መዝሙር ዳዊት
ካልኣይ መጽሓፍ

42  43  44  45  46  47
48  49  50  51  52  53
54  55  56  57  58  59
60  61  62  63  64  65
66  67  68  69
70  71  72

ናብ ቀዳማይ መጽሓፍ፥ 1 — 41
ናብ ሳልሳይ መጽሓፍ፥ 73 — 89
ናብ ራብዓይ መጽሓፍ፥ 90 — 106
ናብ ሓምሳይ መጽሓፍ፥ 107 — 150

ዝ/መዛ.   ብ/ኪ   ሓ/ኪ

        መበል 42 መዝሙር።            

ንሊቀ   መዘምራን፡   ናይ   ደቂ   ቆራህ   መስኪል።

     ¹እራብ   ናብ   ዓይኒ   ማያት   ከም   እትናፍቕ፡

ከምኡ   ኸኣ   ነፍሰይ   ናባኻ፡

ዎ   ኣምላኽ፡   ትናፍቕ   ኣላ። 

²ነፍሰይ   ንኣምላኽ፡   ነቲ   ህያው   ኣምላኽ፡   ትጸምእ   ኣላ፡

መኣዝ   ኰን   ክመጽእ፡

ኣብ   ቅድሚ   ገጽ   ኣምላኽሲ   ክቐውም   እየ፧ 

³ኵሉ   ግዜ፡   ኣምላኽካ   ኣበይ   ኣሎ፧   ክብሉኒ   ኸለዉ፡

ለይትን   መዓልትን   ንብዓተይ   ተቐለብኩ። 

⁴ኣነ   ምስ   ብዙሓት፡

ምስቶም   ብድምጺ   እልልታን   ምስጋናን  

በዓል   ዘብዕሉ   ህዝቢ   ኸይደ፡

ናብ   ቤት   ኣምላኽ   እመርሖም   ከም   ዝነበርኩ፡

እናዘከርኩ   ነፍሰይ   ኣብ   ውሽጠይ   ፈሰሰት። 

     ⁵ነፍሰየ፡   ንምንታይ   ትጒህዪ፧

ንምንታይሲ   ኣብ   ውሽጠይ   ትህውኽኒ   ኣሎኺ፧  

ስለ   ምድሓን   ገጹ   ገና   ኸመስግኖ   እየ   እሞ፡

ተስፋኺ   ኣብ   ኣምላኽ   ግበሪ።

      ⁶ዎ   ኣምላኸይ፡   ነፍሰይ   ኣብ   ውሽጠይ   ትጕሂ   ኣላ፡

ስለዚ   ኸኣ   ካብ   ምድሪ   ዮርዳኖስ፡

ካብ   ኣኽራን   ሄርሞን፡

ካብ   ዝባን   ሚሳር   እዝክረካ   ኣሎኹ። 

⁷ብደሃይ   መንጫዕጫዕታኻ  

መዓሙቑ   ንመዓሙቝ   ይጽውዖ፡

ሸምቦታትካን   ማዕበላትካን   ዘበለ   ብልዕለይ   ሓለፈ። 

     ⁸እግዚኣብሄር   ለውሃቱ   ብመዓልቲ   ይሰድድ፡

ብለይቲ   ድማ   መዝሙሩ   ምሳይ   ኣሎ፡

ንኣምላኽ   ህይወተይውን   እልምን። 

⁹ኣነ   ንኣምላኽ፡   ከውሐይ፡   ንምንታይ   ኢኻ   ዝረሳዕካኒ፧  

ንምንታይከ   ብሰሪ   ጥቕዓት   ጸላኢ   እናሓዘንኩ   ዝኸይድ፧  

እብሎ   ኣሎኹ። 

¹⁰ኵሉ   መዓልቲ፡   ኣምላኽካ   ኣበይ   ኣሎ፧  

እናበሉ   ተጻረርተይ   ኣዕጽምተይ  

ከም   ዝቕጥቀጥ   ገይሮም   ይጸርፉኒ። 

     ¹¹ነፍሰየ፡   ንምንታይ   ትጕህዪ፧

ንምንታይሲ   ኣብ   ውሽጠይ   ትህውኽኒ   ኣሎኺ፧  

ንምድሓን   ገጸይን   ኣምላኸይን   ገና   ኸመስግኖ   እየ   እሞ፡

ተስፋኺ   ኣብ   ኣምላኽ   ግበሪ።

ዝ/መዛ.   ብ/ኪ   ሓ/ኪ

        መበል 43 መዝሙር።            

     ¹ዎ   ኣምላኽ፡   በይነለይ፡

ምስቲ   ምሕረት   ዘይብሉ   ህዝቢ   ተማጐተለይ፡

ካብ   ሓሳውን   ዓማጽን   ሰብ   ኣድሕነኒ። 

²ኣምላኽ   ሓይለይ   ንስኻ   ኢኻ   እሞ፡

ስለምንታይ   ደርበኻኒ፧  

ስለምንታይከ   ብሰሪ   ጥቕዓት   ጸላኢ  

እናሓዘንኩ   እኸይድ   ኣሎኹ፧ 

³ብርሃንካን   ሓቅኻን   ልኣኽ፡   ንሳተን   ይምርሓኒ፡

ናብ   ቅድስቲ   ኸረንካን   ናብ   ማሕደራትካን   የብጽሓኒ። 

⁴ሽዑ   ናብ   መሰውኢ   ኣምላኽ፡

ናብ   ኣምላኽ   ደስታይን   ታሕጓሳይን   ክኣቱ   እየ፡

ዎ   ኣምላኽ፡   ኣምላኸየ፡   ብበገና   ኸመስግነካ   እየ። 

     ⁵ነፍሰይ፡   ስለምንታይ   ትጕህዪ፧

ስለምንታይሲ   ኣብ   ውሽጠይ   ትህውኽኒ   ኣሎኺ፧  

ንምድሓን   ገጸይን   ኣምላኸይን   ገና   ኸመስግኖ   እየ   እሞ፡

ተስፋኺ   ኣብ   ኣምላኽ   ግበሪ።

ዝ/መዛ.   ብ/ኪ   ሓ/ኪ

        መበል 44 መዝሙር።            

ንሊቀ   መዘምራን፡   ናይ   ደቂ   ቆራህ   መስኪል።

     ¹ኣምላኽ   እቲ   ቐደም   ብዘመናቶም   ዝገበርካዮ   ግብርስ

ኣቦታትና   ኣዘንትዮምልና፡   በእዛንና   ሰሚዕናዮ። 

^2-3ብሂግካዮም   ነበርካ   እሞ፡

ብየማናይ   ኢድካን   ቅልጽምካን  

ብብርሃን   ገጽካን   እዮም   እምበር፡

ብሰይፎምሲ   ነታ   ሃገር   ኣይወረስዋን፡

ብቕልጽሞምውን   ኣይደሓኑን   እሞ፡

ነህዛብ   ብኢድካ   ሰጒግካ  

ንኣታቶም   ተኸልካ   ንህዝብታት   ኣጥፊእካ፡

ንኣታቶም   ኣግፋሕካ። 

     ⁴ዎ   ኣምላኽ፡   ንስኻ   ንጉሰይ   ኢኻ፡

ምድሓን   ያእቆብ   ኣዝዝ። 

^5-6ብቐስተይ   ኣይኰንኩን   ዝውከል፡

ሰይፈይውን   ኣይከድሕነንን   እዩ   እሞ፡

ንተጻረርትና   ብኣኻ   ኢና   እነውድቖም፡

ንተቓወምትናውን   ብስምካ   ኢና   እንረግጾም። 

⁷ካብ   ተጻረርትና   ዘድሓንካና፡

ንጸላእትናውን   ዘሕፈርካዮምሲ   ንስኻ   ኢኻ። 

⁸ኵሉ   መዓልቲ   ብኣምላኽ   ንሕበን፡

ስምካውን   ንዘለኣለም   ነመስግን።    ሴላ።

     ⁹ሕጂ   ግና   ደርቢኻና   ኣሕፊርካናውን፡

ምስ   ሰራዊትና   ድማ   ኣይትወጽእን   ኣሎኻ። 

¹⁰ካብ   ተጻራሪ   ኣምለስካና፡   ጸላእትናውን   ዘመቱና። 

¹¹ከም   ኣባጊዕ   ክንብላዕ   ኣሕሊፍካ   ሃብካና፡

ኣብ   ኣህዛብውን   ፋሕ   ኣበልካና፡ 

¹²ንህዝብኻ   ብኸምኡ   ሸጥካ፡   ብዋጋኡ   ኣይረባሕካን። 

¹³ንጐረባብትና   መጻረፊ፡   ኣብ   ዙርያና   ንዝነብሩ   ኸኣ  

መባለቲኦምን   መላገጺኦምን   ገበርካና። 

¹⁴ኣብ   ማእከል   ኣህዛብ   መመሰሊ፡

ኣብ   ማእከል   ህዝብታት   ርእሶም   መነቕነቒ   ገበርካና። 

     ^15-16ሓሳረይ   ምሉእ   መዓልቲ   ኣብ   ቅድመይ   እዩ፡

ብሰሪ   ድምጺ   እቲ   ጸራፍን   ሓማይን፡

ብሰሪ   ጻላእን   ፈዳይ   ሕነን   ሕፍረት   ገጸይ   ሸፊኑኒ   ኣሎ። 

¹⁷እዚ   ዅሉ   በጽሓና፡   ግናኸ   ኣይረሳዕናካን፡

ኪዳንካውን   ኣይጠለምናን። 

^18-19ኣብ   ቦታ   ገበላት   ቀጥቂጥካና፡

ብጽላሎት   ሞትውን   ኣጐልቢብካና   ኽነስኻስ፡

ልብና   ንድሕሪት   ኣይተመልሰን፡

ስጕምትናውን   ካብ   መገድኻ   ኣየግለሰን። 

²⁰ስም   ኣምላኽና   ረሲዕና፡

ኣእዳውና   ናብ   ጓና   ኣምላኽ   ዘርጊሕና   እንተ   ንኸውንሲ፡ 

²¹ኣምላኽ   ንምስጢራት   ልቢ   ይፈልጥ   እዩ   እሞ፡

ነዚዶ   ኣይምመርመሮን   ነይሩ፧ 

²²ምእንታኻ   ምሉእ   መዓልቲ   ንቕተል   ኣሎና፡

ከም   ኣባጊዕ   ማሕረዲውን   ተቘጸርና። 

     ²³ጐይታየ፡   ተበራበር   እባ፡

ንምንታይከ   ትድቅስ፧   ኤረ   ንቓሕ፡

ንሓዋሩ   ኣይትደርብየና። 

²⁴ንምንታይከ   ገጽካ   እትኽውል፧  

መከራናን   ጸበባናን   እትርስዕ፧ 

