ኦሪት ዘሁልቁ

1  2  3  4  5  6  7  8  9
10  11  12   13  14  15
16  17  18  19  20  21
22  23  24  25  26  27
28  29  30  31  32  33
34  35  36

ዘሁልቁ ምዕራፍ 1

   ¹ካብ ምድሪ ግብጺ ኻብ ዝወጹ ኣብ ካልአይቲ ዓመት፡ ኣብታ ኻልአይቲ ወርሒ ብቐዳመይቲ መዓልቲ፡ እግዚኣብሄር ኣብ በረኻ ሲና፡ ኣብ ድንኳን ምርኻብ፡ ንሙሴ ኸምዚ ኢሉ ተዛረቦ፡²በብዓሌቶምን በብማይ ቤት ኣቦታቶምን ተባዕታይ ዘበለ ነንርእሲ ኸም ቁጽሪ ስሞም ናይ ብዘሎ ኣኼባ ደቂ እስራኤል ቁጽሪ ውሰድ።³ንስኻን ኣሮንን፡ ኣብ እስራኤል ንዘለዉ ዅሎም ካብ ወዲ ዕስራ ዓመት ንላዕሊ ናብ ውግእ ክወጹ ዝኽእሉ በብሰራዊቶም ቁጸሮም።⁴ኣብ ማይ ቤት ኣቦታቱ ዋና ዝኸውን ከካብ ነገር ሓደ ሰብ ምሳኻትኩም ይኹን።⁵እቶም ምሳኻትኩም ደው ዝብሉ ሰባት ድማ ስሞም እዚ እዩ፡ ካብ ሮቤል፡ ኤሉጹር ወዲ ሸዴውር።⁶ካብ ስምኦን፡ ሸሉሚኤል ወዲ ጹሪሻዳይ”⁷ካብ ይሁዳ፡ ነኣሶን ወዲ ኣሚናዳብ።⁸ካብ ይሳኮር፡ ናትናኤል ወዲ ጹዓር።⁹ካብ ዛብሎን፡ ኤልያብ ወዲ ሐሎን።¹⁰ካብ ደቂ ዮሴፍ፡ ካብ ኤፍሬም፡ ኤሊሻማዕ ወዲ ዓሚሁድ። ካብ ምናሴ፡ ገማልኤል ወዲ ጳዳህጹር።¹¹ካብ ብንያም፡ ኣቢዳን ወዲ ጊድዖኒ።¹²ካብ ዳን፡ ኣሒዔዘር ወዲ ዓሚሻዳይ።¹³ካብ ኣሴር፡ ጳግዒኤል ወዲ ዖክራን።¹⁴ካብ ጋድ፡ ኤልያሳፍ ወዲ ድዑኤል።¹⁵ካብ ንፍታሌም፡ ኣሒራዕ ወዲ ዔናን።¹⁶እቶም ካብቲ ኣኼባ እተጸውዑ፡ ሹማምቲ ነገዳት ኣቦታቶም እዚኣቶም እዮም። ንሳቶም ሓላቑ ኣሽሓት እስራኤል ነበሩ።
   ¹⁷ሙሴን ኣሮንን ድማ ነዞም በብስሞም እተጸውዑ ሰባት ወሰዱ።¹⁸ኣብታ ኻልአይቲ ወርሒ ብቐዳመይቲ መዓልቲ ንብዘሎ እቲ ኣኼባ ኣከቡ፡ ካብ ወዲ ዕስራ ዓመት ንላዕሊ ዘሎ በብዓሌቶም፡ በብማይ ቤት ኣቦታቶም፡ ነንርእሲ፡ በብስሞም ተቘጺሮም ተጻሕፉ።¹⁹ከምቲ እግዚኣብሄር ንሙሴ ዝኣዘዞ፡ ኣብ በረኻ ሲና ቘጸሮም።
   ²⁰ወለዶ ደቂ ሮቤል በዅሪ እስራኤል፡ በብዓሌቶም፡ በብማይ ቤት ኣቦታቶም፡ ነንርእሲ በብስሞም እተቘጽሩ፡ ካብ ወዲ ዕስራ ዓመት ንላዕሊ፡ ናብ ውግእ ዝወጹ ዅሎም ተባዕትዮ፡²¹እቶም ካብ ነገድ ሮቤል እተቘጽሩ ኣርብዓን ሹድሽተን ሽሕን ሓሙሽተ ሚእትን ኰኑ።
   ²²ወለዶ ደቂ ስምኦን በብዓሌቶም፡ በብማይ ቤት ኣቦታቶም፡ ነንርእሲ፡ በብስሞም እተቘጽሩ፡ ካብ ወዲ ዕስራ ዓመት ንላዕሊ ናብ ውግእ ዝወጹ ዅሎም ተባዕትዮ፡²³እቶም ካብ ነገድ ስምኦን እተቘጽሩ፡ ሓምሳን ትሽዓተን ሽሕን ሰለስተ ሚእትን ኰኑ።
   ²⁴ወለዶ ደቂ ጋድ በብዓሌቶም፡ በብማይ ቤት ኣቦታቶም፡ በብስሞም እተቘጽሩ፡ ካብ ወዲ ዕስራ ዓመት ንላዕሊ ናብ ውግእ ዝወጹ ዅሎም፡²⁵እቶም ካብ ነገድ ጋድ እተቘጽሩ፡ ኣርብዓን ሓሙሽተን ሽሕን ሹድሽተ ሚእትን ሓምሳን ኰኑ።
   ²⁶ወለዶ ደቂ ይሁዳ በብዓሌቶም፡ በብማይ ቤት ኣቦታቶም፡ በብስሞም እተቘጽሩ፡ ካብ ወዲ ዕስራ ዓመት ንላዕሊ ናብ ውግእ ዝወጹ ዅሎም፡²⁷እቶም ካብ ነገድ ይሁዳ እተቘጽሩ፡ ስብዓን ኣርባዕተን ሽሕን ሽዱሽተ ሚእትን ኰኑ።²⁸ወለዶ ደቂ ይሳኮር በብዓሌቶም፡ በብማይ ቤት ኣቦታቶም፡ በብስሞም እተቘጽሩ፡ ካብ ወዲ ዕስራ ዓመት ንላዕሊ ናብ ውግእ ዝወጹ ኵሎም፡²⁹እቶም ካብ ነገድ ይሳኮር እተቔጽሩ፡ ሓምሳን ኣርባዕተን ሽሕን ኣርባዕተ ሚእትን ኰኑ።
   ³⁰ወሎዶ ደቂ ዛብሎን በብዓሌቶም፡ በብ ማይ ቤት ኣቦታቶም፡ በብስሞን እተቘጽሩ፡ ካብ ወዲ ዕስራ ዓመት ንላዕሊ ናብ ውግእ ዝወጹ ዅሎም፡³¹እቶም ካብ ነገድ ዛብሎን እተቘጽሩ፡ ሓምሳን ሾብዓተን ሽሕን ኣርባዕተ ሚእትን ኰኑ።³²ደቂ ዮሴፍ፡ ወለዶ ደቂ ኤፍሬም በብዓሌቶም፡ በብማይ ቤት ኣቦታቶም፡ በብስሞም እተቘጽሩ፡ ካብ ወዲ ዕስራ ዓመት ንላዕሊ ናብ ውግእ ዝወጹ ዅሎም፡³³እቶም ካብ ነገድ ኤፍሬም እተቘጽሩ፡ ኣርብዓ ሽሕን ሓሙሽተ ሚእትን ኰኑ።
   ³⁴ወለዶ ደቂ ምናሴ በብዓሌቶም፡ በብማይ ቤት ኣቦታቶም፡ በብስሞም እተቘጽሩ፡ ካብ ወዲ ዕስራ ዓመት ንላዕሊ ናብ ውግእ ዝወጹ ዅሎም፡³⁵እቶም ካብ ነገድ ምናሴ እተቘጽሩ፡ ሰላሳን ክልተን ሽሕን ክልተ ሚእትን ኰኑ።³⁶ወለዶ ደቂ ብንያም በብዓሌቶም፡ በብማይ ቤት ኣቦታቶም፡ በብስሞም እተቘጽሩ፡ ካብ ወዲ ዕስራ ዓመት ንላዕሊ ናብ ውግእ ዝወጹ ዅሎም።³⁷እቶም ካብ ነገድ ብንያም እተቘጽሩ፡ ሰላሳን ሓሙሽተን ሽሕን ኣርባዕተ ሚእትን ኰኑ።
   ³⁸ወለዶ ደቂ ዳን በብዓሌቶም፡ በብማይ ቤት ኣቦታቶም፡ በብስሞም እተቘጽሩ፡ ካብ ወዲ ዕስራ ዓመት ንላዕሊ ናብ ውግእ ዝወጹ ዅሎም፡³⁹እቶም ካብ ነገድ ዳን እተቘጽሩ፡ ስሳን ክልተን ሽሕን ሾብዓተ ሚእትን ኰኑ።
   ⁴⁰ወለዶ ደቂ ኣሴር በብዓሌቶም፡ በብማይ ቤት ኣቦታቶም፡ በብስሞም እተቘጽሩ፡ ካብ ወዲ ዕስራ ዓመት ንላዕሊ ናብ ውግእ ዝወጹ ዅሎም፡⁴¹እቶም ካብ ነገድ ኣሴር እተቘጽሩ፡ ኣርብዓን ሓደን ሽሕን ሓሙሽተ ሚእትን ኰኑ።
   ⁴²ወለዶ ደቂ ንፍታሌም በብዓሌቶም፡ በብማይ ቤት ኣቦታቶም፡ በብስሞም እተቘጽሩ፡ ካብ ወዲ ዕስራ ዓመት ንላዕሊ ናብ ውግእ ዝወጹ ዅሎም፡⁴³እቶም ካብ ነገድ ንፍታሌም እተቘጽሩ፡ ሓምሳን ሰለስተን ሽሕን ኣርባዕተ ሚእትን ኰኑ።
   ⁴⁴እቶም እተቘጽሩ፡ ሙሴን ኣሮንን እቶም ዓሰርተው ክልተ ሰባት መሳፍንቲ እስራኤልን ዝቘጸርዎም እዚኣቶም እዮም፡ ንሳቶም ሓሓደ ነናይ ማይ ቤት ኣቦታቱ እዮም።⁴⁵እሞ ካብ ደቂ እስራኤል በብማይ ቤት ኣቦታቶም እተቘጽሩ ዝዀኑ ዅሎም፡ ካብ ወዲ ዕስራ ዓመት ንላዕሊ ኣብ እስራኤል ናብ ውግእ ዝወጹ ዅሎም፡⁴⁶እቶም እተቘጽሩ ዅሎም ሹድሽተ ሚእትን ሰለስተን ሽሕን ሓሙሽተ ሚእትን ሓምሳን ኰኑ።
   ⁴⁷ሌዋውያን ግና ብነገድ ኣቦታቶም ምሳታቶም ኣይተቘጽሩን።⁴⁸እግዚኣብሄር ንሙሴ ኸምዚ ኢሉ ተዛሪብዎ ነበረ እሞ፡⁴⁹ንነገድ ሌዊ ጥራይ ኣይትቑጸሮም፡ ቁጽሮም ድማ ምስቶም ደቂ እስራኤል ኣይትጸብጽቦ።⁵⁰ንሌዋውያን ግና ንስኻ ኣብ ልዕሊ ማሕደር ምስክርን ኣብ ልዕሊ ዅሉ ኣቓሑኡን ኣብ ልዕሊ ናቱ ዘበለ ዅሉን ኣመዝዞም። ንሳቶም ነቲ ማሕደርን ንዅሉ ኣቓሑኡን ይጹሩ። ንእኡ ኸኣ ንሳቶም የገልግሉ፡ ኣብ ዙርያ እቲ ማሕደር ድማ ይስፈሩ።⁵¹እቲ ማሕደር ምስ ዝነቅል፡ ሌዋውያን የውርድዎ። እቲ ማሕደር ምስ ዝሰፍር ከኣ፡ ሌዋውያን ይትከልዎ። ጓና እንተ ቐረቦ ድማ፡ ይሙት።⁵²እቶም ደቂ እስራኤል ከኣ ነፍሲ ወከፍ ኣብ ሰሰፈሩ፡ ነፍሲ ወከፍ ድማ ኣብ ሰሰንደቕ ዕላማኡ መምስ ሰራዊቶም ይስፈሩ።⁵³ሌዋውያን ግና ናብ ኣኼባ ደቂ እስራኤል ቁጥዓ ምእንቲ ኸይከውንሲ፡ ኣብ ዙርያ ማሕደር ምስክር ይስፈሩ። ሌዋውያን ከኣ ነቲ ማሕደር ምስክር ይሓልውዎ።
   ⁵⁴ደቂ እስራኤል ድማ ከምኡ ገበሩ፡ ከምቲ እግዚኣብሄር ንሙሴ ዝኣዘዞ ዅሉ ገበሩ።

ዘሁልቁ ምዕራፍ 2

   ¹እግዚኣብሄር ድማ ንሙሴን ንኣሮንን ከምዚ ኢሉ ተዛረቦም፡²ደቂ እስራኤል ነፍሲ ወከፍ ኣብ ጠጥቓ ሰንደቕ ዕላማኡን ኣብ ነናይ ማይ ቤት ኣቦታቶም ምልክትን ይስፈሩ። ኣብ መንጽር ድንኳን ምርኻብ ብዙርያኡ ይስፈሩ።
   ³እቶም ኣብ ቅድሚት ብሸነኽ ምብራቕ ዝሰፍሩ፡ ከም ሰራዊቶም ሰንደቕ ዕላማ ሰፈር ይሁዳ ይኹን። ሹም ደቂ ይሁዳ ድማ ነኣሶን ወዲ ኣሚናዳብ እዩ።⁴ሰራዊቱን እቶም ቁጹራቶምን ሰብዓን ኣርባዕተን ሽሕን ሹድሽተ ሚእትን ነበሩ።⁵ምስኡ ገጢሞም ዝሰፍሩ ኸኣ ነገድ ይሳኮር ይኹኑ። ሹም ደቂ ይሳኮር ድማ ናትናኤል ወዲ ጹዓር እዩ።⁶ሰራዊቱን እቶም ቁጽራቱን ሓምሳን ኣርባዕተን ሽሕን ኣርባዕተ ሚእትን ነበሩ።⁷ነገድ ዛብሎን ከኣ፡ ሹም ደቂ ዛብሎን ኤልያብ ወዲ ሔሎን እዩ።⁸ሰራዊቱን እቶም ቁጹራቱን ሓምሳን ሾብዓተን ሽሕን ኣርባዕተ ሚእትን ነበሩ።⁹እቶም ቁጹራት ሰፈር ይሁዳ ዅሎም ከም ሰራዊቶም ሚእትን ሰማንያን ሹድሽተን ሽሕን ኣርባዕተ ሚእትን ነበሩ። እዚኣቶም ቅድሚት ይጐዓዙ።
   ¹⁰ሰንደቕ ዕላማ ሰፈር ሮቤል፡ ከም ሰራዊቶም ብሸነኽ ደቡብ ይኹን። ሹም ደቂ ሮቤል ከኣ ኤሊጹር ወዲ ሸደውር እዩ፡¹¹ሰራዊቱን እቶም ቑጹራቱን ኣርብዓን ሹድሽተን ሽሕን ሓሙሽተ ሚእትን ነበሩ።¹²ምስኡ ገጢሞም ዝሰፍሩ ኸኣ ነገድ ስምኦን ይኹኑ፡ ሹም ደቂ ስምኦን ደቂ ሸሉሚኤል ወዲ ጹሪሻዳይ እዩ።¹³ሰራዊቱን እቶም ቁጹራቶምን ሓምሳን ትሽዓተን ሽሕን ሰለስተ ሚእትን ነበሩ።¹⁴ነገድ ጋድ ድማ፡ ሹም ደቂ ጋድ ኤልያሳፍ ወዲ ረዑኤል እዩ።¹⁵ሰራዊቱን እቶም ቁጹራቶምን ኣርብዓን ሓሙሽተን ሽሕን ሹድሽተ ሚእትን ሓምሳን ነበሩ።¹⁶እቶም ቁጽራት ሰፈር ሮቤል ኲሎም ከም ሰራዊቶም ሚእትን ሓምሳን ሓደን ሽሕን ኣርባዕተ ሚእትን ሓምሳን ነበሩ። እዚኣቶም ካልኣይ ሰልፊ ዀይኖም ይጐዓዙ።
   ¹⁷ድሕሪኡ ድማ እቲ ድንኳን ምርኻብ ምስ ሰፈር ሌዋውያን ኣብ መንጎ እቲ ሰፈራት ይጐዓዝ። ከምቲ ኣሰፋፍራኦም ከምኡ ኸኣ ነፍሲ ወከፍ ኣብ ሰስፍራኡ መምስ ሰንደቕ ዕላማኦም ይጐዓዙ።
   ¹⁸ሰንደቕ ዕላማ ሰፈር ኤፍሬም ከም ሰራዊቶም ብሸነኽ ምዕራብ ይኹን። ሹም ደቂ ኤፍሬም ድማ ኤሊሻማዕ ወዲ ዓሚሁድ እዩ።¹⁹ሰራዊቱን እቶም ቁጽራቶምን ኣርብዓ ሽሕን ሓሙሽተ ሚእትን ነበሩ።²⁰ምስኡ ገጢሙ ኸኣ ነገድ ምናሴ፡ ሹም ደቂ ምናሴ ድማ ገማልኤል ወዲ ጳዳህጹር እዩ፡²¹ሰራዊቱን እቶም ቁጹራቱን ሰላሳን ክልተን ሽሕን ክልተ ሚእትን ነበሩ።²²ድማ ነገድ ብንያም፡ ሹም ደቂ ብንያም ከኣ ኣቢዳን ወዲ ጊዴዖኒ እዩ፡²³ሰራዊቱን እቶም ቁጽራቶምን ሰላሳን ሓሙሽተን ሽሕን ኣርባዕተ ሚእትን ነበሩ።²⁴እቶም ቁጹራት ሰፈር ኤፍሬም ኲሎም ከም ሰራዊቶም ሚእትን ሾሞንተን ሽሕን ሓደ ሚእትን እዮም። እዚኣቶም ሳልሳይ ሰልፊ ዀይኖም ይጐዓዙ።
   ²⁵ሰንደቕ ዕላማ ሰፈር ዳን ከም ሰራዊቶም ብሸነኽ ሰሜን ይኹን። ሹም ደቂ ዳን ኣሒዔዘር ወዲ ዓሚሻዳይ እዩ፡²⁶ሰራዊቱን እቶም ቁጹራቶምን ስሳን ክልተን ሽሕን ሾብዓተ ሚእትን ነበሩ።²⁷ምስኡ ገጢሞም ዝሰፍሩ ድማ ነገድ ኣሴር ይኹኑ። ሹም ደቂ ኣሴር ከኣ ጳግዔል ወዲ ዖክራን እዩ።²⁸ሰራዊቱን እቶም ቁጹራቶምን ኣርብዓን ሓደን ሽሕን ሓሙሽተ ሚእትን ነበሩ።²⁹ነገድ ንፍታሌም ድማ፡ ሹም ደቂ ንፍታሌም ኣሒራዕ ወዲ ዔናን እዩ።³⁰ሰራዊቱን እቶም ቁጹራቶምን ሓምሳን ሰለስተን ሽሕን ኣርባዕተ ሚእትን ነበሩ።³¹እቶም ቁጹራት ሰፈር ዳን ኲሎም ሚእትን ሓምሳን ሾብዓተን ሽሕን ሹድሽተ ሚእትን ነበሩ። እዚኣቶም ምስ ሰንደቕ ዕላማኦም ደጀን ኰይኖም ይጐዓዙ።
   ³²እቶም ካብ ደቂ እስራኤል በብማይ ቤት ኣቦታቶም እተቘጽሩ እዚኣቶም እዮም። እቶም ኣብ ሰፈር በብሰራዊቶም እተቘጽሩ ዅሎም ሹድሽተ ሚእትን ሰለስተ ሽሕን ሓሙሽተ ሚእትን ሓምሳን እዮም።³³ሌዋውያን ግና ከምቲ እግዚኣብሄር ንሙሴ ዝኣዘዞ፡ ኣብ መንጎ ደቂ እስራኤል ኣይተቘጽሩን።
   ³⁴ደቂ እስራኤል ድማ ከምቲ እግዚኣብሄር ንሙሴ ዝኣዘዞ ዅሉ ገበሩ፡ ከምኡ በብሰንደቕ ዕላማኦም ሰፈሩ፡ ከምኡ ድማ ነፍሲ ወከፍ በብዓሌቶም፡ በብማይ ቤት ኣቦታቶም ተጓዓዙ።

ዘሁልቁ ምዕራፍ 3

   ¹በታ እግዚኣብሄር ኣብ ከረን ሲና እተዛረበላ መዓልቲ፡ ወለዶ ኣሮንን ሙሴን እዚ እዩ።²ስም ደቂ ኣሮን እዚ እዩ፡ ናዳብ እቲ በዅርን ኣቢሁን ኣልኣዛርን ኢታማርን።³ስም እቶም እተቐብኡ ኻህናት፡ ንኽህነት ዝቐደሶም ደቂ ኣሮን እዚ እዩ።⁴ናዳብን ኣቢሁን ከኣ ኣብ በረኻ ሲና ናብ ቅድሚ እግዚኣብሄር ጋሻ ሓዊ ምስ ኣቕረቡ፡ ኣብ ቅድሚ እግዚኣብሄር ሞቱ፡ ውሉድ ከኣ ኣይነበርዎምን። ኣልኣዛርን ኢታማርን ድማ ኣብ ቅድሚ ኣቦኦም ኣሮን ብኻህነት የገልግሉ ነበሩ።
   ⁵እግዚኣብሄር ከኣ ንሙሴ ኸምዚ ኢሉ ተዛረቦ፡⁶ንነገድ ሌዊ ናብዚ ኣቕርቦ፡ ምእንቲ ኸገልግልዎ ኣብ ቅድሚ ኣሮን ካህን፡ ደው ኣብሎም።⁷በቲ ዕዮ ኣገልግሎት ማሕደር ኣብ ቅድሚ ድንኳን ምርኻብ መዙን መዚ ዅሉ እቲ ኣኼባን ይሓልዉ።⁸ኲሉ ኣቕሓ ድንኳን ምርኻብን መዚ ደቂ እስራኤልን ኣብ ዕዮ ኣገልግሎት ማሕደር ይሓልዉ።⁹ሌዋውያን ንኣሮንን ንደቁን ሃቦም፡ ንሳቶም ካብ ደቂ እስራኤል ብመልኦም ንእኡ ተወፍዮም እዮም።¹⁰ንኣሮንን ንደቁን ድማ እቲ ናይ ክህነቶም ክሕልዉ ኣመዝዞም። ጓና እንተ ቐረበ ኸኣ ይሙት።
   ¹¹እግዚኣብሄር ድማ ንሙሴ ኸምዚ ኢሉ ተዛረቦ፡¹²እንሆ፡ ኣነ ኣብ ክንዲ እቶም ኣብ ደቂ እስራኤል ማሕጸን ዝኸፈተ ዅሉ በዅሪ ንሌዋውያን ካብ ማእከል ደቂ እስራኤል ወሲደዮም እየ እሞ፡ ሌዋውያን ንኣይ ይኹኑ።¹³በዅሪ ዝዀነ ዅሉ ንኣይ እዩ እሞ፡ በታ ንዅሉ በዅሪ ሃገር ግብጺ ዝወቓዕኩላ መዓልቲ፡ ሰብ ኰነ፡ እንስሳ ዀነ፡ ኲሉ በዅሪ ኣብ እስራኤል፡ ንኣይ ቀዲሰዮ እየ፡ ንኣይ ይኹኑ። ኣነ እግዚኣብሄር እየ።
   ¹⁴እግዚኣብሄር ድማ ንሙሴ ኣብ በረኻ ሲና ኸምዚ ኢሉ ተዛረቦ፡¹⁵ንደቂ ሌዊ በብማይ ቤት ኣቦታቶምን በብዓሌቶምን ቁጸሮም። ካብ ወዲ ወርሒ ንላዕሊ ዘሎ ዅሉ ተባዕታይ ቁጸሮም።
   ¹⁶ሙሴ ድማ ከምቲ ቓል እግዚኣብሄር፡ ከምቲ ንሱ ዝኣዘዞ ገይሩ ቘጸሮም።¹⁷ደቂ ሌዊ በብስሞም እዚኣቶም እዮም፡ ጌርሾንን ቃሃትን መራሪን።¹⁸ስም ደቂ ጌርሾን ድማ በብዓሌቶም እዚ እዩ፡ ሊብኒን ሺምዒን።¹⁹ደቂ ቃሃት ድማ በብዓሌቶም፡ ኣምራምን ይጽሃርን ሔብሮንን ዑዚኤልን እዮም።²⁰ደቂ መራሪ ድማ በብዓሌቶም፡ ማሕሊን ሙሺን እዮም። ዓሌታት ሌዋውያን በብማይ ቤት ኣቦታቶም እዚኣቶም እዮም።
   ²¹ካብ ጌርሾን ዓሌት ሊብናውያንን ዓሌታት ሺምዓውያንን እዮም፡ እዚኣቶም ዓሌታት ጌርሾናውያን እዮም።²²ቁጽሪ እቶም ካብ ወዲ ወርሒ ንላዕሊ ዘለዉ ቁጹራት ተባዕትዮ፡ እቶም ቁጹራቶም ሾብዓተ ሽሕን ሓሙሽተ ሚእትን እዮም።²³ዓሌታት ጌርሾናውያን ብድሕሪ ማሕደር ብሸነኽ ምዕራብ ይስፈሩ።²⁴ሹም ማይ ቤት ኣቦ ጌርሾናውያን ኤልያሳፍ ወዲ ላኤል እዩ።²⁵ሓለዋ ደቂ ጌርሾን ኣብ ድንኳን ምርኻብ ድማ ነቲ ማሕደርን መኽደኒኡን መደረብታኡን መጋረጃ ኣፍ ድንኳን ምርኻብን።²⁶መጋረጃታት ኣጸድን መጋረጃ ኣፍ ደገ እቲ ኣብ ዙርያ ማሕደርን መሰውእን ዘሎ ኣጸድን ኣግማድን ናይ ኲሉ ኣገልግሎት እዩ።
   ²⁷ካብ ቃሃት ድማ ዓሌት ኣምራማውያንን ዓሌት ይጽሃራውያንን ዓሌት ሔብሮናውያንን ዓሌት ዑዚኤላውያንን እዮም፡ እዚኣቶም ዓሌታት ቃሃታውያን እዮም።²⁸እቶም ሓለዋ መቕደስ ዝሕልዉ ዝነበሩ ኻብ ወዲ ወርሒ ንላዕሊ ዘለዉ ዅሎም ተባዕትዮ ምስ ተቘጽሩ፡ ሾሞንተ ሽሕን ሹድሽተ ሚእትን ኰኑ።²⁹ዓሌታት ደቂ ቃሃት ንማሕደር ብሸነኽ ደቡቡ ይስፈሩ።³⁰ሹም ማይ ቤት ኣቦ ዓሌታት ቃሃታውያን ድማ ኤሊጻፋን ወዲ ዑዚኤል እዩ።³¹ሓለዋኦም ድማ ታቦታትን ሰደቓን ቀዋሚ ቐንዴልን መሰውኢታትን ንመቕደስ ዘገልግሉሉ ዅሉ ኣቓሑን እቲ መጋረጃን ናይ ኲሉ ኣገልግሎቱን እዩ።³²ሹም ሹማምቲ ሌዋውያን ከኣ ኣልኣዛር ወዲ ኻህን ኣሮን እዩ። ንሱ ነቶም ሓለዋ መቕደስ ዝሕልዉ፡ ገበዞም ይኹን።
   ³³ካብ መራሪ፡ ዓሌት ማህላውያንን ዓሌት ሙሻውያንን እዮም፡ እዚኣቶም ዓሌታት መራሪ እዮም።³⁴ካብ ወዲ ወርሒ ንላዕሊ ዘለዉ ዅሎም ተባዕትዮ ምስ ተቘጽሩ፡ እቶም ቁጽራቶም ሹድሽተ ሽሕን ክልተ ሚእትን ኰኑ።³⁵ሹም ማይ ቤት ኣቦ ዓሌታት መራሪ፡ ጹሪኤል ወዲ ኣቢሓይል እዩ። ንሳቶም ንማሕደር ብሸነኽ ሰሜኑ ይስፈሩ።³⁶እተመዘዝዋ ሓለዋ ደቂ መራሪ ድማ ንኣልዋሕ ማሕደርን ጋድማቱን ኣዕኑዱን ኣእጋሩን ኲሉ ኣቓሑኡን ናይ ኲሉ ኣገልግሎቱን፡³⁷ኣዕኑድ እቲ ኣጸድ ብዙርያኡን ኣእጋሩን ሽኻውልቱን ኣግማዱን እዩ።
   ³⁸እቶም ኣብ መንጽር ማሕደር ብምብራቑ፡ ኣብ ቅድሚ ድንኳን ምርኻብ፡ ብሸነኽ ምውጻእ ጸሓይ ዝሰፍሩ፡ ሙሴን ኣሮንን ደቁን እዮም። ንሳቶም ነቲ ሓለዋ ደቂ እስራኤል ኣብ መቕደስ ዝሕሎ ይሕልዉ ነበሩ። ጓና ናብኡ እንተ ቐረበ ኸኣ ይሙት።
   ³⁹እቶም እተቘጽሩ ዅሎም ሌዋውያን፡ ሙሴን ኣሮንን ብትእዛዝ እግዚኣብሄር በብዓሌቶም ዝቘጸርዎም፡ ካብ ወዲ ወርሒ ንላዕሊ ዘለዉ ዅሎም ተባዕትዮ ዕስራን ክልተን ሽሕ ኰኑ።
   ⁴⁰እግዚኣብሄር ድማ ንሙሴ በሎ፡ ኲሎም ተባዕትዮ በዅሪ ደቂ እስራኤል ካብ ወዲ ወርሒ ንላዕሊ ንዘለዉ ቑጸር፡ ቁጽሪ ስሞም ድማ ውሰድ።⁴¹ኣነ እግዚኣብሄር እየ፡ ንሌዋውያን ኣብ ክንዲ ዅሎም በዅሪ ኣብ ደቂ እስራኤል፡ ማል ሌዋውያን ድማ ኣብ ክንዲ በዅሪ ማል ደቂ እስራኤል ንኣይ ውሰዶም።
   ⁴²ሙሴ ድማ፡ ከምቲ እግዚኣብሄር ዝኣዘዞ ንዅሉ በዅሪ ኣብ ደቂ እስራኤል ቈጸረ።⁴³ካብ ወዲ ወርሒ ንላዕሊ ዘሎ ዅሉ በዅሪ ተባዕታይ በብስሞም እተቘጽሩ፡ ቁጹራቶም ዕስራን ክልተን ሽሕን ክልተ ሚእትን ሰብዓን ሰለስተን ኰኑ።
   ⁴⁴እግዚኣብሄር ድማ ንሙሴ ኸምዚ ኢሉ ተዛረቦ፡⁴⁵ንሌዋውያን ኣብ ክንዲ ዅሉ በዅሪ ኣብ ደቂ እስራኤል፡ ማል ሌዋውያን ድማ ኣብ ክንዲ ማሎም ውሰድ፡ ሌዋውያን ናተይ ይኹኑ። ኣነ እግዚብሄር እየ።⁴⁶በጃ እቶም ክልተ ሚእትን ሰብዓን ሰለስተን በዅሪ ደቂ እስራኤል፡ ካብ ቁጽሪ ሌዋውያን ዝሓለፉ ኸኣ፡⁴⁷ነንርእሲ ሓሙሽተ ሲቃል ውሰድ፡ ብሲቃል መቕደስ ውሰድ፡ ሲቃል ዕስራ ጌራ እዩ።⁴⁸ናይቶም ሕልፊ ዝዀኑ ኸኣ ገንዘብ በጃ ንኣሮንን ንደቁን ሃቦም።⁴⁹ሙሴ ድማ ካብቶም ብሌዋውያን እተበጀዎም ሕልፊ ዝዀኑ፡ ገንዘብ በጃ ወሰደ።⁵⁰ካብ በዅርታት ደቂ እስራኤል ብሲቃል መቕደስ ሽሕን ሰለስተ ሚእትን ስሳን ሓሙሽተን ሲቃል ገንዘብ ወሰደ።⁵¹ሙሴ ድማ ከምቲ ቓል እግዚኣብሄር፡ ከምቲ እግዚኣብሄር ንሙሴ ዝኣዘዞ፡ እቲ ገንዘብ በጃ ንኣሮንን ንደቁን ሃቦም።

ዘሁልቁ ምዕራፍ 4

   ¹እግዚብሄር ድማ ንሙሴን ንኣሮንን ከምዚ ኢሉ ተዛረቦም፡^2-3ካብ ማእከል ደቂ ሌዊ ንደቂ ቃሃት በብዓሌቶምን በብማይ ቤት ኣቦታቶምን ካብ ወዲ ሰላሳ ዓመት ንላዕሊ ክሳዕ ወዲ ሓምሳ ዓመት ናብ ዕዮ ኽኣትዉ ዝኽእሉ ዅሎም፡ ኣብ ዕዮ ድንኳን ምርኻብ ከገልግሉ።⁴ኣገልግሎት ደቂ ቃሃት ኣብ ድንኳን ምርኻብ ብናይ ቅድስተ ቅዱሳን ነገር እዚ እዩ፡⁵እቲ ሰፈር ምስ ዝነቅል፡ ኣሮንን ደቁን ኣትዮም፡ ነቲ ዝጋርድ መጋረጃ የውርድዎ፡ ነቲ ታቦት ምስክር ብእኡ ይኽደንዎ፡⁶ኣብ ልዕሊኡ ድማ ቈርበት ታሃስ ይግበሩሉ፡ ኲለንትናኡ ሰማያዊ ዝዀነ ዓለባ ኸኣ ይዘርግሑሉ፡ መሰላታቱውን የእትዉሉ።⁷ኣብ ልዕሊ ሰደቓ እንጌራ ምርኣይ ድማ ሰማያዊ ዓለባ ይዘርግሑሉ፡ ኣብኡ ኸኣ ሒላባትን ጭሔሎታትን ጽውኣትን እቲ ንመስዋእቲ መስተ ዝኸውን ኲስኲስትታትውን ይስርዑ፡ እቲ ናይ ውርትግ እንጌራ ኸኣ ኣብ ልዕሊኡ ይኹን።⁸ኣብ ልዕሊ እዚ ድማ ግምጃ ይዘርግሑሉ፡ ንእኡ ኸኣ ብቘርበት ታሃስ እተገብረ መኽደኒ ገይሮም ይኽደንዎ፡ እቲ መሰላታቱውን የእትዉሉ።⁹ሰማያዊ ዓለባ ወሲዶም ከኣ፡ ነቲ ቐዋሚ ቐንዴልን ቅልዒ ቐነዲሉን መሳቐዪኡን መዋህለል ርስሓቱን እቲ ዅሉ ዘገልግሉሉ፡ ናይ ዘይቲ ኣቓሑኡ ኸኣ ይኽደኑ።¹⁰ምስ ኲሉ ኣቓሑኡ ድማ ኣብ ውሽጢ ሓደ መኽደኒ ናይ ታሃስ ቈርበት የንብርዎ፡ ኣብ መሰላ ኸኣ ይግበርዎ።¹¹ኣብ ልዕሊ እቲ መሰውኢ ወርቂውን ሰማያዊ ዓለባ ይዘርግሑ፡ መኽደኒ ድማ ብቘርበት ታሃስ ይኽደንዎ፡ መሰላታቱ ኸኣ የእትዉሉ።¹²ኣብ ቤተ መቕደስ ዘገልግሉሉ ዅሉ ኣቓሑ ኣገልግሎት ወሲዶም ድማ ኣብ ሰማያዊ ዓለባ ይግበርዎ፡ መኽደኒ ኸኣ ብቘርበት ታሃስ ይኽደንዎ፡ ኣብ መሰላውን ይግበርዎ።¹³ነቲ ሓመዅስቱ ድማ ካብ መሰውኢ ይጕሓፍዎ፡ ቀይሕ ዓለባ ኸኣ ይዘርግሑሉ።¹⁴እቲ ዘገልግሉሉ ዅሉ ኣቓሑኡ ኸኣ፡ ጽንሃታትን ሻኳታትን መጽሓርያታትን ጭሔሎታትን፡ ኲሉ ኣቓሑ መሰውኢ ኣብ ልዕሊኡ ይግበርዎ፡ ኣብ ልዕሊኡ ድማ መኽደኒ ቘርበት ታሃስ ይዘርግሑሉ፡ መሰላታቱ ኸኣ የእትዉሉ።
   ¹⁵ኣሮንን ደቁን ምኽዳን መቕደስን ኲሉ ኣቓሑ መቕደስን ምስ ፈጸሙ፡ እቲ ሰፈር ድማ ምስ ዝነቅል፡ ድሕርዚ ደቂ ቃሃት ክጾሩ ይምጽኡ። ከይሞቱ ግና፡ ነቲ ቅዱስ ነገር ኣይተንክይዎ። ናይ ድንኳን ምርኻብ ጾር ደቂ ቃሃት እዚ እዩ።
   ¹⁶መዚ ኣልኣዛር፡ ወዲ ኻህን ኣሮን፡ ኣብቲ ንቐዋሚ ቐንዴል ዝኸውን ዘይትን ኣብቲ ምኡዝ ዕጣንን ኣብቲ ናይ ወርትግ መስዋእቲ ብልዕን ዘይቲ ቕብኣትን፡ ኣብ ብዘሎ ማሕደርን ኣብኡ ዘሎ ዅሉን፡ ኣብ መቕደስን ኣብ ኣቓሑኡን ይኹን።
   ¹⁷እግዚኣብሄር ድማ ንሙሴን ንኣሮንን ከምዚ ኢሉ ተዛረቦም፡¹⁸ነገድ ዓሌታት ቃሃታውያን ካብ መንጎ ሌዋውያን ኣይተጥፍእዎም።¹⁹ናብ ናይ ቅድስተ ቅዱሳን ነገር ምስ ዝቐርቡ፡ ከይሞቱ፡ ብህይወት ደኣ ኽነብሩ፡ እዚ ግበረሎም፡ ኣሮንን ደቁን ኣትዮም ንነፍሲ ወከፎም ኣኣገልግሎቱን ጸጾሩን የመልክትዎም።²⁰ግናኸ ከይሞቱ፡ ነቲ ቅዱስ ነገር ቅጽበት ዓይኒ እኳ እንተ ዀነ፡ ንምርኣዩ ኣይእተዉ።
   ²¹እግዚኣብሄር ድማ ንሙሴ ኸምዚ ኢሉ ተዛረቦ፡²²ደቂ ጌርሾን ከኣ በብማይ ቤት ኣቦታቶምን በብዓሌቶምን ቁጽሮም ውሰድ።²³ካብ ወዲ ሰላሳ ዓመት ንላዕሊ ኽሳዕ ወዲ ሓምሳ ዓመት፡ ንዕዮ ዝበቕዑ፡ ኣብ ዕዮ ድንኳን ምርኻብ ከገልግሉ ዝኽእሉ ዅሎም ቁጸሮም።²⁴እቲ ኣገልግሎት ዓሌታት ጌርሾናውያን ንምግልጋልን ንምጽዋርን እዚ እዩ፡²⁵እቲ ዓለባታት ማሕደርን ድንኳን ምርኻብን መኽደኒኡን፡ እቲ ኣብ ልዕሊኡ ዝድረብ ቈርበት ታሃስን፡ እቲ መጋረጃ ኣፍ ድንኳን ምርኻብን፡²⁶እቲ መጋረጃታት ኣጸድን መጋረጃ ኣፍ ደገ እቲ ኣብ ዙርያ ማሕደርን መሰውእን ዘሎ ኣጸድን ኣግማዱን ኲሉ ኣቓሑ ኣገልግሎቶምን ይጹሩ፡ ናይቲ ብኣታቶም ዝግበር ኲሉ ብእኡ የገልግሉ።²⁷ናይ ደቂ ጌርሾናውያን ኲሉ ጾርን ኲሉ ዕዮኦምን ብዅሉ ኣገልግሎቶም ከምቲ ትእዛዝ ኣሮንን ደቁን ይኹን። ብጾሮም ዘበለ ዅሉ ኽሓልዩ ኣመዝዝዎም።²⁸ኣገልግሎት ዓሌታት ደቂ ጌርሾናውያን ኣብ ድንኳን ምርኻብ እዚ እዩ፡ እቲ ሓለዋኦም ድማ ኣብ ትሕቲ ኢድ ኢታማር ወዲ ኻህን ኣሮን ይኹን።
   ²⁹ንደቂ መራሪ ኸኣ በብዓሌቶም በብማይ ቤት ኣቦታቶም ቁጸሮም።³⁰ካብ ወዲ ሰላሳ ዓመት ንላዕሊ ኽሳዕ ወዲ ሓምሳ ዓመት ዘለዉ፡ ኣብ ዕዮ ድንኳን ምርኻብ ከገልግሉ ንዝኣትዉ ዅሎም ቁጸሮም።³¹ሓለዋ ጾሮም ብዅሉ ኣገልግሎቶም ኣብ ድንኳን ምርኻብ እዚ እዩ፡ ኣልዋሕ ማሕደርን ጋድማቱን ኣዕኑዱን ኣእጋሩን፡³²ኣዕኑድ እቲ ብዙርያ ዘሎ ኣጸድን ኣእጋሩን ሽካውልቱን ኣግማዱን ስም ኲሉ ኣቓሑኡን ምስቲ ዝዓዩሉ ዘበለ ዅሉን፡ እቲ ዝሕልውዎን ዝጾርዎን ኣቓሑ በብስሙ ቑጸርዎ።³³እቲ ኣገልግሎት ዓሌታት ደቂ መራሪ እዚ እዩ። ኲሉ ኣገልግሎቶም ኣብ ድንኳን ምርኻብ ኣብ ትሕቲ ኢድ ኢታማር ወዲ ኻህን ኣሮን ይኹን።
   ^34-35ሙሴን ኣሮንን እቶም ሹማምቲ እቲ ኣኼባን ድማ ንደቂ ቃሃታውያን በብዓሌቶምን በብማይ ቤት ኣቦታቶምን፡ ካብ ወዲ ሰላሳ ዓመት ንላዕሊ ኽሳዕ ወዲ ሓምሳ ዓመት ንዘለዉ፡ ኣብ ዕዮ ድንኳን ምርኻብ ከገልግሉ ንዝኣትዉ ዅሎም ቈጸርዎም።³⁶እቶም ካባታቶም በብዓሌቶም እተቘጽሩ ኽልተ ሽሕን ሾብዓተ ሚእትን ሓምሳን ኰኑ።³⁷እቶም ካብ ዓሌታት ቃሃታውያን እተቘጽሩ ኣብ ድንኳን ምርኻብ ዘገልግሉ ዅሎም፡ ሙሴን ኣሮንን ብትእዛዝ እግዚኣብሄር ብኢድ ሙሴ ዝቘጸርዎም እዚኣቶም እዮም።
   ³⁸እቶም ካብ ደቂ ጌርሾን በብዓሌቶምን በብማይ ቤት ኣቦታቶምን እተቘጽሩ ድማ፡³⁹ካብ ወዲ ሰላሳ ዓመት ንላዕሊ ኽሳዕ ወዲ ሓምሳ ዓመት ዘለዉ፡ ኣብ ዕዮ ድንኳን ምርኻብ ከገልግሉ ዝኣትዉ ዅሎም፡⁴⁰እቶም በብዓሌቶምን በብማይ ቤት ኣቦታቶምን ካባታቶም እተቘጽሩ፡ ክልተ ሽሕን ሹድሽተ ሚእትን ሰላሳን ኰኑ።⁴¹እቶም ካብ ዓሌታት ደቂ ጌርሾን እተቘጽሩ ኣብ ድንኳን ምርኻብ ዘገልግሉ ዅሎም ሙሴን ኣሮንን ብትእዛዝ እግዚኣብሄር ዝቘጸርዎም እዚኣቶም እዮም።
   ⁴²እቶም ካብ ዓሌታት ደቂ መራሪ በብዓሌቶምን በብማይ ቤት ኣቦታቶምን እተቘጽሩ ድማ፡⁴³ካብ ወዲ ሰላሳ ዓመት ንላዕሊ ኽሳዕ ወዲ ሓምሳ ዓመት ዘለዉ፡ ኣብ ዕዮ ድንኳን ምርኻብ ከገልግሉ ዝኣትዉ ዅሎም፡⁴⁴እቶም በብዓሌቶም ካባታቶም እተቘጽሩ ሰለስተ ሽሕን ክልተ ሚእትን ኰኑ።⁴⁵እቶም ካብ ዓሌታት ደቂ መራሪ እተቘጽሩ፡ ከምቲ እግዚኣብሄር ብኢድ ሙሴ ዝኣዘዞ፡ ሙሴን ኣሮንን ዝቘጸርዎም፡ እዚኣቶም እዮም።
   ⁴⁶እቶም እተቘጽሩ ዅሎም ሌዋውያን፡ ሙሴን ኣሮንን እቶም ሹማምቲ እስራኤልን በብዓሌቶምን በብማይ ቤት ኣቦታቶምን ዝቘጸርዎም፡⁴⁷ካብ ወዲ ሰላሳ ዓመት ንላዕሊ ኽሳዕ ወዲ ሓምሳ ዓመት ዘለዉ፡ ኣብቲ ዝዕየ ዕዮ ኸገልግሉ፡ ድማ ኣብ ድንኳን ምርኻብ ብምጽዋር ከገልግሉ ዝኣትዉ ዅሎም፡⁴⁸እቶም ካባታቶም እተቘጽሩ ሾሞንተ ሽሕን ሓሙሽተ ሚእትን ሰማንያን ኰኑ።⁴⁹ከም ትእዛዝ እግዚኣብሄር ብኢድ ሙሴ ነፍሲ ወከፍ ነንኣገልግሎቱን ነንጾሩን ተቘጽሩ፡ ከምቲ እግዚኣብሄር ንሙሴ ዝኣዘዞ ተቘጽሩ።

