መጽሓፍ እዮብ

1  2  3  4  5  6  7  8  9
10  11  12 13  14  15
16  17  18  19  20  21
22  23  24  25  26  27
28  29  30  31  32  33
34  35  36  37  38  39
40  41  42

        መ. እዮብ  ምዕራፍ 1            

   1ኣብ ምድሪ ኡጽ እዮብ ዝበሃል ሰብኣይ ነበረ። ንሱ ፍጹምን ቅኑዕን ንኣምላኽ ዝፈርህን ካብ ክፋእ ዝረሓቐን ሰብኣይ ነበረ። 2ንሱ ሾብዓተ ኣወዳትን ሰለስተ ኣዋልድን ተወሊዶምሉ ነበሩ። 3ጥሪቱ ድማ ሾብዓተ ሽሕ በጊዕ፡ ሰለስተ ሽሕ ገመል፡ ሓሙሽተ ሽሕ ጽምዲ ብዕራይ፡ ሓሙሽተ ሚእቲ ውላድ ኣድጊ ነበረ፡ ብዙሓት ግዙኣትውን ነበርዎ። እዚ ሰብኣይ እዚ ኻብ ኲሎም ሰብ ምብራቕ ዝበልጽ ዓብዪ ነበረ።
   4እቶም ደቁ ድማ፡ በብታራኦም እናተዓዳደሙ፡ ሓደ መዓልቲ ኣብ ቤት እቲ ሓደ፡ ካልኣይ መዓልቲውን ኣብ ቤት እቲ ኻልእ ይምስሑ ነበሩ። ነተን ሰለስተ ኣሓቶም ከኣ፡ ምእንቲ ምሳታቶም ክበልዓን ክሰትያን፡ ይጽውዕወን ነበሩ። 5እተን ንምሳሕ ዝእከቡለን መዓልትታት ምስ ሓለፋ ኸኣ፡ እዮብ ልኢኹ ይቕድሶም ነበረ። ኣንጊሁ ተንሲኡ ድማ ብቑጽሪ ነፍሲ ወከፎም መስዋእቲ ምሕራር የዕርግ ነበረ። እዮብ፡ እዞም ደቀይ ምናልባሽ በዲሎም፡ ንኣምላኽ ከኣ ብልቦም ክሒዶም ይዀኑ፡ ኢሉ ነበረ እሞ፡ ኲሉ ግዜ ኸምዚ ይገብር ነበረ።
   6ሓደ መዓልቲ ግና ዀነ፡ እቶም ደቂ ኣምላኽ መጺኦም ኣብ ቅድሚ እግዚኣብሄር ቈሙ። ሰይጣን ከኣ ኣብ ማእከሎም መጸ። 7ሽዑ እግዚኣብሄር ንሰይጣን፡ ካበይ መጺእካ በሎ። ሰይጣን ድማ፡ ንምድሪ ዘይረያን ተመላሊሰያን መጻእኩ፡ ኢሉ ንእግዚኣብሄር መለሰሉ። 8እግዚኣብሄር ከኣ ንሰይጣን፡ ከም እዮብ ገይሩ ንኣምላኽ ዝፈርህን ካብ ክፋእ ዝርሕቕን ፍጹምን ቅኑዕን ሰብ ኣብ ምድሪ የልቦን እሞ፡ ንባርያይ እዮብስ ኣስተብሂልካዮዶ በሎ። 9ሰይጣን ከኣ ንእግዚኣብሄር መለሰሉ በሎውን፡ እዮብ ንኣምላኽ ዝፈርሆስ ብኸምኡ ድዩ፧ 10ንስኻ ንእኡ ምስ ቤቱን ኣብ ዙርያኡ ዘለዎ ዂሉንዶ ሓጺርካዮ ኣየሎኻን ንተግባር ኢዱ ባረኽካዮ፡ ጥሪቱ ድማ ንምድሪ መሊእዎ ኣሎ። 11ግናኸ፡ ኣብታ ገጽካ እንተ ዘይክሒዱካስ፡ ኢድካ ዘርጊሕካ ደሞ ንዂሉ ጥሪቱ ሃሰስ ኣይትብሎን፡ ኢሉ መለሰሉ። 12ሽዑ እግዚኣብሄር ንሰይጣን፡ በሎ እስኪ፡ ሓንትስ ናብኡ ደኣ ኢድካ ኣይትዘርግሕ እምበር፡ ዘለዎ ዂሉ ኣብ አድካ ሂበካ እኔኹ፡ በሎ። ሰይጣን ከኣ ካብ ገጽ እግዚኣብሄር ወጸ።
   13ኰነ ድማ፡ ሓደ መዓልቲ እቶም ኣወዳቱን ኣዋልዱን ኣብ ቤት እቲ ዓብዪ ሓዎም ክበልዑን ወይኒ ኽሰትዩን ከለው፡ 14መእወዪ ናብ እዮብ መጺኡ፡ እቶም ኣብዑር ይሕረሱ፡ እተን ኣእዱግ ድማ ኣብ ጥቓኣቶም ይበልዓ ነበራ፡ 15ሽዑ ሰብ ሳባ መጺኦም ዘሚቶምዎም። ነቶም ግዙኣት ብስሕለት ሴፍ ቀቲሎምዎም። ኣነ በይነይ ጥራይ እየ ነዚኣ ኽነግረካ ዘምለጥኩ፡ በሎ።
   16እዚ ገና ኽዛረብ ከሎ ኸኣ፡ ካልእ መጺኡ፡ ናይ ኣምላኽ ሓዊ ኻብ ሰማይ ወሪዳ፡ ነተን ጤለ በጊዕን ንግዙኣትን ኣንደደቶምን በልዓቶምን። ኣነ በይነይ ጥራይ እየ ነዚኣ ኽነግረካ ዘምላጥኩ፡ በሎ።
   17እዚ ገና ኽዛረብ ከሎ ኸኣ፡ ካልእ መጺኡ፡ ከልዳውያን ብሰለስተ ሰልፊ ዀይኖም፡ ኣብተን ኣግማል ሓደጋ ወዲቖም ዘሚቶምወን፡ ነቶም ግዙኣትውን ብስሕለት ሴፍ ቀቲሎምዎም። ኣነ በይነይ ጥራይ እየ ነዚኣ ኽነግረካ ዘምለጥኩ፡ በሎ።
   18እዚ ገና ኽዛረብ ከሎ ኸኣ፡ ካልእ መጹኡ፡ ኣወዳትካን ኣዋልድካን ኣብ እንዳ እቲ ዓብዪ ሓዎም ይበልዑን ወይኒ ይሰትዩን ነበሩ፡ 19ሽዑ ብርቱዕ ህቦብላ ንፋስ ካብ በረኻ መጺኡ፡ ነታ ቤት በርባዕተ መኣዝና፡ ወቕዓ፡ ናብ ርእሲ እቶም ደቂ ድማ ወደቐት፡ ንሳቶም ከኣ ሞይቶም። ኣነ በይነይ ጥራይ እየ ነዚኣ ኽነግረካ ዘምለጥኩ፡ በሎ።
   20-21ሽዑ እዮብ ተንሲኡ ኽዳኑ ቐደደ ርእሱውን ላጸየ እሞ፡ ጥራየይ እየ ኻብ ከርሲ ወላዲተይ ዝወጻእኩ፡ ጥራየይ ከኣ ናብኣ ኽምለስ እየ። እግዚኣብሄር ሃበ፡ እግዚኣብሄር ድማ ወሰደ። ስም እግዚኣብሄር ይባረኽ፡ ኢሉ ናብ ምድሪ ተደፊኡ ሰገደ።
   22በዚ ዂሉ እዮብ ኣይበደለን፡ ንኣምላኽውን ኣይነቐፎን።

        መ. እዮብ  ምዕራፍ 2            

   1ኰነ ኸኣ፡ ሓደ መዓልቲ እቶም ደቂ ኣምላኽ መጺኦም ኣብ ቅድሚ እግዚኣብሄር ቈሙ። ሰይጣን ድማ መጺኡ፡ ኣብ ማእከሎም ኣብ ቅድሚ እግዚኣብሄር ቈመ። 2እግዚኣብሄር ድማ ንሰይጣን፡ ካበይ መጺእካ በሎ። ሰይጣን ከኣ ንእግዚኣብሄር፡ ንምድሪ ዞይረያን ተመላሊሰያን መጻእኩ፡ ኢሉ መለሰሉ። 3ሽዑ እግዚኣብሄር ንሰይጣን፡ ከም እዮብ ገይሩ ንኣምላኽ ዝፈርሆ፡ ካብ ክፋእ ዝርሕቕ፡ ፍጹምን ቅኑዕን ሰብ ኣብ ምድሪ የልቦን እሞ፡ ንእዮብ ባርያይ ኣስተብሂልካዮዶ ብዘይ ምኽንያት ከጥፍኦ ኣላዓዒልካኒ ኽነስኻስ፡ ክሳዕ ሕጂ ንሱ ፍጹም ኰይኑ ይጸንዕ ኣሎ፡ በሎ። 4ሰይጣን ድማ ንእግዚኣብሄር፡ ቈርበት ኣብ ክንዲ ቘርበት። ሰብ ኣብ ክንዲ ህይወቱ ዘለዎ ዂሉ ይህብ እዩ። 5ግናኸ፡ ኣብ ገጽካ እንተ ዘይክሒዱካስ፡ ኢድካ ዘርጊሕካ ደሞ ስጋኡን ዓጽሙን ሃሰስ ኣይትብሎን፡ ኢሉ መለሰሉ። 6እግዚኣብሄር ከኣ ንሰይጣን፡ በል እስኪ ኣብ ኢድካ ሂበዮ እኔኹ፡ ንህይወቱ ግና ተጠንቀቕ፡ በሎ። 7ሽዑ ሰይጣን ካብ ገጽ እግዚኣብሄር ወጺኡ ኸደ እሞ፡ ንእዮብ ካብ ሸዀና እግሩ ሒዙ ኽሳዕ ቅርቅርቱ ብብርቱዕ ቁስለተ ስጋ ወቕዖ።
   8እዮብ ድማ ምእንቲ ኽሓከሉ ገልዒ ሒዙ ኣብ ሓመዂሽቲ ተቐመጠ። 9ሽዑ እታ ሰበይቱ፡ ገናዶ ፍጹም ኴንካስ ጸኒዕካ ትነብር ኣሎኻ ንኣምላኽ ግዳ ኽሓዶ እሞ ሙት፡ በለቶ። 10ንሱ ግና፡ ንስኺ ኣዘራርባ ዓሻ ሰበይቲ ትዛረቢ ኣሎኺ። ካብ ኢድ ኣምላኽ ሰናይ ተቐቢልናስ፡ ነቲ እኩይከ ኣይንቕበሎንዶ በላ።
   እዮብ በዚ ዂሉ ነገር ብኽናፍሩ ኣይሓጥአን።
   11ሰለስተ ፈተውቲ እዮብ፡ ኤሊፋዝ ቴማናዊ፡ ቢልዳድ ሹዋዊ፡ ሶፋር ናዕማዊ፡ እቲ ዝወረዶ መከራ ሰሚዖም ካብ ዓዓዶም ናብኡ መጹ። ንሳቶም፡ ምስኡ ኽንሓዝንን ከነጸናንዖንሲ፡ ንዑናይ ንኺድ፡ ተባሃሃሉ።
   12ካብ ርሑቕ ኣማዕድዮም ጠሚቶም ምልላዩ ምስ ሰኣኑ ግና፡ ዓው ኢሎም በኸዩ፡ ነፍሲ ወከፎም ድማ ክዳውንቶም ቀደዱ፡ ሓመድ ከኣ ናብ ሰማይ ኣቢሎም ናብ ኣራእሶም ነስነሱ። 13ድሕሪ እዚ ኸኣ ሾብዓተ መዓልትን ሾብዓተ ለይትን ምስኡ ኣብ ምድሪ ተቐመጡ። ቃንዛ በርቲዕዎ ስለ ዝረኣዩ ኸኣ፡ ሓንቲ ቓል እኳ ኣይተዛረብዎን።