²⁵ነፍስና   ናብ   ሓመድ   ደኒና፡

ስጋና   ኣብ   ምድሪ   ጠቢቑ   እዩ   እሞ፡ 

²⁶ንረዲኤትና   ተንስእ፡   ምእንቲ   ሳህልኻውን   ኣድሕነና።

ዝ/መዛ.   ብ/ኪ   ሓ/ኪ

        መበል 45 መዝሙር።            

ንሊቀ   መዘምራን፡   ከም   ሾሻኒም፡   ናይ   ደቂ   ቆራህ   መስኪል።   ናይ   ፍቕሪ   መዝሙር።

     ¹ካብ   ልበይ   ጽቡቕ   ነገር   ይግንፍል፡

ድርሳናተይ   ንንጉስ   እዩ፡   እብል፡

ልሳነይ   ከም   ብርዒ   ቕልጡፍ   ጸሓፊ   እያ። 

²ካብ   ደቂ   ሰብ   ንስኻ   ትጽብቕ፡

ውቃበ   ኣብ   ከናፍርካ   ፈሰሰ፡

ስለዚ   ኣምላኽ   ንዘለኣለም   ባረኸካ። 

     ³ኣታ   ጅግና፡   ሰይፍኻ   ኣብ   ሕቛኻ   ዕጠቕ፡

ክብርኻን   ግርማኻን   ልበስ። 

⁴ምእንቲ   ሓቅን   ገርህነትን   ጽድቅን   ብግርማኻ   ውጻእ፡

የማነይቲ   ኢድካውን   ዘፍርህ   ነገር   ክትምህረካ   እያ። 

⁵ፍላጻታትካ   በላሕቲ   እየን፡

ኣብ   ልቢ   ጸላእቲ   ንጉስ   ይኣትዋ።  

ህዝብታት   ኣብ   ትሕቴኻ   ይወድቁ። 

     ⁶ዎ   ኣምላኽ፡   ዝፋንካ   ንዘለኣለመ   ኣለም   እዩ፡

ዘንጊ   መንግስትኻውን   ዘንጊ   ቕንዕና   እያ። 

⁷ጽድቂ   ትፈቱ፡   ረሲእነት   ትጸልእ።  

ስለዚ   እግዚኣብሄር   ኣምላኽካ   ሓለፋ   ብጾትካ  

ብዘይቲ   ሓጐስ   ቀብኣካ። 

⁸ኣልባስካ   ዅሉ   ከርበን   ዓልወን   ዝባድን   ይጨኑ፡

ኣብ   ኣደራሻ   ስኒ   ሓርማዝውን   በገናታት   ባህ   የብለካ   ኣሎ። 

     ⁹ኣዋልድ   ነገስታት

ኣብ   ማእከል   እተን   ክቡራት   ኣንስትኻ   እየን፡

እታ   ንግስቲ   ብወርቂ   ኦፈር   ተሰሊማ፡

ኣብ   የማንካ   ትቐውም   ኣላ። 

¹⁰ጓለየ፡   ስምዒ፡   ርኣዪውን፡

እዝንኺ   ኸኣ   ኣድንኒ፡

ህዝብኽን   ቤት   ኣቦኽን   ረስዒ። 

¹¹ንጉስ   ንውብነትኪ   ይብህጎ፡

ንሱ   ጐይታኺ   እዩ   እሞ   ስገድሉ። 

¹²ጓል   ጢሮስን   ናይ   ህዝቢ   ሃብታማትን፡

ገጸ   በረኸት   ሒዞም፡   ሞገስካ   ኽደልዩ   እዮም። 

¹³ጓል   ንጉስ   ኣብ   ውሽጢ   ዅለንትናኣ   ኽብርቲ   እያ፡

ክዳውንታ   ወርቀዘቦ   እዩ። 

¹⁴ዝንጒርጒር   ክዳን   ተኸዲና   ናብ   ንጉስ   ከእትውዋ፡

ብድሕሪኣ   ኣዳኖታታ   ደናግል   ናባኻ   ኽወስድወን   እዮም። 

¹⁵ብሓጐስን   እልልታን   ተዓጂበን   ክመጻ፡

ናብ   ኣዳራሽ   ንጉስ   ክኣትዋ   እየን። 

¹⁶ውሉድካ   ኣብ   ክንዲ   ኣቦታትካ   ክዀኑ፡

ኣብ   ብዘላ   ምድሪውን   መሳፍንቲ   ኽትገብሮም   ኢኻ። 

¹⁷ካብ   ወለዶ   ንወለዶ   ንስምካ   ኸዘክሮ   እየ፡

ስለዚ   ህዝብታት   ንዘለኣለም   ከመስግኑኻ   እዮም።

ዝ/መዛ.   ብ/ኪ   ሓ/ኪ

        መበል 46 መዝሙር።            

ንሊቀ   መዘምራን፡ናይ   ደቂ   ቆራህ፡   ብኣላሙት   እተዘመረ።

     ¹ኣምላኽ   ንኣና   መዕቈብን   ሓይልን፡

ብጸበባ   ፍጡን   ረድኤትን   እዩ። 

^2-3ስለዚ   ምድሪ   እንተ   ተገልበጠት፡

ኣኽራን   ኣብ   መዓሙቑ   ባሕሪ   እንተ   ተናወጹ፡

ማያቱ   እንተ   ሃመመን   እንተ   ዓፈረን፡

ኣኽራን   ብነድሮም   እንተ   ኣንቀጥቀጡ፡

ንሕናስ   ኣይንፈርህን   ኢና።    ሴላ።

     ⁴ወሓይዙ   ንኸተማ   ኣምላኽ፡

ነታ   ቕድስቲ   ቦታ   ማሕደር   እቲ   ልዑል   ዘሐጕስ   ርባ   ኣሎ። 

⁵ኣምላኽ   ኣብ   ማእከላ   ኣሎ፡   ኣይክትናወጽን   እያ፡

ክወግሕ   ከሎ፡   ኣምላኽ   ክረድኣ   እዩ።

⁶ኣህዛብ   ጫውጫው   በሉ፡   መንግስትታት   ተናወጹ፡

ድምጹ   ኣስምዐ፡   ምድሪ   መኸኸት። 

⁷ጐይታ   ሰራዊት   ምሳና   እዩ።  

ኣምላኽ   ያእቆብ   እምባና   እዩ።    ሴላ።

     ⁸ንዑ፡   ንግብርታት   እግዚኣብሄር፡

ነቲ   ኣብ   ምድሪ   ዝገበሮ   ጥፍኣት   ጠምቱ፡

 ⁹ንውግእ   ክሳዕ   ወሰን   ምድሪ   መወዳኣታ   ይገብረሉ፡

ንቐስቲ   ይሰብሮ፡   ንዅናት   ይቐራስሞ፡

ንሰረገላታት   ብሓዊ   የንድዶ። 

¹⁰ህድእ   በሉ   እሞ   ኣነ   ኣምላኽ   ምዃነይ   ኣስተብህሉ፡

ኣብ   ማእከል   ኣህዛብ   ልዕል   ክብል፡

ኣብ   ምድሪ   ልዕል   ክብል   እየ።

¹¹ጐይታ   ሰራዊት   ምሳና   እዩ፡

ኣምላኽ   ያእቆብ   እምባና   እዩ።    ሴላ።

ዝ/መዛ.   ብ/ኪ   ሓ/ኪ

        መበል 47 መዝሙር።            

ንሊቀ   መዘምራን፡   ናይ   ደቂ   ቆራህ   መዝሙር።

     ¹ኣቱም   ኣህዛብ   ኵሉኹም፡   ኣእዳውኩም   ኣጣቕዑ፡

ንኣምላኽ   ብድምጺ   ሓጐስ   እልል   በሉሉ። 

²ልዑል   እግዚኣብሄር   ዘፍርህ   እዩ   እሞ፡

ኣብ   ብዘላ   ምድሪ   ዓብዪ   ንጉስ   እዩ። 

³ንሱ   ንህዝብታት   ኣብ   ትሕቴና፡

ነህዛብ   ከኣ   ኣብ   ትሕቲ   ኣእጋርና   የግዝኦም። 

⁴ንኽብሪ   ያእቆብ፡   ፈታዊኡ፡

ርስትና   ክዀነልና   ይሓርየልና።    ሴላ

      ⁵ኣምላኽ   ብእልልታ፡

እግዚኣብሄር   ብደሃይ   መለኸት   ደየበ። 

⁶ምስጋና   ኣምላኽ   ዘምሩ፡   ዘምሩ።  

ምስጋና   ንጉስና   ዘምሩ፡   ዘምሩ። 

⁷ኣምላኽ   ንጉስ   ኵላ   ምድሪ   እዩ   እሞ፡

መዝሙር   ምስጋና   ዘምሩሉ። 

     ⁸ኣምላኽ   ኣብ   ኣህዛብ   ነጊሱ፡

ኣምላኽ   ኣብታ   ቕድስቲ   ዝፋኑ   ይቕመጥ። 

⁹መሳፍንቲ   ኣህዛብሲ  

ህዝቢ   ኣምላኽ   ኣብርሃም   ክዀኑ   ይእከቡ   ኣለዉ።  

ዋልታታት   ምድሪ   ናይ   ኣምላኽ   እዩ   እሞ፡

ንሱ   ኣዝዩ   ልዕል   በለ።

ዝ/መዛ.   ብ/ኪ   ሓ/ኪ

       መበል 48 መዝሙር።            

ማህሌት፡   ናይ   ደቂ   ቆራህ   መዝሙር።

     ¹ኣብ   ከተማ   ኣምላኽና፡   ኣብታ   ቕድስቲ   ኸረኑ፡

እግዚኣብሄር   ዓብይን   ኣዝዩ   ምስጉንን   እዩ። 

²ከረን   ጽዮን   ኣብ   ወገን   ሰሜን፡

ከተማ   እቲ   ዓብዪ   ንጉስ፡

ሓጐስ   ኵላ   ምድሪ፡   ብውበታ   ልዕል   ትብል። 

³ኣምላኽ   ኣብ   ኣደራሻታ   እምባ   ምዃኑ   ፍሉጥ   እዩ።

      ⁴እንሆ፡   ነገስታት   ተኣከቡ፡   ሓቢሮም   ሓለፉ።

⁵ርእዮም   ተደነቑ፡   ተሸቢሮም   ሃደሙ።

⁶ኣብኡ፡   ከምቲ   ጻዕሪ   ናይ   እትሓርስ   ሰበይቲ፡

ምንቅጥቃጥ   ሓዞም። 

⁷ንስኻ   ንመራኽብ   ተርሲስ   ብንፋስ   ምብራቕ   ትሰባብረን።

 ⁸ከምቲ   ዝሰማዕናዮ፡   ኣብ   ከተማ   ጐይታ   ሰራዊት፡

ኣብታ   ኸተማ   ኣምላኽና   ኸምኡ   ርኤና፡

