1  2  3  4  5

ዝ/ምዕ    ብ/ኪ   ሓ/ኪ

        ድ. ኤርምያስ  ምዕራፍ 1

     ¹እዛ ህዝቢ ጃርጃር ዝብለላ ከተማ

ከመይ ኢላ እያ ጸምያ እትቕመጥ ዘላ፡

እዛ ኣብ ህዝብታት ዓባይ ዝነበረት ከመይ ኢላ መበለት ኰነት፡

እዛ ወይዘሮ ኣውራጃታትሲ ገባር ኰነት።

     ²ለይቲ ብኽያት ትበኪ፡ ንብዓታ ኣብ ምዕጒርታ ይውሕዝ፡

ካብ ኲሎም እቶም ፈተውታ ሓደ እኳ ዘጸናንዓየልቦን ፡

ኲሎም ኣዕሩኻ ጠለምዋ እሞ ጸላእታ ኾኑ።

     ³ብሰሪ ሓሳርን ብርቱዕ መግዛእትን ይሁዳ ተማሪኻ ኣላ፡

ኣብ ማእከል ኣህዛብ ሰፊራ፡ ህድኣት ከኣ ስኢና ኣላ፡

ኲሎም ተሳጐጒታ ኣብ ጸበባኣ ኣርከብዋ።

     ⁴ናብ በዓል ዝመጽእ የልቦን እሞ፡ መገድታት ጽዮን ይሓዝን፡

ኲሉ ደጌታታ ዖንዩ፡ ካህናት ይትክዙ ኣለዉ።

ደናግላ ጒህየን፡ ንሳ ድማ ተመሪራ ኣላ።

     ⁵ብሰሪ ብዝሒ ኣበሳኣ እግዚኣብሄር ሓዘን ኣውረደላ እሞ፡

ወደረኛታታ ርእሲ ዀኑ፡ ጸላእታ ይቐንዖም ኣሎ።

ደቃ ተማሪኾም ቀቅድሚ ጸላኢ ከዱ።

     ⁶ኵሉ ግርማ ጓል ጽዮን ካብኣ ኣግለሰ።

መሳፍንታ ከም ዝብላዕ ዝሰኣና እራባት ኰኑ፡

ቀቅድሚ ሰጓጒ ንምህዳም ተሓለሉ።

     ⁷የሩሳሌም ብመዓልትታት መከራኣን ምዂብላላን

ናይ ጥንቲ ኽቡር ገንዘብ ትዝክር ኣላ።

ህዝባ ኣብ ኢድ ጸላኢ ወዲቑስ ረዳኢ ምስ ሰኣነ፡

ጸላእቲ እናሽካዕለሉ ጥፍኣታ ረኣዩ።

     ⁸የሩሳሌም ብርቱዕ ሓጢኣት ገበረት፡ ስለዚ ከም ርኽስቲ ዀነት፡

እቶም ዘኽብርዋ ዝነበሩ ዂሎም ዕርቃና ርእዮም ነዓቕዋ።

ንሳውን እህህ እናበለት ንድሕሪት ትምለስ ኣላ።

     ⁹ርኽሰታ ኣብ ዘፈር ክዳና ኣሎ፡ መወዳእታኣ ኣይሓሰበቶን፡

ስለዚ ምውራዳ መስደምም እዩ፡ ዘጸናንዓውን የልቦን፡

ጻላኢ ይዕበ ኣሎ እሞ፡ ዎ ጐይታይ፡ ጸበባይ ርኤ።

     ¹⁰ኣብ ማሕበርካ ከይኣትው ዝኸልከልካዮም ኣህዛብ

ኣብ መቕደሳ ክኣትዉ ረኣየት እሞ፡

ኣብ ኲሉ ከቡር ጥሪታ ጸላኢ ኢዱ ዘርግሐ።

     ¹¹ኲሉ ህዝባ እናተከዘ እንጌራ ይደሊ ኣሎ፡

ነፍሶም ክትቀስንሲ ከቡር ጥሪቶም ንምግቢ ሃቡ።

ዎ ጐይታ፡ ተዋሪደ እየ እሞ፡ ርኤ ጠምትውን።

     ¹²ኣቱም ሓለፍቲ መገዲ ኩላትኩም እስከ ኣስተዋድይዎ፡

ከምቲ በታ መዓልቲ ጒሁር ቁጥዓኡ

እግዚኣብሄር ዘጒሃየኒ ሓንቲ ስቓይ

ከምታ እተቐጻዕኩላ ስቓየይ እንተ ኣልያስ፡ ጠምቱ እሞ ተመልከቱ።