        መ. እዮብ  ምዕራፍ 3            

      ¹ድሕርዚ እዮብ ኣፉ ኸፊቱ ንመዓልቲ ልደቱ ረገማ።²እዮብ ከምዚ ኢሉ ተዛረበ፡

³እታ ኣነ እተወለድኩላ መዓልትን

እታ ወዲ ተጠኒሱ እተባህለትላ ለይትን ትደምስስ።

⁴እታ መዓልቲ እቲኣ ጸልማት ትኹን፡

ኣምላኽውን ካብ ላዕሊ ኣይቋመታ፡

ብርሃን ከኣ ኣይብርሃያ።

⁵ጸልማት ድነ ሞትን ናትና እያ ኢሎም ይሓዝዋ፡

ደበና የጐልብባ፡

እቲ ንመዓልቲ ዘጸልምት ከኣ የሸብራ።

⁶ነታ ለይቲ እቲኣ ጸልማት ይመንጥላ፡

ምስተን ናይ ዓመት መዓልትታት ኣይትተሓወስ፡

ኣብ ቁጽሪ ኣዋርሕውን ኣይትእቶ።

⁷እታ ለይቲ እቲኣ መኻን ትኹን፡

እልልታውን ኣይእተዋ።

⁸እቶም ንመዓልቲ ዝረግሙ

ንሌዋታን ድማ ከንቀሳቕሱ ዝኽእሉ ይርገምዋ።

^9-10ንሳ ነቲ መዓጹ ማሕጸን ወላዲተይ ስለ ዘይዓጸወቶ፡

ነቲ መከራስ ካብ ዓይነይ ስለ ዘይከወለቶ፡

ናይ ኣጋ ጽባሕ ከዋኽብቲ ይጸልምቱ፡

እቲ እተጸበየቶ ብርሃን ኣይምጽኣያ፡

ናይ ወጋሕታ ቕርኒብ ዓይኒ ከቶ ኣይትርአ።

¹¹ስለምንታይከ ኣብቲ ማሕጸን ዘይሞትኩ፡

ካብኡ ወጺአስ ብኡብኡ ዘይጠፋእኩ፧

¹²ስለምንታይከ ኣብራኽ፡

ኣጥባትሲ ኽጠቡ ንምንታይ ተቐበላኒ፡

^13-15ከምዚ ሕጂ ሃዲአ በጥ ምበልኩ፡

ምስቶም ነገስታትን መኸርቲ ምድርን፡

ምስቶም ናይ መቓብር ኣደራወት ዘስርሑ፡

ምስቶም ብዙሕ ወርቂ ዝደለቡ፡

ኣባይቶምውን ብብሩር ዝመልኡ መሳፍንቲ

ደቂሰ ምዓረፍኩ ነይረ።

¹⁶ወይስ ከም እተቐብረ ቑላዕ፡

ከምቲ ብርሃን ዘይረኣየ ሕጻን ኣይምዀንኩን ነይረ።

¹⁷ኣብኡስ እቶም ረሲኣን እኳ ቑጥዓ ሓዲጎም፡

እቶም ዝላሕልሑውን ኣብኡ ዓሪፎም ኣለው።

¹⁸እቶም እሱራትውን ብሓባር ሃዲኦም፡

ድምጺ እቶም ሳቐይቶም ኣይሰምዑን ኣለው።

¹⁹ኣብኡስ ንእሽቶን ዓብይን ሓደ እዮም፡

ባርያውን ካብ ጐይታኡ ሓራ ወጺኡ እዩ።

²⁰ነቲ ምግዱርክ ስለምንታይ እዩ ብርሃን ዝሃቦ፧

አረ ነቶም መሪር ስቓይ ዝሳቐዩስ

ንምንታይ ህይወት ሃቦም፡

²¹እቶም ንሞት ከም ሕብእ መዝገብ

እናዀዓቱ ዝደልይዎ እሞ ዝይረኽብዎ፡

²²እቶም ንመቓብር ምስ ረኸቡ፡

እልል እናበሉ ኣዝዮም ዝሕጐሱ፡

²³ነቲ መገዱ ሕቡእ ዝዀነ፡

ነቲ ኣምላኽ ብሓጹር ዝኸበቦ ሰብሲ

ስለምንታይ እዩ ብርሃን ዝሃቦ፧

²⁴እህህታይ ቅድሚ እንጌራይ ይመጽእ፡

ምንኣኸይ ከም ማይ ይፈስስ ኣሎ።

²⁵እቲ ዝፈራህክዎ ነገር መጺኡኒ፡

እቲ ዝስቀቖ ዝነበርኩ ኸኣ ወሪዱኒ።

²⁶ዕረፍቲ ስኢነ፡ ህድኣትን ዝግታን የብለይን፡

ዓቕለይ ጸቢቡኒ እኔኹ።

        መ. እዮብ  ምዕራፍ 4            

     ¹ድሕርዚ ኤሊፋዝ ቴማናዊ ኸምዚ ኢሉ መለሰ፡

²ክንዛረበካ እንተ ንፍትንሲ፡ ምጒሄኻዶ፧

ዘረባኡ ኽገትእ ዝኽእልከ መን ኣሎ፧

³እንሆ፡ ንብዙሓት መዓድካዮም፡

ንዝደኸማ ኣእዳው ከኣ ኣበርታዕካየን።

⁴ዘረባኻ ነቶም ሰንከልከል ዝብሉ ኣቕንዖም፡

ንዝደኸማ ኣብራኽውን ኣጽናዕካየን።

⁵ሕጂ ናባኻ እንተ በጽሐ ግና፡ ምጽዋሩ ስኢንካ፡

ናባኻ እንተ ወረደ፡ ተሸቢርካ እኔኻ።

⁶እቲ ንኣምላኽ ምፍራህካስ እሙንቶኻ፡

እቲ መገድኻ ፍጹም ምዃኑ ኸኣ ተስፋኻዶ ኣይኰነን፡

⁷እስኪ ተመልከት፡ ንጹህ ከም ዝጠፍአ፡

ቅኑዕውን ከም እተደምሰሰዶ ርኢኻ ትፈልጥ፧

⁸ኣነስ ከምዚ ደኣ ርአኹ፡ እቶም ሓጢኣት ዝሓርሱ፡

መከራ ኸኣ ዝዘርኡ፡ ንእኡ ይዓጽድዎ።

⁹ንሳቶም ብእስትንፋስ ኣምላኽ ይጠፍኡ፡

ብመንፈስ ቁጥዓኡ ይበኑ።

¹⁰ምጒዛም ኣንበሳ፡ ድምጺ እቲ ጓዛሚ፡

ኣስናን ሽደን ኣንበሳውን ይስበር።

¹¹እቲ ኣረጊት ኣንበሳ ዝነጥቕ ስኢኑ እዩ እሞ ይመውት፡

ኰራኲር ኣንበሳ ኸኣ ፋሕ ይብሉ።

¹²ንኣይ ግና ቓል ብሕቡእ መጸኒ፡

እዝነይ ከኣ ንሕሽዂሽዂ ተቐበሎ፡

¹³በቲ ናይ ለይቲ ራእይ ሓሳባት

ንሰባት ብርቱዕ ድቃስ ምስ ወደቖም፡

¹⁴ፍርሃትን ረዓድን ሓዘኒ እሞ፡

ንብዘሎ ኣዕጽምተይ ኣናወጾ።

¹⁵ሓደ መንፈስ ብቕድመይ ሓለፈ፡

ጸጒሪ ስጋይ ተኸየፈ።

¹⁶ንሱ ቘመ፡ መልክዑ ግና ኣየለሌኽዎን፡

ረቂቕ መንፈስ ኣብ ቅድሚ ዓይነይ፡

ስቕታ ነበረአ፡ ድምጺ ኸኣ ሰማዕኩ፡

¹⁷መዋቲ ሰብዶ ኻብ ኣምላኽ ይጸድቕ እዩ፡

ሰብዶ ኻብ ፈጣሪኡ ይነጽህ እዩ፧

¹⁸እንሆ፡ ነቶም ኣገልገልቱ እኳ ኣይኣምኖምን

ንመላእኽቱውን ጒድለት ይረኽበሎም።

¹⁹እምበኣርሲ እቶም መሬት ዝቤቶም፡

ሓመድ ዝመሰረቶም፡

ከም ሓሰኻ ኽጭፍለቑ እዮም።

²⁰ካብ ንግሆ ኽሳዕ ምሸት ይቑረጹ፡

ንሓዋሩ ይጠፍኡ፡ ዝሓስቦውን የልቦን።

²¹እቲ ገመድ ድንኳኖም ይብተኽ፡

ብዘይ ጥበብ ይሞቱ።

        መ. እዮብ  ምዕራፍ 5            

     ¹ምላሽ ዝህበካ እንተ ረኺብካስ፡ እስኪ ጸውዕ፡

ካብ ቅዱሳንከ ናብ መኖም ክትብል ኢኻ፧

²ንደንቈሮ ሰብ ኲራ ይቐትሎ፡

ንዓሻ ኸኣ ቅንኣት የጥፍኦ።

³ኣነ ንደንቈሮስ ሱር ሰዲዱ ርአኽዎ፡

ብኣብኣ ኸኣ ንቤቱ ረገምክዋ።

⁴ደቁ ኻብ ረዲኤት ርሒቖም እዮም እሞ

ኣብ ደገ ይርገጹ፡ ዘናግፎም ከኣ የልቦን።

⁵ነቲ እቶቱ ዝጠመየ ይበልዖ፡

ካብ እሾዂ እኳ የውጽኦ፡

ንጥሪቱ መድፈና ሃህ ኢሉ ይጽበዮ።

⁶መከራ ኻብ ሓመድ ኣይወጽእን እዩ እሞ፡

መግደራ ኻብ መሬት ኣይበቁልን።

⁷ግናኸ፡ ከምቲ ቑልዒ ንላዕሊ ኣቢሉ ዝነጥር፡

ሰብ ንመከራ እዩ ዝውለድ።

⁸ኣነ ግን ኣምላኸ ምደሌኹ፡

ነገረይ ከኣ ንኣምላኽ ምወፌኹ፡

⁹ነቲ ዓበይትን ዘይምርመርን ነገራት፡

ክቑጸር ዘይክእል ተኣምራትውን ዝገብር ዘሎ፡

¹⁰ነቲ ኣብ ልዕሊ ምድሪ ዘዝንም

ንግራሁውን ማያት ዝሰድድ፡

¹¹ንሕሱራት ልዕል ዘብሎም፡

ንሕዙናት ድማ ብምድሓን ዘልዕሎም፡

¹²ኣእዳዎምሲ ብተንኰል ገለ ኸየስልጣ፡

ንተንኰል ጐራሓት ከንቱ ዝገብሮ ንሱ እዩ።

¹³ንጠቢባን ብጒርሖም ይሕዞም፡

ንምኽሪ ጠዋያት ከኣ ይዝርዝሮ።

¹⁴ብመዓልቲ ንኣታቶ ጸልማት ይጓነፎም፡

ብቐትርስ ከም ብለይቲ ሃሰስ ይብሉ።

¹⁵ንሱ ነቲ መስኪን ካብ ሴፍ ኣፎምን

ካብ ኢድ ሓያልን የናግፎ።

¹⁶ስለዚ ነቲ መስኪን ተስፋ ኣለዎ፡

ዓመጻ ኸኣ ኣፋ ትዓጹ።

¹⁷እንሆ፡ እቲ ኣምላኽ ዝግስጾ ሰብሲ ብጹእ እዩ፡

ስለዚ ንመቕጻዕቲ እቲ ዂሉ ዝኽእል ኣይትንዓቆ።

¹⁸ንሱ የቑስልን ይዘንንን፡

ንሱ ይወቅዕ ኣእዳው የሕውያ።

¹⁹ካብ ሹድሽተ ጸበባ ኸናግፈካ፡

አረ ኣብ ሾብዓተ ደኣ ኽፋእ ኣይክትንክየካን እዩ።

²⁰ብዘመን ጥሜት ካብ ሞት፡

ብውግእውን ካብ ሓይሊ ሴፍ ክብጀወካ እዩ።

²¹ካብ ጭጒራፍ ልሳን ክትክወል፡

ድባበ ኽወጽእ ከሎ፡ ኣይክትፈርህን ኢኻ።

²²ነቲ ድባበን ጥሜትን ክትስሕቆ፡

ንኣራዊት ምድሪውን ኣይክትፈርሆምን ኢኻ።

²³ምስ ኣእማን መሮር ኪዳን ኣቲኻ ኢኻ እሞ፡

እንስሳ መሮርውን ብሰላም ምሳኻ ክዀኑ እዮም።

²⁴ድንኳንካ ብሰላም ከም ዘሎ ኽትፈልጥ ኢኻ፡

ንኸብትኻ እንተ ተቛመትካዮ፡ ዝስአን የልቦን።

²⁵ዘርእኻ ብዙሕ ምዃኑ፡

ተወልዶኻ ኸም ሳዕሪ ምድሪ ምዃኑ ኽትፈልጥ ኢኻ።

²⁶ኲልስስቲ እኽሊ ብግዜኡ ኸም ዝኣቱ፡

ብጽቡቕ ሽምግልና ኽትቅበር ኢኻ።

²⁷እንሆ፡ ንሕና ዝመርመርናዮ ኸምኡ እዩ፡

ንስኻ ድማ ሰሚዕካስ ተጠቐመሉ።

        መ. እዮብ  ምዕራፍ 6            

     ¹ሽዑ እዮብ ከምዚ ኢሉ መለሰ፡

²ወዮ፡ ትካዘይ እንተ ዝምዘን፡

መከራይውን ምስኡ ኣብ ሚዛን እንተ ዝኣቱ፡

³ካብ ሑጻ ባሕሪ ምኸበደ ነይሩ፡

ስለዚ ምግታእ ዘረባይ እስእን ኣሎኹ።

⁴ፍላጻታት ናይቲ ዂሉ ዝኽእል ወጊኡኒ ኣሎ እሞ፡

መንፈሰይ መርዙ ይሰቲ ኣሎ፡

ካብ ኣምላኽ ዝመጸኒ ስምባደ ተሰሊፉ ይቃወመኒ ኣሎ።

⁵ኣድጊ በረኻዶ፡ ሳዕሪ እንተ ረኸበ፡ ይሃልል እዩ፡

ብዕራይከ ሓሰር እንተ ረኸበዶ፡ ይንቁ እዩ፧

⁶ነቲ መቐረት ዘይብሉ ብልዒኸ

ብዘይ ጨው መን ይበልዖ፧

ማይ እንቋቑሖስ እንታይ ጣዕሚ ኣለዎ፧

⁷ነፍሰይ ምቕራብ ኣበየቶ፡

እዚ ንኣይ ዕልቅጥ ዝብል ብልዒ ዀነኒ።

⁸አየ፡ ጸሎተይ እንተ ዝስማዕ፡

ኣምላኽ ድማ ተስፋይ እንተ ዝምልኣለይ።

⁹ኣምላኽ ክደቑሰኒ፡ ኢዱ ዘርጊሑ

ንህይወተይ ክቘርጻ ፍቓዱ እንተ ዝኸውንሲ፡

¹⁰ሽዑ ምተጸናናዕኩ፡

ንቓል እቲ ቅዱስ ኣይከሓድክዎን እሞ፡

በቲ ዘይንሕፈኒ ስቓይ እኳ እልል ምበልኩ ነይረ።

¹¹ክጽመምሲ ኽንደይ እዩ ሓይለይ፧

ዓቕሊ ኽረክብሲ መወዳእታይ አየናይ እዩ፧

¹²ሓይለይዶ ኸም ሓይሊ እምኒ እዩ፧

ስጋይሲ ኣስራዚዶ እዩ፧

¹³ረዲኤት ዘይብለይዶ ኣይኰንኩን፧

መውጽኢ ዘይብለይዶ ተዓጽዩኒ ኣይኰነን፧

¹⁴እቲ ንብጻዩ ምሕረት ዘይገብረሉ፡

ንፍርሃት እቲ ዂሉ ዝኽእል ይሓድጎ።

^15-16ከምቲ ብርባርባ ዝሓለፈ ብበረድ እተዘርገ፡

ውርጪውን ኣብኡ እተሓብአ፡

ውሒዝ ኰይኖም ኣሕዋተይ ጠለሙ።

¹⁷ብግዜ ነቕጺ ግና ይነጽፍ፡

ሃሩር እንተ በርትዐ፡ ካብ ስፍራኡ ይጠፍእ።

¹⁸ቃፍላይ ካብ መገዶም ኣግሊሶም፡

ናብ በረኻ ወጺኦም ይጠፍኡ።

¹⁹ናይ ቴማን ቃፍላይ ናብኡ የማዕድው፡

ናብ ሳባ ሓለፍቲ መገዲ ንእኡ ተስፋ ይገብሩ።

²⁰ብእኦም ተስፋ ገይሮም ነይሮም እዮም እሞ ሓፈሩ፡

ናብኡ ምስ በጽሑ፡ ሕፍረት ሓዞም።

²¹ሕጂ ንስኻትኩምውን ከምኡ ፍረ ዘይብልኩም ኢኹም፡

ዘፍርህ ርኢኹምሲ ትሽበሩ ኣሎኹም።

²²ኣነስ፡ ሃቡኒ፡ ወይስ

ሪትኩም ንበጃ ነፍሰይ ሃቡለይዶ ኢለኩም እየ፧

²³ካብ ኢድ ጸላእየይ ኣናግፉኒ፡

ወይስ ካብ ኢድ ጨቋኒ ተበጀውኒዶ ኢለኩም እየ፧

²⁴ምሃሩኒ እሞ፡ ስቕ ክብል እየ፡

እቲ እተጋጌኽዎ ኽስተብህልስ፡ እስኪ ኣፍልጡኒ።

²⁵ቅኑዕ ዘረባስ ክንደይ ሓይሊ ኣለዎ፡

ዘለፋኹም ግና እንታይ ይጠቅም፧

²⁶ንዘረባ ኽትነቕፉዶ ትሓስቡ ኣሎኹም፧

እቲ ተስፋ ዝቐበጸ ግና ንንፋስ እዩ ዝዛረብ።

²⁷ንዘኽታም ዕጭ መውደቕኩምሉ፡

ንፈታዊኹም ምተዋጌኹምዎ ኔርኩም።

²⁸እስኪ ሕጅስ ናባይ ኣቕልቡ፡

ኣብ ቅድሜኹም ኣይሕሱን እየ።

²⁹ተመለሱ ደኣ፡ ዓመጻስ ኣይኹን፡

አረ ተመለሱ፡ ነገረይ ጻድቕ እዩ።

³⁰ኣብ ልሳነይዶ ዓመጻ ይርከብ እዩ፧

ትንሓገይከ ነቲ ኽፋእዶ ኣይለልዮን እዩ፧

        መ. እዮብ  ምዕራፍ 7            

     ¹ንሰብሲ ኣብ ምድሪ ሰልፊዶ ኣይኰነን፧

መዓልትታቱዶ ኸም መዓልትታት

ብዓል ውዕለት ኣይኰናን፧

²ከምቲ ጽላል ዝናፍቕ ባርያ፡

ከምቲ ውዕለቱ ዝጽበ ብዓል ውዕለት፡

³ኣነ ኸኣ ከምኡ ኣዋርሕ ከንቱነት ተዓዲለ፡

ለይትታት ጻዕሪ ተቘጺረናለይ።

⁴ምስ ተገምሰስኩ፡ መኣዝ ኰን ክትንስእ እየ እብል።

ለይቲ ነዊሕ እዩ እሞ፡ ክሳዕ ዝወግሕ

ምግልባጠይ እጸግብ ኣሎኹ።

⁵ስጋይ ብሓሰኻን ብቕላጥ መሬትን ተሸፊኑ፡

ቈርበተይውን እናተዀምተረ ይቕደድ።

⁶መዓልትታተይ ካብ መደርብዮ ኣላማይ ይቕልጥፋ፡

ብዘይ ተስፋ ይበና ኣለዋ።

⁷ህይወተይ ሃፋ ምዃና ዘክር፡

ኣዒንተይውን መሊሰን ጽቡቕ ነገር ኣይኪርእያን እየን።

⁸እታ እትርእየኒ ዘላ ዓይኒ መሊሳ ኣይክትርእየንን እያ፡

ኣዒንትኻ ኽደልያኒ እየን፡ ኣነ ግና የሎኹን።

⁹ደበና ሓሊፉ ኸም ዝብተን፡

ከምኡውን እቲ ናብ ሲኦል ዝወርድ መሊሱ ኣይወጽእን።

¹⁰ናብ ቤቱ ከቶ ኣይምለስን፡

ቦታኡ ደጊም ኣየለልዮን።

¹¹ስለዚ ኣነ ንኣፈይ ኣይክለጒሞን፡

ብጸበባ መንፈሰይ ክዛረብ፡

ብምረት ነፍሰይ ክቑዝም እየ።

¹²ሓላዊ ዝገበርካለይከ፡

ኣነዶ ባሕሪ ወይስ ዓሳ ኣንባሪ እየ፧

¹³መንጸፈይ ከጸናንዓኒ፡

ምድቃሰይ ሓዘነይ ከቕልለለይ እዩ፡ እንተ በልኩ፡

¹⁴ሽዑ ንስኻ ብሕልሚ ተፈራርሃኒ፡

ብራእይውን ተባህርረኒ፡

¹⁵ነፍሰይሲ ኽትሕነቕ፡

ካብ እዘን ኣዕጽምተይ ከኣ ሞት ትሓሪ።

¹⁶ኣነስ መንየዮ እየ፡ ብህይወት ክነብር ኣይደልን፡

መዓልትታተይ ምናምን እየን እሞ፡ ሕደገኒ።

^17-18ሰብ፡ ከም ቁም ነገር እትርእዮ፡

ተጠንቂቕካ እትምልከቶ፡

ኣብ ጸጽባሕ እትቋመቶ፡

በብቕጽበትውን እትዕዘቦስ፡ እንታይ እዩ፧

¹⁹ክሳዕ መኣዝ ኢኻ ምጥማትካ ኻባይ ዘይተግልሶ፧

ምራቐይ ክሳዕ ዝውሕጥከ ዘይትሓድገኒ፧

²⁰ኣንታ ተቛማታይ ደቂ ሰብ፡

በዲለ እንተ ዀንኩስ፡ ንኣኻ እሞ እንታይ ገይረካ፧

ስለምንታይ ኢኻ ንነፍሰይ፡

ከቢድ ጾር ዝዀና ዕላማኻ ዝገበርካኒ፧

²¹ስለምንታይከ ኢኻ ኣበሳይ ይቕረ ዘይትብለለይ፡

በደለይ ከኣ ዘይትሓድገለይ፧

ኣነስ ሕጂ ኣብ መሬት ክግምሰስ እየ እሞ፡

እንተ ደሌኻኒ ኣይክህሉን እየ።

        መ. እዮብ  ምዕራፍ 8            

     ¹ድሕርዚ ቢልዳድ ሹዋዊ ኸምዚ ኢሉ መለሰ፡

²ክሳዕ መኣዝ ከምዚ ኢልካ ኽትዛረብ፡

ነቲ ዘረባ ኣፍካስ ከም ብርቱዕ ንፋስ ክትገብሮ ኢኻ፧

³ኣምላኽዶ ፍትሒ ይጠዊ እዩ፧

እቲ ዂሉ ዝኽእልከ ንጽድቂዶ ይጠውዮ እዩ፧

⁴ደቅኻ በዲሎምዎ እንተ ዀይኖም፡

ንሱውን ናብ ኢድ ኣበሳኦም ኣሕሊፉ እንተ ሂብዎም፡

⁵ንስኻ ንኣምላኽ ተጠንቂቕካ እንተ ደሊኻዮ፡

ነቲ ዂሉ ዝኽእልውን ምሕረት እንተ ለሚንካዮ፡

⁶ንጹህን ጻድቕን እንተ ዄንካ፡

ብርግጽ ንሱ ንረዲኤትካ ኽትንስእ፡

ነታ ማሕደር ጽድቅኻውን ከልምዓ እዩ።

⁷መጀመርታኻ ንእሽቶ እንተ ዀነ፡

መወዳእታኻ ግና እምብዛ ኽበልጽ እዩ።

⁸ነቶም ቀደም ዝሓለፉ ወለዶ ዀታ ጠይቆም እሞ፡

ነቲ ኣቦታቶም እተረድእዎ ኸኣ ኣሰተብህሎ።

⁹ንሕና ገለ ዝይንፈልጥ ናይ ትማሊ ኢና እሞ፡

ኣብ ምድርስ መዓልትታትና ኸም ጽላሎት እየን።

¹⁰ግናኸ ንሳቶም ኣይክምህሩኻን ኣይክነግሩኻንዶ እዮም፧

ካብ ውሽጢ ልቦም ቃላትዶ ኣይከውጽኡን እዮም፧

¹¹ተኺላ ኣብ ዘይብሉ ቦታዶ ሰልሰላ ይነውሕ፧

ማይ ኣብ ዘይብሉስ ሰቲዶ ይበቁል እዩ፧

¹²ንሱ ብለምለሙ ኸሎን ከይተመንቈሰን፡

ቅድሚ ዂሉ ሳዕሪ ይነቅጽ።

¹³መገዲ እቶም ንኣምላኽ ዝርስዕዎ

ዂሎም ከኣ ከምኡ እዩ፡

ተስፋ እቲ ረሲእ ከንቱ ክኸውን እዩ።

¹⁴ተስፋኡ ክቑረጽ እዩ እሞ፡

እሙንቶኡ ኸም ዓለባ ሳሬት እዩ።

¹⁵ንሱ ኣብ ቤቱ ይጽጋዕ፡ ግናኸ ኣይትጸንዕን፡

ቀጥ ኣቢሉ ይሕዛ፡ ግናኸ ኣይትቐውምን።

¹⁶ንሱ ብጸሓይ ይልምልም፡

ጨናፍሩ ናብ ልዕሊ ኣታኽልቱ ይወጽእ።

¹⁷ኣብ ዙርያ እኩብ እምኒ ሱሩ ይሰደድ፡

ንቤት ኣእማን ይምልከቶ ኣሎ።

¹⁸ካብታ ቦታኡ እንተ መንቈሶ፡

ንሳውን፡ ኣነስ ከቶ ኣይርአኹኻን፡ ኢላ ትኽሕዶ።

¹⁹እንሆ፡ ታሕጓስ መገዱ ኸምዚ እዩ።

ካብታ ሓመድ ድማ ካልኦት ክበቑሉ እዮም።

²⁰እንሆ፡ ኣምላኽ ነቲ ፍጹም ሰብ ኣይድርብዮን፡

