መጽሓፍ ምሳሌ

1  2  3  4  5  6  7  8  9
10  11  12 13  14  15
16  17  18  19  20  21
22  23  24  25  26
27  28  29  30
31

        መ. ምሳሌ ምዕራፍ 1

     ¹ምስላታት ሰሎሞን፡ ወዲ ዳዊት ንጉስ እስራኤል፡

²ጥበብን ተግሳጽን ንምፍላጥ፡ ቃላት ፍልጠት ንምስትውዓል፡ 

³ዘለብም ተግሳጽን ጽድቅን ፍርድን ቅንዕናን ንምቕባል፡ 

⁴ነቶም ገርህታትሲ ጥበብ፡ ንመንእሰይ ድማ ፍልጠትን ጥንቃቐን ንምሃብ እዩ። 

^5-6እቲ ጠቢብ ንምሳሌን ትርጓሜን ዘረባ ጠቢባንን ዓሚቝ ሓሳባቶምን ከስተውዕልሲ፡ ነዚ ይስማዕ ፍልጠቱውን ይወስኽ፡ እቲ ለባም ከኣ ምኽሪ የጥሪ። 

     ⁷ፍርሃት እግዚኣብሄር ንጥበብ መጀመርያኣ እዩ፡ ዓያሱ ንጥበብን ትምህርትን ይንዕቅዎ። 

^8-9ወደየ፡ እዚ ንርእስኻ ዘውዲ ጸጋ፡ ንኽሳድካ ከኣ ስልማት ድሪ እዩ እሞ፡ ንተግሳጽ ኣቦኻ ስምዓዮ፡ ንትምህርቲ ወላዲትካ ድማ ኣይትሕደጎ። 

¹⁰ወደየ፡ ሓጥኣን እንተ ሓባበሉኻ፡ ሕራይ ኣይትበሎም። 

¹¹ንሳቶም እንተ በሉ፡ ምሳና ንዓ፡ ደም ከነፍስስሲ ነድቢ፡ ነቲ ንጹህ ብዘይ ምኽንያት መጻወድያ ነጻውደሉ፡ 

¹²ጠሪሶም ናብ ጕድጓድ ከም ዝወርዱ፡ ብህይወቶም ከለዉ ከም ሲኦል ኴንና ንውሓጦም። 

¹³ክቡር ገንዘብ ዘበለ ኽንረክብ፡ ነባይትና በቲ ዝዘመትናዮ ኽንመልኦ ኢና። 

¹⁴ዕጫኻ ምሳና ኣውድቕ፡ ናይ ኵልና ማሕፉዳ ብሓደ ይኹን፡ እንተ በሉ፡ 

^15-16ወደየ፡ ኣእጋሮምሲ ናብ ክፉእ ይጐያ፡ ንምፍሳስ ደም ይቕልጥፋ እየን እሞ፡ መኻይዲ መገዶም ኣይትኹን፡ እግርኻስ ካብ መገዶም ደኣ ኸልክል። 

¹⁷መፈንጠራ ኣብ ቅድሚ ኣዒንቲ ዅለን እተን ኣኽናፍ ዘለወን ብኸንቱ ይጻወድ። 

¹⁸ንሳቶም ግና ንብገዛእ ደሞም የድብዩሉ፡ ንብገዛእ ነፍሶም ከኣ ውዲት ይገብሩሉ። 

¹⁹መገዲ ነፍሲ ወከፍ ንህርፋን ረብሓ እተዋህበ ከምዚ እዩ፡ ንሳ ንነፍሲ ዋናኣ ተጥፍኣ። 

     ²⁰ጥበብ ኣብ ወጻኢ ትጭድር፡ ኣብ ኣደባባያት ድምጻ ተስምዕ። 

²¹ጫውጫው ኣብ ዘለዎ ጐደና ትጽውዕ፡ ኣብ ኣፍ ደጌታት፡ ኣብ ከተማ፡ ቃላት ትዛረብ፡ 

²²ኣቱም ዓያሱ፡ ክሳዕ መኣዝከ ዕሽነት ክትፈትዉ ኢኹም፧ መላገጽቲ ኸኣ ክሳዕ መኣዝ ላግጺ ባህ ክብሎም፡ደናቝርቲውን ፍልጠት ክጸልኡ እዮም፡

²³ናብ ተግሳጸይ ተመለሱ፡ እንሆ፡ መንፈሰይ ከፈልፍለልኩም ቃላተይ ከፍልጠኩም እየ። 

²⁴ጸዊዐስ እምቢ ስለ ዝበልኩም፡ ኢደይ ዘርጊሐውን ዘስተብሃለ ስለ ዘየልቦ፡ 

²⁵ኣረ ምኽረይ ዘበለ ደኣ ኣበኹም፡ ተግሳጸይ ከኣ ኣተቐበልኩምን፡

^26-27ኣነውን፡ እቲ እትፍፈህዎ ክምጽእ ከሎ፡ እቲ ኣትፈርህዎ ከም ህቦብላ ኽመጽእ፡ መከራ ከም ሾምቦባ ዀይኑ ኽበጽሓኩም፡ ጸበባን ጭንቀትን ክወርደኩም ከሎ፡ ብመከራኹም ክስሕቕ እየ፡ ኣነ ከባጭወልኩም እየ። 

²⁸ሽዑ ናባይ ክምህለሉ እዮም፡ ኣነ ግና ኣይክመልሰሎምን እየ፡ ኣንጊሆም ክደልዩኒ፡ ግናኸ ኣይክረኽቡንን እዮም። 

²⁹ፍልጠት ስለ ዝጸልኡ፡ ፍርሃት እግዚኣብሄር ስለ ዘይመረጹ፡ 

³⁰ምኽረይ ስለ ዘይፈተዉ፡ ንዅሉ ተግሳጸይ ስለ ዝነዓቕዎ፡ 

³¹ፍረ መገዶም ክበልዑ፡ ካብቲ ምኽሮም ከኣ ክጸግቡ እዮም። 

³²እወ፡ ነቶም ዓያሱ ዕልወቶም ክቐትሎም፡ ነቶም ደናቝርቲ ከኣ እቲ ሸለል ምባሎም ከጥፍኦም እዩ። 

³³እቲ ዝሰምዓኒ ግና ብደሓን ክነብር፡ ንኽፉእ ከይፈርህ ከኣ ክሃድእ እዩ።

        መ. ምሳሌ  ምዕራፍ 2            

     ^1-2ወደየ፡ እዝንኻ፡ ናብ ጥበብ ምእንቲ ከቕልብ፡ ልብኻውን ናብ ምስትውዓል ምእንቲ ኽደንን ኢልካስ፡ ንቓላተይ እንተ ተቐበልካዮ፡ ንትእዛዛተይ ከኣ ምሳኻ እንተ ኣርነብካዮ፡ 

³እወ፡ ነእምሮ እንተ ጸዋዕካያ፡ ንምስትውዓል ከኣ እንተ ኣድሄኻያ፡ 

⁴ከም ንብሩር ጌርካ እንተ ደሌኻያ፡ ከም ንሕቡእ መዝገብ ጌርካ ከኣ ሃለው እንተ በልካያ፡ 

⁵ሽዑ ንፍርሃት እግዚኣብሄር ከተስተውዕሎ፡ ንምፍላጥ ኣምላኽ ከኣ ክትረኽቦ ኢኻ። 

⁶እግዚኣብሄር ጥበብ ይህብ እዩ እሞ፡ ፍልጠትን ምስትውዓልን ካብ ኣፉ እየን ዝወጻ። 

^7-8ንመገዲ ቕንዕና ኸዕቍባ፡ ንመገዲ እቶም ቅዱሳኑ ከኣ ክሕልዋስ፡ ነቶም ቅኑዓት ደሓን ይእርንበሎም፡ ብዘይ ጽያፍ ንዝመላለሱ ኸኣ ዋልታኦም እዩ። 

⁹ሽዑ ጽድቅን ፍርድን ቅንዕናን፡ አረ ዅሉ ሰናይ መገዲ ኽተስተውዕል ኢኻ። 

^{10 –} ጥበብ ናብ ልብኻ ኽትኣቱ እያ፡ ፍልጠት ከኣ ንነፍስኻ ባህ ከብላ እዩ እሞ፡ 

^11-12ካብ ክፉእ መገዲ፡ ካብቶም ቄናን ዝዛረቡ ሰባት ከተናግፈካስ፡ ምኽሪ ኽትሕልወካ፡ ምስትውዓል ከኣ ከተዕቍበካ እያ። 

¹³ንሳቶም ብመገዲ ጸልማት ምእንቲ ኽመላለሱስ፡ ንመገዲ ቕንዕና ይሓድግዋ፡ 

¹⁴ንሳቶም ክፉእ ብምግባር ይሕጐሱ፡ ብቔናን ነገርውን ባህ ይብሎም። 

¹⁵ንሳቶም ኣብ መገድታቶም ይጠዋውዩ፡ ቄናን መገድታት ከኣ ይኽተሉ። 

^16-17ካብታ ንፈታዊ ንእስነታ ዝሓደገቶ፡ ንኪዳን ኣምላኻውን ዝረስዓቶ ዘማዊት ሰበይቲ፡ ካብታ ልዙብ ዝቓላ ኣመንዝራ ከተናግፈካ እያ። 

¹⁸ቤታ ናብ ሞት፡ መገዳ ከኣ ናብ ምዉታት ዘንቈልቍል እዩ እሞ፡ 

¹⁹ካብቶም ናብኣ ዝኣትዉ ሓደ እኳ ዝምለስ የልቦን፡ ንመገዲ ህይወትውን ኣይረኽብዋን እዮም። 

^20-21እቶም ቅኑዓት ኣብ ምድሪ እዮም ዝነብሩ፡ እቶም ፍጹማት ከኣ ኣባ እዮም ዝተርፉ፡ እምብኣርሲ ንስኻ ኣብታ መገዲ ሰናያት ተመላለስ፡ ንመገዲ ጻድቃንውን ሓልዋ። 

²²ረሲኣን ግና ካብ ምድር ኽጸንቱ፡ እቶም ጠለምቲ ከኣ ካብኣ ኽምንቁሱ እዮም።

        መ. ምሳሌ  ምዕራፍ 3            

     ^1-2ወደየ፡ ምንዋሕ መዓልትታትን ዓመታት ህይወትን ሰላምን ክውሰኸልካ እዩ እሞ፡ ንሕገይ ኣይትረስዓዮ፡ ልብኻውን ንትእዛዛተይ ይሓልወን። 

³ሕያውነትን ሓቅን ካባኻ ኣይፈለያ፡ ኣብ ክሳድካ እሰረን፡ ኣብ ጽላት ልብኻውን ጽሓፈን። 

⁴ ሽዑ ኣብ ቅድሚ ኣምላኽን ሰብን ሞገስን ጽቡቕ ልቦናን ክትረክብ ኢኻ። 

⁵ብምሉእ ልብኻ ብእግዚኣብሄር ተኣመን፡ ኣብ ልቦናኻ ኣይትጸጋዕ። 

⁶ኣብ ኵሉ መገድኻ ንእኡ ሕሰብ፡ ንሱ ከኣ ኣኻይዳኻ ከቕንዕ እዩ። 

⁷ባዕለይ እፈልጥ ኣይትበል፡ ንእግዚኣብሄር ፍራህ፡ ካብ ክፉእ ከኣ ርሓቕ። 

⁸እዚ ንሕምብርትኻ ፈውሲ ነዕጽምትኻውን ኣንጕዕ ክዀነካ እዩ። 

⁹ብጥሪትካን ብዅሉ በዅሪ ፍርያትካን፡ንእግዚኣብሄር ኣኽብሮ። 

¹⁰ሽዑ ቆፋፉኻ ብብዝሒ ኽመልእ፡ መጽመቝኻ ከኣ ብዀልዒ ወይኒ ክቕጸጽ እዩ፡ 

     ^11-12ወደየ፡ ከምቲ ኣቦ ንዘፍቀሮ ውሉዱ ይቐጽዖ፡ ከምኡ ከኣ እግዚኣብሄር ንዘፍቀሮ ይቐጽዖ እዩ እሞ፡ ተግሳጽ እግዚኣብሄር ኣይትንዓቕ፡  እንተ  ቐጽዓካ  ከኣ  ኣይትመረር። 

¹³እቲ ጥበብ ዝረክብ፡ ኣእምሮውን ዘጥሪ ሰብ ብጹእ እዩ። 

¹⁴ከምይሲ ኻብቲ ብሩር ዘጥሪ ንእኣ ዘጥሪ ይበልጽ፡ እቲ ብእኣ ዝርከብ ረብሓ ከኣ ካብ ጽሩይ ወርቂ ይበልጽ እዩ። 

¹⁵ ካብ ዕንቍ ትኸብር፡ ኵሉ እቲ ሃረር እትብሎ ነገር እኳ ኣይመዓራረያን። 

¹⁶ ኣብ የማና ነዊሕ ዕድመ፡ ኣብ ጸጋማ ከኣ ሃብትን ክብረትን ኣለዋ። 

¹⁷ ጐደናኣ ጐደና ሓጐስ፡ ብዘሎ መገዳ ከኣ ሰላም እዩ። 

¹⁸ንዝሕዝዋስ ኦም ህይወት እያ፡ ኣጽኒዑ ዝሕዛ ዘበለ ከኣ ብጹእ እዩ። 

¹⁹እግዚኣብሄር ንምድሪ ብጥበብ ሰረታ፡ ንሰማያት ከኣ ብምስትውዓል ኣጽንዖ። 

²⁰ብፍልጠቱ መዓሙቝ ይኸፍት፡ ደበናታትውን ኣውሊ የንተብጥብ። 

     ²¹ወደየ፡ ነዚአን ካብ ዓንይኻ ኣይትፍለየን፡ ንጥበብን ንምኽርን ተጠንቂቕካ ሓዘን። 

^{22 –} ንሳተን ንነፍስኻ ህይወት፡ ንኽሳድካ ከኣ ስልማት ክዀናኻ እየን። 

²³ ሽዑ ሃዲእካ መገድኻ ኽትከይድ፡ እግርኻውን ኣይክትዕንቀፍን ኢኻ።

²⁴እንተ ተገምሰስካ ኣይክትብህርርን ኢኻ፡ በጥ ክትብል ኢኻ፡ ድቃስካውን ክጥዕም እዩ። 

^25-26እግዚኣብሄር እምንቶኻ ክኸውን፡ ኣእጋርካ ከይፍንጠራ ከኣ ክሕልወን እዩ እሞ፡ ካብቲ ናይ ድንገት ሰምባድ፡ ካብቲ ንረሲኣን ዝመጾም ጥፍኣት ኣይትሸበር። 

²⁷ኢድካ ኽትገብረሉ ዝከኣላ እንተ ዀይኑስ፡ ነቲ ዝግብኦ ሰብ ሰናይ ኣይትኽልኣዮ። 

²⁸ዝወሃብ ከሎካስ፡ ንብጻይካ፡ ኪድ እሞ ተመለስ፡ ጽባሕ ክህበካ እየ ኣይትበሎ። 

²⁹ንብጻይካ፡ ኣሚኑካ ምሳኻ ኽነብር ከሎ፡ ኣይትተናዀለሉ። 

³⁰ምስ ዘይበደለካ ሰብ ብኸምኡ ኣይትበኣስ። 

³¹ብገፋዒ ሰብ ኣይትቕናእ፡ መገዱ ዘበለ ዅሉ ኣይትምረጽ። 

³²እግዚኣብሄር ነቲ ቔናን ይፍንፍኖ፡ ምስጢሩ ግና ምስቶም ቅኑዓት እዩ። 

³³ መርገም እግዚኣብሄር ኣብ ቤት ረሲእ እዩ፡ ንማሕደር ጻድቃን ግና ይባርኾ። 

³⁴ ንሱ ንመላገጽቲ የላግጸሎም፡ ንትሑታት ግና ጸጋ ይህቦም። 

³⁵ ጠቢባን ክብሪ ኽወርሱ እዮም፡ ዓያሱ ግና ልዕልናኦም ውርደት እዩ።

        መ. ምሳሌ  ምዕራፍ 4            

     ¹ኣቱም ቈልዑ፡ ተግሳጽ ወላዲ ስምዑ፡ ልቦና ኽትፈልጡ ኸኣ ኣቕልቡ። 

²ጽቡቕ ትምህርቲ እህበኩም ኣሎኹ እሞ፡ ንሕገይ ኣይትሕደግዎ። 

³ኣነውን ነቦይ ውሉድ፡ ንወላዲተይ ከኣ ሕጻንን ሓደ ጥራይን ነበርኩ። 

⁴ሽዑ ኣስተምሃረኒ በለኒውን፡ ልብኻ ንቓላተይ ኣጽኒዑ ይሓዞ። ንትእዛዛተይ ሓልዎ እሞ፡ ብህይወት ክትነብር ኢኻ። 

⁵ንጥበብ ኣጥርያ፡ ንምስትውዓል ኣጥርያ፡ ንቓል ኣፈይ ኣይትረስዓዮ፡ ካብኡውን ኣይትዘምብል። 

⁶ኣይትሕደጋ፡ ንሳ ኸኣ ክትሕልወካ፡ ኣፍቅራ፡ ንሳውን ክተዕቍበካ እያ። 

⁷ጥበብ ኣውራ ነገር እያ እሞ፡ ንጥበብ ኣጥርያ፡ እወ፡ ብዅሉ ጥሪትካ ንምስትውዓል ኣጥርያ፡ 

⁸ልዕል ኣብላ፡ ንሳውን ክብ ክተብለካ እያ። እንተ ሓቔፍካያ፡ ከተኽብረካ እያ። 

⁹ኣብ ርእስኻ ዘውዲ ጸጋ ኽትደፍኣልካ፡ ዝጸበቐ ኣኽሊል ከኣ ክትህበካ እያ። 

     ¹⁰ወደየ፡ ስማዕ፡ቃለይ ድማ ተቐበል፡ ዓመታት ዕድሜኻውን ክበዝሕ እዩ። 

¹¹ብጐደና ጥበብ መሃርኩኻ፡ ብመገዲ ቕንዕና መራሕኩኻ። 

¹²ክትከይድ ከሎኻ፡ ስጕምትኻ ኣይክሓጽርን፡ እንተ ጐየኻውን ኣይክትዕንቀፍን ኢካ። 

¹³ህይወትካ እያ እሞ፡ ንተግሳጽ ሓዛ፡ ኣይትሕደጋ፡ ሓልዋውን፡ 

¹⁴ናብ መገዲ ረሲኣን ኣይትእቶ፡ ብጐደና እቶም እኩያት ከኣ ኣይትኺድ። 

¹⁵ካብኣ ርሓቕ፡ ብእኣ ኣይትሕለፍ፡ ኣግልሰላ፡ ክንየዋ ኺድ። 

^16-17እንጌራ ረሲእነት ይበልዑ፡ ወይኒ ዓመጻ ድማ ይሰትዩ፡ እከይ ከይገብሩ ኸኣ ኣይድቅሱን እዮም እሞ፡ ገለ እንተ ዘየውደቑስ፡ ድቃስ ካብኦም ይበርር። 

¹⁸መገዲ ጻድቃን ግና ከም ብርሃን ወገግታ እያ፡ ፍጹም መዓልቲ ኽሳዕ ዝኸውን ከኣ፡ እናወሰኸት ትበርህ። 

¹⁹መገዲ ረሲኣን ግና ከም ጸልማት እያ፡ እንታይ ከም ዝዕንቅፎም ኣይፈልጡን። 

     ²⁰ወደየ፡ ናብ ቃላተይ ኣቕልብ፡ እዝንኻ ናብ ዘረባይ ኣድንን። 

^21-22ንዝረኽበን ህይወቱ፡ ንብዘሎ ስጋኡ ኸኣ ፈውሱ እየን እሞ፡ ካብ ቅድሚ ዓይንኻ ኣይተርሕቀን፡ ኣብ ውሽጢ ልብኻ ዕቘረን። 

²³ህይወት ካብኡ እያ እትፍልፍል እሞ፡ ልዕሊ ዅሉ ንልብኻ ሓልዎ። 

²⁴ንለግመኛ ኣፍ ካባኻ ደርብዮ፡ ንውስልትና ኸናፍር ከኣ ካባኻ ኣርሕቆ። 

²⁵ኣዒንትኻ ቀኒዐን ይርኣያ፡ ቈላሕታኻውን ንቕድሚት ይጠምታ። 

²⁶ንመገዲ እግርኻ ኣቕንዓያ፡ ኵሉ ጐደናኻ ምዱብ ይኹን። 

²⁷ንየማን ወይስ ንጸጋም ኣይተግልስ፡ ንእግርካ፧ ኻብ እከይ ኣርሕቆ።

        መ. ምሳሌ  ምዕራፍ 5            

     ^1-2-ወደየ፡ ምኽሪ ከተጽንዕ፡ ከናፍርካውን ፍልጠት ምእንቲ ኽሕዛስ፡ ናብ ጥበበይ ኣቕልብ፡ ናብ ምስትውዓለይውን እዝንኻ ኣድንን። 