ኣምላኽ   ንዘለኣለም   ከጽንዓ   እዩ።    ሴላ።

⁹ዎ   ኣምላኽ፡   ኣብ   ውሽጢ   መቕደስካ  

ንሳህልኻ   ሓሰብናዮ። 

¹⁰ዎ   ኣምላኽ፡   ከምቲ   ስምካ  

ከምኡ   ምስጋናኻ   ኽሳዕ   ወሰን   ምድሪ   እዩ፡

የማነይቲ   ኢድካ   ጽድቂ   መሊኣ   ኣላ። 

¹¹ብፍርድታትካ   ኸረን   ጽዮን   ትሕጐስ፡

ኣዋልድ   ይሁዳ   እልል   ይብላ።

      ¹²ንጽዮን   ዙርዋ፡   ብዙርያኣ   ተመላለሱ፡

ግምብታታ   ቑጸሩ። 

¹³ንዝመጽእ   ወለዶ   ኽትነግሩስ፡   ቀጽርታታ   ኣስተብህሉ፡

ኣደራሻታ   ኣስተውዕሉ። 

¹⁴እዚ   ኣምላኽ   እዚ  

ንዘለኣለም   ኣለም   ኣምላኽና   እዩ   እሞ፡

ንሱ   ኽሳዕ   ሞት   ክመርሓና   እዩ።

ዝ/መዛ.   ብ/ኪ   ሓ/ኪ

       መበል 49 መዝሙር።            

ንሊቀ   መዘምራን፡   ናይ   ደቂ   ቆራህ   መዝሙር።

     ^1-2ኵሉዅም   ኣህዛብ፡   እዚ   ስምዑ፡

ኣቱም   ኣብ   ዓለም   እትነብሩ   ዅሉኹም፡

ሕሱራትን   ክቡራትን፡   ሃብታማትን   ድኻታትን፡

ሓቢርኩም   ጽን   በሉ። 

³ኣፈይ   ጥበብ   ይዛረብ፡

ሓሳብ   ልበይ   ከኣ   ናይ   ምስትውዓል   እዩ። 

⁴እዝነይ   ናብ   ምስላታት   ኤድንን፡

ስዉር   ፍልጠተይውን   ብበገና   እገልጽ   ኣሎኹ። 

     ⁵እከይ   እቶም   ዝረግጹኒ   ክኸበኒ   ኸሎ፡

ብመዓልቲ   ጸገማ   ንምንታይ   እየ   ዝፈርህ፧ 

⁶እቶም   ኣብ   ገንዘቦም   ዝውከሉ፡

ብብዝሒ   ሃብቶም   ከኣ   ዝምክሑ   ዘለዉስ፡ 

^7-9ንሓዋሩ   ኽነብር   ጥፍኣትውን   ከይርኢ፡

ሓደ   እኳ   ንሓዉ   ዝብጀዎ፡

ጋር   ነፍሲ   ንኣምላኽ   ዝህበሉ   የልቦን፡

ጋር   ነፍሶም   ክቡር፡   ንዘለኣለም   ከኣ   ተሪፉ   እዩ። 

¹⁰ጠቢባን   ከም   ዝሞቱ፡

ዓሻን   ደንቈሮን   ሓቢሮም   ከም   ዝጠፍኡ፡

ገንዘቦም   ድማ   ንኻልኦት   ከም   ዝሓድጕሎምሲ  

ኽርኢ   ደኣ   እዩ። 

¹¹ኣባይቶም   ንዘለኣለም፡

መሓድሮም   ካብ   ወለዶ   ንወለዶ   ኸም   ዝነብር፡

ውሽጣዊ   ሓሳቦም   እዩ።  

ንምድሮም   በብስሞም   ይሰምይዎ   ኣለዉ። 

     ¹²ግናኸ   ሰብ   ነተን   ዝጠፍኣ   እንስሳ   እዩ   ዝመስል፡

ከቢሩ   እኳ   እንተሎ   ኣይነብርን   እዩ። 

¹³እዛ   መገዶምሲ   ዕሽነቶም   እያ፡

ድሕሪኦም   ዝመጹውን   ንባህሎም   ይሰምርዎ።    ሴላ

     ¹⁴ከም   ኣባጊዕ   ኣብ   ሲኦል   ይነብሩ፡

ሞት   ይጓስዮም።

   ንግሆ   ቅኑዓት   ይገዝእዎም፡

ውቃቢኦም   ኣብ   ሲኦል   ይጠፍእ፡

ማሕደርውን   የብሎምን። 

¹⁵ኣምላኽ   ግና   ክቕበለኒ   እዩ   እሞ፡

ንሱ   ንነፍሰይ   ካብ   ኢድ   ሲኦል   ከናግፋ   እዩ።    ሴላ

     ¹⁶ሰብ   እንተ   ሃብተመ፡

ክብረት   ቤቱ   እንተ   በዝሐ፡   ኣይትፍራህ። 

¹⁷ክብረቱ   ኣስኣሰሩ   ኣይወርድን   እዩ   እሞ፡

ምስ   ዝመውት፡   ገለ   እኳ   ኣይማላእን። 

¹⁸ሽሕ   እኳ   ብህይወቱ   ነፍሱ   እንተ   ኣመስገነ፡

ንርእስኻ   ሰናይ   እንተ   ገበርካላ፡

ሰባትውን   እንተ   ነአዱኻ፡ 

¹⁹ንስኻስ   ናብቶም   ከቶ   ብርሃን   ዘይርአዩ  

ዓሌት   ኣቦታትካ   ኽትከይድ   ኢኻ። 

²⁰ምስትውዓል   ዘይብሉ   ሰብ  

ብኽብሩ   እኳ   ነተን   ዝጠፍኣ   እንስሳ   እዩ   ዝመስል።

ዝ/መዛ.   ብ/ኪ   ሓ/ኪ

       መበል 50 መዝሙር።            

ናይ   ኣሳፍ   መዝሙር።

     ¹እቲ   ስልጡን   ኣምላኽ፡   እግዚኣብሄር፡   ተዛረበ፡

ካብ   ምብራቕ   ጸሓይ   ክሳዕ   ምዕራባ   ንምድሪ   ጸውዓ። 

²ካብ   ጽዮን፡   እታ   ፍጻሜ   መልክዕ፡   ኣምላኽ   ደመቐ። 

³ኣምላኽና   ይመጽእ   ስቕ   ድማ   ኣይብልን፡

ኣብ   ቅድሚኡ   ዝባላዕ   ሓዊ   ኣሎ፡

ህቦብላ   ንፋስውን   ይኸቦ። 

^4-5ንሱ   ንህዝቡ   ምእንቲ   ኽፈርድሲ፡

ነቶም   ብመስዋእቲ   ገይሮም  

ምሳይ   ኪዳን   ዝአተዉ   ቅዱሳነይ   አክቡለይ፡

ኢሉ   ንሰማያት   ኣብ   ላዕልን   ንምድርን   ይጽውዕ   ኣሎ። 

⁶ኣምላኽሲ   ፈራዲ   እዩ   እሞ፡  

ሰማያት   ጽድቁ   ይነግሩ።    ሴላ።

     ⁷ኣታ   ህዝበይ፡   ኣነ   ኽዛረብሲ   ስማዕ፡

ኣታ   እስራኤል፡   ኣነ   ኽምስክር   እየ፡

ኣነ   ኣምላኽሲ፡   ኣምላኽካ   እየ። 

⁸ብዛዕባ   መስዋእትታትካ   ኣይወቕሰካን፡

መስዋእትታት   ምሕራርካ   ኸኣ  

ኵሉ   ግዜ   ኣብ   ቅድመይ   እዩ። 

^9-11ኵሎም   እንስሳ   በረኻን  

ኣብ   ኣሻሕ   ኣኽራን   ዘለዋ   ኸብትን   ናተይ   እየን፡

ንዅለን   ኣዕዋፍ   ኣኽራን   እፈልጠን፡

ኣብ   ምድሪ   ዝዋሳወስ   ከኣ   ምሳይ   እዩ   ዘሎ   እሞ፡

ኣነ   ኻብ   ገዛኻ   ዝራብዓት፡

ካብ   ደምቤኻውን   ዲቤላታት   ኣይወስድን። 

¹²ምድርን   ምልኣታን   ናተይ   እያ   እሞ፡

እንተ   ዝጠሚ   እኳ   ኣይምነገርኩኻን። 

¹³ኣነዶ   ስጋ   ዝራብዓት   እበልዕ፧  

ደም   ዲቤላታትሲ   እሰቲ   እየ፧ 

     ¹⁴መስዋእቲ   ምስጋና   ንአምላኽ   ሰውኣሉ፡

መብጽዓኻውን   ንልዑል   ሃቦ። 

¹⁵ብመዓልቲ   ጸበባ   ድማ   ጸውዓኒ፡

ኣነ   ኸናግፈካ   እየ፡   ንስኻውን   ከተኽብረኒ   ኢኻ። 

     ^16-17ንረሲእ   ግና   ኣምላኽ   ይብሎ፡

ኣታ   ተግሳጸይ   እትጸልእ፡

ቃላተይውን   ንድሕሬኻ   እትድርብስ፡

ከመይ   ጌርካ   ኢኻ   ስርዓታተይ   እትነግር፧  

ንኺዳነይውን   ብአፍካ   እተውስኦ፡ 

¹⁸ሰራቒ   ምስ   ርኤኻ፡   ምስኡ   ሓበርካ፡

ክፍልኻውን   ምስ   ኣመንዝራታት   ነበረ። 

¹⁹ኣፍካ   ንኽፉእ   ፈኖኻዮ፡

መልሓስካውን   ጥበራ   ትፍሕስ። 

²⁰ተቐሚጥካ   ንሓውካ   ትሓምዮ፡

ንወዲ   እኖኻውን   ተነውሮ   ኣሎኻ። 

     ²¹እዚ   እናገበርካስ፡   ኣነ   ስቕ   በልኩልካ፡

እህ፡   ከማኻ   ዝዀንኩ   መሲሉካ   ኢኻ፡

ግናኸ   ኣነ   ኽግስጸካ፡

ንሓጢኣትካ   ኣብ   ቅድሚ   ኣዒንትኻ   ከቑም   እየ። 

²²ኣቱም   ንኣምላኽ   እትርስዕዎ፡

ኣነ   ኸይሰላልዓኩም   እሞ፡

ዘናግፈኩም   ከይትስእኑስ፡   ነዚ   ኣስተብህልዎ። 

²³መስዋእቲ   ምስጋና   ዝስውኣለይ   የኽብረኒ፡

ነቲ   ብመገዱ   ዝጥንቀቕ   ከኣ  

ምድሓን   ኣምላኽ   ከርእዮ   እየ።

ዝ/መዛ.   ብ/ኪ   ሓ/ኪ

       መበል 51 መዝሙር።            

ንሊቀ   መዘምራን፡   ዳዊት፡   ድሕሪ   ናብ   ባትሴባ   ምእታዉ   ነብዪ   ናታን   ምስ   መጸ፡   ዝበሎ   መዝሙር።