ዘሁልቁ ምዕራፍ 5

   ¹እግዚኣብሄር ድማ ንሙሴ ኸምዚ ኢሉ ተዛረቦ፡²ንዅሉ ለምጻምን ንዅሉ ጀጋልን ብሬሳ ንዝረኸሰ ዅሉን ካብ ሰፈር ከውጽኡ ንደቂ እስራኤል ኣዝዞም።³ተባዕታይ ኰነ ኣንስተይቲ ኣውጽእዎም፡ ነቲ ኣብ ማእከሉ ዝሓድሮ ዘሎኹ ሰፈሮም ከየርክሱ፡ ናብ ወጻኢ ሰፈር ኣውጽእዎም።⁴ደቂ እስራኤል ድማ ከምኡ ገበሩ፡ ናብ ወጻኢ ሰፈር ኣውጽእዎም፡ ከምቲ እግዚኣብሄር ንሙሴ ዝበሎ፡ ደቂ እስራኤል ከምኡ ገበሩ።
   ⁵እግዚኣብሄር ድማ ንሙሴ ኸምዚ ኢሉ ተዛረቦ፡⁶ንደቂ እስራኤል በሎም፡ ሰብኣይ ወይ ሰበይቲ፡ ሰብ ካብ ዝገብሮ ሓጢኣት ኲሉ ብምግባሩ ንእግዚኣብሄር ምስ ዘዕግብ፡ እታ ነፍሲ እቲኣ በዳሊት ኰነት፡⁷ሽዑ በቲ ዝገበርዎ ሓጢኣቶም ይናዘዙ፡ እቲ ዝበደሎ ብመልኡ ይምለሶ ኣብ ልዕሊኡ ድማ ሕምሻኡ ይወስኽ፡ ነቲ ዝበደሎ ኸኣ ይሃቦ።⁸እቲ እተበደለ ነቲ ዝምለሶ ገንዘብ ዝወርሶ ዘይብሉ እንተ ዀነ፡ እቲ ዝምለስ ገንዘብ ናይ እግዚኣብሄር እዩ፡ ብጀካ እቲ ንሱ ዝዕረቐሉ ድዑል መተዓረቒ ንኻህን ይኹን።⁹ኲሉ ዝለዓል መስዋእቲ ደቂ እስራኤል ካብ ኲሉ ቅዱስ ነገር ናብ ካህን ዘምጽእዎ ንእኡ ይኹን።¹⁰ዝዀነ ሰብ ዝቐደሶ ነገር ንእኡ ይኹን፡ ሰብ ንኻህን ዝህቦ ዘበለ ንእኡ ይኹን።
   ¹¹እግዚኣብሄር ድማ ንሙሴ ኸምዚ ኢሉ ተዛረቦ፡¹²ንደቂ እስራኤል ተዛረቦም በሎም ከኣ፡ ንሰብኣይ ሰበይቱ እንተ ጠለመቶ፡ ዓገብ ከኣ እንተ ዓገበቶ፡¹³ካልእ ሰብኣይ ምስኣ ደቂሱ ድማ ብስጋ እንተ ተራኸባ፡ እዚ ኸኣ ካብ ዓይኒ ሰብኣያ እንተ ተኸወለ፡ ብሕቡእ እንተ ረኸሰት፡ ምስክር ድማ እንተ ዘይተረኽባ፡ ኣብቲ ግብሪውን እንተ ዘይተታሕዘት፡¹⁴መንፈስ ቅንኣት ድማ እንተ መጾ፡ ንሳ ብምርካሳ ኸኣ ብሰበይቱ እንተ ቐንአ፡ ወይ ንሳ ኽይረኸሰት ከላ፡ መንፈስ ቅንኣት እንተ መጾ፡ ብሰበይቱ ድማ እንተ ቐንአ፡¹⁵ሽዑ እቲ ሰብኣይ ነታ ሰበይቱ ናብ ካህን የምጽኣያ፡ ብዛዕባኣ ኸኣ ዓስራይ ኢድ ኤፋ ሓርጭ ስገም ንመስዋእቲ የምጽእ። ናይ ቅንኣት መስዋእቲ ብልዒ፡ ክፍኣት ዘዘክር መስዋእቲ ብልዒ እዩ እሞ፡ ዘይቲ ኣይከዓዎ፡ ዕጣንውን ኣይገበሮ።¹⁶እቲ ኻህን ድማ ኣቕሪቡ ኣብ ቅድሚ እግዚኣብሄር ደው የብላ።¹⁷እቲ ኻህን ድማ ብኣቕሓ መሬት ገይሩ ቅዱስ ማይ ይውሰድ፡ ካብቲ ኣብ ምድርቤት ማሕደር ዘሎ ሓመድ ወሲዱ ኸኣ ኣብቲ ማይ ይግበር።¹⁸እቲ ኻህን ነታ ሰበይቲ ኣብ ቅድሚ እግዚኣብሄር ደው ኣቢሉ ድማ ርእሲ እታ ሰበይቲ ይቕላዕ፡ ነቲ መስዋእቲ ብልዒ ምዝካር፡ ንሱ ኸኣ ናይ ቅንኣት መስዋእቲ ብልዒ፡ ኣብ ኢዳ የንብሮ። እቲ ኻህን ከኣ ነቲ መርገም ዘምጽእ መሪር ማይ ኣብ ኢዱ ይሓዝ።¹⁹እቲ ኻህን ድማ የምሕላ፡ ነታ ሰበይቲ ኸኣ ይበላ፡ ሰብኣይ እንተ ዘይደቀስኪ፡ ኣብ ትሕቲ ሰብኣይኪ ኸሎኺ ጠሊምክዮ ዘይረኸስኪ እንት ዄንኪ፡ እዚ መርገም ዘምጽእ መሪር ማይ ኣይጕዳእኪ።²⁰ኣብ ትሕቲ ሰብኣይኪ ኸሎኺ ጠሊምክዮ ረኺስኪ እንተ ዄንኪ ግና፡ ብጀካ ሰብኣይኪ ኻልእ እንተ ደቂሱኪ፡²¹ሽዑ እቲ ኻህን ነታ ሰበይቲ ብማሕላ መርገም የምሕላ፡ እቲ ኻህን ድማ ነታ ሰበይቲ፡ እግዚኣብሄር ንሰለፍኪ ብምውዳቑ፡ ንኸብድኺ ድማ ብምንፋሑ፡ እግዚኣብሄር ኣብ ማእከል ህዝብኺ መራገምን መምሓልን ይግበርኪ፡²²ንኸብድኺ ኽነፍሕ ንሰለፍኪ ኸኣ ከውድቕ፡ እዚ መርገም ዘምጽእ ማይ እዚ ናብ ውሽጥኺ ይእቶ፡ ይበላ። እታ ሰበይቲ ድማ፡ ኣሜን ኣሜን፡ ትበል።²³እቲ ኻህን ከኣ ነዚ መርገም እዚ ኣብ መጽሓፍ ይጽሓፎ፡ በቲ መሪር ማይ ከኣ ይደምስሶ።²⁴ነታ ሰበይቲ ኸኣ እቲ መርገም ዘምጽእ መሪር ማይ የስትያ፡ እቲ መርገም ዘምጽእ ማይ ድማ ይኣትዋ እሞ ክመራ እዩ።²⁵እቲ ኻህን ድማ ነቲ ናይ ቅንኣት መስዋእቲ ብልዒ ኻብ ኢድ እታ ሰበይቲ ይውሰዶ፡ ነቲ መስዋኣቲ ብልዒ ኸኣ ኣብ ቅድሚ እግዚብሄር ይወዝውዞ፡ ናብ መሰውኢውን የቕርቦ።²⁶እቲ ኻህን ድማ ካብቲ መስዋእቲ ብልዒ ንመዘከርታ ምሉእ ኢድ ወሲዱ ኣብ መሰውኢ የሕርሮ፡ ድሕሪ እቲ ነታ ሰበይቲ እቲ ማይ የስትያ።²⁷ነቲ ማይ ምስ ኣስተያ ኸኣ፡ ክኸውን እዩ፡ ንሳ ረኺሳ፡ ንሰብኣያ ድማ ዓገብ ዓጊባቶ እንተ ዀይና፡ እቲ መርገም ዘምጽእ ማይ ኣትዩ ኽመራ እዩ፡ ከብዳ ኸኣ ይንፋሕ፡ ሰለፋውን ይወድቕ፡ እታ ሰበይቲ ኣብ ማእከል ህዝባ መራገሚ ትኸውን።²⁸እታ ሰበይቲ ዘይረኸሰት፡ ንሳ ንጽህቲ እንተ ዀይና ኸኣ፡ ሓራ ውጽእቲ እያ፡ ዘርኢ ኸኣ ትረክብ።
   ²⁹ሕጊ ቕንኣት እዚ እዩ፡ ሰበይቲ ኣብ ትሕቲ ሰብኣያ ኸላ ጠሊማቶ ምስ እትረክስ፡³⁰ወይ ንሰብኣያ መንፈስ ቅንኣት እንተ መጾ፡ ብሰበይቱ ኸኣ እንተ ቐንኣ፡ ሽዑ ነታ ሰበይቲ ኣብ ቅድሚ እግዚኣብሄር ደው የብላ፡ እቲ ኻህን ድማ እዚ ሕጊዚ ብዘሎ ይግበረላ።³¹እቲ ሰብኣይ ከኣ ካብ ክፍኣት ንጹህ ይኸውን፡ እታ ሰበይቲ እቲኣ ድማ ክፍኣታ ትጸውር፡

ዘሁልቁ ምዕራፍ 6

   ¹እግዚኣብሄር ድማ ንሙሴ ኸምዚ ኢሉ ተዛረቦ፡²ንደቂ እስራኤል ተዛረቦም በሎም ከኣ፡ ሰብኣይ ኰነ ወይ ሰበይቲ ናዝራዊ ክኸውን ንእግዚኣብሄር ክፍለ እንተ ተመባጽዔ፡³ካብ ወይንን ካብ ዘስክር መስተን ይፈለ፡ ዝመጸጸ ወይኒ ዀነ ወይ ዝመጸጸ ዘስክር መስተ ኣይስተ፡ ገለ ኻብ ወይኒ እተጸምቈ ኣይስተ፡ ካብ ወይኒ ድማ ብሰዊቱ ዀነ ወይ ብንቑጹ ኣይብላዕ።⁴ብዅለን መዓልትታት ናዝራዊነቱ ፍሬኡ ዀነ ገፈሉ ዀነ፡ ገለ ኻብ ኦም ወይኒ ኣይብላዕ።⁵ብዅለን መዓልታት መብጽዓ ናዝራዊነቱ መላጸ ናብ ርእሱ ኣይሕለፍ፡ እተን ንእግዚኣብሄር እተፈልየለን መዓልትታት ክሳዕ ዝመልኣ፡ ቅዱስ ይኹን፡ ጸጕሪ ርእሱ ኸኣ የንውሕ።⁶በተን ንእግዚኣብሄር እተፈልየለን ኲለን መዓልትታት ናብ ምዉት ሰብ ኣይእቶ።⁷ናዝራዊነቱ ንኣምላኽ ኣብ ርእሱ እዩ እሞ፡ በቦኡን በዲኡን ብሓዉን ብሓብቱን ብሞቶም ኣይርከስ።⁸ብዅለን መዓልትታት ናዝራዊነቱ ንሱ ንእግዚኣብሄር እተቐደሰ እዩ።⁹ብድንገት ኣብ ጥቓኡ ሰብ እንተ ሞተ እሞ ርእሲ ናዝራዊነቱ እንተረኸሰ፡ በታ ዝነጽሃላ መዓልቲ ርእሱ ይላጺ፡ ብሳብዐይቲ መዓልቲ ይላጽዮ።¹⁰ኣብ ሳምነይቲ መዓልቲ ድማ ክልተ ባሬቶ ወይ ክልተ ናኣሽቱ ርግቢ ናብ ኣፍ ድንኳን ምርኻብ ናብ ካህን የምጽእ።¹¹እቲ ኻህን ድማ እታ ሓንቲ ንመስዋእቲ ሓጢኣት እታ ኻልኣይቲ ኸኣ ንዝሓርር መስዋእቲ ይሰውእ። ካብቲ በቲ ምዉት ዝገበሮ ሓጢኣት የተዓርቆ፡ በታ መዓልቲ እቲኣ ኸኣ ርእሱ ይቐድስ።¹²መዓልትታት ናዝራዊነቱ ንእግዚኣብሄር ይፍለ፡ ንመስዋእቲ በደል ድማ ገንሸል ዓመት የምጽእ። እቲ ናዝራዊነቱ ስለ ዝረኸሰ፡ እተን ቀዳሞት መዓልትታት ከንቱ ዀና።
   ¹³ሕጊ ናዝራዊ ኸኣ እዚ እዩ፡ መዓልትታት ናዝራዊነቱ ምስ መልኣ፡ ናብ ኣፍ ድንኳን ምርኻብ የምጽእዎ።^14-15መስዋእቱ ድማ ንዝሓርር መስዋእቲ ጐደሎ ዘይብሉ ገንሸል ዓመት፡ ንመስዋእቲ ሓጢኣት ድማ ጐደሎ ዘይብላ ሽበን ዓመት፡ ንመስዋእቲ ምስጋናውን ጐደሎ ዘይብሉ ድዑል፡ ሓደ መሶብ ካብ ድኹም ሓርጭ ብዘይቲ እተቘምጥዐ፡ ዘይበዅዔ ቕጫታትን፡ ዘይቲ እተለኸየ ዘይበዅዐ ረቀቕቲ ቕጫታትን ምስኡ ኸኣ መስዋእቲ ብልዕን መስዋእቲ መስተን ንእግዚኣብሄር የቕርበሉ።¹⁶እቲ ኻህን ከኣ ናብ ቅድሚ እግዚብሄር የቕርቦ፡ ንመስዋእቲ ሓጢኣቱን ንዝሓርር መስዋእቱን ይሰውኣዮ።¹⁷ነቲ ድዑል ድማ ምስቲ ዘይበዅዐ መሶብ እንጌራ ንእግዚኣብሄር መስዋእቲ ምስጋና ይሰውኣዮ። እቲ ኻህን መስዋእቲ ብልዕን መስዋእቲ መስተን ከኣ ይሰውእ።¹⁸እቲ ናዝራዊ ድማ ነቲ ርእሲ ናዝራዊነቱ ኣብ ኣፍ ድንኳን ምርኻብ ይላጽዮ። ነቲ ጸጕሪ ርእሲ ናዝራዊነቱ ወሲዱ ኸኣ ናብቲ ትሕቲ መስዋእቲ ምስጋና ዘሎ ሓዊ የእትዎ።¹⁹ነቲ ናዝራዊነቱ ምስ ላጸየ ድማ፡ እቲ ኻህን ነታ ዝበሰለት ኢድ ድዑል ይውሰድ። ካብቲ መሶብ ከኣ ሓደ ዘይበዅዐ ቕጫን ሓደ ዘይበዅዐ ረቂቕ ቅጫን ገይሩ ኣብ ኢድ እቲ ናዝራዊ የንብር።²⁰እቲ ኻህን ድማ ኣብ ቅድሚ እግዚኣብሄር ንመስዋእቲ ምውዝዋዝ ይወዝውዞ። እዚ ምስቲ ዝውዝወዝ ሓኸለን ዝለዓል እግርን ነቲ ኻህን ይቀደስ። ድሕርዚ እቲ ናዝራዊ ወይኒ ይስተ።²¹ብጀካ እቲ ኣብ ኢዱ ዝረኸቦ፡ ሕጊ እቲ እተመባጽዐ ናዝራውን ናይ ናዝራዊነት መስዋእቱ ንእግዚኣብሄርን እዚ እዩ። ከምቲ ሕጊ ናዝራዊነቱ፡ ከምቲ እተመባጽዖ መብጾዓ ኸምኡ ይግበር።
   ²²እግዚኣብሄር ድማ ንሙሴ ኸምዚ ኢሉ ተዛረቦ፡²³ንኣሮንን ንደቁን ከምዚ ኢልካ ተዛረቦም፡ ንደቂ እስራኤል ከምዚ ኢልኩም ባርኽዎም፡²⁴እግዚኣብሄር ይባርኽካን ይሓሉኻን።²⁵እግዚኣብሄር ገጹ የብርሃልካ፡ ጸጋ ኸኣ ይሃብካ።²⁶እግዚኣብሄር ገጹ ይምለሰልካ፡ ሰላም ድማ ይሃብካ።²⁷ከምዚ ገይሮም ስመይ ኣብ ደቂ እስራኤል የንብሩ፡ ኣነ ከኣ ክባርኾም እየ።

ዘሁልቁ ምዕራፍ 7

   ¹ኰነ ኸኣ፡ ሙሴ በታ ነቲ ማሕደር ተኺሉ ዝፈጸመላ መዓልቲ ንእኡን ንዅሉ ኣቓሑኡን ምስ ቀብኦን ምስ ቀደሶን፡ ነቲ መሰውእን ንዅሉ ኣቓሑኡ ድማ ምስ ቀብኦን ምስ ቀደሶን፡²እቶም ሹማምቲ እስራኤል፡ ዋናታት ማይ ቤት ኣቦታቶም፡ ንሳቶም ሹማምቲ እቶም ነገዳት፡ ንሳቶም ኣብ ልዕሊ እቶም ቁጹራት ዝነበሩ፡ ይሃብ ኣቕረቡ፡³ህያቦም ሹድሽተ ኽዱናት ሰረገላን ዓሰርተው ክልተ ብዕራይን ናብ ቅድሚ እግዚኣብሄር ኣምጽኡ፡ ንኽልተ ሹም ሓደ ሰረገላ፡ ንነፍሲ ወከፍ ሹም ሓደ ብዕራይ፡ ናብ ቅድሚ ማሕደር ኣቕረብዎ።⁴እግዚኣብሄር ድማ ንሙሴ ኸምዚ ኢሉ ተዛረቦ፡⁵ኣብ ኣገልግሎት ድንኳን ምርኻብ ንመዕየዪ ኪኸውን ካባታቶም ውሰዶ፡ ንሱ ኸኣ ንሌዋውያን ንነፍሲ ወከፍ ከከምቲ ኣገልግሎቱ ሃቦም።⁶ሙሴ ድማ እቲ ሰረገላታትን እቶም ኣብዑርን ወሲዱ ንሌዋውያን ሃቦም።⁷ንደቂ ጌርሾን ከም መጠን ኣገልግሎቶም ክልተ ሰረገላን ኣርባዕተ ብዕራይን ሃቦም።⁸ንደቂ መራሪ ኸኣ ከም መጠን ኣገልግሎቶም ብትሕቲ ኢድ ኢታማር ወዲ ኻህን ኣሮን፡ ኣርባዕተ ሰረገላን ሾሞንተ ብዕራይን ሃቦም።⁹ንደቂ ቃሃት ግና፡ እቲ ኣገልግሎቶም ኣብ መቕደስ ኣብ መንኩቦም ብምጽዋር ነበረ እሞ፡ ገለ ኣይሃቦምን።
   ¹⁰እቶም ሹማምቲ ኸኣ ንምቕዳስ እቲ መሰውኢ በታ እተቐብኣላ መዓልቲ ህያብ ኣቕረቡ፡ እቶም ሹማምቲ ቑርባኖም ናብ ቅድሚ መሰውኢ ኣቕረቡ።¹¹እግዚኣብሄር ድማ ንሙሴ፡ እቲ ናይ ምቕዳስ መሰውኢ ቑርባኖም ሓደ ሹም ንመዓልቲ፡ ሓደ ሹም ንመዓልቲ የቕርቡ፡ በሎ።
   ¹²እቲ ብቐዳመይቲ መዓልቲ ቑርባኑ ዘቕረበ፡ ነኣሶን ወዲ ኣሚናዳብ፡ ካብ ነገድ ይሁዳ እዩ።¹³ብሲቃል መቕደስ ሚእትን ሰላሳን ሲቃል ዝሚዛኑ ሓደ ጻሕሊ ብሩር፡ ሰብዓ ሲቃል ዝሚዛኑ ሓደ ጭሔሎ ብሩር፡ ክልቲኡ ንመስዋእቲ ብልዒ ብዘይቲ እተቘምጥዐ ድኹም ሓርጭ ዝመልአ፡¹⁴ዓሰርተ ሲቃል ዝሚዛኑ ሓደ ጽዋእ ወርቂ፡ ዕጣን ዝመልአ፡¹⁵ንዝሓርር መስዋእቲ ኸኣ ሓደ ዝራብዕን ሓደ ድዑልን ሓደ ገንሸል ዓመትን።¹⁶ንመስዋእቲ ሓጢኣት ድማ ሓደ ድቤላ፡¹⁷ንመስዋእቲ ምስጋናውን ክልተ ብዕራይ፡ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት፡ ቁርባን ነኣሶን ወዲ ኣሚናዳብ እዚ እዩ።
   ¹⁸ኣብ ካልኣይቲ መዓልቲ ናትናኤል ወዲ ጹዓር፡ ሹም ይሳኮር፡ ኣቕረበ።¹⁹ብሲቃል መቕደስ ሚእትን ሰላሳን ሲቃል ዝሚዛኑ ሓደ ጻሕሊ ብሩር፡ ሰብዓ ሲቃል ዝሚዛኑ ሓደ ጭሔሎ ብሩር፡ ክልቲኡ ንመስዋእቲ ብልዒ ብዘይቲ እተቘምጥዐ ድኹም ሓርጭ ዝመልአ፡²⁰ዓሰርተ ሲቃል ዝሚዛኑ ሓደ ጽዋእ ወርቂ፡ ዕጣን ዝመልአ፡²¹ንዝሓርር መስዋእቲ ሓደ ዝራብዕን ሓደ ድዑልን ሓደ ገንሸል መዓልትን፡²²ንመስዋእቲ ሓጢኣት ከኣ ሓደ ድቤላ፡²³ንመስዋእቲ ምስጋና ድማ ክልተ ብዕራይ፡ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት፡ ቁርባን ናትናኤል ወዲ ጹዓር እዚ እዩ።
   ²⁴ኣብ ሳልሰይቲ መዓልቲ ኤልያብ ወዲ ሔሎን፡ ሹም ደቂ ዛብሎን፡²⁵ቁርባኑ ብሲቃል መቕደስ ሚእትን ሰላሳን ሲቃል ዝሚዛኑ ሓደ ጻሕሊ ብሩር፡ ሰብዓ ሲቃል ዝሚዛኑ ሓደ ጭሔሎ ብሩር፡ ክልቲኡ ንመስዋእቲ ብልዒ ብዘይቲ እተቘምጥዐ ድኹም ሓርጭ ዝመልአ፡²⁶ዓሰርተ ሲቃል ዝሚዛኑ ጽዋእ ወርቂ፡ ዕጣን ዝመልአ፡²⁷ንዝሓርር መስዋእቲ ሓደ ዝራብዕ፡ ሓደ ድዑል፡ ሓደ ገንሸል ዓመት።²⁸ንመስዋእቲ ሓጢኣት ሓደ ድቤላ፡²⁹ንመስዋእቲ ምስጋና ድማ ክልተ ብዕራይ፡ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት፡ ቁርባን ኤልያብ ወዲ ሔሎን እዚ እዩ።
   ³⁰ኣብ ራብዐይቲ መዓልቲ ኤሊጹር ወዲ ሸደውር፡ ሹም ደቂ ሮቤል፡³¹ቁርባኑ ብሲቃል መቕደስ ሚእትን ሰላሳን ሲቃል ዝሚዛኑ ሓደ ጻሕሊ ብሩር፡ ሰብዓ ሲቃል ዝሚዛኑ ሓደ ጭሕሎ ብሩር፡ ክልቲኡ ንመስዋእቲ ብልዒ ብዘይቲ እተቘምጥዐ ድኹም ሓርጭ ዝመልአ፡³²ዓሰርተ ሲቃል ዝሚዛኑ ሓደ ጽዋእ ወርቂ፡ ዕጣን ዝመልአ፡³³ንዝሓርር መስዋእቲ ሓደ ዝራብዕ፡ ሓደ ድዑል፡ ሓደ ገንሸል ዓመት፡³⁴ንመስዋእቲ ሓጢኣት ሓደ ድቤላ፡³⁵ንመስዋእቲ ምስጋና ኸኣ ክልተ ብዕራይ፡ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት፡ ቁርባን ኤሊጹር ወዲ ሸደውር እዚ እዩ።
   ³⁶ኣብ ሓምሰይቲ መዓልቲ ሸሉሚኤል ወዲ ጹሪሻይዳ፡ ሹም ደቂ ስምኦን፡³⁷ቁርባኑ ብሲቃል መቕደስ ሚእትን ሰላሳን ሲቃል ዝሚዛኑ ሓደ ጻሕሊ ብሩር፡ ሰብዓ ሲቃል ዝሚዛኑ ሓደ ጭሔሎ ብሩር፡ ክልቲኡ ንመስዋእቲ ብልዒ ዘይቲ እተቘምጥዐ ድኹም ሓርጭ ዝመልአ፡³⁸ዓሰርተ ሲቃል ዝሚዛኑ ሓደ ጽዋእ ወርቂ፡ ዕጣን ዝመልአ፡³⁹ንዝሓርር መስዋእቲ ሓደ ዝራብዕ፡ ሓደ ድዑል፡ ሓደ ገንሸል ዓመት፡⁴⁰ንመስዋእቲ ሓጢኣት ሓደ ድቤላ፡⁴¹ንመስዋእቲ ምስጋና ኸኣ ክልተ ብዕራይ፡ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት። ቁርባን ሸሉሚኤል ወዲ ጹሪሻዳይ እዚ እዩ።
   ⁴²ኣብ ሳድሰይቲ መዓልቲ ኤልያሳፍ ወዲ ድዑኤል፡ ሹም ደቂ ጋድ፡⁴³ቁርባኑ ብሲቃል መቕደስ ሚእትን ሰላሳን ሲቃል ዝሚዛኑ ሓደ ጻሕሊ ብሩር፡ ሰብዓ ሲቃል ዝሚዛኑ ሓደ ጭሔሎ ብሩር፡ ክልቲኡ ንመስዋእቲ ብልዒ ብዘይቲ እተቘምጥዐ ድኹም ሓርጭ ዝመልአ፡⁴⁴ዓሰርተ ሲቃል ዝሚዛኑ ሓደ ጽዋእ ወርቂ፡ ዕጣን ዝመልአ፡⁴⁵ንዝሓርር መስዋእቲ ሓደ ዝራብዕ፡ ሓደ ድዑል፡ ሓደ ገንሸል ዓመት፡⁴⁶ንመስዋእቲ ሓጢኣት ሓደ ድቤላ⁴⁷ንመስዋእቲ ምስጋና ኸኣ ኽልተ ብዕራይ፡ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት፡ ቁርባን ኤልያሳፍ ወዲ ድዑኤል እዚ እዩ።
   ⁴⁸ኣብ ሳብዐይቲ መዓልቲ ኤሊሻማዕ ወዲ ዓሚሁድ፡ ሹም ደቂ ኤፍሬም፡⁴⁹ቁርባኑ ብሲቃል መቕደስ ሚእትን ሰላሳን ሲቃል ዝሚዛኑ ሓደ ጻሕሊ ብሩር፡ ሰብዓ ሲቃል ዝሚዛኒ ሓደ ጭሔሎ ብሩር፡ ክልቲኡ ንመስዋእቲ ብልዒ ብዘይቲ እተቘምጥዐ ድኹም ሓርጭ ዝመልአ፡⁵⁰ዓሰርተ ሲቃል ዝሚዛኑ ሓደ ጽዋእ ወርቂ፡ ዕጣን ዝመልአ፡⁵¹ንዝሓርር መስዋእቲ ሓደ ዝራብዕ፡ ሓደ ድዑል፡ ሓደ ገንሸል ዓመት፡⁵²ንመስዋእቲ ሓጢኣት ሓደ ድቤላ፡⁵³ንመስዋእቲ ምስጋና ኸኣ ክልተ ብዕራይ፡ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት፡ ቁርባን ኤሊሻማዕ ወዲ ዓሚሁድ እዚ እዩ።
   ⁵⁴ኣብ ሳምነይቲ መዓልቲ ገማልኤል ወዲ ጰዳህጹር፡ ሹም ደቂ ምናሴ፡⁵⁵ቁርባኑ ብሲቃል መቕደስ ሚእትን ሰላሳን ሲቃል ዝሚዛኑ ሓደ ጸሕሊ ብሩር፡ ሰብዓ ሲቃል ዝሚዛኑ ሓደ ጭሔሎ ብሩር፡ ክልቲኡ ንመስዋእቲ ብልዒ ብዘይቲ እተቘምጥዐ ድኹም ሓርጭ ዝመልአ፡⁵⁶ዓሰርተ ሲቃል ዝሚዛኑ ሓደ ጽዋእ ወርቂ፡ ዕጣን ዝመልአ፡⁵⁷ንዝሓርር መስዋእቲ ሓደ ዝራብዕ፡ ሓደ ድዑል፡ ሓደ ገንሸል ዓመት፡⁵⁸ንመስዋእቲ ሓጢኣት ሓደ ድቤላ፡⁵⁹ንመስዋእቲ ምስጋና ድማ ክልተ ብዕራይ፡ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት፡ ቁርባን ገማልኤል ወዲ ጳዳህጹር እዚ እዩ።
   ⁶⁰ኣብ ታስዐይቲ መዓልቲ ኣቢዳን ወዲ ጊድዖኒ፡ ሹም ደቂ ብንያም፡⁶¹ቁርባኑ ብሲቃል መቕደስ ሚእትን ሰላሳን ሲቃል ዝሚዛኑ ሓደ ጻሕሊ ብሩር፡ ሰብዓ ሲቃል ዝሚዛኑ ሓደ ጭሔሎ ብሩር፡ ክልቲኡ ንመስዋእቲ ብልዒ ብዘይቲ እተቘምጥዐ ድኹም ሓርጭ ዝመልአ።⁶²ዓሰርተ ሲቃል ዝሚዛኑ ሓደ ጽዋእ ወርቂ፡ ዕጣን ዝመልአ፡⁶³ንዝሓርር መስዋእቲ ሓደ ዝራብዕ፡ ሓደ ድዑል፡ ሓደ ገንሸል ዓመት፡⁶⁴ንመስዋእቲ ሓጢኣት ሓደ ድቤላ፡⁶⁵ንመስዋእቲ ምስጋና ኸኣ ክልተ ብዕራይ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት፡ ቁርባን ኣቢዳን ወዲ ጊድዖኒ እዚ እዩ።⁶⁶ኣብ ዓስረይቲ መዓልቲ ኣሒዔዘር ወዲ ዓሚሻዳይ፡ ሹም ደቂ ዳን፡⁶⁷ቁርባኑ ብሲቃል መቕደስ ሚእትን ሰላሳን ሲቃል ዝሚዛኑ ሓደ ጻሕሊ ብሩር፡ ሰብዓ ሲቃል ዝሚዛኑ ሓደ ጭሔሎ ብሩር፡ ክልቲኡ ንመስዋእቲ ብልዒ ብዘይቲ እተቘምጥዐ ድኹም ሓርጭ ዝመልአ፡⁶⁸ዓሰርተ ሲቃል ዝሚዛኑ ሓደ ጽዋእ ወርቂ፡ ዕጣን ዝመልአ፡⁶⁹ንዝሓርር መስዋእቲ ሓደ ዝራብዕ፡ ሓደ ድዑል፡ ሓደ ገንሸል ዓመት፡⁷⁰ንመስዋእቲ ሓጢኣት ሓደ ድቤላ፡⁷¹ንመስዋእቲ ምስጋና ኸኣ ክልተ ብዕራይ፡ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት፡ ቁርባን ኣሒዔዘር ወዲ ዓሚሻዳይ እዚ እዩ።
   ⁷²ኣብ መበል ዓሰርተው ሓደ መዓልቲ ጳግዒኤል ወዲ ዖክራን፡ ሹም ደቂ ኣሴር፡⁷³ቁርባኑ ብሲቃል መቕደስ ሚእትን ሰላሳን ሲቃል ዝሚዛኑ ሓደ ጻሕሊ ብሩር፡ ሰብዓ ሲቃል ዝሚዛኑ ሓደ ጭሔሎ ብሩር፡ ክልቲኡ ንመስዋእቲ ብልዒ ብዘይቲ እተቘምጥዐ ድኹም ሓርጭ ዝመልአ።⁷⁴ዓሰርተ ሲቃል ዝሚዛኑ ሓደ ጽዋእ ወርቂ፡ ዕጣን ዝመልአ፡⁷⁵ንዝሓርር መስዋእቲ ሓደ ዝራብዕ፡ ሓደ ድዑል፡ ሓደ ገንሸል ዓመት፡⁷⁶ንመስዋእቲ ሓጢኣት ሓደ ድቤላ፡⁷⁷ንመስዋእቲ ምስጋና ኸኣ ክልተ ብዕራይ፡ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት፡ ቁርባን ጳግዒኤል ወዲ ዖክራን እዚ እዩ።
   ⁷⁸ኣብ መበል ዓሰርተው ክልተ መዓልቲ ኣሒራዕ ወዲ ዔናን፡ ሹም ደቂ ንፍታሌም፡⁷⁹ቁርባኑ ብሲቃል መቕደስ ሚእትን ሰላሳን ሲቃል ዝሚዛኑ ሓደ ጻሕሊ ብሩር፡ ሰብዓ ሲቃል ዝሚዛኑ ሓደ ጭሔሎ ብሩር፡ ክልቲኡ ንመስዋእቲ ብልዒ ብዘይቲ እተቘምጥዐ ድኹም ሓርጭ ዝመልአ፡⁸⁰ዓሰርተ ሲቃል ዝሚዛኑ ሓደ ጽዋእ ወርቂ፡ ዕጣን ዝመልአ፡⁸¹ንዝሓርር መስዋእቲ ሓደ ዝራብዕ፡ ሓደ ድዑል፡ ሓደ ገንሸል ዓመት፡⁸²ንመስዋእቲ ሓጢኣት ሓደ ድቤላ፡⁸³ንመስዋእቲ ምስጋና ኸኣ ክልተ ብዕራይ፡ ሓሙሽተ ድዑል፡ ሓሙሽተ ድቤላ፡ ሓሙሽተ ገንሸል ዓመት፡ ቁርባን ኣሒራዕ ወዲ ዔናን እዚ እዩ።
   ⁸⁴በታ መሰውኢ እተቐብኣላ መዓልቲ፡ ህያብ ሹማምቲ እስራኤል ንምቕዳሱ እዚ እዩ፡ ዓሰርተው ክልተ ጻሕሊ ብሩር፡ ዓሰርተው ክልተ ጭሔሎ ብሩር፡ ዓሰርተው ክልተ ጽዋእ ወርቂ።⁸⁵ነንሓደ ጻሕሊ ብሩር ሚዛኑ ሚእትን ሰላሳን ሲቃል፡ ነንሓደ ጭሔሎ ድማ ሰብዓ፡ ናይቲ ዅሉ ኣቓሑ ብሩር ብሲቃል መቕደስ ክልተ ሽሕን ኣርባዕተ ሚእትን ሲቃል ኰነ።⁸⁶እተን ዓሰርተው ክልተ ጽዋእ ወርቂ፡ ዕጣን ዝመልኣ ነንጽዋእ ብሲቃል መቕደስ ዓሰርተ ሲቃል፡ ናይቲ ጽዋኣት ወርቂ ዅሉ ሚእትን ዕስራን ሲቃል ኰነ።⁸⁷ኲሎም ኣብዑር ንዝሓርር መስዋእቲ ዓሰርተው ክልተ ዝራብዕ፡ ዓሰርተው ክልተ ድዑል፡ ዓሰርተው ክልተ ገንሸል ዓመት፡ ንመስዋእቲ ሓጢኣት ምስ ናይ ብልዒ መስዋእቶም ዓሰርተው ክልተ ድቤላ፡⁸⁸ኲሎም ኣብዑር መስዋእቲ ምስጋና ድማ ዕስራን ኣርባዕተን ዝራብዕ፡ ስሳ ድዑል፡ ስሳ ድቤላ፡ ስሳ ገንሸል ዓመት ኰነ። እቲ መሰውኢ ምስ ተቐብአ፡ ንምቕዳሱ እተዋህበ እዚ እዩ።
   ⁸⁹ሙሴ ምስኡ ንምዝራብ ናብ ድንኳን ምርኻብ ምስ ኣተወ፡ ካብቲ ኣብ ልዕሊ ታቦት ምስክር ዘሎ መኽደን መተዓረቒ፡ ካብ መንጎ እቶም ክልተ ክሩቤል እቲ ድምጺ ኽዛረቦ ይሰምዕ ነበረ፡ ይዛረቦ ድማ ነበረ።