³ከናፍር ኣመንዝራ ሰበይትስ መዓር ወለላ የንጠብጥብ፡ ኣፋ ኸኣ ካብ ዘይቲ ትልስልስ። 

⁴መወዳእታኣ ግና ከም ዕረ መሪር፡ ክልተ ኣፍ ከም ዘለዎ ሴፍ ከኣ በሊሕ እዩ። 

⁵ኣእጋራ ናብ ሞት ይወርዳ፡ ስጕምታ ናብ ሲኦል ይበጽሕ። 

⁶ንመገዲ ህይወት ከይትረኽባስ፡ በካይዳኣ ዀብላሊት እያ እሞ፡ ኣይትፈልጥን እያ። 

     ⁷ኣቱም ደቀየ፡ እምበኣርሲ ሕጂ ስምዑኒ፡ ካብ ቃላት ኣፈይ ከኣ ኣይትርሓቑ። 

⁸መገድኻ ኻብኣ ኣርሕቕ፡ ናብ ደገ ቤታ ኣይትቕረብ። 

⁹ክብርኻ ንኻልእ፡ ዕድሚኻውን ንጨካን ከይትህብ፡ 

¹⁰ብጥሪትካ ኻልኦት ከይጸግቡ፡ ፍረ ድኻምካውን ናብ ቤት ካልእ ከይሓልፍ፡ 

¹¹ኣብ መጨረስታ ነፍሰ ስጋኻ ምስ ተወድአ፡ ከይተልቅስ እሞ፡ 

^12-14ከመይከ  ንተግሳጽ ጸላእክዎ፡  ልበይሲ  ንዘለፋ  ነዓቖ፡  ስለምንታይከ  ድምጺ  መምህራነይ  ዘይሰማዕኩ፡  ናብቶም ዘስተምህሩንስ  ኣእዛነይ  ዘየድነንኩ፡ ኣብ  ማእከል  ማሕበርን  ጉባኤን  ናብ ክፉእ  ዘበለ  ኵሉ  ንምብጻሕ  ቅሩብ ተሪፉኒ ነይሩ፡  ከይትብልሲ፡  መገድኻ  ካብኣ  ኣርሕቖ። 

     ¹⁵ማይሲ ኻብ ዔላኻ ደኣ፡ ካብቲ ዝፍልፍል ምንጭኻ ደኣ ስተ። 

¹⁶ምንጭኻ ንወጻኢ፡ ርባታትካስ ናብ ኣደባባያትዶ ይፈስስ ኣሎ እዩ፡ 

¹⁷ንኣኻ ጥራይ ይኹን፡ ጓኖት ኣይካፈሉኻ። 

¹⁸ምንጭኻ ይባርኽ፡ በታ ሰበይቲ ንእስነትካ ባህ ይበልካ። 

¹⁹ፍትውቲ ዋላ፡ ጽብቕቲ ሜዳቝ ትዅነልካ፡ እቲ ኣጥባታ ዅሉ ግዜ የዕግብካ፡ ብፍቕራውን ወርትግ ተመሰጥ። 

²⁰ኣታ ወደይ፡ ስለምንታይ ጓና ሰበይቲ እተፍቅር፡ሰበይቲ እማትካስ እትሓቍፍ፡ 

²¹እምብኣርሲ መገዲ ነፍሲ ወከፍ ሰብ ኣብ ቅድሚ ኣዒንቲ እግዚኣብሄር እዩ፡ ነኻይዳኡውን ንሱ ይምልከቶ። 

²²እቲ ረሲእ ብኣበሳኡ ይሕንኰል፡ በግማድ ሓጢኣቱ ኸኣ ይእሰር። 

²³ንሱ ሰኣን ተግሳጽ ይመውት፡ በቲ ዓብዪ ድንቍርናኡ ኸኣ ይጋገ።

        መ. ምሳሌ  ምዕራፍ 6            

     ¹ወደየ፡ ንብጻይካ እንተ ተውሓስካ፡ ስለ ጓና ኸኣ ኢድ እንተ ጠቓዕካ፡ 

²ብቓላት ኣፍካ ተትሓዝካ፡ ብቓላት ኣፍካ ተፈንጠርካ። 

³ወደየ፡ ኣብ ኢድ ብጻይካ ኻብ ወደቕካስ፡ ምእንቲ ኽትግርነ፡ ከምዚ ግበር፡ ኪድ እሞ ተደፊእካ ንብጻይካ ነዝንዞ፡ 

⁴ንዓይንኻ ድቃስ፡ ንቕርኒብካ ትኽስታ ኣይትሃብ፡ 

⁵ከምቲ ሜዳቝ ካብ ኢድ ሃዳኒ ዑፍውን ካብ ኢድ ኣፈንጣሪ ዘምልጣ፡ ንርእስኻ ኣድሕን። 

     ⁶ኣታ ሃካይ፡ ናብ ጻጸ ኺድ፡ መገዱ ተመልከት እሞ ጠቢብ ኩን። 

⁷ወይ ሓለቓ ወይ ኣዛዚ የብሉን፡ 

⁸ግናኸ ቀለቡ ብሓጋይ የዳሉ፡ ምግቡ ድማ ብቐውዒ ይእክብ። 

⁹ኣታ ሃካይ፡ ክሳዕ መኣዝ ኢኻ በጥ እትብል፡ መኣዝከ ኢኻ ኻብ ድቃስካ እትትንስእ፡ 

¹⁰ሓንሳእ ምድቃስ፡ ሃንሳእ ከኣ ምትካስ፡ ሓንሳእ ምእንቲ ኽትዓርፍውን ኣእዳውካ ምምስቓል፡ 

¹¹ድሕርዚ ኸኣ ድኽነትካ ኸም ፈጣን መንገደኛ፡ ስእነትካ ድማ ከም ኣጽዋር እተዓጥቀ ሰብኣይ ይመጸካ። 

     ¹²ሕሱም ሰብ፡ ዓመጸኛ ሰብ፡ ብወስላታ ኣፍ ይመላለስ፡ 

¹³ብዓይኑ ይጠቅስ፡ ብእግሩ ይዛረብ፡ በጻብዑ የመልክት። 

¹⁴ተንኰል ኣብ ልቡ እዩ፡ ኵሉ ግዜ እከይ ይፍሕስ፡ ባእሲ ድማ ይዘርእ። 

¹⁵ስለዚ ጥፍኣት ብድንገት ይመጽእ፡ ብቕጽበት ዓይኒ ይጭፍለቕ፡ ፈውሲውን ከቶ የብሉን። 

     ¹⁶እግዚኣብሄር ዝጸልአን ሹድሽተ ነገር ኣየን፡ አረ ነፍሱ እምብዛ እትፍንፍነንሲ ሾብዓተ እየን፡ 

¹⁷ትዕቢተኛ ዓይኒ፡ ሓሳዊት መልሓስ፡ ንጹህ ደም ዘፍስሳ ኣእዳው፡ 

¹⁸እኩይ ምኽሪ እትፍሕስ ልቢ፡ እኩይ ነገር ናብ ዘበለ ዝቕልጥፋ ኣእጋር፡ 

¹⁹ሓሶት ዝዛረብ ሓሳዊ ምስክር፡ ኣብ መንጎ ኣሕዋት ባእሲ ዝዘርእ። 

     ²⁰ወደየ፡ ንትእዛዝ ኣቦኻ ሓልዎ፡ ንሕጊ ወላዲትካ ኸኣ ኣይትሕደጎ፡

²¹ኩሉ ግዜ ኣብ ልብኻ እሰሮ፡ ኣብ ክሳድካ ዉን ኣጥቢቕካ ሓዞ።

^22-24ካብታ እክይቲ ሰበይቲ፡ ካብታ ልዙብ ዝመልሓሳ ኣመንዝራ ኽባልሃካስ፡ ትእዛዝ መብራህቲ እዩ፡ ሕጊ ኸኣ ብርሃን እዩ፡ ተግሳጽ ትምህርቲ ድማ መገዲ ህይወት እዩ እሞ፡ እንተ ኼድካ፡ ይመርሓካ፡ በጥ እንተ በልካ፡ ይሕልወካ፡ እንተ ነቓሕካ ድማ፡ የዛርበካ። 

^25-26ብሰሪ ኣመንዝራ ሰበይቲ ሓንቲ እንጌራ ኽሳዕ እትተርፎ ይኸውን፡ ዘማዊት ከኣ ክብርቲ ነፍሲ እያ እትሃድን እሞ፡ ንጽባቔኣ ብልብኻ ኣይትመነዮ፡ ብቘላሕታኣውን ኣይትዘርፍካ። 

²⁷ሰብዶ ሓዊ ሓቝፉስ ክዳኑ ኣይነድድን እዩ፡ 

²⁸ኣብ ልዕሊ ጓህሪ ከይዱኸ፡ ኣእጋሩዶ ኣይሓርርን እዩ 

²⁹ናብ ሰበይቲ ብጻዩ ዝኣቱ ኸኣ ከምኡ እዩ፡ ዝትንክያ ከይተቐጽዐ ከቶ ኣይተርፍን። 

³⁰ሰራቒ ጠምዩ ኽዕንገል ኢሉ እንተ ሰረቐ፡ ሰብ ኣይንዓቆን እዩ፡ 

³¹እንተ ተታሕዘ ኸኣ፡ ሾብዓተ ኢድ ይዓዲ፡ ኣብ ቤቱ ዘሎ ኵሉውን ይህብ። 

³²እቲ ምስ ሰበይቲ ዝምንዝር ግና ልቢ የብሉን፡ ንነፍሱ ኸጥፍኣ ዝደሊ እዩ ከምዚ ዝገብር። 

³³ቍስልን ነውርን ይረኽቦ፡ ጸርፉ ከቶ ኣይድምሰስን። 

³⁴ቅንኢ ንሰብኣይ ብቝጥዓ የንድዶ እዩ እሞ፡ ብመዓልቲ ሕነ ኣይድንግጽን እዩ። 

³⁵ግዲ ኻሕሳ የብሉን፡ ኣብዚሕካ ውህበት እንተ ኣቕረብካሉ እኳ፡ ኣይቅበልን እዩ።

        መ. ምሳሌ  ምዕራፍ 7            

     ¹ወደየ፡ ንቓላተይ ሓልዎ፡ ንትእዛዛተይውን ኣባኻ ዑቘሮ።

²ንትእዛዛተይ ሓልዎ እሞ ብህይወት ክትነብር ኢኻ፡ ንሕገይውን ከም መርዓት ዓይንኻ ሓልዎ። 

³ናብ ኣጸብዕካ እሰሮ፡ ኣብ ሰሌዳ ልብኻውን ጽሓፎ። 

^4-5ካብ ሰበይቲ እማትካ፡ ካብታ ልዙብ ቃላት እትዛረብ ጓና ሰበይቲ ምእንቲ ኽባልሃካስ፡ ንጥበብ፡ ሓብተይ ኢኺ፡ በላ። ነእምሮ ኸኣ ኣማኒተይ ኢልካ ስመያ። 

     ⁶ኣብ መስኰት ቤተይ ኰይነ፡ ብዓይነ ርግቢ ኣሳጊረ ኣማዕዶኹ፡ 

⁷ኣብ ማእከል እቶም ዓያሱ ኰይነ፡ ተመልከትኩ እሞ፡ ኣብ ማእከል እቶም መንእሰይ ልቢ ዘይብሉ ጐበዝ ርኤኹ። 

⁸ንሱ በደባባይ ኣብ ጥቓ ቐራና መገዲ ሓሊፉ፡ ናብታ ናብ ቤታ እትወስድ መገዲ ኣበለ። 

⁹ምድሪ መስዩ፡ ጽልግልግታ ዀይኑ፡ ጸሊም ለይቲ፡ ድቕድቕ ጸልማት ነበረ። 

¹⁰እንሆ ኸኣ፡ ሰበይቲ ኽትቅበሎ ወጸት፡ ክዳን ምንዝርና እተኸደነት፡ ልባ ተንኰለኛ፡ 

¹¹ንሳ ህውከተናን ቀላልን እያ፡ ኣእጋራ ኣብ ቤታ ኣይዓርፉን፡ 

¹²ሓንሳእ ኣብ ኣደባብይ፡ ሓንሳእ ኣብ ዕዳጋ፡ ሓንሳእ ከኣ ኣብ ቀራና መገዲ ኣድብያ ትጸንሕ። 

¹³ሓዘቶ ሰዓመቶውን፡ ዓይነ ዓይኑ እናጠመተት ከኣ በለቶ፡ 

¹⁴መስዋእቲ ምስጋና ከቕርብ ተመባጺዐ ነይረ እየ እሞ፡ ሎሚ መብጽዓይ ፈጸምኩ፡ 

¹⁵ስለዚ ኸኣ ክቕበለካን ገጽካ ኽደልን መጻእኩ እሞ ረኸብኩኻ። 

¹⁶ኣብ ልዕሊ ዓራተይ ፍራሽ፡ ብፈትሊ ግብጺ እተጠልፈ ዝንጕርጕር ምንጻፍ ኣንጺፈሉ ኣሎኹ። 

¹⁷ነቲ ምድቃሰይ ከርበ፡ ዓልወ፡ ቀረፋ ነጺገሉ ኣሎኹ። 

^18-20ሰብኣየይ ከረጺት ገንዘብ ኣብ ኢዱ ሒዙ፡ ነዊሕ መገሻ ከይዱ እዩ፡ ኣብ ገዛ የሎን። ወርሒ ፍጹም ብርሃን ምስ ኰነት እዩ ንገዛኡ ዝምለስ እሞ፡ ንዓ፡ ክሳዕ ዝወግሕ ብፍትወት ንርወ፡ ብናይ ፍትወት ምትሕቝቛፍ ባህ ይበለና። 

²¹ብብዙሕ ጥበራ ኣስሓተቶ፡ ብልዙብ ከናፍራ ስሓበቶ። 

^22-23ከምቲ ናብ ማሕረዲ ዝዅብኰብ ብዕራይ፡ ከምቲ ዓሻ፡ ፍላጻ ንኸብዱ ኽሳዕ ዝስንጥቖ፡ ብቕጽዓት ዝእሰር፡ ከምቲ ንጥፍኣት ነፍሱ ምዃኑ ከይፈለጠ፡ ናብ መጻወድያ ዝሸብብ ዑፍ ኰይኑ ብኡብኡ ሰዓበ። 

     ²⁴እምብኣርሲ ደቀየ፡ ስምዑኒ፡ ናብ ዘረባ ኣፈይ ከኣ ኣቕልቡ። 

^25-27ንሳ ንብዙሓት ወጊኣ ኣውዲቓቶም፡ ዝቐተለቶም ከኣ መሊኦም እዮም፡ ቤታ ናብ ውሻጠ ሞት ዘውርድ፡ መገዲ ሲኦል እዩ እሞ፡ ንልብኻ ናብ ጐደናኣ ኣቢልካ ኣይተዘምብሎ፡ ብመገዳ ኣይትስሓት።

        መ. ምሳሌ  ምዕራፍ 8            

     ¹ጥበብ ኣይትጭድርንዶ እያ ዘላ፡ኣእምሮውን ድምጻዶ ኣይተስምዕን እያ፧ 

²ኣብ ጫፍ በረኽትን፡ ኣብ ቀራናታት መገድን ደው ኢላ፡ 

³ኣብ ጥቓ ደጌታት፡ ኣብ መእተው ከተማ፡ ኣብ ኣፍ ደጌታት ትጭድር፡ 

⁴ኣቱም ሰባት፡ ንኣኻትኩም እጽውዓኹም ኣሎኹ፡ ንደቂ ሰብ እየ ዘድህዮም ዘሎኹ። 

⁵ኣቱም ዓያሱ፡ ኣእምሮ ተምሃሩ፡ ኣቱም ደናቝርቲ ኸኣ፡ ለብሙ። 

^6-7ክቡር ነገር ክዛረብ እየ፡ ከናፍረይ ከኣ ቅኑዕ ዘበለ ንምዝራብ ክኸፍት እየ፡ ኣፈይ ሓቂ ኽዛረብ እዩ፡ ንኸናፍረይ ከኣ ረሲእነትሲ ጽያፈን እዩ እሞ፡ ስምዑ። 

⁸ኵለን ቃላት ኣፈይ ብጽድቂ እየን፡ ኣብአን ጠዋይነትን ልግምን ኣይርከብን። 

⁹ነቲ ኣስተዎዓሊ ኵለን ትኽ ዝበላ እየን፡ ነቶም ፍልጠት ዝረከቡ ኸኣ ቅኑዓት እየን። 

^10-11ጥበብ ካብ ኣዕናቝ ትበልጽ እያ፡ ክቡር ዘበለ ዅሉውን ኣይመዓራረያን እዩ እሞ፡ ካብ ብሩርሲ ተግሳጽ፡ ንፍልጠትውን ካብ ሕሩይ ወርቂ ኣብሊጽኩም ተቐበልዎ። 

     ¹²ኣነ ጥበብ ኣብ ልቦና እነብር፡ ሓሳብ ፍልጠት ድማ እረክብ። 

¹³ንእግዚኣብሄር ምፍራህ ንኽፍኣት ምጽላእ እዩ፡ ኣነውን ትዕቢትን ትምክሕትን ክፉእ ኣካይዳን ቄናን ኣፍን እጸልእ እየ። 

¹⁴ምኽርን ምስላጥን ናተይ እዩ፡ ኣእምሮ ኣነ እየ፡ ስልጣን ናተይ እዩ። 

¹⁵ነገስታት ብኣይ ይነግሱ፡ መሳፍንቲ ብኣይ ገይሮም ጽድቂ ይሕግጉ። 

¹⁶ገዛእትን ከበርቴን ብዘለዉ መኳንንቲ ምድርን ብኣይ ይገዝኡ። 

¹⁷ኣነ ነቶም ዘፍቅሩኒ አፍቅሮም፡ እቶም ኣንጊሆም ዝደልዩኒ ኸኣ ይረኽቡኒ። 

¹⁸ሃብትን ክብረትን ነባሪ ጥሪትን ጽድቅን ኣባይ ኣሎ። 

¹⁹ፍረይ ካብ ወርቂ አረ ኻብ ጽሩይ ወርቂ ደኣ፡ ረብሓይ ከኣ ካብ ሕሩይ ብሩር ይበልጽ። 

^20-21ነቶም ዘፍቅሩኒ ሃብቲ ከውርሶም፡ መዝገቦም ከኣ ምእንቲ ኽመልኣሎምሲ፡ ብጐደና ጽድቂ፡ ብማእከል ቅንዕቲ መገዲ እየ ዝመላለስ። 