     ¹ዎ   ኣምላኽ፡   ከም   ሳህልኻ   ምሓረኒ፡

ከምቲ   ዓብዪ   ርሕራሐኻ   ኣበሳይ   ደምስስ። 

²ካብ   ኣበሳይ   ኣጸቢቕካ   ሕጸበኒ፡

ካብ   ሓጢኣተይውን   ኣጽርየኒ።

     ³ኣነ   ኣበሳይ   እፈልጥ   ኣሎኹ   እሞ፡

ሓጢኣተይ   ኵሉ   ግዜ   ኣብ   ቅድመይ   እዩ። 

⁴ብዘረባኻ   ጻድቕ፡

ብፍርድኻውን   ንጹህ   ኴንካ   ኽትርከብሲ፡

ኣነ   ንኣኻ   ጥራይ   በደልኩ፡

ኣብ   ቅድሜኻ   እከይ   ገበርኩ።

     ⁵እንሆ፡   ብኣበሳ   ተወለድኩ፡

እኖይ   ከኣ   ብሓጢኣት   ጠነሰትኒ። 

⁶እንሆ፡   ንሓቂ   ኣብ   ውሽጢ   ኢኻ   እትደልዮ፡

ኣብ   ሕቡእውን   ጥበብ   ምሃረኒ። 

⁷ምእንቲ   ኽጸርስ፡   ብስምዕዛ   ኣጽርየኒ፡

ካብ   በረድ   ክጽዕዱ፡   ሕጸበኒ። 

⁸እተን   ዝቐጥቀጥካየን   ኣዕጽምቲ   ኽሕጐሳስ፡

ባህታን   ሓጐስን   ኣስምዓኒ። 

⁹ገጽካ   ኻብ   ሓጢኣተይ   ከውሎ፡

ንብዘሎ   ኣበሳይውን   ደምስሶ። 

     ¹⁰ዎ   ኣምላኽ፡   ጽሩይ   ልቢ   ፍጠረለይ፡

ጽኑዕ   መንፈስ   ከኣ   ኣብ   ውሽጠይ   ሓድስ።

¹¹ካብ   ገጽካ   ኣይትደርብየኒ፡

ቅዱስ   መንፈስካውን   ኣይተግድፈኒ። 

¹²ሓጐስ   ምድሓንካ   ምለሰለይ፡

ብፍቓደኛ   መንፈስውን   ደግፈኒ። 

     ¹³መገድኻ   ንመፍረስቲ   ኽምህሮም   እየ፡

ሓጥኣን   ከኣ   ናባኻ   ኽምለሱ   እዮም። 

¹⁴ዎ   ኣምላኽ፡   ኣምላኽ   ምድሓነይ፡

ካብ   ዕዳ   ደም   ኣናግፈኒ፡

ልሳነይውን   ንጽድቅኻ   እልል   ክትብለሉ   እያ። 

¹⁵ጐይታየ፡   ኣፈይ   ምስጋናኻ   ኽነግርሲ፡

ከናፍረይ   ክፈት። 

     ¹⁶መስዋእቲ   ባህ   ኣየብለካን   እዩ፡

እንተ   ዘይኰነስ   መቕረብኩልካ   ነይረ፡

ንመስዋእቲ   ምሕራር   ኣይትብህጎን   ኢኻ   እሞ፡ 

¹⁷መስዋእቲ   ኣምላኽ   ስቡር   መንፈስ   እዩ።  

ዎ   ኣምላኽ፡   ንስቡርን   ቅጥቁጥን   ልቢ   ኣይትንዕቆን   ኢኻ። 

     ¹⁸ንጽዮን   ብጸጋኻ   ሰናይ   ግበረላ፡

መካበብያታት   የሩሳሌም   ንደቕ። 

¹⁹ሽዑ   ብመስዋእቲ   ጽድቂ፡

ብዝሓርር   መስዋእቲ፡

ብምሉእ   መስዋእቲ   ባህ   ክብለካ   እዩ፡

ሽዑ   ኣብ   መሰውኢኻ   ኣራሑ   ከቕርቡልካ   እዮም።

ዝ/መዛ.   ብ/ኪ   ሓ/ኪ

       መበል 52 መዝሙር።            

ንሊቀ   መዘምራን፡   ናይ   ዳዊት   መስኪል።ዶኤግ፡  

እቲ   ኤዶማዊ፡   ናብ   ሳኦል   ኣትዩ፡   ዳዊት   ኣብ   ቤት   ኣህሜሌክ   ኣሎ፡  

ኢሉ   ምስ   ነገሮ   እተዘመረ።

     ¹ኣታ   ሓያል፡   ስለምንታይ   ብእከይ   እትምከሓሉ፧

ጸጋ   ኣምላኽ   ንሓዋሩ   ይነብር። 

     ²ኣታ   መታለሊ፡

መልሓስካ   ኸም   በሊሕ   መላጸ   ጥፍኣት   ትምህዝ   ኣላ። 

³ካብ   ሰናይሲ   እከይ፡

ካብ   ዘረባ   ጽድቂውን   ሓሶት   ትፈቱ   ኣሎኻ።    ሴላ።

⁴ኣቲ   ሓሳዊት   መልሓስ፡

ቃላት   ጥፍኣት   ዘበለ   ትፈትዊ   ኣሎኺ። 

⁵ስለዚ   ኣምላኽ   ንሓዋሩ   ኽጥፍኣኪ   እዩ፡    ሴላ።

ክሕዘኪ   ኻብ   ድንኳንኪውን   ክምንጥለኪ፡

ካብ   ምድሪ   ህያዋን   ክምሕወኪ   እዩ። 

     ^6-7ጻድቃን   ከኣ   ነዚ   ርእዮም   ይፈርሁ   እሞ፡

እንሆ፡   እቲ   ብብዝሒ   ሃብቱ   ተወኪሉስ፡

ብኽፍኣቱ   ዝበርትዐ   እምበር፡

ንኣምላኽሲ   ሓይሉ   ዘይገበሮ   ሰብአይ   እዚ   እዩ፡

እናበሉ   ኽስሕቅዎ   እዮም። 

⁸ኣነ   ግና   ኣብ   ቤት   ኣምላኽ   ከም   ልምዕቲ   ኣውሊዕ   እየ፡

ኣብ   ጸጋ   ኣምላኽውን   ንዘለኣለም   ኣለም   እውከል። 

⁹እዚ   ስለ   ዝገበርካ፡   ንሓዋሩ   ኸመስግነካ፡

ስምካ   ሰናይ   እዩ   እሞ፡

ኣብ   ቅድሚ   ቅዱሳንካ   ኽጽበዮ   እየ።

ዝ/መዛ.   ብ/ኪ   ሓ/ኪ

       መበል 53 መዝሙር።            

ንሊቀ   መዘምራን፡   ብማህሌት፡   ናይ   ዳዊት   መስኪል።

     ¹ዓሻ   ብልቡ፡   ኣምላኽ   የልቦን፡   ይብል።

ተበላሸዉ፡   ግብሪ   ርኽሰት   ገበሩ፡

ሰናይ   ዝገብር   ሓደ   እኳ   የልቦን። 

     ²ኣምላኽሲ፡   ሓደ   ለባም

ንኣምላኽ   ዝደልዮ   እንተሎ   ኺርኢ፡

ኻብ   ሰማያት   ናብ   ደቂ   ሰብ   ኣንቈልቁሉ   ይጥምት። 

³ኵሎም   ዓልዮም፡   ብዘለዉ   ተባለሽዮም፡

ሰናይ   ዝገብር   የልቦን፡   ሓደ   እኳ   የልቦን። 

⁴እቶም   ንህዝበይ   ከም   እንጌራ   ዝበልዕዎ፡

ናብ   ኣምላኽ   ድማ   ዘይምህለሉ   ገበርቲ   እከይሲ፡

ከቶዶ   ምስትውዓል   የብሎምን   እዮም፧ 

     ⁵ኣምላኽ   ነዕጽምቲ   እቶም   ዝኸበቡኻ

ፋሕ   ኣቢልዎ   እዩ   እሞ፡

ኣብታ   መሰምበዲ   ዘይነበራ   ኣዝዮም   ሰምበዱ፡

ኣምላኽ   ደርብይዎም   እዩ   እሞ፡   ንስኻ   ኣሕፈርካዮም። 

⁶ኣየ፡   ምድሓን   እስራኤልሲ   ኻብ   ጽዮንያ   እንተ   ዝመጽእ።  

ኣምላኽ   ነቶም   ምሩኻት   ህዝቡ   ምስ   ዘምልሶም፡

ያእቆብ   ክሕጐስ፡   እስራኤል   ከኣ   ባህ   ክብሎ   እዩ።

ዝ/መዛ.   ብ/ኪ   ሓ/ኪ

       መበል 54 መዝሙር።            

ንሊቀ   መዘምራን፡   ብንጊኖት፡   ናይ   ዳዊት   መስኪል።   ዚፋውያን   ናብ   ሳኦል   መጺኦም፡   ዳዊትሲ   ኣባናዶ   ተሓቢኡ   ኣየሎን፡   ምስ   በልዎ   እተዘመረ።

