ትንቢት ኢሳይያስ

1  2  3  4  5  6  7  8  9
10  11  12  13  14  15
16  17  18  19  20  21
22  23  24  25  26  27
28  29  30  31  32  33
34  35  36  37  38  39
40  41  42  43  44  45
46  47  48  49  50  51
52  53  54  55  56  57
58  59  60  61  62
63  64  65  66

ትን. ኢሳይያስ ምዕራፍ 1

   ¹ኢሳይያስ ወዲ ኣሞጽ ብዘመን ኡዝያን ዮታምን ኣሃዝን ህዝቅያስን፡ ነገስታት ይሁዳ፡ ብናይ ይሁዳን የሩሳሌምን ዝረኣዮ ራእይ።
   ²እግዚኣብሄር ይዛረብ ኣሎ እሞ፡ ኣቱም ሰማያት፡ ስምዑ፡ ኣቲ ምድሪ፡ ጽን በሊ፡ ንውሉድ ኣዕቤኽዎምን ኣልዓልክዎምን፡ ንሳቶም ድማ ካባይ ዓለው።³ብዕራይ ንዋናኡ፡ ኣድጊ ድማ ንመብልዕ ማል ጐይታኡ ይፈልጦ፡ እስራኤል ግና ሓንቲ እኳ ኣይፈልጥን፡ ህዝበይውን ኣየስተውዕልን እዩ።
   ⁴ሓጥእ ዓሌት፡ በደል እተጻዕነ ህዝቢ፡ ዘርኢ ገበርቲ እከይ፡ ጥፉኣት ውሉድ ወይለኦም። ንእግዚኣብሄር ሓዲጎም፡ ነቲ ናይ እስራኤል ቅዱስ ንዒቖም፡ ንድሕሪት ኣቢሎም ተመልሱ።⁵ምዕላው እናወሰኽኩም ካብ እትኸዱስ፡ ንምንታይ ደኣ እትውቅዑ፡ ኲሉ እቲ ርእሲ ሕሙም፡ ኲሉ እቲ ልቢ ሕሉል እዩ።⁶ካብ ከብዲ እግሪ ኽሳዕ ርእሲ ገለ ጥዑይ የብሉን። ዘይተጠወቐን ዘይተዘነነን ብቕብኢ ዘይለስለሰን፡ ኣቑሳልን ስምብራትን ሓድሽ መውቃዕትን ጥራይ እዩ።⁷ሃገርኩም ባዲማ፡ ከተማታትኩም ብሓዊ ነዲደን፡ ንግርሁኹም ጓኖት ኣብ ቅድሜኹም ይውሕጥዎ፡ ጓኖት ከም ዘፍረስዋ ኸኣ ባደመት።⁸ጓል ጽዮን ድማ ከም ዳስ ኣብ ኣታኽልቲ ወይኒ፡ ከም ጎጆ ኣብ ግራት ብርጭቕ፡ ከም እተኸበት ከተማ ዀይና ተሪፋ ኣላ።⁹እግዚኣብሄር ጐይታ ሰራዊት ገለ ሒደት ትርፊ እንተ ዘይሓድገልናስ፡ ከም ሶዶም ምዀንና፡ ንጎሞራ ምመሰልና ኔርና።
   ¹⁰ኣቱም ሓላቑ ሶዶም፡ ቃል እግዚኣብሄር ስምዑ፡ ኣታ ህዝቢ ጎሞራ፡ ንሕጊ ኣምላኽና ጽን በሎ።¹¹ብዝሒ መስዋእትታትኩም እንታይ ኢለዮ ይብል እግዚኣብሄር፡ ብዝሓርር መስዋእቲ ደዓውልን ብስብሒ ስቡሓትን ጸጊበ ኣሎኹ፡ ደም ዝራብዓትን ገናሽልን ድቤላታትን ባህ ኣየብለንን እዩ።¹²ኣብ ቅድመይ ክትረኣዩ ምስ እትመጹ፡ መን ኰታ ኣጸደይ ክትረግጹ ደለየኩም¹³ከንቱ መስዋእቲ ብልዒ ኣይተምጽኡ፡ ዕጣን ንኣይ ፍንፋን እዩ፡ ስርቂ ወርሕን ሰንበትን፡ ኣኼባ ማሕበር፡ ንኣበሳ ምስ ኣኼባ በዓል ኣይዕገሶን እየ።¹⁴ንስርቂ ኣዋርሕኩምን በዓላትኩምን ነፍሰይ ትጸልኦ ኣላ፡ ጾር ኰይኑኒ፡ ምስካሙ ስኢነ ኣሎኹ።¹⁵ኣእዳውኩም ምስ እትዝርግሑ፡ ኣዒንተይ ካባኻትኩም እኽውለን፡ ምህለላ እኳ እንተ ኣብዛሕኩም፡ ኣይሰምዕን እየ፡ ኣእዳውኩም ደም መሊእን እየን።¹⁶ተሓጸቡ፡ ንጽሁ ነቲ እከይ ግብርኹም ካብ ቅድሚ ኣዒንተይ ኣርሕቕዎ፡ ምግባር እከይ ሕደጉ።¹⁷ምግባር ሰናይ ተመሃሩ፡ ቅንዕና ድለዩ፡ ንጥቑዕ ርድእዎ፡ ንዘኽታም ፍትሒ ኣውጽኡሉ፡ ንመበለት ተጣበቑላ።
   ¹⁸ሽዑ ምጹ እሞ ንሓድሕድና ንማጐት፡ ይብል እግዚኣብሄር፡ ሓጢኣትኩም ከም ጁዂ እኳ እንተ ቑሔ፡ ከም በረድ ክጽዕዱ ከም ዝዋውዕ እኳ እንተ ቑሔ ከም ጻዕዳ ጸምሪ ክኸውን እዩ።¹⁹ሕራይ እንተ በልኩምን እንተ ተኣዘዝኩምንሲ፡ ጣዕሚ እታ ምድሪ ኽትበልዑ ኢኹም።²⁰ግናኸ እንተ ኣቤኹምን እንተ ዓሎኹምን፡ ኣፍ እግዚኣብሄር ተዛሪባ እያ እሞ፡ ብሰይፊ ኽትወሓጡ ኢኹም።
   ²¹እታ እምንቲ ኸተማ ኸመይ ኢላ ኣመንዝራ ዀነት። ቅንዕና ዝመልኣ፡ ጽድቂ ዝሓደራ ነበረት፡ ሕጂ ግና ማሕደር ቀተልቲ ነፍሲ ዀነት።²²ብሩርኪ ርስሓት ኰይኑ፡ ወይንኺ ማይ ተዘሊሉ።²³መሳፍንትኺ ሽፍታታትን ኣዕሩዂ ጐሓሉትን እዮም። ኲሎም ምቕባል ደርሆ ይፈትው፡ ደድሕሪ ኻሕሳ ይጐይዩ። ንዘኽታም ፍትሒ ኣየውጽኡሉን፡ ነገር መበለት ከኣ ኣባታቶም ኣይበጽሕን እዩ።
   ²⁴ስለዚ እግዚኣብሄር ጐይታ ሰራዊት፡ እቲ ናይ እስራኤል ስልጡን፡ ከምዚ ይብል፡ ኲራይ ኣብ ተጻረርተይ ከዝሕል፡ ንጸላእተይ ከኣ ሕነ ኽፈድዮም እየ።²⁵ንኢደይ ድማ ኣባኺ ኽመልሳ፡ ንሓርኢ ሓጺንኪ ኸኣ ኣጸቢቐ ኸጸጺ፡ ንዂሉ ቖርቆሮኺውን ክድርብዮ እየ።²⁶ንፈራዶኺ ኸምቶም ቀደም ዝነበሩ፡ ንመኸርትኺ ድማ ከምቶም ብመጀመርታ ዝነበሩ ኽመልሶም እየ። ደሓር ከተማ ጽድቂ፡ እምንቲ ኸተማ ኽትስመዪ ኢኺ።²⁷ጽዮን ብፍርዲ፡ እቶም ምሉሳታ ኸኣ ብጽድቂ ኽድሕኑ እዮም።²⁸ግናኸ ከሓዶን ሓጥኣንን ብሓደ ኽስበሩ፡ ንእግዚኣብሄር ዝሓደጉውን ጥራስ ክጠፍኡ እዮም።²⁹በቲ ዝፈቶኹምዎ ኣእዋም ክትሓንኩ፡ በቲ ዝመረጽኩምዎ ኣታኽልቲ ኽትሓፍሩ ኢኹም።³⁰ቈጽሉ ኸም ዝጸምለወ ኦምን፡ ማይ ከምዘይብሉ ኣታኽልትን ክትኰኑ ኢኹም እሞ፡³¹እቲ ሓያል ከም እተባዘተ ቓንጭ  እንጣጢዕ፡ ዕዮኡ ድማ ከም ቁልዒ ክኸውን እዩ፡ ክልቲኣቶም ብሓደ ኽነዱ እዮም፡ ዘጥፍእ ከኣ ሓደ እኳ የልቦን።

ትን. ኢሳይያስ ምዕራፍ 2

   ¹ኢሳይያስ ወዲ ኣሞጽ ብናይ ይሁዳን የሩሳሌምን ዝረኣዮ ቓል እዚ እዩ፡
   ²ኣብተን ዳሕሮት መዓልትታት ክኸውን እዩ፡ ናይ ቤት እግዚኣብሄር ከረን ኣብ ርእሲ ኣኽራን ክቐውም፡ ኣብ ልዕሊ ዂድዂዶታት ድማ ልዕል ክብል፡ ኲሎም ኣህዛብውን ናብኡ ኽውሕዙ እዮም።³ሕጊ ኻብ ጽዮን፡ ቃል እግዚኣብሄር ከኣ ካብ የሩሳሌም ክወጽእ እዩ እሞ፡ ብዙሓት ህዝብታት ክኸዱ፡ ንዑናይ ናብ ከረን እግዚኣብሄር፡ ናብ ቤት ኣምላኽ ያእቆብ ንደይብ፡ ንሱ ጐደናታቱ ኽምህረና፡ ብመገድታቱ ክንመላለስ ኢና፡ ድማ ክብሉ እዮም።⁴ኣብ መንጎ ኣህዛብ ክፈርድ፡ ንብዙሓት ህዝብታትውን ክዳንዮም እዩ፡ ንሳቶም ከኣ ኣስያፎም ንማሕረሻታት፡ ኲናውቶምውን ንገዘሞታት ክሰርሕዎ እዮም። ህዝቢ ኣብ ህዝቢ ሰይፊ ኣይከልዕልን እዩ፡ ደጊምሲ ውግእ ኣይክመሃሩን እዮም።
   ⁵ኣቱም ቤት ያእቆብ፡ ንዑ ዀታ ብብርሃን እግዚኣብሄር ንመላለስ።⁶ንቤት ያእቆብ፡ ህዝብኻ፡ ብኣመል ሰብ ምብራቕ ስለ ዝመልኡ፡ ከም ፍልስጥኤማውያን ከኣ ስለ ዝጠንቈሉ፡ ምስ ደቂ ጓናውን ኣገና ስለ ዝጠቕዑ፡ ሓደግካዮም።⁷ሃገሮምሲ ብሩርን ወርቅን ምሉእ እዩ፡ ዕቋሮም ድማ ታእላው የብሉን። ሃገሮም ከኣ ኣፍራስ ሞሉእ እዩ፡ ዓረብያታቶምውን ታእላው የብሉን።⁸ሃገሮም ድማ ጣኦታት ምሉእ እዩ፡ንግብሪ ኣእዳዎም፡ ነቲ ኣጻብዖም ዝገበራኦ ይሰግድሉ።⁹እቲ ጥቑዕ ሰብ ከኣ ለጥቕ ይብል፡ እቲ ምርኡይ ሰብ ድማ ይዋረድ ኣሎ፡ ስለዚ ይቕረ ኣይትብለሎምን ኢኻ።¹⁰ኣብ በዓቲ እቶ፡ ካብ ረዓድ እግዚኣብሄር ካብ ቅድሚ ኽብሪ ግብማኡን ኣግሊስካ ኣብ ሓመድ ተሓባእ።¹¹እተን ዕቡያት ኣዒንቲ ሰብ ለጠቕ ክብላ እየን። ትዕቢት ሰባት ከኣ ክዋረድ እዩ፡ በታ መዓልቲ እቲኣ እግዚኣብሄር በይኑ ልዕል ክብል እዩ።
   ¹²እግዚኣብሄር ጐይታ ሰራዊት ንዂሉ ዕቡይን ኲሩዕን ልዕል ንዝበለ ዂሉን ከዋርዶ፡ መዓልቲ ቘሪጹ ኣሎ እሞ፡¹³ኣብ ኲሉ ዓብይን ልዕል ዝበለ ኣእዋም ሊባኖስን ኣብ ኲሉ ኣእዋም ባሳንን፡¹⁴ኣብ ኲሉ ነዊሕ ኣኽራንን ኣብ ኲሉ ልዕል ዝበለ ዀረቢትን፡¹⁵ኣብ ብዘሎ ነዊሕ ግምብን ኣብ ብዘሎ ጽኑዕ ቀጽርን፡¹⁶ኣብ ኲለን መራኽብ ተርሲስን ኣብቲ ንምርኣይ ዘተምኒ ዘበለን መዓልቲ ቘሪጹ ኣሎ እሞ፡¹⁷ትዕቢት ሰብ ክዋረድ፡ ኲርዓት ሰባት ድማ ክሓስር እዩ፡ በታ መዓልቲ እቲኣስ እግዚኣብሄር በይኑ ልዕል ክብል እዩ።
   ¹⁸ጣኦታትውን ብጥራስ ክጠፍኡ እዮም።¹⁹ንምድሪ ኸሸብራ ምስ ዝትንስእ፡ ካብ ረዓድ እግዚኣብሄርን ካብ ቅድሚ ኽብሪ ግርማኡን ኣግሊሶም፡ ናብ በዓትታት ኣኻውሕን ናብ ጐዳጒድ ምድርን ክኣትው እዮም።²⁰በታ መዓልቲ እቲኣ ነቶም ክሰግዱሎም ዝገበርዎም ጣኦታት ብሩሮምን ጣኦታት ወርቆምንሲ ንፍሒራታትን ነዕዋፍ ለይትን ክድርብይዎም እዮም።²¹ንምድሪ ኸሸብራ ምስ ዝትንስእ፡ ካብ ረዓድ እግዚኣብሄር ካብ ቅድሚ ኽብሪ ግርማኡን ኣግሊሶም ናብ በዓትታት ኣኻውሕን ናብ ምንቃዕ ኣኻውሕን ክኣትው እዮም።²²በቲ ትንፋስ ኣብ ኣፍንጫኡ ዘለዎ ሰብ ኣይትወከሉ፡ ብምንታይከ እዩ እተቋጽርዎ፧

ትን. ኢሳይያስ ምዕራፍ 3

   ¹እንሆ፡ እግዚኣብሄር ጐይታ ሰራዊት ካብ የሩሳሌምን ካብ ይሁዳን ደገፋን ምርኩስ፡ ኲሉ ደገፉ እንጌራን ኲሉ ደገፉ ማይን ከርሕቕ እዩ።²ነቲ ጅግናን ተዋጋእን ነቲ ፈራድን ንነብይን ነቲ ፈላጥን ንኣረጊትን፡³ነቲ ሓለቓ ሓምሳን ንምርኡይ ሰብን ነቲ መኻርን ንንፋዕ ብዓል ኢደ ጥበብን ንብልሓተኛ ዓዛምን ከርሕቖም እዩ።⁴ቈልዑ መሳፍንቶም ክዀኑ ኽህቦም እየ፡ ሕጻናት ከኣ ክመልክዎም እዮም።⁵እቲ ህዝቢ ድማ እቲ ሓደ ነቲ ሓደ፡ ነፍሲ ወከፍ ንብጻዩ ኽገፍዖ እዩ፡ ቈልዓ ንኣረጊት፡ እቲ ሕማቕ ድማ ነቲ ኽቡር ክደፍሮ እዩ።⁶ሓደ ንሓው ኣብ ቤት ኣቦኡ ሒዙ፡ ክዳን ኣሎካ እሞ፡ ገዛኢ ኹነና፡ ነዚ ምዕናው እዚ ኣብ ትሕቲ ኢድካ ግበሮ፡ ምስ ዝብሎ፡⁷እቲውን በታ መዓልቲ እቲኣ ኢዱ ኣልዒሉ፡ ኣነ ዘናን ቁስሊ ኣይኰንኩን፡ ኣብ ቤተይ ድማ እንጌራ ወይስ ክዳን የልቦን፡ እሞ፡ ገዛእ ህዝቢ ኣይትግበሩኒ፡ ክብል እዩ።
   ⁸ነዒንቲ ኽብሩ ከቘጥዕወን ኢሎምሲ፡ ልሳኖምን ግብሮምን ንእግዚኣብሄር ስለ እተጻረረ፡ የሩሳሌም ሰንከልከል ትብል፡ ይሁዳ ኸኣ ትወድቕ ኣላ።⁹ትርኢት ገጾም ዘርትዖም ይምስክር፡ ንሓጢኣቶም ከም ሶዶም የውርይዎ፡ ኣይሓብእዎን ከኣ፡ ኣብ ርእሶም ሕሰም የምጽኡ ኣለው እሞ፡ ወይለኣ ነፍሶም።¹⁰ንጻድቕ፡ ፍረ ግብሩ ኽበልዕ እዩ እሞ፡ ተዓዊትካ በልዎ።¹¹ንረሲእሲ እኩይ ክረኽቦ እዩ፡ ግብሪ ኢዱ ኽፍደ እዩ እሞ፡ ወይለኡ።¹²ገፋዕቲ ህዝበይ ቈልዑ እዮም፡ ኣንስቲ ኸኣ ይገዝእኦ ኣለዋ። ዎ ህዝበይ፡ መራሕትኻ ኣጋገዩኻ፡ ነታ እትኸደላ መገዲ ኸኣ የጥፍእዋ ኣለው።
   ¹³እግዚኣብሄር ክምጒት ይትንስእ፡ ንህዝብታት ክፈርዶም ይቐውም።¹⁴እግዚኣብሄር ነቶም ናይ ህዝቡ ዓበይትን መሳፍንትን ክፈርዶም ይኣቱ፡ ነቲ ኣታኽልቲ ወይኒ ንስኻትኩም ኢኹም ዝበላዕኩምዎ፡ እቲ ኻብ ድኻታት ዝዘረፍኩምዎ ኣብ ኣባይትኹም ኣሎ።¹⁵ንህዝበይ እትረግጽዎ፡ ንገጽ ድኻታት ከኣ እትደቑሱንሲ፡ ስለምንታይ ኢኹም ይብል እግዚኣብሄር፡ ጐይታ ሰራዊት።
   ¹⁶መሊሱ እግዚኣብሄር በለ፡ ኣዋልድ ጽዮን ኰሪዐን፡ ክሳውደን ገቲረን፡ በዒንተን ቅምጽ እናበላን ብግንትእ ዝብል ኣረጋግጻን ብሽዋሕዋሕ ዝብል ስልማት እግርን ይኸዳ ኣለዋ እሞ፡¹⁷እግዚኣብሄር ንናላ ኣዋልድ ጽዮን ከንኲዖ፡ እግዚኣብሄር ድማ ንሓፍረተን ክቐልዖ እዩ።¹⁸በታ መዓልቲ እቲኣ እግዚኣብሄር ንጌጽ ኣምባር እግርን ንጥሉፍ መጐልበብን ንሳንቃ ድርን ኪቕንጥጦ እዩ።¹⁹ንዂትሻን ኣምባር ኢድን መጐልበብን፡²⁰ንመጠምጠምያን ስጒሚ ኸሕጽር እተሰርሐ ሰንሰለትን ንቕናትን ቢልቃጥ ሽቱን ክታባውትን፡²¹ንቐለቤት ኣጻብዕን ቀለቤት ኣፍንጫን፡²²ንኽዳውንቲ በዓልን ባርኖስን፡ ንመደረብታን ሕልሕሎን፡²³ንመስትያትን ቅዕጭን ዓለባን ንጋማን መጐልበብን ኪቕንጥጦ እዩ።²⁴ኣብ ክንዲ ምኡዝ ሽቱ ጺእ ጨና፡ ኣብ ክንዲ ቕናት ከኣ ገመድ፡ ኣብ ክንዲ ጐተና ነዃዕ፡ ኣብ ክንዲ ባርኖስ ከኣ ከሊ፡ ኣብ ክንዲ ጽባቐ መልክዕውን ናይ ንዳድ በሰላ ክኸውን እዩ።²⁵ሰብኡትኪ ብሰይፊ፡ ጀጋኑኺ ኣብ ውግእ ክወድቁ እዮም።²⁶ደጌታት ክቑዝማን ክሓዝናን እየን፡ ዖንያ ኸኣ ኣብ ምድሪ ኽትቅመጥ እያ።

ትን. ኢሳይያስ ምዕራፍ 4

   ¹በታ መዓልቲ እቲኣ ሾብዓተ ኣንስቲ፡ እንጌራ ንበልዕ፡ ክዳንናውን ንኽደን፡ ሓንትስ ብስምካ ኽንጽዋዕ ሕደገና፡ ጸርፍና ኸኣ ኣርሕቕ፡ እናበላ ንሓደ ሰብኣይ ክሕዛኦ እየን።²በታ መዓልቲ እቲኣ ነቶም ዘምለጡ ናይ እስራኤል፡ እቲ ጨንፈር እግዚኣብሄር ንጌጽን ንኽብርን፡ እቲ ፍረ ምድሪውን ንሓበንን ሓጐስን ክዀኖም እዩ።^3-4እግዚኣብሄር ብመንፈስ ፍርድን ብመንፈስ ምንዳድን ገይሩ፡ ንርኽሰት ኣዋልድ ጽዮን ምስ ሓጸበ፡ ንደም የሩሳሌም ድማ ካብ ማእከል ምስ ኣጽረየ፡ ኣብ ጽዮን እተሓድገን ኣብ የሩሳሌም ዝተረፈን፡ ነፍሲ ወከፍ ኣብ የሩሳሌም ምስ ህያዋን እተጻሕፈ፡ ቅዱስ እዩ ዝበሃለሉ ግዜክኸውን እዩ።⁵ኣብ ልዕሊ ዂሉ ኽብርስ መኸወሊ ክኸውን እዩ እሞ፡ እግዚኣብሄር ኣብ ልዕሊ ዂሉ መሳፍሮ ኣኽራን ጽዮንን፡ ኣብ ልዕሊ ኣኼባታታን ደበናን ትክን ብመዓልቲ፡ ባና ሃልሃል ዝብል ሓዊ ኸኣ ብለይቲ ኽፈጥር እዩ።⁶ኣብኡ ኸኣ ብመዓልቲ ኻብ ሃሩር መጽለሊ፡ ካብ ሽሾን ዝናምን ከኣ ጸግዕን መዕቀልን ዝኸውን ድንኳን ክህሉ እዩ።

ትን. ኢሳይያስ ምዕራፍ 5

   ¹ቅነ ፍቁረይ ብዛዕባ ኣታኽልቲ ወይኒ ንፍትወይ እቕነየሉ ኣሎኹ። ፍቁረይ ኣታኽልቲ ወይኒ ኣብ ፍርያም ኲርባ ነበሮ።²ኰዓቶ ኣእማኑ ኸኣ ኣርዩ ኣውጽእ እሞ፡ ሕሩይ ተኽሊ ወይኒ ተኸለሉ፡ ኣብ ማእከሉ ድማ ግምቢ ሰርሓሉ፡ መሓምተሊ ኸኣ ኣብ ውሽጡ ገበረሉ። ዘቢብ ከፍሪውን ተጸበየ፡ ግናኸ መጺጽ ፍረ ኣፍረየ።³ኣቱም ኣብ የሩሳሌም እትነብሩን ኣቱም ሰብ ይሁዳን፡ እስኪ ሕጂ ኣብ መንጎይን ኣብ መንጎ ኣታኽልቲ ወይነይን ፍረዱ።⁴ነታኽልቲ ወይነይሲ ሓለፋ እቲ ኣነ ዝገበርኩሉ እንታይ ኰን ምተገብረሉ ነይሩ ዘቢብ የፍሪ እዩ ኢለ እናተጸቤኽዎስ፡ ስለምንታይ እዩ መጺጽ ፍረ ዘፍረየ፧
⁵እምበኣርከ ነቲ ኣብ ኣታኽልቲ ወይነይ ዝገብሮ እፍልጠኩም፡ ንሓጹሩ ክቕንጥጦ እየ፡ መጓሰዪ ኸኣ ክኸውን እዩ፡ ንመካበብያኡ ኸፍርሶ እየ፡ ክርገጽውን እዩ።⁶ከባድሞ እየ፡ ኣይክጽልጽልን ኣይክዂስኰስን ድማ እዩ፡ እሾዂን ተዀርባን ከኣ ክበቑሎ እዩ፡ ንደበናታት ድማ ዝናም ከየዝንሙሉ ኽእዝዞም እየ።⁷እቲ ኣታኽልቲ ወይኒ ናይ እግዚኣብሄር ጐይታ ሰራዊትሲ ቤት እስራኤል እዩ፡ እቲ ተኽሊ ደስታኡ ኸኣ ሰብ ይሁዳ እዮም፡ ፍትሒ ተጸብዩስ፡ እንሆ፡ ምኽዓው ደም፡ ጽድቂ ተጸብዩስ፡ እንሆ፡ ኣውያት ረኸበ።
   ⁸ንስኻትኩም በይንኹም ኣብ ማእከል ሃገር ክትነብሩስ፡ እቶም ስፍራ ኽሳዕ ዝሰኣን፡ ቤት ኣብ ቤት ዝድርቡ፡ ግራት ከኣ ናብ ግራት ዘቕርቡ ወይለኦም።^9-10እግዚኣብሄር ጐይታ ሰራዊት ካብ ዓሰርተ ጽምዲ ዘውዕል ኣታኽልቲ ወይንስ ሓደ ባት፡ ሓደ ሆመር ዘርኢ ኸኣ ሓደ ኤፋ ጥራይ ክእቶ እዩ እሞ፡ ብሓደ እቲ ብዙሕ ኣባይቲ ኽዖኑ እዩ፡ እቲ ዓበይቲ ጽቡቕን እኳ ዝነብሮ ዘይብሉ ክኸውን እዩ፡ ኢሉ ኣብ እዝነይ ተዛረበ።
   ¹¹እቶም ንብርቱዕ መስተ ኽስዕቡ ወጋሕታ ኣንጊሆም ዝትንስኡ፡ ወይኒ ኽሳዕ ዘርስኖም ድማ ኣዝዮም ዘምስዩስ ወይለኦም።¹²መሰንቆን ጭራን ከበሮን እምብልታን ወይንን ኣብ ድግሶም ኣሎ፡ ንተግባር እግዚኣብሄር ግና ኣየስተብህልዎን፡ ነቲ ግብሪ ኣእዳው ኸኣ ኣይርእይዎን።¹³ስለዚውን ህዝበይ ሰኣን ፍልጠት ተማረኹ፡ ክቡራቶም ብጥሜት ይሞቱ፡ ሰቦም ድማ ብጽምኢ ይነቕጹ ኣለው።¹⁴ስለዚ ሲኦል ንትምኒታ ኣርሒባ፡ ኣፋውን ብዘይ ልክዕ ሃህ ኣቢላ ኣላ፡ ክብረቶምን ብዝሒ ሰቦምን ጌጾምን እቲ ኣብኡ ባህ ዝብሎን ናብኣ ይወርድ ኣሎ።¹⁵እቲ ማንም ሰብ ለጠቕ ክብል፡ እቲ ምርኡይ ከኣ ክዋረድ እዩ፡ ኣዒንቲ ዂሩዓት ድማ ክዋረዳ እየን።¹⁶እግዚኣብሄር ጐይታ ሰራዊት ግና ብፍርዲ ልዕል ይብል፡ እቲ ቅዱስ ኣምላኽ ድማ ብጽድቂ ይቕደስ።¹⁷ሽዑ ዕያውቲ ኸም ኣብ መጓሰይኦም ክጓሰዩ እዮም፡ ነቲ ዝባደመ ቦታ ሃብታማት ከኣ ጓኖት ክበልዕዎ እዮም።
   ¹⁸እቶም ንኣበሳ ብገመድ ሓሶት፡ ንሓጢኣት ከኣ ከም ብመታምር ሰረገላ ዝስሕብዎ ወይለኦም።¹⁹እቶም፡ ክንርእዮስ ይቐልጥፍ፡ ዕዮኡ ኸኣ ፈጢኑ ይግበር፡ ምእንቲ ኽንፈልጦ ድማ፡ ምኽሪ እቲ ናይ እስራኤል ቅዱስ ትቕረብ ትምጻእውን፡ ዝብሉ ወይለኦም።²⁰እቶም ነቲ እከይሲ ሰናይ፡ ንሰናይ ከኣ እከይ ዝብሉ፡ ንጸልማትሲ ብርሃን፡ ንብርሃን ድማ ጸልማት ዝገብርዎ፡ ንመሪርሲ ጥዑም፡ ንጥዑምውን መሪር ዝገብርዎ ወይለኦም።²¹እቶም ኣብ ቅድሚ ኣዒንቶም ጠቢባን፡ ብርእሶም ከኣ ኣስተውዓልቲ ዝዀኑ ወይለኦም።
   ²²እቶም ንምስታይ ወይኒ ዝሕይሉ፡ ዘስክር መስተ ንምሕዋስ ከኣ ዝብርትዑ ሰብ ወይለኦም።²³መማለጃ ተቐቢሎም ንረሲእ ዘጽድቕዎ፡ ንጻድቕ ድማ ጽድቁ ዘግድፍዎ ወይለኦም።²⁴ንሕጊ እግዚኣብሄር ጐይታ ሰራዊት ንዒቖምዎ፡ ንቓል እቲ ናይ እስራኤል ቅዱስ ከኣ ተሓሲሞምዎ እዮም እሞ፡ ስለዚ ኸምቲ ልሳን ሓዊ ንብርዒ ዘንድዶ፡ ንቑጽ ሳዕሪ ኸኣ ብሃልሃልታ ሞዂ ዝብል፡ ሱሮም ከም ብዂብዂ ክኸውን፡ ዕምባባኦም ከኣ ከም ዕሻሽ ክተጒጒ እዩ።
   ²⁵ስለዚ ቁጥዓ እግዚኣብሄር ኣብ ህዝቡ ነደደ፡ ኢዱ ኸኣ ኣባታቶም ዘርግሐ እሞ ወቕዖም፡ ኣኽራን ኣንቀጥቀጡ፡ ሬሳኦም ድማ ከም ጐሓፍ፡ ኣብ ማእከል ኣደባባይ ኰነ። ምስናይዚ ዂሉ ድማ ቁጥዓኡ ኣይተመልሰን፡ ኢዱውን ገና ተዘርጊሓ ኣላ።
   ²⁶ነቶም ኣብ ርሑቕ ዘለው ኣህዛብ ድማ ሰንደቕ ዕላማ ኸልዕለሎም፡ ካብ ጽንፊ ምድሪ ኸኣ ብፋጻ ኽጽውዖም እዩ፡ እንሆውን ብፍጥነት ቀልጢፎም ክመጹ እዮም።²⁷ድኹምን ስንከልከል ዝብልን ኣብ ማእከል የልቦን፡ ሓደ እኳ ኣይታኸስን ኣይድቅስን፡ ቅናት ሕቑኦም ኣይፍታሕን፡ ጥላም ሳእኖም ከኣ ኣይብተኽን።²⁸ፍላጻታቶም በሊሕ፡ ኲሉ ቐስቶም ድማ ግቱር እዩ፡ ሸዀና ኣፍራሶም ከም ኣዝሒት እዩ፡ መንኰርኰር ሰረገላታቶም ከኣ ከም ህቦብላ እዩ።²⁹ምጒዛሞም ነቲ ናይ ዋዕሮ ይመስል፡ ከም ሽደን ኣንበሳ ይጓዝሙ፡ የጒራዕርዑ፡ ግዳዮም ዓትዒቶም ኣብ ጽኑዕ ይወስድዎ፡ ዘናግፍውን የልቦን።³⁰በታ መዓልቲ እቲኣ ኸም ህማም ባሕሪ ኣብኦም ክሃሙ እዮም፡ ኣብታ ሃገር እንተ ጠመትካ ኸኣ፡ እንሆ፡ ጸልማት ጸበባን፡ እቲ ብርሃንውን ኣብ ደበናታታ ይጽልምት።

ትን. ኢሳይያስ ምዕራፍ 6

   ¹በታ ንጉስ ኡዝያ ዝሞተላ ዓመት ኣነ፡ እግዚኣብሄር ኣብ በሪኽን ልዕል ዝበለን ዝፋን ተቐሚጡ ኸሎ፡ ርእኽዎ፡ ዘፈራት ልብሱ ኸኣ ነቲ መቕደስ መሊእዎ ነበረ።²ኣብ ልዕሊኡ ድማ ሱራፌል ቈይሞም ነበሩ፡ ነፍሲ ወከፎም ሹድሽተ ኽንፊ ኣለዎ፡ በቲ ኽልተ ንገጹ ይኸድኖ፡ በቲ ኽልተ ድማ ነእጋሩ ይኸድኖ፡ በቲ ኽልተውን ይነፍር ነበረ።
   ³እቲ ሓደ ኸኣ፡ ቅዱስ፡ ቅዱስ፡ ቅዱስ እዩ እግዚኣብሄር ጐይታ ሰራዊት፡ ኲላ ምድሪ ብኽብሩ መሊኣ ኣላ፡ ኢሉ ኣድሃየ።⁴ብድምጺ እቶም ዘድሃዩ እቲ መሰረት ልዳውቲ ኣንቀጥቀጠ፡ እታ ቤትውን ትኪ መልእት።
   ⁵ሽዑ ድማ፡ ከናፍረይ ዝርኹስ ሰብ እየ፡ ኣብ ማእከል እቲ ኸናፍሩ ዝርኹስ ህዝቢ ኸኣ እነብር ኣሎኹ እሞ፡ ወይለይ፡ ኣዒንተይ ንንጉስ፡ ንእግዚኣብሄር ጐይታ ሰራዊት፡ ርእየን እየን እሞ፡ ጠፋእኩ፡ በልኩ።⁶ካብቶም ሱራፌል ሓደ ድማ፡ ጓህሪ ኻብቲ መሰውኢ ብጒጤት ወሲዱ፡ ኣብ ኢዱ ሒዙ ናባይ ነፈረ።⁷ብእኡ ኸኣ ኣፈይ ተንከየ እሞ፡ እንሆ፡ እዚ ንኸናፍርካ ተንከዮ፡ ኣበሳኻ ረሓቐልካ፡ ሓጢኣትካውን ጸረየልካ፡ በለ።
   ⁸ንመን ክልእኽ መንከ ክኸደልና እዩ ዝብል ድምጺ እግዚኣብሄር ሰማዕኩ። ኣነውን፡ እኔኹ ልኣኸኒ፡ በልኩ።^9-10ንሱ ድማ፡ ኪድ እሞ ነዚ ህዝቢ እዚ፡ ምስማዕሲ ስምዑ፡ ግናኸ ኣይተስተውዕሉ፡ ምርኣይሲ ርኣዩ፡ ግናኸ ኣይተለልዩ፡ ኢልካ ተዛረቦ። ምእንቲ በዒንቶም ከይርእዩ፡ በእዛኖም ከኣ ከይሰምዑ፡ ብልቦምውን ከየስተውዕሉ፡ ከይምለሱ እሞ ከይሓውዩስ፡ ንልቢ እዚ ህዝቢ እዚ ድፈኖ፡ ነእዛኖም ኣጽምመን፡ ነዒንቶምውን ዓምተን፡ ኢሉ ተዛረበኒ።
   ¹¹ኣነ ኸኣ፡ ጐይታየ፡ ክሳዕ መኣዝ፡ በልኩ። ንሱ ድማ በለ፡ ከተማታት ክሳዕ ዝባድማ እሞ ዝነብረን ዘይብለን፡ ኣባይቲ ብዘይ ሰብ፡ እታ ሃገርውን በረኻ ዀይና ኽሳዕ እትባድም፡¹²እግዚኣብሄር ንሰብ ክሳዕ ዘግዕዞም፡ ኣብ ማእከል እታ ሃገርውን ጽምዊ ስፍራታት ክሳዕ ዝበዝሕ።¹³ዕሽር እኳ ኣብኣ እንተ ተረፈ፡ ንሱውን መሊሱ ኽጠፍእ እዩ። ግናኸ ከምቲ መመናን ኣውሕን ምስ ተቘርጸ፡ ጒንዱ ዝተርፍ፡ ከምኡ እቲ ቅዱስ ዘርኢ ጒንዱ ክኸውን እዩ።

ትን. ኢሳይያስ ምዕራፍ 7

   ¹ኰነ ኸኣ፡ ሬጺን ንጉስ ሶርያን ጴቃሕ ወዲ ረማልያ ንጉስ እስራኤልን ብዘመን ኣሃዝ ወዲ ዮታም፡ ወዲ ኡዝያ፡ ንጉስ ይሁዳ፡ ንየሩሳሌም ክዋግእዋ ተላዕሉ፡ ግናኸ ኣይተኻእሎምን።²ንቤት ዳዊት ከኣ፡ ሶርያ ኣብ ኤፍሬም ሰፊሮም፡ ኢሎም ኣውረዩሎም። ከምቲ ኣእዋም ዱር ብንፋስ ዝናውጽ፡ ልቡን ልቢ ህዝቡን ተናወጸ።
   ³ሽዑ እግዚኣብሄር ንኢሳይያስ በሎ፡ ንስኻ ምስ ሸኣርያሸብ፡ ወድኻ፡ ውጻእ እሞ ኣብቲ ወሰን መስኖ ላዕላይ ቀላይ ብጽርግያ ግራት ሓጻቢ ንኣሃዝ ተቐባበሎ፡⁴እሞ ንገሮ፡ ተጠንቀቕ፡ ህዳእ ኣይትፍራህውን፡ በዘን ክልተ ተኸኽቲ ተረፍ እያድ፡ በቲ ናይ ሬጺንን ናይ ሶርያን ናይ ወዲ ረማልያን ጒሁር ቁጥዓ ኸኣ ልብኻ ኣይጥፋእ።^5-6ሶርያን ኤፍሬምን ወዲ ረማልያን፡ ናብ ይሁዳ ንደይብ እሞ ንሸብራ፡ ኣፍሪስና ንእቶ፡ ንወዲ ጣብኤል ከኣ ኣብኣ ነንግሶ፡ እናበሉ እኩይ መኺሮምልካ ኣለው።^7-8እግዚኣብሄር ኣምላኽ ከምዚ ይብል፡ ርእሲ ሶርያ ደማስቆ፡ ርእሲ ደማስቆ ኸኣ ሬጺን እዩ እሞ፡ እዚ ኣይክቐውምን ኣይክኸውንን ድማ እዩ፡ ብስሳን ሓሙሽተን ዓመት ድማ ኤፍሬም ህዝቢ ኸይከውን ክጭፍለቕ እዩ።⁹ርእሲ ኤፍሬም ከኣ ሰማርያ እያ፡ ርእሲ ሰማርያ ድማ ወዲ ረማልያ እዩ። እንተ ዘይኣመንኩም፡ ብሓቂ ኣይትጸንዑን ኢኹም።
   ^10-11እግዚኣብሄር ድማ፡ ካብ እግዚኣብሄር ኣምላኽካ ትእምርቲ ለምን፡ ካብቲ ዓሚቑ ወይስ ካብቲ ኣብ ላዕሊ ዘሎ በሪኽ ለምን፡ ኢሉ ኸም ብሓድሽ ንኣሃዝ ነገሮ።¹²ኣሃዝ ግና፡ ኣይልምንን፡ ንእግዚኣብሄር ከኣ ኣይፍትኖን እየ፡ በለ።¹³ሽዑ በለ፡ እምበኣርሲ ኣቱም ቤት ዳዊት፡ ስምዑ፡ እቲ ንሰብ ላሕ ምባልኩምዶ ውሒዱ እዩ፡ ንኣምላኸይ ድማ ላሕ እተብልዎ¹⁴ስለዚ እግዚኣብሄር ባዕሉ ትእምርቲ ኽህበኩም እዩ፡ እንሆ፡ ድንግል ክትጠንስ፡ ወዲ ኸኣ ክትወልድ እያ፡ ስሙውን ኣማኑኤል ክትሰምዮ እያ።¹⁵ንእከይ ምእባይ ንሰናይ ከኣ ምሕራይ ክሳዕ ዝፈልጥሲ፡ ጠስምን መዓርን ክበልዕ እዩ።¹⁶እቲ ቘልዓ ንእከይ ምእባይ ንሰናይ ከኣ ምሕራይ ከይፈለጠ፡ ሃገር እቶም እትፈርሆም ዘሎኻ ኽልተ ነገስታ ክትሕደግ እያ።¹⁷ኤፍሬም ካብ ይሁዳ ኻብ ዝፍለ መዓልቲ ጀሚሩ፡ እግዚኣብሄር ከምኡ ዘመሰለ መዓልትታት ከቶ ዘይመጻ፡ ኣባኻን ኣብ ህዝብኻን ኣብ ቤት ኣቦኻን ከምጽእ እዩ፡ ማለት ንጉስ ኣሶር።
   ¹⁸በታ መዓልቲ እቲኣ ክኸውን እዩ፡ እግዚኣብሄር ነቲ ኣብ ወሰን ርባታት ግብጺ ዘሎ ጽንጽያን ኣብ ምድሪ ኣሶር ዘሎ ንህብን ብፋጻ ኽጽውዖም እዩ።¹⁹ንሳቶም ከኣ ክመጹ እሞ ኲላቶም ኣብ ጽምዊ ሽንጭሮን ኣብ ምንቃዕ ኣኻውሕን ኣብ ኲሉ ኣእሻዂን ኣብ ኲሉ ስዕሩር ምድርን ክሰፍሩ እዮም።
   ²⁰በታ መዓልቲ እቲኣስ እግዚኣብሄር በታ ኻብ ስግር ርባ እተኻረያ መላጸ፡ ማለት ንጉስ ኣሶር፡ ንርእስን ንጸጒሪ እግርን ክላጺ እዩ፡ ንጭሕሚውን ክሰዶ እዩ።
   ^21-22በታ መዓልቲ እቲኣ ኸኣ ክኸውን እዩ፡ ኣብታ ሃገር ዝተረፈ ዘበለ ዂሉስ ጠስምን መዓርን ክበልዕ እዩ እሞ፡ ነፍሲ ወከፍ ሰብ ንሓንቲ በኳር ኣርሕን ንኽልተ ኣባጊዕን ክምግብ እዩ፡ ካብ ብዝሒ ጸበእን እተላዕለ ኸኣ ጠስሚ ኽበልዕ እዩ።
   ²³በታ መዓልቲ እቲኣ ድማ ክኸውን እዩ፡ ኣብቲ ሽሕ ቅርሺ ዝገምጋሙ ሽሕ ተኽሊ ወይኒ ዘለዎ ዂሉ ስፍራስ፡ እሾዂን ተዀርባን ክዀኖ እዩ።²⁴ኲላ እታ ምድሪ እቲኣ እሾዂን ተዀርባን ክትከውን እያ እሞ፡ ፍላጻን መንትግን ሒዞም ናብኣ ኽኣትው እዮም።²⁵እቲ ብመባሮ ዝባሮ ዝነበረ ዂሉ ዀረቢት ከኣ ካብ ፍርሂ እሾዂን ተዀርባን እተላዕለ ሓደ እኳ ዝኸዶ የልቦን፡ ግናኸ መውፈር ኣብዑርን መርገጽ ኣባጊዕን ክኸውን እዩ።

ትን. ኢሳይያስ ምዕራፍ 8

   ¹እግዚኣብሄር ድማ፡ ዓብዪ ሰሌዳ ውሰድ ኣብኡውን፡ ቀልጢፍካ ዝመት፡ ፈጢንካ ማርኽ፡ ኢልካ ብብርዒ ሰብ ጸሓፍ፡ በለኒ።²እሙናት ምስክር ከኣ፡ ንኡርያ እቲ ኻህንን ንዘካርያስ ወዲ ይቤፊኽያን ወሰድኩ።^3-4ኣብታ ነብይት ከኣ ቀረብኩ፡ ንሳውን ጠነሰት ወዲ ኸኣ ወለደት። ሽዑ እግዚኣብሄር፡ እቲ ሕጻን ኣቦይን ኣደይን ምባል ከይፈለጠ፡ ሃብቲ ደማስቆን ምርኮ ሰማርያን ኣብ ቅድሚ ንጉስ ኣሶር ክወስድዎ እዮም እሞ፡ ነቲ ሕጻን፡ ቀልጢፍካ ዝመት፡ ፈጢንካ ማርኽ፡ ኢልካ ስመዩ፡ በለኒ።
   ⁵ከም ብሓድሽ ከኣ እግዚኣብሄር ከምዚ ኢሉ ተዛረበኒ፡⁶እዚ ህዝቢ እዚ ነቲ ለመም ኢሉ ዝውሕዝ ማይ ሰሊሆም፡ ንዒቑ፡ ብረጺንን ብወዲ ረማልያን ከኣ ተሓጒሱ እዩ እሞ፡⁷ምእንትዚ እንሆ፡ እግዚኣብሄር ነቲ ብርቱዕን ዓብይን ማያት ርባ፡ ማለት ንጉስ ኣሶርን ኲሉ ኽብሩን፡ ኣብ ልዕሊኦም ከደይቦ እዩ፡ ንሱውን ንዂሉ ደንደሱ ኽሓልፎን ኣብ ኲሉ ገምገሙ ኸውሕዝን እዩ።⁸ናብ ይሁዳ ጥሒሱ ኽኣቱ፡ ኣብ ልዕሊ ገምገሙ ወጺኡ እናሓለፈ፡ ክሳዕ ክሳድ ክበጽሕ እዩ። ዎ ኣማኑኤል፡ ምዝርጋሕ ኣኽናፉውን ንራሕቢ ሃገርካ ኽመልኦ እዩ።
   ⁹ኣቱም ህዝብታት፡ ነድሩ እሞ ክትጭፍለቑ ኢኹም፡ ኣቱም ሰብ ርሑቕ ሃገር ከኣ ኲሉኹም፡ ጽን በሉ፡ ተዓጠቑ እሞ ክትጭፍለቑ፡ ተዓጠቑ እሞ ክትጭፍለቑ ኢኹም።¹⁰እግዚኣብሄር ምሳና እዩ እሞ፡ ምኽሪ መድቡ፡ ክዝርዘር ከኣ እዩ፡ ቃል ተዛረቡ፡ ኣይክቐውምን ድማ እዩ።¹¹እግዚኣብሄር ብሓያል ኢድ ከምዚ ተዛሪቡኒ እዩ እሞ፡ ብመገዲ እዚ ህዝቢ እዚ ኸይመላለስ ከምዚ ኢሉ ገሰጸኒ፡¹²እዚ ህዝቢ እዚ ምምሕሓል ንዝብሎ ዂሉ ምምሕሓል ኣይትበልዎ፡ ነቲ ዝፈርሆ ኸኣ ኣይትፍርህዎ፡ ብእኡውን ኣይትሰክሑ።¹³ንእግዚኣብሄር ጐይታ ሰራዊት፡ ንእኡ ቀድስዎ፡ ንሱ ፍርሃትኩም ይኹን፡ ንሱ ስምባድኩም ይኹን።¹⁴ንሱ ኸኣ መቕደስ ክኸውን እዩ፡ ነተን ክልተ ቤት እስራኤል ግና እምኒ ምዕንቃፍን ከውሒ ምንስታትን፡ ነቶም ኣብ የሩሳሌም ዝነብሩውን መድፈናን መፈንጠጣን ክዀኖም እዩ።¹⁵ብዙሓት ካባታቶም ከኣ ክዕንቀፉን ክወድቁን ክስበሩን ክፍንጠሩን ክተሓዙን እዮም።
   ¹⁶ኣብ ማእከል ደቀ መዛሙርተይ ምስክር እሰር፡ ሕጊውን ሕተም።¹⁷ኣነስ ነቲ ኻብ ቤት ያእቆብ ገጹ ዝሓብእ እግዚኣብሄር እጽበ፡ ብእኡውን ተስፋ እገብር ኣሎኹ።¹⁸እንሆ፡ ኣነን እቶም እግዚኣብሄር ዝሃበኒ ደቅን፡ ኣብ ከረን ጽዮን ዝነብር እግዚኣብሄር ጐይታ ሰራዊት፡ ኣብ እስራኤል ንትእምርትን ተኣምራትን ኴንና ኣሎና።¹⁹ነቶም ብሕሽዂሽዂን ብሰላሕ ላሕን ዝዛረቡ ጠንቈልትን ኣስማተኛታትን ጠይቑ፡ እንተ በሉኹም፡ ንስኻትኩም ከኣ፡ ህዝቢዶ ንኣምላኹ ኣይሓትትን፡ ብዛዕባ ህያዋንሲ ንምውታትዶ ይሓትት እዩ ኢልኩም ምለሱሎም።²⁰ናብ ሕግን ናብ ምስክርን፡ ከምዚ ዘመሰለ ቓል እንተ ዘይተናገሩ፡ ብሓቂ ወጋሕታ የብሎምን።
   ²¹ሸጊርዎምን ጠምዮምን ኣብታ ሃገር ክዞሩ እዮም። ምስ ጠመዩ ድማ፡ ሓሪቖም ንንጉሶምን ኣምላኾምን ክረግሙ እዮም። ንላዕሊ ገጾም ከንቃዕርሩ፡²²ናብ ምድሪ ድማ ክጥምቱ እዮም፡ እንሆውን፡ ጸበባን ጸልማትን ዘሸብር ጽልግልግታን ኣሎ፡ ናብ ድቕድቕ ጸልማት ክድፍኡ እዮም።

