ትንቢት ህዝቅኤል

1  2  3  4  5  6  7  8  9
10  11  12 13  14  15
16  17  18  19  20  21
22 23  24  25  26  27
28  29  30  31  32  33
34  35  36  37  38  39
40  41  42 43  44  45
46  47  48

ትን. ህዝቅኤል ምዕራፍ 1

   ¹ኰነ ድማ፡ ኣብ መበል ሰላሳ ዓመት፡ ኣብታ ራብዐይቲ ወርሒ፡ ካብታ ወርሒ ድማ ኣብ ሓምሰይቲ መዓልቲ፡ ኣብ ርባ ኬባር ኣብ ማእከል እቶም ምሩኻት ከሎኹ፡ ሰማያት ተኸፍቱ፡ ራእይ እግዚኣብሄር ርኣኹ።²ኣብ ሓምሳይ መዓልቲ ናይቲ ወርሒ ወርሒ ኻብቲ ንጉስ ዮኣቂን እተማረኸሉ ኣብ ሓምሳይ ዓመቱ፡³ቃል እግዚኣብሄር ናብቲ ኻህን ህዝቅኤል ወዲ ኩዚ፡ ኣብ ሃገር ከለዳውያን፡ ናብ ርባ ኬባር መጸ። ኣብኡ ኸኣ ኢድ እግዚኣብሄር ኣብ ልዕሊኡ ነበረት።
   ⁴እንሆ ኸኣ፡ ካብ ሰሜን ህቦብላ ንፋስ፡ ብርቱዕ ደበና ምስናይ ሃልሃልታ ሓዊ፡ ኣብ ዙርያኡ ኸኣ ጸዳል ብርሃን ክመጽእ ከሎ ርኣኹ። ከም ፊሕፊሕ ዝብል ኣስራዚ ድማ ካብ ማእከሉ፡ ካብ ማእከል እቲ ሓዊ ወጸ።⁵ካብቲ ማእከሉ ኸኣ መልክዕ ኣርባዕተ እንስሳ ወጸ። ትርኢቶም ድማ እዚ እዩ፡ ሰብ የምሰልስሉ።⁶ነፍሲ ወከፎም ኣርባዕተ ገጽ፡ ነፍሲ ወከፎም ድማ ኣርባዕተ ኽንፊ ነበሮ።⁷ኣእጋሮም ትኽ ዝበለ ኣእጋር ነበረ፡ ከብዲ እግሮም ከኣ ከም እግሪ ሸኾና ምራኽ ነበረ፡ ከም ርሱን ኣስራዚ ኸኣ ፊሕፊሕ ይብል ነበረ።⁸በርባዕተ ወገኖም ኣብ ትሕቲ ኣኽናፎም ኢድ ሰብ ነበሮም፡ ኣርባዕቲኦም ገጽን ክንፍን ነበሮም።⁹ኣኽናፎም ነንሓድሕደን ግጡማት እየን። ክኸዱ ኸለዉ ኣይምለሱን፡ ነፍሲ ወከፍ ኣቕኒዑ ንቕድሚኡ ይኸይድ ነበረ።¹⁰ምስሊ ገጾም ገጽ ሰብ ይመስል። ኣርባዕቲኦም ከኣ በቲ የማናይ ወገኖም ገጽ ኣንበሳ: ኣርባዕቲኦም ድማ በቲ ጸጋማይ ወገኖም ገጽ ብዕራይ፡ ኣርባዕቲኦምውን ገጽ ንስሪ ነበሮም።¹¹ብላዕሊ ኸኣ ገጾምን ኣኽናፎምን ፍሉይ ነበረ። ናይ ነፍሲ ወከፍ ክልተ ኽንፊ፡ እታ ሓንቲ ምስታ ናይቲ ሓደ እትላገብ፡ እተን ክልተ ድማ ንስጋኦም ዝኸድና እየን።¹²ነፍሲ ወከፎም ኣቕኒዑ ንቕድሚኡ ይኸይድ፡ እቲ መንፈስ ናብ ዝኸዶ ይኸዱ፡ክኸዱ ኸለዉ ድማ ኣይምለሱን ነበሩ።¹³ትርኢት እቶም እንስሳ ኸም ጕሁር ሓውን ከም ዝነድድ ሽግን ነበረ፡ እቲ ሓዊ ኸኣ ኣብ ማእከል እቶም እንስሳ ይዘውርን የንጸባርቕን ነበረ፡ ካብቲ ሓዊውን በርቂ ይወጽእ ነበረ።¹⁴እቶም እንስሳ ኸኣ ከም በርቂ ይጐዩን ይምለሱን ነበሩ።
   ¹⁵እምብኣርሲ ነቶም እንስሳ ኽጥምት ከሎኹ፡ እንሆ፡ ሓደ መንኰርኰር ኣብ ምድሪ ኣብ ጥቓ እቶም እንስሳ ንነፍሲ ወከፍ በርባዕተ ገጾም ርኤኽዎም።¹⁶ትርኢት እቲ መንኰራዅርን ኣሰራርሓኡን ከም ሕብሪ በሪሎስ ነበረ። ኣርባዕቲኡ ይማሳሰል ነበረ። ትርኢቱን ኣሰራርሓኡን ድማ እቲ ሓደ መንኰርኰር ኣብ ውሽጢ እቲ ሓደ መንኰኣኰር ከም ዘሎ ይመስል ነበረ።¹⁷ክኸዱ ኸለዉ፡ በርባዕተ ወገኖም ይኸዱ፡ ምስ ዝኸዱ ድማ ኣይምለሱን ነበሩ።¹⁸እቲ ኽቦም ከኣ ነዊሕን መፍርህን ነበረ። ኣርባዕቲኦም ድማ ኣብቲ ኣዝዋራ ኽቦም ኣዒንቲ መሊእዎም ነበረ።¹⁹እቶም እንስሳ ክኸዱ ኸለዉ፡ እቲ መንኰራዅር በብጥቓኦም ይኸይድ ነበረ። እቶም እንስሳ ኻብ ምድሪ ሓፍ ክብሉ ኸለዉ፡ እቲ መንኰራዅር ከኣ ሓፍ ይብል ነበረ።²⁰ናብቲ እቲ መንፈስ እቶም እንስሳ ኣብቲ መንርኰራዅር ነበረ እሞ፡ እቲ መንርኰራዅር በብጥቓኦም ሓፍ ይብል፡ ነበረ።²¹መንፈስ እቶም እንስሳ ኣብቲ መንኰራዅር ስለ ዝነበረ፡ ንሳቶም ክኸዱ ኸለዉ፡ ይኸይድ፡ ንሳቶም ደው ክብሉ ኸለዉ፡ ደው ይብል፡ ንሳቶም ካብ ምድሪ ሓፍ ክብሉ ኸለዉ፡ እቲ መንርኰራዅር ከኣ በብጥቓኦም ሓፍ ይብል ነበረ።
   ²²ኣብ ልዕሊ ኣርእስ እቶም እንስሳ ኸኣ ከም ግሩም ዝዀነ ክሪስታል፡ ጠፈር ሰማይ ዝመስል፡ ኣብ ላዕሊ፡ ኣብ ልዕሊ ኣርእስቶም ተዘርጊሑ ነበረ።²³ኣብ ትሕቲ እቲ ጠፈር ድማ ኣኽናፎም ኣብ መንጽር ነንሓድሕደን ትኽ ኢለን ነበራ። ነፍሲ ወከፎም ድማ ስጋኦም ዝኸድኑሉ ኸክልተ ኽንፊ ነበሮም።²⁴ክኸዱ ኸለዉ ኸኣ፡ ደሃይ ኣኽናፎም ከም ህማም ብዙሕ ማያት፡ ከም ድምጺ እቲ ዅሉ ዝኽእል፡ ደሃይ ታዕታዕ ከም ደሃይ ሰራዊት ሰማዕኩ። ደው ክብሉ ኸለዉ፡ ኣኽናፎም ይዕዅልሉ ነበሩ።²⁵ካብ ልዕሊ እቲ ኣብ ልዕሊ ርእሶም ዝነበረ ጠፈር ድማ ድምጺ ተሰምዐ። ደው ክብሉ ኸለዉውን ኣኽናፎም ይዕዅልሉ ነበሩ።
   ²⁶ኣብ ልዕሊ እቲ ኣብ ልዕሊ ርእሶም ዝነበረ ጠፈር ከኣ እምኒ ሰፊሮስ ምስሊ ዝፋን ነበረ። ኣብ ልዕሊ እቲ ዝፋን ዝመስል ድማ ኣርኣያ ሰብ ዝመስል ተቐመጠ።²⁷ካብቲ ሕቝኡ ዝመስል ሒዙ ንላዕሊ፡ ርሱን ኣስራዚ ዝሕብሩ፡ ከም ሓዊ ዝትርኢቱ ኣብ ውሽጥን ዙርያኡን ርኣኹ። ካብቲ ሕቝኡ ዝመስል ንታሕቲ ኸኣ ከም ሓዊ ዝትርኢቱ ርኣኹ፡ ኣብ ዝርያኡውን ባና ብርሃን ከቢብዎ ነበረ።²⁸ከምቲ ብመዓልቲ ዝናም ኣብ ደበና ዝኸውን ትርኢት ቀስተ ደመና፡ ከምኡ ትርኢት ባና እቲ ብርሃን ኣብ ዙርያኡ ነበረ። ትርኢት ባና እቲ ብርሃን ኣብ ዙርያኡ ነበረ። ትርኢት ክብሪ እቲ ምስሊ እግዚኣብሄር ከምኡ ነበረ። ምስ ርኣኽዎ ኸኣ ብገጸይ ወደቕኩ፡ ድምጺ ሓደ ዝዛረብውን ሰማዕኩ።

ትን. ህዝቅኤል ምዕራፍ 2

   ¹ንሱ ኸኣ፡ ኣታ ወዲ ሰብ፡ ብእግርኻ ደው በል እሞ ኽዛረበካ እየ፡ በለኒ።²ክዛረበኒ ኸሎ ኸኣ፡ መንፈስ ኣተወኒ፡ ብእግረይ ድማ ደው ኣበለኒ፡ ነቲ ዝዛረበኒውን ሰማዕክዎ።³በለኒውን፡ ኣታ ወዲ ሰብ፡ ናብ ደቂ እስራኤል፡ ናብቶም ካባይ ዝዓለዉ ዓለወኛታት ህዝብታት እልእከካ ኣሎኹ። ንሳቶምን ኣቦታቶምን ክሳዕ እዛ መዓልቲ እዚኣ ተጻሪሮምኒ ኣለዉ።⁴ናብ እዞም ገጾም ዝተረረ፡ ልቦም ዝሓረነ ደቂ እሰደካ ኣሎኹ። ንስኻ ድማ፡ እግዚኣብሄር ኣምላኽ ከምዚ ይብል ኣሎ፡ በሎም።⁵ንሳቶም ዓላዊት ቤት እዮም እሞ፡ እንተ ሰሚዖም እንተ ኣብዮም፡ ኣብ ማእከሎም ነብዪ ኸም ዝነበረ ኽፈልጡ እዮም።⁶ኣታ ወዲ ሰብ፡ ንእኦም ኣይትፍርሃዮም፡ ንቓላቶም ከኣ ኣይትፍርሃዮ፡ ምንም እኳ ምስ ኣምዐን እሾዅን እንተ ዀንካ፡ ኣብ ማእከል ዕንቅርቢታት ተቐሚጥካ ኽነስኻስ፡ ዓላዊት ቤት እዮም እሞ፡ ንቓላቶም ኣይትፍርሃዮ፡ ገጾምውን ኣየሰምብድካ።⁷ዓለውቲ እዮም እሞ፡ እንተ ሰሚዖምኻ፡ እንተ ኣብዮምኻ፡ ቃለይሲ ንገሮም ደኣ።
   ⁸ንስኻ ግና ኣታ ወዲ ሰብ፡ ዝብለካ ዘሎኹ ስማዕ። ከምታ ዓላዊት ቤት ዓላዊ ኣይትኹን፡ ኣፍካ ኽፈት፡ እዚ ዝህበካ ዘሎኹ ድማ ብልዓዮ።⁹ጠመትኩ እሞ እንሆ፡ ኢድ ናባይ ኣቢላ ተዘርጊሓ፡ እንሆውን፡ ኣብኣ ጥቕልልቲ መጽሓፍ ነበረት።¹⁰ንሱ ኸኣ ኣብ ቅድመይ ገንጸላ፡ ብውሽጣ ብግዳማን ተጽሒፍዋ ነበረ። ኣብኣ ኸኣ ድጕዓን ብኽያትን ዋይዋይታን ተጽሒፍዋ ነበረ።

ትን. ህዝቅኤል ምዕራፍ 3

   ¹ንሱ ኸኣ፡ ኣታ ወዲ ሰብ፡ ዝረኸብካዮ ብላዕ። ነታ ጥቕልልቲ መጽሓፍ ብልዓያ፡ ኬድካ ድማ ንቤት እስራኤል ተዛረቦም፡ በለኒ።²ሽዑ ኣፈይ ከፈትኩ፡ ንሱውን ነታ ጥቕላል ኣብለዓኒ።³ንሱ ኸኣ፡ ኣታ ወዲ ሰብ፡ ከብድኻ ኣጽግብ፡ ንውሽጢ ኸብድኻውን በዛ ኣነ ዝህበካ ጥቕላል ምልኣዮ፡ በለኒ። ሽዑ በላዕክዋ፡ ኣብ ኣፈይውን ጥዕምቲ ኸም መዓር ጠዓመት።
   ⁴በለኒ ኸኣ፡ ኣታ ወዲ ሰብ፡ ናብ ቤት እስራኤል ኪድ ብቓላተይ ከኣ ተዛረቦም።^5-6ናብ ቤት እስራኤል እምበር፡ ናብ ሓደ ቛንቋኡ ዘይስትውዕል፡ ዘረባኦም ዝኸቢድ፡ ቃላቶም ዘይተስተውዕሎ ብዙሓት ህዝብታት ኣይተለኣኽካን። ብርግጽ ናባታቶም ሰዲደካ እንተ ዝኸውንሲ፡ ምሰምዑኻ ነይሮም።⁷ግናኸ ኵሉ ቤት እስራኤል፡ ግምባሮም ተሪር፡ ልቦም ሓራን እዩ እሞ፡ ቤት እስራኤልሲ ኽሰምዑኒ ዘይፈትዉ ስለ ዝዀኑ፡ ንኣኻ ኣይክሰምዑኻን እዮም።⁸እንሆ፡ ንገጽካ ኣንጻር ገጾም ኣትሪረዮ፡ ንግምባርካውን ኣንጻር ግምባሮም ኣትሪረዮ እየ።⁹ግምባርካ ኸም ኣልማዝ፡ ካብ ብላድ ዝብርትዕ ገይረዮ፡ ኣብ ቅድሚኦም ከኣ ኣይትሰምብድ።¹⁰መሊሱውን በለኒ፡ ኣታ ወዲ ሰብ፡ ንዅሉ እቲ ዝነግርካ ቓላት ኣብ ልብኻ ዕቘሮ፡ በእዛንካ ድማ ስምዓዮ።¹¹ናብቶም ምሩኻት፡ ናብ ደቂ ህዝብኻ ኺድ እሞ፡ እንተ ኽሰምዑኻ፡ እንተ ኽኣብዩኻ፡ እግዚኣብሄር ኣምላኽ ከምዚ ይብል፡ ኢልካ ንገሮምን በሎምን።
   ¹²እቲ መንፈስ ከኣ ኣልዓለኒ፡ ብድሕረይ ድማ፡ ክብሪ እግዚኣብሄር ኣብቲ ቦታኡ ይባረኽ፡ዝብል ብርቱዕ ደሃይ ምንቅጥቃጥ ሰማዕኩ።¹³ኣነ ኸኣ ህማም እቲ ነንሓድሕዱ ዝጋጮ ዝነበረ ኣኽናፍ እቶም እንስሳን ደሃይ ዓብዪ ምንቅጥቃጥን ሰማዕኩ።¹⁴እቲ መንፈስ ከኣ ኣልዓለኒ ወሰደኒውን። ብዅራ መንፈሰይ መሪሩኒ ኸድኩ፡ ኢድ እግዚኣብሄር ድማ በርቲዓ ኣብ ልዕለይ ነበረት።¹⁵ናብቶም ኣብ ጥቓ ርባ ኬባር ኣብ ቴልኣቢብ ዝነበረኡ ምሩኻት፡ ናብቲ ዝነብሩሉ ዘለዉ ኸኣ መጻእኩ። ኣብኡውን እናኣስቈርቈርኩ፡ ሾብዓተ መዓልቲ ኣብ ማእከሎም ተቐመጥኩ።
   ¹⁶ኰነ ድማ፡ ኣብ መወዳእታ ሾብዓተ መዓልቲ ኸኣ ከምዚ ዝብል ቃል እግዚኣብሄር መጸኒ፡¹⁷ኣታ ወዲ ሰብ፡ ኣብ ቤት እስራኤል ሓላዊ ገይረካ ኣሎኹ። ካብ ኣፈይ ቃል ስማዕ እሞ፡ ኣብ ክንዳይ ኴንካ ምዓዶም።¹⁸ኣነ ነቲ ረሲእ፡ ሞት ክትመውት ኢኻ፡ ምስ በልክዎ፡ እንተ ዘይመዓድካዮ፡ ካብ መገዲ ረሲእነቱ ተመሊሱ ነፍሱ ኽትድሕን፡ እንተ ዘይተዛረብካዮን እንተ ዘይመዓድካዮንሲ፡ እቲ ረሲእ ብሓጢኣቱ ኽመውት እዩ፡ ደሙ ግና ካብ ኢድካ ኽደልዮ እየ።¹⁹ግናኸ ነቲ ረሲእ እንተ መዓድካዮ፡ ንሱ ኸኣ ካብ ረሲእነቱን ካብ መገዲ ረሲእነቱን እንተ ዘይተመልሰ፡ ንሱ ብሓጢኣቱ ኽመውት እዩ፡ ንስኻ ግና ነፍስኻ ኣድሓንካ።²⁰ጻድቕ ካብ ጽድቁ እንተ ተመልሰ፡ ሓጢኣት ከኣ እንተ ገበረ፡ መዓንቀፊ ኣብ ቅድሚኡ እንተ ኣንበርኩሉ፡ክመውት እዩ። ስለ ዘይመዓድካዮ፡ ብሓጢኣቱ ኽመውት፡ እቲ ዝገበሮ ጽድቂ ድማ ኣይክዝክርን እዩ። ደሙ ግና ካብ ኢድካ ኽደልዮ እየ።²¹ንስኻ ግና፡ እቲ ጻድቕ ሓጢኣት ከይገብር ነቲ ጻድቕ እንተ መዓድካዮ እሞ ንሱ ሓጢኣት እንተ ዘይገበረ፡ ምዕዶ ስለ እተቐበለ ብሓቂ ብህይወት ክነብር እዩ፡ ንስኻውን ነፍስኻ ተድሕን።
   ²²ኢድ እግዚኣብሄር ከኣ ኣብኡ ኣብ ልዕለይ መጸት እሞ፡ ተንስእ፡ ናብ ጐልጐል ውጻእ፡ ኣብኡ ምስኻ ኽዛረብ እየ፡ በለኒ።²³ሽዑ ተንሲአ ናብ ጐልጐል ወጻእኩ። እንሆ ኸኣ፡ ክብሪ እግዚኣብሄር፡ ከምቲ ኣብ ርባ ኬባር ዝርኣኽዎ ኽብሪ፡ ኣብኡ ቘይሙ ነበረ። ብገጸይውን ወደቕኩ።²⁴እቲ መንፈስ ከኣ ኣተወኒ፡ ብእግረይ ድማ ደው ኣበነሊ እሞ፡ኪድ ኣብ ቤትካ ተዓጾ፡ ኢሉ ተዛረበኒ።²⁵ኣታ ወደ ሰብ፡ እንሆ፡ መእሰሪ ኽገብሩልካን ክኣስሩኻን እዮም፡ ኣብ ማእከሎም ድማ ኣይክትውጽእን ኢኻ።²⁶ንሳቶም ዓላዊት ቤት እዮም እሞ፡ ምእንቲ ኽትዕበስን፡ ዘላፊኦም ከይትኸውንንሲ፡ ልሳንካ ኣብ ትንሓግካ ኸጥብቕ እየ።²⁷ምስ ዝዛረበካ ግና፡ ንኣፍካ እኸፍቶ፡ ንስኻውን፡ እግዚኣብሄር ኣምላኽ ከምዚ ይብል ኣሎ፡ ክትብሎም ኢኻ። ዓላዊት ቤት እዮም እሞ፡ዝሰምዕ ይስማዕ፡ዝኣቢውን ይእበ።

ትን. ህዝቅኤል ምዕራፍ 4

   ¹ንስኻ ኸኣ፡ ኣታ ወዲ ሰብ፡ ጡብ ውሰድ፡ ኣብ ቅድሜኻ ኸኣ ኣንብሮ እሞ ከተማ፡ ማለት የሩሳሌም ሰኣለሉ።²ክቢ ኽበባ፡ ኣብ ልዕሊኣ ግምቢ ስራሕ፡ ዕርዲ ዕረዳ፡ ሰፈር ኣስፍረላ፡ ብዅሉ ዙርያኣ ድማ ደዓውል ግበር።³ንስኻ ኸኣ መቝሎ ሓጺን ወሲድካ፡ ኣብ መንጎኻን ኣብ መንጎ እታ ኸተማን ከም መንደቕ ሓጺን ጌርካ ኣንብሮ። ገጽካ ናብኣ ኣቢልካ ኣቕንዕ፡ ክብብቲ ትኹን፡ ክበባውን። እዚ ንቤት እስራኤል ምልክት ይኹን።
   ⁴ደሓር ብጸጋማይ ጐድንኻ በጥ በል፡ ኣብኡውን ንኣበሳ ቤት እስራኤል ኣንብሮ፡ ክንዲ ቝጽሪ እተን በጥ እትብለለን መዓልትታት ከኣ ኣበሳኦም ክትጸውር ኢኻ።⁵ኣነ፡ ድማ ዓመታት ኣበሳኦም ብቝጽሪ መዓልትታት፡ ማለት ሰለስተ ሚእትን ተስዓን መዓልቲ፡ ገይረልካ ኣሎኹ። ንስኻውን ኣበሳ ቤት እስራኤል ክትጸውር ኢኻ።⁶እዚ ምስ ኣእከልካ ኸኣ፡ ከም ብሓድሽ ብየማናይ ጐድንኻ ኽትድቅስ ኢኻ፡ ነርብዓ መዓልቲውን ኣበሳ ቤት ይሁዳ ኽትስከም ኢኻ። ሓንቲ መዓልቲ ኽንዲ ዓመት ገይረልካ ኣሎኹ።⁷ገጽካን እቲ ጥራዩ ዘሎ ቕልጽምካን ናብታ ኽብብቲ የሩሳሌም ኣቕንዕ እሞ ተነበየላ።⁸እንሆ፡ ብገመድ ቀጥ አብለካ፡ ነተን መዓልትታት ምኽባብካ ኸየእከልካየን ከኣ ካብ ሓደ ጐድንኻ ናብታ ሓደ ጐድንኻ ኣይክትግልበጥን ኢኻ።
   ⁹ንስካ ስርናይና ስገምን ባልደንጓን ብርስንን ቡልቱግን ሰዓዕን ወሰድ፡ ኣብ ሓደ ኣቕሓ ግበሮ እሞ፡ ካብኡ እንጌራ ሰንክት፡ ብቝጽሪ እተን ብሓደ ጐድንኻ እትድቅሰለን መዓልትታት፡ ማለት ሰለስተ ሚእትን ተስዓን መዓልቲ፡ ካብኡ ኽትበልዕ ኢኻ።¹⁰እቲ እትበልዖ ምግቢ ነንመዓልቲ ብሚዛን ዕስራ ሲቃል ይኹን። ካብ ግዜ ኽሳዕ ግዜ ኽትበልዖ ኢኻ።¹¹ማይውን ብመሰፈሪ፡ ሳድሰይቲ ኣፍ ሂን ክትሰቲ ኢኻ። ካብ ግዜ ክሳዕ ግዜ ኽትሰትዮ ኢኻ።¹²ኣብ ቅድሚኦም ብውጽኣት ግዳም ሰብ ኣብሲልካ፡ ኣብኡ ኸም ቅቻ ስገም ክትበልዖ ኢኻ።¹³እግዚኣብሄር ከኣ፡ ደቂ እስራኤልሲ፡ ኣብ ማእከል እቶም ኣነ ናብኦም ፋሕ ዘብሎም ህዝብታት ኰይኖም፡ ከምኡ ርኹስ እንጌራኦም ክበልዑ እዮም፡ በለ።¹⁴ሽዑ ኣነ፡ ወዮ፡ ኣታ እግዚኣብሄር ኣምላኽ፡ እንሆ፡ ነፍሰይ ከቶ ኣይረኸሰትን። ካብ ንእስነተይ ጀሚረ ኽሳዕ ሎሚ ዝሓለቐን ኣራዊት ዝቐተሎን ኣይበላዕኩን፡ ፍንፉን ስጋ ድማ ኣብ ኣፈይ ከቶ ኣይኣተወን፡ በልኩ።¹⁵ንሱ ኸኣ፡ እንሆ፡ ኣብ ክንዲ ውጽኣት ግዳም ሰብሲ ዒባ ማል እህበካ ኣሎኹ፡ ብእኡ ጌርካ እምጌራካ ኸተብስል ኢኻ፡ በለኒ።^16-17መሊሱውን፡ ኣታ ወዲ ሰብ፡ እንሆ፡ ኣብ የሩሳሌም ንምርኩስ እንጌራ ኽሰብሮ እየ። እንጌራን ማይን ክስእኑ እዮም እሞ፡ ንእንጌራ ብሚዛንን ብሽጋርን ክሰትይዎ እዮም። እቲ ሓደ ምስቲ ሓደ ዀይኖም ክሰትይዎ ክትክዙ፡ ብሰሪ ኣበሳኦምውን ክተፍኡ እዮም፡ በለኒ።

ትን. ህዝቅኤል ምዕራፍ 5

   ¹ንስኻ ድማ፡ ኣታ ወዲ ሰብ፡ በሊሕ ሰይፊ ውሰድ፡ ከም መላጸ ላጸዪ ዝበለ ውሰድ እሞ ርእስኻን ጭሕምኻን ተላጸየሉ። ሚዛን ወሲድካውን ነቲ ጸጕሪ ምቐሎ።²መዓልትታት ምኽባብ ምስ ተፈጸመ፡ ነቲ ሲሶኡ ኣብ ማእከል እታ ኸተማ ብሓዊ ኣንደዶ። ነቲ ሲሶኡ ድማ ውሰዶ እሞ ኣብቲ ዙርያኡ ብሰይፊ ውቕዓዮ፡ ነቲ ሓደ ሲሶውን ኣብ ንፋስ ዝረዎ፡ ኣነ ድማ ደድሕሪኦም ሰይፊ ኽመልሕ እየ።³ካባታተን ከኣ ሒደት ዝቝጽረን ወሰድ እሞ ኣብ ዘፈር ክዳንካ ቛጽረን።⁴ካብ እዚኣተን ከኣ መሊሰካ ውሰድ፡ ኣብ ማእከል ሓዊ ድማ ደርብየን፡ ብሓዊውን ኣንድደን፡ ካብዚ ናብ ኵሉ ቤት እስራኤል ሓዊ ኽወጽእ እዩ።
   ⁵እግዚኣብሄር ኣምላኽ ከምዚ ይብል ኣሎ፡ እዚኣስ የሩሳሌም እያ። ኣነ ኣብ ማእከል ህዝብታት ኣንበርክዋ፡ ሃገራትውን ኣብ ከባቢኣ ኣሎ።⁶ንፍርደይ ንዒቖም፡ ከም ሕጋጋተይ ኣይተመላለሱን እዮም እሞ፡ ንሳ ብረሲእነት ካብ ኣህዛብ ገዲዳ ንፍርደይ ተጻረረቶ፡ ካብተን ከቢበንኣ ዘለዋ ሃገር ገዲዳ ድማ ንሕጋጋተይ ኣፍረሰቶ።⁷ስለዚ እግዚኣብሄር ኣምላኽ ከምዚ ይብል ኣሎ፡ ካብቶም ኣብ ዙርያኹም ዘለዉ ህዝብታት ገዲድኩም ስዲ ስለ ዝዀንኩምን ከም ሕጋጋተይ ስለ ዘይተመላለስኩምን ፍርደይ ስለ ዘይገበርኩምን ከም ፍርዲ እቶም ኣብ ከባቢኹም ዘለዉ ህዝብታት እኳ ስለ ዘገበርኩምንሲ፡⁸ስለዚ እግዚኣብሄር ኣምላኽ ከምዚ ይብል ኣሎ፡ እኔኹ፡ ኣነ እመጻኪ ኣሎኹ፡ ኣብ ቅድሚ ኣዒንቲ ህዝብታት ከኣ ኣብ ማእከልኪ ፍርዲ ኸውጽእ እየ።⁹ብሰሪ ዅሉ ጽያፍኪ ኸኣ፡ ገይረዮ ዘይፈልጥ ድሕርዚ ኸኣ ከቶ ዘይገብሮ፡ ክገብረኪ እየ።¹⁰ስለዚ ኣብ ማእከልኪ ወለዲ ንውሉዶም፡ ውሉድ ድማ ንወለዶም ክበልዑ እዮም። ፍርዲ ኣባኺ ኽፍጽሞ ፡ዅላቶም ዝተረፉኽውን ኣብ ኵሉ ንፋሳት ክዘርዎም እየ።¹¹ስለዚ እግዚኣብሄር ኣምላኽ ይብል ኣሎ፡ ኣነ ህያው እየ፡ ብርግጽ ንመቕደሰይ ብዅሉ ፍንፉን ነገርክን ብዅሉ ጽያፍክን ኣርከስክዮ፡ ስለዚ ኣነ ድማ ከንእሰኪ፡ ዓይነይ ብዘይ ድንጋጽ ካባኺ ኽመልስ ኣይክምሕረክንውን እየ።¹²ሲሶኺ ብፌራ ኽሞቱ፡ ኣብ ማእከልኪ ኸኣ ብጥሜት ክውድኡ እዮም፡ እቲ ሓደ ሲሶ ድማ ኣብ ዙርያኺ ብሰይፊ ኽወድቕ እዩ: ነቲ ሓደ ሲሶ ኸኣ ኣብ ኵሉ ንፋሳት ክዘርዎ፡ ደድሕሪኦምውን ሰይፈይ ክመልሕ እየ።¹³ኵራይ ሃንኡ ኽወጽእ፡ ነድረይ ከኣ ኣብ ልዕሊኦም ክዝሕል እዩ፡ ኣነውን ሕነ ኽፈድዮም እየ። ነድረይ ኣባታቶም ምስ ኣዝሓልኩ፡ ሽዑ ኣነ እግዚኣብሄር ብጸዓተይ ከም እተዛረብኩ ኽፈልጡ እዮም።¹⁴ኣብቶም ከቢቦምኺ ዘለዉ ህዝብታትን ኣብ ዓይኒ እቶም ብእኡ ዝሓልፋ ዅላቶምን ከኣ ምድረ በዳን መጻረፍን ክገብረኪ እየ።¹⁵ብዅራን ብነድርን ብመዓት ነድርን ምስ ፈረድኩኺ፡ እዚ ኣብቶም ኣብ ከባቢኺ ዘለዉ ህዝብታት ንመጻረፍን ንመላገጽን ንመለበምን ንመሰክሕን ክኸውን እዩ። ኣነ እግዚኣብሄር ተዛሪበ ኣሎኹ።¹⁶ንጥፍኣቶም ዝኸውን ናይ ጥሜት ክፉእ ፍላጻ ኣብ ርእሶም ምስ ሰደድኩ፡ ምእንቲ ኸጥፍኣኩም ክሰዶ እየ፡ ነቲ ጥሜትኩም ከግድዶ እየ፡ ንምርኩስ እንጌራኹምውን ክሰብሮ እየ።¹⁷ጥሜትን ንደቅኹም ዝቐትሉ ኣራዊትን ክሰደልኩም፡ ፌራን ደምን ከኣ ብማእከልኪ ኽሓልፍ እዩ፡ ሰይፊውን ከተንስኣልኪ እየ፡ ኣነ እግዚኣብሄር ተዛሪበ ኣሎኹ።

ትን. ህዝቅኤል ምዕራፍ 6

   ¹ከምዚ ዝብል ቃል እግዚኣብሄር ድማ መጸኒ፡²ኣታ ወዲ ሰብ፡ ገጽካ ናብ ኣኽራን እስራኤል ኣቕንዓዮ እሞ ተነበየለን፡³በልውን፡ ኣትን ኣኽራን እስራኤል፡ ቃል እግዚኣብሄር ኣምላኽ ስምዓ፡ እግዚኣብሄር ኣምላኽ ነኽራንን ንዅርባታትን ንሽንጭሮታትን ንለሴታትን ከምዚ ይብል ኣሎ፡ እኔኹ ኣነ፡ እወ ኣነ ሰይፊ ኸምጽኣልኩም፡ ነቲ በረኽቲ ስፍራታትኩም ከጥፍኦ እየ።⁴መሰውኢታትኩም ክፈርስ፡ እቲ ናይ ጸሓይ ኣዕኑድኩም ድማ ክሰባበር፡ ነቶም ውጕኣትኩም ከኣ ኣብ ቅድሚ እቶም ጣኦታትኩም ከውድቖም እየ።⁵ንሬሳታት ደቂ እስራኤል ኣብ ቅድሚ ጣኦታቶም ከንብሮ፡ ኣዕጽምትኹም ድማ ኣብ ዙርያ መሰውኢታትኩም ክዘርዎ እየ።⁶መሰውኢታትኩም ምእንቲ ኽባድምን ክዖኑን፡ ጣኦታትኩም ከኣ ክስበርን ክጠፍእን፡ ናይ ጸሓይ ኣዕኑድኩም፡ ንስኻትኩም ኣብ እትነብሩሉ ዘበለስ እተን ከተማታት ክዖንዋ እየን፡ እቲ በረኽቲ ቦታታት ከኣ ክፈርስ እዩ።⁷ተወጊኦም ዝሞቱ ኣብ ማእከልኩም ክወድቁ እዮም፡ ንስኻትኩም ከኣ ኣነ እግዚኣብሄር ምዃነይ ክትፈልጡ ኢኹም።⁸ኣብ ሀሃገሩ ፋሕ ምስ በልኩም ግና፡ ኣብ ማእከል ህዝብታት ካብ ሰይፊ ዘምለጡ ሓያሎ ኽህልዉኹም እዮም፡ በዚ ኸምዚ ትርፊ ኽሓድገልኩም እየ።⁹እቶም ዘምለጡ ሰብኩም ከኣ ነቲ ኻባይ ዝዘምበለ ዘማዊ ልቦምን፡ ነተን ክዝምዋ ደድሕሪ ጣኦታቶም ዝኸዳ ኣዒንቶምን ምስ ሰባበርኩ፡ ኣብቲ ዘማረኽክዎም ኣብ ማእከል ህዝብታት ኰይኖም ክዝክሩኒ እዮም። በቲ ብዅሉ ጽያፎም ዝገበርዎ እኩይ ከኣ ንርእሶም ክፍንፍኑ እዮም።¹⁰ኣነ እግዚኣብሄር ከም ዝዀንኩ ኸኣ ክፈልጡ እዮም። እዚ መዓት እዚ ኸምጽኣሎም እየ ኢለ እተዛረብክዎ ብኸንቱ ኣይኰነን።
   ¹¹እግዚኣብሄር ኣምላኽ ከምዚ ይብል ኣሎ፡ ብሰይፍን ብጥሜትን ብፌራን ክወድቁ እዮም እሞ፡ ብኢድካ ኣጣቕዕ፡ ብእግርኻ ኸኣ ኰርደብደብ በል፡ ብዛዕባ ናይ ቤት እስራኤል ኵሉ እኩይ ጽያፍ ድማ፡ ኣየ፡ ወዮ፡ በል።¹²እቲ ኣብ ርሑቕ ዘሎ ብፌራ ኽመውት፡ እቲ ኣብ ቀረባ ዘሎ ብፌራ ኽወድቕ፡ እቲ ዝተረፈን ተኸቢቡ ዘሎን ድማ ብጥሜት ክመውት እዩ። በዚ ኸምዚ ቍጥዓይ ኣብታቶም ክፍጽም እየ።¹³እቶም ውጉኣቶም ኣብ ማእከል ጣኦታቶም ኣብ ዙርያ መሰውኢታቶም፡ ኣብ ልዕሊ ዅሉ በረኽቲ ዅድዅዶታት፡ ኣብ ዅሉ ርእሲ ኣኽራን፡ ኣብ ትሕቲ ዅሉ ልሙዕ ገረብ፡ ኣብ ትሕቲ ዅሉ ብርቱዕ ቈጽሊ ዘለዎ ኣውሒ፡ ኣብ ማእከል እቲ ንዅሎም ጣኦታቶም ጥዑም መኣዛ ዝዓጠኑሉ ስፍራ ምስ ኰነ፡ ሽዑ ኣነ እግዚኣብሄር ምዃነይ ክፈልጡ እዮም።¹⁴ኣነ ኸኣ ኢደይ ክዝርግሓሎም እየ፡ ነታ ሃገር ድማ፡ ኣብ እተቐመጡ እኳ እንተ ተቐመጡ፡ ካብ በረኻ ዲብላታ እትገድድ ባዶን ጽምዋን ክገብራ እየ። ሽዑ ኣነ እግዚኣብሄር ምዃነይ ክፈልጡ እዮም።

ትን. ህዝቅኤል ምዕራፍ 7

   ¹ከምዚ ዝብል ቃል እግዚኣብሄር ድማ መጸኒ፡²ኣታ ወዲ ሰብ፡ እግዚኣብሄር ኣምላኽ ንሃገር እስራኤል ከምዚ ይብላ ኣሎ፡ መወዳእታ፡ ናብ ኣርባዕተ መኣዝን እታ ሃገርሲ መወዳእታ ይመጽእ ኣሎ።³ሕጂ መወዳእታ ኣባኺ መጸ፡ ቍጥዓይ ድማ ክሰደልኪ፡ ከም መገድኺ መጠን ክፈርደኪ፡ ኵሉ ጽያፍኪ ድማ ኣብ ልዕሌኺ ኸውርደልኪ እየ።⁴ዓይነይ ኣይክንሕፈክን ኣነውን ኣይክርሕርሓልክን፡ ኣነስ መገድኺ ደኣ ኣብ ልዕሌኺ ኸምጻልኪ እየ፡ ጽያፍኪ ድማ ኣብ ማእከልኪ ኪኸውን እዩ እሞ፡ ንስኻትኩም እግዚኣብሄር ምዃነይ ክትፈልጡ ኢኹም።
   ⁵እግዚኣብሄር ኣምላኽ ከምዚ ይብል ኣሎ፡ መዓት፡ በይኑ ዝዀነ እኳ ደኣ መዓት እንሆ፡ ይመጽእ ኣሎ።⁶መወዳእታ መጸ፡ እቲ መወዳእታ መጸ፡ ተላዕለኪ፡ እንሆ ይመጽእ ኣሎ።⁷ኣታ ኣብ ሃገር ኣትነብር ዘሎኻ፡ ተራኻ መጸካ። እቲ ግዜ ብጽሐ፡ እልልታ ኣብ ኣኽራን ዘይስምዓላ መዓልቲ ዕግርግር ቐረበት።⁸ሕጂ ብቕልጡፍ ነድረይ ክኽዕወልኪ፡ ሃና ቝጥዓይ ከኣ ክወጸልኪ፡ ከም መጠን መገድኺ ድማ ክፈርደኪ፡ ንዅሉ ጽያፍኪ ኣብ ልዕሌኺ ኸውርዶ እየ።⁹ዓይነት ኣይኪንሕፍን እዩ፡ ኣነውን ኣይክርሕርሕን፡ ኣነስ ከም መጠን መገድኺ ኸምጽኣልኪ እየ፡ ጽያፍኪ ድማ ኣብ ማእከልኪ ክኸውን እዩ። ንስኻትኩምውን እቲ ዝወቅዕ ዘሎስ ኣነ እግዚኣብሄር ምዃነይ ክትፈልጡ ኢኹም።¹⁰እንሃ እታ መዓልቲ እንሃ መጸት። ተራኺ በጽሐ። እታ ሸቦጥ ዓምበበት፡ ትዕቢት ከኣ ጠጥዐ።¹¹ዓመጻስ ሸቦጥ ረሲእነት ኰይና ተላዕለት። ካባታቶም ሓደ እኳ የልቦን፡ ካብቲ ብዙሕ ህዝቦምን ካብቲ ሃብቶምን ካብቲ ግርማኦምን ዝተርፍ ሓደ እኳ የልቦን።¹²ዘመን በጺሑ፡ መዓልቲ ቐሪቡ ኣሎ። ጕሁር ቍጥዓ ኣብ ልዕሊ ዅሉ እቲ ብዙሕ ህዝቦም እዩ እሞ፡ዝሻየጥ ኣይተሓጐስ፡ዝሸይጥውን ኣይጕሀ።¹³እቲ ዝሸይጥ ብህይወቱ እኳ እንተሎ፡ ናብቲ ዝሸጦ ኣይክምለስን እዩ። ብዛዕባ እቲ ብዙሕ ህዝቦም ዝዀነ ራእይ ንድሕሪት ኣይክምለስን እዩ እሞ፡ ብዓመጽ ዝነብርሲ ንህይወቱ ዘጽንዓ ሓደ እኳ የልቦን።¹⁴መለኸት ተነፍሐ፡ ኵሉ ኸኣ ተዳለወ፡ ቍጥዓይ ግና ኣብ ልዕሊ ዅሉ እቲ ብዙሕ ዝህቦም ኣሎ እሞ፡ ኣብ ውግእ ዝኸይድ ሓደ እኳ የልቦን።¹⁵ኣብ ወጻኢ ሰይፊ ኣብ ውሽጢ ኸኣ ፌራን ጥሜትን ኣሎ። እቲ ኣብ ከተማ ዘሎውን ፌራን ጥሜትን ክውሕጦ እዩ።¹⁶እቶም ካባታቶም ዘምለጡ ግና ከምተን ርግብታት ሽንጭሮ፡ ነፍሲ ወከፍ ብኣበሳኦም እናቘዘሙ፡ ኣብ ኣኽራን ክዀኑ እዮም።¹⁷ኵለን ኣእዳው ክሕለላ፡ ኵለን ኣብራኽ ድማ ከም ማይ ከፈሳ እየን።¹⁸ከሊ ኽዕጠቑ፡ ራዕዲ ክኽደኑ፡ ኵሉ ገጽ ብሕንኪ ኽጕልበብ፡ ኵሉ ርእስታቶም ድማ ክበርሕ እዩ።¹⁹ብሩሮም ኣብ ኣደባባያት ክድርብዮ፡ ወርቆም ከኣ ከም ርኹስ ነገር ክኸውን እዩ። ብሩሮምን ወርቆምን ናይ ሓጢኣቶም እምኒ መዓንቀፊ ስለ ዝዀነ፡ በታ መዓልቲ ቝጥዓ እግዚኣብሄር ከድሕኖም ኣይተኻእሎን፡ ንጥሜቶም ኣይከጽግቦን፡ ንኸብዶምውን ኣይክመልኣሎምን እዩ።²⁰መልክዕ ስልማቶም ንትዕቢት ኰኖም፡ ምስሊ ርኽሰቶምን እቶም ዘፈንፍኑ ጣኦታቶምን ገበሩሉ። ስለዚ ኣነ ንኣታቶም ንርኽሰት ገበርክዎ።²¹ዘመተ ክኽውን ድማ ኣብ ኢድ ጓኖት፡ ምርኮ ክኸውን ከኣ ንረሲኣን ምድሪ ኣሕሊፈ ኽህቦ እየ፡ ንሳቶም ድማ ከርክስዎ እዮም።²²ካባታቶም ገጸይ ክመልስ እየ፡ ንሳቶም ከኣ ንመዝገበይ ከርክስዎ፡ ገፋዕቲ ኣትዮም ድማ ከርክስዎ እዮም።
   ²³እዛ ሃገር እዚኣ ቅትለተ ደመ ነፍሲ መሊኣ ኣላ፡ እዛ ኸተማ እዚኣውን ዓምጽ መሊእዋ እዩ እሞ፡ ሞቝሕ ኣዳሉ።²⁴ነቶም ኣዝዮም ሕሱማት ካብ ህዝብታት ከምጽእ እየ እሞ፡ እዚኣቶም ኣባይቶም ክወርሱ እዮም። ንትዕቢት እቶም ሓያላት ከጥፍኦ እየ፡ መቓድሶም ከኣ ክረኽሳ እየን።²⁵ጥፍኣት ይመጽእ ኣሎ፡ ንሳቶም ከኣ ሰላም ክደልዩ እዮም፡ ኣይርከብን ከኣ።²⁶መዓት ኣብ ርእሲ መዓት ክመጽእ፡ ወረውን ኣብ ርእሲ ወረ ክኸውን እዩ። ካብ ነብዪ ራእይ ክደልዩ፡ ግናኸ ሕጊ ኻብ ካህን፡ ምኽሪውን ካብ ኣረገውቲ ኽጠፍእ እዩ።²⁷እቲ ንጉስ ክትክዝ፡ እቲ መስፍን ድማ ሓዘን ክኸደን፡ ኣእዳዉ እቶም ህዝቢ እታ ሃገር ራዕራዕ ክብል እዩ። ከም መጠን መገዶም ክፈድዮም፡ ከከም ዝግብኦም ከኣ ክፈርዶም እየ። ኣነ እግዚኣብሄር ምዃነይውን ክፈልጡ እዮም።

ትን. ህዝቅኤል ምዕራፍ 8

   ¹ኰነ ድማ፡ ኣብ ሳድሰይቲ ዓመት፡ ኣብታ ሳድሰይቲ ወርሒ፡ ካብታ ወርሒውን ኣብ ሓምሰይቲ መዓልቲ፡ ኣብ ቤተይ ተቕሚጠ ኸሎኹ፡ እቶም ዓበይቲ ይሁዳውን ኣብ ቅድመይ ተቐሚጦም ከለዉ፡ ኣብኡ ኢድ እግዚኣብሄር ኣምላኽ ኣብ ልዕለይ ወረደት።²ሽዑ ርኣኹ፡ እንሆ፡ ትርኢት ሓዊ ዝመስል ምስሊ፡ ካብቲ ምስሊ ሕቝኡ ንታሕቲ ሓዊ፡ ካብ ሕቝኡ ንላዕሊ ድማ ድሙቕ ብርሃንን ዘንጸባርቕ ኣስራዝን ዝመስል እዩ።³ንሱ ኸኣ ኢድ እትመስል ዘርግሐ፡ ብጸጕሪ ርእሰይ ድማ ሓዘኒ፡ መንፈሰውን ኣብ መንጎ ሰማይን ምድርን ኣልዓለኒ፡ ብራእይ ኣምላኽ ድማ ናብ የሩሳሌም ወሰደኒ፡ ናብቲ ውሽጣዊ ኣጻድ፡ በቲ ንሰሜን ኣቢሉ ዘርኢ ኣፍደገ፡ ናብቲ እቲ ንቕንኣት ዘለዓዕል ምስሊ ቕንኣት ዝነበሮ ኣምጽኣኒ።⁴እንሆ ኸኣ፡ ከምቲ ኣብ ጐልጐል ዝርኣኽዎ ትርኢት፡ ክብሪ ኣምላኽ እስራኤል ኣብኡ ነበረ።⁵ንሱ ኸኣ፡ ኣታ ወዲ ሰብ፡ ኣብ ወገን ሰሜን ኣቢልካ ኣዒንትኻ ኣልዕል፡ በለኒ። ኣነ ድማ፡ ኣብ ሰሜን ኣቢለ ኣዒንተይ ኣልዓልኩ። እንሆ ድማ፡ ኣብ ሰሜን እቲ ደገ መሰውኢ ኣብቲ መእተዊ፡ እቲ ምስሊ ቕንኣት ነበረ።⁶ንሱ ኸኣ፡ ኣታ ወዲ ሰብ፡ እቲ ዝገብርዎ ዘለዉ ትርኢዶ ኣሎኻ፡ኣነ ካብ ቤት መቕደሰይ ምእንቲ ኽርሕቕ ኢሎም እቲ ቤት እስራኤል ኣብዚ ዝገብርዎ ዘለዉ ዓብዪ ጽያፍዶ ትርኢ ኣሎኻ፧ ኤረ ገና ካብዚ ዝዓቢ ጽያፍውን ክትርኢ ኢኻ፡በለኒ።
   ⁷ንሱ ኸኣ ናብ ደገ እቲ ኣጻድ ወሰደኒ፡ እንሆውን ኣብቲ መንደቕ ሓደ ነዃል ርኣኹ።⁸ንሱ ኸኣ፡ ኣያ ወዲ ሰብ፡ ነቲ መንደቕ ኵዓቶ፡ በለኒ። ነቲ መንደቕ ምስ ኮዓትክዎ ድማ፡ እንሆ፡ ኣፍ ደገ ተኸብኩ።⁹ንሱውን፡ እቶ እሞ ነቲ ኣብዚ ዝገብርዎ ዘለዉ ሕሱም ጽያፍ ርኣዮ፡ በለኒ።¹⁰ኣቶኹን ርኣኹን፡ እንሆ ኸኣ፡ ብዙሕ ምስሊ እቶም ዘጸይፉ ለመም ዝብሉን ርኹሳት እንስሳን ኵሎም ጣኦታት ቤት እስራኤልን ኣብ ወሰነወሰን እቲ መንደቕ ተስኢሉ ነበረ።¹¹ኣብ ቅድሚኦም ከኣ ሰብዓ ሰብኣይ ካብ ዓበይቲ ቤት እስራኤል፡ ኣብ ማእከሎም ድማ የኣዛንያ ወዲ ሻፋን ቈይሙ፡ ኣብ ኢድ ነፍሲ ወከፎም ድማ ጽንሃህ ሒዞም፡ ኣብኡ ደው ኢሎም ነበሩ። እቲ መኣዛ ዕጣንውን ዑብ ኢሉ ወጸ።¹²ሽዑ ንሱ፡ ኣታ ወዲ ሰብ፡ እቶም ዓበይቲ ቤት እስራኤል፡ እግዚኣብሄር ኣይርእየናን፡ እግዚኣብሄር ነዛ ሃገር ሓዲግዋ እዩ፡ ኢሎምሲ፡ ነፍሲ ወከፎም ኣብ ጸልማት ኣብ ሸሽር ጓና ምስልታቶም ኰይኖም ዝገብርዎ ዘለዉዶ ርኢኻዮ ኣሎኻ፡በለኒ።
   ¹³ንሱ ኸኣ፡አረ ካብዚ ዝገድድ ዝገብርዎ ዘለዉ ጽያፍውን ክትርኢ ኢኻ፡ በለኒ።¹⁴ናብቲ ናብ ሰሜን ኣቢሉ ዘሎ ኣፍ ደገ ቤት እግዚኣብሄር ወሰደኒ፡ እንሆ ኸኣ፡ ኣብኡ ኣንስቲ ተቐሚጠን ንተሙዝ ይበኽያሉ ነበራ።¹⁵ሽዑ ድማ፡ ኣታ ወዲ ሰብ፡ ርኢኻዮዶ፧ ገና ካብዚ ዝገድድ ርኽሰትውን ክትርኢ ኢኻ፡ በለኒ።¹⁶ናብቲ ውሽጣዊ ኣጻድ ቤት እግዚኣብሄር ወሰደኒ። እንሆ ኸኣ፡ ኣብቲ ደገ መቕደስ እግዚኣብሄር ኣብ መንጎ ገበላን መሰውእን ኣስታት ዕስራን ሓሙሽተን ሰብኣይ ዝባኖም ናብ መቕደስ እግዚኣብሄር፡ ገጾም ድማ ናብ ምብራቕ ኣቢሎም ነበሩ። ናብ ምብራቕ ኣቢሎም ንጸሓይ ይሰግዱ ነበሩ።¹⁷ንሱ ኸኣ፡ ኣታ ወዲ ሰብ ርኢኻዶ፧ ነታ ሃገር ብዓመጽ መሊኦምዋ፡ መመሊሶም ድማ ኵራይ ዘለዓዕሉስ፡ቤት ይሁዳ እዚ ኣብዚ ዝገብርዎ ዘለዉ ጽያፍዶ ውሒድዎም እዩ፧ እንሆ፡ ንሳቶምጨንፈር ኣብ ኣፍንጫኦም የቕርቡ ኣለዉ፡ በለኒ።¹⁸ስለዚ ኣነ ድማ ብነድሪ ኽገብር እየ፡ ዓይነይ ኣይክትንሕፍን እያ፡ ኣይክርሕርሕን ከኣ እየ፡ ኣብ እዝነይ ዓው ኢሎም እንተ ጨርሑ እኳ ኣይክሰምዖምን እየ።