ነቶም ገበርቲ እከይ ከኣ ብኢዱ ኣይሕዞምን እዩ።

²¹ንኣፍካ ስሓቕ፡

ንኸናፍርካውን እልልታ ኽመልኦ እዩ።

²²እቶም ዝጸልኡኻ ነውሪ ኽጒልበቡ እዮም፡

ድንኳን እቶም ረሲኣን ከኣ ክጠፍእ እዩ።

        መ. እዮብ  ምዕራፍ 9        

     ¹ድሕርዚ እዮብ ከምዚ ኢሉ መለሰ፡

²አረ ኸምኡ ምዃኑስ ኣርጊጸ እፈልጥ እየ፡

ከመይ ኢሉ ደኣኸ ሰብ ኣብ ቅድሚ ኣምላኽ ምጸደቐ፧

³ምስኡ ኽማጐት እንተ ዝደሊ፡

ካብ ሽሕስ ሓንቲ እኳ ኽመልሰሉ ኣይምኸኣለን ነይሩ።

⁴ንሱ ብምስትውዓል ጠቢብ፡ ብሓይሊውን ብርቱዕ እዩ፡

ተቓዊምዎስ ዝሰለጦ መን እዩ፧

⁵ንሱ ነኽራን ከይፈለጢ ኸለው የግዕዞም፡

ንቑጥዓኡውን ይገማጥሎም።

⁶ንሱ ንምድሪ ኻብ ቦታኣ የናውጻ፡

ኣዕኑዳውን የንቀጥቅጡ፡

⁷ንሱ ንጸሓይ ይእዝዛ እሞ ኣይትበርቕን።

ንኸዋኽብቲውን ይሓትሞም።

⁸ንሱ ንሰማያት ይዝርግሖ፡

ኣብ ልዕሊ ማዕበላት ባሕሪ ኸኣ ይኸይድ።

⁹ንድቢ፡ ንኦርዮን፡ ንኰዀብ ሾብዓተ፡

ንናይ ደቡብ ማሕደር ዝፈጠሮም ንሱ እዩ።

¹⁰ንሱ ዓበይትን ዘይምርመርን ነገር፡

ቁጽሪ ዘይብሉ ተኣምራትውን ይገብር።

¹¹እንሆ፡ ኣብ ጥቓይ ይሓልፍ እሞ፡ ኣነ ኣይርእዮን፡

መሊሱውን ይሓልፍ እሞ፡ ኣይፍለጠንን እዩ።

¹²እንሆ፡ ንሱ እንተ መንጠለ፡ መን ይኽልክሎ፧

መንከ፡ እንታይ እዩ እትገብሮ ዘሎኻ፡ ክብሎ ይኽእል፧

¹³ኣምላኽ ንቑጥዓኡ ኣይገትኦን፡

ኣብ ትሕቲኡስ እቶም ረዳእቲ ረሃብ እኳ ይትሓቱ፡

¹⁴ኣነ ደኣ ግዳ ኸመይ ገይረ ኽመልሰሉ፡

ንእኡ ዝዛረቦ ቓልከ ኸመይ ገይረ ኽመርጽ፧

¹⁵ጻድቕ እንተ ዝኸውን እኳ፡ ንፈራድየይ ደኣ

ምሕረት ምለመንክዎ እምበር፡ ኣይምመለስኩሉን።

^16-17ንሱ ብህቦብላ ወቒዑኒ፡

ብዘይ ምኽንያት ከኣ ንቑስለይ የብዝሖ ኣሎ እሞ፡

ጸዊዐዮስ እንተ ዝመልሰለይ እኳ፡

ንድምጸይ ጽን ከም ዝበሎ፡ ኣይምኣመንኩን።

¹⁸ንሱ ኸስተንፍስ ኣይሓድገንን፡

ምረት ደኣ የጽግበኒ ኣሎ።

¹⁹ብሓይሊ እንተ ዀይኑ፡ ንሱ፡ እኔኹ፡ ይብል፡

ብፍርዲ እንተ ዀይኑ ኸኣ፡ መን እዩ ቘጸራ ዝህበኒ፧

²⁰ኣነ ጻድቕ እንተ ዝኸውን እኳ፡

ኣፈይ፡ በደለኛ ኢኻ፡ ኢሉ ምፈረደኒ፡

ፍጹም እንተ ዝኸውን ከኣ፡ ሕሱም ምገበረኒ ነይሩ።

²¹ኣነስ ፍጹም እየ፡

ንነፍሰይ እኳ ግዳ የብለይን፡ ንህይወተይውን እንዕቃ እየ።

²²ኲላዂሉ ሓደ እዩ፡ ስለዚ፡

ነቲ ፍጹምን ንረሲእን ብሓደ የጥፍኦም፡ እብል ኣሎኹ።

²³ብድንገት ዝቐትል መዓት እንተ ወረደ፡

ንሱ ብፈተና እቶም ንጹሃት የላግጽ።

²⁴ምድሪ ኣብ ኢድ እቶም ረሲኣን ተውሂባ እያ፡

ንገጽ መኳንንታ ይሽፍኖ።

ንሱ እንተ ዘይኰይኑ ደኣ፡ መን እዩ፧

²⁵መዓልትታተይ ካብ ጐያዪ ይቕልጥፋ፡

ጽቡቕ ነገር ከይረኣያ ይሃድማ ኣለዋ።

²⁶አረ ኸም ጃልባ ወምብቆ፡

ክምንጥል ከም ዝሸብብ ንስሪ ይሓልፋ።

²⁷ኣነ፡ ሓዘነይ ረሲዐ፡ ገጸይ ኣበርሄስ፡

ክሕጐስ ደኣ፡ እንተ በልኩ፡

²⁸ብስቓየይ እስክሕ፡

ከም ዘይተማጻርየኒ ፈሊጠ ኣሎኹ።

²⁹ኣነስ ከም በደለኛ ክዅነን እየ፡

ስለምንታይ ደኣ ንኸንቱ ዝጽዕር፧

³⁰ብማይ በረድ እንተ ዝሕጸብ፡

ኣእዳወይውን ኣጸቢቐ እንተ ዘጽሪ፡

³¹ንስኻ ኣብ ዓዘቕቲ ምኣለኽካኒ

ክዳውንተይ እኳ ምፈንፈናኒ።

³²ከይመልሰሉ፡ ሓቢርናውን ከይንበያየንሲ፡

ከማይ ሰብ ኣይኰነን፡

³³ኣብ ክልቴና ኢዱ ዝዝርግሕ እሞ፡

ኣብ መንጎና ዳኛ ዝኸውን የልቦን።

³⁴በትሩ ግዳ ኻባይ የግልሰለይ፡

ፍርሃቱውን ኣየናውጻኑ፡

³⁵ሽዑ ምተዛረብኩ ኣይምፈራህክዎን ከኣ፡

ኣነ ግና ከምኡ ኣይኰንኩን።

        መ. እዮብ  ምዕራፍ 10            

     ¹ነፍሰይ ንህይወተይ መነወታ፡

ንጥርዓነይ ስቕ ኣየብሎን፡

ብምረት ነፍሰይ ደኣ ኽዛረብ እየ።

²ንኣምላኽ፡ ኣይትዀንነኒ፡

ስለምንታይ ኢኻ እትጻረረኒ ዘሎኻ፧

ኣፍልጠኒ፡እብሎ ኣሎኹ፡

³ንተግባር ኢድካ ኽትጭቁኖን ክትንዕቆን

ነቲ ምኽሪ ረሲኣን ከኣ ከተብርሆንዶ ባህ የብለካ እዩ፧

^4-7ኣነ ረሲእ ከም ዘይኰንኩን

ካብ ኢድካ ዘናግፍ ከም ዘየልቦን፡ እናፈለጥካ፡

ኣበሳይ እትደሊ፡

ሓጢኣተይ እትምርምር ዘሎኻስ፡

ኣዒንቲ ስጋዶ ኣለዋኻ፧

ወይስ ኣረኣእያ ሰብ ዲኻ እትርኢ፧

መዓልትታትካ ኸም መዓልትታት ሰብዶ እየን ፧

ወይስ ዓመታትካዶ ኸም ዕድመ ወዲ ሰብ እየን፧

⁸ኣእዳውካ ንዂለንትናይ ደኰና፡ ሰርሓኒውን፡

ግናኸ ተጥፍኣኒ ኣሎኻ።

⁹ከም መሬት ከም ዝጠፍጠፍካኒ ዘክር፡

ሕጂ ኸኣ ናብ ሓመድ ትመልሰኒ ኣሎኻ።

¹⁰ከም ጸባዶ ኣየፍሰስካንን፡

ከም ርግኦስ ኣየርጋእካንን ኢኻ፧

¹¹ቈርበትን ስጋን ኣልበስካኒ፡

ብዓጽምን ጅማትን ቀወድካኒ።

¹²ህይወትን ጸጋን ሞገስካኒ፡

ምክንኻንካ ንመንፈሰይ ሓለዎ።

¹³ግናኸ ነዚ ኣብ ልብኻ ሓባእካዮ፡

ሓሳብካስ እዚ ኸም ዝነበረ እፈልጥ ኣሎኹ።

¹⁴እንተ ዝብድልሲ ምተቛመትካኒ፡

ካብ ኣበሳይውን ኣይምፈታሕካንን።

¹⁵ረሲእ እንተ ዀንኩ፡ ወይለይ፡

ጻድቕ እንተ ዀንኩ ድማ፡

ሓሳር እጸግብ መከራይውን እርኢ ኣሎኹ እሞ፡

ርእሰይ ከልዕል ኣይከኣለንን እዩ።

¹⁶ልዕል እንተ ዘብሎ ድማ፡ ከም ኣንበሳ ምሃደንካኒ፡

መሊስካ ኣብ ልዕለይ ነቲ ግሩም ስልጣንካ መርአኻ።

¹⁷ሓሓደስቲ ምስክር መቘምካለይ፡

ንቑጥዓኻ ኣብ ልዕለይ ብዕጽፊ መውረድካዮ፡

እተለዋወጠ ዝጻረረኒ ጭፍራ ምሰደድካለይ።

¹⁸ንምንታይ ደኣ እሞ ካብ ማሕጸን ኣውጻእካኒ

ኣየ፡ ዓይኒ ኸይረኣየትኒ ሞይተ እንተ ዝኸውን።

¹⁹ከቶ ኸም ዘይነበርኩ ምዀንኩ፡

ካብ ማሕጸን ናብ መቓብር መውረዱኒ ነይሮም።

^20-22መዓልትታተይ ሒዶት ደይኰናን

ናብታ ሃገር ጸልማትን ድነ ሞትን፡

ናብታ ግብ ዝበለ ጸልማትን ጽላሎት ሞትን ዘለዋን

ስርዓት ዘይብላን ሃገር፡

ኣብኣስ ብርሃን እኳ ኸም ጸልማት ለይቲ ዝዀነ፡

ናብታ ኣነ ኻብኣ ዘይምለስ ሃገር ከይከድኩ፡

ቅሩብ ምእንቲ ባህ ክብለኒ፡ እስኪ ሕደገኒ ልቐቐኒ።

        መ. እዮብ  ምዕራፍ 11            

     ¹ድሕሪዚ ሶፋር ናዕማዊ ኸምዚ ኢሉ መለሰ፡

²ነዚ ብዝሒ ዘረባዶ ምላሽ ኣይክወሃቦን እዩ፧

ወይስ ለፍላፊ ሰብዶ ኽጸድቕ እዩ፧

³እዚ ምሕባንካዶ ንሰብ ስቕ ከብሎ እዩ፧

ኣላጊጽካስ ዘሕፍረካ ሰብዶ የልቦን፧

⁴ንስኻውን፡ ትምህርተይ ቅኑዕ እዩ፡

ኣብ ዓይንኻውን ንጹህ እየ፡ ትብል ኣሎኻ።

⁵ኣየ፡ ኣምላኽያ እንተ ዝዛረብ፡

ከናፍሩ ኸፊቱ እንተ ዝመልሰልካ፡

⁶ናይ ጥበብ ምስጢራት

ካብቲ ዘሎ ዕጽፊ ምዃኑ እንተ ዝገልጸልካ፡

ንገሊኡ ኣበሳኻ ኸም ዝርስዖ፡ መስተብሃልካ ኔርካ።

⁷ንመዓሙቑ ኣምላኽዶ ኸተቑሮ፡

ንምልኣት እቲ ዂሉ ዝኽእልሲ ኸተቑሮ ትኽእል ኢኻ፧

⁸ካብ ሰማይ ልዕል ይብል፡ እንታይ ክትገብር ኢኻ፧

ካብ ሲኦል ይዓሙቑ፡ እንታይ ክትፈልጥ ኢኻ፧

⁹ስፍሩ ኻብ ምድሪ ይነውሕ፡

ካብ ባሕሪውን ይሰፍሕ እዩ።

^10-11ንሱስ ንኸንቱነት ሰብ ይፈልጦ፡

ንዓመጻ ኸኣ ሃሰስ ከይበለ ይረኽቦ እዩ እሞ፡

ንሱ እንተ ሓለፈ፡ እንተ ዓጸወ፡

ኣብ ፍርዲ እንተ ኣከበ፡ መን እዩ ዝኽልክሎ፧

¹²ግናኸ ዓሻ ሰብ ምስትውዓል የብሉን፡

እወ፡ ሰብ ከም ዒሉ ኣድጊ በረኻ እተወልደ እዩ።

¹³ልብኻ እንተ ኣዳሎኻ፡

ኣእዳውካውን ናብኡ እንተ ዘርጋሕካ፡

¹⁴ኣብ ኢድካ ዓመጻ እንተሎ፡ ኣርሕቆ፡

ኣብ ድንኳንካውን ግፍዒ ኣይተስፍር።

¹⁵ሽዑ ንገጽካ ብዘይ ሕፍቲ ኸተልዕሎ፡

ጽኑዕ ክትከውን ኣይክትፈርህን ድማ ኢኻ።

¹⁶ሽዑስ ንመከራኻ ኽትርስዖ፡

ከም ዝሓለፈ ውሒዝ ክትዝክሮ ኢኻ።

¹⁷ህይወትካ ኻብ ቀትሪ በሊጻ ትበርህ፡

ጸልማት እኳ ኸም ወገግታ ብጊሓት ክኸውን እዩ።

¹⁸ተስፋ ኣሎ እሞ፡ ክትሃድእ፡

ናብ ዙያኻ ኣማዕዲኻ ብህድኣት ክትግምሰስ ኢኻ።

¹⁹ዘፍርህ ዘይብልካ በጥ ክትብል፡

ብዙሓትውን ሞገስካ ኽደልዩ እዮም።

²⁰ኣዒንቲ ረሲኣን ግና ይስልምታ፡

መህደሚ የብሎምን፡

ተስፋኦም ከኣ ብምሕላፍ እስትንፋሶም እዩ።

        መ. እዮብ  ምዕራፍ 12            

     ¹ድሕርዚ እዮብ መሊሱ በለ፡

²ብሓቂ እቶም ኣውራታት ሰባት ንስኻትኩም ኢኹም፡

ጥበብውን ምሳኻትኩም ክትመውት እያ።

³ግናኸ ኣነውን ከማኻትኩም ኣእምሮ ኣሎኒ፡

ካባኻትኩም ኣይሰንፍን፡ ነዚ ኸምዚ ዘይፈልጥ መን እዩ፧

⁴ኣነ ንጐረቤተይ መላገጺ ዝዀንኩ ሰብ እየ፡

ኣነ ናብ ኣምላኽ ተማህሊለስ ምላሽ ዝረኸብኩ፡

ጻድቕን ፍጹምን ሰብሲ መላገጺ ዀይኑ።

⁵ኣብ ሓሳብ እቲ ደሓን ዘሎ ሰብ ንመከራ ምንዓቕ ኣሎ።

እዚ ነቶም እግሮም ሰንከልከል ዝብል ድልዊ እዩ።

⁶ድንኳን እቶም በዝበዝቲ ብደሓን ይነብር ኣሎ፡

እቶም ንኣምላኽ ዝተሃላለኽዎ፡

ኣምላኽ ከኣ ኣብ ኢዶም ኣዕዚዙ ዝህቦም ብህድኣት ኣለው።

⁷ግናኸ ንእንስሳ ጠይቀን እሞ፡ ክምህራኻ፡

ነዕዋፍ ሰማይውን፡ ክገልጻልካ እየን።

⁸ወይስ ንምድሪ ተዛረባ፡ ክትምህረካ እያ፡

ዓሳታት ባሕሪውን ክነግሩኻ እዮም።

⁹በዚኣቶም ኲሎምሲ ኢድ እግዚኣብሄር

ከም ዝገበረቶ ዘይፈልጥከ መን እዩ፧

¹⁰ህያው ነፍሲ ዘበለን፡

መንፈስ ኲሉ ሰብን ኣብ ኢዱ ደይኰነን፡

¹¹ከምቲ ትንሓግ ንምግቢ ዘስተማቕሮ፡

ከምኡዶ እዝኒ ንቓላት ኣይለልዮን እዩ፧

¹²ጥበብ ኣብ ሽማግሌታት፡

ምስትውዓልውን ኣብ ምንዋሕ ዕድመ እዩ።

¹³ጥበብን ስልጣንን ኣብኡ ኣሎ፡

ምኽርን ምስትውዓልን ድማ ናቱ እየን።

¹⁴እንሆ፡ ንሱ የፍርስ፡ ከም ብሓድሽ ዝነድቕ ከኣ የልቦን፡

ንሱ ንሰብ ይዓጽዎ፡ ዝኸፍቶ ድማ የልቦን፡

¹⁵እንሆ፡ ንሱ ንማይ ይኽልክሎ እሞ ይነጽፍ፡

ከፊቱ ይድርጒሖ እሞ ምድሪ ይድምሰስ።

¹⁶ሃይልን ኣእምሮን ናቱ እየን፡

እቲ ዝስሕትን ዘይስሕትን ናቱ እዮም።

¹⁷ንሱ ንመኸርቲ ቐንጢጡ ይሰዶም፡

ንፈረድቲውን ዓያሱ ይገብሮም።

¹⁸ንሱ ንስልጣን ነገስታት ይፈትሖ፡

ኣብ ሓቛቑኦም ድማ ገመድ የዕጥቖም።

¹⁹ንሱ ንኻህናት ቀንጢጡ ይሰዶም፡

ንጽኑዓት ከኣ ይግልብጦም።

²⁰ንዘረባ እቶም እሙናት የፍርሶ፡

ንኣረገውቲ ኣእምሮኦም የሕድጎም።

²¹ንመሳፍንቲ ንዕቀት የፍስሰሎም፡

ንሓያላትውን ዕጣቖም የላሕልሓሎም።

²²ነቲ መዓሙቑ ካብ ጸልማት ይቐልዖ፡

ንድነ ሞትውን ናብ ብርሃን የውጽኦ።

²³ንህዝብታት የብዝሖም የብርሶም ከኣ፡

ንህዝብታት የስፍሖም የባርሮምውን።

²⁴ነሕሉቕ ኣህዛብ ምድርስ ኣእምሮ የሕድጎም፡

መገዲ ብዘይብሉ በረኻ የዀብልሎም።

²⁵ንሳቶም ብርሃን ስኢኖም፡

ኣብ ጸልማት ሃሰስ ይብሉ፡

ንሱውን ከም ሰካራት ሰንከልከል የብሎም።

        መ. እዮብ  ምዕራፍ 13            

     ¹እንሆ፡ ነዚ ዂሉስ ዓይነይ ርእያቶ

እዝነይውን ሰሚዓ ኣስተብሂላቶ።

²ነቲ ንስኻትኩም እትፈልጥዎስ ኣነውን እፈልጦ፡

ካባኻትኩም ከኣ ኣይትሕትን እየ።

³ግናኸ ነቲ ዂሉ ዝኽእል ክዛረቦ እደሊ፡

ምስ ኣምላኽ ክማጻረ ሃረር እብል ኣሎኹ።

⁴ንስኻትኩም ግና ሓሶት እትኣልሙ ሰባት ኢኹም፡

ኲላትኩም ዘይትጠቕሙ ሓኪማት ኢኹም።

⁵አረ ስቕ ምባል እንተ ትኽእሉ፡

እዚ ኸኣ ኸም ጥበብ ምተቘጽረልኩም ነይሩ።

⁶ንተግሳጸይ ስምዑ፡

ናብቲ ምስክር ከናፍረይ ጽን በሉ፡

⁷ንኣምላኽስ ብቓል ዓመጻ ኽትካላኸሉሉ፡

ስሊኡ ኢልኩምከ ልግሚዶ ኽትዛረቡ ኢኹም፧

⁸ወራኡ ኽትኰኑ፡

ንኣምላኽ ክትጣበቑሉዶ ትደልዩ ኣሎኹም፧

⁹ንሱ እንተ መርመረኩምዶ ጽቡቕ እዩ

ወይስ ከምቲ ንሰብ እተዐሽውዎ፡ ከተዐሽውዎዶ ኢኹም፧

¹⁰ብስውር እንተ ኣድሎኹምሲ፡

ንሱ ብርግጽ ክዘልፈኩም እዩ።

¹¹ግርማኡዶ ኣይከሸብረኩምን እዩ፧

ፍርሃቱስ ኣይክወድቀኩምን እዩ፧

¹²ባህልኹም ምሳሌታት ሓመዂስቲ፡

ዕርድታትኩውን ዕርድታት ጭቃ እዩ።

¹³ስቕ በሉ፡ ክዛረብ ግዳ ሕደጉኒ፡

ዝዀነ ይኹን ይውረደኒ።

¹⁴ንምንታይ ንስጋይ በስናነይ እሕዞ፧

ንህይወተይውን ኣብ ኢደይ አንብራ፧

¹⁵ሓንትስ ኣኻይዳይ ኣብ ቅድሚኡ አቕንዕ እምበር፡

ንሱ ይቕተለኒ፡ ኣነስ ካልእ ትጽቢት የብለይን።

¹⁶ግብዝ ኣብ ቅድሚኡ ደው ኣይክብልን እዩ እሞ፡

እዚኣ ንምድሓን ክትጠቕመኒ እያ።

¹⁷ስምዑ፡ እስኪ ንቓላተይ ስምዑ፡

እቲ ኣነ ዝብሎ ንእዝንኹም ይሰቈሮ።

¹⁸እንሆ፡ ንነገረይ ኣዳልየዮ ኣሎኹ፡

ጻድቕ ኰይነ ኸም ዝርከብ፡ እፈልጥ ኣሎኹ።

¹⁹መን እዩ ዝረትዓኒ፧

ሽዑ ስቕ እብል እመውትውን።

²⁰ብኽልተ ነገር ግዳ ኣይትግፈዓኒ እምበር፡

ኣነ ኸኣ ካብ ቅድሚ ገጽካ ኣይክስወርን እየ፡

²¹ኢድካ ኻባይ ኣርሕቐለይ፡

ግርማኻውን ኣየሸብረኒ።

²²ሽዑ ንስኻ ጸውዓኒ፡ ኣነውን ክመልስ፡

ወይ ከኣ ኣነ ኽዛረብ፡ ንስኻ ምለሰለይ።

²³ኣበሳይን ሓጢኣተይንሲ ኽንደይ እዩ ምብዛሑ፧

እስኪ በደለይን ሓጢኣተይን ኣፍልጠኒ።

²⁴ንምንታይከ ገጽካ እትኽውሎ፧

ከም ጸላኢኻ እትርእየኒ፧

²⁵ንዝረገፈ ቘጽሊዶ ኸተፈራርሆ ኢኻ፧

ንንቑጽ ሓሰርሲ ኸተሳጒጎ ኢኻ፧

²⁶መሪር ነገር ትጽሕፈለይ፡

ኣበሳ ንእስነተይ ከኣ ተውርሰኒ ኣሎኻ።

²⁷ንስኻ ነእጋረይ ኣብ ጒንዲ ተእትወን፡

ንብዘሎ መገደይውን ትሕሉ፡

ንኸብዲ እግረይ ከኣ መፈለጥታ ትገብረሉ ኣሎኻ።

²⁸ኣነስ ከም ዝበዂበዀ ኦም፡

ብልዒ ኸም ዘበላሸዎ ዓለባ ዀይነ።

        መ. እዮብ  ምዕራፍ 14            

     ¹ሰብ፡ ውሉድ ሰበይቲ፡

ሓጺር ዕድመ፡ ጽጉብ ሓሳር እዩ።

²ከም ዕንበባ ይዕንብብ፡ ይጽምሉ ኸኣ፡

ከም ጽላሎት ይሃድም፡ ኣይነብርን ድማ።

³ኣብ ከምዚ ዝበለዶ ኣዒንትኻ ቛሕ ተብል ኣሎኻ፧

ክፍረድስ ናብ ቅድሜኻዶ ትጐተኒ ኣሎኻ፧

⁴ካብቲ ርኹስሲ ንጹህ ከውጽእ ዝኽእልዶ ኣሎ፧

ሓደ እኳ የልቦን።

⁵ዕድመ ሰብ ምዱብ፡

ኣዋርሑ ኣባኻ ቑሩጽ ካብ ኰነ፡

ዘይሓልፋ ደረትውን ካብ ወሰንካሉስ፡

⁶ንሱ ኸም ብዓል ውዕለት፡

መዓልቱ ኽሳዕ ዝፍጽም ክዓርፍሲ፡

ገጽካ ኻብኡ ምለስ።

⁷ኦምሲ ተስፋ ኣለዎ፡

እንተ ተቘርጸ እኳ መሊሱ ይጥጥዕ፡

ውልዶታቱ ኸኣ ኣይውዳእን እዩ።

⁸ስሩ ኣብ ምድሪ እንተ ኣረገ፡

ጒንዱ ኣብ መሬት እንተ ሞተ፡

⁹ብጠሊ ማይ ይጥጥዕ፡

ከም ሓድሽ ተኽሊ ዀይኑ፡ ጨናፍር ይገብር።

¹⁰ሰብ ግና ይመውት እሞ ወዲቑ ይተርፍ፡

ሰብ እስትንፋሱ እንድሕሪ ሓሊፋስ፡ ኣበይከ ኣሎ፧

¹¹ካብ ባሕርስ ማያት ከም ዝፈስስ፡

ርባውን ከም ዝነጽፍን ዝደርቕን፡

¹²ሰብ ከኣ ከምኡ ደቂሱ ኣይትንስእን፡

ሰማያት ክሳዕ ዝሓልፍ ከቶ ኣይነቅሕን፡

ካብ ድቃስ ኣይበራበርን።