     ¹ዎ   ኣምላኽ፡   ብስምካ   ኣድሕነኒ፡

ብስልጣንካውን   በይነለይ። 

²ዎ   ኣምላኽ፡   ጸሎተይ   ስማዕ፡

ንቓላት   ኣፈይ   ጽን   በሎ።

³ከመይሲ   ጓኖት   ተንሲኦምኒ፡

ዓመጽቲውን   ንነፍሰይ   ይደልይዋ   ኣለዉ።  

ንኣምላኽ   ኣብ   ቅድሚ   ገጾም   ኣይገበርዎን።    ሴላ።

     ⁴እንሆ፡   ኣምላኽ   ረዳእየይ   እዩ፡

ጐይታይሲ   ኣብ   ማእከል   እቶም   ንነፍሰይ   ዝድግፍዋ   እዩ። 

⁵ንእከይ   ናብ   ጸላእተይ   ክመልሶ   እዩ፡

ብሓቅኻ   ኣጥፍኣዮም። 

     ⁶ፈትየ   መስዋእቲ   ከቕርበልካ፡

ጐይታየ፡   ስምካ   ሰናይ   እዩ   እሞ፡   ከመስግኖ   እየ። 

⁷ንሱ   ኻብ   ኵሉ   ጸበባ   ኣውጺኡኒ   እዩ   እሞ፡

ዓይነይ   ንጸላእተይ   ባህ   ኢልዋ   ረአየቶም።

ዝ/መዛ.   ብ/ኪ   ሓ/ኪ

       መበል 55 መዝሙር።            

ንሊቀ   መዘምራን፡   ብማህሌት፡   ናይ   ዳዊት   መስኪል።

     ¹ዎ   ኣምላኽ፡   ንጸሎተይ   ጽን   በል፡  

ካብ   ምህለላይውን   ኣይትተሓባእ። 

^2-3ኣድህበለይን   ምለሰለይን፡

ግፋዒ   የውርዱለይ፡   ብዅራ   የባርሩኒ   ኣለዉ   እሞ፡

ብሰሪ   ምጥቃዕ   እቲ   ረሲእ፡

ብሰሪ   ድምጺ   እቲ   ጸላኢ፡

ብቑዝማይ   ህድኣት   ስኢነ፡   እህህ   እብል   ኣሎኹ። 

     ⁴ልበይ   ኣብ   ውሽጠይ   ተጨነቐት፡

ስምባድ   ሞትውን   ወደቐኒ። 

⁵ፍርሃትን   ምንቅጥቃጥን   መጸኒ፡

ረዓድውን   ኣጐልበበኒ። 

⁶ኣየ፡   ከም   ርግቢ   ኣኽናፍ   እንተ   ዝህልወንስ፡

ነፊረ   ምዓረፍኩ   ነይረ፡   በልኩ። 

⁷እንሆ፡   ኣርሒቐ   ምሃደምኩ።

ኣብ   በረኻውን   ምሓደርኩ።    ሴላ።

     ⁸ካብ   ህቦብላን   ሸምቦባን   ክሃድም፡

ኣብ   መዕቈቢ   ምቐልጠፍኩ። 

⁹ዓመጻን   ባእስን   ኣብታ   ኸተማ   እርኢ   ኣሎኹ   እሞ፡

ጐይታየ፡   ኣጥፍኣዮም፡   መላሕሶም   ፈላሊ። 

¹⁰ለይትን   መዓልትን   ኣብ   መካበብያታት   ይዞሩ፡

በደልን   ክፍኣትን   ኣብ   ውሽጣ   ኣሎ። 

¹¹ሕሰም   ኣብ   ውሽጣ   ኣሎ፡

ጥቕዓትን   ጥልመትን   ካብ   ኣደባባያ   ኣይርሕቕን። 

     ¹²ዝጸርፈኒ   ጸላእየይ   ኣይኰነን፡

እንተ   ዝኸውንሲ   ምተዓገስኩ፡

ዝዕበየለይ   እቲ   ዝጸልኣኒ   ኣይኰነን፡

እንተ   ዝኸውንሲ   ምተሓባእኩ፡ 

¹³ግናኸ   ማዕረይ፡   መሓዛይ   ፈታውየይውን  

ዝነበርካ   ሰብአይ   ንስኻ   ኢኻ   ዝገበርካዮ። 

¹⁴ንሕና   ብጥዑም   ምኽሪ   ሓቢርና   ወዓልና፡

ኣብ   ቤት   ኣምላኽውን   ምስ   ኣኼባ   ንመላለስ   ነበርና። 

¹⁵እከይ   ኣብ   ማሕደሮምን   ኣብ   ውሽጦምን   ኣሎ   እሞ፡

ሞት   ብድንገት   ይምጽኣዮም፡

ብህይወቶም   ከለዉ   ናብ   ሲኦል   ይውረዱ። 

¹⁶ኣነ   ግና   ናብ   ኣምላኽ   እምህለል   ኣሎኹ፡

ጐይታውን   የድሕነኒ   እዩ። 

¹⁷ምሸትን   ብጊሓትን   ቀትርን   እቑዝም  

እህህውን   እብል   ኣሎኹ፡

ንሱ   ኸኣ   ድምጸይ   ይሰምዕ   እዩ። 

¹⁸ዝቃወሙኒ   ብዙሓት   እዮም   እሞ፡

ካብ   ውግእ   ንነፍሰይ   ብሰላም   ኣናግፋ። 

¹⁹ኣይልውጡን፡   ንኣምላኽ   ኣይፈርህዎን   እዮም   እሞ፡

ካብ   ጥንቲ   ዝነብር   ዘሎ   ኣምላኽ  

ሰሚዑ   ኽመልሰሎም   እዩ።    ሴላ።

     ²⁰ንሱ   ነቶም   ምስኡ   ብሰላም   ዘለዉ

ኢዱ   ዘርጊሑ   ኺዳኑ   ኣፍረሰ። 

²¹ኣፉ   ኸም   ጠስሚ   ልዙብ   እዩ፡

ልቡ   ግና   ውግእ   እዩ፡

ቃላቱ   ኻብ   ዘይቲ   ይልእም፡

ግናኸ   እተመሰተ   ኣስያፍ   እዩ። 

     ²²ጾርካ   ናብ   እግዚኣብሄር   ደርብዮ፡

ንሱ   ኽድግፈካ   እዩ።  

ንጻድቕ   ሰንከልከል   ክብል   ከቶ   ኣይሓድጎን። 

²³ዎ   ኣምላኽ፡   ንስኻ   ናብ   ዓሚቑ   ጒድጓድ   ተጽድፎም፡

ደመኛታትን   ጠበርትን  

ኣብ   ፈረቓ   ዕድሚኦም   ኣይበጽሑን   እዮም።  

ኣነ   ግና   ኣባኻ   እውከል   ኣሎኹ።

ዝ/መዛ.   ብ/ኪ   ሓ/ኪ

       መበል 56 መዝሙር።            

ንሊቀ   መዘምራን፡   በታ   ኣብ   ርሑቕ   ኮይና   ስቕ   ዝበለት   ርግቢ፡  

ናይ   ዳዊት   ሚክታም፡   ፍልስጤማውያን   ኣብ   ጋት   ምስ   ሓዙዎ   እተዘመረ።

     ¹ኵሉ   መዓልቲ   ሰልፈኛታት   የጨንቑኒ፡

ክውሕጡኒ   ይደልዩ   ኣለዉ   እሞ፡

ዎ   ኣምላኽ፡   ምሓረኒ። 

²ብትዕቢት   ዝዋግኡኒ   ብዙሓት   እዮም   እሞ፡

ኵላ   መዓልቲ   ተጸናተውተይ   ክውሕጡኒ   ይደልዩ። 

³በቲ   ዝፈርሃሉ   ግዜ   ኣባኻ   እውከል። 

⁴ብኣምላኽ   ንቓሉ   አመስግኖ፡

ኣብ   ኣምላኽ   ተወኪለ   ኣይፈርህን፡

ስጋኸ   እንታይ   ከይገብረኒ፧ 

     ⁵ኵሉ   መዓልቲ   ንቓላተይ   ይካራኸርዎ፡

ብዘሎ   ሓሳባቶም   ንጕድኣተይ   እዩ። 

⁶ተኣኪቦም   የድብዩለይ፡

ነፍሰይ   ይደልዩ   እዮም   እሞ፡

ስጉምተይ   ይስልዩ   ኣለዉ። 

⁷ብበደሎምዶ   ኽድሕኑ   እዮም፧  

ዎ   ኣምላኽ፡   ብዅራኻ   ነህዛብ   ኣውድቆም። 

⁸ንስኻ   ንምዅብላለይ   ቈጸርካ፡

ንንብዓተይ   ኣብ   ጭልፎኻ   ኣከብካዮ፡

ኣብ   መጽሓፍካዶ   ኣይተጻሕፈን፧ 

⁹በታ   ዘእውየላ   መዓልቲ  

ጸላእተይ   ንድሕሪት   ክምለሱ   እዮም።

ኣምላኽ   ምሳይ   ከም   ዘሎ፡   እዚ   እፈልጥ   ኣሎኹ። 

¹⁰ብኣምላኽ   ንቓሉ   አመስግኖ፡

ብእግዚኣብሄር   ንቓሉ   አመስግኖ   ኣሎኹ። 

     ¹¹ኣብ   ኣምላኽ   ተወኪለ   ኣይፈርህን፡

ሰባትከ   እንታይ   ከይገብሩኒ፧ 

^12-13ዎ   ኣምላኽ፡   መብጽዓኻ   ኣብ   ልዕለይ   ኣሎ፡

ኣብ   ብርሃን   ህያዋን   ኣብ   ቅድሚ   ኣምላኽ   ክመላለስሲ፡

ንነፍሰይ   ካብ   ሞት፡

ነእጋረይውን   ካብ   ውድቀት   ኣድሒንካየን   ኢኻ   እሞ፡

መስዋእቲ   ምስጋና   ከቕርበልካ   እየ።

ዝ/መዛ.   ብ/ኪ   ሓ/ኪ

       መበል 57 መዝሙር።            

ንሊቀ   መዘምራን፡   ብኣልተስሄት።   ዳዊት   ካብ   ሳኦል   ሃዲሙ   ናብ   በዓቲ   ምስ   ኣተወ   ዝበሎ   ሚክታም።