     ²²እግዚኣብሄር ኣብ መጀመርታ መገዱ፡ ቅድሚ እቲ ጥንታዊ ግብሩ ተገንዘበኒ። 

²³ካብ ዘለኣለም ካብ መጀመርያ፡ ምድሪ ከይኰነት ቈምኩ። 

²⁴ገና መዓሙቝ ከይኰነ፡ ዓይኒ ማያት ከይወሓዘ፡ ኣነ ተወለድኩ። 

²⁵ኣኽራን ከይተሰረተ፡ ቅድሚ ዀረቢት ኣነ ተወለድኩ። 

²⁶ንምድርን ንጐልጐልን ነቲ መጀመርያ መሬት ዓለምን ከይገበሮ፡ 

²⁷ንሰማያት ከቝማ ኸሎ፡ ኣብኡ ነበርኩ። ንጠፈር ኣብ ልዕሊ መዓሙቝ ክዝርግሖ ኸሎ፡ 

²⁸ንደበና ናብ ላዕሊ ከቝሞ ኸሎ፡ ንምንጭታት መዓሙቝ ከበርትዖ ኸሎ፡ 

²⁹ማያት ካብ ትእዛዙ ኸይሓልፍሲ፡ ንባሕሪ ኽውስኖ ኸሎ፡ መሰረታት ምድሪ ኸመልክት ከሎ፡ 

³⁰ሽዑ ሰራሕተኛ ዀይነ ምስኡ ነበርኩ፡ ብየዕለቱ አሓጕሶ፡ ኵሉ ግዜ ኸኣ ኣብ ቅድሚኡ እሕጐስ ነበርኩ። 

³¹ኣብ ምድሪ ብዝነብር እሕጐስ ነበርኩ፡ ተድላይ ከኣ ብደቂ ሰብ ነበረ። 

     ³²ሕጂ ድማ ደቀየ፡ መገደይ ዝህልዉ ብጹኣን እዮም እሞ፡ ስምዑኒ። 

³³ጠቢባን ኩኑ፡ ተግሳጸይ ስምዑ፡ ኣይትእበይዎ። 

³⁴እቲ ኣብ ልዳት ደጌታተይ እናተጸበየ፡ ብየዕለቱ ደገኡ እናጸንዐ፡ ዝሰምዓኒ ሰብ ብጹእ እዩ። 

³⁵እቲ ዝረኽበንስ ህይወት ይረክብ እዩ እሞ፡ ካብ እግዚኣብሄር ጸጋ ይቕበል። 

³⁶እቲ ኣብ ልዕለይ ዝእብስ ግና ንነፍሱ ይጐድኣ፡ እቶም ዝጸልኡኒ ዅሎምሲ ሞት ይፈትዉ።

        መ. ምሳሌ  ምዕራፍ 9            

     ¹ጥበብ ቤታ ሃነጸት፡ ሾብዓተ ኣዕኑድ ጸረበት። 

²ሰባብሕታ ሓረደት፡ ወይና ዘለለት፡ መኣዳውን ኣሰናደወት። 

³ኣግራዳ ለኣኸት፡ ኣብቲ ኣዝዩ ዝበረኸ ስፍራ ከተማ ዀይና ትጽውዕ ኣላ፡ 

⁴ዘይለበመ እንተሎ፡ ናብዚ ይምጻእ። ነቶም ኣእምሮ ዘይብሎምውን ከምዚ ትብሎም ኣላ፡ 

⁵ንዑ፡ እንጌራይ ብልዑ፡ ዝዘለልክዎ ወይነን ስተዩ። 

⁶ብህይወት ክትነብሩስ ዕሽነት ሕደጉ፡ ብመገዲ ምስትውዓል ከኣ ተመላለሱ። 

⁷ንመላገጺ ዝምዕድ ንርእሱ ጸርፊ ይቕበል፡ ንረሲእ ዝግስጽ ከኣ ነውሪ ይመጾ። 

⁸ምእንቲ ከይጸልኣካስ፡ ንመላገጺ ኣይትገስጾ፡ ንጠቢብ ገስጾ እሞ ከፍቅረካ እዩ። 

⁹ንጠቢብ ትምህርቲ ሃቦ እሞ ወሲኹ ኽጠብብ፡ ንጻድቕ መሃሮ እሞ ፍልጠት ክውስኽ እዩ። 

¹⁰መጀመርታ ጥበብ ንእግዚኣብሄር ምፍራህ እዩ፡ ነቲ ቅዱስ ምፍላጥ ከኣ ምስትውዓል እዩ። 

¹¹ዕለታትካ ብኣይ እየን ዝበዝሓ፡ ዓመታት ዕድሜኻውን ክውሰኻልካ እየን እሞ፡ 

¹²ጥበበኛ እንተ ዀንካ፡ ንርእስኻ ትጠብብ፡ መላገጺ እንተ ዀንካ፡ በይንኻ ኢኻ እትስከሞ፡ ገለ እኳ ኣይትፈልጥ እያ። 

     ¹³ዓሻ ሰበይቲ ህውከተኛ እያ። ዘለባም፡ ገለ እኳ ዘይትፈልጥ እያ። 

^14-16ነቶም ኣቕኒዖም ዝኸዱ ሓለፍቲ መገዲ፡ ዘይለባም እንተሎ ናብዚ የግልስ፡ ኢላ ኽትጽውዖምሲ፡ ኣብ ደገ ቤታን ኣብ በረኻ ስፍራ ከተማን ኣብ መንበር ትቕመጥ። ነቲ ኣእምሮ ዘይብሉ ኸኣ፡ 