ትን. ህዝቅኤል ምዕራፍ 9

   ¹ኣብ ኣእዛነይ ከኣ፡ እቶም ነታ ኸተማ ዝቕጽዑስ፡ ነፍሲ ወከፎም እቲ ዘጥፍኣሉ ኣጽዋር ኣብ ኢዱ ሒዙ ይቕረብ፡ እናበለ ዓው ኢሉ ጨደረ።²እንሆ ድማ፡ ሹድሽተ ሰብኣይ፡ ነፍሲ ወከፎም እቲ ዝቐትለሉ ኣጽዋር ኣብ ኢዱ ሒዙ፡ ካብቲ መገዲ ናብ ሰሜን ኣቢሉ ዘርኢ ላዕላይ ደገ መጹ። ሓደ ሰብኣይ፡ ካብ ልሕጺ እንጣጢዕ እተገብረ ዓለባ እተኸድነ፡ ናብ ጸሓፊ ቐርኒ ቐለምውን ኣብ ሕቝኡ ዘለዎ፡ ኣብ ማእከሎም ነበረ። ኣትዮም ኣብ ጥቓ እቲ መሰውኢ ነሓሲ ቘሙ።³ክብሪ ኣምላኽ እስራኤል ካብቲ ዝነበሮ፡ ካብ ልዕሊ ኩሩቤል ተላዕለ፡ ናብቲ ልዳት እታ ቤት ከኣ ኸደ። ነቲ ካብ ልሕጺ እንጣጢዕ እተገብረ ዓለባ እተኸድነ፡ ናይ ጸሓፊ ቐርኒ ቐለምውን ኣብ ሕቝኡ ዝነበሮ ሰብኣይ ጸውዖ።⁴እግዚኣብሄር ከኣ፡ ብማእከል፡ ከተማ ብማእከል የሩሳሌም ሕለፍ እሞ ነቶም ዝጕህዪን ነቶም ብዛዕባ እቲ ኣብ ማእከላ ዝግበር ዘሎ ጽያፍ ዝጉህዩን ዝትክዙንሲ ኣብ ግምባሮም ማሕተም ግበረሎም፡ በሎ።⁵ኣነ እናሰማዕኩ ኸኣ ነቶም ካልኦት በሎም፡ ደድሕሪኡ በታ ኸተማ ሓሊፍኩም ውቕዑ፡ ዓይንኹም ንሓደ እኳ ኣይትንሓፍ ኣይትራሕርሑውን።⁶ካብ መቕደሰይ ጀሚርኩም ንኣረገውትን ነጉባዝን ንጕረዙን ንቐለውዕን ንኣንስትን ቅተሉ፡ ኣጽንቱ። ነቶም ማሕተም ዘለዎም ግና ኣይትቕረብዎም። ንሳቶም ከኣ በቶም ኣብ ቅድሚ እታ ቤት ዘለዉ ኣረገውቲ ጀመሩ።⁷ንሱ ድማ፡ ናታ ቤት ኣርክስዋ፡ ነቲ ኣጻዳት ከኣ ብምዉታት ምልእዎ፡ ውጹ፡ በሎም። ንሳቶም ወጹ ኣብታ ኸተማውን ይወቕዑ ነበሩ።
   ⁸ኰነ ድማ፡ክወቕዑ ኸለዉ፡ ኣነ ተረፍኩ። ብገጸይ ወደቕኩ እሞ፡ ኣየ ኣታ እግዚኣብሄር ኣምላኽ፡ ነድርኻ ኣብ የሩሳሌም ኪዒኻዶ፡ ንዅሎም ትርፎፍያ እስራኤል ከተጥፍኦም ኢኻ፡ኢለ ጨራሕኩ።⁹ንሱ ድማ በለኒ፡ ኣበሳ ቤት እስራኤልን ይሁዳን ኣዝዩ ዓብዪ እዩ። እግዚኣብሄር ነዛ ሃገር ሓዲግዋ፡ እግዚኣብሄር ሓንቲ እኳ ኣይርእን እዩ፡ ይብሉ ኣለዉ እሞ፡ እታ ሃገር ብደም፡ እታ ኸተማውን ብዓመጽ መሊአን ኣለዋ።¹⁰ስለዚ ዓይነይ ኣይክትንሕፍን እያ፡ ኣነ ኣይክርሕርሕን፡ መገዶምውን ኣብ ርእሶም ክመልሰሎም እየ።¹¹እንሆ ኸኣ፡ እቲ ካብ ልሕጺ እንጣጢዕ እተገብረ ዓለባ እኸድነ፡ ናይ ጸሓፊ ቐርኒ ቐለምውን ኣብ ሕቑኡ ዝነበሮ፡ ከምቲ ዝኣዘዝካኒ ገበርኩ፡ ኢሉ ጸብጻቡ ሃበ።

ትን. ህዝቅኤል ምዕራፍ 10

   ¹ሽዑ ጠመትኩ፡ እንሆ ድማ፡ ኣብ ልዕሊ እቲ ርእሲ ኪሩቤል ዘለዎም ጠፈር፡ ከም እምኒ ሰፊሮስ፡ ትርኢት ዝፋን ዝመስል ኣብ ልዕሊኦም ተገልጸ።²ንሱ ኸኣ ነቲ ብልሕጺ እንጣጢዕ እተገብረ ዓለባ እተኸድነ ሰብኣይ፡ ኣብ መንጎ እቲ መንኰራዅር ኣብ ትሕቲ ኪሩቤል እቶ፡ ካብቲ ኣብ ማእከል ኩሩቤል ዘሎ ነዳዲ ፈሓም ድማ በእዳውካ ሓፊንካ ኣብ ልዕሊ እታ ኸተማ ንዝሓዮ፡ ኢሉ ተዛረበ። ንሱውን እናርአኽዎ ኣተወ።³እቲ ሰብኣይ ክኣቱ ኸሎ፡ እቶም ኪሩቤል ብወገን የማን እታ ቤት ደው ኢሎም ነበሩ።⁴ክብሪ እግዚኣብሄር ድማ ካብ ልዕሊ እቶም ኪሩቤል ተላዕለ ናብ ልዳት እታ ቤት ከኣ ኸደ። እታ ቤት ድማ ብደበና መልአት፡ እቲ ኣጸድውን ብባና ኽብሪ እግዚኣብሄር መሊኡ ነበረ።⁵ህማም ኣኽናፍ ኪሩቤል ከኣ፡ ከም ድምጺ እቲ ዅሉ ዝኽእል ኣምላኽ ክዛረብ ከሎ ዀይኑ፡ ክሳዕ እቲ ግዳማዊ ኣጸድ ተሰምዐ።⁶ኰነ ኸኣ፡ ነቲ ካብ ልሕጺ እንጣጢዕ እተገብረ ዓለባ እተኸድነ ሰብኣይ፡ ካብ መንጎ እቲ መንኰራዅር፡ ካብ መንጎ እቲ ኪሩቤል ሓዊ ውሰድ፡ ኢሉ ምስ ኣዘዞ፡ ንሱ ኣተወ ኣብ ጥቓ መንኰራዅር ድማ ቘመ።⁷እቲ ኪሩብ ድማ ካብ መንጎ እቶም ኪሩቤል ናብቲ ኣብ መንጎ ኪሩቤል ዘሎ ሓዊ ኢዱ ዘርጊሑ ኻብኡ ወሰደ፡ ኣብ ኣእዳው እቲ ኻብ ልሕጺ እንጣጢዕ እተገብረ ዓለባ እተኸድነ ድማ ኣንበሮ። ንሱውን ተቐቢልዎ ወጸ።
   ⁸ኣብ ትሕቲ ኣኽናፍ ኪሩቤል ከኣ ኢድ ሰብ ዝመስል ተራእየ።⁹ጠመትኩ፡ እንሆ ኸኣ፡ ኣብ ጥቓ እቶም ኪሩቤል ኣርባዕተ መንኰራዅር ኣብ ጥቓ ነፍሲ ወከፍ ኪሩብ ነበረ። ትርኢት እቲ መንኰራዅር ድማ ከም ሕብሪ እምኒ ክሪሶሊት ነበረ።¹⁰ትርኢት ኣርባዕቲኦም ከኣ ይመሳሰል ነበረ፡ እቲ ሓደ መንኰርኰር ኣብ ውሽጢ እቲ ሓደ መንኰርኰር ከም ዝኣተወ ይመስል ነበረ።¹¹ክኸዱ ኸልዉ ድማ በርባዕተ ወገኖም ይኸዱ፡ ምስ ዝኸዱ ኸኣ ኣይምለሱን ነበሩ። እቲ ርእሲ ናብ ዘበሎ ስፍራ ይስዕብዎ ነበሩ እምበር፡ክኸዱ ኸለዉስ ኣይምለሱን ነበሩ።¹²ኵሉ ስጋኦምን ዝባኖምን ኣእዳዎምን ኣኽናፎምን እቲ መንኰራዅርን ኣርባዕቲኡ መንኰራዅሮምን ብዅሉ ዙርያኦም ኣዒንቲ መሊእዎም ነበረ፡¹³ነቲ መንኰራዅር ከኣ፡ ኣነ እናሰማዕኩ፡ ኣንኰርኰርቲ ኢሎም ይሰምይዎ ነበሩ።¹⁴ነፍሲ ወከፍ ኣርባዕተ ገጽ ነበሮ፡ እቲ ቐዳማይ ገጽ ናይ ኪሩብ ገጽ፡ እቲ ኻልኣይ ገጽ ናይ ሰብ ገጽ፡ እቲ ሳልሳይ ከኣ ገጽ ኣንበሳ፡ እቲ ራብዓይ ድማ ገጽ ንስሪ እዩ።¹⁵እቶም ኪሩቤል ከኣ ተላዕሉ፡ ንሳቶምውን እቶም ቀደም ኣብ ርባ ኬባር ዝርኣኽዎም እንስሳ እዮም።¹⁶እቶም ኪሩቤል ክኸዱ ኸለዉ፡ እቲ መንኰራዅር ድማ ጐጐብኦም ይኸይድ ነበረ። እቶም ኪሩቤል ካብ ምድሪ ኽለዓሉስ ኣኽናፎም እንተ ዘርግሑ፡ እቲ መንኰራዅርውን ካብ ጥቓኦም ኣየግልስን ነበረ።¹⁷መንፈስ እቶም እንስሳ ኣብኦም ስለ ዝነበረ፡ እቲኣቶም ደው ክብሉ ኸለዉ፡ እዚ ድማ ደው ይብል ነበረ፡ እቲኣቶም ክለዓሉ ኸለዉ፡ እዚውን ይለዓል ነበረ።
   ¹⁸ክብሪ እግዚኣብሄር ካብ ልዕሊ ልዳት እታ ቤት ወጸ፡ ኣብ ሊዕሊ ኪሩቤል ከኣ ቘመ።¹⁹እቶም ኪሩቤል ድማ ኣኽናፎም ዘርግሑ። ክነቕሉ ኸለዉ ኸኣ፡ እቲ መንኰራዅር ብጥቓኦም ኰይኑ፡ ኣብ ቅድሚ ዓይነይ ካብ ምድሪ ተላዕሉ፡ ኣብቲ ናይ ምብራቕ ኣፍ ደገ ቤት እግዚኣብሄር ድማ ቘሙ። ክብሪ ኣምላኽ እስራኤልውን ኣብ ልዕሊኦም ነበረ።²⁰እዚኦም ከኣ እቶም ኣብ ትሕቲ ኣምላኽ እስራኤል ኣብ ጥቓ ርባ ኬባር ዝርኣኽዎም እንስሳ እዮም። ኣነውን ኪሩቤል ምዃኖም ኣለሌኽዎም።²¹ንነፍሲ ወከፎም ኣርባዕተ ገጽ፡ ንነፍሲ ወከፎም ድማ ኣርባዕተ ኽንፊ ነበሮም። ኣብ ትሕቲ ኣክናፎም ከኣ ኣእዳው ሰብ ዝመስል ነበሮም።²²መልክዕ ገጾም ከምቲ ኣብ ጥቓ ርባ ኬባር ዝርኣኽዎ ገጽ ነበረ፡ ትርኢቶም ከምኡ ነበረ። ነፍሲ ወከፎም ንቕድሚኡ ትኽ ኢሉ ይኸይድ ነበረ።

ትን. ህዝቅኤል ምዕራፍ 11

   ¹መንፈስ ኣልዓለኒ ናብቲ ወገን ምብራቕ፡ ናብቲ ናብ ምብራቕ ኣቢሉ ዝርኢ ደገ ቤት እግዚኣብሄር ድማ ወሰደኒ። እንሆ ኸኣ፡ ኣብቲ ደገ ኣፍ ዕስራን ሓሙሽተን ሰብኣይ ነበሩ፡ ኣብ ማእከሎም ድማ ነቶም መሳፍንቲ ህዝቢ ያኣዛንያ ወዲ ዓዙርን ፈላጥያ ወዲ በናያን ርአኽዎም።²በለኒ ኸኣ፡ ኣታ ወዲ ሰብ፡ እዚኣቶም ኣብዛ ኸተማ እዚኣ ሕሰም ዝጠልፉ፡ እኩይ ዝመኽሩ ሰባት እዮም።³ንሳቶም ድማ፡ ኣይቀረበን፡ ኣባይቲ ንስራሕ፡ ንሳ ድስቲ እያ፡ ንሕና ኸኣ ስጋ ኢና፡ ይብሉ ኣለዉ።⁴ስለዚ ኣንጻሮም ተነበየሎም፡ ኣታ ወዲ ሰብ፡ ተነበ፡ በለኒ።^5-6መንፈስ እግዚኣብሄር ከኣ ኣባይ ወረደ እሞ፡ እግዚኣብሄርሲ፡ ኣቱም ቤት እስራኤል፡ ንስኻትኩም ከምዚ ትብሉ ኣሎኹም፡ ኣነውን ሓሳባት ልብኹም እፈልጦ እየ። ኣብዛ ኸተማ እዚኣ ብዙሓት ቀተልኩም፡ ነደባባያታ ኸኣ ብቕቱላት መላእኩማ፡ ይብል ኣሎ፡ ኢልካ ንገሮም፡ በለኒ።⁷ስለዚ እግዚኣብሄር ኣምላኽ ከምዚ ይብል ኣሎ፡ እቶም ኣብ ማእከላ ዘንበርኩምዎም ቅቱላት፡ ንሳቶም ስጋ እዮም፡ ንሳ ኸኣ ድስቲ እያ፡ ንስኻትኩም ግና ካብ ማእከላ ኽትወጹ ኢኹም።⁸ሰይፊ ፈራህኩም፡ ሰይፊ ድማ ከምጽኣልኩም እየ፡ ይብል እግዚኣብሄር ኣምላኽ።⁹ካብ ማእከላ ኸውጽኣኩም፡ ናብ ኢድ ጓኖት ከኣ ከሕልፈኩም፡ ፍርዲውን ኣባኻትኩም ክገብር እየ።¹⁰ብሰይፊ ኽትወድቁ ኢኹም፡ ኣብ ወሰን እስራኤል ክፈርደኩም እየ፡ ንስኻትኩምውን ኣነ እግዚኣብሄር ምዃነይ ክትፈልጡ ኢኹም።¹¹እዛ ኸተማ እዚኣ ድስቲ ኣይክትኰነልኩምን፡ ንስኻትኩም ድማ ኣብ ማእከላ ስጋ ኣይትኰኑን ኢኹም፡ ኣብ ወሰን እስራኤል ክፈርደኩም እየ።¹²ንስኻትኩምሲ ፍርዲ ኣቶም ኣብ ዙርያኹም ዘለዉ ኣህዛብ ገበርኩም እምበር፡ ከም ትእዛዛተይ ኣይተመላለስኩምን፡ ፍርደይ ከኣ ኣይገበርኩምን እሞ፡ ኣነ እግዚኣብሄር ምዃነይ ክትፈልጡ ኢኹም።¹³ኰነ ኸኣ፡ ኣነ ኽንበ ኸሎኹ፡ ፈላጥያ ወዲ በናያ ሞተ። ሽዑ ብግምባረይ ተደፊአ ዓው ኢለ፡ ኣየ፡ ኣታ እግዚኣብሄር ኣምላኽ፡ ነቶም ትርፎፍያ እስራኤልዶ ብጥራስ ከተጥፍኦም ኢኻ፡ኢለ ጨራሕኩ።
   ¹⁴ከምዚ ዝብል ቃል እግዚኣብሄር ድማ ናባይ መጸ፡¹⁵ኣታ ወዲ ሰብ፡ እቶም ኣብ የሩሳሌም ዝነብሩ እዮም ነሕዋትካ፡ እወ ነሕውትካ፡ ነቶም ኣዝማድካን ንቤት እስራኤል ዘበሉ ዅሎምን፡ ካብ እግዚኣብሄር ርሓቑ፡ እዛ ሃገር ንኣና ንርስቲ ተውሂባትና እያ፡ ዝበልዎም።¹⁶ስለዚ ኸኣ እግዚኣብሄር ኣምላኽ፡ ናብ ማእከል ህዝብታት እኳ እንተ ኣርሓቕኩዎም፡ ኣብ ማእከል ሃገራትውን እንተ ዘሮኹዎም፡ ኣብቲ ዘዝመጽዎ ሃገራት ንቕሩብ ግዜ መቕደስ ክዀኖም እየ፡ ይብል ኣሎ፡ ኢልካ ንገሮም።¹⁷ስለዚ ድማ፡ እግዚኣብሄር ኣምላኽ፡ ካብቶም ህዝብታት ክእክበኩም፡ ካብቲ ፋሕ ኢልኩምዎ ዘሎኹም ሃገራት ከኣ ክኣኻኽበኩም፡ ሃገር እስራኤልውን ክህበኩም እየ፡ ይብል ኣሎ፡ ኢልካ ንገሮም።¹⁸ናብኣ ኸኣ ኪመጹ እዮም፡ ኵሉ እቲ ኣብኣ ዘሎ ዘስገድግድ ነገራን ኵሉ ጽያፍን ድማ ካብኣ ኸርሕቕዎ እዮም።^19-20ብትእዛዛተይ ምእንቲ ኽመላለሱ፡ ንፍርደይ ከኣ ኽሕልዉን ክገብርዎን፡ ሓደ ልቢ፡ ኽህቦም፡ ሓድሽ መንፈስ ድማ ኣብ ውሽጥኹም ከሕድረልኩም እየ። ካብ ስጋኦም ናይ እምኒ ልቢ ኸውጽእ፡ ናይ ስጋ ልቢውን ክህቦም እየ። ንሳቶም ህዝበይ ክዀኑ እዮም፡ ኣነውን ኣምላኾም ክኸውን እየ።²¹ግናኸ እቶ፡ ልቦም ንልቢ እቶም ፍንፉናት ነገሮምን ጽያፎምን ዝስዕብሲ፡ መገዶም ኣብ ርእሶም ክመልሰሎም እየ፡ ይብል እግዚኣብሄር ኣምላኽ።
   ²²ሽዑ እቶም ኪሩቤል ኣኽናፎም ኣልዓሉ፡ እቲ መንኰራዅር ከኣ ጐጐብኦም ነበረ፡ ክብሪ ኣምላኽ እስራኤል ድማ ኣብ ላዕሊ፡ ኣብ ልዕሊኦም ነበረ።²³ክብሪ እግዚኣብሄር ከኣ ካብ ማእከል እታ ኸተማ ተላዕለ እሞ ኣብ ልዕሊ እቲ ብወገን ምብራቕ እታ ኸተማ ዘሎ ኸረን ቈመ።²⁴መንፈስ ድማ ኣልዓለኒ፡ በቲ መንፈስ ኣምላኽ ከኣ ብራእይ ናብ ምድሪ ከለዳውያን፡ ናብቶም ምሩኻት ወሰደኒ። እቲ ዝርእዮ ዝነበርኩ ራእይ ድማ ካብ ቅድመይ ህልም በለ።²⁵ኣነ ኸኣ እቲ እግዚኣብሄር ዘርኣየኒ ዅሉ ቓላት ነቶም ምሩኻት ነገርክዎም።

ትን. ህዝቅኤል ምዕራፍ 12

   ¹ከምዚ ዝብል ቃል እግዚኣብሄር ድማ መጸኒ፡²ኣታ ወዲ ሰብ፡ ንስኻስ ኣብ ማእከል ዓላዊት ቤት ትነብር ኣሎኻ። ዓላዊት ቤት እዮም እሞ፡ ኣዒንቲ ንምርኣይ ዘለዎም፡ ዘይርእዩ፡ ኣእዛን ከኣ ንምስማዕ ዘለዎም፡ ዘይሰምዑ እዮም።³ስለዚ ኣታ ወዲ ሰብ፡ ከም ስደተኛ ካንካ ተበትብ ኣዳሉ እሞ ኣብ ቅድሚኦም ብመዓልቲ ተበገስ። ዓላዊት ቤት እዮም እሞ፡ ምናልባሽ እንተ ኣስተንተኑ፡ ኣብ ቅድሚኦም ካብ ስፍራኻ ናብ ካልእ ስፍራ ጕዓዝ።⁴ከምቲ ተበትብ ስደት፡ ንተበትብካ ኣብ ቅድሚኦም ብመዓልቲ ኣውጽኣዮ። ከምቲ ንስደት ዝወጽእ ሰብ ኬንካ፡ ኣብ ቅድሚኦም ምሸት ውጻእ።⁵ኣብ ቅድሚኦም ነቲ መንደቕ ኣንኵሎ፡ ብእኡ ድማ ኣውጽኣዮ።⁶ኣብ ቅድሚኦም ኣብ መንኵብካ ጹሮ፡ ምስ ጸልመተ ድማ ኣውጽኣዮ። ንቤት እስራኤል መመሰሊ ገይረካ እየ እሞ፡ ነዛ ምድሪ ምእንቲ ከይትርእያ፡ ገጽካ ተዓመት።⁷ከምቲ ዝኣዘዘኒ ገበርኩ፡ ንተበትበይ፡ ከም ተበትብ ስደት ገይረ፡ ብመዓልቲ ኣውጻእክዎ፡ ምሸት ከኣ ነቲ መንደቕ ብኢደይ ኣንኰልክዎ። ምስ ጸልመተ ድማ፡ ኣብ መንኵበይ ጾይረ ኣብ ቅድሚኦም ኣውጻእክዎ።
   ⁸ንጽብሒቱ ኸኣ ከምዚ ዝብል ቃል እግዚኣብሄር መጸኒ፡⁹ኣታ ወዲ ሰብ፡ ቤት እስራኤል፡ እዛ ዓላዊት ቤትሲ፡ እንታይ ደኣ እዩ እትገብሮ ዘሎ ኢላዶ ኣይተዛረበትካን፡¹⁰እግዚኣብሄር ኣምላኽሲ፡ እዚ ጾር እዚ ነቲ ኣብ የሩሳሌም ዘሎ መስፍንን ነቶም ኣብ ማእከላ ዘለዉ ዅሎም ቤት እስራኤልን እዩ፡ ይብል ኣሎ ኢልካ ንገሮም፡¹¹በለውን፡ ኣነ ምሳሌኹም እየ። ከምቲ ኣነ ዝገበርክዎ፡ ከምኡ ኽገብርዎም እዮም፡ ንሳቶም ብስደት ናብ ምርኮ ክኸዱ እዮም።¹²እቲ ኣብ ማእከሎም ዘሎ መስፍን፡ ኣብ መንኵቡ ጸይሩ፡ ምስ ጸልመተ ኽወጽእ እዩ፡ ምእንቲ ኸውጽእዎስ፡ ነቲ መንደቕ ከንኵልዎ እዮም። ነታ ምድሪ በዒንቱ ኸይርእያ ድማ ገጹ ኽዕመት እዩ።¹³መርበበይ ከኣ ኣብ ልዕሊኡ እዝርግሓሉ፡ ብመፈንጠራይ ድማ ይተሓዝ። ናብ ባቢሎን፡ ናብ ምድሪ ከለዳውያን ከምጻኦ እየ፡ ግናኸ ኣብኣ ኽመውት ክነሱስ ኣይክርእያን እዩ።¹⁴ንዅላቶም ክሕግዝዎ ኢሎም ዝኸብዎን ንዅሎም ሰራዊቱን ናብ ኵሉ ንፋሳት ፋሕ ከብሎም፡ ሰይፈይ ድማ ደድሕሪኦም ክመዝዝ እየ።¹⁵ኣብ ማእከል ህዝብታት ምስ ዘሮኽዎምን ኣብ ማእከል ሃገራት ፋሕ ምስ ኣበልክዎምን ኣነ እግዚኣብሄር ምዃነይ ክፈልጡ እዮም።¹⁶ካባታቶ ግና ኣብቶም ዝመጽዎም ህዝብታት ኵሉ ፍንፉን ነገሮም ምእንቲ ኸዘንትዉስ፡ ካብ ሰይፍን ጥሜትን ፌራን ሒዶት ከትርፍ እየ፡ ኣነ እግዚኣብሄር ምዃነይ ከኣ ክፈልጡ እዮም።
   ¹⁷ከምዚ ዝብል ቃል እግዚኣብሄር ድማ መጸኒ፡¹⁸ኣታ ወዲ ሰብ፡ እንጌራኻ ራዕራዕ እናበልካ ብላዕ፡ ማይካ ኸኣ ብፍርሃትን ብሰንፈላልን ስተ።^19-20ንህዝቢ እዛ ሃገር እዚኣ፡ እግዚኣብሄር ኣምላኽ ብዛዕባ እቶም ኣብ የሩስሌምን ኣብ ሃገር እስራኤልን ዝነብሩስ፡ ሃገሮም ብሰሪ ዓመጽ ኵሎም ኣቶም ዝነብርዋ፡ ምስቲ ኣባኣ ዘሎ ኽትባድም ኣያ እሞ፡ እንጌራኦም ብሰንፈላል ክበልዑ፡ ማዮም ድማ እናስካሕክሑ ኽሰትዩ እዮም። እዘን ሰብ ዝነብረለን ዘሎ ኸተማታት ክዓንዋ እየን፡ እታ ሃገር ድማ ክትባድም እያ፡ ንስኻትኩምውን ኣነ እግዚኣብሄር ምዃነይ ክትፈልጡ ኢኹም፡ ይብል ኣሎ ኢልካ ንገሮም።
   ²¹ከምዚ ዝብል ቃል እግዚኣብሄር መጸኒ፡²²ኣታ ወዲ ሰብ፡ ኣብ ሃገር እስራኤል፡ ዘመን ይነውሕ፡ ራእይ ዘበለ ዅሉውን ይጠፍእ ኣሎ፡ ኢኩም እትምስሉስ እንታይ ምስላኡ እዩ እዚ፡²³ስለዚ በሎም፡ ከምዚ ይብል ኣሎ እግዚኣብሄር ኣምላኽ፡ ነዚ ምስላ እዚ መወዳእታ ኽገብረሉ እየ፡ ኣብ እስራኤል ከኣ መሊሶም ኣይክምስልዎን እዮም፡ ንስኻ ግና፡ ዘመን መፈጸምታ ዅሉ ራእይን ይቐርብ ኣሎ፡ ኢልካ ደኣ ንገሮም።²⁴ስለዚ ኣብ ማእከል ቤት እስራኤል ድሕርዚ ኸንቱ ራእይን ሓሳዊ ትንቢትን ኣይክኸውንን እዩ።²⁵ኣነ እግዚኣብሄር እየ እሞ፡ ኣነ እየ ዝዛረብ፡ እቲ ዝዛረቦ ቓል ከኣ ክፍጸም ኣይክድንጕን ድማ እዩ። ኣቱም ዓላዊት ቤት፡ ብዘመንኩም ቃል እዛረብ፡ እገብሮውን ኣሎኹ፡ ይብል እግዚኣብሄር ኣምላኽ።
   ²⁶ከምዚ ዝብል ቃል እግዚኣብሄር ከኣ መጸኒ፡²⁷ኣታ ወዲ ሰብ፡ እንሆ፡ ቤት እስራኤልሲ፡ እቲ ዝርእዮ ራእይ ንዝመጽእ ነዊሕ ዘመን እዩ፡ ንርሑቕ ዘሎ ግዝያት ድማ እዩ ዝንበ ዘሎ፡ ይብሉ ኣለዉ።²⁸ስለዚ በሎም፡ እግዚኣብሄር ኣምላኽ ከምዚ ይብል ኣሎ፡ ድሕርዚ ኻብተን ቃላተይሲ ሓንቲ እኳ ኣይክትድንጕን እያ። እታ እተናገርክዋ ቓል ከኣ ክትፍጸም እያ፡ ይብል እግዚኣብሄር ኣምላኽ፡ ኢልካ ንገሮም።

ትን. ህዝቅኤል ምዕራፍ 13

   ¹ከምዚ ዝብል ቃል እግዚኣብሄር ድማ መጸኒ፡²ኣታ ወዲ ሰብ፡ ነቶም ዝንበዩ ዘለዉ ነብያት እስራኤልሲ ኣንጻሮም ተነበየሎም፡ ነቶም ካብ ልቦም ሃንዲሶም ዝንበዩ ዘለዉውን፡ ቃል እግዚኣብሄር ስምዑ፡ ኢልካ ንገሮም።³እግዚኣብሄር ኣምላኽ፡ ነቶም ገለ ኸይርኣዩስ ንመንፈስ ርእሶም ዝስዕቡ ዓያሱ ነብያት ወይለኦም፡ ይብል ኣሎ።⁴ኣታ እስራኤል፡ ነብያትካ ኸም እተን ኣብ ምድረ በዳ ዝነብራ ወኻሩ እዮም።⁵በታ መዓልቲ እግዚኣብሄር ኣብ ኲናት ቀጥ ኢልኩም ክትቈሙስ፡ ናብቲ ፍራስ ኣይወጻእኩምን፡ ኣብ ዙርያ ቤት እስራኤልውን ቀጽሪ ኣይሰራሕኩምን።⁶እቶም እግዚኣብሄር ከይለኣኾምሲ፡እግዚኣብሄር ይብል ኣሎ፡ኢሎም ቃሎም ከም ዝፍጸም ዘተስፍዉ፡ ከንቱነትን ትንቢት ሓሶትን እዮም ዝረኣዩ።⁷ኣነ ኸይተዛረብኩስ ንስኻትኩም፡ እግዚኣብሄር ይብል ኣሎ፡ እትብሉ ዘሎኹም፡ ከንቱ ራእይዶ ኣይኮነን ዝርኣኹምዎ፧ ትንቢት ሓሶትዶኸ ኣይኰነን እተዛረብኩምዎ፧
   ⁸ስለዚ እግዚኣብሄር ኣምላኽ ከምዚ ይብል ኣሎ፡ ከንቱነት ስለ እተዛረብኩም ሓሶትውን ስለ ዝርኣኹም፡ ስለዚ እኔኹ ተሃንዲደኩም ኣሎኹ፡ ይብል እግዚኣብሄር ኣምላኽ።⁹ኢደይ ከኣ ነቶም ከንቱነት ዝርእዩን ሓሶት ዝንበዩን ዘለዉ ነብያት ተጻሪራቶም ኣላ። ንሳቶም ኣብ ባይቶ ህዝበይ ኣይክህልዉን፡ ኣብ ደብተር ቤት እስራኤል ድማ ኣይክጸሓፉን፡ ናብ ሃገር እስራኤል ከኣ ኣይክኣትዉን እዮም፡ ንስኻትኩም ድማ እግዚኣብሄር ኣምላኽ ምዃነይ ክትፈልጡ ኢኹም።¹⁰ሰላም ዘልቦ፡ ሰላም ኣሎ፡ ኢሎም ንህዝበይ ስለ ዘስሓትዎ፡ እወ ስለ ዘስሓትዎ፡ ንሱ መንደቕ እንተ ነደቐ፡ እንሆ፡ ንሳቶም ብዘይ ቀውም ጸብሪ ይልቕልቕዎ ኣለዉ።¹¹ነቶም ብዘይ ቀውም ጸብሪ ዝልቕልቕዎስ፡ክወድቕ እዩ፡ በሎም። ዝደማስስ ዝናም ክዘንም እዩ፡ ኣቱም ኣእማን በረድ፡ ክትወድቁ ኢኹም፡ ህቦብላ ንፋስ ከኣ ከፍርሶ እዩ።¹²እንሆ፡ እቲ መንደቕ ምስ ፈረሰ፡ እቲ ዝለቕለቕኩምሉ ጸብርስ ኣበይ ኣሎዶ ኣይክብሉኹምን እዮም፡
   ¹³ስለዚ እግዚኣብሄር ኣምላኽ ከምዚ ይብል ኣሎ፡ ብነድረይ ህቦብላ ንፋስ ክፍኑ፡ ብዅራይ ድማ ዝደማስስ ዝናም ከዝንም፡ ብነድረይውን ዘጥፍእ ኣእማን በረድ ከውርድ እየ።¹⁴ነቲ ብዘይ ቀውም ጸብሪ ዝለቕለቕኩምዎ መንደቕ ከፍርሶን ናብ ምድሪ ኸውድቖን እየ። መሰረቱውን ጋህ ክብል እዩ። ንሱ ኽወድቕ እዩ፡ ንስኻትኩም ከኣ ኣብ ማእከሉ ኽትጠፍኡ ኢኹም እሞ፡ ኣነ እግዚኣብሄር ምዃነይ ክትፈልጡ ኢኹም።¹⁵ነቲ መንደቕን ነቶም ብዘይ ቀውም ጸብሪ ዝለቕለቕዎን ሃና ነድረይ ከውጽኣሎም እየ።ኣነ ድማ፡ እቲ መንደቕ የሎን፡ እቶም ዝለቕለቕዎውን የለዉን ክብለኩም እየ።¹⁶ንሳቶም እቶም ብዛዕባ የሩሳሌም ዝንበዩ፡ ሰላም፡ዘልቦስ ራእይ ሰላም ዝርእዩላ ዘለዉ ነብያት እስራኤል እዮም፡ ይብል እግዚኣብሄር ኣምላኽ።
   ¹⁷ንስኻውን ኣታ ወዲ ሰብ፡ ገጽካ ናብተን ካብ ልበን ሃንዲሰን ዝንበያ ኣዋልድ ህዝብኻ ኣብል ኣንጻረን ድማ ተነበየለን፡¹⁸ንነፍሳት ከፈንጥራስ፡ እተን መኸዳ ንዅሉ ዅርናዕ ኣእዳው ዝሰፍያን ንዓብይን ንንእሽቶይን ኵሉ ርእሲ ድማ መጐልበቢ ዝገብራን ወይለአን። ነፍሳት ህዝበይ ትፍንጥራ፡ ነፍሳትክንዶ ኸተድሕና ኢኽን፡ይብል እግዚኣብሄር ኣምላኽ፡ ኢልካ ንገር።¹⁹ንስኻትክን ነተን ዘይሞታ ነፍሳት ንሞት እናወፌኽን፡ ነተን ብህይወት ክነብራ ዘይግባአን ነፍሳት ከኣ ህይወተን እናኣድሓንክ፡ ነቲ ሓሶት ዝሰምዕ ህዝበይ እንሓሶኽናሉ፡ ምእንቲ ዕሙዅቲ ስገምን ቈረርስ እንጌራን ኣብ ህዝበይ ተርክሳኒ ኣሎኽን።²⁰ስለዚ ኸኣ እግዚኣብሄር ኣምላኽ ከምዚ ይብል ኣሎ፡ እንሆ ኣነ ነተን ንነፍሳት ከም ኣዕዋፍ እትፍንጥራለን መኸዳታትክን ተሃንዲደየን ኣሎኹ፡ ካብ ቅልጽምክን ድማ ክቐደን፡ ነተን ነፍሳት፡ እወ ነተን ከም ኣዕዋፍ ዝፈንጠርክናአን ነፍሳት ሓራ ኸውጽአን እየ።²¹ነቲ መጐልበቢታትክን ድማ ክቐዶ፡ ንህዝበይ ከኣ ካብ ኢድክን ከድሕኖ እየ፡ ከይተፈንጥራኦምውን ኣብ ኢድክን ኣይክዀኑን እዮም እሞ፡ ኣነ እግዚኣብሄር ምዃነ ክትፈልጣ ኢኽን።²²ንልቢ እቲ ጻድቕ፡ ኣነ ኸሕዝኖ ዘይደሌኹስ፡ ንስኻትክን ብሓሶት ስለ ዘሕዘንክናኦ፡ እቲ ረሲእ፡ ካብ መገዲ ረሲኣነት ከይምለስ እሞ ከይድሕንሲ፡ ኣእዳዉ ስለ ዘበርታዕክን፡²³ስለዚ ከንቱነት ኣይክትርእያን፡ ድሕርዚ ኸኣ ትንቢት ኣይክትንበያን ኢኽን። ንህዝበይውን ካብ ኢድክን ከናግፎ እየ እሞ፡ ኣነ እግዚኣብሄር ምዃነይ ክትፈልጣ ኢኽን።

ትን. ህዝቅኤል ምዕራፍ 14

   ¹ሓያሎ ኻብቶ ዓበይቲ እስራኤል ከኣ ናባይ መጺኦም፡ ኣብ ቅድመይ ተቐመጡ።²ከምዚ ዝብል ቃል እግዚኣብሄር ድማ መጸኒ፡³ኣታ ወዲ ሰብ፡ ኣዞም ሰባት እዚኣቶም ንጣኦታቶም ኣብ ልቦም ኣሕዲሮምዎም ኣለዉ፡ ነቲ መዓንቀፊ ኣበሳኦም ከኣ ኣብ ቅድሚ ገጾም ኣቝሞምዎ ኣለዉ። ከመይ ኢለ ደኣ በዚኣቶም ክሕተት እየ፡^4-5ስለዚ ተዛረቦም፡ እግዚኣብሄር ኣምላኽ፡ ሓደ እኳ ኻብ ቤት እስራኤል፡ ጣኦታቱ ኣብ ልቡ ዘሕድር፡ ነቲ መዓንቀፊ ኣበሳኡ ኸኣ ኣብ ቅድሚ ገጹ ዘቕውም፡ ኣብ ነብዩውን ዝመጽእ ዘበለ፡ ዅላቶም ብሰሪ ጣኦታቶም ካባይ ዘምቢሎም እዮም እሞ፡ ንቤት እስራኤል ብልቦም ምእንቲ ኽሕዞምሲ፡ ኣነ እግዚኣብሄር ከም መጠን ብዝሒ ጣኦታቱ ኽመልሰሉ እየ፡ ይብል ኣሎ፡ ኢልካ ንገሮም።⁶ስለዚ ንቤት እስራኤል በሎም፡ እግዚኣብሄር ኣምላኽ ከምዚ ይብል ኣሎ፡ ተመለሱ፡ ካብ ጣኦታትኩም ተመለሱ፡ ካብ ኵሉ ጽያፍኩም ከኣ ገጽኩም ምለሱ።⁷ሓደ እኳ ኻብ ቤት እስራኤል ወይስ ካብቶም ኣብ እስራኤል ዝነብሩ ዘለዉ መጻእተኛታት ካባይ ዝርሕቕ፡ ንጣኦታቱ ኣብ ልቡ ዘሕድር፡ ነቲ መዓንቀፊ ኣበሳኡ ድማ ኣብ ቅድሚ ገጹ ዘቕውም፡ ንኣይ ክሓተሉ ኢሉውን ናብ ነብዪ ዝመጽእ፡ ኣነ እግዚኣብሄር ባዕለይ ክመልሰሉ እየ⁸ነዚ ሰብኣይ እዚ ንምህንዳድ ኣነ ክመልሰሉ፡ ንምልክትን ምሳሌን ከኣ ክገብሮ፡ ካብ ማእከል ህዝበይውን ከጽንቶ እየ፡ ንስኻትኩምውን እግዚኣብሄር ምዃነይ ክትፈልጡ ኢኹም።
   ^9-11ቤት እስራኤል ህዝበይ ክኾኑ ኣነውን ኣምላኾም ክኸውን እምበር፡ ድሕርዚ ኻባይ ከይዝምብሉ፡ ሕጊ ብምፍራሶም ዘበለ ኵሉኸኣ ከይረኽሱስ፡ እቲ ነብዪ እኳ ተጠቢሩ ቓል እንተ ተዛረበ፡ ነቲ ነብዪ እቲ ኣነ እግዚኣብሄር እየ ዝጠበርክዎ። ኢደይ ናብኡ ኽዝርግሕ እየ እሞ ካብ ማእከል ህዝበይ እስራኤል ከጥፍኦ እየ። በደሎም ድማ ክጾሩ እዮም፡ በደል እቲ ነብዪ ማዕረ በደል እቲ ሓታቲኡ ክኸውን እዩ፡ ይብል እግዚኣብሄር ኣምላኽ።
   ¹²ከምዚ ዝብል ቃል እግዚኣብሄር ድማ መጸኒ፡¹³ኣታ ወዲ ሰብ፡ ሃገር ኣዝያ ጠሊማ ኣባይ ሓጢኣት እንተ ገበረት፡ ኣነ ኸኣ ኢደይ እንተ ዘርጋሕኩላ፡ ነቲ ምርኩስ እንጌራ ድማ እንተ ሰበርኩላ፡ ጥሜት ከኣ እንተ ሰደድኩላ፡ ሰብን እንስሳንውን እንተ ኣጽነትኩላ፡¹⁴እዞም ሰለስተ ሰብኣይ፡ ኖህን ዳንኤልን እዮብን፡ ኣብኣ እኳ እንተ ጸንሑ፡ ንሳቶምሲ ብጽድቆም ነታ ነፍሶም ጥራይ ደኣ መናገፍዋ፡ ይብል እግዚኣብሄር ኣምላኽ።¹⁵ብሰሪ እቶም ኣራዊት ሓደ እኳ ብእኣ ምሕላፍ ክሳዕ ዝስእን፡ ምድረ በዳ ገይሮም ክሳዕ ዘጥፍእዋ፡ ኣነ ሕሱማት ኣራዊት ኣብ ማእከል እታ ሃገር ኣንተ ፈኖኹ፡¹⁶እዞም ሰለስተ ሰብኣይ እኳ ኣብኣ እንተ ጸንሑ፡ ኣነ ህያው እየ፡ ይብል እግዚኣብሄር ኣምላኽ፡ ንሳቶምሲ ንርእሶም ጥራይ ደኣ ምተናገፉ እምበር፡ ነወዳት ወይስ ነዋልድ ኣይመናገፉን፡ እታ ሃገር ከኣ ምባደመት።¹⁷ወይስ ንሰብን እንስሳን ካብኣ ኸይጸንትሲ፡ ሰይፊ ኣብ ማእከል እታ ሃገር ይሕለፍ፡ ኢለ ንሰይፊ ናብታ ሃገር እንተ ኣምጻኣኩ፡¹⁸እዞም ሰለስተ ሰብኣይ ኣብኣ እኳ እንተ ጸንሑ፡ ኣነ ህያው እየ፡ ይብል እግዚኣብሄር ኣምላኽ፡ ንሳቶምሲ ንርእሶም ጥራይ ደኣ ምተናገፉ እምበር፡ ነወዳት ወይስ ነዋልድ ኣይመናገፉን።¹⁹ወይስ ሰብን እንስሳን ካብኣ ኸጽንትሲ፡ ፌራ ናብታ ሃገር ኣቲኣ እንተ ሰደድኩ፡ ቍጥዓይ ከኣ ብደም እንተ ኽዖኹ፡²⁰ኖህን ዳንኤልን እዮብን እኳ ኣብኣ እንተ ጸንሑ፡ ንሳቶምሲ ብጽድቆም ንነፍሶም ጥራይ ደኣ መናገፉ እምበር፡ ኣነ ህያው እየ፡ ይብል እግዚኣብሄር ኣምላኽ፡ ወዲ ወይስ ጓል ኣይመናገፉን።
   ²¹ስለዚ እግዚኣብሄር ኣምላኽ ከምዚ ይብል ኣሎ፡ ሰብን እንስሳን ካብኣ ኸጽንትሲ፡ ነተን ኣርባዕተ ብርቱዓት ፍርደይ፡ ሰይፍን ጥሜትን ሕሱማት ኣራዊትን ፌራን፡ ኣብ የሩሳሌም ምስ ዝሰድድውን፡²²እንሆ፡ዘውጽእዎም ኣወዳትን ኣዋልድን ገለ ተርፍ ከምልጡ እዮም። እንሆ ኸኣ፡ ንሳቶም ናባኻትኩም ክመጹ እዮም፡ ንብረቶምን ግብሮምን ድማ ክትርእዩ ኢኹም፡ ንስኻትኩምውን በቲ ኣነ ኣብ የሩሳሌም ዘውረድክዎ መዓትን በቲ ዘውረድኩላ ዅሉን ክትጸናንዑ ኢኹም።²³ንብረቶምን ግብሮምን ምስ ርአኹም፡ ንምጽንናዕኩም ክኾኑ ኣዮም። ኵሉ እቲ ዝገበርክዎስ ብዘይ ምኽንያት ከም ዘይገበርክዎ ኽትፈልጡ ኢኹም፡ ይብል እግዚኣብሄር ኣምላኽ።

ትን. ህዝቅኤል ምዕራፍ 15

   ¹ከምዚ ዝብል ቃል እግዚኣብሄር ድማ መጸኒ፡²ኣታ ወዲ ሰብ፡ ኦም ወይኒ፡ እቲ ኣብ ማእከል ኣእዋም ዱር ዘሎ ሓረግሲ፡ ብምንታይ እዩ ኻብቲ ኻልእ ኣእዋም ዝበልጽ፡³ብእኡ ስራሕ ክገብሩስ፡ ካብኡዶ ዕጨይቲ ይወስዱ እዮም፡ኣቕሓ ኽሰቕሉሉስ፡ጸዋሪትከ ኻብኡዶ ይወስዱ እዮም፧⁴እንሆ፡ ሞዅ ክብል ኣብ ሓዊ ይድርበ፡ እቲ ሓዊ ኸኣ ንኽልቲኡ ጨንፈሩ ይበልዖ፡ እቲ ማእከሉውን ይሓርር፡ ንገለ ስራሕዶ ይጠቅም እዩ፡⁵እንሆ፡ ብደሓኑ ኸሎ እኳ ንስራሕ ዘይጠቐመስ፡ ሓዊ ምስ በልዖን ምስ ኣሕረሮን ግዳ ኸመይ ኢሉ ገለ ስራሕ ክግበሮ ይከኣል፡⁶ስለዚ እግዚኣብሄር ኣምላኽ ከምዚ ይብል ኣሎ፡ ከምቲ ኣብ ማእከል ኣእዋም ዱር ብሓዊ ሞዅ ክብል ዝወፌኽዎ ኦም ወይኒ፡ ነቶም ኣብ የሩሳሌም ዝነብሩ ኸኣ ከምኡ ኣሕሊፈ ኽህቦም እየ።⁷ንምጽራሮም ገጸይ ናባታቶም ክመልስ እየ፡ ካብ ሓዊ ወጹ፡ ግናኸ ሓዊ ኽበልዖም ኣዩ። ንምጽራሮም ገጸይ ናባታቶም ክመልስ ከሎኹ፡ ኣነ እግዚኣብሄር ምዃነይ ክትፈልጡ ኢኹም።⁸ስለ ዝጠለሙ ነታ ሃገር ከባድማ እየ፡ ይብል እግዚኣብሄር ኣምላኽ።