ዘሁልቁ ምዕራፍ 8

   ¹እግዚኣብሄር ድማ ንሙሴ ኸምዚ ኢሉ ተዛረቦ፡²ንኣሮን ተዛረቦ በሎ ኸኣ፡ ቀነዲል ምስ እትሰቅል፡ እቲ ሾብዓተ ቐንዴል ናብ ቅድሚ እቲ ቐዋሚ ቐንዴል ከም ዝበርህ ግበሮ።³ኣሮን ከኣ ከምኡ ገበረ፡ ከምቲ እግዚኣብሄር ንሙሴ ዝኣዘዞ፡ ነቲ ቐንዴል ኣብ ቅድሚ እቲ ቐዋሚ ቐንዴል ከም ዝበርህ ገበሮ።⁴ኣሰራርሓ እቲ ቐዋሚ ቐንዴል ከምዚ እዩ፡ ካብ ወርቂ ብምቕጥቃጥ እተሰርሐ ነበረ፡ ንሱ ኣእጋሩ ዀነ ዕምባባኡ ዀነ ብምቕጥቃጥ እተሰርሐ ነበረ። ነቲ ቐዋሚ ቐንዴል ከምቲ እግዚኣብሄር ንሙሴ ዘርኣዮ ምስሊ ገበሮ።
   ⁵እግዚኣብሄር ድማ ንሙሴ ኸምዚ ኢሉ ተዛረቦ፡⁶ንሌዋውያን ካብ ማእከል ደቂ እስራኤል ውሰዶም፡ ኣንጽሃዮም ከኣ።⁷ከምዚ ጌርካ ኣንጽሃዮም፡ ማይ ንጽህና ንጸገሎም፡ ኣብ ብዘሎ ስጋኦም ድማ መላጸ የሕልፉ፡ ክዳውንቶም ይሕጸቡ ይንጽሁ ኸኣ።⁸ድሕርዚ ሓደ ዝራብዕን ብዘይቲ እተቘምጥዐ ድኹም ሓርጭ ናይ ብልዒ መስዋእቱን ይውሰዱ፡ ንመስዋእቲ ሓጢኣት ከኣ ካልእ ዝራብዕ ውሰድ።⁹ንሌዋውያን ድማ ናብ ቅድሚ ድንኳን ምርኻብ ኣቕርቦም፡ ንብዘሎ ኣኼባ ደቂ እስራኤልውን ኣክቦ።¹⁰ንሌዋውያን ናብ ቅድሚ እግዚኣብሄር ኣቕርቦም፡ ደቂ እስራኤል ከኣ ኣእዳዎም ኣብ ልዕሊ ሌዋውያን የንብሩ።¹¹ኣሮን ድማ ንሌዋውያን፡ ነገልግሎት ዕዮ እግዚኣብሄር ክዀኑ፡ ዝውዝወዝ መስዋእቲ ደቂ እስራኤል ገይሩ ኣብ ቅድሚ እግዚኣብሄር ይወዝውዞም።¹²ሌዋውያን ድማ ኣእዳዎም ኣብ ልዕሊ ርእሲ እቶም ዝራብዓት የንብሩ፡ ንሌዋውያን ምእንቲ ኸተተዓርቖም ከኣ፡ እቲ ሓደ ንመስዋእቲ ሓጢኣት እቲ ኻልኣይ ከኣ ንዝሓርር መስዋእቲ ጌርካ፡ ንእግዚኣብሄር ሰውኣዮም።¹³ንሌዋውያን ድማ ኣብ ቅድሚ ኣሮንን ኣብ ቅድሚ ደቁን ኣቑሞም እሞ ንእግዚኣብሄር ዝውዝወዝ መስዋእቲ ጌርካ ወዝውዞም።¹⁴ሌዋውያን ንኣይ ምእንቲ ክኾኑስ፡ ንሌዋውያን ካብ ማእከል ደቂ እስራኤል ፍለዮም።¹⁵ድሕርቲ ሌዋውያን ኣብ ድንኳን ምርኻብ ከገልግሉ ይእተዉ እሞ ኣንጽሃዮም፡ ንዝውዝወዝ መስዋእቲ ኸኣ ወዝውዞም።¹⁶ካብ ማእከል ደቂ እስራኤል ብመላኦም ንኣይ ተውሂቦም እዮም እሞ፡ ኣብ ክንዲ ማሕጸን ዝኸፍት ኩሉ፡ በኹሪ ዅሎም ድቂ እስራኤል፡ ንኣይ ወሲደዮም እየ።¹⁷ሰብ ኰነ እንስሳ ዀነ ዅሉ በዅሪ ኣብ ደቂ እስራኤል ናተይ እዩ እሞ፡ በታ ኣብ ምድሪ ግብጺ ንዅሉ በዅሪ ዝወቓዕኩላ መዓልቲ ንኣይ ቀደስኩዎም።¹⁸ኣብ ክንዲ ዅሉ በዅሪ ኣብ ደቂ እስራኤል ከኣ ንሌዋውያን ወሰድኩ።¹⁹ደቂ እስራኤል ናብ መቕደስ ብምቕራቦም ናብ ደቂ እስራኤል መዓት ምእንቲ ኸይወርድ፡ ኣብ ድንኳን ምርኻብ ኣገልግሎት ደቂ እስራኤል ከገልግሉ እሞ ንደቂ እስራኤል ከተዓርቕዎም፡ ካብ ማእከል ደቂ እስራኤል ከኣ ሌዋውያን ንኣሮንን ንደቁን ህያብ ሂበዮም ኣሎኹ።
   ²⁰ሙሴን ኣሮንን ብዘሎ ኣኼባ ደቂ እስራኤልን ድማ ንሌዋውያን እዚ ገበሩሎም፡ ደቂ እስራኤል ከምቲ እግዚኣብሄር ብዛዕባ ሌዋውያን ንሙሴ ዝኣዘዞ ዅሉ ኸምኡ ገበሩሎም።²¹ሌዋውያን ከኣ ነጽሁ፡ ክዳውንቶምውን ሓጸቡ። ኣሮን ከኣ ኣብ ቅድሚ እግዚኣብሄር ንዝውዝወዝ መስዋእቲ ወዝወዞም፡ ኣሮን ድማ ንምንጻሆም ኣተዓረቐም።²²ድሕርቲ ሌዋውያን ኣብ ቅድሚ ኣሮንን ኣብ ቅድሚ ደቁን ኣብ ድንኳን ምርኻብ ኣገልግሎቶም ክገብሩ ኣተዉ። ከምቲ እግዚኣብሄር ብዛዕባ ሌዋውያን ንሙሴ ዝኣዘዘ፡ ከምኡ ገበሩሎም።
   ²³እግዚኣብሄር ድማ ንሙሴ ኸምዚ ኢሉ ተዛረቦ፡²⁴ንሌዋውያን ዝግባእ እዚ እዩ፡ ካብ ወዲ ዕስራን ሓሙሽተን ዓመት ንላዕሊ፡ ናብ ዕዮ ድንኳን ምርኻብ ከገልግሉ ይእተዉ።²⁵ካብ ወዲ ሓምሳ ዓመት ከኣ ካብ ዕዮ ኣገልግሎት ይመለስ፡ ድሕሪ ደጊም ኣየገልግል።²⁶ኣብቲ ሓለዋ ኣሕዋቱ ኣብ ድንኳን ምርኻብ ይሓግዝ፡ ኣብ ኣገልግሎት ግና ኣይዕየ። ንሌዋውያን በቲ ሓለዋኦም ከምኡ ግበረሎም።

ዘሁልቁ ምዕራፍ 9

   ¹ካብ ምድሪ ግብጺ ኻብ ዝወጹ፡ ኣብ ካልኣይቲ ዓመቶም ኣብታ ቐዳመይቲ ወርሒ ድማ እግዚኣብሄር ኣብ በረኻ ሲና ንሙሴ ኸምዚ ኢሉ ተዛረቦ።²ደቂ እስራኤል በቲ ምዱብ ጊዚኡ ፋስጋ የብዕሉ።³ኣብዛ ወርሒ እዚኣ ኣብ መበል ዓሰርተው ኣርባዕተ መዓልቲ፡ በቲ ምዱብ ግዜኡ፡ ክመሲ ኸሎ ኣብዕልዎ። ከም ኲሉ ሕጋጋቱን ከም ኲሉ ስርዓቱን ጌርኩም ኣብዕልዎ።
   ⁴ሙሴ ኸኣ ንደቂ እስራኤል ፋስጋ ኸብዕሉ ተዛረቦም።⁵ንሳቶም ድማ ኣብታ ቐዳመይቲ ወርሒ፡ ካብታ ወርሒ ኸኣ መበል ዓሰርተው ኣርባዕተ መዓልቲ፡ ክመሲ ኸሎ ኣብ በረኻ ሲና ፋሲጋ ኣብዓሉ። ደቂ እስራኤል ከምቲ እግዚኣብሄር ንሙሴ ዝኣዘዞ ዅሉ፡ ከምኡ ገበሩ።
   ⁶ድማ ብምዉት ሰብ ዝረኸሱ፡ በታ መዓልቲ እቲኣ ፋስጋ ኸብዕሉ ዘይከኣሉ ሰባት ነበሩ፡ ንሳቶም ከኣ በታ መዓልቲ እቲኣ ኣብ ቅድሚ ሙሴን ኣብ ቅድሚ ኣሮንን ቀረቡ።⁷እቶም ሰባት እቲኦም ድማ፡ ንሕና ብምዉት ሰብ ረኺስና ኢና እሞ፡ በታ ምድብቲ ግዜ መባእ እግዚኣብሄር ኣብ መንጎ እስራኤል ከይነቕርብ እተኸልከልና ስለምንታይ እዩ፧ በልዎ።⁸ሙሴ ኸኣ፡ እግዚኣብሄር ብዛዕባኹም ዝእዝዞ ኽሰምዕሲ፡ ደው ኢልኩም ጽንሑ፡ በሎም።
   ⁹እግዚኣብሄር ድማ ንሙሴ ኸምዚ ኢሉ ተዛረቦ፡¹⁰ንደቂ እስራኤል ከምዚ ኢልካ ተዛረቦም፡ ዝዀነ ሰብ ካባኻትኩም ወይ ካብ ወለዶኹም ብምዉት እንተ ረኸሰ ወይ ኣብ ርሑቕ መገዲ እንተሎ፡ ንእግዚኣብሄር ፋስጋ የብዕል።¹¹ንሱ ኣብታ ኻልኣይቲ ወርሒ፡ ኣብ መበል ዓሰርተው ኣርባዕተ መዓልቲ ኽመሲ ኸሎ የብዕሉ፡ ምስ ቅጫን መሪር ሓምልን ይብልዕዎ።¹²ካብኡ ገለ ኽሳዕ ጽባሕ ኣይሕደጉ፡ ዓጽሙ ኸኣ ኣይስበሩ። ከም ኲሉ ሕጊ ፋስጋ ይግበርዎ።¹³ዝዀነ ሰብ፡ ንጹህ ክነሱ፡ ኣብ መገዲውን ዘይኰነ፡ ፋስጋ ዘየብዓለ፡ መባእ እግዚኣብሄር በቲ ምዱብ ጊዚኡ ስለ ዘየቕረባ፡ እታ ነፍሲ እቲኣ ኻብ ህዝባ ትመንቈስ። እቲ ሰብ እቲ ሓጢኣቱ ይጸውር።¹⁴ጓና ምሳኻትኩም ዝነብር እንተሎ፡ ፋስጋ ንእግዚኣብሄር ከብዕል እንተ ደለየ፡ ከምቲ ናይ ፋስጋ ሕግን ስርዓትን ይግበር። ንጓናን ንወዲ ዓድን ሓደ ሕጊ ይኹነልኩም።
   ¹⁵በታ እቲ ማሕደር እተተኽለላ መዓልቲ ድማ ነቲ ማሕደር፡ ነቲ ድንኳን ምስክር ደበና ኣጐልበቦ፡ ካብ ምሸት ክሳዕ ብጊሓት ድማ ከም ትርኢት ሓዊ ኣብ ልዕሊ እቲ ማሕደር ነበረ።¹⁶ወርትግ ከምኡ ነበረ፡ ደበና ኣጐልበቦ ብለይቲ ኸኣ ትርኢት ሓዊ።¹⁷እቲ ደበና ኻብ ልዕሊ እቲ ድንኳን ምስ ተላዕለ፡ ድሕርቲ ደቂ እስራኤል ይጕዓዙ፡ እቲ ደበና ኣብ ዝቘመሉ ኸኣ፡ ደቂ እስራኤል ኣብኡ ይሰፍሩ ነበሩ።¹⁸ደቂ እስራኤል ብትእዛዝ እግዚኣብሄር ይጕዓዙ፡ ብትእዛዝ እግዚኣብሄር ከኣ ይሰፍሩ ነበሩ። እቲ ደበና ኣብ ልዕሊ እቲ ማሕደር ብዝቘመሉ ግዜ ኣብቲ ዝሰፈርዎ ይጸንሑ ነበሩ።¹⁹እቲ ደበና ብዙሕ መዓልቲ ኣብ ልዕሊ ማሕደር እንተ ጸንሐ፡ ደቂ እስራኤል እቲ ሓለዋ እግዚኣብሄር ይሕልዉ ነበሩ እሞ ኣይተጓዕዙን።²⁰እቲ ደበና ቕሩብ መዓልቲ ኣብ ልዕሊ ማሕደር እንተ ነበረ፡ ብትእዛዝ እግዚኣብሄር ሰፊሮም ቀነዩ፡ ብትእዛዝ እግዚኣብሄር ከኣ ተጓዕዙ።²¹እቲ ደበና ኻብ ምሸት ክሳዕ ብጊሓት እንተ ነበረ ኸኣ፡ እቲ ደበና ንግሆ ምስ ተላዕለ፡ ይጕዓዙ ነበሩ። ሓንቲ መዓልትን ሓንቲ ለይትን እንተጸንሐ፡ እቲ ደበና ምስ ተላዕለ፡ ሽዑ ተጓዕዙ።²²እቲ ደበና ኣብ ልዕሊ ማሕደር ተቐሚጡ ኽልተ መዓልቲ ወይ ሓደ ወርሒ፡ ወይ ነዊሕ ግዜ እንተ ደንጐየ፡ ደቂ እስራኤል ሰፊሮም ይጸንሑ እምበር፡ ኣይጐዓዙን ነበሩ። ምስ ዚለዓል ግና፡ ይጕዓዙ፡ ነበሩ።²³ብትእዛዝ እግዚኣብሄር ይሰፍሩ ብትእዛዝ እግዚኣብሄር ድማ ይጕዓዙ ነበሩ። ከምቲ እግዚኣብሄር ብኢድ ሙሴ ዝኣዘዞ፡ ነቲ ሓለዋ እግዚኣብሄር ይሕልዉ ነበሩ።

ዘሁልቁ ምዕራፍ 10

   ¹እግዚኣብሄር ድማ ንሙሴ ኸምዚ ኢሉ ተዛረቦ፡²ንኣኻ ክልተ መለኸት ብሩር ግበር፡ ብምቕጥቃጥ ስርሓዮ። ነቲ ኣኼባ ንምጽዋዕን ነቲ ሰፈር ከኣ ንምጕዓዝን ይኹንካ።³ብእኡ ምስ ዝነፍሑ፡ ብዘሎ ኣኼባ ናባኻ ኣብ ኣፍ ድንኳን ምርኻብ ይተኣከብ።⁴ብሓደ ጥራይ እንተ ነፍሑ ኸኣ፡ እቶም ሹማምቲ። ሓላቑ ኣሽሓት እስራኤል፡ ናባኻ ይተኣከቡ።⁵መለኸት ኣንዊሕኩም ምስ እትነፍሑ ድማ፡ ብሸነኽ ምብራቕ ሰፊሮም ዘለዉ ይንቀሉ።⁶ካልኣይ ሳዕ ኣንዊሕኩም ምስ እትነፍሑ ኸኣ፡ ብሸነኽ ደቡብ ሰፊሮም ዘለዉ ይንቀሉ። ንምንቃሎም ኣንዊሖም ይንፍሑ።⁷እቲ ኣኼባ ምስ ዝእከብ ከኣ ንፍሑ፡ ግናኸ ኣይተንውሕዎ።⁸እቶም ካህናት ደቂ ኣሮን ድማ መለኸት ይንፍሑ። እዚ ንውሉድ ወለዶኹም ሕጊ ዘለኣለም ይኹነልኩም።⁹ምስቲ ዝጸቕጠኩም ጸላኢ ኽትዋግኡ ናብ ምድርኹም ምስ እትወጹ፡ ኣንዊሕኩም መለኸት ንፍሑ፡ ኣብ ቅድሚ እግዚኣብሄር ኣምላኽኩም ድማ ትዝከሩ፡ ካብ ጸላእትኹም ከኣ ትድሕኑ።¹⁰ብመዓልቲ ሓጐስኩምን ብበዓላትኩምን ብመጀመርታ ኣዋርሕኩምን ኣብ ልዕሊ እቲ ዝሓርር መስዋእትኹምን ኣብ ልዕሊ መስዋእቲ ምስጋናኹምን መለኸት ንፍሑ። ኣብ ቅድሚ ኣምላኽኩም ከኣ መዘከርታ ክዀነልኩም እዩ። ኣነ እግዚኣብሄር ኣምላኽኩም እየ።
   ¹¹ኰነ ድማ ኣብ ካልአይቲ ዓመት፡ ኣብ ካልኣይቲ ወርሒ፡ ካብታ ወርሒ ኸኣ ኣብ መበል ዕስራ መዓልቲ እቲ ደበና ኻብ ልዕሊ እቲ ማሕደር ምስክር ተላዕለ።¹²ሽዑ ደቂ እስራኤል ድማ ከከም ጕዕዞኦም ካብ በረኻ ሲና ነቐሉ፡ እቲ ደበና ኸኣ ኣብ በረኻ ጳራን ቈመ።¹³ከምቲ እግዚኣብሄር ብኢድ ሙሴ ዝኣዘዞ ድማ፡ እቶም ቀዳሞት ነቐሉ።¹⁴ሰንደቕ ዕላማ ሰፈር ደቂ ይሁዳ፡ ከከም ሰራዊቶም፡ ቅድም ተጓዕዘ፡ ኣብ ልዕሊ ሰራዊቱ ድማ ነኣሶን ወዲ ኣሚናዳብ ነበረ።¹⁵ኣብ ልዕሊ ሰራዊት ነገድ ደቂ ኢሳኮር ከኣ ናትናኤል ወዱ ጹዓር ነበረ።¹⁶ኣብ ልዕሊ ሰራዊት ነገድ ደቂ ዛብሎን ድማ ኤልያብ ወዲ ሔሎን ነበረ።¹⁷ነቲ ማሕደር ከኣ ኣውረድዎ፡ ደቂ ገርሾንን ደቂ መራርን ድማ ነቲ ማሕደር ጾይሮም ተጓዕዙ።¹⁸ሰንደቕ ዕላማ ሰፈር ደቂ ሮቤል ከኣ፡ ከከም ሰራዊቶም፡ ተጓዕዘ፡ ኣብ ልዕሊ ሰራዊቱ ድማ ኤሊጹር ወዲ ሸደውር ነበረ።¹⁹ኣብ ልዕሊ ሰራዊት ነገድ ደቂ ስምኦን ከኣ ሸሉሚኤል ወዲ ጹሪሻዳይ ነበረ።²⁰ኣብ ልዕሊ ሰራዊት ነገድ ደቂ ጋድ ድማ ኤልያሳፍ ወዲ ድዑኤል ነበረ።²¹ቃሃታውያን ድማ ኣቓሑ መቕደስ ጾይሮም ተጓዕዙ፡ ክሳዕ ዝኣትዉ ኸኣ እቲኣቶም ነቲ ማሕደር ኣቘምዎ።²²ሰንደቕ ዕላማ ሰፈር ደቂ ኤፍሬም ድማ፡ ከከም ሰራዊቶም፡ ተጓዕዘ፡ ኣብ ልዕሊ ሰራዊቱ ኸኣ ኤሊሻማዕ ወዲ ዓሚሁድ ነበረ።²³ኣብ ልዕሊ ሰራዊት ነገድ ደቂ ምናሴ ድማ ገማልኤል ወዲ ጰዳህጹር ነበረ።²⁴ኣብ ልዕሊ ሰራዊት ነገድ ደቂ ብንያም ከኣ ኣቢዳን ወዲ ጊድዖኒ ነበረ።²⁵ሰንደቕ ዕላማ ሰፈር ደቂ ዳን ከኣ፡ ከከም ሰራዊቶም፡ ደጀን ኲሉ ሰፈር ኰይኑ ተጓዕዘ፡ ኣብ ልዕሊ ሰራዊቱ ድማ ኣሒዔዘር ወዲ ዓሚሻዳይ ነበረ።²⁶ኣብ ልዕሊ ሰራዊት ነገድ ደቂ ኣሴር ድማ ጳግዒኤል ወዲ ዖክራን ነበረ።²⁷ኣብ ልዕሊ ሰራዊት ነገድ ደቂ ንፍታሌም ከኣ ኣሒራዕ ወዲ ዔናን ነበረ።²⁸ጕዕዞ ደቂ እስራኤል በብሰራዊቶም እዚ ነበረ፡ ተጓዕዙ ድማ።
   ²⁹ሙሴ ኸኣ ንሖባብ ወዲ ረዑኤል ሚድያናዊ፡ ሓሙ ሙሴ፡ ንሕና ናብታ እግዚኣብሄር፡ ንኣኻትኩም ክህበኩም እየ፡ ዝበለና ቦታ ንጐዓዝ ኣሎና። እግዚኣብሄር ብዛዕባ እስራኤል ጽቡቕ ተዛሪቡ እዩ እሞ፡ ጽቡቕ ክንገብረልካ ምሳና ኺድ፡ በሎ።³⁰ንሱ ድማ፡ ኣይከይድን፡ ንሃገረይን ናብ ትውልደይን ደኣ እኸይድ፡ በሎ።³¹ንሱ ኸኣ፡ በጃኻ ኣይትሕደገና፡ ኣብ በረኻ ኣበይ ከም እንሰፍር፡ ንስኻ ትፈልጥ ኢኻ እሞ፡ ኣዒንቲ ኹነና።³²ይኸውን ድማ፡ ምሳና እንተ ኼድካ፡ ካብቲ እግዚኣብሄር ጽቡቕ ዝገብረልና፡ ጽቡቕ ክንገብረልካ ኢና፡ በለ።
   ³³ካብ ከረን እግዚኣብሄር ከኣ መገዲ ሰለስተ መዓልቲ ተጓዕዙ። ታቦት ኪዳን እግዚኣብሄር ድማ ዝዓርፉላ ቦታ ኽደልየሎም፡ መገዲ ሰለስተ መዓልቲ ቐደሞም።³⁴ካብ ሰፈር ምስ ነቐሉ ድማ፡ ደበና እግዚኣብሄር ብመዓልቲ ኣብ ልዕሊኦም ነበረ።
   ³⁵ኰነ ኸኣ፡ ታቦት ምስ ተላዕለ፡ ሙሴ፡ ዎ እግዚኣብሄር፡ ተንስእ፡ ጸላእትኻ ፋሕ ይበሉ፡ እቶም ዝጸልኡኻ ድማ ካብ ቅድሜኻ ይህደሙ፡ ይብል ነበረ።³⁶ምስ ዝሰፍር ከኣ፡ ዎ እግዚኣብሄር፡ ናብቶም እልፊ ኣእላፋት እስራኤል ተመለስ፡ ይብል ነበረ።

ዘሁልቁ ምዕራፍ 11

   ¹እቲ ህዝቢ ድማ ከም ኣጕረምረምቲ ዀነ፡ እዚ ኸኣ ኣብ እዝኒ እግዚኣብሄር ክፉእ ኰይኑ ተሰምዐ። እግዚኣብሄር ምስ ሰምዖ ድማ ኲራኡ ነደደ፡ ሓዊ እግዚኣብሄርውን ኣባታቶም ሃልሃል በለ፡ ነቶም ኣብ ወሰን ሰፈር ዝነበሩ ኸኣ በልዖም።²እቶም ህዝቢ ድማ ናብ ሙሴ ኣእወዩ፡ ሙሴ ኸኣ ንእግዚኣብሄር ለመነ፡ እቲ ሓዊ ኸኣ ጠፍአ።³ሓዊ እግዚኣብሄር ኣብ መንጎኦም ስለ ዝነደደ ድማ፡ እታ ቦታ እቲኣ ታብዔራህ ተባህለት።
   ⁴ነቲ ኣብ ማእከሎም ዝነበረ ሕውስዋስ እኽብካብ ህዝቢ ታፍላ ሓዞ። ደቂ እስራኤል ድማ መሊሶም በኸዩ በሉ ኸኣ፡ እንበልዖ ስጋ መን ይህበና፡⁵እቲ ኣብ ግብጺ ብኸምኡ ዝበላዕናዮ ዓሳ፡ ዱባን ብርጭቕን ሽጕርቲ ቓንጫን ቀይሕ ሽጕርትን ጻዕዳ ሽጕርትን ዘከርና፡⁶ሕጂ ግና ገለ እኳ የልቦን፡ ብጀካ ማና እንርእዮ የብልናን እሞ፡ ነፍስና ነቐጸት።
   ⁷እቲ ማና ኸእ ከም ፍረ ጻቕዳ ነበረ፡ ትርኢቱ ድማ ከም ትርኢት ዕንዲዳ ነበረ።⁸እቶም ህዝቢ እናዞሩ ይኣርይዎ ነበሩ፡ ብመጥሓን ድማ ይጥሕንዎ ወይ ብመጉእ ይጎድእዎ፡ እብ ቍራዕ ኣብሲሎም ከኣ ቅጫ ይገብርዎ ነበሩ ጣዕሙውን ከም ብዘይቲ እተገብረ ቅጫ ይጥዕም ነበረ።⁹ኣብ ልዕሊ እቲ ሰፈር ኣውሊ ብለይቲ ምስ ዝወድቕ፡ ማና ኸኣ ኣብ ልዕሊኡ ይወርድ ነበረ።
   ¹⁰ሙሴ ድማ፡ እቶም ህዝቢ በብዓሌቶም ነፍሲ ወከፍ ኣብ ኣኣፍ ድንኳኑ ኽበኽዩ ሰምዐ። ኵራ እግዚኣብሄር ከኣ ኣዝዩ ነደደ፡ እዚ ድማ ኣብ ዓይኒ ሙሴ ኽፉእ ኰይኑ ተራእየ።¹¹ሙሴ ኸኣ ንእግዚኣብሄር በሎ፡ ስለምንታይ ንባርያኻ ኽፉእ ገበርካኒ፧ ጾር ብዘሎ እዚ ህዝቢ እዚ ኣብ ርእሰይ ዘምበርካስ፡ ስለምንታይ ኣብ ቅድሜኻ ሞገስ ዘይረኸብኩ፧¹²መጕዚት ንዝጠቡ ሕጻን ከም እትጸውር፡ ክሳዕ ናብታ ነቦታቶም ዝመሓልካሎም ምድሪ ኣብ ሕቑፍኻ ጹሮም፡ እትብለንስ፡ ነዚ ዅሉ ህዝቢ እዚ ኣነዶ ጠኒሰዮ፡ ኣነዶኸ ወሊደዮ እየ፧¹³እናበኸዩ፡ እንበልዕ ስጋ ሃበና፡ ይብሉኒ ኣለዉ። ነዚ ዅሉ ህዝቢ እዚ ዝህቦ ስጋኸ፡ ካበይ ክረኽቦ እየ፧¹⁴እምብዛ ኸቢዱኒ እዩ እሞ፡ ንብዘሎ እዚ ህዝቢ እዚ ኣነ በይነይ ክጾሮ ኣይክእልን እየ።¹⁵ከምዚ ትገብረኒ ኻብ ኰንካ፡ ነቲ መከራይ ከይርኢ፡ ኣብ ቅድሜኻ ሞገስ እንተ ደኣ ረኺበስ፡ ብሓደ ኣፊቱ ቕተለኒ።
   ¹⁶እግዚኣብሄር ድማ ንሙሴ በሎ፡ ካብ ዓበይቲ እስራኤል ካብቶም ኣብ ህዝቢ ዓበይትን ሓለቓታትን ከም ዝዀኑ ንስኻ እትፈልጦም፡ ሰብዓ ሰብኣይ ኣክበለይ። ናብ ድንኳን ምርኻብ ውሰዶም፡ ኣብኡ ምሳካ ደው ኣብሎም።¹⁷ወሪደ ኣብኡ ምሳኻ ኽዛረብ እየ፡ ካብቲ ኣብ ልዕሌኻ ዘሎ መንፈስ ክወስድ እየ፡ ኣብ ልዕሊኦም ከኣ ከንብር እየ፡ ንስኻ በይንኻ ኸይትጸሮ ድማ፡ ጾር እቶም ህዝቢ ምሳኻ ኽጾሩ እዮም።¹⁸ነዚ ህዝቢ ድማ በሎ፡ ንጽባሕ ተቐደሱ፡ ስጋ ኽትበልዑ ኢኹም። እንበልዖ ስጋ መን ክህበና እዩ፧ ኣብ ግብጺ ጽቡቕ ነበርና እናበልኩም፡ ምብካይኩም ኣብ እዝኒ እግዚኣብሄር ተሰሚዑ እዩ እሞ፡ እምበኣር እግዚኣብሄር ስጋ ኽህበኩም እዩ እሞ ክትበልዑ ኢኹም።¹⁹ሓደ መዓልቲ ኣይኰነን ወይ ክልተ መዓልቲ ወይ ሓሙሽተ መዓልቲ ወይ ዓሰርተ መዓልቲ ወይ ዕስራ መዓልቲ ኣይኰነን እትበልዑ፡²⁰ብኣፍንጫኹም ክሳዕ ዝወጽእ እሞ ክሳዕ እትመንውዎ፡ ወርሒ ምሉእ እምበር፡ እዚ ኸኣ ነቲ ኣብ ማእከልኩም ዘሎ እግዚኣብሄር ስለ ዝነዓቕኩምዎን ስለምንታይ ካብ ግብጺ ወጻእና፧ እናበልኩም ኣብ ቅድሚኡ ስለ ዝበኸኹምን እዩ።²¹ሙሴ ኸኣ፡ እዚ ኣነ ኣብ ማእከሉ ዘሎኹ ህዝቢ ሹድሽተ ሚእቲ ሽሕ ኣጋራይ እዩ፡ ንስኻ ኸኣ፡ ወርሒ ምሉእ ዝበልዕዎ ስጋ ኽህበኩም እየ፡ ትብል ኣሎኻ።²²ንኣታቶም ዝኣክል ጤለበጊዕን ኣሓንዶ ኽሕረድ እዩ፧ ወይ ንኣታቶም ክኣክልሲ ዅሉ ዓሳ ባሕርዶ ኽእከብ ኰይኑ፧ በለ።²³እግዚኣብሄር ድማ ንሙሴ፡ ኢድ እግዚኣብሄርዶ ሓጻር እያ፧ ሕጂ እቲ ቓለይ ዚዀነልካ እንተ ዀይኑ ወይ ዘይኰነልካ፡ ክትርኢ ኢኻ፡ በሎ።
   ²⁴ሙሴ ድማ ወጺኡ እቲ እግዚኣብሄር ዝበሎ ነቲ ህዝቢ ነገሮ። ካብቶም ዓበይቲ ህዝቢ ሰብዓ ሰብኣይ ኣኪቡ፡ ኣብ ዙርያ እቲ ድንኳን ደው ኣበሎም።²⁵እግዚብሄር ከኣ ብደበና ወሪዱ ንእኡ ተዛረቦ፡ ካብቲ ኣብ ልዕሊኡ ዘሎ መንፈስ ወሰደ፡ ኣብ ልዕሊ እቶም ሰብዓ ዓበይቲ ኣንበረ። ኰነ ኸኣ፡ እቲ መንፈስ ኣብ ልዕሊኦም ምስ ዓረፈ፡ ተነበዩ፡ ግናኸ ኣይደገምዎን።²⁶ክልተ ሰብኣይ ድማ፡ ስም እቲ ሓደ ኤልዳድ፡ ስም እቲ ኻልኣይ ከኣ ሜዳድ ዝብሃሉ፡ ኣብ ሰፈር ተሪፎም ነበሩ፡ ንሳቶም ካብቶም ጽሑፋት ነበሩ፡ ናብ ድንኳን ግና ኣይከዱን ነበሩ፡ እቲ መንፈስ ድማ ኣብ ልዕሊኦም ዓረፈ፡ ኣብ ሰፈር ከኣ ተነበዩ።²⁷ሽዑ ሓደ ጐበዝ ጐይዩ፡ ኤልዳድን ሜዳድን ኣብ ሰፈር ይንበዩ ኣለዉ፡ ኢሉ ንሙሴ ነገሮ።²⁸እያሱ ወዲ ነዌ፡ ካብ ንእሽቶኡ ኣገልጋሊ ሙሴ ዝነበረ፡ ጐይታይ ሙሴ፡ ከልክሎም፡ ኢሉ መለሰ።²⁹ሙሴ ግና፡ ንስኻዶ ስለይ ቀኒእካ ኢኻ፧ እግዚኣብሄር መንፈሱ ኣብ ልዕሊኦም እንተ ዘንብር፡ ኲሎም ህዝቢ እግዚኣብሄር ከኣ ነብያት እንተ ዝዀኑ መን ምሃበ፡ በሎ።³⁰ሙሴ ድማ፡ ንሱን እቶም ዓበይቲ እስራኤልን ናብ ሰፈር ተመልሱ።
   ³¹ካብ እግዚኣብሄር ድማ ንፋስ ወጸ፡ ካብ ባሕሪ ኸኣ ብርኒጎታት ኣምጺኡ ኣብ ልዕሊ እቲ ሰፈር፡ መገዲ መዓልቲ ዝኣክል በዚ፡ መገዲ መዓልቲ ድማ በቲ፡ ኣብ ዙርያ እቲ ሰፈር ኣውረዶ፡ ምብራኹ ኸኣ ካብ ምድሪ ንላዕሊ ኣስታት ክልተ እመት ነበረ።³²እቲ ህዝቢ ድማ ተንስኤ፡ በታ መዓልቲ እቲኣ ብመልኣን ለይቲ ብመልኣን ንጽብሒታውን መዓልቲ ብመልኣ ብርኒጎታት ኣከበ። እቲ ዘውሓደ ዓሰርተ ሆሜር ኣከበ፡ ኣብ ዙርያ ዅሉ ሰፈር ከኣ ሰጥሕወን።³³እቲ ስጋ ገና ኣብ ኲርምቶም ከሎ ኸይሔኽዎ ኸኣ፡ ኲራ እግዚኣብሄር ኣብቶም ህዝቢ ነደደ፡ እግዚኣብሄር ነቶም ህዝቢ ኣዝዩ ብዝበርትዐ መቕዘፍቲ ወቕዖም።³⁴ነቶም ታፍላ ዝሓዞም ህዝቢ ኣብኣ ቐቢሮምዎም እዮም እሞ፡ እታ ቦታ እቲኣ ቂብሮት-ሃታኣባ ተባህለት።
   ³⁵እቶም ህዝቢ ኻብ ቂብሮት-ሃታኣባ ንሓጸሮት ተጓዕዙ፡ ኣብ ሓጸሮት ከኣ ሰፈሩ።

ዘሁልቁ ምዕራፍ 12

   ¹ሙሴ ኢትዮጵያዊት ሰበይቲ ኣእትዩ ነበረ እሞ፡ ሚርያምን ኣሮንን ብዛዕባ እታ ዘእተዋ ኢትዮጵያዊት ሰበይቲ ኣብ ልዕሊኡ ተዛረቡ።²እግዚኣብሄር ብሙሴ ጥራይዶ እዩ ዝዛረብ፧ ብኣናስ ኣይዛረብን ድዩ፧ ድማ በሉ። እዚ ኸኣ እግዚኣብሄር ሰምዖ።³እቲ ሰብኣይ፡ ሙሴ ግና ኣብ ልዕሊ ገጽ ምድሪ ኻብ ዘሎ ሰብ ዓቃል ነበረ።⁴ብኡብኡ እግዚኣብሄር ንሙሴን ንኣሮንን ንሚርያምን፡ ሰለስቴኹም ናብ ድንኳን ምርኻብ ወጹ፡ በሎም። ሰለስቲኦም ድማ ወጹ።⁵እግዚኣብሄር ከኣ ብዓንዲ ደበና ወረደ፡ ኣብ ኣፍ ድንኳን ደው ኢሉ ድማ ንኣሮንን ንሚርያምን ጸውዖም፡ ክልቲኦም ከኣ ወጹ።⁶በሎም ድማ፡ ዘረባይ ደኣ ስምዑ፡ ኣብ ማእከልኩም ነብዪ እንተሎ፡ ኣነ እግዚኣብሄር ብራእይ እግለጸሉ፡ ብሕልሚ እዛረቦ።⁷ባርያይ ሙሴስ ከምኡ ኣይኰነን፡ ንሱ ኣብ ብዘላ ቤተይ እሙን እዩ።⁸ብግልጺ እምበር፡ ብኽዉል ዘረባ ኣይኰነን፡ ኣፍ ንኣፍ እዛረቦ፡ ንሱ ምስሊ እግዚኣብሄር ከኣ ይርኢ። ከመይከ ኣብ ባርያይ ኣብ ሙሴ ምዝራብ ዘይፈራህኩም፡⁹ኲራ እግዚኣብሄር ኣባታቶም ነደደ፡ ከደ ድማ።¹⁰እቲ ደበና ኸኣ ናብ ልዕሊ ድንኳን ኣግለሰ፡ እንሆ ኸኣ፡ ሚርያም ለምጻም ኰነት፡ ከም በረድ ጻዕደወት። ኣሮን ድማ ናብ ሚርያም ግልጽ በለ፡ እነሆ ኸኣ ለምጻም ኰይና ነበረት።¹¹ሽዑ ኣሮን ንሙሴ፡ ኣየ ጐይታይ፡ ስለቲ ብዕሽነትና ዝገበርናዮን ዝበደልናዮን፡ በጃኻ፡ ሓጢኣት ኣይተጹረና።¹²በጃኻ፡ ብምዉቱ ኸም እተወልደ፡ ካብ ከርሲ ኣዲኡ ኽወጽእ ከሎ ፈረቓ ስጋኡ ኸም እተወድኣ ትኹን፡ ኣይትሕደጋ፡ በሎ።¹³ሙሴ ድማ ንእግዚኣብሄር፡ ዎ ኣምላኽ፡ እልምነካ ኣሎኹ ኣሕውያ፡ ኢሉ ጨርሐ።¹⁴እግዚኣብሄር ከኣ ንሙሴ፡ ኣቦኣ ኣብ ገጻ ጡፍ እንተ ዝብለላስ፡ ሾብዓተ መዓልቲዶ ኣይምሓፈረትን፧ ኣብ ወጻኢ ሰፈር ሾብዓተ መዓልቲ ትተዓጾ፡ ደሓር ከኣ ትእቶ፡ በሎ።¹⁵ሚርያም ድማ ኣብ ወጻኢ ሰፈር ሾብዓተ መዓልቲ ተዓጽወት። እቲ ህዝቢ ኸኣ፡ ሚርያም ክሳዕ እትምለስ፡ ኣይነቐለን።¹⁶ድሕርቲ እቲ ህዝቢ ኻብ ሓጸሮት ተጓዕዘ፡ ኣብ በረኻ ጳራን ድማ ሰፈረ።

ዘሁልቁ ምዕራፍ 13

   ¹እግዚኣብሄር ድማ ንሙሴ ኸምዚ ኢሉ ተዛረቦ፡²ነታ ኣነ ንደቂ እስራኤል ዝህቦም ምድሪ ኸነኣን ዝስልዩ ሰባት ስደድ፡ ከካብ ነገድ ኣቦታቶም ሓደ ሰብ፡ ኲሎም ካብቶም ሹማምቶም ይስደዱ።
   ³ሙሴ ድማ ከምቲ ትእዛዝ እግዚኣብሄር ካብ በረኻ ጳራን ሰደዶም። እዞም ሰባት እዚኦም ኲሎም ሓላቑ ደቂ እስራኤል ነበሩ።⁴ስሞም ከኣ እዚ እዩ፡ ካብ ነገድ ሮቤል ሻሙዓ ወዲ ዛኩር፡⁵ካብ ነገድ ስምኦን ሻፋት ወዲ ሖሪ፡⁶ካብ ነገድ ይሁዳ ካሌብ ወዲ የፋነ፡⁷ካብ ነገድ ይሳኮር ይግኣል ወዲ ዮሴፍ፡⁸ካብ ነገድ ኤፍሬም ሆሸዓ ወዲ ነዌ፡⁹ካብ ነገድ ብንያም ጳልጢ ወዲ ራፋ፡¹⁰ካብ ነገድ ዛብሎን ጋዲኤል ወዲ ሶዲ፡¹¹ካብ ነገድ ዮሴፍ፡ ማለት ካብ ነገድ ምናሴ፡ ጋድ ወዲ ሱሲ፡¹²ካብ ነገድ ዳን ዓሚኤል ወዲ ግማሊ፡¹³ካብ ነገድ እሴር ስቱር ወዲ ሚካኤል፡¹⁴ካብ ነገድ ንፍታሌም ናሕቢ ወዲ ዎፍሲ፡¹⁵ካብ ነገድ ጋድ ግዉኤል ወዲ ማኪ።¹⁶ስም እቶም ነታ ምድሪ ኽስልይዋ ሙሴ ዝሰደዶም ሰባት እዚ እዩ። ሙሴ ንሆሼዓ ወዲ ነዌ፡ እያሱ ኣውጽኣሉ።
   ¹⁷ሙሴ፡ ምድሪ ኸነኣን ክስልዩ፡ ሰደዶም። በሎም ከኣ፡ ካብዚ ንደቡብ ኬድኩም ናብ ኣኽራን ደይቡ፡¹⁸እታ ሃገር ድማ ንሳ ኸመይ ከም ዝዀነት፡ እቲ ኣብኣ ዝነብር ህዝቢውን ሓያል እንተ ዀይኑ ወይ ድኹም፡ ሒደት እንተ ዀይኑ ወይ ብዙሕ፡¹⁹እታ ዝነብርዋ ምድሪ ድማ ኸመይ ምዃና፡ ንሳ ጽብቕቲ እንተ ዀይና ወይ ሕማቕ፡ እተን ዚነብሩለን ከተማታት ከኣ ከመይ ምዃነን፡ ሰፈር እንተ ዀይነን ወይ ዕርድታት፡²⁰እታ ምድሪውን ከመይ ምዃና፡ ንሳ ረጓድ እንተ ዀይና ወይ ረቃቕ፡ ኣእዋም እንተለዋ ወይ እንተ ዘይብላ፡ ርኣዩ። ትብዑ ኸኣ ካብ ፍረ እታ ምድሪ ድማ ኣምጽኡ። እተን መዓልትታት እቲኤን ከኣ እቲ ቐዳማይ ፍረ ወይኒ ዝበስለለን ግዝያት ነበራ።
   ²¹ንሳቶም ከኣ ደይቦም ነታ ምድሪ ኻብ በረኻ ጺን ክሳዕ እታ ኣብ መእተዊ ሃማት ዘላ ሬሖብ ሰለይዋ።²²ናብ ደቡብ ከኣ ደየቡ፡ ናብ ኬብሮንውን ኣተዉ፡ ኣብኣ ድማ ኣሒማን፡ ሼሻይን ታልማይን ደቂ ዓናቅ ነበሩ። ኬብሮን ከኣ ሾብዓተ ዓመት ቅድሚ እታ ኣብ ግብጺ ዘላ ጾዓን ተሰርሐት።²³ናብ ርባ ኤሽኮል ከኣ መጹ፡ ካብኣ ድማ ሓደ ጨንፈር ምስ ሓደ ኣስካል ወይኒ ቘሪጾም፡ ክልተ ዀይኖም ብመሰላ ጾርዎ። ካብ ሮማንን ካብ በለስን ከኣ ተማልኡ።²⁴እታ ቦታ እቲኣ፡ ብዛዕባ እቲ ደቂ እስራኤል ካብኣ ዝቘረጽዎ ኣስካል፡ ለሰ ኤሽኮል ተባህለት።²⁵ኣብ መወዳእታ ኣርብዓ መዓልቲ ድማ ካብ ምስላይ እታ ምድሪ ተመልሱ።²⁶ከይዶም ከኣ ኣብ በረኻ ጳራን ኣብ ቃዴስ ናብ ሙሴን ናብ ኣሮንን ናብ ብዘሎ ኣኼባ ደቂ እስራኤልን መጹ። ንኣታቶምን ንብዘሎ ኣኼባን እቲ ነገር ኣዛረብዎም፡ ፍረ እታ ምድሪውን ኣርኣይዎም።²⁷ከምዚ ኢሎም ድማ ኣዘንተዉሉ፡ ናብታ ዝሰደድካና ሃገር በጻሕና፡ ብሓቂ ኸኣ ንሳ ጸባን መዓርን እተውሕዝ እያ፡ ፍሬኣ ኸኣ እዚ እዩ።²⁸ኣብታ ሃገር ዝነብር ህዝቢ ግና ሓያል እዩ፡ እተን ከተማታት ከኣ እተዓርዳን ኣዝየን ዓበይትን እየን፡ ኣብኡ ድማ ደቂ ዓናቅ ርኤና።²⁹ኣብ ሃገር ደቡብ ኣማሌቅ ይነብር ኣሎ፡ ኣብ ኣኽራን ከኣ ሔታውያንን ይቡሳውያንን ኣሞራውያንን ይነብሩ ኣለዉ፡ ኣብ ጥቓ ባሕርን ብሸነኽ ዮርዳኖስን ድማ ከነኣናውያን ይነብሩ ኣለዉ።
   ³⁰ካሌብ ከኣ ነቲ ህዝቢ ኣብ ቅድሚ ሙሴ ኣህድኦ፡ ኣጸቢቕና ንኽእላ ኢና እሞ፡ ንደይብ ደኣ ነታ ምድሪ ንውረሳ፡ ድማ በለ።³¹እቶም ምስኡ ደይቦም ዝነበሩ ሰባት ግና፡ ንሱ ኻባና ዝሕይል እዩ እሞ፡ ናብቲ ህዝቢ እቲ ኽንድይብ ኣይንኽእልን ኢና፡ በሉ።³²ብዛዕባ እታ ዝሰለይዋ ምድሪ ኸኣ ንደቂ እስራኤል ከምዚ ኢሎም ክፉእ ነገር ኣውረዩሎም፡ እታ ኽንስልያ ዝሓለፍናያ ምድሪ፡ ንሳ ነቶም ዝነብርዋ እትውሕጥ ምድሪ እያ፡ እቶም ኣብኣ ዝርአናዮም ኲሎም ህዝቢ ኸኣ ነዋሕቲ ሰባት እዮም።³³ኣብኣ ድማ ካብ ንጉዓት ዓሌት፡ ንጉዓት ደቂ ዓናቅ ርአና። ንሕና ኣብ ዓይንና ኸም ኣምበጣ ዀንና፡ ኣብ ኣዒንቶም ከኣ ከምኡ ነበርና።