¹³ኣየ፡ ቁጥዓኻ ኽሳዕ ዝሓልፍሲ፡

እንተ ትስውረኒ፡ ኣብ ሲኦል እንተ ትሓብኣኒ፡

መዓልቲ ቘጸራ እንተ ትውስነለይ እሞ፡

ብድሕሪኡ እንተ ትዝክረኒ።

¹⁴ሰብ ድሕሪ ሞይቱ መሊሱዶ ህያው ክኸውን እዩ፧

ምብራየይ ክሳዕ ዝመጽእ፡ ዘመን ሰልፈይ ኲሉ ምተጸቤኹ።

¹⁵ንስኻ ምጸዋዕካኒ፡ ኣነውን ምመለስኩልካ ነይረ፡

ነቲ ተግባር ኢድካ ምናፈቕካዮ ኔርካ።

¹⁶ሕጂ ግና ንስጒምተይ ትቘጽረን፡

ንሓጢኣተይሲ ትቋመቶዶ ኣየሎኻን፧

¹⁷ንኣበሳይ ኣብ ከረጺት ይሓትሞ፡

ንበደለይውን ተጣብቖ ኣሎኻ።

¹⁸ግናኸ፡ ከምቲ ኸረን ወዲቑ ዝጠፍእ፡

ከውሒውን ካብ ቦታኡ ዝግዕዝ፡

¹⁹ከምቲ ማያት ነእማን ዘሕቅቖ፡

ውሒዙውን ንመሬት ምድሪ ዝድምስሶ፡

ከምኡ ኸኣ ንስኻ ንተስፋ ሰብ ከንቱ ትገብሮ።

²⁰ንስኻ ንሓዋሩ ትሕይሎ፡ ንሱውን ይሓልፍ፡

ንገጹ ለዊጥካ ይኺድ ትገድፎ።

²¹ደቁ እንተ ኸበሩ፡ ኣይፈልጦን፡

እንተ ሓሰሩውን፡ ኣየስተብህሎን እዩ።

²²ስጋኡ እቲ ናይ ባዕሉ ስቓይ እዩ ዝስምዖ፡

ነፍሱ ኸኣ ብዛዕባ ርእሱ እያ እትጒሂ።

     ¹ድሕርዚ ኸኣ ኤሊፋዝ ቴማናዊ ኸምዚ ኢሉ መለሰ፡

²ለባም ሰብዶ ኸንቱ ብዝዀነ ፍልጠት ምላሽ ይህብ እዩ፧

ብንፋስ ምብራቕዶኸ ኸብዱ ይመልእ እዩ፧

³ብፍረ ዘይብሉ፡ ብዘይጠቅም ዘረባዶ፡

ንነገሩ ይከላኸለሉ እዩ፧

⁴ንስኻ ንፍርሃት እግዚኣብሄር ከንቱ ትገብሮ፡

ንጸሎት ኣብ ቅድሚ ኣምላኽ ተቃልሎ ኣሎኻ፡

⁵ኣበሳኻ ንኣፍካ ይምህሮ፡

ንዘረባ ጐረሓት ትሓሪ ኣሎኻ።

⁶ኣፍካ እያ እትዂንነካ፡ ኣይኣነን፡

ገዛእ ከናፍርካውን እየን ንጒድኣትካ ዝምስክራ።

⁷እቲ ቐዳማይ ሰብ እተወልደዶ ንስኻ ኢኻ፧

ቅድሚ ዂርባታትከ ተጠኒስካ ዲኻ፧

⁸ነቲ ስውር ምኽሪ ኣምላኽዶ ትሰምዖ ኔርካ፧

ጥበብከ ንርእስኻዶ ሒዝካያ ኣሎኻ፧

⁹ንሕና ዘይንፈልጦኸ ንስኻ እንታይ ትፈልጥ፧

ንሕና ዘይተረዳእናዮስ እንታይ ተስተብህል፧

¹⁰ብዕድመስ ካብ ኣቦኻ እኳ ዝዓብዩ

ሸያባትን ሽማግሌታትን ኣብ ማእከልና ኣለው።

¹¹ነቲ ምጽንናዕ ኣምላኽን

ነቲ ብለውሃት ንኣኻ እተዘርበ ቓላትንዶ ተናእሶ ኣሎኻ፧

¹²ልብኻ ናበይ ኣቢሉ ይስሕበካ ኣሎ፧

ንምንታይከ ኣዒንትኻ ኽፋእ ኣጠማምታ ይጥምታ፧

¹³ከምዚ ዝበለ ዘረባ ኻብ ኣፍካ እናቐዳሕካ፡

ስለምንታይ መንፈስካ ኣብ ልዕሊ ኣምላኽ ተልዕሎ፧

¹⁴ሰብከ እንታይ እዩ ንጹህ ዝኸውን፧

ውሉድ ሰበይትስ ጻድቕ ዝኸውን መን እዩ፧

¹⁵እንሆ፡ ነቶም ቅዱሳኑ እኳ ኣይኣምኖምን፡

ሰማያትውን ኣብ ዓይኑስ ንጹህ ኣይኰነን።

¹⁶እቲ ንኣበሳ ኸም ማይ ዝሰትዮ ሰብ ደኣ ግዳ

ክንደይ ኣዝዩ ፍንፋንን ብልሽውን እዩ።

^17-19እስኪ ኽነግረካ፡ ስምዓኒ፡

ካብቶም ምድሪ ንበይኖም እተዋህበቶም፡

ጓናውን ኣብ ማእከሎም ዘይኣተዎም

ጠቢባን ሰባት ዝገለጹልና፡

ካብ ኣቦታቶም ተቐቢሎም ዘይሓብኡልና፡

እዚ ዝርአኽዎስ ከዘንትወልካ እየ።

²⁰ረሲእ ምሉእ ዕድሜኡ፡

ጨካንውን ብዂሉ ቑጽሪ ዘመኑ ይጭነቕ።

²¹ዘፍርህ ደሃይ ኣብ ኣእዛኑ ዀይኑ የድሂ፡

ደሓን ኣሎኹ ኽብል ከሎ መጥፍኢ ይመጾ።

²²ሰይፊ ይጸናተዎ ኣሎ እሞ፡

ካብ ጸልማት ከምልጥ ተስፋ የብሉን።

²³ኣበይከ እሞ ይርከብ ኢሉ ሃለው እናበለ እንጌራ ይደሊ፡

መዓልቲ ጸልማት ኣብ ጥቓ ኢዱ ኸም ዘሎ ይፈልጥ።

²⁴ጸበባን ጭንቀትን የሸብርዎ፡

ከም ስሉፍ ንጉስ ኰይኖም ይወድቅዎ።

²⁵ክጻረሮ ኢሉ ኣእዳው ናብ ኣምላኽ ይዝርግሕ፡

ነቲ ዂሉ ዝኽእልውን ይተሃላለኾ፡

²⁶ብተሪር ክሳዱ፡ ብረጒድ ዋልታኡ ይገጥመሉ።

²⁷ገጹ ኣስብሐ፡ ሕቜኡ ኣህጠረ።

²⁸ኣብ ዝባደማ ኸተማታት፡ ኣብ ሰብ ዘይነብረለን፡

ንምዕናው እተመደባ ኣባይቲ ተቐሚጡ እዩ እሞ፡

²⁹ንሱ ኣይጽጉን፡ ሃብቱ ድማ ኣይቐውምን፡

ገንዘቡውን ሱሩ ናብ ምድሪ ኣይሰዶን እዩ።

³⁰ካብ ጸልማት ኣየምልጥን፡

ጨናፍሩ ብሃልሃልታ ይሓርር፡

ብስትንፋስ ኣፉ ይሓልፍ።

³¹ዓስቡ ኸንቱነት እዩ ዝኸውን እሞ፡

ስሒቱ ብኸንቱነት ኣይተኣመን።

³²መዓልቱ ኸይበጽሐ ግዜኡ ይፍጸም፡

ጨናፍሩ መሊሱ ኣይልምልምን።

³³ከም ተኽሊ ወይኑ ፍሬኡ ብጒዕ የውድቕ፡

ከም ኦም ዘይቲ ዕንባባኡ ይረግፍ።

³⁴እታ ማሕበር ረሲኣን መኻን እያ እሞ፡

ድንኳናት እቶም መማለጃ ዝቕበሉ ሓዊ ይበልዐን።

³⁵ጻዕሪ ጠኒሶም፡ ጥፍኣት ይወልዱ፡

ከርሶምውን ተንኰል እዩ ዘዳሉ።

        መ. እዮብ  ምዕራፍ 16            

     ¹ድሕርዚ እዮብ ከምዚ ኢሉ መለሰ፡

²ከምዚ ዝበለ ዘረባስ እምብዛ ሰሚዐ ኣሎኹ፡

ንስኻትኩም ኲልኹም ዘይትጠቕሙ መጸናናዕቲ ኢኹም።

³እዚ ንፋስ ዝዀነ ዘረባኻስ ተወዲኡዶ፧

ወይስ ክትመልስ እንታይ እዩ ዘላዕለካ ዘሎ፧

⁴ኣነውን ከማኻትኩም ገይረ ኽዛረብ ምኸኣልኩ፡

ንስኻትኩም ከምዚ ኸማይ እንተ ትዀኑስ፡

ርእሰይ እናነቕነቕኩ ቓላት ክሰዂዓልኩም ምኸኣልኩ ነይረ።

⁵ብኣፈይ መበርታዕኩኹም፡

ምጽንናዕ ከናፍረይውን መህድኣኩም ነይሩ።

⁶እንተ ተዛረብኩ፡ ቓንዛይ ዝግ ኣይብልን፡

ስቕ እንተ በልኩውን፡ ኣይሓድገንን እዩ።

⁷ሕጅስ ንሓይለይ ኣላሕሊሕዎ፡

ንብዘላ ማሕበረይ ኣዕኖኻያ።

⁸ምጭምዳደይ ዝጐድኣኒ ምስክር እዩ፡

ዕብራነይ ተንሲኡ ይኸሰኒ።

⁹ብቑጥዓኡ ይዘጋግለንን ይሰጐንን፡

ኣስናኑ ይሕርቅመለይ፡

ጸላእየይ ዓይኑ ኣፍጢጡ ይርእየኒ ኣሎ።

¹⁰ኣፎም ናባይ ሃህ የብሉ ኣለው፡

እናጸረፉውን ጒንዲ እዝነይ ይጸፍዕኑ፡

ኲሎም ከኣ ይተሓባበሩለይ ኣለው።

¹¹ኣምላኽ ኣደዳ ዓመጽቲ ገበረኒ፡

ኣብ ኣእዳው ረሲኣን ደርበየኒ።

¹²ኣነ ሃዲኤ ነይረ፡ ንሱ ድማ ቀጥቀጠኒ፡

ብኽሳደይ ሒዙ ሰባበረኒ፡

ዕላማኡ ገይሩ ኣቘመኒ።

¹³ሰብ መንትጉ ይኸቡኒ፡

ንዀላሊተይ ብዘይ ምሕረት ይበሳስዖ፡

ንሓሞተይውን ናብ ምድሪ ይፍስሶ ኣሎ።

¹⁴ከም ጅግና ዀይኑ ወዲቑኑ፡

ኣብ ልዕሊ ቑስሊ፡ ቑስሊ ወሲኹኒ።

¹⁵ወጮ ኣብ ቈርበተይ ሰፌኹ፡

ቀርነይውን ኣብ ሓመድ ደቤኹ።

^16-17ኣእዳወይ ዓመጻ ዘይሓዛ፡

ጸሎተይውን ንጹህ ክነሱስ፡

ገጸይ ብብኽያት ተገየረ፡

ኣብ ኰበሮ ዓይነውን ድነ ሞት ይሰፍር ኣሎ።

¹⁸ኣቲ ምድሪ፡ ንደመይ ኣይትኸውልዮ፡

ንገዓረይውን ስፍራ ኣይትሃብዮ።

¹⁹ሕጂውን ምስክረይ ኣብ ሰማይ እንሆ፡

ዋሕሰይውን ኣብ ላዕሊ እዩ ዘሎ።

^20-21ፈተውተይ ብኣይ ይስሕቁ ኣለው፡

ንሰብ ምስ ኣምላኽ፡

ንወዲ ሰብውን ምስ ብጻዩ፡ ፍትሒ ምእንቲ ኸውጽእ ኢለ፡

ኣዒንተይ እናነብዓ ናብ ኣምላኽ ይጥምታ ኣለዋ።

²²ገና ሒዶት ዓመታት ክሓልፋ እየን እሞ፡

በታ ዘይምለሰላ መገዲ ክኸይድ እየ።

        መ. እዮብ  ምዕራፍ 17            

     ¹መንፈሰይ ቀሃመ፡

መዓልትታተይ ይጠፍኣ፡

መቓብር ይጽበየኒ ኣሎ።

²መላገጽቲ ኸቢቦምኒ፡

ኣዒንተይ ድማ ብምምራሮም ይሓድራ ኣለዋ።

³ሕጂ ኸኣ ዕርቡን ሃበኒ፡ ኣባኻ ተወሓሰኒ፡

እንተ ዘይኰነስ መን እዩ ኣገና ዝጠቕዓለይ፧

⁴ከየስተውዕሉስ ንልቦም ዓጺኻዮ ኢኻ እሞ፡

ልዕል ኣይከተብሎምን ኢኻ።

⁵እቲ ንፈተውቱ ንበዝበዝቲ ኣሕሊፉ ዝህቦም፡

ኣዒንቲ ደቁ ኸሕለልዋ እየን።

⁶ኣብ ማእከል ኣህዛብ መመሰሊ ገበረኒ፡

ኣብ ቅድሚኦም ጡፍ መበሊ ዀንኩ።

⁷ኣዒንተይ ብሓዘን ሰልመታ፡

ኲለን ኣካላተይ ከም ጽላሎት ኰና።

⁸እቶም ቅኑዓት በዚ ኽግረሙ እዮም፡

እቲ ንጹህ ኣብ ልዕሊ እቲ ረሲእ ክህወኽ እዩ።

⁹እቲ ጻድቕ ግና ኣብ መገዱ ይጸንዕ፡

እቲ ኣእዳው ዝንጹሃት ከኣ እናበርትዐ ይኸይድ።

¹⁰አረ ዂላትኩም ተመለሱ፡

ንዑ፡ ግናኸ ሓደ ጢቢብ እኳ ኣይረኽበልኩምን እየ።

¹¹ዘመነይ ሓሊፉ፡

እቲ ልበይ ዝምነዮ ዝነበረ ምምዳበይ ፈሪሱ።

¹²ንለይቲ ናብ መዓልቲ ይልውጥዎ፡

ጸልማት ከሎስ፡ ብርሃን ቀሪቡ ኣሎ፡ ይብሉ።

¹³እቲ ዝጽበዮ ቤተይ ሲኦል እንተ ዀነ፡

መንጸፈይ ኣብቲ ጸልማት እንተ ኣንጸፍኩ፡

¹⁴ንመቓብር፡ ኣበይ ኢኻ፡

ንሓሳኹውን፡ እኖይን ሓብተይን፡ እንተ በልክዎም፡

¹⁵ተስፋይ ደኣ ኣበይ ኣላ፧

አረ ንተስፋይ መን ክርእያ እዩ፧

¹⁶ኣብ ሓመድ ሓቢርና ምስ እንዓርፍ፡

ናብ መርሖታት ሲኦል ክትወርድ እያ።

        መ. እዮብ  ምዕራፍ 18            

     ¹ድሕርዚ ቢልዳድ ሹዋዊ ኸምዚ ኢሉ መለሰ፡

²ክሳዕ መኣዝከ ኢኹም ዘረባ ዘይትውድኡ፧

ኣስተብህሉ፡ ደሓር ንዛረብ።

³ስለምንታይ ከም እንስሳ ተቘጸርና፡

በዒንትኹምስ ከም ርኹሳት ተርአና፧

⁴ኣታ ብዂራኻ ንነፍስኻ እትብሕጅር፡

ምድሪ ምእንታኻዶ ትባድም፧

ከውሕስ ካብ ስፍራኡዶ የግልስ፧

⁵እወ፡ ብርሃን እቲ ረሲእ ይጠፍእ፡

ሃልሃልታ ሓው ኣይበርህን።

⁶ኣብ ድንኳኑ እቲ ብርሃን ክጽልምት፡

እቲ ኣብ ልዕሊኡ ዘሎ ቐንዴልውን ክጠፍእ እዩ።

⁷ስጒምቲ ሓይሉ ይሓጽር፡

ምኽሪ ርእሱ የውድቖ።

⁸ኣእጋሩ ናብ መጻወድያ የእትዋኦ፡

ኣብ ልዕሊ ወጽመድ ይመላለስ እዩ እሞ፡

⁹ብሸዀናኡ ወጽመድ ይሕዞ፡

መፈንጠራውን የጽንዖ።

¹⁰ኣብ ምድሪ ገመድ፡

ወጽመድ ኣብ መገዲ ተሓቢኡሉ።

¹¹ፍርሃት ከኣ ብዂሉ ወገን የጨንቖ፡

ናብ ዝኸዶ ዘበለውን ይሰጎ።

¹²ሓይሉ ብጥሜት ይልሕልሕ፡

መዓትውን ኣብ ጥቓኡ ተዳልዩ ይጸንሕ።

¹³ንኣባላት ኣካሉ ይበልዖ፡

እወ፡ ናይ ሞት በዂሪ ወዲ ንኣባላቱ ይበልዖ።

¹⁴ካብቲ ዝኣምኖ ዝነበረ ድንኳኑ ይምንቈስ፡

ናብቲ ንጉስ ረዓድ ይውሰድ።

¹⁵ዘይሰቡ ኣብ ድናኳኑ ይሰፍሩ፡

ኣብ ማሕደሩውን ዲን ይንስነስ።

¹⁶ኣብ ታሕቲ ሰረውሩ ይነቅጽ፡

ኣብ ላዕሊውን ጨናፍሩ ይቑረጽ።

¹⁷ዝኽሩ ኻብ ምድሪ ይጠፍእ፡

ኣብ ኣደባባይ ስሙ ኣይስመን፡

¹⁸ካብ ብርሃን ናብ ጸልማት ይድፋእ፡

ካብ ዓለምውን ይስጐጒ።

¹⁹ኣብ ማእከል ህዝቡ ውሉድን ደቂ ደቅን ኣይሓድግን፡

ኣብ ማሕደሩ ትርፊ የልቦን።

²⁰በታ መዓልቱ እቶም ዳሕሮት ይድነቑ፡

እቶም ቀዳሞት ከኣ ጸጒሮም ይኽየፍ።

²¹እወ፡ ማሕደር ረሲኣን ከምዚ እያ፡

ስፍራ እቲ ንኣምላኽ ዘይፈልጥ እዚ እዩ።

        መ. እዮብ  ምዕራፍ 19            

     ¹ድሕርዚ እዮብ ከምዚ ኢሉ መለሰ፡

²ክሳዕ መኣዝ ንነፍሰይ ተጒህይዋ፡

ብዘረባውን ትሰባብሩኒ ኣሎኹም፧

³እንሆ፡ ዓሰርተ ሳዕ ጸሪፍኩምኒ፡

እትገፍዑንስ ኣይትሓፍሩን ዲኹም፧

⁴ብርግጽ ተጋግየ እኳ እንተ ዀንኩ፡

እቲ ጌጋይ ምሳይ ይነብር።

⁵ብሓቂ እንተ ተዓቢኹምለይ፡

ስለ ውርደተይ እንተ ገሰጽኩምኒ፡

⁶እምበኣርስ ኣምላኽ ከም ዝዓመጸኒ፡

ብመፈንጠራኡውን ከም ዝኸበበኒ፡ ፍለጡ።

⁷እንሆ፡ ተዓሚጸ ኢለ እጠርዕ ኣሎኹ፡ ኣይስማዕን ድማ እየ፡

ረዲኤት ደልየ አእዊ ኣሎኹ፡ ፍትሒ ዘውጽኣለይ ከኣ የልቦን።

⁸ኣነ ኸይሓልፍ ኢሉ ንመገደይ ዓጽይዎ፡

ኣብተን መተሓላለፍየይ ጸልማት ዘርጊሑለን።

⁹ንሱ ኽብረተይ ቀንጢጡኒ፡

ንዘውደይውን ካብ ርእሰይ ወሲድዎ።

¹⁰ብዂሉ ወገነይ ኣውዲቑኒ እዩ እሞ ጠፋእኩ።

ንተስፋይ ከም ኦም መንቈሳ።

¹¹ንቑጥዓኡ ኣብ ልዕለይ ኣቃጸሎ፡

ከም ጸላኢኡውን ቈጸረኒ።

¹²ጭፍራታቱ ተኣኻኺቦም

ክወድቁኒ መገዲ ይጸርጉ፡

ኣብ ዙርያ ድንኳነይውን ይሰፍሩ ኣለው።

¹³ነሕዋተይ ካባይ ኣርሒቕዎም፡

እቶም ዝፈልጡኒ ኸም ኣጋይሽ ኰይኖምኒ።

¹⁴ኣዝማደይ ካባይ ኣድሓርሒሮም፡

ኣመንተይውን ረሲዖምኒ፡

¹⁵ቤተ ሰበይን ኣግራደይን ከም ባዕዲ ይቘጽሩኒ፡

ጓና መሲለ ተርአኽዎም።

¹⁶ንግልያይ እጽውዖ፡ ኣቤት ኣይብለንን፡

ትሕት ኢለ ብኣፈይ እልምኖ ኣሎኹ።

¹⁷ሰበይተይ ንስትንፋሰይ፡

ውሉድ ከርሰይ ከኣ ንልመናይ ጸሊኦምዎ።

¹⁸ናእሽቱ ቘልዑ እኳ ይንዕቁኒ፡

ብድድ እንተ በልኩ፡ ይደፍሩኒ ኣለው።

¹⁹ኲሎም መመኽርተይ ፈንፊኖምኒ፡

እቶም ፍቁራተይ ተገምጢሎምኒ።

²⁰ኣዕጽምተይ ምስ ቈርበተይን ስጋይን ተጣቢቑ፡

ግርጻነይ ጥራይ ተሪፉኒ።

²¹ኣቱም ፈተውተይ፡ ኢድ ኣምላኽ ወቒዓትኒ እያ እሞ፡

ደንግጹለይ፡ ደንግጹለይ።

²²ንምምታይከ ኸም ኣምላኽ እትሰጉኒ፧

ንስጋይውን ዘይትጸግብዎ፧

²³ኣየ፡ እዚ ዘረባይ እንተ ዝጸሓፍ፡

ኣየ፡ ኣብ መጽሓፍ እንተ ዝእርነብ፡

²⁴ብበሊሕ ሓጺንን ብዓረርን

ኣብ ከውሒ ንሓዋሩ እንተ ዝቕረጽ።

²⁵ግናኸ እቲ ዝብጀወኒ ህያው ምዃኑ እፈልጥ ኣሎኹ፡

ንሱ ኣብ መወዳእታ ኣብ ልዕሊ ምድሪ ክቐውም እዩ።

²⁶እዚ ቘርበተይ ምስ ጠፍአ ድማ፡

ሽዑ ምስ ስጋይ ንኣምላኽ ክርእዮ እየ።

²⁷ኣነ ባዕለይ ክርእዮ እየ፡ ኣዒንተይ ክርእያኦ፡ ካልእ ኣይኰነን።

ኰላሊተይ ኣብ ውሽጠይ ሓቒቑ።

²⁸ንስኻትኩም፡ ሱር እቲ ነገር ኣባይ ዘሎ መሲሉኩም፡

ንሰጐጎ፡ እንተ በልኩም፡

²⁹ፍርዲ ኸም ዘሎ ምእንቲ ኽትፈልጡ፡

መቕጻዕቲ ሓጢኣትሲ ሰይፊ እዩ እሞ፡

ንሰይፊ ፍርህዎ።

        መ. እዮብ  ምዕራፍ 20            

     ¹ድሕርዚ ሶፋር ናዕማዊ ኸምዚ ኢሉ መለሰ፡

²ነዚ ምላሽ ክህብ ሓሳባተይ ይድርኸኒ፡

ምናዳ እቲ ኣብ ውሽጠይ ዘሎ ይህውኸኒ።

³ዘነውረኒ መግናሕቲ ሰሚዐ፡

መንፈስ ኣእምሮይ ግና ምላሽ ይህበኒ።

^4-5ካብ ጥንቲ፡ ሰብ ኣብ ምድሪ ኻብ ዝነብር፡

እልልታ ረሲኣን ሓጺር፡

ሓጐስ እቲ ሕሱም ቅጽበት ዓይኒ ምዃኑዶ

ኣይትፈልጥን ኢኻ፧

⁶እቲ ልዕል ምባሉ እኳ ናብ ሰማይ እንተ ደየበ፡

ርእሱ ኸኣ ክሳዕ ደበና እንተ በጽሐ፡

⁷ከምቲ ውጽኣት ግዳሙ ንሓዋሩ ይጠፍእ፡

እቶም ዝረኣይዎ፡ ኣበይ ኣሎ ክብሉ እዮም።

⁸ከም ሕልሚ ይበርር እሞ ኣይርከብን፡

ከም ራእይ ለይቲውን ይበንን።

⁹እታ ዝረኣየቶ ዓይኒ መሊሳ ኣይትርእዮን፡

ቦታኡውን ደጊምሲ ኣይጥምቶም።

¹⁰ውሉዱ ሞገስ ድኻታት ይደልዩ፡

ኣእዳው ነቲ ዝረብሖኦ ይመልሳ።

¹¹ዓጽሙ ብንእስነቱ ምሉእ እዩ፡

ምስኡውን ኣብ መሬት ለጥ ይብል።

¹²ክፍኣት ንኣፋ መቂርዎስ፡

ኣብ ትሕቲ መልሓሱ እንተ ሓብኦ፡

¹³ካብኡ ኸይመልቆ እናኣርነበ፡

ኣብ ትንሓጉ ኣንተ ዓቘሮ፡

¹⁴መብልዑ ኣብ ኣምዑቱ ይልወጥ፡

ኣብ ውሽጡ ሕንዚ ተመን ይዀኖ።

¹⁵ንሃብቲ ውሒጥዎ እዩ እሞ ኽተፍኦ፡

ኣምላኽ ካብ ከብዱ ኸውጽኦ እዩ።

¹⁶ንሕንዚ ተመን ክመጽዮ፡

መልሓስ ተመን ከኣ ክቐትሎ እዩ።

¹⁷ንዓይኒ ማይን፡

መዓርን ጸባን ዝውሕዝ ርባታትን ኣይክርእዮን እዩ።

¹⁸ነቲ ፍረ ድኻሙ ኽመልሶ፡ ኣይክውሕጦን ከኣ እዩ፡

እቲ ዝመልሶ ብመጠን ሃብቱ ክኸውን እዩ እሞ፡

ብእኡ ባህ ኣይብሎን።

¹⁹ንድኻታት ጠቕዖምን ጠንጠኖምን፡