     ¹³ካብ ላዕሊ ናብ ኣዕጽምተይ ሓዊ ሰደደ፡ ንሱ ኸኣ ኣሕመቖ።

ነእጋረይ መፈንጠራ ዘርግሐ፡ ንድሕሪት ድማ መለሰኒ፡

ኣብረስኒ ንዂሉ መዓልቲውን ኣማህመነኒ።

     ¹⁴ኣርዑት ኣበሳይ ብኢዱ ተኣስረ፡ ተጠላሊፉ ኣብ ክሳደይ ተነብረ፡

ንሱ ሓይለይ ኣድከመ።

ጐይታ ኣብ ኢድ እቶም ክቃወሞም ዘይከኣለኒ ኣሕሊፉ ወፈየኒ።

     ¹⁵እግዚኣብሄር ንዂሎም ጀጋኖይ ኣብ ማእከለይ ራዕ ኣበሎም።

ኣጒባዘይ ክጭፍልቕ፡ ኣኼባ ኣኽተተለይ።

ጐይታ ነታ ድንግል ጓል ይሁዳ ኣብ መጽመቚ ወይኒ ረገጻ።

¹⁶ስለዚ ኣነ እበኪ፡ ኣዒንተይ፡ ኣዒንተይ ንብዓት ይዝቈቛ።

ንነፍሰይ ዘቕስና መጸናንዒ ካባይ ርሒቑ እዩ እሞ፡

ጸላኢ ስለ ዝሰዓረ፡ ደቀይ በረሱ።

     ¹⁷ጽዮን ኣእዳዋ ትዝርግሕ፡ ዘጸናንዓ ኣይተረኽበን።

እግዚኣብሄር ንያእቆብ ዝኸብዎ ጸላእቲ ኣዘዘሉ።

የሩሳሌም ኣብ ማእከሎም ከም ርኽስቲ ኾነት።

     ¹⁸ንኣፉ ተጻሪረ ነይረ እየ እሞ፡ እግዚኣብሄር ጻድቕ እዩ።

ኣቱም ህዝብታት ኲላትኩም፡ ስምዑ ስቓየይውን ርኣዩ፡

ደናግለይን ኣጒባዘይን ተማሪኾም ከዱ።

     ¹⁹ንፈተውተይ ጸዋዕክዎም፡ ግናኸ ኣስሓቱኒ።

ካህናተይን ዓበይተይን ነፍሶም ከቕስኑ፡

ምግቢ ክልምኑ ከለዉ ኣብ ከተማ ሓለቑ።

     ²⁰ዎ እግዚኣብሄር፡ ሓዚነ ከም ዘሎኹ ርኤ።

ኣዝየ ተጻሪረ እየ እሞ ኣምዑተይ ተዀሰ፡

ልበይ ኣብ ውሽጠይ ተገልበጠ፡

ደቀይ ኣብ ግዳም ብሰይፊ ተወድኡ፡

ኣብ ከብዲ ቤት ከኣ ከም ሞት ኣሎ፡

     ²¹ቁዝማይ ስምዑ፡ ዘጸናንዓኒ የልቦን።

ኲሎም ጸላእተይ መከራይ ሰምዑ፡ ንስኻ ስለ ዝገበርካዮ ተሓጐሱ።

ነታ ዝበልካያ መዓልቲ ከተምጽኣ ኢኻ፡

ሽዑ ከምዚ ኸማይ ክዀኑ እዮም።

     ²²ኲሉ እከዮም ኣብ ቅድሜኻ ይብጻሕ፡

ብኽያተይ በዚሑ፡ ልበይ ተሓሊሉ እዩ እሞ፡

ከምቲ ብሰሪ ዂሉ ኣበሳይ ዝገበርካኒ፡

ከምኡ ድማ ንኣታቶም ግበሮም።

ዝ/ምዕ    ብ/ኪ   ሓ/ኪ

        ድ. ኤርምያስ  ምዕራፍ 2            

     ¹ከመይ ኢሉ ዀን እግዚኣብሄር

ብዂራኡ ንጓል ጽዮን ብደበና ኣጐልበባ።

ንኽብሪ እስራኤል ካብ ሰማይ ናብ ምድሪ ደርበዮ፡

ብመዓልቲ ቚጥዓኡ ኸኣ ንድኳ ኣእጋሩ ኣይዘከረን።

     ²እግዚኣብሄር ንዂሉ መሓድር ያእቆብ ብዘይ ምሕረት ወሓጦ፡

ብቚጥዓኡ ንዕርድታት ጓል ይሁዳ ኣፍረሶ፡ ኣሕመድመዶ፡

መንግስትን መሳፍንታን ከኣ ኣርከሰ።