ዘሁልቁ ምዕራፍ 14

   ¹ብዘለዉ እቶም ኣኼባ ድማ ቃሎም ዓው ኣቢሎም ጨርሑ፡ እቲ ህዝቢ ኸኣ በታ ለይቲ እቲኣ ኽበኪ ሓደረ።²ኲሎም ደቂ እስራኤል ድማ ኣብ ሙሴን ኣብ ኣሮንን ኣጕረምረሙ፡ ብዘሎ እቲ ኣኼባ ኸኣ በሎም፡ ኣብ ምድሪ ግብጺ ኸም ሞትና ወይ ኣብዚ በረኻ እዚ ኸም ሞትና መን ምሃበና።³ንሕና ብሴፍ ክንወድቕ፡ ኣንስትናን ደቅናን ከኣ ክማረኹ፡ ንምንታይ እግዚኣብሄር ናብዛ ምድሪ እዚኣ ኣእተወና፧ ናብ ግብጺ እንተ ንምለስዶ ግዳ ኣይምሕሸናን፧⁴ንሓድሕዶም ከኣ፡ ሓለቓ ግዳ ንሽም እሞ ናብ ግብጺ ንመለስ፡ ተባሃሃሉ።⁵ሽዑ ሙሴን ኣሮንን ኣብ ቅድሚ ብዘላ እታ ማሕበር ኣኼባ ደቂ እስራኤል ብገጾም ተደፍኡ።⁶እያሱ ወዲ ነዌን ካሌብ ወዲ ዮፋነን፡ ካብቶም ሰለይቲ እታ ሃገር ዝነበሩ፡ ክዳውንቶም ቀደዱ፡⁷ንብዘሎ ኣኼባ ደቂ እስራኤል ከኣ ከምዚ ኢሎም ተዛረቡ፡ እታ ኽንስልያ ዝሓለፍናያ ምድሪ ኣዝያ፡ ኣዝያ ጽብቕቲ ምድሪ እያ።⁸እግዚኣብሄር እንተ ፈትዩናስ፡ ናብታ ጸባን መዓርን እተውሕዝ ምድሪ፡ ናብታ ምድሪ እቲኣ ኸእትወና፡ ንሳውን ክህበና እዩ።⁹ኣብ እግዚኣብሄር ግዳ ኣይትዓምጹ፡ ንሳቶም እንጌራና እዮም እሞ፡ ንስኻትኩም ንህዝቢ እታ ምድሪ ኣይትፍርህዎም። እቲ ዘጽልሎም ካባታቶም ኣግሊሱ፡ እግዚኣብሄር ከኣ ምሳና እዩ፡ ኣይትፍርህዎም።¹⁰ብዘሎ እቲ ኣኼባ ግና ብዳርባ እምኒ ክቐትሎም ተዛራረበ። ክብሪ እግዚኣብሄር ከኣ ኣብ ድንኳን ምርዃብ ንዅሎም ደቂ እስራኤል ተራእየ።
   ¹¹እግዚኣብሄር ድማ ንሙሴ፡ እዚ ህዝቢ እዚ ኽሳዕ መኣዝ እዩ ዝንዕቀኒ፡ ክሳዕ መኣዝከ እዮም በቲ ዅሉ ኣብ ማእከሎም ዝገበርክዎ ትእምርትታት ዘይኣምኑኒ፧¹²ብፌራ ኽወቕዖምን ከጥፍኦምን እየ፡ ንኣኻ ግና ካባታቶም ዝዓብን ዝብርትዕን ህዝቢ ኽገብረካ እየ፡ በሎ።
   ¹³ሙሴ ኸኣ ንእግዚብሄር በሎ፡ እቶም ግብጻውያን፡ ንስኻ እኳ ነዚ ህዝቢ ኻብ ማእከሎም ብሓይልኻ ዘደየብካዮ፡ እዚ ኽሰምዑ እዮም።¹⁴ነዞም ኣብዛ ምድሪ እዚኣ ዝነብሩ ድማ ክነግሩ እዮም፡ ንስኻ እግዚኣብሄር ኣብ ማእከል እዚ ህዝቢ እዚ ኸም ዘሎኻ፡ ንስኻ እግዚኣብሄር ገጽ ንገጽ ከም እተርኣኻ፡ ደበናኻውን ኣብ ልዕሊኦም ከም ዝቐውም፡ መዓልቲ ብዓንዲ ደበና፡ ለይቲ ኸኣ ብዓንዲ ሓዊ ቐቅድሚኦም ከም እትኸይድ ድማ ሰሚዖም ኣለዉ።¹⁵ሕጂ ኸኣ ነዚ ህዝቢ እዚ ኸም ንሓደ ሰብ ጌርካ እንተ ቐተልካዮ፡ ሽዑ እቶም ወሬኻ ዝሰምዑ ህዝብታት፡¹⁶እግዚኣብሄር ነዚ ህዝቢ እዚ ናብታ ዝመሓለሎም ምድሪ ኸእትዎም ስለ ዘይከኣለ፡ ኣብ በረኻ ሓረዶም፡ ኢሎም ክዛረቡ እዮም።¹⁷ሕጂ ኸኣ እልምነካ ኣሎኹ፡ ሓይሊ እግዚኣብሄር ይዕበ፡ ከምቲ እተዛረብካዮ ኸምዚ ኢልካ፡¹⁸እግዚኣብሄር ንዅራ ደንጓዪ፡ በዓል ብዙሕ ምሕረት እዩ፡ ንሱ በደልን ሓጢኣትን ይቕረ ይብል፡ ሓጢኣት ኣቦታት ኣብ ውሉድ ክሳዕ ሳልሳይን ኽሳዕ ራብዓይን ወለዶ ይቐጽዕ እምበር፡ ንበዳሊ ኸይቀጽዐ ኣይሓድጎን።¹⁹ነዚ ህዝቢ እዚ ኸምቲ ኻብ ግብጺ ሒዝካ ኽሳዕ ናብዚ ይቕረ ዝበልካሉ፡ ሕጂ ኸኣ እልምነካ ኣሎኹ፡ ነዚ ህዝቢ እዚ ኸምቲ ዓብዪ ምሕረትካ ሓጢኣቱ ሕደገሉ።²⁰እግዚኣብሄር ድማ በለ፡ ከምቲ ቓልካ ይቕረ ኢለ እየ።²¹ግናኸ ኣነ ብሓቂ ህያው እየ፡ ብዘላ ምድሪ ኸኣ ብኽብሪ እግዚኣብሄር ክትመልኣ እያ፡²²ኲሎም እቶም ክብረይን ኣብ ግብጽን ኣብ በረኻን ዝገበርክዎ ተኣምራተይን ዝረኣዩ ሰባት፡ ድሮ ዓሰርተ ሳዕ ፈተኑኒ፡ ቃለይ ከኣ ኣይሰምዑን፡²³ነታ ነቦታቶም ዝመሓልኩሎም ምድሪ ከኣ ኣይርእይዋን፡ ካብቶም ዝነዓቑኒውን ሓደ እኳ ኣይርእያን።²⁴ንባርያይ ካሌብ ግና፡ ካልእ መንፈስ ስለ ዝነበሮ ፈጺሙውን ስለ ዝሰዓበኒ፡ ናብታ ኣትይዋ ዝነበረ ሃገር ከእትዎ እየ፡ ዘርኡ ኸኣ ክወርሳ እዩ።²⁵ኣብ ለሰ ድማ ኣማሌቃውያንን ከነኣናውያንን ይነብሩ ኣለዉ እሞ፡ ጽባሕ ተመለሱ፡ ብመገዲ ባሕሪ ኤርትራ ኣቢልኩም ናብ በረኻ ተጐዓዙ።
   ²⁶እግዚኣብሄር ድማ ንሙሴን ንኣሮንን ከምዚ ኢሉ ተዛረቦም፡²⁷ነዚ ዘጕረምርመለይ ሕሱም ኣኼባ እዚ ኽሳዕ መኣዝ ክጾሮ እየ፧ እቲ ደቂ እስራኤል ዘጕረምርሙለይ ምጕርምራም ሰሚዔ ኣሎኹ።²⁸በሎም ከኣ፡ ኣነ ህያው እየ፡ ከምቲ ኣብ እዝነይ እተዛረብኩምዎ፡ ከምኡ ኽገብረኩም እየ፡ ይብል እግዚኣብሄር፡²⁹ኣቱም ዘጉረምረምኩምለይ ኲላትኩም እተቘጸርኩም፡ ከምቲ ዅሉ ቑጽርኹም፡ ካብ ወዲ ዕስራ ዓመት ንላዕሊ፡ ሬሳኹም ኣብዚ በረኻ እዚ ኽወድቕ እዩ።³⁰ናብታ ኣብኣ ከናብረኩም ኢለ ኢደይ ዘልዓልኩላ ምድሪ፡ ብጀካ ካሌብ ወዲ የፋነን እያሱ ወዲ ነዌን፡ ንስኻትኩም ኣይትኣትዉን።³¹ነቶም ምርኮ ክዀኑ እዮም ዝበልኩምዎም ደቅኹም ግና ከእትዎም እየ፡ ነታ ዝነዓቕኩምዋ ምድሪ ኽፈልጥዋ እዮም።³²ንስኻትኩም ግና፡ ሬሳኹም ኣብዚ በረኻ እዚ ኽወድቕ እዩ።³³ደቅኹም ከኣ ኣብ በረኻ ኣርብዓ ዓመት ጓሶት ክዀኑ እዮም፡ ሬሳኹም ኣብ በረኻ ኽሳዕ ዝጠፍእ ከኣ ምንዝርናኹም ክጾሩ እዮም።³⁴ከም ቁጽሪ እተን ነታ ሃገር ዝሰሌኹምለን መዓልታት፡ ኣርብዓ መዓልቲ፡ ሓንቲ ዓመት ሓጢኣትኩም ክትጾሩ ኢኹም፡ ካባኻትኩም ከም ዝረሓቕኩ ኸኣ፡ ክትፈልጡ ኢኹም።³⁵ኣነ እግዚኣብሄር እየ እተዛረብኩ፡ ነዚ ዅሉ ኣባይ ብሓደ እተሓባበረለይ ሕሱም ኣኼባ ብሓቂ ኸምኡ ኽገብሮ እየ፡ ኣብዚ በረኻ እዚ ኽውድኡ እዮም፡ ኣብኡውን ክሞቱ እዮም።
   ³⁶እቶም ምድሪ ኽስልዩ ሙሴ ዝሰደዶም ሰባት ተመሊሶም ድማ ብዛዕባ እታ ምድሪ ኽፉእ ብምውራዮም ንብዘሎ እቲ ኣኼባ ኣብ ልዕሊኡ ዘጕረምረሙሉ፡³⁷እቶም ብዛዕባ እታ ምድሪ ኽፉእ ዘውረዩ ሰባት ብመቕዘፍቲ ኣብ ቅድሚ እግዚኣብሄር ሞቱ።³⁸ካብቶም ምድሪ ኽስልዩ ኸይዶም ዝነበሩ ሰባት ግና፡ እያሱ ወዲ ነዌን ካሌብ ወዲ የፋነን ብህይወት ተረፉ።
   ³⁹ሙሴ ድማ እዚ ቓላት እዚ ንዅሎም ደቂ እስራኤል ተዛረቦም። እቲ ህዝቢ ኸኣ ብዙሕ ሓዘነ።⁴⁰ንብጊሓቱ ድማ ኣንጊሆም ተንስኡ፡ በዲልና ኢና እሞ፡ እኔና ናብታ እግዚኣብሄር ዝበለና ቦታ ንድይብ ኣሎና፡ ኢሎምውን ናብ ርእሲ እቲ ኸረን ደየቡ።⁴¹ሙሴ ግና በሎም፡ ሕጂ ንስኻትኩም ስለምንታይ ትእዛዝ እግዚኣብሄር እትጥሕሱ፧ ኣይቐንዓኩምን እዩ።⁴²እግዚኣብሄር ኣብ ማእከልኩም ኣይኰነን እሞ፡ ብጸላእትኹም ከይትስዓሩ፡ ኣይትደይቡ።⁴³ኣብኡ ኣማሌቃውያንን ከነአናውያንን ኣብ ቅድሜኹም ኣለዉ እሞ፡ ብሴፍ ክትወድቁ ኢኹም። ንእግዚኣብሄር ካብ ምስዓብ ስለ እተመለስኩም፡ እግዚኣብሄር ከኣ ምሳኻትኩም ኣይኸውንን እዩ።⁴⁴ንሳቶም ግና ናብ ርእሲ እቲ ኸረን ክድይቡ ደፈሩ፡ ታቦት ኪዳን እግዚብሄርን ሙሴን ግና ካብ ሰፈር ኣይለቐቑን።⁴⁵እቶም ኣብቲ ኸረን ዝነበሩ ኣማሌቃውያንን ከነኣናውያንን ድማ ወሪዶም ወቕዕዎም፡ ክሳዕ ሖርማ ኸኣ ቀጥቀጥዎም።

ዘሁልቁ ምዕራፍ 15

   ¹እግዚኣብሄር ድማ ንሙሴ ኸምዚ ኢሉ ተዛረቦ።²ንደቂ እስራኤል ተዛረቦም በሎም ከኣ፡ ናብታ ኽትነብርዋ ኣነ ዝህበኩም ምድሪ ምስ ኣቶኹም፡³ንእግዚኣብሄር መስዋእቲ ሓዊ፡ ዝሓርር መስዋእቲ ወይ መስዋእቲ ሕሩድ፡ ንምፍጻም መብጽዓ ወይ መስዋእቲ ፍቓድ ወይ ናይ በዓላትኩም ብኣሓ ወይ ብጤለበጊዕ ንእግዚኣብሄር ጥዑም ጨና ኽትገብሩ እንተ ትስውኡ፡⁴ሽዑ እቲ መስዋእቱ ንእግዚኣብሄር ዘቕርብ ንመስዋእቲ ብልዒ ዓስራይ ኣፍ ኤፋ ድኹም ሓርጭ፡ ብርብዒ ሂን ዘይቲ እተቘምጥዐ፡ የቕርብ።⁵ንመስዋእቲ መስተ ኸኣ ምስቲ ዝሓርር መስዋእቲ ወይ መስዋእቲ ሕሩድ ነንሓደ ገንሸል ርብዒ ሂን ወይኒ ግበር።⁶ወይ ንድዑል መስዋእቲ ብልዒ ኽልተ ዓስራይ ኣፍ ኤፋ ድኹም ሓርጭ፡ ብሲሶ ሂን ዘይቲ እተቘምጥዐ፡ ግበር።⁷ንመስዋእቲ መስተ ድማ ሳልሳይ ኣፍ ሂን ወይኒ ንእግዚኣብሄር ንጥዑም ጨና ኣቕርብ።⁸ንዝሓርር መስዋእቲ ወይ ንመስዋእቲ ሕሩድ ድማ ንምፍጻም መብጽዓ ወይ መስዋእቲ ምስጋና ንእግዚኣብሄር ዝራብዕ እንተ ኣቕረብካ፡⁹ሽዑ ምስቲ ዝራብዕ ንመስዋእቲ ብልዒ ሰለስተ ዓስራይ ኣፍ ኤፋ ድኹም ሓርጭ፡ ብፈረቓ ሂን ዘይቲ እተቘምጥዐ፡ ኣቕርብ።¹⁰ንመስዋእቲ መስተ ድማ፡ መስዋእቲ ሓዊ ንእግዚኣብሄር ንጥዑም ጨና ፈረቓ ሂን ወይኒ ኣቕርብ።¹¹ከምኡ ነንብዕራይ ወይ ነንድዑል ወይ ነንገንሸል ወይ ነንወጠጦ ይገበር።¹²ከም ቁጽሪ እቶም እትስውእዎም፡ ከምኡ ነንሓዲኦም ከም ቁጽሮም ግበሩ።¹³ወዲ ዓዲ ዘበለ መስዋእቲ ሓዊ ንእግዚኣብሄር ንጥዑም ጨና ምስ ዘቕርብ፡ ነዚ ነገር እዚ ኸምዚ ይግበር።¹⁴ምሳኻትኩም ዝቕመጥ ጓና ወይ ንውሉድ ወለዶኹም ኣብ ማእከልኩም ዝነብር፡ ንእግዚኣብሄር ንጥዑም ጨና መስዋእቲ ምስ ሓዊ ምስ ዘቕርብ፡ ንሱ ኸምቲ ንስኻትኩም እትገብርዎ፡ ከምኡ ይግበር።¹⁵ኣብታ ማሕበር ንኣኻትኩምን ነቲ ምሳኻትኩም ዝነብር ጓናን ሓደ ሕጊ ይኹን። እዚ ንውሉድ ወለዶኹም ሕጊ ዘለኣለም ይኹን፡ ኣብ ቅድሚ እግዚኣብሄር እቲ ጓና ኸማኻትኩም ይኹን።¹⁶ንኣኻትኩምን ነቲ ምሳኻትኩም ዝነብር ጓናን ሓደ ሕግን ሓደ ፍርድን ይኹን።
   ¹⁷እግዚኣብሄር ድማ ንሙሴ ኸምዚ ኢሉ ተዛረቦ፡¹⁸ንደቂ እስራኤል ተዛረቦም በሎም ከኣ፡ ናብታ ኣነ ዘእትወኩም ምድሪ ምስ ኣቶኹም፡¹⁹ሽዑ ክኸውን እዩ፡ ካብ እንጌራ እታ ምድሪ ምስ እትበልዑ፡ ንእግዚኣብሄር ዝልዓል መስዋእቲ ኣቕርቡ።²⁰ካብ ቀዳማይ ብሑቑኩም ዝልዓል መስዋእቲ ሓደ ቕጫ ኣቕርቡ፡ ከምቲ ኻብ ዓውዲ ዝዓልዐል መስዋእቲ እትገብርዎ፡ ከምኡ ኣልዕልዎ።²¹ካብቲ ቐዳማይ ብሑቑኩም ንውሉድ ወለዶኹም ዝልዓል መስዋእቲ ንእግዚኣብሄር ሃቡ።
   ^22-23እተን ተጋጌኹም፡ እዚ እግዚኣብሄር ንሙሴ ዝነገሮ ዅሉ ትእዛዛት እዚ፡ እቲ እግዚኣብሄር ብኢድ ሙሴ ዝኣዘዘኩም ኲሉ፡ ካብታ እግዚኣብሄር ትእዛዛት ዝሃበላ መዓልቲ ንንየው ከኣ ክሳዕ ውሉድ ወለዶኹም እንተ ዘይሓሎኹምዎ፡²⁴እዚ ድማ፡ እቲ ኣኼባ ኸይፈለጠ፡ ብጌጋ እንተ ተገብረ፡ ሽዑ ብዘሎ እቲ ኣኼባ ንእግዚኣብሄር ንጥዑም ጨና ንዝሓርር መስዋእቲ ኸምቲ ስርዓቱ፡ ምስ ናይ ብልዒ መስዋእቱን ምስ ናይ መስተ መስዋእቱን ንመስዋእቲ ሓጢኣት ድማ ሓደ ድቤላ የቕርብ።²⁵ንሱ ብጌጋ እተገብረ እዩ፡ ንሳቶም ከኣ መስዋእቶም፡ መስዋእቲ ሓዊ ንእግዚኣብሄር ኣምጽኡ፡ ብዛዕባ ጌጋኦም ድማ ናይ ሓጢኣት መስዋእቶም ኣብ ቅድሚ እግዚኣብሄር ኣቕሪቦም እዮም እሞ፡ እቲ ኻህን ከኣ ንብዘሎ ኣኼባ ደቂ እስራኤል የተዓርቕ፡ ሽዑ ይሕደገሎም እዩ።²⁶ኣብ ብዘሎ ህዝቢ ብዘይ ፍልጠት እተገብረ እዩ እሞ፡ ንብዘሎ ኣኼባ ደቂ እስራኤልን ኣብ ማእከሎም ንዝነብር ጓናን ይሕደገሎም እዩ።
   ²⁷ሓደ ሰብ ብጌጋ ሓጢኣት እንተ ገበረ፡ ንመስዋእቲ ሓጢኣት ኣርሕዶ ዓመት የቕርብ።²⁸ነቲ ብጌጋ ኣብ ቅድሚ እግዚኣብሄር ሓጢኣት ዝገበረ ሰብ ከኣ ንምትዕራቑ እቲ ኻህን የተዓርቆ፡ ሽዑ ይሕደገሉ እዩ።²⁹ብዛዕባ እቲ ብጌጋ ዝግበር ነገር ንወዲ ዓዲ ኻብ ደቂ እስራኤልን ኣብ ማእከሎም ንዝነብር ጓናን ሓደ ሕጊ ይኹነልኩም።³⁰ወዲ ዓዲ ዀነ ወይ ጓና፡ እቲ ብልዕልቲ ኢድ ሓጢኣት ዝገብር ሰብ ግና፡ ንሱ ንእግዚብሄር ኣዋሪዱ እዩ እሞ፡ እቲ ሰብ እቲ ኻብ ማእከል ህዝቡ ይመንቈስ።³¹ቃል እግዚኣብሄር ንዒቑ፡ ትእዛዙ ኸኣ ኣፍሪሱ እዩ እሞ፡ ንሱ ፈጺሙ ይመንቈስ፡ ሓጢኣቱ ኣብ ርእሱ እዩ።
   ³²ደቂ እስራኤል ኣብ በረኻ ኸለዉ፡ ሓደ ሰብኣይ ብመዓልቲ ሰንበት ዕጨይቲ ኽኣሪ ረኸቡ።³³እቶም ዕጨይቲ ኽኣሪ ዝረኸብዎ ኸኣ ናብ ሙሴን ናብ ኣሮንን ናብ ብዘሎ ኣኼባን ኣቕረብዎ።³⁴እቲ ኽገብርዎ ዝግባእ ኣይተገልጸን ነበረ እሞ፡ ኣብ ቤት ማእሰርቲ ኣእተውዎ።³⁵እግዚኣብሄር ድማ ንሙሴ፡ እቲ ሰብኣይ እቲ ሞት ይሙት፡ ብዘሎ እቲ ኣኼባ ኣብ ወጻኢ ሰፈር ብዳርባ እምኒ ይቕተሎ፡ በሎ።³⁶ከምቲ እግዚኣብሄር ንሙሴ ዝኣዘዞ ድማ፡ ብዘሎ እቲ ኣኼባ ናብ ወጻኢ ሰፈር ኣውጽኦ፡ ብዳርባ እምኒ ቐተልዎ፡ ሞተ ኸኣ።
   ³⁷እግዚኣብሄር ድማ ንሙሴ ኸምዚ ኢሉ ተዛረቦ፡³⁸ንደቂ እስራኤል ተዛረቦም በሎም ድማ፡ ንውሉድ ወለዶኹም ኣብ ወሰን ክዳውንቶም ኣዝፋር ኪገብሩ፡ ኣብ ዘዘፈር ወሰን ከኣ ሰማያዊ ፍሕሶ ኽገብሩ ንገሮም።³⁹ነቲ ብእኡ ናብ ምንዝርና እትኸዱ ዘሎኹም፡ ደድሕሪ ድሌት ልብኹምን ዓይንኹምን ከይትስዕቡ፡ ንእኡ ርኢኹም ንዅሉ ትእዛዛት እግዚኣብሄር ምእንቲ ኽትዝክርዎን ክትገብርዎን፡ ዘፈር መዘከሪ ይኹነልኩም።⁴⁰ንዅሉ ትእዛዛተይ ምእንቲ ኽትዝክርዎን ክትገብርዎን፡ ንኣምላኽኩም ከኣ ቅዱሳን ክትዀኑ እዩ።⁴¹ኣምላኽኩም ምእንቲ ኽኸውን፡ ካብ ምድሪ ግብጺ ዘውጻእኩኹም ኣነ እግዚኣብሄር ኣምላኽኩም እየ። ኣነ እግዚኣብሄር ኣምላኽኩም እየ።

ዘሁልቁ ምዕራፍ 16

   ¹ቆራሕ ወዲ ይጽሃር፡ ወዲ ቃሃት ወዲ ሌዊ፡ ዳታንን ኣቢራምን ደቂ ኤልያብ፡ ኦን ከኣ ወዲ ጴሌት፡ ደቂ ሮቤል፡²ሓያሎ ሰባት ካብ ደቂ እስራኤል፡ ክልተ ሚእትን ሓምሳን ሹማምቲ እቲ ኣኼባ፡ ብማሕበር እተጸውዑ ስሙያት ሰባት ሒዞም ንሙሴ ተላዕልዎ።³ንሙሴን ንኣሮንን ክጻረሩ ተኣኪቦም ድማ፡ ብዘለዉ ኣኼባ ዅሎም ቅዱሳን እዮም፡ እግዚኣብሄር ድማ ኣብ ማእከሎም እዩ እሞ፡ እምብዛ ኣብዚሕኩምዎ፡ ስለምንታይ ኣብ ልዕሊ ማሕበር እግዚኣብሄር ትዕበዩ ኣሎኹም፧ በልዎም።
   ⁴ሙሴ እዚ ምስ ሰምዐ፡ ብገጹ ተደፍአ።⁵ንቆራሕን ነቶም ኣኼባኡን ከምዚ ኢሉ ተዛረቦም፡ እግዚኣብሄር ጽባሕ እቲ ናቱ ዝዀነን እቲ ቕዱስን እቲ ናብኡ ዘቕርቦን መን ከም ዝዀነ፡ ከፍልጥ እዩ። ነቲ ዝሓረዮ ኸኣ ናብኡ ከቕርቦ እዩ።⁶ከምዚ ግበሩ፡ ቆራሕን ብዘሎ ኣኼባኡን ጸጽንሃህኩም ውሰዱ፡⁷ጽባሕ ድማ ኣብ ቅድሚ እግዚኣብሄር ሓዊ ግበሩሉ፡ ዕጣን ከኣ ኣእትዉሉ። ክኸውን ድማ እዩ፡ እቲ እግዚኣብሄር ዛሓርዮ ሰብኣይ፡ ንሱ ቅዱስ ይኹን። ኣቱም ደቂ ሌዊ፡ እምብዛ ኣብዚሕኩምዎ።
   ⁸ሙሴ ኸኣ ንቆራሕ በሎ፡ ኣቱም ደቂ ሌዊ፡ ሕጂ ስምዑ።⁹ኣብ ማሕበር እግዚኣብሄር ከተገልግሉ፡ ኣብ ቅድሚ ኣኼባ ደው ኢልኩም ከኣ ከተገልግልዎም፡ ኣምላኽ እስራኤል ናብኡ ከቕርበኩም ኢሉ፡ ካብ ኣኼባ እስራኤል ዝፈለየኩምዶ ውሒዱኩም እዩ፧¹⁰ንኣኻን ንዅሎም ኣሕዋትካ ደቂ ሌዊ ድማ ምሳኻን ናብኡ ኣቕሪቡኩምሲ፡ ክህነትዶ ድማ ደሊኹም፧¹¹ስለዚ ንስኻን ብዘሎ ኣኼባኻን ኣብ ልዕሊ እግዚኣብሄር ኢኹም እተኣከብኩም። ኣሮንከ፡ ኣብ ልዕሊኡ እተጕረምርሙ፡ ንሱ እንታይ እዩ፧
   ¹²ሙሴ ድማ ንዳታንን ኣቢራምን፡ ደቂ ኤልያብ፡ ክጽውዑሉ ለኣኸ። ንሳቶም ከኣ፡ ኣይንድይብን፡ በሉ።¹³ኣብ በረኻ ኽትቀትለና ኢልካ፡ ካብታ ጸባን መዓርን እተውሕዝ ምድሪ ዘውጻእካናዶ ውሒዱ እዩ፧ ኣብ ልዕሌና ኽትሽየምዶ ንርእስኻ ትሸይም፧¹⁴ብዝተረፈስ ጸባን መዓርን ናብ እተውሕዝ ምድሪ ኣየእቶኻናን። ግርሁን ኣታኽልቲ ወይንን ከኣ ኣየረስቴኻናን። ኣዒንቲ እዞም ሰባት እዚኦምዶ ኸተንቁር ደሊኻ ኢኻ፧ ኣይንድይብን።¹⁵ሙሴ ድማ ኣዝዩ ተናዲዱ ንእግዚኣብሄር፡ ናብ መስዋእቶም ኣይትጠምት፡ ካባታቶም ሓንቲ ኣድጊ እኳ ኣይወሰድኩን፡ ካባታቶም ንሓደ እኳ ኽፉእ ኣይገበርኩን፡ በሎ።
   ¹⁶ሙሴ ድማ ንቆራሕ፡ ጽባሕ ንስኻን ብዘሎ ኣኼባን፡ ንስኻን ንሳቶምን ኣሮንን ኣብ ቅድሚ እግዚኣብሄር ተረኸቡ።¹⁷ነፍሲ ወከፍ ከኣ ጽንሃሁ ይውሰድ፡ ዕጣን ድማ ይግበረሉ፡ ነፍሲ ወከፍ ጽንሃሁ ኽልተ ሚእትን ሓምሳን ጽንሃህ ኣብ ቅድሚ እግዚኣብሄር ኣቕርቡ፡ ንስኻን ኣሮንን ከኣ ነፍሲ ወከፍ ጽንሃሁ ይውሰድ፡ በሎ።¹⁸ነፍሲ ወከፍ ከኣ ጽንሃሁ ወሰደ፡ ሓዊ ድማ ገበረሉ፡ ኣብ ልዕሊኡ ከኣ ዕጣን ኣእተዉሉ፡ ምስ ሙሴን ኣሮንን ከኣ ኣብ ኣፍ ድንኳን ምርኻብ ደው በሉ።¹⁹ቆራሕ ድማ ንብዘሎ ኣኼባ ኣብ ልዕሊኦም ኣብ ኣፍ ድንኳን ምርኻብ ኣከቦ። ክብሪ እግዚኣብሄር ከኣ ንብዘሎ ኣኼባ ተራእየ።
   ²⁰እግዚኣብሄር ድማ ንሙሴን ንኣሮንን፡²¹ካብ ማእከል እዚ ኣኼባ እዚ ተፈለዩ፡ ብቕጽበት ዓይኒ ኽውድኦም እየ፡ ኢሉ ተዛረቦም።²²ሽዑ ንሳቶም፡ ኣታ ኣምላኽ፡ ኣምላኽ ነፍሳት ኲሉ ስጋ፡ ሓጢኣት ዝገበረስ ሓደ ሰብኣይ እዩ፡ ንብዘሎ ኣኼባዶ ኽትቁጥዖ ኢኻ፧ ኢሎም ብገጾም ተደፍኡ።²³እግዚኣብሄር ድማ ንሙሴ ኸምዚ ኢሉ ተዛረቦ፡²⁴ነቲ ኣኼባ ኻብ ዙርያ እቲ ሰፈር ቆራሕን ዳታንን ኣቢራምን ኣግልሱ፡ ኢልካ ተዛረቦም።
   ²⁵ሙሴ ድማ ተንሲኡ ናብ ዳታንን ኣቢራምን ከደ፡ እቶም ዓበይቲ እስራኤል ከኣ ሰዓብዎ።²⁶ነቲ ኣኼባ ኸኣ፡ በጃኹም፡ ካብ ድንኳውንቲ እዞም ሕሱማት ሰባት እዚኣቶም ኣግልሱ፡ ብዅሉ ሓጢኣቶም ከይትጠፍኡ ኸኣ ናቶም ዘበለ ኣይትተንክዩ፡ ኢሊ ተዛረቦም።²⁷ንሳቶምውን ካብ ዙርያ እቲ ሰፈር ቆራሕን ዳታንን ኣቢራምን ኣግለሱ። ዳታንን ኣቢራምን ግና ወጺኦም፡ ምስ ኣንስቶምን ደቆምን ሕጻናቶምን ኣብ ኣፍ ድንኳውንቶም ደው በሉ።²⁸ሙሴ ኸኣ፡ ካብ ፍቓደይ ዘይኰነ፡ ነዚ ዅሉ ግብሪ እዚ ኽገብር እግዚኣብሄር ከም ዝለኣኸኒ፡ በዚ ኽትፈልጡ ኢኹም።²⁹እዞም ሰባት እዚኦም ከም ኣማውታ ዅሉ ሰብ እንተ ሞቱ፡ ወይ ንዅሉ ሰብ ዝበጽሕ ጥራይ እንተ በጽሖም፡ ሽዑ እግዚኣብሄር ኣይለኣኸንን።³⁰እግዚኣብሄር ሓድሽ ነገር እንተ ገበረ ግና፡ እዚኣቶም ምስ ዅሉ ዘለዎም ብህይወቶም ናብ ሲኦል ክወርዱ፡ ምድሪ ኣፋ ኸፊታ እንተ ወሓጠቶም፡ ሽዑ እዞም ሰባት እዚኦም ንእግዚኣብሄር ከም ዝነዓቕዎ ኽትፈልጡ ኢኹም፡ በለ።³¹ኰነ ኸኣ፡ እዚ ዅሉ ተዛሪቡ ምስ ወድአ፡ ኣብ ትሕቲኦም ዘላ ምድሪ ተጨደት፡³²ምድሪ ኸኣ ኣፋ ኸፈተት፡ ንኣታቶምን ነባይቶምን ንዅሎም ናይ ቆራሕ ሰብን ንዅሉ ገንዘቦምን ወሓጠቶም።³³ንሳቶም ምስ ኲሉ ዘለዎም ብህይወቶም ናብ ሲኦል ወረዱ፡ ምድሪ ኸኣ ደፈነቶም፡ ካብ ማእከል ማሕበር ድማ ጠፍኡ።³⁴እቶም ኣብ ዙርያኦም ዝነበሩ ብዘለዉ እስራኤል ከኣ ጭራሕምራሖም ሰሚዖም፡ ንኣና ድማ ምድሪ ኸይትውሕጠና፡ ኢሎም ሃደሙ።³⁵ካብ እግዚኣብሄር ከኣ ሓዊ ወጸ፡ ነቶም ዝዓጥኑ ዝነበሩ ኽልተ ሚእትን ሓምሳን ሰባት ድማ በልዖም።
   ³⁶እግዚኣብሄር ድማ ንሙሴ ኸምዚ ኢሉ ተዛረቦ፡³⁷ንኣልኣዛር፡ ወዲ ኻህን ኣሮን፡ እቲ ጽንሃሃት ተቐዲሱ እዩ እሞ፡ ካብቲ ንዳድ ኣውጽኣዮ፡ ነቲ ሓዊ ኸኣ ናብዝን ናብትን ፋሕ ኣብሎ፡ በሎ።³⁸ነቲ ጽንሃሃት ናይቶም ብሓጢኣቶም ህይወቶም ዘጥፍኡ፡ እቲ መሰውኢ ብእኡ ኽልበጥ ኣርቂቖም ይቐጥቅጥዎ። ናብ ቅድሚ እግዚብሄር ኣቕሪቦምዎ እዮም እሞ፡ ተቐዲሱ እዩ። ንደቂ እስራኤል ድማ ትእምርቲ ይኹን።³⁹ኣልኣዛር ካህን ከኣ ነቲ እቶም ዝነደዱ ዘቕረብዎ ጽንሃሃት ኣስራዚ ወሰደ፡ ንመለበጢ መሰውኡ ክኸውን ከኣ ኣርቀቕዎ።⁴⁰ካብ ዘርኢ ኣሮን ዘይኰነ ጓና ሰብ ክዓጥን ኢሉ ናብ ቅድሚ እግዚኣብሄር ከይቐርብ፡ ከም ቆራሕን ከም ኣኼባኡን ከይኸውን፡ ከምቲ እግዚኣብሄር ብኢድ ሙሴ ዝበሎ፡ ንደቂ እስራኤል መዘከርታ ይኹን።
   ⁴¹ንጽብሒቱ ድማ ብዘሎ እቲ ኣኼባ ደቂ እስራኤል፡ ንስኻትኩም ንህዝቢ እግዚኣብሄር ቀተልኩምዎ፡ ኢሎም ኣብ ልዕሊ ሙሴን ኣሮንን ኣጕረምረሙ።⁴²ኰነ ኸኣ፡ እቲ ኣኼባ ናብ ልዕሊ ሙሴን ኣሮንን ምስ ተኣከበ፡ ናብ ድንኳን ምርኻብ ኣቢሎም ግልጽ በሉ፡ እንሆ ድማ፡ ደበና ኣጐልበቦ፡ ክብሪ እግዚኣብሄር ከኣ ተራእየ።⁴³ሙሴን ኣሮንን ድማ ናብ ቅድሚ ድንኳን ምርኻብ መጹ።^44-45እግዚኣብሄር ድማ ንሙሴ፡ ካብ ማእከል እዚ ኣኼባ እዚ ፍልይ በሉ፡ ኣነ ብቕጽበት ዓይኒ ኸጥፍኦም እየ፡ ኢሉ ተዛረቦም። ንሳቶም ብገጾም ተደፍኡ።⁴⁶ሙሴ ኸኣ ንኣሮን፡ ካብ ቅድሚ እግዚኣብሄር ቁጥዓ ወጺኡ፡ መዓት ጀሚሩ እዩ እሞ፡ ጽንሃህካ ወሲድካ፡ ካብ መሰውኢ ሓዊ ግበረሉ፡ ዕጣን ከኣ ኣእትወሉ፡ ቀልጢፍካ ድማ ናብቲ ኣኼባ ኺድ እሞ ኣተዓርቆም፡ በሎ።⁴⁷ኣሮን ከኣ፡ ከምቲ ሙሴ ዝበሎ፡ ጽንሃህ ወሰደ፡ ናብ ማእከል ማሕበር ድማ ጐየየ። እንሆ ኸኣ፡ እቲ መዓት ኣብቶም ህዝቢ ጀሚሩ ነበረ፡ ዕጣን ገይሩ ድማ ነቲ ህዝቢ ጀሚሩ ነበረ፡ ዕጣን ገይሩ ድማ ነቲ ህዝቢ ኣተዓርቖ።⁴⁸ኣብ መንጎ ምውታንን ህያዋንን ደው በለ፡ እቲ መዓት ከኣ ዝግ በለ።⁴⁹ብጀካ እቶም ብሰሪ ቆራሕ ዝሞቱ፡ እቶም ብመዓት ዝሞቱ ዓሰርተው ኣርባዕተ ሽሕን ሾብዓተ ሚእትን ኰኑ።⁵⁰ኣሮን ድማ ናብ ሙሴ ናብ ኣፍ ድንኳን ምርኻብ ተመልሰ፡ እቲ መዓት ከኣ ዝግ በለ።

ዘሁልቁ ምዕራፍ 17

¹እግዚኣብሄር ድማ ንሙሴ ኸምዚ ኢሉ ተዛረቦ፡²ንደቂ እስራኤል ተዛረቦም እሞ ኻባታቶም ከካብ ማይ ቤት ኣቦታቶም በበትሪ፡ ካብ ኲሎም ሹማምቶም ከከም ማይ ቤት ኣቦታቶም ዓሰርተው ክልተ በትሪ ውሰድ። ስም ነፍሲ ወከፍ ከኣ ኣብ በበትሩ ጽሓፍ።³ነንሹም ማይ ቤት ኣቦታቶም ሓንቲ በትሪ ትኹን እሞ፡ ስም ኣሮን ኣብ ልዕሊ በትሪ ሌዊ ጽሓፍ።⁴ናብቲ ኣነ ምሳኻትኩም ዝራኸበሉ፡ ናብ ድንኳን ምርኻብ፡ ኣብ ቅድሚ ምስክር ከኣ ኣንብረን።⁵ክኸውን ድማ እዩ፡ እቲ ዝሓሬኽዎ ሰብኣይ፡ በትሩ ኽትጥጥዕ እያ። እቲ ደቂ እስራኤል ዘጕረምርሙልኩም ምጕርምራም ከኣ ኣብ ቅድመይ መወዳእታ ኽገብረሉ እየ።⁶ሙሴ ኸኣ ንደቂ እስራኤል ተዛረቦም፡ ኲሎም ሹማምቶም ድማ ኣባትር በብማይ ቤት ኣቦታቶም፡ ነናይ ሹም ሓደ፡ ዓሰርተው ክልተ በትሪ ሃብዎ። በትሪ ኣሮን ከኣ ኣብ ማእከል ኣባትሮም ነበረት።⁷ሙሴ ድማ ነተን ኣባትር ኣብ ድንኳን ምስክር ኣብ ቅድሚ እግዚኣብሄር ኣንበረን።
   ⁸ኰነ ድማ፡ ሙሴ ንጽብሒቱ ናብ ድንኳን ምስክር ኣተወ፡ እንሆ ኸኣ፡ በትሪ ኣሮን፡ እታ ናይ ቤት ሌዊ፡ ጠጢዓ ጸንሐት፡ ቈጽሊ ኸኣ ኣውጽአት፡ ዕምባባውን ዓምበበት፡ ብሱል ካዕካዕ ድማ ፈረየት።⁹ሙሴ ኸኣ ንዅለን ኣባትር ካብ ቅድሚ እግዚኣብሄር ናብ ኲሎም ደቂ እስራኤል ኣውጽኤን፡ ርእዮም ድማ ነፍሲ ወከፍ በትሩ ወሰደ።¹⁰እግዚኣብሄር ድማ ንሙሴ፡ ንደቂ ዓመጻ፡ ምእንቲ ኸይሞቱ፡ ነቲ ናባይ ምጕርምራሞም መወዳእታ ኽትገብር፡ ትእምርቲ ኽትኰኖም፡ ንበትሪ ኣሮን፡ ኣብኡ ኽትሕሎ፡ ናብ ቅድሚ ምስክር ምለሳ፡ በሎ።¹¹ሙሴ ኸኣ እዚ ገበረ፡ ከምቲ እግዚኣብሄር ዝኣዘዞ ኸምኡ ገበረ።
   ^12-13ደቂ እስራኤል ድማ ንሙሴ፡ እንሆ ሞትና፡ ጠፋእና፡ ኲልና ጠፋእና። ነፍሲ ወከፍ ዝቐረበ፡ ናብ ማሕደር እግዚኣብሄር ዝቐረበ ይመውት ኣሎ። ኲልናዶ ኽንጠፍእ ኢና፧ ኢሎም ተዛረብዎ።