ንቤት በዝበዞ፡ ኣይክሰርሖን ከኣ እዩ።

²⁰ከብዱ ዕረፍቲ ስለ ዝይፈለጠስ፡

ካብቲ ዝፈትዎ ገለ እኳ ኣይከድሕንን እዩ።

²¹ስሳዐኡ ገለ እኳ ኣይገደፈን፡

ስለዚ እቲ ጣዕሚ ንብረቱ ኣይክቐውንም እዩ።

²²ኣብ ምልኣት ሃብቱ ይጸቦ፡

ኢዱ ጽጉም ዘበለ ትወድቆ።

²³ከብዱ ኽመልእ ከሎ፡

ኣምላኽ ጓህሪ ቑጥዓኡ ኽሰደሉ፡

ክበልዕ ከሎ ኸኣ ከዝንመሉ እዩ።

²⁴ካብ ኣጽዋር ሓጺን እንተ ሃደመስ፡

ቀስቲ ኣስራዚ ኽወግኦ እዩ።

²⁵ይስሕቦ እሞ ካብ ስጋኡ ይወጽእ፡

እቲ ብልጭልጭ ዝብል ብልሑውን ካብ ሓሞቱ ይወጽእ፡

ስምባድ ይወድቆ።

²⁶ንመዝገቡ ጸልማት ዘበለ ተዓቑሩሉ፡

ብዘይ መናፍሕ ዝነድድ ሓዊ ኽውሕጦ፡

ነቲ ኣብ ድናኳኑ ዝተረፈውን ክበልዖ እዩ።

²⁷ሰማያት ንኣባሳኡ ክቐልዖ፡

ምድሪ ኸኣ ክትልዓሎ እያ።

²⁸ጥሪት ቤቱ ፋሕ ክብል፡

በታ መዓልቲ ቑጥዓኡ ኽፈስስ እዩ።

²⁹እቲ ረሲእ ከምዚ ዝበለ ዕድል ካብ ኣምላኽ ይቕበል፡

ብኣምላኽ ከምዚ ዝበለ ርስቲ ተመዲብዎ እዩ።

        መ. እዮብ  ምዕራፍ 21            

     ¹ድሕርዚ እዮብ ከምዚ ኢሉ መለሰ፡

²እስኪ ሓንሳእ ዘረባይ ስምዑኒ፡

ምጽንናዕኩም እዚ ይኹን።

³ክዛረብ እስኪ ተዓገሱኒ፡

ምስ ተዛረብኩ፡ ኣባጭው።

⁴ቁዝማይዶ ንሰብ እየ ዝነግሮ፧

ወይስ ከመይ ኢሉ ደኣ እዩ ዓቕለይ ዘይጸበኒ፡

⁵ናባይ ኣቕልቡ እሞ ክትድነቑ፡

ኣፍኩምውን በእዳውኩም ዕበሱ።

⁶ኣነስ እንተ ዘከርክዎ፡ የስካሕክሓኒ፡

ንስጋይውን ረዓድ ይሕዞ ኣሎ።

⁷ረሲኣን ብህይወት ዝነብሩ፡ ዝኣርጉ፡

ስልጣኖም ድማ ዝብርትዕስ፡ ስለምንታይ ኰን እዩ፧

⁸ዘርኦም ምስኦም ኣብ ቅድሚኦም ይነብረ፡

ሓድጎም ኣብ ቅድሚ ኣዒንቶም እዩ።

⁹ኣባይቶም ፍርሃት ዘይብሉ ህዱእ እዩ፡

ሸቦጥ ኣምላኽ ኣይቐርቦምን።

¹⁰ኣርሓኦም ሰሪሩ ብዘይ ፍረ ኣይተርፍን፡

ላሞምውን ከየቘልዐት ትወልድ፡

¹¹ንደቆም ከም መጓሰ የውፍርዎም፡

ቈልዑኦም ይሰራሰሩ።

¹²ብኸበሮን ብበገናን ይደርፉ፡

ብቓና ዕንዱር ይሕጐሱ።

¹³ንዘመኖም ብጣዕሚ ንብረት የሕልፍዎ፡

ብቕጽበት ዓይኒ ኸኣ ናብ ሲኦል ይወርዱ።

^14-15ግናኸ ንኣምላኽ፡ መገድኻ ኽንፈልጥ

ኣይንደልን ኢና እሞ፡ ካባና ኣግልስ፡

እቲ ዂሉ ዝኽእል እነገልግሎኸ መን እይ፧

ናብኡ እንተ ተማህለልናስ፡ እንታይ ክጠቕመና እዩ ይብሉ።

¹⁶እንሆ፡ ጣዕሚ ንብረቶም ኣብ ኢዶም ኣይኰነን፡

ምኽሪ ረሲኣንሲ ኻባይ ደኣ ይርሓቕ።

¹⁷ክንደይ ሳዕ መብራህቲ ረሲኣን ዘይጠፍእ፡

መዓት ዘይወርዶም፡

ኣምላኽ ብቑጥዓኡ መከራ ዘይዕድሎም፧

¹⁸ክንደይ ሳዕከ እዮም ንፋስ ከም ዝወስዶ ሓሰር፡

ህቦብላ ኸም ዝብትኖ ብቑቡቑ ዘይኰኑ፧

 ¹⁹ኣምላኽሲ በደል እቲ ረሲእ ንደቁ ይዓቑሮ፡

ምእንቲ ኽፈልጦስ፡ ንእኡ ይፍደዮ።

²⁰ንጥፍኣቱ ብዓይኑ ይርእዮ፡

ካብ ቁጥዓ እቲ ዂሉ ዝኽእል ይስተ።

²¹ቁጽሪ ኣዋርሑ ምስ ተበትካ፡

ድሕሪኡ ብዛዕባ ቤቱ እንታይ ባህ ይብሎ፧

²²ነቶም ልዑላት ዝፈርድ ኣምላኽሲ

ፍልጠት ዝምህሮ መን እዩ፧

²³እቲ ሓደ፡ ምሉእ ሓይሉ ኸለዎ፡

ህዱእን ሕጉስን ከሎ ይመውት፡

²⁴ተፈይቶታቱ ጸባ መሊኡ ኸሎ፡

ኣንጒዕ ኣዕጽምቱውን ልምሉም ከሎ ይመውት።

²⁵እቲ ሓደ ኸኣ ገለ ራህዋ እኳ ኸይጠዓመ፡

ነፍሱ እናተመረረት እዩ ዝመውት፡

²⁶ብሓደ ዀይኖም ኣብ መሬት ይድቅሱ፡

ሓሰኻውን ይኸድኖም።

²⁷እንሆ፡ ንሓሳባትኩም፡ ነቲ ኣባይ ዝመኸርኩምዎ

ኽፋእ ምኽሪ ፈሊጠዮ ኣሎኹ።

²⁸ንስኻትኩምሲ፡ ቤት መስፍን ኣበይ ኣሎ፧

እቲ ረሲኣን ዝነብርዎ ድንኳንከ ኣበይ ኣሎ፧ ትብሉ ኣሎኹም።

^29-30እቲ ኽፋእ ንመዓልቲ መዓት ከም ዝዕቈር፡

ናብ መዓልቲ ቑጥዓውን ከም ዝምራሕ፡

ነቶም ሓለፍቲ መገዲዶ ኣይጠየቕኩምዎምን፧

ንምልክቶምከ ኣየስተብሃልኩምዎን ዲኹም፧

³¹ንመገዱ ኣብ ቅድሚኡ ዝዘርፎ መን ኣሎ፧

ነታ ዝገበራ ዝፈድዮ መን ኣሎ፧

³²ናብ መቓብር ይወስድዎ እሞ፡

ኣብ ኲርባ መቓብር ይሕሉ፡

³³መሬት እቲ ለሰ ጥዒምዎ ኣሎ፡

ቅድሚኡ ታኣላው ዘይብሎም ከም ዝነበሩ፡

ድሕሪኡ ኸኣ ኲሉ ሰብ ክስዕብ እዩ።

³⁴ካብቲ ምላሽኩም ምጥላም ጥራይ እዩ ተሪፉ ዘሎ እሞ፡

ከመይ ጌርኩም ኢኹም ብኸንቱ ተጸናንዑኒ ዘሎኹም፧

        መ. እዮብ  ምዕራፍ 22            

     ¹ድሕርዚ ኤሊፋዝ ቴማናዊ ኸምዚ ኢሉ መለሰ፡

²ሰብዶ ንኣምላኽ ክጠቕሞ ይኽእል እዩ፧

ኣይፋል፡ እቲ ጠቢብ ንርእሱ እዩ ዝጠቅም።

³እቲ ዂሉ ዝኽእልስ ጻድቕ ብምዃንካዶ ባህ ይብሎ እዩ፧

ንመገድኻ ፍጹም ብምግባርካስ ካብኡዶ ረብሓ ኣለዎ፧

⁴ዝዘልፈካ ወይስ ናብ ፍርዲ ምሳኻ ዝእቱ፡

ስለ ዝፈርሃካ ድዩ፧

⁵ክፍኣትካዶ ዓብዪ ኣይኰነን፧

ኣበሳኻውን መወዳእታ ዘይብሉዶ ኣይኰነን፧

⁶ካብ ሓውካ ብኸምኡ ታሕዚ ኣልዒልካ፡

ክዳን እቶም ዕሩቓት ገፊፍካ፡

⁷ንጽሙእ ማይ ኣየስቴኻዮን፡

ንጥሙይውን እንጌራ ኸላእካዮ እሞ፡

⁸ምድሪ ናይ ብዓል ቅልጽም ኰይና፡

እቲ ኽቡር ከኣ ኣብኣ ማሕደሩ ገበረ።

⁹ንመበለታት ጥራይ ኢደን ሰዲድካየን፡

ቀላጽም ዘኽታማት ተሰቢሩ።

¹⁰ስለዚ ንስኻ ብመፈንጠራታት ተኸቢብካ፡

ብናይ ድንገት ፍርሃትውን ተሸቢርካ እኔኻ፡

¹¹ወይስ ነቲ ኸቢቡካ ዘሎ ጸልማትን

ወሓዚ ማይንዶ ኣይትርእዮን ኢኻ ዘሎኻ፧

¹²ኣምላኽሲ ኣብ ላዕሊ ኣብ ሰማይዶ ኣይኰነን፧

ርእሲ ኸዋኽብቲ ኽንደይ በሪኽ ከም ዝዀነ ጠምት።

¹³ንስኻውን፡ ኣምላኽከ እንታይ ይፈልጥ፧

ብኽንየው ድቕድቕ ጸልማት ኰይኑዶ

ኽፈርድ ይኽእል እዩ፧

¹⁴ከይርኢ ደበና ጋሪድዎ፡

ምምልላሱውን ኣብ ዙርያ ሰማይ እዩ፡ ትብል ኣሎኻ።

¹⁵በታ እቶም እኩያት ሰባት ዝረገጽዋ

ናይ ቀደም መገዲዶ ኽትከይድ ደሊኻ ኢኻ፧

¹⁶እቶም ግዜኣቶም ከይበጽሐ እተቐዝፉ፡

መሰረቶም ከም ውሒዝ ዝወሓዘ ሰባት፡

¹⁷ንሳቶም ንኣምላኽ፡ ካባና ኣግልስ፡

እቲ ዂሉ ዝኽእል እንታይ ኰን ክገብረና እዩ በልዎ።

 — ¹⁸ግናኸ ነባይቶም ብጽቡቕ ነገር መልአን፡ —

ምኽሪ እቶም ረሲኣን ካባይ ደኣ ይርሓቕ፡

^19-20ጻድቃን፡ ተጻረርትና ብርግጽ ሕጂ ተመንቁሶም፡

ነቶም ዝተረፉውን ሓዊ በሊዕዎም እዩ፡ ኢሎም

ነዚ ርእዮም ክሕጐሱ እዮም፡

እቲ ንጹህውን ከባጭዎም እዩ።

²¹እምበኣር ምስኡ ተፋቐር ብሰላምውን ንበር፡

በዚ ጽቡቕ ክትረክብ ኢኻ።

²²ካብ ኣፋ ደኣ ሕጊ ተቐበል፡

ንቓሉውን ኣብ ልብኻ ዕቘሮ።

²³ናብቲ ዂሉ ዝኽእል እንተ ተመለስካ፡

ንዓመጻ ኻብ ድንኳንካ እንተ ኣርሓቕካዮ፡

ከም ብሓድሽ ክትስራሕ ኢኻ።

²⁴ንመዝገብካ ናብ መሬት፡

ንወርቂ ኦፊርውን ናብ ኣእማን ርባ ኣእማን ርባ ደርብዮ፡

²⁵ሽዑ እቲ ዂሉ ዝኽእል ወርቅኻን

ዘንጸባርቕ ብሩርን ክዀነልካ እዩ።

²⁶ሽዑ ንስኻ በቲ ዂሉ ዝኽእል ባህ ክብለካ፡

ገጽካውን ናብ ኣምላኽ ከተልዕል ኢኻ።

²⁷ክትልምኖ፡ ንሱውን ክሰምዓካ እዩ፡

ምብጽዓኻውን ክትፍጽም ኢኻ።

²⁸ዝሓሰብካዮ ዘበለ ኽሰልጠልካ፡

ብርሃንውን ኣብ መንገድኻ ኽበርሃልካ እዩ።

²⁹እንተ ኣዋረዱኻ፡ ናብ ላዕሊ፡ ክትብል ኢኻ።

ነቲ ትሑት ሰብ ከናግፎ እዩ።

³⁰ንሱ ንዘይንጹህ ድማ ከናግፎ እዩ፡

ብንጽህና ኣእዳውካ እዩ ዝናገፍ።

        መ. እዮብ  ምዕራፍ 23            

     ¹ድሕርዚ እዮብ ከምዚ ኢሉ መለሰ፡

²ሎሚውን ቁዝማይ ይተሃላለኽ ኣሎ፡

ኢዱ ኣብ ልዕሊ እህህታይ ትኸብድ ኣላ።

³ኣበይ ከም ዝረኽቦ እንተ ዝፈልጥ እሞ፡

ናብ ዝፋኑ ንምብጻሕ እንተ ዝኽእልሲ መን ምሃበኒ።

⁴ኣብ ቅድሚኡ ነገረይ መፍሰስኩ፡

ንኣፈይ ብመርትዒ ምመላእኩ።

⁵ነቲ ዝመልሰለይ ቃላት ምፈለጥክዎ፡

እንታይ ከም ዝብለኒ ኸኣ መስተውዓልኩ ነይረ።

⁶በቲ ዓብዪ ሓይሉዶ ኽበኣሰኒ እዩ፧

ኣይፋል፡ ጽን ደኣ ምበለኒ እምበር።

⁷ሽዑ እቲ ቕኑዕ ምስኡ ምመጐተ፡

ኣነውን ካብ ፈራድየይ ንሓዋሩ ምተናገፍኩ።

⁸እንሆ፡ ንቕድሚት ኣቢለ እንተ ኸድኩ፡

ኣብኡ የሎን፡ ንድሕሪት እንተ ኸድኩውን፡ ኣይረኽቦን።

⁹ኣብ ጸጋም እንተ ሰርሐ፡ ኣይርእዮን፡

ኣብ የማን እንተ ተሓብአ ኸኣ፡ ኣይጥምቶን።

¹⁰ንሱ ግና በየነይቲ መገዲ ኸም ዝኸይድ ይፈልጥ እዩ፡

ይፈትነኒ፡ ከም ወርቂ ዀይነ ኸኣ ክወጽእ እየ።

¹¹ኣእጋረይ ኣሰሩ ሒዘን፡

ተጠንቂቐውን ካብ መገዱ ኣየግለስኩን።

¹²ካብ ትእዛዝ ከናፍሩ ኣይዘንበልኩን፡

ካብ መዝገበይ ኣብሊጸ ንቓል ኣፉ ሓሎኽዎ።

¹³ግናኸ ናቱ ሓሳብ ሓደ እዩ፡ መንከ ይኽልክሎ፧

ነፍሱ እትደልዮ እዩ ዝገብር።

¹⁴ነቲ እተመደበለይ ክፍጽሞ እዩ፡

ብዙሕ ከምዚ ዘመሰለ ምስኡ ኣሎ።

¹⁵ስለዚ ኣብ ቅድሚ ገጹ እሽበር፡

እናሓሰብኩ ድማ ብእኡ እስምብድ ኣሎኹ።

¹⁶ኣምላኽ ንልበይ ኣጃጅይዎ፡

እቲ ዂሉ ዝኽእል የሸብረኒ ኣሎ እምበር፡

¹⁷ኣብ ቅድሚ ጸልማትሲ ኣይጠፋእኩን፡

ንጣቓውን ኣብ ቅድሚ ገጸይ ኣይጋረዶን።

        መ. እዮብ  ምዕራፍ 24            

     ¹ስለምንታይ እቲ ዂሉ ዝኽእል ነቲ ግዜታት ዘይስውሮ፡

ስለምንታይ ደኣ እቶም ዝፈልጥዎ

ንመዓልትታቱ ዘይርእይወን፧

²ንዶብ የዝብልዎ፡

ንኸብቲ ዘሚቶም የውፍርወን።

³ንዘኽታማት ኣድጎም የሕድግዎም፡

ንብዕራይ መበለትውን ታሕዚ ይሕዝዎ፡

⁴ንድኻታት ካብ መገዲ ይደፍእዎም፡

እቶም ጥቑዓት ምድሪ ሓቢሮም ይሕብኡ።

⁵እንሆ፡ ከም ኣድጊ በረኻ ምግቢ እናደለዩ

ናብ ውዕለቶም ይወጹ፡

በረኻውን ንደቆም ዝኸውን ምግቢ ይህቦም።

⁶ኣብ ግራት ቋርፎም ይእክቡ፡

ኣብ ወይኒ እቲ ረሲእ ይቕርሙ፡

⁷ብዘይ ክዳን ጥራዮም ይሓድሩ፡

ኣብቲ ቑሪ ዝኽደንዎ የብሎምን።

⁸ብርቱዕ ማይ ኣኽራን የጠልቅዮም፡

መጸግዒ ስኢኖም ድማ ከውሒ ይሓቑፉ።

⁹ንዘኽታም ካብ ጡብ እኖኡ ይምንጥልዎ፡

ካብ መሳኺን ታሕዚ ይወስዱ።

¹⁰ብዘይ ክዳን ጥራዮም ይኸዱ፡

ብጥሙያቶም እንዳእቲ ይጾሩ።

¹¹ኣብ ውሽጢ መካበብያኦም ዘይቲ ይጸምቁ፡

ኣብ መጽመቑ ይጸምቁ እሞ ይጸምኡ።

¹²እህህታ እቶም ውጹዓት ካብቲ ኸተማ ይወጽእ፡

ነፍሳት እቶም ቁሱላት ይጭርሓ ኣለዋ፡

ኣምላኽ ግና ነዚ ዓመጻ ግዱ ኣይገብርን እዩ።

¹³እቲኣቶም ካብቶም ንብርሃን ዝጸልኡ እዮም፡

ንጐደናታቱ ኣይፈልጥወንን፡

ኣብ መገድታቱ ኣይጸንዑን።

¹⁴እቲ ቐታል ነፍሲ ወጋሕታ ተንሲኡ፡

ነቲ ድኻን ጥቑዕን ይቐትሎ፡

ብለይቲ ኸኣ ከም ሰራቒ እዩ።

¹⁵ዓይኑ ዘማዊ ንጽልግልግታ ትጽበ፡

ገለ ዓይኒ ኸይትርእየኒ፡ እናበለ ገጹ ይጒልበብ።

^16-17ንዂላቶም ረፍዲ ኸም ድነ ሞት ይዀኖም፡

ምስ ፍርሃት ድነ ሞት ከኣ ስምምዕ ኣለዎም እሞ፡

ብጸልማት ናብ ቤት ኲዒቶም ይኣትው፡

መዓልቲ ግና ተዓጽዮም ይውዕሉ፡

ንብርሃን ኣይፈልጥዎን እዮም።

¹⁸ቀልጢፉ ብልዕሊ ማይ ይሰፍፍ፡

ዕድሎም ኣብ ምድሪ ርጉም እዩ፡

ናብቲ መገዲ ኣታኽልቲ ወይኒ ኣይምለስን።

¹⁹ደርቅን ሃሩርን ንማይ በረድ ይውሕጦ፡

ከምኡውን ሲኦል ነቶም ዝሓጥኡ ይውሕጦም፡

²⁰ማሕጸን ይርስዖ፡ ሓሳኹ ብእኡ ይጸግቡ፡

ዝዝክሮውን የልቦን፡ እከይ ከም ኦም ይስበር።

²¹ነታ ዘይወለደት መኻን ይብድላ፡

ንመበለት ጽቡቕ ኣይገብረላን።

²²ንስልጡናት ብሓይሉ ይስሕቦም፡

ይትንስእ እሞ ኲሎም ሰብ ንህይወቶም ይቐብጽዋ።

²³ንሱ ህድኣት ሂቡ የዕርፎም፡

ኣዒንቱውን ንመገዶም ይቛመታ።

²⁴ልዕል ይብሉ፡ ድሕሪ ቕሩብ ግዜ ግና ኣይርከቡን፡

ይወድቁ፡ ከምቶም ካልኦት ኲላቶም ይእከቡ፡

ከም ርእሲ ሰዊት ከኣ ይቑረጹ።

²⁵ከምኡ እንተ ዘይኰይኑስ፡ መን ሓሳዊ ኽገብረኒ እዩ፧

ነቲ ዘረባይከ መን ከንቱ ኽገብሮ ይኽእል፧

        መ. እዮብ  ምዕራፍ 25            

     ¹ድሕርዚ ቢልዳድ ሹዋዊ ኸምዚ ኢሉ መለሰ፡

²ምልክን ረዓድን ናቱ እዩ፡

ኣብ ኣርያሙ ሰላም ይገብር።

³ንሰራዊቱ ክቘጽሮም ዝኽእል መን እዩ፧

ብርሃኑ ዘይበረቖኸ መን ኣሎ፧

⁴ሰብ ደኣ ኸመይ ገይሩ ኣብ ቅድሚ ኣምላኽ ክጸድቕ፧

ወይ ውሉድ ሰበይቲ ኸመይ ኢሉ ንጹህ ክኸውን ይኽእል፧

^5-6ኣሽንኳይ ሰብ እዚ ሓሰኻ፡

ወዲ ሰብ እዚ እብእብሲ፡

እንሆ፡ ወርሒ እኳ ደሚቓ ኣይትበርህን፡

ከዋኽብቲውን ኣብ ቅድሚኡስ ጽሩያት ኣይኰኑን።

        መ. እዮብ  ምዕራፍ 26            

     ¹ድሕርዚ እዮብ ከምዚ ኢሉ መለሰ፡

²ነቲ ሓይሊ ዘይብሉ ኸመይ ዝበለ ሓገዝ ሓገዝካዮ፡

ነቲ ጽንዓት ዝሰኣነ ቕልጽምውን ኣድሓንካዮ።

³ነቲ ጥበብ ዝሰኣነ ኸመይ ዝበለ ምኽሪ ሃብካዮ።

ክንደይ ፍልጠትከ ዘይገለጽካሉ።

⁴ንመን ኢኻ ዘረባ እተዛረብካዮ፧

እቲ ኻባኻ ዝወጽእ መንፈስከ ናይ መን እዩ፧

⁵ምውታትሲ ኣብ ትሕቲ ማያትን

ኣብ ትሕቲ እቶም ኣብኡ ዝነብሩን የንቀጥቅጡ ኣለው፡

⁶ሲኦል ኣብ ቅድሚኡ ዕሩቕ፡

መዓሙቑውን ቅሉዕ እዩ።

⁷ንሰሜን ኣብ ባዶ ይዝርግሖ፡

ንምድሪ ኣብ ገለ ዘይብሉ የንጠልጥላ።

⁸ንማያት ኣብ ደበናኡ ይቘጽሮ፡

እቲ ደበናውን ብትሕቲኡ ኣይቕደድን።

⁹ደበናታቱ እናዘርግሓሉ፡

ንገጹ ዝፋኑ ይስውሮ።

¹⁰ብርሃንን ጸልማትን ክሳዕ ዝፋላለ፡

ንማይ ብኽቢ ወሰኖ።

¹¹ኣዕኑድ ሰማይ የንቀጥቅጡ፡

ብተግሳጹውን ይሽበሩ።

¹²ብሓይሉ ንባሕሪ የናውጻ፡

ብጥበቡ ኸኣ ንትዕቢት ይወቕዖ።

¹³ብመንፈሱ ሰማያት ይጸሪ፡

ኢዱ ነቲ በራሪ ገበል ወግኣቶ።

¹⁴ካብቲ መገዱስ እንሆ፡ እዚ ሓደ ጫፍ ጥራይ እዩ፡

እቲ ብዛዕባኡ እንሰምዖ ሕሽዂሽዂስ ክንደይ ቅሩብ እዩ፡

ነቲ ነጒዲ ስልጣኑኸ መን እዩ ኸስተውዕሎ ዝኽእል፧

        መ. እዮብ  ምዕራፍ 27            

     ¹እዮብ መሊሱ ብምስላኡ ኸምዚ ኢሉ ተዛረበ፡

²እቲ ንነፍሰይ ዘመርራ ዂሉ ዝኽእል፡

ንመሰለይውን ዘግደፈኒ ኣምላኸይ ህያው እዩ፡

³እስትንፋሰይ ኣብ ውሽጠይ፡

መንፈስ ኣምላኽውን ኣብ ኣፍንጫይ ክሳዕ ዘሎ፡

⁴ከናፍረይ ከቶ ሕሰም ኣይክዛረባን፡

ልሳነይውን ሓሶት ኣይከተውስእን እያ።

⁵ንኣኻትኩም ቅኑዓት ኢኹም ምባለይስ ካባይ ይርሓቕ፡

ክሳዕ ሞተይ ካብቲ ብዘይ ጒድለት ምዃነይ ኣየግልስን።

⁶ንጽድቀይ ኣጽኒዐ እሕዞ፡ ከቶ ኣይሰዶን፡

ካብተን መዓልትታተይ ልበይ ስለ ሓንቲ እኳ ኣይነቕፈንን።

⁷ጸላእየይ ከም ረሲእ፡

ዝቃወመኒ ኸም እኩይ ይኹን።

⁸እቲ ረሲእ፡ ንነፍሱ ኣምላኽ እንተ ቘረጻን እንተ መንጠላንሲ፡

እንታይ ተስፋ ኣለዎ፧

⁹መከራ እንተ ወረዶስ፡