¹⁷ንና ስርቂ ማይ ጥዑም እዩ፡ ብሕቡእ ዝብላዕ እንጌራ ኸኣ ባህ የብል እዩ፡ ትብሎ። 

¹⁸ንሱ ግና ምዉታት ኣብኡ ኸም ዘለዉ ዕዱማታውናን መዓሙቝ ሲኦል ከም ዘለዉ ኣይፈልጥን እዩ።

        መ. ምሳሌ  ምዕራፍ 10            

     ¹ምስላታት ሰሎሞን። ጥበበኛ ወዲ ነቦኡ የሓጕስ፡ ዓሻ ወዲ ግና መጕሃይ ኣዲኡ እዩ። 

²መዝገብ ረሲእነት ገለ እኳ ኣይጠቅምን፡ ጽድቂ ግና ካብ ሞት የናግፍ። 

³እግዚኣብሄር ንነፍሲ ጻድቅ ክትጠሚ ኣይሓድጋን፡ ንህርፋን ረሲእን ግና የንኰልልፎ። 

     ⁴ብህክይቲ ኢድ ዝዓዪ ይደኪ ኢድ ትጕሃት ግና ተህብትም። 

⁵እቲ ብሓጋይ ዝእክብ ጥበበኛ ወዲ እዩ፡ እቲ ብቐውዒ ዝድቅስ ግና ዘሕስር ወዲ እዩ። 

     ⁶በረኸት ኣብ ልዕሊ ርእሲ ጻድቕ እዩ፡ ኣፍ ረሲኣን ግና ዓመጽ ይኽውል። 

     ⁷መዘከርታ ጻድቕ ንበረኸት እዩ ስም ረሲኣን ግና ይምሽምሽ። 

     ⁸ጠቢብ ዝልቡ ትእዛዛት ይቕበል፡ ዓሻ ዝኸናፍሩ ግና ይወድቕ። 

     ⁹ብንጽህና ዝመላለስ ሃዲኡ ይኸይድ፡ ብጥውጥዋይ መገዲ ዝኸይድ ግና ይቕላዕ። 

     ¹⁰ብዓይኑ ዝጠቅስ መከራ የምጽእ፡ ዓሻ ዝኸናፍሩ ግና ይወድቕ። 

     ¹¹ኣፍ ጻድቕ ናይ ህይወት ፈልፋሊ እዩ፡ ኣፍ ረሲኣን ግና ዓመጽ ይኸውል። 

     ¹²ጽልኢ ቈየቛ የልዕል፡ ፍቕሪ ግና ንዅሉ ኣበሳ ትኽውሎ። 

     ¹³ኣብ ከናፍር ለባም ሰብ ጥበብ ትርከብ፡ በትሪ ግና ንዝባን እቲ ልቢ ዘይብሉ እዩ። 

     ¹⁴ጠቢባንሲ ፍልጠት ይእርንቡ፡ ኣፍ ዓሻ ግና ናብ ጥፍኣት ቀረባ እዩ። 

     ¹⁵ንሃብታም እቲ ሃብቱ ጽኑዕ ከተማኡ እዩ፡ ንድካ ግና እቲ ድኽነቱ ጥፍኣቱ እዩ። 

     ¹⁶ዕዮ ጻድቕ ንህይወት፡ እቶት ረሲእ ግና ንሓጢኣት እዩ። 

     ¹⁷ምዕዶ ዝሕሉ ኣብ መገዲ ህይወት እዩ፡ ተግሳጽ ዝኣቢ ግና ይስሕት። 

     ¹⁸ጽልኢ ዝሓብእ ሓሰውቲ ኸናፍር ኣለዋኦ፡ ሕሜት ዝዝርግሕ ከኣ ዓሻ እዩ። 

     ¹⁹ብዙሕ ዘረባ ኣብ ዘለዎ ኣብኡ ኣበሳ ኣይሰኣኖን፡ ከናፍሩ ዝገትእ ግና ለባም እዩ። 

     ²⁰ልሳን ጻድቕ ሕሩይ ብሩር እዩ፡ ልቢ ረሲኣን ግና ፍረ የብሉን። 

     ²¹ከናፍር ጻድቕ ንብዙሓት ይጓስያ፡ ዓያሱ ግና ስኣን ልቢ እዮም ዝሞቱ። 

     ²²በረኸት እግዚኣብሄር የሃብትም፡ ሽጋርውን ገለ ኣይውስኸሉን። 

     ²³ንዓሻ ኽፉእ ምግባር ቃዛኡ እዩ፡ ጥበብ ከኣ ንለባም ከምኡ እያ። 

     ²⁴ንረሲእ እቲ ዝፈርሆ ነገር ይመጾ፡ ንጻድቃን ግና እተመነይዎ ይወሃቦም። 

     ²⁵ህቦብላ ምስ ዝሓልፍ፡ እቲ ረሲእ የሎን፡ ጻድቕ ግና ንዘለኣለም ዝነብር መሰረት እዩ። 

     ²⁶ከም መጺጽ ንስኒ፡ ከም ትኪ ኸኣ ንዓይኒ፡ ሃካይ ንለኣኽቱ ከምኡ እዩ። 

     ²⁷ንእግዚኣብሄር ምፍራህ ዕድመ የንውሕ፡ ዓመታት ረሲእ ግና ኽሓጽራ እየን። 

     ²⁸ትጽቢት ጻድቃን ደስታ እዩ፡ ተስፋ ረሲኣን ግና ክትጠፍእ እያ። 

     ²⁹መገዲ እግዚኣብሄር ንንጹህ እምባኡ፡ ንገበርቲ እከይ ግና ጥፍኣቶም እያ። 

     ³⁰ጻድቕ ከቶ ኣይናወጽን፡ ረሲኣን ግና ኣብታ ሃገር ኣይነብሩን እዮም። 

     ³¹ኣፍ ጻድቕ ጥበብ የውጽእ፡ ልግመኛ ልሳን ግና ትቝረጽ። 

     ³²ከናፍር ጻድቃን ነቲ ዘሓጕስ ይፈልጣኦ፡ ኣፍ ረሲኣን ግና ልግመኛ እዩ።

        መ. ምሳሌ  ምዕራፍ 11            

     ¹ሓሳዊ ሚዛን ኣብ ቅድሚ እግዚኣብሄር ፍንፉን እዩ፡ ቅኑዕ ሚዛን ግና ባህ የብሎ። 

     ²ትዕቢት እንተ መጸ፡ ውርደት ከኣ ይመጽእ፡ ጥበብ ግና ምስቶም ትሑታት እያ። 

     ³ነቶም ቅኑዓት ንጽህናኦም ይመርሖም፡ ነቶም ጠለምቲ ግና ልግሞም የጥፍኦም። 

⁴ብመዓልቲ ቝጥዓ ሃብቲ ኣይተቅምን፡ ጽድቂ ግና ካብ ሞት የናግፍ። 

⁵ንፍጹም ሰብ እቲ ጽድቁ መገዲ የቕንዓሉ፡ ንረሲእ ግና ረሲእነቱ የውድቖ። 

⁶ነቶም ቅኑዓት ጽድቆም የናግፎም፡ ነቶም ጠለምቲ ግና ክፍኣቶም ይሕዞም። 

⁷ረሲእ እንተ ሞተ፡ ተስፋኡ ይጠፍእ፡ ትጽቢት ክፉኣትውን ይጠፍእ። 

⁸ጻድቕ ካብ ጸበባ ይድሕን፡ ረሲእ ድማ ኣብ ክንዳኡ ይኸውን። 

     ⁹እቲ ግቡዝ ንብጻዩ ብኣፉ የጥፍኦ፡ ጻድቃን ግና ሳላ ፍልጠት ይናገፉ። 

¹⁰ጻድቃን ጽቡቕ እንተ ረኸቡ፡ ከተማ ትሕጐስ፡ ረሲኣን እንተ ጠፍኡ ኸኣ እልልታ ይኸውን። 

¹¹ከተማ ሳላ በረኸት ቅኑዓት ልዕል ትብል፡ ብኣፍ ረሲኣን ግና ትግልበጥ። 

     ¹²እቲ ንብጻዩ ዝንዕቕ ኣእምሮ የብሉን፡ ለባም ግና ስቕ ይብል። 

     ¹³እናሓመየ ዝዘውርሲ ምስጢር ይቐልዕ፡ እቲ እሙን ልቢ ዘለዎ ግና ንነገር ይስውሮ። 

     ¹⁴ጥበበኛ ምምራሕ ኣብ ዘይብሉስ፡ ህዝቢ ይወድቕ፡ ብምብዛሕ መኸርቲ ግና ደሓን ይርከብ። 

     ¹⁵ንጓና ዝወሓስ መከራ ይመጾ፡ ውሕስነት ዝጸልእ ግና ህዱእ እዩ። 

     ¹⁶ውቅብቲ ሰበይቲ ክብረት ትረክብ፡ ሓያላት ከኣ ሃብቲ ይረኽቡ። 

     ¹⁷ርሕሩሕ ሰብ ንነፍሱ ጽቡቕ ይገብረላ፡ ጨካን ግና ንብገዛእ ስጋኡ ይጐድኦ። 

     ¹⁸ረሲእ ዘታልሎ እቶት የእቱ፡ ጽድቂ ዝዘርእ ግና ኡነተኛ ውሬታ ኣለዎ። 

     ¹⁹ጽድቂ ናብ ይህወት ይመርሕ፡ ንኽፉእ ዝስዕብ ግና ሞት የዳሉ። 

     ²⁰እቶም ጠዋይ ዝልቦም ኣብ እግዚኣብሄር ፍንፉናት እዮም፡ እቶም ብመገዶም ፍጹማት ግና የሓጕስዎ። 

     ²¹ኢድ ንኢድ፡ እቲ ሕሱም ከይተቐጽዐ ኣይተርፍን፡ ዘርኢ ጻድቃን ግና ከምልጡ እዮም። 

     ²²መልክዐኛ ሰበይቲ ብዘይ ኣእምሮስ፡ ከም ኣብ ኣፍንጫ ሓሰማ እተሰቝረ ቐለቤት ወርቂ እያ። 

     ²³ድልየት ጻድቃን ሰናይ ጥራይ እዩ፡ ትጽቢት ረሲኣን ግና መዓት እዩ። 

     ²⁴ገለ ይብትን እሞ ይውሰኸሉ። ገለ ኸኣ ብዘይግባእ ይቝጥብ፡ ኣዝዩ ኸኣ ይነዲ። 

     ²⁵ለጋስ ነፍሲ ኣዝያ ትጸግብ፡ እቲ ዘርዊ ኸኣ ንርእሱ ይረዊ። 

     ²⁶ነቲ እኽሉ ዝዓቍር ሰብ ህዝቢ ይረግሞ፡ በረኸት ግና ርእሲ እቲ እኽሉ ዝሸይጥ ይዓስል። 

     ²⁷ሰናይ ዝደሊ ሞገስ ይደሊ፡ እከይ ዝደሊ ግና ክመጾ እዩ። 

     ²⁸ብሃብቱ ዝእመን ይወድቕ፡ ጻድቃን ግና ከም ቈጽሊ ይልምልሙ። 

     ²⁹እቲ ንቤት ዝገላብጥሲ ንፋስ ይወርስ፡ ዓሻ ኸኣ ነቲ ጥበበኛ ዝልቡ ባርያኡ ይኸውን። 

     ³⁰ፍረ ጻድቕ ኦም ህይወት እዩ። ጥበበኛ ኸኣ ነፍሳት ይረብሕ። 

     ³¹እንሆ፡ እቲ ጻድቕሲ ኢዱ ኣብ ምድሪ ይፍደ፡ እቲ ረሲእን ሓጥእን ደኣ ኽንደይ ዝገደደ።

        መ. ምሳሌ  ምዕራፍ 12            

     ¹ተግሳጽ ዝፈቱ ፍልጠት ይፈቱ፡ መቕጻዕቲ ዝጸልእ ግና ዓሻ እዩ። 

     ²ደጊ ሰብ ካብ እግዚኣብሄር ሞገስ ይቕበል፡ ተንኰለኛ ግና ይዅንኖ። 

³ሳላ ረሲእነት ዝቐውም ሰብ የልቦን፡ ሱር እቶም ጻድቃን ግና ምንቕ ኣይብልን። 

     ⁴ደጊ ሰበይቲ ዘውዲ ሰብኣያ እያ፡ እታ እተነውር ግና ኣብ ኣዕጽምቱ ኸም ቍንቍነ እያ። 

     ⁵ሓሳብ ጻድቃን ቅኑዕ እዩ፡ ምኽሪ ረሲኣን ግና ጥበራ እዩ። 

     ⁶ዘረባ ረሲኣን ንምፍሳስ ደም የድቢ፡ ኣፍ እቶም ቅኑዓት ግና የድሕኖም። 

     ⁷እቶም ረሲኣን ይግልበጡ እሞ ኣይርከቡን፡ ቤት ጻድቃን ግና ይቐውም። 

     ⁸ሰብኣይ ብመጠን ፍልጠቱ እዩ ዝነኣድ፡ ቄናን ዝልቡ ግና ይንዓቕ። 

     ⁹ካብቲ እንጌራ ዘይብሉ ኽብረት ዝድልስ፡ እቲ ዘይምርኡይን ሓደ ግዙእ ዘለዎን ይሓይሽ። 

     ¹⁰ጻድቕ ንነፍሲ እንስሳኡ ይርሕርሓሉ፡ ልቢ ረሲኣን ግና ጨካን እዩ። 

     ¹¹ምድሩ ዝወላውል ሰብ እንጌራ ይጸግብ፡ ንኸንቱነት ዝኽተል ግና ኣእምሮ የብሉን። 

     ¹²ረሲእ ነቲ ወጽመድ እኩያት ሃረር ይብሎ፡ ሱር ጻድቃን ግና ፍረ ይህብ። 

     ¹³እኩይ ሰብ ብሓጢኣት ከናፍሩ ይጥለፍ፡ ጻድቕ ግና ካብ መከራ ይመሉቝ። 

¹⁴ሰብ ብግብረ ኣፉ ሰናይ ይጸግብ፡ ከም ተግባር ኣእዳዉ ኸኣ ክፍደ እዩ። 

     ¹⁵እቲ ዓሻ፡ መገዱ ኣብ ኣዒንቱ ቕንዕቲ እያ፡ ጥበበኛ ግና ምኽሪ ይሰምዕ። 

     ¹⁶ኵራ ዓሻ ብኡብኡ ይፍለጥ፡ ለባም ሰብ ግና ጸርፊ ይሓብእ። 

     ¹⁷ሓቂ ዝዛረብ ቅንዕና የውሪ፡ ሓሳዊ ምስክር ግና ጥበራ። 

     ¹⁸ከም ዝቘርጽ ሰይፊ ገይሩ ዝዛረብ ሰብ ኣሎ፡ መልሓስ እቶም ጠቢባን ግና ጥዕና እዩ። 

     ¹⁹ሓቀኛ ኸንፈር ንሓዋሩ ትነብር፡ ሓሳዊት መልሓስ ግና ንቕጽበት ዓይኒ ጥራይ እያ። 

     ²⁰እቶም እከይ ዝሓስቡ ኣብ ልቦም ጥልመት ኣሎ፡ እቶም ሰላም ዝመኽሩ ግና ደስታ ኣለዎም። 

     ²¹ንጻድቕ ገለ ኽፉእ ኣይረኽቦን፡ ረሲኣን ግና ሕሰም መሊእዎም እዩ። 

     ²²ሓሰውቲ ኸናፍር ኣብ እግዚኣብሄር ፍንፉናት እየን፡ እቶም ሓቂ ዝገብሩ ግና የሓጕስዎ። 

     ²³ለባም ሰብ ፍልጠቱ ይሓብእ፡ልቢ እቶም ዓያሱ ግና ዕሽነት የውሪ። 

     ²⁴ኢድ ትጉሃት ክትገዝእ እያ፡ እታ ሃካይ ግና ክትግብር እያ። 

     ²⁵እቲ ኣብ ልቢ ሰብ ዝሓደረ ጓሂ ንእኡ ይጸቕጦ፡ ሰናይ ቃል ግና ባህ የብሎ። 

     ²⁶ጻድቕ ንብጻዩ መገዲ ይሕብሮ፡ ንረሲኣን ግና መገዶም ተጋግዮም። 

     ²⁷ሃካይ ነቲ ዝሃደኖ ኣይጠብሶን፡ ትግሃት ግና ንሰብ ክቡር ገንዘብ እያ። 

     ²⁸ኣብ መገዲ ጽድቂ ህይወት ኣላ፡ ኣብ መተሓላለፊኣ ኸኣ ሞት የልቦን።

        መ. ምሳሌ  ምዕራፍ 13            

     ¹ለባም ውሉድ ተግሳጽ ኣቦኡ ይሰምዕ፡ መላገጺ ግና መግናሕቲ ኣይሰምዕን። 

     ²ሰብ ብፍረ ኣፉ ሰናይ ይስሰ፡ ነፍሲ እቶም ጠለምቲ ግና ግፍዒ ትምገብ። 

     ³ኣፉ ዝሕሉ ህይወቱ ይባልህ፡ ከናፍሩ ጋህ ዘብልግና ጥፍኣት ይረኽቦ። 

     ⁴ነፍሲ ሃካይ ሃረር ትብል ኣላ እሞ ገለ ኣይትረክብን፡ ነፍሲ ትጉሃት ግና ኣዝያ ትጸግብ። 

     ⁵ጻድቕ ንዘረባ ሓሶት ይጸልኦ፡ ረሲእ ግና ይንውርን የነውርን። 

     ⁶ጽድቂ ነቲ ብመገዱ ቕኑዕ ዝዀነ ትሕልዎ፡ ረሲእነት ግና ንሓጥእ የውድቖ። 

     ⁷ገለ ዘይብሉስ ንርእሱ ሃብታም ዘምስል ኣሎ፡ ብዙሕ ገንዘብ ከለዎስ፡ ንርእሱ ድኻ ዘምስል ኣሎ። 

     ⁸ሃብታም ብገንዘቡ ንህይወቱ ይብጀዋ፡ ድኻ ግና ዘፈራርሆ የብሉን። 

     ⁹ብርሃን ጻድቃን ሕጉስ እዩ፡ መብራህቲ ረሲኣን ግና ክጠፍእ እዩ። 

     ¹⁰ካብ ትዕቢት ባእሲ ጥራይ እዩ ዝመጽእ፡ ጥበብ ግና ምስቶም ምኽሪ ዝቕበሉ እያ። 

     ¹¹ብኸምኡ እተረኽበ ገንዘብ እናጐደለ ይኸይድ፡ ብኢድ ዝእከብ ግና እናበዝሐ ይኸይድ። 

     ¹²ነዊሕ ትጽቢት ንልቢ የማህምኖ፡ እተፈጸመ ድሌት ግና ኦም ህይወት እዩ። 

     ¹³ነቲ ቓል ዝንዕቆ ንነፍሱ የጥፍኣ፡ ነቲ ትእዛዝ ዝፈርሆ ግና ክከሓስ እዩ። 

     ¹⁴ካብ ወጽመድ ሞት ምእንቲ ኸተምልጥሲ፡ ሕጊ ጠቢብ ናይ ህይወት ፈልፋሊ እዩ። 

     ¹⁵ጽቡቕ ምስትውዓል ሞገስ ይህብ፡ መገዲ ጠለምቲ ግና ተራር እያ። 

     ¹⁶ኣእምሮኛ ሰብ ብምስትውዓል ይዓዪ፡ ዓሻ ግና ዕሽነት ይዝርግሕ። 

     ¹⁷ረሲእ ልኡኽ ኣብ እከይ ይወድቕ፡ እሙን መልእኽተኛ ግና ጥዕና እዩ። 

     ¹⁸ነቲ ተግሳጽ ዘይቅበል ሰብ ድኽነትን ነውርን ይጸንሖ፡ መግናሕቲ ዝቕበል ግና ይኸብር። 

     ¹⁹እተፈጸመ ድሌት ንነፍሲ ጥዑም እዩ፡ዓያሱ ግና ካብ እከይ ምርሓቕ ጽያፎም እዩ። 

     ²⁰ምስ ጠቢባን ዝመላለስ ጠቢብ ይኸውን፡ ምስ ዓያሱ ዝመላለስ ግና ሕሱም ይኸውን። 

     ²¹ንሓጥኣን ሕሰም የባርሮም፡ ጻድቃን ግና ብሰናይ ይፍደዩ። 

     ²²ደጊ ሰብ ንደቂ ደቁ የውርሶም፡ ሃብቲ ሓጥእ ግና ንጻድቕ ይዕቈረሉ። 

     ²³ድኻታት ዝሓረስዎ በዱ ብዙሕ ሲሳይ ይርከቦ፡ ሰኣን ቅንዕና ዝጠፍኡ ግና ኣለዉ። 

     ²⁴ብሸቦጥ ዘይገርፍ ንውሉዱ ይጸልኦ፡ ዘፍቅሮ ግና ኣንጊሁ ይቐጽዖ። 

     ²⁵ጻድቕ ክሳዕ ዝጸግብ ይበልዕ፡ ከብዲ ሓጥኣን ግና ይጠሚ።

        መ. ምሳሌ  ምዕራፍ 14            

     ¹ለባም ሰበይቲ ቤታ ትሃንጽ፡ ዓሻ ግና ብገዛእ ኢዳ ተፍርሶ። 

     ²ብቕንዕናኡ ዝመላለስ ንእግዚኣብሄር ይፈርሆ፡ መገዱ ዘጐብጥ ግና ይንዕቆ። 

     ³ኣብ ኣፍ ዓሻ ሸቦጥ ትዕቢት ኣሎ፡ ንጠቢባን ግና ከናፍሮም ይሕልውዎ። 

     ⁴ብዕራይ ኣብ ዘይብሉ መብልዕ ማል ጥራዩ እዩ፡ ብዙሕ ሲሳይ ግና ብሓይሊ ብዕራይ እዩ። 

     ⁵እሙን ምስክር ኣይሕሱን፡ ሓሳዊ ምስክር ግና ሓሶት የውስእ። 

     ⁶መላገጺ ንገንዘብ ይደልያ እሞ ኣይረኽባን፡ ነእምሮኛ ግና ፍልጠት ኣይሽግሮን። 

     ⁷ካብ ዓሻ ርሓቕ፡ ኣብኡ ኸናፍር ፍልጠት ኣይትረክብን ኢኻ። 

     ⁸ጥበብ እቲ ለባምሲ መገዱ ምፍላጥ እዩ፡ ዕሽነት እቶም ዓያሱ ግና ጥበራ እዩ። 

     ⁹እቶም ዓያሱ ብሓጢኣት ይዋዘዩ፡ ኣብ ማእከል እቶም ቅኑዓት ግና ጽቡቕ ፍቓድ ኣሎ። 

     ¹⁰ልቢ ንምረቱ ባዕሉ ይፈልጦ፡ ኣብ ሓጐሱ ኸኣ ጓና ኣይሕወስን። 

     ¹¹ቤት ረሲኣን ይዓኑ፡ ድንኳን ቅኑዓት ግና ይዕምብብ። 

     ¹²ንሰብ ቅንዕቲ ትመስሎ መገዲ ኣላ፡ መወዳእታኣ ግና መገዲ ሞት እዩ። 

     ¹³ልቢ እናሰሓቕካውን ይጉሂ እዩ፡ መወዳእታ ሓጐስ ከኣ ሓዘን እዩ። 

     ¹⁴እቲ ብልቡ ዝዓሉ ብመገዱ ይጸግብ፡ ደጊ ሰብ ድማ ካብ ርእሱ እዩ። 

     ¹⁵ገርሂ ሰብ ንዅሉ ቓል ይኣምን፡ ለባም ግን ንስጉምቱ ይጥንቀቐለን። 

     ¹⁶ጠቢብ ይፈርህ ካብ እከይ ድማ ይርሕቕ፡ ዓሻ ግና ደፋርን ኣማኒ ርእሱን እዩ። 

     ¹⁷ኰራዪ ሰብ ዕሽነት ይገብር፡ ተንኰለኛ ኸኣ ይጽላእ። 

     ¹⁸እቶም ደናቝርቲ ዕሽነት ይርስተዩ፡ ለባማት ግና ፍልጠት ዘውዶም እዩ። 

     ¹⁹እቶም እኩያት ኣብ ቅድሚ ሰናያት፡ ረሲኣን ከኣ ኣብ ደጌታት ጻድቃን ይደኑ። 

     ²⁰ንድኻ ብጻዩ እኳ ይጸልኦ፡ ፈተውቲ ሃብታም ግና ብዙሓት እዮም። 

     ²¹እቲ ንብጻዩ ዝንዕቕ ሓጢኣት ይገብር፡ ንድኻ ዝርሕርሓሉ ግና ብጹእ እዩ። 

     ²²እቶም እከይ ዝሓስቡ ኣይጋገዩንዶ እዮም፧ ምሕረትን ሓቅን ግና ነቶም ሰናይ ዝሓስቡ እዩ። 

     ²³ኣብ ዕዮ ዘበለ ረብሓ ኣሎ፡ ዘረባ ኸናፍር ግና ናብ ረሲእነት ጥራይ የብጽሕ። 

     ²⁴ሃብቲ ንጠቢባን ዘውዶም እዩ፡ ዕሽነት እቶም ዓያሱ ግና ኵሉ ግዜ ዕሽነት እዩ። 

     ²⁵ሓቀኛ ምስክር ነፍሳት የድሕን፡ ሓሶት ዝዛረብ ግና ምጥባር ጥራይ እዩ። 

     ²⁶ጽኑዕ እምንቶ ኣብ ምፍራህ እግዚኣብሄር እዩ፡ ንደቁ ኸኣ ጸግዒ ይዀኖም። 

     ²⁷ካብ ወጽመድ ሞት ከተምልጥሲ፡ ፍርሃት እግዚኣብሄር ናይ ህይወት ፈልፋሊ እዩ። 

     ²⁸ምብዛሕ ህዝቢ ክብሪ ንጉስ እዩ፡ምውሓድ ህዝቢ ግና ጥፍኣት መስፍን እዩ። 

     ²⁹እቲ ንዅራ ደንጓዪ ብዙሕ ኣእምሮ ኣለዎ፡ ኰራዪ ግና ዕሽነት ይገልጽ። 

     ³⁰ዓቃል ልቢ ንስጋ ህይወቱ እዩ፡ ቅንኢ ግና ነዕጽምቲ ቝንቍኔኡ እዩ። 