ትን. ህዝቅኤል ምዕራፍ 16

   ¹ቃል እግዚኣብሄር ናባይ መጸ በለኒውን፡²ኣታ ወዲ ሰብ፡ ንየሩሳሌም ጽያፋ ኣፍልጣ፡³እግዚኣብሄር ኣምላኽ ንየሩሳሌም ከምዚ ይብላ ኣሎ፡ ኢልካውን በላ፡ ሱርክን ወለዶኽን ካብ ሃገር ከንኣናውያን እዩ፡ ኣቦኺ ኣሞራዊ እዩ፡ ኣዴኺ ኸኣ ሔታዊት እያ⁴ብናይ ምውላድክስ፡ በታ እተወለድክላ መዓልቲ እትቢ ሕምብርትኺ ኣይተኣትበን፡ ምእንቲ ኽትጸርይስ ብማይ ኣይተሓጸብክን፡ ብጨው ኣይተቐባእክን፡ ኣይተጠቕለልክንውን።⁵በታ እተወለድክላ መዓልትስ ነፍስኺ ስለ እተናዕቀ፡ ኣብቲ ጋህ ዝበለ መሮር ደኣ ተደርቤኺ። ሓደ ግዛዕ ካብዚ ኽግብረልኪ ኢሉ ራሕሪሑ ብለውሃቱ ቍሊሕ ዝበለኪ ዓይኒ የልቦን።⁶ብኣኺ ሓለፍኩ፡ ኣብ ደምኪ ጠንቀላዕላዕል ክትብሊ ኸሎኺ ኸኣ ርአኹኺ እሞ፡ ኣቲ ኣብ ደምኪ ዘሎኺ፡ ብህይወት ንበሪ፡ በልኩኺ። እወ ኣብ ደምኪ ዘሎኺ ብህይወት ንበሪ፡ በልኩኺ።⁷ከም ብቝሊ ግራሁ ኣኣላፋት ገይረ ኣብዛሕኩኺ። ንስኺ ድማ ዘለግ በልኪ፡ ዓቤኺ፡ ኣዚኺ ኸኣ መልካዕኪ፡ ኣጥባት ገበርኪ፡ ጸጕርኽውን በቘለ፡ ግናኸ ንስኽስ ጥራይክን ዕርቕትን ነበርኪ።⁸ብኣኺ ሓሊፈ ርአኹኺ፡ እንሆ፡ ኸኣ፡ግዜኺ፡ እቲ ጽቡቕ ፍትወት ነበረ። ዘፈር ክዳነይ ኣብ ልዕሌኺ ዘርጊሐ፡ ዕርቃንኪ ኸወልኩ። መሓልኩልኪ፡ኪዳን ኣቶኹልኪ፡ ናተይውን ኰንኪ፡ ይብል እግዚኣብሄር ኣምላኽ።⁹ብማይ ሓጸብኩኺ፡ ካብ ደምኪ ኣጽሬኹኺ፡ ብዘይቲ ድማ ቀባእኩኺ።¹⁰ብወርቀዘቦ እተጠልፈ ኸደንኩኺ፡ ብቘርበት የባራረብ ሳእኒ ቐጻዕኩልኪ፡ ብሻሽ ኣዕጠቕኩኺ፡ ብሃሪውን ከደንኩኺ።¹¹ብስልማት ሰለምኩኺ፡ ኣብ ቀላጽምኪ ኣምባር፡ ኣብ ክሳድኪ ኸኣ ሕንጥልጥል ኣሰርኩልኪ።¹²ቀለቤት ኣብ ኣፍንጫኺ፡ ኵትሻ ኣብ ኣእዛንኪ፡ ዘውዲ ግርማ ድማ ኣብ ርእስኺ ገበርኩልኪ።¹³በዚ ኸምዚ ብወርቅን ብሩርን ተሰለምኪ፡ ሻሽን ሃርን መርግፍን ተወንዘፍኪ፡ ኵእኩእ ስርናይን መዓርን ዘይትን በላዕኪ። ኣዚኺ መልካዕኪ፡ ክሳዕ ንግስቲ ምዃን ከኣ በጻሕኪ።¹⁴በቲ ኣነ ዝሰለሙክኺ ግርማ እቲ መልክዕኪ ፍጹም ኰይኑ እዩ እሞ፡ ብምኽንያቱ ወሬኺ ኣብ ማእከል ህዝብታት ወጸ፡ ይብል እግዚኣብሄር ኣምላኽ።
   ¹⁵ንስኺ ግና ብመልክዕኪ ተኣመንኪ፡ ስለ ናእዳ ስምኪ ኢልኪ ኣመንዘርኪ፡ ንማንም ሓላፍ መገዲ ንእኡ ኽትኰኒ፡ ምንዝርናኺ ኣቕረብክሉ።¹⁶ካብ ክዳውንትኺ ወሲድኪ፡ ውሩዕ በረኽቲ ስፍራ ሰራሕኪ እሞ ኣብኡ ኣመንዘርኪ። ከምዚ ዝበለስ ኣይተገብረን ኣይክግበርን ከኣ እዩ።¹⁷እቲ ኣነ ዝሃብኩኺ ጽቡቕ ስልማትኪ ወርቀይን ብሩረይን ኣልዓልኪ፡ምስልታት ሰብኣይ ንኣኺ ገበርኪ፡ ምሳታቶም ድማ ኣመንዘርኪ።¹⁸ክዳን ወርቀ ዘቦኺ ኣልዒልኪ ከደንክዮም፡ ዘይተይን ዕጣነይን ከኣ ኣብ ቅድሚኦም ኣቕረብኪ።¹⁹ነቲ ኣነ ዝሃብኩኺ እንጌራይ፡ እቲ ብእኡ ዝምግበኪ ዘነበርኩ ዅእኩእ ሓርጭ ስርናይን ዘይትን መዓርን ንመኣዛ ሽታ ኣብ ቅድሚኦም ቀረብክዮ። እዚ ተገይሩ እዩ፡ ይብል እግዚኣብሄር ኣምላኽ ።^20-21ነቶም ንኣይ ዝወለድክዮም ኣወዳትክን ኣዋልድክን ከኣ ምእንቲ ኽውሕጥዎም፡ ኣልዒልኪ ሰዊእክዮም። ንደቀይ ሓሪድኪ፡ ብሓዊ ኣሕሊፍኪ ዝወፌኽዮምሲ፡ እዚ ምንዝርናኽዶ ውሒዱኪ እዩ፡²²ኣብ ኵሉ ጽያፍክን ምንዝርናኽን ከሎኺ፡ ነቲ ጥራይክን ዕርቕትን ኴንኪ ኣብ ደምኪ ጠንቀላዕላዕ እትብልሉ ዝነበርኪ ዘመን ንእስነትኪ ኣይዘከርክን።²³ድሕሪ ዅሉ ግዜ ኽፍኣትኪ፡ ወይለኺ፡ — ወይለኺ፡ ይብል ኣሎ እግዚኣብሄር ኣምላኽ፡ — ²⁴ንስኺ ልዕል ዝበለ ስፍራ፡ ብዅሉ መተሓላለፍ መገዲውን በሪኽ ስፍራ ሰራሕኪ።²⁵ኣብ ኵሉ ወሰን መገዲ ክብ ዝበለ ስፍራ ገበርኪ፡ ንመልክዕኪ ኣፈንፈንክዮ፡ ንዅሉ ሓላፍ መገዲ ድማ ኣእጋርኪ ኣርአኺ፡ ምንዝርናኺውን ኣብዛሕኪ።²⁶ምስቶም ስጋኦም ዝገዝፍ ጐረባብትኺ ግብጻውያን ዘሞኺ፡ ኵራይ ንምልዕዓል ከኣ ዝሙትኪ ኣብዛሕኪ።²⁷ስለዚ እንሆ፡ ኢደይ ኣብ ልዕሌኺ ዘርጋሕኩ፡ ንመግብኺ ኸኣ ኣጕደልክዎ፡ ንፍቓድ እተን ዝጸልኣኺ፡ በቲ ርኹስ መገድኺ ዝሓፍራ ዘለዋ ኣዋልድ ፍልስጥኤማውያን ወፌኹኺ።²⁸ኣይጸገብክን እሞ፡ ምስ ደቂ ኣሶራውያን ዘሞኺ። ምሳታቶም ድማ ዘሞኺ፡ ኣይጸገብክን ከኣ።²⁹ምስናይ እዚ ኸኣ ዝሙትኪ ናብ ምድሪ ኸንኣን ክሳዕ ምድሪ ከለዳውያን ኣብዛሕኪ ግናኸ በዚውን ኣይጸገብክን።^30-31ኵሉ እዚ ግብሪ እታ ዘይትሓፍር ኣመንዝራ እትገብሪ ኣብ ኵሉ ወሰን መገድታት ልዕል ዝበለ ስፍራ፡ኣብ መተሓላለፍ መግዲውን በሪኽ ስፍራ እትሰርሒ፡ ዋጋ ስለ ዝነዓቕኪ ኸም ካልኦት ኣመናዝር ኣይነበርክን፡ ከመይ ዝበለ ብልሽዊ ዀን እዩ እቲ ልብኺ፡ ይብል እግዚኣብሄር ኣምላኽ።³²ኣብ ክንዲ ሰብኣያ ጓኖት እተእቱ ዘማዊት ሰበይቲ ዀንኪ።³³ንዅለን ኣመናዝር ህያባት ይወሃበን፡ ንስኺ ግና ንዅሎም ፈተውትኺ ህያባት ሃብክዮም። ካብ ኵሉ ወገን መጺኦም ምሳኺ ኽዝምዉ ብህያብ ሓባበልክዮም።³⁴ንምምንዛር ዝስዕበኪ ዜይብልክስ፡ በቲ ምምንዛርኪ ኻልኦት ኣንስቲ ዘይገበራኦ ገበርኪ። ንስኺ ኣብ ክንዲ ናይ ምንዝርናኺ ህያብ ምቕባልሲ፡ ምእንቲ ኸተምንዝሪ ህያብ ሃብኪ፡ ኻልኦት ዘይገበራኦ ገበርኪ።
   ³⁵ስለዚ፡ ኣቲ ዘማዊት፡ ቃል እግዚኣብሄር ስምዒ፡³⁶እግዚኣብሄር ኣምላኽ ከምዚ ይብል ኣሎ፡ ብምንዝርናኺ ምስ ፈተውትኺ ርኽሰትኪ ስለ እተኻዕወ፡ ነውርኺ ኸኣ ስለ እተቐልዐ፡ ብሰሪ ዅሎም እቶም ፍንፉናት ጣኦታትክን፡ ብሰሪ እቶም ንኣታቶም ዝወፌኽዮም ደቅኽን፡³⁷ስለዚ እንሆ፡ ንዅሎም እቶም ባህ ዘበሉኺ ፈተውትኽን፡ ንዅሎም እቶም ዝፈቶኽዮምን ንዅሎም እቶም ዝጸላእክዮምን ክእክቦም እየ። ካብ ኵሉ ወገን ንምጽራርኪ ኽእክቦም እየ፡ ኵሉ ዕርቃንኪ ማንቲ ኽራዩ፡ ንዕርቃንኪ ኣብ ቅድሚኦም ክቐልዖ እየ።³⁸ኣነውን ከምቲ ዘመውትን መፍሰስቲ ደምን እተፈርዳሉ ገይረ ኽፈርደኪ፡ ናይ ነድርን ናይ ቅናኣትን ደም ከውርደልኪ እየ።³⁹ኣብ ኢዶም ኣሕሊፈ ኽህበኪ እየ፡ ንሳቶም ከኣ ነቲ ልዕል ዝበለ ስፍራኺ ኸፍርሱ፡ በረኽቲ ስፍራኺ ድማ ኪፍንጥሱ፡ ክዳውንትኺ ኽገፉ፡ ጽቡቕ ስልማትኪ ክቕንጥጡ፡ ጥራይክን ዕርቕትን ገይሮም ክሓድጉኺ እዮም።⁴⁰ብዙሕ ሰብ ናባኺ ኸውጽኡ እዮም ንሳቶም ከኣ ብዳርባ እምኒ ክቐትሉኺ፡ ብሰይፎም ድማ ክቘራርጹኺ እዮም።⁴¹ነባይትኺ ብሓዊ ኸንድዱ፡ ኣብ ቅድሚ ብዙሓት ኣንስቲ ኸኣ ክፈርዱኺ እዮም፡ ኣነውን ምንዝርናኺ ኸሕድገኪ እየ፡ መሊስኪ ድማ ዋጋ ኣይክትህብን ኢኺ።⁴²በዚ ኸምዚ ሃና ነድረይ ክወጸልኪ፡ ቅንኣተይ ከኣ ክርሕቀልኪ እዩ፡ ክሃድእ ብድሕርዚውን ኣይክዅርን እየ።⁴³ዘመን ንእስነትኪ ኣይዘከርክን፡ ብዅሉ እዚ ነገር እዚ ኸኣ ኣዀሪኽኒ ኢኺ እሞ፡ እንሆ፡ ኣነውን፡ ኣብ ልዕሊ ኵሉ ጽያፍኪ እዚ ነውሪ እዚ ኸይትውስኽስ፡ መገድኺ ኣብ ርእስኺ ኽመልሶ እየ፡ ይብል እግዚኣብሄር ኣምላኽ።
   ⁴⁴እንሆ፡ እቶም ዝምስሉ ኵላቶም፡ ከምታ ኣደ ኸምኡውን እታ ጓላ፡ ኢሎም ብኣኺ ኽምስሉ እዮም።⁴⁵ንስኺ ጓል እታ ንሰብኣያን ደቃን ዝጸልአት ኣዴኺ ኢኺ። ንስኺ ሓብቲ እተን ንሰብኡተንን ደቀንን ዝጸልኣ ኣሓትኪ ኢኺ። ኣዴኺ ሔታዊት፡ ኣቦኺ ኸኣ ኣሞራዊ ነበሩ።⁴⁶እታ ምስ ኣዋልዳ ኣብ ጸጋምኪ ዘላ ዓባይ ሓብትኺ ሰማርያ እያ፡ እታ ምስ ኣዋልዳ ኣብ የማንኪ ዘላ ንእሽቶ ሓብትኺ ኸኣ ሶዶም እያ።⁴⁷ንስኺ ግና ብመገደን ኣይከድክን፡ ከምቲ ፍንፉን ነገረን ከኣ ኣይገበርክን። እዚ ቐሊሉክስ፡ ብዅሉ መገድኺ ደኣ ኻብአን ገደድኪ።⁴⁸ኣነ ህያው እየ፡ ይብል እግዚኣብሄር ኣምላኽ፡ ሶዶም ሓብትኺ ንሳን ኣዋልዳን፡ ከምቲ ንስኽን ደቅኽን ዝገበርክናኦ ኣይገበራን።⁴⁹እንሆ፡ እቲ ኣበሳ ሶዶም ሓብትኺ እዚ ነበረ፡ ትዕቢትን ጽጋብ እንጌራን ትህኪትን ኣብኣን ኣብ ኣዋልዳን ነበረ፡ ግናኸ ኢድ እቲ ጭኑቕን ድኻን ኣይደገፈትን።⁵⁰ዕቡያት ነበራ፡ ኣብ ቅድመይ ከኣ ፍንፉን ነገር ገበራ፡ እዚ ምስ ርኣኹ ድማ ኣጥፋእክወን።⁵¹ሰማርያስ ፍርቂ ሓጢኣትኪ እኳ ኣይገበረትን። ንስኺ ግና ጽያፍኪ ኻብአን ኣብዛሕኪ፡ ብኵሉ እቲ ዝገበርክዮ ጽያፍኪውን ነሓትኪ ኣጽደቕክየን።⁵²ንስኺ ኸኣ ነቲ ነሓትኪ ዝፈረድክሉ ነውሪ ተሰካሚ። በቲ ኻብአን ዝረክስ ዝገበርክዮ ሓጢኣትኪ ንሳተን ካባኺ ይጸድቃ። ነሓትኪ ኣጽዲቕክየን ኢኺ እሞ፡ ሕፈሪ ነውርኽውን ጹሪ።
   ^53-54ነውርኺ ኽትጾሪ፡ በቲ ዝገበርክዮ ዅሉ ኸኣ ክትሓፍሪ፡ በዚ ኸምዚ ድማ ከተጸናንዕየንሲ፡ ምርኮአን፡ ምርኮ ሶዶምን ኣዋልዳን፡ ምርኮ ሰማርያን ኣዋልዳን፡ ምርኮ እቶም ኣብ ማእከለን ዘለዉ ምሩኻትኪ ኽመልስ እየ።⁵⁵ኣሓትኪ ሶዶምን ኣዋልዳን ናብቲ ናይ ቀደም ሃለዋተን ክምለሳ እየን፡ ሰማርያን ኣዋልዳን ናብቲ ናይ ቀደም ሃለዋተን ክምለሳ እየን፡ ንስኽን ኣዋልድክን ድማ ናብቲ ናይ ቀደም ሃለዋትክን ክትምለሳ ኢኽን።^56-57ከምቲ በዋልድ ሶርያን ኣብ ከባቢኣ ዘለዉ ዅሎምን፡ በተን ኣብ ኵሉ ወገን ዘነውራኺ ዝነበራ ኣዋልድ ፍልስጥኤማውያንን እተጸረፍክሉ ግዜ፡ ክፍኣትኪ ኸይተቐልዐ ኸሎ፡ በቲ መዓልቲ ዅርዓትኪ እታ ሓብትኺ ሶዶም ብኣፍኪ እኳ ኣይተረቝሐትን።^58-59እግዚኣብሄር ኣምላኽሲ ኪዳን ብምፍራስኪ ማሕላ ዝነዓቕኪ ኢኺ፡ ኣነውን ከምቲ ዝገበርክዮ ኽገብረኪ እየ፡ ይብል ኣሎ እሞ፡ ምንዝርናኽን ጽያፍክን ትጾሪ ኣሎኺ፡ ይብል እግዚኣብሄር።
   ⁶⁰ኣነ ግና ነቲ ብዘመን ንእስነትኪ ምሳኺ ዝኣተኽዎ ኪዳን ክዝክሮ እየ፡ ዘለኣለማዊ ኪዳን ከኣ ከጽንዓልኪ እየ።⁶¹ነሓትኪ፡ ነተን ካባኺ ዝዓብያን ዝንእሳን ኣሓትኪ፡ ክትቅበልየን ከሎኺ፡ ብኪዳንኪ ዘይኰነስ፡ ኣዋልድኪ ክዀና ኽህበኪ ኸሎኹ፡ ሽዑ መገድኺ ኽትዝክርን ክትሓፍርን ኢኺ።^62-63ኵሉ እቲ ዝገበርክዮ ይቕረ ምስ በልኩልኪ፡ ንእኡ ዘኪርኪ ኽትሓንኪ፡ ካብ ሕንኪ እተላዕለ ኣፍኪ ኸቶ ኸይትኸፍትስ፡ ኪዳነይ ኸጽንዓልኪ እየ፡ ንስኽውን እግዚኣብሄር ምኳነይ ክትፈልጢ ኢኺ፡ ይብል እግዚኣብሄር ኣምላኽ።

ትን. ህዝቅኤል ምዕራፍ 17

   ¹ከምዚ ዝብል ቃል እግዚኣብሄር ናባይ መጸ፡²ኣታ ወዲ ሰብ፡ ንቤት እስራኤል ሕንቅሕንቅሊቶይ ንገሮም፡ ምስላውን መስለሎም።³እግዚኣብሄር ኣምላኽ ከምዚ ይብል ኣሎ፡ ኢልካውን ተዛረብ፡ ገዚፍ ዘኽናፉ፡ ነዊሕ ዝመንገብገቡ፡ ዓንጥዓንጦራይ ክንቲት ዝመልኦ ዓብዪ ንስሪ ኣብ ሊባኖስ መጸ እሞ ርእሲ ጨንፈር እታ ኦም ጽሕዲ ወሰደ።⁴ነቲ ርእሲ ጨንፈራ ሰልዖ፡ ናብ ሃገር ነግዲ ወሰዶ፡ ኣብ ከተማ ነጋዶ ኸኣ ኣንበሮ።⁵ካብታ ሃገር ድማ ጫለዳ ወሰደ፡ ኣብ ፍርያም ግራት ከኣ ተኸላ፡ ኣብ ጥቓ ብዙሕ ማይ ድማ ከም ዕቦል ገይሩ ስፍራ ኣትሓዛ።⁶ንሳ ዓበየት፡ ጨንፍራ ናብኡ ዘበለ፡ ሱራ ኸኣ ኣብ ትሕቲኡ ዝዀነ ሰፊሕ ዝሓረጋ፡ ሓጺር ዝጕንዳ ኦም ወይኒ ዀነት። በዚ ኸምዚ ጨንፈር እትጭንፍርን፡ ጠጥዒ እትጥጥዕን ኦም ወይኒ ዀነት።⁷ገዚፍ ዝኽንፉ፡ ብዙሕ ዝኽንቲቱ ኻልእ ዓብዪ ንስሪ ነበረ። እንሃ ኸኣ፡ እዛ ኦም ወይኒ እዚኣ፡ ንሱ ማይ ከስትያ ኢላ፡ ካብቲ እተተኽለቶ ቦታ ናብኡ ኣቢላ ሱራ ዘርግሐት፡ ሓረጋ ድማ ናብኡ ኣቢላ ኣውፈረት።⁸ጨናፍር ምእንቲ ኸተውጽእ፡ ፍረ ኸተፍሪ፡ ክብርቲ ኦም ወይኒውን ክትከውንሲ፡ ኣብ ጽቡቕ ግራት ኣብ ጥቓ ብዙሕ ማይ ተተኺላ ነበረት።⁹በል ድማ፡ ክትልምዕዶ እያ፧ ይብል እግዚኣብሄር ኣምላኽ። ምእንቲ ኽትነቅጽሲ ሱራዶ ኣይክምንቈስን፡ ፍሪኣኸ ኣይክቑረጽን እዩ፧ እቲ ኻብኣ ዝጨብጨበ ዅሉ ቘጽልስ ኣይክነቅጽንድዩ፧ሱራ ንምምንቋስ ሓያል ቅልጽምን ብዙሕ ህዝብን ኣየድልን እዩ።¹⁰እንሆ፡ ምትካልሲ ተተኺላ ኣላ፡ ክትልምዕዶ እሞ እያ፧ ንፋስ ምብራቕ ምስ ተንከያስ፡ሓሸውሸው ኢላዶ ኣይክትነቅጽን እያ፧ኣብታ ዝበቘለትላ ቦታ ኽትነቅጽእያ።
   ¹¹ከምዚ ዝብል ቃል እግዚኣብሄር ከኣ መጸኒ፡¹²እምብኣርሲ ነቲ ተጻራሪ ቤት፡ እዚ እንታይ ማለት ምዃኑዶ ኣይትፈልጡን ኢኹም፧ በሎም። ንገሮም ከኣ፡ እንሆ፡እቲ ንጉስ ባቢሎን ናብ የሩሳሌም መጸ፡ ንንጉሳን መሳፍንታን ሒዙ ናብኡ ናብ ባቢሎን ማረኾም።^13-14እታ መንግስቲ ኽትሓምቕ እሞ ከይትትንስእ፡ ብምሕላው ኪዳና ኸኣ ምእንቲ ኽትቀውምሲ፡ ካብ ዘርኢ ቤት መንግስቲ ወሲዱ ምስኡ ኪዳን ኣተወ ማሕላ ድማ ኣምሓሎ። ነቶም ኣውራታት እታ ሃገርን ምስኡ ወሰዶም።¹⁵ግናኸ ንሱ ኻብኡ ዓለወ፡ ኣፍራስን ብዙሕ ህዝብን ክህብዎ ልኡኻት ናብ ግብጺ ሰደደ። ክሰልጦዶ እሞ እዩ፡ከምዚ ዝበለ ዝገብርሲ ኸምልጥዶ እዩ፧ ጠላም ኪዳንከ የምልጥዶ እዩ፧¹⁶ኣነ ህያው እየ፡ ይብል እግዚኣብሄር ኣምላኽ፡ ኣብታ እቲ ንእኡ ዘንገሶ ዝነብረላ ዘሎ ቦታ፡ ናብቲ ማሕላኡ ዝጠለመሉ፡ ኪዳን ዘፍረሰሉ ንጉስ፡ ምስኡ ኸይኑ፡ ኣብ ማእከል ባቢሎን ኣብኣ ኽመውት እዩ።¹⁷ብዙሕ ሰብ ኪቐትሉ ኢሎም ዕርዲ ኽዓርዱን ግምቢ ኽሰርሑን ከለዉ፡ ፈርኦን ከኣ ምስቲ ብርቱዕ ሰራዊቱን ብዙሕ ህዝብን ኰይኑ ኣብ ውግእ ኣይክረድኦን እዩ።¹⁸ነቲ ኪዳን ብምፍራሱ ማሕላ ንዒቑ፡ ኢድ ጠቒዑስ እዚ ዅሉ ገይሩ እዩ እሞ፡ ኣይከምልጥን እዩ።¹⁹ስለዚ፡ ኣነ ህያው እየ፡ እቲ ዝነዓቖ ማሕላውን እቲ ዘፍረሶ ኪዳነይን ብርግጽ ናብ ርእሱ ኸውርደሉ እየ፡ ይብል እግዚኣብሄር ኣምላኽ።²⁰መርበበይ ክዝርግሓሉ እየ፡ ብመፈንጠራይ ከኣ ክተሓዝ እዩ፡ ናብ ባቢሎን ድማ ክወስዶ፡ ኣብኡውን በቲ ንኣይ ዝዓመጸሉ ዓመጻ ምስኡ ናብ ፍርዲ ኽኣቱ እየ።²¹ኵሎም ህዱማቱ ምስ ኵሎም ጭፍራኡ ብሰይፊ ኽወድቁ፡ እዮም ዝተረፉ ኸኣ ኣብ ኵሉ ንፋሳት ክዝረዉ እዮም። ኣነ እግዚኣብሄር ከም እተዛረብኩ ድማ ክትፈልጡ ኢኹም።
   ²²እግዚኣብሄር ኣምላኽ ከምዚ ይብል ኣሎ፡ ኣነ ኸኣ ካብር ርእሲ እቲ ነዊሕ ጽሕዲ ወሲደ ኸንብሮ እየ። ካብቲ ላዕላይ ጠጥዒ ሓንቲ ለውለው እትብል ሰሊዐ፡ ኣብ ክብ ዝበለ በሪኽ ከረን ክተኽላ እየ።²³ኣብቲ በሪኽ ከረን እስራኤል ክተኽላ እየ። ክትጭንፍርን ክትፈርን፡ ግሩም ዝዀነት ጽሕዲውን ክትከውን እያ። ኵለን ኣዕዋፍን ክንፊ ዘለወን ዘበላን ኣብ ትሕቲኣ ኽነብራ፡ ኣብ ትሕቲ ጽላል ጨናግራ ክነብራ እየን።²⁴ኵለን ኣእዋም መሮር ከኣ ነታ ነዋሕ ኦም ለጠቕ ዘበልኩ፡ ነታ ልምዕቲ ኦም ዘንቀጽኩ፡ ነታ ንቕጽቲ ኦም ከኣ ዘጠጠዕኩ ኣነ እግዚኣብሄር ከም ዝዀንኩ ኽፈልጣ እየን። ኣነ እግዚኣብሄር ተዛሪበ ኣሎኹ፡ ክገብሮ ድማ እየ።

ትን. ህዝቅኤል ምዕራፍ 18

   ¹ከምዚ ዝብል ቃል እግዚኣብሄር ድማ መጸኒ፡²ስለምንታይ ኢኹም ኣብ ሃገር እስራኤል እዚ ምስላ እዚ፡ ኣቦታት መጺጽ ዘቢብ በልዑ እሞ ነስናን እቶም ውሉድ ኰኸወ፡ ኢልኩም እትምስሉ፡³ኣነ ህያው እየ፡ ይብል እግዚኣብሄር ኣምላኽ። እዚ ምስላ እዝስ ድሕርዚ ኣብ እስራኤል ኣይክትምስልዎን ኢኹም።⁴እንሆ፡ ኵለን ነፍሳት ናተይ እየን፡ ከምታ ነፍሲ እቲ ወላዲ ኸምኡውን ነፍሲ እቲ ውሉድ ናተይ እያ። እታ ሓጢኣት እትገብር ነፍሲ ንሳ ኽትመውት እያ።
   ⁵ጻድቕ ሰብ እንተሎ፡ ቅንዕናን ጽድቅን ከኣ እንተ ገበረ፡⁶ኣብ ኣኽራን እንተ ዘይበልዐ፡ ኣዒንቱ ድማ ናብቶም ጣኦታት ቤት እስራኤል ቍሊሕ እንተ ዘይበላ፡ ሰበይቲ ብጻዩ እንተ ዘየራኸሰ፡ ኣብ ሰበይቲ ኸኣ ብጻግኒኣ እንተ ዘይቀረበ፡⁷ንሓደ እኳ እንተ ኣይገፍዐ፡ ንብዓል ዕዳ ታሕዚ እንተ መለሰሉ፡ ንሓደ እኳ እንተ ዘይዓመጸ፡ እንጌራኡ ንጥሙት እንተ ሃበ፡ ንዕሩቕ ከኣ ክዳን እንተ ኸደነ፡⁸እንተ ዘየኻዕበተን እንተ ዘየሕረጠን፡ ኢዱ ካብ ዓመጽ እንተ ኸልከለ፡ ኣብ መንጎ ሰባት ከኣ ቅንዕና እንተ ፈረደ፡⁹ብሕጋጋተይ እንተ ተመላለሰ፡ ጽድቂ እናገበረ ፍርደይ እንተ ሓለወ፡ ንሱ ጻድቕ እዩ፡ ብርግጽ ብህይወት ክነብር እዩ፡ ይብል እግዚኣብሄር ኣምላኽ።
   ¹⁰ግናኸ ንሱ ዓምጺ፡ ከዓው ደም፡ ካብዚ ነገር እዚ ኸኣ ሃደ ግዛዕ ዝገብር ውሉድ እንተ ወለደ፡¹¹እዚ ዅሉ ዘይገብር፡ ኣብ ኣኽራን ዝበልዕ፡ ሰበይቲ ብጻዩ ዘርክስ፡¹²ንነዳይ ንድኻን ዝገፍዕ፡ መንዚዑ ዝወስድ፡ ታሕዚ ዘይመልስ፡ ኣዒንቱ ናብ ጣኦታት ዝቘላሕታአን፡ ፍንፉን ነገር ዝገብር፡¹³ዘኻዕብትን ዘሕርጥንሲ፡ ንሱዶ ብህይወት ክነብር እዩ፡ ያእ፡ ንሱ ኣይክነብርን እዩ።እዚ ኹሉ ፍንፉን ነገር እዚ ገይሩ እዩ እሞ፡ ሞት ክመውት ደሙ ኸኣ ኣብ ርእሱ ከኸውን እዩ።
   ¹⁴እንሆ ኸኣ፡ ንሱ ውሉድ እንተ ወለደ፡ እሞ ኣቦኡ ዝገበሮ ኵሉ ሓጢኣት ዝርእን ዝፈርህን ከምኡ ዝበለውን ዘይገብር፡¹⁵ኣብ ኣኽራን ዘይበልዕ፡ ኣዒንቱ ድማ ናብ ጣኦታት ቤት እስራኤል ቍሊሕ ዘየብል፡ ሰበይቲ ብጻዩ ዘየርክስ፡¹⁶ንሓደ እኳ ዘይገፍዕ፡ ታሕዚ ዘይሕዝ፡ መንዚዑ ዘይወስድ፡ እንጌራኡ ንጥሙይ ዘብልዕ፡ ንዕሩቕውን ክዳን ዝኸድን፡¹⁷ንድኻ ኸይገፍዕ ኢዱ ዝመልስ፡ ሓረጣን ካዕበትን ዘይወስድ፡ ፍርደይ ዝገብር፡ ብሕገይ ዝመላለስ፡ ንሱ ብህይወት ክነብር እዩ እምበር፡ ብሰሪ ኣበሳ ኣቦኡ ኣይክመውትን እዩ።¹⁸ኣቦኡ ዓመጸኛ ስለ ዝነበረ፡ ንሓዉ መንዚዑ ስለ ዝጐድአ፡ ኣብ ማእከል ህዝቡ ኸኣ ሰናይ ዘይኰነ ስለ ዝገበረ፡ እንሆ፡ ብኣበሳኡ ኽመውት እዩ።
   ¹⁹ንስኻትኩምሲ፡ ስለምንታይ እዩ እቲ ወድስ ኣበሳ ኣቦኡ ዘይጸውር፡ትብሉ ኣሎኹም፡እቲወዲ፡ ቅንዕናን ጽድቅን ገይሩ ንዅሉ ሕጋጋተይ ሓልይዎን ገይርዎን እዩ እሞ፡ ብርግጽ ብህይወት ክነብር እዩ።²⁰እታ ሓጢኣት እትገብር ነፍሲ እያ እትመውት። ውሉድ ኣበሳ ወላዲኡ ኣይክጸውርን እዩ። ጽድቂ እቲ ጻድቕ ኣብ ርእሱ ክኸውን እዩ።²¹ግናኸ እቲ ረሲእ ካብቲ ዝገበሮ ዅሉ ሓጢኣት እንተ ተመለሰ፡፡ኵሉ ሕጋጋተይ ከኣ እንተ ሓለወ፡ ቅንዕናን ጽድቅን ድማ እንተ ገበረ፡ ንሱ ብርግጽ ብህይወት ክነብር፡ ኣይክመውትን ከኣ እዩ።²²ካብቲ ዝገሃሶ ምግሃስሲ ሓንቲ እኳ ኣይክትዝከረሉን፡ በቲ ዝገበሮ ጽድቂ ብህይወት ክነብር እዩ።²³ንሞት ረሲእዶ እፈቱ እየ፧ ፍታወይሲ ካብ መገዱ ኽምለስ፡ ብህይወት ከኣ ክነብርዶ ግዳ ኣይኰነን፧ ይብል እግዚኣብሄር ኣምላኽ።²⁴እቲ ጻድቕከ ኻብ ጽድቁ እንተ ተመልሰ፡ እንተ ኣበሰ እሞ ከምቲ ረሲእ ዝገብሮ ኹሉ ፍንፉን ነገር እንተ ገበረስ፡ ብህይወትዶ ኽነብር እዩ፡ካብቲ ዝገበሮ ጽድቂ ሓንቲ እኳ ኣይክትዝከርን እያ። በቲ ዝጠለሞ ጥልመትን በቲ ዝገበሮ ሓጢኣትን ክመውት እዩ።
   ²⁵ንስኻትኩም ግና፡ መገዲ እግዚኣብሄር ቅኑዕ ኣይኰነን፡ ትብሉ ኣሎኹም። እምብኣርሲ፡ ኣቱም ቤት እስራኤል፡ ስምዑ፡ ካንዶ መገደይ እዩ ዘይቅኑዕ፡ ዘይቅኑዕሲ መገድታትኩምዶ ግዳ ኣይኰነን፧²⁶ጻድቕ ካብ ጽድቁ እንተ ተመልሰ እሞ፡ እንተ ኣበሰ ብእኡ ኸኣ እንተ ሞተ፡ ብሰሪ እቲ ዝገበሮ ኣበሳኡ እዩ ዝመውት።²⁷ግናኸ እቲ ረሲእ ካብቲ ዝገበሮ ረሲእነቱ እንተ ተመልሰ፡ ቅንዕናን ጽድቅን ከኣ እንተ ገበረ፡ ንሱ ንነፍሱ ብህይወት ከንብራ እዩ።²⁸ካብ ኵሉ እቲ ዝገበሮ ግህሰቱ ኣስተንቲኑ ስለ እተመልሰ፡ ንሱ ርግጽ ብህይወት ክነብር፡ ኣይክመውትን እዩ።²⁹ግናኸ ቤት እስራኤልሲ፡ መገዲ እግዚኣብሄር ኣይቅኑዕን እዩ፡ይብሉ ኣለዉ። ኣቱም ቤት እስራኤል፡ ካንዶ መገድታተይ እዩ ዘይቅኑዕ፡ዘይቅኑዕሲ መገድታትኩምዶ ግዳ ኣይኰነን፧³⁰ስለዚ፡ ኣቱም ቤት እስራኤል፡ ንነፍሲ ወከፍ ከከም መገድኹም ክፈርደኩም እየ፡ ይብል እግዚኣብሄር ኣምላኽ። ተመለሱ፡ ኣበሳኹም መዓንቀፊ ኸይኰነኩምሲ፡ ካብ ኵሉ ግህሰትኩም ተመለሱ።³¹ነቲ ዝገሃስኩምዎ ግህሰት ካባኹም ደርብዩ፡ ሓድሽ ልብን ሓድሽ መንፈስን ድማ ግበሩ። ኣቱም ቤት እስራኤል፡ ስለምንታይ እትሞቱ፡³²ኣነስ ሞት ሓደ እኳ ኣይፈቱን እየ እሞ፡ ተመለሱ ብህይወት ከኣ ንበሩ፡ ይብል እግዚኣብሄር ኣምላኽ።

ትን. ህዝቅኤል ምዕራፍ 19

¹ንስኻ ኸኣ ንመሳፍንቲ እስራኤል መልቀስ ኣልቅሰሎም፡ በል ድማ፡

²ከመይ ኰን ኣዴኻ ኣንስተይቲ ኣንበሳ ነበረት።

ኣብ ማእከል ኣናብስ ተጋደመት፡

ኣብ ማከል ሸደናት ኣናብስ ንዀራኵራ ኣዕበየት።

³ሓደ ካብቶም ኰራኵራ ኣዕበየት፡

ሽደን ኣንበሳ ኸኣ ዀነ፡

ምምንጣል ግዳይ ተማህረ፡ ሰብውን በልዐ።

⁴ህዝብታት ብዛኦባኡ ሰምዑ፡

ኣብ ጕድጓዶም ከኣ ተታሕዘ፡

ሳንቀ ኣፍንጫ ገይሮም ናብ ሃገር ግብጺ ወሰድዎ።

⁵ትጽቢታ ኸንቱ ምዃኑ ምስ ረኣየት፡

ተስፋ ኸኣ ምስ ቀበጸት፡

ካብ ኰራኵራ ሓደ ኻልእ ወሰደት፡

ሽደን ኣንበሳውን ገበረት።

⁶ኣብ ማእከል ኣናብስ ተመላለሰ፡

ሽደን ኣንበሳ ኸኣ ዀነ፡

ምምንጣል ግዳይ ተማህረ፡ ሰብውን በልዐ።

⁷ኣዳራሻቶም ገሰሰ፡

ከተማታቶም ኣዕነወ።

እር ኢሉ ምስ ጓዘመ፡

ምድርን ኣብኣ ዘሎ ዅሉን ራዕራዕ በለ።

⁸ሽዑ ኻብቲ ኸባቢ ዘሎ ሃገራት ህዝብታት ኣኽተቱሉ፡

መርበቦም ዘርግሑሉ፡ ኣብ ጕድጓዶም ድማ ተታሕዘ።

⁹ሳንቀ ገይሮም ኣብ ቈፎ ኣእተውዎ፡

ናብ ንጉስ ባቢሎን ድማ ወሰድዎ።

ድምጹ ኣብ ኣኽራን እስራኤል ድሕርዚ ኸይስማዕ፡

ኣብ ጽኑዕ እምባ ኣቐመጥዎ።

¹⁰ኣዴኻ ኸማኻ ኣብ ጥቓ ማያት እተተኽለት ኦም ወይኒ ነበረት።

ብሳላ ብዝሒ ማያት እትጭብጭብ

ሓረግ ፈራይት ኦም ወይኑ ዀነት።

¹¹ንዘንጊ መንግስቲ ዝኸውን ድልዱል ጨንፈር ኣውጽአት፡

ጕንዳ ኣብ ማእከል ጽቡቕ ኣጽል ነውሐ።

ነዋሕን ሓረግ ዝመልኣን ስለ ዝነበረት፡ እትርአ ዀነት።

¹²ግናኸ ብቝጥዓ ተመንቈሰት፡ ኣብ ምድሪ ኸኣ ተደርበየት፡

ንፋስ ምብራቕ ድማ ፍሪኣ ኣንቀጾ።

ድልዱል ጨናፍራ ተሰብረን ነቐጸን፡ ሓዊውን በልዖ።

¹³ሕጂ ኣብ ምድረ በዳ፡

ኣብ ደረቕ ምድሪ ኣጻምእ ተተኺላ ኣላ።

¹⁴ካብ ጨናፍራ ሓረጋ ሓዊ ወጸ፡

ፍሪኣ ኸኣ ሞዅ ኣበለ።

ዛንጊ ገዛኢ ዝኸውን ድልዱል ጨንፈር የብላን።

እዚኣ ልቕሶ እያ፡ ከም ድጕዓ ትድጓዕ።

ትን. ህዝቅኤል ምዕራፍ 20

   ¹ኰነ ኸኣ፡ ኣብታ ሳብዐይቲ ዓመት ኣብ ዓስረይቲ መዓልቲ ኣብቲ ሓምሳይ ወርሒ ሓያሎ ሰባት ካብ ዓበይቲ እስራኤል ንእግዚኣብሄር ክጥይቑ መጺኦም ኣብ ቅድመይ ተቐመጡ።²ከምዚ ዝብል ቃል እግዚኣብሄር ከኣ መጸኒ፡³ኣታ ወዲ ሰብ፡ ነቶም ዓበይቲ እስራኤል፡ ክትሓቱኒዶ መጺእኩም፡ይብል እግዚኣብሄር ኣምላኽ፡ ኣነ ህያው እየ፡ ብኣኻትኩም ኣይሕተትን እየ፡ ይብል እግዚኣብሄር ኣምላኽ፡ ኢልካ ንገሮም።⁴ክትፈርደሎም ዲኻ፡ኣታ ወዲ ሰብ፡ክትፈርደሎም ዲኻ፧ ጽያፍ ኣቦታቶም ኣፍልጦም።⁵በሎምውን፡ እግዚኣብሄር ኣምላኽ ከምዚ ይብል ኣሎ፡ በታ ንእስራኤል ዝሓሬኹላ መዓልቲ፡ ሽዑ ንዘርኢ ቤት ያእቆብ ኢደይ ኣልዓልኩ፡ ኣብ ሃገር ግብጺ ድማ ተገለጽኩሎም። ኣነ እግዚኣብሄር ኣምላኽኩም እየ፡ ኢለውን ኢደይ ኣልዓልኩሎም።⁶በታ መዓልቲ እቲኣ ኻብ ሃገር ግብጺ ኸውጽኦም፡ ናብታ ኣነ ዝሓሬኹሎም ጸባን መዓርን ዝውሕዛ፡ ካብ ኵለን ሃገራት እትበልጽ ሃገር ክእትዎም፡ ኢለ ኢደይ ኣልዓልኩሎም።⁷ኣነ ኸኣ፡ ነፍሲ ወከፍኩም ጽያፍ ዓይኑ ይደርቢ፡ ብጣኦታት ግብጺ ድማ ኣይትርከሱ፡ ኣነ እግዚኣብሄር ኣምላክኩም እየ፡ በልክዎም።
   ⁸ንሳቶም ግና ተጻረሩኒ፡ ምስማዐይ ከኣ ኣበዩ፡ ነፍሲ ወከፎም ጽያፍ ዓይኑ ኣይደርበየን፡ ጣኦታት ግብጺውን ኣይሓደገን። ሽዑ ኣብ ማእከል ሃገር ግብጺ ሃና ዅራይ ክወጸሎምሲ፡ ነደረይ ኣብ ልዕሊኦም ክኽዑ እየ፡ በልኩ።⁹ግናኸ እዚ ዝገበርዎስ ምእንቲ ስመይ ኣብ ቅድሚ እቶም ኣብ ማእከሎም ዝነብሩ እሞ ኣነ ንኣታቶም ካብ ሃገር ግብጺ ብምውጽአይ ኣብ ቅድሚኦም እተፈለጥኩሎም ህዝብታት፡ ከይትሓስር ኢለ እየ ዝገበርክዎ።
   ¹⁰ካብ ሃገር ግብጺ ኸኣ ኣውጻእክዎም፡ ናብ በረኻውን ኣምጻእክዎም።¹¹ሕጋጋተይ ሃብክዎም፡ ነቲ ሰብ እንተ ገበሮ ብህይወት ዝነብረሉ፡ ፍርደይ ከኣ ኣፍለጥክዎም።¹²ኣብ ርእሲ እዚ ኸኣ እቲ ዝቕድሶም ኣነ እግዚኣብሄር ምዃነይ ክፈልጡስ፡ ኣብ መንጎይን ኣብ መንጎኦምን ትእምርቲ ምእንቲ ክዀና ኢለ፡ ሰናብተይ ሃብክዎ።¹³ግናኸ ቤት እስራኤል ኣብ በረኻ ኸድዑኒ፡ ከም ትእዛዛተይ ኣይተመላለሱን። ነቲ፡ ሰብ እንተ ገበሮ ብህይወት ዝነብረሉ፡ ፍርደይ ከኣ ኣበይዎ፡ ንሰናብተይውን ኣዝዮም ኣርከስዎ። ሽዑ ኣብቲ በረኻ ኸጥፍኦምሲ፡ ነድረይ ደኣ ክኽዕወሎም በልኩ።¹⁴ግናኸ ምእንቲ ስመይ ኣብ ቅድሚ ዓይኒ እቶም ኣብ ቅድሚኦም ዘውጻእክዎም ህዝብታት ከይትሓስር ኢለ እየ ዝገበርክዎ።^15-16ልቦም ንጣኦታቶም ስለ ዝሰዓበ፡ ፍርደይ ኣብዮም ከም ሕጋጋተይ ከኣ ኣይተመላለሱን፡ ሰናብተይ ድማ ኣርክሶም እዮም እሞ፡ ናብታ ዝሃብክዎም፡ ጸባን መዓርን እተውሕዝ ካብ ኵላተን ሃገራት ከኣ እትበልጽ ሃገር ኣይከእትዎምን እየ ኢለ ኣብ በረኻ እኳ ኢደይ ኣልዓልኩሎም።¹⁷ግናኸ ዓይነይ ነሓፈቶም እሞ ኣየጥፋእክዎምን፡ ኣብቲ በረኻ ጠሪሰ ኣይወዳእክዎምን።
   ¹⁸ኣብ በረካ ኸኣ ንደቆም፡ ከምቲ ሕጋጋት ኣቦታትኩም ኣይትመላለሱ፡ ፍርዶም ድማ ኣይትሓልዉ፡ ብጣኦታቶምውን ኣይትርከሱ፡ በልክዎም።¹⁹ኣነ እግዚኣብሄር ኣምላኽኩም እየ፡ ከም ሕጋጋተይ ተመላለሱ፡ ፍርደይ ከኣ ሓልዉ ግበርዎውን።²⁰ንሰናብተይ ቀድሱ፡ ኣነ እግዚኣብሄር ኣምላኽኩም ምዃነይ ክትፈልጡስ፡ ኣብ መንጎይን ኣብ መንጎኹምን ትእምርቲ ክዀና እየን።²¹ግናኸ እቶም ደቂ ኸድዑኒ፡ ከም ሕጋጋተይ ኣይተመላለሱን፡ ነቲ ሰብ እንተ ገበሮ ብህይወት ዝነብረሉ፡ ፍርደይ ክገብርዎ ኢሎም ኣይሓለውዎን፡ ንሰናብተይውን ኣርከሱ። ሽዑ ኣብቲ በረኻ ሃና ቝጥዓይ ከውጸሎም ነድረይውን ክኽዕወሎም እየ፡ በልኩ።²²ኣነ ግና ኢደይ መለስኩ፡ ምእንቲ ስመይ፡ ኣብ ቅድሚ ዓይኒ እቶም ኣብ ቅድሚኦም ዘውጻእክዎም ህዝብታት፡ ከይትሓስር ኢለ እየ ዝገበርክዎ።^23-24ሕጋጋተይ ኣበዩ፡ ንሰናብተይ ኣርከሱ፡ ኣዒንቶም ንጣኦታት ኣቦታቶም ሰዓባ እምበር፡ ፍርደይ ኣይገበሩን እዮም እሞ፡ ኣነ ኣብ ህዝብታት ፋሕ ከብሎም፡ ናብ ሃገራት ክዘርዎም እየ ኢለ፡ ኣብቲ በረኻ እኳ ኢደይ ኣልዓልኩሎም።²⁵ምስናይ እዚ ኣነውን ጽቡቕ ዘይኰነ ትእዛዛት፡ ብህይወት ክነብሩሉ ዘይከኣሎም ፍርድታት ሃብክዎም።²⁶ኣነ እግዚኣብሄር ምዃነይ ምእንቲ ኽፈልጡስ፡ ከባድሞም ኢለ፡ በቲ ማሕጸን ኣዲኡ ዝኸፈተ ዅሉ ብሓዊ ዘሕለፍዎ መባኦም ገይረ ኣርከስክዎም።
   ²⁷ስለዚ ኣታ ወዲ ሰብ፡ ንቤት እስራኤል፡ እግዚኣብሄር ኣምላኽ ከምዚ ይብል ኣሎ፡ ኢልካ ንገሮም፡ በዚ ድማ ኣቦታትኩም ንኣይ ብምጥላሞም ጸረፉኒ።²⁸ናብታ ኽህቦም እየ ኢለ ኢደይ ዘልዓልኩላ ሃገር ምስ ኣእቶኽዎም፡ ኣብኡ ንዅሉ በሪኽ ኵርባን ንዅሉ ልሙዕ ኦምን ጠመቱ፡ መስዋእቶም ድማ ኣብኡ ሰውኡ፡ ኣብኡ ኸኣ ዘዀሪ መባእ ኣቕረቡ፡ ኣብኡ ድማ ጥዑም መኣዛኦም ዓጠኑ፡ ኣብኡውን መስዋእቲ መስቲኦም ከዓዉ።²⁹ኣነ ኸኣ፡ እዚ ናብኡ እትኸድዎ ዘሎኹም በሪኽ እንታይ እዩ፡በልክዎም። በዚ ኸምዚ ስሙ ኽሳዕ ሎሚ ባማ ይሰምይዎ ኣለዉ።³⁰ስለዚ ንቤት እስራኤል፡ እግዚኣብሄር ኣምላክ ከምዚ ይብል ኣሎ፡ ኢልካ ንገሮም፡ ንስኻትኩም ከም መገዲ ኣቦታትኩም እናኸድኩም ረኸስኩም፡ ነቲ ፍንፉን ነገሮም እናሰዓብኩም ዘሞኹም።³¹መባእኩም ከተቕርቡ ውሉድኩም ድማ ብሓዊ ኸተሕልፉ ኸሎኹም፡ ክሳዕ ሎሚ ብዅሉ ጣኦታትኩም ትረኽሱ ኣሎኹም። ኣቱም ቤት እስራኤል፡ እሞኸ ኣነዶ ብኣኻትኩም ክሕተት እየ፧ ኣነ ህያው እየ፡ይብል እግዚኣብሄር ኣምላኽ፡ ብኣኻትኩም ኣይክሕተትን እየ።³²ንሕና፡ ከምቶም ህዝብታትን ዓሌታት ሃገራትን፡ ንዕጭን እምንን ከነምልኽ፡ ኢልኩም ኣብ ሓሳብኩም ጠብላሕ ዝብለኩም ከቶ ኣይክኸውንን እዩ።
   ³³ኣነ ህያው እየ፡ ይብል እግዚኣብሄር ኣምላኽ፡ ብብርቱዕ ኢድን ብእተዘርግሐት ቅልጽምን ብእተኻዕወ ነድርን ርግጽ ክነግሰኩም እየ።³⁴ብብርቱዕ ኢድን ብእተዘርግሐት ቅልጽምን ብእተኻዕወ ነድርን ካብቶም ህዝብታት ከውጽኣኩም እየ።³⁵ናብ በረኻ ህዝብታት ከኣ ክወስደኩም፡ ኣብእውን ገጽ ንገጽ ናብ ፍርዲ ክንኣቱ ኢና።³⁶ከምቲ ምስ ኣቦታትኩም ኣብ በረኻ ሃገር ግብጺ እተፋረድኩ፡ ከምኡ ድማ ምሳኻትኩም ክፋራረድ እየ፡ ይብል እግዚኣብሄር ኣምላኽ።³⁷ብትሕቲ በትረይ ከሕልፈኩም፡ ናብ መኣስር ኪዳን ከኣ ከእትወኩም እየ።³⁸ነቶም ካባይ ዝዓለዉን ዝኸድዑን ካባኻትኩም ክፈልዮም ካብቲ ጓና ዀይኖምዎ ዘለዉ ሃገር ከኣ ከውጽኦም እየ። ግናኸ ናብ ሃገር እስራኤልሲ ኣይክኣትዉን እዮም። ንስኻትኩም ድማ ኣነ እግዚኣብሄር ምዃነይ ክትፈልጡ ኢኹም።
   ³⁹ኣቱም ቤት እስራኤል፡ እግዚኣብሄር ኣምላኽ ከምዚ ይብል ኣሎ፡ ምስማዕ ካብ ኣቤኹምንስ፡ ኪዱ ነፍሲ ወከፍኩም ንጣኦታትኩም ኣምልኹ። ድሕርዚ ግና ንቅዱስ ስመይ ብመባእኩምን ብጣኦታትኩምን ኣይከተርክስዎን ኢኹም።⁴⁰ኣብቲ ቅዱስ ከረነይ፡ ኣብቲ በሪኽ ከረን እስራኤል፡ ቤት እስራኤል ዘበሉ ዅሎም ኣብታ ሃገር ከምልኹኒ እዮም። ኣብኡ ተሓጕሰ ክቕበሎም እየ፡ ኣብኡውን ንመስዋእትኹምን ነቲ ነገርኩም ክደልዮ እየ፡ ይብል እግዚኣብሄር ኣምላኽ።⁴¹ካብ ህዝብታት ምስ ኣውጻእኩኹም፡ ካብቲ ፋሕ ኢልኩምዎ ዝነበርኩም ሃገራት ድማ ምስ ኣከብኩኹም፡ ከም ምኡዝ ሽታ ብኣኻትኩም ባህ ክብል፡ ኣብ ቅድሚ ዓይኒ እቶም ህዝብታት ከኣ ብኣኻትኩም ክቕደስ እየ።⁴²ንስኻትኩምውን፡ ናብ ሃገር እስራኤል፡ ናብቲ ነቦታትኩም ክህቦም እየ ኢለ ኢደይ ዘልዓልኩሉ ሃገር ምስ ኣእቶኹኹም፡ እግዚኣብሄር ምዃነይ ክትፈልጡ ኢኹም።⁴³ኣብኡ ኸኣ ንመገድታትኩምን ነቲ ዝረኸስኩምሉ ግብርኹምን ክትዝክሩ ኢኹም፡ በቲ ዝገበርክምዎ ዘበለ ዅሉ እከይ ድማ ነፍስኹም ከስካሕክሕ እዩ።⁴⁴ኣቱም ቤት እስራኤል፡ ከምቲ እኩይ መገድኹምን ከምቲ ብልሽዊ ግብርኹምን ዘይኰነስ፡ ምእንቲ ስመይ ኢለ ምስ ገበርኩልኩም፡ ሽዑ ኣነ እግዚኣብሄር ምዃነይ ክትፈልጡ ኢኹም፡ ይብል እግዚኣብሄር ኣምላኽ።
   ⁴⁵ከምዚ ዝብል ቃል እግዚኣብሄር ድማ መጸኒ፡⁴⁶ኣታ ወዲ ሰብ፡ ገጽካ ናብ ደቡብ ኣቢልካ ምለስ፡ ናብ ደቡብ ከኣ ቃልካ ኣንጠብጥብ፡ ነቲ ኣብ ደቡብ ዘሎ ዱር መሮር ድማ ተነበየሉ።⁴⁷ነቲ ዱር ደቡብ ከኣ፡ ቃል እግዚኣብሄር ስማዕ፡ ኢልካ ንገሮ። እግዚኣብሄር ኣምላኽ ከምዚ ይብል ኣሎ፡ እንሆ ኣባኻ ሓዊ ኽኣጕድ እየ፡ ነተን ኣባኻ ዘለዋ ዅለን ጥሉላት ኣእዋምን ንዅሉ ንቑጻት ኣእዋምን ሞዅ ከብለን እዩ። እቲ ነዳዲ ሃልሃልታ ድማ ኣይክጠፍእን፡ ካብ ደቡብ ክሳዕ ሰሜን ከኣ ኵሉ ገጽ ብእኡ ኽነድድ እዩ።⁴⁸ኵሉ ስጋውን፡ እቲ ዝኣጐዶስ ኣነ እግዚኣብሄር ከም ዝዀንኩ፡ክርኢ እዩ። ኣይክጠፍእን እዩ።⁴⁹ሽዑ ኣነ፡ ኣየ፡ ኣታ እግዚኣብሄር ኣምላኽ፡ ንሳቶም ብዛዕባይ፡ እዝስ ምስላታት እዩ ዝምስል፡ ይብሉ ኣለዉ፡ በልኩ።