ኣምላኽ ዶዀን ምህልላኡ ይሰምዖ ይኸውን፧

¹⁰ወይስ ነቲ ዂሉ ዝኽእል ሃረርዶ ይብሎ እዩ፧

ኲሉ ግዜዶ ናብ ኣምላኽ ይምህለል እዩ፧

¹¹ኣነ ብዛዕባ ኢድ ኣምላኽ ክምህረኩም፡

ንሓሳባት እቲ ዂሉ ዝኽእል ኣይክሓብኣልኩምን እየ።

¹²እንሆ፡ ኲሉኹም ባዕልኻትኩም ርኢኹምዎ፡

ስለምንታይ ደኣ ኸንቱ ትዛረቡ ኣሎኹም፧

¹³ኣምላኽ ነቲ ረሲእ ዝህቦ ዕድል፡

እቲ ጨካን ካብቲ ዂሉ ዝኽእል ዝቕበሎ ርስቲ እዚ እዩ፡

¹⁴ደቁ እንተ በዝሑ፡ ኣደዳ ሰይፊ እዮም፡

ውሉዱውን እንጌራ ኣይጸግቡን፡

¹⁵እቶም ተርፋ ብሞት ይቕበሩ፡

መበለታቱውን ኣየልቅሳን።

¹⁶ንብሩርስ ከም ሓመድ እንተ ኣከቦ፡

ንኽዳውንቲውን ከም ጭቃ እንተ ደለቦ፡

¹⁷ንሱ ይድልብ፡ ግናኸ እቲ ጻድቕ እዩ ዝኽደኖ፡

ነቲ ብሩርውን እቲ ንጹህ ይማቐሎ።

¹⁸ከም ቁንቁነ ቤቱ ይሰርሕ፡

ከምቲ ሓላዊ ዝሰርሓ ጐጆ እያ።

¹⁹ብሃብታሙ ይድቅስ፡ ምስኡ ገለ እኳ ኣይማላእን፡

ኣዒንቱ ቛሕ የብል እሞ የሎን፡

²⁰ፍርሃት ከም ማያት ኰይኑ የርክቦ፡

ህቦብላ ብለይቲ ይምንጥሎ።

²¹ንፋስ ምብራቕ ኣልዒሉ ይወስዶ፡

ካብቲ ቦታኡ ይነቕሎ።

²²ኣምላኽ ብዘይ ምሕረት ይውርውረሉ፡

ካብ ኢዱ ቐልጢፉ ኽሃድም ይደሊ።

²³ሰባት ኣእዳዎም የጣቕዑሉ፡

ካብ ቦታኡ እናፋጸዩ የውጽእዎ።

        መ. እዮብ  ምዕራፍ 28            

     ¹ንብሩርስ መብቈሊ፡

ነቲ ወርቂውን ዝፈሰሉ ቦታ ኣለዎ።

²ሓጺን ካብ ምድሪ፡

ኣስራዚ ኸኣ ካብ እምኒ እዩ መኺኹ ዝወጽእ።

³ሰብ ንጸልማት ወሰን ይገብረሉ፡

ናይ ጸልማትን ናይ ድነ ሞትን ኣእማን ከኣ

ክሳዕ መወዳእታ ይምርምሮ።

⁴ካብቲ ሰብ ዝነብረሉ ርሒቑ፡

ንታሕቲ ኣዕሚቑ ይዂዕት፡

ካብ እግሪ ተረሲዖም፡ ካብ ሰብ ርሒቖም፡

ተንጠልጢሎም ይዝምብዩ።

⁵ካብ ምድሪ እዩ እንጌራ ዝወጽእ፡

መዓሙቓ ግና ከም ብሓዊ ይግምጠል።

⁶እቲ ኣእማና ናይ ሰፊሮስ ስፍራ እዩ።

ድኹም ወርቂ ኸኣ ኣብኡ ይርከብ።

⁷ነታ መገዲ እቲኣ ነፋሪ ዘበለ ኣይፈልጣን፡

ዓይኒ ንስሪውን ኣይረኣየታን።

⁸እቶም ዕቡያት ኣራዊት ኣይረገጽዋን፡

ኣንበሳውን ኣይሓለፋን።

⁹ሰብ ንኢዱ ናብ እምኒ ብላድ ይዝርግሓ፡

ነኽራን ካብ ሱሩ ይግምጥሎ።

¹⁰ኣብ ውሽጢ ኣኻውሕ ነዃላት ይነድል፡

ዓይኑውን ኣብኡ ኽቡር ዘበለ ትርኢ።

¹¹ንመገዲ ማያት ከይነጥብ ይዓብሶ፡

ንስውር ነገር ናብ ብርሃን የውጽኦ።

¹²ግናኸ ጥበብስ ኣበይ እያ እትርከብ፧

ምስትውዓልከ ኣበይ እዩ ቦታኣ፧

¹³ዋጋኣ ዝፈልጥ ሰብ የልቦን፡

አረ ኣብ ምድሪ ህያዋን እኳ ኣይትርከብን።

¹⁴መዓሙቑ፡ ንሳ ኣባይ የላን፡ ይብል፡

ባሕሪውን፡ ምሳይስ የላን፡ ይብል።

¹⁵ብጽሩይ ወርቂ እኳ ኣይትዕደግን፡

ብሩር ንዋጋኣ ኣይምዘንን እዩ።

¹⁶ብወርቂ ኦፊርን

ብኽቡር ዕንቁን ሰፊሮስን ኣይትምዘንን፡

¹⁷ወርቅን መረጸንን ኣይመስልዋን፡

ነቓሑ ወርቂውን ኣይትልወጥን።

¹⁸ብዛዕባ ኣዕናቑን ክርስታልን እኳ ኣይዘረብ፡

ምጥራይ ጥበብስ ካብ ሉል ዝበልጽ እዩ።

¹⁹ናይ ኢትዮጵያ ቶጳዝዮን እኳ ኣይመሳሰላን፡

ብጽሩይ ወርቂውን ኣይትምዘንን እያ።

²⁰አረ ጥበብስ ካበይ እያ እትመጽእ፧

ቦታ ምስትውዓልከ ኣበይ እዩ ዘሎ፧

²¹ካብ ዓይኒ ዂሎም ህያዋን ሕብእቲ እያ፡

ካብ ኣዕዋፍ ሰማይውን ክውልቲ እያ።

²²መዓሙቑን ሞትን፡

በእዛንና ወሬኣ ሰሚዕና፡ ይብሉ፡

^23-24ንወሰናት ምድሪ ዝቋመቶ፡

ነቲ ኣብ ትሕቲ ሰማይ ዘሎ ዂሉ ዝርእዮ ንሱ እዩ እሞ፡

ንመገዳ ዘስተውዕሎስ ኣምላኽ እዩ፡

ንቦታኣ ዝፈልጥ ንሱ እዩ።

²⁵ንሱ ንንፋስ ሚዛን ምስ ገበረሉ፡

ንማይ ከኣ ብስፍሪ ምስ መዘኖ፡

²⁶ንዝናምሲ ሕጊ፡

ንበርቂ ነጐዳ መገዲ ምስ መደበሉ፡

²⁷ሽዑ ረኣያ እሞ ገለጻ፡

ኣቑሙውን መርመራ።

²⁸ንሰብ ድማ፡ እንሆ፡ ፍርሃት እግዚኣብሄርሲ ጥበብ እዩ፡

ካብ ክፋእ ምርሓቕ ከኣ ምስትውዓል እዩ፡ በለ።

        መ. እዮብ  ምዕራፍ 29            

     ¹እዮብ መሊሱ ብምሰላኡ ኸምዚ ኢሉ ተዛረበ፡

²አየ፡ ከም በተን ቀዳሞት ኣዋርሕ፡

ከም በተን ኣምላኽ ዝሓለወኒ

መዓልትታት እንተ ዝኸውን እሞ መን ምሃበኒ።

³መብራህቱ ኣብ ርእሰይ ክደምቕ ከሎ፡

ብብርሃኑውን ንጸልማት ክሓልፎ ኸሎኹ፡

⁴ከምቲ ብዘመን ጒብዝናይ ዝነበርክዎ፡

ምስጢር ኣምላኽ ኣብ ልዕሊ ድናኳነይ ክዓርፍ ከሎ፡

⁵እቲ ዂሉ ዝኽእል ምሳይ ክነብር ከሎ፡

ደቀይውን ኣብ ዙርያይ ክቘሙ ኸለው፡

⁶ስጒምተይ ኣብ ጠስሚ ኽሓጽብ ከሎኹ፡

ርባታት ዘይቲ ኻብቲ ኸውሒ ኽውሕዘለይ ከሎ፡

ከምተን መዓልትታት እቲኤን እሞ መን ምሃበኒ።

⁷ኣብ ደገ ኸተማ ኽወጽእ፡

ኣብ ኣደባባይውን መንበረይ ክተክል ከሎኹ፡

⁸መንእሰያት ርእዮምኒ ይሕብኡ፡

ሽማግሌታትውን ተንሲኦም ይቘሙ ነበሩ፡

⁹መኳንንቲ ኸኣ ምዝራብ ይሓድጉ፡

ኣፎም ከኣ ብኢዶም ይኸድኑ ነበሩ።

¹⁰ድምጺ መሳፍንቲ ተሓብአ፡

መልሓሶምውን ኣብ ትንሓጎም ተጣበቐ።

^11-12ነቲ ዝጠርዕ ጥቑዕ፡

ነቲ ረዳኢ ዘይብሉ ዘኽታምውን አናግፎ ነበርኩ እሞ፡

ዝሰምዓትኒ እዝኒ ትምርቐኒ፡

ዝረኣየትኒ ዓይኒ ኸኣ ትምስክረለይ ነበረት።

¹³ምርቓ እቶም ውጹዓት በጺሑኒ፡

ንልቢ መበለታትውን እልል ኣቢለዮ።

¹⁴ንጽድቂ ለቢሰያ፡ ንሳውን ለቢሳትኒ።

ፍትሐይ ከም ባርኖስን ዘውድን ነበረት።

¹⁵ዓይኒ ንዝዖረ፡

እግሪውን ንዝሓንከሰ እዀኖ ነበርኩ።

¹⁶ንድኻታትውን ኣቦኦም ነበርኩ፡

ነቲ ኣነ ዘይፈለጥክዎ ኸኣ ነገሩ መርመርኩሉ።

¹⁷ንምንጋጋ ዓማጺ ሰበርኩ፡

ነቲ ዝዘረፎ ድማ ካብ ኣስናኑ መንጠልክዎ።

¹⁸ኣነ ሽዑ፡ ኣብ ቤተይ ክመውት፡

ንመዓልትታተይውን ከም ሑጻ ኸብዝሐን እየ፡

¹⁹ሱረይ ናብ ማይ ክዝርጋሕ፡

ኣውሊ ኣብ ጨናፍረይ ክሓድር እዩ።

²⁰ክብረይ ኣባይ ክትሕደስ፡

ቀስተይ ከኣ ኣብ ኢደይ ክትልምልም እያ፡ በልኩ።

²¹ንኣይ ጽን ኢሎም ይጽበዩ፡

ንምኽረይውን ስቕ ኢሎም ይሰምዕዎ ነበሩ።

²²ድሕሪ ዘረባይ መሊሶም ኣይተዛረቡን፡

ዘረባይ ኣብ ልዕሊኦም የንጠብጥብ ነበረ።

²³ከም ንዝናም ይጽበዩኒ፡

ከም ንዝናም ጽብሓት ኣፎም ሃህ ኣቢሎም ነበሩ።

²⁴ክምስ ምስ በልክዎም፡ ኣይኣመኑንን፡

ንፍሽሕውነት ገጸይ ከጸውግዎ ኣይከኣሉን።

²⁵መገዶም መርመርኩ እሞ ከም ሓለቓ ተቐመጥኩ፡

ኣብ ማእከል ሰራዊቱ ኸም ዝቕመጥ ንጉስ፡

ከምቲ ንሕዙናት ዘጸናንዕ እቕመጥ ነበርኩ።

        መ. እዮብ  ምዕራፍ 30            

     ¹ሕጂ ግና እቶም ብዕድመ ዝንእሱኒ፡

ነቦታቶም ምስቶም ኣኽላባት መጓሰይ እኳ

ዘይመሕበርክዎም፡ ይንዕቁኒ ኣለው።

²እዞም ናብ ዝበሰለ ዕድመ ኽበጽሑ ዘይኽእሉ ሰባት፡

ሓይሊ ኣእዳዎም እንታይ ክጠቕመኒ እዩ፧

³ብስእነትን ጥሜትን ዝማህመኑ እዮም፡

ነቲ ኻብ ቀደም ዝጸመወን በረኻ ዝዀነን

ንቑጽ ምድሪ ይግህጽዎ።

⁴ካብ ጥቓ ቘጥቋጥ ቈጽሊ ኣምዒ ይቕንጥቡ፡

ሱር ቈጥቋጥ ምግቦም ይገብሩ።

⁵ካብ ሕብረት ሰብ ይስጐጉ፡

ከም ንሰራቒ ደድሕሪኦም የድህዩ።

⁶ኣብ ዘፍርህ ጋግ፡ ኣብ ጒድጓድ ምድርን

ኣብ ማእከል ከውሕን ይነብሩ፡

⁷ኣብ ማእከል ዱር ኰይኖም ይጭድሩ፡

ኣብ ትሕቲ እሾዂ ይእከቡ።

⁸ውሉድ ደናቑርቲ፡ ስም ዘይብሉ ዓሌት፡

ተገሪፎም ካብ ሃገር እተሰጉ ኣዮም።

⁹ሕጂ ኣነ መድረፊኦም ኰንኩ፡

መዛረቢኦምውን ገበሩኒ፡

¹⁰ርሒቕ ካባይ ሃዲሞም ይፍንፍኑኒ፡

ናብ ገጸይ ጡፍ ክብሉ ኣይሓፍሩን እዮም።

¹¹ገመደይ ፈቲሑ ኣዋረደኒ እሞ፡

ነቲ ልጓም ኣብ ቅድመይ ደርበይዎ።

¹²እዞም ሕማቓት ኣብ የማነይ ይትንስኡ፡

ነእጋረይ ይደፍእወን፡

ናይ ጥፍኣት መገዶም ኣብ ልዕለይ ይድርብዩ ኣለው።

¹³ንመገደይ የፍርስዋ ኣለው፡

ንርእሶም እኳ ረዲኤት ዘይብሎምስ፡

ንጥፍኣተይ ይተሓጋገዙ።

¹⁴ብገፊሕ ነቓዕ ከም ዝኣትው ዀይኖም ይመጹኒ፡

ብፍሩስ መካበብያ ኣንካራርዮም ይኣትው።

¹⁵ስምባደ ይወርደኒ፡

ከም ህቦብላ ዀይኖም ንኽብረይ የባርርዎ፡

ጣዕሚ ንብረተይ ከም ደበና ሓሊፉ።

¹⁶ሕጂ ድማ ነፍሰይ ኣብ ውሽጠይ ትመክኽ ኣላ፡

መዓልትታት መከራ ሒዘናኒ፡

¹⁷ብለይቲ ኣዕጽምተይ ይንደል፡

ዝቐራጥመኒ ቓንዛ ኣይዓርፍን እዩ።

¹⁸ብብርቱዕ ሓይሊ ሕማመይ ክዳነይ ተበላሽዩ፡

ከም ክሳድ ቀምሸይ ጠሚሩኒ።

¹⁹ናብ ጭቃ ደርብዩኒ፡

ከም መሬትን ሓመዂስትን ኰይነ።

²⁰ናባኻ እምህለል ኣሎኹ፡ ኣይትመልሰለይን፡

ደው ኢለ እኔኹ፡ ተኲርካ ትጥምተኒ ኣሎኻ።

²¹ናብ ጨካን ተለዊጥካኒ፡

በታ ብርትዕቲ ኢድካ ትቃወመኒ ኣሎኻ።

²²ሓፍ ኣቢልካ ብህቦብላ ትሕልፈኒ፡

ብሸምቦባውን ተምክኸኒ ኣሎኻ።

²³አረ ናብቲ ዂሎም ህያዋን ዝእከቡሉ ቤት፡

ናብ ሞት ከም እትወስደኒ እፈልጥ ኣሎኹ።

²⁴ግናኸ ዝወድቕ ሰብዶ ኢዱ ኣይዝርግሕን፧

ወይስ ጥፍኣት ዝመጾዶ ኣየእውን እዩ፧

²⁵ኣነስ ነቲ ጽጉም መዓልቲ ዝረኸቦዶ እበኽየሉ ኣይነበርኩን፧

ንድኻውን ነፍሰይ ትሓዝነሉዶ ኣይነበረትን፧

²⁶እንሆ፡ ራህዋ ንምርካብ ተስፋ ገበርኩ፡ ግናኸ ጸበባ መጸ፡

ብርሃን ተጸቤኹ፡ ግናኸ ጸልማት መጸ።

²⁷ኣምዑተይ ይፈልሕ እሞ ኣይዓርፍን እዩ፡

መዓልትታት መከራ ተጓኒፈናኒ።

²⁸ብዘይ ጸሓይ ጸሊመ እዘውር ኣሎኹ፡

ኣብ ማእከል ማሕበርውን እናተሳእኩ አእዊ።

²⁹ንወኻሩ ሓወን፡

ንሰገናትውን መሓዝአን ኰንኩ።

³⁰ቈርበተይ ጸሊሙ፡ ካብ ስጋይውን ተፋላልዩ፡

ኣዕጽምተይ ከኣ ብረስኒ ሓሪሩ።

³¹ስለዚ መሰንቆይ ናብ ሓዘን፡

ዕንዱረይ ከኣ ናብ ደሃይ ብኽያት ተለዊጡ።

        መ. እዮብ  ምዕራፍ 31            

     ¹ምስ ኣዒንተይ ኪዳን ተኣታቶኹ፡

ከመይ ኢለ ደኣ ናብ ቈንጆ ግልጽ ክብል፧

²እቲ ግደ ኣምላኽ ካብ ላዕሊ፡

እቲ ርስቲ ናይቲ ዂሉ ዝኽእል ካብ ላዕሊ እንታይ እዩ፧

³ጥፍኣት ንዓመጽቲ፡

ጸገማውን ንገበርቲ እከይ ደይኰነን ዝመጾም፧

⁴ንሱስ ንመገደይዶ ኣይርእያን፧

ንዂለን ስጒምተይከ ኣይቈጽረንንዶ እዩ፧

⁵ምስ ከንቱነት ሕብረት እንተ ኣሎኒ፡

እግረይ ናብ ጥልመት ትቕልጥፍ እንተ ዀይና፡

⁶ — ኣምላኽ ንጹህ ምዃነይ ምእንቲ ኽፈልጥሲ፡

ኣነ ብቕኑዕ ሚዛን እምዘን፡ —

⁷ስጒምተይ ካብ መገዲ እንተ ዘምቢለን፡

ልበይ ደድሕሪ ኣዒንተይ ስዒቡ እንተ ዀይኑ፡

ኣእዳወይ ገለ ርስሓት ተጸይቐን እንተ ዀይነንሲ፡

⁸ነቲ ዝዘራእክዎ ኻልእ ይብልዓዮ፡

ፈልሰይውን ካብ ሱሩ ይመንቈስ።

⁹ልበይ ብገለ ሰበይቲ ተሃንዚሉስ፡

ኣብ ደገ ቤት ብጻየይ ተጾናትየ እንተ ዀይነ፡

^10-12አረ እዚ ነውሪ እዩ፡

ፈራዲ ዝቐጽዖ ሓጢኣት እዩ፡

ክሳዕ ሲኦል ዝበልዕ ሓዊ፡

ንጥሪተይ ክሳዕ ሱሩ ዘጥፍእ እዩ እሞ፡

ሰበይተይስ ንኻልእ ሰብኣይ ትጥሓን፡

ካልኦት ሰባትውን ይሕቈፍዋ።

¹³ጊልያይን ገረደይን ምሳይ እንተ ተቛየቑስ፡

ንመሰሎም እንተ ነዓቕክዎ፡

¹⁴ኣምላኽ ምስ ተንስአ ደኣ፡ እንታይ ክገብር፡

ምስ ተቛጻጸረንስ፡ እንታይ ክመልሰሉ እየ፧

¹⁵እቲ ንኣይ ዝፈጠረ ኣብ ማሕጸን ወላዲት ንእኡ ፈጠሮ፡

እቲ ኣብ ከርሲ ወላዲት ዝሃነጸና ሓደዶ ኣይኰነን፧

¹⁶ነቲ መስኪን ለሚኑኒ ኸሊኤዮ እንተ ዀይነ፡

ንዓይኒ መበለት ሃረር ኣቢለያ እንተ ዀይነ፡

¹⁷ንቑራስ እንጌራይ በይነይ በሊዐያ እንተ ዀይነ፡

እቲ ዘኽታም ካብኡ ዘይበልዐ እንተ ዀይኑ፡

¹⁸ — ንሱስ ካብ ንእስነተይ ጀሚረ ደኣ

ኸም ምስ ኣቦኡ ምሳይ ዓበየ፡

ካብ ከርሲ ወላዲተይ ጀሚረ ኸኣ ንእኣ መራሕክዋ። —

¹⁹ንዕሩቕ ሰኣን ክዳን ክጠፍእ፡

ወይስ ንድኻ ብዘይ ማቕ ርእየዮ እንተ ዀይነ፡

²⁰ጐኑ ዘይመረቐኒ፡

ጸጒሪ ኣባጊዐይ ዘየሞቖ እንተ ዀይኑ፡

²¹ኣብ ደገስ ጸግዐይ ርእየ

ኢደይ ኣብ ልዕሊ ዘኽታም ኣልዒለ እንተ ዀይነ፡

²²መንኩበይ ካብ መጋጥማ ትፈለ፡

ቅልጽመይውን ካብ ዓጽማ ትሰበር።

²³መዓት ኣምላኽ ኣሰምበደኒ እሞ፡

ኣብ ቅድሚ ግርማኡውን ክቐውም ኣይከኣልኩን።

²⁴ንወርቂ ተስፋ ጌረዮ፡

ነቲ ጽሩይ ወርቂ፡ እምንቶይ ኢኻ፡ ኢለ እንተ ዀይነስ፡

²⁵ብእለይ በዚሑለይ ኢደይ ኣብዚሓ ደሊባ፡

ኢለ ተሓጒሰ እንተ ዀይነ፡

²⁶ንምድማቕ ብርሃን ጸሓይን፡

ነቲ ኽቡር ኣኻይዳ ወርሕን ጠሚተ እንተ ዀይነ፡

²⁷ልበይ ብስውር ተጠቢሩስ፡

ኣፈይ ንኢደይ እንተ ተሳሊማ፡

²⁸በዚ ኸምዝስ ንልዑል ኣምላኽ ከሓዲኡ ምዀንኩ ነይረ እሞ፡

እዚ ኸኣ ፈራዲ ዝቕጽዖ ኣበሳ ምዀነ ነይሩ።

²⁹ብጒድኣት ጸላእየይ ባህ ኢሉኒ እንተ ዀይነ፡

መከራ ምስ ወረዶውን፡ ተሓጒሰ እንተ ዀይነ፡

³⁰ — ንነፍሱ እናረገምኩ ይሙት ክብል

ንትንሓገይ ኣይፈቐድኩሉን። —

³¹ሰብ ድንኳነይ፡ ካብ ስጋኡ ዘይጸገበ መን ኰን ይኸውን፧

ዘይበሉ እንተ ዀይኖም፡

³² — መጻእተኛ ኣብ ወጻኢ ኣይሓደረን፡

ደጌታተይ ንመንገደኛ ኸፈትኩ። —

^33-34ነቲ ብዙሕ ህዝቢ ስለ ዝፈራህክዎ፡

ኣብ ዓሌት ኣዝማድ ከይንውር ከኣ ስለ ዝሓፈርኩ፡

ስቕ ኢለ ንደገ ኸይወጻእኩ፡

ንበደለይ ኣብ ትሽትሸይ ሓቢኤዮ፡

ንኣበሳይ ከም ግእዚ ሰብ ገይረ ሰዊረዮ እንተ ዀይነስ፡

³⁵ኣየ ዝሰምዓኒ እንተ ዝረክብ።

እንሆ፡ ጽሕፈት ኢደይ፡እቲ ዂሉ ዝኽእል ይምለሰለይ፡

እቲ ወደረኛይ ድማ ክሱ ይጽሓፍ።

³⁶ብሓቂ ኣብ መንኩበይ ምጾርክዎ፡

ዘውደይውን ምገበርክዎ፡

³⁷ቁጽሪ ስጒምተይ መፍለጥክዎ፡

ከም መስፍን ዀይነ ምቐረብክዎ።

³⁸ግራተይ ጠሪዓትለይ እንተ ዀይና፡

ኲለን ትልምታታውን በኽየን እንተ ዀይነን፡

³⁹መሰል ከይሃብኩስ ንፍሬኣ በሊዐዮ እንተ ዀይነ፡

ህይወት ሓረስቶት ኣሕዚነየን እንተ ዀይነ፡

⁴⁰ሽዑ ኣብ ክንዲ ስርናይስ ክርዳድ፡

ኣብ ክንዲ ስገም ከኣ ሰዓዕ ተብቁለለይ።

ዘረባ እዮብ ኣብዚ ተፈጸመ።

        መ. እዮብ  ምዕራፍ 32            

     ¹እዮብ ንርእሱ ጻድቕ ኰይኑ ስለ እተራእዮ፡ እቶም ሰለስተ ሰብኡት ምላሽ ምሃብ ሓደጉ። ²ሽዑ ኤሊሁ፡ ወዲ ባርኪኤል ቡዛዊ ኻብ ዓሌት ራም፡ ብዂራ ተናደደ፡ ንእዮብ ከኣ፡ ኣብ ቅድሚ ኣምላኽ ንነፍሱ ስለ ዘጽደቓ፡ ኣበርቲዑ ዀረየሉ። ³ነቶም ሰለስተ ፈተውቱውን፡ ንእዮብ ምላሽ ስለ ዘይረኸቡሉ እሞ ስለ ዝፈረድዎ፡ ኰረየሎም። ⁴ብዕድመ ይዓብይዎ ስለ ዝነበሩ፡ ኤሊሁ ንእዮብ ከይተዛረቦ ጸንሐ። ⁵ኤሊሁ ግና፡ ሰለስቲኦም ብኣፎም ዝመልስዎ ስኢኖም ምስ ረኣየ፡ ብዂራ ተናደደ። — ⁶ሽዑ ኤሊሁ፡ ወዲ ባርኪኤል ቡዛዊ፡ ከምዚ ኢሉ መለሰ፡