     ³በቲ ጒሁር ኲራኡ ድማ ንዂሉ ቐርኒ እስራኤል ሰልዐ፡

ካብ ጸላኢ ከኣ ንየማነይቱ መለሳ፡

ከምቲ ንኸባቢኡ ዝልቚምጽ ሃልሃልታ ሓዊ ንያእቆብ ሞዂ ኣበሎ።

     ⁴ከም ጸላኢ ቐስቱ ገተረ፡

ከም ወደረኛ የማኑ ኣልዓለ፡ ንዓይኒ ዘብህግ ዘበለ ቐተለ፡

ኣብቲ ድንኳን ጓል ጽዮን ነድሩ ከም ሓዊ ከዓወ።

     ⁵እግዚኣብሄር ከም ጸላኢ ዀነ፡ ንእስራኤል ወሓጣ፡

ንዂሉ ኣዳራሻታ ወሓጦ፡ ንዕርድታታ ኣፍረሶ፡

ኣብ ጓል ይሁዳ ከኣ ዋይዋይን ቁዝማን ኣብዝሐ።

     ⁶ድንኳን ከም ኣታኽልቲ መንቈሰ፡ ንስፍራ መኣከቢኡ ኣፍረሰ፡

እግዚኣብሄር ኣብ ጽዮን ንበዓልን ሰንበትን ኣረስዖ፡

ብዂራ ነድሩውን ንንጉስን ካህንን ኣቃለለ።

     ⁷እግዚኣብሄር መሰውኢኡ ደርበየ፡ መቕደሱውን ንሕርሚ ወፈየ፡

ቀጽሪ ኣዳራሻታ ኣብ ኢድ ጸላእቲ ኣሕለፈ፡

ከም ብመዓልቲ በዓል ኣብ ቤት እግዚኣብሄር ዓው ኢሎም ጨደሩ።

     ⁸እግዚኣብሄር ንቐጽሪ ጓል ጽዮን ከፍርስ መደበ፡

ገመድ መለክዒ ዘርግሐ፡ ካብ ምጥፋእሲ ኢዱ ኣይመለሰን።

ሓጹርን ቀጽርን ኣሕዘነ፡ ኲሉ ብሓደ ማሰነ።

     ⁹ደጌታታ ኣብ ምድሪ ጠሓለ፡ ንመሃርሃሪታታ ኣብረሶ፡ ሰባበሮ፡

ንጉሳን መሳፍንታን ኣብ ማእከል ኣህዛብ ኣለዉ፡ ደጊም ሕጊ የልቦን።

ነብያታውን ራእይ ካብ እግዚኣብሄር ኣይረኽቡን።

     ¹⁰እቶም ዓበይቲ ጓል ጽዮን

ትም ኢሎም ኣብ ምድሪ ይቕመጡ ኣለዉ፡

ሓመድ ኣብ ርእሶም ነስነሱ፡ ከሊውን ለበሱ።

ደናግል የሩሳሌም ርእሰን ናብ ምድሪ ኣድነና።

     ¹¹ብምኽንያት ጒድኣት ጓል ህዝበይ

ሕጻናትን ዕሸላትን ኣብ ኣደባባያት ከተማ ስለ ዘሕለለዉ፡

ኣዒንተይ ብንብዓት ተበላሸወ፡ ኣምዑተይ ተዀሰ፡

ከብደይ ኣብ ምድሪ ተዂዖ።

     ¹²ኣበይ ኣሎ እኽልን ወይንን፧ እናበሉ ነዴታቶም ይሓቱ፡

ኣብ ኣደባባይ ከተማ ከም ውጉኣት ኣሕለልዮም ራዕ ይብሉ ኣለዉ፡

ነፍሶም ናብ ሕቚፊ ኣዴታቶም ትኲዖ ኣላ።

     ¹³ኣቲ ጓል የሩሳሌም፡ እንታይ ክምስክረልኪ፧

ብምንታይ እሞ እየ ዘምዓራርየኪ፧

ከጸናንዓክስ ብምንታይ እየ ዝምስለኪ፧

ኣቲ ድንግል ጓል ጽዮን፡

መስበርትኺ ዓብዪ ከም ባሕሪ እዩ እሞ፡ መን የሕውየኪ፧

     ¹⁴ነብያትኪ ከንቱን ጥበራን ረኣዩልኪ፡

ንግራት ከንቱነትን ምርኮን ረኣዩልኪ እምበር፡

ካብ ምርኮ ምእንቲ ከትድሕንስ፡ ኣበሳኺ ኣይቀልዑልክን።