ትን. ህዝቅኤል ምዕራፍ 21

   ¹ከምዚ ዝብል ቃል እግዚኣብሄር ድማ መጸኒ፡²ኣታ ወዲ ሰብ፡ ገጽካ ናብ የሩሳሌም ኣቢልካ ምለስ፡ ቃልካ ኸኣ ናብቲ ቕዱስ ስፍራታት ኣንጠብጥብ፡ ንሃገር እስራኤል ከኣ ኣንጻር ተነበየሉ።³ነታ ሃገር እስራኤል፡ እግዚኣብሄር ከምዚ ይብል ኣሎ፡ ኢልካ ንገራ፡ እኔኹ ኣንጻርኪ እየ፡ ሰይፈይ ከኣ ካብ ሰገባኡ ኽመልሖ ካባኺውን ጻድቃንን ረሲኣንን ከጥፍእ እየ።⁴ንጻድቃንን ረሲኣንን ካባኺ ኸጥፍኦም እየ እሞ፡ ስለዚ ንዅሉ ስጋ ኽወቅዕ ካብ ደብብ ክሳዕ ሰሜን ሰይፈይ ካብ ሰገባኡ ኽምላሕ እዩ።⁵ስጋ ዘበሉ ዅሎም ከኣ፡ ኣነ እግዚኣብሄር ሰይፈይ ካብ ሰገባኡ ኸም ዝመላሕኩ፡ክፈልጡ እዮም፡ ኣይክምለስን ድማ እዩ።⁶ስለዚ ኣታ ወዲ ሰብ፡ ቈዝም፡ ብምስባር ሓቛቝኻ፡ ብመሪር ቃንዛ ኣብ ቅድሚ ኣዒንቶም ቈዝም።⁷ክኸውን ከኣ እዩ፡ እንታይ ኴንካ ትቝዝም፡ ኢሎም እንተ ሓተቱኻ፡ ንስኻ፡ በቲ ዝመጽእ ወረ ኹሉ ልቢ ኽመክኽ፡ ኩለን ኣእዳው ድማ ወለል ክብላ፡ ኩሉ መንፈስ ከኣ ክሕለል፡ ኩሉ ኣብራኽ ውን ከም ማይ ክፈስስ እዩ፡ ኢልካ ምለሰሎም። እንሆ፡ ይመጽእ ኣሎ፡ ክፍጸም ድማ እዩ፡ ይብል እግዚኣብሄር ኣምላኽ።
   ⁸ከምዚ ዝብል ቃል እግዚኣብሄር ከኣ መጸኒ፡⁹ኣታ ወዲ ሰብ፡ ተነበ በልውን፡ እግዚኣብሄር ከምዚ ይብል ኣሎ፡ ሰይፊ፡ ሰይፊ በሊሑን ተወልዊሉን ኣሎ በል።¹⁰ምእንቲ ኽሓርድ በሊሑ፡ ምእንቲ ማሕማሕ ክብል ተወልዊሉ። እምብኣርሲ ብእኡዶ ክንሕጐስ ኢና፡ በትሪ ወደይ ንኹለን ኣዕጻው ትንዕቀን ኣላ።¹¹ብኢድ ምእንቲ ክተሓዝ፡ክውልወል ሃቦ። እቲ ሰይፊ ናብ ኢድ ቀታሊ ምእንቲ ኽውፈ፡ ተሳሕለን ተወልወለን።¹²ኣታ ወዲ ሰብ፡ እዚ ኣብ ህዝበይን ኣብ ኵሎም መሳፍንቲ እስራኤልን ክኸውን እዩ እሞ፡ ጨርሕ፡ ዋይዋይ ከኣ በል። ምስ ህዝበይ ንኣደዳ ሰይፊ ተዋሂቦም እዮም፡ ስለዚ ሰለፍካ ውቓዕ።¹³ምዕዛብ መጸ፡ እታ እትንዕቕ በትሪ እኳ ኻብ ዘይትህሉስ፡ እንታይ ደኣ እዩ፡ ይብል እግዚኣብሄር ኣምላኽ።¹⁴ኣታ ወዲ ሰብ፡ ተነበ በእዳውካ ኸኣ ኣጣቕዕ። እቲ ሰይፊ ሰለስተ ግዜ ይካዕበት፡ እቲ ሰይፊ ናይቶም ክሳዕ ሞት ዝቘሰሉ፡ እቲ ሰይፊ ናይቲ ኽሳዕ ሞት ዝቘሰለ ዓብዪ እዩ ናብ ቤቶም ዝኣቱ።¹⁵ልቦም ምእንቲ ኽመክኽ፡ ዕንቅፋቶም ከኣ ክበዝሕሲ፡ ኣንፊ ሰይፊ ናብ ኵሉ ኣፍ ደጌታቶም ኣቢለ ኣንበርኩ። ኣየ፡ ከም በርቂ መስመስ ይብል፡ክሓርዱሉ ኸኣ ተሳሒሉ ኣሎ።¹⁶ስሕለትካ ናብ ዘበሎ ተዳሊኻ ንየማን ወይስ ንጸጋም ኪድ።¹⁷ኣነ ድማ ኣእዳወይ ከጣቕዕ፡ ሃና ነድረይውን ከውጽእ እየ። ኣነ እግዚኣብሄር እየ ተዛሪበዮ ዘሎኹ።
   ¹⁸መሊሱውን ከምዚ ዝብል ቃል እግዚኣብሄር መጸኒ፡¹⁹ኣታ ወዲ ሰብ፡ ሰይፊ ንጉስ ባቢሎን ዚሓልፈለን ክልተ መገዲ ንኣኻ ግበር፡ ክልቴአን ካብ ሓደ ሃገር ይውጽኣ። መሓበርታ ኸኣ ግበር፡ ኣብ ርእሲ እታ ናይታ ኸተማ መገዲ ግበሮ።²⁰ሰይፊ ናብ ራባት ናይ ደቂ ዓሞን፡ ናብ ይሁዳ ኸኣ ናብታ ዕርድቲ የሩሳሌም ክመጽእስ፡ መገዲ ኽትገብር ኢኻ።²¹እቲ ንጉስ ባቢሎን ምእንቲ ኽጥንቍል፡ ኣብታ ቓራና መገዲ፡ ኣብ ርእሲ ኽልቲአን መገዲ ደው ኢሉ ኣሎ፡ ፍላጻታት የነኒ፡ ንጣኦታት ቤት ይጥይቕ፡ ከብዲ ይጥምት ኣሎ።²²ኣብኡ መፍረስ ዕርዲ ኽትከል፡ ንዘመራ ውግእ ኣፉ ክኸፍት፡ ንሆይታ ውግእ ዓው ኢሉ ኽጭድር፡ ኣብ መንጽር ደጌታት ከኣ መፍረስ ዕርዲ ከቕውም፡ ሓመድ ኵዒቱውን ዕርዲ ኽነድቕሲ፡ ኣብ የማነይቱ ናብ የሩሳሌም እተመልክት ዕጭ ኣላቶ።²³ማሕላ ምሒሎም ክነሶምሲ፡ እዝ ጠንቈላ እዚ ሓሶት ኰይኑ ኽረኣዮም እዩ። ንሱ ግና፡ ምእንቲ ኽተሓዙ፡ ኣበሳኦም ከዘክር እዩ።
   ²⁴ስለዚ እግዚኣብሄር ኣምላኽ፡ ገበንኩም ተቐሊዑ፡ ሓጢኣትኩም ብዅሉ ግብርኹም ብምርኣዩ፡ ኣበሳኹም ስለ ዘዘከረኩም፡ ዝኽርኹም ተዘኪሩ እዩ እሞ፡ ስለዚ ብሓያል ኢድ ክትተሓዙ ኢኹም፡ ይብል ኣሎ።²⁵ኣታ በዚ ኣበሳ ዝፍጸመሉ ግዜ መዓልትኻ ዝበጽሐ ርኹስ ረሲእ መስፍን እስራኤል፡²⁶እግዚኣብሄር ኣምላኽ ከምዚ ይብል ኣሎ፡ ዘውዲ ቐንጥጥ፡ ኣኽሊል ኣውጽእ። እዝስ ከምዚ ዘለዎ ዀይኑ ኣይክነብርን እዩ። እቲ እተዋረደ ልዕል ይበል፡ እቲ ልዕል ዝበለ ኸኣ ይዋረድ።²⁷ጥፍኣት፡ ጥፍኣት፡ ጥፍኣት ካባይ ክመጻ እዩ። እቲ ኣነ ንእኡ ዝህቦ በዓል ፍርዲ ኽሳዕ ዝመጽእ፡ እዚ ኸኣ ኣይክነብርን እዩ።
   ^28-29ንስኻ ድማ፡ ኣታ ወዲ ሰብ፡ ተነበ፡ እግዚኣብሄር ኣምላኽ ብዛዕባ ደቂ ዓሞንን ብዛዕባ ጸርፎምን ከምዚ ይብል ኣሎ፡ ኢልካ ንገር በልውን፡ ኣብ ልዕሊ ኽሳድ እቶም በዚ ኣበሳ ዝፍጸመሉ ግዜ መዓልቶም ዝበጽሐ ቕቱላት ረሲኣን ኸንብሩኽስ፡ ከንቱነት ክርእዩልኪ፡ ጠንቈላ ሓሶት ከኣ ክናገሩልኪ ኸለዉ፡ ሰይፊ፡ ሰይፊ ተመሊሑ ኣሎ። ክሓርድን ክጐምምን መስመስ ክብልን ተወልዊሉ ኣሎ።³⁰ናብ ሰገባኡ ኽተቶ፡ ኣብታ እተፈጠርካላ ቦታ፡ ኣብታ እተወለድካላ ሃገር ክፈርደካ እየ።³¹ኵራይ ኣብ ልዕሌኻ ክኽዕዎ፡ ሓዊ ነድረይ ድማ ኡፍ ክብለልካ፡ ናብ ኢድ እቶም ከም ኣራዊት ዝበሉ፡ ምጥፋእ ዝተግባሮም ሰባት ክውፍየካ እየ።³²ብልዒ ሓዊ ክትከውን ኢኻ፡ ደምካ ኣብ ማእከል ሃገር ክክዖ እዩ። ኣነ እግዚኣብሄር ተዛሪበ እየ እሞ፡ዝዝክረካ የልቦን።

ትን. ህዝቅኤል ምዕራፍ 22

   ¹ከምዚ ዝብል ቃል እግዚኣብሄር ድማ መጸኒ፡²ኣታ ወዲ ሰብ፡ ክትፈርድዶ ኢኻ፡ ነዛ ኸተማ ደምዶ ክትፈርዳ ኢኻ፧ እምብኣርስ ኩሉ ጽያፋ ኣፍልጣ።³እግዚኣብሄር ኣምላኽ ከምዚ ይብል ኣሎውን በል፡ግዜኣ ምእንቲ ኽበጽሕ፡ ኣብ ማእከላ ደም እትኽዑ፡ ንርእሳ ኸተርክስ ከኣ ጣኦታት እትገብር ከተማ እያ።⁴በቲ ዝኸዖኽዮ ደምኪ፡ በት ዝገበርክዮ ጣኦታት ድማ ረኸስኪ። መዓልትታትኪ ኣቕረብኪ፡ ዓመታትኪውን ኣሕጸርኪ። ስለዚ ንህዝብታት መጻረፊ፡ ንዅሉ ሃገራት ከኣ መላገጺ ገበርኩኺ።⁵ኣቲ ርኹስ ዝወሬኺ፡ ዕግርግር ዝመልኣኪ ዝቐረቡኽን ዝረሓቑኽን ከላግጹልኪ እዮም።⁶እንሆ፡ እቶም መሳፍንቲ እስራኤል፡ ነፍሲ ወከፍ ከከም ሓይሉ፡ ደም ንምፍሳስ ኣባኺ ነበሩ።⁷ኣባኺ ነቦን ነደን ነዓቑ፡ ኣብ ማእከልኪ ንመጻእተኛ ገፍዑ፡ ኣባኺ ንዘኽታምን ንመበለትን ጨቈኑ።⁸ነቲ ናተይ ቅዱስ ነገራት ነዓቕኪ፡ ንሰናብተይ ኣርከስኪ።⁹ንምፍሳስ ደም ኣባኺ ሓመይቲ ነበሩ፡ ኣባኺ ኣብቶም ኣኽራን በልዑ፡ ኣብ ማእከልኪ ኸኣ ሕሰም ገበሩ።¹⁰ኣባኺ ሓፍረት ኣቦ ገለጹ፡ ኣባኺ ሰበይቲ በቲ ግዜ ደም መርገማ ኣዋረዱ።¹¹ሰብኣይ ምስ ሰበይቲ ብጻዩ ርኽሰት ገበረ፡ ሓደ ድማ ንሰበይቲ ወዱ ኣርከሰ፡ ሓደኻልእውን ኣባኺ ንሓብቱ ጋል ኣቦኡ ኣነወረ።¹²ደም ምእንቲ ኸፍስሱ፡ ኣባኺ ደርሆ ተቐበሉ፡ ኣኻዕበትክን ኣሕረጥክን፡ ብዓመጽ ካብ ብጻይኪ ረባሕኪ፡ ንኣይውን ረሳዕኪ፡ ይብል እግዚኣብሄር ኣምላኽ።
   ¹³እንሆ እምብኣር፡ በቲ ብዘይ ቅንዕና ዝረባሕክዮን በቲ ኣብ ማእከልኪ ዝኸዖኽዮ ደምን ኢደይ ኣጣቓዕኩ።¹⁴በታ ግብረይ ኣባኺ ዝገብረላ መዓልትስ ልብኺዶ ክቐውም ወይስ ኣእዳውኪ ኽጸንዓ እየን: ኣነ እግዚኣብሄር እየ እተዛረብኩ እሞ ክገብሮ እየ።¹⁵ኣነ ኣብ ማእከል ህዝብታት ፋሕ ከብለኪ፡ ናብ ሃገራት ከኣ ክዘርወኪ፡ ርስሓትኪውን ካባኺ ኸጥፍኦ እየ።¹⁶ብሰሪ ርእስኺ ኣብ ቅድሚ ህዝብታት ክትረኽሲ፡ ኣነ እግዚኣብሄር ምኻነይ ከኣ ክትፈልጢ ኢኺ።
   ¹⁷ከምዚ ዝብል ቃልእግዚኣብሄር ከኣ መጸኒ፡¹⁸ኣታ ወዲ ሰብ፡ እቶም ቤት እስራኤል ሓርኢ ሓጺን ኰኑኒ፡ ኣብ ማእከል እቶን ከኣ ኵላቶም ኣስራዝን ቈርቈሮን ሓጺንን ዓረርን እዮም። ሓተላ ብሩር ኰኑ።¹⁹ስለዚ እግዚኣብሄር ኣምላኽ ከምዚ ይብል ኣሎ፡ ኵላትኩም ሓርኢ ሓጺን ኢኹም እሞ፡ ስለዚ እንሆ፡ ኣብ ማእከል የሩሳሌም ክእክበኩም እየ።²⁰ከምቲ ክመክኽ ኢሎም፡ ሓዊ ምእንቲ ኽነፍሑሉ፡ ንብሩርን ኣስራዝን ሓጺንን ዓረርን ቈርቈሮን ኣብ ማእከል እቶን ዝእክብዎ፡ ከምኡ ኸኣ ብቝጥዓይን ብነድረይን ክእክበኩምን ኣብኡ ኸእትወኩምን ከምክኸኩምን እየ።²¹ክእክበኩም ሓዊ ነድረይ ድማ ክነፍሓልኩም እየ። ኣብ ማእከልውን ክትመኩ ኢኹም።²²ከምቲ ብሩር ኣብ ማእከል እቶን ዝመክኽ፡ ከምኡ ኣብ ማእከል ኽትመኩ ኢኹም። ንስኻትኩምውን፡ ኣነ እግዚኣብሄር ነድረይ ኣብ ልዕሌኹም ከም ዘፍሰስኩ፡ ክትፈልጡ ኢኹም።
   ²³ከምዚ ዝብል ቃል እግዚኣብሄር ድማ መጸኒ፡²⁴ኣታ ወዲ ሰብ፡ ንእኣ፡ ንስኺ ዘይጸረኺ፡ ብመዓልቲ ኵራውን ዝናም ዘይዘነመኪ ሃገር ኢኺ፡ ኢልካ ንገራ።²⁵ኣብ ውሽጣ ዘለዉ ነብያት ተማሓሒሎም ኣለዉ፡ ከምቲ ንግዳይ ሰላሊዑ ዝጓዝም ዝንበሳ፡ ነፍሳት ወሓጡ፡ መዝገብን ክቡር ነገርን ወሰዱ፡ ኣብ ማእከላውን መበላሉ ኣብዝሑ።²⁶ካህናታ ሕገይ ኣፍረሱ፡ ነቲ ናተይ ቅዱስ ነገራት ኣርከሱ፡ ነቲ ቅዱስ ካብቲ ዘይቅዱስ ኣይፈለዩን፡ ኣብ መንጎ ርኹስን ንጹህን ዘሎ ልዩነት ኣየፍለጡን፡ ካብ ሰናብተይ ኣዒንቶም ዓመቱ፡ ኣነውን ኣብ ማእከሎም ረኸስኩ።²⁷መሳፍንታ ኣብ ውሽጣ፡ ብዘይ ቅንዕና ኽረብሑስ፡ ደም እናፍሰሱ፡ ነፍሳት እናጥፍኡ፡ ከምቶም ንግዳይ ዝሰላልዑ ተዃሉ እዮም።²⁸ነብያት፡ ከንቱነት እናረኣዩ፡ ሓሶት እናጠቈሉሎም፡ እግዚኣብሄር ዘይተዛረቦስ፡ እግዚኣብሄር ኣምላኽ ከምዚ ይብል ኣሎ፡ እናበሉ ብዘይጠቅም ጸብሪ ለቕለቑሎም።²⁹እቲ ህዝቢ እታ ሃገር ዓመጸ፡ ከተረ፡ ንሽጉርን ድኻን ገፍዐ፡ ንመጻእተኛውን ኣጨነቐ።³⁰ኣነ ኸየጥፋኣስ፡ ነቲ ቐጽሪ ዘጣጥእ ምእንቲ እታ ሃገርውን ኣብ ቅድመይ ኣብቲ ምንቃዕ ዝቐውም፡ ኣብ ማእከሎም ሓደ ሰባኣይ ደሌኹ፡ ግናኸ ሓደ እኳ ኣይረኸብኩን።³¹ስለዚ ኸኣ ኵራይ ኣብ ልዕሊኦም ኣፍሰስኩ፡ ብሓዊ ነድረይ ኣጥፋእክዎም፡ መገዶም ኣብ ልዕሊ ርእሶም መለስኩሎም፡ ይብል እግዚኣብሄር ኣምላኽ።

ትን. ህዝቅኤል ምዕራፍ 23

   ¹ከምዚ ዝብል ቃል እግዚኣብሄር ከኣ መጸኒ፡²ኣታ ወዲ ሰብ፡ ክልተ ኣንስቲ፡ ሓንቲ ዘዲአን ኣዋልድ፡ ነበራ።³እዚኣተን ኣብ ግብጺ ኣመንዘራ፡ ኣጥባተን ተጸቕጠ፡ እቲ ድንግል ሕጽነን ኣብኡ ተደርቅቐ።⁴ኣስማተን ከኣ፡ እታ ዓባይ ኦሆላ፡ እታ ሓብታ ድማ ኦሆሊባ ይበሃላ ነበራ። ናተይ ኰና፡ ኣወዳትን ኣዋልድን ድማ ወለዳ። ስማተን ከኣ ኦሆላ ሰማርያ እያ፡ ኦሆሊባ ድማ የሩሳሌም እያ።
   ⁵ኦሆላ ኸኣ ናተይ ከላስ ዘመወት። ፍትወታ ኣብቶም ፈተውታ ኣብ ኣሶራውያን ጐረባብታ ዀነ።⁶ንሳቶም ሰማያዊ ሃሪ እተኸድኑ መሳፍንትን መኳንንትን፡ ኵላቶምውን መልክዐኛታት ኣባጽሕ፡ ኣብ ኣፍራስ ዝቕመጡ ፈረሰኛታት ነበሩ።⁷ምስ ኵላቶም ሕሩያት ኣወዳት ኣሶር ከኣ ኣመንዘረት፡ ፍትወት ኣብ እተላዕላ ምስ ኵሎም ጣኦታቶም ድማ ረኸሰት።⁸ምስናይ እዚ ኸኣ ነቲ ምስቶም፡ብጓላ ኸኣ፡ ምስኣ ዝደቀሱን ድንግል ሕጽና ዝደርቀቑን ዝሙቶም ዝኸዓዉላን ግብጻውያን ምዝማዋ ኣይሓደገትን።⁹ስለዚ ኣብ ኢድ እቶም ፈተውታ፡ ብፍትወት ምሳታቶም ነዲዳ ዝነበረት፡ ኣብ ኢድ ኣወዳት ኣሶር መጦኽዋ።¹⁰ንሳቶም ከኣ ዕርቃና ቀልዑ፡ ነወዳታን ነዋልዳን ማረኽዎም፡ ንእኣ ድማ ብሰይፊ ቀተልዋ። ኣብ ማእከል ኣንስቲ ኽፉእ ስም ወጸ፡ ኣብ ልዕሊኣውን ፍርዲ ተፈርደ።
   ¹¹ኦሆሊባ ሓብታ ኸኣ እዚ ረኣየት፡ ብፍትወታ ኻብኣ ገደደት፡ ምንዝርንኣ ድማ ካብ ምንዝርና ሓብታ በዝሐ።¹²ምስቶም ጐረባብታ ደቂ ኣሶር፡ መሳፍንትን፡ዘሐብን ክዳውንቲ እተኸድኑ፡ ኣብ ኣፍራስ ኣተቐመጡ ፈረሰኛታት፡ ኵሎም መልክዐኛታት ኣባጽሕ፡ ብፍትወት ነደደት።¹³ንሳውን ከም ዝረኸሰት ርአኹ፡ ክልቲአን ሓደ መገዲ ኸዳ።¹⁴ንሳ ግና ብምንዝርንኣ ሓለፍ በለት፡ ኣብ መንደቕ ከኣ ስእሊ ሰብኡት፡ ምስሊ ከለዳውያን ብቐይሕ ቀለም ተሳኢሉ።¹⁵ቅናት ኣብ ሕቝኦም ተዓጢቖም፡ ገፊሕ መጠምጠምያ ኸኣ ኣብ ርእሶም፡ ኵላቶም መኳንንቲ፡ ኣብታ እተወልዱላ ሃገር ከለዳውያን ምስሊ ደቂ ባቢሎን ዝመስሉ ረኣየት።¹⁶በዒንታ ምስ ረኣየቶም ኣባታቶም ብፍትወት ነደደት፡ ናብ ሃገር ከለዳውያን ድማ ልኡኽ ለኣኸትሎም።¹⁷ደቂ ባቢሎን ከኣ ናብኣ መጹ ምስኣ ብፍትወት ደቀሱ፡ ብምንዝርናኦም ድማ ኣርከስዋ። ብኣታቶም ምስ ረኸሰት፡ ነፍሳ ኻብኦም ኣግለሰት።¹⁸ዝሙታ ምስ ገለጸት፡ ዕርቃና ምስ ቀልዐት፡ ከምቲ ነፍሰይ ካብ ሓብታ ዘግለሰት፡ ካብኣ ድማ ነፍሰይ ኣግለሰት።¹⁹ግናኸ ብዘመን ንእስነታ ኣብ ሃገር ግብጺ ዘመንዘረቶ ዘኪራስ፡ ምንዝርንኣ ኣብዝሐት።²⁰ምስቶም ዘመውቲ፡ ስጋኦም ከም ናይ ኣድጊ ስጋ፡ ዘርኦም ከም ዘርኢ ኣፍራስ ዝዀነ ኸኣ፡ ብፍትወት ነደደት።²¹ከምኡ፡ እቶም ግብጻውያን ኣጥባት ጕርዝነት ከሎኪ ዝደርቀቑኺ፡ ርኽሰት ንእስነትኪ ዘከርኪ።
   ²²ስለዚ ኣቲ ኦሆሊባ፡ ኣግዚኣብሄር ኣምላኽ ከምዚ ይብል ኣሎ፡ እንሆ፡ ኣነ ነቶም ነፍስኺ ኻባታቶም ዘግለሰት ፈተውትኺ ኸተንስኣልኪ እየ። ክጻረሩኺ ኸኣ ካብ ኵሉ ወገን ከምጽኦም እየ።²³ባቢሎናውያንን ኵሎም ከለዳውያንን ጼኮድን ሾዓን ቆዓን፡ ምስኦም ከኣ ኵሎም ኣሶራውያንን፡ መልክዐኛታት ኣባጽሕ፡ መሳፍንትን መኳንንትን ኵላቶም ኣብ ኣፍራስ እተቐመጥ ሓላቑን ውሩያትን፡²⁴ንሳቶም ኣጽዋርን ሰረገላታትን መንኰራዅርን ሒዞም፡ ምስ ብዙሕ ከተቴ ህዝብታት ክጻረሩኺ ኽመጹ እዮም። ገለብን ዋልታን ቍራዕ ርእስን ሒዞም ብዙርያኺ ኽቃወሙኺ እዮም። ኣነ ኸኣ ፍርዲ ኽህቦም እየ፡ ንሳቶምውን ከም ፍርዶም ክፈርዱኺ እዮም።²⁵ቅንኣተይ ከውርደልኪ እየ፡ንሳቶም ከኣ ብነድሪ ኽመዓቱኺ እዮም። ኣፍንጫኽን ኣእዛንክን ክቘርጹ እዮም፡ እቲ ኻባኺ ዝተርፍ ድማ ብሰይፊ ኽወድቕ እዩ። ነወዳትክን ነዋልድክን ክማርኽዎም፡ እቲ ኻባኺ ዝተርፍውን ብሓዊ ክዅመም እዩ።²⁶ክዳውንትኺ ክቕንጥጡኺ፡ ክቡር ስልማትኪ ኽወስዱልኪ እዮም።²⁷ኣዒንቲኺ ናባታቶም ቍሊሕ ከይተብልን፡ ድሕርዚ ኸኣ ግብጺ ኸይትዝክርንሲ፡ ነቲ ኻብ ግብጺ ዝጀመረ ርኽሰትክን ምንዝርናኽን መወዳእታ ኽገብረሉ እየ።²⁸እግዚኣብሄር ኣምላኽ ከምዚ ይብል ኣሎ፡ እንሆ፡ ኣነ ናብ እቶም እትጸልእዮም ነፍስኺ ኻብኦም ዘግለሰት ክውፍየኪ እየ እሞ፡²⁹ብጽልኢ ኽካየዱኺ፡ ዅሉ ጻማ ድኻምኪ ኽወስዱልኪ፡ ዕርቕትን ንውልቅኽን ገይሮም ክሓድጉኺ እዮም። ናይ ምንዝርናኺ ዕርቃን ርኽሰትክን ምንዝርናኽን ክግለጽ እዩ።³⁰ደድሕሪ ህዝብታት ዒልዒል እናበልኪ ስለ ዝመንዘርኪ፡ ብጣኦታቶም ከኣ ስለ ዝረኸስኪ፡ እዚ ነገር እዚ ኽወርደኪ እዩ።³¹ብመገዲ ሓብትኺ ኸድኪ፡ ስለዚ ኸኣ ኣነ ናታ ጽዋእ ኣብ ኢድኪ ኽህበኪ እየ።³²እግዚኣብሄር ኣምላኽ ከምዚ ይብል ኣሎ፡ ንስኺ እታ ዓማቝን ገፋሕን ዝዀነት ጽዋእ ሓብትኺ ኽትሰትዩ ኢኺ። ብዙሕ እትሕዝ እያ እሞ መስሓቕን መላገጽን ክትኰኒ ኢኺ።³³እታ ጽዋእ ሓብትኺ ሰማርያስ ጽዋእ መሰክሕን ጥፍኣትን እያ እሞ፡ ብስኽራንን ብሓዘንን ክትመልኢ ኢኺ።³⁴ኣነ እየ እተዛረብኩ፡ ይብል እግዚኣብሄር ኣምላኽ እሞ፡ክትሰትይያን ክትጽንቅቕያን ገልዑ ኸኣ ክትነኽስን፡ ኣፍ ልብኺ ድማ ክትስንጥቕን ኢኺ።³⁵ስለዚ እግዚኣብሄር ኣምላኽ ከምዚ ይብል ኣሎ፡ንስኺ ረሲዕክኒ፡ ብድሕሪ ዝባንኪ ድማ ደርቢኽኒ ኢኺ እሞ፡ ንስኺውን ርኽሰትክን ምንዝርናኽን ጹሪ።
   ³⁶እግዚኣብሄር ከኣ በለኒ፡ ኣታ ወዲ ሰብ፡ ንኦሆላን ንኦሆሊባን ክትፈርደለን ዲኻ፡እምብኣርስ ጽያፈንንገረን።³⁷ዘምየን እየን እሞ፡ ኣብ ኣእዳወን ደም ኣለወን፡ ምስ ጣኦታተን ዘምየን፡ ነቶም ንኣይ ዝወለድክዎም ደቀን፡ ሓዊ ኽበልዖምሲ፡ ብእኡ ኣሕለፋኦም።³⁸ኣብ ርእሲኡውን እዚ ገበራኒ፡ በታ መዓልቲ እቲኣ መቕደሰይ ኣጸየፋ፡ ሰናብተይ ከኣ ኣርከሳ፡³⁹ደቀን ንጣኦታተን ምስ ሓርዳኦም፡ በታ መዓልቲ እቲኣ ኸርክስኣ ናብ መቕደሰይ መጻ። እንሆ፡ ኻብ፡ ኣብ ማእከል ቤተይ ከምዚ ገበራ።⁴⁰ኣብ ርእሲ እዚ ድማ ነቶም ካብ ርሑቕ ዝመጹ ሰብኡት ለኣኻሎም። ልኡኽ ተላእኮም፡ እንሆ፡ውን መጹ። ተሓጸብክሎም፡ ኣዒንትኺ ተዀሓልክሎም፡ ብስልማትውን ተሰለምክሎም።⁴¹ኣብ ጽቡቕ ዓራት ተቐመጥኪ፡ ኣብ ቅድሚኡ ኸኣ ሰደቓ ተዳልዩ ነበረ፡ ኣብ ልዕሊኡውን ዕጣነይን ዘይተይን ኣንበርኪ።⁴²ኣብኣ ድምጺ ሕጉሳት ሰብ ነበረ። ናብቲ ብዙሕ ህዝቢ ድማ ሰብ ሳባ ኻብ በረኻ ኣምጽኡ። ንሳቶም ከኣ ኣምባር ኣብ ኣእዳወን፡ እጹብ ዘውዲውን ኣብ ኣርእስተን ገበሩ።
   ⁴³ሽዑ ኣነ ብዛዕባ እታ ብዝሙት ዝኣረገት፡ ሎሚ ድማ ምስኣ የመንዝሩ ኣለዉ፡ በልኩ፡⁴⁴ከምቲ ናብ ኣመንዝራ ዝኣትዉ፡ ናብኣ ኣተዉ። ከምኡውን ናብተን ርኹሳት ኣንስቲ ኦሆላን ኦሆሊባን ኣተዉ።⁴⁵ጻድቃን ሰባት ከኣ፡ ዘመውቲ ስለ ዝዀና ኣብ ኣእዳወን ድማ ደም ስለ ዘለወን፡ ከምቲ ንዘመውቲ፡ ከምቲ ነተን መፍሰስቲ ደም ዝፍረደን ገይሮም፡ክፈርድወን እዮም።⁴⁶ስለዚ እግዚኣብሄር ኣምላኽ ከምዚ ይብል ኣሎ፡ ኣኼባ ህዝቢ ኸውጽኣለን እየ እሞ፡ ንምምራኽን ንዘመተን ኣሕሊፈ ኽህበን እየ።⁴⁷ኣኼባ ኸኣ ብዳርባ እምኒ ክቐትልወን፡ በስያፎም ክቘራርጽወን፡ ነወዳተንን ነዋልደንን ክቐትልዎም፡ ኣባይተንውን ብሓዊ ኸንድዱ እዮም።⁴⁸ኵላተን ኣንስቲ ኸምቲ ምንዝርናኽን ኸይገብራ፡ ምእንቲ ኽመዓዳስ፡ ንምንዝርና ኻብታ ሃገር ከጥፍኦ እየ።⁴⁹ምንዝርናኽን ኣብ ልዕሌኽን ከንብሩልክን እዮም፡ ሓጢኣት ጣኦታትክን ድማ ክትጾራ ኢኽን። ኣነ እግዚኣብሄር ኣምላኽ ምዃነይ ከኣ ክትፈልጣ ኢኽን።

ትን. ህዝቅኤል ምዕራፍ 24

   ¹ኣብ መበል ታስዐይቲ ዓመት ኣብታ ዓስረይቲ ወርሒ፡ ካብታ ወርሒውን ኣብ ዓስረይቲ መዓልቲ ኸምዚ ዝብል ቃል እግዚኣብሄር መጸኒ፡²ኣታ ወዲ ሰብ፡ ነዛ መዓልቲ እዚኣ ስም እዛ መዓልቲ እዚኣ ጽሓፍ። ንጉስ ባቢሎን ሎሚ መዓልቲ ናብ የሩሳሌም ቀረበ።³ነታ ኸዳዕ ቤት ምስላ ንገራ በሎምውን፡ እግዚኣብሄር ኣምላኽ ከምዚ ይብል ኣሎ፡ ድስቲ ሰኽትት፡ ሰኽትቶ ማይ ድማ ኣዕርቐሉ።⁴ምታሩ፡ ኵሉ ጽቡቕ ምታር ዘበለ፡ እግርን ክሳድን፡ ናብኡ ኣክቦ፡ በቲ ሕሩይ ዓጽሚውን ምልኣዮ።⁵ካብቲ መጓሰ ኸኣ ሕሩድ ውሰድ፡ ነቲ ዓጽሚ ድማ ኣብ ትሕቲኡ ዀሚርካ፡ እቲ ኣብ ውሽጢ ዘሎ ኣዕጽምቲ ምእንቲ ኽበስል፡ ኣጸቢቕካ ኣፍልሓዮ።
   ⁶ስለዚ እግዚኣብሄር ኣምላኽ ከምዚ ይብል ኣሎ፡ ነታ ምምራታ ዘይለቅቕ ብምምራት ዝዘዓገት ድስቲ፡ በዓልቲ ደም ዝዀነት ከተማ ወይለኣ። ነቲ ምራት ብምታሩ ኣውጽኣዮ፡ ዕጭ ኣይወደቖን።⁷ደማ ኣብ ማእከላ እዩ እሞ፡ ኣብቲ ልሙጽ ከውሒ ሓደገቶ። ብሓመድ ክትከድኖ እኳ ኣብ ምድሪ ኣይከዓወቶን።⁸ንምልዕዓል ነድርን ንምፍዳይ ሕነ እቲ ደማ ምእንቲ ኸይክወል፡ ኣብ ልሙጽ ከውሒ ኣኽዖኽዎ።
   ⁹ስለዚ እግዚኣብሄር ኣምላኽ ከምዚ ይብል ኣሎ፡ ኣነውን ብርቱዕ መጕሃር ክኣጕድ እየ እሞ፡ ነታ በዓልቲ ደም ዝዀነት ከተማ ወይለኣ፡¹⁰ኣዕጻው ኰምር፡ ሓዊ እጐድ፡ ነቲ ስጋ ኣጸቢቕካ ኣብስሎ፡ ነቲ መረቕ ኣዚካ ኣፍልሓዮ፡ ነቲ ኣዕጽምቲ ኸኣ ኣሕርሮ።¹¹ምእንቲ ኽውዕን እቲ ኣስራዚኡ ድማ ምእንቲ ኽረስንን ኣብ ውሽጢ ዘሎ ዛዕጉ ኽመክኽን እቲ ምምራቱ ኸኣ ክጠፍእንሲ፡ ጥራዩ ኣብ ልዕሊ ጓህሪ ሰኽትቶ።¹²ጻዕራ ኸንቱ እዩ፡ ምምራታ በርቲዑ እዩ እሞ፡ ብሓዊ እኳ ኣይለቅቕን እዩ።¹³ኣብ ርስሓትኪ ርኽሰት ኣሎ። ኣጽርየክስ ኣይጸሬኽን ኢኺ እሞ፡ሃና ነድረይ ክሳዕ ዝወጸልኪ ኻብ ርስሓትኪ ኣይክትጸርይን ኢኺ።¹⁴ኣነ እግዚኣብሄር እየ እተዛረብክዎ። ክኸውን እዩ፡ ክገብሮ ድማ እየ። ከም መገድኽን ከም ግብርኽን ክፈርዱኺ እዮም፡ ይብል እግዚኣብሄር ኣምላኽ።
   ¹⁵ከምዚ ዝብል ቃል እግዚኣብሄር ከኣ መጸኒ፡¹⁶ኣታ ወዲ ሰብ፡ እንሆ፡ ንተድላ ኣዒንትኻ ብወቕዒ ኽምንጥለልካ እየ። ንስኻ ድማ ኣይትሕዘን፡ ኣይትብከ፡ ኣይትንባዕውን፡¹⁷ስቕ ኢልካ እህህ በል፡ ንምዉታት ከም ዝልቀሶም ጌርካ ኣይተልቅስ፡ ርእስኻ ደኣ ብመጠምጠምያ ጠምጥም፡ ኣሳእንካ ኣብ ኣእጋርካ ኣእቱ፡ ጭሕምኻ ኣይትኽደን እንጌራ ሓዘንቲውን ኣይትብላዕ።
   ¹⁸ነቲ ህዝቢ ንግሆ ተዛረብክዎ፡ ንምሸቱ ኸኣ ሰበይተይ ሞተት፡ ንጽብሒቱ ድማ ከምቲ እተኣዘዝክዎ ገበርኩ፡¹⁹እቲ ህዝቢውን፡ እቲ እትገብሮ ዘሎኻስ ንኣና እንታይ ማለት ምዃኑዶ ኣይትገልጸልናን ኢኻ፡በለኒ።²⁰ኣነ ድማ፡ ከምዚ ዝብል ቃል እግዚኣብሄር መጸኒ፡ ኢለ መለስኩሎም፡²¹ንቤት እስራኤል፡ እግዚኣብሄር ኣምላኽ ከምዚ ይብል፡ ኣሎ፡ በሎም፡ እንሆ፡ እታ ሓበን ሓይልኹም፡ እታ ተድላ ኣዒንትኹም፡ እታ ናፍቖት ነፍስኹም፡ ቤት መቕደሰይ ከርክሳ እየ። እቶም ደድሕሬኹም ዝሓደግኩምዎም ኣወዳትኩምን ኣዋልድኩምን ብሰይፊ ኽወድቁ እዮም።²²ንስኻትኩም ከኣ ከምቲ ዝገበርክዎ ኽትገብሩ ኢኹም። ጭሕምኹም ኣይክትከድኑን፡ እንጌራ ሓዘንቲውን ኣይክትበልዑን፡²³መጠምጠምያኹም ኣብ ርእስኹም፡ኣሳእንኩም ኣብ ኣእጋርኩም ክኸውን እዩ። ዋይዋይ ኣይክትብሉን ኣይክትበኽዩን ከኣ ኢኹም፡ ግናኸ ብሰሪ ኣበሳኹም ክትማስኑ፡ ነንሓድሕድኩም ከኣ እህህ ክትብሉ ኢኹም።²⁴ህዝቅኤል ከኣ ኣርኣያ ክዀነልኩም እዩ፡ ከምቲ ንሱ ዝገበሮ ዘበለ ዅሉ። እዚ ምስመጸ፡ ኣነ እግዚኣብሄር ኣምላኽ ምዃነይ ክትፈልጡ ኢኹም።
   ²⁵ኣታ ወዲ ሰብ ከኣ፡ በታ ንሓይሎምን፡ ንሓጐስ ክብረቶም፡ ንተድላ ኣዒንቶም፡ ነቲ ናፍቖት ልቦም፡ ኣወዳቶምን ኣዋልዶምን ኣነ ካብኦም ዝወስደላ መዓልቲ፡²⁶በታ መዓልቲ እቲኣ እቲ ዘምለጠ ኣብ እዝንኻ ኸስምዓካ ኽመጸካ እዩ።²⁷በታ መዓልቲ እቲኣ እቲ ዘምለጠ ምስ መጸ ኣፍካ ክኽፈት እዩ፡ ክትዛረብ ድሕርዚ ኸኣ ዓባስ ኣይክትኸውንን ኢኻ። ከምኡ ንስኻ ኣርኣያ ኽትኰኖም ኢኻ፡ ኣነ እግዚኣብሄር ምዃነይውን ክፈልጡ እዮም።

ትን. ህዝቅኤል ምዕራፍ 25

   ¹ከምዚ ዝብል ቃል እግዚኣብሄር ከኣ መጻኒ፡²ኣታ ወዲ ሰብ፡ ገጽካ ናብ ደቂ ዓሞን ኣቢልካ ምለስ እሞ ተነበየሎም።³ንደቂ ዓሞን ከኣ፡ ቃል እግዚኣብሄር ኣምላኽ ስምዑ፡ ከምዚ ይብል ኣሎ እግዚኣብሄር ኣምላኽ፡ ኢልካ ንገሮም፡ መቕደሰይ ስለ ዝረኸሰት፡ ሃገር እስራኤል ስለ ዝባደመት፡ ቤት ይሁዳ ስለ እተማረኹ ኣሰይ፡ ኣሰይ ኢልካ ኢኻ እሞ፡⁴ስለዚ እንሆ፡ ንደቂ ምብራቕ ርስቶም ክትከውን፡ ድንኳናቶም ክተኽሉልካ፡ ኣብ ማእከልካውን ሰፊሮም ክሰርሑ ኽውፍየካ እየ። ንሳቶም ፍሬኻ ኽበልዑ፡ ጸባኻውን ክሰትዩ እዮም።⁵ንራባት መጓሰዪ ኣግማል፡ ንደቂ ዓሞን ከኣ ደምበ ኣባጊዕ ክገብሮም እየ። ኣነ እግዚኣብሄር ምዃነይ ድማ ክትፈልጡ ኢኹም።⁶እግዚኣብሄር ኣምላኽ ከምዚ ይብል ኣሎ፡ በእዳውካ ስለ ዘጣቓዕካ፡ በእጋርካ ኰርደብደብ ስለ ዝበልካ፡ ብዅሉ ነፍስኻ ንዒቕካያ ብሃገር እስራኤል ስለ እተሓጐስካ፡⁷ስለዚ እንሆ፡ ኢደይ ኣባኻ እዝርግሕ ኣሎኹ እሞ፡ ዘመተ ኣህዛብ ክትከውን ክውፍየካ፡ ካብ ህዝብታት ከጽንተካ፡ ካብ ሃገራት ክጥርሰካ፡ ከጥፍኣካውን እየ፡ ኣነ እግዚኣብሄር ምዃነይ ድማ ክትፈልጥ ኢኻ።
   ⁸እግዚኣብሄር ኣምላኽ ከምዚ ይብል ኣሎ፡ ሞኣብን ሰዒርን፡ እንሆ፡ ቤት ይሁዳስ ከም ኵላቶም ህዝብታት እዮም፡ ይብሉ ኣለዉ እሞ፡⁹ስለዚ እንሆ፡ ኣነ ንግድሚ ሞኣብ ብወገን ከተማታት ካብተን ብዅሉ ኸባቢኣ ዘለዋ ኸተማታታ፡ ክቡራት እታ ሃገር፡ እኒ ቤት-የሺሞት፡ በዓል-መዖን፡ ቂርያታይም ክኸፍት እየ።¹⁰እቶም ደቂ ዓሞን ድሕርዚ ኣብ ማእከል ኣህዛብ ከይዝከሩስ፡ ነቶም ኣብ ርእሲ ደቂ ዓሞን ዝመጹ ደቂ ምብራቕ ርስቲ ገይረ ኽውፍየን እየ።¹¹ኣብ ሞኣብ ፍርዲ ኽገብር እየ፡ ኣነ እግዚኣብሄር ምዃነይ ከኣ ክፈልጡ እዮም።
   ¹²እግዚኣብሄር ኣምላኽ ከምዚ ይብል ኣሎ፡ ኤዶም ጨኪኑ ንቤት ይሁዳ ሕነ ብምፍዳዩ፡ በዚ ዝፈደዮ ሕነ እዚ ብርቱዕ በደል በዲሉ ኣሎ እሞ፡¹³ስለዚ እግዚኣብሄር ኣምላኽ፡ ኢደይ ናብ ኤዶም ክዝርግሕ፡ ሰብን እንስሳን ድማ ካብኣ ኸጽንት እየ። ካብ ቴማን ጀሚረ ጸምጸም በረኻ ኽገብሮም እየ፡ ክሳዕ ዴዳን ከኣ ብሰይፊ ኽወድቁ እዮም፡ ይብል ኣሎ።¹⁴ኣነ ኸኣ፡ ብኢድ ህዝበይ እስራኤል ገይረ፡ ሕነይ ናብ ኤዶም ከውርዶ እየ። ንሳቶም ንኤዶም ከም ኵራይን ነድረይን ክገብርዋ እዮም። ምፍዳይ ሕነይውን ክፈልጡ እዮም፡ ይብል እግዚኣብሄር ኣምላኽ።
   ¹⁵እግዚኣብሄር ኣምላኽ ከምዚ ይብል ኣሎ፡ እቶም ፍልስጥኤማውያን ጨክኖም ሕነ ስለ ዝፈደዩ፡ በቲ ናይ ጥንቲ ጽልኦም ከጥፍኡ ኢሎምሲ፡ ብነፍሶም ንዒቖም ሕነ ስለ ዝፈደዩ፡¹⁶ስለዚ ኸኣ እግዚኣብሄር ኣምላኽ ከምዚ ይብል ኣሎ፡ እንሆ፡ ኢደይ ናብ ፍልስጥኤማውያን ክዝርግሕ፡ ንክረታውያን ከኣ ከጽንቶም፡ ነቲ ኣብ ገምገም ባሕሪ ተርፊ ዘሎውን ከጥፍኦ እየ።¹⁷ብመዓት ነድሪ ኸኣ ብርቱዕ ምፍዳይ ሕነ ኽፈድዮም እየ። ሕነይ ምስ ፈዴኽዎም፡ ሽዑ ኣነ እግዚብሄር ምዃነይ ክፈልጡ እዮም።

ትን. ህዝቅኤል ምዕራፍ 26

   ¹ኰነ ኸኣ፡ ኣብ መበል ዓሰርተው ሓደ ዓመት በታ ቐዳመይቲ መዓልቲ እታ ወርሒ ኸምዚ ዝብል ቃል እግዚኣብሄር መጸኒ፡²ኣታ ወዲ ሰብ፡ ጢሮስ ብዛዕባ የሩሳሌም፡ ኣሰይ፡ ኣሰይ፡ እታ ደገ ህዝብታት ፈሪሳ፡ ናባይ ተመሊሳ፡ ንሳ ባዲማ እያ፡ ኣነ ኽመልእ እየ፡ ኢላ ኣላ እሞ፡³ስለዚ እግዚኣብሄር ኣምላኽ ከምዚ ይብል ኣሎ፡ ኣቲ ጢሮስ፡ ተሃንዲደኪ እኔኹ፡ ከምቲ ባሕሪ ንማዕበሉ ዘልዕሎ፡ ከምኡ ገይረ ብዙሓት ህዝብታት ከተንስኣልኪ እየ።⁴ንቐጽርታት ጢሮስ ከጥፍእዎ፡ ንግምብታታ ኸኣ ከፍርስዎ። ሓመዳ ኽጸርገላ፡ ልምጽምጽ ዝብል ከውሒ ኽገብራ እየ።⁵ንሳ ኣብ ማእከል ባሕሪ መስጥሒ መርበብ ክትከውን እያ። ኣነ ተዛሪበ እየ፡ ይብል እግዚኣብሄር ኣምላኽ። ንህዝብታት በዝባዝ ክትከውን እያ።⁶እተን ኣብ መሮር ዘለዋ ኣዋልዳ ኸኣ ብሰይፊ ክቕተላ እየን፡ ኣነ እግዚኣብሄር ምዃነይ ድማ ክፈልጡ እዮም።⁷እግዚኣብሄር ኣምላኽ ከምዚ ይብል ኣሎ፡ እንሆ፡ ንነቡካድነጻር፡ ንጉስ ባቢሎን ንጉስ ነገስታት፡ ምስ ኣፍራስን ሰረገላታትን ምስ ፈረሰኛታትን ጭፍራን ብዙሕ ህዝብን ካብ ሰሜን ናብ ጢሮስ ከምጽኦ እየ።⁸ነተን ኣብ መሮር ዘለዋ ኣዋልድኪ ብሰይፊ ክቐትለን፡ ዕርዲ ኽዓርደልኪ፡ ሓመድ ክዅምረልኪ፡ ዋልታታት ከልዕለልኪ እዩ።⁹ነቲ መፍረሲኡ ናብ ቀጽርኺ ኣቢሉ ኽተኽሎ እዩ፡ ብመሳርያኡ ኸኣ ንግምብታትኪ ኸፍርሶ እዩ።¹⁰ካብ ብዝሒ ኣፍራሱ እተላዕለ፡ ደሮናኦም ከጐልብበኪ እዩ። ብፍሩስ ቀጽሪ ኣብ ከተማ ኸም ዝኣትዉ፡ ንሱ ብኣፍ ደጌታትኪ ኽኣቱ ኸሎ፡ ህዱድ ብምባል ፈረሰኛታትኪ መንኰራዅሩን ሰረገላታቱን ቀጽርታትኪ ነይነይ ክብል እዩ።¹¹ንዅሉ ኣደባባያትኪ ብሸዀና ኣፍራሱ ኽረግጾ፡ ንህዝብኺ ብሰይፊ ክቐትሎም፡ እቲ ሓወልቲ ሓይልኺ ናብ ምድሪ ጻሕ ክብል እዩ።¹²ንመዛግብትኺ ኽብዝብዙ፡ ነቕሑ ንግድኪ ኽዘምቱ፡ ንመናድቕኪ ኸፍርሱ፡ ነቲ በብሉጽ ኣባይትኺ ኽፍንጥሑ፡ ነእማንክን ኣዕጻውክን ሓመድክን ኣብ ማእከል ማይ ክድርብዩ እዮም።¹³ንደሃይ ደርፍኺ መወዳእታ ኽገብረሉ እየ፡ ድሕርዚ ድማ ቃና መሰንቆታትኪ ኣይክስማዕን እዩ።¹⁴ልሙጽ ከውሒ ኽገብረኪ እየ፡ መስጥሒ መርበብ ክትኰኒ ኢኺ። ኣነ እግዚኣብሄር እየ እተዛረብኩ እሞ፡ ከም ብሓድሽ ኣይክትስርሕን ኢኺ፡ ይብል እግዚኣብሄር ኣምላኽ።
   ¹⁵እግዚኣብሄር ኣምላኽ ንጢሮስ ከምዚ ይብል ኣሎ፡ ብህማም ምውዳቕኪ፡ እቶም ውጹዓት ውጉኣት ክቕንዘዉ ኸለዉ፡ ኣብ ማእከልኪ ክቕተሉ ኸለዉ፡ እተን ደሴታትዶ ረዓድ ኣይክሕዘንን እዩ፡¹⁶ሽዑ ዅላቶም መሳፍንቲ ባሕሪ ካብ ዝፋውንቶም ክወርዱ፡ ባርኖሶም ክቕንጥጡ ጥሉፍ ኣልባሶም ክድርብዩ፡ ስምባድ ክኽደኑ፡ ኣብ ምድሪ ክቕመጡ፡ ኵሉ ግዜ ፈጥፈጥ ክብሉ፡ ብኣኺ ኽስክሑ እዮም።^17-18ኣቲ መሳፍሮ ሰብ ባሕሪ፡ ኣቲ ኣብ ባሕሪ ሓያል ዝነበርኪ፡ ንስኺ ምስቶም ኣባኺ ዝነብሩ ዝነበሩ ኾንኪ ብዅሉ ሰብ መፍርሂት ዝነበርኪ ውርይቲ ኸተማ፡ ከመይ ኢልኪ ዀን ጠፋእኪ፡ ሕጂ እተን ደሴታት በታ መዓልቲ ምውዳቕኪ ኽንቅጥቀጣ፡ እተን ኣብ ባሕሪ ዘለዋ ደሴታት ከኣ ብመወዳእታኺ ኽስምብዳ እየን፡ ኢሎም መልቀስ ከልቅሱልኪ እዮም።
   ¹⁹እግዚኣብሄር ኣምላኽሲ ኸምዚ ይብል ኣሎ፡ ከምተን ሓደ እኳ ዝነብረን ዘይብለን ከተማታት ገይረ፡ ዕንውቲ ኸተማ ምስ ገበርኩኺ፡ መዓሙቝ ኣብ ልዕሌኺ ምስ ኣስራሰርኩ፡ ብዙሕ ማያት ምስ ደፈነኪ፡²⁰ሽዑ ምስቶም ናብ ጕድጓድ ዝወረዱ ናይ ጥንቲ ህዝቢ ኸውርደኪ እየ። ኣባኺ ዝነብሩ ከይህሉስ፡ ምስቶም ናብ ጕድጓድ ዝወረዱ ኣብ መዓሙቝ ምድሪ ኣብ ናይ ጥንቲ ዑናታት ከስፍረኪ እየ። ኣነውን ክቡር ነገር ኣብ ምድሪ ህያዋን ክገብር እየ።²¹መሰክሒ ኽገብረኪ እየ እሞ፡ ኣይክትህልውን ኢኺ። ዝደለየ እኳ እንተ ደለየኪ፡ ከቶ ንዘለኣለም ኣይክትርከብን ኢኺ፡ ይብል እግዚኣብሄር ኣምላኽ።