ትን. ኢሳይያስ ምዕራፍ 9

   ¹ግናኸ ኣብታ እትሽገር ሃገርሲ ጸልማት ኣይክነብርን እዩ። ኣብቲ ዘመን ቀደም ንምድሪ ዛብሎንን ንምድሪ ንፍታሌምን ከም ዘቃለለን፡ ከምኡ ኣብቲ ዳሕራይ ዘመን ንመገዲ ባሕሪ፡ ንማዕዶ ዮርዳኖስ፡ ነታ ናይ ኣህዛብ ገሊላ ከኽብራ እዩ።²እቲ ኣብ ጸልማት ዝመላለስ ህዝቢ ዓብዪ ብርሃን ረኣየ፡ ነቶም ኣብ ምድሪ ድነ ሞት ዝነብሩውን ብርሃን ኣብርሃሎም።³ነቲ ህዝቢ ኣብዛሕካዮ፡ ንሓጐሶም ከኣ ኣዕቤኻዮ፡ ከምቲ ሓጐስ ቀውዕን ከምቲ ምርኮ ኽማቐሉ ኸለው ዝሕጐሱን፡ ከምኡ ኣብ ቅድሜኻ ይሕጐሱ።⁴ነርዑት ጾሩን ንበትሪ መንኲቡን ንስላዕ ገፋዒኡን ከም ብመዓልቲ ሚድያን ጌርካ ሰበርካዮ።⁵ሰብ ኣብ ውግእ እተዓጥቆ ዘበለ ኣጽዋርን፡ ብደም እተዓለሰ ኽዳንን ክነድድ፡ ሓዊ ድማ ክበልዖ እዩ።⁶ሕጻን ተወሊዱልና፡ ወዲ ተውሂብና እዩ እሞ፡ እቲ ግዝኣት ከኣ ኣብ መንኲቡ እዩ፡ ስሙውን ግሩም፡ መካር፡ ብርቱዕ ኣምላኽ፡ ኣቦ ዘለኣለም፡ መስፍን ሰላም ክስመ እዩ።⁷ብፍርድን ብጽድቅን ካብ ሕጂ ኽሳዕ ዘለኣለም ምእንቲ ኸጽንዓን ከቑማንሲ፡ ኣብ ዝፋን ዳዊትን ኣብ መንግስቱን ዕቤት ግዝኣቱን ሰላሙን መወዳእታ የብሉን። ቅንኣት እግዚኣብሄር ጐይታ ሰራዊት ነዚ ኽገብር እዩ።
   ⁸እግዚኣብሄር ናብ ያእቆብ ቃል ሰደደ፡ እዚውን ኣብ እስራኤል ወደቐ።^9-10ኲሉ እቲ ህዝብን እቶም ብትዕቢት ብዂርዓት ልቦምን፡ ጡብ ፈረስ፡ ግናኸ ብውቑር እምኒ ኽንሃንጽ፡ ኦም ሳግላ ተቘርጸ፡ ግናኸ ጽሕዲ ኽንትክኣሉ ኢና፡ ዝብሉ ኤፍሬምን እቶም ኣብ ሰማርያ ዝነብሩን ክፈልጡ እዮም።¹¹ስለዚ እግዚኣብሄር ንተጻረርቱ ሬጺን ኣብ ልዕሊኡ ኸተንስኣሉ፡ ንጸላእቱውን ከለዓዕሎም እዩ፡¹²ሰብ ሶርያ ኻብ ምብራቕ፡ ፍልስጥኤማውያን ድማ ካብ ምዕራብ፡ እዚኣቶም ከኣ ኣፎም ሃህ ኣቢሎም ንእስራኤል ክውሕጥዎም እዮም። ምስናይ እዚ ዂሉስ ቁጥዓኡ ኣይተመልሰን፡ ኢዱውን ገና ተዘርጊሓ ኣላ።
   ¹³እቶም ህዝቢ ግና ናብቲ ዝወቕዖም ኣይተመልሱን፡ ንእግዚኣብሄር ጐይታ ሰራዊት ከኣ ኣይደለይዎን።¹⁴ስለዚ እግዚኣብሄር ንርእስን ጭራን፡ ንስየን ሰልሰላን ካብ እስራኤል ብሓንቲ መዓልቲ ክቘርጾ እዩ።¹⁵እቲ ዓብይን እቲ ምርኡይን ርእሲ እዩ፡ እቲ ሓሶት ዝምህር ነብዪ ኸኣ ጭራ እዩ።
   ¹⁶መራሕቲ እዚ ህዝቢ እዚ መስሓትቲ እዮም፡ እቶም ብኣታቶም ዝምርሑውን ክጠፍኡ እዮም።¹⁷ኲላቶም ግቡዛትን ገበርቲ ኽፋእን እዮም፡ ኲሉ ኣፍ ከኣ ዕሽነት ይዛረብ እዩ እሞ፡ ስለዚ እግዚኣብሄር በጒባዞም ኣይክሕጐስን እዩ፡ ንዘኽታማቶምን ንመበለታቶምን ከኣ ኣይክርሕርሓሎምን እዩ። ምስናይ እዚ ዂሉስ ቁጥዓኡ ኣይተመልሰን፡ ኢዱውን ገና ተዘርጊሓ ኣላ።
   ¹⁸ረሲእነት ከም ሓዊ ይነድድ እሞ፡ ንእሾዂን ተዀርባን ይበልዖ፡ ኣብ ጽቡቕ ዱር ይባራዕ፡ ከም ኣዕኑድ ትኪውን ንላዕሊ ይወጽእ።¹⁹እታ ሃገር ብቑጥዓ እግዚኣብሄር ጐይታ ሰራዊት ትነድድ፡ ህዝቢ ድማ ኣደዳ ሓዊ ይኸውን፡ ሓደ እኳ ንሓው ኣይንሕፍን።²⁰ሰብ ካብ የማን ይምንጥል ይጠሚ ኸኣ፡ ካብ ጸጋም ይውሕጥ ኣይጸግብን ድማ፡ ነፍሲ ወከፍ ካብ ቀቅልጽሙ ስጋ ኽበልዕ እዩ።²¹ምናሴ ንኤፍሬም፡ ኤፍሬም ከኣ ንምናሴ ይበልዖ፡ ሓቢሮምውን ንይሁዳ ይቃወምዎ። ምስናይ እዚ ዂሉስ ቁጥዓኡ ኣይተመልሰን፡ ኢዱውን ገና ተዘርጊሓ ኣላ።

ትን. ኢሳይያስ ምዕራፍ 10

   ^1-2እቶም ንሽጉራትሲ ፍትሒ ክኸልእዎም፡ ንድኻታት ህዝበይ ከኣ መሰሎም ከግድፍዎም፡ ንመበለታት ምርኮኦም ክገብርወን፡ ንዘኽታማት ድማ ምእንቲ ክኸትርዎም ኢሎምሲ፡ ሕጋጋት ዓመጻ ዝሕግጉ፡ ሕሰም ዝጽሕፉ ጸሓፍቲ ወይለኦም።³ብመዓልቲ ቕጽዓትን ህቦብላን ኻብ ርሑቕ ምስ ዝመጽእን እንታይ ክትገብሩ ኢኹም ረዲኤት ክትረኽቡ ናብ መን ክትሃድሙ ንኽብርኹምከ ኣበይ ክትሓድግዎ ኢኹም⁴ብዘይ ኣብ ትሕቲ እሱራት ምድናንን ኣብ ማእከል ቅቱላት ምውዳቕን ዝተርፎም የልቦን። ምስናይ እዚ ዂሉ ቁጥዓኡ ኣይተመልሰን፡ ኢዱውን ገና ተዘርጊሓ ኣላ።
   ⁵ኣሶር ሸቦጥ ቁጥዓይ ወይለኡ፡ እቲ ኣብ ኢዱ ዘሎ በትሪ ኸኣ ኲራይ እዩ።⁶ናብ ረሲእ ህዝቢ ኽሰዶ እየ፡ ክዘምትን ክብዝብዝን ከም ጭቃ ኣደባባይ ከኣ ክረግጾምንሲ፡ ናብቲ ወለዶ ነድረይ ክእዝዞ እየ።⁷ንሱ ግና ከምኡ ኣይመስሎን፡ ልቡውን ከምኡ ኣይሓስብን እዩ፡ ኣብ ልቡስ ምጥፋእን፡ ንሒደት ዘይኰነ ኣህዛብ ከኣ ምጽናትን እዩ ዘሎ።⁸ይብል ኣሎ እሞ፡ ኲሎም መሳፍንተይዶ ነገስታት ኣይኰኑን⁹ከልኖዶ ኸም ከርከሚሽ ኣይኰነትን ሃማትከ ኸም ኣርፋድዶ ኣይኰነትን ሰማርያስ ከም ደማስቆዶ ኣይኰነትን¹⁰ከምቲ ነቶም ካብ የሩሳሌምን ካብ ሰማርያን ዝበልጽ፡ ጽሩብ ምስልታት ዝነበሮም መንግስትታት ጣኦታት፡ ኢደይ ዘርከበቶም፡¹¹ከምቲ ንሰማርያን ንጣኦታታን ዝገበርክዎ፡ ንየሩሳሌምን ንጣኦታታንሲ ኸምኡዶ ኣይክገብርን እየ፧
   ¹²እምበኣርሲ ክኸውን እዩ፡ እግዚኣብሄር ኲሉ ግብሩ ኣብ ከረን ጽዮንን ኣብ የሩሳሌምን ምስ ፈጸመ፡ ነቲ ፍረ ዕቡይ ልቢ ንጉስ ኣሶርን፡ ንድርቅና እተን ኲሩዓት ኣዒንቱን ክቐጽዕ እየ።¹³ኢሉ እዩ እሞ፡ ኣስተውዓሊ ስለ ዝዀንኩ፡ ብሓይሊ ኢደይን ብጥበበይን ገበርክዎ፡ ንዶብ ህዝብታት ከኣ ኣዝበልክዎ፡ ንመዛግቦም ድማ ዘመትክዎ፡ ከም ጅግናውን ነቶም ኣብ ዝፋን እተቐመጡ ኣውረድክዎም።¹⁴ኢደይ ከኣ ንሃብቲ ህዝብታት ከም ቤት ዑፍ ረኸበቶ፡ ከምቲ ንድርቡይ እንቋቑሖ ዝእክቦ፡ ኣነውን ከምኡ ንብዘላ ምድሪ ኣኪበያ ኣሎኹ እሞ፡ ሓደ እኳ ኽንፉ ዘንገብግብ፡ ወይስ ኣፉ ኸፊቱ ጭቑጭቑ ዝብል ኣይነበረን።¹⁵ምሳርሲ ኣብ ልዕሊ እቲ ብእኡ ዝኸርት ዘሎዶ ይጀሃር እዩ፧ መጋዝከ ነቲ ሰሓቢኡ ኽንዕቕ ኢሉዶ ይዕበየሉ እዩ ሸቦጥሲ ነቶም ዝልዕልዎ መኣዝ እዩ ዘወሳወሶም በትሪኸ ነቲ ዘይዕንጸይቲ መኣዝ እዩ ሓፍ ዘበሎ፧
   ¹⁶ስለዚ እግዚኣብሄር ጐይታ ሰራዊት ናብቶም ህጣራታቱ ዕብራን ክሰድድ እዩ፡ ብትሕቲ ኽብሩውን፡ ከም ምብራዕ ሓዊ ገይሩ፡ ባርዕ ከባርዕ እዩ፡¹⁷እቲ ብርሃን እስራኤልሲ ሓዊ፡ ቅዱሱ ድማ ሃልሃልታ ክኸውን እዩ፡ ንእሾኹን ተዀርባኡን ከኣ ኣንዲዱ ብሓንቲ መዓልቲ ኽበልዖ እዩ።¹⁸ንኽብሪ ዱሩን ፈራዪ ግርሁኡን ካብ ነፍሲ ኽሳዕ ስጋ ኸጥፍኦ እዩ፡ ከምቲ ምምህማን ብሕማም ዝማሰነ ሰብ ክኸውን እዩ።¹⁹እቲ ኻብ ዱሩ ዝተረፈ ኣእዋም ከኣ፡ ቈልዓ እኳ ኽሳዕ ዝጽሕፎ፡ ቁጽሪ ሒደት ክኸውን እዩ።
   ²⁰በታ መዓልቲ እቲኣ ኸኣ ክኸውን እዩ፡ እቶም ካብ እስራኤል ዝተረፉን እቶም ዘምለጡ ናብ ቤት ያእቆብን ብሓቂ ኣብ እግዚኣብሄር፡ ኣብቲ ናይ እስራኤል ቅዱስ፡ ክጽግዑ እዮም እምበር፡ ድሕሪ ደጊምሲ ኣብቲ ወቓዒኦም ኣይክጽግዑን እዮም።²¹እቲ ትራፍ፡ እቲ ኻብ ያእቆብ ዝተረፈ፡ ናብቲ ብርቱዕ ኣምላኽ ክምለስ እዩ።²²ዎ እስራኤል፡ ህዝብኻ ኸም ሑጻ ባሕሪ እኳ እንተ ዀነስ፡ ተረፍ ጥራይ ክምለስ እዩ፡ ጥፍኣት ምዱብ እዩ፡ እዚውን ንጽድቂ ኸውሕዞ እዩ።²³ስለዚ እግዚኣብሄር ጐይታ ሰራዊት ኣብ ማእከል ኲላ ምድሪ ምዱብ ጥፍኣት ክፍጽም እዩ።
   ²⁴ስለዚ እግዚኣብሄር ጐይታ ሰራዊት ከምዚ ይብል፡ ኣታ ኣብ ጽዮን እትነብር ዘሎኻ ህዝበይ፡ ኣሶርሲ ምንም እኳ ብስላዕ እንተ ወቕዓካ፡ ከምቲ ኣዋቓቕዓ ግብጺ በትሩ እንተ ኣልዓለልካ፡ ኣይትፍርሃዮ።²⁵ቅሩብ ግዜ እምበር እቲ ዂራ ኽወዳእ፡ ቁጥዓይ ከኣ ንጥፍኣቶም ክምለስ እዩ።²⁶እግዚኣብሄር ጐይታ ሰራዊት ድማ፡ ከምቲ ኣብ ከውሒ ሆሬብ ንሚድያን ዝወቕዓ፡ ጭጒራፍ ከልዕለሉ እዩ፡ በትሪ ኸኣ ኣብ ልዕሊ ባሕሪ ክኸውን እዩ፡ ከምቲ ኣብ ግብጺ ዝገበሮውን ከልዕሎ እዩ።²⁷በታ መዓልቲ እቲኣ ኸኣ ክኸውን እዩ፡ ጾሩ ኻብ መንኲብኻ፡ ኣርዑቱ ድማ ካብ ክሳድካ ኽወርድ እዩ። እቲ ኣርዑትውን ካብ ስብሒ እተላዕለ ኽስበር እዩ።
   ²⁸ናብ ዓያት ይመጽእ፡ ብሚግሮን ይሓልፍ፡ ኣብ ሚኽማሽ ኣቓሕኡ የንብር ኣሎ።²⁹ብኽሳድ ይሓልፉ፡ ኣብ ጌባ ኸኣ ማሕደሪኦም ይገብሩ ኣለው። ራማ ራዕራዕ ትብል፡ ናይ ሳኦል ጊብዓ ድማ ትሃድም ኣላ።³⁰ኣቲ ጓል ጋሊም፡ ዓው ኢልኪ ኣእውዪ፡ ዎ ላይሻ፡ ጽን በሊ፡ ኣናቶት ከኣ ይወኣነይቲ።³¹ማድሜና ትሃድም፡ ሰብ ጌቢም ከኣ ከብቶም የህድሙ።³²በዛ መዓልቲ እዚኣ ኣብ ኖብ ይውዕል፡ ኢዱ ኣብ ልዕሊ ኸረን ጓል ጽዮን፡ ኣብ ኲርባ የሩሳሌም የዋጣውጥ ኣሎ።
   ³³እንሆ፡ እግዚኣብሄር ጐይታ ሰራዊት ንጨናፍር ብዘሰክሕ ሓይሊ ይሰልዖም፡ እቶም ነዊሕ ዝቑመቶም ይቑረጹ፡ እቶም ልዑላት ከኣ ለጠቕ ይብሉ ኣለው።³⁴ነቲ ዕሙር ዱር ብሓጺን የብርሶ፡ ሊባኖስ ከኣ ብኢድ እቲ ስልጡን ይወድቕ።

ትን. ኢሳይያስ ምዕራፍ 11

   ¹ካብቲ ኽሩት ጒንዲ እሰይ ከኣ ሓደ ጠጥዒ ኽጭብጭብ እዩ፡ ሓደ ጨንፈርውን ካብ ሱሩ ፍረ ኽፈሪ እዩ።²ኣብ ልዕሊኡ ድማ መንፈስ እግዚኣብሄር፡ መንፈስ ጥበብን ኣእምሮን መንፈስ ምኽርን ሓይልን፡ መንፈስ ፍልጠት እግዚኣብሄርን ፍርሃቱን ክዓርፍ እዩ።³ታሕጓሱ ኣብ ፍርሃት እግዚኣብሄር እዩ፡ ዓይኑ ኸም እትርእዮ ኣይክፈርድን፡ እዝኑ ኸም እትሰምዖ ኸኣ ኣይክብይንን እዩ።⁴ግናኸ ንድኻታት ብጽድቂ ኽዳኒ፡ ነቶም ዓቃላት ምድሪ ኸኣ ብቕንዕና ኽብይን፡ ብበትሪ ኣፉ ንምድሪ ኽወቕዓ፡ ብመንፈስ ከናፍሩ ድማ ንረሲኣን ክቐትሎም እዩ።⁵ጽድቂ ኸኣ ቅናት ሕቑኡ፡ እምንነትውን ማዕጥቖ ምሕኲልቱ ክኸውን እዩ።⁶ተዂላ ምስ ዕየት ክሰፍር፡ ነብሪ ኸኣ ምስ ማሕስእ ክድቅስ፡ ምራኽን ኲርኲር ኣንበሳን ሰባብሕትን ሓቢሮም ክውዕሉ፡ ንእሽቶ ወዲውን ክጓስዮም እዩ።⁷ላምን ድብን ብሓደ ወፊረን ክበልዓ፡ ወለልደን ከኣ ብሓደ በጥ ክብሉ እዮም፡ ኣንበሳውን ከም ብዕራይ ሓሰር ክበልዕ እዩ።⁸ዝጠቡ ሕጻን ኣብ ጥቓ እንዳ ተመን ክጻወት፡ እቲ ጡብ ሕዳግ ድማ ኢዱ ናብ ጒድጓድ ከይሲ ኽዝርግሕ እዩ።⁹ከምቲ ማያት ንመዓሙቑ ባሕሪ ዘጐልብቦ፡ ምድሪ ብፍልጠት እግዚኣብሄር ክትመልእ እያ እሞ፡ ኣብ ኲሉ እቲ ቅዱስ ከረነይ ሓደ እኳ እከይን ጒድኣትን ዝገብር ኣይክህሉን እዩ።
   ¹⁰በታ መዓልቲ እቲኣ ክኸውን እዩ፡ ኣህዛብ ነቲ ንህዝብታት ሰንደቕ ዕላማ ክኸውን እተተኽለ ጠጥዒ ሱር እሰይ ክደልዩ እዮም፡ ማሕደሪኡ ኸኣ ክቡር ክኸውን እዩ።
   ¹¹በታ መዓልቲ እቲ ክኸውን እዩ፡ እግዚኣብሄር ነቲ ኻብ ኣሶርን ካብ ግብጽን ካብ ጳጥሮስን ካብ ኢትዮጵያን ካብ ኤላምን ካብ ሲንኣርን ካብ ሃማትን ካብ ደሴታት ባሕርን ተሪፉ ዘሎ ትራፍ ህዝቡ ምእንቲ ኸጥርዮስ፡ ከም ብሓድሽ ካልኣይ ሳዕ ኢዱ ኽዝርግሕ እዩ።¹²ነህዛብ ከኣ ሰንደቕ ዕላማ ኽተኽለሎም፡ ነቶም ካብ እስራኤል እተሰጉ ድማ ክእክቦም፡ ነቶም ካብ ይሁዳ ፋሕ ዝበሉውን ካብ ኣርባዕተ መኣዝን ምድሪ ኽኣኻኽቦም እዩ።¹³ቅንኢ ኤፍሬም ክርሕቕ እዩ፡ ጸላእቲ ይሁዳ ኸኣ ክጸንቱ እዮም። ኤፍሬም ንይሁዳ ኣይክቐንኣሉን፡ ይሁዳ ድማ ንኤፍሬም ኣይከጨንቖን እዩ።¹⁴ኣብ መንኲብ ፍልስጥኤማውያን ንምዕራብ ኣቢሎም ክነፍሩ፡ ብሓደ ዀይኖም ድማ ንደቂ ምብራቕ ክዘምቱ፡ ኣብ ልዕሊ ኤዶምን ሞኣብን ኢዶም ከውድቑ እዮም፡ ደቂ ዓሞን ከኣ ክእዘዝዎም እዮም።¹⁵እግዚኣብሄር ድማ ንልሳን ባሕሪ ግብጺ ኸንቅጾ እዩ፡ ብብርቱዕ ንፋሱ ኸኣ ንኢዱ ኣብ ልዕሊ እቲ ርባ ኸዋጣውጦ፡ ሾብዓተ ኽሳዕ ዝኸውን ድማ ነቲ ርባ ኽወቕዖ እዩ፡ ሳእኒ ኣእቲኻ ኸም ዝስገርውን ክገብሮ እዩ።¹⁶ከምቲ ንእስራኤል በታ ኻብ ምድሪ ግብጺ ዝወጹላ መዓልቲ ዝዀነሎም፡ ከምኡውን ነቲ ኻብ ኣሶር ተሪፉ ዘሎ ትራፍ ህዝቢ ጽርግያ ክኸውን እዩ።

ትን. ኢሳይያስ ምዕራፍ 12

¹በታ መዓልቲ እቲኣ ኸኣ ክትብል ኢኻ፡ ጐይታየ፡ ተቘጢዕካኒ ነበርካ፡ ግናኸ ቁጥዓኻ ተመሊሱስ ኣጸናኒዕካኒ ኢኻ እሞ፡ ኤመስግነካ ኣሎኹ።²እንሆ፡ ኣምላኽሲ ምድሓነይ እዩ፡ እእመን ኣይፈርህን ድማ እየ። እግዚኣብሄር ኣምላኽ ሓይለይን መዝሙረይን እዩ እሞ፡ ንሱ ምድሓነይ ኰነ።³ካብ ዔላታቱ ምድሓን ከኣ ብደስታ ማይ ክትቀድሑ ኢኹም።
   ⁴በታ መዓልቲ እቲኣ ድማ ክትብሉ ኢኹም፡ ንእግዚኣብሄር ኣመስግኑ፡ ንስሙ ጸውዑ፡ ግብሩ ኣብ ኣህዛብ ኣፍልጡ፡ ስሙ ልዑል ከም ዝዀነ ንገሩ።⁵ግሩም ነገር ገይሩ እዩ እሞ፡ ንእግዚኣብሄር ዘምሩ፡ እዚ ኣብ ኲላ ምድሩ ይፈለጥ።⁶ኣቲ ኣብ ጽዮን እትነብሪ፡ ናይ እስራኤል ቅዱስ ኣብ ማእከልኪ ዓብዪ እዩ እሞ፡ ተሓጐስን እልል በልን።

ትን. ኢሳይያስ ምዕራፍ 13

   ¹ኢሳይያስ ወዲ ኣሞጽ ብዛዕባ በቢሎን ዝረኣዮ ጾር።
   ²ሰንደቕ ዕላማ ኣብ ነዊሕ ከረን ትኸሉ፡ ዓው ኢልኩም ኣድህዩሎም፡ ብደገ መሳፍንቲ ኽኣትው ኸኣ ብኢድ ኣመልክቱ።³ነቶም እተቐደሱለይ ኣዚዘዮም፡ ንጀጋኖይ፡ ነቶም ብኽብረይ እልል ዝብሉ፡ ንምፍጻም ቁጥዓይ ጸዊዐዮም ኣሎኹ።
   ⁴ድምጺ ወኻዕታ ኸም ናይ ዓብዪ ህዝቢ ኣብ ኣኽራን ኣሎ። ድምጺ እቶም እኩባት መንግስትታት ኣህዛብ ንሰራዊት ክስለፉ ይእዝዞም ኣሎ።⁵እግዚኣብሄርን ኣጽዋር ኲራኡን፡ ንዂላ ምድሪ ምእንቲ ኸጥፍኡስ፡ ካብ ርሑቕ ሃገር፡ ካብ ወሰን ሰማይ ይመጹ።⁶መዓልቲ እግዚኣብሄር ቀሪባ ኣላ፡ ከም ጥፍኣት ኰይና ኻብቲ ዂሉ ዝኽእል ክትመጽእ እያ እሞ፡ ብኸዩ።⁷ስለዚ ኢድ ዘበለ ዘርጋሕጋሕ ክብል፡ ኲሉ ልቢ ሰብ ክመክኽ እዩ።⁸ክስምብዱ፡ ቃንዛን ሓዘንን ክሕዞም እዩ፡ ከም እትወልድ ሰበይቲ ከቕለልው፡ ተገሪሞም ነንሓድሕዶም ክጣማመቱ እዮም፡ ገጾም ከም ገጽ ሃልሃልታ እዩ።
   ⁹እንሃ፡ መዓልቲ እግዚኣብሄር ንምድሪ ኸተባድማ፡ ነቶም ኣብኣ ዝነብሩ ሓጥኣን ድማ ከተብርሶም፡ ብቑጥዓን ብርሱን ነድርን መሰክሒት ኰይና ትመጽእ ኣላ።¹⁰ከዋኽብትን ብርሃኖም ኣይከብርሁን እዮም፡ ጸሓይ ክትበርቕ ከላ ኽትጽልምት እያ፡ ወርሒ ኸኣ ብርሃና ኣይከተብርህን እያ።¹¹ንዓለም ስለ ኽፍኣታ፡ ንረሲኣን ድማ ስለ ኣበሳኦም ክቐጽዖም እየ፡ ንድርቅና ትዕቢተኛታት ከኣ መወዳእታ ኽገብረሉ፡ ንዂርዓት እቶም ገፋዕቲውን ከዋርዶ እየ።¹²ንሰብ ካብ ጽሩይ ወርቂ፡ አረ ኻብቲ ወርቂ ኦፊር ዝኸበረ ኽገብሮ እየ።¹³ስለዚ ንሰማያት ከንቀጥቅጦ እየ፡ ምድሪ ኸኣ ብቑጥዓ እግዚኣብሄር ጐይታ ሰራዊት፡ ብመዓልቲ ርሱን ነድሪ ኻብ ስፍራኣ ኽትናወጽ እዩ።¹⁴ክኸውን ከኣ እዩ፡ ከም እተሃድነት እራብን፡ ኣካቢ ኸም ዘይብሉ መጓሰን ኰይኖም፡ ነፍሲ ወከፍ ናብ ሀህዝቡ ኽምለስ፡ ነፍሲ ወከፍ ናብ ሃሃገሩ ኽሃድም እዩ።¹⁵እተረኽበ ዘበለ ኽውጋእ፡ እተታሕዘ ዂሉ ኸኣ ብሴፍ ክወድቕ እዩ።¹⁶ሕጻውንቶም ኣብ ቅድሚ ኣዒንቶም ክጭፍለቑ እዮም፡ ኣባይቶም ክብዝበዝ እዩ፡ ኣንስቶም ድማ ክንውራ እየን።¹⁷እንሆ፡ ነቶም ግዲ ብሩር ዘይብሎም፡ ንወርቂ ኸኣ ዘይብህግዎ ሜዶናውያን፡ ኣብ ልዕሊኦም ከተንስኦም እየ።¹⁸መንትጎም ነጒባዝ ከውድቖም እዩ፡ ንፍረ ማሕጸን ኣይክምሕሩን እዮም፡ ኣዕንቶም ከኣ ንቘልዑ ኣይክድንግጻሎምን እየን።¹⁹ባቢሎን፡ ጌጽ መንግስትታት፡ ናይ ከለዳውያን ዕቡይ ስልማት፡ ከምቲ እግዚኣብሄር ንሶዶምን ጎሞራን ዘፍረሰን ክትከውን እያ።²⁰ሰብ ኣብኣ ንዘለኣለም ኣይክሰፍርን እዩ፡ ንውሉድ ወለዶ ኸኣ ማሕደር ሰብ ኣይክትከውንን እያ። ዓረብ ኣብኣ ድንኳን ኣይክተክልን እዩ፡ ጓሶት ድማ መጓሲኦም ኣይከስፍሩላን እዮም።²¹ግናኸ ኣራዊት በረኻ ኣብኣ ኽሰፍሩ እዮም፡ ኣባይታ ጒንጓታት ክመልእ እዩ፡ ሰገን ኣብኣ ኽነብራ እየን፡ ኣጋንንቲውን ኣብኣ ኽሰራሰሩ እዮም።²²ኣኽላባት በረኻ ኣብ ኣደራሻታ፡ ወኻሩ ድማ ኣብቲ ጽቡቕ ግምብታታ ኽንቅው እዮም። ግዜኣ ቐሪቡ እዩ፡ መዓልትታታውን ኣይክድንጒያን እየን።

ትን. ኢሳይያስ ምዕራፍ 14

   ¹እግዚኣብሄር ንያእቆብ ክምሕሮ እዩ እሞ፡ ከም ብሓድሽ ንእስራኤል ክሓርዮም፡ ኣብ ሃገሮም ድማ ከቑሞም እዩ። ማእከላይ ዓሌት ክጽምበርዎም፡ ኣብ ቤት ያእቆብውን ክለግቡ እዮም።²እቶም ህዝብታት ሒዞም ናብ ቦታኦም ክወስድዎም እዮም፡ ቤት እስራኤል ድማ ግዙኣትን ኣግራድን ገይሮም ኣብቲ ምድሪ እግዚኣብሄር ገንዘቦም ክገብርዎም እዮም። ነቶም ማረኽቶም ክማርኹ፡ ነቶም ገፋዕቶም ድማ ክገዝኡ እዮም።
   ³ክኸውን ከኣ እዩ፡ እግዚኣብሄር ካብ ጻዕርኻን ካብ መከራኻን ካብቲ ኣብኡ ኣእትዮምኻ ዝነበሩ ጽኑዕ ባርነትን ምስ ዘዕርፈካ መዓልቲ፡⁴ሽዑ ኣብ ልዕሊ ንጉስ ባቢሎን ከምዚ ኢልካ ኽትምስል ኢኻ፡ ከመይ ኢሉ እቲ ጨቋኒ ተወዲኡ እረ እቲ ግፍዒኸ ኸመይ ኢሉ ተወዲኡ⁵እግዚኣብሄር ንበትሪ ረሲኣን፡ ነቲ ዘንጊ ገዛእቲ፡ ሰበሮ።⁶ነቲ ንህዝብታት ብቑጥዓ ኸየቛረጸ ዝወቕዖም፡ ነቲ ብዂራን ዓጋቲ ብዘይብሉ ምስጓጒን ነህዛብ ዝገዝኤ ዘንጊ ሰበሮ።⁷ኲላ ምድሪ ዓሪፋ ሃዲኣ ኣላ፡ ሰብውን እልል ይብሉ ኣለው።⁸ጽሕድታትን ኣእዋም ሊባኖስን እኳ፡ ንስኻ ኻብ እትወድቕ ጀሚሩ ክቘርጸና ዝደየበ የልቦን፡ እናበሉ ብዛዕባኻ ይሕጐሱ ኣለው።⁹እቲ ታሕቲ ዘሎ ሲኦል ክትመጽእ ከሎኻ ኽቀባበለካ ኢሉ ብኣኻ የዕገርግር፡ ንድኔታትን ንዂሎም ስልጡናት ምድርን የበራብረልካ፡ ንዂሎም ነገስታት ኣህዛብ ካብ ዝፋውንቶም የተንስኦም።¹⁰ኲላቶም ከኣ፡ ንስኻውንዶ ኸማና ሓሚቕካ ንስኻኸ ንኣናዶ መሲልካ ኢሎም ክመልሱልካ እዮም።¹¹ክብረትካን ቃና መሰንቆታትካን ናብ ሲኦል ወሪዱ፡ መንጸፍካ ሓሳኹ፡ መደረብታኻ ድማ ሓሳኹ እዮም።
   ¹²ኣየ፡ ኣታ ብሩህ ኮዀብ ወዲ ወጋሕታ፡ ከመይ ኢልካ ኻብ ሰማይ ወደቕካ፡ ንስኻ ነህዛብ ዘውደቕካስ፡ ከመይ ኢልካ ናብ ምድሪ ተደርቤኻ።¹³ንስኻስ ብልብኻ፡ ናብ ሰማይ ክድይብ፡ ንዝፋነይ ኣብ ልዕሊ ኸዋኽብቲ ኣምላኽ ልዕል ከብሎ፡ ኣብ ወሰን ሰሜን ኣብ ልዕሊ ኸረን ማሕበር ክቕመጥ እየ።¹⁴ኣብ ልዕሊ ርእሲ ደበናታት ክድይብ፡ ነቲ ኣዝዩ ልዑል ክመስል እየ፡ በልካ።¹⁵ኣይፋልካን፡ ናብ ሲኦል፡ ናብቲ መዓሙቑ ጒድጓድ ደኣ ኽትድርበ ኢኻ።^16-17ዝርእዩኻ ይጥምቱኻን የስተብህሉልካን እሞ፡ እቲ ንምድሪ ዘንቀጥቅጣን ንመንግስትታት ራዕራዕ ዘብለንን፡ እቲ ንዓለም ዘባደማን ንኸተማታታ ዘፍረሰን ንምሩኻቱ ኸኣ ናብ ቤቶም ክምለሱ ዘይፈትሖም ሰብኣይዶ እዚ እዩ ይብሉ ኣለው።¹⁸ኲሎም፡ ነገስታት ኣህዛብ፡ ብዘለው ዂሎም፡ ኣብ በቤቶም ብኽብሪ በጥ ኢሎም ኣለው፡¹⁹ንስኻ ግና በቶም ብሰይፊ እተወግኡን ናብ ናይ ጋህሲ ኣእማን ዝወረዱን ቅቱላት እተኸደንካ፡ ከም እተረግጸ ገምቢ፡ ከም ፍንፋን ጨንፈር ኴንካ፡ ርሑቕ ካብ መቓብርካ ተደርቤኻ።²⁰ንስኻ ንምድርኻ ኣጥፊእካያ፡ ንህዝብኻ ቐቲልካዮ ኢኻ እሞ፡ ኣብ መቓብር ምሳታቶም ኣይክትጽምበርን ኢኻ። ዘርኢ ገበርቲ እከይ ንዘለኣለም ኣይክስመን እዩ።
   ²¹ከይትንስኡ ንምድሪ ኸኣ ከይወርሱ፡ ንዝባን ዓለም ድማ ብኸተማታት ከይመልእዋ፡ ብሰሪ ሓጢኣት ኣቦታቶም ንውሉድ ማሕረዲ ኣዳልው።²²ኣነ ኽትንስኦም እየ፡ ይብል እግዚኣብሄር ጐይታ ሰራዊት፡ ስምን ትርፍን ወድን ወዲ ወድን ካብ ባቢሎን ከጽንት እየ፡ ይብል እግዚኣብሄር።²³ማሕደር ቅንፍዝን ዓዘቕትን ክገብራ፡ ብመዀስተር ጥፍኣት ድማ ክዂስትራ እየ፡ ይብል እግዚኣብሄር ጐይታ ሰራዊት።²⁴እግዚኣብሄር ጐይታ ሰራዊት ከምዚ ኢሉ መሓለ፡ ብሓቂ ኸምቲ ዝሓሰብክዎ ክኸውን፡ ከምቲ ዝመደብክዎውን ክቐውም እዩ።²⁵ንኣሶር ኣብ ሃገረይ ክሰባብሮ፡ ኣብ ኣኽራነይ ድማ ኽረግጾ እየ፡ ሽዑ፡ ኣርዑቱ ኻባታቶም ክውሰድ፡ ጾሩውን ካብ መንኲቦም ክውሰድ እዩ።²⁶ኣብ ልዕሊ ዂላ ምድሪ ዝመደብክዎ ምኽሪ እዚ እዩ፡ ኣብ ልዕሊ ዂሎም ኣህዛብ እተዘርግሐት ኢድ እዚኣ እያ።²⁷እግዚኣብሄር ጐይታ ሰራዊት መዲብዎ እዩ እሞ፡ መን ከንቱ ይገብሮ ኢዱ ተዘርጊሓ ኣላ፡ መንከ ይመልሳ²⁸በታ ንጉስ ኣሃዝ ዝሞተላ ዓመት እዚ ጾር እዚ ዀነ፡
   ²⁹ካብ ሱር ተመንሲ ኸይሲ ኽወጽእ እዩ፡ ፍሬኡ ኸኣ ዝነፍር ርሱን ተመን ክኸውን እዩ እሞ፡ ኣቲ ፍልስጥኤም ብዘሎኺ፡ እቲ ዝወቕዓኪ ሸቦጥ ስለ እተሰብረ ኣይትተሓጐሲ።³⁰በዂሪ እቶም ድኻታት ክጓስዩ፡ ሽጉራት ከኣ ሃዲኦም ክሰፍሩ እዮም። ንሱርኪ ግና ብጥሜት ክቐትሎ እየ፡ ትርፍኺ ድማ ክሕረድ እዩ።³¹ትኪ ኻብ ሰሜን ይመጽእ፡ ካብ ሰራዊቱ ኸኣ ንበይኑ ዝተርፍ የልቦን እሞ፡ ኣታ ደገ፡ ዋይዋይ በል፡ ኣቲ ኸተማ፡ ኣእውዪ፡ ብዘሎኺ ፍልስጥኤም ከኣ፡ ምኸኺ።³²ንልኡኻት ህዝብኻ እንታይ ኢሎም ክመልሱሎም እዮም እግዚኣብሄር ንጽዮን ከም ዝሰረታ፡ እቶም ሽጉራት ህዝቡ ኸኣ ኣብኣ ጸግዒ ኸም ዝረኸቡ።

ትን. ኢሳይያስ ምዕራፍ 15

   ¹ጾር ብዛዕባ ሞኣብ።
   ኣየ፡ ኣር ሞኣብ ብሓንቲ ለይቲ ኽትዖኑን ክትጠፍእን እያ፡ ኣየ፡ ቂር ሞኣብ ብሓንቲ ለይቲ ኽትዖኑን ክትጠፍእን እያ።²ናብ ባይትን ናብ ዲቦንን ክበኽያ ናብ በረኽቲ ይወጻ ኣለዋ፡ ሞኣብ ኣብ ልዕሊ ኔቦን ኣብ ልዕሊ ሜድባን ኰይና ዋይዋይ ትብል ኣላ፡ ኲሉ ርእሶም ነዃዕ፡ ኲሉ ጭሕሚ ኸኣ ቁሩጽ እዩ።³ኣብ ኣደባባያ ኽዳን ሓዘን ይዕጠቑ፡ ኣብ ኣናሕሳን ኣብ ዕዳጋኣን ዋይዋይ እናበሉ ንብዓት የውሕዙ።⁴ሄስቦንን ኤልዓለን የእውያ፡ ድምጸን ክሳዕ ያሓጽ ይስማዕ፡ ስለዚውን ናይ ማኣብ ተዋጋእቲ የእውዩ፡ ነፍሱ ኣብ ውሽጡ ተንቀጥቅጥ ኣላ።⁵ልበይ ንሞኣብ ይበኽየላ ኣሎ፡ እቶም ህዱማታ ኽሳዕ ጾኣር፡ ናብ ኤግላት ሸሊሽያ ይሃድሙ፡ ንዓቐበት ሉሂት እናበኸዩ ይድይብዎ፡ ኣብቲ ናይ ሆሮናይም ዝወስድ መገዲውን ኣውያት ጥፍኣት ይተኽሉ ኣለው።⁶ማያት ኒምሪም ነጺፉ እዩ እሞ፡ ሳዕሪ ነቐጸ፡ ለቕሚ ቐምሰለ፡ ለምዒ የልቦን።⁷ስለዚ ነቲ ዘትረፍዎን ነቲ ዝዓቘርዎን ብርባ ዕቦል ከሳግርዎ እዮም።⁸ንዶባት ሞኣብ ኣውያት ከበቦ፡ ብኽያታ ኽሳዕ ኤግላይም፡ ብኽያታውን ክሳዕ ብኤር ኤሊም በጽሐ።⁹ማያት ዲሞንሲ ደም መሊኡ ኣሎ፡ ኣብ ዲሞን ዝገደደ ኽውስኽ እየ እሞ፡ ኣብ ልዕሊ እቶም ዘምለጡ ሰብ ሞኣብን ኣብ ልዕሊ ተረፍ እቲ ሃገርን ኣንበሳ ኽሰድድ እየ።

ትን. ኢሳይያስ ምዕራፍ 16

   ¹ገናሽል ናብቲ ገዛእ ሃገር ካብ ሴላ ብበረኻ ኣቢልኩም ናብ ከረን ጓል ጽዮን ስደዱ።²ከም ዝሃድማ ኣዕዋፍ፡ ከም ካብ ቤተን እተሰጓ ወለሊድ ዑፍ፡ ኣዋልድ ሞኣብ ኣብ መሳገሪ ኣርኖን ከምኡ ክዀና እየን።³ምኽሪ ምኽሪ፡ ፍርዲ ፍርዲ፡ ቀትሪ ኸሎ ንጽላሎትኪ ኸም ለይቲ ግበርዮ፡ ንስጉጓት ሕብኢ፡ ንህዱማት ኣይትግለጺ።⁴እቲ ጠዋዪ ጠፊኡ፡ ምዝማት ከኣ ተወዲኡ፡ ጨቈንቲ ሃገርውን ህልም ኢሎም እዮም እሞ፡ ዎ ሞኣብ፡ ንሰጉጓተይ ምሳኺ ኣስፍርዮም፡ ካብ ቅድሚ እቲ ዘማቲ ኸውሊ ዂንዮ።⁵ዝፋን ብምሕረት ክትከል፡ ኣብኡውን ዝፈርድን ቅንዕና ዝደልን ጽድቂ ንምግባር ዝፈጥንን ብሓቂ ኣብ ድንኳን ዳዊት ክቕመጥ እዩ።
   ⁶ብዛዕባ ትዕቢት ሞኣብ፡ እዛ ኣዝያ ዕብይቲ፡ ብናይ ኲርዓታ፡ ምብርጣጣ፡ ቁጥዓኣ፡ ከንቱ ዝዀነ ጃህርኣ ሰማዕና።⁷ስለዚ ሞኣብ ንሞኣብ ዋይዋይ ክትብለላ እያ፡ ኲላቶም ዋይዋይ ክብሉ እዮም፡ ብዛዕባ ናይ ቂር ሓሬሴት ጎጎ ዘቢብ ኣስቈርቁርኩም ክትበኽዩ ኢኹም።⁸ግርሁ ሄስቦንን ኣትክልቲ ወይኒ ሲብማን ጸምልዩ ኣሎ። እተን ክቡራት ተኽልታታ ጨናፍረን ኣስፋሕፊሑ፡ ክሳዕ ያዕዜር በጺሑ፡ ኣብ በረኻ ወፊሩ፡ ባሕሪ ተሳጊሩ ዝነበረስ፡ እቶም ጐይተት ኣህዛብ ሰበርወን።⁹ስለዚ ንተኽሊ ወይኒ ሲብማ ብኽያት ያዕዜር እበኽየሉ ኣሎኹ፡ ኣብ ፍረ ሓጋይኪ፡ ኣብ ቀውዕኺ ናይ ውግእ ጭድርታ ወዲቑ እዩ እሞ፡ ዎ ሄስቦን፡ ንኣኺውን እልዓለ፡ ብንብዓተይ እተርክሰኪ ኣሎኹ።¹⁰ሓጐስን ተድላን ካብቲ ፈራዪ ግርሁ ተወሲዱ፡ ኣብ ኣታኽልትታት ወይኒ ኸኣ ደርፍን እልልታን የልቦን፡ ኣብ መሓምተሊ ሓደ እኳ ወይኒ ዝረግጽ ረጋጺ የልቦን። ንጭድርታ ሓጐስሲ መወዳእታ ገይረሉ እየ።¹¹ስለዚ ኣምዑተይ ብናይ ሞኣብ፡ ውሽጠይውን ብዛዕባ ቂር ሄሬስ ከም መሰንቆ ይቑዝም ኣሎ።¹²ክኸውን ከኣ እዩ፡ ሞኣብ ኣብቲ በሪኽ መጺኡ እንተ ጸዓረ፡ ኣብ መቕደሱ ኽጽሊ እንተ ኣተወ፡ ገለ እኳ ዘስልጦ የብሉን።
   ¹³እግዚኣብሄር ብናይ ሞኣብ ቀደም እተዛረቦ ቓል እዚ እዩ።¹⁴ሕጂ ኸኣ እግዚኣብሄር፡ ከም ቁጽሪ ዓመት ዓስቢ ዓሳብ፡ ብሰለስተ ዓመት ክብሪ ሞኣብ ምስናይ ብዝሒ ህዝቡ ኽዋረድ እዩ፡ እቲ ዝተረፈውን ኣዝዩ ሒደትን ጥቑዕን ክኸውን እዩ፡ ኢሉ ተዛረበ።

ትን. ኢሳይያስ ምዕራፍ 17

   ¹ጾር ብዛዕባ ደማስቆ። እንሆ፡ ደማስቆ ከተማ ኻብ ምዃን ክትተርፍ፡ ዖና ዃና ኽትከውን እዩ።²ከተማታት ኣሮኤር ተሓዲጉ፡ ብዘይ ፍርሃት ዝነብራሉ፡ መውፈር መጓሴታት ክኸውን እዩ።³እምባ ኻብ ኤፍሬም፡ መንግስቲ ኸኣ ካብ ደማስቆ፡ ትርፊ ሶርያውን ክጠፍእ እዩ። ከም ክብሪ ደቂ እስራኤል ክዀኑ እዮም፡ ይብል እግዚኣብሄር ጐይታ ሰራዊት።⁴በታ መዓልቲ እቲኣ ክኸውን እዩ፡ ክብሪ ያእቆብ ክውሕድ፡ ህጥራን ስጋኡውን ክዓብር እዩ።⁵ከምቲ ዓጻዳይ ነቲ ደው ኢሉ ዘሎ እኽሊ ዝጭምርሮ፡ ብቕልጽሙ ኸኣ ነቲ ወረን ዝዓጽዶ ክኸውን እዩ፡ ከምቲ ኣብ ለሰ ረፋይም ንወረን ዝቕርምዎ ድማ ክኸውን እዩ።⁶ግናኸ ከምቲ ኣውልዕ ምስ ተነዝነዘ፡ ኣብ ጫፍ እቲ ላዕላይ ጨናፍሩ ኽልተ ወይስ ሰለስተ ፍረ፡ ኣብቲ ጨናፍር ፍርያም ኦም ከኣ ኣርባዕተ ወይስ ሓሙሽተ ኸም ዝተርፍ፡ ኣብኡ ሒደት ቀሪም ክተርፍ እዩ፡ ይብል እግዚኣብሄር ኣምላኽ እስራኤል።⁷በታ መዓልቲ እቲኣ ሰብ ናብ ፈጣሪኡ ግልጽ ክብል፡ ኣዒንቱ ኸኣ ናብቲ ናይ እስራኤል ቅዱስ ክርእያ እየን።⁸ናብቲ ብኢዱ ዝሰርሖ መሰውኢ ግልጽ ኣይክብልን፡ ናብቲ ኣጻብዑ ዝገበራኦ ኣስታርቴታት ወይስ ናብ ሓወልቲ ጸሓይ ኣይክጥምትን እዩ።⁹በታ መዓልቲ እቲኣ እተን ጽኑዓት ከተማታቱ፡ ከምቲ ብምኽንያት ደቂ እስራኤል እተሓድገ ቦታታት፡ ዱርን ርእሲ ኣኽራንን ክዀና እየን፡ ክባድማ ድማ እየን።¹⁰ንኣምላኽ ምድሓንኪ ስለ ዝረሳዕኪ፡ ንኸውሒ ሓይልኺውን ስለ ዘይዘከርኪ፡ ስለዚ ባህ ዘብል ኣትክልቲ ትተኽሊ፡ ጋሻ ዝዀነ ሓረግ ወይኒውን ተፍልሲ ኣሎኺ።¹¹በታ ዝተኸልክላ መዓልቲ ትሓጽርዮ፡ ኣንጊህኪ ኸኣ ንዘርእኺ ተዓንብብዮ፡ ግናኸ ቀውዒ ብመዓልቲ መዓትን መሪር ስቓይን ይመልቑ።
   ¹²ኣየ፡ ህማም ብዙሕ ህዝብታት፡ ከም ህማም ባሕሪ ይሃምም ኣሎ፡ ኣህዛብ ከም ድዋሕዋሕ ብርቱዕ ማያት ድዋሕዋሕ ይብሉ ኣለው።¹³ኣህዛብ ከም ድዋሕዋሕ ብዙሕ ማያት ድዋሕዋሕ ይብሉ ኣለው፡ ግናኸ ንሱ ይገንሖም፡ ኣርሒቖም ከኣ ይሃድሙ። ከም ብቑቡቑ ኣኽራን ኣብ ቅድሚ ንፋስ፡ ከም ሓሰር ኣብ ቅድሚ ህቦብላ ይብተኑ።¹⁴ኣጋ ምሸት እንሆ፡ ስምባድ ይመጽእ፡ ምድሪ ኸይወግሐ ኸኣ የለውን። ግደ እቶም ዝማረኹና፡ ብጽሒት እቶም ዝዘመቱና እዚ እዩ።