     ¹⁵ኲሎም ሓለፍቲ መገዲ ንጓል የሩሳሌም፡

እዚኣዶ እያ እታ ፍጹም ዝመልክዓ፡

ሓጐስ ኲሉ ምድሪ እትብሃል ከተማ፧ ኢሎም ይፋጽዩላ፡

ርእሶም ይንቕንቑላ፡ ኣላጊጾም ኣእዳዎም የጣቕዑላ።

     ¹⁶ኲሎም ጸላእትኺ ኣፎም ኣባኺ ይኸፍቱ፡

ውሒጥናያ፡ ብሓቂ እዚኣስ እታ እተጸበናያ መዓልቲ እያ፡

ኣርከብናላን ርኤናያን፡ ኢሎም እናፋጸዩ ኣስናኖም ይነኽሱ ኣለዉ።

     ¹⁷እግዚኣብሄር ነቲ ዝሓለኖ ገበረ፡

ነቲ ካብ ጥንቲ ሒዙ ዝነገረሉ ቃል ፈጸመ።

ኣፍረሰ እሞ ኣይደንገጸን፡

መሓጐስ ጸላኢውን ገበረኪ፡ ቀርኒ ተጻረርትኺ ኣልዓለ።

     ¹⁸ልቦም ናብ እግዚኣብሄር ኣእወየ፡

ኣቲ ቐጽሪ ጓል ጽዮን፡ ለይትን መዓልትን ከም ውሒዝ ኴንኪ፡

ንብዓት ኣውሕዚ፡ ከቶ ኣይትዕረፊ፡ መርዓት ዓይኒኺ ኣይተዕርፊ።

     ¹⁹ኣብ መመጀመርታ ሕልዋ ተንስኢ፡ ብለይቲ ጨድሪ፡

ኣብ ቅድሚ ገጽ እግዚኣብሄር ልብኺ ከም ማይ ከዓዊ።

ስለ ነፍሳት እቶም ኣብ መኣዝን ኲሉ መገዲ

ጠምዮም ዘሕለልዉ ሕጻናትኪ ኣእዳውኪ ናብኡ ኣልዕሊ።

     ²⁰ጐይታየ፡ ርኤ እሞ ጠምት፡ ንመንከ ከምዚ ገበርካዮ፧

ኣንስቲዶ ፍረ ማሕጸነን ዝሓቚፋኦም ሕጻናት ይበልዓ፧

ካህንን ነብይንዶ ኣብ መቕደስ እግዚኣብሄር ይሕረዱ፧

     ²¹ቈልዑን ኣረገውትን ኣብ መሬት

ኣብ ኣደባባያት ተራዒቶም ኣለዉ፡

ጐረዞይን ኣጒባዘይን ከኣ ብሰይፊ ወደቑ።

ብመዓልቲ ኹራኻ ቐተልካዮም፡ ብዘይ ድንጋጽ ሓረድካዮም።

     ²²ንመፍርህየይ ካብ ኲሉ ወገን ከም ብመዓልቲ በዓል ጸዋዕካለይ።

ብመዓልቲ ዂራ እግዚኣብሄር ዘምልጥን ዝተርፍን የልቦን።

ነቶም ዝሓቘፍክዎምን ዘዕበኽዎምን እቲ ጸላእየይ ኣጽነቶም።

ዝ/ምዕ    ብ/ኪ   ሓ/ኪ

        ድ. ኤርምያስ  ምዕራፍ 3            

     ¹ኣነ ብሸቦጥ ቁጥዓኡ ሽጋር ዝርኤኹ ሰብኣይ እየ።

²ንሱ መርሓኒ፡ ብብርሃን ዘይኰነስ ብጸልማት ወሰደኒ።

³ብሓቂ መመሊሱ መዓልቲ ብመልኣ ኢዱ ኣባይ ይመልስ ኣሎ።

     ⁴ንስጋይን ቈርበተይን ኣእረጎ፡ ንዓጻጽምተይ ሰበሮ።

⁵ኣብ ከባብየይ ቀጽሪ ሰርሐ፡ ብመርዝን ድኻምን ከኣ ሓጸረኒ።

⁶ከምቶም ቀደም ዝሞቱ ኣብ ጸልማት ኣንበረኒ።

     ⁷ከይወጽእሲ ብመንደቕ ከበበኒ፡ ንሰንሰለተይ ኣኽበዶ።

⁸እንተ ጠራዕኩን ኣእዌኹን እኳ፡ ንጸሎተይ መሕለፊ ዓጸወሉ።

⁹ብቕሩጽ እምኒ ንጐደናታተይ ዓጸዎ፡