ዘሁልቁ ምዕራፍ 18

   ¹እግዚኣብሄር ድማ ንኣሮን በሎ፡ ንስኻን ደቅኻን ቤት ኣቦኻ ድማ ምሳኻን ነቲ ኽፍኣት መቕደስ ጹሩ። ንስኻን ደቅኻ ኸኣ ምሳኻን ነቲ ኽፍኣት ክህነትኩም ጹሩ።²ኣሕዋትካ ነገድ ሌዊ ነገድ ኣቦኻ ድማ፡ ምሳኻ ዀይኖም ምእንቲ ኸገልግሉኻ፡ ምሳኻ ኣቕርቦም፡ ንስኻ ግና፡ ደቅኻ ኸኣ ምሳኻ፡ ኣብ ቅድሚ ድንኳን ምስክር ኩኑ።³ንሳቶም ድማ ሓለዋኻን ሓለዋ ዅሉ ድንኳንን ይሓልዉ፡ ንሳቶምን ንስኻትኩምን ምእንቲ ኸይትሞቱ፡ ናብ ኣቓሑ መቕደስን ናብ መሰውእን ጥራይ ኣይቕረቡ።⁴ኣብ ኲሉ ኣገልግሎት ድንኳን ምሳኻ ዀይኖም ኣብ ሓለዋ ድንኳን ምርኻብ ይሓልዉ፡ ጓና ግና ኣይቕረብኩም።⁵ድማ መሊሱ ዅራ ናብ ደቂ እስራኤል ምእንቲ ኸይመጽእሲ፡ ንስኻትኩም ሓለዋ መቕደስን ሓለዋ መሰውእን ሓልዉ።⁶እንሆ፡ ኣነ ነሕዋትኩም ሌዋውያን ካብ ማእከል ደቂ እስራኤል ወሰድክዎም፡ ንኣኻትኩም እተዋህቡ ህያብ እዮም፡ ንሳቶም ኣብ ድንኳን ምርኻብ ከገልግሉ ንእግዚኣብሄር ተወፈዩ።⁷ንስኻን ደቅኻ ኸኣ ምሳኻን ብናይ መሰውኢ ነገርን ውሽጢ መጋረጃ ዘበለን ክህነትኩም ሓልዉን ኣገልግሉን። እቲ ኣገልግሎት ክህነት ከም ህያብ ሂበኩም እየ። ጓና እንተ ቐረበ ግና፡ ይሙት።
   ⁸እግዚኣብሄር ድማ ንኣሮን ተዛረቦ፡ እንሆ፡ ኣነ ሓለዋ እቲ ዝልዓል መስዋእተይ፡ እቲ ናይ ደቂ እስራኤል እተቐደሰ ዅሉ ነገር ክትሕሉ ሂበካ ኣሎኹ። ንኣኻ ብምቕባእ መሰል ዘለኣለም ገይረ ንደቅኻ ሂበዮ ኣሎኹ።⁹ካብቲ ኻብ ሓዊ ዝተረፈ ቅዱስ ቅዱሳን እዚ ንኣኻ ይኹን፡ እቲ ዘቕርቡለይ ኲሉ መባኦም፡ ኲሉ ናይ ብልዒ መስዋእቶምን ኲሉ ናይ ሓጢኣት መስዋእቶምን ኲሉ ናይ በደል መስዋእቶምን ንሱ ንኣኻን ንደቅኻን ቅዱስ ቅዱሳን ይኹን።¹⁰ኣብ ቅዱስ ቅዱሳን ኴንካ ብልዓዮ፡ ኲሉ ተባዕታይ ይብልዓዮ፡ ቅዱስ ይኹነልካ።¹¹እዚ ንኣኻ እዩ፡ እቲ ኻብ መባኦም ዝልዓል መስዋእትን እቲ ደቂ እስራኤል ዘቕርብዎ ዝውዝወዝ መስዋእትን ንኣኻ፡ ነወዳትካን ነዋልድካን ድማ ምሳኻ፡ መሰል ዘለኣለም ገይረ ሂበካ ኣሎኹ። ኣብ ቤትካ ንጹህ ዘበለ ይብልዓዮ።¹²ካብ ዘይቲ ዝበለጸ ዅሉን ካብ ወይንን ካብ ስርናይን ዝበለጸ ዅሉን ንእግዚኣብሄር ዝህብዎ በዅራት ንኣኻ ሂበካ ኣሎኹ።¹³ኣብ ምድሮም ዘሎ ዅሉ በዅሪ ፍረ ናብ እግዚኣብሄር ዘምጽእዎ ንኣኻ ይኹን፡ ኣብ ቤትካ ንጹህ ዘበለ ኻብኡ ይብላዕ።¹⁴ኣብ እስራኤል እተሓርመ ዅሉ ንኣኻ ይኹን።¹⁵ካብ ኲሉ ስጋ፡ ማሕጸን ዚኸፍት ዘበለ፡ ሰብ ኰነ ሓደው እንስሳ፡ ናብ እግዚኣብሄር ዘቕርብዎ፡ ንኣኻ ይኹን። ንበዅሪ ሰብ ግና በጃ ሃበሉ፡ ንበዅሪ ርዅስ እንስሳ ኸኣ በጃ ሃበሉ።¹⁶ነቶም እትብጀዎም ድማ ካብ ወዲ ወርሒ ዝዀነ ከም ገምጋምካ ብሲቃል መቕደስ፡ ንሱ ኸኣ ዕስራ ጌራ፡ ብሓሙሽተ ሲቃል ብሩር ተበጀዎም።¹⁷በዅሪ ላምን በዅሪ በጊዕን በዅሪ ጤልን ግና፡ ቅዱሳት እዮም እሞ፡ ኣይትበጀዎም፡ ደሞም ኣብ መሰውኢ ንጸጎ፡ ስብሖም ከኣ ንእግዚኣብሄር ንጥዑም ጨና፡ ንመስዋእቲ ሓዊ ኣሕርሮ።¹⁸ስጋኦም ከኣ ንኣኻ ይኹን፡ ከም ሓኸለ እቲ ዚውዝወዝ መስዋእትን ከም የማናይ እግርን ንኣኻ ይኹን።¹⁹ናይቲ ቅዱስ ነገር ደቂ እስራኤል ንእግዚኣብሄር ዘቕርብዎ ዅሉ ዚልዓል መስዋእቲ ንኣኻ፡ ነወዳትካን ነዋልድካን ድማ ምሳኻ፡ መሰል ዘለኣለም ገይረ ሂበካ ኣሎኹ። ንሱ ንኣኻን ንዘርእኻ ድማ ምሳኻን ኣብ ቅድሚ እግዚኣብሄር ንዘለኣለም ኪዳን ጨው እዩ።
   ²⁰እግዚኣብሄር ድማ ንኣሮን በሎ፡ ኣብ ምድሮም ርስቲ ኣይሃሉኻ፡ ኣብ ማእከሎም ከኣ ግደ ኣይሃሉኻ፡ ኣብ ማእከል ደቂ እስራኤል ግዴኻን ርስትኻን ኣነ እየ።²¹ንደቂ ሌዊ ድማ ኣብ ክንዲ እቲ ኣገልግሎቶም፡ ኣብ ድንኳን ምርኻብ ዘገልግልዎ ኣገልግሎት፡ እንሆ፡ ኲሉ ዕሽር እስራኤል ንርስቲ ሂበዮም ኣሎኹ።²²ድሕሪ ደጊም ደቂ እስራኤል ምእንቲ ሓጢኣት ከይጾሩን ከይሞቱን፡ ናብ ድንኳን ምርኻብ ኣይቕረቡ።²³ሌዋውያን ግና ኣብቲ ዕዮ ድንኳን ምርኻብ የገልግሉ፡ እቲ በደሎም ከኣ ንሳቶም ይጹርዎ፡ እዚ ንውሉድ ወለዶኹም ሕጊ ዘለኣለም ይኹን። ኣብ ማእከል ደቂ እስራኤል ድማ ርስቲ ኣይረስተዩ።²⁴እቲ ደቂ እስራኤል ንእግዚኣብሄር ንዝልዓል መስዋእቲ ዝህብዎ ዕሽር ሌዋውያን ርስቲ ሂበዮም እየ እሞ፡ ስለዚ ኣብ ማእከል ደቂ እስራኤል ርስቲ ኣይሃልዎም፡ በልክዎም።
   ²⁵እግዚኣብሄር ድማ ንሙሴ ኸምዚ ኢሉ ተዛረቦ፡²⁶ንሌዋውያን ተዛረቦም በሎም ከኣ፡ እቲ ኻባታቶም ከም ርስትኹም ገይረ ዝሃብኩኹም ዕሽር ካብ ደቂ እስራኤል ምስ እትወስዱ፡ ካብኡ ንእግዚኣብሄር ዝልዓል መስዋእቲ፡ ካብቲ ዕሽርሲ ዕሽር ኣቕርቡ።²⁷እዚ ዝልዓል መስዋእትኹም ድማ ከም ስርናይ ካብ ዓውዲ፡ ከም ወሓዚ ኻብ መጽመቑ ይቑጸረልኩም።²⁸ከምኡ ንስኻትኩም ድማ ካብቲ ኻብ ደቂ እስራኤል እትወስድዎ ዅሉ ዕሽርኩም ንእግዚኣብሄር ዝልዓል መስዋእቲ ኣቕርቡ፡ ካብኡ እቲ ናይ እግዚኣብሄር ዝልዓል መስዋእቲ ንኻህን ኣሮን ሃቡ።²⁹ካብቲ እተዋህበኩም ኲሉ፡ ካብቲ እተቐደሰ ኻብ ኲሉ እቲ ብሉጹ፡ እቲ ናይ እግዚኣብሄር ዝልዓል መስዋእቱ ኣቕርቡ።³⁰በሎም ድማ፡ እቲ ዝበለጸ ኻብኡ ምስ እተቕርቡ፡ ንሌዋውያን ከምቲ እቶት ዓውድን ከም እቶት መጽመቑን ይቑጸረሎም።³¹ናይቲ ኣብ ድንኳን ምርኻብ እተገልግልዎ ማሕድሮኹም እዩ እሞ፡ ንስኻትኩምን ስድራ ቤትኩምን ኣብ ዝዀነ ቦታ ብልዕዎ።³²ካብኡ እቲ ዝበለጸ ምስ ኣልዓልኩም፡ ብዛዕባኡ ሓጢኣት ኣይትጾሩን፡ እቲ ደቂ እስራኤል ዝቐደስዎ ኸኣ ኣይተርክሱን ኣይትሞቱን ከኣ።

ዘሁልቁ ምዕራፍ 19

   ¹እግዚኣብሄር ድማ ንሙሴን ንኣሮንን ከምዚ ኢሉ ተዛረቦም፡²እቲ እግዚኣብሄር ከምዚ ኢሉ ዝኣዘዞ ትእዛዝ ሕጊ እዚ እዩ፡ ሓንቲ ጕድለትን ኣበርን ዘይብላ፡ ኣርዑት ዘይተሰቕለላ ጣላ ላም ከምጽኡልካ፡ ንደቂ እስራኤል ንገሮም።³እዚኣ ንኻህን ኣልኣዛር ሃብዎ፡ ንሱ ናብ ወጻኢ ሰፈር የውጽኣያ እሞ ሓደ ኣብ ቅድሚኡ ይሕረዳ።⁴ካህን ኣልኣዛር ከኣ ካብቲ ደማ በጻብዑ ይውሰድ፡ ብሸነኽ ቅድሚት ድንኳን ምርኻብ ካብ ደማ ሾብዓተ ሳዕ ይንጸግ።⁵ነታ ላም ከኣ ኣብ ቅድሚ ዓይኑ የንድዳ፡ ቈርበታን ስጋኣን ደማን ምስናይ ፈርሳ ይንደድ።⁶እቲ ኻህን ድማ ዕጨይቲ ጽሕድን ስምዕዛን ጽሩይ ቀይሕ ፈትልን ይውሰድ፡ ናብ ማእከል እቲ ኣርሒ እትነደሉ ዘላ ሓዊ ይደርብዮ።⁷እቲ ኻህን ከኣ ክዳውንቱ ይሕጸብ፡ ስጋኡውን ብማይ ይተሓጸብ፡ ድሕርቲ ናብ ሰፈር ይእቶ። እቲ ኻህን ከኣ ክሳዕ ምሸት ርኹስ ይኹን።⁸እቲ ዘንደዳ ድማ ክዳውንቱ ብማይ ይሕጸብ፡ ስጋኡውን ብማይ ይተሓጸብ፡ ክሳዕ ምሸት ከኣ ርኹስ ይኹን።⁹ነቲ ሓመዅስቲ እታ ኣርሒ ኸኣ ንጹህ ዝዀነ ሰብ ይኣክቦ። ኣብ ወጻኢ ሰፈር ድማ ኣብ ጽሩይ ቦታ የንብሮ። እዚ መስዋእቲ ሓጢኣት እዩ እሞ፡ ንኣኼባ ደቂ እስራኤል ንዘንጽህ ማይ ክኸውን ይተሓሎ።¹⁰እቲ ሓመዅስቲ እታ ኣርሒ ዝኣከበ ሰብ ድማ ክዳውንቱ ይሕጸብ፡ ክሳዕ ምሸትውን ርኹስ ይኹን። እዚ ንደቂ እስራኤልን ኣብ ማእከሎም ንዝነብር ጓናን ሕጊ ዘለኣለም ይኹን።
   ¹¹ንዝዀነ ዝሞተ ስጋ ሰብ ዝተንከየ፡ ሾብዓተ መዓልቲ ርኹስ ይኹን።¹²ንሱ ብሳልሰይቲ መዓልቲ ይንጻህ፡ ብሳብዐይቲ መዓልቲ ኸኣ ክነጽህ እዩ። በታ ሳልሰይቲ መዓልቲ እንተ ዘይነጽሀ ግና፡ በታ ሳብዐይቲ መዓልቲ ኸኣ ኣይነጽህን እዩ።¹³ናይ ዝሞተ ሰብ ምዉት ስጋ ዝተንከየ ዘበለ እሞ ዘይነጽሀ፡ ንማሕደር እግዚኣብሄር ኣርከሰ፡ እታ ነፍሲ እቲኣ ኻብ እስራኢል ትመንቈስ። እቲ ማይ ምንጻህ ኣብ ልዕሊኡ ስለ ዘይተነጽጎ፡ ርኹስ እዩ፡ ርኽሰቱ ገና ኣብ ልዕሊኡ ኣሎ።
   ¹⁴ሰብ ኣብ ሓደ ድንኳን ምስ ዝመውት፡ እቲ ሕጊ እዚ እዩ፡ ነፍሲ ወከፍ ናብቲ ድንኳን ዝኣተወን ነፍሲ ወከፍ ኣብቲ ድንኳን ዘሎን ሾብዓተ መዓልቲ ርኹስ ይኹን።¹⁵ኲሉ ኽፉት፡ ኣብ ልዕሊእ እተኣስረ መኽደን ዘይብሉ ኣቕሓ ርኹስ ይኹን።¹⁶ኣብ መሮር ብሴፍ ንተቐትለ ወይ ንዝሞተ ወይ ዓጽሚ ሰብ ወይ መቓብር ዝተንከየ ዘበለ፡ ሾብዓተ መዓልቲ ርኹስ ይኹን።¹⁷ነቲ ዝረኸሰ ድማ ካብ ሓመዅስቲ እቲ ዝሓረረ መስዋእቲ ሓጢኣት ይውሰዱ፡ ኣብ ኣቕሓ ገይሮም ድማ ኣብ ልዕሊኡ ህያው ማይ ይኽዓዉሉ።¹⁸ሓደ ንጹህ ሰብ ድማ ስምዕዛ ይውሰድ እሞ ኣብቲ ማይ ጠሚዑ ኣብ ልዕሊ እቲ ድንኳንን ኣብ ልዕሊ እቲ ኣቓሑን ኣብ ልዕሊ እቶም ኣብኡ ዝነብሩ ነፍሳትን ኣብ ልዕሊ እቲ ንዓጽሚ ወይ ነቲ እተቐትለ ወይ ንዝሞተ ወይ ንመቓብር ዝተንከየን ይንጸግ።¹⁹እቲ ንጹህ ኣብ ልዕሊ እቲ ርኹስ በታ ሳልሰይቲ መዓልትን በታ ሳብዐይቲ መዓልትን ይንጸገሉ፡ ኣብታ ሳብዐይቲ መዓልቲ ኸኣ ከንጽሆ እዩ። ክዳውንቱ ድማ ይሕጸብ፡ ብማይ ከኣ ይተሓጸብ፡ ምሸት ድማ ክነጽህ እዩ።²⁰ዝረኸሰ ሰብ ግና፡ ዘይነጽሀ ኸኣ፡ መቕደስ እግዚኣብሄር ኣርኪሱ እዩ እሞ፡ እታ ነፍሲ እቲኣ ኻብ ማእከል እታ ማሕበር ትመንቈስ። ማይ ምንጻህ ስለ ዘይተነጽጎውን፡ ርኹስ እዩ።²¹እዚ ድማ ሕጊ ዘለኣለም ይኹነሎም። እቲ ማይ ምንጻህ ዝነጸገ ኸኣ ክዳውንቱ ይሕጸብ፡ እቲ ማይ ምንጻህ ዝተንከየ ድማ ክሳዕ ምሸት ርኹስ ይኹን።²²እቲ ርኹስ ዝተንከየ ዘበለ ኸኣ ርኹስ እዩ፡ ዝተንከየቶ ነፍሲ ድማ ክሳዕ ምሸት ርኽስቲ ትኹን።

ዘሁልቁ ምዕራፍ 20

   ¹ብዘሎ ኣኼባ ደቂ እስራኤል ከኣ በታ ቐዳመይቲ ወርሒ ናብ በረኻ ጺን ኣተዉ፡ ኣብ ቃዴስ ድማ ጸንሑ። ሚርያም ከኣ ኣብኡ ሞተት፡ ኣብኡውን ተቐብረት።
²እቲ ኣኼባ ድማ ማይ ኣይነበሮን፡ ሽዑ ኣብ ልዕሊ ሙሴን ኣብ ልዕሊ ኣሮንን ተኣከቡ።³እቶም ህዝቢ ኸኣ ንሙሴ፡ እቲ ኣሕዋትና ኣብ ቅድሚ እግዚኣብሄር ክሞቱ ኸለዉ እንተ ንመውት፡ መን ምሃበና፡⁴ንሕናን ከብትናን ድማ ኣብኡ ኽንመውት፡ ስለምንታይ ንማሕበር እግዚኣብሄር ናብዚ በረኻ እዚ ኣምጻእኩምዎ፧⁵ስለምንታይከ ናብዛ ኽፍእቲ ቦታ ኸተምጽኡና ኻብ ግብጺ ኣደየብኩምና፧ ናይ ዘርኢ ወይ ናይ በለስ ወይ ናይ ወይኒ ወይ ናይ ሮማን ቦታ ኣይኰነትን፡ ዝስተ ማይውን የብላን፡ ኢሎም ተቛየቑዎ።⁶ሙሴን ኣሮንን ከኣ ካብ ቅድሚ ማሕበር ናብ ኣፍ ድንኳን ምርኻብ ከዱ፡ ብገጾም ድማ ተደፍኡ። ክብሪ እግዚኣብሄር ከኣ ተራእዮም።⁷እግዚኣብሄር ድማ ንሙሴ ኸምዚ ኢሉ ተዛረቦ፡⁸ነታ በትሪ ውሰዳ፡ ንስኻን ሓውካ ኣሮንን ከኣ ነቲ ኣኼባ ኣክብዎ፡ ኣብ ቅድሚኦም ድማ ነቲ ኸውሒ ተዛረብዎ፡ ንሱ ኸኣ ማዩ ይህብ። ንስኻውን ካብቲ ኸውሒ ማይ ተውጽኣሎም፡ ነቲ ኣኼባን ንኸብቶምን ከኣ ተስቲ።⁹ሙሴ ድማ ኸምቲ ዝኣዘዞ ነታ በትሪ ኻብ ቅድሚ እግዚኣብሄር ወሰዳ፡¹⁰ሙሴን ኣሮንን ድማ ነታ ማሕበር ኣብ ቅድሚ እቲ ኸውሒ ኣኪቦም፡ ኣቱም ዓለወኛታት፡ ሕጂ ስምዑ፡ ካብዚ ኸውሒ እዚዶ ማይ ከነውጽኣልኩም ኢና፧ በሎም።¹¹ሙሴ ድማ ኢዱ ኣልዒሉ ነቲ ኸውሒ ብበትሩ ኽልተ ሳዕ ወቕዖ፡ ብዙሕ ማይ ከኣ ወጸ፡ እቲ ኣኼባን ከብቶምን ሰተዩ።¹²እግዚኣብሄር ድማ ንሙሴን ንኣሮንን፡ ኣብ ቅድሚ ደቂ እስራኤል ክትቅድሱኒ ብኣይ ስለ ዘይኣመንኩም፡ ስለዚ ነዛ ማሕበር እዚኣ ናብታ ዝሃብክዎም ምድሪ ኣይተእትውዎምን ኢኹም፡ በሎም።¹³እዚ ማይ መሪባ፡ እቲ ደቂ እስራኤል ምስ እግዚኣብሄር እተቛየቑሉ፡ ንሱ ኸኣ ኣባታቶም እተቐደሰሉ እዩ።
   ¹⁴ሙሴ ድማ ካብ ቃዴስ ናብ ንጉስ ኤዶም፡ ሓውካ እስራኤል ከምዚ ይብል፡ እቲ ዝረኸበና ዅሉ መከራ ንስኻ ትፈልጥ ኣሎኻ፡¹⁵ኣቦታትና ናብ ግብጺ ኸመይ ከም ዝወረዱ፡ ኣብ ግብጺ ኸኣ ነዊሕ ዘበን ተቐመጥና፡ ግብጻውያን ድማ ንኣናን ነቦታትናን ሓሰሙና።¹⁶ናብ እግዚኣብሄር ምስ ኣእዌና፡ ንሱ ቓልና ሰምዐ፡ መልኣኽ ሰዲዱ ድማ ካብ ግብጺ ኣውጽኣና። እንሆ ኸኣ፡ ንሕና ኣብ ወሰን ዶብካ ኣብ ዘላ ኸተማ ቃዴስ ኣሎና።¹⁷በጃኻ፡ ብምድርካ ኣሕልፈና፡ ብግርሁን ብቦታ ወይንን ኣይንሓልፍን፡ ማይ ዔላ ኸኣ ኣይንሰትን፡ ዶብና ኽሳዕ እንሓልፍ ንየማን ወይ ንጸጋም ኣይነግልስን፡ ብጐደና ንጉስ ንኸይድ፡ ኢሉ ልኡኻት ሰደደሉ።¹⁸ኤዶም ግና፡ ወጺኤ ብሴፍ ከይቃባበለካ፡ ብኣይ ኣይትሕለፍ፡ በሎ።¹⁹ደቂ እስራኤል ከኣ፡ ብጐደና መገዲ ንድይብ፡ ኣነን ከብተይን ካብ ማይካ እንተ ሰቴና ድማ፡ ዋጋ እህብ። ጥራይ እንግረይ ነገር ዘየልቦ ኣሕልፈኒ፡ በልዎ።²⁰ንሱ ድማ፡ ኣይትሓልፍን፡ በለ። ኤዶም ድማ ምስ ብዙሕ ህዝብን ብሓያል ኢድን ክቃባበሎ ወጸ።²¹በዚ ኸምዚ ኤዶም ንእስራኤል ብዶቡ ምሕላፍ ምስ ከልኦ፡ እስራኤል ካብኡ ኣግለሰ።
   ²²ካብ ቃዴስ ድማ ተጓዕዙ፡ ብዘሎ እቲ ኣኼባ ደቂ እስራኤል ከኣ ናብ ከረን ሆር መጸ።²³እግዚኣብሄር ድማ ንሙሴን ንኣሮንን ኣብ ከረን ሆር፡ ኣብ ወሰን ምድሪ ኤዶም፡ ከምዚ ኢሉ ተዛረቦም፡²⁴ኣብ ማይ መሪባ ንትእዛዘይ ስለ ዝኣቤኹምዎ፡ ኣሮን ናብቲ ንደቂ እስራኤል ዝሃብክዎም ምድሪ ኣይኣቱን እዩ እሞ፡ ናብ ሰቡ ይተኣከብ።²⁵ንኣሮንን ንኣልኣዛር ወዱን ውሰድ፡ ናብ ከረን ሆር ድማ ኣደይቦም።²⁶ንኣሮን ከኣ ኣልባሱ ግፈፎ ንኣልኣዛር ወዱ ድማ ክደኖ። ኣሮን ከኣ ናብ ህዝቡ ይተኣከብ፡ ኣብኡውን ይሙት።²⁷ሙሴ ኸኣ ከምቲ እግዚኣብሄር ዝኣዘዞ ገበረ፡ ብዘሎ እቲ ኣኼባ እናረአዮምውን ናብ ከረን ሆር ደየቡ።²⁸ሙሴ ድማ ንኣሮን ኣልባሱ ገፊፉ ንኣልኣዛር ወዱ ኸደኖ። ኣሮን ከኣ ኣብኡ ኣብ ርእሲ እቲ ኸረን ሞተ። ሙሴን ኣልኣዛርን ድማ ካብቲ ኸረን ወረዱ።²⁹ኲሉ እቲ ኣኼባ፡ ኣሮን ከም ዝሞተ ምስ ረኣየ፡ ብዘለዉ ቤት እስራኤል ንኣሮን ሰላሳ መዓልቲ በኸዩሉ።

ዘሁልቁ ምዕራፍ 21

   ¹እቲ ኣብ ደቡብ ዝነብር ንጉስ ኣራድ ከነኣናዊ፡ እስራኤል ብመገዲ ኣታሪም ከም ዝመጸ ምስ ሰምዐ፡ ምስ እስራኤል ተዋግአ፡ ካባታቶም ከኣ ገለ ምርኮ ማረኸ።²ሽዑ እስራኤል፡ እዚ ህዝቢ እዚ ኣብ ኢደይ ኣሕሊፍካ እንተ ሂብካንስ፡ ከተማታቶም ክሓርመን እየ፡ ኢሉ ንእግዚኣብሄር መብጽዓ ተመባጽዐ።³እግዚኣብሄር ድማ ቃል እስራኤል ሰምዐ፡ ንከነኣናውያን ከኣ ኣብ ኢዶም ሃቦም፡ ንኣታቶምን ንኸተማታቶምን ድማ ሓረምዎም፡ ስም እታ ቦታ ኸኣ ሖርማ ተባህለት።
   ⁴ካብ ከረን ሆር ንምድሪ ኤዶም ክዞሩ ንባሕሪ ኤርትራ ኣቢሎም ተጓዕዙ፡ ነፍሲ እቲ ህዝቢ ኸኣ ብመገዲ ዓቕሊ ኣጽበበት።⁵እቲ ህዝቢ ድማ፡ ኣብዚ እንጌራ የልቦን፡ ማይ ድማ የልቦን፡ ነዚ ፈኲሽ እንጌራ ኸኣ ነፍስና መንያቶ እያ እሞ፡ ኣብ በረኻ ኽንመውትከ ስለምንታይ ካብ ግብጺ ኣደየብኩምና፧ ኢሎም ኣብ ኣምላኽን ኣብ ሙሴን ተዛረቡ።⁶እግዚኣብሄር ከኣ ዝነዱ ኣትማን ናብ ህዝቢ ሰደደ። ነቲ ህዝቢ ድማ ነኸስዎ፡ ካብ እስራኤል ከኣ ብዙሕ ህዝቢ ሞተ።⁷ሽዑ እቶም ህዝቢ ናብ ሙሴ መጺኦም፡ ኣብ ልዕሊ እግዚኣብሄርን ኣብ ልዕሌኻን ብምዝራብና ሓጢኣት ገበርና፡ ነዞም ኣትማን ከርሕቐልና ንእግዚኣብሄር ለምነልና፡ በሉ። ሙሴ ድማ ምእንቲ እቲ ህዝቢ ለመነ።⁸እግዚኣብሄር ከኣ ንሙሴ፡ ዝነድድ ተመን ንኣኻ ግበር፡ ኣብ ባላ ድማ ስቐሎ። ክኸውን ከኣ እዩ፡ እተነኽሰ ዘበለ ናብኡ እንተ ጠመተ፡ ክሓዊ እዩ።⁹ሙሴ ኸኣ ካብ ኣስራዚ ተመን ገበረ፡ ኣብ ባላውን ሰቐሎ። ኰነ ኸኣ፡ ገለ ተመን ንሰብ እንተ ነኸሰ፡ ናብቲ ተመን ኣስራዚ ምስ ዝጥምት ይሓዊ ነበረ።
   ¹⁰ደቂ እስራኤል ድማ ተጓዕዙ፡ ኣብ ኦቦት ከኣ ሰፈሩ።¹¹ካብ ኦቦት ተጓዒዞም ድማ፡ ኣብ መንጽር ሞኣብ ብሸነኽ ምብራቕ ኣብ ዘሎ በረኻ ኣብ ዒየ-ዓባሪም ሰፈሩ።¹²ኣብኡ ተጓዒዞም ከኣ፡ ኣብ ለሰ ዘሬድ ሰፈሩ፡¹³ካብኡ ተጓዒዞም ድማ፡ ኣብ ማዕዶ እቲ ኣብ በረኻ ዘሎ ኻብ ዶብ ኣሞራውያን ዝወጽእ ኣርኖን ሰፈሩ። ኣርኖን ከኣ ኣብ መንጎ ሞኣብን ኣሞራውያንን ዘሎ ዶብ ሞኣብ እዩ።¹⁴ስለዚ ኣብ መጽሓፍ ውግእ እግዚኣብሄር ተባሂሉ እዩ፡ ዋሄብ ኣብ ሱፋ ለሴታት ኣርኖን ከኣ፡¹⁵ናብቲ ዓር እትነብረሉ ዘብል፡ ቁልቁለት ለሴታት ድማ፡ ናብ ዶብ ሞኣብውን ዝጽጋዕ።¹⁶ካብኡ ድማ ናብ ቤዔር ተጓዕዙ፡ እቲ እግዚኣብሄር ብዛዕባኡ ንሙሴ፡ ነቲ ህዝቢ ኣክቦ ኣነውን ማይ ክህቦም እየ፡ ዝበሎ ዔላ ንሱ እዩ።
   ¹⁷ሽዑ እስራኤል እዚ መዝሙር እዚ ዘመረ፡ ኣታ ዔላ፡ ፈልፍል፡ ንእኡ ዘምሩሉ፡¹⁸እቲ ሹማምቲ ዝዀዓትዎ፡ ኣውራታት ህዝቢ፡ ብዘንጊ መንግስቲ፡ በባትሮም ዘጐድጐድዎ ዔላ። ካብ በረኻ ድማ ናብ ማታና፡¹⁹ካብ ማታና ኸኣ ናብ ናሓሊኤል፡ ካብ ናሓሊኤል ድማ ናብ ባሞት፡²⁰ካብ ባሞት ከኣ ናብቲ ኣብ መሮር ሞኣብ ዘሎ ለሰ፡ ናብቲ ናብ በረኻ ዝርኢ ርእሲ ጲስጋ ተጓዕዙ።
   ^21-22እስራኤል ድማ ናብ ሲሆን ንጉስ ኣሞራውያን፡ ብምድርኻ ኣሕልፈኒ፡ ናብ ግርሁን ናብ ወይንን ኣይነግልስን፡ ማይ ዔላውን ኣይንሰትን፡ ዶብካ ኽሳዕ እንሓልፍ ብጐደና ንጉስ ንኸይድ፡ ኢሉ ልኡኻት ሰደደ።²³ሲሆን ከኣ እስራኤል ብዶቡ ኽሓልፍ ኣይፈቐደን እሞ ሲሆን ኲሉ ህዝቡ ኣኪቡ ንእስራኤል ክቃባበሎም ናብ በረኻ ወጸ፡ ናብ ያሃጽ መጺኡ ኸኣ ምስ እስራኤል ተዋግአ።²⁴እስራኤል ግና ብስሕለት ሴፍ ወቕዖ፡ ምድሩ ኸኣ ካብ ኣርኖን ክሳዕ ያቦቅ፡ ክሳዕ ደቂ ኣሞን ወረሰ። ዶብ ደቂ ኣሞን ግና ጽኑዕ ነበረ።²⁵እስራኤል ድማ ንዅለን እተን ከተማታት እቲኤን ሓዘን፡ እስራኤል ከኣ ኣብ ኲለን ከተማታት ኣሞራውያን፡ ኣብ ሔስቦንን ኲለን ዓድታታን ተቐመጠ።²⁶ሔስቦን ከተማ ሲሆን ንጉስ ኣሞራውያን ነበረት እሞ፡ ንሱ ምስቲ ቕድም ዝነበረ ንጉስ ሞኣብ ተዋጊኡ፡ ንብዘላ ምድሩ ኽሳዕ ኣርኖን ካብ ኢዱ ወሲድዋ ነበረ።²⁷ስለዚ እቶም መሰልቲ ይብሉ፡ ናብ ሔስቦን ንዑ። ከተማ ሲሆን ትነደቕን ትተዓረድን።²⁸ካብ ሔስቦን ሓዊ ወጺኡ እዩ እሞ፡ ካብ ከተማ ሲሆን ድማ ሃልሃልታ፡ ንሱ ንዓር ናይ ሞኣብን ነቶም ጐይተት በረኽቲ ኣርኖንን በልዐ።²⁹ሞኣብ ወይለኻ። ኣታ ህዝቢ ከሞሽ ጠፋእካ። ኣወዳቱ ንምህዳም፡ ኣዋልዱ ኸኣ ንምርኮ፡ ንሲሆን ንጉስ ኣሞራውያን ሃቦ።³⁰ንሕና ወርወርናሎም፡ ሔስቦን ክሳዕ ዲቦን ጠፍአት። ክሳዕ ኖፋሕ፡ ክሳዕ ሜድባ ዝበጽሕ ኣዓኖና።
   ³¹በዚ ኸምዚ እስራኤል ኣብ ምድሪ ኣሞራውያን ተቐመጠ።³²ሙሴ ድማ ናብ ያዕዘር ዝስልዩ ሰደደ፡ ዓድታታውን ሓዙ። ኣብኡ ንዝነበሩ ኣሞራውያን ከኣ ኣውጽእዎም።³³ተመሊሶም ድማ ብመገዲ ባሳን ደየቡ። ኦግ ንጉስ ባሳን ከኣ፡ ንሱን ኲሉ ህዝቡን ናብ ኤድረይ ክዋጋእን ክቃባበሎምን ወጸ።³⁴እግዚኣብሄር ድማ ንሙሴ፡ ንእኡን ንዅሉ ህዝቡን ምድሩን ኣብ ኢድካ ሂበካ እየ እሞ፡ ኣይትፍርሃዮ። ከምቲ ነቲ ኣብ ሔስቦን ዝነበረ ሲሆን ንጉስ ኣሞራውያን ዝገበርካዮ፡ ከምኡ ኽትገብሮ ኢኻ፡ በሎ።³⁵ንሳቶም ድማ ንእኡን ንደቁን ንዅሉ ህዝቡን፡ ሓደ እኳ ኽሳዕ ዘይተርፎ፡ ወቕዕዎ። ምድሩ ድማ ወረሱ።