     ¹ዎ   ኣምላኽ፡   ምሓረኒ፡

ነፍሰይ   ኣባኻ   ተዕቁብ   ኣላ   እሞ፡   ምሓረኒ፡

እቲ   መዓት   ክሳዕ   ዝሓልፍ፡

ኣብ   ጽላል   ኣኽናፍካ   ተጸጊዐ   እኔኹ። 

²ናብ   ልዑል   ኣምላኽ፡

ናብቲ   ዝፍጽመለይ   ኣምላኽ   አእዊ   ኣሎኹ።

 ³ንሱ፡   እቲ   ወሓጥየይ፡   ክጸርፈኒ   ኸሎ፡

ካብ   ሰማይ   ልኢኹ   ኸድሕነኒ   እዩ፡    ሴላ።

ጸጋኡን   ሓቁን   ክልእኽ   እዩ። 

     ⁴ነፍሰይ   ኣብ   ማእከል   ኣናብስ   እያ፡

ኣብ   ማእከል   እቶም   ሓዊ   ዝተፍኡ፡

ኣብ   ማእከል   እቶም   ኣስናኖም   ኵናትን   ፍላጻን፡

መላሕሶም   ከኣ   ስሑል   ሰይፊ  

ዝዀነ   ሰባት   እድቅስ   ኣሎኹ። 

⁵ዎ   ኣምላኽ፡   ኣብ   ልዕሊ   ሰማያት   ልዕል   በል፡

ክብርኻ   ኣብ   ልዕሊ   ዅሉ   ምድሪ   ይኹን። 

⁶ንስጕምተይ   መጻወድያ   ኣጻውዱለይ፡   ነፍሰይ   ጐበጠት፡

ኣብ   ቅድመይ   ጕድጓድ   ኰዓቱ፡

ኣብኡውን   ወደቑ።    ሴላ።

     ⁷ልበይ   ኣንቂዱ፡   ዎ   ኣምላኽ፡   ልበይ   ኣንቂዱ፡

ክዝምርን   ከመስግንን፡   እየ። 

⁸ክብረየ፡   ንቕሒ፡   በገናን   መሰንቆን   ንቕሑ፡

ንወጋሕታ   ኸንቅሓ   እየ። 

⁹ጐይታየ፡   ኣብ   ማእከል   ኣህዛብ   ከመስግነካ፡

ኣብ   ማእከል   ህዝብታት   ክዝምረልካ   እየ። 

¹⁰ሳህልኻ   ኽሳዕ   ሰማያት   ዓብዪ፡

ሓቅኻውን   ክሳዕ   ደበናታት   እዩ   እሞ፡ 

¹¹ዎ   ኣምላኽ፡   ኣብ   ልዕሊ   ሰማያት   ልዕል   በል፡

ክብርኻ   ኣብ   ልዕሊ   ዅሉ   ምድሪ   ይኹን።

ዝ/መዛ.   ብ/ኪ   ሓ/ኪ

       መበል 58 መዝሙር።            

ንሊቀ   መዘምራን፡   ብኣልተስሄት፡   ናይ   ዳዊት   ሚክታም።

     ¹ኣቱም   ደቂ   ሰብ፡   ስቕ   ብምባልኩምዶ   ጽድቂ   ትዛረቡ፧

ሓቂዶኸ   ትፈርዱ   ኢኹም፧ 

²ኣብ   ልብኹምስ   እባ   በደል   ደኣ   ትብድሉ፡

ግፍዒ   ኣእዳውኩም   ኣብ   ሃገር   ትመዝኑ። 

³ረሲኣን   ካብ   ከርሲ   ወላዲቶም   ጀሚሮም   ኣግለሱ፡

ሓሰውቲ   ኻብ   ማህጸን   ወላዲቶም   ጀሚሮም   ተጋገዩ። 

     ^4-5ሕንዚ   ተመን   ዝመስል   ሕንዚ   ኣለዎም፡

ከምቲ   ድምጺ   ኣስማተኛታት፡

ናይቲ   ፈላጥ   ጠንቋሊ   እኳ   ኸይሰምዕ   ኢሉ  

ኣእዛኑ   ዝዓብስ   ጸማም   ተመን   እዮም። 

⁶ዎ   ኣምላኽ፡   ኣስናኖም   ኣብ   ኣፎም   ሰባብሮ፡

ጐይታየ፡   ኰራርምቲ   ሽደናት   ኣናብስ   መዝሕቕ። 

⁷ከም   ዝኩዖ   ማይ   ይከዓዉ።  

ፍላጻታቱ   እንተ   ገተረን፡   ይጕደማ። 

⁸ከምቲ   ክኸይድ   ከሎ   ዝመክኽ   ኣረነ፡

ከምቲ   ጸሓይ   ዘይረአየ   ቝላዕ   ሰበይቲ   ይኹኑ። 

     ⁹ቈራርዕኩም   ሓዊ   ቐሸም   ከይቀረቦ፡

ህቦብላ   ንጥሉልን   ንንዱድን   ይመንጥሎ። 

¹⁰ጻድቕ   ንምፍዳይ   ሕነ   ርእዩ   ኽሕጐስ፡

ኣእጋሩ   ብደም   ረሲእ   ክሕጸብ   እዩ። 

¹¹ሰባት   ከኣ፡   ብሓቂ   ንጻድቕሲ   ፍረ   ኣለዎ፡

ብሓቂ   ኣብ   ምድሪ   ዝፈርድ   ኣምላኽ   ኣሎ፡

ክብሉ   እዮም።

ዝ/መዛ.   ብ/ኪ   ሓ/ኪ

       መበል 59 መዝሙር።            

ንሊቀ   መዘምርራን፡   ብኣልተስሄት፡   ናይ   ዳዊት   ሚክታም፡   ሳኦል   ክቐትሎ   ኢሉ   ንቤቱ   ክሕልዎ   ምስ   ሰደደ   እተዘመረ።

     ¹ኣምላኸየ፡   ካብ   ጸላእተይ   ኣናግፈኒ፡

ካብቶም   ዝትንስኡኒ   ኣብ   እምባ   ኣቑመኒ። 

²ካብ   ገበርቲ   እከይ   ኣናግፈኒ፡

ካብ   ደመኛታትውን   ኣድሕነኒ። 

³እነዉ፡   ንነፍሰይ   ይጻናተውዋ   ኣለዉ   እሞ፡

ጐይታየ፡   ብኣበሳይን   ሓጢኣተይን   ኣይኰኑን  

ሓያላት   ክቃወሙኒ   ሓቢሮም   ዘለዉ። 

⁴ከይበደልኩስ   ጐይዮም   ይዳለዉ፡

ክትቅበለኒ   ንቓሕ   እሞ   ርኤ። 

⁵ጐይታይ፡   ኣምላኽ   ሰራዊት፡   ኣምላኽ   እስራኤል፡

ንቓሕ   እሞ   ንዅሎም   ኣህዛብ   መዓት   ኣውርደሎም፡

ካብቶም   ጠለምቲ   ገበርቲ   እከይ  

ንሓደ   እኳ   ኣይትምሓር።    ሴላ።

     ⁶ምሸት   እናተመልሱ   ኸም   ኣኽላባት   ይነብሑ፡

ኣብ   ከተማውን   ይዞሩ። 

⁷መንከ   ዝሰምዕ   ኣሎ፧   እናበሉ፡

እንሆ፡   ኣፎም   ይግንፍል፡

ኣብ   ከናፍሮም   ኣስያፍ   ኣሎ። 

     ⁸ግናኸ   ጐይታየ፡   ንስኻ   ኽትስሕቆም፡

ንዅሎም   ኣህዛብ   ከተባጭዎም   ኢኻ። 

⁹እምባይ   ኣምላኽ   እዩ   እሞ፡

ኣታ   ሓይለይ፡   ኣባኻ   ኣዕቁበ   እኔኹ። 

¹⁰ኣምላኸይ   ብሳህሉ   ይቕበለኒ፡

ኣምላኽ   ነቶም   ጸላእተይ   ብሓጐስ   የርእየኒ። 

¹¹ህዝበይ   ከይርስዑስ   ኣይትቕተሎም።  

ኣታ   ጐይታና፡   ዋልታና፡

ብሓይልኻ   ኣዀብልሎም   እሞ   ኣውድቆም። 

¹²ቃል   ከናፍሮም   ሓጢኣት   ኣፎም   እዩ፡

ስለቲ   ዝዛረብዎ   መርገምን   ሓሶትን  

ብትዕቢቶም   ይተሓንኰሉ።

 ¹³ብዅራኻ   ኣጥፍኣዮም፡

ኣምላኽ   ካብ   ያእቆብ   ጀሚሩ  

ኽሳዕ   ወሰናት   ምድሪ   ገዛኢ   ምዃኑ   ኽፈልጡስ፡

ከም   ዘይርከቡ   ጌርካ   ኣጥፍኣዮም።    ሴላ።

     ¹⁴ምሸት   እናተመልሱ   ኸም   ኣኽላባት   ይነብሑ፡

ኣብ   ከተማውን   ይዞሩ። 

¹⁵መብልዕ   ደልዮም   ይዛውኑ፡

ከይጸገቡ   ኸኣ   ይሓድሩ   ኣለዉ። 

     ¹⁶ኣነ   ግና   ንሓይልኻ   እዝምር፡

ንስኻ   እምባ፡

ብመዓልቲ   ጸበባውን   መዕቈቢ   ዄንካ   ኢኻ   እሞ፡

ንሳህልኻ   ኣንጊሄ   እልል   እብል   ኣሎኹ። 

¹⁷ኣምላኽሲ   እምባይ፡   ኣምላኽ   ምሕረተይ   እዩ   እሞ፡

ኣታ   ሓይለይ፡   ንኣኻ   ምስጋና   እዝምር   ኣሎኹ።

ዝ/መዛ.   ብ/ኪ   ሓ/ኪ

       መበል 60 መዝሙር።            

ንሊቀ   መዘምራን፡   ብሱሳን   ኤዱት፡   ናይ   ዳዊት።   ምስ   ናይ   ሞሶጶታምያ   ሶርያውያንን      ምስ   ናይ   ጾባ   ሶራውያንን   ክዋጋእ   ከሎ፡   ዮኣብውን   ተመሊሱ   ካብ   ኤዶማውያን   ኣብ   ለሰ   ጨውንዓሰርተው   ክልተ   ሽሕ   ምስ   ሰዓሮም   ዝጽናዕ   ሚክታም።