ትን. ኢሳይያስ ምዕራፍ 18

   ¹ኣየ፡ ኣታ ኣብ ክንየው ርባታት ኢትዮጵያ ዘሎኻ፡ ሃገር እቶም ጅጅ ዝብሉ ኣኽናፍ።²ኣታ በተን ኣብ ልዕሊ ማያት ዝሰፋ መርከብ ሰልሰላ ጌርካ፡ ብባሕሪ ልኡኻት እትልእኽ ሃገር፡ ኣቱም ፈጣናት ልኡኻት ናብቲ ነዊሕ ዝቑመቱ ልሙጽ ህዝቢ፡ ናብቲ ኻብ መጀመርታ እተፈርሀ ህዝቢ፡ ዝኽፋፍልን ዝረግጽን፡ ሃገሩውን ብርባታት እተመቓቐለ ህዝቢ ኺዱ።³ኣቱም ኣብ ዓለም እትነብሩ፡ ኣብ ምድሪ ሰፊርኩም ዘሎኹም ኲላትኩምውን፡ ሰንደቕ ዕላማ ኣብ ኣኽራን ልዕል ምስ በለ፡ ተመልከቱ፡ መለኸት ምስ ዝንፋሕ፡ ጽን በሉ።
   ⁴እግዚኣብሄር ከምዚ በለኒ፡ ከም ዳህሪ እቲ ዘንጸባርቕ ጸሓይ፡ ከም ደበና ኣውሊ ኣብ ረስኒ ቐውዒ፡ ሃዲእ ኣብቲ ዝነብረሉ ስፍራይ ኰይነ ኽጥምት እየ።⁵ቅድሚ ቐውዒ፡ ግዜ ምዕምባብ ምስ ሓለፈ፡ ዕምባባ ኸኣ ኣብ ምብሳል ዘለላ ኣቢሉ ምስ ከደ፡ ንሓረግ ብኻራ ኣታኽልቲ ወይኒ ገይሩ ክቘርጾ፡ ነቲ ጫሌዳ ሱር ድማ ከርሕቖን ክቘርጾን እዩ።⁶ኲላቶም ሓቢሮም ኣደዳ ኣሞራን ኣኽራንን ኣራዊት መሮርን ክዀኑ እዮም፡ ኣሞራታት ከኣ ኣብኦም ክሓግዩ፡ ኲላቶም ኣራዊት መሮር ድማ ኣብኦም ክኸርሙ እዮም።
   ⁷በቲ ግዜ እቲ ንእግዚኣብሄር ጐይታ ሰራዊት ካብቲ ነዊሕ ዝቑመቱ ልሙጽ ህዝቢ፡ ካብቲ ኻብ መጀመርታ እተፈርሀ ህዝቢ፡ ካብቲ ዝኸፋፍልን ዝረግጽን፡ ሃገሩውን ብርባታት እተመቓቐለ ህዝቢ፡ ናብታ ስም እግዚኣብሄር ጐይታ ሰራዊት ዘለዋ ቦታ፡ ናብ ከረን ጽዮን ገጽ በረኸት ክቕረብ እዩ።

ትን. ኢሳይያስ ምዕራፍ 19

   ¹ጾር ብዛዕባ ግብጺ።
   እንሆ፡ እግዚኣብሄር ብቕልጡፍ ደበና ይወጽእ፡ ናብ ግብጺውን ይመጽእ፡ ጣኦታት ግብጺ ኣብ ቅድሚኡ ራዕራዕ ክብሉ እዮም፡ ልቢ ግብጺ ኸኣ ኣብ ውሽጣ ኽመክኽ እዩ።²ንግብጻውያን ኣብ ግብጻውያን ከተንስኦም እየ፡ ነፍሲ ወከፍ ምስ ሓው፡ ነፍሲ ወከፍ ምስ ብጻዩ፡ ከተማ ምስ ከተማ፡ መንግስቲ ምስ መንግስቲ ኽዋጋእ እዩ።³መንፈስ ግብጺ ኣብ ውሽጡ ጥራዩ ክኸውን እዩ፡ ንምኽሩ ድማ ከንቱ ኽገብሮ እየ፡ ንሳቶም ከኣ ንጣኦታትን ነስማተኛታትን ንጠንቈልትን ንመውደቕቲ ዛዕጐልን ክሓቱ እዮም።⁴ንግብጻውያን ናብ ኢድ ደረቕ ጐይታ ኣሕሊፈ ኽህቦም እየ፡ ጨካን ንጉስ ድማ ክገዝኦም እዩ፡ ይብል እግዚኣብሄር ጐይታ ሰራዊት።⁵ማያት ካብ ባሕሪ ኽጠፍእ፡ ርባውን ነጺፉ ኽነቕጽ እዩ።⁶ርባታት ክጽይእ፡ መሳኑ ግብጺ ኽውሕድን ክደርቕን እዩ፡ ሰልሰላን ጋሳን ክጽምልው እዮም።⁷ሸኻታት ኒል፡ ገምገመ ገምገም ኒል ዘሎን፡ ኣብ ጥቓ ኒል ዝዝራእ ዘበለን ክሃጒጒ፡ ክጠፍእ ኣይክርከብን ድማ እዩ።⁸ገፈፍቲ ዓሳ ኸስቈርቁሩ፡ እቶም ኣብ ኒል መቑለብ ዝድርብዩ ዂሎም ክሓዝኑ፡ እቶም መርበብ ኣብ ልዕሊ ማያት ዝዝርግሑ ድማ ሕሊናኦም ክዓርብ እዩ።⁹እቶም ዓየይቲ እተባዘተ ቓንጫ እንጣጢዕን እቶም ኣለምቲ ጻዕዳ ኽዳውንትን ክሓፍሩ እዮም።¹⁰ኣዕኑዳ ኽስበሩ፡ እቶም ብዓስቢ ዝዓዩ ዂሎምውን ክጒህዩ እዮም።¹¹መሳፍንቲ ጾኣን ኣዝዮም ዓሸው፡ ምኽሪ እቶም ጥበበኛታት መኸርቲ ፈርኦንሲ ዕሽነት ኰነ። ከመይ ኢልኩም ደኣ ንፈርኦን፡ ኣነ ወዲ ጥበበኛታት፡ ወዲ እቶም ናይ ቀደም ነገስታት እየ፡ እትብልዎ¹²እቶም ጥበበኛታትካ ደኣ ኣበይ ኣለው እግዚኣብሄር ጐይታ ሰራዊት ብናይ ግብጺ ዝመደቦ እንታይ ከም ዝዀነ ይፍለጡ እሞ እስከ ይንገሩኻ።¹³መሳፍንቲ ጾኣን ዓሽዮም፡ መሳፍንቲ ኖፍ ተጠቢሮም፡ ንግብጺ እቶም እምኒ መኣዝን ዓሌታታ ኣጋገይዋ።¹⁴እግዚኣብሄር መንፈስ ዝርግርግ ኲዕዩላ፡ ስኹር ኣብ ትፋኡ ሰንከልከል ከም ዝብል፡ ንግብጺ ኣብ ኲሉ ተግባራ ኣጋገይዋ።¹⁵ዝዀነ ዕዮ፡ ርእሲ ወይስ ጭራ፡ ስየ ወይስ ሰቲ ዝገብሮ፡ ንግብጺ ኣይክጠቕማን እዩ።
   ¹⁶በታ መዓልቲ እቲኣ ግብጺ ኸም ኣንስቲ ኽትከውን እያ፡ ብምውጥዋጥ እታ እተወጣውጠላ ኢድ እግዚኣብሄር ጐይታ ሰራዊት ራዕራዕ ክትብልን ክትስምብድን እዩ።¹⁷ሃገር ይሁዳ ኸኣ ንግብጺ መሰክሒ ኽትኰና እያ። ነፍሲ ወከፍ ንእኣ ዘዘክርዎ ኸኣ ብምኽንያት እቲ እግዚኣብሄር ጐይታ ሰራዊት ኣብ ልዕሊኣ መዲብዎ ዘሎ ምኽሪ ኽሽበር እዩ።
   ¹⁸በታ መዓልቲ እቲኣ ቛንቋ ኸንኣን ዝዛረባ፡ ብእግዚኣብሄር ጐይታ ሰራዊት ከኣ ዝምሕላ ሓሙሽተ ኸተማ ኣብ ሃገር ግብጺ ኽርከባ እየን፡ ሓንቲአን ኢር-ሄሬስ ክትበሃል እያ።
   ¹⁹በታ መዓልቲ እቲኣ ኣብ ማእከል ሃገር ግብጺ መሰውኢ ንእግዚኣብሄር፡ ኣብ ወሰና ኸኣ ዓንዲ ንእግዚኣብሄር ክትከል እዩ።²⁰እዚ ኸኣ ንእግዚኣብሄር ጐይታ ሰራዊት ኣብ ሃገር ግብጺ ምልክትን ምስክርን ክኸውን እዩ። ብምኽንያት እቶም ጨቈንቶም ናብ እግዚኣብሄር ክጠርዑ እዮም እሞ፡ ንሱውን መድሓንን ተኻላኻልን ክሰደሎምን ከናግፎምን እዩ።²¹እግዚኣብሄር ርእሱ ንግብጺ ኽገልጸላ እዩ፡ ግብጻውያን ከኣ በታ መዓልቲ እቲኣ ንእግዚኣብሄር ክፈልጥዎ እዮም፡ ብመስዋእቲ ሕሩድን ብመስዋእቲ ብልዕን ከገልግልዎ፡ ንእግዚኣብሄር ብመብጽዓ ኽማባጽዑሉ ኽፍጽምዎ ኸኣ እዮም።²²እግዚኣብሄር ንግብጺ ኽወቕዓ፡ ክወቕዓ እሞ ክፍውሳ እዩ። ንሳቶም ከኣ ናብ እግዚኣብሄር ክምለሱ እዮም፡ ንሱ ኽልመነሎምን ክፍውሶምን እዩ።
   ²³በታ መዓልቲ እቲኣ ጽርግያ ካብ ግብጺ ናብ ኣሶር ክትከውን እያ፡ ኣሶራውያን ናብ ግብጺ፡ ግብጻውያን ከኣ ናብ ኣሶር ክመጹ እዮም። ግብጻውያን ድማ ምስ ኣሶራውያን ከምልኹ እዮም።
   ²⁴በታ መዓልቲ እቲኣ እስራኤል ንግብጺን ንኣሶርን ሳልሳዮም፡ ኣብ ማእከል ምድሪ ድማ በረኸት ክኸውን እዩ።²⁵እግዚኣብሄር ጐይታ ሰራዊት ከኣ፡ ግብጺ ህዝበይን ኣሶር ግብሪ ኢደይን እስራኤል ርስተይን ብሩኻት ኩኑ፡ ኢሉ ኽባርኾም እዩ።

ትን. ኢሳይያስ ምዕራፍ 20

   ¹በታ ታርታን ናይ ኣሽዶድ ዝመጻላ ዓመት፡ ሳርጎን ንጉስ ኣሶር ምስ ለኣኾ እሞ ንኣሽዶድ ተዋጊኡ ምስ ሓዛ፡²በቲ ግዜ እቲ እግዚኣብሄር፡ ብኢሳይያስ ወዲ ኣሞጽ ገይሩ፡ ኪድ እሞ ነቲ ማቕ ካብ ሕቜኻ ፍትሓዮ፡ ኣሳእንካ ድማ ካብ ኣእጋርካ ኣውጽእ፡ ኢሉ ተዛረቦ። ንሱውን ከምኡ ገበረ እሞ ጥራይ ዝባኑን ጥራይ እግሩን ከደ።³እግዚኣብሄር ድማ በለ፡ ከምቲ ኢሳይያስ ባርያይ ኣብ ልዕሊ ግብጺን ኢትዮጵያን ምልክትን ትእምርትን ክኸውንሲ፡ ሰለስተ ዓመት ጥራይ ዝባንን ጥራይ እግርን ዝኸደ፡⁴ከምኡ ንጉስ ኣሶር ንእሱራት ግብጺን ንምሩኻት ኢትዮጵያን፡ ናእሽቱን ኣረገውትን፡ ጥራይ ዝባኖምን ጥራይ እግሮምን፡ ስጋኦም ተቐሊዑ ንነውሪ ግብጺ ኽወስዶም እዩ።⁵ንሳቶም ከኣ ብምኽንያት ኢትዮጵያ፡ እቲ ተስፋኦም፡ ብምኽንያት ግብጺ፡ እቲ ኽብረቶም፡ ክስምብዱን ክሓፍሩን እዮም።⁶በታ መዓልቲ እቲኣ እቶም ኣብ ጥቓ ባሕሪ ዝነብሩ፡ እንሆ፡ ትጽቢትና፡ እቲ ኻብ ንጉስ ኣሶር ከናግፈናስ ረዲኤት ደሊና ናብኡ ዝሃደምና እዚ እዩ፡ ንሕና ደኣ ኸመይ ጌርና ኽነምልጥ ኢና ክብሉ እዮም።

ትን. ኢሳይያስ ምዕራፍ 21

   ¹ጾር ብዛዕባ በረኻ ባሕሪ።
   ከምቲ ህቦብላ ንፋስ ካብ ደቡብ ዝለዓል፡ ከምኡ ኸኣ በረኻ፡ ካብቲ ዝፍራህ ሃገር ይመጽእ።²መሰክሕ ዝዀነ ራእይ ተገልጸለይ፡ ዓማጻይ ይዕምጽ፡ ማራኻይ ይማርኽ ኣሎ። ኣቲ ኤላም፡ ደይቢ፡ ዎ ማዳይ፡ ክበቢ፡ ንምስቁርቋር ዘበለ ዂሉ መወዳእታ ኽገብረሉ እየ።³ስለዚ ሕቘይ ቃንዛ መሊእዎ፡ ከምታ ብጻዕሪ እትወልድ ሰበይቲ ኸኣ ጻዕሪ ሒዙኒ፡ ብሰሪ ምዕሉባጥ ምስማዕ ስኢነ፡ ምርኣይ ክሳዕ ዝስእን ድማ ሰምቢደ ኣሎኹ።⁴ልበይ ተመሊሑ፡ ረዓድ ሒዙኒ፡ እቲ ዝብህጎ ዘሎኹ ጽልግልግ ናብ ምንቅጥቃጥ ተለዊጡኒ።⁵መኣዲ ይዳሎ፡ ሓለውቲ ይሕልው፡ ይብላዕ፡ ይስተ ኣሎ፡ ኣቱም መሳፍንቲ፡ ተንስኡ ዋልታ ልኸዩ።
   ⁶እግዚኣብሄርሲ፡ ኪድ እሞ ሓላዊ ግበር፡ እቲ ዝረኣዮውን ይንገር፡ በለኒ።⁷ንሱ ኸኣ ጭፍራ ፈረሰኛታት በብኽልተ፡ ጭፍራ ኣእዱግ፡ ጭፍራ ኣግማል ረኣየ፡ ኣጸቢቑ ጽን በለ፡ ተጠንቂቑ ጽን በለ።^8-9ንሱ ኸኣ፡ ጐይታየ፡ መዓልቲ ብመልኣ ኸየቛረጽኩ ኣብታ ግምቢ ምሕላው ደው ኢለ፡ ለይተ ለይቲውን ኣብታ መሓለዊተይ ተተኺለ ኣሎኹ፡ እንሆ ኸኣ ጭፍራ ሰብ ፈረሰኛታት፡ በብኽልተ ይመጹ ኣለው፡ ኢሉ ኸም ኣንበሳ ጨደረ። ከም ብሓድሽ ድማ፡ በቢሎንሲ ወዲቓ፡ ወዲቓ፡ ኲሉ ምስልታት ጣኦታት ኣብ ምድሪ ተሰባበረ፡ ኢሊ መለሰ።¹⁰ኣታ እተኼድካ ወዲ ዓውደይ፡ ካብ እግዚኣብሄር፡ ጐይታ ሰራዊት ኣምላኽ እስራኤል፡ ዝሰማዕክዎ ነጊረካ እኔኹ።
   ¹¹ጾር ብዛዕባ ዱማ።
   ካብ ሰዒር፡ ኣታ ሓላዊ፡ ለይቲ እንታይ ግዜኡ ዀይኑ ኢሉ የድህየኒ ኣሎ።¹²እቲ ሓላዊ ኸኣ፡ ወግሐ መሰየውን፡ ክትሓቱ እንተ ደሌኹም ሕተቱ፡ መሊስኩም ከኣ ምጹ፡ በለ።
   ¹³ጾር ብዛዕባ ዓረብ።
   ኣቱም ቃፍላይ ዴዳን፡ ኣብ ዱር ዓረብ ክትሓድሩ ኢኹም።^14-15ካብ ኣስያፍ፡ ካብ ምሉሕ ሰይፊ፡ ካብቲ እተገተረ ቐስቲ፡ ካብ ብርቱዕ ውግእ ሃዲሞም እዮም እሞ፡ ኣቱም ሰብ ቴማ፡ ንጽሙእስ ማይ ኣምጽኡሉ፡ ንህዱማትውን እንጌራ ሒዝኩም ተቐበልዎም።¹⁶እግዚኣብሄር ከምዚ ኢሉኒ እዩ እሞ፡ ብዓመት ከምቲ ዓመታት ብዓል ዓስቢ፡ ኲሉ ኽብሪ ቄዳር ክጠፍእ እዩ፡¹⁷እግዚኣብሄር ኣምላኽ እስራኤል እዚ ተዛሪቡ እዩ እሞ፡ ካብ ቁጽሪ መንትግ እቶም ጀጋኑ ደቂ ቄዳር ዝተርፍ ሒደት እዩ።

ትን. ኢሳይያስ ምዕራፍ 22

   ¹ጾር ብዛዕባ ሽንጭሮ ራእይ። ኲሉ ሰብኪ ናብ ናሕሲ ዝድይብሲ እንታይ ረኺቡኪ እዩ²ኣቲ ታዕታዕን ዕግርግርን ዝመልኣኪ ኸተማ፡ ኣቲ ሕጒስቲ ኸተማ፡ እቶም ቅቱላትኪ ብሰይፊ ኣይተቐትሉን፡ ኣብ ውግእ ከኣ ኣይሞቱን።³ኲሎም መኳንንትኺ ሓቢሮም ሃደሙ፡ ብዘይ መንትግ ተኣሰሩ፡ ኣባኺ እተረኽቡ ዘበሉ ዂሎም፡ ኣርሒቖም እኳ እንተ ሃደሙ፡ ሓቢሮም ተኣስሩ።⁴ስለዚ ኣምሪረ ኽበክስ ቁሊሕ ኣይትበሉኒ፡ ብጥፍኣት ጓል ህዝበይ ንምጽንናዕ ኣይትነዝንዙኒ፡ በልኩ።⁵መዓልቲ ዕግርግርን ረግጽን ተጓእ ምባልን ካብ እግዚኣብሄር ጐይታ ሰራዊት፡ ኣብ ሽንጭሮ ራእያት ኰይኑ እዩ እሞ፡ ቀጽርታት ይፈርስ፡ ኣውያት ድማ ክሳዕ ኣኽራን ይበጽሕ ኣሎ።⁶ኤላም ጒልድባ ጾረት፡ ምስ ሰብ ሰረገላን ፈረሰኛታትን ወጸት፡ ቂር ዋልታ ቐልዐት።⁷እቲ ጸጽቡቕ ለሴታትኪ ብሰረገላታት መልአ፡ ፈረሰኛታት ከኣ ኣብ ኣፍ ደገ ተሰለፉ።⁸ጒልባብ ይሁዳ ተቐልዐ፡ በታ መዓልቲ እቲኣ ናብ ኣጽዋር፡ ናብ ቤት ዱር ቁሊሕ በልኪ።⁹እቲ ፍሩስ ኣብ ከተማ ዳዊት ምብዝሑ ርኤኹም፡ ነቲ ማይ ከኣ ኣብቲ ታሕታይ ሓጽቢ ኣከብኩም፡¹⁰ነባይቲ ኸተጽንዑ ኸኣ፡ ነቲ ኣባይቲ ኣፍረስኩምዎ።¹¹ኣብ መንጎ እቲ ኽልተ ቐጽሪ ድማ ንማይ እቲ ናይ ቀደም ሓጽቢስ መኣከብ ማይ ገበርኩም፡ ግናኸ ናብቲ ነዚ ዝገበረ ኣይጠመትኩምን፡ ናብቲ ኻብ ጥንቲ ዘዳለዎ ኣይርኤኹምን።¹²በታ መዓልቲ እቲኣ እግዚኣብሄር ጐይታ ሰራዊት ንብኽያት ንዋይዋይን ንምልጻይ ርእስን ከሊ ንምዕጣቕን ጸውዓኩም።¹³እንሆ ኸኣ ታሕጓስን ደስታን ምሕራድ ኣብዑርን ምጥባሕ ኣባጊዕን ምብላዕ ስጋን ምስታይ ወይንን ኰነ፡ ጽባሕ ክንመውት ኢና እሞ ንብላዕን ንስተን፡ ትብሉ ኣሎኹም።¹⁴እግዚኣብሄር ጐይታ ሰራዊት ከኣ ኣብ እዝነይ ነገረኒ፡ እዚ ዓመጻ እዚ ኽሳዕ እትሞቱ ኣይሕደገልኩምን፡ ይብል እግዚኣብሄር ጐይታ ሰራዊት።
   ¹⁵እግዚኣብሄር ጐይታ ሰራዊት ከምዚ በለ፡ ናብ ሸብና፡ እቲ ኣዛዝ ቤት ኰይኑ ዘሎ ዓቃብ ቤት፡ ኪድ እሞ ንገሮ፡¹⁶ኣብዚ እንታይ ትገብር ኣሎኻ መቓብር ኣብዚ እትወቅር፡ ኣታ መቓብርካ ኣብ ላዕሊ እትወቅር፡ ስፍራ ንርእስኻ ኣብ ከውሒ እትዂዕትሲ፡ ኣብዚ መን ኣሎካ¹⁷እንሆ፡ እግዚኣብሄር ብሓያል ቅልጽም ኣርሒቑ ኽውርውረካ፡ ኣጸቢቑ ድማ ክዕዂልለካ እዩ፡¹⁸ጠቕሊሉ የንከባልለካ፡ ከም ኲዕሶ ድማ ናብ ሰፊሕ ሃገር ክድርብየካ እዩ፡ ኣታ ነውሪ ቤት ጐይታኻ፡ ኣብኡ ኽትመውት ኢኻ፡ እተን ሰረገላታት ክብርኻ ድማ ኣብኡ ክዀና እየን።¹⁹ካብ ስፍራኻ ክሰጐካ እየ፡ ካብ ሽመትካ ድማ ክስዕረካ እዩ።
   ²⁰በታ መዓልቲ እቲኣ ኸኣ ክኸውን እዩ፡ ንባርያይ ኤልያቂም ወዲ ህልቅያ ኽጽውዖ እየ፡²¹ቀሚስካ ኸልብሶ፡ ማዕጥቖኻ ኸዕጥቖ፡ ስልጣንካ ናብ ኢዱ ኣሕሊፈ ኽህቦ እየ፡ ንሱውን ነቶም ኣብ የሩሳሌም ዝነብሩን ንቤት ይሁዳን ኣቦ ክኸውን እዩ።²²መኽፈቻ ቤት ዳዊት ድማ ኣብ መንኲቡ ኸንብር እየ፡ ንሱ ይኸፍት፡ ሓደ ዝዓጹ ኸኣ የልቦን፡ ንሱ ይዓጹ፡ ሓደ ዝኸፍት ድማ የልቦን።²³ከም ሽንካር ኣብ ድልዱል ስፍራ ኽተኽሎ እየ፡ ንቤት ኣቦኡውን ዝፋን ክብሪ ክኸውን እዩ።²⁴ክብሪ ቤት ኣቦኡ ዂሉ፡ ውሉድን ውሉድ ውሉድን፡ ኲሉ ናእሽቱ ኣቓሑ፡ ካብ ዋንጫ ኽሳዕ ዝንግሪር ኣብኡ ኽስቀል እዩ።²⁵እግዚኣብሄር ተዛሪቡ እዩ እሞ፡ በታ መዓልቲ እቲኣ እቲ ኣብ ድልዱል ስፍራ ተተኺሉ ዝነበረ ሽንካር ክመልቑን ክቑረጽን ክወድቕን፡እቲ ኣብኡ ተሰቒሉ ዝነበረ ጾር ከኣ ክቕረጽ እዩ፡ ይብል እግዚኣብሄር ጐይታ ሰራዊት።

ትን. ኢሳይያስ ምዕራፍ 23

   ¹ጾር ብዛዕባ ጢሮስ።
   ዖንያ እያ፡ ቤት የልቦን፡ ምእታው የልቦን እሞ፡ ኣትን መራኽብ ተርሲስ፡ ዋይዋይ በላ። ካብ ምድሪ ኪቲም ተገልጸሎም።²ኣቱም ኣብ ደሴት እትነብሩ፡ ስቕ በሉ፡ እቶም ብባሕሪ ዝሳገሩ ነጋዶ ሲዶን መልኡኺ።³እኽሊ ሲሆርን ቀውዒ ኒልን፡ ብብዙሕ ማያት ሰጊሩ እቶታ ነበረ፡ ንሳውን ዕዳጋ ኣህዛብ ነበረት።⁴ባሕሪ፡ እቲ ናይ ባሕሪ ዕርዲ፡ ቅልውላው ኣይሓዘንን ኣይወለድኩን ከኣ፡ ኣጒባዝ ኣየዕቤኹን፡ ደናግል ድማ ኣየዕቤኹን፡ ኢሉ ተዛሪቡ እዩ እሞ፡ ኣቲ ሲዶን፡ ሕፈሪ።⁵እዚ ወረ እዚ ናብ ግብጺ ምስ ዝበጽሕ፡ በቲ ወረ ጢሮስ ራዕራዕ ክብሉ እዮም።⁶ኣቱም ኣብ ደሴት እትነብሩ፡ ናብ ተርሲስ ተሳገሩ እሞ ዋይዋይ በሉ።⁷እታ ኻብ ጥንቲ ዝጀመረት፡ ኣእጋራውን ናብ ርሑቕ ሃገር፡ ኣብኡ ኽትነብር ዝወስዳ ሕጒስቲ ኸተማኹምሲ እዚኣ ድያ⁸ነታ ዘውድታት እትዕድል ዝነበረት፡ መሳፍንቲ ዝነጋዶኣ፡ ምርኡያት ምድሪ ዝሸቃጦኣ ጢሮስሲ፡ መን እዩ እዚ ምኽሪ እዚ ኣብ ልዕሌኣ ዝመኸረላ⁹ንትዕቢት ክብሪ ዘበለ ኸሕስር፡ ንዂሎም ምርኡያት ምድሪ ምእንቲ ኸዋርድ ኢሉ፡ እግዚኣብሄር ጐይታ ሰራዊት እዩ ዝመኸሮ።¹⁰ኣቲ ጓል ተርሲስ፡ ከም ኒል ኴንኪ ኣብ ሃገርኪ ኣሳፍሒ፡ ደጊምሲ ማዕጥቖ የብልክን።¹¹ኢዱ ኣብ ልዕሊ ባሕሪ ዘርጊሑ፡ ንመንግስትታት ራዕራዕ ኣበሎም፡ እግዚኣብሄር ብዛዕባ ኸነኣን ዕርድታታ ኽፈርስ ኣዘዘ።¹²በለ ድማ፡ ኣቲ እተዓመጽኪ ድንግል ጓል ሲዶን፡ ደጊምሲ ኣይክትሕጐስን ኢኺ፡ ተለዓሊ እሞ ናብ ኪቲም ተሳገሪ፡ ኣብኡውን ህድኣትስ ኣይክትረኽብን ኢኺ።¹³እንሆ፡ ሃገር ከለዳውያን፡ ቀደም ህዝቢ ዘይነበረስ፡ ኣሶር ንኣራዊት በረኻ መደቦ፡ ዝኸቡሉ ግምቦም ይሰርሑ፡ ኣዳራሻታ የፍርሱ፡ ዖናውን ይገብርዎ።¹⁴ኣትን መራኽብ ተርሲስ፡ ዕርድኽን ፈሪሱ እዩ እሞ፡ ዋይዋይ በላ።¹⁵በታ መዓልቲ እቲኣ ክኸውን እዩ፡ ጢሮስ፡ ከም መዓልትታት ሓድ ንጉስ፡ ንሰብዓ ዓመት ክትርሳዕ እያ። ኣብ መወዳእታ ሰብዓ ዓመት ግና ንጢሮስ ከምቲ ደርፊ ኣመንዝራ ዝብሎ ክዀና እዩ፡¹⁶ኣቲ ርስዕቲ ኣመንዝራ፡ መሰንቆኺ ኣልዕሊ፡ ኣብ ከተማ ዙሪ፡ ኣጸቢቕኪ መሰንቆ ኣቓንዪ፡ ምእንቲ ኽትዝከሪ ድማ፡ ብዙሕ ደርፊ ድረፊ።¹⁷ኣብ መወዳእታ ሰብዓ ዓመት ከኣ ክኸውን እዩ፡ እግዚኣብሄር ንጢሮስ ክቐጽዓ እዩ፡ ንሳ ኸኣ ናብ ዓስቢ ምንዝርናኣ ኽትምለስ፡ ምስ ኲሎም ኣብ ልዕሊ ገጽ ምድሪ ዘለው መንግስትታት ዓለም ድማ ክትምንዝር እያ።¹⁸ግናኸ ረብሓኣን እቲ ዓስቢ ምንዝርናኣን ንእግዚኣብሄር እተቐደሰ ክኸውን እዩ፡ ረብሓኣ በሊዖም ምእንቲ ኽጸግቡ፡ ብሉጽ ክዳንውን ክኽደኑስ፡ ነቶም ኣብ ቅድሚ እግዚኣብሄር ዝነብሩ ክኸውን እዩ እምበር፡ ኣይክዕቈርን ኣይክንበርን እዩ።

ትን. ኢሳይያስ ምዕራፍ 24

   ¹እንሆ፡ እግዚኣብሄር ንምድሪ ጥራያ ይገብራን የባድማን፡ ገጻ ይግምጥል፡ ነቶም ኣብኣ ዝነብሩውን ፋሕ የብሎም።²ከምቲ ንህዝቢ ኸምኡ ንኻህን ክበጽሖ እዩ፡ ከምቲ ንባርያ ኸምኡ ንጐይታ፡ ከምቲ ንግዝእቲ ኸምኡ ንእመቤት፡ ከምቲ ንተሻያጢ ኸምኡ ንሸያጢ፡ ከምቲ ንተለቃሒ ኸምኡ ንመለቅሒ፡ ከምቲ ንብዓል ዕዳ ኸምኡ ንመዕድዪ ኽበጽሕ እዩ።³እግዚኣብሄር እዚ ቓል እዚ ተዛሪቡ እዩ እሞ፡ ምድሪ ብጥራስ ጥራያ ኽትከውን ብጥራስውን ክትብዝበዝ እያ።⁴ምድሪ ትሓዝን ትጽምሉውን ኣላ፡ ዓለም ትሕለል ትጽምሉውን ኣላ፡ እቶም ምርኡያት ህዝቢ ምድሪ ይሕለሉ ኣለው።⁵ሕጊ ስዒሮም ስርዓት ለዊጦም፡ ነቲ ዘለኣለማዊ ኪዳን ኣፍሪሶም እዮም እሞ፡ ምድሪ በቶም ኣብኣ ዝነብሩ ረኸሰት።⁶ስለዚ መርገም ንምድሪ ውሒጥዋስ፡ እቶም ኣብኣ ዝነብሩ ይቕጽዑ ኣለው፡ ስለዚ እቶም ኣብ ምድሪ ዝነብሩ ይነዱ፡ ሒደት ሰብ ከኣ ይተርፉ።⁷ኰልዒ ወይኒ ይሓዝን፡ ተኽሊ ወይኒ ይሕለል፡ እቶም ኣብ ልቦም ሓጐስ ዝነበሮም ኲላቶም ይትክዙ ኣለው።⁸ደስታ ወቓዕቲ ኸበሮ ተሪፉ፡ ጭራሕምራሕ እቶም ሕጉሳት ተወዲኡ፡ ታሕጓስ መሰንቆ ተሪፉ፡⁹ደጊምሲ እናደረፉ ወይኒ ኣይሰትዩን፡ ብርቱዕ መስተ ንሰተይቱ ይመሮም።¹⁰እታ ዝባደመት ከተማ ፈረሰት፡ ቤት ዘበለ ኸኣ ሰብ ከይኣትዎ ተዓጽወ።¹¹ብዛዕባ ወይኒ ኣብ ኣደባባይ ታዕታዕ ይብሉ፡ ታሕጓስ ዘበለ ዓረበ፡ ተድላ ምድሪ ጐዓዘ።¹²ኣብታ ኸተማስ ዑና ጥራይ ተረፈ፡ ምዕናው ከኣ ንመዓጹ ሰበረ።¹³እምበኣርሲ ኣብ ምድሪ ኣብ ማእከል ህዝብታት፡ ከምቲ ምንዝናዝ ኣውልዕ፡ ምጒናእ ዘቢብ ተወዲኡስ፡ ቀሪም ከም ዝቕረም፡ ክኸውን እዩ።¹⁴እዚኣቶም ድምጾም የልዕሉ፡ እልል ከኣ ይብሉ፡ ብዛዕባ ግርማ እግዚኣብሄር ካብ ባሕሪ የመስግኑ።¹⁵ስለዚ ንእግዚኣብሄር ኣብ ሃገር ምብራቕ፡ ንስም እግዚኣብሄር ኣምላኽ እስራኤል ኣብ ደሴታት ባሕሪ ኣኽብርዎ።
   ¹⁶ካብ ወሰን ምድሪ፡ ክብሪ ነቲ ጻድቕ ዝብል መዝሙር ንሰምዕ ኣሎና። ኣነ ግና፡ ዘማቶ ይዘምቱ፡ እወ፡ ዘማቶ ኣዝዮም ይዘምቱ ኣለው፡ ይዋእ ኣነ፡ ይዋእ ኣነ፡ ወይለይ፡ በልኩ።¹⁷ኣታ ኣብ ምድሪ እትነብር፡ ስምባድን ጒድጓድን መፈንጠራን ኣብ ልዕሌኻ ኣሎ።¹⁸ክኸውን ድማ እዩ፡ እቲ ኻብ ደሃይ ስምባድ ዝሃድም ናብ ጒድጓድ ክወድቕ፡ እቲ ኻብ ጒድጓድ ዝወጽእ ከኣ ብመፈንጠራ ኽትሓዝ እዩ። መሳዂቲ ኣብ ላዕሊ ተኸፊቱ እዩ እሞ፡ መሰረታት ምድሪውን የንደቕድቕ ኣሎ።¹⁹ምድሪ ጥዋዕ ኢላ ትስበር፡ ምድሪ ተረር ኢላ ትትርተር፡ ምድሪ ነነይ ኢላ ትናወጽ።²⁰ምድሪ ኸም ስኹር ሰንከልከል ትብል፡ ከም ዳስ ከኣ ሰሰው ትብል፡ ኣበሳኣ ኸቢድዋ ትወድቕ፡ መሊሳውን ኣይትትንስእን።
   ²¹በታ መዓልቲ እቲኣ ኸኣ ክኸውን እዩ፡ እግዚኣብሄር ንሰራዊት ላዕሊ ኣብ ላዕሊ፡ ንነገስታት ምድሪውን ኣብ ምድሪ ክቐጽዕ እዩ።²²ብሓደ ይእከቡ፡ እሱራት ኣብ ጒድጓድ ከም ዝእከቡ፡ ኣብ ቤት ማእሰርቲ ይዕጸው፡ ድሕሪ ብዙሕ መዓልትታት ከኣ ክቕጽዑ እዮም።
   ²³እግዚኣብሄር ጐይታ ሰራዊት ከኣ ኣብ ከረን ጽዮንን ኣብ የሩሳሌምን ክነግስ፡ ኣብ ቅድሚ ዓበይቱ ድማ ክኸብር እዩ እሞ፡ ሽዑ ወርሒ ኽትሓፍር፡ ጸሓይ ክትሓንኽ እያ።

ትን. ኢሳይያስ ምዕራፍ 25

   ¹ዎ እግዚኣብሄር፡ ንስኻ ኢኻ ኣምላኸይ። ተኣምራት፡ እቲ ናይ ጥንቲ ምኽሪ፡ እምነትን ሓቅን ጌርካ ኢኻ እሞ፡ ልዕል ከብለካ ንስምካውን ክውድሶ እየ።²ንኸተማስ ኲምራ እምኒ፡ ነታ ዕርድቲ ኸተማ ኸኣ ዑና ጌርካያ ኢኻ እሞ፡ እቲ ኣዳራሽ ጓኖት ደጊም ከተማ ኸይከውን፡ ንዘለኣለም ኣይክስራሕን እዩ።³ስለዚ እቲ ብርቱዕ ህዝቢ የኽብረካ፡ ከተማ እቶም ጨካናት ኣህዛብ ትፈርሃካ ኣላ።⁴ነድሪ እቶም ጨካናት ከምቲ ንመንደቕ ዝወቅዕ ሃጽፊ እዩ እሞ፡ ንስኻ ዕርዲ ንድኻ፡ ንሽጉር ኣብ ጸበባኡ መጸግዒ፡ ካብ ሃጽፊ መዕቀሊ፡ ካብ ሃሩር መጽለሊ ዀንካ።⁵ከምቲ ንሃሩር ኣብ ደረቕ ምድሪ እተህድኦ፡ ከምኡ ንታዕታዕ ጓኖት ተህድኦ ኣሎኻ፡ ከምቲ ዋዒ ብጽላሎት ደበና ዝዝሕል፡ ከምኡ ናይቶም ጨካናት ደርፊ ዓወት ይዝሕል ኣሎ።
   ⁶እግዚኣብሄር ጐይታ ሰራዊት ኣብዚ ኸረን እዚ ምሳሕ ብስቡሕ ብልዒ ንዂሎም ህዝብታት ክገብረሎም እዩ፡ ምሳሕ ብብርቱዕ ወይኒ፡ ኣንጒዕ ብዝመልኦ ስቡሕ ብልዒ፡ ምሳሕ ብብርቱዕ ጽሩይ ወይኒ ኽገብር እዩ።⁷ኣብዚ ኸረን እዚ ነቲ ንዂሎም ህዝብታት ዝጋርድ መጋረጃን ነቲ ንዂሎም ኣህዛብ ዝጒልብብ መጐልበብን ከጥፍኦ እዩ።⁸ንሞት ንሓዋሩ ኽውሕጦ፡ እግዚኣብሄር ኣምላኽ ከኣ ንንብዓት ካብ ገጽ ኲሎም ክደርዞ እዩ። እግዚኣብሄር ተዛሪቡ እዩ እሞ፡ ንሕስራን ህዝቡ ኻብ ኲላ ምድሪ ኸርሕቖ እዩ።⁹በታ መዓልቲ እቲኣ፡ እንሆ፡ ኣምላኽና እዚ እዩ፡ ተጸቤናዮ፡ ከድሕነና ኸኣ እዩ፡ እቲ እተጸቤናዮ እግዚኣብሄር እዚ እዩ፡ ብምድሓኑ ንተሓጐስ ባህውን ይበለና፡ ክበሃል እዩ።¹⁰ኢድ እግዚኣብሄር ኣብዚ ኸረን እዚ ኽትዓርፍ እያ እሞ፡ ከምቲ ሓሰር ኣብ ዕነ ዝርገጽ፡ ሞኣብ ኣብ ስፍራኡ ኽርገጽ እዩ።¹¹ከምቲ ሓማሲ ኽሕምስ ከሎ ኣእዳው ዝዝርግሕ፡ ከምኡ ኣብ ማእከሉ ኣእዳው ኽዝርግሕ እዩ፡ ንሱ ኸኣ ንትዕቢቱ ምስናይ እቲ ተንኰል ኣእዳው ኸዋርዶ እዩ።¹²ነቲ ልዕል ዝበለ ጽኑዕ ቀጽሪ ዕርድኻ ለጠቕ ከብሎ፡ ከውድቖ፡ ክሳዕ ሓመድውን ናብ ምድሪ ጻሕ ከብሎ እዩ።

ትን. ኢሳይያስ ምዕራፍ 26

¹በታ መዓልቲ እቲኣ ኣብ ሃገር ይሁዳ እዚ መዝሙር እዚ ኽዝመር እዩ፡ ጽንዕቲ ኸተማ ኣላትና፡ ቀጽርን ዕርድን ገይሩ ምድሓን ከንብረላ እዩ።²እቲ ሓዊ ዝሕሉ ጻድቕ ህዝቢ ኽኣቱስ፡ ደጌታት ክፈቱ።³ነቲ ጽኑዕ ዝሃቀናኡ:ኣባኻ ስለ እተማሕጸነ፡ ብሰላም እወ ብሰላም ትሕልዎ።⁴እግዚኣብሄር ኣምላኽ ናይ ዘለኣለም ከውሒ እዩ እሞ፡ ንዘለኣለም ብእግዚኣብሄር ተማሕጸኑ።⁵ነቶም ኣብ በሪኽ ዝነበሩ ለጠቕ ኣበሎም፡ ነታ ልዕል ዝበለት ከተማ ኣዋረዳ፡ ክሳዕ ምድሪ ኣዋረዳ፡ ናብ ሓመድ ጻሕ ኣበላ።⁶እግሪ እረ ኣእጋር ድኻታትን ስጒምቲ ሽጉራትን ይረግጻኣ።
   ⁷መገዲ ጻድቕ ቅንዕቲ እያ። ንጻድቕሲ መገዲ ተዳልወሉ ኢኻ።⁸ዎ እግዚኣብሄር፡ ኣብ መገዲ ፍርድኻ ተጸቤናኻ። ስምካን ዝኽርኻን ናፍቖት ነፍስና እዩ።⁹ፍርድኻ ኣብ ምድሪ ምስ እትገብር፡ እቶም ኣብ ዓለም ዝነብሩ ጽድቂ ይመሃሩ እዮም እሞ፡ ነፍሰይ ብለይቲ ትናፍቐካ፡ በቲ ኣብ ውሽጠይ ዘሎ መንፈስ ድማ ኣንጊሄ እደልየካ ኣሎኹ።¹⁰ንረሲእ እንተ ራሕራሕካሉ፡ ጽድቂ ኣይመሃርን፡ ኣብ ሃገር ቅንዕና እኩይ ይገብር፡ ንግርማ እግዚኣብሄር ድማ ኣይርእዮን።
   ¹¹ዎ እግዚኣብሄር፡ ኢድካ ተላዒላ ኣላ፡ ንሳቶም ግና ኣይርእዩን፡ ግናኸ ነቲ ምእንቲ ህዝቢ እትጽዕቶ ጻዓት ክርእዩን ክሓፍሩን እዮም፡ እወ፡ ንተጻረርትኻስ ሓዊ ኽውሕጦም እዩ።¹²ዎ እግዚኣብሄር፡ ንዂሉ ተግባርና ንስኻ ኢኻ እትፍጽመልና እሞ፡ ሰላም እትህበና ንስኻ ኢኻ።¹³ዎ እግዚኣብሄር ኣምላኽና፡ ብጀካኻ ኻልኦት ጐይቶት መሊኾምና ኣለው፡ ግናኸ ብኣኻ ጥራይ ንስምካ ንዝክሮ።¹⁴ምውታትሲ ህያዋን ኣይኰኑን፡ ጽላሎት ኣይትንስኡን፡ ስለዚ ቐጻዕካዮምን ኣጽነትካዮምን፡ ንመዘከርታኦም ዘበለውን ኣጥፋእካዮ።
   ¹⁵ነቲ ህዝቢ ኣብዛሕካዮ፡ ዎ እግዚኣብሄር፡ ነቲ ህዝቢ ኣብዛሕካዮ፡ ከበርካ፡ ንወሰን እቲ ሃገር ኲሉ ድማ ኣርሓብካዮ።¹⁶ዎ እግዚኣብሄር፡ ብጸበባ ደለዩኻ፡ ቅጽዓትካ ምስ ረኸቦም፡ ሰላሕ ኢሎም ጸሎት ኣፍሰሱ።¹⁷ከም ጥንስቲ ሰበይቲ፡ ክትወልድ ምስ ቀረበት፡ ቅልውላው ተታሒዛ እትጭርሕ፡ ዎ እግዚኣብሄር፡ ንሕናውን ኣብ ቅድሜኻ ኸምኡ ዀንና።¹⁸ጠነስና፡ ጻዕሪ ሕርሲ ሓዘና፡ ንፋስ ከም ዝወለደት ኰንና፡ ምድሓን ንምድሪ ኣየምጻእናላን፡ ኣብ ዓለም ዝነብሩ ኸኣ ኣይውለዱን።¹⁹ምውታትካ ህያዋን ክዀኑ፡ ሬሳታተይ ክትንስኡ እዮም። ኣውልኻ ኣውሊ ብርሃን እዩ፡ ምድሪውን ንምውታት ከተውጽኦም እያ እሞ፡ ኣቱም ኣብ ሓመድ እትነብሩ፡ ንቕሑ እልል ከኣ በሉ።
   ^20-21እንሆ፡ እግዚኣብሄር ነቶም ኣብ ምድሪ ዝነብሩ ብሰሪ እከዮም ክቐጽዖም ካብ ስፍራኡ ይወጽእ ኣሎ፡ ምድሪ ኸኣ ንደማ ኽትቀልዖ፡ ንቕቱላታውን ድሕሪ ደጊም ኣይክትክውሎምን እያ እሞ፡ እምበኣርከ ኣታ ህዝበይ፡ ኪድ፡ ናብ ሕልፍኚኻ እቶ። ማዕጾኻ ድማ ብድሕሬኻ ዕጾ፡ ቁጥዓ ኽሳዕ ዝሓልፍ ንቕሩብ ግዜ ተሓባእ።

ትን. ኢሳይያስ ምዕራፍ 27

   ¹በታ መዓልቲ እቲኣ እግዚኣብሄር በቲ ተሪርን ዓብይን ሓያልን ሰይፉ ገይሩ፡ ንሌዋታን፡ ነቲ ቕልጡፍ ተመን፡ ንሌዋታን፡ ነቲ ዝለዋወ ተመን፡ ክቐጽዖ፡ ነቲ ኣብ ባሕሪ ዘሎ ገበል ከኣ ክቐትሎ እዩ።
   ²በታ መዓልቲ እቲኣ ብዛዕባ እቲ እተፈትወ ኣታኽልቲ ወይኒ ዘምሩ፡³ኣነ እግዚኣብሄር እሕልዎ፡ ኲሉ ግዜእስትዮ፡ ሓደ እኳ ኸይጐድኦ፡ ለይትን መዓልትን እሕልዎ ኣሎኹ።⁴ኲራ የብለይን፡ ተዀርባን እሾዂን ክዋግኡኒ እንተ ዝትንስኡ፡ ተንሲኤ ብሓደ መንደድክዎም።⁵እንተ ዘይኰነስ ምሳይ ይተዓረቕ፡ ንሓይለይ ይሓዝ፡ ምሳይ ይተዓረቕ።⁶በቲ ዝመጽእ ዘመን፡ ያእቆብ ሱር ክሰድድ፡ እስራኤል ከኣ ክልምዕን ክዕምብብን እዩ፡ ንዝባን ዓለም ድማ ብፍረ ኽመልእዎ እዩም።
   ⁷ከምቲ ነቶም ወቓዕቲ ዝወቕዖምዶ ወቒዕዎ እዩ ወይስ ከምቲ ንቕቱላቱ ዝቐተሎምዶ ተቐቲሉ እዩ፧⁸ኣርሒቕካ ብምስጓጒ ብልክዕ ቀጻዕካዮ፡ ብመዓልቲ ንፋስ ምብራቕ ብብርቱዕ ህቦብላኡ ደፍኦ።⁹ኣዕኑድ ኣስታርተን ሓወልቲ ጸሓይን ድሕሪ ደጊም ከይትንስኡ፡ ንዂሉ ኣእማን መሰውኢ ኸም ዝሰባበር እምኒ ኖራ ገይሩ ምስ ኣፍረሶ፡ ስለዚ እቲ ኣበሳ ያእቆብ በዚ ተሰርየ፡ እዚ እዩ ምሉእ ፍረ ምርሓቕ ሓጢኣት።¹⁰እታ ጽንዕቲ ኸተማ ትጽሙ፡ ከም በረኻ፡ ሰብ ዘይብሉ እተሓድገ ስፍራ ትኸውን ኣላ፡ ኣብኣ ምራኽ ይጓሰ፡ ኣብኣውን ይውዕልን ጨናፍራ ይበልዕን ኣሎ።¹¹ጨንገፋ ምስ ነቐጸ፡ ይስበር፡ ኣንስቲውን መጺአን የንድዳኦ። ኣእምሮ ዘይብሉ ህዝቢ እዩ እሞ፡ ስለዚ እቲ ፈጣሪኡ ኣይድንግጸሉን፡ እቲ ደኳኒኡ ድማ ኣይምሕሮን።
   ¹²በታ መዓልቲ እቲኣ ክኸውን እዩ፡ ካብቲ ርባ ጀሚሩ ኽሳዕ እቲ ናይ ግብጺ ወሓዚ፡ እግዚኣብሄር ፍረ ኸእቱ እዩ። ኣቱም ደቂ እስራኤል ከኣ፡ በብሓደ ተኣሪኹም ክትእከቡ ኢኹም።
   ¹³በታ መዓልቲ እቲኣ ኸኣ ክኸውን እዩ፡ ዓብዪ መለኸት ክንፋሕ እሞ፡ እቶም ኣብ ሃገር ኣሶር ጠፊኦም፡ እቶም ኣብ ሃገር ግብጺውን ተሰጒጎም ዝነበሩ ኽመጹ፡ ንእግዚኣብሄር ድማ ኣብቲ ቅዱስ ከረን፡ ኣብ የሩሳሌም ክሰግዱሉ እዮም።