     ³¹እቲ ንድኻ ዝጭቍን ንፈጣሪኡ ይጸርፍ፡ ንስኡን ዝርሕርሓሉ ግና የኽብሮ። 

     ³²ረሲእ ብእከዩ ይግምጠል፡ ጻድቕ ግና ኣብ ሞት እኳ ጸግዒ ኣለዎ። 

     ³³ጥበብ ኣብ ልቢ ኣእምሮኛ ትሓድር፡ ኣብ ውሽጢ ዓያሱ ዘሎ ግና ይግለጽ። 

     ³⁴ጽድቂ ንህዝቢ ልዕል የብሎ፡ ሓጢኣት ግና ውርደት ህዝብታት እዩ። 

     ³⁵ሞገስ ንጉስ ንለባም ጊልያ እዩ፡ ቍጥዓኡ ግና ነቲ ዘነውር እዩ።

        መ. ምሳሌ  ምዕራፍ 15            

     ¹ልኡም ምላሽ ንቝጥዓ የህድኦ፡ ተሪር ቃል ግና ኵራ የልዕል። 

     ²ልሳን ጠቢባን ፍልጠት የንጠብጥብ፡ ኣፍ ዓያሱ ግና ዕሽነት ይፍልፍል። 

     ³ኣዒንቲ እግዚኣብሄር ኣብ ኵሉ ስፍራ እየን፡ ንእኩያትን ንሰናያትን ከኣ ይቋመታኦም። 

     ⁴ልዝብቲ ልሳን ከም ኦም ህይወት እያ፡ ቄናን መንፈስ ግና ንመንፈስ ትሰብሮ። 

     ⁵ዓሻ ንተግሳጽ ኣቦኡ ይንዕቆ፡ ዘለፋ ዝቕበል ግና ኣእምሮኛ ይኸውን። 

     ⁶ኣብ ቤት ጻድቕ ብዙሕ መዝገብ ኣሎ፡ ኣብ እቶት ረሲኣን ግና ህውከት ኣሎ። 

     ⁷ከናፍር ጠቢባን ፍልጠት ይዝርግሓ፡ ልቢ እቶም ዓያሱ ግና ኣይከምኡን እዩ። 

     ⁸መስዋእቲ ረሲኣን ኣብ ቅድሚ እግዚኣብሄር ፍንፉን እዩ፡ ጸሎት ቅኑዓት ግና ባህ የብሎ። 

     ⁹እግዚኣብሄር ንመገዲ ረሲኣን ይፍንፍኖ፡ ጽድቂ ንዝስዕብ ግና የፍቅሮ። 

     ¹⁰መገዲ ንዝሓድግ ብርቱዕ መቕጻዕቲ ይወርዶ፡ ተግሳጽ ዝጸልእ ከኣ ይመውት። 

     ¹¹ሲኦልን መዓሙቕን ኣብ ቅድሚ እግዚኣብሄር እዩ፡ ልቢ ሰብ ግዳ ኽንደይ ኣዝዩ። 

     ¹²መላገጺ ተግሳጽ ኣይፈቱን፡ ናብ ጠቢባን ኣይከይድን። 

     ¹³ሕጉስ ልቢ ንገጽ የብርሆ፡ ልቢ እንተ ጐሃየ ግና መንፈስ ይስበር። 

     ¹⁴ልቢ ኣእምሮኛ ፍልጠት ይደሊ፡ ኣፍ ዓያሱ ግና ዕሽነት ይምገብ። 

     ¹⁵ኵለን ዕለታት እቲ ሕዙን ክፉኣት እየን፡ ሕጉስ ልቢ ዘለዎ ግና ኵሉ ግዜ ደስ ዘብል መኣዲ እዩ። 

     ¹⁶ካብ ዓብዪ መዝገብ ምስ ህውከትሲ፡ ሒደት ምስ ፍርሃት እግዚኣብሄር ይሓይሽ። 

     ¹⁷ካብ ስቡሕ ብዕራይ ምስ ጽልኢ፡ ጻሕሊ ሓምሊ ምስ ፍቕሪ ይሓይሽ። 

     ¹⁸ኰራዪ ሰብ ቈየቛ የልዕል፡ ዓቃል ግና ባእሲ የህድእ። 

     ¹⁹ጐደና ሃካይ ከም ሓጹር እሾዅ እዩ፡ መገዲ ቕኑዓት ግና እተደላደለት እያ። 

     ²⁰ጥበበኛ ውሉድ ነቦኡ የሓጕሶ፡ ዓሻ ሰብ ግና ንወላዲቱ ይንዕቃ። 

     ²¹ዕሽነት ነቲ ልቢ ዘይብሉ ሰብ ደስታ እዩ፡ ለባም ግና ትኽ ኢሉ ይኸይድ። 

     ²²ኣብቲ ምኽሪ ዘይብሉ፡ ህቃኔታት ከንቱ ይኸውን፡ ኣብቲ መኸርቲ ዝበዝሕዎ ግና ይጸንዕ። 

     ²³ሰብ ብምላሽ ኣፉ ይሕጐስ፡ እወ፡ ብግዜኡ ዝዝረብ ቃል ክንደይ ጽቡቕ እዩ። 

     ²⁴ለባም ሰብ፡ ካብቲ ኣብ ታሕቲ ዘሎ ሲኦል ክርሕቕሲ፡ መገዲ ህይወት ናብ ላዕሊ ትመርሖ። 

     ²⁵እግዚኣብሄር ንቤት ዕቡያት ይምሕዎ፡ ንዶብ መበለት ግና የቝሞ። 

     ²⁶እኩይ ሓሳባት ኣብ እግዚኣብሄር ፍንፉን እዩ፡ ልኡም ቃላት ግና ኣብ ቅድሚኡ ንጹህ እዩ። 

     ²⁷እቲ ረብሓ ዝሃርፍ ንቤቱ ይህውኻ፡ መማለጃ ዝጸልእ ግና ብህይወት ይነብር። 

     ²⁸ልቢ ጻድቕ ዝምልሶ ይሓስብ፡ ኣፍ ረሲኣን ግና ሕሰም ይፍልፍል። 

     ²⁹እግዚኣብሄር ነቶም ረሲኣን ርሑቖም እዩ፡ ንጸሎት ጻድቃን ግና ይሰምዖ። 

     ³⁰ብሩህ ቈላሕታ ንልቢ የሓጕሶ፡ ብስራት ነዕጽምቲ የስብሖ። 

     ³¹እታ ናብ ህይወት ዝመርሕ ተግሳጽ እትሰምዕ እዝኒ ኣብ ማእከል ጠቢባን ትነብር። 

     ³²እቲ ተግሳጽ ዝኣቢ ንነፍሱ ይንዕቃ፡ ዘለፋ ዝሰምዕ ግና ይልብም። 

     ³³ፍርሃት እግዚኣብሄር ናይ ጥበብ ትምህርቲ እዩ፡ ንኽብረት ከኣ ትሕትና ትቕድማ።

        መ. ምሳሌ  ምዕራፍ 16            

     ¹ሰብ ብልቡ ሓሳባት የዳሉ፡ መልሓስ እትመልሶ ግና ካብ እግዚኣብሄር እዩ። 

     ²ሰብሲ ኵሉ መገዱ ኣብ ቅድሚ ኣዒንቱ ንጹህ እዩ፡ መናፍስቲ ዝመዝን ግና እግዚኣብሄር እዩ። 

     ³ተግባርካ ንእግዚኣብሄር ወፍዮ፡ሽዑ ሓሳባትካ ክቀውም እዩ። 

     ⁴እግዚኣብሄርሲ ኵሉ ንምዱብ ነገር፡ ከምኡውን ንረሲእ ንመዓልቲ ሕሰም ፈጠሮ። 

     ⁵ብልቡ ዝዕበ ዘበለ ዅሉ ኣብ እግዚኣብሄር ፍንፉን እዩ፡ ኢድ ብኢድ ከይተቐጽዐ ኣይተርፍን። 

     ⁶ብምሕረትን ብሓቅን ስሬት ኣበሳ ይርከብ፡ ሰብውን ብፍርሃት እግዚኣብሄር ካብ እከይ ይርሕቕ። 

     ⁷እግዚኣብሄር ብመገዲ ሓደ ሰብ ባህ እንተ በሎ፡ ነቶም ጸላእቱ እኳ ምስኡ ብሰላም የንብሮም። 

     ⁸ካብ ብዙሕ እቶት ምስ ዓመጻ፡ ሒደት ምስ ጽድቂ ይሓይሽ። 

     ⁹ልቢ ሰብ መገዱ ይምድብ፡ ንስጕምቱ ግና እግዚኣብሄር እዩ ዘቃንዓ። 

     ¹⁰ኣብ ከናፍር ንጉስሲ ንግራት ኣምላኽ ኣሎ፡ ኣፉ ብፍርዲ ኣይጋገን። 

     ¹¹ሓቀኛ ሚዛንን መምዘንን ናይ እግዚኣብሄር እዩ፡ ኣብ ከረጺት ዘሎ ዅሉ መምዘኒ ከኣ ተግባሩ እዩ። 

     ¹²ዝፋን ብጽድቂ እዩ ዝጸንዕ እሞ፡ ነገስታት ንረሲእነት ይፍንፍንዎ። 

     ¹³ጻድቃን ከናፍር ንነገስታት የሐጕሳኦም፡ ነቲ ቅንዕና ዝዛረብውን የፍቅርዎ። 

     ¹⁴ቍጥዓ ንጉስሲ ልኡኽ ሞት እዩ፡ ጥበበኛ ሰብ ግና የህድኦ። 

     ¹⁵ገጽ ንጉስ እንተ በርሀ፡ ህይወት እዩ፡ ሞገሱ ኸኣ ከም ደበና ብዙሓት እዩ። 

     ¹⁶ካብ ምጥራይ ወርቂ ክንደይ ኰን ምጥራይ ጥበብ ይበልጽ። ካብ ምጥራይ ብሩርሲ ምጥራይ ምስትውዓል ክንደይ ኰን ይኸብር። 

     ¹⁷ጐደና እቶም ቅኑዓት ካብ ኣኩይ ምርሓቕ እዩ፡ እቲ ንመገዱ ዝጥንቀቐላ ንነፍሱ ይሕልዋ። 

     ¹⁸ንውርደት ትዕቢት ትቕድማ፡ ንውድቀት ከኣ ኵርዓት። 

     ¹⁹ምስቶም ዕቡያት ዘመተ ኻብ ምክፋልሲ፡ ምስቶም መሳኪን ደኣ ብመንፈስ ትሑት ምዃን ይሓይሽ። 

     ²⁰ነቲ ቓል ዘቅልበሉ ሰናይ ይረክብ፡ ብእግዚኣብሄር ዝእመን ከኣ ብጹእ እዩ። 

     ²¹ጥበበኛ ዝልቡ መስተውዓሊ ይበሃል፡ ጣዕሚ ኸናፍር ከኣ ትምህርቲ ይውስኽ። 

     ²²ምስትውዓል ንዘጥርያ ሰብ ፈልፋሊት ህይወት እያ፡ ዕሽነት ግና ነቶም ዓያሱ ቕጽዓቶም እያ። 

     ²³ልቢ እቲ ጥበበኛ ንኣፉ መስተውዓሊ ይገብሮ፡ ንኸናፍሩ ድማ ትምህርቲ ይውስኸን። 

     ²⁴ልኡም ዘረባ መዓር ወለላ እዩ፡ ንነፍሲ ጥዑም፡ ነዕጽምቲ ኸኣ ጥዕና እዩ። 

     ²⁵ንሰብ ቅንዕቲ እትመስሎ መገዲ ኣላ፡ መወዳእታኣ ግና መገዲ ሞት እዩ። 

     ²⁶ኣፉ ይድርኾ እዩ እሞ፡ ጥሜት እቲ ዓያዪ ስሌኡ ኢሉ ይዓዪ። 

     ²⁷ሕሱም ሰብ እከይ ይዅዕት፡ ኣብ ከናፍሩ ኸኣ ከም ዝባላዕ ሓዊ ኣሎ። 

     ²⁸ጠዋይ ሰብ ቈየቛ ይዝርግሕ፡ ሓማዪ ኸኣ ንእሙናት ፈተውቲ ይፈላልዮም። 

     ²⁹ግፍዐኛ ሰብ ንብጻዩ ይሓባብሎ እሞ፡ ሰናይ ናብ ዘይኰነት መገዲ ይመርሖ። 

     ³⁰በዒንቱ ዝጠቅስ ሓሳባቱ ጠዋይ እዩ፡ ከናፍሩ ዝርምጥጥ ከኣ ነቲ ኽፍኣት ፈጺምዎ እዩ። 

     ³¹ሸያብ ጸጕሪ ናይ ክብረት ዘውዲ እዩ፡ እዚ ኸኣ ኣብ መገዲ ጽድቂ እዩ ዝርከብ። 

     ³²ንዅራ ደንጓዪ ዝዀነ ኻብ ጅግና ይበልጽ፡ ካብቲ ንኸተማ ዝሕዝ ከኣ መንፈሱ ዝገዝእ ይበልጽ። 

     ³³ዕጭ ናብ ሕቝፊ እዮም ዘውድቑ፡ ንመን ከም ዝበጽሕ ግና እግዚኣብሄር እዩ ዝምድቦ።

        መ. ምሳሌ  ምዕራፍ 17            

     ¹ካብ ሕሩድ ዝመልኦ ቤት ምስ ቈየቛስ፡ ንቕጽቲ ቝራስ ምስ ህድኣት ትበልጽ። 

     ²ለባም ባርያ ንነውራም ውሉድ ይገዝኦ፡ ኣብ ማእከል ኣሕዋት ድማ ርስቲ ይካፈል። 

     ³መምከኺ ንብሩር፡ እቶን ከኣ ንወርቂ እዩ፡ ንልቢ ዝፍትኖ ግና እግዚኣብሄር እዩ። 

     ⁴እኩይ ሰብ ንበደለኛ ኸንፈር ጽን ይብሎ፡ ሓሳዊ ድማ ነታ እክይቲ መልሓስ ይሰምዓ። 

     ⁵ንድኻ ዘባጩ ንፈጣሪኡ ይጸርፍ፡ ብጕድኣት ዝሕጐስ ከኣ ከይተቐጽዐ ኣይተርፍን። 

     ⁶ንኣረገውቲ እቶም ደቂ ደቆም ዘውዶም እዮም፡ ንቘልዑ ኸኣ ኣቦታቶም ክብረቶም እዮም። 

     ⁷ንዓሻስ ዓብዪ ዘረባ ኣይመጠኑን፡ ንመስፍን ደኣ ግዳ ሓሰውቲ ኽናፍር ከመይ ኢለን። 

     ⁸መማለጃ ነቲ እተቐበሎ ኸም ብሩር ዕንቍ እዩ፡ ኣብ ዝኸደ እንተ ኸደ ይሰልጦ።

     ⁹ፍቕሪ ዝደሊ ንበደል ይኽውሎ፡ ናብ ነገር ዝምለስ ግና ንእሙናት ፈተውቲ ይፈላልዮም። 

     ¹⁰ካብ ሚእቲ ግርፋት ንዓሻስ፡ተግሳጽ ንለባም ኣዕሚቑ ይኣትዎ። 

     ¹¹እኩይ ሰብ ዕልወት ጥራይ ይደሊ፡ ስለዚ ጨካን መልእኽተኛ ይሰደሉ። 

     ¹²ዓሻ ብዕሽነቱ ኻብ ዝጓነፈካስ፡ ኰራዅራ ዘሕደግዋ ድቢ ኽትጓነፈካ ይሓይሽ። 

     ¹³ኣብ ክንዲ ሰናይሲ እከይ ዝፈዲ፡ መከራ ኻብ ቤቱ ኣይርሕቕን። 

     ¹⁴ምጅማር ቈየቛ ከም ምኽፋት መገዲ ውሕጅ እዩ፡ ስለዚ ናብ ምሕርቃም ስኒ ኸይበጽሐ ኻብ ቈየቛ ርሓቕ። 

     ¹⁵እቲ ንዓማጺ ናጻ ዘውጽኦን ንጻድቕ ዝዅንኖን፡ ክልቲኦም ኣብ እግዚኣብሄር ፍንፉናት እዮም። 

     ¹⁶ዓሻስ ልቢ የብሉን እዩ እሞ፡ ጥበብ ክገዝእሲ፡ እቲ ኣብ ኢዱ ዘሎ ዋጋ ንምንታይ ይጠቅም፡ 

     ¹⁷ፈታዊ ንዅሉ ግዜ የፍቅር፡ ሓው ድማ ንጸገማ ይውለድ። 

     ¹⁸ልቢ ዘይብሉ ሰብ ኣገን ይጠቅዕ፡ኣብ ቅድሚ ብጻዩ ኸኣ ይውሓስ። 

     ¹⁹ባእሲ ዝፈቱ ሓጢኣት ይፈቱ፡ ንደጊኡ ዘንውሕ ምብራስ ይደሊ። 

     ²⁰ጠዋይ ልቢ ዘለዎ ሰናይ ኣይረክብን፡ ወስላታ ዝልሳኑ ኸኣ ኣብ መከራ ይወድቕ። 

     ²¹ዓሻ ዝወለደ ብእኡ ይጕሂ፡ ኣቦ ዓሻውን ከቶ ኣይሕጐስን። 

     ²²ሕጉስ ልቢ ጽቡቕ መድሃኒት እዩ፡ ስቡር መንፈስ ግና ነዕጽምቲ የንቅጾ። 

     ²³ረሲእ፡ መገዲ ፍትሒ ንምጥዋይ፡ መማለጃ ኻብ ሕቝፊ ይወስድ። 

     ²⁴ለባም ሰብሲ ጥበብ ኣብ ቅድሚኡ ኣላ፡ ኣዒንቲ ዓሻ ግና ክሳዕ ወሰን ምድሪ እየን። 

     ²⁵ዓሻ ውሉድ ነቦኡ ጓሂ እዩ፡ ንወላዲቱ ኸኣ ምረት እዩ። 

     ²⁶ንጻድቕ ምቕጻዕ፡ ንኽቡራት ስለ ቕንዕናኦም ምውቃዕ ሰናይ ኣይኰነን። 

     ²⁷እቲ ፍልጠት ዘለዎስ ቃላቱ ይቝጥብ፡ ህዱእ መንፈስ ዘለዎ ለባም እዩ። 

     ²⁸ዓሻ እኳ ስቕ እንተ በለስ፡ ጥበበኛ መሲሉ ይርአ፡ ከናፍሩ ዝዓጹ ኣእምሮኛ ይበሃል።

        መ. ምሳሌ  ምዕራፍ 18            

     ¹እቲ ንርእሱ ዝፍለ ትምኒት ይደሊ፡ ንዅሉ ጥበብውን ይቃወሞ። 

     ²ዓሻ ነቲ ኣብ ልቡ ዘሎ ኽገልጾ እምበር፡ ምስትውዓል ኣይፈቱን እዩ። 

     ³ረሲእ እንተ መጸ፡ ንዕቀት ድማ ይወጽእ፡ ምስ ነውሪውን ጸርፊ ይመጽእ። 

     ⁴ቃላት ኣፍ ሰብ ጥልቂ ማያት እዩ፡ ናይ ጥበብ ዓይኒ ማይ ከኣ ወሓዚ ርባ እዩ። 

     ⁵ጻድቕ ምእንቲ ኽግፋዕ ኢልካ፡ ምስ ረሲእ ምሽራውሲ ሰናይ ኣይኰነን። 

     ⁶ከናፍር ዓሻ ናብ ባእሲ ይኣትዋ፡ ኣፉ ኸኣ መውቃዕቲ ይጽውዕ። 

     ⁷ኣፍ ዓሻ ንእኡ ጥፍኣቱ እዩ፡ ከናፍሩ ኸኣ ወጽመድ ነፍሱ እየን። 

     ⁸ቃላት ጠባው እዝኒ ኸም ጥዑም ኵላሶ እዩ እሞ፡ ክሳዕ ውሽጢ መዓንጣ ይወርድ። 

     ⁹እቲ ንዕዮ ሸለል ዝብሎ ሰብሲ ሓው በታን ገንዘብ እዩ። 

     ¹⁰ስም እግዚኣብሄር ጽኑዕ ግምቢ እዩ፡ ጻድቕ ናብኡ ጐይዩ የዕቍብ። 

     ¹¹ንሃብታም እቲ ጥሪቱ ጽኑዕ ከተማኡ እዩ፡ ብሓሳቡ ኸኣ ከም ክብ ዝበለ ቀጽሪ እዩ። 

     ¹²ልቢ ሰብ ቅድሚ ውድቀት ልዕል ይብል፡ ትሕትና ኸኣ ንኽብረት ትቕድማ። 

     ¹³ከይሰምዐ ምላሽ ዝህብ ሰብ ዕሽነትን ነውርን ይቝጸሮ። 

     ¹⁴ሰብ እንተ ሓመመስ፡ መንፈሱ ይድግፎ። ንተሰብረ መንፈስ ግና መን ከበርትዖ ይኽእል፡ 

     ¹⁵ልቢ ለባም ሰብ ፍልጠት የጥሪ፡ እዝኒ ጠቢባን ከኣ ፍልጠት ትደሊ። 

     ¹⁶ንሰብ ውህበቱ መገዲ የርሕበሉ፡ ናብ ዓበይቲ ኸኣ የእትዎ። 

     ¹⁷እቲ ቅድም ነገሩ ዘፍስስ ቅኑዕ ይመስል፡ እቲ በዓል ጋራ ግና መጺኡ ኣጸቢቑ ይምርምሮ። 

     ¹⁸ዕጭ ውድእ ንባእሲ ይውድኦ፡ ንብርቱዓት ይፈላልዮም። 

     ¹⁹ካብ ጽንዕቲ ኸተማስ እተበደለ ሓው ይቃወም፡ ባእሶም ከኣ ከም መሃርሃር ዕርዲ እዩ። 

     ²⁰ከብዲ ሰብ ካብ ፍረ ኣፉ ይጸግብ፡ ካብ እቶት ከናፍሩ ኸኣ ይጸግብ። 

     ²¹ሞትን ህይወትን ኣብ ስልጣን መልሓስ እዩ፡ እቲ ዘፍቅራ ኸኣ ፍሬኣ ኽበልዕ እዩ። 

     ²²እቲ ሰበይቲ ዝረክብ ሰናይ ይረክብ፡ ካብ እግዚኣብሄር ከኣ ሞገስ ይቕበል። 

     ²³ድኻ እናለመነ ይዛረብ፡ ሃብታም ግና ብትሪ ይመልስ። 

     ²⁴ብዙሓት ፈተውቲ ዘለውዎ ሰብ ይጠፍእ፡ ግናኸ ካብ ሓው ኣብሊጹ ጥብቂ ዝዀነ ፈታዊ ኣሎ።

        መ. ምሳሌ  ምዕራፍ 19            

     ¹ካብቲ ቔናን ከናፍር ዘለዎ ዓሻስ፡ ብንጽህና ዝመላለስ ድኻ ይሓይሽ። 

     ²ነፍሲ ብዘይ ፍልጠት ምዃና ጽቡቕ ኣይኰነን፡ ቅልጡፍ እግሪ ኸኣ ይስሕት። 

     ³ሰብ ብዕሽነቱ መገዱ ይገላብጥ፡ ልቡ ግና ኣብ እግዚኣብሄር እዩ ዘንጸርጽር። 

     ⁴ሃብትስ ብዙሓት ፈተውቲ ይውስኽ፡ ንድኻ ግና ፈታዊኡ እኳ ይሓድጎ። 

     ⁵ሓሳዊ ምስክር ከይተቐጽዐ ኣይተርፍን፡ እቲ ሓሶት ዘውስእ ከኣ ኣየምልጥን። 

     ⁶ንኸበርቴ ብዙሓት የቀባጥሩሉ፡ ነቲ ዓዳል ውህበታት ድማ ኵሎም ፈተውቱ እዮም። 

     ⁷ንድኻ ዅሎም ኣሕዋቱ ይጸልእዎ፡ ምናዳ እኳ ፈተውቱ ኻብኡ ይርሕቁ፡ ብቓላት ይስዕቦም፡ ግናኸ የለዉን። 

     ⁸ልቦና ዘጥሪ ንነፍሱ የፍቅራ፡ ንምስትውዓል ዘድህበሉ ሰናይ ይረክብ። 

     ⁹ሓሳዊ ምስክር ከይተቐጽዐ ኣይተርፍን፡ ሓሶት ዘውስእ ከኣ ይጠፍእ። 

     ¹⁰ንዓሻ ጣዕሚ ንብረት ኣይግብኦን፡ ምናዳ እኳ ንባርያ ኣብ ልዕሊ መሳፍንቲ ምስልጣን ኣይግብኦን። 

     ¹¹ምስትውዓል ንሰብ ንዅራ ደንጓዪ ይገብሮ፡ ንበደል ምሕላፍ ከኣ ክብረቱ እዩ። 

     ¹²ኵራ ንጉስ ከም ምጕዛም ኣንበሳ እዩ፡ ሞገሱ ግና ኣብ ሳዕሪ ኸም ዝወርድ ኣውሊ እዩ። 

     ¹³ዓሻ ውሉድ ነቦኡ መከራ እዩ፡ ቈየቛ ሰበይቲ ኸኣ ከየቋረጸ ዝነጥብ ናሕሲ እዩ። 

     ¹⁴ቤትን ሃብትን ካብ ወላዲ ይውረስ፡ ለባም ሰበይቲ ግና ካብ እግዚኣብሄር እያ። 

     ¹⁵ትህኪት ናብ ዓሚቝ ድቃስ የውድቕ፡ ሸለልተኛ ነፍሲ ኸኣ ትጠሚ። 

     ¹⁶ትእዛዝ ዝሕሉ ነፍሱ ይሕሉ፡ መገዱ ሸለል ዝብል ግና ይመውት። 

     ¹⁷እቲ ንድኻ ዝርሕርሓሉ ንእግዚኣብሄር የለቅሖ፡ ንሱውን ንሰናይ ግብሪ ኽፈድዮ እዩ። 

     ¹⁸ገና ተስፋ ኸሎ፡ ንወድኻ ቕጽዓዮ፡ ክሳዕ ንምቕታሉ ግና ኣይትናደድ። 

     ¹⁹እንተ ኣናገፍካዮስ ከተንድዶ ኢኻ እሞ፡ ኰራዪ ሰብ ይዕደ። 

     ²⁰ኣብ መውዳእታኻ ጥበበኛ ኽትከውንሲ፡ ምኽሪ ስማዕ፡ ተግሳጽውን ተቐበል። 

     ²¹ኣብ ልቢ ሰብ ብዙሕ ሃቐና ኣሎ፡ ምኽሪ እግዚኣብሄር ግና እዩ ጸኒዑ ዝነብር። 