     ¹ዎ   ኣምላኽ፡   ደርበኻና፡

ፋሕ   ኣበልካና፡   ኰረኻ።   ምለሰና። 

     ²ንምድሪ   ኣንቀጥቀጥካያ፡   ተርተርካያ፡

ትናወጽ   ኣላ   እሞ፡   ጭዳዳ   ጸግን። 

³ንህዝብኻ   ጭንቀት   ኣርኤኻዮ፡

ሰንከልከል   ዘብል   ወይኒ   ኣስተኻና። 

⁴ስለ   ሓቂ   ምእንቲ   ኽለዓል፡

ነቶም   ዝፈርሁኻ   ሰንደቕ   ዕላማ   ሃብካዮም።    ሴላ።

     ⁵ፈተውትኻ   ምእንቲ   ኽናገፉ።  

ብየማነይትኻ   ኣድሕን   እሞ   ስምዓና። 

     ⁶ኣምላኽ   ኣብ   መቕደሱ   ተዛረበ፡

ኣነ   ኽዕወት፡   ንሴኬም   ክመቕሎ፡

ንለሰ   ሱኮትውን   ብመስፈሪ   ኽሰፍሮ   እየ። 

⁷ጊልኣድ   ናተይ   እዩ፡   ምናሴ   ኸኣ   ናተይ   እዩ።  

ኤፍሬም   መጸግዕ   ርእሰይ፡

ይሁዳውን   ዘንጊ   ግዝኣተይ   እዩ።

⁸ሞኣብ   ገበራ   ምሕጻበይ   እዩ፡

ኣብ   ኤዶም   ሳእነይ   እድርቢ።  

ዎ   ፍልስጥኤም፡   እልል   በልለይ። 

     ⁹ናብታ   ዕርድቲ   ኸተማ   መን   ይወስደኒ፧  

ናብ   ኤዶምሲ   መን   ኰን   ይመርሓኒ፧ 

¹⁰ዎ   ኣምላኽ፡   ንስኻዶ   ኣይኰንካን   ዝደርበኻና፧  

ንስኻ   ዎ   ኣምላኽ፡   ምስ   ሰራዊትናኸ   ኣይትወጽእን   ዲኻ፧ 

     ¹¹ረዲአት   ሰብ   ከንቱ   እዩ   እሞ፡

ካብቲ   ተጻራሪ   ርድኣና። 

¹²ብኣምላኽ   ንሕይል፡

ንሱውን   ንተጻረርትና   ኽረግጾም   እዩ።

ዝ/መዛ.   ብ/ኪ   ሓ/ኪ

       መበል 61 መዝሙር።            

ንሊቀ   መዘምራን፡   ብንጊኖት፡   ናይ   ዳዊት።

     ¹ዎ   ኣምላኽ፡   ኣውያተይ   ስማዕ፡

ናብ   ጸሎተይ   ኣቕልብ። 

^2-3ንስኻ   መዕቈብየይ፡

ካብ   ገጽ   ጸላኢ   ጽኑዕ   ግምቢ   ኢኻ   እሞ፡

ልበይ   እንተ   ተሓለለ፡

ካብ   ወሰን   ምድሪ   ኣባኻ   ኸእዊ   እየ።  

ናብቲ   ኻባይ   ልዕል   ዝበለ   ኸውሒ   ምርሓኒ። 

^4-5ዎ   ኣምላኽ፡   ንስኻ   መብጽዓይ   ሰሚዕካ፡

ስምካ   ንዝፈርሁ   ርስቲ   ትህቦም   ኣሎኻ   እሞ፡

ኣብ   ድንኳንካ   ንሓዋሩ   ኽነብር   እየ፡

ኣብ   ጽላል   ኣኽናፍካ   አዕቁብ   ኣሎኹ።    ሴላ።

     ⁶ዕድመ   ንጉስ   ተንውሕ፡

ዓመታቱ   ኻብ   ወለዶ   ንወለዶ   ይነብር። 

⁷ኣብ   ቅድሚ   ኣምላኽ   ንሓዋሩ   ይነብር፡

ምሕረትን   እምነትን   ክሕልዋኦ   ኣዳሉ። 

⁸ንስምካ   ንሓዋሩ   ኽዝምረሉ፡

ከምዚ   ገይረ   ነንመዓልቲ   መብጽዓይ   ክፈዲ   እየ።

ዝ/መዛ.   ብ/ኪ   ሓ/ኪ

       መበል 62 መዝሙር።            

ንሊቀ   መዘምራን፡   ብየዱቱን፡   ናይ   ዳዊት   መዝሙር።

     ¹ነፍሰይ   ኣብ   ኣምላኽ   ጥራይ   ሃዲኣ   ትጽበ፡

ምድሓነይ   ካብኡ   ይመጽእ   ኣሎ። 

²ከውሐይን   ምድሓነይን   እምባይን   ንሱ   ጥራይ   እዩ፡

ኣዝየ   ኣይናወጽን። 

     ³ከም   ዝቐነነ   ግድጊዳን፡

ንምውዳቕ   ዝተቐረበ   መንደቕን፡

ኵሉኹም   ሓቢርኩም   ምእንቲ   ኸተወድቕዎስ፡

ክሳዕ   መኣዝ   ኢኹም   ንሓደ   ሰብኣይ   ጥራይ   እትጥሕሩ፧ 

⁴ካብ   ልዕልናኡ   ኸጽድፍዎ   ጥራይ   ይማኸሩ፡

ብሓሶት   ባህ   ይብሉ፡   ብኣፎም   ይምርቑ፡

ብውሽጦም   ግና   ይረግሙ   ኣለዉ።    ሴላ።

     ⁵ትጽቢተይ   ካብኡ   እዩ   እሞ፡

ነፍሰየ፡   ብኣምላኽ   ጥራይ   ሃዲእኪ   ተጸበዪ። 

⁶ከውሐይን   ምድሓነይን   እምባይን   ንሱ   ጥራይ   እዩ፡

ኣነ   ኣይክናወጽን   እየ። 

⁷ምድሓነይን   ክብረይን   ኣብ   ኣምላኽ   እዩ፡

ጽኑዕ   ከውሐይን   መዕቈብየይን   ኣብ   ኣምላኽ   እዩ። 

⁸ኣቱም   ህዝቢ፡   ኵሉ   ግዜ   ብእኡ   ተወከሉ፡

ልብኹም   ኣብ   ቅድሚኡ   ኣፍስሱ፡

መዕቈቢና   ኣምላኽ   እዩ።    ሴላ።

     ⁹ውሉድ   ኣዳም   ምናምን   ጥራይ   እዮም፡

ውሉድ   ሰብውን   ሓሶት   ጥራይ   እዮም፡

ኣብ   ሚዛን   ልዕል   ይብሉ፡

ኵሎም   ብሓባር   ካብ   ምናምን   ይፈዅሱ። 

¹⁰ኣብ   ግፍዒ   ኣይትወከሉ፡

ብዘመተ   ኸኣ   ኸንቱ   ተስፋ   ኣይትግበሩ፡

ሃብቲ   እንተ   በዝሐ፡   ልብኹም   ኣይተውድቑሉ። 

¹¹ስልጣን   ናይ   ኣምላኽ   ምዃኑ፡

ኣምላኽ   ሓንሳእ   ተዛረበ፡

ክልተ   ሳዕ   ሰማዕክዎ። 

¹²ንነፍሲ   ወከፍ   ከከም   ግብሩ   ትፈድዮ   ኢኻ   እሞ፡

ጐይታየ፡   ጸጋውን   ናትካ   እዩ።

ዝ/መዛ.   ብ/ኪ   ሓ/ኪ

       መበል 63 መዝሙር።            

ዳዊት   ኣብ   በረኻ   ይሁዳ   ኸሎ   ዝዘመሮ   መዝሙር።

     ¹ዎ   ኣምላኽ፡   ንስኻ   ኢኻ   ኣምላኸይ፡

ኣንጊሀ   እደልየካ   ኣሎኹ፡   ነፍሰይ   ንኣኻ   ትጸምእ   ኣላ፡

ስጋይ፡   ማይ   ኣብ   ዘይብሉ  

ደረቕን   ጽሙእን   ምድሪ   ዀይኑ፡

ይናፍቐካ   ኣሎ። 

²ከምኡውን   ስልጣንካን   ክብርኻን   ምእንቲ   ኽርኢ፡

ናብ   መቕደስካ   አማዕዱ   ኣሎኹ። 

³ለውሃትካ   ኻብ   ህይወት   ይበልጽ   እዩ   እሞ፡

ከናፍረይ   ክውድሳኻ   እየን። 

⁴ብህይወተይ   ክሳዕ   ዘሎኹ   ኽባርኸካ፡

ብስምካ   ነእዳወይ   ከልዕለን   እየ። 

     ^5-7ረዲአተይ   ንስኻ   ኢኻ፡

ኣብ   ትሕቲ   ጽላል   ኣኽናፍካ   እሕጐስ   ኣሎኹ   እሞ፡

ኣብ   ምድቃሰይ   ክዝክረካ፡

ብለይቲ   እናነቓሕኩ   ክሓስበካ   ከለኹ፡

ነፍሰይ   ከም   ብስብሕን   ኣንጕዕን   ትጸግብ፡

ኣፈይውን   ብኸናፍር   እልልታ   ኸመስግነካ   እዩ። 

⁸ነፍሰይ   ኣብ   ድሕሬኻ   ትጠብቕ፡

የማነይቲ   ኢድካውን   ትድግፈኒ   ኣላ። 

     ⁹እቶም   ንህይወተይ   ከጥፍእዋ   ዝደልዩ   ግና

ናብ   መዓሙቑ   ምድሪ   ኽወርዱ   እዮም። 

¹⁰ንስልጣን   ሰይፊ   ኽውሃቡ፡

ግደ   ወኻሩ   ክዀኑ   እዮም። 

¹¹ንጉስ   ግና   ብኣምላኽ   ክሕጐስ፡

ኣፍ   ሓሰውቲ   ኽዕበስ   እዩ   እሞ፡

ነፍሲ   ወከፍ   ብእኡ   ዝምሕል   ዘበለ   ኽሕበን   እዩ።

ዝ/መዛ.   ብ/ኪ   ሓ/ኪ

       መበል 64 መዝሙር።            

ንሊቀ   መዘምራን፡   ናይ   ዳዊት   መዝሙር።

     ¹ዎ   ኣምላኽ፡   ክምህለል   ከሎኹ፡   ድምጸይ   ስማዕ፡

ንህይወተይ   ካብ   ፍርሃት   ጸላኢ   ሓልዋ። 

²ካብ   ሕቡእ   ምኽሪ   ሕሱማት፡

ካብ   ህውከት   ገበርቲ   እከይ   ሰውረኒ። 

^3-4ካብቶም   ኣብ   ሕቡእ   ቦታ   ንንጹህ   ክወግኡስ፡

መላሕሶም   ከም   ሰይፊ   ዝስሕሉ፡

ፍላጻታቶም፡   መሪር   ቃላት፡   ዘዝግቡ   ሰውረኒ።  

ብድንገት   ይወግኡ   ኣለዉ፡   ኣይፈርሁን   ድማ። 

     ⁵ኣብ   እኩይ   ሃቐና   ይጸንዑ፡