ትን. ህዝቅኤል ምዕራፍ 27

   ¹ከምዚ ዝብል ቃል እግዚኣብሄር ከኣ መጸኒ፡²ኣታ ወዲ ሰብ፡ ንጢሮስ መልቀስ ኣልቅሰላ፡³ንጢሮስ በላ፡ ኣቲ ኣብ መእተዊ ባሕሪ እትነብሪ፡ ምስቶም ኣብ ብዙሕ ደሴታት ዘለዉ ህዝብታት ከኣ እትነግዲ፡ ከምዚ ይብል እግዚኣብሄር ኣምላኽ፡ ኣቲ ጢሮስ፡ ባዕልኺ፡ ብመልክዕ ፍጽምቲ ኣነ እየ በልኪ።⁴ወሰንኪ ኣብ ልቢ ባሕሪ እዩ፡ እቶም ሃነጽትኺ ነቲ መልክዕኪ ፈጸምዎ።⁵ንጐቦታትኪ ብጽሕዲ ሰኒር ሰርሕዎል ደቐል መራኽብ ክገብሩልኪ ካብ ሊባኖስ ኣእዋም ወሰዱ።⁶መቕዘፊታትኪ ብስኒ ሓርማዝ ሰሊሞም፡ በቲ ኻብ ደሴታት ኪቲም ዝመጻ ኣእዋም ገበሩ።⁷እቲ ንሰንደቕ ዕላማ ዝዀነኪ ጋንጽላኺ ብልሕጺ እንጣጢዕ እተገብረ ቀጢን እተጠልፈ ዓለባ ኻብ ግብጺ ነበረ። ካብ ደሴታት ኤሊሻ ሰማያዊ ሃርን ጁዅን መጋረጃኺ ነበረ።⁸ኣቲ ጢሮስ፡ እቶም ዝቐዝፋልክስ ሰብ ሲዶናን ሰብ ኣርዋድን ነበሩ፡ እቶም ኣባኺ ዘለዉ ጠቢባንኪ መራሕቲ መራኽብኪ ዀኑ።⁹እቶም ሽማግሌታት ጌባልን እቶም ጠቢባናን ነቲ እተሰብረ ከጣጥኡስ ኣብ ማእከልኪ ነበሩ። ኵላተን መራኽብ ባሕርን ባሕረኛታትን፡ ንግዶም ክለዋወጡኺ፡ ኣባኺ ነበሩ።¹⁰ፋርስን ሉድን ፉጥን ኣብ ሰራዊትኪ ዓቀይትኺ ነበሩ። ዋላቱን ቍራዕ ርእስን ሰቐሉልኪ፡ ንሳቶም ጌጽ ሃቡኺ።¹¹ደቂ ኣርዋድን ሰራዊትክን ኣብ ከባቢ ቐጽርኺ፡ ሰብ ገማድያ ኸኣ ኣብ ግምብታትኪ ነበሩ፡ ዋላቱኦም ኣብ ወሰነወሰን መናድቕኪ ሰቐሉ፡ ንመልክዕኪ ፈጸምዎ።¹²ተርሲስ ስለ ብዙሕ ዓይነት ሃብቲ ምሳኺ ትነግድ ነበረት፡ ብብሩርን ሓጺንን ቈርቈሮን ዓረርን ገይራ ዋጋኡ ፈደየትኪ።¹³ያዋንን ቱባልን ሜሴክን ነጋዶኺ ነበሩ፡ ናብ ዕዳጋኺ ባሮትን ኣቓሑ ነሃስን ኣምጽኡ።¹⁴ካብ ቤት ቶጋርማ በፍራስን በፍራስ ውግእን በባቕልን ገይሮም ለውጢ ነግድኺ ሃቡኺ።¹⁵ደቂ ዴዳን ኣባኺ ነገዱ፡ ብዙሓት ደሴታት ብኢድኪ ነግዶም ኣመሓላለፉ፡ ስኒ ሓርማዝን ዝበን ከኣ ገጽ በረኸት ኣምጽኡልኪ።¹⁶ስለ ብዝሒ ግብሪ ብልሓትኪ ሶርያ ምሳኺ ነገደት፡ ብክቡር ዕንቍን ብጁዅን ብተጠልፈ ዓለባን ብልሕጺ እንጣጢዕ እተገብረ ዓለባን ብዘዓጐልን ብሮቢኖስን ገይሮም፡ ለውጢ ነግድኺ ሃቡኺ።¹⁷ይሁዳን ሃገር እስራኤልን ምሳኺ ነገዱ፡ ንዕዳጋኺ በቲ ኻብ ምኒት ዝመጸ ስርናይን ብሕብስትን መዓርን ዘይትን ቅዲትን መልእዋ።¹⁸ደማስቆ ብብዝሒ እትዋትክን ስለ እቲ ብዙሕ በብዓይነቱ ዝዀነ ሃብትን ብነቢት ካብ ሄልቦንን ብጸምርን መናግድኺ ነበረት።¹⁹ዌዳንን ያዋንን ሙዛልን ንዕዳጋኺ ብስሩሕ ሓጺንን ሽቱን ቀረፋን ኣዓመሩ።²⁰ዴዳን ብኽቡር መረሻታት ምሳኺ ነግዳ ገበረት።²¹ዓረብን ኵላቶም መሳፍንቲ ቄዳርን ብኢድኪ ነገዱ። ምሳኺ ኽነግዱስ ገነሽልን ደዓውልን ኣጣልን ኣምጽኡ።²²እቶም ነጋዶ ሰባን ራዕማን መናግድኺ ነበሩ። ብብሉጽ ቀመምን ብኽቡር ኣእማን ዘበለን ብወርቅን ተላዋወጡኺ።²³ካራንን ካኔን ኤድንን፡ ነጋዶ ሳባን ኣሶርን ኪልማትን ነጋዶኺ ነበሩ።²⁴ብብሉጽ ኣልባሳትን ብሰማያዊ ሃርን ብወርቀዘቦ እተጠልፈ ባርኖስን፡ ብኦም ሊባኖስ እተገብረን በግማድ እተኣሰረን፡ ክቡር ዓለባ ዝመልአ ሳጻውን ገይሮም ምሳኺ ይነግዱ ነበሩ።²⁵መራኽብ ተርሲስ ከኣ ቃፍላይ ነግድኺ ነበሩ። መላእኪ እሞ ኣብ ልቢ ባሕሪ ኣዚኺ ኸበርኪ።
   ²⁶እቶም ዝቐዝፉልኪ ናብ ብዙሕ ማያት ወሰዱኺ፡ ንፋስ ምብራቕ ከኣ ኣብ ልቢ ባሕሪ ሰበረኪ።²⁷ሃብትኽን መነጋገድያኽን መለዋወጢኽን ባሕረኛታትክን፡ መራሕቲ መራኽብክን፡ መጣጣእቲ ስቡርክን ነጋዶኽን ኣባኺ ዘለዉ ዅሎም ጭፍራ ውግእክን፡ እቶም ኣባኺ ዘለዉ ዅሎም ሰብኡትን በታ መዓልቲ ውድቀትኪ ኣብ ልቢ ባሕሪ ኽወድቁ እዮም።²⁸ካብ ኣውያት እቶም መራሕቲ መራኽብኪ እተላዕለ እቶም ኣብ ከባቢኺ ዘለዉ ራዕራዕ ክብሉ እዮም።²⁹ኵላቶም ብመቕዘፍ ዝቐዝፉን ባሕርኛታትን ኵላቶም መራሕቲ መራክብን ካብ መራኽቦም ክወርዱ ኣብ ምድሪ ኸኣ ክቐሙ እዮም።³⁰ብዛዕባኺ ድምጾም ከስምዑ፡ ኣምሪሮም ድማ ክበኽዩልኪ እዮም። ኣብ ርእሶም ሓመድ ክንስንሱ፡ ኣብ ሓመዅስቲውን ጠንቀላዕላዕ ክብሉ እዮም።³¹ርእሶም ክላጽዩልኪ፡ ከሊ ኽዕጠቑልኪ፡ ብምረት ነፍሶም መሪር ብኽያት ክበኽዩልኪ እዮም።³²እናሕዘንዘኑ ብቝዝማ፡ ከምታ ኣብ ማእከል ባሕሪ ትም ዘበለዋ፡ ከም ጢሮስ መን ነበረት፡ኢሎም ዝቝዝሙልኪ እዮም።³³ኣቓሑ ነግድኺ ኻብ ባሕሪ ምስ ወጸ፡ ንብዙሓት ህዝብታት ኣጽገብክዮም። በቲ ብዙሕ ሃብትኽን ነግድኽን ንነገስታት ምድሪ ኣሃብተምክዮም።³⁴በታ ኣብ ባሕሪ፡ ኣብቲ ዓሚቝ ማያት እተሰበርክላ ግዜ፡ ነግድኽን ኵሉ ህዝብኽን ኣብ ማእከልኪ ወደቐ።³⁵እቶም ኣብ ደሴታት ዝነብሩ ዅሎም ብኣኺ ኽስክሑ፡ ነገስታቶም ከኣ ክርዕዱ እዮም፡ ገጾምውን ክኽፋእ እዩ።³⁶እቶ ነጋዶ ህዝብታት ክፋጽዩልኪ እዮም። መሰክሒ ዀንኪ፡ ንዘለኣለም ኣይክትህልውን ኢኺ።

ትን. ህዝቅኤል ምዕራፍ 28

   ¹ከምዚ ዝብል ቃል እግዚኣብሄር ከኣ መጸኒ፡²ኣታ ወዲ ሰብ፡ ንመስፍን ጢሮስ፡ እግዚኣብሄር ኣምላኽ ከምዚ ይብል ኣሎ፡ ኢልካ ንገሮ፡ ልብኻ ተዓብዩስ፡ ኣነ ኣምላኽ እየ፡ ኣብ ማእከል ባሕሪ ድማ ኣብ ዝፋን ኣምላኽ ተቐሚጠ ኣሎኹ፡ ትብል ኣሎኻ እሞ፡ ምንም እኳ ንልብኻ ኸም ልቢ ኣምላኽ እንተ ገበርካዮ፡ ንስኻ ሰብ ኢኻ እምበር፡ ኣምላኽ ኣይኰንካን።³እንሆ፡ ካብ ዳንኤል ያኢ ንስኻ ትጠብብ፡ ኵሉ ምስጢርውን ኣይሕብኣካን እዩ።⁴ብጥበብካን በእምሮኻን ሃብቲ ኣጥሬኻ፡ ኣብ መዛግብካ ድማ ወርቅን ብሩርን ኣከብካ።⁵በቲ ዓብዪ ጥበብካን ብነግድኻን ሃብትኻ ኣብዛሕካ። ብምኽንያት ሃብትኻ ኸኣ ልብኻ ተዓበየ።⁶ስለዚ እግዚኣብሄር ኣምላኽ ከምዚ ይብል ኣሎ፡ ንልብኻ ኸም ልቢ ኣምላኽ ስለ ዝገበርካ፡⁷እንሆ፡ ስለዚ ኣነ ኻብ ህዝብታት ዝጭክኑ ጓኖት ከተንስኣልካ እየ፡ ንሳቶም ከኣ ኣብቲ ጽባቐ ጥበብካ ሰይፎም ክመልሑ፡ ግርማኻ ድማ ከርክሱ እዮም።⁸ናብ ጕድጓድ ክደፉኡኻ እዮም፡ ንስኻውን ከምቲ እቶም ኣብ ልቢ ባሕሪ ተወጊኦም ዝሞቱላ ሞት ክትመውት ኢኻ።⁹ኣብ ቅድሚ እቲ ቐታሊኻ ደዀን፡ ኣነ ኣምላኽ እየ፡ ክትብል ኢኻ፡ንስኻስ ኣብ ኢድ እቲ ወጋኢኻ ሰብ ኢኻ እምበር፡ኣምላኽ ኣይኰንካን።¹⁰ኣነ ተዛሪበ እየ እሞ፡ ንስኻ ከምቲ ኣማውታ ዘይግዙራት፡ ብኢድ ጓኖት ክትመውት ኢኻ፡ ይብል እግዚኣብሄር ኣምላኽ።
   ¹¹ከምዚ ዝብል ቃል እግዚኣብሄር ድማ መጸኒ፡¹²ኣታ ወዲ ሰብ፡ ንንጉስ ጢሮስ ብድጕዓ ቘዝመሉ፡ እግዚኣብሄር ኣምላኽ ከምዚ ይብል ኣሎ፡ ኢልካውን ንገሮ፡ ንስኻ ጥበብ ዝመልኣካ፡ ፍጹም ዝመልክዕካ ብሉጽ ማሕተም ነበርካ።¹³ንስኻ ኣብ ኤደን ገነት እግዚኣብሄር ነበርካ። በብዝዓይነቱ ክቡር እምኒ፡ ሰርድዮስ፡ ቶጳዝዮን፡ ከልቄድዮን፡ ክሪሶሊት፡ ሰርዶንክስን፡፡ ያስጲስ ሰፊሮስ፡ ክሪሶጵራስ፡ ስመራግዶስን ወርቅን ተኸዲንካ ነበርካ። እቲ ከበሮኻን ዕንዱርካን ምሳኻ ነበረ፡ በታ እተፈጠርካላ መዓልቲ ተዳለወ።¹⁴ንስኻ ዘጽልል ቅቡእ ኪሩብ ነበርካ፡ ኣነ ኣብቲ ቅዱስ ከረን ኣምላኽ ኣስፈርኩኻ፡ ኣብ ማእከል እቲ ኣእማን ሓዊ ተመላለስካ።¹⁵ካብቲ እተፈጠርካላ መዓልቲ ጀሚርካ ኽሳዕ እቲ ኣበሳ እተረኸበካ ግዜ ብመገድካ ፍጹም ነበርካ።¹⁶ብብዝሒ ነግድኻ ውሽጥኻ ብዓመጻ መልአ እሞ ሓጢኣት ገበርካ። ስለዚ፡ ኣታ እተጽልል ኪሩብ፡ ካብቲ ኸረን ኣምላኽ ከም ርኹስ ደርቤኹኻ፡ ካብ ማእከል እቲ ኣእማን ሓዊ ኸኣ ኣጥፋእኩኻ።¹⁷ብምኽንያት መልክዕካ ልብኻ ተዓበየ፡ ብኽብረትካ ድማ ጥበብካ ኣባላሾኻ። ኣብ ምድሪ ጻሕ ኣበልኩኻ፡ክርእዩኻስ ኣብ ቅድሚ ነገስታት ወፌኹኻ።¹⁸ብብዝሒ ኣበሳኻን ብዘይ ቅንዕና ዝነገድካዮ ነግድኻን ንመቓድስካ ኣርከስካዮ። ስለዚ ካብ ውሽጥኻ ሓዊ ኣውጻእኩ፡ ንሳውን በልዓትካ። ኣብ ቅድሚ ዅላቶም ዝርእዩኻ ድማ ኣብ ምድሪ ሓመዅስቲ ገበርኩኻ።¹⁹እቶም ዝፈልጡኻ ዘበሉ ዅሎም ህዝብታት ብኣኻ ኽስክሑ እዮም። መሰክሒ ዀንካ፡ ድሕርዚ ኸኣ ከቶ ኣይክትህሉን ኢኻ።
   ²⁰ከምዚ ዝብል ቃል እግዚኣብሄር ድማ መጻኒ፡²¹ኣታ ወዲ ሰብ፡ ገጽካ ናብ ሲዶን ኣቢልካ ምለስ እሞ ተነበየላ።²²እግዚኣብሄር ኣምላኽ ከምዚ ይብል ኣሎ፡ ኢልካ ንገራ፡ ኣቲ ሲዶን፡ እኔኹ ኣብ ርእስኺ ኣሎኹ። ኣብ ማእከልኪ ኸኣ ክኸብር እየ።ፍርደይ ኣብኣ ምስ ፈጸምኩ ኣብኣውን ምስ ተቐደስኩ፡ ኣነ እግዚኣብሄር ምዃነይ ክፈልጡ እዮም።²³ፌራን ደም ኣብ ኣደባባያን ክሰደላ እየ፡ በቲ ኣብ ከባቢኣ ዘሎ ሰይፊ ኸኣ እቶም ውጉኣት ኣብ ማእከላ ጻሕ ክብሉ እዮም እሞ፡ ኣነ እግዚኣብሄር ምዃነይ ክፈልጡ እዮም።²⁴ድሕርዚ ንቤት እስራኤል ኣብ ኵሎም እቶም ዘቃልልዎም ጐደቦታቶም፡ዝወግእ እሾዅ ወይስ ዘሕምም ተዀርባ ኣይክህሉን እዩ፡ ኣነ እግዚኣብሄር ኣምላኽ ምኳነይ ከኣ ክፈልጡ እዮም።
   ²⁵እግዚኣብሄር ኣምላኽ ከምዚ ይብል ኣሎ፡ ንቤት እስራኤል ካብቶም ኣብ ማእከሎም ፋሕ ኢሎምዎም ዝነበሩ ህዝብታት ምስ ኣከብክዎም፡ ሽዑ ኣብ ቅድሚ ዓይኒ ህዝብታት ኣባታቶም ክቕደስ፡ ንሳቶም ድማ ኣብታ ንያቆብ ባርያይ ዝሃብክዋ ሃገር ክነብሩ እዮም።²⁶ኣብኣ ብህድኣት ክነብሩ፡ ኣባይቲ ኸኣ ክሰርሑ፡ ኣታኽልቲ ወይኒ ድማ ክተኽሉ እዮም። ኣነ ኣብቶም ኣብ ዙርያኦም ኰይኖም ዘቃልልዎም ዘለዉ ፍርዲ ምስ ፈጸምኩ፡ ሽዑ ብህድኣት ክነብሩ፡ ኣነ እግዚኣብሄር ኣምላኽ ምዃነይውን ክፈልጡ እዮም።

ትን. ህዝቅኤል ምዕራፍ 29

   ¹ኣብ ዓስረይቲ ዓመት፡ ኣብታ ዓስረይቲ ወርሒ፡ ካብታ ወርሒውን ኣብ መበል ዓሰርተው ክልተ መዓልቲ ኸምዚ ዝብል ቃል እግዚኣብሄር መጻኒ፡²ኣታ ወዲ ሰብ፡ ገጽካ ናብ ፈርኦን ንጉስ ግብጺ ኣቢልካ ምለስ። ኣብ ልዕሊኡን ኣብ ልዕሊ ዅላ ግብጽን ከኣ ተነበ፡³ተዛረብ፡ እግዚኣብሄር ኣምላኽ ከምዚ ይብል ኣሎ፡ ኢልካ ንገር፡ ኣታ ፈርኦን ንጉስ ግብጺ፡ ኣብ ማእከል ርባታትካ እትድቅስ ገዚፍ ገበል፡ ንስኻ፡ እቲ ርባይ ናተይ እዩ፡ ኣነ እየ ንርእሰይ ዝገበርክዎ፡ እትብል ዘሎኻ፡ እኔኹ ተለዓልኩኻ።⁴ኣብ ምንጋጋኻ ዓንቃሪቦ ኽገብር፡ ንዓሳታት ርባታትካ ድማ ኣብ ቅራፍካ ኸጥብቖም እየ፡ ምስ ኵሉ እቲ ኣብ ቅራፍካ ጠቡቑ ዘሎ ዓሳ ኸኣ ካብ ማእከል ርባታትካ ኸውጽኣካ እየ።⁵ንኣኻን ንዅሉ ዓሳ ርባታትካን ኣብ በረኽ ኽድርብየካ፡ ኣብ መሮር ክትወድቕ፡ ኣይክትእረን ኣይክትእከብን ኢኻ፡ ኣነ ንኣራዊት ምድርን ነዕዋፍ ሰማይን ምግቢ ገይረ ወፌኹኻ።⁶እቶም ኣብ ግብጺ ዝነብሩ ዅሎም ንቤት እስራኤልሲ ምርኵስ ሻምብቆ ዀይኖምዎም እዮ እሞ፡ ኣነ እግዚኣብሄር ምዃነይ ክፈልጡ እዮም።⁷ብኢዶም እንተ ሓዙኻ፡ ተሰበርካ፡ ንኵሉ መንኵቦም ከኣ ወጋእካ፡ እንተ ተጸጎዑኻ ተሰባበርካ ብጐድኖም ድማ ሰንከል ኣበልካዮም።⁸ስለዚ እግዚኣብሄር ኣምላኽ ከምዚ ይብል ኣሎ፡ እንሆ፡ ኣነ ሰይፊ ኣብ ልዕሌኻ ኸምጽኣልካ፡ ሰብን እንስሳን ድማ ካባኻ ኸጽንቶም እየ።⁹እቲ ርባ ናተይ እዩ፡ ኣነ ኸኣ እየ ዝገበርክዎ፡ ኢሉ እዩ እሞ፡ ሃገር ግብጺ በረኻን ምድረ በዳን ክትከውን እያ፡ ኣነ እግዚኣብሄር ምዃነይ ድማ ክፈልጡ እዮም።¹⁰ስለዚ እኔኹ፡ ኣባኻን ኣብ ርባታትካን ክለዓለካ፡ ንሃገር ግብጺ ኻብ ሚግዶል ክሳዕ ሴኔ ኽሳዕ ዶብ ኢትዮጵያ ኸኣ ምድረ በዳን በረኻን ክገብራ እየ።¹¹እግሪ ሰብ ብእእ ኣይክሓልፍን፡ እግሪ እንስሳ ብኣእ ኣይክሓልፍን እዩ፡ ነርብዓ ዓመትውን ዝነብራ የብላን።¹²ንሃገር ግብጺ ኣብ ማእከል እተን ዝባደማ ሃገራት በረኻ ኽገብራ እየ። ከተማታት ነርብዓ ዓመት በረኻ ክዀና እየን። ንግብጻውያን ከኣ ኣብ ማእከል ህዝብታት ፋሕ ከብሎም፡ ኣብ ኵሉ ሃገራትውን ክዘርዎም እየ።
   ¹³ስለዚ እግዚኣብሄር ኣምላኽ ከምዚ ይብል ኣሎ፡ ድሕሪ ኣርብዓ ዓመት ነቶም ግብጻውያን ካብ ማእከል እቶም ተዘርዮምዎም ዘለዉ ህዝብታት ክኣኻኽቦም እየ።¹⁴ንምርኮ ግብጺ ኽመልሶም፡ ናብታ እተወልዱላ፡ ናብ ሃገር ጳጥሮስ ክመልሶም እየ። ኣብኣውን ለጠቕ ዝበለት መንግስቲ ክዀኑ እዮም።¹⁵ካብ ካልኦት መንግስትታት ለጠቕ ክትብል፡ መሊሳ ኸኣ ኣብ ልዕሊ ህዝብታት ኣይክትዕበን እያ። መሊሶም ኣብ ህዝብታት ከይገዝኡስ፡ ከውሕዶም እየ።¹⁶ድሕርዚ ቤት እስራኤል ብኣታቶም ይክኣምኑን እዮም፡ ናባታቶም ቍሊሕ እንተ በሉ ግና፡ ኣሰባኦም ከዘክርዎም እዮም፡ ኣነ እግዚኣብሄር ኣምላኽ ምዃነይ ከኣ ክፈልጡ እዮም።
   ¹⁷ኣብ መበል ዕስራን ሾብዓተን ዓመት፡ ኣብታ ቐዳመይቲ ወርሒ፡ ካብታ ወርሒውን ኣብታ ቐዳመይቲ መዓልቲ ኸምዚ ዝብል ቃል እግዚኣብሄር መጸኒ፡¹⁸ኣታ ወዲ ሰብ፡ ነቡካድነጾር ንጉስ ባቢሎን፡ ንጢሮስ ክሕዝ ኢሉ፡ ንጭፍራኡ ብርቱዕ ጻዕሪ ኣጽዓሮም፡ ግናኸ በቲ ንጢሮስ ክሕዝ ኢሉ ዝጸዓሮ ጻዕሪ ንሱ ወይስ ጭፍራኡ ገለ ደመወዝ እኳ ኣይረኸቡን።¹⁹ስለዚ እግዚኣብሄር ኣምላኽ ከምዚ ይብል ኣሎ፡ እንሆ፡ ንነቡካደነጾር ንጉስ ባቢሎን ሃገር ግብጺ ኽህቦ እየ። ንሱ ሃብታ ኽወስድ፡ዝዝረፍ ክዝርፍ፡ዝዝመት ከኣ ክዘምት እዩ፡ እዚ ድማ ንጭፍራኡ ደመወዝ ክኸውን እዩ።²⁰ንኣይ እዮም ዝገበርዎ እሞ፡ ጻማ ጻዕሩ ሃገር ግብጺ ሃብክዎ፡ ይብል እግዚኣብሄር ኣምላኽ።
   ²¹በታ መዓልቲ እቲኣ ንቤት እስራኤል ቀርኒ ኸብቍል፡ ንኣኻ ድማ ኣብ ማእከሎም እተኸፍተ ኣፍ ክህበካ እየ፡ ኣነ እግዚኣብሄር ምዃነይ ከኣ ክፈልጡ እዮም።

ትን. ህዝቅኤል ምዕራፍ 30

   ¹ከምዚ ዝብል ቃል እግዚኣብሄር ከኣ መጸኒ፡^2-3ኣታ ወዲ ሰብ፡ እግዚኣብሄር ኣምላኽ ከምዚ ይብል ኣሎ፡ ኢልካ ተነበ በልውን፡ መዓልቲ ቐሪባ፡ እወ፡ መዓልቲ እግዚኣብሄር ቀሪባ ኣላ፡ መዓልቲ ደበና፡ግዜ ኣህዛብ ክኸውን እዩ እሞ፡ ኣየ፡ ተካሊት መዓልቲ፡ ኢልኩም ዋይዋይ በሉ።⁴ሰይፊ ኣብ ግብጺ ኽመጽእ እዩ፡ እቶም ውጉኣት ኣብ ግብጺ ምስ ወደቑ፡ ሃብታ ምስ ተወስደ፡ መሰረታውን ምስ ፈረሰ፡ ኣብ ኢትዮጵያ ብርቱዕ ፍርሃት ክኸውን እዩ።⁵ኢትዮጵያን ፉጥን ሉድን ኵሎም ሕውስዋስ ህዝብን፡ ኩብን ደቂ እታ ኪዳን ዝኣተወት ሃገርን ምሳታቶም ብሰይፊ ኽወድቁ እዮም።
   ⁶እግዚኣብሄር ኣምላኽ ከምዚ ይብል ኣሎ፡ እቶም ንግብጺ ዝድግፉ ኽወድቁ እዮም፡ እቲ ዕቡይ ሓይላ ኸኣ ክዋረድ እዩ። ካብ ሚግዶል ጀሚሩ ኽሳዕ ሴኔ ኣብኣ ብሰይፊ ኽወድቁ እዮም፡ ይብል እግዚኣብሄር ኣምላኽ፡⁷ኣብ ማእከል እተን ዝባደማ ሃገራት ከኣ ክባድሙ እዮም፡ ኸተማታቶም ድማ ኣብ ማእከል እተን ዝፈረሳ ከተማታት ክዀና እየን።⁸ኣብ ግብጺ ሓዊ ምስ ኣጐድኩ፡ ደገፍታ ዘበሉ ዅሎም ከኣ ምስ ተሰባበሩ፡ ኣነ እግዚኣብሄር ኣምላኽ ምዃነይ ክፈልጡ እዮም።⁹በታ መዓልቲ እቲኣ፡ ነታ ደሓን ኣሎኹ እትብል ኢትዮጵያን ኸሰምብድዋስ፡ ልኡኻት ብመርከብ ካብ ቅድሚ ገጸይ ክወጹ እዮም። እንሆ፡ ይመጽእ ኣሎ እሞ፡ ከምቲ ንመዓልቲ ግብጺ ዝዀነ ፍርሃት ክዀኖም እዩ።
   ¹⁰እግዚኣብሄር ኣምላኽ ከምዚ ይብል ኣሎ፡ ብኢድ ነቡካድነጾር ንጉስ ባቢሎን ነቲ ብዙሕ ህዝቢ ግብጺ ኸጥፍኦ እየ።¹¹ንሱን ህዝቡ ኸኣ ምስኡን፡ ካብቶም ህዝብታት ኣዝዮም ዝጭክኑ፡ ነታ ሃገር ከጥፍእዋ ኽወጹ እዮም። ሰይፎም ንግብጺ ኽመልሑላ፡ ነታ ሃገርውን ብቕቱላት ክመልእዋ እዮም።¹²ነቲ ርባታት ከንጽፎ፡ ነታ ሃገር ድማ ናብ ኢድ ሕሱማት ሰብ ክሸጣ እየ። ነታ ሃገርን ኣብኣ ዘሎ ዅሉን ብኢድ ጓኖት ገይረ ኸባድማ እየ። ኣነ እግዚኣብሄር እየ እተዛረብኩ።
   ¹³እግዚኣብሄር ኣምላኽ ከምዚ ይብል ኣሎ፡ ንጣኦታት ከጥፍኦም፡ ንጣኦታት ከንቱ ኻብ ኖፍ ክጥርሶም እየ። ድሕርዚ ኻብ ሃገር ግብጺ መስፍን ኣይክኸውንን እዩ፡ ናብ ሃገር ግብጺ ኸኣ ፍርሃት ከምጽእ እየ።¹⁴ንጳጥሮስ ከባድማ፡ ኣብ ጾዓን ሓዊ ኽኣጉድ፡ ኣብ ኖ ኸኣ ፍርዲ ኽገብር እየ።¹⁵ነድረይ ከኣ ናብ ሲና፡ እታ ዕርዲ ግብጺ፡ ክኽዑ፡ ንህዝቢ ኖ ድማ ከጽንቶ እየ።¹⁶ኣብ ግብጺ ሓዊ ኽኣጕድ እየ፡ ሲን ክትጭነቕ እያ፡ ኖ ኽትጠፍእ እያ፡ ንኖፍ ከኣ ጸላእቲ ብመዓልቲ ኽሕዝዋ እዮም።¹⁷ኣጕባዝ ኣቤንን ፊቤሴትን ብሰይፊ ኽወድቁ እዮም፡ ንሳተን ከኣ ክማረኻ እየን።¹⁸ኣርዑት ግብጺ ኣብኣ ምስ ሰበርኩ፡ ሓበን ሓይላውን ምስ ተጠረሰ፡ ኣብ ታህፋኔስ መዓልቲ ኽትጽልምት እያ። ደበና ኸጐልብባ እዩ፡ ኣዋልዳ ድማ ክማረኻ እየን።¹⁹ከምዚ ገይረ ኣብ ግብጺ ፍርዲ ኸፈርድ እየ፡ ንሳቶምውን እግዚኣብሄር ምዃነይ ክፈልጡ እዮም።
  ²⁰ኣብ መበል ዓሰርተው ሓደ ዓመት፡ ኣብታ ቐዳማይቲ ወርሒ፡ ካብታ ወርሒውን ኣብ ሳብዓይቲ መዓልቲ ኸምዚ ዝብል ቃል እግዚኣብሄር መጸኒ፡²¹ኣታ ወዲ ሰብ፡ ንቕልጽም ፈርኦን ንጉስ ግብጺ ሰበርክዋ፡ እንሆ ድማ፡ ሰይፊ ንምሓዝ ምእንቲ ኽትድልድል፡ዝሰፋ፡ ፈውሲ ገይረ ኸኣ ብዓለባ ዝዝንና የልቦን።²²ስለዚ እግዚኣብሄር ኣምላኽ ከምዚ ይብል ኣሎ፡ ንፈርኦን ንጉስ ግብጺ ኣብ ርእሱ ኣሎኹ፡ ነተን ቀላጽሙ፡ ነታ ብርትዕትን ነታ ስብርትን፡ ክሰብረን፡ ነቲ ሰይፊ ኸኣ ካብ ኢዱ ኸውድቖ እየ።²³ነቶም ግብጻውያን ኣብ ማእከል ህዝብታት ክዘርዎም፡ ኣብ ኵለን ሃገራት ከኣ ፋሕ ከብሎም እየ።²⁴ንቐላጽም ንጉስ ባቢሎን ከበርትዐን፡ ሰይፈይ ድማ ኣብ ኢዱ ኸትሕዞ እየ፡ ንቐላጽም ፈርኦን ግና ክሰብረን እየ፡ ንሱ ድማ ከምቲ ንሞት እተወግአ ሰብኣይ ዝቝንዞ፡ ኣብ ቅድሚኡ ክቝንዞ እዩ።²⁵ንቐላጽም ንጉስ ባቢሎን ከበርትዐን እየ፡ ቀላጽም ፈርኦን ግና ዘርጋሕ ኢለን ክወድቃ እየን። ንሰይፈይ ኣብ ኢድ ንጉስ ባቢሎን ምስ ኣትሓዝክዎ፡ ንሱውን ኣብ ሃገር ግብጺ ማሕማሕ ምስ ኣበሎ፡ ኣነ እግዚኣብሄር ምዃነይ ክፈልጡ እዮም።²⁶ነቶም ግብጻውያን ኣብ ማእከል ህዝብታት ክዘርዎም፡ ኣብ ኵለን ሃገራት ከኣ ፋሕ ከብሎም እየ፡ ኣነ እግዚኣብሄር ምዃነይ ከኣ ክፈልጡ እዮም።

ትን. ህዝቅኤል ምዕራፍ 31

   ¹ኣብ መበል ዓሰርተው ሓደ ዓመት፡ ኣብታ ሳልሰይቲ ወርሒ፡ ካብታ ወርሒውን ኣብታ ቐዳመይቲ መዓልቲ ኸምዚ ዝብል ቃል እግዚኣብሄር መጸኒ፡²ኣታ ወዲ ሰብ፡ንፈርኦን ንጉስ ግብጽን ነቲ ብዙሕ፡ ብዕቤትካ ንመን ትመስል፡በሎ፡³እንሆ፡ ኣሶር ጨናፍሩ ዝጽቡቕ፡ ጽላሉ ዝዕሙር፡ ቍመቱ ዝነዊሕ ኦም ሊባኖስ ነበረ። ጫፉ ኸኣ ኣብ ማእከል ዕሙር ጨናፍር ነበረ።⁴ማያት መገቦ፡ መዓሙቝ ኣዕበዮ፡ ውሒዝ ኣብ ዙርያ እቲ ተተኺልዎ ዘሎ ቦታ ወሓዘ፡ መሳኑኡ ድማ ናብ ኵሉ ኣእዋም መሮር ሰደደ።⁵ስለዚ ቝመቱ ካብ ኵለን ኣእዋም መሮር ተመልመለ፡ ሳላ እቲ ዘዐምሮ ዝነበረ ብዙሕ ማያት፡ ጨናፍሩ በዝሐ፡ ዘፋፍሩ ነውሐ።⁶ኣብቲ ጨናፍሩ ዅለን ኣዕዋፍ ሰማይ ኣባይተን ሰርሓሉ፡ ኣብ ትሕቲ ዘፋፍሩ ድማ ኵሎም እንስሳ መሮር ተዋለዱሉ፡ ኣብ ጽላሉ ኸኣ ኵሎም ዓበይቲ ህዝብታት ይቕመጡሉ ነበሩ።⁷ሱሩ ኣብ ብዙሕ ማያት ነበረ እሞ፡ ብዕቤቱን ብምናሕ ጨናፍሩን ጽቡቕ ነበረ።⁸ኣብ ገነት ኣምላኽ ዘሎ ኣእዋም ሊባኖስ ክኸውሎ ኣይከኣለን፡ ጽሕድታት ነቲ ጨናፍሩ ኣይተኻኸሎን፡ ጸሊሞ እኳ ኸም ጨናፍሩ ኣይነበረን፡ ኣብ ገነት ኣምላኽ ካብ ዘሎ ኦምሲ ሓንቲ እኳ ብጽባቐ ኣይተመዓራረዮን።⁹ኣነ ብብዝሒ ጨናፍሩ ጽቡቕ ገበርክዎ፡ ኣብ ገነት ኣምላኽ ዘለዋ ኣእዋም ኤድን ከኣ ኵላተን ቀንኣሉ።
   ¹⁰ስለዚ እግዚኣብሄር ኣምላኽ ከምዚ ይብል ኣሎ፡ ብቝመት ክብ ስለ ዝበልካ፡ ጫፉ ኣብ ማእከል ዕሙር ጨናፍር ስለ ዝገበረ፡ ብምኽንያት ቍመቱ ልቡ ስለ እተዓበየ፡¹¹ኣነ ኣብ ኢድ እቲ ሓያል ናይ ህዝብታት፡ ከም ድሌቱ ኽገብሮስ፡ መጦኽዎ። ብሰሪ ረሲእነቱ ደርቤኽዎ።¹²እቶም ጓኖት፡ ናይ ህዝብታት ጨካናት፡ ቈረጽዎን ደርበይዎን። ጨናፍሩ ኣብ ኣኽራንን ኣብ ኵሉ ርባርባን ወደቐ፡ ጨንገፉ ኣብ ኵሉ ኣጻድፍ እታ ሃገር ተደርቀመ። ኵሎም ህዝብታት ምድሪ ኸኣ ካብ ጽላሉ ተዛሕጡ፡ሓደግዎውን።¹³ኣብ ልዕሊ እቲ ውዱቕ ጕንዲ ዅለን ኣዕዋፍ ሰማይ ተቐመጣ፡ ኵሎም እንስሳ መሮር ድማ ኣብ ጨንገፉ ሰፈሩ።¹⁴እተን ኣብ ማይ እተተኽላ ዘበላ ኣእዋም ብቝመተን ከይዕበያን፡ ጫፈን ኣብ ማእከል ዕሙር ጨናፍር ዝወርዱ ዘለዉ ውሉድ ሰብ ንመዓሙቝ ምድሪ፡ ንሞት ተወፍዮም እዮም እሞ፡ እተን ማያት ዝሰትያ ዘበላ ዅለን ሓያላት ብትዕቢት ከይቈማስ፡ እዚ ዀነ።
   ¹⁵እግዚኣብሄር ኣምላኽ ከምዚ ይብል ኣሎ፡ በታ ንሱ ናብ ሲኦል ዝወረደላ መዓልቲ ሰብ ከም ዝቝዝሙ ገበርኩ። ብሰሩ ንመዓሙቝ ኣጐልበብኩ፡ ንወሓይዙ ኸልከልኩ፡ ዓበይቲ ማያት ተዓግተ፡ ብሰሩ ንሊባኖስ ኣጸለምክዎ፡ ብሰሩ ዅለን ኣእዋም መሮር ሓዘን ኰና።¹⁶ምስቶም ናብ ጕድጓድ ዝወርዱ ናብ ሲኦል ምስ ኣውረድክዎም፡ ካብ ደሃይ ምውዳቑ እተላዕለ ንህዝብታት ራዕራዕ ኣበልክዎም። ኵላተን እተን ናይ ሊባኖስ ሐሕሩያትን ጸጽቡቓትን ኣእዋም ኤድን፡ ማይ ዝሰትያ ዝነበራ ዘበላ ኵለን፡ ኣብቲ መዓሙቝ ምድሪ ተጸናንዓ።¹⁷ንሳቶም ድማ፡ ናብቶም ቅልጽሙ ዀይኖም ኣብ ማእከል ህዝብታት ኣብ ጽላሉ ተቐሚጦም ዝነበሩ ብሰይፊ እተቐትሉ፡ ምስኡ ናብ ሲኦል ወረዱ።
   ¹⁸እምበኣረይ፡ ብኽብረትን ዕቤትን ኣብ ማእከል ኣእዋም ኤድንሲ ንመን ኢኻ እትመስል፡ከምኡ ኸኣ ንስካ ምስተን ኣእዋም ኤድን ናብ መዓሙቝ ምድሪ ኽትድርበ ኢኻ፡ ኣብ ማእከል እቶም ዘይተገዝሩ ኣብ ማእከል እቶም ሰይፊ ዝቐተሎምውን ክትድቅስ ኢኻ። እዚ ፈርኦን ንኵሎም ህዝቡን እዩ፡ ይብል እግዚኣብሄር ኣምላኽ።

ትን. ህዝቅኤል ምዕራፍ 32

   ¹ኰነ ድማ፡ ኣብ መበል ዓሰርተው ክልተ ዓመት፡ ኣብታ መበል ዓሰርተው ክልተ ወርሒ፡ ካብታ ወርሒውን ኣብታ ቐዳመይቲ መዓልቲ ኸምዚ ዝብል ቃል እግዚኣብሄር መጸኒ፡²ኣታ ወዲ ሰብ፡ ንፈርኦን ንጉስ ግብጺ ድጕዓ መልቀስ ደጕዓሉ፡ በሎውን፡ ንስኻ ኣብ ማእከል ህዝብታት ከም ሽደን ኣንበሳ፡ ኣብ ባሕርታት ከኣ ከም ገበል ትመስል ነበርካ፡ ኣብ ርባታትካ ጨንደላሕ በልካ፡ በእጋርካ ማያት ኣናወጽካ፡ ነቲ መሳኑ ድማ ዘርግካዮ።³እግዚኣብሄር ኣምላኽ ከምዚ ይብል ኣሎ፡ ብእኩባት ብዙሓት ህዝብታት ገይረ ኣነ መርበበይ ክዝርግሓልካ እየ፡ ንሳቶም ከኣ ብመርበበይ ክስሕቡኻ እዮም።⁴ኣብ ልዕሊ ምድሪ ጻሕ ከብለካ፡ ኣብ መሮር ክድርብየካ፡ ኵለን ኣዕዋፍ ሰማይ ከዕስለልካ እየ። ኣራዊት ኵላ ምድሪ ድማ ብኣኻ ኸጽግቦም እየ።⁵ንስጋኻ ኣብ ልዕሊ ኣኽራን ከንብሮ፡ ንሽንጭሮታት ከኣ በቲ ኣሰከሬንካ ኽመልኦ እየ።⁶ነታ እትምሕሰላ ዘሎኻ ምድሪ ኽሳዕ ኣኽራን ብደምካ ኸስትያ እየ፡ እቲ ርባታት ከኣ ብኣኻ ክመልእ እዩ።⁷ከጥፍኣካ ኸሎኹ፡ ንሰማያት ከጐልብቦ፡ ንኸዋኽብቱ ኸኣ ከጸልምቶም፡ ንጸሓይ ብደበና ክኽውላ እየ፡ ወርሒውን ብርሃና ኣይክትህብን እያ።⁸ንዅሉ ብርሃናት ሰማይ ብሰርኻ ኸጸልምቶ፡ ኣብ ሃገርካውን ጸልማት ክዝርግሕ እየ፡ ይብል እግዚኣብሄር ኣምላኽ።⁹ወረ ጥፍኣትካ ናብ ህዝብታት፡ ናብ ዘይትፈልጦ ሃገራት ምስ ኣብጻሕኩ፡ ልቢ ብዙሓት ኣህዛብ ከሕዝን እየ።¹⁰ንሰይፈይ ኣብ ቅድሚኦም ማሕማሕ ከብሎ ኸሎኹ፡ ንብዙሕት ህዝብታት ብኣኻ ኽሰክሖም እየ፡ ነገስታቶም ድማ ኣዝዮም ክርዕዱ እዮም። ብመዓልቲ ውድቀትካ ኸኣ ነፍሲ ወከፍ ኵሉ ግዜ ስለ ህይወቱ ራዕራዕ ክብል እዩ።¹¹ስለዚ እግዚኣብሄር ኣምላኽ ከምዚ ይብል ኣሎ፡ ሰይፊ ንጉስ ባቢሎን ክለዓለካ እዩ።¹²ነቲ ብዙሕ ህዝብኻ ብሰይፊ እቶም ሓያላት ከውድቖ እየ። ንሳቶም ኵላቶም ካብ ህዝብታት ዝጭክኑ እዮም። ንሓበን ህዝቡ ኸኣ ክጠፍእ እዩ።¹³ነቶም ኣብ ጥቓ ብዙሕ ማያት ዝነበሩ ዅሎም እንስሳኡ ኸጥፍእ እየ። ድሕርዚ እግሪ ሰብ ኣይክዘርጎን ሸዀና እንስሳውን ኣይክዘርጎን እዩ።¹⁴ሽዑ ንማያቶም ከጽርዮ እየ፡ ንርባታቶም ድማ ከም ዘይቲ ኸውሕዞ እየ፡ ይብል እግዚኣብሄር ኣምላኽ።¹⁵ነታ ሃገር ግብጺ በረኻ ምስ ገበርክዋ፡ እቲ ነታ ሃገር መሊእዋ ዝነበረ ምስ ወቓዕክዎም፡ሽዑ ኣነ እግዚኣብሄር ምዃነይ ክፈልጡ እዮም።¹⁶እቲ ዝድጓዕ ድጕዓ መልቀስ እዚ እዩ። ኣዋልድ ህዝብታት ከልቅሳኦ፡ ብዛዕባ ግብጽን እቲ ብዙሕ ህዝባን ከልቅሳላ እየን፡ ይብል እግዚኣብሄር ኣምላኽ።
   ¹⁷ኰነ ኸኣ፡ ኣብ መበል ዓሰርተው ክልተ ዓምት፡ ካብታ ወርሒ ኸኣ ኣብታ መበል ዓሰርተው ሓሙሽተ መዓልቲ ኸምዚ ዝብል ቃል እግዚኣብሄር መጸኒ፡¹⁸ኣታ ወዲ ሰብ፡ ነቲ ብዙሕ ህዝቢ ግብጺ ኣልቅሰሉ፡ ንእኣን ነተን ኣዋልድ ክቡራት ህዝብታትን ምስቶም ናብ ጕድጓድ ዝወርዱ ናብ መዓሙቝ ምድሪ ኣውርደን።¹⁹ብጽባቐስ ካብ መን ትበልጺ፡ውረዲ፡ምስቶ ምዘይግዙራት ከኣ ደቅሲ።²⁰ኣብ ማእከል እቶም ብሰይፊ እተቐትሉ ኽወድቁ እዮም። እቲ ሰይፊ ተዋሂቡ ኣሎ። ምስቲ ብዙሕ ህዝባ ጓትትዋ።²¹ካብቶም ጀጋኑስ እቶም ኣውራታት ሓያላት ካብ ውሽጢ ሲኦል ንእኡን ንደገፍቱን ከምዚ ኢሎም ክዛረብዎ እዮም፡ እቶም ዘይግዙራት ብሰይፊ እተቐትሉ ወሪዶም፡ ኣብኡ በጥ ኢሎም ኣለዉ።
  ²²ኣብኡ ኣሶርን ኵሉ ህዝባን ኣለዉ፡ ኣብ ዙርያኡ መቓብሩ ኣሎ። ኵላቶም ተቐትሉ፡ ብሰይፊ ወደቑ።²³መቓብሮም ኣብ መዓሙቝ ጕድጓድ፡ ህዝባ ኸኣ ኣብ ዙርያ መቓብራ ኣሎ። እቶም ኣብ ሃገር ህያዋን ዘስክሑ ዝነበሩ ኵላቶም ተቐቲሎም ብሰይፊ ወዲቖም እዮም።
   ²⁴ኣብኡ ዐላምን ኵሉ ህዝባን ኣብቲ ዙርያ መቓብራ ኣለዉ። ኵላቶም ተቐትሉ፡ ብሰይፊ ወደቑ፡ ንሳቶም ኣብ ምድሪ ህያዋን ዘሰክሑ ዝነበሩ ዘይግዙራት ናብ መዓሙቝ ምድሪ ወረዱ፡ ምስቶም ናብ ጕድጓድ ዝወረዱ ኸኣ ነውሮም ተሰከሙ።²⁵ንእኣን ንዅሉ ህዝባን ኣብ ማእከል እቶም ቅቱላት ኣንጸፍሎም። መቓብራ ኣብ ዙርያኣ እዩ። ኣብ ምድሪ ህያዋን ዘሰክሑ ነበሩ እሞ፡ ኵላቶም ዘይግዙራት ብሰይፊ እተቐትሉ እዮም፡ ነውሮም ድማ ምስትም ናብ ጕድጓድ ዝወርዱ ተሰከሙ። ኣብ ማእከል ቅቱላት ተነብረ።
   ²⁶ኣብኡ መሴክን ቱባልን ምስ ኵሉ ህዝቦም ኣለዉ። ኣብ ዙርያኣ መቓብር ኣሎ። ኣብ ምድሪ ህያዋን መሰክሒ ስለ ዝነበሩ፡ ኵላቶም ዘይግዙራት ብሰይፊ እተቐትሉ እዮም።²⁷ንሳቶም ከኣ ምስቶም ካብቶም ዘይግዙራት ዝወደቑ ምስ ኣጽዋር ውግኦም ናብ ሲኦል ዝወረዱ፡ ኣብ ትሕቲ ኣርእስቶም ድማ ኣስያፎም ዘንበሩሎም ጀጋኑ፡ ምሳታቶም ኣይድቅሱን እዮም። ኣብ ምድሪ ህያዋን መሰክሕ ጀጋኑ ስለ ዝነበሩ፡ ኣበሳኦም ኣብ ልዕሊ ኣዕጽምቶም እዩ።²⁸ንስኻ ኸኣ ኣብ ማእከል እቶም ዘይግዙራት ክትሰባበር፡ ምስቶም ብሰይፊ እተቐትሉ ድማ ክትድቅስ ኢኻ።
   ²⁹ኣብኡ ኤዶምን ነገስታታን ኵሎም መሳፍንታን ኣለዉ። እዚኣቶም ሓይሎም ምስቶም ብሰይፊ እተቐትሉ ተነብሩ። ምስቶም ናብ ጕድጓድ ዝወረዱን ዘይግዙራትን ደቂሶም ኣለዉ።
   ³⁰ኣብኡ እቶም ምስቶም ቅቱላት ዝወረዱ ኵላቶም መሳፍንቲ ሰሜንን ኵላቶም ሲዶናውያንን ኣለዉ። ብሓይሎም ዘስክሑ ኽነሶም ነዊሮም፡ ዘይግዙራት ኰይኖም ምስቶም ብሰይፊ እተቐትሉ ይድቅሱ ኣለዉ፡ ምስቶም ናብ ጕድጓድ ዝወረዱ ኸኣ ነውሮም ይጾሩ ኣለዉ።
   ³¹ፈርኦን ክርእዮም፡ ስለ ዅሉ ህዝቡ ኸኣ ክጸናናዕ እዩ። ፈርኦንን ኵሉ ሰራዊቱን ብሰይፊ ተቐቲሎም እዮ፡ ይብል እግዚኣብሄር ኣምላኽ፡³²ኣነ ኣብ ምድሪ ህያዋን መሰክሒ ዝኸውን ከምጽእ እየ እሞ፡ ንፈርኦንን ንዅሉ ህዝቡን ኣብ ማእከል እቶም ዘይግዙራት፡ ምስቶም ብሰይፊ እተቐትሉ በጥ ከብልዎም እዮም፡ ይብል እግዚኣብሄር ኣምላኽ።