ትን. ኢሳይያስ ምዕራፍ 28

   ¹ነታ ኣኽሊል ትዕቢት ናይ ስኹራት ኤፍሬምን ነታ ናይ ክቡር ስልማቱ ዝጸምለወት ዕምባባ፡ ኣብ ርእሲ እታ ስብሕቲ ለሰ ናይቶም ብወይኒ ሰንከልከል ዝብሉ ዘላን ወይለአን።²እንሆ፡ ሓደ ብርቱዕን ሓያልን ካብ እግዚኣብሄር ይመጽእ ኣሎ፡ ንሱ ኸም ሃጽፊ በረድን ከም ዘጥፍእ ህቦብላን ከም ሃጽፊ ብርቱዕ ደምሳሲ ማይን ኰይኑ፡ ብሓይሊ ናብ ምድሪ ጻሕ የብሎ።³እቲ ኣኽሊል ትዕቢት ናይ ስኹራት ኤፍሬም ብእግሪ ኽርገጽ እዩ።⁴እቲ ኣብ ርእሲ እታ ስብሕቲ ለሰ ዘሎ ናይቲ ኽቡር ስልማቱ ዝጸምለወ ዕምባባ ከምቲ ቕድሚ ቐውዒ ቀዲሙ ዝበሰለ በለስ ክኸውን እዩ፡ ምስ ረኣዮ፡ ገና ኣብ ኢዱ ኸሎ፡ ቀልጢፉ ይውሕጦ።
   ⁵በታ መዓልቲ እቲ እግዚኣብሄር ጐይታ ሰራዊት ነቶም ተረፍ ህዝቢ ኣኽሊል ክብርን ዘውዲ ስልማትን ክዀኖም እዩ።⁶ነቲ ኽፈርድ ዝቕመጥ ከኣ መንፈስ ፍትሒ፡ ነቶም ንውግእ ናብ ኣፍ ደገ ዝመልሱ ድማ ሓይሊ ክዀኖም እዩ።⁷ግናኸ እዚኣቶም ድማ ብወይኒ ሰንከልከል ይብሉ፡ ብሰሪ ብርቱዕ መስተ ኸኣ ይሳናኸሉ። ካህንን ነብይን ብሰሪ ብርቱዕ መስተ ሰንከልከል ይብሉ፡ ብወይኒ ይውሓጡ፡ ብሰሪ ብርቱዕ መስተ ሰንከልከል ይብሉ፡ ኣብ ራእይ ይጋገዩ፡ ኣብ ፍርዲ ይዕንቀፉ ኣለው።⁸ኲሉ መኣድታት ዘፈንፍን ትፋእ ምሉእ እዩ፡ ካን ጽጹይ ስፍራ ይልቦን።⁹ንመን ደኣ ፍልጠት ክምህር እዩ ንመንከ እዩ ነታ መልእኽቲ ኸም ዘስተውዕላ ዝገብሮ ነቶም ጸባ ኣዲኦም ዝሓደጉ፡ ካብ ጡብ እተፈልዩ ድዩ¹⁰ትእዛዝ ኣብ ልዕሊ ትእዛዝ፡ ትእዛዝ ኣብ ልዕሊ ትእዛዝ፡ ባህሊ ኣብ ልዕሊ ባህሊ፡ ባህሊ ኣብ ልዕሊ ባህሊ፡ ሒደት ኣብዚ፡ ሒደት ኣብቲ እዩ።¹¹እምበኣርሲ ብወታእ ከናፍርን ብልሳን ጓናን ነዚ ህዝቢ እዚ ኽዛረቦ እዩ።¹²ንሱውን፡ ዕረፍቲ እዚኣ እያ፡ ነቲ ድኹም ኣዕርፍዎ፡ እታ መቕሰኒት እዚኣ እያ፡ ኢልዎም ነይሩ፡ንሳቶም ግና ምስማዕ ኣበዩ።¹³ስለዚ ኸኣ ቃል እግዚኣብሄር ንኣታቶም፡ ትእዛዝ ኣብ ልዕሊ ትእዛዝ፡ ትእዛዝ ኣብ ልዕሊ ትእዛዝ፡ ባህሊ ኣብ ልዕሊ ባህሊ፡ ሒደት ኣብዚ፡ ሒደት ኣብቲ ክዀኖም እዩ። ክኸዱ ኸለው ኸኣ፡ ጥንቅሊዒት ወዲቖም፡ ክስበሩን ክፍንጠሩን ክትሓዙን እዮም።
   ¹⁴ስለዚ ኣቱም መላገጽቲ፡ ኣቱም ነዚ ኣብ የሩሳሌም ዘሎ ህዝቢ እትመልኩ፡ ቃል እግዚኣብሄር ስምዑ።¹⁵ንስኻትኩም ከኣ፡ ምስ ሞትሲ ኪዳን ተኣታቲና፡ ምስ ሲኦም ድማ ተዋዓዒልና፡ ንሓሶት ጸግዕና ንጥልመትውን ከውልና ጌርና ኢና እሞ፡ መዓት ከም ደምሳሲ ውሒዝ ኰይኑ ምስ ዝሓልፍ፡ ኣባናስ ኣይክበጽሕን እዩ፡ ትብሉ ኣሎኹም እሞ፡¹⁶ስለዚ እግዚኣብሄር ኣምላኽ ከምዚ ይብል ኣሎ፡ እንሆ፡ ኣብ ጽዮን እምኒ መሰረት፡ ፍቱን እምኒ፡ ድልዱል ዝመሰረቱ፡ ክቡር እምኒ ዂርናዕ እንብር ኣሎኹ፡ ብእኡ ዝኣምን ኣይክሃድምን እዩ።¹⁷ፍርዲ ንመዓቀኒ፡ ጽድቂ ኸኣ ንመለክዒ ኽገብሮ እየ፡ በረድ ንጸግዒ ሓሶት ከፍርሶ፡ ማያትውን ነቲ ኸውሊ ኽድምስሶ እዩ።¹⁸እቲ ምስ ሞት እተኣታቶኹምዎ ኪዳንሲ ከንቱ ክኸውን፡ እቲ ምስ ሲኦል እተዋዓዓልኩምዎ ውዕል ከኣ ኣይክጸንዕን እዩ፡ መዓት ከም ደምሳሲ ውሒዝ ኰይኑ ምስ ዝሓልፍ፡ ንስኻትኩም ብእኡ ኽትርገጹ ኢኹም።¹⁹ንግሆ ንግሆ፡ ለይትን መዓልትን ክሓልፍ እዩ እሞ፡ እናሓለፈ ኽሕዘኩም እዩ። ነዚ መልእኽቲ እዚ ምስትውዓልሲ መሰክሒ ጥራይ ክኸውን እዩ።²⁰ዓራት ከየሳፍሑሉ፡ ሓጺር እዩ፡ መደረብታ ኸኣ፡ ብእኡ ኸይጒልበቡ፡ ጸቢብ እዩ።²¹እግዚኣብሄር ንዕዮኡ፡ ነቲ መስትንክር ዕዮኡ ምእንቲ ኽገብር፡ ንተግባሩ፡ ነቲ ዘደንቕ ተግባሩ ምእንቲ ኽፍጽምሲ፡ ከም ኣብ ከረን ጴራጺም ክትንስእ፡ ከም ኣብ ለሰ ጊብዖን ክዂሪ እዩ እሞ፡²²ጥፍኣት ኣብ ልዕሊ ዂላ ምድሪ ተመዲቡ ኸም ዘሎ፡ ካብ እግዚኣብሄር ጐይታ ሰራዊት ሰሚዐ ኣሎኹ እሞ፡ ማእሰርትኹም ከይጸንዕ ደጊምሲ ኣይተላግጹ።
   ²³ጽን በሉ፡ ድምጻይ ስምዑ፡ ኣስተብህሉ፡ ዘረባይ ድማ ስምዑ።²⁴ሓረስታይ ክዘርእ ኢሉ ዂሉ መዓልቲዶ ይሓርስ፡ ንግራቱስ ይባርዎን ይጒልጒሎን ድዩ²⁵ንዝባኑ ምስ ኣጣጥሖ ሰሰግዶ ኣይንስንስን ካሙንከ ኣይብትንን ድዩ ስርናይ ከኣ ኣብቲ ትልምታት፡ ስገም ድማ ኣብ ወገኑ፡ ንሂጒውን ኣብ ወሰነ ወሰኑዶ ኣይዘርእን እዩ²⁶ኣምላኽውን ነቲ ቕኑዕ ኣገባቡ ኣፍሊጥዎን ምሂርዎን እዩ።²⁷ሰሰግ ብመኸዲ ኣይክየድን፡ መንኰርኰር ሰረገላ ኸኣ ኣብ ካሙን ኣየዙሩን፡ ንሰሰግሲ ብጨንገፍ፡ ንካሙን ድማ ብሸቦጥ እዮም ዝዘብጥዎ።²⁸እኽሊ ይጥሓን እምበር፡ ንሓዋሩስ ኣይክየድን እዩ፡ መንኰረዂር ሰረገላኡን ኣፍራሱን እኳ እንተ ኣኸድሉ፡ ኣይጥሓንን እዩ።²⁹እዚውን ካብ እግዚኣብሄር ጐይታ ሰራዊት እዩ ዝወጸ። ንሱ ብምኽሩ ዘገርም፡ ብጥበቡውን ዓብዪ እዩ።

ትን. ኢሳይያስ ምዕራፍ 29

   ¹ኣቲ ኣሪኤል፡ ኣሪኤል፡ ዳዊት መሳፍሮ ዝገበረኪ ኸተማ፡ ወይለኺ። ዓመት ኣብ ዓመት ወስኹ፡ በዓላትውን ምዝዋሩ ይፈጽም።²ንኣሪኤል ድማ ከጨንቐላ እየ፡ ዋይዋይን ቁዝማን ክኸውን እዩ፡ ንሳውን ከም ኣሪኤል ክትኰነኒ እያ።³ኣብ ከባቢኻ ኽሰፍር እየ፡ ብሰራዊት ክኸበኪ፡ ኣብ ልዕሌኺውን ዕርዲ ከቕውም እየ።⁴ተዋሪድኪ፡ ካብ ምድሪ ኽትዛረቢ ኢኺ፡ ቃልኪ ብሰላሕላሕ ካብ ሓመድ ክወጽእ፡ ድምጽኺ ከም ድምጺ ሰራዪ ኻብ ምድሪ ኽስማዕ፡ ቃልኪውን ካብ ሓመድ ሕሽዂሽዂ ክብል እዩ።⁵ብዝሒ ጻላእትኺ ግና ከም ድኹም ተጐጓ፡ ብዝሒ እቶም መጨነቕቲ ኸኣ ከምቲ ዝሓልፍ ብቑብቑ ክኸውን እዩ፡ እዚውን ብቕጽበት ብድንገት ክኸውን እዩ።⁶መዓት እግዚኣብሄር ጐይታ ሰራዊት ብነጒድን ምንድቕዳቕ ምድርን ብብርቱዕ ህማምን ህቦብላን ሃጽፍን ብዝባላዕ ሃልሃልታ ሓውን ክመጸኪ እዩ።⁷ብዝሒ እቶም ኣብ ልዕሊ ኣሪኤል ዝትንስኡ ዂሎም ኣህዛብ፡ ብዝሒ እቶም ንእኣን ንዕርዳን ዝወግኡን ዘጽብቡን ኲሎም ከም ሕልምን ራእይ ለይትን ክኸውን እዩ።⁸ከምቲ ጥሙይ ብሕልቡ ዝበልዕ፡ ምስ ነቕሐ ግና ነፍሱ ጥራያ እያ፡ ከምቲ ጽሙእ ድማ ብሕልሙ ዝሰቲ፡ ግናኸ ምስ ነቕሐ፡ እንሆ፡ ይሕለል ነፍሱውን ትጸምእ፡ እቶም ብዙሓት ንኸረን ጽዮን ዝወግእዋ ዂሎም ኣህዛብ ድማ ከምኡ ክዀኑ እዮም።
   ⁹ተድነቑን ተገረሙን ተዓመቱን ዑሩን። ስኹራት እዮም፡ ግናኸ ኣይብወይንን፡ ሰንከልከል ይብሉ፡ ግናኸ ብብርቱዕ መስተ ኣይኰኑን።¹⁰እግዚኣብሄርሲ መንፈስ ከቢድ ምትኻስ ኲዕዩልኩም ኣሎ እሞ፡ ነዒንትኹም ደፊንወን፡ ንነብያትን ንሓለቓታትኩምን ንሰብ ራእይን ኣጐልቢብዎም ኣሎ።¹¹ኲሉ ራእይ ከም ቃላት ሕቱም መጽሓፍ ኰይኑኩም ኣሎ። ንሓደ ንባብ ዝፈልጥ፡ እንካ እስከ እዚ ኣንብብ፡ ኢሎም እንተ ሃብዎ፡ ንሱ ኸኣ፡ ሕቱም እዩ እሞ፡ ኣይዀነለይን፡ ኢሉ ይመልስ።¹²ወይስ ንሓደ ንባባ ዘይፈልጥ፡ እንካ እስከ እዚ ኣንብብ፡ ኢሎም እንተ ሃብዎ፡ ንሱው፡ ንባብ ኣይፈልጥን እየ፡ ኢሉ ይመልስ።
   ¹³እግዚኣብሄር ከኣ በለ፡ እዚ ህዝቢ እዚ ብኣፉ ኻብ ዝቐርበኒ፡ ብኸናፍሩውን ካብ ዘኽብረኒ፡ ልቡ ግና ካባይ ካብ ዝርሕቕ፡ እቲ ንኣይ ምፍራሁ ኸኣ ብምህሮ ባህሊ ሰብ ካብ ዝኸውን፡¹⁴ስለዚ እንሆ፡ ኣብ ማእከል እዚ ህዝቢ እዚ ዘደንቕ ተግባር፡ እወ፡ ዘደንቕ ተግባርን ተኣምራትን ወሲኸ ኽገብር እየ፡ ጥበብ፡ እቶም ጥበበኛታቱ ኽጠፍእ፡ ምስትውዓል እቶም ኣስተውዓልቱ ኽድፈን እዩ፡ በለ።
   ¹⁵ነቶም ንምኽሮም ካብ እግዚኣብሄር ኣዕሚቖም ዝሓብኡ፡ ተግባሮም ከኣ ብጸልማት ዝገብሩ እሞ፡ መን ይርእየና መንከ ይፈልጠና፡ ዝብሉስ ወይለኦም።¹⁶ኣየ ኣቱም ቄናናት፡ ስሩሕ ንስራሒኡ፡ ንስኻ ኣይሰራሕካንን፡ ድኩን ከኣ ንደኳኒኡ፡ ንስኻ ኣይተስተውዕልን ኢኻ፡ ኢሉስ መሬትዶ ምስ ሰራሒኡ ይመዓራረ እዩ¹⁷ሊባኖስ ናብ ፍርያም ግራት ክልወጥ፡ እቲ ፍርያም ግራት ከኣ ከም ዱር ክቑጸር፡ ቅሩብ ግዜዶ ኣይኰነን ተሪፉ ዘሎ¹⁸በታ መዓልቲ እቲኣ ጸማማት ንቓል እቲ ጽሑፍ ክሰምዑ፡ ኣዒንቲ ዕውራት ድማ ካብ ጽልግልግታን ጸልማትን ወጺእን ክርእያ እየን።¹⁹እቶም ዓቃላት ንሓጐሶም ኣብ እግዚኣብሄር ከዕዝዝዎ፡ እቶም ኣብ ማእከል ሰብ ዘለው ድኻታት ከኣ በቲ ናይ እስራኤል ቅዱስ ክሕጐሱ እዮም።²⁰ስለዚ እቲ ጨካን ደጊም ኣይክህሉን፡ እቲ መላገጺ ኸኣ ጠፊኡ እዩ፡ እቶም እከይ ክገብሩ ትልጭ ዝብሉ ዂላቶም፡²¹እቶም ንሰብ ብሰሪ ሓንቲ ቓል ከም በዳሊ ዝፈርድዎ፡ ነቲ ኣብ ደገ ዝግስጽ ከኣ መፈንጠራ ዝግትሩሉ፡ ነቲ ጻድቕ ድማ ብኸንቱ ዘርሕቕዎ ኽጸንቱ እዮም።
   ²²ስለዚ እቲ ንኣብርሃም እተበጀዎ እግዚኣብሄር ንቤት ያእቆብ ከምዚ ይብላ ኣሎ። ደጊምሲ ያእቆብ ኣይክሓፍርን ገጹውን ኣይክጽምሉን እዩ።²³ንደቁ፡ እቶም ግብሪ ኣእዳወይ፡ ኣብ ማእከሉ ምስ ረኣየ ግና፡ ሽዑ ንሳቶም ንስመይ ክቕድሱ፡ ነቲ ናይ ያእቆብ ቅዱስ ድማ ክቕድሱ፡ ንኣምላኽ እስራኤል ከኣ ክፈርሁ እዮም።²⁴እቶም ብመንፈስ እተጋገዩ ድማ ኣእምሮ ኽረኽብ፡ እቶም መጒረምረምቲውን ትምህርቲ ኽምሃሩ እዮም።

ትን. ኢሳይያስ ምዕራፍ 30

   ¹ኣቱም ተጻረርቲ ደቂ፡ ወይለኹም፡ ይብል እግዚኣብሄር፡ ምኽሪ ትመኽሩ፡ ግናኸ ካባይ ኣይኰነን፡ ሓጢኣት ኣብ ልዕሊ ሓጢኣት ክትውስኹስ፡ ኪዳን ትትኣታተው ኣሎኹም፡ ግናኸ ካብ መንፈሰይ ኣይኰነን።²ብሓይሊ ፈርኦን ክትሕይሉ፡ ኣብ ጽላል ግብጺ ኸኣ ክትጽግዑ ኢልኩምሲ፡ ናብ ግብጺ ትወርዱ ኣሎኹም፡ ግናኸ ንኣፈይ ኣይሓተትኩምን።³ስለዚ እቲ ሓይሊ ፈርኦን መነወሪኹም፡ እቲ ኣብ ትሕቲ ጽላል ግብጺ ምጽጋዕኩም ድማ መሕፈሪኹም ክኸውን እዩ።⁴መሳፍንቱ ኣብ ጾኣን ኣለው፡ ልኡኻቱውን ናብ ሃኔስ በጽሑ እሞ፡⁵በቲ ነውርን ሕፍረትን እምበር፡ ገለ እኳ ዘይጠቕሞም፡ ረዲእትን ጥቕምን ከኣ ዘይብሉ ህዝቢ ኲላቶም ክሓፍሩ እዮም።
   ⁶ጾር ብዛዕባ ኣራዊት ደቡብ።
   በታ ዋዕሮን ሓየትን መንደልቶን ዝነፍር ገበልን ብምድሪ ጸበባን ምዕሉባጥን ኣቢሎም፡ ንሃብቶም ኣብ ዝባን ጸዕብ፡ ንዕቋሮም ከኣ ኣብ መንጒዳ ኣግማል ጽዒኖም፡ ንገለ እኳ ዘይጠቕሞም ህዝቢ የምጽኡሉ።⁷ግብጺ ብኸንቱ ብብላሽ እያ እትረድእ እሞ፡ ስለዚ ንእኣ፡ ረሃብ ስቕ ኢላ እትቕመጥ፡ ኢለ ሰሜኽዋ።⁸እምበኣርሲ ኺድ እሞ፡ ኣብ ቅድሚኦም ኣብ ሰሌዳ ሓንጽጾ፡ ንዝመጽእ ግዜን ንሓዋሩን ንዘለኣለምን ክነብርሲ፡ ኣብ መጽሓፍ ጽሓፎ።⁹ዓለወኛ ህዝቢ፡ ሓሰውቲ ውሉድ፡ ንሕጊ እግዚኣብሄር ምስማዕ ዝኣብዩ ውሉድ እዮም እሞ፡¹⁰ነቶም ረኣይቲ፡ ኣይትርኣዩ፡ ንነብያት ከኣ፡ ቅኑዕ ነገር ኣይትነበዪልና፡ ዘሐጒስ ደኣ ንገሩና፡ ጥበራውን ተነበዪልና፡¹¹ካብ ጐደና ኣግልሱ፡ ካብ መገዲ ዝበሉ፡ ነቲ ናይ እስራኤል ቅዱስ ካብ ቅድሜና ኣርሕቑ፡ ይብሉ።¹²ስለዚ እቲ ናይ እስራኤል ቅዱስ ከምዚ ይብል፡ ነዚ ቓል እዚ ንዒቕኩም፡ ኣብ ዓመጽን ኣብ ጐመጽን ተወክልኩም፡ ንእኡ ጸግዒ እትገብሩስ፡¹³ስለዚ እዚ ኣበሳ እዚ ኸም ሓደ ኽወድቕ ዝቐረበ ነቓዕ፡ ከምቲ ብድንገትን ብቕጽበትን ዝፈርስ እተዘዘወ ነዊሕ መንደቕ ክዀነኩም እዩ፡¹⁴ዕትሮ ስራሕ መሬት ከም ዝሰባበር፡ ክሰባበር እዩ፡ ካብቲ ገልዑ እኳ ሓዊ ኻብ እቶን ዝጽሓሮ፡ወይስ ማይ ካብ ሓጽቢ ዝቕድሖ ኸም ዘይርከብ፡ ብዘይ ምሕረት ክሰባበር እዩ።
   ¹⁵እግዚኣብሄር ኣምላኽ፡ እቲ ናይ እስራኤል ቅዱስ፡ ከምዚ ኢሉ ኣሎ እሞ፡ ብምምላስኩምን ብምህዳእኩምን ክትድሕኑ ኢኹም፡ ሓይልኹም ኣብ ህድኣትን ኣብ ምውካልን ክኸውን እዩ፡ ግናኸ ኣቤኹም።¹⁶ንስኻትኩምውን፡ ኣይፋልናን፡ በፍራስ ደኣ ንሃድም፡ ስለዚ ኽትሃድሙ ኢኹም፡ ኣብ ፈጣናት ኣፍራስ ከኣ ክንቅመጥ ኢና፡ በልኩም። ስለዚ እቶም ዝሰጉኹም ፈጣናት ክዀኑ እዮም።¹⁷ብምፍርራህ ሓደ ሰብኣይ ካባኻትኩም ሽሕ ክሃድሙ እዮም፡ ከም ጒንዲ ኣብ ርእሲ ኸረን፡ ከም ሰንደቕ ዕላማውን ኣብ ኲርባ ኽሳዕ እትተርፉ፡ ብምፍርራህ ሓሙሽተ ኽትሃድሙ ኢኹም።¹⁸ስለዚ ኸኣ እግዚኣብሄር፡ ጸጋ ምእንቲ ኽህበኩም ክጽበ፡ ስለዚውን ምእንቲ ኽምሕረኩም ልዕል ክብል እዩ። እግዚኣብሄርሲ ኣምላኽ ፍርዲ እዩ እሞ፡ እቶም ዝጽበይዎ ዘበሉ ዂላቶም ብጹኣን እዮም።
   ¹⁹እቲ ህዝቢ ኣብ ጽዮን ኣብ የሩሳሌም ክነብር እዩ እሞ፡ ድሕርዚ ኣይክትበክን ኢኻ፡ ምስ እተእዊ ብርግጽ ጸጋ ኽህበካ እዩ፡ ክሰምዕ ከሎ ኸኣ ክመልሰልካ እዩ።²⁰እግዚኣብሄርሲ እንጌራ ጸበባን ማይ ጭንቀትን ክህበኩም እዩ፡ ኣዒንትኻ ግና መምህራንካ ኽርእያ እየን እምበር፡ ደጊምሲ መምህራንካ ኣይክስወሩን እዮም።²¹ንየማን ወይስ ንጸጋም እንተ ኣግለስኩም፡ ኣእዛንካ፡ እዚኣ እያ እታ መገዲ፡ ብእኣ ተመላላሱ፡ ዝብል ቃል ኣብ ድሕሬኻ ኽሰምዓ እየን።²²ነቲ ናይ ቅርጺ ምስልታትካ ተለቢጥዎ ዘሎ ብሩርን፡ ነቲ ናይ ፍሲ ምስልታትካ ተጠሊቕዎ ዘሎ ወርቅን ከተርክሶን ከም ርኹስ ነገር ክትጒሕፎን፡ ወጊድ ካብዚ ውጻእ፡ ክትብሎን ኢኻ።²³ንሱ ኸኣ ነቲ ኣብ ምድሪ ዝዘራእካዮ ዘርኢ ዝናም ክህብ፡ ካብቲ ምድሪ ዝርከብ እንጌራ ድማ ጥዑምን ኣኽልታርፍን ክኸውን እዩ፡ በታ መዓልቲ እቲኣ ማልካ ኣብ ርሒብ ሸኻታት ክጓሰያ እየን።²⁴እቶም ንምድሪ ዝሓርሱ ኣብዑርን ጻዕባትን ከኣ ብመስአን ብሰፍእን ዝጸረየ ጨው ዝጥዕም ድርቋ ኽበልዑ እዮም።²⁵በታ ግምብታት ዝወድቁላ ዓባይ መዓልቲ ቕትለት ከኣ ኣብ ኲሉ ነዋሕቲ ኣኽራንን ኣብ ኲሉ በረኽቲ ዂድዂዶታትን ርባታትን ወሓይዝትን ክኸውን እዩ።²⁶በታ እግዚኣብሄር ንመስበርቲ ህዝቡ ዝዘንላ፡ ንቑስሊ መውቃዕቱ ዘሕውየላ መዓልቲ ኸኣ እቲ ብርሃን ወርሒ ኸም ብርሃን ጻሓይ ክኸውን፡ ብርሃን ጸሓይ ድማ ሾብዓተ ዕጽፊ ኸም ብርሃን ሾብዓተ መዓልቲ ክኸውን እዩ።
   ²⁷እንሆ፡ ስም እግዚኣብሄር ብርሱን ቁጥዓኡን ብዝዕልስ ትክን ካብ ርሑቕ ይመጽእ ኣሎ፡ ከናፍሩ ብዂራ ምሉእ፡ ልሳኑውን ከም ዝባላዕ ሓዊ እዩ።²⁸ነህዛብ ብምሐ ኸንቱነት ክሐሕዮም፡ ንምንጋጋ ህዝብታት ከኣ ብዘጋጊ ልጓም ምእንቲ ኽለጒምሲ፡ ትንፋሱ ኸምቲ ኽሳዕ ክሳድ ዝበጽሕ ደምሳሲ ውሒዝ እዩ።²⁹ከምታ ቅዱስ በዓል ዝበዓለላ ለይቲ ኽትዝምሩ ኢኹም፡ ከምቲ ናይ ከረን እግዚኣብሄር፡ ናብቲ ኸውሒ እስራኤል፡ ብቓና እምብልታ ኽድይቡ ኸለው፡ ከምኡውን ልብኹም ክሕጐስ እዩ።³⁰እግዚኣብሄር ድማ ነቲ ኽቡር ድምጹ ኸስምዕ እዩ፡ ንቕልጽሙ ኸኣ ብዂራ ቑጥዓን ብሃልሃልታ ዝባላዕ ሓውን ብሽሾን ሃጽፍን በእማን በረድን ኣውሪዱ ኸርኢ እዩ።³¹ኣሶር ብሸቦጥ ምስ ወቕዐ፡ ብድምጺ እግዚኣብሄር ክሰባበር እዩ እሞ፡³²ኲሉ መውቃዕቲ እታ እግዚኣብሄር ዘውርደሉ ምድብቲ ስላዕ ከኣ ብኸበሮን መሰንቆን ክኸውን እዩ፡ ንሱ ኸኣ መመሊሱ ኢዱ እናልዓለ ኽዋግኦም እዩ።³³ቶፌት ካብ ቀደም ተዳልያ ኣላ፡ እወ፡ ንንጉስ እኳ ደኣ እያ እተዳለወት፡ ኣዕመቛን ኣርሓባን፡ ኣብኣ ኸኣ ሓውን ብዙሕ ዕጨይትን ተዀሚሩ ኣሎ፡ ትንፋስ እግዚኣብሄር ከም ውሒዝ ዲን በግ የብላ ኣሎ።

ትን. ኢሳይያስ ምዕራፍ 31

   ¹እቶም ረዲኤት ደልዮም ናብ ግብጺ ዝወርዱ፡ እምንቶኦም በፍራስ ዝገብሩ፡ ኣብ ዓረብያታት፡ ብዙሓት ስለ ዝዀና፡ ኣብ ፈረሰኛታት ድማ፡ ብርቱዓት ስለ ዝዀኑ፡ ዝውከሉ ወይለኦም። ናብቲ ናይ እስራኤል ቅዱስ ግና ኣይጥምቱን፡ ንእግዚኣብሄር ከኣ ኣይደልይዎን።²ግናኸ ንሱ ድማ ጠቢብ እዩ፡ ንእከይ የምጽኦ፡ ንቓሉ ኸኣ ኣይልውጦን፡ ንምጽራር ቤት እቶም ገበርቲ እከይን፡ ንምጽራር ረዲኤት ዓመጸኛታትን ድማ ይትንስእ።³እምበኣርከ ግብጻውያንሲ ሰብ እዮም፡ ኣምላኽ ኣይኰኑን፡ ኣፍራሶም ከኣ ስጋ እዮም፡ መንፈስ ኣይኰኑን። እግዚኣብሄር ኢዱ ምስ ዝዝርግሕ ከኣ፡ እቲ ረዳኢ ይዕንቀፍ፡ እቲ ተረዳኢውን ይወድቕ እሞ ኲላቶም ሓቢሮም ይጠፍኡ።
   ⁴እግዚኣብሄር ከምዚ ኢሉኒ እዩ እሞ፡ ከምቲ ኣንበሳን ሽደን ኣንበሳን ብዙሓት ጓሶት እኳ ተጸዋዊዖም እንተ መጽዎ ብግዳዩ ዝጓዝም፡ ብድምጾም ዘይስምብድን ብጭራሕምራሖም ዘይፈርህን፡ ከምኡ እግዚኣብሄር ጐይታ ሰራዊት ኣብ ከረን ጽዮንን ኣብ ኲድዂዶኣን ምእንቲ ኽዋጋእ ክወርድ እዩ።⁵ከምተን ዝነፍራ ኣዕዋፍ ገይሩ፡ እግዚኣብሄር ጐይታ ሰራዊት ንየሩሳሌም ከዕቁባ እዩ፡ ከዕቁባን ከናግፋን ክንሕፋን ከድሕናን እዩ።
   ⁶ኣቱም ደቂ እስራኤል፡ ናብቲ ኻብኡ ኣዚኹም ዝረሓቕኩም ተመለሱ።⁷በታ መዓልቲ እቲኣ ነቶም ኣእዳውኩም ንመሕጥኢ ዝገበራኦም ጣኦታት ብሩርን ጣኦታት ወርቅን ነፍሲ ወከፎም ክድርብይዎም እዮም እሞ፡⁸ሽዑ ኣሶር ብሰይፊ ኽወድቕ፡ ብናይ ሰብ ኣይኰነን፡ እቲ ናይ ሰብ ዘይኰነ ሰይፊ ኸኣ ክውሕጦ እዩ። ካብ ሰይፊ ድማ ክሃድም እዩ፡ ኣጒባዙውን ገባር ክዀኑ እዮም።⁹ካብ ፍርሃት እተላዕለ እምባኡ ኽሓልፍ፡ መሳፍንቱውን ብሰንደቕ ዕላማ ኽፈርሁ እዮም፡ ይብል እቲ ሓው ኣብ ጽዮን፡ እቶኑ ኸኣ ኣብ የሩሳሌም ዘለዎ እግዚኣብሄር።

ትን. ኢሳይያስ ምዕራፍ 32

   ¹እንሆ፡ ንጉስ ብጽድቂ ኽነግስ እዩ፡ መሳፍንቲ ኸኣ ብቕንዕና ኽገዝኡ እዮም።²ሰብ ድማ ካብ ንፋስ ከም ከውሊ፡ ካብ ህቦብላ ኸም ጸግዒ፡ ኣብ ደረቕ ምድሪ ኸም ወሓዚ ማያት፡ ኣብ ምድሪ ኣጻምእ ከም ጽላል ዓብዪ ኸውሒ ክኸውን እዩ።³ኣዒንቲ እቶም ረኣይቲ ኣይክዖራን፡ ኣእዛን እቶም ሰማዕቲ ኸኣ ጽን ክብላ እየን።⁴ልቢ እቶም ዝንጉዓት ፍልጠት ከስተውዕል፡ ልሳን ወትኣት ከኣ ትኽ ኣቢሉ ኣጽርዩ ኽዛረብ እዩ።⁵ሕሱምሲ ድሕሪ ደጊም ክቡር ተብሂሉ ኣይክስመን፡ መጣፍኢ ኸኣ ጐይታ ኣይክብሃልን እዩ።⁶ሕሱም ሰብሲ ረሲእነት ምእንቲ ኽገብር፡ ኣብ ልዕሊ እግዚኣብሄር ስሕተት ክዛረብ፡ ንነፍሲ ጥሙይ ጥራያ ኽሓድጋ ንጽሙእ ድማ መስተ ምእንቲ ክኸልኦስ፡ ሕሰም ይዛረብ፡ ልቡ ኸኣ እከይ ይሰርሕ።⁷መሳርያ መጣፍኢ ተካል እዩ፡ ንሽጉራትን ነቲ ቕንዕና ዝዛረብ ድኻን ብቓል ሓሶት ምእንቲ ኸጥፍኦምሲ፡ እኩይ ሓሳብ ይጠላልፍ።⁸ክቡር ሰብ ግና ክቡር ሓሳብ ይሓስብ፡ ኣብ ክቡር ነገር ከኣ ይጸንዕ።
   ⁹ኣትን ጥዒሙክን ዘሎኽን ኣንስቲ፡ ተንስኣ እሞ ድምጸይ ስምዓ፡ ኣትን ግዲ ዘይብልክን ኣዋልድ፡ ናብ ዘረባይ ኣድህባ።¹⁰ምጒናእ ዘቢብ ጠፊኡ፡ ምእራይ ፍሬታት ኣይመጽእን እዩ እሞ፡ ኣትን ግዲ ዘይብልክን ኣንስቲ፡ ድሕሪ ዓመትን ቅሩብ መዓልታትን ክትስምብዳ ኢኽን።¹¹ኣትን ጥዒሙክን ዘሎኽን ኣንስቲ፡ ተሸበራ፡ ኣትን ግዲ ዘይብልክን፡ ራዕራዕ በላ፡ ተቐንጠጣ እሞ ጥራይክን ኩና፡ ሓቛቑኽን ድማ ተዓጠቓ።¹²ስለዚ ጽቡቕ ሸዓብትን ስለቲ ፈራዪ ኣታኽልቲ ወይንን ኣፍ ልበን ክወቕዓ እየን።¹³ኣብ ምድሪ ህዝበይ፡ እወ፡ ኣብታ ሕጒስቲ ኸተማ ዘሎ ዂሉ ኣባይቲ ደስታ፡ እሾዂን ተዀርባን ክበቁል እዩ።¹⁴ኣዳራሽ ክሕደግ እዩ፡ እታ ሰባ ታእላው ዘይብሉ ኸተማ ኽትጽሙ እያ፡ ዕርድን ግምብን ከኣ ንሓዋሩ በዓትታታን ሓጐስ ኣእዱግ ከደንን መጓስዪ መጋርያታትን ክኸውን እዩ እሞ፡¹⁵መንፈስ ካብ ላዕሊ ኽሳዕ ዝከዓወና ከምዚ ክኸውን እዩ። ሽዑ ነቲ ምድረ በዳ ኸም ፈራዪ ሽዕበት ክኸውን፡ እቲ ፈራዪ ሽዕበት ድማ ከም ዱር ክቑጸር እዩ።¹⁶ሽዑ ቕንዕና ኣብ ምድሪ በዳ ኽሰፍር፡ ጽድቂውን ኣብ ፈራዪ ሽዕበት ክነብር እዩ።¹⁷ግብሪ ጽድቅስ ሰላም፡ ፍረ ጽድቂውን ህድኣትን ደሓንን ንዘለኣለም ክኸውን እዩ።¹⁸ህዝበይ ኣብ ማሕደር ሰላምን ኣብ ኣባይቲ ደሓንን ኣብ ህዱእ ቦታታት ዕረፍትን ክነብር እዩ።¹⁹ግናኸ ዱር ብበረድ ክወድቕ፡ እታ ኸተማውን ኣዝያ ኽትዋረድ እያ።²⁰ኣቱም ኣብ ጥቓ ዂሉ ማያት እትዘርኡን ነእጋር ብዕራይን ኣድግን እትፍንውን፡ ብጹኣን ኢኹም።

ትን. ኢሳይያስ ምዕራፍ 33

   ¹ኣታ እትዘምት እሞ ዘይተዘመትካ፡ ወይለኻ፡ ኣታ እትጠልም እሞ ዘይተጠለምካ፡ ወይለኻ። ምዝማት ምስ ፈጸምካ፡ ክትዝመት ኢኻ። ምጥላም ምስ ወዳእካ፡ ክጠልሙኻ እዮም።²ዎ እግዚኣብሄር ምሓረና፡ ንኣኻ ንጽበ ኣሎና። ኣብ ጸጽባሕ ቅልጽሞም፡ ብግዜ ጸበባ ኸኣ ምድሓንና ኹን።³እቶም ህዝብታት በቲ ህማም ታዕታዕ ይሃድሙ፡ ብምትንሳእካ ኣህዛብ ፋሕ ይብሉ።⁴ኲብኲብታ ኸም ዝእከብ፡ ዘመቴኹም ይእከብ፡ ኣንበጣ ኸም ዝጐዪ ይጐይዎ ኣለው።⁵እግዚኣብሄር ልዑል እዩ፡ ኣብ ላዕሊ ይነብር እዩ እሞ፡ ንጽዮን ብፍርድን ጽድቅን መሊእዋ ኣሎ።⁶ኣብ ዘመናትካ ህድኣትን ብዝሒ ምድሓንን ጥበብን ፍልጠትን ክኸውን እዩ፡ ምፍራህ እግዚኣብሄር ከኣ መዝገቡ እዩ።
   ⁷እንሆ፡ ጀጋኑኦም ኣብ ወጻኢ ይጭድሩ፡ ልኡኻት ሰላም ከኣ ኣምሪሮም ይበኽዩ ኣለው።⁸መገድታት ባደመ፡ ሓላፍ መገዲ ተሳእነ። ኪዳን ጠለመ፡ ከተማታት ነዓቐ፡ ንሰብ ገለ እኳ ኣየቋጽሮን።⁹እታ ሃገር ሓዘነትን ሓስኤትን፡ ሊባኖስ ሓፈረትን ነቐጸትን፡ ሳሮን ከም ምድረ በዳ ዀነት፡ ባሳንን ቀርሜሎስን ድማ ቈጽሉ ረገፈ።¹⁰እግዚኣብሄር ግና፡ ሕጂ ኽትንስእ፡ ሕጂ ኽለዓል፡ ሕጂ ልዕል ክብል እየ፡ ይብል ኣሎ።¹¹ሳዕሪ ትጠንሱ፡ ሓሰር ከኣ ክትወልዱ ኢኹም፡ ትንፋስኩም፡ ዝበልዓኩም ሓዊ እዩ።¹²ህዝብታት ከምቲ ብሓዊ ዝነደደ ኖራ ይነዱ፡ ከምቲ ኣብ ሓዊ ሞዂ ዝብል ቈጥቋጥ እሾዂ ይዀኑ።
   ¹³ኣቱም ኣብ ርሑቕ ዘሎኹም፡ ዝገበርክዎ ስምዑ፡ ኣቱም ቀረባ ዘሎኹም ከኣ፡ ስልጣነይ ፍለጡ።¹⁴ኣብ ጽዮን ዘለው ሓጢኣተኛታት ይስምብዱ ኣለው፡ ንረሲኣን ድማ ራዕዲ ይሕዞም ኣሎ፡ ካባናስ ምስ ዝባላዕ ሓዊ ኽነብር ዝኽእል መን እዩ ካባናኸ ምስ ናይ ዘለኣለም ባርዕ ክነብር ዝኽእል መን እዩ¹⁵እቲ ብጽድቂ ዝመላለስን ቅንዕና ዝዛረብን፡ ረብሓ ምጭቋን ዝንዕቕ፡ መማለዲ ኸይቅበል ድማ ኢዱ ዝንዝንዝ፡ ብናይ ምኽዓው ደም ከይሰምዕ ከኣ ኣእዛኑ ዝውትፍ፡ እከይ ከይርኢውን ኣዒንቱ ዝዕምትሲ፡¹⁶ንሱ ኣብ በረኻ ክነብር፡ ኣኻውሕ እምባታት ከኣ ጸግዑ ከኽውን፡ እንጌራኡ ኽረክብ ማዩውን ንሓዋሩ ኣይክነጽፍን እዩ።
   ¹⁷ኣዒንትኻ ንንጉስ ብጽባቔኡ ኽርእያኦ፡ ርሑቕ ሰፊሕ ሃገር ከኣ ክምልከታ እየን።¹⁸ልብኻ፡ ጸሓፊ ኣበይ ኣሎ መዛኒ ኣበይ ኣሎ ግምብታት ዝቘጸረስ ኣበይ ኣሎ እናበለ ናብቲ ፍርሂ ኽሓስብ እዩ።¹⁹ነቲ ጨካን ህዝቢ፡ ነቲ ዘይስትውዓል ጭንቂ ዝቛንቋኡ፡ ነቲ ዘይስማዕ ወታእ ዝመልሓሱ ህዝቢ ኣይክትርእዮን ኢኻ።²⁰ንጽዮን፡ ነታ ኸተማ በዓላትና፡ ተመልከታ፡ ኣዒንትኻ ንየሩሳሌም፡ ነታ ህድእቲ ማሕደር፡ ዘይትዛናበል ድንኳን፡ መታኽላ ንሓዋሩ ዘይምንቈስ፡ ኣግማዳ ኸኣ ከቶ ዘይብተኽ፡ ክርእያ እየን።²¹ኣብኣውን እግዚኣብሄር፡ በታ ርሒብ ርባታትን ወሓይዝን ኰይኑ፡ ብግርማኡ ምሳና ክኸውን እዩ፡ ብመቕዘፍ እትምራሕ መርከብ ኣይትኣትዋን፡ ዓባይ መርከብ ከኣ ኣይትሓልፋን።²²እግዚኣብሄር ፈራዲና፡ እግዚኣብሄር ሓጋግ ሕግና እዩ፡ እግዚኣብሄር ንጉስና እዩ እሞ፡ ንሱ ኸድሕነና እዩ።²³ኣግማድካ ዘሊቑ፡ ነቲ ደቐል ኣጽኒዑ ኣየትርሮን፡ ነቲ ጋንጽላ ኣይግትሮን። ሽዑ እቲ ዘመተ ናይ ብርቱዕ ምርኮ ይምቀል፡ ሓንካሳት እኳ ምርኮ ይማርኹ።²⁴ካብቶም ኣብኣ ዝነብሩስ ሓደ እኳ፡ ሕማቕ እየ፡ ኣይብልን፡ እቲ ኣብኣ ዝነብር ህዝቢ ኣበሳኡ ተሓዲጉሉ እዩ።

ትን. ኢሳይያስ ምዕራፍ 34

   ^1-2እግዚኣብሄር ኣብ ኲላቶም ኣህዛብ ኰርዩ፡ ኣብ ኲሎም ሰራዊቶም ድማ ተቘጢዑ እዩ እሞ፡ ኣቱም ኣህዛብ፡ ክትሰምዑ ቕረቡ፡ ኣቱም ህዝብታት፡ ጽን በሉ፡ ምድርን መሊእዋ ዘሎን፡ ዓለምን ካብኣ ዝወጽእ ዘበለ ዂሉን ይስማዕ፡ ንጥፍኣት መጥይዎም ንማሕረዲ ኸኣ ወፍይዎም እዩ።³ቅቱላቶም ይድርበዩ፡ ሬሳታቶም ጺእ ይጨኑ፡ ኣኽራን ድማ ብደሞም ይመክኽ።⁴ኲሉ ሰራዊት ሰማይ ይጠፍእ፡ ሰማያት ከኣ ከም ብራና ይጥቕለል፡ ኲሉ ሰራዊቱውን ከምቲ ቘጽሊ ኻብ ተኽሊ ወይኒ፡ ከምቲ ዝጸምለወ ቘጽሊ፡ ካብ ኦም በለስ ዝረግፍ፡ ክረግፍ እዩ።
   ⁵ሴፈይ ኣብ ሰማይ ሰኺሩ እዩ እሞ፡ እንሆ፡ ኣብ ኤዶም፡ ኣብቲ ህዝቢ መርገመይ፡ ንፍርዲ ኽወርድ እዩ።⁶እግዚኣብሄር መስዋእቲ ኣብ ቦጽራ፡ ኣብ ሃገር ኤዶም ድማ ብዙሕ ሕሩድ ክገብር እዩ እሞ፡ ሰይፊ እግዚኣብሄር ብደም ተዓሊሱ፡ ብስብሕን ብደም ገናሽልን ወጣጡን ብስብሒ ዀላሊት ደዓውልን ከኣ ተሰቢሑ ኣሎ።^7-8መዓልቲ ሕነ እግዚኣብሄር፡ ዓመት ምፍዳይ ኢድ ብናይ ነገር ጽዮን እዩ እሞ፡ ምሳታቶም ድማ ጎባያትን ኣረውሕን ዝራብዓትን ይወድቁ፡ ሃገሮም ብደም ይሰክር፡ ሓመዶም ብስብሒ ይስባሕ ኣሎ።
   ⁹ወሓይዝ ናብ ቅጥራን፡ ሓመድ ኸኣ ናብ ዲን ክልወጥ፡ ሃገራውን ነዳዲ ቕጥራን ክኸውን እዩ።¹⁰ምንዳዳ ለይትን መዓልትን ኣይጠፍእን፡ ትካ ንዘለኣለም ይተክኽ፡ እታ ሃገር ንውሉድ ወለዶ ትባድም፡ ንዘለኣለም ሓድ እኳ ኣይሓልፋን።¹¹ኣባጉምባሕን ቅንፍዝን ናቶም ይገብርዋ፡ ጒንጓን ኳዂን ይነብርዋ፡ ናይ ምብራስ ገመድ መስፈርን ናይ ምብዳም ሚዛን መለክዕን ይዝርግሓላ።¹²ካብቶም ንምንጋስ ዝበቕዑ ጭዋታታ ሓደ እኳ የልቦን፡ ኲላቶም መሳፍንታ ኸኣ ምናምን ይዀኑ።¹³እሾዂ ኣብ ኣዳራሻታ፡ ኣምዐን ተዀርባን ከኣ ኣብ ዕርድታታ ይበቁል፡ መሳፍሮ ወኻሩን መውዓል ሰገንን ትኸውን።¹⁴ኣራዊት በረኻን ኣኽላባት መሮርን ኣብኣ ይራኸቡ፡ ኣጋንንቲ ኸኣ ይጻዋውዑ፡ ዛር ለይቲ ድማ ኣብኣ ይነብር፡ ቦታ ዕረፍቲውን ይረኽበላ።¹⁵ተመን ኣብኣ ቤቱ ይገብር፡ እንቋቑሖኡ ድማ የውድቕ፡ ኣንቁሑ ንወለልዱ ኣብ ጽላሉ ይእክቦም፡ ኣብኣውን ኣሞራታት ተኣኪቦም ንሓድሕዶም ይራኸቡ።
   ^16-17ኣብ መጽሓፍ እግዚኣብሄር ድለዩን ኣንብቡን፡ ኣፈይ እዩ ዝእዝዝ፡ መንፈሱ እዩ ዝእክቦም ዘሎ፡ ንሱ እዩ ዕጭ ዘውድቐሎም፡ ኢዱ ኸኣ እያ ብገመድ መለክዒ ንእኣ ዝመቐለትሎም እሞ፡ ንዘለኣለም ክሕዝዋ ንውሉድ ወለዶውን ክነብርዋ እዮም፡ ካብዚኣቶም ሓደ እኳ ኣይክስኣንን እዩ፡ ንብጻዩ ዝስእን የልቦን።