     ²²ንሰብ ርሕራሐ እዩ ጌጹ፡ ካብ ሓሳውስ ድኻ ይሓይሽ። 

     ²³ፍርሃት እግዚኣብሄር ናብ ህይወት የብጽሕ፡ ሳላኡ ሰብ ጸጊቡ ይሓድር፡ ክፉእ ከኣ ኣይረኽቦን። 

     ²⁴ሃካይ ንኢዱ ናብ ጻሕሊ የእትዋ፡ ግናኸ ናብ ኣፉ እኳ ኣይምልሳን። 

     ²⁵ንመላገጺ እንተ ገረፍካዮ፡ ገርሂ ይጥንቀቕ፡ ንበዓል ኣእምሮ እንተ ገሰጽካዮ ኸኣ፡ ፍልጠት የስተውዕል። 

     ²⁶እቲ ነቦኡ ዘጥፍእ ነዲኡውን ዝሰጕጕ መሕፈርን ነውራምን ውሉድ እዩ። 

     ²⁷ወደየ፡ ነቲ ኻብ ቃል ፍልጠት ዘርሕቐካ ተግሳጽ ሕደጎ። 

     ²⁸ሕሱም ምስክር ንፍርዲ የባጭወሉ፡ ኣፍ ረሲእ ከኣ ኣበሳ ይውሕጥ። 

     ²⁹ፍርዲ ንመላገጽቲ፡ መውቃዕቲ ኸኣ ንዝባን ዓያሱ ተዳልዩሎም ኣሎ።

        መ. ምሳሌ  ምዕራፍ 20            

     ¹ወይኒ መላገጺ እዩ፡ ዘስክር መስተ ኸኣ ሃዋኺ እዩ፡ በዚ ሰንከልክል ዝብል ዘበለስ ጥበበኛ ኣይከውንን። 

     ²ንጉስ ከም ምጕዛም ኣንበሳ እዩ ዘሰምብድ፡ እቲ ዘዀርዮ ንህይወቱ ይብድላ። 

     ³ንሰብ ካብ ቈየቛ ምርሓቕ ክብረት እዩ፡ ዓሻ ግና ዘሊሉ ይኣትዎ። 

     ⁴ሃካይ ብምኽንያት ቍሪ ኣይሓርስን፡ ብግዜ ቐውዒ ይልምን እሞ፡ ገለ እኳ ኣይረክብን። 

     ⁵ምኽሪ ኣብ ልቢ ሰብ ከም ጥልቂ ማይ እዩ፡ ብዓል ኣእምሮ ግና ይቐድሖ። 

     ⁶ርሕራሐኦም ዘውርዩ ብዙሓት እዮም፡ ግናኸ ንእሙን ሰብ መን ይረኽቦ 

     ⁷ብንጽህናኡ ዝመላለስ ጻድቕሲ፡ ብድሕሪኡ ውሉዱ ብሩኻት እዮም። 

     ⁸ኣብ ዝፋን ፍርዲ እተቐመጠ ንጉስ እከይ ንዘበለ ዅሉ በዒንቱ ይብትኖ። 

     ⁹ንልበይ ኣጽርየዮ፡ ካብ ሓጢኣተይ ነጺሀ፡ ክብል ዝኽእል መን እዩ፧ 

     ¹⁰ክልተ ዓይነት ሚዛን፡ ክልተ ዓይነት መስፈሪ፡ እዚኣተን ክልቲአን ኣብ እግዚኣብሄር ፍንፉናት እየን። 

     ¹¹ቈልዓ እኳ ዕዮኡ ቕኑዕን ንጹህን እንተ ዀነ፡ ብግብሩ ይፍለጥ። 

     ¹²ነታ ሰማዒት እዝንን፡ ነታ ረኣዪት ዓይንንሲ፡ ንኽልቲአን እግዚኣብሄር እዩ ዝገበረን። 

     ¹³ድኻ ምእንቲ ኸይትኸውን፡ ድቃስ ኣይትፍቶ፡ ነዒንትኻ ቋሕ ኣብለን፡ ሽዑ እንጌራ ኽትጸግብ ኢኻ። 

     ¹⁴ዓዳጊ፡ ሕማቕ እዩ፡ ሕማቕ እዩ፡ ይብል፡ መገዱ ምስ ከደ ግና ይሕበን። 

     ¹⁵ወርቅን ብዙሕ ዕንቍን ኣሎ፡ ፈላጣት ከናፍር ግና ክቡር ኣቕሓ እየን። 

     ¹⁶ነቲ ንጓና እተዋሕሰ ኽዳኑ ወሰደሉ፡ ኣብ ክንዲ እቶም ጓኖትሲ ታሕዚ ኻብኡ ውሰድ። 

     ¹⁷እንጌራ ጥበራ ንሰብ ጥዑም እዩ፡ ድሓር ግና ኣፉ ጸጸር ይመልእ። 

     ¹⁸ሃቐና ብምኽሪ ይጸንዕ፡ ብጥበብ ተመሪሕካ ተዋጋእ። 

     ¹⁹እቲ እናዞረ ዝሓሚ፡ ምስጢራት ይቐልዕ፡ ስለቲ ምስቲ ኸናፍሩ ዘግፍሕ ሰብ ኣይትተሓወስ። 

     ²⁰እቲ ነቦኡን ነዲኡን ዝረግም መብራህቱ ኣብ ማእከል ድቕድቕ ጸልማት ክጠፍእ እዩ። 

     ²¹እቲ ብመጀመርታ ቐልጢፉ እተኣከበ ርስቲ መወዳእታኡ ኣይክባረኽን እዩ። 

     ²²እከይ ክፈዲ ኣይትበል፡ ንእግዚኣብሄር ተጸበዮ እሞ፡ ንሱ ኸድሕነካ እዩ። 

     ²³ክልተ ዓይነት ሚዛን ኣብ ቅድሚ እግዚኣብሄር ፍንፉን እዩ፡ ጠባሪ ከኣ ሰናይ ኣይኰነን። 

     ²⁴ስጉምቲ ሰብ ብእግዚኣብሄር እዩ ዝምራሕ፡ ሰብ ደኣ ኸመይ ገይሩ እዩ ንመገዱ ዘስተውዕላ 

     ²⁵ብሃንደበት እተቐደሰ እዩ ምባልን ድሕሪ መብጽዓ ምምርማርንሲ፡ ንሰብ መፈንጠራ እዩ። 

     ²⁶ጥበበኛ ንጉስ ነቶም ረሲኣን የዝርዎም፡ ብመንኰራዅር ድማ ይደርጾም። 

     ²⁷መብራህቲ እግዚኣብሄር መንፈስ ሰብ እዩ፡ ንሱ ንብዘሎ ውሻጠ ልቢ ይምርምሮ። 

     ²⁸ምሕረትን ሓቅን ንንጉስ ይሕልዋኦ፡ ንሱ ብምሕረት ንዝፋኑ የጽንዖ። 

     ²⁹ሓይሊ ንመንእሰይ ክብረቱ እዩ፡ንኣረገውቲ ኸኣ ሽበቶም ስልማቶም እዩ። 

     ³⁰ሰመርመር ዝብል ስምብራት ካብ ክፍኣት የጽሪ፡ ከምኡውን መውቃዕቲ ንውሻጠ ልቢ የጽርዮ።

        መ. ምሳሌ  ምዕራፍ 21            

     ¹ልቢ ንጉስ ኣብ ኢድ እግዚኣብሄር ከም ወሓዚ ማይ እዩ፡ ንሱ ናብ ዝደለዮ ይመልሶ። 

     ²ሰብሲ ዅሉ መገዱ ኣብ ቅድሚ ዓይኑ ቕኑዕ ይመስሎ፡ ግናኸ እግዚኣብሄር እዩ ልቢ ዝመዝን። 

     ³እግዚኣብሄር ካብ መስዋእትስ ጽድቅን ቅንዕናን ምግባር እዩ ዝፈቱ። 

     ⁴ኵርዓት ኣዒንትን ንፉሕ ልብን ሓጢኣት እዩ፡ ንሱ ኸኣ መብራህቲ ረሲኣን እዩ። 

     ⁵ሃቐና እቲ ትጉህ ናብ ረብሓ የብጽሕ፡ እቲ ዝህወኽ ዘበለ ግና ስእነት ጥራይ ይህወኽ። 

     ⁶እቲ ብሓሳዊት መልሓስ ኣተኣከበ መዝገብ በኒኑ ይጠፍእ፡ ናብ ወጽመድ ሞት ከኣ የውድቕ። 

     ⁷ቅንዕና ምግባር ኣብዮም እዮም እሞ፡ ነቶም ረሲኣንሲ ግፍዖም ጥፍኣቶም እዩ። 

     ⁸መገዲ እቲ በደለኛ ጥውይዋይ እያ፡ ንጹህ ሰብ ግና ግብሩ ቕኑዕ እዩ። 

     ⁹ካብ ምስ ናግራም ሰበይቲ ኣብ ሓደ ቤትሲ ኣብ ዝባን ናሕሲ ብሓደ ወገን ምቕማጥ ይሓይሽ። 

     ¹⁰ነፍሲ ረሲእ ንእከይ ትምነዮ፡ ብጻዩውን ኣብ ቅድሚኡ ምሕረት ኣይረክብን። 

     ¹¹ንመላገጺ እንተ ቕጻዕካዮ፡ እቲ ገርሂ ጠቢብ ይኸውን፡ ንጥበበኛ እንተ መሃርካዮ ኸኣ፡ ፍልጠት ይቕበል። 

     ¹²እቲ ጻድቕ ንቤት ረሲእ ይምልከቶ፡ ነቶም ረሲኣን ከኣ ናብ መከራ የጽድፎም። 

     ¹³እቲ ንጥርዓን ድኻ ኸይሰምዕ ኢሉ እዝኑ ዝዓጹ፡ ንሱውን ይጠርዕ እሞ ምላሽ ኣይረክብን። 

     ¹⁴ብስዉር ዝኣተወ ገጸ በረኸት ኵራ የህድእ፡ሕቡእ ውህበትውን ንብርቱዕ ቍጥዓ የዝሕሎ። 

     ¹⁵ቅኑዕ ምግባር ንጻድቕ ሓጐሱ እዩ፡ ንገበርቲ ዓመጻ ግና ረዓድ እዩ። 

     ¹⁶እቲ ኻብ መገዲ ልቦና ዝዝምብል ሰብ ኣብ ኣኼባ ምዉታት ይነብር። 

     ¹⁷ጣዕሚ ንብረት ዝፈቱ ይደኪ፡ ወይንን ዘይትን ዝፈቱ ኸኣ ኣይህብትምን። 

     ¹⁸ረሲእ በጃ ጻድቕ እዩ፡ ኣብ ክንዲ ቕኑዕ ድማ ጠላሚ ይሓልፍ። 

     ¹⁹ካብ ምስ ናግራም መሰቀቒትን ሰበይትስ ኣብ በረኻ ምቕማጥ ይሓይሽ። 

     ²⁰ኣብ ቤት ጥበበኛ ኽቡር መዝገብን ዘይትን ኣሎ፡ ዓሻ ሰብ ግና ይውሕጦ። 

     ²¹እቲ ንጽድቅን ብጕነትን ዝስዕባን፡ ህይወትን ጽድቅን ክብረትን ይረክብ። 

     ²²ጥበበኛ ሰብ ናብ ከተማ ሓያላት ይድይብ፡ ንሓይሊ እምንቶኣ የፍርሶ። 

     ²³እቲ ኣፉን መልሕሱን ዝሕሉ ሰብ ንነፍሱ ኻብ ጸበባ ይሕልዋ። 

     ²⁴ዕቡይን ኵሩዕን ሰብ መላገጺ እዩ ስሙ፡ ንሱ ብናይ ትዕቢት ቍጥዓ ይገብር። 

     ²⁵ሃካይ፡ ኣእዳው ምዕያይ ይኣብያ እየን እሞ፡ ትምኒቱ ይቐትሎ። 

     ²⁶ምሉእ መዓልቲ ብህርፋን ዝምነ ኣሎ፡ ጻድቕ ግና ይህብ ኣይከልእን ከኣ። 

     ²⁷መስዋእቲ እቶም ረሲኣን ፍንፉን እዩ፡ ምናዳ እኳ ብእኩይ ሓሳብ እንተ ኣቕረቦ። 

     ²⁸ሓሳዊ ምስክር ይጠፍእ፡ ዝሰምዕ ሰብ ግና ኵሉ ግዜ ኽዛረብ ይፍቀደሉ። 

     ²⁹ረሲእ ሰብ ገጽ ድርቅና የርኢ፡ ጻድቕ ግና መገዱ የጽንዕ። 

     ³⁰ጥበበ ወይስ ኣእምሮ ወይስ ምኽሪ፡ ንእግዚኣብሄር ዝቃወሞ የልቦን። 

     ³¹ፈረስ ንመዓልቲ ውግእ ተዳልዩ ኣሎ፡ ስዕረት ግና ካብ እግዚኣብሄር እዩ።

        መ. ምሳሌ  ምዕራፍ 22            

     ¹ጽቡቕ ስም ካብ ብዙሕ ሃብቲ ይሕረ፡ ሞገስ ከኣ ካብ ብሩርን ወርቅን ይበልጽ። 

     ²ሃብታምን ድኻን ይራኸቡ፡ ንዅላቶም ዝገብሮም እግዚኣብሄር እዩ። 

     ³ኣስተውዓሊ ሰብሲ እከይ ይርኢ እሞ ይሕባእ፡ ገርህታት ግና ህሩጕ ይብሉ እሞ ብእኡ ይጕድኡ። 

     ⁴ዓስቢ ትሕትናን ፍርሃት እግዚኣብሄርሲ ሃብትን ክብረትን ህይወትን እዩ። 

     ⁵እሾዅን መፈንጠራን ኣብ መገዲ እቲ ቔናን እዩ፡ እቲ ንነፍሱ ዝሕልዋ ካብኡ ይርሕቕ። 

     ⁶ንቘልዓ እታ ክኸደላ ዝግብኦ መገዲ ኣላምዶ እሞ ምስ ኣረገ ኻብኣ ኣይከልግስን እዩ። 

     ⁷ንድኻ ሃብታም ይገዝኦ፡ ተለቃሒ ኸኣ ባርያ እቲ ዘለቅሖ እዩ። 

     ⁸እቲ ኣበሳ ዝዘርእ መከራ ይዓጽድ፡ ብሸቦጥ ቍጥዓኡ ይጠፍእ። 

     ⁹እቲ ርሕሩሕ ቈላሕታ ዘለዎ፡ ንድኻ ኻብ ኣንጌራኡ ይህቦ እሞ፡ ይባረኽ። 

     ¹⁰ንመላገጺ ስጐጎ እሞ፡ ቈየቛ ኽወጽእ እዩ፡ ባእስን ጸርፍን ከኣ ክውዳእ እዩ። 

     ¹¹እቲ ንጽህና ልቢ ዝፈቱ እሞ ጸጋ ኣብ ከናፍሩ ዘለዎ፡ ፈታዊኡ ንጉስ እዩ። 

     ¹²ኣዒንቲ እግዚኣብሄር ንጥበብ ይከናኸናኣ፡ ንሱ ግና ንቃላት እቲ ጠላሚ ይግልብጦ። 

     ¹³ሃካይ፡ ኣብ ወጻኢ ኣንበሳ ኣሎ፡ ኣብ ማእከል ኣደባባይ እቕተል እኸውን እየ፡ ይብል። 

     ¹⁴ኣፍ ኣመንዝራ ሰበይቲ ዓሚቝ ጕድጓድ እዩ፡ እግዚኣብሄር እተቘጥዖ ሰብ ኣብኣ ይወድቕ። 

     ¹⁵ንልቢ ቘልዓ ዕሽነት ተቘራንይዎ ኣሎ፡ ሸቦጥ መቕጻዕቲ ግና ካብኡ የርሕቖ። 

     ¹⁶ንድኻ ዘጥቅዖ የሃብትሞ፡ ንሃብታም ዝህቦ ኣብ ስእነት ጥራይ የብጽሖ። 

     ^17-18ኣብ ውሽጥኻ ኣንተ ኣርነብካየን፡ ኵላተን ኣብ ከናፍርካ እንተ ኣለዋስ፡ ጥዑም እዩ እሞ፡ እዝንኻ ጽሎ፡ ቃላት ጠቢባን      ከኣ ስማዕ፡ ብልብኻ ናብ ፍልጠተይ ኣቕልብ። 

     ¹⁹እምንቶኻ ብእግዚኣብሄር ምእንቲ ክኸውንሲ፡ ኣነ ሎሚ ንኣኻ፡ እወ ንኣኻ ምሂረካ። 

     ^20-21ነቶም ዝልእኩኻ ቃላት ሓቂ ምእንቲ ኽትመልስ፡ ርግጽ ነገርን ቃላት ሓቅን ምእንቲ ኸፍልጠካ ኢለስ፡ ድሮዶ ናይ ምኽርን ናይ ፍልጠትን ብሉጽ ነገር ኣይጸሓፍኩልካን እየ፡ 

     ^22-23እግዚኣብሄር ክማጐተሎም፡ ነቶም ገፈፍቶም ከኣ ህይወቶም ክገፎም እዩ እሞ፡ ነቲ ድኻስ ድኻ ስለ ዝዀነ፡ ኣይትግፈፎ፡ ንሽጉር ድማ ኣብ ደገ ኣይትጥቅዓዮ። 

     ^24-25መገዱ ምእንቲ ኸይትምሃር እሞ፡ ንነፍስኻ ኸይተፈንጥረላ፡ ምስ ኰራዪ ሰብ ኣይትመሓዞ፡ ምስ ተቘጣዒ ኸኣ ኣይትኺድ። 

     ²⁶ካብቶም ኣሕሊፎም ዝህቡ፡ ንዕዳ ዝወሓሱ ኣይትኹን። 

     ²⁷ምፍዳይ እንተ ሰኣንካስ፡ ስለምንታይ እዩ መንጸፍካ ኻብ ትሕቴኻ ዝወስድ፡ 

     ²⁸ኣቦታትካ ዘቘምዎ ናይ ቀደም ደረት ኣይተዝብል። 

     ²⁹ኣብ ዕዮኡ ፈጣን ዝዀነ ሰብዶ ርኢኻ ትፈልጥ፡ ንሱ ኣብ ቅድሚ ነገስታት እዩ ዝቐውም፡ኣብ ቅድሚ ታሕቶት ሰባት ኣይቀውምን።

        መ. ምሳሌ  ምዕራፍ 23            

     ¹ኣብ መኣዲ ምስ መኰነን እንተ ተስራዕካ፡ መን ከም ዝዀነ ኣብ ቅድሜኻ ዘሎ ኣጸቢቕካ ኣስተብህል፡ 

²ስሱዕ እንተ ዀንካስ፡ ንጐሮሮኻ ኻራ ኣቕርበሉ፡ 

³ጠባሪ ብልዒ እዩ እሞ፡ ነቲ ጥዑም በባልዑ ኣይትብሃጎ። 

     ⁴ሃብታም ክኸውን ኢልካ ኣይትጽዓር፡ ንጥበብካ ኣብኡ ኣይተውዕሎ። 

⁵ከምቲ ንሰማይ ኣቢሉ ዝነፍር ንስሪ፡ ብርግጽ ኣኽናፍ የውጽእ እዩ እሞ፡ ኣዒንትኻዶ ናብቲ ዘየሎ ኸተውድቕ ኢኻ፡ 

⁶ናይ ክፉእ ዝዓይኑ እንጌራ ኣይትብላዕ፡ ጣዕሚ መብልዑ ኸኣ ኣየብህግካ፡ 

⁷ብላዕ ስተ፡ ይብለካ፡ ኣብ ውሽጡ ግና ተጸባጻቢ እዩ እሞ፡ ልቡ ምሳኻ ኣይኰነን። 

⁸ነታ ዝበላዕካያ ዅላሶ ኽትተፍኣ ኢኻ፡ ነቲ ጽቡቕ ዘረባኻውን ከተጥፍኦ ኢኻ። 

     ⁹ዓሻ ነቲ ጥበብ ዘረባኻ ይንዕቆ እዩ እሞ፡ ኣብ ኣዝኑ ኣይትዛረብ። 

     ¹⁰ናይ ቀደም ደረት ኣይይተዝብል፡ ናብ ግራት ዘኽታማት ከኣ ኣይታቶ። 

     ¹¹እቲ ጠበቓኦም ብርቱዕ እዩ እሞ፡ ባዕሉ ኣብ ክንዳኦም ክማጐተልካ እዩ። 

     ¹²ልብኻ ናብ ተግሳጽ ፡ ኣእዛንካ ድማ ናብ ቃላት ፍልጠት ኣቕልብ። 

     ¹³ንቘልዓ ብሸቦጥ እንተ ግረፍካዮ፡ ኣይመውትን እዩ እሞ፡ ብዘይ መቕጻዕቲ ኣይትግደፎ። 

     ¹⁴ብሸቦጥ ትገርፎ እሞ፡ ንነፍሱ ኻብ ሲኦል ተድሕና። 

     ¹⁵ወደየ፡ ልብኻ ጥበበኛ እንተ ዀነ፡ ኣነውን ልበይ ይሕጐስ፡ 

     ¹⁶እወ፡ ከናፍርካ ቅንዕና እንተ ተዛረበ፡ ኰላሊተይ ደስ ይብለን። 

     ^17-18ብርግጽ ዓስቢ ኣሎ፡ ትጽቢትካ ኸኣ ከንቱ ኣይክኸውንን እዩ እሞ፡ ልብኻ ዅሉ መዓልቲ ፍርሃት እግዚኣብሄር ይሃልዎ እምበር፡ ብሓጢኣተኛታት ኣይቕናእ። 

     ¹⁹ኣታ ወደየ፡ስማዕ እሞ ጥበበኛ ኹን፡ ንልብኻውን ብመገዲ ኣቕንዓዮ። 

     ^20-21ሰካርን ህሩፍን ይደኽዩ፡ ድቃስ ከኣ ጨርቂ የኽድን እዩ እሞ፡ ኣብ ማእከል ሰተዪ ወይኒ፡ ኣብ ማእከል ህሩፋት በላዕቲ ስጋ ኣይትኹን። 

     ²²ነቲ ዝወለደካ ኣቦኽ ስምዓዮ፡ ኣዴኻ ምስ ኣረገት ከኣ ኣይትንዓቃ። 

     ²³ንሓቂ ዓድጋ እሞ ኣይትሽጣ፡ ንጥበብን ተግሳጽን ኣእምሮ ኸኣ። 

     ²⁴ኣቦ ጻድቕ ብዙሕ ይሕጐስ፡ ጥበበኛ ወዲ ዝወለደ ኸኣ ብእኡ ባህ ይብሎ። 

²⁵ኣቦኻን ኣዴኻን ብኣካ ባህ ይበሎም፡ እታ ዝወለደትካ ድማ ባህ ይበላ። 

     ²⁶ወደየ፡ ልብኻ ሃበኒ፡ ኣዒንትካ ድማ ብመገደይ ደስ ይበለን። 

²⁷ኣመንዝራስ ዓሚቝ ዓዘቕቲ እያ፡ ሰበይቲ ኻልእ ጸቢብ ጕድጓድ እያ። 

²⁸ከም ከታሪ ተድቢ፡ ንብዙሓት ሰብውን ጠለምቲ ትገብሮም። 

     ²⁹ዋይዋታ ንመን እዩ፡ ሓዘን ንመን እዩ፡ ባእሲ ንመን እዩ፡ ምስቍርቋር ንመን እዩ፡ብዘይምኽንያት ምቝሳል ንመን እዩ፡ ምቕያሕ ዓይንስ ንመን እዩ፡ 

³⁰ነቶም ኣብ ምስታይ ወይኒ ዝድንጕዩ፡ ነቶም ዝደረቐ ወይኒ ኽመርጹ ዝእከቡ እዩ። 

³¹ወይኒ ምቕያሑ፡ ኣብ ብርለ ምውዕዋዑ፡ ጥዒሙ ምውራዱ ኣይትጠምቶ። 

³²ኣብ መወዳእታ ኸም ተመን ይነክስ፡ ከም ኣፍዑት ሕንዙ ፋፍ የብል። 

³³ኣዒንትኻ ሕውዝውዝ ይብላ፡ ልብኻውን ጠዋይ ነገር ይዛረብ። 

³⁴ኣብ ውሽጢ ባሕሪ በጥ ከም ዝበለ፡ ኣብ ጫፍ ደቐል ከም ዝደቀሰ ኢኻ እትኸውን፡ 

³⁵ወቒዖምንስ ኣይትሰምዓንን፡ ዘቢጦምንስ ኣይተፈለጠንን፡ መኣዝ ክነቅሕ እየ፡መሊሰ ኽደልዮ እየ።

        መ. ምሳሌ  ምዕራፍ 24            

     ^1-2ልቦም ግፍዒ እዩ ዝሓስብ፡ ከናፍሮም ድማ ጥፋኣት እየን ዝዛረባ እሞ፡ በቶም እኩያት ኣይትቕናእ፡ ምሳታቶም ክትነብርውን ኣይትድለ። 

     ³ቤት ሳላ ጥበብ ይህነጽ፡ ሳላ ምስትውዓል ከኣ ይጸንዕ። 

⁴ክፍልታት ቤት ሳላ ፍልጠት እዩ ኽቡርን ጽቡቕን ዘበለ ዅሉ ጥሪት ዝመልእ። 

     ⁵ጥበበና ሰብ ብርቱዕ እዩ፡ ኣእምሮ ዘለዎ ኸኣ ሓይሉ የጽንዕ። 

⁶እምብኣርሲ ብጥበብ ተመሪሕካ ተዋጋእ፡ ደሓን ከኣ ብምብዛሕ መኸርቲ እዩ። 

     ⁷ጥበብ ነቲ ዓሻ ኣዝያ ላዕሊ እያ፡ ኣፉ ኣብ ደገ ኣይከፍትን። 

⁸እከይ ክገብር ዝሃስብ ሰብሲ፡ ሰራሕ ነገር እዩ ዝበሃል። 

     ⁹ምህዞ ዓሻ ሓጢኣት እዩ፡ መላገጺ ኸኣ ብሰብ ፍንፉን እዩ። 

¹⁰ብመዓልቲ መከራ እንተ ተሓለልካ፡ ሓይልኻ ቕሩብ እዩ። 

     ¹¹ነቶም ናብ ሞት ዝጕተቱ ኣናግፎም፡ ነቶም ሰንከልከል እናበሉ ናብ ማሕረዲ ዝኸዱ ኸኣ ኣይትሕደጎም። 

¹²እንሆ፡ እዝስ ኣይፈለጥናን፡ እንተ በልካ፡ እቲ ልቢ ዝመዝንዶ ኣየስተብህሎን እዩ፡ እቲ ንነፍስኻ ዝጥንቀቐላስ ኣይፈልጦን ድዩ፡ ንሱ ኸኣ ንነፍሲ ወከፍ ከከም ግብሩ ኽፈድዮ እዩ። 