ትን. ህዝቅኤል ምዕራፍ 33

   ¹ከምዚ ዝብል ቃል እግዚኣብሄር ድማ መጸኒ፡²ኣታ ወዲ ሰብ፡ ንደቂ ህዝብካ ተዛረቦም በሎምውን፡ ኣነ ሰይፊ ናብ ሃገር እንተ ኣምጻእኩ፡ ህዝቢ እታ ሃገር ከኣ ካባታቶም ሓደ ሰብኣይ ሓላዊ ክዀኖም እንተ ኣመዘዝዎ፡³ንሱ ኸኣ ሰይፊ ናብታ ሃገር ክመጽእ እንተ ረኣየ እሞ፡ መለኸት እንተ ነፍሐ፡ ነቶም ህዝቢ ኸኣ እንተ ኣጠንቀቖም፡⁴ሓደ ነቲ ደሃይ መለኸት ሰሚዑ እንተ ዘይተጠንቀቐ፡ ሰይፊ መጺኡ ኸኣ እንተ መንከሎ፡ ደሙ ኣብ ርእሱ ክኸውን እዩ።⁵ደሃይ መለኸት ሰሚዑስ ኣይተጠንቀቐን እሞ፡ ደሙ ኣብ ርእሱ ክኸውን እዩ። እንተ ዝጥንቀቕሲ፡ ንነፍሱ መድሓና ነይሩ።⁶እቲ ሓላዊ ግና ሰይፊ ኽመጽእ ከሎ እንተ ረኣየ፡ መለኸት ድማ እንተ ዘይነፍሐ፡ ነቶም ህዝቢ ኸኣ እንተ ዘየጠንቀቖም፡ ሰይፊ መጺኡውን ንሓደ ኻባታቶም እንተ መንከሎ፡ ንሱ ብሰሪ ኣበሳኡ ይውሰድ፡ ደሙ ግና ካብ ኢድ እቲ ሓላዊ እየ ዝደልዮ።⁷እምበኣርሲ፡ ኣታ ወዲ ሰብ፡ ኣብ ቤት እስራኤል ሓላዊ ገይረ ኣቝመካ እየ፡ ነቲ ቓል ካብ ኣፈይ ስማዕ እሞ ኣብ ክንዳይ ኴንካ ኣጠንቅቆም።⁸ኣነ ነቲ ረሲእ፡ ኣታ ረሲእ፡ ብርግጽ ክትመውት ኢኻ፡ እንተ በልክዎ፡ ኢልካ ኽጥንቀቕ፡ እንተ ዘይተዛረብካዮ፡ እዚ ረሲእ ብሰሪ ረሲእነቱ ኽመውት እዩ፡ ደሙ ግና ካብ ኢድካ እየ ዝደልዮ።⁹ግናኸ ነቲ ረሲእ ካብ መገዱ ኽምለስ እንተ ኣጠንቀቕካዮ፡ ንሱ ኸኣ ካብ መገዱ እንተ ዘይተመልሰ፡ ንሱ ንሰሪ ረሲእነቱ ኽመውት እዩ፡ ንስኻ ግና ንነፍስኻ ኣድሓንካያ።
   ¹⁰ኣታ ወዲ ሰብ፡ ንቤት እስራኤል፡ ንስኻትኩምሲ፡ ኣበሳናን ሓጢኣትናን ኣብ ርእስና እዩ፡ ንሕና ኸኣ ብሰሩ ንሕለል ኣሎና። ከመይ ጌርና ደኣ ብህይወት ክንነብር ኢና፡ ኢልኩም ትብሉ ኣሎኹም፡በሎም።¹¹ኣነ ህያው እየ፡ ይብል እግዚኣብሄር ኣምላኽ፡ ረሲእ ካብ መገዱ ኽምለስ እሞ ብህይወት ክነብር እምበር፡ ብሞት ረሲእ ባህ ኣይብለንን እዩ። ኣቱም ቤት እስራኤል፡ ስለምንታይ እትሞቱ፡ካብቲ እኩይ መገድኹም ተመለሱ፡ተመለሱ፡በሎም።¹²ኣታ ወዲ ሰብ፡ ንደቂ ህዝብኻ በሎም፡ ጽድቂ እቲ ጻድቕ በታ ንሱ ዝእብሰላ መዓልቲ ኣይከድሕኖን እዩ። ረሲእነት እቲ ረሲእ ከኣ፡ በታ ኻብ ርሲእነት ዝምለሰላ መዓልቲ ኣይከውድቖን እዩ። እቲ ጻድቕሲ በታ ዝእብሰላ መዓልቲ በቲ ጻድቁ ብህይወት ኣይክነብርን እዩ።¹³ነቲ ጻድቕ፡ ብርግጽ ብህይወት ክትነብር ኢኻ እንተ በልክዎ፡ ንሱ ኸኣ ብጽድቂ ተኣሚኑ እንተ ኣበሰ፡ ንሱ ብሰሪ እቲ ዝገበሮ ኣበሳኡ ኽመውት እዩ እምበር፡ እቲ ዅሉ ጽድቁ ኣይክዝከረሉን እዩ።¹⁴ነቲ ረሲእ ድማ፡ ብርግጽ ሞት ክትመውት ኢኻ፡ እንተ በልክዎ፡ ንሱ ኸኣ ካብ ሓጢኣቱ እንተ ተመልሰ፡ ፍርድን ጽድቅንውን እንተ ገበረ፡¹⁵ረሲእስ ታሕዚ እንተ መለሰ፡ ዝዘመቶ እንተ ኸሓሰ፡ ግፍዒ ኸይገበረ ብሕጋጋት ህይወት እንተ ተመላለሰ፡ ንሱ ርግጽ ብህይወት ክነብር፡ ኣይክመውትን ከኣ እዩ።¹⁶እቲ ዝገበሮ ዘበለ ዅሉ ሓጢኣቱ ኣይክዝከረሉን። ፍርድን ጽድቅን ገይሩ እዩ እሞ፡ ርግጽ ብህይወት ክነብር እዩ።¹⁷ደቂ ህዝብኻ ኸኣ፡ መገዲ እግዚኣብሄር ቅኑዕ ኣይኰነን፡ ይብሉ ኣለዉ። ግናኸ ኣይቅኑዕሲ መገዲ ርእሶም ደኣ እዩ።¹⁸ጻድቕ ካብ ጽድቁ እንተ ተመልሰ፡ ዓመጻ ኸኣ እንተ ገበረ ብሰራ ኽመውት እዩ።¹⁹ረሲእውን ካብ ረሲእነቱ እንተ ተመልሰ፡ ፍርድን ጽድቅን ድማ እንተ ገበረ፡ ሳላአን ብህይወት ክነብር እዩ።²⁰ንስኻትኩምሲ፡ መገዲ እግዚኣብሄር ቅኑዕ ኣይኰነን፡ ትብሉ ኣሎኹም። ኣቱም ቤት እስራኤል፡ ንነፍሲ ወከፍኩም ከከም መገድኹም ክፈርደኩም እየ።
   ²¹ኰነ ድማ፡ ካብ እንማረኽ ኣብ መበል ዓሰርተው ክልተ ዓመቱ፡ ኣብታ ዓስረይቲ ወርሒ፡ ነታ ወርሒ ኸኣ ኣብታ ሓምሰይቲ መዓልቲ፡ ሓደ ዘምለጠ ሰብኣይ ካብ የሩሳሌም ናባይ መጸ እሞ፡ እታ ኸተማስ ተትሒዛ፡ በለኒ።²²እቲ ዘምለጠ ኸይመጸ ኸሎ፡ ኣጋ ምሸት ኢድ እግዚኣብሄር ኣብ ልዕለይ መጺኣ ነበረት፡ ንጽባሒቱ ንሱ ኽሳዕ ዝመጸኒ ኸኣ፡ ኣፈይ ከፈተለይ። በዚ ኸምዚ ኣፈይ ተኸፍተለይ፡ ድሕርዚ ኸኣ ዓባስ ኣይኰንኩን።²³ከምዚ ዝብል ቃ፡ እግዚኣብሄር ድማ መጸኒ፡²⁴ኣታ ወዲ ሰብ፡ እቶም ኣብተን ዑናታት እታ ሃገር እስራኤል ዘለዉ፡ ኣብርሃም ሓደ ንበይኑ ነበረ ነዛ ሃገር እዚኣ ኸኣ ተረስተያ። ንሕና ግና ብዙሓት ኢና፡ እታ ሃገር ድማ ርስቲ ኽትከውን ንኣና ተዋሂባ እያ፡ ይብሉ ኣለዉ።²⁵ስለዚ፡ እግዚኣብሄር ኣምላኽ ከምዚ ይብል ኣሎ፡ ኢልካ ንገሮም፡ ምስ ደም ጌርኩም ትበልዑ ኣሎኹም፡ ኣዒንትኹም ድማ ናብ ጣኦታትኩም ቍሊሕ ይብላ ኣለዋ’ ደም ትኽዕዉ ኣሎኹም፡ ምስናይ እዝስ ነታ ሃገር ያኣይ ክትወርስዋ ኢኹም፡²⁶ኣብ ሰይፍኹም ትጽግዑ፡ ጽያፍ ትገብሩ ኣሎኹም፡ ነፍሲ ወከፍኩም ንሰበይቲ ብጻዩ የርክስ ኣሎ፡ ምስ ናይ እዝስ ነታ ሃገር ያኣይ ክትወርስዋ ኢኹም፡²⁷እግዚኣብሄር ኣምላኽሲ ኸምዚ ይብል ኣሎ፡ ኢልካውን ነሮም፡ ኣነ ህያው እየ፡ እቶም ኣብ ዑናታት ዝነብሩ ብርግጽ ብሰይፊ ኽወድቁ እዮም፡ ነቲ ኣብ መሮር ዘሎ ኸኣ ንኣራዊት ብልዒ ክኸውን ክውፍዮ እየ። እቶም ኣብ ዕርድን ኣብ በዓትታትን ዝነብሩ ድማ ብፌራ ክሞቱ እዮም።²⁸ኣነ ነታ ሃገር እቲኣ ምድረ በዳን መሰክሕን ክገብራ እየ። እቲ እትዕበየሉ ሓይላ ጥራስ ክጠፍእ እዩ። ኣኽራን እስራኤል ድማ ዝሓልፈሉ ዜይብሉ ዀይኑ ኽባድም እዩ።²⁹ብሰሪ እቲ ዝገበርዎ ዘበለ ዅሉ ጽያፎም ነታ ሃገር እቲኣ ምድረ በዳን መስክሕን ምስ ገበርክዋ፡ ንሳቶም ኣነ እግዚኣብሄር ምዃነይ ክፈልጡ እዮም።
   ³⁰ኣታ ወዲ ሰብ፡ እቶም ደቂ ህዝብኻ ኣብ ጥቓ መንደቕን ኣብ ኣፍ ደጌታት ኣባይትን ኰይኖም ብዛዕባኻ ይዛራረቡ ኣለዉ፡ ንድሓሕዶም ነፍሲ ወከፍ ንሓዉ፡ እስከ ንዑናይ፡ ካብ እግዚኣብሄር ዝወጽእ ቃል እንታይ ከም ዝዀነ ስምዑ፡ ይባሃሃሉ ኣለዉ።³¹ከም ኣመጻጽኣ ህዝቢ ድማ ኣባኻ ይመጹ፡ ከም ህዝበይ ከኣ ኣብ ቅድሜኻ ይቕመጡ፡ ቃላትካውን ይሰምዑ ኣለዉ፡ ግናኸ ኣይገብርዎን እዮም። ብኣፎም ፍቕሪ የርእዩ ኣለዉ፡ ልቦም ግና ደድሕሪ ረብሓ ርእሶም እዩ ዝኸይድ።³²እምበኣርሲ ንስኻ ኸም ቅኔ ፍቕሪ፡ ከምቲ ጥዑም ድምጺ ዘለዎ፡ ምህራም መሰንቆ ኸኣ ዝኽእል ኰንካዮም። ቃልካውን ይሰምዑ ኣለዉ፡ ግናኸ ኣይገብርዎን እዮም።³³ምስ ዝመጽእ ግና፦ እንሆ፡ ይመጽእ ኣሎ፦ ሽዑ ነብዪ ኣብ ማእከሎም ከም ዝነበረ ኽፈልጡ እዮም።

ትን. ህዝቅኤል ምዕራፍ 34

   ¹ከምዚ ዝብል ቃል እግዚኣብሄር ከኣ መጸኒ፡²ኣታ ወዲ ሰብ፡ ኣብቶም ጓሶት እስራኤል ተነበ፡ ነቶም ጓሶት ተነበየሎም፡ እግዚኣብሄር ኣምላኽ ከምዚ ይብል ኣሎ፡ ኢልካውን ንገሮም፡ ነቶም ንርእሶም ጥራይ ዝጓስዩ ጓሶት እስራኤል ወይለኦም። እቶም ጓሶትሲ ነተን ኣባጊዕዶ ኣይኰኑን ዝጓስዩ፡³ነቲ ስቡሕ ትበልዑ፡ ጸምሪ ትኽደኑ፡ ነቲ ዝሰብሐ ትሓርዱ፡ ነቲ መጓሰ ግና ኣይትኣልዩን።⁴ንዝሓመቓ ኣየበርታዕኩምን፡ ንዝሓመመት ኣይፈወስኩምን፡ ንተሰብረት ኣይዘነንኩምን፡ ንተባረረት ኣይመለስኩምን፡ ንዝጠፍአት ኣይደሌኹምን፡ ብሓይልን ብትርን ደኣ ገዛእኩምወን።⁵ጓሳ ስለ ዘይነበረን ፋሕ በላ፡ ንዅሎም ኣራዊት መሮር ከኣ ብልዒ ዀና፡ ፋሕውን በላ።⁶ኣባጊዐይ ኣብ ኵሉ ኣኽራንን ኣብ ኵሉ ነነዋሕቲ ዅርባታትን ተባረራ፡ ኣብ ኵሉ ዝባን ምድሪ ፋሓ በላ፡ ግደን ዝገብርን ዝደልየንን ከኣ የልቦን።
  ⁷ስለዚ፡ ኣቱም ጓሶት፡ ቃል እግዚኣብሄር ስምዑ፡⁸ኣነ ህያው እየ፡ ይብል እግዚኣብሄር ኣምላኽ፡ ኣባጊዐይ ተዘሪፈን፡ ኣባጊዐይ ከኣ ንዅሎም ኣራዊት መሮር ብልዒ ዀይነን፡ እቶም ጓሶት ኣይነበሩን፡ ጓሶትይ ግዲ ኣባጊዐይ ኣይገበሩን፡ እቶም ጓሶት ንርእሶም ጓሰዩ እምበር፡ ነባጊዐይሲ ኣይጓሰይወንን እዮም እሞ፡⁹ስለዚ፡ ኣቱም ጓሶት፡ ቃል እግዚኣብሄር ስምዑ፡¹⁰እግዚኣብሄር ኣምላኽሲ እንሆ፡ ኣብቶም ጓሶት እጥልቕ ኣሎኹ፡ ኣባጊዐይ ከኣ ካብ ኢዶም ክደልየን እየ። እቶም ጓሶት መሊሶም ንርእሶም ከይጓስዩስ፡ ጕስነት ኣባጊዐይ ከሕድጎም እየ። ድሕርዚ ቐለቦም ከይዀና ድማ፡ ካብ ኣፎም ክምንዝዐን እየ፡ ይብል ኣሎ።
   ¹¹ስለዚ እግዚኣብሄር ኣምላኽ ከምዚ ይብል ኣሎ፡ እኔኹ ኣነ ባዕለይ፡ ኣነ ነተን ኣባጊዐይ ክኣልየንን ክደልየንን እየ።¹²ከምቲ ጓሳ፡ በታ እተን መጓሲኡ ፋሕ ዝብላላ መዓልቲ ኣብ ማእከል ኣባጊዑ ጸኒሑ ዝደልየን፡ ከምኡ ድማ ኣነ ነባጊዐይ ክደልየን፡ ካብ ኵሉ እት ብመዓልቲ ደበናን ጸልማትን ፋሕ ኢለናኦ ዝነበራ ቦታ ኸኣ ከናግፈን እየ።¹³ካብ ህዝብታት ከውጽአን፡ ካብ ሃገራት ክእክበን፡ ናብ ሃገረን ድማ ክመልሰን፡ ኣብ ኣኽራን እስራኤልን ኣብ ጥቓ ወሓዚ መስኖ ኣብቲ ሰብ ዝነብረሉ ኵሉ ቦታ እታ ሃገርን ክጓስየን እየ።¹⁴ኣብ ልሙዕ መጓስዪ ኸውፍረን እየ፡ ደምቢአን ከኣ ኣብቲ ነዋሕቲ ኣኽራን እስራኤል ክኸውን እዩ። ኣብኡ ኣብ ጽቡቕ ደምበ ኽድቅሳ፡ ኣብ ስቡሕ መውፈሪ ኣብ ኣኽራን እስራኤል ክጓሰያ እየን።¹⁵ኣነ ባዕለይ ነባጊዐይ ክወፍረን ባዕለይ ድማ ከስፍረን እየ፡ ይብል እግዚኣብሄር ኣምላኽ።¹⁶ዝጠፍአት ክደሊ፡ እተባረረት ክመልስ፡ እተሰብረት ክዘንን፡ ዝሓመቐት ከኣ ከጽንዕ፡ ነታ ዝሰብሐትን ዝበርትዐትን ግና ከጥፍእ፡ ብፍርዲውን ክጓስየን እየ።¹⁷እግዚኣብሄር ኣምላኽ ከምዚ ይብል ኣሎ፡ ኣትን ኣባጊዐይ፡ እንሆ፡ ኣነ ኣብ መንጎ በጊዕን በጊዕን፡ ኣብ መንጎ ደዓውልን ደባሉን ክፈርድ እየ።¹⁸ነቲ ካብ መውዓሊኹም ዝተረፈ በእጋርኩም እትረግጽዎስ፡ ኣብቲ ልሙዕ ሸኻ ምውዓልዶ ውሒድኩም እዩ፡ነቲዝተረፈማይምስታይዶውሒድኩምእዩ፡¹⁹እሞ እተን ኣባጊዐይሲ እቲ በእጋርኩም እተረግጸዶ ኽበልዓ፡ እቲ ኣእጋርኩም ዝዘረጎስ ክሰትያ እየን፡
   ²⁰ስለዚ እግዚኣብሄር ኣምላኽ ከምዚ ይብል ኣሎ፡ እኔኹ፡ ኣነ ባዕለይ ኣብ መንጎ እተን ስቡሓት ኣባጊዕን እተን ዓባሩ ኣባጊዕን ክፈርድ እየ።²¹ንዅለን እተን ዝሓመቓ ዘበላ ኽሳዕ ሰጕጕኩም ፋሕ እተብልወን፡ ብጐድንን ብመንኩብን ስለ ዝጐነጽኩምወን፡ በቕርንትኹም ድማ ስለ ዝወጋእኩምወን፡²²ስለዚ ኣነ ነባጊዐይ፡ ድሕርዚ ንዘመተ ኸይውፈያ፡ ከድሕነን ኣብ መንጎ በጊዕን በጊዕን ከኣ ክፈርድ እየ።²³ኣነ ኸኣ ዝጓስየን ሓደ ጓሳ፡ ዳዊት ባርያይ፡ ከተንስኣለን እየ። ንሱ ኽጓስየን፡ ጓሳአን ድማ ክኸውን እዩ።²⁴ኣነ እግዚኣብሄር ኣምላኾም ክኸውን እየ፡ ዳዊት ባርያይውን ኣብ ማእከሎም መስፍን ክኸውን እዩ፡ ኣነ እግዚኣብሄር ተዛሪበ ኣሎኹ።²⁵ኣነ ምሳታተን ኪዳን ሰላም ክኣቱ፡ ንኽፉኣት ኣራዊት ካብ ሃገር ከጥፍኦም እየ። ንሳተን ከኣ ኣብ በረኻ ሃዲአን ክነብራ፡ ኣብ ዱርውን ክድቅሳ እየን።²⁶ኣነ ኸኣ ንእአንን ነቲ ኣብ ዙርያ ኹርባይ ዘሎ ቦታን ንበረኸት ክገብሮም እየ። ዝናም ብግዜኡ ኸውርድ እየ፡ ዝናም በረኸትውን ክኸውን እዩ።²⁷ኦም መሮር ፍሪኡ ኸፍሪ እዩ፡ ምድሪውን ብቝላ ኽትህብ እያ፡ ኣብ ሃገሮም ከኣ ሃዲኦም ክነብሩ እዮም። ኣነ ሰንሰለት ኣርዑቶም ምስ ሰበርኩ፡ ካብ ኢድ እቶም ባሮት ዝገበርዎም ከኣ ምስ ኣናገፍክዎም፡ ሽዑ ኣነ እግዚኣብሄር ምዃነይ ክፈልጡ እዮም።²⁸ድሕርዚ ዘመተ ህዝብታት ኣይክዀኑን እዮም፡ ኣራዊት ምድሪ ኸኣ ኣይክበልዕዎምን እዮም። አረ ሃዲኦም ክነብሩ እዮም፡ዘፍርሆምውን የልቦን።²⁹ንናእዳ ዝዀኖም ተኽሊ ኸተንስኣሎም እየ፡ ድሕርዚ ኸኣ ኣብታ ሃገር ብጥሜት ኣይክጠፍኡን፡ ድሕሪ ደጊም ድማ ጸርፊ ህዝብታት ኣይክጾሩን እዮም።³⁰ኣነ እግዚኣብሄር ኣምላኾምሲ ምሳታቶም ከም ዝዀንኩ ኽፈልጡ እዮም፡ ይብል እግዚኣብሄር ኣምላኽ።³¹ኣቱም ኣባጊዐይ፡ ኣባጊዕ መውፈረይ፡ ንስኻትኩም ሰብ ኢኹም፡ ኣነ ኸኣ ኣምላኽኩም እየ፡ ይብል እግዚኣብሄር ኣምላኽ።

ትን. ህዝቅኤል ምዕራፍ 35

   ¹ከምዚ ዝብል ቃል እግዚኣብሄር ከኣ መጸኒ፡²ኣታ ወዲ ሰብ፡ ገጽካ ናብ ከረን ሳዒር ኣብል ተነበየሉ ኸኣ፡
³እግዚኣብሄር ኣምላኽ ከምዚ ይብል ኣሎ፡ ኢልካውን ንገሮ፡ ኣታ ኸረን ሳዒኢር፡ እኔኹ እጥልቐልካ ኣሎኹ፡ ኢደይ ኣባኻ ኽዝርግሕ እየ እሞ ባዶን በረኻን ክገብረካ እየ።⁴ንኸተማታትካ ኸዕንወን እየ፡ ንስኻ ድማ ክትባድም ኢኻ፡ ኣነ እግዚኣብሄር ምዃነይውን ክትፈልጥ ኢኻ።⁵ናይ ሓዋሩ ጽልኢ ስለ ዝገበርካ፡ ንደቂ እስራኤል በቲ ግዜ ጸበባኦምን በቲ ኣበሳኦም እተፈጸመሉ ግዜስ ንኣደዳ ሰይፊ ስለ ዝወፌኻዮም፡⁶ስለዚ፡ ኣነ ህያው እየ፡ ይብል እግዚኣብሄር ኣምላኽ፡ ንደም ክውፍየካ እየ፡ ደም ከኣ ክሰጐካ፡ ደም ኣይጸላእካን እሞ፡ ደም ክሰጐካ እዩ።⁷ንኸረን ሳዒር ባዶን በረኻን ክገብሮ፡ ነቲ ብእኡ ዝኸይድን ዝምለስን ድማ ከጽንቶ እየ።⁸ነኽራኑ ብቕቱላቱ ኽመልኦ እየ። ኣብቲ በረኽትካን ኣብ ሽንጭሮታትካን ኣብ ኵሉ ርባርባታትካን ብሰይፊ እተቐትሉ ኽወድቁ እዮም።⁹ንሓዋሩ ምድረ በዳ ኽገብረካ እየ፡ ከተማታትካ ድማ ሰብ ዘይነብረለን ክዀና እየን። ኣነ እግዚኣብሄር ምዃነይ ከኣ ክትፈልጡ ኢኹም።¹⁰እግዚኣብሄር ኣብኣ ኸሎስ፡ ንስኻ፡ እዞም ክልተ ህዝብን እዘን ክልተ ሃገርን ናተይ ክዀና፡ ንሕና ኽንወርሶም ኢና፡ ኢልካ ኢኻ እሞ፡¹¹ስለዚ፡ ኣነ ህያው እየ፡ ይብል እግዚኣብሄር ኣምላኽ፡ ኣነ ኸምቲ ዅራኻን፡ ከምቲ ጸሊእካ ዝገበርካዮም ቅንኣትካን ክገብር እየ። ምስ ፈርድኩኻ ኸኣ፡ ኣብ ማእከሎም ርእሰይ ከፍልጥ እየ።¹²እቲ ነኽራን እስራኤል፡ በረኻ ዀይኑ፡ ብልዒ ክኸውን ድማ ንኣና ተወፍዩ እዩ፡ ኢልካ እተዛረብካዮ ኵሉ ጸርፍኻ ኣነ እግዚኣብሄር ከም ዝሰማዕክዎ ኽትፈልጥ ኢኻ።¹³ንስኻትኩም ብኣፍኩም ከም እተዓቤኹምለይን ዘረባ ኸም ዘብዛሕኩምለይን፡ ሰሚዐዮ ኣሎኹ።^14-15እግዚኣብሄር ኣምላኽ ድማ፡ ኵላ ምድሪ ኽትሕጐስ ከላ፡ ኣነ ኸባድመካ እየ፡ ከምቲ ብምብዳም ርስቲ ቤት እስራኤል እተሓጐስካዮ፡ ከምኡ ኸውርደልካ እየ። ኣታ ኸረን ሳዒር፡ ክትባድም ኢኻ፡ ኵላ ኤዶም ብዘላውን ከምኡ፡ ኣነ እግዚኣብሄር ምዃነይ ከ ክፈልጡ እዮም፡ ይብል ኣሎ።

ትን. ህዝቅኤል ምዕራፍ 36

   ¹ኣታ ወዲ ሰብ፡ ነኽራን እስራኤል ተነበየሎም፡ ኣቱም ኣኽራን ቃል እግዚኣብሄር ስምዑ፡ ከኣ በሎም።²እግዚኣብሄር ኣምላኽ ከምዚ ይብል ኣሎ፡ እቲ ጸላኢ፡ ኣሰይ፡ እቲ ናይ ጥንቲ በረኽቲ ርስትና ዀነ፡ ኢሉ ብዛዕባኹም ተዛሪቡ እዩ እሞ፡³ስለዚ ተነበ፡ እግዚኣብሄር ኣምላኽ ከምዚ ይብል ኣሎ፡ ኢልካውን ንገር፡ ነቶም ዝተረፉ ህዝብታት ርስቶም ምእንቲ ኽትኰኑስ፡ ንሳቶም ብዅሉ ወገን ኣባዲሞምኹምን ውሒጦምኹምን፡ መዛረብ ልሳንን መሕመዪ ህዝብን ከኣ ኴንኩም ኢኹም እሞ፡⁴ስለዚ፡ ኣቱም ኣኽራን እስራኤል፡ ቃል እግዚኣብሄር ኣምላኽ ስምዑ፡ እግዚኣብሄር ኣምላኽ ነኽራንን ንዅድዅዶታትን ንርባታትን ንሽንጭሮታትን ንዝባደመ ዑናታትን ነተን እተሓድጋ እሞ ነቶም ኣብ ዙርያኤን ዝተረፉ ህዝብታትሲ ንዘመተን ልግጫን ኰይነን እተወፈያ ኸተማታትን ከምዚ ይብል ኣሎ፡⁵ስለዚ እግዚኣብሄር ኣምላኽ ከምዚ ይብል ኣሎ፡ ነቶም ብምሉእ ልቦም ተሓጕሶም፡ ብነፍሶም ንዒቖም፡ ዘመተ ኽትከውንሲ፡ ነታ ሃገረይ እተረስተየዋ ተረፍ ህዝብታትን፡ ብዘሎ ኤዶምን ብሓዊ ቕንኣተይ ተዛረብኩ።⁶እምብኣርሲ ነኽራንን ንዅድዅዶታትን ንርባታትን ንሽንጭሮታትን፡ እግዚኣብሄር ኣምላኽ፡ እንሆ፡ ንስኻትኩም ነውሪ ህዝብታት ስለ እተሰከምኩም፡ ኣነ ብቕንኣተይን ብነድረይን ተዛረብኩ፡ ይብል ኣሎ ኢልካ ብዘዕባ ሃገር እስራኤል ተነበ።⁷ስለዚ እግዚኣብሄር ኣምላኽ ከምዚ ይብል ኣሎ፡ ኣነ ኢደይ ኣልዒለ እየ፡ እዞም ኣብ ከባቢኹም ዘለዉ ህዝብታት ንሳቶም ነውሮም ክስከሙ እዮም።^8-9ግናኸ፡ ኣቱም ኣኽራን እስራኤል፡ እኔኹ ናባኻትኩም ክመጽእ፡ ናባኻትኩምውን ከብል እየ። ንስኻትኩም ከኣ ክትሕረሱን ክትዝርኡን ኢኹም እሞ፡ ምምላሶም ስለ ዝቐረበ፡ ንህዝበይ እስራኤል ጨናፍርኩም ክጭብጭብ፡ ፍሬኹም ከኣ ክፈሪ እዩ።¹⁰ኣባኻትኩም ንዅላ ብዛላ ቤት እስራኤል ከኣ ሰብ ከብዝሓላ እየ። ከተማታት ክስፈር፡ ዑናታት ድማ ክስራሕ እዩ።¹¹ኣነ ኸኣ ኣባኻትኩም ሰብን እንስሳን ከብዝሕ እየ፡ ንሳቶም ድማ ክባዝሑን ክፋረዩን እዮም። ከምቲ ናይ ቀደምኩም መሓድር ክገብረኩም እየ፡ ካብቲ ናይ መጀመርታኹም ዝበለጸ ኸኣ ሰናይ ክገብረልኩም እየ። ኣነ እግዚኣብሄር ምዃነይውን ክትፈልጡ ኢኹም።¹²ንሰብ፡ ህዝበይ እስራኤል፡ ኣባኻትኩም ከመላልሶም እየ። ክወርሱኻ እዮም፡ ርስቶም ከኣ ክትከውን ኢኻ፡ ድሕርዚውን ውሉድ ዘይብሎም ኣይክትገብሮምን ኢኻ።¹³እግዚኣብሄር ኣምላኽ ከምዚ ይብል ኣሎ፡ ሰብ በሊዕኪ፡ ንህዝብኺ ኸኣ ውሉድ ዘይብሉ ጌርክዮ ኢኺ፡ ይብሉኹም ኣለዉ እሞ፡¹⁴ስለዚ ድሕርዚ ሰብ ኣይክትበልዕን፡ ንህዝብኺውን ውሉድ ዘይብሉ ኣይክትገብርዮን ኢኺ፡ ይብል እግዚኣብሄር ኣምላኽ።¹⁵ደጊምሲ ነውሪ ኣህዛብ ኣይከስምዓክን እየ፡ ልግጫ ህዝብታት ኣይክትጾርን፡ ድሕርዚውን ንህዝብኺ ኣይከተዐንቅፍዮምን ኢኺ፡ ይብል እግዚኣብሄር ኣምላኽ።
   ¹⁶ከምዚ ዝብል ቃል እግዚኣብሄር ከኣ መጸኒ፡¹⁷ኣታ ወዲ ሰብ፡ ቤት እስራኤል ኣብ ሃገሮም ከለዉ፡ ብመገዶምን ግብሮምን የርክስዋ ነበሩ። መገዶም ኣብ ቅድመይ ከም ርኽሰት ጽግያት ሰበይቲ ነበረ።¹⁸ሽዑ ብሰሪ እቲ ኣብታ ሃገር ዝኸዓውዎ ደምን ብጣኦታቶም ከኣ ስለ ዘርከስዋን ኵራይ ከዖኹሎም።¹⁹ኣብ ማእከል ህዝብታት ዘሮኽዎም፡ ኣብ ሃገራት ከኣ ፋሕ በሉ፡ ኣነውን ከም መገዶምን ከም ግብሮምን ፈረድክዎም።²⁰ብዛዕባኦም ከኣ እዚኣቶም ይኣይ ህዝቢ እግዚኣብሄር እዮም፡ ካብ ሃገሩ ወጺኦም፡ እናተባህለስ፡ ኣብ ዘዝኣተውዎም ኣህዛብ ምስ በጽሑ፡ ነቲ ቅዱስ ስመይ ኣርከስዎ።²¹ኣነ ግና ነቲ ቤት እስራኤል ኣብ ዘዝኣተውዎም ህዝብታት ዘርከስዎ ቅዱስ ስመይ ነሓፍክዎ።²²ስለዚ፡ እግዚኣብሄር ኣምላኽ ከምዚ ይብል ኣሎ፡ ኢልካ ንቤት እስራኤል ንገሮም፡ ኣቱም ቤት እስራኤል፡ እዚ ምእንቲ እቲ ኣብ ዘዝኣተኽምዎም ህዝቢ ዘርከስኩምዎ ቅዱስ ስመይ እየ እምበር፡ ምእንታኹም ኣይኰንኩን ዝገብሮ ዘሎኹ።²³ነቲ ኣብ ህዝብታት ዝረኸሰ፡ ኣብ ማእከሎም ዘርከስኩምዎ ዓብዪ ስመይ ክቕድሶ እየ። ኣብ ቅድሚ ኣዒንቶም ኣባኻትኩም ምስ ተቐደስኩ ኸኣ፡ እቶም ህዝብታት ኣነ እግዚኣብሄር ምዃነይ ክፈልጡ እዮም፡ ይብል እግዚኣብሄር ኣምላኽ።
   ²⁴ካብ ህዝብታት ከምጽኣኩም፡ ካብ ኵሉ ሃገራት ከኣ ክኣኻኽበኩም እየ፡ ናብ ሃገርኩምውን ክመልሰኩም እየ።²⁵ጽሩይ ማይ ክነጽገልኩም እየ እሞ ክትጸርዩ ኢኹም። ካብ ኵሉ ርኽሰትኩምን ካብ ኵሎም ጣኦታትኩምን ከጽርየኩም እየ።²⁶ሓድሽ ልቢ ድማ ክህበኩም፡ ሓድሽ መንፈስ ከኣ ከሕድረልኩም፡ ናይ እምኒ ልቢ ኻብ ስጋኹም ከውጽእ፡ ናይ ስጋ ልቢውን ክህበኩም እየ።²⁷ንመንፈሰይ ኣብ ውሽጥኹም ከሕድሮ፡ ብትእዛዛተይ ከመላልሰኩም፡ ፍርደይ ከሓልወኩምን ከግብረኩምን እየ።²⁸ኣብታ ነቦታትኩም ዝሃብኩዋ ሃገር ክትነብሩ፡ ህዝቢ ኸኣ ክትኰኑኒ ኢኹም፡ ኣነውን ኣምላኽ ክዀነኩም እየ።²⁹ካብ ኵሉ ርኽሰትኩም ከኣ ከናግፈኩም፡ ንእኽሊ ኽጽውዖን ከብዝሖን እየ፡ ድሕርዚውን ጥሜት ኣይከምጽኣልኩምን እየ።³⁰ድሕርዚ ኣብ ማእከል ህዝብታት ጸርፊ ጥሜት ከይትጾሩስ፡ ፈረ ኦምን ፍርያት ግራትን ከብዝሖ እየ።³¹ሽዑ ነቲ እኩይ መገድታትኩምን ነቲ ዘይሰናይ ተግባራትኩምን ክትዝክሩ፡ ብሰሪ ኣበሳኹምን ጽያፍኩምን ከኣ ንርእስኹም ክትፍንፍኑ ኢኹም።³²ኣቱም ቤት እስራኤልሲ፡ እዚ ምእንታኹም ኢለ ኸም ዘይገብሮ፡ ኣባኻትኩም ይፈልጥ፡ ብሰሪ መገድታትኩም ሕፈሩን ነውሩን፡ ይብል እግዚኣብሄር ኣምላኽ።
   ³³እግዚኣብሄር ኣምላኽ ከምዚ ይብል ኣሎ፡በታ ኣነ ንኣኻትኩም ካብ ኵሉ ኣበሳኹም ዘንጽሃላ መዓልቲ፡ ነተን ከተማታት ሰብ ከም ዝነብረን፡ እቲ ዑናታት ከኣ ከም ዝስራሕ ክገብሮ እየ።³⁴እታ ዝባደመት ምድሪ፡ ኣብ ክንዲ እቲ ኣብ ቅድሚ ዓይኒ ዅሎም ሓለፍቲ መገዲ ባዲማቶ ዝነበረት፡ ክትሕረስ እያ።³⁵ሽዑ ኸኣ፡ እዛ ባዲማ ዝነበረት ምድሪ ኸም ገነት ኤደን ኰነት፡ እተን ዝባደማን ዝዓነዋን ዝፈረሳን ከተማታት ድማ እተዓርዳን፡ ሰብ ዝነብረለንን ኰና፡ክበሃል እዩ።³⁶እቶም ኣብ ከባቢኹም ዝተረፉ ህዝብታት ከኣ ኣነ እግዚኣብሄር ነቲ ዝፈረሰ ኸም ዝሰራሕክዎ፡ ነቲ ዝበረሰውን ከም ዝተኸልክዎ ኽፈልጡ እዮም። ኣነ እግዚኣብሄር ተዛሪበ ኣሎኹ፡ ክገብሮ ድማ ኣየ።
   ³⁷እግዚኣብሄር ኣምላኽ ከምዚ ይብል ኣሎ፡ ምስናይ እዚ፡ ንቤት እስራኤል እዚ ኽገብረሎም እየ። ነቶም ሰብ ከም መጓሴታት ኣባጊዕ ከብዝሖም እየ።³⁸ከምተን ዝተቐደሳ መጓሰ፡ ከምተን መጓሰ የሩሳሌም ኣብቲ በዓላታ ኸምኡ እተን ዝባደማ ኸተማታት ብመጓሴታት ሰብ ክመልኣ እየን። ኣነ እግዚኣብሄር ምዃነይ ከኣ ክፈልጡ እዮም።

ትን. ህዝቅኤል ምዕራፍ 37

   ¹ኢድ እግዚኣብሄር ኣብ ልዕለይ ነበረት፡ እግዚኣብሄር ከኣ ብመንፈስ ኣውጽኣኒ፡ ኣብ ማእከል እታ ጐልጐል ድማ ኣንበረኒ፡ ንሳውን ዓጻጽምቲ መሊእዋ ነብረ።²ኣብ ጥቓኦም ብዙርያኦም ኣሕለፈኒ፡ እንሆ ኸኣ፡ ኣብቲ ዝባን ጐልጐል ብዙሕ ነበረ፡ እንሆውን፡ ኣዝዩ ንቑጽ ነበረ።³ንሱ ኸኣ፡ ኣታ ወዲ ሰብ፡ እዚ ዓጻጽምቲ እዝስ ህያውዶ ክኸውን እዩ በለኒ። ኣነ ድማ፡ ዎ እግዚኣብሄር ኣምላኽ፡ ንስኻ ትፈልጥ፡ ኢለ መለስኩ።⁴ንሱ ኸኣ፡ ኣብ ልዕሊ እዚ ዓጻጽምቲ እዚ ተነበ፡ ኣቱም ንቑጻት ዓጻጽምቲ፡ ቃል እግዚኣብሄር ስምዑ፡ ኢልካውን ንገሮም፡ በለኒ።⁵እግዚኣብሄር ኣምላኽ ነዚ ዓጻጽምቲ እዚ ኸምዚ ይብል ኣሎ፡ እንሆ፡ ኣነ ትንፋስ ከእትወልኩም እየ፡ ንስኻትኩም ከኣ ህያዋን ክትኰኑ ኢኹም።⁶ጅማውቲውን ኸንብረልኩም፡ ስጋ ኽገብረልኩም፡ ብቘርበት ክኸድነኩም፡ ትንፋስ ከእትወልኩም እየ፡ ህያዋን ከኣ ክትኰኑ ኢኹም፡ ኣነ እግዚኣብሄር ምዃነይ ድማ ክትፈልጡ ኢኹም።⁷ከምቲ እተኣዘዝክዎ ኸኣ ተነቤኹ። ክንበ ኸሎኹ ድማ ደሃይ ኰነ፡ እንሆ ኸኣ፡ ፍኒሕኒሕ ኰነ፡ እቲ ዓጻጽምቲውን ዓጽሙ ተቓራረበ።⁸እንሆ ኸኣ፡ ጅማውትን ስጋን ክወጾም፡ ቈርበት ድማ ክኸድኖም ርአኹ፡ ትንፋስ ግና ኣይነበሮምን።⁹ሽዑ ንሱ፡ ኣታ ወዲ ሰብ፡ ተነበ፡ ንንፋስ ተነበየሉ፡ ንንፋስ ከኣ፡ እግዚኣብሄር ኣምላኽ፡ ኣታ ትንፋስ፡ እዞም ህያዋን ክዀኑስ፡ ካብቶም ኣርባዕተ ንፋስ ንዓ እሞ ኣብዚኦም ንፈስ፡ ይብል ኣሎ፡ ኢልካ ንገሮ ፡ በለኒ።¹⁰ኣነ ኸኣ ኸምቲ ዝኣዘዘኒ ተነቤኹ፡ ትንፋስ ድማ ኣተዎም። ህያዋን ኰኑ፡ በእጋሮም ከኣ ቘሙ፡ ኣዝዩ ዓብዪ ጭፍራ ነበሩ።¹¹ሽዑ ንሱ በለኒ፡ ኣታ ወዲ ሰብ፡ እዚ ዓጻጽምቲ እዚ ዅላ ቤት እስራኤል እዮም። እንሆ፡ ንሳቶም፡ ዓጻጽምትና ነቐጸ፡ ተስፋና ተቐብጻ፡ ንሕና ጠፊእና ኢና፡ ይብል ኣለዉ።¹²ስለዝተነበ፡ እግዚኣብሄር ኣምላኽ ከምዚ ይብል ኣሎ፡ ኢልካውን ንገሮም፡ እንሆ፡ ኣነ መቓብራትኩም ክኸፍት፡ ኣቱም ህዝበይ፡ ካብ መቓብራትኩም ድማ ከውጽኣኩም፡ ናብ ሃገር እስራኤልውን ከእትወኩም እየ።¹³ኣቱም ህዝበይ፡ መቓብራትኩም ምስ ከፈትኩ፡ ካብ መቓብራትኩም ከኣ ምስ ኣውጽእኩኹም፡ ኣነ ኣግዚኣብሄር ምዃነይ ክትፈልጡ ኢኹም።¹⁴መንፈሰይ ከሕድረልኩም እየ፡ ህያዋን ከኣ ክትኰኑ ኢኹም፡ ናብ ሃገርኩም ድማ ከንብረኩም እየ እሞ፡ ኣነ እግዚኣብሄር ከም እተዛረብኩን ከም ዝገበርክዎን ክትፈልጡ ኢኹም፡ ይብል እግዚኣብሄር።
   ¹⁵ከምዚ ዝብል ቃል እግዚኣብሄር ከኣ መጸኒ፡¹⁶ኣታ ወዲ ሰብ፡ ሓደ ዕጨይቲ ውሰድ እሞ፡ ንይሁዳን ንደቂ እስራኤል ብጾቱን፡ ኢልካ ጽሓፈሉ። ድሕሪኡውን ካልእ ዕጨይቲ ውሰድ እሞ፡ ንዮሴፍ ዕጨይቲ ኤፍሬምን ኵላ ቤት እስራኤል ብጾቱን፡ ኢልካ ጽሓፈሉ።¹⁷ሓደ ዕጨይቲ ክኸውንሲ፡ እቲ ሓደ ኣብቲ ሓደ ኣጋጥሞ፡ ኣብ ኢድካ ኸኣ ሓደ ክኸውን እዩ።¹⁸እቶም ደቂ ህዝብኻ ድማ፡ በዝስ እንታይ ከም ዝዀነ ሓሳብካዶ ኣይትገልጸልናን ኢኻ፡ኢሎም ምስ ተዛረቡኻ፡¹⁹ንስኻ ኸኣ፡ እግዚኣብሄር ኣምላኽ ከምዚ ይብል ኣሎ፡ ኢልካ ንገሮም፡ እንሆ፡ ኣነ ነቲ ኣብ ኢድ ኤፍሬምን ነገድ እስራኤል ብጾቱን ዘሎ ዕጨይቲ ዮሴፍ ክወስድ፡ ኣብቲ ዕጨይቲ ይሁዳ ኸኣ ክድርቦም፡ ኣብ ኢደይ ሓደ ክዀኑስ፡ ሓደ ዕጨይቲ ኽገብሮም እየ።²⁰እቲ ዝጸሓፍካሉ ዕጨይቲ ድማ ኣብ ቅድሚ ዓይኖም ኣብ ኢድካ ክኸውን እዩ።²¹እግዚኣብሄር ኣምላኽ ከምዚ ይብል ኣሎ፡ ኢልካውን ንገሮም፡ እንሆ፡ ኣነ ንደቂ እስራኤል ካብ ማእከል እቶም ከይዶምዎም ዘለዉ ህዝብታት ክወስድ፡ ካብ ኵሉ ወገን ክእክቦም ናብ ሃገሮምውን ከእትዎም እየ።²²ኣብታ ሃገር ኣብ ኣኽራን እስራኤል ከኣ ሓደ ህዝቢ ኽገብሮም እየ፡ ንዅላቶም ሓደ ንጉስ ክነግሶም እዩ፡ ድሕርዚ ድማ ክልተ ህዝቢ ኣይክዀኑን፡ ድሕርዚውን ኣብ ክልተ መንግስቲ ኣይክምቀሉን እዮም።
   ²³ድሕሪ ደጊም በቲ ጣኦታቶምን ነውሮምን ብዅሉ ኣበሳኦምን ኣይክረኽሱን እዮም። ኣነ ኸኣ ካብ ኵሉ እቲ ሓጢኣት ዝገብሩሉን ዝነብርዎን ስፍራ ኸድሕኖምን ከንጽሆምን እየ። ንሳቶም ህዝበይ ክዀኑ እዮም፡ ኣነውን ኣምላኾም ክኸውን እየ።²⁴ዳዊት ባርያይ ከኣ ክነግሶም፡ ንዅላቶም ድማ ሓደ ጓሳ ክዀኖም እዩ፡ ብፍርደይ ከኣ ክመላለሱ፡ ንሕጋጋተይውን ክሕልውዎን ክገብርዎን እዮም።²⁵ኣብታ ንባርያይ ያእቆብ ዝሃብክዎ፡ ኣቦታትኩ ከኣ ዝነበርዋን ሃገር ክነብሩ እዮም። ንሳቶምን ደቆምን ደቂ ደቆምን ንዘለኣለም ኣብኣ ኽነብሩ እዮም፡ ዳዊት ባርያይ ድማ ንዘለኣለም መስፍኖም ክኸውን እዩ።²⁶ኪዳን ሰላም ክኣትወሎም እየ፡ ዘለኣለማዊ ኪዳን ድማ ክዀነሎም እዩ። ክተኽሎምን ከብዝሖምን እየ። መቕደሰይ ከኣ ንዘለኣለም ኣብ ማእከሎም ከቝሞ እየ።²⁷ማሕደረይ ምሳታቶም ክኸውን እዩ፡ ኣነ ኸኣ ኣምላኾም ክኸውን እየ፡ ንሳቶምውን ህዝበይ ክዀኑ እዮም።²⁸መቕደሰይ ንዘለኣለም ኣብ ማእከሎም ምስ ኰነ ህዝብታት እቲ ንእስራኤል ዝቕድስሲ ኣነ እግዚኣብሄር ምዃነይ ክፈልጡ እዮም።