ትን. ኢሳይያስ ምዕራፍ 35

   ¹በረኻን ምድረ ኣጻምእን ክሕጐሱ፡ ምድረ በዳ ኸኣ እልል ክብል፡ ከም ጽጌረዳ ድማ ክዕምብብ እዩ።²ኣጸቢቑ ኽዕምብብ፡ ብሓጐስን ብእልልታን ባህ ክብል፡ ክብሪ ሊባኖስን ጌጽ ቀርሜሎስን ሳሮንን ክወሃቦ እዩ፡ ንኽብሪ እግዚኣብሄርን ንጌጽ ኣምላኽናን ክርእዩ እዮም።³ነተን ዝሰነፉ ኣእዳው ኣበርትዑ፡ ነተን ወለል ዝበላ ኣብራኽ ድማ ኣደልድሉ።⁴ነቶም ፈራህ ዝልቦም፡ ኣጆኹም፡ ኣይትፍርሁ፡ እንሆ፡ ኣምላኽኩም ምስ ሕነን ምስ ናይ ኣምላኽ ምፍዳይ ኢድን ክመጽእ፡ ባዕሉ ኸድሕነኩም ክመጽእ እዩ፡ በልዎም።
   ⁵ሽዑ ኣዒንቲ ዕውራት ክኽፈታ፡ ኣእዛን ጸማማት ከኣ ጋህ ክብላ እየን።⁶ሽዑ ሓንካስ ከም እራብ ክሰርር፡ ልሳን እቲ ዓባስ ከኣ እልል ክብል፡ ማያት ኣብ በረኻ፡ ወሓይዝ ድማ ኣብ ምድረ በዳ ኽፍልፍል እዩ እሞ፡⁷ምድሪ ረመጨትሲ ቐላይ፡ ምድሪ ኣጻምእ ከኣ ዓይኒ ማያት ክኸውን እዩ፡ እቲ ወኻሩ መሳፍሮ ዝገብራኦ ስፍራስ መብቈል ሰትን ሰልሰላን ሻምብቆን ክኸውን እዩ።
   ⁸መገዲ ጽርግያ ኣብኣ ኽትከውን እያ፡ ቅድስቲ መገዲ ኽትበሃል እያ፡ ርኹስ ዘበለ ኣይክሓልፋን እዩ፡ ንኣታቶም ጥራይ እያ፡ እቲ ብእኣ ዝኸይድ፡ ዓሻ እኳ እንተ ዀነ፡ ኣይክጋገን፡ እዩ።⁹ኣንበሳ ኣብኣ ኣይክህሉን፡ ግርጉር ኣራዊት ኣይክድይባን፡ ኣብኣውን ኣይክርከብን እዩ፡ ድሑናት ደኣ ይመላለሱላ።¹⁰እቶም እግዚኣብሄር እተበጀዎም ክምለሱ፡ እልል እናበሉ ናብ ጽዮን ክመጹ እዮም፡ ዘለኣለማዊ ሓጐስ ከኣ ርእሶም ክኸልል እዩ፡ ደስታን ሓጐስን ክረኽቡ እዮም፡ ጓህን እህህታን ክሃድም እዩ።

ትን. ኢሳይያስ ምዕራፍ 36

   ¹ኰነ ድማ፡ ኣብ መበል ዓሰርተው ኣርባዕተ ዓመቱ ንንጉስ ህዝቅያስ፡ ሰናክሬብ ንጉስ ኣሶር ናብተን ዕሩዳት ከተማታት ይሁዳ ዂላተን ደዪቡ ሓዘን።²ንጉስ ኣሶር ከኣ ናብ ንጉስ ህዝቅያስ ካብ ላኪሽ ናብ የሩሳሌም ንረብሳቁ ብዙሕ ሰራዊት ኣትሒዙ ለኣኾ፡ ንሱውን ኣብ ጥቓ እቲ ላዕላይ ሓጽቢ መስኖ፡ ብመገዲ ግራት መስተይ ቀለም ደው በለ።³ሽዑ ኤልያቂም፡ ወዲ ህልቅያ እቲ ኣዛዝ ቤትን ሸብና እቲ ጸሓፍን ዮኣህ ወዲ ኣሳፍ፡ እቲ ጸሓፍ ክብረ ነገስትን ናብኡ ወጹ።
   ⁴ረብሳቄ ኸኣ በሎም፡ ንህዝቅያስ በል፡ እቲ ዓብዪ ንጉስ፡ ንጉስ ኣሶር፡ ከምዚ ይብል ኣሎ፡ እዛ እትውከላ ዘሎኻ ትውክልቲ እንታይ እያ⁵ንውግእስ ምኽርን ዓቕምን ኣሎኒ፡ ምባልካ ቓል ከናፍር ጥራይ እዩ፡ እብለካ ኣሎኹ፡ ካባይ እትሽፍትሲ ኣብ መን ተወኪልካ ኢኻ⁶እንሆ፡ በቲ ስቡር ምርኩስ ሻምብቆ፡ ብግብጺ፡ ትውከል ኣሎኻ። ሰብ እንተ ተመርኰሶ፡ ኣብ ኢዱ ይኣቱ እሞ የንኲሎ። ፈረኦን ንጉስ ግብጺ ኸኣ ነቶም ዝውከልዎ ዂሎም ከምኡ እዩ።⁷ንሕናስ ብእግዚኣብሄር ኣምላኽና ኢና እንውከል፡ እንተ በልካኒ፡ ንሱዶ ኣይኰነን፡ ህዝቅያስ ንይሁዳን ንየሩሳሌምን፡ ኣብ ቅድሚ እዚ መሰውኢ እዚ ስገዱ፡ እናበለ ንዀረቢቱን መሰውኢታቱን ዘፍረሰሉ⁸እስከ እጂ ምስ ጐይታይ፡ ምስ ንጉስ ኣሶር፡ ተዋራረድ፡ ንስኻ ዝቕመጥዎም ፈረሰኛታት ክትረክብ እንተ ኽኢልካ፡ ኣነ ኽልተ ሽሕ ፈረስ ክህበካ እየ።⁹ከመይ ጌርካኸ ንሓደ ፊተውራሪ ናይቶም ናእሽቱ ሓሸክር ጐይታይ፡ ገጽ ንድሕሪት ክትመልስ ትኽእል ግናኸ ብናይ ግብጺ ሰረገላታትን ፈረሰኛታትን ተወኪልካ ኣሎኻ።¹⁰ሕጂኸ ብዘይ ፍቓድ እግዚኣብሄር ድዩ ነዛ ሃገር ከጥፍኣ ዝደየብኩ እግዚኣብሄር እዩ፡ ናብዛ ሃገር ደይብካ ኣጥፍኣያ፡ ዝበለኒ።
   ¹¹ሽዑ ኤልያቂምን ሸብናን ዮኣህን ንረብሳቄ፡ ቋንቋ ሶርያ ንፈልጦ ኢና እሞ፡ ንባሮትካ ዀታ ብእኡ ተዛረበና፡ ግናኸ ኣብ ቅድሚ እቶም ኣብ ቀጽሪ ዘለው ህዝቢ ብዘረባ ይሁዳ ኣይትዛረበና፡ በልዎ።¹²ረብሳቄ ግና፡ ጐይታይሲ እዘን ቃላት እዜኤን ክዛረብ ናብ ጐይታኻን ናባኻን ድዩ ዝለኣኸኒ ናብቶም ውጽኣቶም ክበልዑን ሽንቶም ክሰትዩን ምሳኻትኩም ኣብ ቀጽሪ ተቐሚጦም ዘለው ሰብኡትዶ ግዳ ኣይኰነን ዝለኣኸኒ በለ።
   ¹³ድሕርዚ ረብሳቄ ደው በለ እሞ ዓው ኢሉ ብዘረባ ይሁዳ ጨደረ በለውን፡ ዘረባ እቲ ዓብዪ ንጉስ፡ ንጉስ ኣሶር፡ ስምዑ፡¹⁴እቲ ንጉስ ከምዚ ይብል፡ ህዝቅያስ ከናግፈኩም ኣይኽእልን እዩ እሞ፡ ኣይጠብርኩም።¹⁵ህዝቅያስ፡ እግዚኣብሄር ብርግጽ ከናግፈና እዩ፡ እዛ ኸተማውን ኣብ ኢድ ንጉስ ኣሶር ኣይክትወሃብን እያ፡ እናበለ ኣብ እግዚኣብሄር ኣየወከልኩም።^16-17ንጉስ ኣሶር፡ ኣነ ኽሳዕ ዝመጽእ እሞ ናብ ምድርኹም ዝመስል፡ ምድሪ እኽልን ወይንን ምድሪ እንጌራን ኣታኽልቲ ዘቢብን ክሳዕ ዘብጽሓኩም፡ ምሳይ ተዓረቑ፡ ናባይ ውጹ፡ ንፍሲ ወከፍኩም ካብ ተኽሊ ወይኑ፡ ነፍሲ ወከፍኩምውን ካብ ኦም በለሱ ይብላዕ፡ ነፍሲ ወከፍኩም ማይ ዔላኡ ይስተ፡ ይብል ኣሎ እሞ፡ ንህዝቅያስ ኣይትስምዕዎ።¹⁸ህዝቅያስ፡ እግዚኣብሄር ከናግፈና እዩ፡ ኢሉ ኣይሕበልኩም። ሓደ ኻብቶም ኣማልኽቲ ኣህዛብሲ ንሃገሩ ኻብ ኢድ ንጉስ ኣሶር ዘናገፋዶ ኣሎ¹⁹ኣማልኽቲ ሃማትን ኣርጳድን ኣበይ ኣለው ኣማልኽቲ ሰፈርዋይም ኣበይ ኣለው ንሰማርያስ ካብ ኢደይዶ ኣናጊፎምዋ እዮም²⁰ካብ ኲሎም ኣማልኽቲ እዘን ሃገራት እዚኤን ንሃገሩ ኻብ ኢደይ ዘናገፈ ኣየናይ እዩ እግዚኣብሄርከ ንየሩሳሌምዶ ኻብ ኢደይ መናገፋ²¹ንሳቶም ግና ኣጽቀጡ፡ እቲ ንጉስ፡ ኣይትምለሱሉ፡ ኢሉ ኣዚዝዎም ነበረ እሞ፡ ሓንቲ ቓል እኳ ኣይመለሱሉን።²²ድሕርዚ ኤልያቂም፡ ወዲ ህልቅያ እቲ ኣዛዝ ቤትን ሸብና እቲ ጸሓፍን ዮኣህ ወዲ ኣሳፍ፡ እቲ ጸሓፍ ክብረ ነገስትን ክዳውንቶም ቀዲዶም ናብ ህዝቅያስ ኣተው፡ ቃላት ረብሳቄ ኸኣ ነገርዎ።

ትን. ኢሳይያስ ምዕራፍ 37

   ¹ኰነ ድማ፡ ንጉስ ህዝቅያስ እዚ ምስ ሰምዐ፡ ክዳውንቱ ቐደደ፡ ከሊ ተኸዲኑ ናብ ቤት እግዚኣብሄር ኣተወ።²ንኤልያቂም፡ ነቲ ኣዛዝ ቤትን ንሸብና እቲ ጸሓፍን ነቶም ሽማግሌታት ካህናትን፡ ከሊ ብኽዱናቶም፡ ናብ ነብዪ ኢሳይያስ ወዲ ኣሞጽ ለኣኾም።³ንሳቶም ከኣ በልዎ፡ ህዝቅያስ ከምዚ ይብል፡ ውሉድ ክውለዱ ቐሪቦም ኣለው፡ ንምውላድ ግና ሓይሊ ተሳኢኑ እዩ እሞ፡ እዛ መዓልቲ እዚኣ መዓልቲ ጸበባን ዘለፋን ጸርፍን እያ።⁴ምናልባሽ እግዚኣብሄር ኣምላኽካ ነተን ቃላት ናይቲ ንህያው ኣምላኽ ክጸርፍ ኢሉ ጐይታኡ፡ ንጉስ ኣሶር፡ ዝለኣኾ ረብሳቄ ሰሚዑ ይህሉ፡ ስለ እዘን እግዚኣብሄር ኣምላኽካ ዝሰምዐን ቃላት ከኣ ክቐጽዖ እዩ። ስለዚ ነቲ ተሪፉ ዘሎ ተረፍሲ ጸሎት ኣዕርግ።
   ⁵እቶም ኣገልገልቲ ንጉስ ህዝቅያስ ከኣ ናብ ኢሳይያስ መጹ።⁶ኢሳይያስ ድማ በሎም፡ ንጐይታኹም ከምዚ በልዎ፡ እግዚኣብሄር ከምዚ ይብል፡ በተን ሓሽከር ንጉስ ኣሶር ንኣይ ዝጸረፉለን ንስኻውን ዝሰማዕካየን ቃላት ኣይትፍራህ።⁷እንሆ፡ ኣነ መንፈስ ክሰደሉ እየ፡ ወረ ሰሚዑ ኸኣ ናብ ሃገሩ ኽምለስ እዩ፡ ኣብ ሃገሩውን ብሰይፊ ኸውድቖ እየ።
   ⁸ሽዑ ረብሳቄ ተመልሰ፡ ንጉስ ኣሶር ካብላኪሽ ከም ዝነቐለ ሰሚዑ ነበረ እሞ፡ ንሊብና ኽዋግኣ ኸሎ ረኸቦ።⁹ብዛዕባ ቲርሃቃ ንጉስ ኢትዮጵያ፡ ክዋግኣካ ወጺኡ ኣሎ፡ ዝብል ወረ ሰምዐ። እዚ ምስ ሰምዐ ኸኣ፡ ከምዚ ዝብሉ ልኡኻት ናብ ህዝቅያስ ለኣኸ፡¹⁰ንህዝቅያስ ንጉስ ይሁዳ ከምዚ በልዎ፡ እቲ እትውከሎ ዘሎኻ ኣምላኽካ፡ የሩሳሌም ናብ ኢድ ንጉስ ኣሶር ኣይክትውሃብን እያ ብምባሉ ኣየስሕትካ።¹¹እንሆ፡ ነገስታት ኣሶር ንዂለን ሃገራት ዝገበርወን ሰሚዕካ ኣሎኻ፡ ንብዘለዋ ኣጥፊኦምወን እዮም እሞ ንስኻ ዲኻ እትናገፍ¹²ነቶማ ኣቦታተይ ዘጥፍእዎም ኣህዛብ፡ እኒጎዛንን ሃራንን ሬጽፍን እቶም ኣብ ቴላሳር ዝነበሩ ደቂ ኤደንን፡ ኣማልኽቶምንዶ ኣናጊፎምዎም እዮም¹³ንጉስ ሃማትን ንጉስ ኣርጳድን ንጉስ ከተማ ሰፈርዋይምን ናይ ሃናእን ናይ ኢዋህን ኣበይ ኣለው¹⁴ህዝቅያስ ከኣ ነታ ደብዳበ ኻብ ኢድ እቶም ልኡኻት ተቐቢሉ ኣንበባ፡ ህዝቅያስ ድማ ናብ ቤት እግዚኣብሄር ደየበ፡ ኣብ ቅድሚ እግዚኣብሄር ዘርግሓ።¹⁵ህዝቅያስ ከኣ ከምዚ ኢሉ ናብ እግዚኣብሄር ጸለየ፡¹⁶ዎ እግዚኣብሄር፡ ጐይታ ሰራዊት ኣምላኽ እስራኤል፡ ኣብ ኪሩቤል ተቐሚጥካ ዘሎኻ፡ ኣምላኽ ኲለን መንግስትታት ምድሪ ንስኻ በይንኻ ኢኻ፡ ንስኻ ኢኻ ሰማይን ምድርን ዝገበርካ።¹⁷ዎ እግዚኣብሄር፡ እዝንኻ ጽሎ እሞ ስማዕ፡ ዎ እግዚኣብሄር፡ ኣዒንትኻ ኽፈት እሞ ርእ፡ ነተን ንህያው ኣምላኽ ክጸርፍ ኢሉ ዝለኣኸን ኲለን ቃላት ሰናክሬብ ስማዕ።¹⁸ዎ እግዚኣብሄር፡ እቶም ነገስታት ኣሶር ንዂለን ሃገራትን ምድሮምን ከም ዘዕነውስ፡ ሓቂ እዩ።¹⁹ንኣማልኽቶም ድማ ናብ ሓዊ ደርብይዎም፡ ስራሕ ኢድ ሰብ፡ ዕጭን እምንን እዮም እምበር፡ ኣማልኽቲ ኣይኰኑን፡ ስለዚ ኣጥፍእዎም።²⁰ሕጂ ግና፡ ዎ እግዚኣብሄር ኣምላኽና፡ ኲለን መንግስትታት ምድሪ ንስኻ በይንኻ እግዚኣብሄር ምዃንካ ምእንቲ ኽፈልጣ፡ ካብ ኢዱ ኣድሕነና።
   ²¹ሽዑ ኢሳይያስ ወዲ ኣሞጽ ናብ ህዝቅያስ ከምዚ ኢሉ ለኣኸ፡ እግዚኣብሄር፡ ኣምላኽ እስራኤል፡ ከምዚ ይብል ኣሎ፡ ነቲ ብናይ ሰናክሬብ ንጉስ ኣሶር ዝለመንካኒ፡²²እግዚኣብሄር ብዛዕባኡ ዝብሎ ቓል እዚ እዩ፡
   እታ ድንግል ጓል ጽዮን ትንዕቀካን ተላግጸልካን ኣላ፡ ጓል የሩሳሌም ብድሕሬኻ ርእሳ ትንቕንቐልካ ኣላ።²³ንመን ኣባጮኻን ጸረፍካን ድምጽኻኸ ኣብ ልዕሊ መን ኣልዓልካ በዒንትኻስ ንመን ኣፋጠጥካሉ ኣብ ልዕሊ እቲ ናይ እስራኤል ቅዱስ ኢኻ።²⁴ብሓሸክርካ ጌርካ ንእግዚኣብሄር ከምዚ ኢልካ ጸረፍካዮ፡ ብብዝሒ ሰረገላታተይ ናብ ርእሲ ኣኽራን፡ ኣብ ዓቐበት ሊባኖስ ደይበ፡ ነቲ ጸጽቡቕ ኣጽሕዱን ነነዋሕቲ ኣእዋሙን ክቘርጾ እየ፡ ናብቲ ላዕላይ ጫፍን ናብቲ ዕሙር ዱሩን ክበጽሕ እየ።²⁵ኲዒተ ማይ ሰቴኹ፡ ብኸብዲ ኣእጋረይ ንዂሉ ርባታት ግብጺ ኸንጽፎ እየ።²⁶ነዚ ኻብ ቀደም ከም ዘዳሎኽዎ፡ ካብ ጥንቲ ኸኣ ከም ዝደኰንክዎ፡ ኣይሰማዕካን ዲኻ ሕጂውን ክፍጽሞ እየ፡ ንስኻ ነተን ዕሩዳት ከተማታት ኣፍሪስካ ኲምራ ዖናታት ክትገብረን ኢኻ።²⁷እቶም ኣብእን ዝነብሩ ሰነፋን ሰምበዱን ሓፈሩን፡ ከም ሳዕሪ መሮርን ከም ልሙዕ ቈጽልን ከም ሳዕሪ ናሕስን ከምቲ ኸይበቘለ ዝሃጕጒ ዘርእን ኰነ።²⁸ኣነ ግና ምቕማጥካን ምውጻእካን ምእታውካን ኣብ ልዕለይ ምንዳርካን እፈልጥ ኣሎኹ።²⁹ኣብ ልዕለይ ስለ ዝነደርካ ድፍረትካውን ኣብ ኣእዛነይ ስለ ዝበጽሐ፡ ስለዚ ኣብ ኣፍንጫኻ ሳንቀይ፡ ኣብ ኣፍካ ድማ ልጓመይ ክገብር እየ፡ በታ ዝመጻእካላ መገዲውን ክመልሰካ እየ።
   ³⁰እዚ ኸኣ ምልክት ይኹነልካ፡ ሎምዘመን ካብቲ ባዕሉ ዝበቘለ ቐሪም፡ ንዓመታ ኸኣ ባልጋ ኽትበልዑ ኢኹም፡ ኣብታ ሳልሰይቲ ዓመት ድማ ክትዘርኡን ክትዓጽዱን ኣታኽልቲ ወይኒ ኽትተኽሉን ኢኹም እሞ ፍሪኡ ኽትበልዑ ኢኹም።^31-32ተረፍ ካብ የሩሳሌም፡ እቶም ድሑናት ከኣ ካብ ከረን ጽዮን ክወጹ እዮም እሞ፡ እቲ ኻብ ቤት ይሁዳ ዝደሓነ ተረፍ ከም ብሓድሽ ንታሕቲ ሱር ክሰድድ፡ ኣብ ላዕሊ ድማ ፍረ ኽፈሪ እዩ። ቅንኣት እግዚኣብሄር ጐይታ ሰራዊት እዚ ኽገብር እዩ።³³ስለዚ ብዛዕባ ንጉስ ኣሶርሲ እግዚኣብሄር ከምዚ ይብል፡ ኣብዛ ኸተማ እዚኣ ኣይክኣቱን፡ ፍላጻ ኸኣ ኣይክውርውረላን፡ ብዋልታ መኪቱ ኣይክቐርባን፡ ብቐጽሪውን ኣይክኸባን እዩ።^34-35ምእንቲ ርእሰይን ምእንቲ ዳዊት ባርያይን ኢለ ነዛ ኸተማ እዚኣ ኸድሕናስ ክከላኸለላ እየ እሞ፡ በታ ዝመጸላ መገዲ ኽምለስ፡ ናብዛ ኸተማ እዚኣውን ኣይክኣቱን እዩ፡ ይብል እግዚኣብሄር።
   ³⁶መልኣኽ እግዚኣብሄር ወጺኡ ኣብ ሰፈር ኣሶራውያን ሚእትን ሰማይናይ ሓሙሽተን ሽሕ ሰብኣይ ወቕዐ። ንጽብሒቱ ኣንጊሆም ምስ ተንስኡ፡ እንሆ፡ ኣብ ኲሉ ስፍራ ሬሳታት ጸንሕዎም።³⁷ሰናክሬብ ንጉስ ኣሶር ድማ ነቒሉ ኸደ፡ ናብ ነነዌ ተመሊሱ ኸኣ ተቐመጠ።³⁸ኰነ ድማ፡ ኣብ ቤት ኒስሮክ ኣምላኹ ኽሰግድ ከሎ፡ ደቁ ኣድረሜሌክን ሳሬጽን ብሰይፊ ቐተልዎ፡ ናብ ምድሪ ኣራራት ከኣ ሃደሙ፡ ኤሳር ሃዶን ወዱ ድማ ኣብ ክንዳኡ ነገሰ።

ትን. ኢሳይያስ ምዕራፍ 38

   ¹በቲ ዘመን እቲ ህዝቅያስ ንሞት ክሳዕ ዝዋላእ ሓመመ። ነብዪ ኢሳይያስ ወዲ ኣሞጽ ከኣ ናብኡ መጺኡ፡ እግዚኣብሄር ከምዚ ይብል ኣሎ፡ ክትመውት ኢኻ እምበር፡ ኣይክትሓውን ኢኻ እሞ፡ ብናይ ሓዳርካ ተላቦ፡ በሎ።^2-3ሽዑ ህዝቅያስ ገጹ ናብ መንደቕ መሊሱ፡ ዎ እግዚኣብሄር፡ ዑቑባኻ፡ ብሓቅን ብፍጹም ልብን ኣብ ቅድሚ ገጽካ ኸም እተመላለስኩን፡ ኣብ ቅድሚ ኣዒንትኻ ሰናይ ከም ዝገበርኩን ዘክር፡ ኢሉ ናብ እግዚኣብሄር ጸለየ። ህዝቅያስ ድማ መሪር ብኽያት በኸየ።⁴ሽዑ ኸምዚ ዝብል ቃል እግዚኣብሄር ናብ ኢሳይያስ መጸ፡⁵ኪድ እሞ ንህዝቅያስ ንገሮ፡ እግዚኣብሄር፡ ኣምላኽ ዳዊት ኣቦኻ፡ ጸሎትካ ሰሚዐ፡ ንብዓትካ ርእየ፡ እንሆ፡ ኣብ ዕድሜኻ ዓሰርተው ሓሙሽተ ዓመት ክውስኸልካ እየ።⁶ንኣኻን ነዛ ኸተማ እዚኣን ካብ ኢድ ንጉስ ኣሶር ከናግፈኩም እየ፡ ነዛ ኸተማውን ክከላኸለላ እየ፡ ይብል ኣሎ።⁷እግዚኣብሄር ነዚ ዝበሎ ቓል ከም ዝፍጽሞ፡ እዚ ኻብ እግዚኣብሄር ምልክት ይዂንካ፡⁸እንሆ፡ ነቲ ብምኽንያት ጸሓይ ኣብታ ናይ ኣካዝ መድረኽ ዝወረደ ጽላሎት መድረኽሲ ዓሰርተ መድረኽ ንድሕሪት ኣቢለ ኽመልሶ እየ። ጸሓይ ከኣ በቲ ዝወረደቶ መድረኽ ዓሰርተ መድረኽ ንድሕሪት ኣቢላ ተመልሰት።
   ⁹ህዝቅያስ ንጉስ ይሁዳ፡ ሓሚሙ ነይሩ ምስ ሓወየ፡ ዝጸሓፎ ጽሕፈት፡
   ¹⁰ኣነስ፡ ኣብቲ ጣዕሚ ዕድመይ ከሎኹ፡ ናብ ደጌታት ሲኦል እኸይድ፡ ነተን ዝተረፋ ዓመታተይ እስእነን ኣሎኹ፡ በልኩ።¹¹ደጊም ንእግዚኣብሄር፡ ኣብ ምድሪ ህያዋን ንእግዚኣብሄር ኣይክርእዮን እየ፡ ምስቶም ኣብ ሲኦል ዘለው ሰብ ኰይነ፡ መሊሰ ሰብ ኣይክርእን እየ፡ በልኩ።¹²ማሕደረይ ፈረሰት፡ ከም ድንኳን ጓሳ ኸኣ ካባይ ጐዓዘት፡ ንህይወተይ ከም ኣላማይ ጠቕሊለያ ኣሎኹ፡ ንሱውን ካብ መዋጥር ክቘርጸኒ እዩ፡ ምድሪ ኸይመሰየ ትጥርሰኒ።¹³ክሳዕ ዝወግሕ ሃዳእኩ፡ ንሱ ግና ከም ኣንበሳ ንዂሉ ዓጻጽምተይ ሰባበሮ። ምድሪ ኸይመሰየ ትጥርሰኒ።¹⁴ከም ለዃዂቶ፡ ከም ራዛ ጭቑጭቑ በልኩ፡ ከም ርግቢ ቘዘምኩ፡ ኣዒንተይ ላዕሊ ብምጥማት ተሓለላ፡ ዎ እግዚኣብሄር፡ እጭነቕ ኣሎኹ፡ ዋሕሰይ ኩን።
   ¹⁵እንታይ እሞ ኽብል ንሱ ተዛሪቡኒ ኣሎ፡ ንሱ ኸኣ ገበሮ። ብዛዕባ ምረት ነፍሰይ ብዂለን ዓመታተይ ብህድኣት ክመላለስ እየ።¹⁶ዎ እግዚኣብሄር፡ ሰብ በዚ ኸምዚ እዩ ብህይወት ዝነብር፡ ህይወት መንፈሰይ ከኣ በዚ ዂሉ እዩ። እምበኣርሲ ኣሕውየኒ ህይወትውን ምለሰለይ።¹⁷እንሆ፡ እዚ ዓብዪ ምረት ንሰላመይ ኰነ፡ ንስኻ ንዂሉ ሓጢኣተይ ናብ ድሕሪ ዝባንካ ደርቢኻዮ ኢኻ እሞ፡ ንነፍሰይ ኣፍቂርካ ኻብ ጒድጓድ ጥፍኣት ኣናገፍካያ።¹⁸ሲኦል ኣየመስግነካን፡ ሞት ኣይውድሰካን፡ እቶም ናብ ጒድጓድ ዝወርዱ ብሓቅኻ ተስፋ ኣይገብሩን እዮም እሞ፡¹⁹እቲ ህያው፡ እቲ ህያው፡ ከምዚ ኣነ ሎሚ ዝገብሮ ዘሎኹ፡ የመስግነካ፡ ኣቦ ንውሉዱ ሓቅኻ ኸፍልጦም እዩ።²⁰እግዚኣብሄር እዩ ዘድሓነኒ፡ ስለዚ ብመዓልትታት ህይወትና ዂሉ ኣብ ቤት ኣብ ቤት እግዚኣብሄር ንመዛሙረይ ብመሰንቆ ኽንዝምሮ ኢና።
   ²¹ኢሳይያስ ግና፡ ጽባጥ በለስ ገይሮም፡ ነቲ ዝሓበጠ ይለብጥዎ እሞ ክሓዊ እዩ፡ ኢሉ ነበረ።²²ህዝቅያስ ድማ፡ ናብ ቤት እግዚኣብሄር ክድይብሲ ምልክቱ እንታይ እዩ በለ።

ትን. ኢሳይያስ ምዕራፍ 39

   ¹በታ ግዜ እቲኣ መሮዳክ በላዳን፡ ወዲ በላዳን ንጉስ ባቢሎን፡ ህዝቅያስ ሓሚሙ ኸም ዝሓወየ ሰሚዑ ነበረ እሞ፡ ደብዳበን ገጽ በረኸትን ሰደደሉ።²ህዝቅያስ ድማ ብኣታቶም ተሓጐሰ እሞ ነቲ ቤት መዝገቡ፡ ንብሩርን ወርቅን ቅዲትን ነቲ ኽቡር ዘይትታትን ንዂሉ ቤት መሳርያኡን ነቲ ኣብ መዝገቡ ዝጸንሐ ዂሉን ኣርኣዮም። ኣብ ቤቱን ኣብ መንግስቱን ዂሉን ህዝቅያስ ዘየርኣዮም ሓንቲ እኳ ኣይተረፈትን።
   ³ሽዑ ነብዪ ኢሳይያስ ናብ ንጉስ ህዝቅያስ መጺኡ፡ እዞም ሰባት እንታይ በሉ ካበይከ ናባኻ መጹ በሎ። ህዝቅያስ ድማ፡ ካብ ርሑቕ ሃገር፡ ካብ ባቢሎን ናባይ ዝመጹ እዮም፡ በለ።⁴ንሱ ኸኣ፡ ኣብ ቤትካኸ እንታይ ረኣዩ ኢሉ ሓተተ። ህዝቅያስ ድማ፡ ኣብ ቤተይ ዘሎ ዂሉ ርእዮም፡ ካብቲ ኣብ መዛግበይ ዘሎ ዂሉ ሓንቲ እኳ ዘየርእኽዎም የልቦን፡ ኢሉ መለሰ።
   ⁵ሽዑ ኢሳይያስ ንህዝቅያስ በሎ፡ ንቓል እግዚኣብሄር ጐይታ ሰራዊት ስምዓዮ፡⁶እንሆ፡ ነቲ ኣቦታትካ ኽሳዕ ሎሚ ዝኣከብዎ ኣብ ቤትካ ዘሎ ዂሉ፡ ሓንቲ እኳ ኸይተረፈት፡ ናብ ባቢሎን ዝወስዱለን መዓልትታት ክመጻ እየን፡ ይብል እግዚኣብሄር።⁷ነቶም ካባኻ ዝወጹ እትወልዶም ኣወዳትካ ኸኣ ክወስድዎም እዮም እሞ፡ ኣብ ኣዳራሽ ንጉስ ባቢሎን ውሽጠ ሓሽከር ክዀኑ እዮም።⁸ህዝቅያስ ከኣ ንኢሳይያስ፡ እቲ እተዛረብካዮ ቓል እግዚኣብሄር ጽቡቕ እዩ፡ በሎ። ደጊሙ ኸኣ፡ ብዘመነይሲ ሰላምን ደሓንን ደኣ ይኸውን፡ በለ።

ትን. ኢሳይያስ ምዕራፍ 40

   ¹ንህዝበይ ኣጸናንዑ፡ ኣጸናንዑ፡ ይብል ኣምላኽኩም።²ንልቢ የሩሳሌም ተዛረቡ፡ ጸበባኣ ኸም እተፈጸመ፡ ኣበሳኣ ኸም እተሓድገላ፡ ስለ ዂሉ ሓጢኣታ ድማ ካብ ኢድ እግዚኣብሄር ካዕበት ከም ዝረኸበት ኣውጁ።
   ³ድምጺ ኣዋጂ ይኣውጅ፡ መገዲ እግዚኣብሄር ኣብ በረኻ ኣዳልው፡ ኣብ ምድሪ ኣጻምእ ከኣ ንኣምላኽና ጽርግያ ኣቕንዑ።⁴ሽንጭሮ ዘበለ ልዕል ይበል፡ ኲሉ ኣኽራንን በረኽትን ድማ ለጠቕ ይበል፡ ቄናን ይቕናዕ ድንጒር ከኣ ሰጥ ዝበለ ስፍራ ይኹን።⁵ኣፍ እግዚኣብሄር ተዛሪቡ እዩ እሞ፡ ክብሪ እግዚኣብሄር ክግለጽ፡ ኲሉ ስጋ ኸኣ ሓቢሩ ኽርእዮ እዩ።⁶ድምጺ፡ ኣውጅ፡ ይብል። ሓደ ኸኣ፡ እንታይ ኢለ ኽእውጅ በለ። ስጋ ዘበለ ዂሉ ሳዕሪ እዩ፡ ኲሉ ኽብሩ ኸኣ ከም ዕምባባ መሮር እዩ።⁷ትንፋስ እግዚኣብሄር ነፊስዎ እዩ እሞ፡ ሳዕሪ ይነቅጽ፡ ዕምባባ ይቕምስል። ብሓቂ እቲ ህዝቢ ሳዕሪ እዩ።⁸ሳዕሪ ይነቅጽ፡ ዕምባባ ይቕምስል፡ ቃል ኣምላኽና ግና ንዘለኣለም ይነብር።
   ⁹ኣቲ ብስራት እተበስሪ ጽዮን፡ ናብ ነዊሕ ከረን ደይቢ፡ ኣቲ ብስራት እተበስሪ የሩሳሌም፡ ድምጽኺ ብሓይሊ ዓው ኣብሊ፡ ብዘይ ፍርሃት ዓው በሊ፡ ንኸተማታት ይሁዳ፡ እንሆ ኣምላኽኩም፡ ኢልኪ ንገሪ።¹⁰እንሆ፡ እግዚኣብሄር ኣምላኽ ብሓይሊ ይመጽእ፡ ብቕልጽሙ ድማ ይገዝእ። እንሆ፡ ዓስቡ ምስኡ ኣሎ፡ ካሕሳኡ ኸኣ ቀቅድሚኡ ይኸይድ።¹¹ንመጓሲኡ ኸም ጓሳ ኸውፍር፡ ንዕያውቱ ኣብ ቅልጽሙ ኽእክብ ኣብ ሕቑፉ ኸኣ ክስከሞም፡ ነተን ዘጥብዋ ድማ ብህድኣት ክመርሐን እዩ።
   ¹²ንማያት ብኢዱ ዓሚኹ ዘሰፈረ፡ ንሰማያት ከኣ በጻብዑ ዝሰደረ መን እዩ ንሓመድ ምድሪ ኣብ ሚዛን ዝኣከበ፡ ነኽራን ብሚዛን፡ ንዀረቢት ድማ ብነጥሪ ዝመዘነኸ መን እዩ¹³ንመንፈስ እግዚኣብሄር ዝመርመረ፡ ወይስ መኻሪኡ ዀይኑ ዝመሃሮኸ መን እዩ¹⁴ምስ መን ተማኸረ ኣእምሮ ዝሃቦ፡ እቲ ቅኑዕ መገዲ ኸኣ ዝመሃሮ፡ ፍልጠት ዘፍለጦ፡ መገዲ ምስትውዓል ድማ ዘርኣዮኸ መን እዩ¹⁵እንሆ፡ ኣህዛብ ከም ሓንቲ ነጥቢ ኣብ ዕትሮ፡ ከም ሓንቲ በሰር ኣብ ሚዛን ይቑጾሩ፡ እንሆ፡ ንደሴታት ከም ተጐጓ የልዕል።¹⁶ሊባኖስ ንምንዳድ ኣይኣክልን፡ እንስሳኡውን ንመስዋእቲ ምሕራር ኣይኣክልን።¹⁷ኲሎም ኣህዛብ ኣብ ቅድሚኡ ኸም ሓደ ግዛዕ ኣይረኣዩን፡ ሓንቲ ኸም ዘይልቦ፡ ከም ከንቱነት ገይሩ ይቘጽሮም።¹⁸እምበኣርሲ ንኣምላኽ ምስ መን ተማሳስልዎ ምስ ኣየናይ መልክዕከ ኸተመዓራርይዎ ኢኹም¹⁹ገባር ምስሊ ፍሲ ገይሩ ጣኦት ይገብር፡ ኣምካኺ ድማ ብወርቂ ይልብጦ፡ ብሰንሰለት ብሩር ከኣ ይስልሞ።²⁰እቲ ኽሳዕ ክንድዚ ኽስውእ ዓቕሚ ዘይብሉ ድኻስ ዘይቁንቁን ዕጨይቲ ይሓሪ፡ ዘይነቓነቕ ምስሊ ዝገብረሉ ኸኣሊ ድማ ይደሊ።²¹ኣእምሮ የብልኩምን እኳዶ ኣይትሰምዑን ኢኹም ካብ ጥንቲዶ እዚ ኣይተዘንተወልኩምን መሰረታት ምድሪ ዝነግርዎዶኸ ኣየስተውዓልኩምን ኢኹም²²ንሱ እዩ ኣብ ልዕሊ እታ ኸባብ ምድሪ ዝቕመጥ፡ እቶም ኣብኣ ዝነብሩ ኸኣ ከም ኣንበጣ እዮም፡ ንሰማያት ከም ጋንጽላ ዘስጥሖ፡ መሕደሪ ክኸውን ድማ ከም ድንኳን ዝገብሮ ንሱ እዩ።²³ንመሳፍንቲ ገለ እኳ ኸም ዘይኰኑ፡ ንፈራዶ ምድሪ ኸም ምናምን ዝገብሮም ንሱ እዩ።²⁴ብኡብኡ ሱር ኣብ ምድሪ ምስ ሰደዱ፡ ንሱ ኡፍ ይብለሎም እሞ ይነቕጹ፡ ዘራጊቶ ኸኣ ከም ብቑቡቑ ይወስዶም።²⁵ክመዓራረዮስ፡ ምስ መን ከተማሳስሉኒ ኢኹም ይብል እቲ ቅዱስ።²⁶ኣዒንትኹም ናብ ላዕሊ ቋሕ ኣቢልኩም ርኣዩ፡ ነዚ ዝፈጠሮ መን እዩ እቲ ንሰራዊቶም ብፍቕዲ ዘውጽኦ፡ በብስሞም ዝጽውዖም እዩ፡ ካብ ዕቤት ምልኩን ካብ ብርትዐ ሓይሉን እተላዕለ ሓደ እኳ ኣይተርፍን።
   ²⁷ኣታ ያእቆብ፡ ከመይ ደኣ ኸምዚ ትብል፡ ኣታ እስራኤልሲ፡ ከመይ ኢልካ ኢኻ፡ መገደይ ካብ እግዚኣብሄር ሕብእቲ እያ፡ ፍርደይ ከኣ ካብ ኣምላኸይ ሓሊፉ እዩ፡ ኢልካ ትዛረብ²⁸እቲ ንወሰናት ምድሪ ዝፈጠረ እግዚኣብሄር ዘለኣለማዊ ኣምላኽ ከም ዝዀነ፡ ከም ዘይደክምን ከም ዘይሕለልን፡ ኣእምሮኡ ኸም ዘይምርመርን፡ ኣይትፈልጥንዶ ኣይሰማዕካንዶኸ ኢኻ²⁹ንድኹም ሓይሊ ይህብ፡ ንስኑፍ ከኣ ብርታዐ ይውስኽ።³⁰ኣጒባዝ ይደኽሙን ይሕለሉን፡ ኣባጽሕ ድማ ሰንከልከል ኢሎም ይወድቁ፡³¹እቶም ንእግዚኣብሄር ዝጽበዩ ግና ሓይሎም ይሕደስ። ከም ንስሪ በኽናፍ ይድይቡ፡ ይጐዩ እሞ ኣይሕለሉን፡ ይኸዱ እሞ ኣይደኽሙን።

ትን. ኢሳይያስ ምዕራፍ 41

   ¹ኣትን ደሴታት፡ ኣብ ቅድመይ ስቕ በላ፡ ህዝብታት ከኣ ሓድሽ ሓይሊ ይወስኹ፡ ይቕረቡ እሞ ሽዑ ይዛረቡ፡ ንዑ ሓቢርና ናብ ፍርዲ ንቕረብ።²ነቲ ብጽድቂ ናብ እግሩ ዝጸውዖ መን እዩ ኻብ ምብራቕ ዘተንስኦ፡ ንህዝብታት ኣብ ቅድሚኡ ኣሕሊፉ ሃቦ፡ ኣብ ልዕሊ ነገስታት ከኣ ኣግዝኦ፡ ንሴፎም ከም ተጐጓ፡ ንመንትጎም ከምቲ ንፋስ ዝብትኖ ብቑቡቑ ገበሮ።³ሰጒጒዎም፡ በታ ኣእጋሩ ከቶ ዘይረገጻኣ መገዲ ብደሓኑ ይሓልፍ ኣሎ።⁴ነዚ ዝሰርሖን ዝገበሮን መን እዩ እቲ ንወለዶታት ካብ ጥንቲ ዝጸውዐ ኣነ እየ፡ ኣነ እግዚኣብሄር ቀዳማይን ምስቶም ዳሕሮት ዘሎን እየ።⁵ደሴታት ርእየን ፈርሃ፡ ወሰናት ምድሪ ራዕራዕ በሉ፡ ቀረቡ መጹ ኸኣ። ኣጆኻ፡ በለ።⁶ነፍሲ ወከፍ ንብጻዩ ደገፈ፡ ንሓው ኸኣ፡ ኣጆኻ፡ በለ።⁷ጸራቢ ነቲ ኣምካኽ ፍሲ የፋጥኖ፡ በያዲ ኸኣ ነቲ ኣብ ወጻቓ ዝቕጥቅጥ ብናይ ምጥባቑ፡ ጽቡቕ እዩ፡ እናበለ የፋጥኖ፡ ከይናቓነቕ ከኣ ብሽንካር የጽንዖ።
   ⁸ግናኸ፡ ኣታ እስራኤል ባርያይ፡ ኣታ ያእቆብ፡ ዝሓሬኹኻ ዘርኢ ኣብርሃም ፈታውየይ፡⁹ኣታ ኻብ ወሰናት ምድሪ ዘምጻእኩኻ፡ ካብቲ ኣዝዩ ርሑቕ ጸዊዐ፡ ባርያይ ኢኻ፡ ሓሬኹኻ ኣይነዓቕኩኻን ድማ፡ ዝበልኩኻ።¹⁰ምሳኻ እየ እሞ፡ ኣይትፍራህ፡ ኣነ ኣምላኽካ እየ እሞ፡ ኣይትሸበር፡ ከበርትዓካ፡ ክረድኣካ፡ ብየማነይቲ ኢድ ጽድቀይውን ክድግፈካ እየ።¹¹እንሆ፡ እቶም ኣባኻ ዝንድሩ ዂሎም ክንውሩ ክሓፍሩን እዮም፡ መጻርርትኻ ድማ ከም ዘይነበሩ ክዀኑን ክጠፍኡን እዮም።^12-13ኣነ ንየማነይቲ ኢድካ ዝሕዝ፡ ኣይትፍራህ፡ ክድግፈካ እየ፡ ዝብል እግዚኣብሄር ኣምላኽካ እየ እሞ፡ ነቶም ዝወዳደሩኻ ኽትደልዮም ኣይክትረኽቦምን ከኣ ኢኻ፡ እቶም ዝዋግኡኻ ድማ ከንቱን ከም ገለ ዘይነበረን ክዀኑ እዮም።¹⁴ኣታ ሓሰኻ ያእቆብ፡ ኣቱም ሰብ እስራኤል፡ ኣነ እየ ዝድግፈካ፡ ኣይትፍራህ፡ ተበጃዊኻ ድማ ናይ እስራኤል ቅዱስ እዩ፡ ይብል እግዚኣብሄር።¹⁵እንሆ፡ በሊሕ ዘስናኑ ሓድሽ ሰረገላ መኸዳ ኽገብረካ እየ፡ ነኽራን ክሳዕ ዝድቈሱ ኸተኺዶም፡ ንዀረቢት ከኣ ከም ብቑቡቑ ክትገብሮም ኢኻ።¹⁶ክትምስእዮም ኢኻ፡ ንፋስ ከኣ ክወስዶም፡ ህቦብላውን ክዘርዎም እዩ። ንስኻ ግና ብእግዚኣብሄር ክትሕጐስ፡ በቲ ናይ እስራኤል ቅዱስ ድማ ክትሕበን ኢኻ።¹⁷ሽጉራትን ድኻታትን ማይ ይደልዩ እሞ የልቦን፡ ልሳኖም ብጽምኢ ነቐጸ፡ ግናኸ ኣነ እግዚኣብሄር ክሰምዖም፡ ኣነ ኣምላኽ እስራኤል ኣይክሓድጎምን እየ።¹⁸ውሒዝ ኣብቶም መላጣት ኰረቢት፡ ዓይኒ ማያት ከኣ ኣብ ማእከል ሽንጭሮታት ከውሕዝ እየ፡ ንጸምጸም በረኻስ ማይ ዝመልኦ ቐላይ፡ ንምድሪ ኣጻምእ ከኣ ፈልፋሊ ኽገብሮ እየ።^19-20ኢድ እግዚኣብሄር እዚ ኸም ዝገበረት፡ እቲ ናይ እስራኤል ቅዱስ ከኣ ከም ዝፈጠሮ ምእንቲ ኽርእዩን ክፈልጡን ክሓስቡን ሓቢሮም ከስተውዕሉንሲ፡ ኣብ በረኻ ንኦም ሊባኖስን መመናን ጸጾን ኣውልዕን ከብቁል፡ ኣብቲ ኣጻምእ ከኣ ጽሕድን ሙዝን ዝበን ኣሕቢረ ኽተክል እየ።
   ²¹ክስኹም ንገሩ፡ ይብል እግዚኣብሄር፡ መርትዖኹም ኣምጽኡ፡ ይብል እቲ ንጉስ ያእቆብ።²²ይንገሩ፡ እስኪ ነቲ ዝመጽእ ይግለጹልና፡ ነቲ ናይ ቀደም ባህልኹም፡ ምእንቲ ኽንሓስቦ ፍጻሜኡ ኸኣ ክንፈልጥሲ፡ እስኪ ንገሩና፡ ወይስ ነቲ ዝመጽእ ኣስምዑና።²³ኣማልኽቲ ምዃንኩም ምእንቲ ኽንፈልጥ፡ ነቲ ድሕሪ ሕጂ ዝኸውን ንገሩና። ርኢናስ ሓቢርና ምእንቲ ኽንግረመሉ ኸኣ፡ እስኪ ጽቡቕ ወይስ ክፋእ ግበሩ።²⁴እንሆ፡ ንስኻትኩም ከንቱ ኢኹም፡ ተግባርኩም ከኣ ብላሽ እዩ፡ እቲ ዝሓርየኩም ድማ ፍንፋን እዩ።
   ²⁵ካብ ሰሜን ኣተንሳእክዎ እሞ መጸ፡ ካብ ምብራቕ ጸሓይ ከኣ፡ ንሱውን ንሰማይ ይጽውዖ፡ ከምቲ ሰራሕ መሬት ንጭቃ ዝረግጾ፡ ንሱ ኸኣ ንመሳፍንቲ ኸም መሬት ይረግጾም።²⁶ምእንቲ ኽንፈልጦን ንስኻ ጻድቕ ኢኻ ኽንብልንሲ፡ ካብ ጥንቲ ኣቐዲሙ እዚ ዝነገረ መን እዩ ዝነግር የልቦን፡ ዘስምዓና የልቦን፡ ቃልኩም ዝሰምዕ ከኣ የልቦን።²⁷ቅድሚ ዂሉ ንጽዮን፡ እነውልኪ እቲኣቶም እዮም፡ ዝብል ንየሩሳሌም ከኣ ዘበስር ኣነ እየ።²⁸እንተ ጠመትኩ፡ ሓደ እኳ የልቦን፡ እንተ ሓተትክዎም ድማ፡ ካብቶም መኻሮ ምላሽ ክህብ ዝኽእል ሓደ እኳ የልቦን።²⁹እንሆ፡ ኲላቶም ከንቱነት እዮም፡ ተግባሮም ከኣ ምናምን እዩ፡ እቲ ናይ ፍሲ ምስልታቶም ድማ ንፋስን ባዶን እዩ።