     ¹³ወደየ፡ ጽቡቕ እዩ እሞ፡ መዓር ብላዕ፡ ወለላ መዓር ንትንሓግካ ጥዑም እዩ። 

¹⁴ከምኡውን ንነፍስኻ ጥበብ ተምሃር እምበር፡ እንተ ረኸብካያስ ጻማ ኣሎ፡ ትጽቢትካውን ኣይክቝረጽን እዩ። 

     ¹⁵ኣታ ረሲእ፡ ንቤት ጻድቕ ኣይተድብየላ፡ ነታ መዕረፊኡ ኣይትሃውካ። 

¹⁶እቲ ጻድቕ ሾብዓተ ሳዕ ይወድቕ እሞ ይትንስእ፡ ረሲኣን ግና ናብ መከራ ይጸድፉ። 

     ^17-18እግዚኣብሄር ነዚ ርእዩ ኸይጉሂ እሞ ዅራኡ ኻብኡ ኸይመልስሲ፡ ጸላኢኻ እንተ ወደቐ፡ ኣይትተሓጐስ፡ እንተ ጸደፈ ኸኣ፡ ልብኻ ደስ ኣይበሎ። 

     ^19-20እኩይ ሰብ ውሬታ የብሉን፡ ቀንዴል ረሲኣን ከኣ ይጠፍእ እዩ እሞ፡ በቶም እከይ ዝገብሩ ኣይተንጽርጽር፡ በቶም ረሲኣን ኣይትቕናእ። 

     ²¹ወደየ፡ ንእግዚኣብሄርን ንንጉስን ፍርሃዮም፡ ምስ ዓለወኛታት ኣይትጸንበር። 

     ²²ብድንገት መዓት ክወርዶም እዩ እሞ፡ ንጥፍኣት ክልቲኦም መን እዩ ዝፈልጦ፡ 

     ²³እዚውን ካብ ጠቢባን እዩ፡ ኣብ ፍርዲ ኣድልዎ ምግባር ሰናይ ኣይኰነን። 

     ²⁴ነቲ በደለኛስ፡ ጻድቕ ኢኻ ዝብሎ፡ ህዝብታት ክረግምዎ፡ ኣህዛብውን ክፍንፍንዎ እዮም። 

²⁵እቶም ዝግስጽዎ ግና ደሓን ክዀኑ እዮም፡ ኣብ ልዕሊኦም በረኸትን ጽቡቕ ዕድልን ክወርድ እዩ። 

     ²⁶ቅኑዕ ምላሽ ዝህብ፡ ከናፍር ይስዕም። 

     ²⁷ናይ ወጻኢ ዕዮኻ ኣሰናዱ፡ ኣብ ግራት ከኣ ንኣኻ ኣዳሉ፡ ደሓር ቤትካ ስራሕ። 

     ²⁸ንብጻይካ ብዘይ ምኽንያት መስኪርካ ኣይትጕድኣዮ፡ ብኸናፍርካ ድማ ኣይትጠበር። 

     ²⁹ከምታ ዝገበረኒ ኽገብሮ፡ ብሰብ ከም ግብሩ ኽፈድዮ እየ፡ ኣይትበል። 

     ³⁰ኣነ ብግራት ሃካይ፡ ብናይቲ ኣኣምሮ ዘይብሉ ኣታኽልቲ ወይኒ ሓለፍኩ፡ 

³¹እንሆ ድማ፡ ተዀርባ በቝልዎ፡ ቈጥቋጥ ውሒጥዎ፡ እቲ መካበብያ እምኒውን ፈሪሱ። 

³²ልበይ ኣውዲቐ ኣብኡ ተመልከትኩ፡ ንእኡ ርእየ ድማ ትምህርቲ ረኸብኩ፡ 

³³ቅሩብ ድቃስ፡ ቅሩብ ትኽስታ፡ ምእንቲ ኽትዓርፍ ቅሩብ ኣእዳውካ ምምስቃል፡ 

³⁴ሽዑ ድኽነትካ ገስጊሱ፡ ንዴትካ ኸኣ ከም እተሰለፈ ሰብኣይ ይመጸካ።

        መ. ምሳሌ  ምዕራፍ 25            

     ¹እዘን ምስላታት እዚአን ድማ ናይ ሰሎሞን እየን፡ ናይ ህዝቅያስ ንጉስ ይሁዳ ሰባት ከኣ ኣኽበብወን። 

     ²ክብሪ ኣግዚኣብሄርሲ ምስዋር ነገር እዩ፡ ክብሪ ነገስታት ግና ምምርማር ነገር እዩ። 

     ³ልዕልና ሰማይን መዓሙቝ ምድርን ልቢ ነገስታት ኣይተመርማርን እዩ። 

     ⁴ንብሩር ካብ ዛዕጉ ኣጽርዮ እሞ፡ ሽዑ ነንጠረኛ ኣቕሓ ይወጸሉ። 

     ⁵ንረሲእ ካብ ቅድሚ ንጉስ ኣርሕቆ፡ ሽዑ ዝፋን ንጉስ ብጽድቂ ይጸንዕ። 

     ^6-7ኣብ ቅድሚ እቲ ኣዒንትኻ ዝረኣያኦ መስፍን ካብ እትዋረድሲ፡ ናብዚ ልዕል በል፡ ክብሉኻ ይሕሸካ እሞ፡ ኣብ ቅድሚ ንጉስ ኣይትጀሃር፡ ኣብ ቦታ ዓበይቲ ኣይትቝም። 

     ⁸ብጻይካ ምስ ኣሕፈረካ፡ ኣብ መወዳእታ እትገብሮ ኸይጠፍኣካስ፡ ናብ ባእሲ ኣይትቐልጥፍ። 

     ^9-10ዝሰምዐ ኸይጸርፈካ፡ ስምካ ኸኣ ከይከፍእሲ፡ ነገርካ ምስ ብጻይካ ተማጻረ፡ ምስጢር ካልእ ግና ኣይትቕላዕ። 

     ¹¹ብግቡእ ግዜ እተዘርበ ቓል ከም ሮማን ወርቂ ኣብ ጻሕሊ ብሩር እዩ። 

     ¹²ንትሰምዕ እዝንስ ጥበበኛን ገላጺ ኸም ቀለቤት ወርቅን ከም ስልማት ጽሩይ ወርቅን እዩ። 

     ¹³እሙን ልኡኽ ነቶም ዝልእክዎ ኸምቲ ዛሕሊ ውርጪ ብግዜ ቕውዒ እዩ፡ ንሱ ንነፍሲ ጐይታኡ የቕስና። 

     ¹⁴ብዛዕባ ህያቡ ብሓሶት ዝጅሃር ሰብሲ፡ ከምቲ ዝናም ዘይብሉ ደበናን ንፋስን እዩ። 

     ¹⁵ፈራዲ ብትዕግስቲ ይቕልስ፡ ልዙብ መልሓስ ከኣ ኣዕጽምቲ ይሰብር። 

     ¹⁶መዓር እንተ ረኸብካ፡ እምብዛ ኸይትጸግብ እሞ ከይትተፍኦስ: ዝኣኽለካ ብላዕ። 

     ¹⁷ብጻይካ ኸይመንወካ እሞ ከይጸልኣካስ፡ ናብ ቤቱ እግርኻ ኣይተዘውትር። 

     ¹⁸እቲ ኣብ ብጻዩ ሓሶት ዝምስክርሲ ሞደሻን ሰይፍን በሊሕ ፍላጻን እዩ። 

     ¹⁹ጠላሚ ሰብ ብመዓልቲ ጸበባ ንዝጽግዖ፡ ብዅባዅ ስንን መንሳተቲ እግርን እዩ። 

     ²⁰ንሕዙን ልቢ ደርፊ ዝደርፈሉስ ከምቲ ብግዜ ቝሪ ንመደረብታኡ ዝቕንጥጦን ኣብ ጨው ከኣ መጺጽ ዘእትወሉን እዩ። 

     ²¹ጸላኢኻ እንተ ጠመየ፡ እንጌራ ኣብልዓዮ፡ እንተ ጸምአውን፡ ማይ ኣስትዮ። 

     ²²በዚ ኸምዚ ጓህሪ ኣብ ርእሱ ትእክብ፡ እግዚኣብሄር ከኣ ክፈድየካ እዩ። 

     ²³ንፋስ ሰሜን ዝናም የምጽእ፡ ሓማይት ልሳን ከኣ ገጽ ተጸውግ። 

     ²⁴ካብ ምስ ናግራም ሰበይቲ ኣብ ሓደ ቤትሲ፡ ኣብ ዝባን ናሕሲ ብሓደ ወገን ምቕማጥ ይሓይሽ። 

     ²⁵ካብ ርሑቕ ሃገር ዝመጸ ብስራት፡ ከም ዝሑል ማይ ንዝጸምአት ነፍሲ እዩ። 

     ²⁶ኣብ ቅድሚ ረሲእ ሰንከልከል ዝብል ጻድቕ፡ ከምቲ ኣተዘርገ ዓይኒ ማይን ከም ዝሰበበ ዔላን እዩ። 

     ²⁷መዓር ኣብዚሕካ ምብላዕ ጽቡቕ ኣይኰነን፡ ከምኡውን ከቢድ ነገር ምምርማር ዘሸግር እዩ። 

     ²⁸መንፈሱ ዘይገትእ ሰብሲ ቀጽሪ ዘይብላ ዝፈረሰት ከተማ እዩ።

        መ. ምሳሌ  ምዕራፍ 26            

     ¹ከምቲ በረድ ንጽብሓት፡ ዝናም ከኣ ንቐውዒ፡ ከምኡውን ንዓሻ ኽብረት ኣይግብኦን። 

     ²ምኽንያት ዘይብሉ መርገምሲ ኸምታ እትነፍር ጭሩ፡ ከምታ እትበርር ለዃዂቶ ኣይበጽሕን እዩ። 

     ³ሓለንጊ ንፈረስ፡ ልጓም ንኣድጊ፡ በትሪ ንዝባን ዓሻ እዩ። 

     ⁴ንስኻ ድማ ንእኡ ኸይትመስልሲ፡ ንዓሻ ኸም ዕሽነቱ ኣይትምለሰሉ። 

     ⁵ዓሻ፡ ጠቢብ ከም ዝዀነ ኸይመስሎስ፡ ከም ዕሽነቱ ምለሰሉ። 

     ⁶እቲ ብኢድ ዓሻ መልእኽቲ ዝሰድድ ባዕሉ ኣእጋሩ ይቘርጽ እሞ መከራ ይሰቲ። 

     ⁷ኣእጋር መጻጕዕ ጠልጠል ይብላ፡ ምስላ ኸኣ ኣብ ኣፍ ዓያሱ ኸምኡ እዩ። 

     ⁸ንዓሻ ኽብረት ምሃብሲ፡ ከምቲ ኸረጺት ዕንቁ ናብ ምራ እምኒ ምድርባይ እዩ። 

     ⁹ምስላ ኣብ ኣፍ ዓያሱ ኸም እሾኵ ኣብ ኢድ ሰካር እዩ። 

     ¹⁰እቲ ምስ ዓሻን ምስ ሓላፍ መገድን ዝውዓዓል፡ ከምቲ ንዝረኸበ ዝወግእ ወርዋር ፍላጻ እዩ። 

     ¹¹ከልቢ ናብ ትፋኡ ኸም ዝምለስ፡ ዓሻ ኸምኡ ንዕሽነቱ ይደጋግሞ። 

     ¹²ኣነ ጥበበኛ እየ፡ ዝብል ሰብዶ ርኢኻ ትፈልጥ፡ ካብ ብእኡስ ብዓሻ ተስፋ ምግባር ይበልጽ። 

     ¹³እቲ ሃካይ፡ ኣብ መገዲ ኣንበሳ ኣሎ፡ አረ ኣብ ኣደባባይ ኣንበሳ ኣሎ፡ ይብል። 

¹⁴ከምቲ ማዕጾ ኣብ ወንድወንዶኡ፡ ሃካይውን ከምኡ ኣብ ዓራት ይዘውር። 

¹⁵ሃካይ ንኢዱ ናብ ጻሕሊ የእትዋ እሞ፡ ናብ ኣፉ ምምላስ ድኻም ይዀኖ። 

¹⁶ሃካይሲ ኻብ ሾብዓተ ሰብ ብምስትውዓል ዝምለሱ ንሱ ብጥበብ ዝበለጸ ይመስሎ። 

     ¹⁷እቲ ናብ ዘይነገሩ ዘኣቱ ሓላፍ መገዲ ከምቲ ንእዝኒ ኸልቢ ዝሕዝ እዩ። 

     ^18-19እቲ ንብጻዩ ጠቢርዎስ፡ ክጻወተካ እየ ዝገበርክዎ፡ ዝብል እያድን ፍላጻን ሞትን ከም ዝውርውር ዕቡድ እዩ። 

     ²⁰ዕጨይቲ እንተ ተወድአ፡ ሓዊ ይጠፍእ፡ ሓማዪ እንተ ዘየሎ ኸኣ ባእሲ ይውዳእ። 

²¹ከሰል ንጓህሪ ዕጨይቲ ንሓዊ ኸም ዝኸውን፡ ናግራም ሰብኣይ ከኣ ከምኡ ባእሲ የሳውር። 

²²ዘረባ ሓማዪ ኸኣ ጥዑም ኵላሶ እዩ እሞ፡ ክሳዕ ውሽጢ መዓንጣ ይወርድ። 

     ²³ርሱን ከናፍርን እኩይ ልብንሲ ብዓፍራ ብሩር ከም እተለበጠ ኣቕሓ መሬት እዩ። 

²⁴ጸላኢ ብኸናፍሩ የምስል፡ ኣብ ውሽጡ ግና ጥበራ የንብር። 

²⁵ኣብ ልቡ ሾብዓተ ዘፈንፍን ኣለዎ እሞ፡ ድምጹ ኣልዚቡ እንተ ተዛረበ እኳ፡ ኣይትእመኖ። 

²⁶ጽልኡ ብተንኰል እንተ ተሓብአ እኳ፡ ክፍእቱስ ኣብ ማሕበር ክቕላዕ እዩ። 

     ²⁷ጕድጓድ ዝዅዕት ኣብኣ ይወድቕ፡ እምኒ ዘንከባልል ከኣ ንሳ ትምለሶ። 

     ²⁸ሓሳዊት ልሳን ነቶም ዘቝሰለቶም ትጸልኦም፡ መቀባጠሪ ኣፍ ከኣ ጥፍኣት የምጽእ።

        መ. ምሳሌ  ምዕራፍ 27            

     ¹መዓልቲ እትወልዶ ኣይትፈልጥን ኢኻ እሞ፡ ብጽባሕ ኣይትመካሕ። 

     ²ካልእ ይንኣድካ፡ ጓና እምበር፡ ከናፍርካ ኣይኰነን። 

     ³እምኒ ኸቢድ እዩ፡ ሑጻ ኸኣ ረዚን እዩ፡ ካብ ክልቲኡ ግና ኣንጸርጽሮት ዓሻ ይኸብድ። 

     ⁴ቍጥዓ ጨካን እዩ፡ ኵራውን ውሒዝ እዩ፡ ኣብ ቅድሚ ቅንኢ ግና መን ደው ይብል፡ 

     ⁵ካብ ሕቡእ ፍቕሪ ግሉጽ ተግሳጽ ይሓይሽ። 

     ⁶ናይ ፈታዊ ምቝሳል እሙን እዩ፡ ጸላኢ ግና ኣብዚሑ ይስዕም። 

     ⁷ንዝጸገበት ነፍስስ ወለላ መዓር ትርግጽ፡ንዝጠመየት ነፍሲ ግና ኵሉ መሪር እኳ ጥዑም እዩ። 

     ⁸ካብ ቤቱ ወጺኡ ዝዅብልል ሰብ፡ ቤታ ሓዲጋ ኸም እትዅብልል ዑፍ እዩ። 

     ⁹ቅብእን ዕጣንን ንልቢ የሓጕሶ፡ ጣዕሚ ፈታዊ ምስናይ ምኽሪ ነፍሱ ኸኣ ከምኡ እዩ። 

     ¹⁰ፈታዊኻን ፈታው ኣቦኻን ኣይትሕደግ፡ ብመዓልቲ ጸበባኻ ናብ ቤት ሓውካ ኣይትኺድ፡ ካብር ርሑቕ ዘሎ ሓውስ ኣብ ቀረባ ዘሎ ጐረቤት ይሕርይሽ። 

     ¹¹ወደየ፡ ነቲ ዝጸርፈኒ ምላሽ ምሃቡ ክኽእልሲ፡ ጥበበኛ ኹን፡ ንልበይውን ኣሕጕሶ። 

     ¹²ኣስተውዓሊ ሰብሲ እከይ ይርኢ እሞ ይሕባእ፡ ገርህታት ግና ንቕድሚት ይኸዱ እሞ ብእኡ ይጕድኡ። 

     ¹³ነቲ ንጓና እተዋሕሰ ኽዳኑ ውሰደሉ፡ ኣብ ክንዲ እታ ጓና ኻብኡ ታሕዚ ውሰድ። 

     ¹⁴እቲ ኣንጊሁ ዓው ኢሉ ንብጻዩ ዝምርቖ፡ ከም ዝረግም እዩ ዝቝጸር። 

     ¹⁵ብመዓልቲ ጥሚቕ ከየቛረጸ ዝነጥብ ቤትን ናግራም ሰበይትን ሓደ እዮም። 

     ¹⁶ንእኣ ምዕጋትሲ ንንፋስ ምዕጋትን ብየማነይትኻ ዘይቲ ምዕማዅን እዩ። 

     ¹⁷ሓጺን ንሓጺን ይስሕሎ፡ ከምኡ ኸኣ ሰብ ንገጽ ብጻዩ ይስሕሎ። 

     ¹⁸ንበለስ ዝኸናኸን፡ ፍሬኣ ይበልዕ፡ ንጐይታኡ ዝከናኸን ከኣ ይኸብር። 

     ¹⁹ከምቲ ገጽ ንገጽ ኣብ ማይ ዘርእዩ፡ ከምኡ ኸኣ ልቢ ሰብ ንሰብ ይርእዮ። 

     ²⁰ሲኦልን መዓመቝን ከቶ ኣይጸግቡን፡ ከምኡውን ኣዒንቲ ሰብ ኣይጸግባን እየን። 

     ²¹መምከኺ ንብሩር፡ እቶን ንወርቂ እዩ፡ ሰብ በቲ ዝነኣዶ ይፍለጥ። 

     ²²ንዓሻ ኣብ ሞጕእ ምስ ጕርዲ ብንኢ እንተ ትጐድኦ እኳ፡ እቲ ዕሽነቱ ኣይምሓደጎን። 

     ^23-24ሃብቲ ንሓዋሩዘውዲውን ንውሉድ ወለዶ ኣይነብርን እዩ እሞ፡ ሃለዋት ኣባጊዕካ ኣጸቡቕካ ፍለጥ፡ ንልብኻ ኣብ መጓሴኻ ኣንብሮ። 