ትን. ህዝቅኤል ምዕራፍ 38

   ¹ከምዚ ዝብል ቃል እግዚኣብሄር ከኣ መጸኒ፡²ኣታ ወዲ ሰብ፡ ገጽካ ናብ ጎግ ኣብ ሃገር ማጎግ፡ እቲ መስፍን ሮሽን ሜሴክን ቱባልን፡ መልስ እሞ ኣንጻሩ ተነበየሉ፡³በልውን፡ እግዚኣብሄር ኣምላኽ ከምዚ ይብል ኣሎ፡ ኣታ ጎግ መስፍን ሮሽን ሜሴክ ቱባልን ኣብ ክሳድካ ኣሎኹ።^4-5ክመልሰካ፡ ኣብ ምንጋጋኻ ዓንቃሪቦ ኽገብር እየ፡ ንኣኻ ምስ ኵሉ ሰራዊትካ፡ ኣፍራስን ፈረሰኛታትን፡ ኵላቶም ድርዒ ዝለበሱ፡ ብዙሓት ሰብ ከኣ ዋልታን ገለብን ዘለዎም፡ ኵላቶም ሰይፊ ዝሓዙ፡ ምስኦም ከኣ ሰብ ፋርስን ኢትዮጵያን ፉጥን፡ ኵላቶም ዋልታን ቍራዕ ርእስን ዘለዎም ገይረ ኸውጽኣካ እየ።⁶ጎሜርን ኵሉ ጭፍራኡን ቤት ቶጋርማ ኻብ ወሰናይ ሰሜንን ኵሉ ጭፍራኡን፡ ብዙሓት ህዝቢ ምሳኻ እዮም።⁷ተዳሎ፡ ንስኻን ኵሉ እቲ ኣባኻ ተኣኪቡ ዘሎ ህዝብኻን ተሰለፍ፡ ንስኻውን ሓለቓኦም ኩን።⁸ድሕሪ ብዙሕ ዘመን ክትከትት ኢኻ። ኣብተን ዳሕሮት ዓመታት ናብታ ኻብ ሰይፊ እተናገፈት፡ ካብ ብዙሓት ህዝብታት እተኣከበት፡ ናብቲ ነዊሕ ግዜ ዝባደመ ኣኽራን እስራኤል ክትኣቱ ኢኻ። ካብ ህዝብታት ወጺኣስ፡ ኵላቶም ሃዲኦም ይነብሩላ ኣለዉ።⁹ንስኻ ኽትድይብ ከም ህቦብላ ንፋስ ከኣ ክትመጽእ ኢኻ፡ ንስኻ ምስ ኵሉ ጭፍራታትካን ምስቶም ምሳኻ ዘለዉ ብዙሓት ህዝብታትን ከምቲ ንምድሪ ዘጐልብባ ደበና ኽትከውን ኢኻ።
   ¹⁰እግዚኣብሄር ኣምላኽ ከምዚ ይብል ኣሎ፡ በዛ መዓልቲ እዚኣ ነገር ኣብ ልብኻ ኽትንስእ እዩ፡ እኩይ እማመ ኽትእምም ኢኻ፡¹¹እሞ፡ ናብታ ዘይተዓርደት ሃገር ክድይብ፡ ናብቶም ሃዲኦም ብደሓን ዝነብሩ፡ ዅላቶም ብዘይ ቀጽሪ ዘለዉ፡ መሃርሃርን መዓጹን ዘይብሎም ህዝቢ ሓደጋ ኽወድቆም እየ፡ ክትብል ኢኻ።¹²ክትማርኽን ክትብዝብዝን፡ ናብቲ ዓንዩ ነይሩስ ሕጂ ሰብ ዝነብረሉ ዘሎ፡ ናብቲ ኸብትን ሃብትን ዘጥረየ፡ ካብ ህዝብታት እተኣከበ፡ ኣብ ሕምብርቲ ምድሪ ዝነብር ዘሎ ህዝቢ ኢድካ ኽትዝርግሕ ክትድይብ ኢኻ።¹³ሳባን ዴዳን ነጋዶ ተርሲስን እቶም ኰረኵር ኣናብሱን፡ ምርኮ ኽትማርኽዶ መጺእካ፡ ዘመተ ኽትዘምት፡ ብሩርን ወርቅን ክትወስድ፡ ከብትን ሃብትን ክትሕዝ፡ ብዙሕ ምርኮ ኸተእቱዶ ንጭፍራታትካ ኣኽቲትካዮም፡ ክብሉኻ እዮም።
   ¹⁴ስለዚ፡ ኣታ ወዲ ሰብ፡ ተነበ፡ እግዚኣብሄር ኣምላኽ ከምዚ ይብል ኣሎ፡ ኢልካውን ንጎግ ንገሮ፡ በታ መዓልቲ እቲኣ ህዝበይ እስራኤልሃዲኡ ምስ ተቐመጠ፡ ኣይክትፈልጦን ዲኻ፡¹⁵ንስኻ ምሳኻውን ብዙሓት ህዝብታት፡ ኵላቶም ኣብ ኣፍራስ ኣተቐመጡን ዓብዪ ጭፍራን ብርቱዕ ሰራዊትን ሒዝካ ኻብ ቦታኻ ኻብ ወሰን ሰሜን ክትመጽእ ኢኻ።¹⁶ነታ ሃገር ከም ደበና ምእንቲ ኽትከድና፡ ናብ ህዝበይ እስራኤል ክትድይብ ኢኻ። ኣታ ጎግ፡ ኣብተን ዳሕሮት መዓልትታት ክኸውን እዩ፡ እቶም ህዝብታት፡ ኣነ ኣብ ቅድሚ ዓይኖም ኣባኻ ምስ ተቐደስኩ፡ክፈልጡንስ፡ ናብ ሃገረይ ከደይበካ እየ።
   ¹⁷እግዚኣብሄር ኣምላኽ ከምዚ ይብል ኣሎ፡ እቲ ኣነ ብጥንቲ ኣብኦም ከም ዘምጽኣካ በቶም በታ ዘመን እቲኣ ዓመት ንዓመት እተነበዩ ኣገልገልተይ ነብያት እስራኤል ገይረ ብዛዕባኻ እተዛረብኩስ ንስኻዶ ኣይኰንካን፡¹⁸እግዚኣብሄር ኣምላኽ ድማ፡ በታ መዓልቲ እቲኣ ክኸውን እዩ፡ በታ ጎግ ንሃገር እስራኤል ክጻረረላ ዝመጸላ መዓልቲ፡ ነድረይ ክስርንቐኒ እዩ፡ ይብል ኣሎ።¹⁹ብቕንኣተይን ብሓዊ ቝጥዓይን እብል ኣሎኹ፡ ርግጽ በታ መዓልቲ እቲኣ ኣብ ሃገር እስራኤል ዓብዪ ምንቅጥቃጥ ክኸውን እዩ።²⁰ሽዑ ዓሳታት ባሕርን ኣዕዋፍ ሰማይን እንስሳ መሮርን ኵሉ ኣብ ምድሪ ለመም ዝብል ለመምታን ኣብ ዝባን ምድሪ ዘሎ ዅሉ ሰብን ኣብ ቅድመይ ራዕራዕ ክብሉ እዮም። ኣኽራን ክግልበጥ፡ ኣኻውሕ ክፈርስ፡ ኵሉ መናድቕ ከኣ ኣብ ኣብ ምድሪ ኽወድቕ እዩ።²¹ኣነ ድማ ኣብ ኵሉ ኣኽራነይ ኣብ ልዕሊኡ ሰይፊ ኽጽውዓሉ እየ፡ ይብል እግዚኣብሄር ኣምላኽ፡ ሰይፊ ነፍሲ ወከፍ ኣብ ርእሲ ሓዉ ክኸውን እዩ።²²ብፌራን ብደምን ክፈርደሉ እየ። ኣባኡን ኣብ ጭፍራኡን ኣብቶም ምስኡ ዘለዉ ብዙሓት ህዝብታትን ዝናም ሃጽፍን በረድን ሓውን ዲንን ከዝንም እየ።²³በዚ ኸምዚ ኣነ ግርማውን ቅዱስን ምኻነይ ክግሃድ፡ ኣብ ቅድሚ ዓይኒ ብዙሓት ህዝብታት ከኣ ባዕለይ ክፍለጥ እየ። ንስቶምውን ኣነ እግዚኣብሄር ምዃነይ ክፈልጡ እዮም።

ትን. ህዝቅኤል ምዕራፍ 39

   ¹ኣታ ወዲ ሰብ፡ ንጎግ ተነበየሉ፡ እግዚኣብሄር ኣምላኽ ከምዚ ይብል ኣሎ፡ ኢልካውን ንገሮ፡ ኣታ ጎግ መስፍን ሮሽን ሜሴክን ቱባልን፡ እኔኹ፡ ከረኻኽበልካ እየ።²መሪሐን ደሪኸን ካብ ወሰን ሰሜን ከውጽኣካ፡ ናብ ኣኽራን እስራኤል ከኣ ከእትወካ እየ።³ንቐስትኻ ካብታ ጸጋመይቲ ኢድካ ኽድርብዮ፡ ንፍላጻታትካ ኸኣ ካብታ የማነይቲ ኢድካ ኸውድቖ እየ።⁴ንስኻ ምስ ኵሉ ጭፍራኻን ምስቲ ምሳኻ ዘሎ ህዝብን ኣብ ኣኽራን እስራኤል ከትወድቅ ኢኻ። ክበልዑኻውን ንጋባትን ንበብዓይነቶም ዝዀኑ ኣዕዋፍን ንኣራዊት ግዳምን ክውፍየካ እየ።⁵ኣነ ተዛሪበ እየ እሞ፡ ኣብ መሮር ክትወድቕ ኢኻ፡ ይብል እግዚኣብሄር ኣምላኽ።⁶ኣብ ማጎግን ናብቶም ኣብ ደሴታት ሃዲኦም ዝነብሩ ዘለዉን ሓዊ ኽሰድድ እየ፡ ኣነ እግዚኣብሄር ምዃነይ ከኣ ክፈልጡ እዮም።⁷እቲ ቅዱስ ስመይ ኣብ ማእከል ህዝበይ እስራኤል ከፍልጦ ኣየ። ድሕርዚ ድማ እቲ ቅዱስ ስመይ ኣይከርክሶን እየ። እቶም ህዝብታት ከኣ ኣነ እግዚኣብሄር እቲ ኣብ እስራኤል ቅዱስ ምዃነይ ክፈልጡ እዮም።⁸እንሆ፡ ይመጽእ ክኸውን ድማ እዩ። እታ ብዛዕባኣ እተዛረብኩላ መዓልቲ እዚኣ እያ፡ ይብል እግዚኣብሄር ኣምላኽ።
   ⁹እቶም ኣብ ከተማታት እስራኤል ዝነብሩ ዘለዉ ድማ ክወጹ እዮም እሞ፡ ኣጽዋርን ዋላቱን ገለባትን ቀስትታትን ፍላጻታትን ኣጕማድን ኲናውትን ሓዊ ኣጒዶም ከንድድዎ እዮም። ሾብዓተ ዓመትውን ብእኡ ሓዊ ኸንድዱ እዮም።¹⁰በቲ ኣጽዋር ገይሮም ሓዊ ኽኣጕዱ እዮም እሞ፡ ካብ መሮር ዕጨይቲ ኣይከእትዉን፡ ካብ ዱር ከኣ ኣይክቘርጹን እዮም። ነቶም ዝገፈፍዎም ክገፍዎም፡ ነቶም ዝዘመትዎም ከኣ ክዘምትዎም እዮም፡ ይብል እግዚኣብሄር ኣምላኽ።
   ¹¹በታ መዓልቲ እቲኣ ንጎግ ኣብ እስራኤል ብወገን ባሕሪ ዘሎ፡ ለሰ ሓለፍቲ መገዲ ዝበሃል መቓብር ክህቦ እየ። ነቶም ብእኡ ዝሓልፉ ኸኣ መገዶም ክዓጽወሎም እዩ። ኣብኡውን ንጎግን ንዅሉ እቲ ብዙሕ ሰቡን ክቐብርዎም እዮም። ለሰ ሃሞናጎግ ድማ ክበሃል እዩ።¹²ቤት እስራኤል ከኣ፡ ነታ ሃገር ምእንቲ ኸጽርዩስ፡ ብሾብዓተ ወርሒ ክቐብርዎም እዮም።¹³ኵሉ ህዝቢ እታ ሃገር ክቐብሮም እዩ። እዚውን በታ ኣነ ዝኸብረላ መዓልቲ ንስም ክዀኖም እዩ፡ ይብል እግዚኣብሄር ኣምላኽ።¹⁴ምእንቲ ኸጽርዮስ፡ ነቶም ኣብ ልዕሊ ምድሪ ወዲቖም ዝጸንሑ ክቐብሩ፡ ምስቶም ቀባሮ ኸይኖም ነታ ሃገር ከየቛረጹ ዝዞርዋ ሰብኡት ከመቕርሑ እዮም። ድሕሪ ሾብዓተ ወርሒ ሃለው ክብሉ እዮም።¹⁵እቶም እናዞሩ ብታ ሃገር ዝሓልፉ፡ ሓደ ኻብኦም ዓጽሚ ሰብ እንተ ረኣየ፡ እቶም ቀባሮ ኣብ ለሰ ሃሞናጎግ ክሳዕ ዝቐብሮም፡ መሓበርታ ኽገብረሉ እዩ።¹⁶ስም እታ ኸተማ ኸኣ ሃሞና ኽበሃል እዩ። በዚ ኸምዚ ነታ ሃገር ከጽርይዋ እዮም።
   ¹⁷ኣታ ወዲ ሰብ፡ ንዅለን ነፈርቲ ኣዕዋፍን ንዅሎም ኣራዊት መሮርን፡ እግዚኣብሄር ኣምላኽ ከምዚ ይብል ኣሎ፡ ኢልካ ንገሮም፡ ተኣኻኺብኩም ንዑ። ስጋ ኽትበልዑ ደም ከኣ ክትሰትዩስ፡ ናብቲ ኣነ ዝሓረድኩልኩም መስዋእቲ፡ ናብቲ ዓብዪ መስዋእቲ ኣኽራን እስራኤል ካብ ኵሉ ወገን ተኣካኸቡ።¹⁸ስጋ እቶም ጀጋኑ ኽትበልዑ፡ ደም እቶም ምሳፍንቲ ምድሪ ኽትሰዩ ኢኹም። ናይ መኻክትን ገናሽልን ድቤላታትን ኣብዑርን እዩ፡ ኵላቶም ኣብ ባሳን ዝሰብሑ እዮም።¹⁹ካብቲ ኣነ ዝሓረድኩልኩም መስዋእቲ ሕሩድ ክሳዕ እትጸግቡ እቲ ስቡሕ ክትበልዑ፡ ክሳዕ እትሰኽሩ ድማ ደም ክትሰትዩ ኢኹም።²⁰ኣብ መኣደይ በፍራስን ብፈረሰኛታትን ብጀጋኑን ብዅሎም እቶም ተዋጋእትን ክትጸግቡ ኢኹም፡ ይብል እግዚኣብሄር ኣምላኽ።²¹ኣነ ኸኣ ግርማይ ኣብ ማእከል ህዝብታት ክገልጽ እየ። ኵሎም ህዝብታት ድማ ነቲ ዝፈጸምክዎ ፍርደይን ነታ ኣብ ልዕሊኦም ዘንበርክዎ ኢደይን ክርእዩ እዮም።²²ካብታ መዓልቲ እቲኣ ንንየው ቤት እስራኤል ኣነ እግዚኣብሄር ኣምላኽ ምዃነይ ክፈልጡ እዮም።²³እቶም ህዝብታት ከኣ፡ ቤት እስራኤል ብሰሪ ኣበሳኦም ከም እተማረኹ ኽፈልጡ እዮም። ንኣይ ጠሊሞም እዮም እሞ፡ ገጸይ ከወልኩሎም፡ ኣብ ኢድ ጸላእቶም ወፌኽዎም፡ ኵላቶም ድማ ብሰይፊ ወደቑ።²⁴ከም ርኽሰቶምን ከም ኣበሳኦምን መጠን ገበርክዎም፡ ገጸይ ከኣ ከወልኩሎም።
   ²⁵ስለዚ እግዚኣብሄር ኣምላኽ ከምዚ ይብል ኣሎ፡ ሕጂ ንያእቆብ ካብ ምርኮ ኽመልሶ፡ ንዅላ ቤት እስራኤል ከኣ ክምሕራ፡ ስለ እቲ ቅዱስ ስመይ ድማ ክጽዕት እየ።^26-27ካብ ማእከል ህዝብታት ምስ መለስክዎም፡ ካብ ሃገር ጸላእቶምውን ምስ ኣካኸብክዎም፡ ኣብ ቅድሚ ዓይኒ ብዙሓት ህዝብታት ኣባታቶም ምስ ተቐደስኩ፡ ሓደ እኳ ዘፍርሆም ዘይብሎም ኣብ ሃገሮም ሃዲኦም ምስ ተቐመጡ፡ ነውሮም ንኣይ ዝጠለምዎ ዅሉ ጥልመት ክጾሩ እዮም።²⁸ኣነ ናብ ማእከል ህዝብታት ኣማሪኸዮም ነይረስ፡ ድሕርዚ ኸኣ ካባታቶም ሓደ እኳ ኣብኣ ኸየትረፍኩ ናብ ሃገሮም ምስ ኣካኸብክዎም፡ ኣነ እግዚኣብሄር ኣምላኽ ምዃነይ ክፈልጡ እዮም።²⁹መንፈሰይ ኣብ ልዕሊ ቤት እስራኤል ምስ ከዖኹ፡ ድሕሪ ደጊም ገጸይ ኣይክኽውለሎምን እየ፡ ይብል እግዚኣብሄር ኣምላኽ።

ትን. ህዝቅኤል ምዕራፍ 40

   ¹ካብ እንማረኽ ኣብ መበል ዕስራን ሓሙሽተን ዓመት፡ ኣብ መጀመርታ እታ ዓመት፡ ኣብ ዓስረይቲ መዓልቲ እታ ወርሒ፡ እታ ኸተማ ኻብ እትተሓዝ ኣብ መበል ዓሰርተው ኣርባዕተ ዓመት፡ ልክዕ በታ መዓልቲ እቲኣ፡ ንሱውን ናብ ንየው ወሰደኒ።²ብራእይ ኣምላኽ ናብታ ሃገር እስራኤል ወሰደኒ፡ ኣብ ነዊሕ ከረን ከኣ ኣንበረኒ። ኣብኡውን ብወገን ደቡብ ከም ህኑጽ ከተማ ነበረ።³ናብኣ ኸኣ ወሰደኒ፡ እንሆ ድማ፡ ከም ኣስራዚ ዝትርኢቱ ሰብኣይ፡ ናይ ልሕጺ እንጣጢዕ ገመድን ዝእምተሉ ዘንግን ኣብ ኢዱ ሒዙ፡ ኣብታ ደገውን ደው ኢሉ ነበረ።⁴እዚ ሰብኣይ እዚ ኸኣ፡ ኣታ ወዲ ሰብ፡ ምእንቲ ኸርእየካ፡ ናብዚ ተመሪሕካ ኢኻ እሞ፡ ነቲ ኣነ ዘርእየካ፡ ናብዚ በዒንትኻ ጠምቶ፡ በእዛንካ ድማ ስምዓዮ፡ ብልብኻ ኸኣ ኣቕልበሉ። እቲ ዝርኣካዮ ዅሉውን ንቤት እስራኤል ንገሮም፡ በለኒ።
   ⁵እንሆ ኸኣ፡ ነታ ቤት ብወጻኢ መንደቕ ከቢብዋ ነበረ። እቲ ሰብኣይ ኣብ ኢዱ ሒዝዋ ዝነበረ መኣመቲት ሻምብቆ ኸኣ ምንዋሓ ሹድሽተ እመት እያ። እተን እመት ድማ አእመትን ስድርን እየን። ንሱ ወርዲ እቲ መንደቕ ኣመተ፡ ሓንቲ ሻምብቆ ዀነ፡ ቍመቱውን ሓንቲ ሻብምቆ።⁶ድሕርዚ ናብታ ኣብ ወገን ምብራቕ ዘላ ደገ መጸ፡ ብደረጃታታ ኸኣ ደየበ። ነታ መድረኽ እታ ደገ ድማ ኣመታ፡ ወርዳ ሓንቲ ሻምብቆ ዀነት፡ እታ ኻልኣይቲውን ወርዳ ሓንቲ ሻምብቆ።⁷ነፍሲ ወከፍ ክፍሊ ከኣ ምንዋሓ ሓንቲ ሻምብቆ፡ ወርዳ ድማ ሓንቲ ሻምብቆ እያ። ምርሕሓቕ እተን ክፍልታት ከኣ ሓሓሙሽተ እመት እዩ። እታ ኣብታ ናይ ደገ ገበላ ዘላ መድረኽ እታ ደገ ብወገን ውሽጢውን ሓንቲ ሻምብቆ ዀነት።⁸ነቲ ብወገን ውሽጢ ዘሎ ገበላ እታ ደገ ኣመተ፡ ሓንቲ ሻምብቆውን ኰነ።⁹ንገበላ እታ ደገ ኣመቶ፡ ሾሞንተ እመት ከኣ ዀነ፡ ኣዕኑድ ሰቕሰቓ ድማ ከክልተ እመት ኰነ። ገበላ እታ ደገውን ብወገን ውሽጢ እዩ።¹⁰እተን ናይቲ ናብ ምብራቕ ዘብል ደገ ክፍልታት ሰለስተ በዚ ሰለሰተ ድማ በቲ እየን። ሰለስቲኤን ልክዕ ሓደ ስፍሪ እየን፡ እተን ኣዓኑድ ከኣ በዝን በትን ልክዕ ሓደ ስፍሪ እየን።¹¹ወርዲ እታ ደገ ኣመቶ፡ ዓሰረተ እመት ከኣ ዀነ። ምንዋሕ እታ ደገ ድማ ዓሰርተው ሰለስተ እመት ኰነ።¹²ኣብ ቅድሚ እተን ክፍልታት ዘሎ ሕዳጋት ድማ ሓንቲ እመት በዚ ሓንቲ እመትውን በቲ እዩ። እተን ክፍልታት ከኣ በዚ ወገን እዝን በቲ ወገን እትን ሸሽዱሽተ እመት እዩ።¹³ነቲ ደገ ኻብ ናሕሲ እታ ሓንቲ ቤት ክሳዕ ናሕሲ እታ ኻልአይቲ አመተ፡ ወርዱ ኸኣ፡ ካብ ደገ ንደገ ዕስራን ሓሙሽተን እመት ኰነ።¹⁴ነቲ ኣዕኑድ ሰቕሰቕ ድማ ብዙርያኡ ኽሳዕ እቲ ዓንዲ ኣጸድ ደገ ስሳ እመት ገበሮ።¹⁵ካብ ግምባር እታ ኣፍ ደገ ኽሳዕ ግምባር ገበላ እታ ውሽጣዊት ደገ ድማ ሓምሳ እመት እዩ።¹⁶ኣብተን ክፍልታትን ኣብተን ኣብ ውሽጢ ደገ ዘለዋ ኣዕንኑድን ብዅሉ ዙርያኤን ዓይነ ርግቢ ዘለዎ መሳዅቲ ነበረን። ከምኡውን ኣብተን ገበላታት ብወገን ውሽጠን ብዅሉ ዙርያኤን መሳዅቲ ነበረን። ኣብ ልዕሊ እተን ኣዕኑድ ከኣ ስየታት ነበረ።
   ¹⁷ናብቲ ወጻኢ ኣጸድ ድማ ወሰደኒ፡ እንሆ ኸኣ፡ ኣብኡ ክፍልታት ኣባይቲ ነበረ፡ ዙርያ እቲ ኣጸድውን ብእምኒ ተነጺፉ ነበረ። ኣብቲ እምኒ እተነጽፎ ድማ ሰላሳ ኽፍሊ ቤት ነበረ።¹⁸እቲ ብእምኒ እተነጽፈ ምድሪ ኣብ ጥቓ ደጌታት እዩ፡ ልክዑ ኸኣ ከም ምንዋሕ እቲ ደጌታት እዩ። እዚ እቲ ታሕታይ ብእምኒ እተነጽፈ ምድሪ እዩ።¹⁹ካብ ቅድሚ እታ ታሕተይቲ ደገ ሒዙ ኽሳዕ እታ ውሽጣዊት ኣጸድ ብወጻኢ ነቲ ወርዳ ኣመቶ፡ ብወገን ምብራቕን ሰሜንን ከኣ መሚእቲ እመት እዩ።
   ²⁰ነቲ ንሰሜን ገጹ ዘሎ ናይ ወጻኢ ኣጸድ ደገ ምንዋሑን ወርዱን ኣመቶ።²¹ክፍልታት በዚ ሰለስተ፡ ሰለስተ ኸኣ በቲ ነበረ። ኣዕኑድ ሰቕሰቑን ገበላታቱን፡ ከምቲ ስፍሪ እታ ቐዳመይቲ ደገ፡ ንዋሑ ሓምሳ እመት፡ ወርዱውን ዕስራን ሓሙሽተን እመት እዩ።²²መሳዅታን ገበላኣን ስየታታን ብልክዕ እታ ናብ ምብራቕ እተብል ደገ እዩ። መደያይቦኣ ኸኣ ሾብዓተ ደረጃ እዩ፡ ገበላታት ድማ ኣብ ቅድሚኡ ነበረ።²³ደገ እታ ውሽጣዊት ኣጸድ ድማ በንጻር እተን ንምብራቕን ንሰሜንን ዝርእያ ደጌታት እያ። ካብታ ሓንቲ ደገስ ክሳዕ እታ ሓንቲ ደገ ኣመተ፡ ሚእቲ እመት ከኣ ዀነ።
   ²⁴ድሕርዚ ናብ ደቡብ ኣቢሉ መርሓኒ፡ እንሆ ኸኣ፡ ናብ ደቡብ እተርኢ ደገ እያ። ነዕኑዳን ገበላታትን ከኣ ክንዲ እተን መስፈሪ ኣመተን።²⁵ከምተን መሳዅቲ ኸኣ ኣብኣን ኣብ ዙርያ ገበላታትን መሳዅቲ ነበራ። ምንዋሓ ሓምሳ እመት፡ ወርዳውን ዕስራን ሓሙሽተን እመት እዩ።²⁶መደያይቦኣ ኸኣ ሾብዓተ ደረጃ እዩ፡ ገበላታታ ድማ ኣብ ቅድሚኡ እዩ። ኣብ ርእሲ ኣዕኑዱ ኸኣ ስየታት፡ ሓደ በዚ፡ ሓደ በቲ ነበረ።²⁷እታ ውሽጣዊት ኣጸድ ብወገን ደቡብ ደገ ኣለዋ። ካብታ ሓንቲ ደገስ ናብታ ሓንቲ ኣብ ወገን ደቡብ ዘላ ደገ ኣመተ፡ ሚእቲ እመት ከኣ ዀነ።
   ²⁸በታ ደገ ደቡብ ኣቢሉ ድማ ናብታ ውሽጣዊት ኣጸድ ኣእትወኒ። ነታ ደገ ደቡብ ከኣ ክንዲ እተን መስፈሪ ኣመታ።²⁹እቃቤታታን ኣዕኑዳን ገበላታታን ከኣ ክንዲ ኣቲ መስፈሪ እዩ። ኣብኣን ኣብ ዙርያ ገበላታታን ድማ መሳዅቲ ኣለዋ። ምንዋሓ ሓምሳ እመት፡ ወርዳውን ዕስራን ሓሙሽተን እመት እዩ።³⁰ዕስራን ሓሙሽተን እመት ዝምንዋሑ፡ሓሙሽተ እመት ከኣ ዝወርዱ ገበላታት ብዙርያኣ ኣሎ።³¹ገበላታቱ ናብቲ ኣብ ወጻኢ ዘሎ ኣጸድ ኣቢሉ እዩ። ኣብ ርእሲ ኣዕኑድ ሰቕሰቑ ኸኣ ስየታት ኣሎ፡ መደያይቦኡ ሾሞንተ ደረጃ እዩ።
   ³²ናብታ ኣብ ምብራቕ ዘላ ውሽጣዊት ኣጸድ ወሰደኒ እሞ ነታ ደገ ክንዲ እቲ መስፈሪ ኣመታ።³³እቃቤታታን ኣዕኑድ ሰቕሰቓን ገበላታታን ክንዲ እቲ መስፈሪ እዩ፡ ኣብኣን ኣብ ዙርያ ገበላታታን መሳዅቲ ኣሎ። ምንዋሓ ሓምሳ እመት፡ ወርዳ ኸኣ ዕስራን ሓሙሽተን እመት እያ።³⁴ገበላታታ ናብቲ ኣብ ወጻኢ ዘሎ ኣጸድ ኣቢሉ እዩ። ኣብ ርእሲ ኣዕኑዳ ድማ ስየታት በዝን በትን ኣሎ። መደያይቦኣውን ሸሞንተ ደረጃ እዩ።
   ³⁵ናብ ሰሜናዊት ደገ ወሰደኒ፡ ክንዲ እቲ መስፈሪ ኸኣ ኣመቶ፡³⁶እቃቤታታን ኣዕኑድ ሰቕሰቓን ገበላታታን ከኣ ከምኡ፡ መሳዅቲውን ብዙርያኣ ኣሎ። ምንዋሓ ሓምሳ እመት፡ ወርዳ ድማ ዕስራን ሓሙሽተን እመት እዩ።³⁷ኣዕኑድ ሰቕሰቓ ናብቲ ኣብ ወጻኢ ዘሎ ኣጸድ ኣቢሉ እዩ፡ ኣብ ርእሲ ኣዕኑዳ ኸኣ በዝን በትን ስየታት ኣሎ፡ መደያይቦኣውን ሾሞንተ ደረጃ እዩ።
   ³⁸ኣብ ጥቓ እተን ኣዕኑድ ሰቕሰቕ ደጌታት ድማ ሓንቲ ኽፍሊ ቤት ምስ መእተዊኣ ኣላ። ኣብኣውን መስዋእቲ ምሕራር ይሓጽቡ ነበሩ።³⁹ኣብታ ገበላ ደገ ኸኣ፡ መስዋእቲ ምሕራርን መስዋእቲ ሓጢኣትን መስዋእቲ ዕዳን ዝሓርዱሉ ኽልተ ሰደቓ በዚ፡ ክልተ ሰደቓ ድማ በቲ ኣሎ።⁴⁰ኣብ ጥቓ እቲ ብወጻኢ ዘሎ ናብ ደገ ሰሜን ዘደይብ መደያይቦ ኸኣ ክልተ ሰደቓ ኣሎ፡ ኣብቲ ኻልእ ወገን እታ ገበላ ደገ ድማ ክልተ ሰደቓ ኣሎ።⁴¹እምብኣርስ ኣብ ጥቓ እታ ደገ ኣርባዕተ ሰደቓ በዚ፡ ኣርባዕተ ሰደቓ ኸኣ በቲ ኣሎ፡ እዚ መስዋእቲ ዝሓርዱሉ ሸሞንተ ሰደቓ እዩ።⁴²ንመስዋእቲ ምሕራር ዝኸውን ካብ ውቑር እምኒ እተገብረ ኣርባዕተ ሰደቓ ኣሎ። ምንዋሑ እመትን ስድርን፡ ወርዱ እመትን ስድርን፡ ምብራኹ ሓደ እመት እዩ። ኣብኡውን ነቲ ንመስዋእቲ ምሕራርን ንመስዋእትን ዝሓርዱሉ መሳርያ ዝንበሮ እዩ።⁴³ሰስድሪ ዝምንዋሑ ኵላባት ብውሽጢ ኣብ ዙርያኡ ተጋጢሙ ኣሎ። እዚ ሰደቓታት እዚ እቲ ስጋ መስዋእቲ ዝንበሮ እዩ።
   ⁴⁴ኣብ ውሽጣዊ ኣጸድ ኣብ ወጻኢ እታ ውሽጣዊት ደገ ኸኣ ንመዘምራን እተገብረ ኽፍልታት ኣባይቲ ኣሎ። ሓንቲ ኣብ ጥቓ እታ ሰሜናዊት ደገ ናብ ደቡብ ኣቢላ እያ። እታ ሓንቲውን ኣብ ጥቓ እታ ምብራቓዊት ደገ ኣላ፡ ገጻ ኸኣ ናብ ሰሜን ኣቢላ እያ።⁴⁵ንሱውን በለኒ፡ እዛ ንደቡብ ኣቢላ ዘላ ኽፍሊ ቤት ነቶም ነታ ቤት ከገልግሉ እተመደቡ ኻህናት እያ።⁴⁶እዛ ንሰሜን ኣቢላ ዘላ ኽፍሊ ቤት ድማ ነቶም ኣብታ መሰውኢ ኸገልግሉ ዝነቕሑ ኻህናት እያ። ንሳቶም ከገልግልዎ ናብ እግዚኣብሄር ዝቐርቡ ኻብ ደቂ ሌውስ ደቂ ጻዶቅ እዮም።⁴⁷ነቲ ኣርባዕተ ዝመኣዝኑ ኣጸድ ኣመቶ፡ ምንዋሑ ሚእቲ እመት፡ ወርዱውን ሚእቲ እመት እዩ። እቲ መሰውኢ ኸኣ ኣብ ቅድሚ እታ ቤት እዩ ዘሎ።
   ⁴⁸ናብ ገበላ እታ ቤት ከኣ ወሰደኒ፡ ነቲ ኣዕኑድ ሰቕሰቕ እታ ገበላ ድማ ኣመቶ፡ ሓሙሽተ እመት በዚ፡ ሓሙሽተ እመት በቲ እዩ። ወርዲ እታ ደገ ኸኣ ሰለስተ በዚ፡ሰለስተ እመት በቲ እዩ።⁴⁹ምንዋሕ እታ ገበላ ዕስራ እመት፡ ወርዳ ኸኣ ዓሰርተው ሓደ እመት እዩ፡ በቲ ደረጃታት ድማ ይድይብዋ ነበሩ። ኣብ ጥቓ እቲ ኣዕኑድ ሰቕሰቕ ከኣ ሓደ በዚ፡ ሓደውን በቲ ኣዕኑድ ኣሎ።

ትን. ህዝቅኤል ምዕራፍ 41

   ¹ናብታ መቕደስ ድማ ኣእተወኒ። ነቲ ዓንዲ ሰቕሰቕውን ኣመቶ፡ እቲ ወርዱ ኸም ወርዲ እታ ድንኳን፡ ሹድሽተ እመት በዚ፡ ሹድሽተ እመት ከኣ በቲ ዀነ፡²ወርዲ እታ ኣፍ ደገ ኸኣ ዓሰርተ እመት እዩ፡ ገንዚ እታ ኣፍ ደገ ድማ ሓሙሽተ እመት በዚ፡ ሓሙሽተ እመት ከኣ በቲ እዩ። ምንዋሓ ኣርባዓ እመት፡ ወርዳውን ዕስራ እመት ኣመተ።³ድሕርዚ ናብ ውሽጢ ኣተወ እሞ ንሰቕሰቕ እታ ኣፍ ደገ ኽልተ እመት፡ ነታ ኣፍ ደገ ኸኣ ሹድሽተ እመት ኣመቶ።⁴ነቲ ቕድሚ መቕደስ ምነዋሑ ዕስራ እመት፡ ወርዱ ኸኣ ዕስራ እመት ኣመት። እዚኣ እታ ቅድስቲ ቅዱሳን እያ፡ ከኣ በለኒ።
   ⁵ድሕርዚ መንደቕ እታ ቤት ሹድሽተ እመት ኣመተ። ኣብ ዙርያ እታ ቤት ብዅሉ ወገና ዘለዋ ኽፍልታት ኣባይቲ ኸኣ ወርደን ኣኣርባዕተ እመት ኣመተ።⁶እተን ብጎቦታታ ዝነበራ ኽፍሊ ኣባይቲ ሓደ ኣብ ልዕሊ እቲ ሓደ ሰለስተ ደርቢ ዘለወን ሰላሳ እየን። ኣብ መንደቕ እታ ቤት ከይተጸግዓስ፡ ኣብቲ ኣብ ዙርያ ኽፍልታት ኣባይቲ ዘሎ መንደቕ እታ ቤት ክጸግዓ፡ ኣብኡ ተጋጢመን እየን።⁷ኣብ ዙርያ እታ ቤት ካብ ደርቢ ናብ ደርቢ ዝዘውር መደያይቦ ነበረ እሞ፡ እቲ ኽፍልታት ኣባይቲ ብዙርያ ንላዕሊ ኣቢሉ ብዝወጸሉ መጠን እናገፍሐ እዩ ዝኸይድ። ስለዚ ምግፋሕ እታ ቤት ናብ ላዕሊ ኣቢሉ እዩ። ከምኡውን ካብ ታሕትስ ብላዕሊ ብማእከላይ ኣቢሉ መደየቢ ኣለዋ።⁸ኣነ ኸኣ ነታ ቤት ብዙርያኣ ልዕል ዝበለ መሰረት ከም ዘለዋ ርአኹ። እቲ መሰረት እተን ብጎቦ ዝነበራ ኽፍልታት ኣባይቲ ድማ በታ ሻምብቆ ሹድሽተ እመት ልክዕ እዩ።⁹እተን ብጎቦ ዘለዋ ኽፍልታት ኣባይቲ እተሃንጻሉ መንደቕ፡ ወርዱ ብወጻኢ ሓሙሽተ እመት እዩ። ኣብ መንጎ እተን ብጎቦ ዝነበራ ኽፍልታት ኣባይቲ ኸኣ ንኣምፉ ዝነብር ቦታታት ኣሎ።¹⁰ኣብ መንጎ እተን ክፍልታት ኣባይቲ ድማ ብዙርያ እታ ቤት ዐዕስራ እመት እዩ።¹¹ደጌታት እተን ቤት ብጎቦ ዘለዋ ኽፍልታት ኣባይቲ ኸኣ ናብቲ ንኣምፉ ዝነበር ቦታታት፡ሓንቲ ደገ ንሰሜን፡ ሓንቲ ኸኣ ንደቡብ ኣቢለን እየን። እቲ ንኣምፉ ዘሎ ቦታ ኸኣ ብዙርያኡ ወርዱ ሓሓሙሽተ እመት እዩ።
   ¹²እቲ ኣብ ቅድሚ እቲ ንኣምፉ ዘሎ ሕዳግ እተሃንጸ ንምዕራብ ወገኑ ወርዱ ሰብዓ እመት እዩ። ናይቲ እተሃንጸ ገንዚ መንደቕ ብዙርያኡ ሓሙሽተ እመት እዩ፡ምንዋሑ ኸኣ ተስዓ እመት እዩ።¹³ነታ ቤት ድማ ኣመታ፡ ምንዋሓ ሚእቲ እመት ኰነት። እቲ ንኣምፉ ዘሎ ቦታን እቲ ህኑጽን መንደቑን ከኣ ምንዋሑ ሚእቲ እመት ኰነ።¹⁴ቅድሚት እታ ቤት ምስ ናይ እቲ ናብ ምብራቕ ኣቢሉ ንኣምፉ ዘሎ ቦታ፡ ወርዱ ሚእቲ እመት እዩ።
   ¹⁵ንሱ ኸኣ ነቲ ኣብ ቅድሚት እቲ ንኣምፉ ዝዀነ ቦታ ኽሳዕ እቲ ብወገን ድሕሪት ዘሎ ህንጻን፡ ነቲ በዝን በትን ዘሎ መተሓላለፊኡን ኣመቶ፡ ምንዋሑ ድማ ሚእቲ እመት ኰነ። እታ ውሽጣዊት መቕደስን እቲ ገበላታት እቲ ኣጸድን፡¹⁶መድረኻትን እቲ ብሽቦ እተገብረ መሳዅትን ኣብ ዙርያ እተን ሰለስተ ደርብታት ዘሎ መተሓላለፍን ኣንጻር እቲ ልዳት፡ ካብ ምድሪ ጀሚሩ ኽሳዕ እቲ መሳዅቲ ብዙርያኡ ብሉሕ ተኸድኑ እዩ፡ እቲ መሳዅቲ ድማ ክዱን እዩ።¹⁷ካብ ልዕሊ እታ ደገ ኽሳዕ እታ ውሽጣዊት ቤት፡ ብወጻእን ብዙርያ ዅሉ እቲ መንደቕን፡ ብኣታዊኡን ብወጻኢኡን ብልክዕ እዩ።¹⁸ኪሩቤልን ስየን ተቐሪጽዎ ኣሎ። ኣብ መንጎ ኪሩቤልን ኪሩቤልን ከኣ ሓንቲ ስየ ኣላ። ነፍሲ ወከፍ ኪሩቤል ከኣ ከክልተ ገጽ ኣለዎ።¹⁹ነታ ስየን ናብዚ ወገና ገጽ ሰብ፡ ነታ ስየስ ናብቲ ወገና ኸኣ ገጽ ኣንበሳ ኣለዋ። ንብዘላ እታ ቤት ብዅሉ ዙርያኣ ኸምኡ ተገይርዋ እዩ።²⁰ካብ ምድሪ ሒዙ ኽሳዕ እቲ ልዕሊ ደጊኣ ኪሩቤል ስየን ተቕሪጽዎ ኣሎ። እቲ መንደቕ እታ ቤተ መቕደስውን ከምኡ እዩ።²¹ልዳውቲ እታ መቕደስ ኣርባዕተ ዝመኣዝኑ እዩ። ደገ እታ ቅድስቲ ቦታ ድማ ትርኢቱ ኸምኡ እዩ።²²እቲ መሰውኢ ድማ ካብ ሉሕ እተገብረ እዩ። ቍመቱ ሰለስተ እመት፡ ምንዋሑ ኽልተ እመት እዩ። መኣዝን ከኣ ኣለዎ፡ ግድጊዳኡ ኸኣ ሉሕ እዩ። ንሱውን፡ እዚኣስ እታ ኣብ ቅድሚ እግዚኣብሄር ዘላ መኣዲ እያ፡ በለኒ።²³ንታ መቕደስን ቅድስቲ ቦታን ክልተ ማዕጾ ኣለዋአን።²⁴ነፍሲ ወከፍ ማዕጾ ድማ ክልተ መቃን፡ ኣብ ከክልተ ዝዕጸፉ መቃን፡ ነታ ሓንቲ ማዕጾ ኽልተ መቃን፡ ነታ ኻልኣይቲ ኸኣ ክልተ መቃን ኣለዋአን።²⁵ከምቲ ኣብ መንደቕ ዘሎ፡ ኣብተን ደጌታት መቕደስ ከኣ ኪሩቤልን ስየን ተቐሪጽወን ኣሎ። ኣብ ወጻኢ እቲ ገጽ ገበላ ኸኣ ካብ ረጕድ ኦም እተገብረ ናሕሲ ኣሎ።²⁶ኣብ ጎቦታት እታ ገበላ ኸኣ በዝን በትን ዓይኒ ርግቢ ዘለወን መሳዅትን ስየን ኣለዋ። እተን ብጎቦ ዝነበራ ኽፍልታት ኣባይቲ እቲ ህንጻን እቲ ናሕሲ ዕጨይትን ከኣ ከምኡ እዩ።

ትን. ህዝቅኤል ምዕራፍ 42

   ¹ድሕርዚ ንሱ ናብቲ ሰሜን ዘብል መገዲ ናብ ወጻኢ ኣጻድ ኣውጽኣኒ። ናብቲ ኣብ ቅድሚ እቲ ንኣምፉ ዘሎ ቦታን ኣብ ግምባር እቲ ናብ ሰሜን ዝርኢ ህንጻን ዘሎ ኽፍሊ ቤት ከኣ ኣእተወኒ።²እታ ደጊኣ ናብ ሰሜን ኣቢላ እትርኢ፡ ምንዋሓ ሚእቲ እመት ወርዳ ኸኣ ሓምሳ እመት እዩ።³ኣብ ኣንጻር እታ ዕስራ ዝእመታ ውሽጣዊት ኣጻድ፡ ኣብ መንጽር እቲ ኣብ ወጻኢ ኣጸድ ዘሎ ምድሪ ቤት እምኒ ኸኣ መተሓላለፊ ኣብቲ ሰለስተ ደርቢ ኣሎ።⁴ኣብ ቅድሚ እተን ክፍልታት ኣባይቲ ድማ ዓሰርተ እመት ዝወርዱ መተሓላለፊ ኣሎ። ናብ ውሽጢ ኸኣ ሓደ ዝእመቱ መገዲ ኣሎ። ደጌታታውን ናብ ሰሜን ኣቢለን እየን።⁵እቲ መተሓላለፊታት ቦታ ስለ ዝወሰደለን፡ እተን ላዕሎት ክፍልታት ኣባይቲ ካብተን ታሕቶትን ማእከሎትን ናይቲ ህንጻ እየን።⁶ንሳተን ሰለስተ ደርቢ እየን እሞ፡ ኣዕኑድሲ ኸምተን ናይ ኣጸድ ኣዕኑድ የብለንን። ስለዚ ካብ ምድሪ ቤት ሒዙ እተን ላዕሎት ክፍልታት ኣባይቲ ካብተን ታሕቶትን ማእከሎትን ይጸባ እየን።^7-8እተን ኣብ ወጻኢ ዘለዋ ኽፍልታት ኣባይቲ ምንዋሐን ሓምሳ እመት እዩ። እቲ ኣብ ኣንጻር ቤር መቕደስ ዘሎውን ሚእቲ እመት እዩ እሞ፡ እቲ ኣብ ቅድሚ ኽፍልታት ኣባይቲ ናብቲ ወጻኢ ኣጻድ ዘብል፡ ኣብ ወጻኢ፡ ኣብ ኣንጻር እቲ ኽፍልታት ኣባይቲ ዘሎ መንደቕ ምንዋሑ ሓምሳ እመት እዩ።⁹ነቶም ካብ ወጻኢ ኣጸድ ዝኣትዉ፡ ኣብ ትሕቲ እዘን ክፍልታት ቤት እዝኤን ብወገን ምብራቕ መእተዊ ኣሎ።
   ¹⁰ኣብ ወገን ምብራቕ ኣብ ገንዚ እቲ መንደቕ ኣጻድ፡ ኣብ ቅድሚ እቲ ንኣምፉ ዘሎ ቦታን ኣብ ቅድሚ እቲ ህኑጽን ክፍልታት ኣባይቲ ኣለዋ።¹¹ኣብ ቅድሚኤን ከኣ፡ ከምቲ ናብ ሰሜን ዘብል ክፍልታት ኣባይቲ መተሓላለፊ ኣሎ፡ ምንዋሐንን ወርደንን፡ መውጽኢአንን ስርዓተንን ደጊአንን ማዕረ ማዕረ እዩ።¹²ከምተን ናብ ደቡብ ዘብላ ደጌታት ክፍልታት ኣባይቲ፡ ኣብ ርእሲ እታ መገዲ ደገ ኣሎ። ንሳውን ነቶም ካብ ምብራቕ ዝኣትዉ ኣብ ቅድሚ እቲ መንደቕ ዘላ እያ።¹³በለኒውን፡ እዘን ኣብ ቅድሚ እቲ ንኣምፉ ዘሎ ቦታ ናይ ሰሜንን ደቡብን ክፍልታት ኣባይቲ ቅዱሳት ክፍልታት ኣባይቲ እየን። ኣብአን እቶም ናብ እግዚኣብሄር ዝቐርቡ ኻህናት ነቲ ኣዝዩ ቅዱስ ነገር ክበልዑ እዮም። ቅዱስ ቦታ እዩ እሞ፡ ኣብኡ ነቲ ኣዝዩ ቅዱስ ነገር መስዋእቲ እኽልን መስዋእቲ ሓጢኣትን መስዋእቲ ዕዳን ከንብሩ እዮም።¹⁴እቶም ካህናት ምስ ኣተዉ፡ እተን ዘገልግሉለን ኣልባሳት ቅዱሳት እየን እሞ፡ ኣብኡ ከየንብርወን፡ ካብታ መቕደስ ናብ ወጻኢ ኣጸድ ኣይውጽኡ፡ ካልእ ክዳውንቲ ይከደኑ እሞ ናብቲ ንህዝቢ እተመደበ ቦታ ይውጽኡ።
   ¹⁵ነታ ውሽጣዊት ቤት ኣሚቱ ምስ ወድአ፡ በታ ናብ መገዲ ምብራቕ እተብል ደገ ኣውጽኣኒ፡ በዝን በትን ብዙርያኡ ኣመታ።¹⁶ነቲ ወገን ምብራቕ በታ መኣመቲት ሻብምቆ ኣመቶ፡ በዛ መኣመቲት ሻምብቆ ኸኣ ብዙርያኡ ሓሙሽተ ሚእቲ ሻምብቆ ዀነ።¹⁷ነቲ ወገን ሰሜን ከኣ ኣመቶ፡ በታ መኣመቲት ሻምብቆ ድማ ብዙርያኡ ሓሙሽተ ሚእቲ ሻምብቆ ዀነ።¹⁸ነቲ ወገን ደቡብ ከኣ ኣመቶ፡በታ መኣመቲት ሻምብቆ ሓሙሽተ ሚእቲ ሻምብቆ ዀነ።¹⁹ናብቲ ወገን ምብራቕ ዞረ፡ በታ መኣመቲት ሻምብቆ ድማ ሓሙሽተ ሚእቲ ሻምብቆ ኣመቶ።²⁰ነቲ ኣብ ዙርያኡ ዘሎ መንደቕ በርባዕቲኡ ወገን ኣመቶ፡ ምንዋሑ ሓሙሽተ ሚእቲ ፡ ወርዱ ኸኣ ሓሙሽተ ሚእቲ ዀነ። እዚ ነቲ ቅዱስ ካብቲ ዘይቅዱስ ዝፈሊ እዩ።

ትን. ህዝቅኤል ምዕራፍ 43

   ¹ድሕርዚ ናብቲ ደገ፡ ናብቲ ንምብራቕ እትርኢ ደገ ኣውጽኣኒ።²እንሆ ኸኣ፡ ክብሪ ኣምላኽ እስራኤል ካብ ምብራቕ ኣቢሉ መጸ። ድምጺ ድማ ከም ህማም ብርቱዕ ማያት ነበረ። ምድሪውን ብኽብሩ በርሄት።³እቲ ኣነ ዝርአኽዎ ራእይ ድማ ከምቲ ነታ ኸተማ ኸጥፍእ ምስ መጻእኩ ዝርአክዎ ራእይ እዩ። እዚ ራእያት እዚ ኸኣ ከምቲ ኣብ ርባ ኬባር ዝርአኽዎ ራእይ እዩ። ኣነውን ብገጸይ ፍግም ኢለ ወደቕኩ።⁴ክብሪ እግዚኣብሄር ድማ በታ ናብ ምብራቕ እተርኢ ደገ ናብታ ቤት ኣተወ።⁵መንፈስ ሓፍ ኣበለኒ፡ ናብታ ውሽጣዊት ኣጸድ ከኣ ኣእተወኒ፡ እንሆውን፡ ክብሪ እግዚኣብሄር ነታ ቤት መልኣ።⁶ኣነ ኸኣ ካብታ ቤት ሓደ ኽዛረበኒ ኸሎ ሰማዕኩ፡ ኣብ ጥቓይ ድማ ሰብኣይ ደው ኢሉ ነበረ።
   ⁷በለኒውን፡ ኣታ ወዲ ሰብ፡ እታ ኣብ ማእከል ደቂ እስራኤል ንሓዋሩ ዝነብረላ ቦታ ዝፋነይን እግረይ ዝረግጻ ቦታን እዚኣ እያ።ቤት እስራኤል፡ ንሳቶምን ነገስታቶምን ነቲ ቅዱስ ስመይ ብምንዝርናኦምን ብሬሳ ነገስታቶምን ኣብቲ በረኽቲ ቦታኦም ድሕርዚ ኣይከርስክዎን እዮም።⁸መንደቕ ጥራይ ኣብ መንጎይን መንጎኦምን ክሳዕ ዝኸውን፡ መድረኾም ኣብ ጥቓ መድረኸይ፡ ልዳቶም ኣብ ጥቓ ልዳተይ ገበሩ። በዚ ዝገበርዎ ጽያፍ ነቲ ቅዱስ ስመይ ኣርከስዎ፡ ስለዚ ድማ ብቝጥዓይ ኣጥፋእክዎም።⁹ሕጂ ንምንዝርናኦምን ንሬሳ ነገስታትምን ካባይ ከርሕቑ እዮም፡ ኣነውን ንሓዋሩ ኣብ ማእከሎም ክነብር እየ።
   ¹⁰ኣታ ወዲ ሰብ፡ ብኣበሳኦም ክሓፍሩስ ንቤት እስራኤል እዛ ቤት እዚኣ ኣርእዮም፡ ኣተሃናንጻኣ ኸኣ ኣለክዓዮም።¹¹በቲ ዝገበርዎ ዅሉ እንተ ሓፈሩስ፡ ምስላን ስርዓታን ዘበለ ዅሉ ምእንቲ ኽሕልውዎን ክገብርዎን፡ ምስሊ እታ ቤትን ኣሰራርዕኣን ነቲ መውጺኢኣን መእተዊኣን ኵሉ ምስላን ኵሉ ስርዓታን፡ ኵሉ ምስላን ኵሉ ሕጋጋታን ኣፍልጦም፡ ኣብ ቅድሚ ኣዒንቶም ከኣ ጽሓፎ።¹²ሕጊ እታ ቤት ድማ እዚ እዩ፡ እቲ ኣብ ዝባን እቲ ኸረን ኣብ ኵሉ ዙርያኡ ዘሎ ቦታ ኣዝዩ ቅዱስ እዩ፡ እንሆ፡ ሕጊ እታ ቤት እዚ እዩ።
   ¹³ልክዕ እታ መሰውኢ ድማ ብእመትሲ እዚ እዩ፦ እታ እመት ከኣ እመትን ስድርን እያ፦ እግሩ ሓደ እመት ወርዱ ኸኣ ሓደ እመት እዩ። ብዘሎ ዙርያ ኸንፈራውን ገንዙ ሓደ ስድሪ እዩ። እዚ መሰረት እቲ መሰውኢ እዩ።¹⁴ካብ ምድሪ ጀሚሩ ኽሳዕ እቲ ታሕታይ ሕዳግ ክልተ እመት፡ ወርዱ ኸኣ ሓደ እመት እዩ። ካብቲ ታሕታይ ሕዳግ ጀሚሩ ኽሳዕ እቲ መወዳእታ ሕዳግ ድማ ኣርባዕተ እመት፡ ወርዱን ሓደ እመት እዩ።¹⁵እቲ ዝባን መሰውኢ ኣርባዕተ እመት እዩ፡ ካብቲ መእጐድ ሓዊ መሰውኢ ንላዕሊ ኣቢሉ ኸኣ ኣርባዕተ ቐርኒ ኣሎ።¹⁶እቲ ናይ መሰውኢ መእጐድ ሓዊ ምንዋሑ ዓሰርተው ክልተ እመት፡ ወርዱ ኸኣ ዓሰርተው ክልተ እመት እዩ። ኣርባዕቲኡ መኣዝኑውን ማዕረ ማዕረ እዩ።¹⁷እቲ ሕዳግ ከኣ በርባዕተ ወገኑ ምንዋሑ ዓሰርተው ኣርባዕተ እመት፡ ወርዱውን ዓሰርተው ኣርባዕተ እመት ማዕረ ማዕረ እዩ። እቲ ኣብ ዙርያኡ ዘሎ ኸንፈር ድማ ፈረቓ እመት፡ እግሩ ኸኣ ብኽቡ ሓደ እመት እዩ። ደረጃታቱውን ናብ ምብራቕ ገጹ እዩ።
   ¹⁸በለኒ ድማ፡ ኣታ ወዲ ሰብ፡ እግዚኣብሄር ኣምላኽ ከምዚ ይብል ኣሎ፡ መስዋእቲ ምሕራር ኣብኡ ምእንቲ ከቕርቡ፡ ደም ከኣ ኣብኡ ኽነጽጉስ፡ በቲ ዝስርሓሉ መዓልቲ፡ ስርዓት እቲ መሰውኢ እዚ እዩ፡¹⁹እግዚኣብሄር ኣምላኽ ከምዚ ይብል ኣሎ፡ ነቶም ከገልግሉኒ ኢሎም ዝቐርቡኒ፡ ካብ ዘርኢ ጻዶቅ ዝዀኑ ሌዋውያን ካህናት ንመስዋእቲ ሓጢኣት ዝኸውን ዝራብዕ ክትህቦም ኢኻ።²⁰ንስኻ ድማ ካብቲ ደሙ ኽትወስድ፡ ኣብቲ ኣርባዕተ ቐርኑን ኣብቲ ኣርባዕተ መዛን ሕዳጋትን ኣብቲ ኸንፈሩን ኣብ ዙርያኡ ኽትገብሮ ኢኻ፡ በዚ ኸምዚ ኸተጽርዮን ከተትዓርቖን ኢኻ።²¹ነቲ ዝራብዕ መስዋእቲ ሓጢኣት ክትወስዶ ኢኻ፡ ኣብ ወጻኢ መቕደስ፡ ኣብቲ እተወሰነሉ ቦታ እታ ቤት ድማ ክነድድ እዩ።²²ብኻልኣይ መዓልቲ ኸኣ ጕድለት ዘይብሉ ድቤላ ንመስዋእቲ ሓጢኣት ከተቕርብ ኢኻ። ከምቲ ብዝራብዕ ገይሮም ዘጽረይዎ፡ ነቲ መሰውኢ ኸጽርይዎ እዮም።²³ምጽራዩ ምስ ፈጸምካ፡ጕድለት ዘይብሉ ዝራብዕ፡ ካብ ኣባጊዕውን ጕድለት ዘይብሉ ድዑል ከተቕብር ኢኻ።²⁴ኣብ ቅድሚ እግዚኣብሄር ከተቕርቦ ኢኻ፡ እቶም ካህናት ድማ ጨው ክንስንሱሎም፡ መስዋእቲ ምሕራር ከኣ ንእግዚኣብሄር ከቕርቡሉ እዮም።²⁵ሾብዓተ መዓልቲ ዕለት ዕለት መስዋእቲ ሓጢኣት ዝኸውን ድቤላ ኸተቕርብ ኢኻ። ጕድለት ዘይብሎም ዝራብዕን ካብ ኣባጊዕ ድማ ድዑልን ክስውኡ እዮም።²⁶ሾብዓተ መዓልቲ ነቲ መሰውኢ ኸተዓርቕዎን ከንጽህዎን ክጽምብልዎን እዮም።²⁷እዘን መዓልትታት እዝኤን ምስ ተፈጸማ፡ በታ ሳምነይቲ መዓልቲ ብድሕሪኣን እቶም ካህናት ኣብቲ መሰውኢ ንመስዋእቲ ምሕራርኩምን ንመስዋእቲ ምስጋናኹምን ከቕርቡ እዮም። ኣነውን ባህ ኢሉኒ ክቕበለኩም እየ፡ ይብል እግዚኣብሄር ኣምላኽ።