ትን. ኢሳይያስ ምዕራፍ 42

   ¹እንሆ፡ ዝድግፎ ባርያይ፡ ሕሩየይ፡ ነፍሰይ ብእኡ ባህ ዝብላ፡ መንፈሰይ ኣብ ልዕሊኡ ኣሕዲረ ኣሎኹ፡ ንሱ ነህዛብ ፍትሒ ኸውጽኣሎም እዩ።²ኣይክጭድርን፡ ድምጹ ዓው ኣቢሉ ኸኣ ኣብ ኣደባባይ ኣይከስምዕን እዩ።³ጭፍሉቕ ሻምብቆ ኣይክሰብርን፡ ተኻኺ ጥዋፍ ድማ ኣይከጥፍእን እዩ፡ ፍትሒ ብሓቂ የውጽእ።⁴ፍትሒ ኣብ ምድሪ ኽሳዕ ዝምስርት፡ ሓይሉ ኣይሓምቕን ኣይሕለልን ደሴታት ከኣ ሕጉ ኽጽበያ እየን።
   ⁵እቲ ንሰማያት ዝፈጠሮም ዝገተሮን፡ ንምድርን ንሳ እተብቁሎን ዝዘርግሐ፡ ነቲ ኣብኣ ዘሎ ህዝቢ ኸኣ ትንፋስ ዝሃበ፡ ነቶም ኣብኣ ዝመላለሱ ድማ መንፈስ ዝሃበ እግዚኣብሄር ኣምላኽ ከምዚ ይብል፡^6-7ኣዒንቲ ዕውራት ምእንቲ ኽትከፍት፡ ንእሱራት ካብ ቤት ማእሰርቲ፡ ነቶም ኣብ ጸልማት ዝነብሩ ኸኣ ካብ ማእሰርቶም ምእንቲ ኸተውጽኦምስ፡ ኣነ እግዚኣብሄር ብጽድቂ ጻዋዕኩኻ፡ ብኢድካ ኽሕዘካን ክሕልወካን ኪዳን ህዝቢ፡ ብርሃን ኣህዛብ ክገብረካን እየ።⁸ኣነ እግዚኣብሄር እየ፡ ስመይ እዚኣ እያ፡ ክብረተይ ከኣ ንኻልእ፡ ምስጋናይውን ንጽሩብ ምስልታት ኣይህብን እየ።⁹እንሆ፡ እቲ ናይ ቀደም ተፈጸመ፡ ደጊም ሓድሽ ክነግረኩም እየ፡ ከይተቐልቀለ ድማ ብዛዕባኡ ኽስምዓኩም እየ።
   ¹⁰ኣቱም ኣብ ባሕሪ እትወርዱን ኣብኡ ዘሎ ዘበለ ዂሉን፡ ኣትን ደሴታትን ኣብእን እትነብሩን፡ ንእግዚኣብሄር ሓድሽ መዝሙርን ምስጋናኡን ካብ ወሰን ምድሪ ዘምሩ።¹¹በረኻን ከተማታቱን፡ እተን ሰብ ቄዳር ዝነብርወን ዓድታትን ድምጾም ዓው ይበል፡ እቶም ኣብ ኣኻውሕ ዝነብሩ ብሓጐስ ይጨድሩ፡ ካብ ርእሲ ኣኽራን እልል ይበሉ።¹²ንእግዚኣብሄር ክብሪ ይሃቡ፡ ምስጋናኡ ኸኣ ኣብ ደሴታት ይንገሩ።
   ¹³እግዚኣብሄር ከም ጅግና ይወጽእ፡ ከም ተዋጋኢ ድማ ቅንኣት የልዓዕል፡ ይጭድር እሞ የዝምር፡ ኣብ ልዕሊ ጸላእቱ ኸኣ ይብርትዕ።¹⁴ነዊሕ ግዜ ስቕ ኢለ ተጸሚመ ነፍሰይ መለኽኩ፡ ሕጂ ግና ከም እትጽዕር ወላዲት ክጭርሕ፡ ተናኢኸ ድማ ከተንፍስ እየ።¹⁵ነኽራንን ኰረቢትን ከባድሞ፡ ንዅሉ ብቋልያኦም ድማ ከንቅጾ እየ፡ ንወሓዚ ኸኣ ደሴት ክገብሮ፡ ንቐላይውን ከንጽፎ እየ።¹⁶ንዕውራት ብዘይፈልጥዋ ጐደና ኽወስዶም፡ ብዘይፈልጥወን መገድታት ክመርሖም፡ ንጸልማት ኣብ ቅድሚኦም ብርሃን ክገብሮ፡ ንድንጒር ከጣጥሖ እየ። እዚ ኽገብረሎም ኣይክሓድጎምን ድማ እየ።¹⁷እቶም ብቕርጺ ምስልታት ዝውከሉ፡ ንምስልታት ፍሲ ኸኣ፡ ንስኻትኩም ኣማልኽትና ኢኹም፡ ዝብሉ፡ ንድሕሪት ገጾም ክምለሱ፡ ኣዝዮም ድማ ክንውሩ እዮም።
   ¹⁸ኣቱም ጸማማት፡ ስምዑ፡ ኣቱም ዕውራት ከኣ፡ ክትርእዩስ ጠምቱ።¹⁹ባርያይ እንተ ዘይኰይኑስ፡ ዕውር መን እዩ ከምቲ ዝልእኮ ልኡኸይ ጸማምከ መን እዩ ዕዉር ከም ፈታውየይ፡ ዕዉር ከም ባርያ እግዚኣብሄር መን እዩ²⁰ብዙሕ ነገር ርኢኻ፡ ግናኸ ኣይሓሎኻዮን፡ ኣእዛን ተኸፊቱ ነይሩ፡ ግናኸ ገለ እኳ ኣይሰማዕካን።²¹እግዚኣብሄር ስለ ጽድቁ ንሕጉ ዓብይን ክቡርን ክገብሮ ተሓጐሰ።²²ግናኸ እዚ ህዝቢ እዚ ውሩርን ዝሙትን እዩ፡ ኲላቶም ኣብ ጐደጒዲ ተፈንጠሩ፡ ናብ ቤት ማእሰርቲ ኸኣ ተዳጐኑ። ንዘመተ ተወፈዩ፡ መናገፊ ኸኣ የልቦን፡ ተማረኹ፡ ምለስ፡ ዝብል ድማ የልቦን።²³ካባኻትኩም ነዚ ጽን ዝብል፡ ንዳሕራዪ ኸስተውዕሎ ኢሉ ዝሰምዖስ መን እዩ²⁴ያእቆብ ንወራር፡ እስራኤል ንዘመተ ዝወፈየ መን እዩ እቲ ብመገዱ ኽመላለሱ ዘይፈተዉ፡ ንሕጉ ድማ ዘይተኣዘዙ፡ ንሕናውን ዝበደልናዮ እግዚኣብሄርዶ ኣይኰነን ዝገበሮ²⁵ስለዚ ቑጥዓ መዓቱን ነድሪ ውግእን ከዓወሉ፡ እዚውን ብኽቡ ኣንደዶ፡ ግናኸ ኣይፈለጠን፡ ሞዂ ኣበሎ፡ ግናኸ ኣብ ልቡ ኣይተመልሰን።

ትን. ኢሳይያስ ምዕራፍ 43

   ¹ሕጂ ግና ኣታ ያእቆብ፡ እቲ ዝፈጠርካ፡ ኣታ እስራኤል ድማ፡ እቲ ዝደኰነካ እግዚኣብሄር ከምዚ ይብል፡ ተበጅየካ እየ እሞ፡ ኣይትፍራህ፡ ብስምካ ጸዋዕኩኻ፡ ንስኻ ናተይ ኢኻ።²ብማያት ምስ እትሓልፍ፡ ምሳኻ ክኸውን እየ፡ ብውሒዝ ምስ እትሳገር ከኣ፡ ኣይከጥሕለካን እዩ፡ ብሓዊ ምስ እትኸይድ፡ ኣይክትነድድን ኢኻ፡ ሃልሃልታውን ኣይክህምዀካን እዩ።³ኣነ እግዚኣብሄር ኣምላኽካ፡ እቲ ናይ እስራኤል ቅዱስ፡ መድሓኒኻ እየ እሞ፡ ንግብጺ በጀኻ፡ ንኢትዮጵያን ሳባን ኣብ ክንዳኻ ኣሕለፍኩ።⁴ኣብ ኣዒንተይ ብሉጽን ክቡርን ስለ ዝዀንካን ስለ ዘፍቀርኩኻን፡ ኣብ ክንዳኻ ሰባት፡ ኣብ ክንዲ ህይወትካ ድማ ህዝብታት ክህብ እየ።⁵ምሳኻ እየ እሞ፡ ኣይትፍራህ፡ ንዘርእኻ ኻብ ምብራቕ ከምጽኦም፡ ካብ ምዕራብ ከኣ ክኣኻኽበካ እየ።^6-7ንሰሜን፡ ኣምጽእ፡ ንደቡብ ከኣ፡ ኣይትኽላእ፡ ነወዳተይ ካብ ርሑቕ፡ ነዋልደይ ካብ ወሰን ምድሪ፡ ነቲ ብስመይ እተጸውዐ ዘበለ ዂሉን ንኽብረይ ዝፈተርክዎን ዝደኰንክዎን ዝገበርክውን ኣምጻኣዮ፡ እብል ኣሎኹ።
   ⁸ነቲ ዓይኒ ኸለዎስ ዕውር፡ እዝኒ ኸለዎስ ጸማም ዝዀነ ህዝቢ ኣውጽኣዮ፡⁹ኲሎም ኣህዛብ ብሓደ ይተኣከቡ፡ ህዝብታት ከኣ ይጨምረሩ፡ ካባታቶም ከምዚ ዘመሰለ ኽነግር ዝኽእል መን እዩ እቲ ናይ ቀደም ባህሎም እስኪ የስምዑና፡ ሰብ ሰሚዑ፡ ሓቂ እዩ፡ ምእንቲ ኽብልሲ፡ ምስክሮም የቕርቡ፡ መርትዕኦም ከኣ የፍልጡ።¹⁰ኣነ ኸም ዝዀንኩ ምእንቲ ኸተስተውዕሉን ክትፈልጡን ክትኣምኑንሲ፡ ንስኻትኩም ምስክረይን እቲ ዝሓሬኽዎ ባርያን ኢኹም፡ ይብል እግዚኣብሄር። ቅድመይ ኣምላኽ ከቶ ኣይተደኰነን፡ ድሕረይ ከኣ ኣይክኸውንን እዩ።¹¹ኣነ፡ ኣነ እየ እግዚኣብሄር፡ ብጀካይ መድሓኒ የልቦን።¹²ኣነ እየ ዝነገርኩ፡ ዘድሓንኩ፡ ዘስማዕኩ፡ ካልእ ኣምላኽ ከኣ ኣብ ማእከልኩም ኣይነበረን። ስለዚ ንስኻትኩም ምስክረይ ኢኹም፡ ይብል እግዚኣብሄር፡ ኣነውን ኣምላኽ እየ።¹³ካብ ጥንቲ ኣነ እየ፡ ካብ ኢደይ ዘድሕን ከኣ የልቦን፡ ኣነ እገብር፡ ክኽልክል ዝከኣሎኸ መን እዩ፧
   ¹⁴እግዚኣብሄር፡ እቲ ተበጃዊኹም፡ ናይ እስራኤል ቅዱስ፡ ከምዚ ይብል ኣሎ፡ ምእንታኹም ናብ ባቢሎን ልኢኸ፡ ንዂሎም፡ እረ ንከለዳውያንውን በተን ዝሕጐሱለን መራኽቦም ሰጒጐ ኸህድሞም እየ፡¹⁵እግዚኣብሄር እቲ ቅዱስኩም፡ ፈጣር እስራኤል እቲ ንጉስኩም ኣነ እየ።^16-17እቲ ንሰረገላን ፈረሰን ንጭፍራን ጅግናን ዘውጽእ፡ ኲላቶም ብሓደ ወደቑ፡ ኣይክትንስኡን ከኣ እዮም፡ ጠፍኡ፡ ከምፈትሊ መብራህቲ ኸኣ ቀሃሙ፡ እቲ ኣብ ባሕርስ ጐደና፡ ኣብ ብርቱዕ ማያት ከኣ መገዲ ዝገበረ እግዚኣብሄር ከምዚ ይብል፡¹⁸ነቲ ቐደም ዝነበረ ኣይትዘክሩ፡ ነቲ ናይ ጥንቲ ኸኣ ኣይትሕሰቡ።¹⁹እንሆ፡ ሓድሽ ነገር ክገብር እየ፡ ሕጂ ትበቁል ኣላ፡ ኣይተለልይዋንዶ ኢኹም እወ፡ መገዲ ኣብ በረኻ፡ ወሓይዝ ድማ ኣብ ምድረ በዳ ኽገብር እየ።²⁰ንህዝበይ፡ እቲ ሕሩየይ፡ ምእንቲ ኸስቲ፡ ማይ ኣብ በረኻ፡ ውሒዝውን ኣብቲ ምድረ በዳ ኽህብ እዩ እሞ፡ እንስሳ መሮር፡ እኒ ወኻርያን ሰገንን፡ ከኽብሩኒ እዮም።²¹እቲ ንኣይ ዝደኰንክዎ ህዝቢ ምስጋናይ ከዘንቱ እዩ።
   ²²ኣታ ያእቆብ፡ ንስኻ ግና ኣይጸዋዕካንን፡ ኣታ እስራኤል፡ ፋዕራይ ኣይገበርካን።²³ገንእሸል መስዋእቲ ምሕራርካ ኣየቕረብካለይን፡ ብመስዋእትታትካ ድማ ኣየኽበርካንን፡ ብመስዋእቲ ብልዒ ኣየትዓብኩኻን ብዕጣን ከኣ ኣየድከምኩኻን።²⁴ብሓጢኣትካ ደኣ ኣትዓብካኒ፡ ብኣበሳኻ ድማ ኣድከምካኒ እምበር፡ ቀረፋ ብገንዘብ ኣይተወየጥካለይን፡ ብስብሒ መስዋእትኻውን ኣየጽገብካንን።²⁵ኣነ፡ ኣነ እየ ስለ ርእሰይ ኢለ ገበንካ ዝድምስስ፡ መሊሰ ኸኣ ሓጢኣትካ ኣይዝክርን።²⁶ኣዘክረኒ እሞ ንሓድሕድና ንማጐት፡ ክትረትዕሲ ባዕልኻ ተዛረብ።²⁷እቲ ቐዳማይ ኣቦኻ ሓጢኣት ገበረ፡ እቶም መምህራንካ ድማ ዓመጹኒ።²⁸ስለዚ ንሓላቑ ቤተ መቕደስ ኣርከስክዎም፡ ንያእቆብ ከኣ ንሕርሚ መጦኽዎ፡ ንእስራኤል ድማ ንጸርፊ ወፌኽዎ።

ትን. ኢሳይያስ ምዕራፍ 44

   ¹ደጊም ኣታ ያእቆብ ባርያይ፡ ኣታ እስራኤል ከኣ ሕሩየይ፡ ስማዕ፡²እቲ ዝሰርሓካን፡ ካብ ማሕጸን ጀሚሩ ዝደኰነካን፡ ዝድግፈካን እግዚኣብሄር ከምዚ ይብል፡ ኣታ ያእቆብ ባርያይ፡ ንስኻውን ይሹሩን ሕሩየይ፡ ኣይትፍራህ።³ማይ ኣብቲ ጽሙእ፡ ወሓይዝ ከኣ ኣብቲ ንቑጽ ከፍስስ እየ፡ መንፈሰይ ኣብ ዘርእኻ፡ በረኸተይ ከኣ ኣብ ሓድግኻ ኸፍስሶ እየ እሞ፡⁴ከም ዕቦል ኣብ ጥቓ ወሓዚ ርባ፡ ኣብ ማእከል ሳዕሪ ኽበቑሉ እዮም።⁵እቲ ሓደ፡ ናይ እግዚኣብሄር እየ፡ ክብል እዩ፡ እቲ ሓደ ኻልእ ብስም ያእቆብ ክስመ እዩ፡ እቲ ሓደ ድማ፡ ናይ እግዚኣብሄር፡ ኢሉ ኣብ ኢዱ ኽጽሕፍ እዩ፡ ንስም እስራኤል ድማ መጸውዒ ኽብረት ክገብሮ እዩ።⁶እግዚኣብሄር፡ ንጉስ እስራኤልን ተበጃዊኡን፡ እግዚኣብሄር ጐይታ ሰራዊት ከምዚ ይብል፡ ቀዳማይን ዳሕራይን ኣነ እየ፡ ብጀካይ ኣምላኽ የልቦን።⁷ካብቲ ኣነ ነቲ ናይ ጥንቲ ህዝቢ ዝሰረትኩሉ ግዜ ጀሚሩ፡ ከማይ ዝጽውዕ መን እዩ እስከ ይዛረብ እሞ ይንገረኒ። ነቲ ዝመጽእን ዝኸውንን ይንገሩ።⁸ኣይትፍርሁን ኣይትሰምብዱን፡ ቀደምዶ ኣየስማዕኩኻን ኣይነገርኩኻንዶኸ ንስኻትኩም ምስክረይ ኢኹም፡ ብጀካይዶ ኣምላኽ ኣሎ እዩ ካልእ ከውሒ የልቦን፡ ገለ እኳ ኣይፈልጥን።⁹እቶም ጣኦታት ዝሰርሑ ዂሎም ከንቱ እዮም፡ እቶም ፍትዋቶም ከኣ ገለ እኳ ኣይጠቕሙን። እቶም ምስክሮም ድማ ኣይርእዩን ኣየስተውዕሉን፡ ስለዚ ኽንውሩ እዮም።¹⁰ገለ እኳ ዘይጠቕሞስ ኣምላኽ ዝሰርሐ፡ ምስሊውን ብፍሲ ዝገበረ መን እዩ¹¹እንሆ፡ ኲሎም መተዓይይቱ ኽንውሩ እዮም፡ እቶም ሰራሕቲ ኸኣ ሰብ እዮም። ኲሎም ይተኣከቡን ይቕረቡን፡ ክስምብዱን ሓቢሮም ከኣ ክንውሩን እዮም።
   ¹²ሰራሕ ሓጺን ምሳር ይሰርሕ፡ ኣብ ጓህሪ ይገብሮ፡ ብሞደወ ይቕጥቕጦ፡ ብሓይሊ ቕልጽሙ ይዓዮ፡ ይጠሚ እሞ ይደክም፡ ማይ ኣይሰትን እሞ ይሕለል።¹³ጸራቢ ገመድ ይግትር፡ ብመንደፊ ይነድፎ፡ ብመንደል ይነድሎ፡ ብመመዓራረዪ ይሕንጽጾ። ኣብ ቤት ክነብር እዩ እሞ፡ ከም መልክዕ ሰብ፡ ከም ውቁብ ሰብ ገይሩ ይሰርሖ።¹⁴ኦም ሊባኖስ ይቘርጽ፡ ኣውሕን ኣልጌንን የምጽእ፡ ካብ ኣእዋም ዱር ከኣ ይሓሪ፡ ጽሕዲ ይተክል፡ ዝናም ድማ የብቁሎ።¹⁵እዚ ኸኣ ንሰብ ንምንዳድ ይጠቕሞ፡ ካብኡ ወሲዱ ይስሕነሉ፡ ኣንዲዱ ኸኣ እንጌራ ይስንክት፡ ምስናይ እዚውን ካብኡ ኣምላኽ ይገብር እሞ የምልኾ፡ ምስሊ ይጸርብ እሞ ይሰግደሉ።¹⁶እምበኣርሲ ፈረቓኡ ኣብ ሓዊ የንድዶ፡ በቲ ፈረቓኡ ኸኣ ስጋ የብስለሉ፡ ጥብሲ ጠቢሱ ድማ ይጸግበሉ፡ ይመውቑ እሞ፡ ኣሰይ እመውቑ፡ ሓዊ ኸኣ እርኢ ኣሎኹ፡ ይብል።¹⁷ነቲ ዝተረፈ ድማ ምስሊ ቐሪጹ ይገብሮ፡ ኣምላኸይ ኢኻ እሞ፡ ኣድሕነኒ፡ እናበለ ኣብ ቅድሚኡ ተደፊኡ ይሰግድን ይጽልን።¹⁸እዚኣቶምሲ፡ ከይርእዩ ኣዒንቶም፡ ከየስተውዕሉ ድማ ልቦም ተደፊኑ እዩ እሞ፡ ገለ እኳ ኣይፈልጡን፡ ሓንቲ እኳ ኣየስተውዕሉን እዮም።¹⁹ፍርቁ ኣብ ሓዊ ኣንዲደ፡ ንጓህሩ ድማ እንጌራ ሰንኪተ፡ ስጋ ኸኣ ጠቢሰ በላዕኩ፡ ነቲ ተረፉዶ ፍንፋን ክገብሮ ንቑራጽ ዕጨይቲዶኸ ኽሰግደሉ እየ ክብልሲ ኣብ ልቡ ዝምለስ፡ ፍልጠትን ኣእምሮን ዘለዎ ሓደ እኳ የልቦን።²⁰ንሱ ሓመዂስቲ ይምገብ፡ ነፍሱ ኸየናግፍ፡ እዚ ኣብ የማነይቲ ኢደይ ዘሎ ሓሶትዶ ኣይኰነን ከኣ ከይብልሲ፡ እተጠበረ ልቢ ኣጋገዮ።
   ²¹ኣታ ያእቆብ፡ ኣታ እስራኤልውን፡ ባርያይ ኢኻ እሞ እዚ ዘክር፡ ኣነ ደኰንኩኻ፡ ባርያይ ኢኻ፡ ዎ እስራኤል፡ ብኣይሲ ኣይክትርሳዕን ኢኻ።²²ንገበንካ ኸም ደበና፡ ንሓጢኣትካውን ከም ግመ ኣጥፊኤዮ እየ። ኣነ እየ ዝብጀወካ እሞ፡ ናባይ ተመለስ።²³እግዚኣብሄር እዩ ዝገበሮ እሞ፡ ኣቱም ሰማያት፡ እልል በሉ። እግዚኣብሄር ንያእቆብ ተበጅይዎ፡ ክብሩ ኸኣ ኣብ እስራኤል ገሊጹ እዩ እሞ፡ ኣቱም መዓሙቑ ምድሪ፡ ብታሕጓስ ጨድሩ፡ ኣቱም ኣኽራን፡ ኣታ ዱር ምስ ኲሉ ኣእዋምካ፡ ዓው ኢልኩም ዘምሩ።
   ²⁴እቲ ኻብ ማሕጸን ጀሚሩ ዝደኰነካ እግዚኣብሄር ተበጃዊኻ፡ ከምዚ ይብል፡ እቲ ዂሉ ዝገብር እግዚኣብሄር ኣነ እየ፡ ንሰማያት በይነይ ዝዝርግሖ፡ ብዘይ ደገፍ ከኣ ንምድሪ ዝኻስሶ፡²⁵ንትእምርቲ ሓሰውቲ ኸንቱ ዝገብሮ፡ ንጠንቈልቲ ዓያሱ ዝገብሮም፡ ንጥበበኛታት ድሕሪት ዝመልሶም፡ ንፍልጠቶም ከኣ ናብ ዕሽነት ዝልውጦ፡²⁶ንቓል ባርያኡ ዘጽንዖ፡ንምኽሪ ልኡኻቱ ዝፍጽሞ፡ ብዛዕባ የሩሳሌም፡ ክነብርዋ፡ ብዛዕባ ኸተማታት ይሁዳ ኸኣ፡ ክህነጻ፡ ኣነውን ንዖናታተን ከተንስኦ እየ፡ ዝብል፡²⁷ንመዓሙቑ ባሕሪ፡ ንጻፍ፡ ንርባታትካውን፡ ኣነ ኸንጽፎም እየ፡ ዝብል፡²⁸ብዛዕባ ቂሮስ፡ ንሱ ጓሳይ እዩ፡ ንፍቓደይ ዘበለ ዂሉውን ክፍጽሞ እዩ፡ ብዛዕባ የሩሳሌም ድማ፡ ክትህነጽ፡ ብናይ ቤተ መቕደስውን፡ ክትስረት እያ፡ ዝብል ኣነ እግዚኣብሄር እየ።

ትን. ኢሳይያስ ምዕራፍ 45

   ¹እግዚኣብሄር ነቲ ቕቡኡ፡ ንቂሮስ፡ ህዝብታት ኣብ ቅድሚኡ ኸግዝኣሉ፡ ሕቘ ነገስታት ከኣ ክፈትሕ፡ ደጌታት ከይዕጾዎ ድማ፡ መዓጹ ኣብ ቅድሚኡ ምእንቲ ኸርሕወሉ ኢለ ብየማነይቲ ኢዱ ዝሓዝክዎ ኸምዚ ይብሎ ኣሎ፡²ኣነ ቐቅድሜኻ ክኸይድ፡ ንድንጉር ከኣ ሰጥ ከብሎ፡ ንመዓጹ ኣስራዚ ሓሸምሸም ከብሎ፡ ንመሸጐሪ ሓጺን ድማ ክሰባብሮ እየ።³ኣነ ብስምካ ዝጸዋዕኩኻ እግዚኣብሄር፡ ኣምላኽ እስራኤል ምዃነይ ምእንቲ ኽትፈልጥሲ፡ መዝገብ ጸልማትን ኣብ ስውር እተሓብአ ሃብትን ክህበካ እየ።⁴ምእንቲ ያእቆብ ባርያይን እስራኤል ሕሩየይን፡ ብስምካ ጸዋዕኩኻ፡ ከይፈለጥካኒ እኳ ስም ክብረት ሃብኩኻ።^5-6እግዚኣብሄር ኣነ እየ፡ ካልእ የልቦን፡ ብጀካይ ኣምላኽ የልቦን፡ ካብ ምብራቕ ጸሓይ ክሳዕ ምዕራብ ብጀካይ ካልእ ከም ዘየልቦ ምእንቲ ኽፈልጡስ፡ ከይፈለጥካኒ እኳ ኣዕጠቕኩኻ። ኣነ እግዚኣብሄር እየ፡ ካልእውን ከቶ የልቦን።⁷ብርሃን እገብር፡ ጸልማት ከኣ እፈጥር፡ ደሓን እገብር፡ መዓት ድማ እፈጥር፡ እዚ ዂሉ ዝገብር ኣነ እግዚኣብሄር እየ።
   ⁸ኣቱም ሰማያት፡ ካብ ላዕሊ ኣንጠብጥቡ፡ ደበናታት ከኣ ጽድቂ የዝንሙ። ምድሪ ትጨንዳሕ እሞ ምድሓን የፍርዩ፡ ጽድቂውን ኣሕቢራ ተብቁል። እዚ ዝፈጠርኩ ኣነ እግዚኣብሄር እየ።⁹እቲ ምስ ፈጣሪኡ ዝካታዕ ወይለኡ፡ ንሱ ገልዒ ኣብ ማእከል ኣጋልዕ መሬት እዩ። መሬትዶ ንስራሒኣ፡ እንታይ ትገብር፡ ትብሎ እያ ግብርኻዶኸ፡ ኣእዳው የብሉን፡ ይብል እዩ¹⁰እቲ ነቦ፡ እንታይ ትወልድ ንስኻ ንሰበይቲ ኸኣ፡ እንታይ ጽዒርኪ ትወልዲ ዝብል ወይለኡ።¹¹እግዚኣብሄር፡ እቲ ናይ እስራኤል ቅዱስን ፈጣሪኡን፡ ከምዚ ይብል፡ ብናይ እቲ ዝመጽእ ሕተቱኒ፡ ብዛዕባ ደቀይን ግብሪ ኢደይን ኣዝዙኒ።¹²ንምድሪ ዝገበርኩ፡ ኣብኣ ዘሎ ሰብ ከኣ ዝፈጠርኩ ኣነ እየ፡ ንሰማያት ዝዘርግሓ ድማ ኣእዳወይ እየን፡ ንዂሎም ሰራዊቶምውን ኣዘዝኩ።¹³ነዚ ብጽድቂ ዘተንሳእክዎ ኣነ እየ፡ መገድታቱ ዂሉ ድማ ከጣጥሓሉ እየ፡ ንሱ ብዘይ ምፍዳይን ገጸ በረኸትን ንኸተማይ ክሰርሓ፡ ንምሩኻተይ ከኣ ክመልሶም እዩ፡ ይብል እግዚኣብሄር ጐይታ ሰራዊት።
   ¹⁴እግዚኣብሄር ከምዚ ይብል፡ ጻዕሪ ግብጽን ንግድ ኢትዮጵያን እቶም ነዊሕ ዝቑመቶም ሰብ ሳባን ናባኻ ኽሓልፉ ናትካውን ክዀኑ እዮም። ንሳቶም ደድሕሬኻ ኽስዕቡ፡ ብመቐውሕ ድማ ክሓልፉ እዮም እሞ፡ ብሓቂ ኣምላኽ ኣባኻ እዩ፡ ብጀካኡስ ካልእ ኣምላኽ ከቶ የልቦን፡ እናበሉ፡ ኣብ ቅድሜኻ ኽሰግዱን ክልምኑኻን እዮም።¹⁵ዎ ኣምላኽ እስራኤል፡ ዎ መድሓኒ፡ ብሓቂ ንርእስኻ እትስውር ኣምላኽ ኢኻ።¹⁶እቶም ጣኦታት ዝገብሩ ዂሎም ክሓፍሩን ክደሃሉን፡ ብሓደ ነዊሮም ክኸዱን እዮም።¹⁷እስራኤል ግና ብዘለኣለማዊ ምድሓን ብእግዚኣብሄር ክድሕን እዩ። ንስኻትኩምሲ ንዘለኣለም ኣይክትሓፍሩን ኣይክትደሃሉንውን ኢኹም።
   ¹⁸እቲ ንሰማያት ዝፈጠረ እግዚኣብሄር ንሱ ኣምላኽ እዩ፡ ንምድሪ ዝደኰናን ዝገበራን ዘጽንዓን፡ ማሕደር ሰብ ክትከውን ዝደኰና እምበር፡ ጥራያ ኽትከውን ዘይፈጠራ ኸምዚ ይብል፡ ኣነ እግዚኣብሄር እየ፡ ብጀካይውን ካልእ የልቦን።¹⁹ብሕቡእ፡ ኣብ ስፍራ ዝጸለመተ ምድሪ ኣይተዛረብኩን፡ ንዘርኢ ያእቆብ፡ ብኸንቱ ድለዩኒ፡ ኣይበልኩን። ኣነ እግዚኣብሄር ጽድቂ ዝዛረብ፡ ቅንዕና ዘውሪ እየ።²⁰ኣቱም ካብ ህዝብታት ዘምለጥኩም፡ ተኣከቡ፡ ንዑ፡ ብሓደ ቕረቡ፡ እቶም ንዕጨይቲ ጽሩብ ምስልታቶም ዝጾሩ ከድሕን ንዘይከኣሎ ኣምላኽ ዝልምኑን ኣእምሮ የብሎምን።²¹እስከ ንገሩ፡ ቅረቡ፡ ብሓደውን ይምከሩ፡ ካብ ጥንቲ እዚ ነገር እዚ መን ኣስምዐ ካብ ቀደም ዝነገረኸ መን እዩ ኣይኣነ እግዚኣብሄር እንዶ እየ ዝገበርክዎ ብጀካይ ካልእ ኣምላኽ የልቦን፡ ጻድቕን ዘድሕንን ኣምላኽ ብጀካይ ከቶ የልቦን።²²ኣነ ኣምላኽ እየ፡ ካልእ ከኣ የልቦን እሞ፡ ኣቱም ወሰናት ምድሪ ዂላትኩም፡ ናባይ ተመለሱ ድሓኑውን።²³ቃል ጽድቂ ኻብ ኣፈይ ወጺኡ እዩ እሞ ኣይክምለስን እዩ፡ ኲሉ ብርኪ ኽሰግደለይ፡ ኲሉ ልሳን ከኣ ብኣይ ክምሕል እዩ፡ ኢለ ብርእሰይ መሓልኩ።²⁴ብዛዕባይ ከኣ፡ ጽድቅን ስልጣንን ኣብ እግዚኣብሄር ጥራይ እዩ፡ ክበሃል እዩ። ናብኡ ኽመጹ እዮም፡ እቶም ነዲሮምሉ ዝነበሩ ዂላቶም ከኣ ክሓፍሩ እዮም።²⁵ዘርኢ እስራኤል ኲሉ ብእግዚኣብሄር ክጸድቕን ክሕበንን እዩ።

ትን. ኢሳይያስ ምዕራፍ 46

   ¹ቤል ይደንን፡ ኔቦ ይጒምበስ፡ ጣኦታቶም ናብ እንስሳን መጽዓኛን ይጸዓን፡ እቶም ዘዞርኩምዎም ነቲ ድኹም መጽዓኛ ከቢድ ጾር ኰይኖም ተጻዕንዎ።²ተጐምበሱ፡ ብሓደ ደነኑ፡ ነቲ ጾር ከድሕንዎ ኣይከኣሉን፡ ንርእሶምውን ተማረኹ።³ኣቱም ቤት ያእቆብ፡ ኣቱም ዝተረፍኩም ቤት እስራኤል ኲላትኩም፡ ካብ ከርሲ ጀሚርኩም ኣባይ እተጸዓንኩም፡ ካብ ማሕጸን ጀሚርኩም ብኣይ እተጾርኩም፡ ስምዑኒ፡⁴ክሳዕ እርግናኹም ኣነ እየ፡ ክሳዕ ትሽይቡ ድማ ክጾረኩም፡ ኣነ ገበርኩ ኣነውን ክድግፍ እየ፡ ክጸውርን ኸድሕንን እየ።⁵መዛኑ ኽንከውንሲ፡ ምስ መን እሞ ከተማሳስሉኒ ከተመዓራርዩንን ኢኹም⁶ወርቂ ኻብ ማሕፉዳ ይኽስክሱ፡ ብሩር ድማ ብሚዛን ይመዝኑ፡ ምስ ሰራሕተኛ ይዋዓዓሉ፡ ንሱውን ኣምላኽ ይሰርሕ፡ ንሳቶም ከኣ ይሰግዱሉን የማልኽዎን።⁷ኣልዒሎም ኣብ መንኲቦም ይጾርዎ፡ ኣብ ስፍራኡ ኸኣ የንብርዎ፡ ኣብኡ ይቐውም፡ ካብ ስፍራኡውን ፍንሕንሕ ኣይብልን። ዝጸውዐ እንተ ጸውዐ፡ ኣይመልስን ካብ ጸበባኡውን ኣየድሕኖን።
   ⁸ነዚ ዘክሩ እሞ፡ ሰብኡት ኲኑ፡ ኣቱም ገበነኛታት፡ ኣብ ልብኹም ተመለሱ።⁹ኣነ ኣምላኽ እየ፡ ብጀካይ ከቶ የልቦን እሞ፡ ነቲ ናይ ጥንቲ ናይ ቀደም ዘክሩ፡ ኣነ ኣምላኽ እየ፡ ዝማሳሰለኒ ኸኣ የልቦን።¹⁰ካብ መጀመርታ ነቲ መወዳእታ፡ ካብ ጥንቲ ገና ኸይኰነ ኸሎ ዝነገርኩ እሞ፡ ምኽረይ ክቐውም እዩ፡ ፍቓደይ ኲሉውን ክፍጽም እየ፡ ዝበልኩ ኣነ እየ።¹¹ንኣሞራ ኻብ ምብራቕ፡ ነቲ መማኽርተይ ካብ ርሑቕ ሃገር ዝጽውዕ ኣነ እየ። እወ፡ ተዛሪበ ኽፍጽሞ ኸኣ እየ፡ ኣሚመ ኽገብሮውን እየ።¹²ኣቱም ካብ ጽድቂ ዝረሓቕኩም ተረርቲ ልቢ፡ ስምዑኒ፡¹³ጽድቀይ እቕርብ ኣሎኹ፡ ንሱ ርሑቕ ኣይኰነን፡ ምድሓነይ ከኣ ኣይድንጒን፡ ምድሓን ኣብ ጽዮን፡ ክብረይውን ንእስራኤል ክህብ እየ።

ትን. ኢሳይያስ ምዕራፍ 47

   ¹ድሕሪ ደጊምሲ ሕንቅቕቲ ስውንቲ ኣይክትበሃልን ኢኺ እሞ፡ ኣቲ ድንግል ጓል ባቢሎን፡ ውረዲ ኣብ ሓመድ ከኣ ተቐመጢ፡ ኣቲ ጓል ከለዳውያን፡ ብዘይ ዝፋን ኣብ ምድሪ ተቐመጢ።²መጥሓን ሓዚ እሞ ሓርጭ ጥሓኒ፡ ጒልባብኪ ቕልዒ፡ ነቲ ወለል ዝብል ዘፈር ክዳንኪ ሰብስቢ፡ ደናጉኺ ጥራዩ ጌርኪ ውሓይዝ ተሳገሪ።³ዕርቃንኪ ይቀላዕ፡ ነውርኺ ኸኣ ይረኤ፡ ሕነ ኽፈዲ እየ፡ ዝገጥመለይ ከኣ ሓደ እኳ የልቦን።⁴ስም እቲ ተበጃዊናስ እግዚኣብሄር ጐይታ ሰራዊት፡ ናይ እስራኤል ቅዱስ እዩ።⁵ኣቲ ጓል ከለዳውያን፡ ድሕሪ ደጊም እትየ መንግስትታት ኣይክትበሃልን ኢኺ እሞ፡ ስቕ ኢልኪ ተቐመጢ፡ ናብ ጸልማት ኣግልሲ።⁶ኣብ ህዝበይ ኰሬኹ፡ ርስተይ ፈንፈንኩ፡ ኣብ ኢድኪ ኸኣ ኣሕሊፈ ሃብክዎም። ንስኺ ኣይምሓርክዮምን፡ ኣርዑትኪ ኣብቶም ኣረገውቲ ኣዚኺ ኣኽበድኪ።⁷ነዚ ኣብ ልብኺ ኸየንበርኪ፡ ብናይ መወዳእታውን ከይሓሰብኪ፡ ኣነስ ኰታ ንዂሉ ግዜ እትየ እየ፡ በልኪ።
   ⁸እምበኣርሲ ኣቲ ግዲ ዂሉ ዘይብልኪ፡ ብልብኺ ኸኣ፡ ኣነ ጥራይ እየ እምበር፡ ብጀካይ ካልእ የልቦን፡ ኣነስ ከቶ ኣይክምብሉን፡ ስእነት ውሉድውን ኣይክፈልጥን እየ፡ እትብሊ ተሰዋኒት፡ ነዚ ስምዒ፡⁹ክልቲኣተን፡ ስእነት ውሉድን ምብልውናን፡ ብሓንቲ መዓልቲ ድንገት ክመጻኺ እየን። ምንም እኳ ጥንቁልናኺ እንተ በዝሐ፡ ምዕዛምኪውን እንተ በርትዐ፡ ብምሉእ መስፈር ክመጻኺ እየን።¹⁰ብኽፍኣትኪ ተወከልኪ እሞ፡ ዝርኣየኒ የልቦን፡ በልኪ፡ ጥበብክን ፍልጠትክን ኣስሓተኪ፡ ብልብኺውን፡ ኣነ እምበር፡ ብጀካይ ካልእ የልቦን፡ በልኪ።¹¹ስለዚ ኽትዕዝምዮ ዘይከኣለኪ መዓት ክመጻኪ፡ ከተዝብልዮ ዘይኰነልኪ መከራ ኸኣ ክወርደኪ እዩ፡ ዘይፈለጥክዮ ጥፍኣት ድማ ብድንገት ክወርደኪ እዩ።¹²ምናልባሽ እንተ ጠቐመኪ፡ ምናልባሽ እንተ ኣሰምበደክስ፡ ነቲ ኻብ ንእስነትኪ ጀሚርኪ ዝጸዓርክሉ ጥንቈላን ብዝሒ ኣስማትክን ሒዝኪ፡ ቕረቢ።¹³ብብዝሒ ምኽርታትኪ ደኸምኪ፡ እቶም ፈለጥቲ ትእምርቲ ሰማይን እቶም ቈጸርቲ ኸዋኽብትን እቶም ነቲ ኣብ ሰሰርቂ ወርሒ ዝረኽበኪ ዝነግሩኽን ይተንስኡ እሞ የድሕኑኺ።¹⁴እንሆ፡ ንሳቶም ከም ሓሰር እዮም፡ ሓዊ የንድዶም፡ ካብ ሓይሊ ሃልሃልታ ንነፍሶም ኣየድሕንዋን። ጓህሪ ንምስሓን ዝኸውን፡ ሓዊ ኸኣ ኣብ ቅድሚኡ ኾፍ ንምባል ዝኸውን ኣይክህሉን እዩ።¹⁵ዕድል እቶም ዝጸዓርክሎም ከምዚ ክኸውን እዩ። እቶም ካብ ንእስነትኪ ጀሚሮም መናግድትኺ ዝነበሩ መመገዶም ጸው ክብሉ እዮም፡ ሓደ እኳ ዘድሕነኪ የልቦን።

ትን. ኢሳይያስ ምዕራፍ 48

   ¹ኣቱም ቤት ያእቆብ፡ ብስም እስራኤል እትስመዩ፡ ካብ ዓይኒ ማይ ይሁዳ ኸኣ ዝፈልፈልኩም፡ ብሓቅን ብጽድቅን ደኣ ኣይኰነን እምበር፡ ብስም እግዚኣብሄር እትምሕሉ፡ ንኣምላኽ እስራኤል ከኣ እትውድሱ ዘሎኹም፡ እዚ ስምዑ፡²በታ ቅድስቲ ኸተማ ስለ እተሰምዩ፡ ኣብ ጐይታ ሰራዊት ዝስሙ ኣምላኽ እስራኤል ከኣ ስለ እተጸግዑ እዮም።³እቲ ሕሉፍ ኣቐዲመ ነገርኩ፡ ካብ ኣፈይ ወጺኡ እዩ እሞ ኣስማዕኩኹም፡ ብድንገት ገበርክዎ፡ ኰነ ኸኣ።⁴ህልኸኛ ምዃንካን፡ ክሳድካ ጅማት ሓጺን፡ ግንባርካውን ኣስራዚ ምዃኑን ፈሊጠ እየ እሞ፡⁵ስለዚ፡ ጣኦተይ እዩ ዝገበሮ፡ እቲ ጽሩብን ፍሱስን ምስለይ እዩ ዝኣዘዞ፡ ከይትብልሲ፡ ኣቐዲመ ነገርኩኻ፡ ከይኰነ ኸኣ ኣስማዕኩኻ።⁶ነዚ ሰሚዕካ ኣሎኻ፡ ንዂሉውን ጠምቶ፡ ንስኻትኩምሲ ኣይተውርይዎንዶ ኢኹም ካብ ሕጂ ጀሚሩ ሓድሽን ሕቡእን ዘይፈለጥካዮን ነገር ከስማዓካ እየ።⁷ሕጂ ተፈጥረ እምበር፡ ቀደም ኣይኰነን፡ ንስኻ፡ ነዝስ እፈልጦ ነይረ፡ ምእንቲ ኸይትብል፡ ቅድሚ ሎሚ ኣይሰማዕካዮን።⁸ኣይሰማዕካን፡ ኣይፈለጥካን፡ እዝንኻውን ካብ ቀደም ኣይተኸፍተን። እዚ ኸኣ ጠላሚ ምዃንካን፡ ካብ ማሕጸን ኣዴኻ ጀሚሮም ገበነኛ ኢሎም ከም ዝሰምዩኻን ስለ ዝፈለጥኩ እዩ።⁹ስለ ስመይ ኢለ ቁጥዓይ ኤደንጒ፡ ከየጽንተካ ድማ፡ ስለ ኽብረይ ኢለ ርእሰይ እገትእ ኣሎኹ።¹⁰እንሆ፡ ኣምከኽኩኻ፡ ግናኸ ከም ብሩር ኣይኰነን፡ ኣብ እቶን ጸበባ ተዓዘብኩኻ።¹¹ስለይ፡ እወ፡ ስለይ ኢለ ኽገብሮ እየ፡ ከመይ ኢለኸ ንስመይ ይርከስ ክሓድጎ ክብረይ ከኣ ንኻልእ ኣይህብን እየ።
   ¹²ኣታ ያእቆብ፡ ንስኻውን ዝጸዋዕኩኻ እስራኤል፡ ስምዓኒ፡ ንሱ ኣነ እየ፡ ቀዳማይ ኣነ እየ፡ ዳሕራይውን ኣነ እየ።¹³ኢደይ ምድሪ ሰረተት፡ የማነይተይ ከኣ ሰማያት ዘርግሐት፡ ምስ ዝጽውዖም ድማ ብሓደ ይቘሙ።¹⁴ኲላትኩም ተኣከቡ እሞ ስምዑ፡ ካባታቶምከ እዚ ዝገበረ መን እዩ እቲ እግዚኣብሄር ዘፍቅሮ ንፍቓዱ ኣብ ልዕሊ ባቢሎን ክፍጽሞ እዩ፡ ቅልጽሙ ድማ ኣብ ልዕሊ ከለዳውያን ክኸውን እዩ።¹⁵ኣነ፡ ኣነ እየ እተዛረብክዎን ዝጸዋዕክዎን፡ ኣነ እየ ዘምጻእክዎ እሞ መገዱ ኽሰልጠሉ እዩ።¹⁶ናባይ ቅረቡ፡ እዚ ስምዑ፡ ካብ መጀመርታ ብሕቡእ ኣይተዛረብኩን፡ ካብቲ ዝዀነሉ ዘመን ጀሚረ ኣብኡ ኣሎኹ። ሕጂውን እግዚኣብሄር ኣምላኽ ንኣይን ንመንፈሱን ልኢኹ ኣሎ።¹⁷እግዚኣብሄር፡ እቲ ተበጃዊኻ ናይ እስራኤል ቅዱስ፡ ከምዚ ይብል፡ ነቲ ዝጠቕም ዝምህረካን፡ በታ እተኸደላ መገዲ ዝመርሓካን ኣነ እግዚኣብሄር ኣምላኽካ እየ።¹⁸ኣየ፡ ትእዛዛተይ ሰሚዕካ እንተ ትኸውንሲ፡ ሰላምካ ኸም ወሓዚ፡ ጽድቅኻውን ከም ማዕበል ባሕሪ ምዀነ ነይሩ፡¹⁹ዘርእኻ ኸም ሑጻ፡ ፍረ ኸርስኻውን፡ ከም ድበቱ ምዀነ። ስሙ ከቶ ኣይምጠፍአን፡ ካብ ቅድመይ ድማ ኣይምተደምሰሰን ነይሩ።
   ²⁰ካብ ባቢሎን ውጹ፡ ካብ ከለዳውያን ጽለቑ፡ ብድምጺ እልልታ ንገሩ፡ ኣውጁ፡ ክሳዕ ወሰን ምድሪ ኣውርዩ እሞ፡ እግዚኣብሄር ንያእቆብ ባርያኡ ተበጅይዎ፡ በሉ።²¹ብምድረ በዳ ኽመርሖም ከሎ፡ ኣይጸምኡን፡ ማይ ካብ ከውሒ ኣውሓዘሎም፡ ከውሒ ሰንጢቑ ማይ ኣፈልፈለ።²²ንረሲኣንሲ ሰላም የብሎምን፡ ይብል እግዚኣብሄር።