ንመገድታተይ ጥውጥዋይ ገበሮ።

     ¹⁰ከም ዘድበየ ድቢ፡ ተሓቢኡ ከም ዝቃጾ ኣንበሳ ኮነኒ።

¹¹ንመገደይ ኣዘምበሎ፡ ሰባበረኒ ኣዕነወኒውን።

¹²ቀስቱ ገተረ፡ ንፍላጻ ከኣ ዕላማ ገይሩ ኣቘመኒ።

     ¹³ብፍላጻታት ጒልድባኡ ኮላሊተይ ወግአ።

¹⁴መላገጺ ኩሉ ህዝበይ፡ መዓልቲ ብመልኣ መድረፊኦም ኰንኩ።

¹⁵ብመሪር ኣጽገበኒ፡ ዕረ ኣስተየኒ።

¹⁶ኣስናነይ ብጸጸር ሰበረ፡ ብሓመዂስቲ ኣጐልበበኒ።

     ¹⁷ነፍሰይ ካብ ሰላም ኣርሓቕካ፡ ነቲ ጽቡቕ ረሳዕክዎ።

¹⁸ኣነ ከኣ፡ ሓይለይን ብእግዚኣብሄር ተስፋይን ህልም በለ፡ በልኩ።

     ¹⁹ሽጋረይን ኰብለል ምባለይን፡ እቲ ዕረን መርዝን ዘክር።

²⁰ነፍሰይ ከየባተኸት ትዝክሮ፡ ኣብ ውሽጠይ ከኣ ደኒና ኣላ።

     ²¹እዚ ኣብ ልበይ ኤንብር፡ ስለዚ ድማ ተስፋ እገብር።

²²ምሕረቱ ኣይተወድአን እዩ እሞ፡

ጥራስ ዘይጠፋእናስ ጸጋ እግዚኣብሄር እዩ።

²³ኣብ ጸጽባሕ ሓድሽ እዩ፡ እሙን ምዃንካ ዓብዪ እዩ።

²⁴ነፍሰይሲ፡ ግደይ እግዚኣብሄር እዩ፡

ስለዚ ብእኡ ተስፋ እገብር፡ ትብል ኣላ።

²⁵እግዚኣብሄር ነቶም ዝጽበይዎ፡ ነታ እትደልዮ ነፍሲ ሰናይ እዩ።

²⁶ንምድሓን እግዚኣብሄር ተስፋ ምግባርን

ብህድኣት ምጽባይን ሰናይ እዩ።

²⁷ንሰብኣይ ብንእስነቱ ኣርዑት ምጻር ሰናይ እዩ።

     ²⁸ኣሰኪምዎ እዩ እሞ፡ ትም ኢሉ በይኑ ይቀመጥ።

²⁹ምናልባሽ ተስፋ ይህልዎ እዩ፡ ኣፉ ደኣ ኣብ ሓመድ የድንን፡

³⁰ንዝወቕዖ መልትሑ ይምለሰሉ ብጸርፊውን ይጽገብ።

     ³¹እግዚኣብሄርሲ ንዘለኣለም ኣይውግድን እዩ እሞ፡

³²እንተ ኣጒሃየ እኳ፡ ከምቲ ብዝሒ ጸጋኡ ይርሕርሕ እዩ።

³³ንደቂ ኣዳም ዘዋርዶምን ዘጒህዮምንሲ ብፍታው ልቡ ኣይኰነን።

     ³⁴ንዂሎም እሱራት ምድሪ ኣብ ትሕቲ እግሪ ምርጋጾም፡

³⁵ኣብ ቅድሚ ገጽ እቲ ልዑል መሰል ሰብኣይ ምቕናኖም፡

³⁶ንሰብ ብነገሩ ዓጋቢ ምግባርሲ፡ ነዚዶ እግዚኣብሄር ኣይርእዮን እዩ፧

     ³⁷እግዚኣብሄር ዘይኣዘዞስ፡ እተዛረበ እሞ ዝዀነሉ መን እዩ፧

³⁸ክፉእን ጽቡቕን ካብ ኣፍ እቲ ልዑልዶ ኣይወጽእን እዩ፧

³⁹ስለምንታይ እቲ ህያው ሰብ የጒረምርም፧

ነፍሲ ወከፍ ብሓጢኣቱ ደኣ የጒረምርም።

⁴⁰መገድና ንተዓዘብን ንመርምርን እሞ ናብ እግዚኣብሄር ንመለስ።

     ⁴¹ልብና ምስናይ ኣእዳውና ናብ እግዚኣብሄር ኣብ ሰማይ ነልዕል።