ትን. ህዝቅኤል ምዕራፍ 44

   ¹ድሕርዚ ናብ መገዲ እታ ናብ ምብራቕ እትርኢ መጻኢት ደገ መቕደስ መለሰኒ፡ ዕጽውቲ ኸኣ እያ።²እግዚኣብሄር ድማ በለኒ፡ እዛ ደገ እዚኣ ዕጽውቲ ትኹን፡ ኣይትከፈት፡ ሰብውን ኣይእተዋ። እግዚኣብሄር ኣምላኽ እስራኤል ኣትዩላ እዩ እሞ፡ ስለዚ ብዕጽውታ ትንበር።³እቲ መስፍንሲ፡ መስፍን ስለ ዝዀነ፡ ኣብ ቅድሚ እግዚኣብሄር እንጌራ ክበልዕ፡ ኣብኡ ክቕመጥ እዩ። ንሱ ብመገዲ ገበላ እታ ደገ ኽኣቱ፡ ብእእ ኣቢሉውን ክወጽእ እዩ።
   ⁴ድሕርዚ ድማ ብመገዲ እታ ደገ ሰሜን ኣቢሉ፡ ናብ ቅድሚ እታ ቤት ኣምጽኣኒ። ጠመትኩ፡ እንሆ ኸኣ፡ ክብሪ እግዚኣብሄር ነታ ቤት እግዚኣብሄር መሊእዋ ነበረ። ኣነውን ብገጸይ ፍግም ኢለ ወደቕኩ።⁵እግዚኣብሄር ድማ በለኒ፡ ኣታ ወዲ ሰብ፡ ነዚ ኣነ ብዛዕባ ኵሉ ስርዓት ቤት እግዚኣብሄር ኵሉ ሕጋጋታን ዝነግረካ ዘሎኹ፡ ልብኻ ኣውደቐሉ፡ በዒንትኻ ተመልከቶ፡ በእዛንካ ስምዓዮ። ንመእተዊ እታ ቤትን ንዅሉ መውጽኢ እታ ቤት መቕደስን ኣጸቢቕካ ኣስተብህለሉ።⁶ነዞም ዓለውቲ ቤት እስራኤል፡ እግዚኣብሄር ኣምላኽ ከምዚ ይብል ኣሎ፡ በሎም፡ ኣቱም ቤት እስራኤል፡ ርኽሰትኩም ዘበለ ዅሉ ይእከልኩም።⁷እንጌራይን ስብሕን ደምን ከተቕርቡ ኸሎኽኹ፡ ንቤተይ ከርክስዋስ ነቶም ልቦም ዘይተገዝረ፡ ስጋኦምውን ዘየተግዝረ ጓኖት ናብ መቕደሰይ ኣእቲኹምዋም ኢኹም እሞ፡ ንሳቶም ኣብ ልዕሊ ዅሉ ጽያፍኩም ክዳነይ ኣፍረሱ።⁸ኣብታ መቕደሰይ ንእኦም ኣብ ክንዳኹም ንኣገልግሎተይ መዘዝኩምዎም እምበር፡ ነቲ ቅዱስ ነገረይ ባዕልኻትኩም ኣየገልገልኩምዎን።⁹እግዚኣብሄር ኣምላኽ ከምዚ ይብል ኣሎ፡ ካብቶም ኣብ ማእከል ደቂ እስራኤል ዘለዉ ጓኖት፡ ልቡ ዘይተገዝረ፡ ስጋኡውን ዘይተገዝረ ሓደ ወዲ ጓና እኳ ናብ መቕደሰይ ኣይእቶ።¹⁰እቶም ብስሕተት እስራኤል ካባይ ዝረሓቑ፡ ንጣኦታቶም ክስዕቡስ ካባይ ዝረሓቑ ሌዋውያን፡ ግና ኣበሳኦም ክጾሩ እዮም።¹¹ኣብ ደጌታት እታ ቤት ከኣ ሓለውቲ ክዀኑ፡ ኣብታ ቤት ከገልግሉስ፡ ኣብ መቕደሰይ ኣገልገልቲ ክዀኑ እዮም። ንሳቶም ንመስዋእቲ ምሕራርን ንመስዋእቲ እቲ ህዝብን ክሓርዱ፡ ምእንቲ ኸገልግልዎም ከኣ ኣብ ቅድሚኦም ክቘሙ እዮም።¹²ኣብ ቅድሚ ጣኦታቶም ኣገልጊሎምዎም፡ ንቤት እስራኤል ከኣ ናብ ኣበሳ ኣዓንቂፎምዎም እዮም እሞ፡ ስለዚ ንሳቶም ኣበሳኦም ክጾሩ እዮም ኢለ ኢደይ ኣልዓልኩሎም፡ ይብል እግዚኣብሄር ኣምላኽ።¹³ንሳቶም ድማ ነውሮምን ነቲ ዝገበርዎ ጽያፎምን ድኣ ኽጾሩ እዮም እምበር፡ ብመዓርግ ክህነት ከገልግሉኒ፡ ኣብቲ እተቐደሰ ነገረይ ኣብቲ ኣዝዩ ቅዱስ ነገር ክቐርቡስ ናባይ ኣይክቐርቡን እዮም።¹⁴ንዅሉ ዕዮኣን ነቲ ኣብኣ ዝግበር ዘበለ ኵሉን ሓለውቲ እታ ቤት ክዀኑ ኽምዝዞም እየ።
   ¹⁵እቶም፡ ደቂ እስራኤል ካባይ ክርሕቁ ኸለዉ፡ ንምሕላው መቕደሰይ እተጸምዱ ኻብ ወገን ሌዋውያን ዝዀኑ ኻህናት ደቂ ጻዶቅ፡ከገልግሉኒ ኢሎም ክቐርቡኒ፡ ስብሕን ደምን ክስውኡለይ ኣብ ቅድመይ ዝቘሙ እዚኣቶም እዮም፡ ይብል እግዚኣብሄር ኣምላኽ።¹⁶ንሳቶም ናብ መቕደሰይ ክኣትዉ፡ከገልግሉንስ ናብ መኣደይ ክቐርቡ፡ ንኣገልግሎተይውን ክምዘዙ እዮም።¹⁷ብደጌታት እታ ውሽጣዊት ኣጸድ ክኣትዉ ኸለዉ፡ ካብ ልሕጺ እንጣጢዕ እተገብረ ኣልባሳት ክለብሱ እዮም። ኣብ ደጌታት እታ ውሽጣዊት ኣጸድን ኣብ ውሽጥን ከገልግሉ ኸለዉ ገለ ናይ ጸጕሪ ኣይክኽደኑን እዮም።¹⁸ኣብ ኣራእሶም ናይ ልህጺ እንጣጢዕ ሻሽ ክጥምጥሙ፡ ኣብ ሕቝኦምውን ናይ ልሕጺ እንጣጢዕ ስረ ኽዕጠቑ፡ዘርህጽ ነገር ኣይክዕጠቑን እዮም።¹⁹ናብ ወጻኢ ኣጸድ፡ ናብቲ ኣብ ወጻኢ ኣጸድ ዘሎ ህዝቢ ኽወጹ ኸለዉ፡ ብኣልባሳቶም ነቲ ህዝቢ ከይቅድስዎስ፡ እቲ ዘገልገሉሉ ኣልባሳት ከውጽእዎ፡ ኣብ ቅዱስ ክፍልታት ቤት ከኣ ከንብርዎ፡ ካልእ ክዳውንቲውን ክኽደኑ እዮም።²⁰ነቲ ጸጕሪ ርእሶምሲ በብሓጺሩ ደኣ ክቘርጽዎ እዮም እምበር፡ ርእሶም ኣይክላጽዩን፡ ጸጕሮም ድማ ኣይከንውሑን እዮም።²¹ካህን ዘበለ ዅሉ ናብቲ ውሽጢ ኣጸድ ክኣቱ ከሎ፡ ወይኒ ኣይክሰትን እዩ።²²ካብ ዘርኢ ቤት እስራኤል ዝዀነት ድንግል ወይስ ሰበይቲ ኻህን ዝነበረት መበለት ደኣ ኸእትዉ እዮም እምበር፡ መበለት ወይስ ፍትሕቲ ኣይከእትዉን እዮም።²³ንሳቶም ንህዝበይ ነቲ ኣብ መንጎ ቅዱሳን ዘይቅዱስን ዘሎ ምፍላይ ክምህርዎ፡ ነቲ ኣብ መንጎ ርኹስን ንጹህን ዘሎ ምልላይ ከኣ ከፍልጥዎ እዮም።²⁴ኣብ ምጕት ፈራዶ ዀይኖም ክቘሙ፡ ከምቲ ፍርደይ ገይሮም ከኣ ክፈርዱ እዮም። ብዅሉ በዓላት ዓመተይ ንሕጋጋተይን ንስርዓተይን ክሕልዉ፡ ሰናብተይ ክቕድሱ እዮም።²⁵ከይረኽሱስ፡ ናብ ምዉት ሰብ ኣይቕረቡ። በቦን ኣደን፡ ብወድን ጓልን፡ ብሓውን ብዘይተኣትወት ሓብትን ጥራይ ይርከሱ።²⁶ድሕሪ ምንጻሁ ድማ ሾብዓተ መዓልቲ ይቝጸሩሉ።²⁷በታ ኣብታ ውሽጣዊት ኣጸድ ኣብ መቕደስ ከግልግል፡ ኣብ መቕደስ ዝኣትወላ መዓልቲ ኸኣ፡ መስዋእቲ ሓጢኣቱ የቕርብ፡ ይብል እግዚኣብሄር ኣምላኽ።²⁸ርስቲ ይኹኖም፡ ኣነ እየ ርስቶም። ኣብ እስራኤል ግደ ኣይትሃብዎም፡ ግዲኦምሲ ኣነ እየ።²⁹ንሳቶም ነቲ መስዋእቲ ብልዕን ነቲ መስዋእቲ ሓጢኣትን መስዋእቲ ዕዳን ይብልዕዎ። እስራኤል ዝሓረምዎ ዘበለውን ንኣታቶም ይኹን።³⁰በዅሪ ዅሉ ፍርያትኩምን፡ ኵሉ መባእኩም፡ ዝዀነ ይኹን መባእ ንኻህናት ይኹን። ንቤትኩም በረኸት ምእንቲ ኽሓድራስ፡ በዅሪ ሓሪጭኩም ንኻህን ሃቡ።³¹እቶም ካህናት ካብ ኣዕዋፍ ወይስ ካብ ከብቲ ዝሓለቐን እተሰብረን ኣይብልዑ።

ትን. ህዝቅኤል ምዕራፍ 45

   ¹እምብኣርሲ ነታ ሃገር ርስቲ ኽትኰነኩም ብዕጻ ኽትማቐልዋ ኸሎኹም፡ ካብታ ሃገርስ እተቐደሰት ክፍሊ ንእግዚኣብሄር መባእ ከተቕርቡ ኢኹም። ምንዋሓ ዕስራን ሓሙሽተን ሽሕ እመት፡ ወርዳ ኸኣ ዓሰርተ ሽሕ እመት ክኸውን፡ ኣብ ዙርያኣ ብዅሉ ወሰናውን ቅድስቲ ኽትከውን እያ።²ካብዚ ድማ ኣርባዕቲኡ መኣዝና ማዕረ ማዕረ ዝዀነ ሓሙሽተ ሚእቲ ዝምንዋሓ፡ ሓሙሽተ ሚእቲ ዝወርዳ፡ ንመቕደስ ክኸውን እዩ። ሓምሳ እመትውን ኣብ ዙርያእ ንኣምፉ ዝነብር ቦታ ኽውሰኻ እዩ።³ካብዚ ልኩዕሲ ዕስራን ሓሙሽተን ሽሕ ዝምንዋሓ፡ ዓሰርተ ሽሕ እመት ዝወርዳ ኣምት። ኣብኣ እታ መቕደስ፡ ቅድስተ ቅዱሳን፡ ትኹን።⁴እዛ ቅድስቲ ግደ እታ ሃገር ነቶም ኣገልገልቲ መቕደስ ኰይኖም፡ ንእግዚኣብሄር ከገልግሉ ዝቀርቡ ኻህናት ክትከውን እያ። ነባይቶም ስፍራ፡ ንመቕደስውን ቅዱስ ቦታ ኽትከውን እያ።⁵ዕስራን ሓመሽተን ሽሕ ዝምንዋሓ፡ ዓሰርተ ሽሕ ዝወርዳ ነቶም ኣብታ ቤት ዘገልግሉ ሌዋውያን ዕስራ ኽፍሊ ቤት ንርስቶም ክትከውን እያ።
   ⁶ንርስቲ እታ ኸተማ ከኣ ኣብ ኣንጻር እታ ዝወፌኹምዋ መባእ እታ ቅድስቲ ኽፍሊ ሓሙሽተ ሽሕ ዝወርዳ፡ ዕስራን ሓሙሽተን ሽሕ ዝምንዋሓ መደቡ። እዚኣ ንብዘሎ ቤት እስራኤል ትኹን።⁷ነቲ መስፍን ድማ በዝን በትን እታ ቅዱስ መባእ ኰይና እተወፈየት ምድርን ርስቲ እታ ኸተማን ኣብ መንጽር እታ እተቐደሰት መባእን ኣብ መንጽር ርስቲ እታ ኸተማን፡ ምዕራባ ናብ ወገን ምዕራብ፡ ምብራቕ ድማ ናብ ወገን ምብራቕ ክኸውን እዩ። ምንዋሓ ኸኣ ካብ ወሰን ምዕራብ ሒዙስ ክሳዕ ወሰን ምብራቕ ክንዲ ሓደ ኽፍሊ ክኸውን እዩ።⁸መሳፍንተይ ከኣ እታ ምድሪ ንቤት እስራኤል ከከም ነገዶም ክህብዎም እዮም እምበር፡ ድሕርዚ ንህዝበይ ኣይክገፍዕዎምን፡ እዚኣስ ምድሩ፡ ኣብ እስራኤል ርስቱ ኽትከውን እያ።
   ⁹እግዚኣብሄር ኣምላክ ከምዚ ይብል ኣሎ፡ ኣቱም መሳፍንቲ እስራኤል፡ ደጊም ይእከልኩም፡ ዓመጻን በዝባዝን ሕደጉ፡ ቅንዕናን ጽድቅን ግበሩ፡ ግፍዕኹም ካብ ህዝበይ ኣርሕቑ፡ ይብል እግዚኣብሄር ኣምላኽ።¹⁰ሓቀኛ ሚዛን፡ ሓቀኛ ኤፋ፡ ሓቀኛ ባት ይሃሉኹም።¹¹ኤፋን ባትን ልክዑ ሓድ ይኹን፡ እቲ ባት ዓስራይ ኣፍ ሆመር፡ እቲ መስፈሪኦም ብሆመር እተለኽዐ ይኹን።¹²ሓደ ሲቃል ዕስራ ጌራ ዝሕዝ ይኹን። እቲ ምና ኸኣ ዕስራ ሲቃል፡ ዕስራን ሓሙሽተን ሲቃል፡ ዓሰርተው ሓሙሽተ ሲቃል ይኹነልኩም።¹³እቲ ንስኻትኩም እተቕርብዎ መባእ እዚ እዩ፡ ካብ ሆመር ስርናይ ሳድሳይ ኣፍ ኤፋ፡ ካብ ሆመር ስገም ድማ ሳድሳይ ኣፍ ኤፋ ወፍዩ።¹⁴ናይ ዘይቲ ሕጊ፡ ናይቲ ባት ዘይቲ ኸኣ እዚ እዩ፡ ዓሰርተ ባት ሓደ ሆመር እዩ እሞ፡ ካብ ሓደ ኮር ዓስራይ ኣፍ ባት ይወፈ፡ እቲ ኮር ድማ ዓሰርተ ባት ዝሕዝ ሆመር እዩ።¹⁵ንኣታቶም ዝኸውን መበጀዊ ንምግባር፡ ንመስዋእቲ ብልዕን ንመስዋእቲ ምሕራርን ንመስዋእቲ ምስጋናን ካብቲ ማይ ዘለዎ መዋፍር እስራኤል ካብ መጓሰ ኽልተ ሚእትስ ሓንቲ ብጊዕ ክትውፈ እያ፡ ይብል እግዚኣብሄር ኣምላኽ።¹⁶ብዘለዉ ህዝቢ እታ ሃገር ነዚ መባእ እዚ ነቲ መስፍን እስራኤል ክህብዎ ይግብኦም እዩ።¹⁷መዚ እቲ መስፍንሲ ብበዓላትን ብሰርቂ ወርሕን ብሰናብትን ብዅሉ በዓልት ዓመት ቤት እስራኤልን መስዋእቲ ምሕራርን መስዋእቲ ብልዕን መስዋእቲ መስተን ክውፊ እዩ። ንሱ ንቤት እስራኤል መበጀዊ ምእንቲ ኽገብረሎም መስዋእቲ ሓጢኣትን መስዋእቲ ብልዕን መስዋእቲ ምሕራርን መስዋእቲ ምስጋናን ከቕርብ እዩ።
   ¹⁸እግዚኣብሄር ኣምላኽ ከምዚ ይብል ኣሎ፡ በታ ቐዳመይቲ ወርሒ፡ ካብታ ወርሒውን በታ ቐዳመይቲ መዓልቲ ንስኻ ጕድለት ዘይብሉ ዝራብዕ ክትወስድ ኢኻ እሞ፡ ነታ መቕደስ ከተንጽሃ ኢኻ።¹⁹እቲ ኻህን ድማ ካብ ደም እቲ መስዋእቲ ሓጢኣት ክወስድ፡ ኣብ ልዳት እታ ቤትን ኣብ ኣርባዕቲኡ መኣዝን ሕዳጋይ መሰውእን ኣብ ልዳት ደገ እታ ውሽጣዊት ኣጸድን ክገብሮ እዩ።²⁰ብሳብዐይቲ መዓልቲ እታ ወርሒ ድማ ስለ እቲ ብጌጋ ዝኣበሰን ስለ እቲ ግሩህን ከምኡ ኽትገብር ኢኻ። ነታ ቤትውን ከምኡ ኸተበጅውዋ ኢኹም።
   ²¹በታ መጀመርያ ወርሒ፡ ካብታ ወርሒ ኸኣ ኣብ መበል ዓሰርተው ኣርባዕተ መዓልትስ፡ ፋስጋ፡ ሾብዓተ መዓልቲ በዓል ይኹነልኩም፡ ቅጫውን ክብላዕ እዩ።²²በታ መዓልቲ እቲኣ እቲ መስፍን ብናይ ርእሱን ብናይ ብዘሎ ህዝቢ እታ ሃገርን ሓደ ዝራብዕ ንመስዋእቲ ሓጢኣት ከቕርብ እዩ።²³በዘን ሾብዓተ መዓልቲ በዓል ድማ ጕድለት ዘይብሎም ሾብዓተ ዝራብዓትን ሾብዓተ ድዑላትን ኣብ ጸጽባሕ እዘን ሾብዓተ መዓልቲ ንእግዚኣብሄር መስዋእቲ ምሕራር፡ ኣብ ጸጽባሕ ከኣ ንመስዋእቲ ሓጢኣት ሓደ ድቤላ ከቕርብ እዩ።²⁴ንሱ ድማ መስዋእቲ ብልዒ፡ ንነፍሲ ወከፍ ዝራብዕ ሓደ ኤፋ፡ ንነፍሲ ወከፍ ድዑል ከኣ ሓደ ኤፋ፡ ንነፍሲ ወከፍ ኤፋውን ሓደ ሂን ዘይቲ ከቕርብ እዩ።²⁵ኣብታ ሳብዐይቲ ወርሒ፡ ካብታ ወርሒውን ኣብ መበል ዓሰርተው ሓሙሽተ መዓልቲ በዚ በዓል እዚ ንሾብዐተ መዓልቲ ኸምቲ መስዋእቲ ሓጢኣት፡ ከምቲ መስዋእቲ ምሕራር፡ ከምቲ መስዋእቲ ብልዒ፡ ከምቲ ዘይቲ ከቕርብ እዩ።

ትን. ህዝቅኤል ምዕራፍ 46

   ¹እግዚኣብሄር ኣምላኽ ከምዚ ይብል ኣሎ፡ እታ ንምብራቕ እትርኢ ደገ እታ ውሽጣዊት ኣጸድ በተን ሹድሽተ መዓልቲ ዕዮ ኽትዕጾ ብመዓልቲ ሰንበት ግና ክትክፈት፡ ብመዓልቲ ስርቂ ወርሒውን ክትክፈት እያ።²እቲ መስፍን ከኣ በቲ ገበላ እታ ደገ ኣቢሉ ኻብ ወጻኢ ኽኣቱ፡ ኣብ ልዳት እታ ደገውን ክቐውም እዩ። ካህናት ከኣ መስዋእቲ ምሕራሩን መስዋእቲ ምስጋናኡን ከቕርቡ እዮም፡ ንሱ ድማ ኣብ መድረኽ እታ ደገ ኽሰግድ፡ ድሕርዚውን ክወጽእ እዩ። እታ ደገ ግና ክሳዕ ምሸት ኣይክትዕጾን እያ።³ህዝቢ እታ ሃገር ከኣ ብሰናብትን ብሰርቂ ኣዋርሕን፡ ኣብ መእተዊ እዛ ደገ እዚኣ ዀይኖም፡ ኣብ ቅድሚ እግዚኣብሄር ክሰግዱ እዮም።⁴እቲ መስፍን ብመዓልቲ ሰንበት ንእግዚኣብሄር ዘቕርበሉ መስዋእቲ ምሕራርሲ ጕድለት ዘይብሎም ሹድሽተ ገንሸል፡ ጕድለት ዘይብሉ ሓደ ድዑልን እዩ።⁵መስዋእቲ ብልዒ ኸኣ ነቲ ድዑል ሓንቲ ኤፋ፡ መስዋእቲ ብልዒ ነቶም ገንሸላት ድማ ከም ርካቡ ክኸውን፡ ንነፍሲ ወከፍ ኤፋውን ሓደ ሂን ዘይቲ ኽህልዎ እዩ።⁶ንመዓልቲ ሰርቂ ወርሒ ኸኣ ጕድለት ዘይብሉ ዝራብዕን ጕድለት ዘይብሎም ሹድሽተ ገንሸልን ሓደ ድዑልን ከቕርብ እዩ።⁷ንሱ ኸኣ መስዋእቲ ብልዒ ነቲ ዝራብዕ ሓደ ኤፋ፡ ነቲ ድዑል ድማ ሓደ ኤፋ፡ ነቶም ገንናሽልውን ከም ርካቡ፡ ንነፍሲ ወከፍ ኤፋ ኸኣ ሓደ ሂን ዘይቲ ከቕርብ እዩ።⁸እቲ መስፍን ክኣቱ ኸሎ፡ ብገበላ እታ ደገ ኽኣቱ፡ ብእኣ ኣቢሉውን ክወጽእ እዩ።⁹ህዝቢ እታ ሃገር በቲ ዓበይቲ በዓላት ኣብ ቅድሚ እግዚኣብሄር ምስ መጹ፡ እቲ ኽሰግድ ኢሉ ብደገ ሰሜን ዝኣተወ ብደገ ደቡብ ሰሜን ክወጽእ እዩ። በታ ኣንጻራ ደኣ ኽወጽእ እምበር፡ ሓደ እኳ በታ ዝኣተወላ ደገ ኣይክምለስን እዩ።¹⁰እቲ መስፍን ከኣ፡ እቶም ህዝቢ ኽኣትዉ ኸለዉ ኣብ ማእከሎም ኰይኑ ኽኣቱ፡ ንሳቶም ክወጹ ኸለዉ ድማ፡ ምስኦም ክወጽእ እዩ።¹¹ብበዓላትን ብበዓላት ዓመትን እቲ መስዋእቲ ብልዒ ነቲ ዝራብዕ ሓደ ኤፋ፡ ነቲ ድዑል ድማ ሓደ ኤፋ፡ ነቶም ገናሽልውን ከም ርካቡ፡ ነንሓደ ኤፋ ኸኣ ሓደ ሂን ዘይቲ ከቕርብ እዩ።¹²እቲ መስፍን ከኣ ናይ ፍቓዱ መስዋእቲ፡ መስዋእቲ ምሕራር ወይስ መስዋእቲ ምስጋና ኸም ፍቓዱ ንእግዚኣብሄር ከቕርብ ከሎ፡ እታ ንምብራቕ እትርኢ ደገ ይኽፈተሉ እሞ፡ ነቲ መስዋእቲ ምሕራሩን መስዋእቲ ምስጋናኡን ከምቲ ናይ ሰንበት ገይሩ ከቕርብ እዩ። ድሕርዚ ኽወጽእ፡ ምስ ወጸ ድማ፡ እታ ደገ ትተዓጾ።¹³ጕድለት ዘይብሉ ናይ ዓመት ገንሸል ከም መስዋእቲ ምሕራር ኣብ ጸጽባሕ ንእግዚኣብሄር ከተቕርበሉ ኢኻ። ንግሆ ንግሆ ኽትስውኦ ኢኻ።¹⁴ምስናይዚ መስዋእቲ ብልዒ ሳድሳይ ኣፍ ኤፋ፡ መለስለሲ እቲ ሓርጭ ከኣ ሳልሳይ ኣፍ ሂን ዘይቲ ንግሆ ንግሆ ኸትቕርብ ኢኻ። እዚ ንእግዚኣብሄር ዝቕረብ መስዋእቲ ብልዒ እዚ ናይ ሓዋሩ ስርዓት ንዅሉ ግዜክኸውን እዩ።¹⁵ገንሸል መስዋእቲ ብልዕን ዘይትን ንግሆ ንግሆ ኸም ናይ ኵሉ ግዜ ምስዋእቲ ምሕራር ክትስውኡ ኢኹም።
   ¹⁶እግዚኣብሄር ኣምላኽ ከምዚ ይብል ኣሎ፡ እቲ መስፍን ንሓደ ካብቶም ደቁ ውህበት እንተ ሃቦ፡ ርስቱ እዩ፡ እዚ ንደቂ ይኹን፡ ደቁ ዝወረስዎ ርስቶም እዩ።¹⁷ንሓደ ካብ ገላዉኡ ካብቲ ርስቱ መቒሉስ ውህበት እንተ ሃቦ ግና፡ እዚኣ ኽሳዕ ዓመት ሓራ ናቱ ትኹን። ድሕርዚ ኸኣ ናብቲ መስፍን ትመለስ። ርስትነቱ ድማ ንደቁ ክኸውን እዩ።¹⁸እቲ መስፍን ከኣ ነቶም ህዝቢ ካብ ርስቶም ነቒሉ ርስቲ ኣይውሰደሎም። ካብቶም ህዝበይ ሓደ እኳ ካብ ርስቱ ኸይንቀልስ፡ ነቶም ደቁ ካብ ርስቱ ኸረስትዮም እዩ።
   ¹⁹ድሕርዚ ንሱ ናብተን ናይ ሰሜን ዝርእያ ናይ ካህናት ቅዱሳት ክፍሊ ኣባይቲ በታ ኣብ ጥቓ እታ ደገ ዘላ መእተዊት ኣቢሉ ኣእተወኒ። እንሆ ድማ፡ ኣብቲ ወሰኑ ንምዕራብ ኣቢሉ ዝርኢ ቦታ ኣሎ።²⁰ንሱ ኸኣ፡ ናብ ወጻኢ ኣጸድ ከየውጽእዎ እሞ እቲ ህዝቢ ኸይቅደስሲ፡ እቲ እቶም ካህናት ነቲ መስዋእቲ ዕዳን ነቲ መስዋእቲ ሓጢኣትን ዝቕቅልሉ፡ ነቲ መስዋእቲ ብልዒውን ዝስንክትሉ ቦታ እዚ እዩ፡ በለኒ።²¹ናብ ወጻኢ ኣጸድ ድማ ኣውጽኣኒ፡ ኣብ ኣርባዕቲኤን መኣዝን እታ ኣጸድ ከኣ ኣሕለፈኒ፡ እንሆውን፡ ኣብ ነፍሲ ወከፍ መኣዝን እታ ኣጸድሲ ኣጸድ ኣሎ።²²ኣብተን ኣርባዕተ መኣዝን እታ ኣጸድ ድማ እተቐጽራ ኣጸዳት ኣለዋ፡ ምንዋሐን ኣርብዓ እመት፡ ወርደን ከኣ ሰላሳ እዩ። እዘን ኣርባዕተ ብመኣዝንሲ ልክዐን ሓደ እዩ።²³ኣብ ዙርያኤን ኣብ ዙርያ ኣርባዕቲኤን ከኣ መንደቕ ኣሎ። ኣብ እግሪ እቲ መንደቕ ብዙርያ ድማ መሰኻተቲ ተሰሪሕዎ ኣሎ።²⁴ንሱ ኸኣ፡ እዚኣ እታ ዘብስሉላ ቤት እያ፡ እዚኣተን ከኣ እቶም ኣገልግልቲ እዛ ቤት ናይ ህዝቢ መስዋእቲ ዘብስሉለን እየን፡ በለኒ።

ትን. ህዝቅኤል ምዕራፍ 47

   ¹ንሱ ድማ ናብ ደገ እታ ቤት መለሰኒ። ገጽ እታ ቤት ናብ ምብራቕ ኣቢሉ እዩ ዝርኢ እሞ፡ እንሆ፡ ማያት ካብ ትሕቲ መድረኽ እታ ቤት ናብ ምብራቕ ኣቢሉ ወጸ። እቲ ማያት ከኣ ካብ ትሕቲ፡ ካብ የማናይ ወገን እታ ቤት፡ ነታ መሰውእስ ብደቡባ ይወርድ ነበረ።²ድሕርዚ ብመገዲ እታ ሰሜናዊት ደገ ኣውጽኣኒ፡ ብመገዲ እታ ናብ ምብራቕ እትርኢ ደገ፡ ናብታ ኣብ ወጻኢ ዘላ ደገ ብወጻኢ ኣዞረኒ። እንሆ ኸኣ፡ ማያት ካብቲ የማናይ ወገን ይፍልፍል ነበረ።³እቲ ሰብኣይ ናብ ምብራቕ ኣቢሉ ኽወጽእ ከሎ፡ዝእምተሉ ገመድ ኣብ ኢዱ ነበሮ፡ ብእኡ ኸኣ ሽሕ እመት ኣመተ። በቲ ማያት ኣሳገረኒ፡ ክሳዕ እግረይ በጽሐ።⁴ከም ብሓድሽ ሽሕ እመት ኣመተ፡ በቲ ማያት ከኣ ኣሳገረኒ፡ እቲ ማያት ድማ ክሳዕ ኣብራኸይ በጽሐ። ከም ብሓድሽ ሽሕ እመት ኣመተ፡ በቲ ማያት ከኣ ኣሳገረኒ፡ እቲ ማያትውን ክሳዕ ሕቘይ በጽሐ።⁵ድሕርዚ ሽሕ እመት ኣመተ፡ እቲ ማያት ብዘይ ሓመሳ ዘይስገር ዓሚቝ ውሒዝ ኰይኑ እዩ እሞ፡ ኣነ ኽሳገሮ ዘይክኣለኒ ውሒዝ ኰነ።⁶ንሱ ኸኣ፡ ኣታ ወዲ ሰብ፡ ትርኢዶ ኣሎኻ፡በለኒ።ሽዑ ወሰድኒ፡ ናብ ወሰን እቲ ውሒዝ ድማ መለሰኒ።⁷ምስ ተመለስኩ፡ እንሆ፡ ወሰን ወሰን እቲ ውሒዝ በዝን በትን ብዙሕ ኣእዋም ኣሎ።⁸በለኒ ድማ፡ እዚ ማያት እዚ ናብ ምብራቕ ኣቢሉ ይውሕዝ ኣሎ፡ናብ ጐልጐል ክወርድ ናብ ባሕሪ ኸኣ ክበጽሕ እዩ። ናብ ባሕሪ ምስ ኣተወ ድማ፡ እቲ ማያት ክጥዒ እዩ።⁹ክኸውን ድማ እዩ፡ ኣብቲ እዚ ውሒዝ እዚ ዝበጽሖ ዘበለስ ኵሉ ዝዋሳወስ ህያው ነፍሲ ብህይወት ክነብር እዩ፡ ዓሳ ኸኣ ኣዝዮም ክበዝሑ እዮም። እዚ ማያት እዚ ኽኣትዎ እዩ እሞ፡ እቲ ማያት ባሕሪ ኽጥዒ እዩ። እቲ ውሒዝ ኣብ ዝኣተዎ ዘበለ ድማ ኵሉ ብህይወት ክነብር እዩ።¹⁰ክኸውን ከኣ እዩ፡ ገፈፍቲ ዓሳ ኣብኡ ክቘሙ፡ ካብ ዔን-ገዲ ኽሳዕ ዔን-ኤግላይም መዘርግሒ መርበብ ክኸውን እዩ። ዓሳታት፡ ከምቲ ዓሳ ናይ ዓብዪ ባሕሪ፡ በብዓይነቶም ኣዝዮም ብዙሓት ኣብኡ ኽህልዉ እዮም።¹¹ዓዘቕቱን ዕቋሩን ግና ጨው ኰይኑ ኽነብር እዩ እምበር፡ ኣይክጥዕን እዩ።¹²ወሰነ ወሰን እዚ ርባ በዝን በትን ኵሉ ዓይነት ፈራዪ ኣእዋም ክበቍል እዩ። ኣቍጽልቱ ኣይክጽምሉን፡ ፍሬኡውን ኣይክውዳእን እዩ። ማያቱ ካብቲ መቕደስ እዩ ዝፍልፍል እሞ፡ ኣብ ወወርሒ ሓድሽ ፍረ ኽፈሪ፡ ፍሬታቱ ንምግቢ፡ ኣቍጽልቱ ድማ ንመድሓኒት ክኸውን እዩ።
   ¹³እግዚኣብሄር ኣምላኽ ከምዚ ይብል ኣሎ፡ እታ ንዓሰርተው ክልተ ነገድ እስራኤል ርስቲ ጌርኩም እትመቕልዎም ምድሪ፡ ወሰናታ እዚ እዩ፡ ዮሴፍ ክልተ ዕጫ ኽረክብ እዩ።¹⁴እዛ ነቦታትኩም ክህባ እየ ኢለ ኢደይ ዘልዓልኩላ ምድሪ እቲ ሓደ ኸምቲ ሓደ ኽትወርስዋ ኢኹም። እዛ ሃገር እዚኣ ርስትኹም ክትከውን እያ።¹⁵ወሰናት እታ ምድሪ ኸኣ እዚ እዩ፡ ብወገን ሰሜን ካብቲ ዓብዪ ባሕሪ ሒዙ በታ መገዲ ሃትሎን ኣቢሉ፡ ክሳዕ ጸዳድ፡¹⁶ኣብ መንጎ ወሰን ደማስቆን ወሰን ሃማትን ዘሎ ሃማት፡ ቤሮታ፡ ሲብራይም፡ እቲ ኣብ ወሰን ሃውራን ዘሎ ሓጻር-ሓቲኮን ድማ።¹⁷እቲ ወሰን ካብ ባሕሪ ኽሳዕ ሓጻር-ዔናን ወሰን ደማስቆ ክኸውን እዩ። ጻፎን ድማ ኣብ ሰሜን ወሰን ሃማት እዩ። እዚ እቲ ወገን ሰሜን እዩ።¹⁸ብወገን ምብራቕ ድማ ኣብ ማእከል ሃውራንን ደማስቆን ጊልዓድን ምድሪ እስራኤልን ዮርዳኖስን እዩ። ካብ ወሰን ሰሜን ናብቲ ኣብ ምብራቕ ዘሎ ባሕሪ ኽትእምቱ ኢኹም። እዚ እቲ ወገን ምብራቕ እዩ።¹⁹እቲ ወገን ደቡብ ናብ ደቡብ ኣቢሉ ኸኣ ካብ ታማር ሒዙ ኽሳዕ ማይ መሪባ ናይ ቃዴስ፡ በቲ ርባ ኽሳዕ እቲ ዓብዪ ባሕሪ እዩ። እዚ እቲ ናብ ደቡብ ዘብል ወገን ደቡብ እዩ።²⁰እቲ ወገን ምዕራብ ድማ እቲ ዓብዪ ባሕሪ ኻብ ወሰን ደቡብ ክሳዕ መንጽር ሃማት እዩ። እዚ እቲ ወገን ምዕራብ እዩ።²¹ነዛ ሃገር እዚኣ ኸከም ነገድ እስራኤል ንኣኻትኩም ተማቐልዋ።²²ክኸውን ድማ እዩ፡ ንስኻትኩምን ነቶም ኣብ ማእከልኩም ዝነብሩ፡ ኣብ ማእከልኩምውን ውሉድ ዝወልዱ ጓኖት ርስቲ ጌርኩም ብዕጭ ምቐልዋ። ንሳቶም ኣብ ማእከል ደቂ እስራኤል ከም ደቂ ዓድኹም ክዀኑልኩም እዮም። ኣብ ማእከል ነገድ እስራኤል ከኣ ምሳኻትኩም ንርስቲ ኽርስተዩ እዮም።²³ክኸውን ድማ እዩ፡ ነቲ ጓና ኣብታ ዝነብረላ ነገድ፡ ኣብኣ ርስቱ ኽትህብዎ ኢኹም፡ ይብል እግዚኣብሄር ኣምላኽ።

ትን. ህዝቅኤል ምዕራፍ 48

   ¹ስማት እቶም ነገድ እዚ እዩ፡ ካብ ወገን ሰሜን ሒዙ፡ ብጥቓ መገዲ ሃይሎን፡ ክሳኦ ሃማትን ክሳዕ ሓጻር-ዔናንን፡ ወሰን ደማስቆ፡ ናብ ሰሜን ኣብ ጥቓ ሃማት ኣቢሉ፡ ካብ ምብራቕ ክሳዕ ምዕራብ ንዳን ሓደ ኽፍሊ ይኹን።²ኣብ ወሰን ዳን ድማ ካብ ወገን ምብራቕ ክሳዕ ወገን ኣሴር ሓደ ኽፍሊ ይኹን።³ኣብ ወሰን ኣሴር ከኣ ካብ ወገን ምብራቕ ክሳዕ ወገን ምዕራብ ንንፍታሌም ሓደ ኽፍሊ ይኹን።⁴ኣብ ወሰን ንፍታሌም ድማ ካብ ወገን ምብራቕ ናብ ወገን ምዕራብ ንምናሴ ሓደ ኽፍሊ ይኹን።⁵ኣብ ወሰን ምናሴ ኸኣ ካብ ወገን ምብራቕ ናብ ውወገን ምዕራብ ንኤፍሬም ሓደ ኽፍሊ ይኹን።⁶ኣብ ወሰን ኤፍሬም ድማ ካብ ወገን ምብራቕ ናብ ወገን ምዕራብ ንሮቤል ሓደ ኽፍሊ ይኹን።⁷ኣብ ወሰን ሮቤል ከኣ ካብ ወገን ምብራቕ ናብ ወገን ምዕራብ ንይሁዳ ሓደ ኽፍሊ ይኹን።
   ⁸ኣብ ወሰን ይሁዳ ድማ ካብ ወገን ምብራቕ ናብ ወገን ምዕራብ እቲ እተቕርብዎ መባእ ይኹን። ወርዱ ዕስራን ሓመሽተን እመት፡ ምንዋሑ ኸኣ ካብ ወገን ምብራቕ ናብ ወገን ምዕራብ ክንዲ ሓደ ኽፍሊ ይኹን። እታ መቕደስ ድማ ኣብ ማእከሉ ትኹን።⁹እዛ ንእግዚኣብሄር እተቕርቡሉ መባእ ምንዋሓ ዕስራን ሓሙሽተን ሽሕ፡ ወርዳን ዓሰርተ ሽሕ ትኹን።¹⁰እዛ ቅድስቲ መባእ እዚኣ ንኻህናት ትኹን። ንሰሜን ምንዋሓ ዕስራን ሓሙሽተን ሽሕ፡ ንምዕራብ ከኣ ወርዳ ዓሰርተ ሽሕ፡ ንደቡብ ከኣ ምንዋሓ ዕስራን ሓሙሽተን ሽሕ እዩ። እታ መቕደስ እግዚኣብሄርውን ኣብ ማእከላ ትኹን።¹¹እዚኣ ነቶም፡ እቶም ደቂ እስራኤል ክስሓቱ ኸለዉ ኸምቶም ዝስሕቱ ሌዋውያን ዘይሰሕቱ፡ እተቐደሱ ንኣገልግሎተይውን እተመዘዙ ኻህናት፡ ደቂ ጻዶቅ፡ ትኹን።¹²እዚኣ ኻብታ ኣብ ወሰን ሌዋውያን ዘላ፡ ኣዝያ ቅድስቲ ዝዀነት መባእ ምድሪ ንኣታቶም መባእ ትዀነሎም።¹³ኣብ ወሰን እታ ናይ ካህናት ከኣ ምንዋሓ ዕስራን ሓሙሽተን ሽሕ፡ ወርዳውን ዓሰርተ ሽሕ ንሌዋውያን ትኹን። ምንዋሓ ዅላዅላ ዕስራን ሓሙሽተን ሽሕ፡ ወርዳውን ዓሰርተ ሽሕ እያ።¹⁴እዚኣ ንእግዚኣብሄር እተቐደሰት እያ እሞ፡ ካብኣ ኣይሽጡ፡ ኣይለውጡ፡ እዛ በዅራት ምድሪ እዚኣ ኣብ ካልእ ኣይትሕለፍ።
   ¹⁵እታ ኣብ ኣንጻር እቲ ዕስራን ሓሙሽተን ሽሕ ዘላ ኻብቲ ወርዲ ዝተረፈ ሓሙሽተ ሽሕ ግና ዘይተቐደሰ ቦታን ሰብ ዝነብረላን ኸተማን ንኸባቢኣን ትኹን።¹⁶ልክዓ ኸኣ ብወገን ሰሜን ኣርባዕተ ሽሕን ሓሙሽተ ሚእትን፡ ብወገን ደቡብ ኣርባዕተ ሽሕን ሓሙሽተ ሚእትን፡ ብወገን ምብራቕ ኣርባዕተ ሽሕን ሓሙሽተ ሚእትን፡ ብወገን ምዕራብውን ኣርባዕተ ሽሕን ሓሙሽተ ሚእትን እዩ።¹⁷እቲ ኣብ ከባቢ እታ ኸተማ ዘሎ ቦታ ድማ ብሰሜን ክልተ ሚእትን ሓምሳን፡ ብደቡብ ክልተ ሚእትን ሓምሳን፡ ብምብራቕ ክልተ ሚእትን ሓምሳን፡ ብምዕራብውን ክልተ ሚእትን ሓምሳን ይኹን።¹⁸እታ ትራፍ ናይቲ ምንዋሕሲ ብኣንጻር እታ ቅድስቲ መባእ ኣብ ምብራቕ ኣቢላ ዓሰርተ ሽሕ፡ ኣብ ምዕራብ ኣቢሉ ኸኣ ዓሰርተ ሽሕ ትኹን፡ እዚኣ ኣንጻር እታ ቅድስቲ መባእ እያ። እቶታውን ምግቢ እቶም ዓየይቲ እታ ኸተማ ይኹን።¹⁹እቶም ካብ ኵሎም ነገድ እስራኤል ዝዀኑ ኣብታ ኸተማ ዝዓዩ ኸኣ ነታ ምድሪ ይሕረስዋ።²⁰እታ መባእ ኵላኵላ ምንዋሓ ዕስራን ሓሙሽተን ሽሕ፡ ወርዳ ዕስራን ሓሙሽተን ሽሕ ትኹን። ንርስቲ እታ ኸተማ ዝኸውን ራብዓይ ክፍሊ እታ ቅድስቲ መባእ ኣልዕሉ።
   ²¹እቲ ዝተረፈ ንመስፍን ይኹን፡ በዝን በትን እታ ቅድስቲ መባእ ርስቲ እታ ኸተማ፡ ኣብ ኣንጻር እቲ ዕስራን ሓሙሽተን ሽሕ እመት እታ መባእ ክሳዕ ወሰን ምብራቕ፡ ኣብ ምዕራብ ከኣ ኣብ ኣንጻር እቲ ዕስራን ሓሙሽተን ሽሕ ናብ ወሰን ምዕራብ ዘብል፡ ማዕረ ማዕረ እቲ ኽፍልታት ዘሎ፡ ነቲ መስፍን ይኹን። እታ ቅድስቲ መባእን መቕደስ እታ ቤትን ከኣ ኣብ ማእከል ይኹና።²²ካብቲ ኣብ ማእከል ናይ መስፍን ዘሎ ርስቲ ሌዋውያንን ርስቲ እታ ኸተማን፡ ኣብ መንጎ ወሰን ይሁዳን ወሰን ብንያምን ዘሎ ነቲ መስፍን ይኹን።
   ²³ነቶም ዝተረፉ ነገድ ድማ እዚ እዩ፡ ካብ ወገን ምብራቕ ናብ ወገን ምዕራብ ሓደ ኽፍሊ ንብንያም ይኹን።²⁴ኣብ ወሰን ብንያም ድማ ካብ ወገን ምብራቕ ናይ ወገን ምዕራብ ሓደ ኽፍሊ ንስምኦን ይኹን።²⁵ኣብ ወሰን ስምኦን ከኣ ካብ ወገን ምብራቕ ናይ ወገን ምዕራብ ውገን ኽፍሊ ንይሳኮር ይኹን።²⁶ኣብ ወስን ይሳኮር ድማ ካብ ወገን ምብራቕ ናይ ወገን ምዕራብ ሓደ ኽፍሊ ንዛብሎን ይኽይን።²⁷ኣብ ወስን ዛብሎን ከኣ ካብ ወገን ምብራቕ ናብ ወገን ምዕራብ ሓደ ኽፍሊ ንጋድ ይኹን።²⁸ኣብ ወሰን ጋድ ድማ ካብ ወገን ደቡብ ናብ ደቡብ ኣቢሉ ወሰኑ ኻብ ታማር ሒዙ ኽሳዕ ማይ መሪባ ናይ ቃዴስ ክሳዕ እቲ ርባ ኽሳዕ እቲ ዓብዪ ባሕሪ ይኹን።²⁹እታ ንነገዳት እስራኤል ዕጭ ኣውዲቕኩም ርስቲ እተማቕልዎም ምድሪ እዚኣ እያ። እተን ግዴታት ከኣ እዚኤን እየን፡ ይብል እግዚኣብሄር ኣምላኽ።
   ³⁰መውጽኢታት እታ ኸተማ ድማ እዚ እዩ፡ ብወገን ሰሜን ኣርባዕተ ሽሕን ሓሙሽተ ሚእትን እመት እዩ ልክዑ።³¹ደጌታት እታ ኸተማ ኸኣ ብስም ነገዳት እስራኤል ይሰመያ። ናብ ሰሜን ኣቢሉ ሰለስተ ደገ፡ ደገ ሮቤል ሓንቲ፡ ደገ ይሁዳ ሓንቲ፡ ደገ ሌዊ ሓንቲ።³²ብወገን ምብራቕ ድማ ኣርባዕተ ሽሕን ሓሙሽተ ሚእትን እመት፡ ደጌታትውን ሰለስተ፡ ደገ ዮሴፍ ሓንቲ፡ ደገ ብንያም ሓንቲ፡ ደገ ዳን ሓንቲ።³³ብወገን ደቡብ ከኣ ኣርባዕተ ሽሕን ሓሙሽተ ሚእትን እመት እዩ ልክዑ፡ደጌታትውን ሰለሰተ፡ ደገ ስምኦን ሓንቲ፡ ደገ ይሳኮር ሓንቲ፡ ደገ ዛብሎን ሓንቲ።³⁴ብወገን ምዕራብ ድማ ኣርባዕተ ሽሕን ሓሙሽተ ሚእትን እመት፡ ደጌታትውን ሰለስተ፡ ደገ ጋድ ሓንቲ፡ ደገ ኣሴር ሓንቲ፡ ደገ ንፍታሌም ሓንቲ።³⁵ዙርያኣ ዓሰርተ ሾሞንተ ሽሕ እመት እዩ። ድሕሪ እዛ መዓልቲ እዚኣ ኸኣ ስም እታ ኸተማ፡ እግዚኣብሄር ኣብኣ እዩ፡ ክትስመ እያ።

ሓድስ ኪዳን

ደጉዓ ኤርምያስ

ትንቢት ዳንኤል

ዝ/ምዕ

ብ/ኪ

ሓ/ኪ

ቃል ብስራት Qal Bisrat

ትንቢት ህዝቅኤል

Like this:

Leave a ReplyCancel reply

ትንቢት ህዝቅኤል

Share this:

Like this:

Leave a ReplyCancel reply

ቃል ብስራት Qal Bisrat