ትን. ኢሳይያስ ምዕራፍ 49

   ¹ኣትን ደሴታት፡ ስምዓኒ፡ ኣቱም ኣብ ርሑቕ ዘሎኹም ህዝቢ፡ ጽን በሉ፡ እግዚኣብሄር ካብ ማሕጸን ጸውዓኒ፡ ካብ ከርሲ ኣደይ ጀሚሩ ስመይ ዘከረ።²ንኣፈይ ከም በሊሕ ሰይፊ ገበሮ፡ ኣብ ጽላል ኢዱ ኸኣ ሓብኣኒ፡ ስሑል ፍላጻ ገበረኒ፡ ኣብ ጒልድባኡውን ከወለኒ፡³ኣታ እስራኤል ኣነ ዝኸብረሉ ባርያይ፡ ንስኻ ኢኻ፡ ከኣ በለኒ።⁴ኣነ ግና፡ ብኸንቱ ጸዓርኩ፡ ንዘይጠቅም ብኸምኡ ሓይለይ ወዳእኩ፡ ግናኸ ፍርደይ ኣብ እግዚኣብሄር፡ ዓስበይ ከኣ ኣብ ኣምላኸይ እዩ፡ በልኩ።⁵እምበኣርሲ እቲ ኣነ ባርያኡ ክኸውን፡ ንያእቆብ ናብኡ ኽመልሶ ንእስራኤልውን ናብኡ ኽእክቦ ኢሉ፡ ካብ ማሕጸን ጀሚሩ ዝደኰነኒ እግዚኣብሄር ይብል ኣሎ፡ ኣነስ ኣብ ዓይኒ እግዚኣብሄር ክቡር እየ፡ ኣምላኸይ ከኣ ሓይለይ ኰነ፡⁶እወ፡ ንሱ ይብል፡ ንነገድ ያእቆብ ንምትንሳእ፡ ነቶም ዝተረፉ እስራኤል ንምምላስ፡ ባርያይ ምዃንካ ኣዝዩ ሒደት እዩ። ምድሓነይ ክሳዕ ወሰን ምድሪ ምእንቲ ኽበጽሕሲ፡ ብርሃን ኣህዛብ ከኣ ክገብረካ እየ።⁷ነቲ ሰብ ዝነዓቖ፡ ህዝብታት ዝፈንፈንዎ ባርያ ገዛእቲ፡ ንእኡ እግዚኣብሄር፡ እቲ ተበጃዊ እስራኤልን ቅዱስን፡ ስለቲ እሙን እግዚኣብሄርን ስለቲ ዝመረጸካ ናይ እስራኤል ቅዱስን ኢሎም ነገስታት ርእዮም ክትንስኡ፡ መሳፍንቲውን ክሰግዱ እዮም፡ ይብል ኣሎ።
   ^8-9እግዚኣብሄር ከምዚ ይብል ኣሎ፡ ብምሽእቲ ግዜ ሰማዕኩኻ፡ ብመዓልቲ ምድሓን ከኣ ረዳእኩኻ። ንምድሪ ኸተቑማ፡ ዝበረሰ ርስቲ ኸተውርሶም፡ ንእሱራት፡ ውጹ፡ ነቶም ኣብ ጸልማት ዘለው ድማ፡ ተረኣዩ፡ ክትብልሲ ኽሕልወካን ንቓል ኪዳን ህዝቢ ኽህበካን እየ። ኣብ መገዲ ኽበልዑ፡ ኣብ ኲሉ መላጥ ኰረቢት ድማ መጓስዪ ኽረኽቡ እዮም።¹⁰እቲ ዝርሕርሓሎም ክመርሖም፡ ኣብ ዓይኒ ማይ ከኣ ከብጽሖም እዩ እሞ፡ ኣይክጠምዩን ኣይክጸምኡንውን እዮም፡ ሃሩር ወይስ ጸሓይ ኣይክጐድኦምን እዩ።¹¹ንዂሉ ኣኽራነይ መገዲ ኽገብሮ እየ፡ ጽርግያታተይ ከኣ ልዕል ክብል እዩ፡¹²እንሆ፡ እዚኣቶም ካብ ርሑቕ ይመጹ፡ እዚኣቶም ካብ ሰሜንን ካብ ምዕራብን፡ እዚኣቶም ከኣ ካብ ሃገር ሲኒም ይመጹ።
   ¹³እግዚኣብሄር ንህዝቡ ኣጸናንዐ፡ ንሽጉራቱውን ክምሕሮም እዩ እሞ፡ ኣቱም ሰማያት፡ እልል በሉ፡ ኣቲ ምድሪ፡ ተሓጐሲ፡ ኣቱም ኣኽራን፡ እልል እናበልኩም ጨድሩ።¹⁴ጽዮን ግና፡ እግዚኣብሄር ራሕ ኣቢሉ ሓዲጉኒ፡ ጐይታ ረሲዑኒ፡ በለት።¹⁵ሰበይቲዶ ንፍረ ኸርሳ ኽሳዕ ዘይትርሕርሓሉ፡ ነቲ ዝጠቡ ውሉዳ ኽትርስዕ ይከኣላ እዩ ምንም እኳ ንሳተን እንተ ረስዓ፡ ኣነስ ኣይክርስዓክን እየ።¹⁶እንሆ፡ ኣብ ኢደይ ወቂጠኪ ኣሎኹ፡ ቀጽርታትኪ ድማ ኲሉ ግዜ ኣብ ቅድሚ ዓይነይ እዩ።¹⁷ውሉድኪ ቐልጢፎም ይመጹ፡ መፍርስትኺን መጥፋእትኽን ይወጹልኪ።¹⁸ዓይኒኺ ቑሊሕ ኣብሊ እሞ ኣብ ዙርያኺ ጠምቲ፡ ኲላቶም ተኣኻኺቦም ናባኺ ይሙጹ ኣለው። ኣነ ህያው እየ፡ ይብል እግዚኣብሄር፡ ንዂላቶም ከም ስልማት ክትክደንዮም፡ ከም መርዓት ከኣ ክትወናዘፍዮም ኢኺ።¹⁹ኣብቲ ዑናኽን ዝባደመ ቦታኽን፡ ኣብቲ ዝጠፍእ ምድርኽን ሕጂ ብርግጽ ነቶም ዝነብሩኺ ኽትጸብዮም ኢኺ፡ እቶም ዝወሓጡኺ ድማ ክርሕቁ እዮም።²⁰እቶም ጠፊኦም ዝነበሩ ውሉድኪ ኸኣ፡ ስፍራ ጸቢቡኒ፡ ክነብረሉ ዀታ ኣርሕብለይ፡ ኢሎም ኣብ እዝንኺ ኽዛረቡኺ እዮም።²¹ሽዑ ብልብኺ፡ ነዚኣቶም መን ወለደለይ ኣነ ውሉደይ ዝጠፍኡኒ መኻን ምርኽትን ስጉጒትን ዝነበርኩስ፡ ነዚኣቶም መን ኣዕበዮም እኔኹ፡ በይነይ ተሪፈ ነበርኩ፡ እዚኣቶም ደኣ ኣበይ ነበሩ ክትብሊ ኢኺ።
   ²²እግዚኣብሄር ኣምላኽ ከምዚ ይብል፡ እንሆ፡ ኢደይ ናብ ኣህዛብ ኣቢለ ኸልዕል፡ ንሰንደቕ ዕላማይ ከኣ ናብ ህዝብታት ከቑሞ እየ። ንሳቶም ድማ ነወዳትኪ ሓቑፎም ከምጽኡልኪ፡ ነዋልድኪውን ክሕንግርወን እዮም፡²³ነገስታት ከኣ መዕበይትኺ፡ ንግስትታቶም ድማ መጒዚታትኪ ክዀኑ፡ ብገጾም ኣብ ምድሪ ተደፊኦም ክሰግዱልኪ፡ ተጐጓ እግርኺውን ክልሕሱ እዮም። ንስኺ ኸኣ ኣነ እግዚኣብሄር ምዃነይ፡ እቶም ዝጽበዩኒ ድማ ከም ዘይሓፍሩን፡ ክትፈልጢ ኢኺ።
   ²⁴ንጅግናዶ ነቲ ዝዘረፎ የግድፍዎ እዮም ወይስ እቲ እተማረኸ ጻድቕዶ የምልጥ እዩ²⁵እግዚኣብሄር ከምዚ ይብል፡ ምሩኻት እቲ ጅግና እኳ ኽዝረፉ እዮም፡ ምርኮ እቲ ጨካን ከኣ ክምለስ እዩ። ኣነ ኸኣ ንመጻርርትኺ ኽጻረሮም፡ ንደቅኺውን ከድሕኖም እየ።²⁶ንጠቓዕትኺ ስጋ ርእሶም ከብልዖም እየ፡ ብደም ርእሶም ከኣ ከም ብዀልዒ ወይኒ ኽሰኽሩ እዮም፡ ኲሉ ስጋ ድማ፡ ኣነ እግዚኣብሄር መድሓኒኽን ተበጃዊኽን፡ እቲ ናይ ያእቆብ ስልጡን ምዃነይ ክፈልጥ እዩ።

ትን. ኢሳይያስ ምዕራፍ 50

   ¹እግዚኣብሄር ከምዚ ይብል፡ እቲ ኣነ ዝፈታሕኩሉ ጽሕፈት ምፍታሕ ኣዴኹም ደኣ ኣበይ ኣሎ እቲ ንእኡ ዝሸጥኩኹም ብዓል ዕዳይ መን እዩ እንሆ፡ ብሰሪ በደልኩም ደኣ ኢኹም እተሸጥኩም፡ ብሰሪ ገበንኩም ድማ ኣዴኹም ተፈትሐት።²ስለምንታይ እዩ ምስ መጻእኩስ፡ ሓደ እኳ ዘይጸንሐ ጸዊዐ ኸኣ ሓደ እኳ ዘይመልሰለይ ብሓቂዶ ኢደይ ንምብጃው ሓጻር እያ ወይስ ከናግፍዶ ሓይሊ የብለይን እንሆ፡ ብመግናሕተይ ንባሕሪ አንጽፎ፡ ንወሓይዝ ድማ ምድሪ ኣጻምእ እገብሮ፡ ሰኣን ማይ ከኣ ዓሳታቱ ብጽምኢ ሞይቶም ይምሽምሹ።³ንሰማያት ብጸልማት እኽደኖ፡ መጐልበቢኡ ድማ ከሊ እገብሮ።
   ⁴ንድኹም ብቓል ገይረ ምጽንናዕ ምእንቲ ኽፈልጥሲ፡ እግዚኣብሄር ኣምላኽ ናይ ምሁራት ልሳን ሃበኒ። ኣብ ጸጽባሕ የንቅሕ፡ ከም ተመሃሮ ኽሰምዕስ፡ ንእዝነይ የንቅሖ።⁵እግዚኣብሄር ኣምላኽ እዝነይ ከፈተለይ፡ ኣነውን ኣይኣቤኹን፡ ኣየድሓርሓርኩን።⁶ዝባነይ ንገረፍቲ፡ ምዕጒርተይ ከኣ ንነጸይቲ ጸጒሪ ሃብኩ፡ ገጸይ ድማ ካብ ጸርፍን ጡፍ ምባልን ኣይከወልኩን።⁷እግዚኣብሄር ኣምላኽ ይረድኣኒ እዩ እሞ፡ ስለዚ ተጓእ ኣይበልኩን። ስለዚ ንገጸይ ከም ዓረ ገበርክዎ፡ ከም ዘይሓፍር ከኣ ፈለጥኩ።⁸እቲ ዘጽድቐኒ ቐረባ እዩ፡ መን እዩ ዝማጐተኒ ብሓደ ንቑም። መንከ እዩ ተጻራርየይ ይቕረበኒ።⁹እንሆ፡ እግዚኣብሄር ኣምላኽ ይረድኣኒ፡ ዝዂንነኒ ደኣ መን እዩ እንሆ፡ ኲላቶም ከም ዓለባ ኽበልዩ፡ ብልዒውን ክበልዖም እዩ።
   ¹⁰ካባኻትኩምሲ ንእግዚኣብሄር ዝፈርህ፡ ንድምጺ ባርያኡውን ዝሰምዕ መን እዩ እቲ ብጸልማት ዝመላለስ ብርሃን ከኣ ዝስእን፡ ኣብ ስም እግዚኣብሄር ይወከል፡ ኣብ ኣምላኹውን ይጸጋዕ።¹¹እንሆ፡ ኣቱም ሓዊ እተንድዱ ዂላትኩም፡ እያድ ከኣ እትዕጠቑ፡ ኣብቲ ሃልሃልታ ሓውኹምን ኣብቲ ዘንደድኩምዎ እያድን ኪዱ፡ እዚ ኻብ ኢደይ እዩ ዝመጻኩም፡ ኣብ ስቓይ ክትድቅሱ ኢኹም።

ትን. ኢሳይያስ ምዕራፍ 51

   ¹ኣቱም ንጽድቂ እትስዕቡ፡ ንእግዚኣብሄር ከኣ እትደልዩ፡ ጽን በሉኒ፡ ናብቲ እተፈንጫሕኩምሉ ኸውሕን፡ ናብታ እተዀዓትኩምላ ጒድጓድ ዔላን ኣስተብህሉ።²ሓደ በይኑ ኸሎ፡ ጸዊዐዮን ባሪኸዮን ኣብዚሐዮን እየ እሞ፡ ናብ ኣቦኹም ኣብርሃምን፡ ናብታ ዝወለደትኩም ሳራን ኣስተብህሉ።³እግዚኣብሄር ንጽዮን ከጸናንዓ፡ ንዂሉ ዑናታታ ኸጸናንዕ፡ ንምድረ በዳኣ ኸም ገነት፡ ንበረኻኣ ድማ ከም ኣታኽልቲ እግዚኣብሄር ክገብሮ እዩ እሞ፡ ደስታን ሓጐስን ምስጋናን ቃና መዝሙርን ኣብኣ ኽርከብ እዩ።
   ⁴ሕጊ ኻባይ ይወጽእ፡ ብርሃን ህዝብታት ክኸውንሲ፡ ፍርደይ ከንብር እየ እሞ፡ ኣታ ህዝበይ፡ ናባይ ኣድህብ፡ ኣታ ዓሌተይ፡ ጽን በለኒ።⁵ጽድቀይ ድማ ንህዝብታት ክፈርዱ፡ ደሴታት ክትስፈዋኒ፡ ኣብ ቅልጽመይ ከኣ ክውከላ እየን።⁶ኣዒንትኹም ናብ ሰማያት ቁሊሕ ኣብሉ፡ ታሕቲ ገጽኩም ከኣ ናብ ምድሪ ጠምቱ፡ እንሆ፡ ሰማያት ከም ትኪ ኽበኑ እዮም፡ ምድሪ ድማ ከም ክዳን ክትበሊ እያ፡ እቶም ኣብኣ ዝነብሩውን ከምኣ ኽሞቱ እዮም። ምድሓነይ ግና ንዘለኣለም ክነብር፡ ጽድቀይውን ኣይክስዓርን እዩ።^7-8ፍልሖ ኸም ክዳን ክበልዖም፡ ብልዒ ኸኣ ከም ጸምሪ ኽበልዖም እዩ፡ ጽድቀይ ግና ንዘለኣለም፡ ምድሓነይውን ንውሉድ ወለዶ ኽነብር እዩ እሞ፡ ኣቱም ጽድቂ እትፈልጡ፡ ኣታ ኣብ ልብኻ ሕገይ ዘሎካ ህዝቢ፡ ስምዓኒ፡ ላግጺ ሰብ ኣይትፍርሁ፡ ብጸርፎምውን ኣይትሰምብዱ።
   ⁹ኣታ ቕልጽም እግዚኣብሄር፡ ንቓሕ፡ ንቓሕ፡ ሓይሊ ተኸደን፡ ከምቲ ብመዓልትታት ጥንቲ፡ ብዘመናት ቀደም ዝገበርካዮ፡ ንቓሕ። ንረሃብ ዝቘራረጽካ፡ ንገበል ዝወጋእካስ ንስኻዶ ኣይኰንካ¹⁰ንባሕሪ፡ ናይቲ ብርቱዕ መዓሙቑ ማያት፡ ዘንጸፍካ፡ እቶም ድሑናት ክሓልፉሉ ኸኣ ነቲ ቆር ባሕሪ መገዲ ዝገበርካዮኸ ንስኻዶ ኣይኰንካ¹¹እቶም እግዚኣብሄር እተበጀዎም ክምለሱ፡ እልል እናበሉ ናብ ጽዮን ክመጹ እዮም፡ ዘለኣለማዊ ሓጐስ ከኣ ርእሶም ክኽልል እዩ፡ ደስታን ሓጐስን ክረኽቡ እዮም፡ ጓህን እህህታን ክሃድም እዩ።
   ¹²ኣነ፡ ኣነ እየ ዘጸናንዓኩም፡ ንስኻኸ ካብዚ መዋቲ ሰብ፡ ካብዚ ኸም ሳዕሪ ዝሓልፍ ወዲ ሰብ እትፈርህሲ መን ኢኻ¹³ነቲ ሰማያት ዝገተረ፡ ንምድሪ ኸኣ ዝሰረተ፡ ነቲ ዝፈጠረካ እግዚኣብሄር ረሳዕካዮ። ኲሉ ግዜ፡ ኲሉ መዓልቲ ኻብ ነድሪ እቲ ንምጥፋእ እተዳለወ ገፋዒ ትፈርህ ኣሎኻ። ነድሪ እቲ ገፋዒ ደኣ ኣበይ ኣሎ¹⁴እቲ እሱር ቀልጢፉ ኽፍታሕ፡ ኣይክመውትን ኣይክቕበርን፡ እንጌራውን ኣይክስእንን እዩ።¹⁵ኣነ እግዚኣብሄር ኣምላኽ እየ እሞ፡ ንባሕሪ፡ ማዕበላ ኽሳዕ ዝሃምም፡ እናውጻ፡ ስሙውን እግዚኣብሄር ጐይታ ሰራዊት እዩ።¹⁶ንሰማያት ክተኽሎም፡ ንምድሪ ኸኣ ክስርታ፡ ንጽዮን ድማ፡ ንስኺ ህዝበይ ኢኺ፡ ክብልሲ ቓላተይ ኣብ ኣፍካ ኣንበርኩ፡ ብጽላል ኢደይውን ከወልኩኻ።
   ¹⁷ኣቲ፡ የሩሳሌም፡ ካብ ኢድ እግዚኣብሄር ጽዋእ ነድሩ ዝሰቴኺ፡ ነቲ ዘስክር ጽዋእ ዝሰቴኽዮን ዝጨለጥክዮን፡ ንቕሒ፡ ንቕሒ፡ ተንስኢ።¹⁸ካብ ኲሎም እቶም ዝወለደቶም ደቂ ሓደ እኳ ዝመርሓ የልቦን፡ ካብ ኲሎም እቶም ዘዕበየቶም ደቂ ሓደ እኳ ኢዳ ዝሕዝ የልቦን።¹⁹እዘን ክልተ ነገር ወረዳኺ፡ መን እሞ ኽርሕርሓልኪ እዩ ጥፍኣትን ምብራስን፡ ጥሜትን ሰይፍን እንሆልኪ። ከመይ ገይረ ኸጸናንዓኪ እየ²⁰ውሉድኪ ዛሕ ኢሎም፡ ከም ድንኩላ ኣብ መፈንጠራ ኣብ ኲሉ ቐራና መገድታት በጥ በሉ። ቁጥዓ እግዚኣብሄርን መግናሕቲ ኣምላኽክን መልኦም።²¹ስለዚ፡ኣቲ ሽግርቲ፡ ብወይኒ ደኣ ኣይኰነን እምበር፡ ኣቲ ስኽርቲ፡ ነዚ ስምዒ፡²²እግዚኣብሄር ጐይታኺ፡ እቲ ምእንቲ ህዝቡ ዝጣበቕ ኣምላኽኪ፡ ከምዚ ይብል፡ እንሆ፡ ነቲ ጽዋእ ስኽራን፡ ነቲ ጽዋእ ቁጥዓይ፡ ካብ ኢድኪ ወሰድክዎ፡ ድሕርዚ ኣይክትሰትይዮን ኢኺ።²³ኣነ ኸኣ ኣብ ኢድ እቶም ንነፍስኺ፡ ብኣኺ ኣቢልና ኽንሳገርሲ ተጐምበሲ፡ ዝበልዋ፡ መሸገርቲኺ ኽህቦ እየ፡ ንስኺ ድማ ዝባንኪ ነቶም ሓለፍቲ ኸም ምድሪ፡ ከም መገዲ ገበርክሎም።

ትን. ኢሳይያስ ምዕራፍ 52

   ¹ድሕሪ ሕጂ ዘይተገዝረን ርኹስን ኣባኺ ኣይክኣቱን እዩ እሞ፡ ኣቲ ጽዮን፡ ንቕሒ፡ ንቕሒ፡ ሓይልኺ ልበሲ፡ ዎ የሩሳሌም፡ ኣቲ ቅድስቲ ኸተማ፡ እቲ ብሉጽ ልብስኺ ልበሲ።²ኣቲ የሩሳሌም፡ ተጐጓኺ ንገፊ፡ ተንስኢ፡ ተቐመጢ። ኣቲ ምርኽቲ ጓል ጽዮን፡ ንማእሰርቲ ኽሳድኪ ፍትሕዮ።
   ³እግዚኣብሄር ከምዚ ይብል፡ ብኸምኡ ተሸጥኩም፡ በዘይ ገንዘብ ከኣ ክትብጀው ኢኹም።⁴እግዚኣብሄር ኣምላኽ ከምዚ ይብል፡ ህዝበይ ምእንቲ ኣብኣ ኽነብር፡ ቀደም ናብ ግብጺ ወረደ፡ ኣሶር ከኣ ብዘይ ምኽንያት ጠቕዖ።⁵ህዝበይ ብዘይ ምኽንያት ካብ ዝማረኽ፡ ሕጂ ኣብዚ እንታይ ኣሎኒ ይብል እግዚኣብሄር፡ ገዛእቲ ኸኣ ይጭድሩ፡ ስመይውን ኲሉ ግዜ፡ ኲሉ መዓልቲ ይጽረፍ ኣሎ።⁶ስለዚ ህዝበይ ንስመይ ክፈልጦ እዩ፡ ስለዚ በታ መዓልቲ እቲኣ፡ እኔኹልካ፡ ዝብል ኣነ ኸም ዝዀንኩ ኽፈልጥ እዩ፡ ይብል እግዚኣብሄር።
   ⁷እቲ ብስራት ዘበስር፡ ሰላም ዘውሪ፡ ሰናይ ዘበስር፡ ምድሓን ዘውሪ፡ ንጽዮን ከኣ፡ ኣምላኽኪ ይነግስ፡ ዝብል፡ ኣእጋሩ ኣብ ኣኽራን ክንደይ ጽቡቓት እየን።⁸እግዚኣብሄር ናብ ጽዮን ምስ ተመልሰ፡ ዓይኒ ንዓይኒ ኽርእይዎ እዮም እሞ፡ እቶም ደርቱምኪ ድምጾም ዓው ኣቢሎም ሓቢሮም እልል ክብሉ እዮም።⁹ኣትን ዑናታት የሩሳሌም፡ እግዚኣብሄር ንህዝቡ ስለ ዘጸናንዖ፡ ንየሩሳሌም ስለ እተበጀዋ፡ ብሓጐስ እልል በላ፡ ሓቢርክን ኣመስግና።¹⁰እግዚኣብሄር ኣብ ቅድሚ ዓይኒ ዂሎም ኣህዛብ ነቲ ቅዱስ ቅልጽሙ ቐልዖ፡ ኲለን ወሰናት ምድሪ ኸኣ ምድሓን ኣምላኽና ኽርእያ እየን።¹¹ርሓቑ፡ ርሓቑ፡ ካብዚ ውጹ፡ ርኹስ ከቶ ኣይትተንክዩ፡ ኣቱም ኣቓሑ እግዚኣብሄር እትጾሩ፡ ካብ ማእከል ውጹ፡ ንጽሁ።¹²እግዚኣብሄር ቀቅድሜኹም ክኸይድ፡ ኣምላኽ እስራኤል ድማ ደጀንኩም ክኸውን እዩ እሞ፡ ብታህዋኽ ኣይክትነቕሉን፡ ብምህዳም ከኣ ኣይክትግስግሱን ኢኹም።
   ¹³እንሆ፡ ባርያይ በእምሮ ኸስልጥ፡ ክኸብር ልዕል ክብል፡ ኣዝዩውን ክዓዝዝ እዩ።¹⁴ብዙሓት ብኣኻ ኸም እተገረሙ፡ ትርኢቱ ኻብ ካልኦት ሰብ ሕሱር ነበረ። መልክዑ ድማ ካብ ካልኦት ደቂ ሰብ ሓመቐ።¹⁵ከምኡ ኸኣ ንብዙሓት ኣህዛብ ከገርሞም እዩ። ነቲ ዘይተዘንተወሎም ክርእይዎ፡ ነቲ ዘይሰምዕዎ ድማ ከስተውዕልዎ እዮም እሞ፡ ነገስታት ኣብ ቅድሚኡ ኣፎም ክሕዙ እዮም።

ትን. ኢሳይያስ ምዕራፍ 53

   ¹ነዚ ምስክርና መን ኣመኖ ቅልጽም እግዚኣብሄር ንመን ተጋህደሉ²ኣብ ቅድሚኡ ኸም ጨንፈርን ከምቲ ኻብ ንቑጽ ምድሪ ዝወጽእ ሱርን ጨብጨበ። መልክዕን ውቃበን ኣይነበሮን፡ ምስ ርእናዮ፡ ዘብህገና ትርኢት ኣይነበሮን።³ንዑቕን ብሰብ ድርቡይን እዩ፡ ብዓል ስቓይ፡ ብሕማም ልዱይ፡ ከምቲ ኣብ ቅድሚኡ ገጾም ዝጒልብቡሉ ሰብ እተዋረደ እዩ፡ ንሕናውን ገለ እኳ ኣየቋጾርናዮን።⁴ብሓቂ ንሱ ንሕማምና ጾሮ፡ ንስቓይና ኸኣ ኣብ ነፍሱ ጸዓኖ፡ ንሕና ግና ከም እተወቕዐን ብእግዚኣብሄር ከም እተቐዝፈን ከም እተዋረደን ጌርና ኣቋጸርናዮ።⁵ንሱ ግና ብሰሪ ገበንና ቘሰለ፡ ብሰሪ ኣበሳና ድማ ተኸትከተ፡ ንሕና ሰላም ምእንቲ ኽንረክብ፡ መቕጻዕቲ ናብኡ ወረደ፡ ንሕናውን ብስምብራቱ ሓዌና።⁶ኲላትና ኸም ኣባጊዕ ተባረርና፡ ነፍሲ ወከፍ ነናብ መገዱ ዘምበለ፡ እግዚኣብሄር ከኣ ኣበሳ ዂላትና ኣብኡ ኣውደቖ።⁷መከራ ጸገበ፡ ርእሱ ኣዋረደ ኣፉውን ኣይከፈተን። ከምቲ ናብ ማሕረዲ ዝኽብከብ ገንሸል፡ ከምታ ኣብ ቅድሚ መቀዝታ ስቕ እትብል በጊዕ ኣፉ ኣይከፈተን።⁸ካብ ጥቕዓትን ፍርድን ተወስደ፡ ካብ ምድሪ ህያዋን ከም እተቘርጸ፡ ካብቶም ወለዶኡ መን ሓሰቦ ብምኽንያት ገበን ህዝበይ ተቐዝፈ።⁹እከይ ዘይገበረ፡ ሓሶት ከኣ ኣብ ኣፉ ዘይተረኽበ ኽነሱስ፡ መቓብሩ ምስ ረሲኣን ገበሩ፡ ብሞቱ ግና ምስ ሃብታም ኰነ።
   ¹⁰እግዚኣብሄር ግና ብመከራ ኽሕምሽሾ ፈተወ። ነፍሱ ንመስዋእቲ ሓጢኣት ምስ ወፈያ፡ ዘርኢ ኽርኢ፡ መዓልትታቱ ኸንውሕ እዩ፡ ፍቓድ እግዚኣብሄር ከኣ ኣብ ኢዱ ኽሰልጥ እዩ።¹¹ጻማ ነፍሱ ኽርኢ ኽጸግብውን እዩ። እቲ ጻድቕ ባርያ ብፍልጠቱ ንብዙሓት ከጽድቕ፡ ኣበሳኦም ድማ ባዕሉ ኽጸውር እዩ።¹²ነፍሱ ንሞት ስለ ዝወፈያ፡ ምስ በደለኛታት ከኣ ስለ እተቘጽረ፡ ስለዚ ግዲኡ ምስ ዓበይቲ ኽመቕሎ እየ፡ ምርኮውን ምስ ሓያላት ክመቅል እዩ። ግናኸ ሓጢኣት ብዙሓት ጾረ፡ ምእንቲ በደለኛታት ከኣ ለመነ።

ትን. ኢሳይያስ ምዕራፍ 54

   ¹ካብ ደቂ እታ ምርዕውቲስ ደቂ እታ በይና ዘላ ኽበዝሑ እዮም እሞ፡ ኣቲ ዘይወለድኪ መኻን፡ እልል በሊ፡ ኣቲ ንምውላድ ዘይጸዓርኪ፡ ዓው ኢልኪ ብደስታ ጨድሪ፡ ይብል እግዚኣብሄር።^2-3ናብ የማነ ጸጋም ከተስፋሕፍሒ ኢኺ፡ ዘርእኺ ነህዛብ ክወርሶም፡ ነተን ዝዓነዋ ኸተማታት ከኣ፡ ሰብ ከም ዝነብረለን ክገብረን እዩ እሞ፡ ስፍራ ድንኳንኪ ኣርሕቢ፡ እቲ መጋረጃታት ማሕደርኺ ብዘይ ምቑጣብ ይገተር፡ ኣግማድኪ ኣንውሒ፡ መታኽልክውን ኣጽንዒ።^4-5ፈጣሪኺ ሰብኣይኪ እዩ እሞ፡ ስሙ እግዚኣብሄር ጐይታ ሰራዊት እዩ፡ እቲ ናይ እስራኤል ቅዱስ ከኣ ተበጃዊኺ እዩ፡ ንሱ ኣምላኽ ኲሉ ምድሪውን ይበሃል። ስለዚ ኣይክትሓፍርን ኢኺ እሞ ኣይትፍርሂ፡ ኣይክትንውርን ኢኺ እሞ ኣይትሕነኺ፡ እረ ነውሪ ንእስነትኪ ኽትርስዒ፡ ጸርፊ ምብልውናኺ ድማ ድሕርዚ ኣይክትዝክርን ኢኺ።⁶ከምታ መንፈሳ ዝጐሃየ ፍትሕቲ ሰበይቲ፡ ከምታ ሕድግቲ ንእሽቶ መርዓት፡ እግዚኣብሄር ጸውዓኪ፡ ይብል ኣምላኽኪ።⁷ንሓጻር ግዜሓደግኩኺ፡ ብዓብዪ ምሕረት ግና ኽእክበኪ እየ።⁸ብምፍሳስ ቁጥዓ ንቕጽበት ዓይኒ ገጸይ ከወልኩልኪ፡ ብዘለኣለማዊ ምሕረት ግና ክርሕርሓልኪ እየ፡ ይብል እቲ ተበጃዊኺ ኣምላኽ።⁹እዚ ንኣይ ከምቲ ማያት ኖህ እዩ እሞ፡ ማያት ኖህ ኣብ ምድሪ መሊሱ ኸይውሕዝ ከም ዝመሓልኩ፡ ከምኡውን ከይቁጥዓክን ከይገንሓክን እምሕል ኣሎኹ።¹⁰ስለዚ ኣኽራን እኳ እንተ ዘበሉ፡ ኰረቢትውን ነነይ እንተ በሉ፡ ምሕረተይሲ ኻባኺ ኣይክዘብልን፡ ኪዳን ሰላመይ ድማ ነነይ ኣይክብልን እዩ፡ ይብል እቲ ዝርሕርሓልኪ እግዚኣብሄር።
   ¹¹ኣቲ ህቦብላ ዝደፍኣኪ፡ ዘይተጸናናዕኪ፡ ሕዝንቲ፡ እንሆ፡ ነእማንኪ ሰሊመ ኽነድቆ፡ ብሰጲሮስ ከኣ ክስርተኪ፡¹²ጒልላት ግምብኺ ብሮቢኖስ፡ ደጌታትኪ ብህያክንቶስ፡ መካበብያኺ ዂሉ ድማ ብኽቡር እምኒ ኽገብሮ እየ።¹³ኲላቶም ደቅኺ ብእግዚኣብሄር ክምሃሩ እዮም፡ ሰላም ደቅኺውን ዓብዪ ክኸውን እዩ።¹⁴ብጽድቂ ኽትጸንዒ ኢኺ። እትፈርህዮ የብልክን እሞ፡ ካብ ግፍዒ ርሓቒ። ስምባድ ኣይክቐርበክን እዩ እሞ፡ ካብኡ ርሓቒ።¹⁵እንሆ፡ ካባይ ደኣ ኣይኰነን እምበር፡ ሓቢሮም ይተኣኻኸቡ ኣለው፡ ዝዀነ እንተ ዀነ እቶም ክጻረሩኺ ዝሳማምዑ ዂሎም ኣብ ቅድሜኺ ኽወድቁ እዮም።¹⁶እንሆ፡ ነቲ ንሕመት ነፊሑ ዘጒህሮ መሳርያ ዕዮኡ ኸኣ ዝገብር ኣንጠረኛ ኣነ እየ ዝፈጠርክዎ። ኣነውን እየ ነቲ መጥፍኢ፡ ከብርስ ኢለ፡ ዝፈጠርክዎ።¹⁷ንኣኺ ኽወግኡሉ እተሰርሐ ኣጽዋር ኲሉ ኣይክጠቅምን እዩ፡ ነቲ ንፍርዲ ዝትንስኣኪ ዂሉ ልሳን ድማ ክትረትዕዮ ኢኺ። እዚ እዩ ርስቲ ባሮት እግዚኣብሄር፡ ጽድቆምውን ካባይ እዩ፡ ይብል እግዚኣብሄር።

ትን. ኢሳይያስ ምዕራፍ 55

   ¹ኣቱም ጽሙኣት ኲላትኩም፡ ናብ ማያት ንዑ፡ ኣቱም ገንዘብ ዘይብልኩም ከኣ፡ ንዑ ተሻየጡ እሞ ብልዑ። እወ ንዑ፡ ብዘይ ገንዘብ ብኸምኡ ወይንን ጸባን ተሻየጡ²ገንዘብኩም ነቲ እንጌራ ዘይኰነ፡ ጸማኹም ድማ ነቲ ዘየጽግበኩም እተትፍኡሉስ ስለምንታይ ተጠንቂቕኩም ስምዑኒ፡ ነቲ ዝጸበቐ ኸኣ ብልዑ፡ ነፍስኹምውን ብጣዕሚ ባህ ክብላ እዩ።³እዝንኹም ናባይ ጽለው እሞ ናባይ ንዑ፡ ስምዑ፡ ነፍስኹም ድማ ብህይወት ክትነብር እያ፡ ኣነ እቲ ንዳዊት ዘተስፎኽዎ ነባሪ ጸጋ፡ ዘለኣለማዊ ኪዳን፡ ምሳኻትኩም ክኣቱ እየ።⁴እንሆ፡ ምስክር ንህዝብታት፡ መስፍንን ገዛእን ንህዝብታት ክኸውን ሃብክዎ።⁵እንሆ፡ ንዘይትፈልጦ ህዝቢ ኽትጽውዕ ኢኻ፡ ዘይፈለጠካ ህዝቢ ድማ፡ ምእንቲ እግዚኣብሄር ኣምላኽካን ምእንቲ ናይ እስራኤል ቅዱስን፡ ንሱ ኣኽቢሩካ እዩ እሞ፡ ናባኻ ኽጐዪ እዩ።
   ⁶ንእግዚኣብሄር በቲ ዝርከበሉ ግዜ ድለይዎ፡ ቀረባ ኸሎውን ጸውዕዎ።⁷ረሲእ መገዱ፡ ዓመጸኛ ኸኣ ሓሳቡ ይሕደግ፡ ናብ እግዚኣብሄር ይመለስ፡ንሱ ኸኣ ክምሕሮ እዩ፡ ኣዝዩ ይቕረ ይብል እዩ እሞ፡ ናብ ኣምላኽናውን ይመለስ።⁸ሓሳባተይ ሓሳባትኩም ኣይኰነን፡ መገድታትኩም ከኣ መገድታተይ ኣይኰነን፡ ይብል እግዚኣብሄር።⁹ከምቲ ሰማይ ካብ ምድሪ ልዕል ዝብል፡ መገድታተይ ካብ መገድታትኩም፡ ሓሳባተይ ከኣ ካብ ሓሳባትኩም ልዕል ዝበለ እዩ።¹⁰ዝናምን ውርጭን ካብ ሰማይ ከም ዝወርድ እሞ ንምድሪ ኸይስተዮ፡ ከም ዘየፍርን ከም ዘየብቁልን ከኣ ከይገበሮ፡ ዘርኢ ንዘራኢ፡ ምግቢ ንተቐላቢ ድማ ከይሃቦ፡ ንድሕሪት ከም ዘይምለስ፡¹¹እቲ ኻብ ኣፈይ ዝወጽእ ቃለይ ከኣ ከምኡ ክኸውን እዩ፡ ነቲ ኣነ ዝደልዮ ኸስልጥ፡ ኣብቲ ኣነ ዝልእኮ ከቕንዕ እዩ እምበር፡ ብኸንቱ ናባይ ኣይክምለስን እዩ።¹²ብሓጐስ ክትወጹ፡ ብሰላም ድማ ክትስነዩ ኢኹም እሞ፡ ኣኽራንን ኰረቢትን ቀቅድሜኹም እልል ክብሉልኩም፡ ኲሎም ኣእዋም መሮርውን ከጣቕዑልኩም እዮም።¹³ኣብ ክንዲ እሾዂስ ጽሕዲ፡ ኣብ ክንዲ ኣምዐ ድማ ጸጾ ኽበቁል እዩ፡ እዚውን ንስም እግዚኣብሄርን ዘይጠፍእ ዘለኣለማዊ ምልክትን ክኸውን እዩ።

ትን. ኢሳይያስ ምዕራፍ 56

   ¹እግዚኣብሄር ከምዚ ይብል፡ ምድሓነይ ክመጽእ፡ ጽድቀይ ድማ ክግለጽ ቀረባ እዩ እሞ፡ ፍርዲ ሓልው ጽድቂውን ግበሩ።²እቲ ነዚ ዝገብር ሰብ፡ ብእኡ ዝጸንዕ፡ ንሰንበት ከየርክስ ድማ ዝጥንቀቕ፡ እከይ ከይገብርውን ኢዱ ዝሕሉ ወዲ ሰብ ብጹእ እዩ።³እቲ ምስ እግዚኣብሄር ሕብረት ዝገበረ መጻእተኛ፡ ብሓቂ እግዚኣብሄር ካብ ህዝቡ ኽፈልየኒ እዩ፡ ኣይበል። እቲ ስሉብ ድማ፡ እንሆ፡ ንቑጽ ኦም እየ፡ ኣይበል።⁴ስለዚ እግዚኣብሄር ከምዚ ይብል ኣሎ፡ ነቶም ሰናብተይ ዝሕልው፡ ንኣይ ዘሐጒስ ዝሓርዩ፡ ኪዳነይ ድማ ዘጽንዑ ስሉባት፡⁵ንኣታቶም ኣብ ቤተይን ኣብ ውሽጢ ደምበይን ስፍራ፡ ካብ ኣውዳትን ኣዋልድን ዝበልጽ ስም ክህቦም እየ።⁶ነቶም ምእንቲ ኸገልግልዎ፡ ንስም እግዚኣብሄር ከፍቅሩ፡ ባሮቱ ክዀኑ ኢሎም ምስ እግዚኣብሄር ዝሓበሩ መጻእተኛታት፡ ሰንበት ከየፍርሱ ዝጥንቀቑ፡ ኪዳነይውን ዘጽንዑ ዂላቶም፡⁷ቤተይሲ ንዂሎም ህዝብታት ቤት ጸሎት ክስመ እዩ ኣሞ፡ ንኣታቶም ናብ ቅዱስ ከረነይ ከምጽኦም፡ ኣብ ቤት ጸሎተይ ከኣ ከሓጒሶም እየ፡ ዝሓርር መስዋእትታቶምን መስዋእትታት ሕሩዶምን ኣብ መሰውእየይ ቅቡል ክኸውን እዩ።⁸እቲ ነቶም ፋሕ ኢሎም ዘለው እስራኤል ዝኣኻኽብ እግዚኣብሄር ኣምላኽ፡ ኣብ ርእሲ እቶም እኩባቱ ካልኦትውን ክእክብ እየ፡ ይብል ኣሎ።
   ⁹ኣቱም ኣራዊት መሮር ኲላትኩም፡ ኣቱም ኣራዊት ዱር ኲላትኩም፡ ክትበልዑ ንዑ።¹⁰ሓለውቱ ዕውራት እዮም፡ ኲላቶም ኣእምሮ የብሎምን፡ ኲላቶም ዘይነብሑ በሃማት ኣኽላባት እዮም፡ ይሓልሙ፡ በጥ ይብሉ፡ ድቃስ ይፈትው ኣለው።¹¹ህሩፋት ኣኽላባት ከቶ ዘይጸግቡ እዮም፡ እዚኣቶም ሓንቲ እኳ ዘየስተውዕሉ ጓሶት እዮም፡ ነፍሲ ወከፎም ካብ ቀዳማይ ክሳዕ ዳሕራይ ረብሓ ርእሱ ደለየ፡ ኲሎም ናብ መመገዶም ዘምበሉ።¹²ወይኒ ኸምጽእ እየ እሞ ንዑ፡ ብርቱዕ መስተ ሰቲና ንስከር፡ ጽባሕ ድማ ከምዚ ናይ ሎሚ፡ እረ ኣዝዩ ዝበለጸ እኳ ደኣ ክኸውን እዩ፡ ይብሉ።

ትን. ኢሳይያስ ምዕራፍ 57

   ¹ጻድቕ ይመውት እሞ ዝሓስቦ የልቦን፡ እቶም ፈራህቲ እግዚኣብሄር ከኣ ይምንጠሉ እሞ፡ እቲ ጻድቕ ካብ እከይ ከም እተኣርነበ ዘስተንትኖ የልቦን።²ናብ ሰላም ይኣቱ፡ እቶም ብቕንዕና እተመላለሱ ኣብ መደቀሲኦም ይዓርፉ።³ግናኸ ኣቱም ደቂ ጠንቋሊት፡ ዘርኢ ዘማውን ኣመንዝራን፡ ናብዚ ቕረቡ።^4-5ንመን ኢኹም እተባጭውሉ ንመንከ ኢኹም ኣፍኩም ሃህ ኣቢልኩም ልሳንኩም እተውጽኡሉ ኣቱም ንጣኦታት ኣብ ትሕቲ ዝለምዐ ዘበለ ዂሉ ኦም እትብህጉ፡ ንደቂ ድማ ኣብ ሽንጭሮታትን ኣብ ትሕቲ በዓትታት ኣኻውሕን እትሓርድዎም፡ ደቂ ኣበሳን ዘርኢ ሓሶትንዶ ኣይኰንኩምን⁶እቲ ልሙጽ ኣእማን ርባ እዩ ግዴኺ፡ ንሱ፡ ንሱ እዩ ብጽሒትኪ፡ ንእኡውን መስዋእቲ መስተ ኣፍሰስክሉ፡ መስዋእቲ ብልዒ ኣቕረብክሉ፡ ኣነዶ በዚ እሕጐስ እየ⁷ኣብ ልዕል ዝበለ በሪኽ ከረን መደቀሲኺ ኣዳሎኺ፡ ኣብኡ ድማ መስዋእቲ ሕሩድ ክትስውኢ ደየብኪ።⁸ኣብ ድሕሪ ማዕጾን ልዳትን መዘከርታኺ ገበርኪ፡ ንኣይ ሓደግኪ፡ ንኻልእ ተቐንጢጥኪ ደየብክሉ፡ንመደቀሲኺውን ኣርሓብክዮ፡ ምሳታቶም ድማ ኪዳን ኣቶኺ፡ ኣብቲ ዝርእኽዮ ቦታ ዂሉ መደቀሲኦም ፈቶኺ።⁹ዘይቲ ሒዝኪ ናብ ንጉስ ከድኪ፡ ቅዲትኪ ኸኣ ኣብዛሕኪ፡ ልኡኻትኪ ናብ ርሑቕ ለኣኽኪ፡ ክሳዕ ሲኦል ተዋረድኪ።¹⁰ብምርሓቕ መገዲ ደኸምኪ፡ ግናኸ፡ ተስፋ ቐቢጸስ፡ ኣይበልክን። መሊስኪውን ኣብ ኢድኪ ሓይሊ ረኸብኪ፡ ስለዚ ኣይተሓለልክን።¹¹እትጠልምን ዘይትዝክርንን፡ ኣብ ልብኺ ዘይትሓስብዮንሲ፡ መን እዩ ዘሰምበደክን ዘፍርሃክን ኣነዶ ነዊሕ ግዜ ስቕ ኣይበልኩን እየ ስለዚ ኸኣ ኣይፈራህክንን።¹²እምበኣር ኣነስ ጽድቅኽን ግብርኽን ክነግር እየ፡ ገለ እኳ ኣይክጠቕመክን እዩ።¹³ምስ እተእውዪ፡ እቶም እኩባትኪ የድሕኑኺ፡ ግናኸ ንፋስ ንዂላቶም ክወስዶም፡ ጸለውታ ንፋስ ከኣ ክጸርጎም እዩ። እቲ ናባይ ዝጽጋዕ ግና ነቲ ሃገር ክግንዘቦ ነቲ ቅዱስ ከረነይ ድማ ክወርሶ እዩ።
   ¹⁴ኣዓርዩ፡ ኣዓርዩ፡ መገዲ ጽረጉ፡ ካብ መገዲ ህዝበይ መዓንቀፊ ኣርሕቑ፡ ክበሃል እዩ።¹⁵ስለዚ እቲ ንዘለኣለም ዝነብር ልዑልን ዕዙዝን ቅዱስ ዝስሙን ከምዚ ይብል ኣሎ፡ ኣብቲ ልዑልን ቅዱስን ስፍራ እነብር ኣሎኹ፡ ግናኸ ንመንፈስ ትሑታት ህያው ክገብሮ፡ ንልቢ ድቑሳት ከኣ ህያው ክገብሮስ፡ ምስቲ ድቑስን ትሑትን መንፈስ ዘለዎ ሰብ ድማ እነብር ኣሎኹ።¹⁶ንዘለኣለም ኣይክብኣስን፡ ንሓዋሩ ኸኣ ኣይክቑጣዕን እየ። እንተ ዘይኮነስ እተን ዝፈጠርክወን ነፍሳትን መንፈስን ኣብ ቅድመይ ምተሓለላ።¹⁷ብሰሪ ኣበሳ ንፍገቱ እየ እተቘጣዕኩን ዝወቓዕክዎን፡ ተሓባእኩ፡ ተቘጣዕኩ ድማ፡ ንሱውን ዓልዩ ብመገዲ ልቡ ኸደ።¹⁸መገድታቱ ርእኹ፡ ከሕውዮን ክመርሖን እየ፡ ንእኡን ንጒህያቱን ከኣ ምጽንናዐይ ክመልሰሎም እየ።¹⁹ኣነ ፍረ ኸናፍር ክፈጥር እየ፡ ሰላም፡ ሰላም ነቲ ኣብ ርሑቕን ኣብ ቀረባን ዘሎ ይኹን፡ ኣነውን ከሕውዮ እየ፡ ይብል እግዚኣብሄር።²⁰እቶም ረሲኣን ግና ከምቲ ዝናወጽ ባሕሪ እዮም፡ ክሃድእ ኣይክእልን እዩ እሞ፡ ማያቱ ጭቃን ርስሓትን የውጽእ።²¹እቶም ረሲኣንሲ ሰላም የብሎምን፡ ይብል ኣምላኸይ።

ትን. ኢሳይያስ ምዕራፍ 58

   ¹ኣፍካ መሊእካ ጨድር፡ ኣይተቛርጽ፡ ድምጽኻ ኸም መለኸት ዓው ኣብል፡ ንህዝበይ ኣበሳኦም፡ ንቤት ያእቆብ ድማ ሓጢኣቶም ንገሮም።²ኣብ ጸጽባሕ ይደልዩኒ፡ መገድታተይ ክፈልጥ ድማ ይፈትው። ከምቲ ጽድቂ ዝገብርን፡ ሕጊ ኣምላኹ ዘይሓደገን ህዝብስ፡ ሕጊ ጽድቂ ኻባይ ይደልዩ፡ ናብ ኣምላኽ ክቐርቡውን ይፈትው።³ስለምንታይ ደኣ ጾምና፡ ንስኻ ድማ ዘይርእኻና ስለምንታይከ ነፍስና ኣሕሳእና፡ ንስኻውን ግዱ ዘይገበርካ እንሆ፡ ብመዓልቲ ጾምኩምሲ ተግባርኩም ኢኹም እትገብሩ፡ ንግዙኣትኩም ድማ ትገፍዕዎም ኣሎኹም።⁴እንሆ፡ ብባእስን ብምክርኻርን ብሕሱም ምውቃዕ ጒስጢትን ኢኹም እትጾሙ። ድምጽኹም ኣብ ላዕሊ ኸም ዝስማዕ ጌርኩም ሎሚ ኣይትጾሙን ኢኹም ዘሎኹም።⁵እቲ ኣነ ዝፈትዎ ጾምን፡ እታ ሰብ ንነፍሱ ዘሕስኣላ መዓልትን ከምዚ ዘመሰለ ድዩ ከም ሰልሰላ ርእስኻ ምድናንን፡ ክሻን ሓመዂስትን መንጸፍካ ምግባርን፡ ነዚ ዲኻ ጾምን እግዚኣብሄር ዝቕበሎ መዓልትን እትብሎ ዘሎኻ⁶እቲ ኣነ ዝፈትዎ ጾምሲ ንመኣሰር እከይ ምፍታሕ፡ ንማእሰርቲ ኣርዑት ምዝላቕ፡ ንጥቑዓት ምውጻእ ሓራ፡ ኣርዑት ዘበለ ዂሉውን ምስባርዶ ኣይኰነን⁷እንጌራኻ ንጥሙይ ክትመቅል፡ ነቶም እተሰዱ ድኻታት ናብ ቤትካ ኸተእቱ፡ ዕሩቕ እንተ ርእኻ ኽትከድኖ፡ ካብ ስጋካውን ከይትሕባእዶ ኣይኰነን⁸ሽዑ ብርሃንካ ኸም ወጋሕታ ዀይኑ ኽወጽእ፡ ምሕዋይካ ኸኣ ቀልጢፉ ኽበቁል፡ ጽድቅኻ ድማ ቀቅድሜኻ ክኸይድ፡ ክብሪ እግዚኣብሄርውን ደጀንካ ክኸውን እዩ።⁹ሽዑ ኽትጽውዕ፡ እግዚኣብሄር ከኣ ክመልሰልካ፡ ከተእዊ፡ ንሱ ድማ፡ እኔኹ፡ ክብል እዩ። ነርዑት፡ ንምውጥዋጥ ኣጻብዕ፡ ንሕማቕ ዘረባ ኸኣ ካብ ማእከልካ እንተ ኣርሓቕካ፡¹⁰ካብ ናብ ነፍስኻ ንጥሙይ እንተ መቐልካ፡ ንጭንቕቲ ነፍሲ እንት ኣጽገብካ፡ ሽዑ ብርሃንካ ኣብ ጸልማት ክወጽእ፡ ጸልማትካውን ከም ቀትሪ ክኸውን እዩ።¹¹እግዚኣብሄር ንዂሉ ግዜኽመርሓካ፡ ኣብ ምድሪ ኣጻምእ ንነፍስኻ ኸጽግባ፡ ነዕጽምትኻ ድማ ከበርትዖ እዩ። ንስኻ ኸኣ ከም ዝሰተየ ኣታኽልትን ከምቲ ማዩ ዘይነጽፍ ዓይኒ ማይን ክትከውን ኢኻ።¹²ደቅኻ ነቲ ቐደም ዝዓነወ ኽነድቁ እዮም፡ ንመሰረት ብዙሓት ወለዶ ኸተቕውም ኢኻ። ነዳቕ ፍሩስን፡ መሳፍሮ ዝኸውን መገዲ መዓረይን ተብሂልካ ኽትስመ ኢኻ።
   ¹³ብሰንበት፡ በታ ቅድስቲ መዓልተይ ከም ፍቓድ ርእስኻ ኸይትገብር፡ እግርኻ እንተ ዘሓጥካ፡ ንሰንበት ከኣ ደስታ፡ ነታ ቅድስቲ መዓልቲ እግዚኣብሄር ድማ ክብርቲ ኢልካ እንተ ሰሜኻያ፡ እንተ ኣኽበርካየ፡ መገዲ ርእስኻ ድማ እንተ ዘይከድካ፡ ፍቓድ ርእስኻ እንተ ዘይገበርካ፡ ከንቱ ዘረባውን እንተ ዘይተዛረብካ፡¹⁴ኣፍ እግዚኣብሄር ተዛሪቡ እዩ እሞ፡ ሽዑ ብእግዚኣብሄር ደስ ክብለካ እዩ፡ ኣነ ድማ ናብቲ በረኽቲ ምድሪ ኸደይበካ፡ ርስቲ ኣቦኻ ያእቆብውን ከብልዓካ እየ።