ኣነ ብዕድመ ንኡስ እየ፡

ንስኻትኩም ግና ዓበይቲ ኢኹም፡

ስለዚ ኸኣ ሓፊረስ ክሳዕ ሕጂ ስቕ በልኩ፡

ሓሳበይውን ኣይገለጽኩልኩምን።

⁷ኣነ፡ እተን መዓልትታት ይዛረባ፡

ብዝሒ ዓመታት ከኣ ጥበብ የፍልጥ፡ ኢለ ሓሰብኩ።

⁸ግናኸ እቲ ኣብ ሰብ ዘሎ መንፈስን

እስትንፋስ እቲ ዂሉ ዝኽእልን እዩ ምስትውዓል ዝህብ።

⁹ዓበይቲ ኣይኰኑን ጠቢባን ዝዀኑ፡

ሽማግሌታትውን ኣይኰኑን ንቕኑዕ ዘስተውዕሉ።

¹⁰ስለዚ ድማ ኣነውን ሓሳበይ ክገልጽሲ፡

ስምዑኒ፡ እብል ኣሎኹ።

¹¹እንሆ፡ እትዛረብዎ ኽሰምዕ ተጸቤኹ፡

ቃላት ክትምርምሩ ኸሎኹምሲ፡

ንቑም ነገርኩም ጽን በልኩ።

¹²ኣጸቢቐ ኣቕለብኩልኩም እሞ፡

እንሆ፡ ንእዮብ ዘረድኦ ንዘረባኡ ኸኣ ምላሽ ዝሃበሉ

ካባኻትኩም ሓደ እኳ የልቦን።

¹³ንስኻትኩም፡ ጥበብ ረኺብና፡

ኣምላኽ እዩ ዝስዕሮ፡ ሰብ ኣይኰነን፡ ኣይትበሉ።

¹⁴ንኣይስ ገለ እኳ ኣይተዛረበንን፡

ብዘረባኹም ከኣ ኣይክመልሰሉን እየ።

¹⁵ሰምቢዶም፡ ድሕርዚ ዘረባ ስኢኖም፡

ምላሽ ኣይሃቡን።

¹⁶ገለ እኳ ኸይመለሱን ከይተዛረቡን፡

ደው ኢሎም እዮም እሞ፡ ኣነ ኽጽበ ድየ፧

¹⁷ኣነውን ብታራይ ክመልስ፡

ኣነ ድማ ሓሳበይ ክገልጽ እየ።

¹⁸ቃላት መሊኡኒ እዩ እሞ፡

እቲ ኣብ ውሽጠይ ዘሎ መንፈስ ይድርኸኒ ኣሎ።

¹⁹እንሆ፡ ውሽጠይ ከም ሕቱም ወይኒ ብጎዕሽ ወይኒ

ክቕደድ ከም ዝቐረበ ሓርቢ እዩ።

²⁰ክዛረብ እሞ ከስተንፍስ፡

ከናፍረይ ከፊተስ ክመልስ እየ።

^21-22ንምቅብጣር እኳ ኣይፈልጦን እየ እሞ፡

ንዝዀነ ይኹን ኣድልዎ ገጽ የብለይን፡

ንሓደ እኳ ብምቅብጣር ኣይዛረብን እየ።

ከምኡ እንተ ዝኸውንሲ፡

ፈጣሪየይ ቀልጢፉ ምመንጠለኒ ነይሩ።

        መ. እዮብ  ምዕራፍ 33            

     ¹ዎ እዮብ፡ ሕጂ ግና ንዘረባይ ስማዕ፡

ንዂሉ ቓለይ ከኣ ጽን በሎ።

²እንሆ፡ ኣፈይ እኸፍት ኣሎኹ፡

መልሓሰይውን ኣብ ትንሓገይ ትዛረብ ኣላ።

³ዘረባይሲ ቕንዕና ልበይ እይ፡

ከናፍረይ ከኣ ነቲ ዝፈልጣኦ ብቕንዕና ኽነግራ እየን።

⁴መንፈስ ኣምላኽ እዩ ዝፈጠረኒ፡

እስትንፋስ እቲ ዂሉ ዝኽእል እዩ ህይወት ዝሃበኒ።

⁵እንተ ኽኢልካስ ምለሰለይ፡

ተዳሊኻ ኣብ ቅድመይ ቁም።

⁶እንሆ፡ ኣነ ኣብ ቅድሚ ኣምላኽ ከማኻ እየ፡

ኣነ ድማ ካብ መሬት እተገበርኩ እየ።

⁷እንሆ፡ ንኣይ ፈሪህካ ኣይክትሽበርን፡

ኢደይውን ኣይክትከብደካን እያ።

⁸ብሓቂ ኣብ ኣእዛነይ ተዛረብካ፡

ድምጺ ቓላትካ ሰሚዐ፡

⁹ኣነ ብዘይ በደል ጽሩይ እየ፡

ንጹህ እየ፡ ሓጢኣት ከኣ የብለይን።

¹⁰እንሆ፡ ንሱ ምኽንያት ኣባይ ረኺቡ፡

ከም ጸላኢ ይርእየኒ ኣሎ፡

¹¹ነእጋረይ ኣብ ጒንዲ ኣሲሩወን፡

ንዂለን መገደይ ይቋመተን ኣሎ።

¹²እንሆ፡ ኣምላኽ ካብ ሰብ ይበልጽ እዩ እሞ፡

በዝስ ተጋጊኻ ኢለ እመልሰልካ ኣሎኹ።

¹³ብነገሩ ምላሽ ኣይህብን እዩ እሞ፡

ስለምንታይ ምስኡ እትካራኸር፧

¹⁴ኣምላኽ ሓንሳእ፡ ክልተ ሳዕ ይዘረብ፡

ሰብ ግና ኣየቕልብን እዩ።

¹⁵ብሕልሚ፡ ብናይ ለይቲ ራእይ፡

ንሰብ ከቢድ ድቃስ ምስ ወደቖ፡

ኣብ ዓራቱ ምስ ደቀሰ፡

^16-18ንሰብ ካብ ግብሩ ምእንቲ ኽመልሶ፡

ካብ ትዕቢትውን ክስውሮ፡

ንነፍሱ ኻብ ዓሚቑ ምእንቲ ኽባልሃ፡

ንህይወቱውን ካብ ሴፍ ከናግፋስ፡

ሽዑ ንእዝኒ ሰብ ከፊቱ፡

ንተግሳጹ ይሓትሞ።

¹⁹ሰብ ኣብታ ምድቃሱ ብስቓያት፡

ኣብ ዓጽሙ ዂሉ ግዜ ብቓንዛ ይቕጻዕ፡

²⁰ሽዑ ህይወቱ ንእንጌራ፡

ነፍሱውን ንጥዑም ምግቢ ትፍንፍኖ።

²¹ዘይርአ ኽሳዕ ዝኸውን ስጋኡ ይማስን።

እቲ ቕድም ዘይተራእየ ኣዕጽምቱ ይቕላዕ።

²²ከምኡ ነፍሱ ናብ መቓብር፡

ህይወቱውን ናብ ቀተልቲ ትቐርብ።

²³ንሰብ እታ ቕንዕቲ መገዲ ዝምህሮ፡

ካብ ኣሽሓትስ ሓደ ማእከላይ ኰይኑ

ዝሕልዎ መልኣኽ እንተ ተረኽበ ግና፡

²⁴ሽዑ ንሱ፡ ካሕሳ ተቐቢለ እየ እሞ፡

ናብ መቓብር ካብ ምውራድ ኣድሕኖ፡ ኢሉ ይርሕርሓሉ።

²⁵ስጋኡ ኻብ ናይ ሕጻን ይልምልም፡

ናብ መዓልትታት ጒብዝናኡ ይምለስ።

²⁶ንኣምላኽ ክልምኖ እሞ፡ ንሱ ጸጋ ኽህቦ እዩ፡

ንገጹውን ብሓጐስ የርእዮ፡

ነቲ ሰብቲ ጽድቁ ይመልሰሉ።

^27-28ሽዑ ንሱ፡ ኣነ በደልኩ ፍትሒውን ደፈንኩ፡

ከም ዝግብኣኒ ኸኣ ኣይተቐጻዕኩን፡

ነፍሰይ ናብ መቓብር ከይትወርድ ተበጅይዋ፡

ህይወተይ ብርሃን ትርኢ ኣላ፡

ኢለ ኣብ ቅድሚ ሰብ ይዝምር።

^29-30እንሆ፡ ንነፍሱ ኻብ መቓብር ክመልሳ፡

ብብርሃን ህያዋን ምእንቲ ኽትበርህስ፡

ኣምላኽ ነዚ ዂሉ ኽልተ ሳዕ፡

ሰለስተ ሳዕ ንሰብ ይገብሮ።

³¹ኣታ እዮብ፡ ኣስተብሂልካማ ስማዓኒ፡

ክዛረብሲ ስቕ በል።

³²እትብሎ እንተ ኣልዩካ ምለሰለይ፡

ከጽድቐካ እደሊ ኣሎኹ እሞ፡ ተዛረብ።

³³እንተ ዘይኮነስ ጽን በለኒ፡

ጥበብ ክምህረካስ፡ ስቕ በል።

        መ. እዮብ  ምዕራፍ 34            

     ¹ኤሊሁ ኸም ብሓድሽ ከምዚ ኢሉ ተዛረበ፡

²ኣቱም ጠቢባን፡ እስኪ ዘረባይ ስምዑ፡

ኣቱም ፍልጠት ዘሎኩም፡ ናባይ ኣቕልቡ።

³ትንሓግ ንብልዒ ኸም ዘስተማቕሮ፡

እዝኒ ንዘረባ ይዕዘቦ።

⁴ቅኑዕ ንምረጽ፡

ንሰናይ ሓቢርና ነስተብህሎ።

^5-6እዮብ፡ ኣምላኽ ደኣ ፍትሒ ደፊኑለይ እምበር፡

ኣነስ ጻድቕ እየ፡

ቅኑዕ ክነሰይ፡ ከም ሓሳዊ ዀይነ፡

ገለ እኳ ዘይበደልኩስ፡ ቁስለይ ዘይሓዊ እዩ፡ ኢሉ ኣሎ።

^7-8እዮብሲ፡ ሰብ ናብ ኣምላኽ እንተ ለገበ፡

ገለ እኳ ኣይጥቀምን፡ ኢሉ እዩ እሞ፡

መሓዛ ገበርቲ ኽፋእ ዝኸውን፡

ምስቶም ረሲኣን ዝሓብር፡

ንምልጋጽ ከም ማይ ዝሰትዮ፡

ከም እዮብ ዝበለ ሰብከ ኣበይ ይርከብ፧

¹⁰ስለዚ ኣቱም ሰብ ኣእምሮ፡ እስኪ ስምዑኒ፡

ረሲእነት ካብ ኣምላኽ ይርሓቕ፡

ክፍኣትውን ካብቲ ዂሉ ዝኽእል ይርሓቕ።

¹¹ንሰብ ደኣ ከከምታ ግብሩ ይፈድዮ፡

ንነፍሲ ወከፍ ከከም ኣካይዳኡ ገይሩ ዓስቢ ይህቦ።

¹²ብርግጽ፡ ኣምላኽ ዓመጻ ኣይገብርን፡

እቲ ዂሉ ዝኽእል ድማ ፍትሒ ኣይደፍንን።

¹³ንምድሪ ሓደራ ዝሃቦ መን እዩ፧

ንዂላ ዓለም ዝሰረታኸ መን እዩ፧

¹⁴ንሱ ንሰብ እንተ ዝሓስቦስ፡

ንመንፈሱን ንስትንፋሱን ናብ ርእሱ ምመለሶ፡

¹⁵ስጋ ዝለበሰ ዂሉ ሓቢሩ ምጠፍአ፡

ሰብ ከኣ ናብ መሬት ምተመልሰ ነይሩ።

¹⁶ምስትውዓል እንተ ኣሎካስ፡ ነዚ ስምዓዮ፡

ናብቲ ድምጺ ቓላተይ ኣቕልብ።

¹⁷እቲ ንቕንዕና ዝጸልእዶ ኽገዝእ እዩ፧

ነቲ ጻድቕን ስልጡንን ንስኻዶ በዳሊ ኽትገብሮ ኢኻ፧

¹⁸ሰብዶ ንንጉስ፡ ኣታ ብልያል፡

ወይስ ንመኳንንቲ፡ ኣቱም ረሲኣን፡ ይብሎም እዩ፧

¹⁹ኲላቶም ተግባር ኢዱ እዮም እሞ፡

ገጽ ሓለቓታት ርእዩ ኣየድሉን፡

ንሃብታም ካብ ድኻ ኣዕዚዙ ኣይርእዮን።

²⁰ብቕጽበት ዓይኒ ይሞቱ፡

ኣብ ፍርቂ ለይቲ እኳ የንቀጥቅጡን ይሓልፉን፡

እቶም ሓያላት ድማ ብዘይ ኢድ ይንቀሉ።

²¹ኣዒንቱ ኣብ መገዲ ሰብ እየን እሞ፡

ንዂሉ ስጒምቶም ይርእዮ እዩ።

²²እቶም ገበርቲ ሓጢኣት ዝሕብኡሉ

ጸልማት ወይስ ድነ ሞት የልቦን።

²³ኣምላኽ ንሰብ፡ ኣብ ቅድሚኡ ኽፈርድ ኢሉ

ኽመጽእ ከሎ፡

ተጠንቂቑ ኽጥምቶ ኣየድልዮን እዩ እሞ፡

²⁴ንሓያላት ብዘይ ምምርማር ይጭፍልቖም፡

ኣብ ክንድኦም ከኣ ካልኦት የቕውም።

²⁵ንተግባሮም ይፈልጦ እዩ እሞ፡

ብለይቲ ይግልብጦም ይቕጥቅጦም ከኣ።

^26-28ገዓር ድኻ ናብኡ ኽበጽሕ፡

ንገዓር ሽጉራት ድማ ከይስምዕዎስ፡

ንእኡ ኸይስዕቡ ስለ ዘግለሱ፡

ንዂለን መገድታቱ ስለ ዘይተጠንቀቑለን፡

ከም ንረሲኣን ገይሩ

ኣብ ቅድሚ ሰብ ይቐጽዖም።

^29-30ረሲእ ምእንቲ ኸይነግስ፡

ንህዝቢ ኸኣ ወጽመድ ከይከውንሲ፡

ንህዝቢ ወይስ ንሓደ ሰብ

ዕረፍቲ እንተ ሃበ፡ መን እዩ ዝዂንኖ፧

ገጹ እንተ ሰወረኸ፡ መን ኣሎ ዝርእዮ፧

^31-32ንኣምላኽዶ ኸ፡ መከራ ተቐቢለ፡

ድሕርዚ ኣይክብድልን እየ፡

ነቲ ዘይርእዮ ምሃረኒ፡

በዲለ እንተ ዀይነ ኸኣ ኣይክደግምን እየ፡ ዝበለዶ ኣሎ፧

³³ንስኻ ኣቢኻዮ ኢኻ እሞ፡

ከም ሓሳብካ ገይሩዶ ፍዳ ኽህብ እዩ፧

ኣነ ዘይኰንኩስ፡ ንስኻ እስኪ ብዛዕባ እዚ ምረጽ፡

አረ ነቲ እትፈልጦ ተዛረብ።

^34-35ለባማት ሰባትን ዝሰምዓኒ ጠቢብ ሰብን፡

እዮብ ብዘይ ፍልጠት እዩ ዝዛረብ፡

ቃላቱ ብዘይ ኣእምሮ እዩ፡ ክብሉኒ እዮም።

^36-37እዮብ ኣብ ማእከልና ኣእዳው የጣቕዕ፡

ብምብዛህ ዘረባ ንኣምላኽ ይከራኸሮ፡

ኣብ ልዕሊ ሓጢኣቱ ዓመጻ ይውስኽ ኣሎ እሞ፡

ከምቶም ረሲኣን ገይሩ ምላሽ ስለ ዝሃበስ፡

ክሳዕ ፍጻሜ ይፈተን።

        መ. እዮብ  ምዕራፍ 35            

     ¹ኤሉሁ ኸም ብሓድሽ ከምዚ ኢሉ ተዛረበ፡

²ንስኻስ፡ ሓለፋ ኣምላኽ ጻድቕ እየ፡ ምባልካ

ቅኑዕዶ ይመስለካ፧

³እንታይ ይጠቕመኒ፧

እንተ በደልኩኸ እንታይ ክረብሕ እየ፧ ትብል ኣሎኻ እሞ፡

⁴ነዝስ ኣነ ክመልሰልካ፡

አረ ነቶም ብጾትካውን ምሳኻ፡

⁵እስኪ ንሰማያት ኣቢልካ ርአ እሞ፡

ነቲ ኻባኻ ልዕል ደበና ተመልከቶ።

⁶እንተ በደልካስ፡ እንታይ ትገብሮ፡

ኣበሳኻ እንተ በዝሐኸ፡ እንታይ ትጐድኦ ኢኻ፧

⁷ጻድቕ እንተ ዀንካ፡ እንታይ ትህቦ፧

ካብ ኢድካስ እንታይ እዩ ዝቕበሎ፧

⁸ረሲእነትካ ንዝኸማኻ ሰብሲ ይጐድኦ፡

ጽድቅኻውን ንወዲ ሰብ ይጠቕሞ ይኸውን።

⁹ዓመጻ ስለ ዝበዝሐ ይግዕሩ፡

ብምኽንያት ቀላጽም እቶም ዓበይቲ የእውዩ።

^10-11ግናኸ እቲ ኻብ እንስሳታት ምድሪ ኣብሊጹ ዘስተምሃረና፡

ካብ ኣዕዋፍ ሰማይውን ኣብሊጹ ዘጥበበና፡

እቲ ብለይቲስ መዝሙር ምስጋና ዝህብ

ዝፈጠረኒ ኣምላኽከ ኣበይ እዩ ዘሎ፧ዝብል የልቦን።

¹²ብሰሪ ትዕቢት እኩያት ሽዑ ይጠርዑ፡

ግናኸ ንሱ ምላሽ ኣይሃቦምን።

¹³ብሓቂ፡ ኣምላኽ ንኸንቱነት ኣይሰምዖን፡

እቲ ዂሉ ዝኽእል ከቶ ኣየቕልበሉን።

¹⁴ምናዳ ግና ከም ዘይትርእዮ እንተ በልካ፡

ፍትሒ ኣብ ቅድሚኡ ኣሎ፡ ንስኻውን ተጸበዮ።

¹⁵ሕጂኸ ብቑጥዓኡ ስለ ዘይቀጽዐ፡

ንድፍረት ከም ዘይፈልጦዶ ይመስለካ ኣሎ፧

¹⁶እምበኣርከ እዮብ ብኸንቱ ኣፉ ይኸፍት፡

ብዘይ ፍልጠት ከኣ ዘረባ የብዝሕ ኣሎ።

        መ. እዮብ  ምዕራፍ 36            

     ¹ኤሊሁ ወሲኹ ተዛረበ፡

²ስለ ኣምላኽ ገና ዝዝረብ ኣሎኒ እሞ፡

ኣነ ኸምህረካ ቕሩብ ጽናሕ።

³ንፍልጠተይ ካብ ርሑቕ ከምጽኦ እየ፡

ፈጣርየይ ጻድቕ ከም ዝዀነ ኸርኢ እየ።

⁴ብሓቂ፡ ዘረባይ ሓሶት ኣይኰነን፡

ፍጹም ፍልጠት ዘለዎ ምሳኻ ኣሎ።

⁵እንሆ፡ ኣምላኽ ስልጡን እዩ፡

ግናኸ ንሓደ እኳ ኣይንዕቕን፡

ብሓይሊ ምስትውዓሉ ስልጡን እዩ።

⁶ንህይወት ረሲእ ኣይሕልዋን፡

ንመሳኺን ግና ፍትሒ የውጽኣሎም።

⁷ኣዒንቱ ኻብ ጻድቃን ኣይመልሰንን፡

ንሓዋሩ ምስ ነገስታት ኣብ ዝፋን የቐምጦም፡

እሞ ልዕል ይብሉ።

⁸ብሰንሰለት እንተ ተኣሰሩ፡

በግማድ ሽጋር እንተ ተታሕዙ፡

⁹ንሱ ንተግባሮም፡

ነቲ ብትዕቢት ዝገበርዎ ምትሕልላፎም የፍልጦም።

¹⁰እዝኖም ንተግሳጽ ከፊቱስ፡

ካብ ሓጢኣት ክምለሱ ይእዝዞም።

¹¹እንተ ሰምዕዎ እሞ እንተ ተገዝእዎ፡

መዓልትታቶም ብሰናይ፡

ዓመታቶምውን ብደስታ ይፍጽሙ።

¹²እንተ ዘይሰምዑ ግና፡ ብሰይፊ ኽጠፍኡ፡

ብዘይ ፍልጠትውን ክሞቱ እዮም።

¹³እቶም ብልቦም ረሲኣን ዝዀኑ ግና ኲራ የብዝሑ፡

እንተ ኣሰሮም ከኣ ኣየእውዩን።

¹⁴ነፍሶም ብሰዊታ ትቕዘፍ፡

ህይወቶም ከኣ ኣብ ማእከል ርኹሳት ትጠፍእ።

¹⁵ንሽጉር ብሽጋሩ ገይሩ የድሕኖ፡

ብጭንቀትውን ንእዝኖም ይኸፍቶ።

¹⁶ከምኡ ድማ ንኣኻ ኻብ ኣፍ ጸበባ

ናብቲ ጭንቂ ዘይብሉ ገፊሕ ቦታ ኸውጽኣካ፡

ስቡሕ መኣዲውን ክቕርበልካ እዩ።

¹⁷ንስኻ ግና ፍርዲ ረሲእነት መሊእካ ኣሎኻ፡

ፍርድን ፍትሕን ሒዘናኻ እኔዋ።

¹⁸ኲራ ናብ ጸርፊ ኸይደፍኣካ ተጠንቀቕ፡

ካሕሳ እንተ በዝሐ እኳ፡ ኣየጋጊኻ።

¹⁹ሃብትኻን ኲሉ ምብርታዕ ሓይልኻን

ካብ ጸበባ ኸውጽኣካዶ ይኣክል እዩ፧

²⁰ነታ ነህዛብ ካብ ቦታኦም እትጸርጎም ለይቲ ኣይትናፍቃ።

²¹ካብ መከራ ንሓጢኣት መሪጽካ ኢኻ እሞ፡

ናብኡ ኸይትምለስ ተጠንቀቕ ደኣ።

²²እንሆ፡ ኣምላኽ ብሓይሉ ልዑል እዩ፡

ከምኡ ገይሩ ዝምሃርከ መን እዩ፧

²³መገዱ ዝሓበሮ መን እዩ፧

መንከ፡ ሓጢኣት ጌርካ፡ ክብሎ ይኽእል፧

²⁴ነቲ ሰባት ዝውድስዎ ተግባሩ

ከተዕብዮ ደኣ ዘክር።

²⁵ኲሎም ይጥምትዎ፡

ነፍሲ ወከፍ ኣማዕድዩ ይርእዮ።

²⁶እንሆ፡ ኣምላኽ ዓብዪ እዩ፡ ኣይንፈልጦን ኢና፡

ቁጽሪ ዓመታቱ ኸኣ ኣይምርመርን።

²⁷ንነጥብታት ማይ ንላዕሊ ይስሕቦ፡

ካብ ግመ ኸኣ ዝናም ይዘንም።

²⁸ደበናታት የንጠብጥቦ፡

ኣብ ልዕሊ ብዙሕ ሰብውን የፍስሶ።

²⁹አረ ንምዝርጋሕ ደበናታት፡

ነቲ ኻብ ድንኳኑ ዝወጽእ ደሃይውን መን እዩ ዘስተውዕሎ፧

³⁰እንሆ፡ ንብርሃኑ ኣብ ዙርያኡ ይዝርግሖ፡

ንመዓሙቑ ባሕሪ ኸኣ ይሽፍኖ።

³¹በዚ ኸምዚ ነህዛብ ይፈርዶም፡

ምግቢ ድማ ኣበርኪቱ ይህብ።

³²ነእዳው ብመብረቕ ይስውረን፡

ናብቶም ተጻረርቲ ይውርውሮ።

³³ነጐዳጓዱ ስሌኡ ይነግር፡

እንሰሳታት ከኣ ምቕራብ ይፈልጡ።

        መ. እዮብ  ምዕራፍ 37            

     ¹እወ፡ በዝስ ልበይ የንቀጥቅጥ፡

ካብ ስፍራኡ ኸኣ ይናወጽ ኣሎ።

²ኣታ ስምዑ፡ ነቲ ምህማም ድምጹ፡

ነቲ ኻብ ኣፉ ዝወጽእ ደሃይ ስምዕዎ።

³ንእኡ ናብ ትሕቲ ዂሉ ሰማይ

ንመብረቑውን ክሳዕ ወሰን ይሰዶ።

⁴ድሕርዚ ድምጺ ይጓዝም፡

በቲ ግርማዊ ድምጺ የንጐድጒድ፡

ድምጺ ምስ ዝስማዕውን፡ ንበርቅታት ኣይኽልክሎን።

⁵ኣምላኽ ብድምጹ ዘደንቕ ገይሩ የንጐድጒድ፡

ዘይነስተውዕሎ ዓበይቲ ነገር ይገብር።

⁶ንውርዕጭን ንነጠብጣብ ዝናምን ንብርቱዕ ጸፍዕን፡

ናብ ምድሪ ውረድ፡ ይብሎ።

⁷ኲሎም ሰብ ተግባሩ ምእንቲ ኽፈልጡስ፡

ንኢድ ነፍሲ ወከፍ ሰብ ይሓትሞ።

⁸ሽዑ ኣራዊት ነናብ መሕብኢኦም ይኣትው፡

ኣብ በበዓቶም ይቕመጡ።

⁹ህቦብላ ኻብቲ ሕቡእ ስፍራኡ፡

ዛሕሊ ኸኣ ካብ ሰሜን ይወጽእ።

¹⁰ብእስትንፋስ ኣምላኽ በረድ ይኸውን፡

ምግፋሕ ማያት ድማ ይጸብብ።

¹¹ንደበናታት ማይ ይጽዕኖም፡

ንናይ መብረቕ ደበናታትውን ይብትኖም።

¹²እዚኣቶም፡ ነቲ ንሱ ዝእዝዞም ዘበለ

ኣብ ልዕሊ ዂሉ ገጽ ምድሪ ምእንቲ ኽገብሩስ፡

ብእኡ እናተመርሑ ናብዝን ናብትን ይመላለሱ ኣለው።

¹³ወይ ንመቕጻዕቲ ወይ ንምድሩ

ወይ ንምሕረት የውርዶም።

¹⁴እምበኣርስከ ዎ እዮብ፡ ነዚ ስማዕ፡

ንተኣምራት ኣምላኽ ህድእ ኢልካ ኣስተንትኖ።

¹⁵ኣምላኽ ከመይ ገይሩ ከም ዘቃንዖም፡

ንበርቂ ደበናኡ ኸመይ ገይሩ ኸም ዘብርቖ ትፈልጦ ዲኻ፧

¹⁶ነቲ ምድልዳል ደበና፡

ናይቲ ፍልጠቱ ፍጹም ዝዀነ ዘደንቅ ግብሪኸ ትፈልጦ ዲኻ፧

¹⁷ምድሪ ብንፋስ ደቡብ ምስ ደንዘዘት፡

ንስኻ ኽዳውንትኻ ዘይድህረካስ ተስተውዕሎ ዲኻ፧

¹⁸ነቲ ኸም ፍሱስ መስትያት ዝምጽናዑ ሰማይሲ

ምስኡ ዄንካዶ ዘርጊሕካዮ ኢኻ፧

¹⁹ንሕናስ ብሰሪ ጸልማት

ብስርዓት ክንዛረብ ኣይንኽእልን ኢና እሞ፡

ንእኡ እንብሎ፡ ንስኻ ምሃረና።

²⁰ኣነ ኽዛረብ ከም ዝደልስ ክነግርዎ ድዮም፧

ክውሓጥ ዝደሊ ሰብዶኸ ኣሎ፧

²¹ሕጂ እቲ ኣብ ውሽጢ ደበናታት ዝበርህ ብርሃን ኣይርአን እዩ፡

ግናኸ ንፋስ ሓሊፉ የጽርዮ።