ዘሁልቁ ምዕራፍ 22

   ¹ደቂ እስራኤል ድማ ተጓዕዙ፡ ናብ ስግር ዮርዳኖስ ናይ ያሪኮ ኣብ ጐልጐል ሞኣብ ከኣ ሰፈሩ።
   ²ባላቅ ወዲ ጺጶር ድማ፡ እስራኤል ኣብ ኣሞራውያን ዝገበሮ ዅሉ ረኣየ።³ሞኣብ ከኣ፡ እቲ ህዝቢ ብዙሕ ስለ ዝዀነ፡ ብእኡ ኣዝዩ ፈርሀ። ሞኣብ ብደቂ እስራኤል ተሸበረ።⁴ሞኣብ ከኣ ንዓበይቲ ሚድያን፡ ብዕራይ ሳዕሪ መሮር ከም ዝበልዕ፡ ሕጂ እዚ ኣኼባ እዚ፡ ኣብ ዙርያና ንዘሎ ንዅሉ ኸምኡ ኽበልዖ እዩ፡ በሎም። በቲ ዘበን እቲ ድማ ባላቅ ወዲ ጺጶር፡ ንጉስ ሞኣብ ነበረ።⁵ንሱ ኸኣ ናብታ ኣብ ጥቓ ርባ ዘላ ጴጦር ኣብ ሃገር ደቂ ህዝቡ ተቐሚጡ ዘሎ ናብ በላዓም ወዲ ቤዖር፡ ከምዚ ኢሎም ክጽውዕዎ ልኡኻት ሰደደሉ፡ እንሆ፡ ካብ ግብጺ ዝወጸ ህዝቢ። እንሆ፡ ንሱ ገጽ ምድሪ ኸዲኑ ኣሎ፡ ንሱ ኸኣ ኣብ መንጽረይ ተቐሚጡ ኣሎ።⁶ንሱ ኻባይ ዝሕይል እዩ እሞ፡ ሕጂ ድማ መጺእካ ነዚ ህዝቢ እዚ ኽትረግመለይ እልምነካ ኣሎኹ። ንስኻ ዝመረቕካዮ ምሩቕ፡ ዝረገምካዮ ኸኣ ርጉም ከም ዝዀነ እፈልጥ እየ እሞ፡ ምናልባሽ ክወቕዖን ካብ ሃገር ከኣ ከውጽኦን እኽእል እየ።
   ⁷ዓበይቲ ሞኣብን ዓበይቲ ሚድያንን ድማ ዓስቢ ጥንቁልና ኣብ ኢዶም ሒዞም ከዱ፡ ናብ በላዓም መጺኦም ከኣ ቃል ባላቅ ነገርዎ።⁸ንሱ ድማ፡ ሎም ለይቲ ኣብዚ ሕደሩ፡ ከምቲ እግዚኣብሄር ዝነገረኒ ነገር ከኣ ክመልሰልኩም እየ፡ በሎም። ሹማምቲ ሞኣብ ድማ ምስ በላዓም ተቐመጡ።⁹ኣምላኽ ድማ ናብ በላዓም መጺኡ፡ እዞም ምሳኻ ዘለዉ ሰባት እንታዎት እዮም፧ በለ።^10-11በላዓም ከኣ ንኣምላኽ በሎ፡ ባላቅ ወዲ ጺጶር፡ ንጉስ ሞኣብ፡ እንሆ፡ ካብ ምስሪ ዝወጸ ህዝቢ ገጽ ምድሪ ኸዲኑ ኣሎ፡ ሕጂ መጺእካ ንእኡ ርገመለይ፡ ምናልባሽ ክዋግኦን ከውጽኦን እኽእል እየ፡ ኢሉ ለኣኸለይ።¹²ኣምላኽ ድማ ንበላዓም፡ ምሳታቶም ኣይትኺድ፡ ምሩቕ እዩ እሞ፡ ነቲ ህዝቢ እቲ ኣይትርገሞ፡ በሎ።¹³በላዓም ከኣ ብጊሓት ተንሲኡ ንሹማምቲ ባላቅ፡ እግዚኣብሄር ምሳኻትኩም ከይከይድ ከሊኡኒ እዩ እሞ፡ ንሃገርኩም ኪዱ፡ በሎም።¹⁴ሹማምቲ ሞኣብ ድማ ተንስኡ፡ ናብ ባላቅ መጺኦም ከኣ፡ በላዓም ምሳና ምምጻእ ኣብዩ፡ በልዎ።
   ¹⁵ባላቅ ድማ መሊሱ ኻባታቶም ዝበዝሑን ዝኽብሩን ሹማምቲ ሰደደ።¹⁶ናብ በላዓም መጺኦም ከኣ፡ ባላቅ ወዲ ጺጶር፡ በጃኻ፡ ናባይ ካብ ምምጻእ ኣይትተዓገት፡¹⁷ኣዝየ ከኽብረካ እየ፡ እትብለኒ ዅሉ ኸኣ ክገብር እየ እሞ፡ በጃኻ ንዓ፡ ነዚ ህዝቢ እዚ ርገመለይ፡ ይብል ኣሎ፡ በልዎ።¹⁸በላዓም ድማ ንገላዉ ባላቅ መለሰሎም በሎም ከኣ፡ ባላቅ ብቤቱ መሊኡ እኳ ብሩርን ወርቅን እንተ ዝህበኒ፡ ብንእሽቶ ዀነ ወይ ብዓብዪ፡ ቃል እግዚኣብሄር ኣምላኸይ ከፍርስ ኣይክእልን እየ።¹⁹ሕጂ ኸኣ እግዚኣብሄር መሊሱ ዝብለኒ ኽፈልጥ ንስኻትኩም በዛ ለይቲ እዚኣ ድማ ኣብዚ ተቐመጡ።²⁰ኣምላኽ ድማ ብለይቲ ናብ በላዓም መጺኡ፡ እዞም ሰባት እዚኦም ክጽውዑኻ መጺኦም እንተ ዀይኖም፡ ተንሲእካ ምሳታቶም ኪድ፡ እቲ ኣነ ዝብለካ ጥራይ ደኣ ግበር፡ በሎ።²¹በላዓም ከኣ ብጊሓት ተንስአ፡ ኣድጉ ጽዒኑ ድማ ምስቶም ሹማምቲ ሞኣብ ከደ።
   ²²ንሱ ስለ ዝኸደ ድማ ኲራ ኣምላኽ ነደደ። ንሱ ኣድጉ ተወጢሑ ኽልተ ገላዉኡ ኸኣ ምስኡ ክኸዱ ኸለዉ፡ መልኣኽ እግዚብሄር ክኽልከሎ ኣብ መገዲ ደው በለ።²³እታ ኣድጊ ድማ መልኣኽ እግዚኣብሄር፡ ምሉሕ ሴፍ ኣብ ኢዱ ሒዙ፡ ኣብ መገዲ ደዉ ኢሉ ረኣየት፡ እታ ኣድጊ ኸኣ ካብ መገዲ ኣግሊሳ ናብ ግራት ኣቢላ ኸደት። በላዓም ድማ ነታ ኣድጊ ናብ መገዲ ኽመልሳ ወቕዓ።²⁴መልኣኽ እግዚኣብሄር ከኣ ኣብ መንጎ ኣታኽልቲ ወይኒ፡ በዚ መንደቕ በቲ ድማ መንደቕ ኣብ ዘለዋ ዅዕትቲ መገዲ ደው በለ።²⁵እታ ኣድጊ ኸኣ መልኣኽ እግዚኣብሄር ርእያ፡ ናብቲ መንደቕ ተጸግዐት፡ ንእግዚኣብሄር ርእያ፡ ናብቲ መንደቕ ተጸግዐት፡ ንእግሪ በላዓም ድማ ናብቲ መንደቕ ኣራጸመቶ። ንሱ ኸኣ መመሊሱ ወቕዓ።²⁶እቲ መልኣኽ እግዚኣብሄር ድማ ከም ብሓድሽ ንቕድሚት ሓሊፉ፡ ንየማን ወይ ንጸጋም እተግልስ ኣብ ዘይብላ መገዲ፡ ኣብ ጸቢብ ቦታ ደው በለ።²⁷እታ ኣድጊ ኸኣ መልኣኽ እግዚኣብሄር ርእያ፡ ኣብ ትሕቲ በላዓም በጥ በለት። በላዓም ድማ ኰርዩ ተናደደ፡ ነታ ኣድግ ኸኣ ብበትሪ ወቕዓ።²⁸ሽዑ እግዚኣብሄር ኣፍ እታ ኣድጊ ኸፈተ፡ ንሳ ድማ ንበላዓም፡ እዚ ሰለስተ ሳዕ ዝወቓዕካኒኸ እንታይ ገይረካ እየ በለቶ፧²⁹በላዓም ከኣ ነታ ኣድጊ፡ ስለ ዘላገጽክለይ፡ ሴፍ ኣብ ኢደይ እንተ ዝህልወንስ፡ ሕጂ ሕጂ እኳ ምቐተልኩኺ፡ በላ።³⁰እታ ኣድጊ ድማ ንበላዓም፡ ኣነ ኽሳዕ እዛ መዓልቲ እዚኣ ነዊሕ ዘበንካ እተወጣሕካኒ ኣድግኻ ደይኰንኩን፧ ከምዚ ኽገብረካዶ ልማድ ነይሩኒ፧ በለቶ። ንሱ ኸኣ፡ ኣይፋልክን፡ በለ።³¹ሽዑ እግዚኣብሄር ኣዒንቲ በላዓም ከፈተ እሞ መልኣኽ እግዚኣብሄር ኣብ መገዲ ደው ኢሉ፡ ምሉሕ ሴፉ ኸኣ ኣብ ኢዱ ረአየ። ፍግም ኢሉ ድማ ብገጹ ተደፍአ።³²መልኣኽ እግዚኣብሄር ከኣ፡ ስለምንታይ ኢኻ ነዛ ኣድግኻ ሰለስተ ሳዕ ዝወቓዕካያ፧ እዛ መገዲ እዚኣ ኣብ ቅድመይ ቅንዕቲ ኣይኰነትን እሞ፡ እንሆ፡ ክኽልክለካ ወጻእኩ።³³እታ ኣድጊ ኸኣ ርእያትኒ፡ ሰለስተ ሳዕ ካብ ቅድመይ ኣግለሰት፡ ካብ ቅድመይ እንተ ዘይተግልስ፡ ንእኣ ብህይወታ ሓዲገ ንኣኻ ምቐተልኩኻ ነይረ፡ በሎ።³⁴በላዓም ድማ ነቲ መልኣኽ እግዚኣብሄር፡ ንምኽልካለይ ኣብ መገዲ ደው ከም ዝበልካ ኣይፈለጥኩን እሞ፡ በደልኩ። ሕጂ ኸኣ ዘጕህየካ እንተ ዀይኑስ፡ እምለስ፡ በሎ።³⁵መልኣኽ እግዚኣብሄር ድማ ንበላዓም፡ ምስ እዞም ሰባት እዚኦም ኪድ፡ ግናኸ እቲ ኣነ ዝብለካ ጥራይ ደኣ ተዛረብ፡ በሎ። በላዓም ከኣ ምስቶም ሹማምቲ ባላቅ ከደ።
   ³⁶ባላቅ ድማ፡ በላዓም ከም ዝመጸ ምስ ሰምዐ፡ ክቃባበሎ ናብታ ኣብ ዶብ ኣርኖን ዘላ ኸተማ ሞኣብ፡ ኣብ ወሰን ዶብ ከደ።³⁷ባላቅ ድማ ንበላዓም፡ ንምጽዋዕካ ኣጽኒዔዶ ኣይለኣኽኩልካን፧ ስለምንታይ ደኣ ናባይ ዘይመጻእካ፧ ኣጸቢቐ ከኽብረካዶ ኣይክእልን እየ፧ በሎ።³⁸በላዓም ከኣ ንባልቅ፡ እንሆ፡ ናባኻ መጺአ ኣሎኹ። ሕጂ ገለ ነገር ክዛረብዶ እኽእል እየ፧ እቲ ኣምላኽ ኣብ ኣፈይ ዘንብረለይ ቃል ንሱ እየ ዝዛረብ፡ በሎ።³⁹በላዓም ድማ ምስ ባላቅ ከደ፡ ቅርያት-ሑጾት ከኣ መጹ።⁴⁰ባላቅ ድማ ኣብዑርን ኣባጊዕን ሓሪዱ ናብ በላዓምን ናብቶም ምስኡ ዘለዉ ሹማምትን ሰደደ።⁴¹ኰነ ኸኣ፡ ንጽብሒቱ ባላቅ ንበላዓም ወሲዱ ናብ ባሞት-በዓል ኣደየቦ፡ ኣብኡ ዀይኑ ድማ ወሰን እቲ ህዝቢ ረኣየ።

ዘሁልቁ ምዕራፍ 23

   ¹በላዓም ድማ ንባላቅ፡ ኣብዚ ሾብዓተ መሰውኢ ንደቐለይ እሞ ሾብዓተ ዝራብዕን ሾብዓተ ድዑልን ኣዳልወለይ፡ በሎ።²ባላቅ ከኣ ከምቲ በላዓም ዝበሎ ገበረ፡ ባላቅን በላዓምን ኣብ መመሰውኢ ሓደ ዝራብዕን ሓደ ድዑልን ሰውኡ።³በላዓም ድማ ንባላቅ፡ ኣብ ጥቓ እዚ ዝሓርር መስዋእትኻ ደው በል፡ ኣነ፡ ምናልባሽ እግዚኣብሄር ክራኸበኒ እንተ ወጸ፡ ክኸይድ እየ፡ እቲ ንሱ ዘርእየኒ ነገር ከኣ ክነግረካ እየ፡ በሎ። ናብ ሓደ መላጥ በሪኽ ድማ ከደ።⁴ኣምላኽ ከኣ ንበላዓም ተጓነፎ፡ ንሱ ድማ፡ ሾብዓተ መሰውኢ ኣዳሎኹ፡ ኣብ መመሰውኢ ኸኣ ዝራብዕን ድዑልን ሰዋእኩ፡ በሎ።⁵እግዚኣብሄር ድማ ቃል ኣብ ኣፍ በላዓም ኣንበረ፡ ናብ ባላቅ ተመሊስካ ኸምዚ ኢልካ ተዛረቦ፡ ከኣ በሎ።⁶ናብኡ ድማ ተመልሰ። እንሆ ኸኣ፡ ንሱ ምስ ኲሎም ሹማምቲ ሞኣብ ኣብ ጥቓ እቲ ዝሓርር መስዋእቱ ደው ኢሉ ነበረ።
   ⁷ምስላኡ ኣልዒሉ ድማ በለ፡ ባላቅ ካብ ኣራም፡ ንጉስ ሞኣብ ኣብ ኣኽራን ምብራቕ ኣምጽኣኒ፡ መጺእካ ንያእቆብ ርገመለይ፡ ንዓ ንእስራኤል ጸይፎ።⁸ኣምላኽ ንዘይረገሞ ኸመይ ኢለ ኽረግም፧ እግዚኣብሄር ንዘይጸየፎኸ ኸመይ ገይረ ኽጽይፍ፧⁹ካብ ርእሲ ኣኻውሕ ደኣ እርእዮ፡ ካብ ኲርባታት ከኣ እጥምቶ ኣሎኹ። እንሆ፡ ንበይኑ ዝቕመጥ ህዝቢ፡ ምስ ህዝብታትውን ኣይቁጸርን።¹⁰ነቲ ሓመድ ያእቆብ መን ክቘጽሮ ይኽእል፧ ወይ ንርብዒ እስራኤል መን ይጽብጽቦ፧ ነፍሰይ ሞት ጻድቃን ትሙት፡ መወዳእታይ ከኣ ከም ናቱ ይኹን።
   ¹¹ባላቅ ድማ ንበላዓም፡ እንታይ እዩ ዝገበርካኒ፡ ንጸላእተይ ክትረግሞም ኣምጻእኩኻ፡ እንሆ ኸኣ፡ ፈጺምካ መረቕካዮም፡ በሎ።¹²ንሱ ድማ፡ እቲ እግዚኣብሄር ኣብ ኣፈይ ዘንበሮ ተጠንቂቐ ኽዛረብዶ ኣይግብኣንን እዩ፧ ኢሉ መለሰ።
   ¹³ባላቅ ድማ፡ በጃኻ፡ ኣብኣ ዄንካ ኽትርእዮምሲ፡ ናብ ካልእ ቦታ ምሳይ ኪድ። ናይ ሓደ ወገን ወሰኖም ትርኢ ኣሎኻ እምበር፡ ንብዘለዉ ኣይትርእዮምን ኢኻ ዘሎኻ፡ ኣብኡ ዄንካ ንኣታቶም ርገመለይ፡ በሎ።¹⁴ናብ መሮር ጾፊም ናብ ርእሲ ጲስጋ ድማ ወሰዶ፡ ሾብዓተ መሰውኢ ኸኣ ነደቐ፡ ኣብ መመሰውኢ ድማ ሓደ ዝራብዕን ሓደ ድዑልን ሰውአ።¹⁵ንባላቅ ከኣ፡ ኣብዚ ኣብ ጥቓ ዝሓርር መስዋእትኻ ደው በል ኣነ ኣብኡ ኽራኸቦ ክኸይድ እየ፡ በሎ።¹⁶እግዚኣብሄር ድማ ንበላዓም ተራኸቦ፡ ቃል ከኣ ኣብ ኣፉ ኣንበረ፡ ናብ ባላቅ ተመሊስካ ድማ ከምዚ ኢልካ ተዛረቦ፡ በለ።¹⁷ናብኡ ኸኣ መጸ፡ እንሆ ድማ፡ ኣብ ጥቓ እቲ ዝሓርር መስዋእቱ ደው ኢሉ፡ ሹማምቲ ሞኣብውን ምስኡ ነበሩ። ባላቅ ድማ፡ እግዚኣብሄር እንታይ ተዛሪቡካ፡ በሎ።
   ¹⁸ሽዑ ምስላኡ ኣልዒሉ በለ፡ ባላቅ፡ ተንስእ፡ ስማዕ ድማ፡ ኣታ ወዲ ጺጶር፡ ናባይ ጽን በል።¹⁹ኣምላኽ ከይሕሱ፡ ሰብ ኣይኰነን። ከይጠዓስ ከኣ፡ ወዲ ሰብ ኣይኰነን። ንሱ ዝበሎስ ኣይገብሮንዶ፧ እተዛረቦስ ኣይፍጽሞንዶ፧²⁰እንሆ፡ ክምርቕ ተኣዚዘ እየ። ንሱ ድማ ባሪኹ እዩ፡ ኣነ ኸኣ ክመልሶ ኣይከኣለንን።²¹ኣብ ያእቆብ ክፍኣት ኣይጠመተን፡ ኣብ እስራኤል ከኣ ሕሰም ኣይረኣየን። እግዚኣብሄር ኣምላኹ ምስኡ እዩ፡ እልልታ ንንጉስ ድማ ኣብ ማእከሉ ኣሎ።²²ኣምላኽ ካብ ግብጺ ኣውጽኦም፡ ሓይሊ ኸም ናይ ርኤም ዝበለ ኣለዎ።²³ኣብ ያእቆብ ኣስማት፡ ኣብ እስራኤል ከኣ ጥንቁልና የልቦን። ብዛዕባ ያእቆብን እስራኤልን ብግዜኡ፡ ኣምላኽ ከመይ ዝበለ ግብሪ ገበረ፡ ክብሃል እዩ።²⁴እንሆ፡ ህዝቢ ኸም ዋዕሮ ይትንስእ፡ ከም ኣንበሳ ይልዓል። ዝዘረፎ ኽሳዕ ዝበልዕ፡ ደም እቶም ቅቱላት ከኣ ክሳዕ ዚሰቲ በጥ ኣይብልን።
   ²⁵ሽዑ ባላቅ ንበላዓም፡ ምርጋም ኣይትርገሞ፡ ምምራቕ ከኣ ኣይትምርቆ፡ በሎ።²⁶በላዓም ግና ንባላቅ፡ እግዚኣብሄር ዝብለኒ ዅሉ እየ ዝገብር፡ ኢለዶ ኣይተዛረብኩኻን፧ ኢሉ መለሰሉ።
   ²⁷ባላቅ ድማ ንበላዓም፡ ናብ ካልእ ቦታ ኽወስደካ፡ ምናልባሽ ኣምላኽ እንተ ሰመሮ፡ ኣብኣ ዄንካ ኽትረግመለይ፡ በጃኻ ንዓ፡ በሎ።²⁸ባላቅ ከኣ ንበላዓም፡ ንበረኻ ኣቢሉ ናብ ዘርኢ፡ ናብ ርእሲ ጴዖር ወሰዶ።²⁹በላዓም ድማ ንባላቅ፡ ኣብዚ ሾብዓተ መሰውኢ ንደቐለይ፡ ሾብዓተ ዝራብዕን ሾብዓተ ድዑልን ከኣ ኣብዚ ኣዳልወለይ፡ በሎ።³⁰ባላቅ ድማ ከምቲ በላዓም ዝበሎ ገበረ፡ ኣብ መመሰውኢ ኸኣ ሓደ ዝራብዕን ሓደ ድዑልን ሰውአ።

ዘሁልቁ ምዕራፍ 24

   ¹በላዓም ድማ ንእስራኤል ክምርቖ፡ ኣብ ቅድሚ እግዚኣብሄር ጽቡቕ ከም ዝዀነ ምስ ረኣየ፡ ገጹ ንበረኻ ኣቢሉ መለሰ እምበር፡ ከምተን ቀዳሞት ግዝያት ብኣስማት ክቃባበል ኣይከደን።²በላዓም ከኣ ዓይኑ ኣልዓለ ንእስራኤል ድማ በብነገዶም ሰፊሮም ረኣዮም፡ መንፈስ ኣምላኽ ድማ ናብ ልዕሊኡ መጸ።
   ³ምስላኡ ኣልዒሉ ኸኣ በለ፡ በላዓም ወዲ ቤዖር፡ ከምዚ ይብል፡ እቲ ኽፉት ኣዒንቲ ዘለዎ ሰብኣይ ድማ ከምዚ ይብል።⁴እቲ ቓል ኣምላኽ ዝሰምዕ፡ ናይቲ ዅሉ ዝኽእል ራእይ ዘርኢ፡ እቲ ዝወድቕ፡ ኣዒንቱ ከኣ ዝኽፈታሉ፡ ከምዚ ይብል፡⁵ኣታ ያእቆብ፡ ድንኳናትካ፡ ኣታ እስራኤል ድማ፡ ማሕደርካ ኽንደይ ይጽብቕ።⁶ከም ለሴታት፡ ኣብ ገምገም ርባ ኸም ዘሎ ኣታኽልቲ፡ እግዚኣብሄር ከም ዝተኸሎ ዕሬታት፡ ኣብ ወሰን ማይ ከም ዘሎ ጽሕድታት ይዝርግሑ።⁷ካብ ዕትሮኡ ማይ ይጅርበብ፡ ዘርኡ ድማ ኣብ ብዙሕ ማያት ይኸውን፡ ንጉሱ ኻብ ኣጋግ ክብ ይብል፡ መንግስቱ ኸኣ ክትልዓል እያ።⁸ኣምላኽ ካብ ግብጺ ኣውጽኦ፡ ሓይሊ ኸም ናይ ርኤም ዝበለ ኣለዎ፡ ነቶም ዝጻረርዎ ህዝብታት ክበልዖም እዩ፡ ኣዕጽምቶም ከኣ ክሰባብር እዩ፡ ብመንትጉውን ክወግኦም እዩ።⁹ንሱ ኸም ኣንበሳ በጥ ኢሉ፡ ከም ዋዕሮ ድማ ደቂሱ ኣሎ፡ መን የተንስኦ ዝምርቐካ ምሩቕ፡ ዝረግመካ ኸኣ ርጉም ይኹን።
   ¹⁰ሽዑ ዅራ ባላቅ ኣብ በላዓም ነደደ፡ ኣእዳዉ ድማ ኣጣቕዐ፡ ባላቅ ከኣ ንበላዓም፡ ኣነ ንጸላእተይ ክትረግሞም ጸዋዕኩኻ፡ እንሆ ኸኣ፡ ሕጂ ሰለስተ ሳዕ ኣጸቢቕካ መረቕካዮም።¹¹ሕጂ ድማ ናብ ቦታኻ ህደም። ኣነ ኣዝየ ከኽብረካ ኢለ ነይረ፡ እግዚኣብሄር ግና እንሆ፡ ከይትኸብር ከልኣካ፡ በሎ።^12-13በላዓም ከኣ ንባላቅ በሎ፡ ነቶም ናባይ ዝሰደድካዮም ልኡኻትካ፡ ባላቅ ቤቱ ብሩርን ወርቅን መሊኡ እንተ ዝህበኒ እኳ፡ ቃል እግዚኣብሄር ኣፍሪሰ፡ ጽቡቕ ኰነ ወይስ ክፉእ፡ ከም ልበይ ክገብር ኣይክእልን፡ እግዚኣብሄር ዝብለኒ ንሱ እየ ዝዛረብ፡ ኢለዶ ኣይተዛረብክዎምን፡¹⁴ሕጂ ኸኣ እንሆ፡ ናብ ህዝበይ እከይድ ኣሎኹ። ንዓ፡ እዚ ህዝቢ እዚ ዳሕሮት መዓልትታት ንህዝብኻ ዝገብሮ ኽነግረካ።
   ¹⁵ምስላኡ ኣልዒሉ ድማ በለ፡ በላዓም ወዲ ቤዖር ከምዚ ይብል፡ እቲ ክፉት ኣዒንቲ ዘለዎ ሰብኣይ ከምዚ ይብል፡¹⁶እቲ ቓል ኣምላኽ ዝሰምዕ፡ ፍልጠት እቲ ልዑል ድማ ዝፈልጥ፡ ናይቲ ዅሉ ዝኽእል ራእይ ዝርኢ፡ እቲ ዝወድቕ፡ ኣዒንቱ ኸኣ ዝኽፈታሉ፡ ከምዚ ይብል፡¹⁷እርእዮ ኣሎኹ፡ ሕጂ ደኣ ኣይኰነን፡ እጥምቶ ኣሎኹ፡ ግናኸ ቀረባ ኣይኰነን፡ ካብ ያእቆብ ኰዀብ ይወጽእ፡ ካብ እስራኤል ከኣ በትሪ መንግስቲ ትትንስእ፡ ንሳ ንመሳፍንቲ ሞኣብ ትወቕዖም፡ ንዅሎም ደቂ መዕገርገርቲ ትጭፍልቖም።¹⁸ኤዶም ርስቲ ክኸውን እዩ፡ ሰዒር ናይ ጸላእቱ ድማ ርስቲ ኽትከውን እያ፡ እስራኤል ከኣ ሓይሊ ኽገብር እዩ።¹⁹ካብ ያእቆብ ገዛኢ ኽወጽእ እዩ፡ ነቲ ትርፊ ኸኣ ኻብታ ኸተማ ኽወድኦ እዩ።
   ²⁰ንኣማሌቅ ርእዩ ድማ ምስላኡ ኣልዒሉ በለ፡ ኣማሌቅ ካብ ህዝብታት ቀዳማይ እዩ፡ ዳሕራዩ ግና ንጥፍኣት እዩ።²¹ናብ ቄናውያን ርእዩ ኸኣ ምስላኡ ኣልዒሉ በለ፡ እትነብረሉ ጽኑዕ እዩ፡ ቤትካ ኸኣ ኣብ ከውሒ ተነቢሩ ኣሎ።²²እዚ ኽነሱ፡ ኣሶር ክሳዕ ዝማርኸካ፡ ቃይን ከዖኑ እዩ።²³ምስላኡ ኣልዒሉ ድማ በለ፡ ወይለይ፡ እግዚኣብሄር ነዚ ምስ ዝገብርሲ፡ መን ኮን ብህይወት ይነብር፧²⁴ካብ ወሰን ክቲም መራኽብ ክመጻ እየን፡ ንሳተን ንኣሶር ከጨንቓ፡ ንዔብርውን ከጨንቓ እየን። ንሱ ኸኣ ክጠፍእ እዩ።
   ²⁵በላዓም ድማ ተንሲኡ ኽደ፡ ናብ ቦታኡ ኸኣ ተመልሰ። ባላቅውን መገዱ ኸደ።

ዘሁልቁ ምዕራፍ 25

   ¹እስራኤል ድማ ኣብ ሽጢም ተቐመጠ። እቲ ህዝቢ ኸኣ ምስ ኣዋልድ ሞኣብ ክምንዝር ጀመረ።²ንሳተን ነቲ ህዝቢ ናብ መስዋእቲ ኣማልኽተን ጸውዓኦ። እቲ ህዝቢ ኸኣ በልዐ፡ ንኣማልኽተን ድማ ሰገደ።³እስራኤል ከኣ ምስ በዓል-ጴዖር ሓበረ። ኲራ እግዚኣብሄር ድማ ኣብ እስራኤል ንደደ።⁴እግዚኣብሄር ድማ ንሙሴ፡ እቲ ነዳዲ ዅራ እግዚኣብሄር ካብ እስራኤል ምእንቲ ኽምለስሲ፡ ንዅሎም ሓላቑ ህዝቢ ወሲድካ ንእግዚኣብሄር ኣብ ቅድሚ ጸሓይ ስቐሎም፡ በሎ።⁵ሙሴ ድማ ንፈራዶ እስራኤል፡ ነፍሲ ወከፍኩም ነቶም ምስ በዓል-ጴዖር ዝሓበሩ ሰቡ ይቕተል፡ በሎም።
   ⁶እንሆ ኸኣ፡ ካብ ደቂ እስራኤል ሓደ ሰብኣይ ኣብ ቅድሚ ሙሴን ኣብ ቅድሚ ዅሉ ኣኼባ ደቂ እስራኤልን፡ ንሳቶም ኣብ ኣፍ ድንኳን ምርኻብ ደው ኢሎም ክበኽዩ ኸለዉ፡ ሓንቲ ሚድያናዊት ሰበይቲ ናብ ኣሕዋቱ ኣምጽኣ።⁷ፊንሃስ ወዲ ኣልኣዛር፡ ወዲ ኻህን ኣሮን፡ ምስ ረኣዮ፡ ካብ ማእከል እቲ ኣኼባ ተንስአ፡ ኲናትውን ኣብ ኢዱ ወሰደ፡⁸ደድሕሪ እቲ እስራኤላዊ ሰብኣይ ናብታ ዝደቀሱላ ኣተወ፡ ነቲ እስራኤላዊ ሰብኣይን ነታ ሰበይትን ከኣ ረቃቒቶኣ ንኽልቲኦም ወግኦም። እቲ መዓት ድማ ካብ ደቂ እስራኤል ዛረየ።⁹እቶም በቲ መዓት ዝሞቱ ኸኣ ዕስራን ኣርባዕተን ሽሕ ኰኑ።
   ¹⁰እግዚኣብሄር ድማ ንሙሴ ኸምዚ ኢሉ ተዛረቦ፡¹¹ፊንሃስ ወዲ ኣልኣዛር፡ ወዲ ኻህን ኣሮን፡ ኣብ መንጎኦም ብምቕናአይ ስለ ዝቐንአ፡ ንዅራይ ካብ ደቂ እስራኤል መለሶ እሞ፡ ንደቂ እስራኤል ብቕንኣተይ ኣየጥፋእክዎምን።¹²ስለዚ በል፡ እንሆ፡ ንእኡ ናይ ሰላም ኪዳነይ እህቦ ኣሎኹ።¹³ንኣምላኹ ቐኒኡ፡ ንደቂ እስራኤል ከኣ ኣተዓሪቑ እዩ እሞ፡ ስለዚ ንእኡ፡ ብድሕሪኡ ድማ ንዘርኡ ኪዳን ክህነት ዘለኣለም ይኹን።
   ¹⁴ስም እቲ እተቐትለ እስራኤላዊ ሰብኣይ፡ ምስታ ሚድያናዊት ሰበይቲ እተቐትለ፡ ዝምሪ ወዲ ሳሉ፡ ንሱ ኻብ ደቂ ስምኦን፡ ሹም ሓደ ማይ ቤት ኣቦ ነበረ።¹⁵ስም እታ እተቐትለት ሚድያናዊት ሰበይቲ ከኣ ኩዝቢ ጓል ጹር፡ ንሱ ኣብ ሚድያን ናይ ሓደ ማይ ቤት ኣቦ ሓለቓ ህዝቢ ነበረ።
   ¹⁶እግዚኣብሄር ድማ ንሙሴ ከምዝ ኢሉ ተዛረቦ፡^17-18በቲ ብናይ ጴዖር ነገር ዝጠበሩኹም ምጥባሮም፡ ድማ ብነገር ኩዝቢ ሓብቶም፡ ጓል ሹም ሚድያን፡ በታ ብዛዕባ ጴዖር መዓት ዝወረደላ መዓልቲ እተቐትለት፡ ኣጨኒቖምኹም ነይሮም እዮም እሞ፡ ንሚድያናውያን ኣጨንቕዎምን ውቕዕዎምን።

ዘሁልቁ ምዕራፍ 26

   ^1-2ኰነ ድማ፡ ድሕሪ እዛ መዓት እዚኣ እግዚኣብሄር ንሙሴን ንኣልኣዛር ወዲ ኻህን ኣሮንን፡ ንብዘሎ ኣኼባ ደቂ እስራኤል፡ ካብ ወዲ ዕስራ ዓመት ንላዕሊ፡ ኣብ እስራኤል ናብ ውግእ ክወጽእ ዝኽእል ዘበለ በብማይ ቤት ኣቦታቶም ቁጸሩ፡ ኢሉ ተዛረቦም።³ሙሴን ካህን ኣልኣዛርን ከኣ ኣብ ጐላጉል ሞኣብ፡ ኣብ ዮርዳኖስ ናይ ያሪኮ ኸምዚ ኢሎም ተዛረብዎም፡⁴ከምቲ እግዚኣብሄር ንሙሴን ነቶም ካብ ምድሪ ግብጺ ዝወጹ ደቂ እስራኤልን ዝኣዘዞም፡ ነቶም ካብ ወዲ ዕስራ ዓመት ንላዕሊ ዘለዉ ቑጸሮም።
   ⁵ሮቤል በዅሪ እስራኤል እዩ። ደቂ ሮቤል፡ ካብ ሓኖክ ዓሌት ሓኖካውያን፡ ካብ ፋሉ ዓሌት ፋላውያን።⁶ካብ ሔስሮን ዓሌት ሔስሮናውያን፡ ካብ ካርሚ ዓሌት ካርማውያን።⁷ዓሌታት ሮቤላውያን እዚኣቶም እዮም፡ ቁጹራቶም ድማ ኣርብዓን ሰለስተን ሽሕን ሾብዓተ ሚእትን ሰላሳን ኰኑ።⁸ደቂ ፋሉ ኸኣ፡ ኤልያብ።⁹ደቂ ኤልያብ ድማ፡ ነሙኤልን ዳታንን ኣቢራምን። እቲ ምስ ኣኼባ ቆራሕ ኰይኖም ንእግዚኣብሄር ክትንስእዎ ኸለዉ፡ ኣብ ልዕሊ ሙሴን ኣብ ልዕሊ ኣሮንን ዝተንስኡ፡ ኣብቲ ኣኼባ ስሙያት ዝነበሩ ዳታንን ኣቢራምን እዚኣቶም እዮም።¹⁰ነዚኣቶም፡ በታ ነቶም ክልተ ሚእትን ሓምሳን ሰብ ሓዊ ዝበልዓላ፡ እቲ ህዝቢ ድማ ዝሞተላ፡ ንሳቶም ከኣ ንምልክት ዝዀኑላ ግዜ ምድሪ ኣፋ ኸፊታ ምስ ቆራሕ ወሓጠቶም።¹¹ደቂ ቆራሕ ግና ኣይሞቱን።
   ¹²ደቂ ስምኦን በብዓሌቶም፡ ካብ ነሙኤል ዓሌት ነሙኤላውያን፡ ካብ ያሚን ዓሌት ያሚናውያን፡ ካብ ያኪን ዓሌት ያኪናውያን፡¹³ካብ ዜራሕ ዓሌት ዜራሓውያን፡ ካብ ሳውል ዓሌት ሳውላውያን።¹⁴ዓሌታት ስምኦናውያን እዚኣቶም እዮም፡ ዕስራን ክልተን ሽሕን ክልተ ሚእትን።
   ¹⁵ደቂ ጋድ በብዓሌቶም፡ ካብ ጸፎን ዓሌት ጻፎናውያን፡ ካብ ሓጊ ዓሌት ሓጋውያን፡ ካብ ሹኒ ዓሌት ሹናውያን፡¹⁶ካብ ኦዝኒ ዓሌት ኦዝናውያን፡ ካብ ኤሪ ዓሌት ኤራውያን፡¹⁷ካብ ኣሮድ ዓሌት ኣሮዳውያን፡ ካብ ኣርኤሊ ዓሌት ኣርኤላውያን፡¹⁸ዓሌታት ደቂ ጋድ ከምቲ እተቘጽርዎ እዚኣቶም እዮም፡ ኣርብዓ ሽሕን ሓሙሽተ ሚእትን።
   ¹⁹ደቂ ይሁዳ፡ ኤርን ኦናንን። ኤርን ኦናንን ድማ ኣብ ምድሪ ከነኣን ሞቱ።²⁰ደቂ ይሁዳ ኸኣ በብዓሌቶም እዚኣቶም እዮም፡ ካብ ሸላ ዓሌት ሸላውያን፡ ካብ ፋሬስ ዓሌት ፋሬሳውያን፡ ካብ ዜራሕ ዓሌት ዜራሓውያን።²¹ደቂ ፋሬስ ድማ እዚኣቶም እዮም፡ ካብ ሔጽሮን ዓሌት ሔጽሮናውያን፡ ካብ ሓሙል ዓሌት ሓሙላውያን።²²ዓሌታት ይሁዳ ኸምቲ እተቘጽርዎ እዚኣቶም እዮም፡ ሰብዓን ሹድሽተን ሽሕን ሓሙሽተ ሚእትን።
   ²³ደቂ ይሳኮር በብዓሌቶም፡ ካብ ቶላ ዓሌት ቶላውያን፡ ካብ ፉዋ ዓሌት ፉዋውያን፡²⁴ካብ ያሹብ ዓሌት ያሹባውያን፡ ካብ ሺምሮን ዓሌት ሺምሮናውያን።²⁵ዓሌታት ይሳኮር ከምቲ እተቘጽርዎ እዚኣቶም እዮም፡ ስሳን ኣርባዕተን ሽሕን ሰለስተ ሚእትን።
   ²⁶ደቂ ዛብሎን በብዓሌቶም፡ ካብ ሰረድ ዓሌት ሰረዳውያን፡ ካብ ኤሎን ዓሌት ኤሎናውያን፡ ካብ ያሕልኤል ዓሌት ያሕልኤላውያን።²⁷ዓሌታት ዛብሎናውያን ከምቲ እተቘጽርዎ እዚኣቶም እዮም፡ ስሳ ሽሕን ሓሙሽተ ሚእትን።
   ²⁸ደቂ ዮሴፍ በብዓሌቶም፡ ምናሴን ኤፍሬምን።²⁹ደቂ ምናሴ፡ ካብ ማኪር ዓሌት ማኪራውያን። ማኪር ድማ ንጊልኣድ ወለደ፡ ካብ ጊልኣድ ዓሌት ጊልኣዳውያን።³⁰ደቂ ጊልኣድ እዚኣቶም እዮም፡ ካብ ኢዔዘር ዓሌት ኢዔዘራውያን፡ ካብ ሔለቅ ዓሌት ሔለቃውያን፡³¹ካብ ኣስሪኤል ከኣ ዓሌት ኣስሪኤላውያን፡ ካብ ሰኬም ድማ ዓሌት ሰኬማውያን።³²ካብ ሸሚዳ ኸኣ ዓሌት ሸሚዳውያን፡ ካብ ሔፈር ድማ ዓሌት ሔፈራውያን።³³ጸሎፈሓድ ወዲ ሔፈር ከኣ ኣዋልድ እምበር፡ ኣወዳት ኣይነበርዎን። ስም እተን ኣዋልድ ጸሎፈሓድ ድማ፡ ማሕላ፡ ኖዓ፡ ሖግላ፡ ሚልካ፡ ቲርጻ እዩ።³⁴ዓሌታት ምናሴ እዚኣቶም እዮም፡ ቁጹራቶም ከኣ ሓምሳን ክልተን ሽሕን ሾብዓተ ሚእትን ኰኑ።
   ³⁵ደቂ ኤፍሬም በብዓሌቶም እዚኣቶም እዮም፡ ካብ ሹተላ ዓሌት ሹተላውያን፡ ካብ ቤከር ዓሌት ቤከራውያን፡ ካብ ታሓን ዓሌት ታሓናውያን።³⁶ደቂ ሹተላ ኸኣ፡ ካብ ዔራን ዓሌት ዔራናውያን።³⁷ዓሌታት ደቂ ኤፍሬም ከምቲ እተቘጽርዎ እዚኣቶም እዮም፡ ሰላሳን ክልተን ሽሕን ሓሙሽተ ሚእትን። ደቂ ዮሴፍ በብዓሌቶም እዚኣቶም እዮም።
   ³⁸ደቂ ብንያም በብዓሌቶም፡ ካብ ቤላዕ ዓሌት ቤላዓውያን፡ ካብ ኣሽቤል ዓሌት ኣሽቤላውያን፡ ካብ ኣሒራም ዓሊም ኣሒራማውያን።³⁹ካብ ሸፉፋም ዓሌት ሸፉፋማውያን፡ ካብ ሑፋም ዓሌት ሑፋማውያን።⁴⁰ደቂ ቤላዕ፡ ኣርድን ነዓማንን ነበሩ። ካብ ኣርድ ዓሌት ኣርዳውያን፡ ካብ ነዓማን ዓሌት ነዓማናውያን።⁴¹ደቂ ብንያም በብዓሌቶም እዚኣቶም እዮም፡ ቁጽራቶም ከኣ ኣርብዓን ሓሙሽተን ሽሕን ሹድሽተ ሚእትን ኰኑ።
   ⁴²ደቂ ዳን በብዓሌቶም እዚኣቶም እዮም፡ ካብ ሹሓም ዓሌት ሹሓማውያን። ዓሌታት ዳን በብዓሌቶም እዚኣቶም እዮም።⁴³ኲሎም ዓሌታት ሹሓማውያን ከምቲ እተቘጽርዎ ስሳን ኣርባዕተን ሽሕን ኣርባዕተ ሚእትን ኰኑ።
   ⁴⁴ደቂ ኣሴር በብዓሌቶም፡ ካብ ዪምና ዓሌት ዪምናውያን፡ ካብ ዪሽዊ ዓሌት ዪሽዋውያን፡ ካብ ብሪዓ ዓሌት ብሪዓውያን።⁴⁵ካብ ደቂ ብሪዓ፡ ካብ ሔበር ዓሌት ሔብራውያን፡ ካብ ማልኪኤል ዓሌት ማልኪኤላውያን።⁴⁶ስም ጓል ኣሴር ሳራ ነበረ።⁴⁷ዓሌታት ደቂ ኣሴር ከምቲ እተቘጽርዎ እዚኣቶም እዮም፡ ሓምሳን ሰለስተን ሽሕን ኣርባዕተ ሚእትን።
   ⁴⁸ደቂ ንፍታሌም በብዓሌቶም፡ ካብ ያሕጽኤል ዓሌት ያሕጽኤላውያን፡ ካብ ጉኒ ዓሌት ጉናውያን።⁴⁹ካብ የጸር ዓሌት የጸራውያን፡ ካብ ሺሌም ዓሌት ሺሌማውያን።⁵⁰ዓሌታት ንፍታሌም በብዓሌቶም እዚኣቶም እዮም። ቁጹራቶም ከኣ ኣርብዓን ሓሙሽተን ሽሕን ኣርባዕተ ሚእትን ኰኑ።
   ⁵¹እቶም ካብ ደቂ እስራኤል እተቘጽሩ ሹድሽተ ሚእትን ሓደን ሽሕን ሾብዓተ ሚእትን ሰላሳን ኰኑ።
   ⁵²እግዚኣብሄር ድማ ንሙሴ ኸምዚ ኢሉ ተዛረቦ፡⁵³እታ ምድሪ ነዚኣቶም ብቑጽሪ ስሞም ርስቲ ዀይና ትመቐል።⁵⁴ነቶም ብዙሓት ርስቲ ኣግፍሓሎም፡ ነቶም ሒደት ከኣ ርስቲ ኣንእሰሎም፡ ንነፍሲ ወከፍ ከም ቁጽሩ ርስቱ ይወሃብ።⁵⁵እታ ምድሪ ግና ብዕጭ ውድቕ ትመቐል። ከከም ስም ነገድ ኣቦታቶም ይረስተዩ።⁵⁶እቲ ርስቶም ኣብ መንጎ እቶም ብዙሓትን እቶም ሒደትን ከምታ ዕጫ ዝሃበቶ ይመቐል።⁵⁷እቶም በብዓሌቶም እተቘጽሩ ሌዋውያን ድማ እዚኣቶም እዮም፡ ካብ ገርሾን ዓሌት ገርሾናውያን፡ ካብ ቃሃት ዓሌት ቃሃታውያን፡ ካብ መራሪ ዓሌት መራራውያን።⁵⁸ዓሌታት ሌዊ እዚኣቶም እዮም፡ ዓሌት ሊብናውያን፡ ዓሌት ሔብሮናውያን፡ ዓሌት ማሕላውያን፡ ዓሌት ሙሻውያን፡ ዓሌት ቆራሓውያን። ቃሃት ከኣ ንኣምራም ወለደ።⁵⁹ስም ሰበይቲ ኣምራም ድማ ዮኬቤድ ነበረ። ንሳ ንሌዊ ኣብ ግብጺ እተወልደትሉ ጓል ሌዊ እያ። ንሳ ኸኣ ንኣምራም ኣሮንን ሙሴን ሚርያም ሓብቶምን ወለደትሉ።⁶⁰ንኣሮን ድማ ናዳብን ኣቢሁን ኣልኣዛርን ኢታማርን ተወልዱሉ።⁶¹ናዳብን ኣቢሁን ከኣ ጋሻ ሓዊ ናብ ቅድሚ እግዚኣብሄር ምስ ኣቕረቡ፡ ሞቱ።⁶²እቶም ቁጹራቶም ተባዕትዮ ዘበሉ ኸኣ፡ ካብ ወዲ ወርሒ ንላዕሊ ዕስራን ሰለስተን ሽሕ፡ ኰኑ። ንሳቶም ኣብ ማእከል ደቂ እስራኤል ርስቲ ኣይተዋህቦምን እሞ፡ ስለዚ ምስ ደቂ እስራኤል ኣይተቘጽሩን።
   ⁶³ሙሴን ካህን ኣልኣዛርን ኣብ ዮርዳኖስ ናይ ያሪኮ ኣብ ጐላጕል ሞኣብ ዝቘጸርዎም ደቂ እስራኤል እዚኣቶም እዮም።⁶⁴ካብቶም ሙሴን ካህን ኣሮንን ኣብ በረኻ ሲና ዝቘጸርዎም ቁጹራት ደቂ እስራኤል ግና ሓደ እኳ ኣብ ማእከል እዚኣቶም ኣይነበረን።⁶⁵እግዚኣብሄር ብዛዕባኦም፡ ርግጽ ኣብ በረኻ ኽሞቱ እዮም፡ ኢሉ ነበረ እሞ፡ ካባታቶም፡ ብጀካ ካሌብ ወዲ የፋኔን እያሱ ወዲ ነዌን፡ ሓደ እኳ ኣይተረፈን።