⁴²ንሕና በደልናን ዓሎናን፡ ንስኻውን ይቕረ ኣይበልካን።

     ⁴³ብዂራ ተጐልበብካን ሰጐጒካናን፡ ብዘይ ምሕረት ቀተልካ።

⁴⁴ጸሎት ከይሓልፍሲ፡ ደበና ተጐልበብካ።

⁴⁵ኣብ ማእከል ህዝብታት ጐሓፍን ፍንፋንን ገበርካና።

     ⁴⁶ኲሎም ጸላእትና ኣፎም ሃህ ኣበሉልና።

⁴⁷ፍርሃትን ጕድጓድን ምፍራስን ጥፍኣትን በጽሓና።

⁴⁸ብናይ ምጭፍላቕ ጓል ህዝበይ

ካብ ዓይነይ ውሒዝ ማይ ይውሕዝ ኣሎ።

     ^49-50እግዚኣብሄር ኣንቈልቁሉ ከሳዕ ዝርእን፡

ካብ ሰማይ ክሳዕ ዝጥምትንሲ፡

ዓይነይ ከይዓረፈን ከየቛረጸን ዘርባሕባሕ ይብል ኣሎ።

⁵¹ብምኽንያት ኲለን ኣዋልድ ከተማይ ዓይነይ ንነፍሰይ የሕዝና ኣሎ።

     ⁵²እቶም ብዘይ ምኽንያት ዝጸልኡኒ ከም ዑፍ ሃደኑኒ።

⁵³ህይወተይ ኣብ ጒድጓድ ኣጥፍኡ፡ ኣብ ልዕለይ ከኣ እምኒ ደርበዩ።

⁵⁴ማይ ኣብ ልዕሊ ርእሰይ ወሓዘ፡ ጥራስ ጠፍእኩ፡ በልኩ።

     ⁵⁵ካብ መዓሙቚ ጒድጋድ፡ ዎ እግዚኣብሄር፡ ስምካ ጸዋዕኩ።

⁵⁶ድምጸይ ሰሚዕካ፡ ካብ እህህታይን ጭርሓይን እዝንኻ ኣይትሕብኣዮ።

⁵⁷በታ ዝጸዋዕኩኻ መዓልቲ ቐረብካ፡ ኣይትፍራህ፡ በልካ።

     ⁵⁸ዎ ጐይታይ፡ ንነገር ነፍሰይ ተጣበቕካ፡ ንህይወተይ ተበጆኻ።

⁵⁹ዎ ጐይታይ፡ ነቲ ዝወረደኒ ግፍዒ ርኤኻ፡ ፍትሒ ኣውጽኣለይ።

⁶⁰ኲሉ እቲ ቒሞም፡ ኣባይ ዝጠለፍዎ ኩሉ ውዲቶም ርኤኻ።

     ^61-62ዎ ጐይታይ፡ ኲሉ ጸርፎም፡ ኲሉ ኣባይ ዝጠለፍዎ ውዲቶም፡

ከናፍር እቶም ተቓወምተይ፡

ምሉእ መዓልቲ እኩይ ዝመኽሩለይ ሰማዕካ።

⁶³ኣብ ምቕማጦምን ምትንሳኦምን እሞ ጠምት፡

ኣነስ መድረፊኦም ኰይነ ኣሎኹ።

     ⁶⁴ዎ እግዚኣብሄር፡ ከም ግብሪ ኣእዳዎም ሕነ ፍደዮም።

⁶⁵ድርቅና ልቢ ሃቦም፡ መርገምካ ኣውርደሎን።

⁶⁶ብቚጥዓ ስጐጎም፡ ካብ ትሕቲ ሰማይ እግዚኣብሄር ኣጽንቶም።

ዝ/ምዕ    ብ/ኪ   ሓ/ኪ

        ድ. ኤርምያስ  ምዕራፍ 4            

     ¹ከመይ ኢሉኸ እቲ ወርቂ ጸለመ፡

እቲ ኣዝዩ ጽሩይ ወርቂ ተለወጠ።

ኣእማን እታ መቕደስ ኣብ መኣዝን ኲሉ ኣደባባያት ተዘርወ።

     ²እቶም ጭዋታት ደቂ ጽዮን፡ ከም ጽሩይ ወርቂ ዝኸበሩ፡

ከመይ ኢሎምከ ከም ኣቓሑ መሬት፡

ከም ስራሕ ኣእዳው ሰራሕ መሬት ተቘጽሩ።

     ³ወኻሩ እኳ ኸይተረፋ፡ ኣጥባተን ሂበን፡ ንዀራኲረን የጥብዋ።

እታ ጓል ህዝበይ ግና ከም ሰገን በረኻ ጨከነት።