²⁵ዕላም ሓሊፉ ለቕሚ በቝሉ፡ ኣብ ኣኽራን ድማ መኸል ተኣኪቡ። 

²⁶ዕያውቲ ንኽዳንካ፡ ድቤላውን መዓድግ ግራት ኣሎካ፡ 

²⁷ጸባ ኣጣል ንምግብኻን ንምግቢ ስድራኻን ንቐለብ ኣግራድኻን ክኣክል እዩ።

        መ. ምሳሌ  ምዕራፍ 28            

     ¹ረሲኣን ዝሰጎም ዘይብሎም ይሃድሙ፡ ጻድቃን ግና ከም ሽደን ኣንበሳ ይተብዑ። 

     ²ብሰሪ ኣበሳ ሃገርሲ ሓለቓታታ ይበዝሑ፡ ብሳላ ኣስተውዓልን ጥበበኛን ሰብ ግና ህልዋታ ይነውሕ። 

     ³ንመስኪን ዘጨንቕ ድኻስ፡ ከምቲ ደምሲሱ እንጌራ ዝኸልእ ዝናም እዩ። 

     ⁴መፍረስቲ ሕጊ ንረሲኣን ይንእድዎም፡ ሓለውቲ ሕጊ ግና ይዋግእዎም። 

     ⁵እኩያት ሰባትሲ ቅንዕና ኣየስተውዕሉን፡ እቶም ንእግዚኣብሄር ዝደልይዎ ግና ኵሊ የስተውዕሉ። 

     ⁶ካብቲ ብጠዋይ መገዲ ዝኸይድ ሃብታምሲ፡ ንብጽህና ዝመላለስ ድኻ ይሓይሽ። 

     ⁷ንሕጊ ዝሕልዎስ ኣስተውዓሊ ውሉድ እዩ፡ ምስ ሓሻሻት ዝመሓዞ ግና ነቦኡ የሕፍሮ። 

     ⁸እቲ ብዘይ ግባእ ረብሓን ሓረጣን ገንዘቡ ዘብዝሕ፡ ነቲ ንመሳኺን ዝርሕርሓሎም ይእክበሉ። 

     ⁹እቲ ሕጊ ከይሰምዕ ኢሉ እዝኑ ዝመልስ፡ ጸሎቱ እኳ ፍንፉን ኡዩ። 

     ¹⁰እቲ ንቕኑዓት ኣጋግዩ ናብ እኩይ መገዲ ዘእትዎም፡ ባዕሉ ኣብ ጕድጓድ ይወድቕ፡ እቶም ፍጹማት ግና ሰናይ ክወርሱ እዮም። 

     ¹¹ሃብታም ሰብ ጥበበኛ ዝዀነ ይመስሎ፡ ግናኸ ኣእምሮ ዘለዎ ድኻ ይዕዘቦ። 

     ¹²ጻድቃን እንተ ተዓወቱ፡ ዓብዪ ኽብሪ ይኸውን፡ ረሲኣን ልዕል እንተ በሉ ግና፡ ሰብ ይሕባእ። 

     ¹³ገበኑ ዝኽውል ኣይሰልጦን፡ እቲ ዝናዘዘሉ እሞ ዝሓድጎ ግና ምሕረት ይረክብ። 

     ¹⁴ኵሉ ግዜ ዝፈርህ ሰብ ብጹእ እዩ፡ ልቡ ዘትርር ግና ኣብ መከራ ይወድቕ። 

     ¹⁵ኣብ ድኻ ህዝቢ ዝገዝእ ረሲእ ከም ዝጓዝም ኣንበሳን ከም ጥሙይ ድብን እዩ። 

     ¹⁶ኣእምሮ ዘይብሉ መስፍን ብዙሕ ይገፍዕ፡ ንፍገት ዝጸልእ ግና መዓልትታቱ የንውሕ። 

     ¹⁷ደም ነፍሲ ዝኸበዶ ሰብ ክሳዕ መቓብር ይሃድም፡ ሓደ እኳ ኣይዕገቶ። 

     ¹⁸ብዘይ መንቅብ ዝመላለስ ይድሕን፡ ብጠዋይ መገዲ ዝኸይድ ግና ብኡብኡ ይወድቕ። 

     ¹⁹ግራቱ ዝከናኸን እንጌራ ይጸግብ፡ ደድሕሪ ምናምን ዝስዕብ ግና ሽጋር ይጸግብ። 

     ²⁰እሙን ሰብ ኣዝዩ ይባረኽ፡ እቲ ኽህብትም ኢሉ ዝህወኽ ግና ከይተቐጽዐ ኣይተርፍን። 

     ²¹ኣድልዎ ሰናይ ኣይኰነን፡ ሰብ ምእንቲ ቝራስ ኣንጌራ ይብድል። 

     ²²ክፉእ ዝዓይኑ ሰብ ክህብትም ይቕልጥፍ፡ ሽጋር ከም ዝወርዶ ኸኣ ኣይፈልጥን። 

     ²³ካብቲ ብልዙብ ልሳን ዘቀባጥርሲ፡ እቲ ንሰብ ዝግስጾ ደሓር ዝበለጸ ሞገስ ይረክብ። 

     ²⁴እቲ ኻብ ኣቦኡን ኣዲኡን ዝሰርቕ እሞ፡ ሓጢኣት ኣይኰነን፡ ዝብል፡ ንሱ መሓዛ መጣፍኢ እዩ። 

     ²⁵ረብሓ ዝሃርፍ ሰብ ባእሲ የልዕል። ብእግዝኣብሄር ዝእመን ግና ይጸግብ። 

     ²⁶ብልቡ ዝእመን ዓሻ እዩ፡ ብጥበብ ዝመልለስ ግና የምልጥ። 

     ²⁷ንድኻ ዝህብ ገለ ኣይጐድሎን፡ ነቲ ኣዒንቱ ዝዕምቶ ግና ብዙሕ መርገም ይወርዶ። 

     ²⁸ረሲኣን ልዕል እንተ በሉ፡ ሰብ ይሕባእ፡ እንተ ጠፍኡ ግና፡ ጻድቃን ይዕምሩ።

        መ. ምሳሌ  ምዕራፍ 29            

     ¹እቲ ብዙሕ ተገሲጹ ክሳዱ ዘትርር ሰብ ብድንገት ይጭፍለቕ፡ መድሃኒትውን የብሉን። 

     ²ጻድቃን እንተ ዓመሩ፡ ህዝቢ ይሕጐስ፡ ረሲእ እንተ ሰልጠነ ግና፡ ህዝቢ የስቈርቍር። 

     ³ጥበብ ዝፈቱ ሰብ ነቦኡ የሐጕሶ፡ ምስ ኣመናዝር ዝመሓዞ ግና ገንዘቡ ይውድእ። 

     ⁴ንጉስ ንሃገር ብፍርዲ የጽንዓ፡ ፈታው መማለጃ ግና የጥፍእ። 

     ⁵እቲ ንብጻዩ ዘቀባጥረሉ ነእጋሩ መጻወድያ ይገብረሉ። 

     ⁶ኣብ ገበን እኩይ ሰብ መፈንጠራ ኣሎ፡ ጻድቕ ግና እልል ይብል ይሕጐስውን። 

     ⁷ጻድቕ ንገበን ድኻታት የስተውዕሎ፡ ረሲእ ግና ምስትውዓል ኣይፈልጥን። 

     ⁸መላገጽቲ ሰብ ከተማ የንድዱ፡ ጠቢባን ግና ኵራ ይመልሱ። 

     ⁹ጠቢብ ምስ ዓሻ እንተ ተማጐተ፡ ወይ ይዅሪ ወይ ከኣ ይስሕቕ፡ ዕረፍቲ የብሉን። 

     ¹⁰እቶም መፍሰስቲ ደም ንፍጹም ሰብ ይጸልእዎ፡ ቅኑዓት ግና ነፍሱ ይደልዩ። 

     ¹¹ዓሻ ንዅሉ ዅራኡ ይድርጕሖ፡ ጥበበኛ ግና ይዓግቶ የህድኦውን። 

     ¹²እቲ ብሓሶት ጽን ዝብል መኰንን፡ ኵሎም ገላውኡ ረሲኣን እዮም። 

     ¹³ድኻን ጠቓዕን ይራኸቡ፡ ነዒንቲ ኽልቲኦም ዘብርህ እግዚኣብሄር እዩ። 

     ¹⁴እቲ ንመስኪን ብቕንዕና ዘፈርዶም ንጉስ፡ ዝፋኑ ንሓዋሩ ይጸንዕ። 

     ¹⁵ሸቦጥን ተግሳጽን ጥበብ ይህብ፡ ስዲ ዝኸደ ውሉድ ግና ንወላዲቱ የሕፍር። 

     ¹⁶ረሲኣን እንተ በዝሑ፡ ገበን ይበዝሕ፡ ጻድቃን ግና ውድቀቶም ይርእዩ። 

     ¹⁷ንውሉድካ ቕጽዓዮ እሞ ከዕርፈካ፡ ንነፍስኻውን ተድላ ክዀና እዩ። 

     ¹⁸ራእይ ዘየልቦ እንተ ዀነ፡ ህዝቢ ስዲ ይኸይድ፡ ሕጊ ዝሕሉ ግና ብጹእ እዩ። 

     ¹⁹ባርያ፡ ምንም እኳ እንተ ኣስተውዓለ፡ ኣይእዘዝን እዩ እሞ፡ ብዘረባ ኣይቅጻዕን። 

     ²⁰ተሃዊኹ ዝዛረብ ሰብዶ ርኢኻ፡ ካብ ብእኡስ ብዓሻ ተስፋ ኣሎ። 

     ²¹እቲ ኻብ ንእስነቱ ጀሚሩ ብሕንቃቐ ዝዓበየ ባርያ ኣብ መወዳእታ ውሉድ ይኸውን። 

     ²²ቍጡዕ ሰብ ባእሲ የልዕል፡ ተነቃፊ ሰብ ሓጢኣት የብዝሕ። 

     ²³ንሰብ ትዕቢት የዋርዶ፡ ብመንፈሱ ትሑት ዝዀነ ግና ክብረት ይረክብ። 

     ²⁴እቲ ምስ ሰራቒ ዝሓብር ንነፍሱ ይጸልኣ፡ ንሱ መርገም ይሰምዕ ገለ ኸኣ ኣይገልጽን። 

     ²⁵ንሰብ ምፍራህ ኣብ መፈንጠራ የእቱ፡ብእግዚኣብሄር ዝእመን ግና ኣብ ደሓን ይነብር። 

     ²⁶ብዙሓት ሰብ ሞገስ ገዛኢ ይደልዩ፡ ፍርዲ ነፍሲ ግና ካብ እግዚኣብሄር እዩ። 

     ²⁷ሓጢኣተኛ ሰብ ኣብ ቅድሚ ጻድቃን ፍንፉን እዩ፡ እቲ ብቕኑዕ መገዲ ዝመላለስ ከኣ ኣብ ቅድሚ ረሲኣን ፍንፉን እዩ።

        መ. ምሳሌ  ምዕራፍ 30            

     ¹እዚኣ ናይ ኣጉር ወዲ ያቂ ቃላትን ንግራትን እያ። እቲ ሰብኣይ እቲ ንኢቲኤል፡ ንኢቲኤልን ንኡካልን ከምዚ ይብል፡ 

²ብርግጽ ካብ ዝዀነ ይኹን ሰብ ኣነ ደንቆሮ እየ፡ ኣእምሮ ሰብ የብለይን። 

³ጥበብ ኣይተምሃርኩን፡ ፍልጠት እቲ ቅዱስ የብለይን። 

     ⁴ናብ ሰማይ ዝደየበ እሞ ዝወረደ መን እዩ፡ ንንፋስ ኣብ ዕምኩ ዝኣከቦ መን እዩ፧ ንማያት ኣብ ክዳኑ ዝቘጸሮ መን እዩ፧ ንብዘሎ ወሰናት ምድሪ ዘጽንዐ መን እዩ፧ እንታይ እዩ ስሙ፧ ስም ወዱኸ እንታይ እዩ፧ እዚዶ ትፈልጥ ኢኻ፧ 

     ⁵ቃል ኣምላኽ ብዘሎ ዅሉዕ እዩ፡ ንሱ ነቶም ናብኡ ዝዕቈቡ ዋልታኦም እዩ። 

     ⁶ከይዝልፈካ፡ ሓሳዊ ዄንካ ኸኣ ከይትርከብሲ፡ ናብ ቃሉ ሓንቲ እኳ ኣይትወስኽ። 

     ⁷ኣነ ኽልተ ነገር እየ ዝልምነካ፡ ክሳዕ ዕለተ ሞተይ ንእአን ኣይትኽልኣኒ፡ 

     ^8-9ጸጊበስ ከይክሕደካ እሞ፡ እግዚኣብሄር መን እዩ፧ ከይብል፡ወይ ደኽየስ ከይሰርቕ እሞ ስም ኣምላኸይ ከየቃልልሲ፡ ድኽነትን ሃብትን ኣይትሃበኒ፡ ግናኸ በቲ ዘድልየኒ እንጌራ መግበኒ፡ ከንቱነትን ሓሶትን ኣርሕቐለይ። 

     ¹⁰ምእንቲ ኸይረግመካ፡ በዳሊ ኸኣ ከይትኸውንሲ፡ ንግልያ ኣብ ቅድሚ ጐይታኡ ኣይትሕመዮ። 

     ¹¹ነቦኡ ዝረግም፡ ነዲኡ ኸኣ ዘይምርቕ ወለዶ ኣሎ። 

¹²ርኽሰቱ ዘይተሓጽበስ፡ ኣነ ንጹህ እየ፡ ዝብል ወለዶ ኣሎ። 

¹³ዕቡይ ዝዓይኑ፡ ኵሩዕ ዝቘላሕታኡ ወለዶ ኣሎ። 

¹⁴ነመሳኪን ካብ ምድሪ፡ ንድኻታት ካብ ማእከል ደቂ ሰብ ምእንቲ ኽውሕጦምሲ፡ ሰይፊ ዝስኑ፡ ካራታት ዝዅርምቱ ወለዶ ኣሎ። 

     ¹⁵ዓለቕትስ፡ ሃበኒ፡ ሃበኒ፡ ዝብላ ኽልተ ኣዋልድ ኣለዋኦ። ዘይጸግቡ ሰለስተ እዮም፡ አረ ይኣክል ዝይብሉስ ኣርባዕተ እዮም፡ 

¹⁶ሲኦልን ዘይወልድ ማሕጸንን ማይ ዘይጸግብ መሬትን ይኣኽለኒ ዘይብል ሓውን እዮም። 

     ¹⁷እቲ ነቦኡ ዘባጭዎ ነዲኡ ኸኣ ከይእዘዛ ዝንዕቃ፡ ንዓይኑ ኳዃት ርባ ኽጕጥጕጥዎ፡ ጨጫዊት ንስሪ ኸኣ ኽበልዕዋ እዮም። 

     ¹⁸ኣዝዩ ዝገርመኒ ሰለስተ ነገር ኣሎ፡ አረ ዘይፈልጦስ ኣርባዕተ እዩ፡ 

¹⁹መገዲ ንስሪ ኣብ ሰማይ፡ መገዲ ተመን ኣብ ከውሒ፡ መገዲ መርከብ ኣብ ማእከል ባሕሪ፡ መገዲ ሰብኣይ ምስ ቆንጆ። 

²⁰ኣመንዝራ ሰበይቲውን መገዳ ኸምኡ እዩ፡ በሊዓ እፋ ሕብስ ኣቢላ፡ ገለ እከይ እኳ ኣይገብርኩን፡ ትብል። 

²¹ምድሪ ብሰለስተ ነገር ተንቀጥቅጥ፡ አረ ኽትጾሮ ዝይትኽእልሲ ኣርባዕተ እዩ። 

²²ባርያ እንተ ነገሰ፡ ዓሻ እንጌራ እንተ ጸገበ፡ 

²³እተጸልአት ሰበይቲ ሰብኣይ እንተ ረኸበት፡ ገረድ ከኣ ንእምበይታ እንተ ወረሰታ። 

     ²⁴ኣብ ምድሪ ኣርባዕተ ደቀቕቲ ኣለዉ፡ ግናኸ ኣዝዮም ጥበበኛታት እዮም። 

²⁵ጻጸ ሓይሊ ዘይብሉን ህዝቢ እዩ፡ ግናኸ ምግቡ ብሓጋይ የዳሉ። 

²⁶ጊሔታይ ሃይሊ ዘይብለን ህዝቢ እየን፡ ግናኸ ኣባይተን ኣብ ኣኻውሕ ይገብራ። 

²⁷ኣንበጣ ንጉስ የብሉን፡ ግናኸ በገባብ ሓቢሩ ይጕዓዝ። 

²⁸ጠበቕ ብኢድካ ምሓዙ ዝከኣል እዩ፡ ግናኸ ኣብ ኣደራሽ ነገስታት ይርከብ። 

     ²⁹ስለስተ ብጽቡቕ ኣኻይዳ ይስጕሙ፡ አረ ግሩም ገይሮም ዝራመዱስ ኣርባዕተ እዮም፡ 

³⁰ካብ ኵሉ እንስሳ ዝብርትዕ፡ ብገለ እኳ ድሕር ዘይብል ኣንበሳ፡ 

³¹ናብ ውግእ ዝነቅል ፈረስ፡ ድቤላ፡ ቀቅድሚ ሰራዊቱ ዝኸይድ ንጉስ። 

^32-33ርጕኦ እንተ ተሓቝነ፡ ልኻይ የውጽእ፡ ኣፍንጫ እንተ ተወቕዐ፡ ደም የውጽእ፡ ከምኡ ኸኣ ኵራ ዝቕስቅስ ባእሲ የልዕል እዩ እሞ፡ ርእስኻ ልዕል ኣቢልካ ዕሽነት እንተ ገበርካ፡ ወይስ እንተ ሓሰብካ፡ ኣፍካ ብኢድካ ዕበስ።

        መ. ምሳሌ  ምዕራፍ 31            

     ¹ቃላት ንጉስ ልሙኤል፡ ኣዲኡ ዝመሃረቶ ንግራት፡ 

     ²ኣየ፡ ኣታ ወደየ፡ እንታይ፧ ኣታ ውሉድ ከርሰይ፡እንታይ፡ እንታይ እሞ፡ኣታ ወዲ መብጽዓይ፡ 

     ³ሓይልኻ ነንስቲ፡ መገድኻ ኸኣ ነተን መጥፋእቲ ነገስታት ኣይትሃብ። 

     ^4-5ልሙኤለየ፡ ሰትዮም ሕጊ ኸይርስዑ እሞ፡ ፍርዲ ዅሎም ግፉዓት ከይልውጡስ፡ እዚ ኣይንነገስታትን እዩ፡ ነገስታት ወይኒ ኽሰትዩ፡ መሳፍንቲ፡ ዘስክር መስተ ኣበይ ኣሎ፡ ክብሉ ኣይግባእን። 

⁶ብርቱዕ መስተስ ነቲ ናብ ጥፍኣት ዝቐረበ፡ ወይኒ ኸኣ ነቶም ነፍሶም እተመረረት ሰባት ደኣ ሃቡ። 

⁷ይስተ እሞ ድኽነቱ ይረስዕ፡ መከራኡ ኸኣ ኣይዘክር። 

     ⁸ኣብ ክንዲ ዓባስ፡ ኣብ ክንዲ እቶም ጸግዒ ዘይብሎም ኣፍካ ኽፈት። 

⁹ኣፍካ ኽፈት፡ ብቕንዕና ፍረድ፡ ንሽጉርን ንመስኪንን ብይን ኣውጽኣሎም። 

     ¹⁰ደገኛ ሰበይትስ መን ይረኽባ፡ዋጋኣ ኻብ ክቡር ዕንቍ ኣዝዮ ይኸብር። 

¹¹ልቢ ሰብኣያ ይእመና፡ እቶቱ ከቶ ኣየቋርጽን። 

¹²ንሳ ምሉእ ዕድሚኣ ሰናይ እምበር፡ ክፉእ ኣይትገብሮን። 

¹³ጸጕርን ልሕጺ እንጣጢዕን ትደሊ፡ ተሓጕሳ ኸኣ ብኢዳ ትዓዪ። 

¹⁴ንሳ ኸም መርከብ ነጋዶ እያ፡ ካብ ርሑቕ ምግባ ተምጽእ። 

¹⁵ገና ለይቲ ኸሎ፡ ትትንስእ እሞ፡ ንስድራ ቤታ ምግቦም ትህቦም፡ ነግራዳ ኸኣ ሰስርሐን ተትሕዘን። 

¹⁶ግራት ትምልከት እሞ ትዕድጎ፡ ብፍረ ኣእዳዋ ኸኣ ኣታኽልቲ ወይኒ ትተክል። 

¹⁷ሕቝኣ ብሓይሊ ይዕጠቕ፡ ቀላጽማ ኸኣ ተበርትዕ። 

¹⁸ኣቓሑ ንግዳ ጽቡቕ ዝዀነ ትርኢ፡ መብራህታ ብለይቲ ኣይጠፍእን። 

¹⁹ኣእዳዋ መፍተል የልዕላ፡ ኣጻብዓውን ቍኒን ይሕዛ። 

²⁰ንሽጉራት ኢዳ ትዝርግሓሎም፡ ንጽጉማት ከኣ ኣእዳዋ ትሰደሎም። 

²¹ኵሎም ስድራኣ ሰብ ድርብ ክዳን እዮም እሞ፡ ስለ ስድራኣ ብውርጪ ኣይትፈርህን። 

²²ንርእሳ ምንጻፋት ትገብር፡ ክዳውንታውን በፍታን ጁዅን እዩ። 

²³ሰብኣያ ኣብ ደገ ኣብ ማእከል ዓበይቲ ዓዲ ምስ ዝቕመጥ ምርኡይ እዩ። 

²⁴ጽቡቕ ቀሚሽ ኣእሊማ ትሸይጥ፡ መቐነት ንነጋዳይ ትህቦ። 

²⁵ሓይልን ክብረትን ልብሳ እዩ፡ ነቲ ዝመጽእ መዓልቲ ትስሕቆ። 

²⁶ኣፋ ብጥበብ ትኸፍት፡ ትምህርቲ ለውሃት ድማ ኣብ ልሳና እዩ። 

²⁷ንብረት ቤታ ትህሉ፡ እንጌራ ትህኪት ኣይትበልዕን። 

^28-29ደቃ ይትንስኡ ብርኽቲ ኸኣ ይብልዋ፡ ሰብኣያ ድማ፡ ብዙሃት ኣንስቲ ጽቡቕ ዝገበራ ኣለዋ፡ ንስኺ ግና ንዅላተን ትበልጽየን፡ ኢሉ ይንእዳ። 

³⁰ጽባቐ መልክዕ ጠባሪ እዩ፡ ውቃበ ኸኣ ከንቱ እዩ፡ ንእግዚኣብሄር እትፈርህ ሰበይቲ ግና ትንኣድ። 

³¹ካብ ፍረ ኣእዳዋ ሃብዋ፡ ኣብ ደጌታትውን ተግባራ ይንእዳ።