ዘሁልቁ ምዕራፍ 27

   ¹ኣዋልድ ጸሎፎሓድ ወዲ ሔፈር፡ ወዲ ጊልኣድ ወዲ ማኪር ወድ ምናሴ፡ ካብ ዓሌታት ምናሴ ወዲ ዮሴፍ ከኣ ቀረባ። ስም እተን ኣዋልዱ ድማ እዚ ነበረ፡ ማሕላ፡ ኖዓ፡ ሖግላ፡ ሚልካ፡ ቲርጻ።²ኣብ ቅድሚ ሙሴን ኣብ ቅድሚ ኻህን ኣልኣዛርን ኣብ ቅድሚ ሹማምትን ኲሉ ኣኼባን ኣብ ኣፍ ድንኳን ምርኻብ ደው ኢለን፡³ኣቦና ኣብ በረኻ ሞተ፡ ንሱ ኸኣ ብሓጢኣቱ ሞተ እምበር፡ ኣብ ማእከል እቶም በቲ ኣኼባ ቆራሕ ናብ ልዕሊ እግዚኣብሄር እተኣከቡ ኣይነበረን፡ ኣወዳት ድማ ኣይነበርዎን።⁴ወዲ ስለ ዘይነበሮስ፡ ስለምንታይ ስም ኣቦና ኻብ ማእከል ዓሌቱ ዝጠፍእ፡ ኣብ ማእከል ሓወቦታትና ርስቲ ሃበና፡ በላ።⁵ሙሴ ድማ እቲ ነገረን ናብ ቅድሚ እግዚኣብሄር ኣቕረበ።⁶እግዚኣብሄር ከኣ ንሙሴ ኸምዚ ኢሉ ተዛረቦ።⁷ኣዋልድ ጸሎፍሓድ እተዛረባኦ ሓቂ እዩ። ኣብ ማእከል ሓወቦታተን ርስቲ ሃበን፡ እቲ ርስቲ ኣቦኤን ናባታተን ኣሕልፎ።⁸ንደቂ እስራኤል ድማ ከምዚ ኢልካ ተዛረቦም፡ ሰብ፡ ወዲ ኸይሓደገ እንተ ሞተ፡ እቲ ርስቱ ናብ ጓሉ ኣሕልፍዎ።⁹ጓል እንተ ዘይብሉ ኸኣ፡ እቲ ርስቱ ነሕዋቱ ሃብዎም።¹⁰ኣሕዋት እንተ ዘይብሉ ኸኣ፡ እቲ ርስቱ ንሓወቦታቱ ሃብዎም።¹¹ኣቦኡ ኣሕዋት እንተ ዘይብሉ ድማ፡ እቲ ርስቱ ኻብ ዓሌቱ ንዝቐርቦ ዘመዱ ሃብዎ፡ ንሱ ይውረሶ። እዚ ኸኣ ከምቲ እግዚኣብሄር ንሙሴ ዝኣዘዞ ንደቂ እስራኤል ሕጊ ፍርዲ ይኹን።
   ¹²እግዚኣብሄር ድማ ንሙሴ በሎ፡ ናብዚ ኸረን ዓባሪም ደይብ፡ እታ ንደቂ እስራኤል ዝሃብክዎም ምድሪ ኸኣ ርኣያ።^13-14ምስ ርኤኻያ ድማ፡ እቲ ኣኼባ ኣብ በረኻ ጺን ክቋየቘኒ ኸሎ፡ ኣብቲ ማይ ኣብ ቅድሚ ኣዒንቶም ከይትቕድሱኒ፡ ንቓለይ ስለ ዝዓሎኹም፡ ከምቲ ኣሮን ሓውካ እተኣከበ፡ ንስኻውን ከምኡ ናብ ህዝብኻ ኽትእከብ ኢኻ። እዚ ኣብ ቃዴስ ኣብ በረኻ ጺን ዝነበረ ማይ መሪባ እዩ።
   ¹⁵ሙሴ ኸኣ ንእግዚኣብሄር ከምዚ ኢሉ ተዛረቦ፡^16-17እቲ ኣኼባ እግዚኣብሄር ጓሳ ኸም ዘይብለን ኣባጊዕ ከይኸውንሲ፡ ኣብ ቅድሚኦም ዝወጽእን ኣብ ቅድሚኦም ዝኣቱን፡ ዘውጽኦምን ዘእትዎምን፡ እግዚኣብሄር፡ ኣምላኽ መናፍስቲ ዅሉ ስጋ፡ ኣብ ልዕሊ እዚ ኣኼባ እዚ ዝኸውን ሰብኣይ ይመድብ።¹⁸እግዚኣብሄር ከኣ ንሙሴ በሎ፡ እያሱ ወዲ ነዌ፡ መንፈስ ዘለዎ ሰብኣይ፡ ናባኻ ውሰድ፡ ኢድካ ድማ ኣብ ልዕሊኡ ኣንብር።¹⁹ኣብ ቅድሚ ኻህን ኣልኣዛርን ኣብ ቅድሚ ዅሉ ኣኼባን ከኣ ደው ኣብሎ፡ ኣብ ቅድሚኦም ድማ ኣዝዞ።²⁰ኲሉ ኣኬባ ደቂ እስራኤል ምእንቲ ኽእዘዞ ኸኣ፡ ካብ ግርማኻ ኣብ ልዕሊኡ ኣንብር።²¹ኣብ ቅድሚ ኻህን ኣልኣዛር ድማ ደው ይበል፡ ንሱ ኸኣ ብፍርዲ ኡሪም ኣብ ቅድሚ እግዚኣብሄር ይሕተተሉ። ንሱን ኲሎም ደቂ እስራኤልን ኲሉ እቲ ኣኼባን ከኣ ምስኡ ብቓሉ ይውጽኡ። ብቓሉ ድማ ይእተዉ።
   ²²ሙሴ ድማ ከምቲ እግዚኣብሄር ዝኣዘዞ ገበረ፡ ንእያሱ ወሲዱ ኣብ ቅድሚ ኻህን ኣልኣዛርን ኣብ ቅድሚ ዅሉ ኣኼባን ደው ኣበሎ።²³ንሱ ኸኣ ኣእዳዉ ኣብ ልዕሊኡ ኣንበረ፡ ከምቲ እግዚኣብሄር ብሙሴ እተዛረቦ ድማ ኣዘዞ።

ዘሁልቁ ምዕራፍ 28

   ¹እግዚኣብሄር ድማ ንሙሴ ኸምዚ ኢሉ ተዛረቦ፡²ንደቂ እስራኤል፡ መስዋእተይ፡ እቲ ብልዐይ ነቲ ጥዑም ጨና ዝዀነኒ ናይ ሓዊ መስዋእተይ፡ በቲ ምዱብ ጊዚኡ ኸተቕርቡለይ ሓልዉ፡ ኢልካ ኣዝዞም።³በሎም ድማ፡ እቲ ንእግዚኣብሄር እተቕርብዎ መስዋእቲ ሓዊ እዚ እዩ፡ ነቲ ናይ ወርትግ ዝሓርር መስዋእቲ ነንመዓልቲ ጐደሎ ዘይብሎም ክልተ ገንሸል ዓመት፡⁴ነቲ ሓደ ገንሸል ብጊሓት ሰውኣዮ፡ ነቲ ኻልኣይ ገንሸልውን ምሸት ሰውኣዮ።⁵ንመስዋእቲ ብልዒ ኸኣ ብርብዒ ሂን ጕዱእ ዘይቲ እተቘምጥዐ ዓስራይ ኣፍ ኤፋ ድኹም ሓርጭ።⁶እዚ እቲ ኣብ ከረን ሲና እተቐረበ ናይ ወርትግ ዝሓርር መስዋእቲ፡ ንእግዚኣብሄር ንጥዑም ጨና መስዋእቲ ሓዊ እዩ።⁷ንመስዋእቲ መስተ ኸኣ ምስቲ ሓደ ገንሸል ርብዒ ሂን ይኹን። እቲ መስዋእቲ መስተ ኻብ ብርቱዕ መስተ ንእግዚኣብሄር ኣብ ቅዱስ ቦታ ይኰዖ።⁸ነቲ ኻልኣይ ገንሸል ምሸት ሰውኣዮ። ከምቲ ናይ ብጊሓት ምስ መስዋእቲ ብልዕን ምስ መስዋእቲ መስተን ጌርካ ንእግዚኣብሄር ንጥዑም ጨና ንመስዋእቲ ሓዊ ሰውኣዮ።
   ⁹ብመዓልቲ ሰንበት ድማ ክልተ ገንሸል ዓመት ጐደሎ ዘይብሎም፡ ንመስዋእቲ ብልዒ ኸኣ ክልተ ዓስራይ ኣፍ ኤፋ፡ ብዘይቲ እተቘምጥዐ ድኹም ሓርጭ፡ ምስኡ ኸኣ ናይ መስተ መስዋእቱ።¹⁰እዚ ብጀካ እቲ ናይ ወርትግ ዝሓርር መስዋእትን ናይ መስተ መስዋእቱን፡ ናይ ሰንበተ ሰንበት ዝሓርር መስዋእቲ እዩ።
   ¹¹ኣብ መጀመርታ ኣዋርሕኩም ድማ ክልተ ዝራብዕ፡ ሓደ ድዑል፡ ሾብዓተ ገንሸል ዓመት፡ ጐደሎ ዘይብሎም፡ ንእግዚኣብሄር ዝሓርር መስዋእቲ ኸተቕርቡ ኢኹም፡¹²መስዋእቲ ብልዒ ድማ ነንሓደ ዝራብዕ ሰለስተ ዓስራይ ኣፍ ኤፋ፡ ብዘይቲ እተቘምጥዐ ድኹም ሓርጭ፡ ነቲ ድዑል መስዋእቲ ብልዒ ኸኣ ክልተ ዓስራይ ኣፍ፡ ብዘይቲ እተቘምጥዐ ድኹም ሓርጭ።¹³ነንሓደ ገንሸል መስዋእቲ ብልዒ ድማ ሓደ ዓስራይ ኣፍ፡ ብዘይቲ እተቘምጥዐ ድኹም ሓርጭ፡ ንጥዑም ጨና ዝሓርር መስዋእቲ ሓዊ ንእግዚኣብሄር።¹⁴ናይ መስተ መስዋእቶም ድማ ንዝራብዕ ፈረቓ ሂን ወይኒ፡ ንድዑል ከኣ ሳልሳይ ኣፍ ሂን፡ ንገንሸል ከኣ ርብዒ ሂን። እዚ ኣብ ናይ ዓመት ኣዋርሕ፡ በብወርሒ ዝሓርር መስዋእቲ እዩ።¹⁵ንመስዋኣቲ ሓጢኣት ድማ ሓደ ድቤላ ንእግዚኣብሄር የቕርብ፡ እዚ ኣብ ልዕሊ እቲ ናይ ወርትግ ዝሓርር መስዋእትን ናይ መስተ መስዋእቱን ይሰዋእ።
   ¹⁶በታ ቐዳመይቲ ወርሒ፡ ካብታ ወርሒ ኣብ መበል ዓሰርተው ኣርባዕተ መዓልቲ ኸኣ ፋስጋ እግዚኣብሄር እዩ።¹⁷ኣብታ ወርሒ እቲኣ ኣብ መበል ዓሰርተው ሓሙሽተ መዓልቲ ድማ በዓል እዩ። ሾብዓተ መዓልቲ ቅጫ ይበላዕ።¹⁸በታ ቐዳመይቲ መዓልቲ ቅዱስ ኣኼባ ይኹነልኩም። ገለ ዕዮ ኣገልግሎት ኣይትዕየዩ።¹⁹ግናኸ መስዋእቲ ሓዊ፡ ዝሓርር መስዋእቲ ንእግዚኣብሄር ክልተ ዝራብዕ፡ ሓደ ድዑል፡ ሾብዓተ ገንሸል ዓመት ኣቕርቡ፡ ጐደሎ ዘይብሎም ይኹኑልኩም።²⁰ናይ ብልዒ መስዋእቶም ከኣ ብዘይቲ እተቘምጥዐ ድኹም ሓርጭ፡ ንዝራብዕ ሰለስተ ዓስራይ ኣፍ፡ ንድዑል ክልተ ዓስራይ ኣፍ ሰውኡ።²¹ነቶም ሾብዓተ ገንሸል ነንሓደ ገንሸል ዓስራይ ኣፍ ሰውእ።²²ንምትዕራቕኩም ድማ ሓደ ድቤላ ንመስዋኣቲ ሓጢኣት።²³ብጀካ እቲ ናይ ብጊሓት ዝሓርር መስዋእቲ፡ እቲ ናይ ወርትግ ዝሓርር መስዋእቲ፡ እዚ ሰውኡ።²⁴ኣብ ጸጽባሕ ሾብዓተ መዓልቲ ኸምኡ ግበሩ፡ ብልዒ መስዋእቲ ሓዊ ንእግዚኣብሄር ንጥዑም ጨና እዩ። እዚ ምስቲ ናይ ወርትግ ዝሓርር መስዋእትን ናይ መስተ መስዋእቱን ይሰዋእ።²⁵በታ ሳብዐይቲ መዓልቲ ኸኣ ቅዱስ ኣኼባ ይኹነልኩም፡ ገለ ዕዮ ኣገልግሎት ኣይትዕየዩ።
   ²⁶በታ ቐዳማይ ፍሬኹም ንእግዚኣብሄር ሓድሽ መስዋእቲ ብልዒ እተቕርቡላ መዓልቲ፡ በቲ ናይ ሰሙን በዓላትኩም፡ ቅዱስ ኣኼባ ይኹነልኩም፡ ገለ ዕዮ ኣገልግሎት ኣይትዕየዩ።²⁷ግናኸ ዝሓርር መስዋእቲ ንእግዚኣብሄር ንጥዑም ጨና ኽልተ ዝራብዕ ሓደ ድዑል፡ ሾብዓተ ገንሸል ዓመት ኣቕርቡ።²⁸ናይ ብልዒ መስዋእቶም ድማ ብዘይቲ እተቘምጥዐ ድኹም ሓርጭ፡ ነንዝራብዕ ሰለስተ ዓስራይ ኣፍ፡ ነቲ ድዑል ከኣ ክልተ ዓስራይ ኣፍ፡²⁹ነቶም ሾብዓተ ገንሸል ከኣ ነንሓደ ገንሸል ዓስራይ ኣፍ፡³⁰ንምትዕራቕኩም ድማ ሓደ ድቤላ ሰውኡ።³¹ብጀካ እቲ ናይ ወርትግ ዝሓርር መስዋእቲ ምስ ናይ ብልዒ መስዋእቱን ምስ ናይ መስተ መስዋእቶምን እዚ ሰውኡ። ጐደሎ ዘይብሎም ከኣ ይኹኑልኩም።

ዘሁልቁ ምዕራፍ 29

   ¹ብሳብዐይቲ ወርሒ፡ ኣብታ ወርሒ ኸኣ በታ ቐዳመይቲ መዓልቲ ቅዱስ ኣኼባ ይኹነልኩም። ገለ ዕዮ ኣገልግሎት ኣይትዕየዩ። ንሳ መዓልቲ ቓና መለኸት ትኹነልኩም።²ሽዑ ንእግዚኣብሄር ንጥዑም ጨና ዝሓርር መስዋእቲ፡ ሓደ ዝራብዕ፡ ሓደ ድዑል፡ ጐደሎ ዘይብሎም ሾብዓተ ገንሸል ዓመት፡³ናይ ብልዒ መስዋእቶም ከኣ ብዘይቲ እተቘምጥዐ ድኹም ሓርጭ፡ ነቲ ዝራብዕ ሰለስተ ዓስራይ ኣፍ፡ ነቲ ድዑል ድማ ክልተ ዓስራይ ኣፍ፡⁴ነቶም ሾብዓተ ገንሸል ከኣ ነንገንሸል ሓደ ዓስራይ ኣፍ፡⁵ንመስዋእቲ ሓጢኣት ከኣ ንምትዕራቕኩም ሓደ ድቤላ፡⁶እዚ ብጀካ እቲ ናይ መጀመርታ ወርሒ ዝሓርር መስዋእትን ምስ ናይ ብልዒ መስዋእቱን እቲ ናይ ወርትግ ዝሓርር መስዋእትን ናይ ብልዒ መስዋእቱን ናይ መስተ መስዋእቶምን እዚ ንእግዚኣብሄር ንጥዑም ጨና መስዋእቲ ሓዊ እዩ።
   ⁷ካብዛ ሳብዐይቲ ወርሒ እዚኣ ኣብ ዓስረይቲ መዓልቲ ኸኣ ቅዱስ ኣኼባ ይዅነልኩም፡ ነፍስኹም ከኣ ኣዋርዱ። ገለ ዕዮ ኣይትዕየዩ።⁸ንእግዚኣብሄር ንጥዑም ጨና ዝሓርር መስዋእቲ፡ ሓደ ዝራብዕ፡ ሓደ ድዑል፡ ሾብዓተ ገንሸል ዓመት ኣቕርቡ፡ ጐደሎ ዘይብሎም ከኣ ይኹኑልኩም።⁹ናይ ብልዒ መስዋእቶም ድማ ብዘይቲ እተቘምጥዐ ድኹም ሓርጭ፡ ነቲ ዝራብዕ ሰለስተ ዓስራይ ኣፍ፡ ነቲ ድዑል ከኣ ክልተ ዓስራይ ኣፍ፡¹⁰ነቶም ሾብዓተ ገንሸል ነንገንሸል ዓስራይ ኣፍ፡¹¹ንመስዋእቲ ሓጢኣት ሓደ ድቤላ፡ እዚ ብጀካ እቲ ንመተዓረቒ ዝኸውን መስዋእቲ ሓጢኣትን ናይ ወርትግ ዝሓርር መስዋእትን ምስ ናይ ብልዒ መስዋእቱን ናይ መስተ መስዋእቶምን ኣቕርቡ።
   ¹²ኣብታ ሳብዐይቲ ወርሒ ኣብ መበል ዓሰርተው ሓሙሽተ መዓልቲ ቅዱስ ኣኼባ ይኹነልኩም፡ ገለ ዕዮ ኣገልግሎት ኣይትዕየዩ፡ ሾብዓተ መዓልቲ ንእግዚኣብሄር በዓል ኣብዕሉ።¹³ንእግዚኣብሄር ንጥዑም ጨና ዝሓርር መስዋእቲ መስዋእቲ ሓዊ፡ ኣቕርቡ፡ ዓሰርተው ሰለስተ ዝራብዕ፡ ክልተ ድዑል፡ ዓሰርተው ኣርባዕተ ገንሸል ዓመት ኣቕርቡ፡ ገደሎ ዘይብሎም ከኣ ይኹኑ።¹⁴ናይ ብልዒ መስዋእቶም ከኣ ብዘይቲ እተቘምጥዐ ድኹም ሓርጭ፡ ነቶም ዓሰርተው ሰለስተ ዝራብዕ፡ ነንሓደ ዝራብዕ ሰለስተ ዓስራይ ኣፍ፡ ነቶም ክልተ ድዑል ድማ ነንሓደ ድዑል ክልተ ዓስራይ ኣፍ፡¹⁵ነቶም ዓሰርተው ኣርባዕተ ገንሸል ከኣ ነንሓደ ገንሸል ዓስራይ ኣፍ፡¹⁶ንመስዋእቲ ሓጢኣት ድማ ሓደ ድቤላ፡ እዚ ብጀካ እቲ ናይ ወርትግ ዝሓርር መስዋእቱ፡ ምስቲ ናይ ብልዒ መስዋእቱን ናይ መስተ መስዋእቱን ጌርኩም ኣቕርቡ።
   ¹⁷ኣብታ ኻልኣይቲ መዓልቲ ድማ፡ ዓሰርተው ክልተ ዝራብዕ፡ ክልተ ድዑል፡ ጐደሎ ዘይብሎም ዓሰርተው ኣርባዕተ ገንሸል ዓመት ኣቕርቡ፡¹⁸ምስቲ ናይ ብልዒ መስዋእቶምን ናይ መስተ መስዋእቶምን ነቶም ዝራብዓትን ደዓውልን ገንሸልን ከምቲ ቑጽሮም፡ ከምቲ እተሰርዐ፡¹⁹ንመስዋእቲ ሓጢኣት ከኣ ሓደ ድቤላ፡ እዚ ብጀካ እቲ ናይ ወርትግ ዝሓርር መስዋእቲ፡ ምስ ናይ ብልዒ መስዋእቱን ናይ መስተ መስዋእቶምን ኣቕርቡ።
   ²⁰በታ ሳልሰይቲ መዓልቲ ድማ ዓሰርተው ሓደ ዝራብዕ፡ ክልተ ድዑል፡ ጐደሎ ዘይብሎም ዓሰርተው ኣርባዕተ ገንሸል ዓመት፡²¹ድማ እቲ ናይ ብልዒ መስዋእቶምን ናይ መስተ መስዋእቶምን ነቶም ዝራብዓትን ደዓውልን ገነሽልን፡ ከምቲ ቑጽሮም፡ ከምቲ እተሰርዐ፡²²ንመስዋእቲ ሓጢኣት ከኣ ሓደ ድቤላ፡ እዚ ብጀካ እቲ ናይ ወርትግ ዝሓርር መስዋእቲ ምስ ናይ ብልዒ መስዋእቱን ናይ መስተ መስዋእቱን።
   ²³በታ ራብዐይቲ መዓልቲ ድማ ዓሰርተ ዝራብዕ፡ ክልተ ድዑል፡ ጐደሎ ዘይብሎም ዓሰርተው ኣርባዕተ ገንሸል ዓመት፡²⁴ድማ እቲ ናይ ብልዒ መስዋእቶምን ናይ መስተ መስዋእቶምን፡ ነቶም ዝራብዓትን ደዓውልን ገነሽልን፡ ከምቲ ቑጽሮም፡ ከምቲ እተሰርዐ፡²⁵ንመስዋእቲ ሓጢኣት ከኣ ሓደ ድቤላ፡ እዚ ብጀካ እቲ ናይ ወርትግ ዝሓርር መስዋእቲ ናይ ብልዒ መስዋእቱን ናይ መስተ መስዋእቱን።
   ²⁶በታ ሓምሰይቲ መዓልቲ ድማ ትሽዓተ ዝራብዕ፡ ክልተ ድዑል፡ ጐደሎ ዘይብሎም ዓሰርተው ኣርባዕተ ገንሸል ዓመት።²⁷ድማ እቲ ናይ ብልዒ መስዋእቶምን ናይ መስተ መስዋእቶምን ነቶም ዝራብዓትን ደዓውልን ገነሽልን፡ ከምቲ ቑጽሮም፡ ከምቲ እተሰርዐ፡²⁸ንመስዋእቲ ሓጢኣት ከኣ ሓደ ድቤላ፡ እዚ ብጀካ እቲ ናይ ወርትግ ዝሓርር መስዋእቲ፡ ምስ ናይ ብልዒ መስዋእቱን ናይ መስተ መስዋእቱን።
   ²⁹በታ ሳድሰይቲ መዓልቲ ድማ ሾሞንተ ዝራብዕ፡ ክልተ ድዑል፡ ጐደሎ ዘይብሎም ዓሰርተው ኣርባዕተ ገንሸል ዓመት፡³⁰ድማ እቲ ናይ ብልዒ መስዋእቶምን ናይ መስተ መስዋእቶምን፡ ነቶም ዝራብዓትን ደዓውልን ገንሸልን፡ ከምቲ ቑጽሮም፡ ከምቲ እተሰርዐ።³¹ንመስዋእቲ ሓጢኣት ከኣ ሓደ ድቤላ፡ እዚ ብጀካ እቲ ናይ ወርትግ ዝሓርር መስዋእቲ፡ ናይ ብልዒ መስዋእቱን ናይ መስተ መስዋእቱን።
   ³²በታ ሳብዐይቲ መዓልቲ ድማ ሾብዓተ ዝራብዕ፡ ክልተ ድዑል፡ ጐደሎ ዘይብሎም ዓሰርተው ኣርባዕተ ገንሸል ዓመት፡³³ድማ እቲ ናይ ብልዒ መስዋእቶምን ናይ መስተ መስዋእቶምን፡ ነቶም ዝራብዓትን ድዓውልን ገንሸልን፡ ከምቲ ቑጽሮም፡ ከምቲ እተሰርዐ፡³⁴ንመስዋእቲ ሓጢኣት ከኣ ሓደ ድቤላ፡ እዚ ብጀካ እቲ ናይ ወርትግ ዝሓርር መስዋእቲ ናይ ብልዒ መስዋእቱን ናይ መስተ መስዋእቱን።
   ³⁵በታ ሳምነይቲ መዓልቲ ኽቡር ኣኼባ ይኹነልኩም፡ ኩሉ ዕዮ ኣገልግሎት ኣይትዕየዩ።³⁶ንእግዚኣብሄር ጥዑም ጨና ዝሓርር መስዋኣቲ፡ መስዋእቲ ሓዊ ኣቕርቡ፡ ሓደ ዝራብዕ፡ ሓደ ድዑል፡ ጐደሎ ዘይብሎም ሾብዓተ ገንሸል ዓመት፡³⁷እቲ ናይ ብልዒ መስዋእቶምን ናይ መስተ መስዋእቶምን፡ ነቲ ዝራብዕን ነቲ ድዑልን ንገነሽልን፡ ከምቲ ቑጽሮም፡ ከምቲ እተሰርዐ፡³⁸ንመስዋእቲ ሓጢኣት ከኣ ሓደ ድቤላ፡ እዚ ብጀካ እቲ ናይ ወርትግ ዝሓርር መስዋእቲ ናይ ብልዒ መስዋእቱን ናይ መስተ መስዋእቱን።
   ³⁹እዚ ብጀካ እቲ መብጽዓኹምን ናይ ፍቓድ መስዋእትኹምን ንዝሓርር መስዋእትኹም ኰነ ወይ ናይ ብልዒ መስዋእትኹም ወይ ናይ መስተ መስዋእትኹም ወይ ናይ ምስጋና መስዋእትኹም በቶም ዓበይቲ በዓላት ንእግዚኣብሄር ከተቕርቡ ኢኹም።

ዘሁልቁ ምዕራፍ 30

   ¹ከምቲ እግዚኣብሄር ንሙሴ ዝኣዘዞ ዅሉ ድማ፡ ሙሴ ንደቂ እስራኤል ነገሮም።
   ²ሙሴ ኸኣ ንሓላቑ ነገድ ደቂ እስራኤል፡ እቲ እግዚኣብሄር ዝኣዘዞ እዚ እዩ፡ ኢሉ ተዛረቦም፡³ሰብ ንእግዚኣብሄር መብጽዓ እንተ ተማባጽዐ፡ ወይ ምሒሉ፡ ገለ ነገር ይትረፈኒ ብምባል፡ ነፍሱ ብማሕላ እንተ ኣሰረ፡ ቃሉ ኣየፍርስ፡ ከምቲ ኻብ ኣፉ ዝወጸ ኹሉ ይግበር።
   ⁴ሰበይቲ ድማ ብግዜ ንእስነታ፡ ኣብ ቤት ኣቦኣ ኸላ፡ ንእግዚኣብሄር መብጽዓ እንተ ተማባጽዐት፡ ብገለ ማእሰር ከኣ እንተ ተኣስረት፡⁵ኣቦኣ ድማ መብጽዓኣን እቲ ነፍሳ ዝኣሰረትሉ መእሰርን እንተ ሰምዐ፡ እሞ ኣቦኣ ብዛዕባ እዚ ስቕ እንተ በለ፡ ኲሉ መብጽዓኣ ይቑም፡ እቲ ነፍሳ ዝኣሰረትሉ ዅሉ መእሰሪ ኸኣ ይቑም።⁶ኣቦኣ በታ ዝሰምዓላ መዓልቲ እንተ ኸልኣ ግና፡ ኲሉ መብጽዓኣን እቲ ነፍሳ ዝኣሰረትሉ መእሰርን ኣይቑም። ኣቦኣ እዩ ዝኸልኣ እሞ፡ እግዚኣብሄር ከኣ ይቕረ ኽብለላ እዩ።⁷ተማባጺዓ ኸላ፡ ወይ ብታህዋኽ ካብ ኣፋ ቓል እንተ ሞለቛ እሞ፡ ብእኡ ነፍሳ ኣሲራ ኸላ ኣብ ሰብኣይ እንተ ተኣትወት፡⁸እቲ ሰብኣያ ኸኣ ሰሚዑ፡ በታ ዝሰምዓላ መዓልቲ ስቕ እንተ በለ፡ እቲ መብጽዓኣ ይቑም፡ እቲ ነፍሳ ዝኣሰረትሉ መእሰሪኣ ድማ ይቑም።⁹እቲ ሰብኣያ በታ ዝሰምዓላ መዓልቲ እንተ ኸልኣ ግና፡ ንሱ ነቲ መብጽዓኣን ነቲ ብእኡ ነፍሳ ዝኣሰረትሉ ብታህዋኽ ካብ ኣፋ ዝመለቘ ቓልን ከንቱ ይገብሮ፡ እግዚኣብሄር ከኣ ክሓድገላ እዩ።¹⁰ናይ መበለት ወይ ናይ ፍትሕቲ ሰበይቲ መብጾዓ ግና፡ ነፍሳ ዝኣሰረትሉ ዅሉ ይቑመላ።
   ¹¹ኣብ ቤት ሰብኣያ ኸላ ድማ፡ እንተ ተማባጽዐት ወይ ብናይ ማሕላ መእሰሪ ነፍሳ እንተ ኣሰረት፡¹²ሰብኣያ ኸኣ ሰሚዑ ስቕ እንተ በለ እሞ እንተ ዘይከልኣ፡ ኲሉ መብጽዓኣ ይቑም፡ እቲ ነፍሳ ዝኣሰረትሉ ዅሉ መእሰሪ ድማ ይቑም።¹³ሰብኣያ በታ ዝሰምዓላ መዓልቲ ፈጺሙ ኸንቱ እንተ ገበሮ ግና፡ ብዛዕባ መብጽዓኣ ወይ ብዛዕባ እቲ እተኣስረትሉ፡ ካብ ኣፋ ዝወጾ ዅሉ ኣይቐውምን። ሰብኣያ እዩ ኸንቱ ዝገበሮ፡ እግዚኣብሄር ድማ ይቕረ ኽብለላ እዩ።¹⁴ነፍሳ ኸተትሕት ኢላ እተማባጾዓቶ ዅሉ ወይ ናይ ማሕላ መእሰሪ ዘበለ ሰብኣያ የቑሞ፡ ሰብኣያ ኸኣ ከንቱ ይገብሮ።¹⁵ሰብኣያ ኻብ መዓልቲ ንመዓልቲ ስቕ እንተ በለ ግና፡ ንዅሉ መብጾዓኣን ንዅሉ ኣብ ልዕሊኣ ዘሎ መእሰሪኣን ኣቘሞ፡ በታ ዝሰምዓላ መዓልቲ ስቕ ኢሉ እዩ እሞ፡ ኣቘሞ።¹⁶ምስ ሰምዐ፡ ጸኒሑ ፈጺሙ ኸንቱ እንተ ገበሮ ግና፡ ንሱ በደላ ይጸውር።
   ¹⁷እቲ ብዛዕባ ኣብ መንጎ ሰብኣይን ሰበይትን፡ ኣብ መንጎ ኣቦን ጓልን ብግዜ ንእስነታ ኣብ ቤት ኣቦኣ ኸላ፡ እግዚኣብሄር ንሙሴ ዝኣዘዞ ሕጋጋት እዚ እዩ።

ዘሁልቁ ምዕራፍ 31

   ^1-2እግዚኣብሄር ድማ ንሙሴ፡ ንደቂ እስራኤል ንሚድያናውያን ሕነ ፍደየሎም፡ ድሕሪኡ ናብ ህዝብኻ ኽትእከብ ኢኻ፡ ኢሉ ተዛረቦ።³ሙሴ ኸኣ ነቲ ህዝቢ ኸምዚ ኢሉ ተዛረቦ፡ ካባኻትኩም ሰባት ንውግእ ይዳለዉ፡ ኣብ ሚድያን ሕነ እግዚኣብሄር ክፈድዮ ኸኣ ንሚድያን ይኺዱ።⁴ካብ ኲሎም ነገዳት እስራኤል፡ ከካብ ነገድ ሽሕ ሰብ ንውግእ ስደዱ።⁵ካብ ኣሽሓት እስራኤል፡ ከካብ ነገድ ሽሕ ተዋህቡ፡ ዓሰርተው ክልተ ሽሕ ንውግእ ተዳለዉ።⁶ሙሴ ድማ ነቶም ከካብ ነገድ ሽሕ ዝወጹ፡ ንኣታቶምን ነቲ ምስ ኣቓሑ መቕደስን መለኸት መመልከትን ኣብ ኢዱ ዝነበሮ ፊንሃስ ወዲ ኻህን ኣልኣዛርን ናብ ውግእ ሰደዶም።⁷ከምቲ እግዚኣብሄር ንሙሴ ዝኣዘዞ ኸኣ፡ ምስ ሚድያን ተዋግኡ፡ ንዅሉ ተባዕታይ ድማ ቐተሉ።⁸ንነገስታት ሚድያን ድማ፡ ንኤዊን ሬቀምን ጹርን ሑርን ሬባዕን፡ ነቶም ሓሙሽተ ነገስታት ሚድያን ምስቶም ቅቱላቶም ቀተልዎም። ንበላዓም ወዲ ቤዖር ድማ ብሴፍ ቀተልዎ።⁹ደቂ እስራኤል ከኣ ነንስቲ ሚድያንን ንቘልዑኤንን ማረኹ። ኲሉ ማሎምን ኲሉ ጥሪቶምን ኲሉ ገንዘቦምን ዘመቱ።¹⁰ንዅለን ዝነብሩለን ከተማታቶምን ኲሉ ሰፈሮምን ከኣ ብሓዊ ኣንደዱ።¹¹ኲሉ ሰለባን ኲሉ ምርኮን፡ ሰብ ኰነ ማል ኰነ፡ ወሰዱ።¹²ነቶም ምሩኻትን ነቲ እተዘምተን ነቲ ሰለባን ድማ ናብ ሙሴን ናብ ካህን ኣልኣዛርን ናብ ኣኼባ ደቂ እስራኤልን፡ ናብቲ ሰፈር ኣብ ጐላጕል ሞኣብ ናይ ዮርዳኖስ፡ ኣብ መንጽር ያሪኮ ኣምጽእዎ።
   ¹³ሙሴን ካህን ኣልኣዛርን ኲሎም ሹማምቲ እቲ ኣኼባን ድማ ናብ ወጻኢ ሰፈር ክቕበልዎም ወጹ።¹⁴ሙሴ ኸኣ በቶም ካብ ውግእ እተመልሱ ሓላቑ ሰራዊት፡ በቶም ሓላቑ ሽሕን ሓላቑ ሚእትን፡ ተናደደ።¹⁵ሙሴ ድማ በሎም፡ ንዅለን ኣንስቲዶ ብህይወት ሓዲግኩምወን፡¹⁶እንሆ፡ በቲ ናይ ጴዖር ነገር፡ ብምኽሪ በላዓም፡ ንደቂ እስራኤል ንእግዚኣብሄር ዘጥለማኦም ንሳተን እየን፡ ስለዚ ኸኣ ኣብቲ ኣኼባ እግዚኣብሄር መዓት ኰነ።¹⁷ሕጂ ድማ ካብ ቈልዑ ተባዕታይ ዘበለ ቕተሉ፡ ምስ ተባዕታይ ብምድቃስ ሰብኣይ ዝፈለጣ ዅለን ኣንስቲ ኸኣ ቅተልወን።¹⁸ብምድቃስ ንተባዕታይ ዘይፈለጣ ዅለን ኣዋልድ ግና ንኣኻትኩም ክዀና ብህይወተን ሕደግወን።¹⁹ንስኻትኩም ከኣ ክሳዕ ሾብዓተ መዓልቲ ኣብ ወጻኢ ሰፈር ስፈሩ፡ ሰብ ዝቐተለ ዘበለን እተቐትለ ዝተንከየ ዘበለን ከኣ፡ ንስኻትኩምን ምሩኻትኩምን፡ ብሳልሰይቲ መዓልትን ብሳብዐይቲ መዓልትን ርእስኹም ኣንጽሁ።²⁰ኲሉ ኽዳውንትን ኲሉ ኣቕሓ ቘርበትን ካብ ጸጕሪ ጤል እተገብረ ዅለን ኲሉ ኣቕሓ ዕጨይትን ኣንጽህዎ።
   ²¹ካህን ኣልኣዛር ድማ ነቶም ኣብ ውግእ ከይዶም ዝነበሩ ተዋጋእቲ ሰባት በሎም፡ እግዚኣብሄር ንሙሴ ዝኣዘዞ ትእዛዝ ሕጊ እዚ እዩ፡²²ወርቅን ብሩርን፡ ኣስራዚ፡ ሓጺን፡ ቈርቈሮን ዓረርን፡²³ሓዊ ዝኽእል ኲሉ ነገር ብሓዊ ኣሕልፍዎ፡ ይነጽህ ድማ፡ በቲ ዘንጽህ ማይ ከኣ ይንጻህ። ሓዊ ንዘይኽእል ኲሉ ድማ ብማይ ኣሕልፍዎ።²⁴ኣብታ ሳብዐይቲ መዓልቲ ኸኣ ክዳውንትኹም ሕጸቡ፡ ትነጽሁ ኸኣ። ድሕርቲ ሰፈር ትኣትዉ።
   ²⁵እግዚኣብሄር ድማ ንሙሴ ኸምዚ ኢሉ ተዛረቦ፡²⁶ንስኻን ካህን ኣልኣዛርን ሓላቑ ማይ ቤት ኣቦታት ኣኼባን ኴንኩም፡ ነቲ ምርኮ፡ ሰቡን ማሉን፡ ቁጸርዎ።²⁷እቲ ምርኮ ነቶም ኣብ ውግእ ዝኸዱ ተዋጋእትን ንብዘሎ እቲ ኣኼባን ፍርቀ ፍርቂ ጌርኩም ምቐልዎም፡²⁸ካብቶም ናብ ውግእ ከይዶም ዝነበሩ ሰብ ውግእ፡ ካብ ሰብን ካብ ኣሓን ካብ ኣእዱግን ካብ ኣባጊዕን ከካብ ሓሙሽተ ሚእቲ ሓንቲ ነፍሲ ንእግዚኣብሄር ግብሪ ኣልዕል።²⁹ካብቲ ፍርቆም ውሰዱ እሞ፡ ንእግዚኣብሄር ዝውዝወዝ መስዋእቲ ክኸውን፡ ንኻህን ኣልኣዛር ሃቦ።³⁰ካብቲ ፍርቂ ናይ ደቂ እስራኤል ከኣ፡ ካብ ሰብ፡ ካብ ኣሓ፡ ካብ ኣእዱግን ካብ ኣባጊዕን፡ ካብ ኲለን ከብቲ ከካብ ሓምሳ ሓደ ውሰድ፡ ነቶም ሓለዋ ማሕደር እግዚብሄር ዝሕልዉ ሌዋውያን ሃቦም።
   ³¹ሙሴን ካህን ኣልኣዛርን ድማ ከምቲ እግዚኣብሄር ንሙሴ ዝኣዘዞ ገበሩ።³²እቲ እተዘምተ፡ ካብቲ እቶም ሰብ ውግእ ዝዘመትዎ ዝተረፈ ዝማት ሹድሽተ ሚእትን ሰብዓን ሓሙሽተን ሽሕ በጊዕ።³³ሰብዓን ክልተን ሽሕ ላም፡³⁴ስሳን ሓደን ሽሕ ኣድጊ፡³⁵ኲልዅለን ሰላሳን ክልተን ሽሕ ሰብ ከኣ ምስ ተባዕታይ ምድቃስ ዘይፈላጣ ነፍሳት ኣዋልድ።³⁶እቲ ፍርቂ፡ ግደ እቶም ናብ ውግእ ከይዶም ዝነበሩ፡ ቁጽሪ እተን ኣባጊዕ ሰለስተ ሚእትን ሰላሳን ሾብዓን ሽሕ ሓሙሽተን ሚእትን ኰነ።³⁷ካብ ኣባጊዕ ግብሪ ንእግዚኣብሄር ሹድሽተ ሚእትን ሰብዓን ሓሙሽተን ኰነ።³⁸ኣሓ ድማ ሰላሳን ሹድሽተን ሽሕ፡ ካብኡ ግብሪ ንእግዚኣብሄር ሰብዓን ክልተን።³⁹ኣእዱግ ከኣ ሰላሳ ሽሕን ሓሙሽተ ሚእትን፡ ካብኡ ግብሪ ንእግዚኣብሄር ስሳን ሓደን፡⁴⁰ነፍሲ ሰብ ድማ ዓሰርተው ሹድሽተ ሽሕ፡ ካብኡ ግብሪ ንእግዚኣብሄር ሰላሳን ክልተን ነፍሲ።⁴¹ሙሴ ድማ እቲ ግብሪ፡ እቲ ናይ እግዚኣብሄር ዝልዓል መስዋእቲ፡ ከምቲ እግዚኣብሄር ንሙሴ ዝኣዘዞ፡ ንኻህን ኣልኣዛር ሃቦ።⁴²እቲ ኻብቶም ኣብ ውግእ ዝነበሩ ሙሴ ዝመቐሎ፡ ፈረቓ እቲ ግደ ደቂ እስራኤል ከኣ፡⁴³እቲ ናይቲ ኣኼባ ፍርቂ፡ ካብ ኣባጊዕ ሰለስተ ሚእትን ሰላሳን ሾብዓተን ሽሕን ሓሙሽተ ሚእትን፡⁴⁴ኣሓ ሰላሳን ሹድሽተን ሽሕ፡⁴⁵ኣእዱግ ሰላሳ ሽሕን ሓሙሽተ ሚእትን፡⁴⁶ነፍሲ ሰብ ድማ ዓሰርተው ሹድሽተ ሽሕ ኰነ፡⁴⁷ከምቲ እግዚኣብሄር ንሙሴ ዝኣዘዞ ድማ፡ ሙሴ ኻብዚ ናይ ደቂ እስራኤል ፍርቂ፡ ካብ ሰብን ካብ እንስሳን፡ ከካብ ሓምሳ ሓደ ወሲዱ፡ ነቶም ሓለዋ ማሕደር እግዚኣብሄር ዝሕልዉ ዝነበሩ ሌዋውያን ሃቦም።
   ⁴⁸እቶም ኣብ ልዕሊ ኣሽሓት ሰራዊት እተሾሙ ሓላቑ ኣሽሓትን ሓላቑ ሚእትታትን ድማ ናብ ሙሴ ቐረቡ፡⁴⁹ንሙሴ ኸኣ፡ ገላዉኻ ቁጽሪ እቶም ኣብ ትሕቴና ዘለዉ ዓቀይቲ ቘጸርና፡ ሓደ ሰብ እኳ ኣይጐደለናን።⁵⁰ነፍሲ ወከፍ ካባና ድማ ኣቕሓ ወርቂ ዝረከበ፡ ኣልቦ፡ ኣምባር፡ ቀለቤት፡ ኲትሻ፡ ድሪ፡ ኣብ ቅድሚ እግዚኣብሄር ምእንቲ ኸተዓርቐና፡ ንእግዚኣብሄር መስዋእቲ ኣቕረብና፡ በልዎ።⁵¹ሙሴን ካህን ኣልኣዛርን ከኣ ነቲ በብዓይነቱ እተሰርሐ ኣቓሑ ወርቂ ኻባታቶም ወሰድዎ።⁵²እቲ ኻብ ሓላቑ ኣሽሓትን ካብ ሓላቑ ሚእትታትን ንእግዚኣብሄር ዝልዓል መስዋእቲ ዘቕረብዎ ዅሉ ወርቂ ዓሰርተው ሹድሽተ ሽሕን ሾብዓተ ሚእትን ሓምሳን ሲቃል ኰነ።⁵³እቶም ሰብ ውግእ፡ ነፍሲ ወከፍ ነንርእሱ፡ ዝዅኖ ማሪኹ ነበረ።⁵⁴ሙሴን ካህን ኣልኣዛርን ነቲ ወርቂ ኻብ ሓላቑ ኣሽሓትን ሚእትታትን ወሲዶም፡ ኣብ ቅድሚ እግዚኣብሄር ንመዘከርታ ደቂ እስራኤል ክኸውን፡ ናብ ድንኳን ምርኻብ ኣእተውዎ።