ትን. ኢሳይያስ ምዕራፍ 59

   ¹እንሆ፡ ኢድ እግዚኣብሄር ንምድሓን ሓጻር ኣይኰነትን፡ ከይሰምዕ ከኣ እዝኑ ኣይጻንዖን እዩ።^2-3ግናኸ ኣእዳውኩም ብደም፡ ኣጻብዕኩም ብበደል ረኺሰን፡ ከናፍርኩም ሓሶት ይዛረባ፡ ልሳንኩም ከኣ ክፍኣት ይናገር ኣሎ እሞ፡ ንኣኻትኩምን ንኣምላኽኩምን ኣብ መንጎኹም ኰይኑ ዝፈላለየኩምሲ ኣበሳኹም እዩ፡ ከይሰምዓኩም ከኣ፡ ኣብ ቅድሜኹም ገጹ ዘሕብኣልኩም ሓጢኣትኩም እዩ።⁴ብጽድቂ ዝጠርዕ ሓደ እኳ የልቦን፡ ብሓቂ ዝምጒት ሓደ እኳ የልቦን፡ ኣብ ከንቱነት ይውከሉ፡ ሓሶት ከኣ ይዛረቡ፡ እከይ ይጠንሱ፡ ሓጢኣትውን ይወልዱ ኣለው።⁵እንቋቑሖ ገበል ይሓቑፉ፡ ዓለባ ሳሬት ከኣ ይኣልሙ፡ እቲ ኻብ እንቋቕሖ ዝበልዕ ይመውት፡ ካብቲ እተጨፍለቐ ድማ መንደልቶ ይነቁሕ።⁶ዓለባኦም ክዳን ኣይከውንን፡ ብግብሮም ከኣ ኣይክኽደኑን እዮም። ግብሮም ግብሪ እከይ እዩ፡ ኣብ ኣእዳዎም ድማ ግብሪ ዓመጻ ኣሎ።⁷ኣእጋሮም ናብ እከይ ይጐይ፡ ንጹህ ደም ንምፍሳስ ይቕልጥፉ፡ ሓሳቦም ሓሳብ እከይ እዩ፡ ጥፍኣትን ምዕናውን ኣብ መገድታቶም ኣሎ።⁸ንመገዲ ሰላም ኣይፈልጥዋን፡ ኣብ ኣኻይዳኦም ቅንዕና የልቦን፡ ንመገድታቶም ይጠዋውይዎ፡ እቲ ብእኡ ዝኸይድ ዘበለ ንሰላም ከቶ ኣይፈልጣን።
   ⁹ስለዚ ቕንዕና ኻባና ረሓቐ፡ ጽድቂውን ኣየርክበናን እዩ። ንብርሃን ንጽበ፡ እንሆ ኸኣ ጸልማት፡ ንድሙቕ ብርሃን ንጽበ፡ ግናኸ ብጸልማት ኢና እንመላለስ ዘሎና።¹⁰ከም ዕውራት ንመንደቕ ሃሰስ ንብሎ፡ እወ፡ ከምቶም ዓይኒ ዘይብሎም ሃሰስ ንብሎ ኣሎና፡ ቀትሪ ኸሎስ፡ ከም ብግዜ ጽልግልግታ ደርገፍገር ንብል። ምስ ምሉእ ሓይልና ኸም ምውታት ኰንና።¹¹ኲላትና ኸም ድብታት ንሃብብ፡ ከም ረገቢት ንቑዝም፡ ንቕንዕና ንጽበ ኣሎና፡ ግናኸ የልቦን፡ ንምድሓን፡ ንሱውን ካባና ርሑቕ እዩ።
   ¹²ገበንና ኣብ ቅድሜኻ ብዙሕ እዩ እሞ፡ ሓጢኣትና ድማ ይምስክረልና ኣሎ። ገበንና ምሳና እዩ ዘሎ እሞ፡ ንኣበሳና ንፈልጦ ኢና፡¹³ካብ እግዚኣብሄር ዓሎና ኽሓድናዮውን፡ ንኣምላኽና ኸይንስዕቦ ድማ ተዝሓጥና፡ ግፍዕን ዕልወትን ተዛረብና፡ ዘረባ ሓሶት ጠኒስና ኻብ ልብና ደርጓሕናዮ።¹⁴ፍርዲ ድማ ንድሕሪት ኣቢሉ ተመልሰ፡ ጽድቂ ኸኣ ኣብ ርሑቕ ቈመ፡ ሓቂ ኣብ ኣደባባይ ወዲቑ እዩ እሞ፡ ቅንዕና ኽኣቱ ኣይተኻእሎን።¹⁵እወ፡ ሓቂ ተሳእነ፡ እቲ ኻብ እከይ ዝርሕቕ ድማ ርእሱ ንዘመተ ይውፊ፡ እግዚኣብሄር እዚ ረኣየ፡ ቅንዕና ስለ ዘየልቦ ኸኣ ጐሃየ።
   ¹⁶ደጊም ሓደ እኳ ኸም ዘየልቦ ረኣየ፡ ሓደ እኳ ዘማልድ ስለ እተሳእነ ተገረመ። ሽዑ ቕልጽሙ ረድኦ፡ ጽድቁውን ደገፎ።¹⁷ንጽድቂ ኸም ድርዒ ገይሩ ተኸድኖ፡ ኣብ ርእሱ ድማ ናይ ምድሓን ቁራዕ ርእሲ ኣእተወ። ክዳን ምፍዳይ ሕነ ኸኣ ተወንዘፈ፡ ንጸዓትውን ከም ባርኖስ ገይሩ ለፈፎ።¹⁸ከከም ግብሮም ክፈድዮም እዩ፡ ኲራ ንተጻረርቱ፡ ፍዳ ንጸላእቱ፡ ንደሴታትውን ፍዳ ኽህብ እዩ።¹⁹እምበኣርሲ ስም እግዚኣብሄር ካብ ምዕራብ፡ክብሩ ኸኣ ካብ ምብራቕ ጸሓይ ክፍራህ እዩ። ጸላኢ ኸም ውሒዝ ደሪኹ እንተ መጸ፡ ትንፋስ እግዚኣብሄር ክሰጎ እዩ።²⁰ንጽዮንን ነቶም ካብ ምዕላዎም ናብ ያእቆብ ዝምለሱን ተበጃዊ ኽመጽእ እዩ፡ ይብል እግዚኣብሄር።²¹ኣነስ ኪዳነይ ምሳታቶም እዚ እዩ፡ ይብል እግዚኣብሄር፡ እቲ ኣባኻ ዘሎ መንፈሰይን፡ እተን ኣብ ኣፍካ ዘንበርክወን ቃላተይን ካብ ኣፍካ ወይስ ካብ ኣፍ ደቅኻ ወይ ካብ ኣፍ ደቂ ደቅካ ኻብ ሕጂ ኽሳዕ ዘለኣለም ኣይክርሕቕን እዩ፡ ይብል እግዚኣብሄር።

ትን. ኢሳይያስ ምዕራፍ 60

   ¹ብርሃንኪ መጺኡ፡ ክብሪ እግዚኣብሄር ከኣ ወጺኡልኪ እዩ እሞ፡ ተንስኢ፡ ብርሂ።²እንሆ፡ ጸልማት ንምድሪ፡ ጣቓ ድማ ንህዝብታት የጐልብቦም፡ ግናኸ እግዚኣብሄር ኣብ ልዕሌኺ ኽወጽእ፡ ክብሩውን ኣብ ልዕሌኺ ኽርእ እዩ።³ኣህዛብ ናብ ብርሃንኪ፡ ነገስታት ከኣ ናብ ጸዳል ምብራቕኪ ኽመጹ እዮም።⁴ኣዒንትኺ ናብ ዙርያ ቛሕ ኣብሊ እሞ ጠምቲ፡ ኲሎም ተኣኪቦም ናባኺ ይመጹ ኣለው፡ ኣወዳትኪ ኻብ ርሑቕ፡ ኣዋልድኪውን ተሓቑፈን ይመጹ ኣለው።⁵ምልኣት ባሕሪ ናባኺ ኽምለስ፡ ሃብቲ ኣህዛብ ከኣ ናባኺ ኽመጽእ እዩ እሞ፡ ሽዑ ኽትርእዪ፡ ብታሕጓስ ድማ ከተንጸባርቒ ኢኺ፡ ልብኺውን ትርግርግ ክብልን ክርሕብን እዩ።⁶ብዝሒ ኣግማልን ረብዓት ኣግማል ሚድያንን ኤፋን ኪለማኺ እየን፡ ኲላቶም ካብ ሳባ ኽመጹ፡ ወርቅን ዕጣንን ከምጽኡ፡ ውዳሴ እግዚኣብሄር ከኣ ክነግሩ እዮም።⁷ኲላተን መጓሴታት ቄዳር ናባኺ ኽእከባ፡ ድቤላታት ኔባዩት ከገልግሉኺ፡ ባህ ንምባለይ ናብ መሰውእየይ ክስውኡ እዮም፡ ኣነውን ንቤት ክብረይ ከኽብሮ እየ።
   ⁸እዞም ከም ደበናን ከም ናብ ኣባይተን ዝነፍራ ረገቢትን ዝመጹ እንታዎት እዮም⁹ደሴታት ይጽበያኒ፡ ንሱ ኣኽቢሩኪ እዩ ኣሞ፡ ንደቅኺ ምስ ብሩሮምን ወርቆምን ናብ ስም እግዚኣብሄር ኣምላኽኪ፡ ናብቲ ናይ እስራኤል ቅዱስ፡ ካብ ርሑቕ ምእንቲ ኸምጽኣስ፡ መራኽብ ተርሲስ ቅድም ክመጻ እየን።¹⁰ብዂራይ ወቒዐኪ፡ ብለውሃተይ ግና ምሒረኪ እየ እሞ፡ ደቂ መጻእተኛታት ንቐጽርኺ ኽነድቅዎ፡ ነገስታቶም ከኣ ከገልግሉኺ እዮም።^11-12እቲ ዘይግዝኣኪ ህዝብን መንግስትን ክጠፍእ፡ እወ፡ እዞም ኣህዛብ ብጥራስ ክጸንቱ እዮም እሞ፡ ሃብቲ ኣህዛብ ምእንቲ ኸእትውልኪ፡ ነገስታቶም ድማ ተዓጅቦም ክኣትውኽስ፡ ደጌታትኪ ዂሉ ግዜ ኽፋት ክኸውን፡ ለይትን መዓልትን ኣይክዕጾን እዩ።¹³ነቲ ስፍራ መቕደሰይ ምእንቲ ኽስልምዎ፡ ክብሪ ሊባኖስ፡ ጽሕድን ሙዝን ዝበን፡ ሓቢሮም ክመጹኺ እዮም። ኣነውን ንስፍራ መርገጽ እግረይ ከኽብሮ እየ።¹⁴ደቂ ጠቓዕትኺ እናደነኑ ናባኺ ኽመጹ፡ እቶም ዝነዓቑኺ ዂሎም ድማ ናብ ትሕቲ ኣእጋርኪ ፍግም ክብሉ እዮም እሞ፡ ከተማ እግዚኣብሄር፡ ጽዮን ናይ እስራኤል ቅዱስ፡ ኢሎም ክሰምዩኺ እዮም።
   ¹⁵ኣብ ክንዲ እቲ ሓደ እኳ ዘየግልሰኪ ሕድግትን ጽልእትን ዝነበርኪ፡ ኣነ ዘለኣለማዊ መሓበንን ንውሉድ ወለዶ ኸኣ ደስታን ክገብረኪ እየ።¹⁶ጸባ ኣህዛብ ክትጠብዊ፡ ኣጥባት ነገስታት ከኣ ክትጠብዊ ኢኺ። ኣነ እግዚኣብሄር መድሓኒኺ፡ እቲ ናይ ያእቆብ ስልጡን ተበጃዊኺ ምዃነይውን ክትፈልጢ ኢኺ።¹⁷ኣብ ክንዲ ነሃሲ ወርቂ ኸምጽእ፡ ኣብ ክንዲ ሓጺን ብሩር፡ ኣብ ክንዲ ዕጨይቲ ኸኣ ነሃሲ፡ ኣብ ክንዲ እምኒውን ሓጺን ከምጽእ እየ። ኣሕሉቑኪ ሰላም፡ ሹማምትኺ ድማ ጽድቂ ኽገብር እየ።¹⁸ድሕርዚ ዓመጽ ኣብ ምድርኺ፡ ጥፍኣትን ምዕናውን ኣብ ዶብኪ ኣይክስማዕን እዩ። ግናኸ ንቐጽርታትኪ ምድሓን፡ ንዴጌታትኪ ኸኣ ምስጋና ኢልኪ ኽትሰምይየን ኢኺ።¹⁹እግዚኣብሄር ዘለኣለማዊ ብርሃንኪ፡ ኣምላኽኪ ድማ ክብርኺ ክኸውን እዩ እምበር፡ ድሕርዚ ጸሓይ ብመዓልቲ ብርሃንኪ ኣይክትከውንን፡ ወርሒ ኸኣ ብምድማቓ ኣይከተብርሃልክን እያ።²⁰እግዚኣብሄር ዘለኣለማዊ ብርሃንኪ ክዀነልኪ፡ መዓልትታት ሓዘንኪ ኸኣ ክውድኣ እየን እሞ፡ ድሕርዚ ጸሓይኪ ኣይክትዓርብን፡ ወርሕኺ ድማ ኣይክትጐድልን እያ።²¹ኲሎም ህዝቢ ብዘለው ጻድቃን ክዀኑ፡ ነታ ሃገር ከኣ ንዘለኣለም ክወርስዋ እዮም፡ ንሳቶም ንኽብረይ ዝኸውን ጨንፈር ተኽለይ፡ ግብሪ ኣእዳወይ እዮም።²²እቲ ንእሽቶስ ሽሕ፡ እቲ ኣዝዩ ውሑድ ከኣ ብርቱዕ ህዝቢ ክኸውን እዩ። ኣነ እግዚኣብሄር ነዚ ብግዜኡ ቐልጢፈ ኽገብሮ እየ።

ትን. ኢሳይያስ ምዕራፍ 61

   ¹ንትሑታት ብስራት ከበስርሲ እግዚኣብሄር ቀቢኡኒ እዩ እሞ፡ መንፈስ እግዚኣብሄር ኣምላኽ ኣብ ልዕለይ እዩ። ንስቡራት ልቢ ኽዘንን፡ ንምሩኻት ሓርነት፡ ንእሱራት ከኣ ምፍታሕ ክእውጅ ለኣኸኒ።²ዓመት ጸጋ እግዚኣብሄርን መዓልቲ ሕነ ኣምላኽናን ክእውጅ፡ ንዂሎም ሕዙናት ከጸናንዕ፡³ኣእዋም ጽድቂ፡ ንኽብሩ ዝኸውን ተኽሊ እግዚኣብሄር፡ ተብሂሎም ምእንቲ ኽስመዩ ድማ፡ ንሕዙናት ጽዮን ኣብ ክንዲ ሓመዂስቲ ዘውዲ ኽደፍኣሎም፡ ኣብ ክንዲ ሓዘን ከኣ ዘይቲ ሓጐስ፡ ኣብ ክንዲ መንፈስ ጓሂውን ክዳን ምስጋና ኽህቦም ለኣኸኒ።
   ⁴ነቲ ናይ ቀደም ዑናታት ክሃንጹ፡ ነቲ ቐደም ዝባደመ ከቑሙ፡ ነተን ካብ ውሉድ ወለዶ ዝዓነዋ ፍሩሳት ከተማታት ክሕድሱ እዮም።⁵ጓኖት ደው ኢሎም ንመጓሴታትኩም ክጓስዩ፡ መጻእተኛታት ድማ ሓረስቶትኩምን ናበይቲ ኣታኽልቲ ወይንኹምን ክዀኑ እዮም።⁶ንስኻትኩም ግና ካህናት እግዚኣብሄር ክትስመዩ ኢኹም፡ ሰብ ከኣ ኣገልገልቲ ኣምላኽና ኽብለኩም እዩ፡ ሃብቲ ኣህዛብ ክትበልዑ ብኽብሮም ድማ ክትከብሩ ኢኹም።⁷ኣብ ክንዲ ነውርኹም ካዕበት ክትቅበሉ ኢኹም፡ ኣብ ክንዲ ጸርፊ ብዕድሎም ክሕጐሱ እዮም፡ ስለዚ ኣብ ሃገሮም ካዕበት ክግንዘቡ፡ ዘለኣለማዊ ሓጐስ ድማ ክረኽቡ እዮም።⁸ኣነ እግዚኣብሄር ንቕንዕና አፍቅሮ፡ ንኸትርን ዓመጻን እጸልኦ እየ እሞ፡ ኢዶም ብሓቂ ኽፈድዮም፡ ዘለኣለማዊ ኪዳን ከኣ ምስኦም ክኣቱ እየ።⁹ዘርኦም ድማ ኣብ ኣህዛብ፡ ትውልዶም ከኣ ኣብ ህዝብታት ፍሉጥ ክኸውን እዩ። እቶም ዝርእይዎም ኲሎም እግዚኣብሄር ዝባረኾም ዘርኢ ምዃኖም ክፈልጡ እዮም።¹⁰ከምቲ ኣኽሊል ኣብ ርእሱ ዝደፍእ መርዓዊ፡ ከምታ ብስልማት እተሰለመት መርዓት፡ እግዚኣብሄር ልብሲ ምድሓን ኣልቢሱኒ፡ ብመርግፍ ጽድቂውን ኣጐልቢቡኒ እዩ እሞ፡ ብእግዚኣብሄር ኣዝየ እሕጐስ፡ ነፍሰይ ብኣምላኸይ ባህ ይብላ ኣሎ።¹¹ከምቲ ምድሪ ብቋልያኣ እተውጽእ፡ ከምቲ ኣታኽልቲ ኸኣ ዘርኡ ዘብቁል ከምኡውን እግዚኣብሄር ኣምላኽ ኣብ ቅድሚ ዂሎም ኣህዛብ ጽድቅን ምስጋናን ከብቁል እዩ።

ትን. ኢሳይያስ ምዕራፍ 62

   ¹ጽድቃ ኸም ድሙቕ ብርሃን፡ ምድሓና ኸኣ ከም ሃልሃልታ ፋና ማሕ ክሳዕ ዝብል፡ ስለ ጽዮን ስቕ ኣይክብልን፡ ስለ የሩሳሌም ድማ ኣይክዓርፍን እየ።²ኣህዛብ ንጽድቅኺ፡ ኲሎም ነገስታት ከኣ ንኽብርኺ ኽርእዩ እዮም፡ በቲ ኣፍ እግዚኣብሄር ዘውጽኦ ሓድሽ ስም ክትስመዪ ኢኺ።³ኣብ ኢድ እግዚኣብሄር ክቡር ኣኽሊል፡ ኣብ ኢድ ኣምላኽኪ ድማ ዘውዲ ንጉስ ክትኰኒ ኢኺ።⁴ድሕርዚ ሕድግቲ ኣይክትበሃልን ኢኺ፡ ሃገርኪ ኸኣ ጸምጸም በረኻ ኣይክትበሃልን እያ። እግዚኣብሄር ባህ ኢሉልኪ፡ ሃገርኪ ድማ ሔምኣ ረኺባ እያ እሞ፡ ንስኽስ፡ ደስታይ ኣብኣ እዩ፡ ክትስመዪ ኢኺ፡ ሃገርኪውን ሔማ ኽትበሃል እያ።⁵ከምቲ ጐበዝ ንድንግል ዝምርዖ፡ ከምኡ ደቅኺ ኽምርዓውኺ እዮም እሞ፡ መርዓዊ ብመርዓቱ ኸም ዝሕጐስ፡ ከምኡ ኣምላኽኪ ብኣኺ ኽሕጐስ እዩ።
   ⁶ዎ የሩሳሌም፡ ኣብ ልዕሊ ቐጽርኺ ሓለውቲ ኣቑመ ኣሎኹ፡ ለይትን መዓልትን ከቶ ስቕ ኣይክብሉን እዮም። ኣቱም ንእግዚኣብሄር እተዘክርዎ፡ ኣይትዕረፉ።⁷ንየሩሳሌም ክሳዕ ዘጽንዓ፡ ኣብ ምድሪውን መመስገኒ ኽሳዕ ዝገብራ ኣይተዕርፍዎ።^8-9እግዚኣብሄር ብየማናይ ኢዱን ብሓያል ቅልጽሙን መሓለ፡ እቶም ዝኣከብዎ ኽበልዕዎ፡ ንእግዚኣብሄር ከኣ ከመስግንዎ እዮም፡ እቶም ዘእተውዎ ድማ ኣብ ኣጸድ መቕደሰይ ኰይኖም ክሰትይዎ እዮም እምበር፡ ብሓቂ፡ ድሕርዚ እኽልኺ ንጸላእትኺ ምግቢ ክዀኖም ኢለ ኣይክህቦምን እየ፡ ነቲ ዝጸዓርክሉ ወይንኺ ኸኣ ጓኖት ኣይክሰትይዎን እዮም።
   ¹⁰ሕለፉ፡ ብደጌታት ሕለፋ፡ መገዲ ነቲ ህዝቢ ኣዳልዉሉ፡ ኣጣጥሑ፡ መገዲ ጽርግያ ኣጣጥሑ፡ ኣእማን ጽረጉ፡ ንህዝብታት ሰንደቕ ዕላማ ኣልዕሉሎም።¹¹እንሆ፡ እግዚኣብሄር ክሳዕ ወሰን ምድሪ ኣወጀ፡ ንጓል ጽዮን፡ እንሆ፡ ምድሓንኪ ይመጽእ ኣሎ፡ እንሆ፡ ደመወዙ ምስኡ ኣሎ፡ ዓስቡ ኸኣ ቀቅድሚኡ እዩ፡ በልዋ።¹²ንሳቶም ድማ፡ ቅዱስ ህዝቢ፡ እግዚኣብሄር እተበጀዎም፡ ኢሎም ክሰምይዎም እዮም። ንስኺውን እትበሃግ፡ ዘይትሕደግ ከተማ ኽትበሃሊ ኢኺ።

ትን. ኢሳይያስ ምዕራፍ 63

   ¹እዚ ብኽዳውንቱ ዘጌጸ፡ ብሓይሊ ጒልበቱ ዝሽነን፡ ካብ ኤዶም፡ ካብ ቦጽራ፡ ግምጃ ለቢሱ ዝመጽእ መን እዩ ኣነ እየ እቲ ብጽድቂ ዝዛረብ፡ ንምድሓን ስልጡን።²ስለምንታይ ክዳንካ ቑሔ ስለምንታይከ ኣልባስካ ነቲ ናይ ርጋጽ ዘቢብ መሰለ^3-4መዓልቲ ምፍዳይ ሕነ ኣብ ልበይ ነይራ፡ ዓመት እቶም ብጅዋተይ ከኣ መጺኣ እያ እሞ፡ ኣነ በይነይ ነቲ መጽመቑ ዘቢብ ረገጽክዎ፡ ካብ ህዝብታት ሓደ እኳ ምሳይ ኣይነበረን። ብዂራይ ረገጽክዎም፡ ብነድረይ ድማ ጨፍለቕክዎም። ደሞም ኣብ ክዳውንተይ ተናጠረ፡ ብዘሎ ኣልባሰይ ከኣ ጸየቕኩ።⁵ግልጽ በልኩ፡ ሓጋዚ ኸኣ ኣይነበረንን፡ ዝድግፈኒ ስለ ዘይተረኽበ ኸኣ ተዓነድኩ። ሽዑ ቕልጽመይ ኣድሓነኒ፡ ነድረይ ከኣ ደገፈኒ።⁶ብዂራይ ንህዝብታት ረገጽክዎም፡ ብነድረይ ድማ ኣስከርክዎም፡ ደሞም ከኣ ኣብ ምድሪ ዂዖኹ።
   ⁷ኣነ ኸምቲ እግዚኣብሄር ዝገበረለና ዂሉ ሰናይ ግብርን፡ ከምቲ ንቤት እስራኤል ዝገበረላ ዓብዪ ግብርን ከም መጠን ምሕረቱን ዕቤት ለውሃቱን እናዘከርኩ፡ ሰናይ ግብሪ እግዚኣብሄርን ውዳሴኡን ክነግር እየ።⁸ብሓቂ ህዝበይ ዘይጠልሙ ደቂ እዮም፡ በለ እሞ፡ መድሓኒኦም ኰነ።⁹ኣብ ኲሉ ጸበባኦም ጸበቦ፡ መልኣኽ ገጹ ድማ ኣድሓኖም። ብፍቕሩን ብለውሃቱን ተበጀዎም፡ ብዝሓለፈ ዘመናት ኲሉ ግዜሓንገሮምን ሓዘሎምን።¹⁰ንሳቶም ግና ዓለው፡ ንቅዱስ መንፈሱ ኸኣ ኣጒሃዩ፡ ስለዚ ጸላኢኦም ኰነ፡ ባዕሉውን ተዋግኦም።¹¹ሽዑ ንሱ ንዘመን ቀደምን ንሙሴን ንህዝቡን ዘከረ፡ እቲ ምስቶም ጓሶት መጓሴኡ ኻብ ባሕሪ ዘውጽኦም ኣበይ ኣሎ እቲ ንቅዱስ መንፈሱ ኣብ ውሽጦም ዘሕደረ ኣበይ ኣሎ¹²እቲ ንኽቡር ቅልጽሙ ኣብ የማን ሙሴ ዘሕለፈ፡ እቲ ንርእሱ ዘለኣለማዊ ስም ምእንቲ ኽገብር፡ ኣብ ቅድሚኦም ማያት ዝኸፈለ፡¹³እቲ ኸም ፈረስ ኣብ በረኻ ኸይተዓንቀፈ ኣብ መዓሙቑ ዝመርሖም ኣበይ ኣሎ¹⁴ከብቲ ናብ ለሰ ኸም ዝወርዳ፡ ከምኡ መንፈስ እግዚኣብሄር ናብ ዕረፍቲ ኣብጽሖም፡ ንርእስኻ ኽቡር ስም ክትገብርሲ፡ ንህዝብኻ ኸምኡ ጌርካ መራሕካዮም።
   ¹⁵ካብ ሰማይ ኣመንጽር፡ ካብቲ ማሕደር ቅድስናኻን ግርማኻን ከኣ ጠምት፡ ጸዓትካን ስልጡን ግብርኻን ኣበይ ኣሎ፧ ርሕራሐ ልብኻን ምሕረትካን ካባይ ተኸልከለ።¹⁶ንስኻ ደኣ ኢኻ ኣቦና፡ ኣብርሃም ኣይፈልጠናን፡ እስራኤል ድማ ኣየለልየናን እዩ እሞ፡ ዎ እግዚኣብሄር፡ ንስኻ ኢኻ ኣቦና፡ ስምካ ኸኣ ካብ ዘለኣለም ተበጃዊና እዩ።¹⁷ዎ እግዚኣብሄር፡ ካብ መገድኻ ክንዘብል፡ ከይንፈርሃካ ድማ ልብና ኽተርር ዝሓደግካና ስለምንታይ ኢኻ ስለ ባሮትካ፡ ስለ ነገድ ርስትኻ ኢልካ ተመለስ።¹⁸እቲ ቅዱስ ህዝብኻ ንሓጺር ዘመን ጥራይ ተረስተየ፡ ጸላእትና ንመቕደስካ ረገጽዋ።¹⁹ከምቶም ካብ ጥንቲ ዘይመለኽካዮም፡ ከምቶም ብስምካ ዘይተሰምዩ ዄንና ኣሎና።

ትን. ኢሳይያስ ምዕራፍ 64

   ¹መንሞ ኽህብ ንሰማያት ጨንዲሕካ እንተ ትወርድ፡ ኣኽራን ኣብ ቅድሜኻ ነነይ ምበሉ፡²ሓዊ ንቐሸም ከም ዘንድዶ፡ ሓዊውን ንማይ ከም ዘፍልሖ፡ ስምካ ኣብ ጸላእትኻ ምእንቲ ኸተፍልጥ ኣህዛብ ከኣ ኣብ ቅድሜኻ ራዕራዕ ክብሉስ፡³ዘይተጸቤናዮ ዘገርም ግብሪ ምስ ገበርካ፡ ወረድካ፡ ኣኽራን ድማ ኣብ ቅድሜኻ ነነይ በሉ።⁴ነቶም ዝጽበይዎ ኸምቲ ንስኻ ዝገበርካሎም ዝገብር ካልእ ኣምላኽ ካብ ጥንቲ ኣይተሰምዐን፡ ኣብ እዝኒ ኣይተዘነየን፡ ዓይኒውን ከቶ ኣይረኣየቶን።⁵ነቲ ተሓጒሱ ጽድቂ ዝገብር፡ ነቶም ኣብ መገድኻ ዝዝክሩኻ ትቃባበሎም። እንሆ፡ ንስኻ ዀሬኻ፡ ንሕና ሓጢኣት ገበርና፡ ብእኡ ነዊሕ ዘመን ነበርና፡ ንድሕን ዶዀን ንኸውን⁶ኲላትና ኸም ሓደ ርኹስ ኰንና፡ ብዘሎ ጽድቅና ኸኣ ከም ጽዩቕ ክዳን እዩ፡ ኲላትና ኸም ቈጽሊ ቐምሰልና፡ ኣበሳና ድማ ከም ንፋስ ይብቁጸና ኣሎ።⁷ገጽካ ኸዊልካልና፡ ብሰሪ ኣበሳና ኸኣ ደርቢኻና ኢኻ እሞ፡ ስምካ ዝጽውዕን ንኣኻ ኽሕዝ ኢሉ ዝትንስእን ሓደ እኳ የልቦን።
   ⁸ሕጂ ግና፡ ዎ እግዚኣብሄር፡ ንስኻ ኣቦና ኢኻ፡ ንሕና መሬት ኢና፡ ንስኻ ድማ ሰራሒና ኢኻ፡ ኲልናውን ግብሪ ኢድካ ኢና።⁹ዎ እግዚኣብሄር፡ እምብዛ ኣይትቈጣዕ፡ ኣበሳውን ንሓዋሩ ኣይትዘክር። እንሆ፡ ጠምት፡ ንልምነካ ኣሎና፡ ኲልና ህዝብኻ ኢና።¹⁰እተን ቅዱሳት ከተማታትካ በረኻ ዀይነን፡ ጽዮን በረኻ ዀይና፡ የሩሳሌም ዖንያ።¹¹እታ ኣቦታትና ንኣኻ ዘመስገኑላ ቅድስትን ክብርትን ቤትና ብሓዊ ነደደት፡ እቲ ኽቡር ጥሪትናውን ብዘሎ በረሰ።¹²ዎ እግዚኣብሄር፡ በዚ ነገር እዚዶ ኽትዘሓጥ ኢኻ፧ ስቕ ክትብል እሞ እምብዛዶ ኸተጨንቕና ኢኻ፧

ትን. ኢሳይያስ ምዕራፍ 65

   ¹እቶም ግደይ ዘይገብሩ ደለዩኒ፡ እቶም ዘይደለዩኒ ድማ ረኸቡኒ። ነቲ ብስመይ ዘይተሰምየ ህዝቢ ኸኣ፡ እኔኹ፡ እኔኹ፡ በልክዎ።²ነቲ ሰናይ ብዘይኰነት መገዲ ደድሕሪ ሓሳብ ርእሱ ዝመላለስ ዓለወኛ ህዝቢ ምሉእ መዓልቲ ኢደይ ዘርጋሕኩሉ።³እቲ መመሊሱ ኣብ ቅድመይ ዘዀርየኒ ህዝቢ፡ ኣብ ኣታኽልቲ ዝስውእ፡ ኣብ ልዕሊ ጡብ ከኣ ዕጣን ዝዓጥን፡⁴ኣብ መቓብራት ዝሰፍር፡ ኣብ ሕቡእ ስፍራ ዝሓድር: ስጋ ሓሰማ ዝበልዕ: ኣብ ጻሕሉ ኸኣ ርኹስ ምግቢ ዘለዎ፡⁵እቲ፡ ካብኻ ኣነ ኣዝየ ቅዱስ እየ እሞ፡ ካባይ ርሓቕ፡ ኣይትቕረበኒ፡ ዝብል ህዝቢ፡ እዚ ኣቶም ኣብ ኣፍንጫይ ትኪ፡ ምሉእ መዓልቲ ዝነድድ ሓዊ እዮም።^6-7እንሆ፡ እዚ ኣብ ቅድመይ ጽሑፍ ኣሎ፡ ፍዳ ኸፈድዮም እየ እምበር፡ ስቕ ኣይክብልን እየ፡ እወ፡ ንኣበሳኹም ምስኡውን ንኣበሳ ኣቦታትኩም ኣብ ሕቑፎም ክፈድዮም እየ፡ ይብል እግዚኣብሄር። ኣብ ኣኽራን ዕጣን ዓጠኑ፡ ኣብ ኲድዂዶታት ከኣ ጸረፉኒ፡ ስለዚ ኣቐዲመ ግብሮም ኣብ ሕቑፎም ክሰፍረሎም እየ።
   ⁸እግዚኣብሄር ከምዚ ይብል፡ ከምቲ ሓድሽ ወይኒ ኣብ ዘለላ ምስ ዝርከብ፡ በረኸት ኣለዎ እሞ፡ ኣይተጥፍእዎ፡ ዝበሃል፡ ኣነውን ንዂላቶም ከየጥፍኦምሲ፡ ስለ ባሮተይ ኢለ ኸምኡ ኽገብር እየ።⁹ካብ ያእቆብ ዘርኢ፡ ካብ ይሁዳ ኸኣ ወራስ ኣኽራነይ ከውጽእ እየ። ሕሩያተይ ክወርስዋ፡ ባሮተይ ከኣ ኣብኣ ኽነብሩ እዮም።¹⁰ነቲ ዝደለየኒ ህዝበይ ከኣ ሳሮን መጓሰዪ ኣባጊዕ፡ ለሰ ኣኮርውን መደቀሲ ከብቲ ክኸውን እዩ።
   ¹¹ንስኻትኩም ግና ንእግዚኣብሄር እትሓድጉ፡ ንቅዱስ ከረነይ እትርስዑ፡ ንጋድ መኣዲ እትሰርዑሉ፡ ንሜኒ ኸኣ ወይኒ እተስልፍዎ፡¹²ጻዋዕኩኹም፡ ኣይመለስኩምን፡ ተዛረብኩ፡ ጽን ድማ ኣይበልኩምን፡ ኣብ ቅድሚ ዓይነይ ደኣ እከይ ገበርኩም፡ ነቲ ባህ ዘየብለኒ ኸኣ ሓሪኹም ኢኹም እሞ፡ ኣነ ንሰይፊ እምድበኩም፡ ኲላትኩምውን ንማሕረዲ ኽትጒምበሱ ኢኹም።
   ¹³ስለዚ እግዚኣብሄር ኣምላኽ ከምዚ ይብል፡ እንሆ፡ ባሮተይ ክበልዑ፡ ንስኻትኩም ግና ክትጠምዩ ኢኹም፡ እንሆ፡ ባሮተይ ክሰትዩ፡ ንስኻትኩም ግና ክትጸምኡ ኢኹም፡ እንሆ፡ ባሮተይ ክሕጐሱ፡ ንስኻትኩም ግና ክትሓፍሩ ኢኹም።¹⁴እንሆ፡ ባሮተይ ብሓጐስ ልቢ እልል ክብሉ፡ ንስኻትኩም ግና ብጓሂ ልቢ ኽትግዕሩ፡ መንፈስኩም ስለ እተሰባበረ ኸኣ፡ ዋይ ዋይ ክትብሉ ኢኹም።¹⁵ስምኩም ድማ ኣብቶም ሕሩያተይ ንመራገሚ ኽትሓድጉ ኢኹም፡ እግዚኣብሄር ኣምላኽ ክቐትለካ እዩ፡ ንባሮቱ ግና ብኻልእ ስም ክሰምዮም እዩ፡¹⁶እቲ ናይ ቀደም ጸበባ ተረሲዑ፡ ካብ ኣዒንተይ ድማ ተሰዊሩ እዩ እሞ፡ እቲ ንነፍሱ ኣብ ምድሪ ዝባርኽ፡ ብኣምላኽ ሓቂ እዩ ዝባርኽ፡ እቲ ኣብ ምድሪ ዝምሕል ከኣ ብኣምላኽ ሓቂ እዩ ዝምሕል።
   ¹⁷እንሆ፡ ኣነ ሓድሽ ሰማይን ሓድሽ ምድርን ክፈጥር እየ እሞ፡ እቲ ናይ ቀደም ኣይክሕሰብን እዩ።¹⁸ግናኸ እንሆ፡ የሩሳሌም ንእልልታ፡ ህዝባ ኸኣ ንሓጐስ ክፈጥር እየ እሞ፡ በቲ ኣነ ዝፈጥሮስ ክሕጐሱን ንዘለኣለም ደስ ክብለኩምን እዩ።¹⁹ኣነ ድማ ብየሩሳሌም እልል ክብል፡ ብህዝበይውን ደስ ክብለኒ እዩ፡ ድምጺ ብኽያትን ድምጺ ኣውያትን ድሕርዚ ኣብኣ ኣይክስማዕን እዩ።²⁰ሚእቲ ዓመት ገይሩ ዝመውት ብንእስነቱ ይመውት፡ ሓጢኣተኛ ኸኣ ሚእቲ ዓመት ምስ ገበረ እዩ ዝርገም እሞ፡ ድሕርዚ ሓጺር ዝዕምሩ ሕጻንን ዕድሚኡ ዘየብጽሐ ኣረጊትን ኣይክርከብን እዩ።²¹ኣባይቲ ኽሰርሑን ክነብሩለንን እዮም፡ ኣታኽልቲ ወይኒ ኽተኽሉ፡ ፍሬኡውን ክበልዑ እዮም።²²ዕድመ ህዝበይ ከም ዕድመ ኦም ክኸውን፡ ሕሩያተይ ድማ ጻማ ግብሪ ኣእዳዎም ክበልዑ እዮም እሞ፡ ካልኦት ዝነብሩሉ ኣባይቲ ኣይክሰርሑን፡ ካልኦት ፍሬኡ ዝበልዕዎ ኸኣ ኣይክተኽሉን እዮም።²³ንሳቶም ዘርኢ እቶም ብሩኻት እግዚኣብሄር እዮም፡ ተርፎም ከኣ ምሳታቶም ክነብር እዩ እሞ፡ ንኸንቱ ኣይክጽዕሩን፡ ብድንገት ዝሞቱ ደቂ ኣይክውለዱን እዮም።²⁴ክኸውን ድማ እዩ፡ ከይጸውዑ ኽመልስ፡ ገና ኽዛረቡ ኸለው ኸኣ ክሰምዕ እየ።²⁵ተዂላን ዕየትን ብሓደ ኽጓሰዩ እዮም፡ ኣንበሳ ከም ብዕራይ ሓሰር ክበልዕ፡ ተመን ከኣ ሓመድ ክቕለብ እዩ። ኣብ ኲሉ እቲ ቅዱስ ከረነይ ኣይክጐድኡን ኣይከጥፍኡን እዮም፡ ይብል እግዚኣብሄር።

ትን. ኢሳይያስ ምዕራፍ 66

   ¹እግዚኣብሄር ከምዚ ይብል፡ ሰማይ ዝፋነይ እዩ፡ ምድሪ ኸኣ መርገጽ እግረይ እያ። እቲ ንስኻትኩም እትሰርሑለይ ቤት ደኣ ኸመይ ዝበለ እዩ እቲ ኣነ ዝዓርፈሉ ስፍራኸ ኸመይ ዝበለ እዩ²ኢደይ እያ ነዚ ዂሉ ዝገበረቶ፡ እዚ ኸኣ ኰይኑ ኣሎ፡ ይብል እግዚኣብሄር፡ ግናኸ ኣብቲ ሽጉርን ድቑስን መንፈስ ዘለዎን ብቓለይ ዝርዕድን ሰብ ደኣ እየ ዝጥምት ዘሎኹ።³እቲ ብዕራይ ዝሓርድ፡ ከምቲ ንሰብ ዝቐትል እዩ፡ እቲ ገንሸል ዝስውእ ከምቲ ንኽሳድ ከልቢ ዝሰብር እዩ፡ እቲ ንመስዋእቲ ብልዒ ዘቕርብ ከምቲ ደም ሓሰማ ዝስውእ እዩ፡ እቲ ዕጣን ዝዓጥን ከምቲ ንጣኦት ዘመስግን እዩ። እወ፡ መገድታት ርእሶም ሓረዩ፡ ነፍሶም ድማ ብጽያፎም ባህ በላ።⁴ኣብ ቅድሚ ዓይነይ እኩይ ገበሩ፡ ባህ ዘየብለኒውን ሓረዩ እምበር፡ ጸዊዐ ሓደ እኳ ኣይመለሰለይን፡ ተዛሪበ ኸኣ ኣይሰምዑንን እሞ፡ ኣነ ኸኣ ጒድኣቶም ክሓሪ፡ ዘሰክሖም ድማ ከውርደሎም እየ።
   ⁵ኣቱም ብቓሉ እትርዕዱ፡ ቃል እግዚኣብሄር ስምዑ፡ እቶም ዝጸልኡኹምን ብዛዕባ ስመይ ዝሰጉኹምን ኣሕዋትኩም፡ ሓጐስኩም ምእንቲ ኽንርእስ፡ እግዚኣብሄር ይኽበር፡ ይብሉ፡ ግናኸ ክሓፍሩ እዮም።⁶ድምጺ ታዕታዕ ካብ ከተማ፡ ድምጺ ኻብ ቤት መቕደስ ይስማዕ ኣሎ፡ ድምጺ እቲ ንጸላእቱ ፍዳ ዝፈዲ እግዚኣብሄር እዩ።
   ⁷ቅልውላው ከይሓዛ ወለደት፡ ከይተጻዕረት ከኣ ወዲ ወለደት።⁸ከምዚ ዘመሰለ መን ሰምዐ ከምዚ ዝበለኸ መን ረኣየ ሃገርዶ ብሓንቲ መዓልቲ ጽዒራ ትወልድ እያ ህዝቢዶኸ ብሓንቲ ግዜ ይውለድ እዩ ጽዮን ግና ቅልውላው ምስ ሓዛ፡ ብኡብኡ ደቃ ወለደት።⁹ኣነ ንምውላድ ዘብጻሕኩስ፡ ሓይሊ ምውላድዶ ኣይህብን እየ ይብል እግዚኣብሄር። ኣነ ንምውላድ ሓይሊ ዝህብከ፡ ንማሕጸንዶ እዓጹ እየ ይብል ኣምላኽኪ።
   ^10-11ክትጠብውን ኣብ ኣጥባት ምጽንንዓ ኽትጸግቡን፡ ክትምጥምጡን ብብዝሒ ኽብረት ኽፍሽሕወኩምንሲ፡ ምስ የሩሳሌም ተሓጐሱ፡ ኣቱም እተፍቅርዋ ዂላትኩም ከኣ ብእኣ ደስ ይበልኩም። ኣቱም ዝሓዘንኩምላ ዂላትኩም፡ ተሓጒስኩም ምስኣ እልል በሉ።¹²እግዚኣብሄርሲ ኸምዚ ይብል ኣሎ፡ እንሆ፡ ሰላም ከም ፈሳሲ ርባ፡ ክብረት ኣህዛብ ከኣ ከም ደምሳሲ ውሒዝ ከውሕዘላ እዩ፡ ንስኻትኩም ድማ ክትጠብው፡ ክትሕቈፉ ኢኹም፡ ኣብ ኣብራኾም ከሳራስሩኹም እዮም።¹³ከምቲ ኣደ ንውሉዳ እተጸናንዕ፡ ከምኡ ኸጸናንዓኩም እየ፡ ኣብ የሩሳሌም ከኣ ኽትጸናንዑ ኢኹም።¹⁴ልብኹም ከኣ እዚ ርእዩ ኽሕጐስ እዩ፡ ኣዕጽምትኹም ድማ ከም ዝጥጥዕ ሳዕሪ ሓይሊ ኽውስኽ እዩ። ኢድ እግዚኣብሄር ንባሮቱ ኽትፍለጥ እያ፡ ንጸላእቱውን ክቑጥዖም እዩ።
   ¹⁵ኲራኡ ብነድሪ፡ መግናሕቱ ኸኣ ብሃልሃልታ ሓዊ ኽፈዲ፡ እንሆ፡ እግዚኣብሄር ብሓዊ ኽመጽእ እዩ፡ ሰረገላታቱውን ከም ህቦብላ ክዀና እየን።¹⁶እግዚኣብሄር ንነፍሲ ወከፍ ስጋ ዝለበሰ ብሓውን ሰይፍን ክፈርዶ እዩ እሞ፡ እቶም እግዚኣብሄር ዝቐትሎም ብዙሓት እዮም።¹⁷እቶም ደድሕሪ እቲ ኣብ ማእከል ዘሎ ናብ ኣታኽልቲ ክኸዱ ንነፍሶም ዝቕድሱን ዘጽርዩን፡ ስጋ ሓሰማን ፍንፋንን ኣናጹን ዝበልዑ ዂሎም ብሓደ ኽጠፍኡ እዮም፡ ይብል እግዚኣብሄር።¹⁸ኣነ ግብሮምን ሓሳቦምን እፈልጥ እየ፡ ኲሎም ኣህዛብን ቋንቋታትን ዝእክበሉ ዘመን ይመጽእ ኣሎ፡ ንሳቶም ከኣ ክመጹን ክብረተይ ክርእዩን እዮም።¹⁹ኣባታቶም ከኣ ትእምርቲ ኽገብር እየ፡ ነቶም ካባታቶም ዘምለጡ ናብ ኣህዛብ፡ ናብቶም መንትግ ዝውርውሩ ሰብ ተርሲስን ፋልን ሉድን ናብ ቱባልን ያዋንን፡ ናብተን ወረይ ዘይሰምዓ፡ ክብረይ ከኣ ዘይረኣያ ርሑቓት ደሴታትን ክልእኽ እየ፡ ንሳቶም ድማ ክብረይ ኣብ ማእከል ኣህዛብ ክነግሩ እዮም።²⁰ከምቲ ደቂ እስራኤል ንመባኦም፡ ብጽሩይ ኣቕሓ ገይሮም፡ ናብ ቤት እግዚኣብሄር ዘምጽእዎ፡ ንዂሎም ኣሕዋትኩም ድማ፡ መባእ እግዚኣብሄር ገይሮም፡ በፍራስን ብሰረገላታትን ብቓሬዛታትን በባቕልን ብፈጠናት ኣግማልን ካብ ኲሎም ኣህዛብ ናብቲ ቅዱስ ከረነይ ናብ የሩሳሌም ከምጽእዎም እዮም፡ ይብል እግዚኣብሄር።²¹ካህናትን ሌዋውያንን ዝዀነ ኸኣ ካባታቶም ክወስድ እየ፡ ይብል እግዚኣብሄር።²²ከምቲ ኣነ ዝገብሮ ሓድሽ ሰማይን ሓድሽ ምድርን ኣብ ቅድመይ ዝነብር፡ ከምኡ ዘርእኹምን ስምኩምን ክነብር እዩ፡ ይብል እግዚኣብሄር።²³ክኸውን ድማ እዩ፡ ካብ ሰርቂ ወርሒ ኽሳዕ ሰርቂ ወርሒ፡ ካብ ሰንበት ከኣ ክሳዕ ሰንበት፡ ስጋ ዝለበሰ ዂሉ ኣብ ቅድመይ ክሰግድ ክመጽእ እዩ፡ ይብል እግዚኣብሄር።²⁴ወጺኦም ከኣ ንሬሳታት እቶም ካባይ ዝዓለው ኽርእዩ እዮም፡ ሓሰኻኦም ኣይክመውትን፡ ሓዎም ድማ ኣይክጠፍእን እዩ እሞ፡ ንዂሉ ስጋውን መፈንፈኒ ክዀኑ እዮም።

ሓድሽ ኪዳን

መሃልየ መሃልይ

ትንቢት ኤርምያስ

ዝ/ምዕ

ብ/ኪ

ሓ/ኪ

ቃል ብስራት Qal Bisrat

ትንቢት ኢሳይያስ

Like this:

Leave a ReplyCancel reply

ትንቢት ኢሳይያስ

Share this:

Like this:

Leave a ReplyCancel reply

ቃል ብስራት Qal Bisrat