     ⁴ልሳን እቲ ዕሸል ብጽምኢ ኣብ ትንሓጉ ጠበቐ።

ቈልዑ እንጌራ ይልምኑ፡ ዝቘርሰሎም ከኣ የልቦን።

     ⁵እቶም ጥዑም ምግቢ ዝበልዑ ዝነበሩ ኣብ ኣደባባያት ይወድቁ።

እቶም ብቐይሕ ሃሪ ዝዓበዩ ጐድፍ ይሓቚፉ።

     ⁶ኣበሳ እታ ጓል ህዝበይ ካብታ ኣእዳው ከይተንከያ፡

ብድንገት እተገልበጠት ሶዶም፡ ካብ ሓጢኣታ ይዓቢ።

     ⁷መሳፍንቲ ኻብ በረድ ዘንጸባርቑ፡ ካብ ጸባ ዝጽዕድዉ፡

ስጋኦም ካብ ቀይሕ ዕንቊ ዝቐይሕ፡

መልክዖም ከም ሰፊሮስ ነበረ።

     ⁸ገጾም ካብ ጸሊም ይጽልም፡ ኣብ ኣደባባያት ኣይልለዩን፡

ቈርበቶም ኣብ ዓጽሞም ጠቢቑ፡ ነቒጹ ከም ዕጨይቲ ኮይኑ ኣሎ።

     ⁹ካብቶም ብጥሜት ዝሞቱ ብሰይፊ ዝሞቱ ይሕሾም፡

ፍረ ምድሪ ስለ እተሳእነ፡ ተወጊኦም ይማስኑ።

     ¹⁰ርሕሩሓት ኣንስቲ እኳ በእዳወን ደቀን ኣብሰላ፡

በቲ ጥፍኣት ጓል ህዝበይ ምግቢ ኾኑወን።

     ¹¹እግዚኣብሄር ነድሩ ፈጸመ፡ ርሱን ቁጥዓኡ ከዓወ፡

መሰረታታ ሞዂ ዘበለ ሓዊ ኣብ ጽዮን ኣንደደ።

     ¹²ነገስታት ምድርን ኣብ ዓለም ዝነብሩ ኩሎምንሲ

ተጻራርን ጸላእንብደጌታት የሩሳሌም ከም ዝኣቱ፡

ከቶ ኣይኣመኑን ነይሮም።

     ¹³ብምኽንያት ሓጢኣት ነብያታን ብሰሪ ኣበሳ ካህናታን፡

ንሳቶም ኣብ ማእከላ ደም ጻድቃን ስለ ዘፍሰሱ እዚ ኾነ።

     ¹⁴ሰብ ክዳውንቶም ንምትንካይ ክሳዕ ዝፍንፍን፡

ብደም ዝላላ ዀኑ፡

ከም ዕውራት ኰይኖም ኣብ ኣደባባያት ዕግንግን ይብሉ ኣለዉ።

     ¹⁵ርሓቑ፡ ኣቱም ርኹሳት፡ ርሓቑ፡ ርሓቑ ኣይትተንክዩ፡

ኢሎምይጭድሩሎም። ሃዲሞም ኰብለል በሉ።

ኣብ ማእከል ህዝብታት፡

ድሕርዝስ ኣብዚ ኣይክቕመጡን እዮም፡ ተባህለ።

     ¹⁶ገጽ እግዚኣብሄር ፋሕ ኣበሎም፡ መሊሱ ቚሊሕ ኣይብሎምን፡

ንሳቶም ንካህናት ኣየኽበሩን፡ ንኣረገውቲ ኸኣ ኣይደንገጹን።

     ¹⁷ንኸንቱ ደገፍ እናጠመትና፡ ገና ኣዒንትና ደኺመን ኣለዋ።

ብምጽባይናስ ነቲ ምድሓን ዘይከኣሎ ህዝቢ ተጸበና።

     ¹⁸በደባባይና ከይንኸይድ፡ ስጓሞና ይስልዩ፡

መወዳእታና ቐረባ፡ መዓልትታትና ኣኸለ፡ መወዳእታና በጽሐ።

     ¹⁹ሰጐጒትና ካብ ንስሪ ሰማይ ቀልጠፉ፡

ኣብ ኣኽራን ሃደኑና፡ ኣብ ምድረ በዳ ኣድበዩልና።

     ²⁰እቲ እግዚኣብሄር ዝቐብኦ፡

ብዛዕባኡ፡ኣብ ማእከል ህዝብታት

ኣብ ጽላሉ ኽንነብር ኢና፡