ዘሁልቁ ምዕራፍ 32

   ¹ደቂ ሮቤልን ደቂ ጋድን ድማ ኣዝየን ብዙሓት ማል ነበራኦም። እንሆ ኸኣ፡ ምድሪ ያዕዜርን ምድሪ ጊልኣድን ቦታ ማል ከም ዝዀነ ምስ ረኣዩ፡²ደቂ ጋድን ደቂ ሮቤልን መጺኦም፡ ንሙሴን ንኻህን ኣልኣዛርን ንሹማምቲ ኣኼባን፡³ዓጣሮትን ዲቦንን ያዕዜርን ኒምራህን ሔስቦንን ኤልዓለን ሴባምን ኔቦን ቤዖንን፡⁴እዛ ኣብ ቅድሚ ኣኼባ እስራኤል፡ እግዚኣብሄር ዝወቕዓ ምድሪ፡ ምድሪ ማል እያ፡ ገላዉኻ ድማ ማል ኣለዋና፡ ኢሎም ተዛረብዎም።⁵ኣብ ቅድሚ ዓይንኻ ሞገስ እንተ ደኣ ረኸብናስ፡ እዛ ምድሪ እዚኣ ንገላዉኻ ርስቲ ትወሃብ፡ ንዮርዳኖስ ኣይተሳግረና፡ ከኣ በሉ።⁶ሙሴ ግና ንደቂ ጋድን ንደቂ ሮቤልን በሎም፡ ኣሕዋትኩም ናብ ውግእ ክኸዱ ኸለዉዶ፡ ኣብዚ ኽትተርፉ ኢኹም፧⁷ስለምንታይ፡ ናብታ እግዚኣብሄር ዝሃቦም ምድሪ ኸይኣትዉ፡ ልቢ ደቂ እስራኤል እተድክሙ፧⁸ኣቦታትኩም ድማ፡ ምድሪ ኽርእዩ ኢለ ኻብ ቃዴስ-ባርኔዓ ምስ ሰደድክዎም፡ ከምኡ ገበሩ።⁹ክሳዕ ለሰ ኤሽኮል ደይቦም ነታ ምድሪ ምስ ረኣይዋ፡ ናብታ እግዚኣብሄር ዝሃቦም ምድሪ ኻብ ምእታው ንልቢ ደቂ እስራኤል ኣሸበርዎ።¹⁰በታ መዓልቲ እቲኣ ከኣ ኲራ እግዚኣብሄር ነደደ እሞ ኸምዚ ኢሉ መሓለ፡^11-12ብጀካ ካሌብ ወዲ የፋኔ ቀኒዛውን እያሱ ወዲ ነዌን፡ ንእግዚኣብሄር ፈጺሞም ስለ ዝሰዓብዎ፡ እዞም ካብ ግብጺ ዝደየቡ ሰባት ፈጺሞም ስለ ዘይሰዓቡኒ፡ ካብ ወዲ ዕስራ ዓመት ንላዕሊ ዘለዉ ነታ ንኣብርሃም፡ ንይስሃቅ፡ ንያእቆብ ከኣ ዝመሓልኩሎም ምድሪ ኣይርእይዋን እዮም።¹³ኲራ እግዚኣብሄር ከኣ ኣብ እስራኤል ነደደ እሞ፡ እቲ ኣብ ቅድሚ እግዚኣብሄር ክፋእ ዝገበረ ወለዶ ኽሳዕ ዝውዳእ፡ ኣርብዓ ዓመት ኣብ በረኻ ዀለል ኣበሎም።¹⁴ኣቱም ትውልዲ ሓጥኣን ሰባት፡ ነቲ ነዳዲ ዅራ እግዚብሄር ኣብ ልዕሊ እስራኤል ከተበርትዑ፡ እንሆ፡ ኣብ ክንዲ ኣቦታትኩም ተንሳእኩም።¹⁵ካብ ምስዓቡ እንተ ተመለስኩም፡ ንሱ ኸኣ መሊሱ ንእስራኤል ኣብ በረኻ ይሓድጎም እሞ፡ ነዚ ህዝቢ እዚ ዅሉ ተጥፍእዎ ኣሎኹም።
   ¹⁶ንሳቶም ከኣ ናብኡ ቐሪቦም በሉ፡ ኣብዚ ንማልና ደምቤታት፡ ንቘልዑና ድማ ከተማታት ክንሰርሕ፡¹⁷ንሕና ግና፡ ናብታ ቦታኦም ክሳዕ እነእትዎም፡ ቀቅድሚ ደቂ እስራኤል ክንከይድ ተዳሊና ኣጽዋር ሒዝና ኣሎና። ደቅና ኸኣ ብዛዕባ እቶም ኣብታ ሃገር ዝነብሩ፡ ኣብ ጽኑዓት ከተማታት ይቀመጡ።¹⁸ደቂ እስራኤል ነፍሲ ወከፍ ረርስቱ ኽሳዕ ዝረክብ፡ ናብ ኣባይትና ኣይንምለስን።¹⁹ርስትናስ ኣብ ክነጀው ዮርዳኖስ ብሸነኽ ምብራቕ በጺሑና እዩ እሞ፡ ኣብ ስግር ዮርዳኖስ ኣብ ንየው ምሳታቶም ርስቲ ኣይንወርስን።²⁰ሙሴ ድማ በሎም፡ እዚ ነገርዚ እንተ ጌርኩም፡ ኣብ ቅድሚ እግዚኣብሄር ከኣ ንውግእ ኣጽዋር እንተ ሒዝኩም፡^21-22ንጸላእቱ ድማ ካብ ቅድሚኡ ኽሳዕ ዝሰጎም፡ እታ ሃገርውን ኣብ ቅድሚ እግዚኣብሄር ክሳዕ እትግዛእ፡ ኲሎም ሰልፈኛታትኩም ኣብ ቅድሚ እግዚኣብሄር ዮርዳኖስ እንተ ተሳጊሮምሲ፡ ድሕርቲ ትምለሱ፡ ኣብ እግዚኣብሄር ኣብ እስራኤልን ከኣ ብዘይ በደል ትዀኑ፡ እዛ ሃገር እዚኣ ድማ ኣብ ቅድሚ እግዚኣብሄር ርስትኹም ክትከውን እያ።²³ከምኡ እንተ ዘይገበርኩም ግና፡ እንሆ፡ ኣብ እግዚኣብሄር ሓጢኣት ገበርኩም፡ ሓጢኣትኩም ከም ዝረኽበኩም ድማ ፍለጡ።²⁴ንደቅኹም ከተማታት፡ ነባጊዕኩም ከኣ ደምቤታት ስርሑ፡ እቲ ኻብ ኣፍኩም ዝወጸ ድማ ግበርዎ።²⁵ደቂ ጋድን ደቂ ሮቤልን ንሙሴ፡ ገላዉኻ ኸምቲ ጐይታይ ዝኣዘዞ ኽገብሩ እዮም።²⁶ቈልዑናን ኣንስትናን መጓሰ ኣባጊዕናን ኲሉ ማልናን ኣብኡ ኣብ ከተማታት ጊልኣድ ይኹኑ።²⁷ገላውኻ ግና ኲላቶም ንውግእ ኣጽዋር ዝሓዙ፡ ከምቲ ጐይታይ ዝበሎ፡ ኣብ ቅድሚ እግዚኣብሄር ክዋግኡ ይሳገሩ፡ ኢሎም ተዛረብዎ።
   ²⁸ሙሴ ድማ ንኻህን ኣልኣዛርን ንእያሱ ወዲ ነዌን፡ ንሓላቑ ማይ ቤት ኣቦታት ነገዳት ደቂ እስራኤልን ብዛዕባኦም ኣዘዘ።²⁹ሙሴ ኸኣ፡ ደቂ ጋድን ደቂ ሮቤልን ንውግእ ኣጽዋር ዝሓዙ ዅሎም ኣብ ቅድሚ እግዚኣብሄር ክዋግኡ፡ ምሳኻትኩም ዮርዳኖስ እንተ ተሳገሩ፡ እታ ሃገር ድማ ኣብ ቅድሜኹም እንተ ተገዝአት፡ ሽዑ ምድሪ ጊልኣድ ርስቲ ሃብዎም።³⁰ኣጽዋር ሒዞም ምሳኻትኩም እንተ ዘይተሳገሩ ግና፡ ኣብ ምድሪ ከነኣን ኣብ ማእከልኩም ይረስተዩ፡ በሎም።³¹ደቂ ጋድን ደቂ ሮቤልን ድማ፡ ከምቲ እግዚብሄር ንገላዉኻ ዝበሎም፡ ከምኡ ንገብር።³²ንሕና ኣጽዋር ሒዝና ኣብ ቅድሚ እግዚኣብሄር ንምድሪ ከነኣን ንሳገር፡ እቲ እንርስተዮ ርስቲ ኸኣ ኣብዚ ኣብ ክነጀው ዮርዳኖስ ይኹነልና፡ ኢሎም መለሱ።
   ³³ሙሴ ኸኣ ንኣታቶም ንደቂ ጋድን ንደቂ ሮቤልን ንፈረቓ ነገድ ምናሴ ወዲ ዮሴፍን፡ መንግስቲ ሲሆን ንጉስ ኣሞራውያን፡ መንግስቲ ዖግ ንጉስ ባሳን፡ እታ ሃገር፡ ከተማታታ ምስ ከባቢኤን፡ ናይታ ኣብ ዙርያ ዘላ ሃገር ከተማታት ድማ ሃቦም፡³⁴ደቂ ጋድ ድማ፡ ዲቦንን ዓጣሮትን ዓሮዔርን፡³⁵ዓጥሮት-ሾፋንን ያዕዜርን ዮግብሃን፡³⁶ቤት-ኒምራን ቤትሃራንን፡ እተዓርዳ ከተማታት፡ ደምቤታት ኣባጊዕ ከኣ ሰርሑ።³⁷ደቂ ሮቤል ድማ ሔስቦንን ኤልዓለን ቂርያታዪምን፡³⁸ኔቦን በዓል-ሜዖንን ሰርሑ፡ ስመን ከኣ ተለወጠ፡ ሲብማውን ሰርሑ። ነተን ዝሰርሕወን ከተማታት ከኣ ካልእ ስም ኣውጽኡለን።³⁹ደቂ ማኪር ወዲ ምናሴ ድማ ናብ ጊልኣድ ከይዶም ሓዝዋ፡ ነቶም ኣብኣ ዝነበሩ ኣሞራውያን ከኣ ሰጐጕዎም።⁴⁰ሙሴ ድማ ንማኪር ወዲ ምናሴ ጊልኣድ ሃቦ፡ ኣብኣ ኸኣ ተቐመጠ።⁴¹ያኢር ወዲ ምናሴ ድማ ከይዱ ዓድታቶም ሓዘ፡ ዓድታት ያኢር ኢሉ ኸኣ ሰመየን።⁴²ኖባ ድማ ከይዱ ንቔናትን ኣቑሻታን ሓዛ፡ ብስሙ ኸኣ ኖባ ኣውጽኣላ።

ዘሁልቁ ምዕራፍ 33

   ¹ደቂ እስራኤል በብሰራዊቶም ብኢድ ሙሴን ኣሮንን ካብ ምድሪ ግብጺ ምስ ወጹ፡ ኣጓዕዛኦም እዚ እዩ፡²ሙሴ ድማ ነቲ ምውጻኦም ካብ ሰፈር ናብ ሰፈር ምጕዓዞም ብትእዛዝ እግዚኣብሄር ጸሓፎ። እቲ ኣጓዕዛኦም ከምቲ ምንቃሎም እዚ እዩ፡
   ^3-4በታ ቐዳመይቲ ወርሒ፡ ኣብታ ወርሒ ኸኣ ብመበል ዓሰርተው ሓሙሽተ መዓልቲ ኻብ ራዕምሌስ ነቐሉ። ግብጻውያን ነቶም እግዚኣብሄር ኣብ ማእከሎም ዝቐተሎም ኲላቶም በዅርታት ክቐብሩ ኸለዉ፡ ንኣማልኽቶም ድማ እግዚኣብሄር ምስ ፈረደሎም፡ ሽዑ ደቂ እስራኤል፡ ኲሎም ግብጻውያን እናረኣይዎም ብልዕልቲ ኢድ ጽባሕ ፋስጋ ወጹ።⁵ደቂ እስራኤል ከኣ ካብ ራዕምሴስ ነቐሉ፡ ኣብ ሱኮት ከኣ ሰፈሩ።⁶ካብ ሱኮት ነቒሎም ድማ፡ ኣብታ ኣብ ወሰን በረኻ ዘላ ኤታም ሰፈሩ።⁷ካብ ኤታም ነቒሎም ከኣ፡ ኣብ መንጽር በዓል-ጼፎን ናብ ዘላ ጲሃ-ሒሮት ተመሊሶም፡ ኣብ መጣምቲ ሚግዶል ሰፈሩ።⁸ካብ መንጽር ሃሒሮት ነቒሎም ድማ፡ ብማእከል ባሕሪ ገይሮም ናብ በረኻ ሰገሩ። ኣብ በረኻ ኤታም መገዲ ሰለስተ መዓልቲ ኸይዶም ከኣ፡ ኣብ ማራ ሰፈሩ።⁹ካብ ማራ ነቒሎም ድማ፡ ናብ ኤሊም መጹ። ኣብ ኤሊም ከኣ ዓሰርተው ክልተ ዓይኒ ማይን ሰብዓ ኦም ተምርን ነበረ፡ ኣብኣ ድማ ሰፈሩ።¹⁰ካብ ኤሊም ነቒሎም ከኣ፡ ኣብ ጥቓ ባሕሪ ኤርትራ ሰፈሩ፡¹¹ካብ ባሕሪ ኤርትራ ነቒሎም ድማ፡ ኣብ በረኻ ሲን ሰፈሩ።¹²ካብ በረካ ሲን ነቒሎም ከኣ፡ ኣብ ዶፍቃ ሰፈሩ።¹³ካብ ዶፍቃ ነቒሎም ድማ፡ ኣብ ኣሉሽ ሰፈሩ።¹⁴ካብ ኣሉሽ ነቒሎም ከኣ፡ ኣብ ረፊዲም ሰፈሩ፡ ኣብኣ ድማ እቶም ህዝቢ ዚሰትይዎ ማይ ኣይነበረን።¹⁵ካብ ረፊዲም ነቒሎም ድማ፡ ኣብ በረካ ሲና ሰፈሩ።¹⁶ካብ በረካ ሲና ነቒሎም ከኣ፡ ኣብ ቂብሮት-ሃታኣባ ሰፈሩ።¹⁷ካብ ቂብሮት-ሃታኣባ ነቒሎም ድማ፡ ኣብ ሓጼሮት ሰፈሩ።¹⁸ካብ ሓጼሮት ነቒሎም ከኣ፡ ኣብ ሪትማ ሰፈሩ።¹⁹ካብ ሪትማ ነቒሎም ድማ፡ ኣብ ሪሞን-ጰሬጽ ሰፈሩ።²⁰ካብ ሪሞን-ጰሬጽ ነቒሎም ከኣ፡ ኣብ ሊብና ሰፈሩ።²¹ካብ ሊብና ነቒሎም ድማ፡ ኣብ ሪሳ ሰፈሩ።²²ካብ ሪሳ ነቒሎም ከኣ፡ ኣብ ቄሄላታ ሰፈሩ።²³ካብ ቄሄላታ ነቒሎም ድማ፡ ኣብ ከረን ሸፈር ሰፈሩ።²⁴ካብ ከረን ሸፈር ነቒሎም ከኣ፡ ኣብ ሓራዳ ሰፈሩ።²⁵ካብ ሓራዳ ነቒሎም ድማ፡ ኣብ ማቅሄሎት ሰፈሩ።²⁶ካብ ማቅሄሎት ነቒሎም ከኣ፡ ኣብ ታሕት ሰፈሩ።²⁷ካብ ታሓት ነቒሎም ድማ፡ ኣብ ታራ ሰፈሩ።²⁸ካብ ታራ ነቒሎም ከኣ፡ ኣብ ሚትቃ ሰፈሩ።²⁹ካብ ሚትቃ ነቒሎም ድማ፡ ኣብ ሓሽሞና ሰፈሩ።³⁰ካብ ሓሽሞና ነቒሎም ከኣ፡ ኣብ ሞሴሮት ሰፈሩ።³¹ካብ ሞሴሮት ነቒሎምውን፡ ኣብ ብነያ-ዓቃን ሰፈሩ።³²ካብ ብነያ-ዓቃን ነቒሎም ድማ፡ ኣብ ሖር-ሃጊድጋድ ሰፈሩ።³³ካብ ሖር-ሃጊድጋድ ነቒሎም ከኣ፡ ኣብ ዮጥባታ ሰፈሩ።³⁴ካብ ዮጥባታ ነቒሎም ድማ፡ ኣብ ዓብሮና ሰፈሩ።³⁵ካብ ዓብሮና ነቒሎምውን፡ ኣብ ኤጽዮንጋበር ሰፈሩ።³⁶ካብ ኤጽዮን-ጋበር ነቒሎም ከኣ፡ ኣብ በረካ ጺን ሰፈሩ፡ ንሱ ቃዴስ እዩ።³⁷ካብ ቃዴስ ነቒሎም ድማ፡ ኣብ ወሰን ምድሪ ኤዶም ኣብ ዘሎ ኸረን ሆር ሰፈሩ።
   ³⁸ካህን ኣሮን ከኣ ብትእዛዝ እግዚኣብሄር ናብ ከረን ሆር ደየበ፡ ደቂ እስራኤል ካብ ምድሪ ግብጺ ኻብ ዚወጹ ኣብ መበል ኣርብዓ ዓመት ኣብ ሓምሰይቲ ወርሒ፡ ኣብታ ወርሒ ኸኣ በታ ቐዳመይቲ መዓልቲ ኣብኡ ሞተ።³⁹ኣሮን ኣብ ከረን ሆር ክመውት ከሎ፡ ወዲ ሚእትን ዕስራን ሰለስተን ዓመት ነበረ።
   ⁴⁰እቲ ከነኣናዊ ንጉስ ኣራድ፡ ኣብ ደቡብ ሃገር ከነኣን ዝነብር ከኣ፡ ደቂ እስራኤል ከም ዝመጹ ሰምዐ።
   ⁴¹ካብ ከረን ሆር ነቒሎም ድማ፡ ኣብ ጻልሞና ሰፈሩ።⁴²ካብ ጻልሞና ነቒሎም ከኣ፡ ኣብ ጱኖን ሰፈሩ።⁴³ካብ ጱኖን ነቒሎም ድማ፡ ኣብ ኣቦት ሰፈሩ።⁴⁴ካብ ኣቦት ነቒሎም ከኣ፡ ኣብ ዒየ-ዓባሪም፡ ዶብ ሞኣብ፡ ሰፈሩ።⁴⁵ካብ ዕዪም ነቒሎም ከኣ፡ ኣብ ዲቦን-ጋድ ሰፈሩ።⁴⁶ካብ ዲቦን-ጋድ ነቒሎም ድማ፡ ኣብ ዓልሞንዲብላታዪም ሰፈሩ።⁴⁷ካብ ዓልሞን-ዲብላታዪም ነቒሎም ከኣ፡ ኣብ ኣኽራን ዓባሪም ኣብ መንጽር ኔቦ ሰፈሩ።⁴⁸ካብ ኣኽራን ዓባሪም ነቒሎም ድማ፡ ኣብ ጐላጕል ሞኣብ፡ ኣብ ዮርዳኖስ ኣብ መንጽር ያሪኮ፡ ሰፈሩ።⁴⁹ኣብ ዮርዳኖስ፡ ካብ ቤት-የሺሞት ክሳዕ ኣቤል-ሺጢም ኣብ ጐላጕል ሞኣብ ሰፈሩ።
   ⁵⁰እግዚኣብሄር ድማ ኣብ ጐላጕል ሞኣብ፡ ኣብ ዮርዳኖስ መንጽር ያሪኮ፡ ንሙሴ ኸምዚ ኢሉ ተዛረቦ፡⁵¹ንደቂ እስራኤል ተዛረቦም፡ በሎም ከኣ፡ ዮርዳኖስ ተሳጊርኩም፡ ናብ ምድሪ ከነኣን ምስ ኣቶኹም፡⁵²ነቶም ኣብታ ሃገር ዝነብሩ ዅሎም ካብ ቅድሜኹም ስጐጕዎም፡ ኲሉ ምስልታቶም ሰባብሩ፡ ኲሉ ዝፈሰሰ ምስልታቶም ሰባብሩ፡ ኲሉ በረኽቲ ቦታኦም ኣፍርሱ።⁵³እታ ሃገር ክትርስተይዋ ሂበኩም እየ እሞ፡ ነታ ሃገር ተረስተይዋ፡ ኣብኣውን ንበሩ።⁵⁴ነታ ምድሪ ኸከም ዓሌትኩም ብዕጭ ተማቐልዋ። ነቶም ብዙሓት ገፊሕ ርስቲ ሃብዎም፡ ነቶም ሒደት ድማ ጸቢብ ርስቲ ሃብዎም። ነፍሲ ወከፍ ኣብታ ዕጩ ዝበጽሓቶ ኣብኣ ይረስተ፡ ከከም ነገድ ኣቦታትኩም ተረስተዩ።⁵⁵ነቶም ኣብታ ሃገር ዝነብሩ ኻብ ቅድሜኹም እንተ ዘይሰጐጕኩምዎም ግና፡ እቶም ካባታቶም ዘትረፍኩምዎም ኣብ ኣዒንትኹም እሾዅ፡ ኣብ መሰንገሌኹም ከኣ ዳንዴር ክዀኑኹም እዮም፡ ኣብታ እትነብርዋ ሃገር ከጨንቑኹም እዮም።⁵⁶ክኸውን ድማ እዩ፡ ከምቲ ንኣታቶም ክገብሮም ዝሓሰብኩ፡ ንኣኻትኩም ከምኡ ኽገብረኩም እየ።

ዘሁልቁ ምዕራፍ 34

   ¹እግዚኣብሄር ድማ ንሙሴ ኸምዚ ኢሉ ተዛረቦ፡²ንደቂ እስራኤል ኣዝዞም፡ በሎም ከኣ፡ ናብ ምድሪ ከነኣን ምስ ኣቶኹም፡ እታ ንርስቲ እትበጽሓኩም ምድሪ እዚኣ እያ፡ ምድሪ ከነኣን ክሳዕ ወሰናታ።³ሸነኽ ደቡብ ምድርኹም ካብቲ ብወገን ኤዶም ዘሎ በረኻ ጺን ይኹን እሞ፡ ናብ ደቡብ ዶብኩም ካብ ወሰን ባሕሪ ጨው ንምብራቑ ይኹን።⁴ዶብኩም ብደቡብ ዓቐበት ዓቅራቢም ዞይሩ ናብ ጺን ይሕለፍ። ብደቡብ ቃዴስ-ባርኔዓ ኣቢሉ ድማ ይውጻእ። ብሓጻር-ኣዳር ወጺኡ ኸኣ ናብ ዓጽሞን ይሕለፍ።⁵ካብ ዓጽሞን ከኣ እቲ ዶብ ናብ ርባ ግብጺ ይዙር፡ ናብ ባሕሪ ድማ ይውጻእ።⁶ዶብ ምዕራብውን እቲ ዓብዪ ባሕርን እቲ ዶብን ይኹነልኩም። ናብ ምዕራብ ዶብኩም እዚ ይኹን።⁷ናይ ሰሜን ዶብኩም ድማ እዚ ይኹን፡ ካብቲ ዓብዪ ባሕሪ ናብ ከረን ሆር ኣቢልኩም ንኣኻትኩም ምልክት ግበሩሉ።⁸ካብ ከረን ሆር ክሳዕ እታ ናብ ሃማት እተእቱ ምልክት ግበሩሉ፡ እቲ ዶብ ከኣ ናብ ጸዳድ ይውጻእ።⁹እቲ ዶብ ድማ ናብ ዚፍሮን ይሕለፍ እሞ ናብ ሓጻር-ዔናን ይውጻእ፡ ናይ ሰሜን ዶብኩም እዚ ይኹን።¹⁰ናይ ምብራቕ ዶብኩም ከኣ ካብ ሓጻር-ዔናን ክሳዕ ሼፋም ኣመልክቱሉ።¹¹እቲ ዶብ ድማ ካብ ሼፋም ናብ ሪብላ፡ ንዓይን ብምብራቓ ይውረድ፡ እቲ ዶብ ከኣ ወሪዱ ናብ ምብራቕ ኣቢሉ ኽሳዕ ባሕሪ ኪኔሬት ይብጻሕ።¹²እቲ ዶብ ክሳዕ ዮርዳኖስ ይውረድ፡ ናብ ባሕሪ ጨው ከኣ ይውጻእ። እዚኣ ምስቲ ኣብ ዙርያኣ ዘሎ ዶብ ሃገርኩም ትኹን።
   ¹³ሙሴ ድማ ንደቂ እስራኤል ከምዚ ኢሉ ኣዘዞም፡ እታ ብዕጭ እትርስተይዋ ሃገር፡ እግዚኣብሄር ንትሽዓተ ነገድን ንፈረቓ ነገድን ክትወሃብ ዝኣዘዘ፡ እዚኣ እያ።¹⁴እሞ ነገድ ደቂ ሮቤል ከከም ማይ ቤት ኣቦታቶም፡ ነገድ ደቂ ጋድ ድማ ከከም ማይ ቤት ኣቦታቶም ረርስቶም ሓዙ። ፈረቓ ነገድ ምናሴ ኸኣ ርስቶም ሓዙ።¹⁵እዞም ክልተ ነገድን እዚ ፈረቓ ነገድን ኣብ ክንየው ዮርዳኖስ ናይ ያሪኮ ብሸነኽ ምብራቕ ጸሓይ ረርስቶም ሓዙ።
   ¹⁶እግዚኣብሄር ድማ ንሙሴ ኸምዚ ኢሉ ተዛረቦ፡¹⁷ስም እቶም ነታ ምድሪ ንርስቲ ዝመቕሉልኩም ሰባት እዚ እዩ፡ ካህን ኣልኣዛርን እያሱ ወዲ ነዌን።¹⁸ንምምቃል እታ ምድሪ ንርስቲ ድማ ከካብ ነገድ ሓደ ሹም ውሰዱ።¹⁹ስም እቶም ሰባት ድማ እዚ እዩ፡ ካብ ነገድ ይሁዳ፡ ካሌብ ወዲ የፋኔ።²⁰ካብ ነገድ ደቂ ስምኦን፡ ሽሙኤል ወዲ ዓሚሁድ።²¹ካብ ነገድ ብንያም፡ ኤሊዳድ ወዲ ኪስሎን።²²ካብ ነገድ ደቂ ዳን፡ ሹም ቡቂ ወዲ ዮግሊ።²³ካብ ደቂ ዮሴፍ፡ ካብ ነገድ ደቂ ምናሴ፡ ሹም ሓኒኤል ወዲ ኤፎድ።²⁴ካብ ነገድ ደቂ ኤፍሬም፡ ሹም ቄሙኤል ወዲ ሺፍጣን።²⁵ካብ ነገድ ደቂ ዛብሎን፡ ሹም ኤሊጻፋን ወዲ ጳርናክ።²⁶ካብ ነገድ ደቂ ይሳኮር፡ ሹም ጳልጢኤል ወዲ ዓዛን።²⁷ካብ ነገድ ደቂ ኣሴር፡ ሹም ኣሒሁድ ወዲ ሸሎሚ።²⁸ካብ ነገድ ደቂ ንፍታሌም፡ ሹም ጴዳህኤል ወዲ ዓሚሁድ።
   ²⁹እቶም ንደቂ እስራኤል ኣብ ምድሪ ከነኣን ርስቲ ኽመቕልዎም እግዚኣብሄር ዝኣዘዞም እዚኣቶም እዮም።

ዘሁልቁ ምዕራፍ 35

   ¹እግዚኣብሄር ድማ ንሙሴ፡ ኣብ ጐላጕል ሞኣብ ኣብ ዮርዳኖስ መንጽር ያሪኮ፡ ከምዚ ኢሉ ተዛረቦ፡²ንደቂ እስራኤል፡ ካብቲ ዝወረስዎ ርስቲ ንሌዋውያን ዝነብሩለን ከተማታት ክህብዎም፡ ኣዝዞም። ኣብ ዙርያ እተን ከተማታት ዘሎ ከባቢኤን ከኣ ንሌዋውያን ሃብዎም።³ከተማታት ንመቐመጢ ይኹናኦም፡ እታ ኣብ ከባቢኤን ዘላ ምድሪ ድማ ንማሎምን ንጥሪቶምን ንዅሉ እንስሳኦምን ትኹን።⁴እታ ንሌዋውያን እትህብዎም ኣብ ከከባቢ ኸተማታት ዘላ ምድሪ ድማ፡ ካብ መካበብያ እታ ኸተማ ብዙርያኣ፡ ምግፋሓ ሽሕ እመት ትኹን።⁵ብወጻኢ ኸተማ ብሸነኽ ምብራቕ ከኣ ክልተ ሽሕ እመት፡ ብሸነኽ ደቡብ ድማ ክልተ ሽሕ እመት፡ ብሸነኽ ምዕራብ ከኣ ክልተ ሽሕ እመት፡ ብሸነኽ ሰሜን ድማ ክልተ ሽሕ እመት ስፈሩ። እታ ኸተማ ኸኣ ኣብ ማእከል ትኹን። እዚ ኸኣ ከባቢ እተን ከተማታት ይኹነሎም።⁶እተን ንሌዋውያን እትህብዎም ከተማታት ድማ፡ ቀታል ነፍሲ ምእንቲ ኽሃድመለን እትህብዎ ሹድሽተ ኸተማታት መዕቈቢ ይኹና። ኣብ ልዕሊኤን ድማ ኣርብዓን ክልተን ከተማታት ሃብዎም።⁷እተን ንሌዋውያን እትህብዎም ከተማታት ኲለን ኣርብዓን ሾሞንተን ከተማታት፡ መምስ ከባቢኤን ይኹና።⁸ብዛዕባ እተን ካብ ርስቲ ደቂ እስራኤል እትህብዎም ከተማታት ድማ፡ ካብቶም ብዙሕ ዘለዎም ብዙሕ፡ ካብቶም ሒደት ዘለዎም ከኣ ሒደት ውሰዱ። ነፍሲ ወከፍ ከም መጠን እታ እተረስተያ ርስቱ ኻብ ከተማታቱ ንሌዋውያን ይሃብ።
   ⁹እግዚኣብሄር ድማ ንሙሴ ኸምዚ ኢሉ ተዛርቦ፡¹⁰ንደቂ እስራኤል ተዛረቦም፡ በሎም ከኣ፡ ንስኻትኩም ንዮርዳኖስ ናብ ምድሪ ከነኣን ምስ ተሳገርኩም፡¹¹ብዘይ ሓሳብ ነፍሲ ዝቐተለት ቐታሊ ዝሃድመለን ከተማታት መዕቈቢ ዝዀናኹም፡ ንኣኻትኩም ከተማታት ፍለዩ።¹²እቲ ቐታሊ ኣብ ቅድሚ ኣኼባ ንፍርዲ ደው ከይበለ ኸይመውት፡ እዘን ከተማታት እዚኤን ካብቲ ፈዳይ ደም መዕቈቢ ይኹናኹም።¹³እተን እትህብወን ከተማታት፡ ሽድሽተ ኸተማ መዕቈቢ ይኹናኹም።¹⁴ሰለስተ ኸተማ ኣብ ስግር ዮርዳኖስ ሃቡ፡ ሰለስተ ኸተማ ኸኣ ኣብ ምድሪ ከነኣን ሃቡ፡ ከተማታት መዕቈቢ ይኹና።¹⁵ንደቂ እስራኤል ኰነ፡ ንጓና ኸነ፡ ምሳታቶም ንዝነብር ስደተኛ ዀነ፡ ነፍሲ ወከፍ ብዘይ ፍልጠት ነፍሲ ዝቐተለ ናባታተን ክሃድም፡ እዘን ሽድሽተ ኸተማ እዚኤን መዕቈቢ ይኹና።
   ¹⁶ብኣቕሓ ሓጺን እንተ ወቕዖ ግና፡ እሞ እንተ ሞተ፡ ንሱ ቐታል ነፍሲ እዩ። ቀታል ነፍሲ ኸኣ ርግጽ ይሙት።¹⁷ወይስ ኣብ ኢድ ብዝሓዞ ክቐትል ብዝኽእል እምኒ እንተ ወቕዖ፡ እሞ እንተ ሞተ፡ ንሱ ቐታል ነፍሲ እዩ። ቀታል ነፍሲ ድማ ርግጽ ይሙት።¹⁸ወይ ኣብ ኢዱ ብዝሓዞ ኣቕሓ ዕጨይቲ ክቐትል ብዝኽእል እንተ ወቕዖ፡ እሞ እንተ ሞተ፡ ንሱ ቐታል ነፍሲ እዩ። ቀታል ነፍሲ ኸኣ ርግጽ ይሙት።¹⁹እቲ ፈዳይ ደም ነቲ ቐታሊ ይቕተሎ። ምስ ዝረኽቦ ባዕሉ ይቕተሎ።²⁰ብጽልኢ እንተ ደፍኦ ኸኣ፡ ወይ ተጸናትዩ ገለ እንተ ደርበየሉ፡ እሞ እንተ ሞተ፡²¹ወይ ጽልኢ ነይርዎ ብኢድ እንተ ወቕዖ፡ እሞ እንተ ሞተ፡ እቲ ዝወቕዖ ቐታል ነፍሲ እዩ እሞ፡ ርግጽ ይሙት። እቲ ፈዳይ ደም ነቲ ቐታሊ ምስ ዝረኽቦ ይቕተሎ።
   ^22-23ብጽልኢ ዘይኰነ፡ ብድንገት እንተ ደፍኦ ግና፡ ንሱ ጸላኢኡ እንተ ዘይነበረ፡ ወይ ከኣ ንኽፉኡ እንተ ዘይደለየ፡ ወይ ከይተጸናተወ ገለ ነገር እንተ ደርበየሉ፡ ወይ ከይረኣዮ ክቐትል ብዝኽእል እምኒ እንተ ደርበየሉ፡ እሞ እንተ ሞተ፡²⁴ሽዑ እቲ ኣኼባ ኣብ መንጎ እቲ ወቓዕን ኣብ መንጎ እቲ ፈዳይ ደምን በዚ ሕጊ እዚ ይፍረድ፡²⁵እቲ ኣኼባ ኸኣ ነት ቐታሊ ኻብ ኢድ እቲ ፈዳይ ደም የድሕኖ፡ እቲ ኣኼባ ድማ ናብታ ሃዲሙላ ዝነበረ ኸተማ መዕቈቢቱ ይምለሶ። እቲ ብቕዱስ ቅብኢ እተቐብአ ሊቀ ኻህናት ክሳዕ ዝመውት ኣብኣ ይጽናሕ።²⁶እቲ ቐታሊ ኻብ ዶብ እታ ዝሃደመላ ኸተማ መዕቈቢቱ እንተ ወጸ ግና፡²⁷እቲ ፈዳይ ደም ከኣ ኣብ ወጻኢ ዶብ እታ ኸተማ መዕቈቢቱ እንተ ረኸቦ፡ እቲ ፈዳይ ደም ድማ ነቲ ቐታሊ እንተ ቐተሎ፡ ዕዳ ደም የብሉን።²⁸እቲ ቐታሊ ኽሳዕ ሞት እቲ ሊቀ ኻህናት ኣብታ ኸተማ መዕቈቢቱ ኽጸንሕ ይግብኦ ነይሩ እዩ እሞ፡ ድሕሪ ሞት እቲ ሊቀ ኻህናት ግና ናብታ ምድሪ ርስቱ ይመለስ።²⁹እዚ ኣብ ኲሉ እትነብርዎ ንውሉድ ወለዶኹም ሕጊ ፍርዲ ይኹነልኩም።
   ³⁰ነፍሲ ዝቐተለ ዘበለ እቲ ቐታሊ ብኣፍ ምስክር ይቀተል፡ ምስክር ሓደ ግና ንሞት ነፍሲ ምስክር ኣይኹን።³¹ካብቲ ሞት ዝግብኦ ቐታሊ ጋር ነፍሲ ኣይትቀበሉ፡ ርግጽ ሞት ደኣ ይሙት።³²ስለ እቲ ናብ ከተማ መዕቈቢቱ ዝሃደመ፡ ሊቀ ኻህናት ከይሞተ ምእንቲ ናብ ዓዱ ኽምለስ ኢልኩም፡ ጋር ኣይትቀበሉ።³³ደም፡ ንሱ ነታ ሃገር የርክሳ እዩ እሞ፡ ነታ ዘሎኹምዋ ሃገር ኣይተርክስዋ። እታ ሃገር ድማ ብዛዕባ እቲ እተኻዕዋ ደም ብጀካ ደም እቲ ደም ዝኸዓወ ኣይትዕረቕን እያ።³⁴ኣነ እግዚኣብሄር ኣብ ማእከል ደቂ እስራኤል እሓድር እየ እሞ፡ ነታ ኣነ ኣብ ማእከላ ዝሓደራ፡ ንስኻትኩም ድማ እትነብርዋ ሃገር ኣይተርክስዋ።

ዘሁልቁ ምዕራፍ 36

   ¹ሓላቑ ማይ ቤት ኣቦታት ዓሌት ደቂ ጊልኣድ ወዲ ማኪር፡ ወዲ ምናሴ ካብ ዓሌታት ደቂ ዮሴፍ ድማ ቀረቡ፡ ኣብ ቅድሚ ሙሴን ኣብ ቅድሚ እቶም ሹማምቲ፡ ሓላቑ ማይ ቤት ኣቦታት ደቂ እስራእልን ከኣ ተዛረቡ፡²በሉ ድማ፡ እግዚኣብሄር እታ ምድሪ ንደቂ እስራኤል ንርስቲ ብዕጭ ክህቦም ንጐይታይ ኣዘዞ፡ እግዚኣብሄር ድማ ንጐይታይ እታ ርስቲ ጸሎፍሓድ ሓውና፡ ነዋልዱ ኽህበን ኣዘዞ።³ንሳተን ከኣ ናብ ገለ ኻብ ደቂ ኻልኦት ነገዳት ደቂ እስራኤል እንተ ተኣትዋ፡ ሽዑ እቲ ርስተን ካብ ርስቲ ኣቦታትና ይውሰድ፡ ናብ ርስቲ እቲ ዝኣተዋኦ ነገድ ድማ ይውሰኽ። በዚ ኸምዚ ኻብቲ ብዕጭ እተረስቴናዮ ይንከ።⁴ንደቂ እስራኤል ዓመት እልልታ ምስ ኰነሎም፡ እቲ ርስተን ናብ ርስቲ እቲ ዝኣተዋኦ ነገድ ይውሰኽ፡ ሽዑ እቲ ርስተን ካብ ርስቲ ኣቦታትና ይንከ።
   ⁵ሙሴ ድማ ከምቲ ቓል እግዚኣብሄር ንደቂ እስራኤል ከምዚ ኢሉ ኣዘዞም፡ ነገድ ደቂ ዮሴፍ እተዛረብዎ ቕኑዕ እዩ።⁶እግዚኣብሄር ብናይ ኣዋልድ ጸሎፍሓድ ከምዚ ኢሉ ዝኣዘዞ ነገር እዚ እዩ፡ ናብ ዝፈተዋኦ ይተኣተዋ። ካብ ዓሌት ነገድ ኣቦታተን ጥራይ ግዳ ይተኣተዋ።⁷ነፍሲ ወከፍ ኣብ ደቂ እስራኤል ኣብ ርስቲ ነገድ ኣቦታቱ ደኣ ይጽናዕ እምበር፡ ርስቲ ደቂ እስራኤል ካብ ነገድ ናብ ነገድ ኣይሕለፍ።⁸ካብ ነገዳት ደቂ እስራኤል ርስቲ ዝወረሰት ዘበለት ጓል ድማ፡ ነፍሲ ወከፍ ኣብ ደቂ እስራኤል ርስቲ ኣቦታቱ ምእንቲ ኽወርስ፡ ናብ ሓደ ኻብ ዓሌት ነገድ ኣቦኣ ትተኣቶ።⁹ነፍሲ ወከፍ ነገድ ደቂ እስራኤል ኣብ ረርስቱ ይጽናዕ እምበር፡ እቲ ርስቲ ኻብ ነገድ ናብ ካልእ ነገድ ኣይሕለፍ።
   ¹⁰ኣዋልድ ጸሎፍሓድ ከምቲ እግዚኣብሄር ንሙሴ ዝኣዘዞ ገበራ።¹¹ማሕላ፡ ቲርጸ፡ ሖግላ፡ ሚልካ፡ ኖዓ፡ ኣዋልድ ጸሎፍሓድ ኣብ ደቂ ሓወቦታተን ተኣትዋ።¹²ኣብ ዓሌታት ደቂ ምናሴ ወዲ ዮሴፍ ተኣትዋ፡ ርስተን ድማ ኣብ ነገድ ዓሌት ኣቦአን ተረፈ።
   ¹³እግዚኣብሄር ኣብ ጐላጕል ሞኣብ፡ ኣብ ዮርዳኖስ ናይ ያሪኮ ንደቂ እስራኤል ብሙሴ ዝኣዘዞም ትእዛዛትን ፍርድታትን እዚ እዩ።

ሓድሽ ኪዳን

ኦሪት ዘሌዋውያን

ኦሪት ዘዳግም

ዝ/ምዕ

ብ/ኪ

ሓ/ኪ

ቃል ብስራት Qal Bisrat

ኦሪት ዘሁልቁ

Like this:

Leave a ReplyCancel reply

ኦሪት ዘሁልቁ

Share this:

Like this:

Leave a ReplyCancel reply

ቃል ብስራት Qal Bisrat