²²ወርቂ ኻብ ሰሜን እዩ ዝመጽእ፡

ኣምላኽ ብዘፍርህ ግርማ ተኸቢቡ ኣሎ።

²³ነቲ ዂሉ ዝኽእል ክንረኽቦ ኣይንኽእልን ኢና፡

ንሱ ብሓይሊ፡ ብፍርዲ፡ ብፍትሒ ዓብዪ እዩ፡

ንሓደ እኳ ኣይጭቁንን።

²⁴ስለዚ እዩ ሰባት ዝፈርህዎ፡

ነቶም ብልቦም ጠቢባን ዝዀኑ ኣየቕልበሎምን እዩ።

        መ. እዮብ  ምዕራፍ 38            

     ¹ሽዑ እግዚኣብሄር ንእዮብ ካብ ህቦብላ ንፋስ ከምዚ ኢሉ መለሰሉ፡

²ብዘይ ፍልጠት ብምዝራቡ

ንምኽረይ ዘጸልምቶ መን እዩ፧

³ከም ሰብኣይ ኴንካ ሕቜኻ ተዓጠቕ፡

ኣነ ኽጥይቐካ እየ፡ ንስኻውን ምለሰለይ።

⁴ኣነ ንምድሪ ኽስርታ ኸሎኹስ፡ ኣበይ ነበርካ፧

ኣእምሮ እንተ ኣልዩካስ፡ ንገረኒ።

⁵ነቲ ልክዓ ዝወሰነ መን እዩ፧ — ዒራ ትፈልጦ ኢኻ፡ —

ገመድ መለክዒ ኣብ ልዕሊኣ ዝዘርግሐኸ መን እዩ፧

^6-7ከዋኽብቲ ጽባሕ ሓቢሮም ከመስግኑ፡

ኲሎም ደቅ ኣምላክ እልል ክብሉ ኸለው፡

መሰረታ ኣብ ምንታይ ተሰረተ፧

ወይ እምኒ መኣዝና ዘቘመ መን ኰን ይኸውን፧

⁸ከም ካብ ከርሲ ወላዲቱ ጥሒሱ ምስ ወጸ፡

ንባሕርስ ደጌታቱ ዝዓጸወኸ መን እዩ፧

⁹ደበና ልብሱ ክኸውን፡

ድቕድቕ ጸልማት ድማ መጠቕለሊኡ ክኸውን ምስ ገበርኩ፡

¹⁰ዶብ ምስ ኣቘምኩሉ፡

መሽጐርን መዓጹን ምስ ገበርኩሉ፡

¹¹ክሳዕ ናብዚ ኽትመጽእ፡ ካብኡ ንንየው ኣይኰነን፡

እቲ ብርቱዕ ትዕቢት ማዕበላትካ

ኻብዚ ኣይክሓልፍን እዩ፡ በልኩ።

^12-13ንወሰናት ምድሪ ኽሕዞ እሞ፡

እቶም ረሲኣን ተደርብዮም ምእንቲ ኽወጹ፡

ካብ እትውለድ ጀሚርካስ፡ ንንግሆ ኣዚዝካዮ፡

ወይስ ንወጋሕታ ሰፍራኡ ሓቢርካሉዶ ትፈልጥ ኢኻ፧

¹⁴ንሳ ኸም ጭቃ ኣብ ትሕቲ ማሕተም ትልወጥ፡

ኲሉ ነገርውን ከም ልብሲ ይቐውም፡

¹⁵ሽዑ ንረሲኣን ብርሃኖም የግድፎም፡

እቲ ልዕል ዝበለ ቕልጽምውን ይስበር።

¹⁶ክሳዕ ምንጭታት ባሕሪዶ በጺሕካ፧

ኣብ ውሽጢ መዓሙቑከ ተመላሊስካዶ ትፈልጥ፧

¹⁷ደጌታት ሞትከ ተቐሊዑልካዶ፧

አረ ንደጌታት ድነ ሞትዶ ርኢኻ፧

¹⁸ንግፍሒ ምድሪኸ ኣስተብሂልካዮዶ፧

እዚ ዂሉ እትፈልጥ እንተ ዄንካስ፡ ተዛረብ።

^19-20ናብ ወሰኑ ኸተብጽሖ፡

ናብ ቤቱ እትወስድ መገዲውን ክትፈልጥሲ፡

እታ ናብ ማሕደር ብርሃን እትወስድ መገዲ ኣበይ ኣላ፧

ጸልማትከ ቦታኡ ኣበይ ኣሎ፧

²¹ሽዑ ይኣ ተወሊድካ ኔርካ ኢኻ፡

አረ ቑጽሪ መዓልትታትካ ብዙሕ እዩ እሞ፡

ንስኻ ትፈልጦ ኢኻ።

^22-23ናብቲ ንግዜ ጸበባ ንመዓልቲ ሰልፍን ውግእን

ክኸውን ኢለ ዝዓቘርክዎ

መዝገብ ውርጪዶ ኣቲኻ፧

ወይስ ነቲ መዝገብ በረድከ ርኢኻዮዶ ^፧

²⁴ኣብ ልዕሊ ምድሪ እታ ብርሃን ዝምቀለላ፡

ንፋስ ምብራቕ ዝዝርግሓላ መገድስ ኣየነይቲ እያ፧

^25-27ነታ ሰብ ዘይነብረላ ሃገር፡

ነቲ ሰብ ዘይብሉ በረኻ ምእንቲ ኸዝንመሉስ፡

ነቲ ምድሪ ኣጻምእን በረኻን ከርውዮ፡

ለምለም ሳዕሪ ምእንቲ ኸብቁል፡

ንፋሳሲ ዝናምሲ መትረብ ዘቃንዓሉ፡

ንበርቂ ነጐዳውን መገዲ ዝህቦ መን እዩ፧

²⁸ንዝናምዶ ኣቦ ኣልይዎ፧

ንነጠብጣብ ኣውሊ ዝወለዶኸ መን እዩ፧

²⁹በረድ ካብ ከርሲ መን እዩ ዝወጽእ፧

ንኣስሓይታ ሰማይከ ዝወለዶ መን እዩ፧

³⁰ማያት ከም እምኒ ዀይኑ ይስወር፡

ዝባን እቲ ዓሚቑውን ይረግእ።

³¹ንማእሰር እቶም ሾብዓተ ኸዋኽብቲ ኽትልቅሞ፡

ንኦሪዮን ካብ ማእሰሩ ኽትፈትሖዶ ይከኣለካ እዩ፧

³²ንናይ ማዛሮት ምልክት በብግዜኡ ኸተውጽኦ፡

ወይስ ንድቢ ምስቶም ደቃ ክትመርሓዶ ይከኣለካ እዩ፧

³³ንሕጋጋት ሰማይ ትፈልጦ ዲኻ፧

ንምልኩ ኣብ ልዕሊ ምድሪ እትምድቦኸ ንስኻ ዲኻ፧

³⁴ብዝሒ ማይ ምእንቲ ክኸድነካ፡

ንድምጽኻ ኽሳዕ ደበና ኸተልዕሎዶ ይከኣለካ እዩ፧

³⁵እኔና ኢሎምኻ ክኽዱስ፡

ንበርቅታት ክትልእኮምዶ ይከኣለካ እዩ፧

³⁶ንጥበብ ናብ ውሽጢ ዘንበራ መን እዩ፧

ወይስ ንልቢ ምስትውዓል ዝሃቦ መን እዩ፧

^37-38ሓመድ ተበጽቢጹ ምስ ዝረግእ፡

ደናኲል ብሓደ ምስ ዝጣበቑ፡

ንደበናታት ብጥበብ ዝቘጽሮም መን እዩ፧

ነሕርብቲ ሰማይ ዘፍስሶምከ መን እዩ፧

^39-40ንዋዕሮዶ ሃድን ተምጽኣላ፡

ነቶም ኣብ በዓትታት ለጥ ኢሎም፡

ኣብ ዱርውን ኣድብዮም ዝጸንሑ

ኰራዂር ኣንበሳኸ፡ ንጥሜቶምዶ ተጽግቦ ኢኻ፧

⁴¹ኳዂ፡ ጨጫውቱ ዝብላዕ ስኢኖም እናተመላለሱ፡

ናብ ኣምላኽ እንተ ተማህለሉ፡

ዝምግቦኸ መን እዩ፧

        መ. እዮብ  ምዕራፍ 39            

     ¹ነቲ ጤለ በዱ እትወልደሉ ግዜ ትፈልጦዶ፧

ነቲ እራብ ቅልውላው እትተሓዘሉ ግዜኸ

ተመልኪትካዮዶ ኣሎኻ፧

²ነቲ ምብጻሕ ኣዋርሐንዶ ትቘጽሮ፧

ነቲ ንሳተን ዝወልዳሉ ግዜስ ትፈልጦዶ ኢኻ፧

³ብርክኽ ኢለን ይወልዳ፡

ካብቲ ጻዕረን ከኣ ይዓርፋ።

⁴መሓስአን ይጥንክራ፡ ኣብ መሮር ይዓብያ፡

ይወጻ እሞ ናባታተን ኣይምለሳን፡

^5-6ነቲ ጸምጸም በረኻ ስፍራኡ፡

ምድሪ ጨው ከኣ ማሕደሩ ክኸውን ዝሃብክዎ

ኣድጊ በረኻ ሓራ ዘውጽአ መን እዩ፧

ነቲ ኣብ በረኻ ዀለል ዝብል ኣድግስ

መእሰሪኡ መን ፈትሓሉ፧

⁷ነቲ ናይ ከተማ ጫውጫው የባጭወሉ፡

ደሃይ ኰብኳቢውን ኣይሰምዕን።

⁸ነቲ ዝበልዓሉ ጎቦታት ይምልከቶ፡

ለምለም ዘለዎ ዂሉ ኸኣ ይደሊ።

⁹ጐባይከ ኽግዝኣካዶ ፍቓዱ እዩ፧

ኣብ ደምቤኻስ ይሓድረልካዶ፧

¹⁰ምእንቲ ኽትልመልካዶ ንጐባይ ብገመድ ትኣስሮ ኢኻ፧

ደድሕሬኻኸ ንለሴታትዶ ይጒልጒል እዩ፧

¹¹ሓይሉ ብርቱዕ ስለ ዝዀነዶ ኽትእመኖ፡

ወይስ ንዕዮኻዶ ኽትገድፈሉ ኢኻ፧

¹²እኽልኻ ክኸተልካ፡

ኣብ ዓውዲውን ክእክቦ ትኣምኖዶ ኢኻ፧

¹³ኣኽናፍ ሰገን ብሓጐስ የንገብግብ፡

ግናኸ ኣኽናፋን ክንቲታን ርሕሩሕዶ እዩ፧

¹⁴ንእንቋቑሖኣ ኣብ ምድሪ ተውድቖ፡

ኣብ ልዕሊ ሑጻውን ተሙቖ።

¹⁵እግሪ ኸይጭፍልቐለይ፡

ኣራዊትውን ከይረግጸለይ፡ ኢላ ኣይትዝክርን እያ።

^16-17ኣምላኽ ጥበብ ከሊእዋ፡

ምስትውዓልውን ኣይዓደላን እዩ እሞ፡

ንውሉዳ ኸም ዘይናታ ትጭክነሉ፡

ጻዕራ ኸንቱ ብምዃኑ ኣይትጒህን።

¹⁸ብድድ ኢላ ምስ ሸበበት፡

ንፈረስን ፈረሰኛን ትስሕቆም።

¹⁹ንፈረስ ሓይሉ ዝሃብካዮ

ንኽሳዱውን ዘውዘው ዝብል ጒንጒነ

ዘልበስካዮ ንስኻ ዲኻ፧

²⁰ከም ኣንበጣዶ ተሰራስሮ ኢኻ፧

ዕቡይ ኲርፍታኡ ዘሰምብድ እዩ።

²¹ኣብ ጐልጐል እናጸሕተረ ብሓይሉ ይሕጐስ፡

ምስ ኣጽዋር ክገጥም ይወጽእ።

²²ንፍርሃት የባጭዎ ኣይፈርህን ከኣ፡

ካብ ሰይፊውን ድሕር ኣይብልን እዩ።

²³ኣብ ልዕሊኡ ናይ ፍላጻ ጒልድባ፡

ቁልጭልጭ ዝብል ኲናትን ስሕለትን

ጭዋሕዋሕ ይብል።

²⁴እናፈጠነ ብዂራ ንምድሪ ይውሕጣ፡

መለኸት ክንፋሕ ከሎ፡ ኣይግታእን።

²⁵መለኸት ምስ ዝሰምዕ፡ ይሕምሕም፡

ንሰልፍን ንጭድርታ ሓላቑን ንወኻዕታ ሰራዊትን

ካብ ርሑቕ ይሽትቶ።

²⁶ሊላ ንላዕሊ ዝነፍር፡

ኣኽናፋውን ንደቡብ ኣቢሉ ዝዝርግሕከ ብጥበብካ ድዩ፧

²⁷ንስሪ ንላዕሊ ዝዓርግ፡

ቤቱውን ኣብ ላዕሊ ዝሰርሕከ ብትእዛዝካ ድዩ፧

²⁸ኣብ ከውሒ፡ ኣብ ጫፍ ከውሒ ይነብር፡

ኣብ ልዕሊ እምባ ይሓድር።

²⁹ኣብኡ ዀይኑ ዝዝረፍ የማዕዱ፡

ኣዒንቱ ኽሳዕ ርሑቕ ይጥምታ።

³⁰ጨጫውቱ ደም ይመጽዩ፡

ኣብቲ ቕቱላት ዘለውዎ ንሱ ኣብኡ ይርከብ።

        መ. እዮብ  ምዕራፍ 40            

     ¹እግዚኣብሄር ንእዮብ መለሰሉ በሎውን፡

²እቲ ወቓሲ ምስቲ ዂሉ ዝኽእልዶ ኽማጐት እዩ፧

እቲ ንኣምላኽ ዝግስጾ ሕጂ ይምለስ።

³ሽዑ እዮብ ንእግዚኣብሄር መለሰሉ በሎውን፡

⁴እንሆ፡ ኣነ ምናምን እየ፡ እንታይ ኢለኸ ኽመልሰልካ፧

ንኣፈይ ብኢደይ ሒዘያ እየ።

⁵ሓንሳእ ተዛሪበ ነይረ፡ ሕጂ ኸኣ ኣይክመልስን እየ፡

አረ ኽልተ ሳዕ፡ ግናኸ ኣይክደግምን እየ።

⁶ድማ እግዚኣብሄር ንእዮብካብ ህቦብላ ንፋስ ተዛረቦ

በሎውን፡

⁷ሰብኣይ ኩን፡ ሕቜኻ ተዓጠቕ፡

ኣነ ኽጥይቐካ እየ፡ ንስኻውን ምሃረኒ።

⁸ርእስኻ ምእንቲ ኸተጽድቕሲ፡

ንፍርደይዶ ኸንቱ ኽትገብሮ፡

ንኣይከ ኽትኲንነኒዶ ትደሊ ኣሎኻ፧

⁹ከም ናይ ኣምላኽ ዝዀነ ቕልጽምዶ ኣሎካ፧

ከምቲ ድምጹ ጌርካ ኽተንጐድጒድዶ ይከኣለካ እዩ፧

¹⁰እምበኣርስከ ኽብረትን ልዕልናን ተሰለም፡

ክብርን ግርማን ከኣ ልበስ።

¹¹ንውሒዝ ቁጥዓኻ ኣፍሲስካ፡

ንዕቡይ ዘበለ ዂሉ ጠሚትካ ኣዋርዶ።

¹²ንዕቡይ ዘበለስ ጠሚትካ ትሕት ኣብሎ፡

ንረሲኣንውን ኣብ ቦታቶም ርገጾም፡

¹³ንዂላዂሎም ኣብ ሓመድ ሕብኣዮም፡

አረ ንገጾም ኣብ ሕቡእ ስፍራ ዕጸዎ፡

¹⁴ሽዑ ኣነ ድማ፡ የማነይትኻ ተድሕነካ እያ፡

ኢለ ኽንእደካ እየ።

¹⁵ነቲ ምሳኻ ዝገበርክዎ ብህሞት እሞ ርኣዮ፡

ንሱ ኸም ብዕራይስ ሳዕሪ ይበልዕ፡

¹⁶እንሆ ድማ፡ ሓይሉ ኣብ ሕቜኡ፡

ምብርታዑ ኣብ ጭዋዳ ኸብዱ እዩ ዘሎ።

¹⁷ንጭራኡ ኸም ኦም ሊባኖስ ይዝርግሖ፡

ጅማውቲ ሰለፉ ጽኑዕ ትትዖ እዩ፡

¹⁸ኣዕጽምቱ ኸም ሻምብቶ ኣስራዚ እዩ፡

ኣካላቱ ኸም በትሪ ሓጺን እዩ።

¹⁹ንሱ ንኣምላኽ ኣውራ ፍጥረቱ እዩ፡

ፈጣሪኡ ኸኣ ሴፉ ሃቦ።

²⁰ኣኽራን ሳዕሪ የብቁለሉ እዩ እሞ፡

ኲለን እንስሳ መሮርውን ኣብኡ ይጻወታ።

²¹ኣብ ትሕቲ ጽላል ኣእዋም፡

ኣብ ሰንሰላን ጨፈቃን ተሓቢኡ ለጥ ይብል፡

²²ኣእዋም የጽልሎ፡ ናይ ወሓዚ ዕቦላት ይኸቦ።

²³ውሒዝ ብሓይሉ እንተ ተጀርበባ እኳ፡ ኣይሽበርን እዩ፡

ዮርዳኖስ ክሳዕ ኣፋ እንተ መልአውን፡ ህዱእ እዩ።

²⁴እናረኣየዶ ይተሓዝ እዩ፧

ንኣፍንጫኡ ኣንኲሉ ሰነቀ ዘእትወሉኸ መን እዩ፧

²⁵ንሌዋታን ብመቑለብዶ ትስሕቦ፧

ንመልሓሱ ብገመድ ትኣስሮዶ ኢኻ፧

²⁶ናብ ኣፍንጫኡ ሰንቀዶ ተእትወሉ፡

ንምንጋጋኡኸ ብእሾዂዶ ተንኲሎ ኢኻ፧

²⁷ብዙሕ ልማኖዶ ይልምነካ፧

ወይስ ብጥዑም ዘረባዶ ይዛረበካ እዩ፧

²⁸ንሓዋሩ ባርያኻ ኽትገብሮስ፡

ምሳኻዶ ኪዳን ይኣቱ እዩ፧

²⁹ከም ዑፍዶ መጻወቲ ትገብሮ ኢኻ፧

ወይስ ኣዋልድካ ምእንቲ ኽስሓቓሉዶ ትኣስሮ ኢኻ፧

³⁰ነጋዶ ይነግድዎ ድዮም፧

ኣብ ሞንጎ ሸቓጦኸ ይመቕልዎ ድዮም፧

³¹ንቘርበቱ ብዂናት፡

ንርእሱ ኸኣ ብመቓጥን ዓሳዶ ትመልኦ ኢኻ፧

³²እሲኪ ኢድካ ኣብ ልዕሊኡ ኣንብር፡

ነቲ ሰልፊ ኽትዝክሮ እሞ መሊስካ ኣይክትደግሞን ኢኻ።

        መ. እዮብ  ምዕራፍ 41            

     ¹እንሆ፡ ተስፋኡ ኸንቱ እዩ፡

ዝረኣዮ ዂሉ ኣብ ቅድሚኡ ይወድቕ።

²ንእኡ ክቕስቅሶ ዝደፍር የልቦን።

ኣብ ቅድመይ ዝቐውም ደኣ መን እዩ፧

³እቲ ቕድም ገለ ዝሃበኒ፡

ኣነውን ዝመልሰሉ፡ መን እዩ፧

ኣብ ትሕቲ ሰማይ ዘሎ ዂሉ ናተይ እዩ።

⁴ኣነ ብናይ ኣካላቱ፡ ብናይ ብርቱዕ ሓይሉ፡

ብናይ ምጽባቕ ኣገባብራኡ ስቕ ኣይክብልን እየ።

⁵ንጌጽ ክዳኑ ዝቐልዖ መን እዩ፧

ናብ መንጎ ኽልቲኤን ምንጋጋኡ መን ይኣቱ፧

⁶ንመዓጹ ገጹ ዝኸፍት መን እዩ፧

ኣብ ዙርያ ኣስናኑ ፍርሃት ኣሎ።

⁷እቶም ብርቱዓት ዋልታታቱ ትዕቢቱ እዮም፡

ከም ብጸቢብ ማሕተም እተጋጠሙ እዮም፡

⁸ንሓድሕዱ ተላጊቡ እዩ፡

ብመንጎኡ ንፋስ ኣይኣቱን።

⁹እቲ ሓደ ምስቲ ሓደ ግጡም እዩ፡

ንሓድሕዶም ይተሓሓዙ ኣይፋላለዩንውን እዮም።

¹⁰እንጥሾኡ ብርሃን የንጸባርቕ፡

ኣዒንቱ ኸም ናይ ወጋሕታ ቕርኒብ ዓይኒ እዩ።

¹¹ካብ ኣፋ ፋና ይወጽእ፡

ካብኡ ኸኣ ቁልዒ ሓዊ ይነጥር።

¹²ከም ካብ ዝገርር ድስትን ቁራዕን

ካብ ኣፍንጫኡ ትኪ ይወጽእ።

¹³ብእስትንፋሱ ንሕመት የንድዶ፡

ካብ ኣፉ ኸኣ ሃልሃልታ ይወጽእ።

¹⁴ኣብ ክሳዱ ሓይሊ ይሓድር፡

ኣብ ቅድሚኡ ፍርሃት ይሰራሰር።

¹⁵ክፍልታት ስጋኡ ግጡም እዩ፡

ኣብ ልዕሊኡ ጽኑዕ፡ ከቶ ዝይነቓነቕ እዩ።

¹⁶ልቡ ኸም እምኒ ተሪር እዩ፡

ከም እምኒ መጥሓን ከኣ ጽኑዕ እዩ።

¹⁷ንሱ እንተ ተንስአ፡ ጀጋኑ ይሽበሩ፡

ብሰሪ ፍርሃትሲ ልቦም ይጠፍኦም።

¹⁸ሰይፊ እንተ ወቕዖ፡ ኲናት ወይ ጩረ፡

ወይ መውግእ ኣንበሪ ዓሳ ከቶ ኣይጠቅምን እዩ።

¹⁹ንሱ ንሓጺን ከም ሓሰር፡

ነስራዚውን ከም በዂባዂ ዕጨይቲ ይቘጽሮ።

²⁰ፍላጻ ኣየህድሞን፡

እምኒ ወንጭፍን ከም ብርዒ ይዀኖ።

²¹ንጐመድ ከም ብርዒ እዩ ዝቘጽሮ፡

ንምውርዋር ኲናት ከኣ ይስሕቆ።

²²ኣብ ትሕቲ ኸብዱ በሊሕ ስሕለት ኣለዎ፡

ኣብ ጭቃ ኸኣ ኣሰር በላሕቲ ጫፍ ይሓድግ።

²³ንሱ ንመዓሙቑ ከም ድስቲ የፍልሖ፡

ንባሕሪ ድማ ከም ቁራዕ ቅዲት ይገብሮ።

²⁴ደድሕሪኡ እቲ መገዲ ይበርህ፡

እቲ መዓሙቑውን ሽበት ይመስል።

²⁵ንሱ ዘይፈርህ ኰይኑ ተፈጥረ እሞ፡

ኣብ ምድሪ ማዕሬኡ ዝኸውን ከቶ ኣይርከብን።

²⁶ንልዕል ዝበለ ዂሉ ንዒቑ ይጥምቶ።

ንብዘለው ደቂ ትዕቢት ከኣ ንጉሶም እዩ።

        መ. እዮብ  ምዕራፍ 42            

     ¹ሽዑ እዮብ ንእግዚኣብሄር ከምዚ ኢሉ መለሰሉ፡

²ኲሉ ኸም እትኽእል፡ ነቲ ዝመደብካዮ ኸኣ

ዝኽልክለካ ኸም ዘየልቦን፡ እፈልጥ ኣሎኹ።

³ብዘይ ፍልጠት ነቲ ምኽሪ ዘጸልምቶ መን እዩ፧

ስለዚ ኣነ ነቲ ዘየስተውዓልክዎ፡

ንኣይ እምብዛ ዘገርም ዝዀነ፡ ዘይፈልጦ ነገር ተዛረበ።

⁴ክዛረበካስ ስምዓኒ ዀታ፡

ኣነ ኽጥይቐካ፡ ንስኻውን ምሃረኒ።

⁵ብሰማዒት እዝኒ ብዛዕባኻ ሰሚዐ ነይረ፡

ሕጂ ግና ዓይነይ ርእያትካ።

⁶ስለዚ ንርእሰይ እፍንፍን ኣሎኹ፡

ኣብ ሓመድን ሓመዂስትን ኰይነ ኸኣ እንሳሕ ኣሎኹ።

     ⁷እግዚኣብሄር ንእዮብ እዚ ምስ ተዛረቦ፡ ንኤሌፋዝ ቴማናዊ በሎ፡

 ብዛዕባይ ከምቲ እዮብ ባርያይ ዝገበሮ ጌርኩም፡ ቅኑዕ ስለ ዘይተዛረብኩም፡ ኣባኻን ኣብ ክልቲኦም መሓዙትካን ኲራይ ተቓጺሉ እዩ። ⁸ሕጂ ኸኣ ሾብዓተ ዝራብዕን ሾብዓተ ድዑልን ሒዝኩም ናብ እዮብ ባርያይ ኪዱ እሞ ብናይ ርእስኹም መስዋእቲ ምሕራር ኣዕርጉ። እዮብ ባርያይ ክጽልየልኩም እዩ፡ ንእኡ ክቕበሎ እየ። ከም እዮብ ባርያይ ጌርኩም ብዛዕባይ ቅንዕና ስለ ዘይተዛረብኩም፡ ምእንታኡ ኢለ ኸምቲ ንዕሽነትኩም ዝግባእ ኣይክገብርን እየ። ⁹ሽዑ ኤሊፋዝ ቴማናዊ፡ ቢልዳድ ሹዋዊ፡ ሶፋር ናዕማዊ ኸይዶም ከምቲ እግዚኣብሄር ዝኣዘዞም ገበሩ። እግዚኣብሄር ከኣ ንእዮብ ተቐበሎ።
     ¹⁰እዮብ ምእንቲ ፈተውቱ ምስ ጸለየ፡ እግዚኣብሄር ንምርኮ እዮብ መለሶ፡ እግዚኣብሄር ከኣ ንእዮብ ኣብ ልዕሊ እቲ ቐደም ዝነበሮ ዕጽፊ ገይሩ ወሰኾ። ¹¹ኲሎም ኣሕዋቱን ኲላተን ኣሓቱን ብዘለው እቶም ቀደም ዝፈልጥዎ ዝነበሩ ድማ ናብኡ መጺኦም፡ ኣብ ቤቱ ምስኡ እንጌራ በልዑ፡ ስለቲ እግዚኣብሄር ዘውረደሉ ዂሉ መከራታት ከኣ ሓዘኑሉን ኣጸናንዕዎን። ነፍሲ ወከፎም ድማ ሓሓንቲ ብሩርን ቀቀለቤት ወርቅን ሃብዎ። ¹²እግዚኣብሄር ድማ ንእዮብ ካብቲ ቐዳማዩስ ነቲ ዳሕራዩ ኣብሊጹ ባረኸሉ። ንሱ ዓሰርተው ኣርባዕተ ሽሕ በጊዕ፡ ሹድሽተ ሽሕ ገመል፡ ሽሕ ጽምዲ ብዕራይ፡ ሽሕ ከኣ ኣንስተይቲ ኣድጊ ነበሮ። ¹³ሾብዓተ ኣወዳትን ሰለስተ ኣዋልድን ከኣ ነበርዎ። ¹⁴ነታ ቐዳመይቲ ይሚማ፡ ነታ ኻልኣይቲ ቅጺዓ፡ ነታ ሳልሰይቲ ቄርንሃጱኽ ኢሉ ሰመየን። ¹⁵ኣብ ኲላ እታ ሃገር እቲኣ ኸም ኣዋልድ እዮብ ዝበላ መልክዐኛታት ኣይነበራን። ኣቦአን ድማ ርስቲ ምስቶም ኣሕዋተን ኣውረሰን። ¹⁶ድሕሪዚ ድማ እዮብ ሚእትን ኣርብዓን ዓመት ጸንሐ፡ ደቁን ደቂ ደቁን ከኣ ክሳዕ ኣርባዕተ ወለዶ ረኣየ። ¹⁷ድሕሪዚ እዮብ ሸምጊሉ ዕድመ ጸጊቡ ሞተ። ።