ዝበልናዮ መተንፈስ ትንፋስና ኣብ ጐደጒዶም ተታሕዘ።

     ²¹ኣቲ ኣብ ሃገር ኡጽ እትነብሪ ጓል ኤዶም፡

ተሓጐሲ፡ ደስ ይበልኪ፡

እቲ ጽዋእሲ ናባኺውን ክሓልፍ እዩ፡

ክትሰኽርን ጥራይኪ ኽትኰንን ኢኺ።

     ²²ኣቲ ጓል ጽዮን፡ ኣበሳኺ ተወድአ፡

ደጊምሲ ኣይከማርኸክን እዩ።

ኣቲ ጓል ኤዶም፡ ኣበሳኺ ክቘጽር እዩ፡

ሓጢኣትኪ ኽገልጽ እዩ።

ዝ/ምዕ    ብ/ኪ   ሓ/ኪ

        ድ. ኤርምያስ  ምዕራፍ 5            

     ¹ጐይታየ፡ እቲ ዝወረደና ዘክር፡

እቲ ነውርና ጠምትን ርኤን።

      ²ርስትና ኣብ መጻእተኛታት፡

ኣባይትና ኣብ ጓኖት ሓለፈ።

     ³ኣቦ ዘይብልና ዘኽታማት ኰንና፡

ኣዴታትና ከም መበላሉ ዀና።

     ⁴ማይ ብዋጋ ንሰቲ፡

ዕጨይትና ብመሸጣ ይመጸና።

     ⁵ሰጐጒትና ኣብ ክሳድና እዮም፡

ተሓለልና፡ ዕረፍቲ ሰኣንና።

     ⁶እንጌራ ምእንቲ ከንጸግብሲ፡

ኢድና ንግብጽን ኣሶርን ወፌና።

     ⁷ኣቦታትና ሓጢኣት ገበሩ፡ የለዉን ከኣ፡

ንሕና ድማ ኣበሳኦም ጾርና።

     ⁸ባሮት ይገዝኡና ኣለዉ፡

ካብ ኢዶም ዘናግፈና ከኣ የልቦን።

     ⁹ኣብ ቅድሚ ሰይፊ በረኻ፡ ህይወትና እናተዋልአት፡

እንጌራና ነምጽእ ኣሎና።

     ¹⁰ካብቲ ረስኒ ጥሜት እተላዕለ

ቈርበትና ከም እቶን ጸለመ።

     ¹¹ኣንስቲ ኣብ ጽዮን፡

ደናግል ኣብ ከተማታት ይሁዳ ኣተሓረቑ።

     ¹²መሳፍንቲ በእዳዎም ተሓንቁ፡

ገጽ ኣረገውቲ ኣየኽበሩን።

     ¹³ኣጒባዝሲ መጥሓን ተሰከሙ፡

ናእሽቱ ከኣ ኣብ ትሕቲ ዕጨይቲ ሰንከልከል በሉ።

     ¹⁴እቶም ኣረገውቲ ኣፍ ደገ፡

እቶም ኣጒባዝ ከኣ ደሃይ በገናኦም ሓደጉ።

     ¹⁵ታሕጓስ ልብና ኣቋረጸ፡

ጓይላና ናብ ሓዘን ተለወጠ።

     ¹⁶ኣኽሊል ካብ ርእስና ወደቐ፡

ሓጢኣት ጌርና ኢና እሞ፡ ወይለና።

     ^17-18ስለ እታ ወኻሩ ዝሓምበጣላ ዝባደመት ከረን ጽዮን፡

ስለዚ ልብና ተሓለለ፡

ስለዚ ኣዒንትና ጸልመታ።

     ¹⁹ንስኻ ዎ እግዚኣብሄር፡ ንዘለኣለም ትነብር፡

ዝፋንካ ንውሉድ ወለዶ እዩ።

     ²⁰ስለምንታይ ንሓዋሩ እትርስዓና፧

ንነዊሕ ዘመንስ እትሓድገና፡

     ²¹ጐይታየ፡ ናባኻ ምለሰና ንሕናውን ንምለስ።

ንመዓልትታትና ከምቲ ናይ ቀደም ሓድሶ።

     ²²ጠሪስካዶ ደርቢኻና ኢኻ፧

ኣዚኻዶ ዀሪኻልና ኣሎኻ፧