መፈንጠራ   ኸጻውዱስ   ይመኽሩ፡

መን   ከይርእየና፡   ይብሉ   ኣለዉ። 

⁶እከይ   ሓሰቡ፡   ኣዝዮም   መርመሩ፡

ነቲ   እተመርመረ   ምኽሪ   ኸኣ   ፈጸሙ።  

ውሽጢ   ነፍሲ   ወከፍን   ልቡን   ዓሚቑ   እዩ። 

     ⁷ኣምላኽ   ይወግኦም፡   ድንገት   ብፍላጻ   ይቘስሉ።

⁸ይወድቁ፡   መላሕሶም   ዝበሎ   ናብኦም   ይምለስ፡

ዝርእዮም   ዘበለ   ርእሱ   ኽንቕንቕ   እዩ። 

 ⁹ኵሎም   ሰባት   ከኣ   ክፈርሁ፡

ንግብሪ   ኣምላኽ   ድማ   ከዘንትዉ፡

ንዕዮኡውን   ከስተብህሉ   እዮም። 

     ¹⁰ጻድቕ   ብእግዚኣብሄር   ክሕጐስ፡

ኣብኡ   ኸኣ   ክውከል፡

ቅኑዓት   ልቢ   ዘበሉውን   ክሕበኑ   እዮም።

ዝ/መዛ.   ብ/ኪ   ሓ/ኪ

       መበል 65 መዝሙር።            

ንሊቀ   መዘምራን፡   ናይ   ዳዊት   መዝሙር፡   ንምስጋና።

     ¹ዎ   ኣምላኽ፡   ኣብ   ጽዮን   ብህድኣት   የመስግኑኻ፡

መብጽዓውን   ንኣኻ   ኽፍጸም   እዩ። 

²ኣታ   ጸሎት   እትሰምዕ፡

ኵሉ   ስጋ   ናባኻ   ኽመጽእ   እዩ። 

     ³ኣበሳ   በርቲዑኒ፡

ንስኻ   ንምግሃስና   ይቕረ   ኽትብል   ኢኻ። 

⁴ኣብ   ቦታኻ   ኽሓድር   ዝሓረኻዮን

ዘቕረብካዮን   ሰብ   ብጹእ   እዩ።  

ብበረኸት   ቤትካ፡   ብቕዱስ   መቕደስካ   ኽንጸግብ   ኢና። 

^5-7ኣታ   ኣምላኽ   ምድሓንና፡

ንዅሉ   ወሰናት   ምድርን   ንርሑቕ   ባሕርታትን  

መዕቈቢ   ዝዀንካ፡

   ስልጣን   ተዓጢቕካ፡   ብሓይልኻ   ነኽራን   ዘጽናዕካ፡

   ህማም   ባሕርታት፡   ህማም   ማዕበላቱ፡

ወኻዕታ   ኣህዛብ   እተህድእ፡

ብዘፍርህ   ነገር   ብጽድቂ   ኽትመልሰልና   ኢኻ። 

     ⁸ኣብ   ወሰን   ምድሪ   ዝነብሩ   ኸኣ   ብትእምርትኻ   ይፈርሁ፡

ንምብራቕን   ምዕራብን   እልል   ተብለን። 

⁹ንምድሪ   ትበጽሓን   ዕልቕልቕ   ተብላን፡

ኣዚኻ   ተሀብትማ፡   ርባ   ኣምላኽ   ማይ   መሊኡ   እዩ።  

ንምድሪ   ኸምዚ   ጌርካ   ምስ   ኣዳሎኻያ፡

እኽሊ   ተዳልወሎም። 

¹⁰ንነግሕታታ   ተስትዮ፡ንድንኵላታ   ትምድምዶ፡

ብዝናም   ተለምልማ፡   ንብቑላ   ትባርኾ። 

¹¹ንዓመት   ብሳህልኻ   ትኽልላ፡

ኣሰርካ   ስብሒ   የንጠብጥብ። 

¹²ኣብ   ሰውሒ   በረኻ   የንጠብጥብ፡

ኰረቢትውን   ብታሕጓስ   ይዕጠቓ። 

¹³ኣሳውሕ   ብመጓሰታት   ይኽደን፡

ለሰታትውን   እኽሊ   ይጒልበብ፡

እልል   ይብሉን   ይዝምሩን   ኣለዉ።

ዝ/መዛ.   ብ/ኪ   ሓ/ኪ

       መበል 66 መዝሙር።            

ንሊቀ   መዘምራን፡   መዝሙር   ምስጋና።

     ¹ኵሉኹም   ሃገራት፡   ንኣምላኽ   እልል   በሉሉ፡

²ንኽብሪ   ስሙ   ዘምሩ፡   ንውዳሴኡ   ኽብሪ   ሃቡ። 

³ንኣምላኽ   ከኣ፡   ግብርታትካ   ኽንደይ   ዘፍርህ   እዩ፡

ጸላእትኻ   ሳላ   ዕቤት   ስልጣንካ  

ኣቃባጢሮም   ይግዝኡኻ፡   በልዎ። 

⁴ኵላ   ምድሪ   ኽትሰግደልካ   ኽትዝምረልካውን   እያ፡

ንስምካ   ኽትዝምር   እያ።    ሴላ።

     ⁵ንዑ፡   ኣምላኽ   ዝገበሮ   ኸኣ   ርኣዩ፡

ግብርታቱ   ንደቂ   ሰብ   ዘፍርህ   እዩ። 

⁶ንባሕሪ   ንቑጽ   ምድሪ   ገይሩ   ለወጦ፡

ንወሓዚ   በእጋሮም   ሰገርዎ፡   ሽዑ   ብእኡ   ተሓጐስና። 

⁷ብስልጣኑ   ንዘለኣለም   ይገዝእ፡

ኣዒንቱ   ናብ   ኣህዛብ   ይምልከታ።  

ዓለወኛታት   ርእሶም   ኣየልዕሉ።    ሴላ።

     ^8-9ኣቱም   ኣህዛብ፡   ነቲ   ንነፍስና   ብህይወት   ዘንበረ፡

ኣእጋርና   ኸንደልህጻውን   ዘይፈቐደ   ኣምላኽና   ባርኽዎ፡

ድምጺ   ውዳሰኡ   ኣስምዑ። 

     ¹⁰ዎ   ኣምላኽ፡   ተዓዚብካና   ኢኻ   እሞ፡

ከም   ዝዅላዕ   ብሩር   ኰላዕካና። 

¹¹ናብ   መርበብ   ኣእቶኻና፡

ኣብ   ሕቖና   ኸቢድ   ጾር   ኣጾርካና። 

¹²ብልዕሊ   ርእስና   ሰባት   ኣሳገርካ፡

ብሓውን   ብማይን   ሓለፍና፡

ንስኻ   ግና   ናብ   ራህዋ   ኣውጻእካና። 

     ^13-14መስዋእቲ   ምሕራር   ሒዘ   ናብ   ቤትካ   ኽኣቱ፡

እቲ   ኸናፍረይ   እተዛረቦ፡

ጸቢቡኒ   ኸሎኹ   ኣፈይ   ዝበሎ  

መብጽዓታተይ   ንኣኻ   ኽፍጽሞ   እየ። 

¹⁵ካብ   ስቡሓት   ኣባጊዕ   ምስ   ዕጣን   ደዓውል   ገይረ፡

መስዋእቲ   ምሕራር   ከቕርበልካ   እየ።  

ኣብዑርን   ዲቤላታትን   ክስውኣልካ   እየ።    ሴላ።

     ¹⁶ኣቱም   ንኣምላኽ   እትፈርሁ   ዅሉኹም፡   ንዑ፡

ንነፍሰይ   ዝገበረላ   ኸዘንትወልኩምሲ፡   ስምዑ። 

¹⁷ብኣፈይ   ናብኡ   ኣእወኹ፡

ምስጋናውን   ኣብ   ትሕቲ   መልሓሰይ   ነበረ። 

¹⁸ኣብ   ልበይ   እኩይ   ሃቂነ   እንተ   ዝኸውን፡

እግዚኣብሄር   ኣይምሰምዓንን   ነይሩ። 

¹⁹ግናኸ   ኣምላኽ   ብሓቂ   ሰሚዑኒ፡

ንድምጺ   ጸሎተይ   ኣቕሊቡሉ   እዩ። 

²⁰እቲ   ንጸሎተይ   ዘይነዓቐ፡

ጸጋኡውን   ዘየርሓቐለይ   ኣምላኽሲ   ይባረኽ።

ዝ/መዛ.   ብ/ኪ   ሓ/ኪ

       መበል 67 መዝሙር።            

ንሊቀ   መዘምራን፡   ብንጊኖት፡   መዝሙር   ምስጋና።

     ¹ኣምላኽ   ይምሓረና፡   ይባርኸና፡

ገጹ   የብርሃልና።    ሴላ

     ²መገድኻ   ኣብ   ምድሪ፡

ኣብ   ኵሎም   ኣህዛብውን   ምድሓንካ   ኽፍለጥሲ፡

ገጽካ   ኣብርሃልና። 

³ዎ   ኣምላኽ፡   ኣህዛብ   የመስግኑኻ፡

ኵሎም   ኣህዛብ   የመስግኑኻ። 

⁴ንህዝብታት   ብቕንዕና   ኽትፈርዶም፡    ሴላ

ነህዛብውን   ኣብ   ምድሪ   ኽትመርሖም   ኢኻ   እሞ፡

ህዝብታት   ይተሓጐሱን   እልል   ይበሉን። 

     ⁵ዎ   ኣምላኽ፡   ኣህዛብ   የመስግኑኻ፡

ኵሎም   ኣህዛብ   የመስግኑኻ፡ 

⁶ምድሪ   ፍሬኣ   ሂባ፡

እግዚኣብሄር   ኣምላኽና   ኽባርኸና   እዩ። 

⁷ኣምላኽ   ይባርኸና፡

ብዘሎ   ወሰናት   ምድሪ   ኸኣ   ይፍርሃዮ።

ዝ/መዛ.   ብ/ኪ   ሓ/ኪ

       መበል 68 መዝሙር።            

ንሊቀ   መዘምራን፡   ናይ   ዳዊት   መዝሙር፡ንምስጋና።

     ¹ኣምላኽ   ይተንስእ፡   ጸላእቱ   ፋሕ   ይበሉ፡

እቶም   ዝጸልእዎ   ኻብ   ገጹ   ይህደሙ።     ሴላ

²ትኪ   ኸም   ዝብተን፡   ከምኡ   ትብትኖም፡

ስምዒ   ኣብ   ቅድሚ   ሓዊ   ኸም   ዝመክኽ፡

ከምኡውን   ረሲኣን   ካብ   ቅድሚ   ኣምላኽ   ይጠፍኡ። 

     ³ጻድቃን   ግና   ይሕጐሱ፡

ኣብ   ቅድሚ   ኣምላኽ   ደስ   ይብሎም፡

ባህ   ኢልዎም   ድማ   እልል   ይብሉ። 

⁴ንኣምላኽ   ቃንዩሉ፡   ንስሙ   ኣመስግኑ፡

ነቲ   ብበረኻ   ዝሓልፍ   መገዲ   ጽረጉሉ፡

ስሙ   እግዚኣብሄር   እዩ።   ኣብ   ቅድሚኡ   ደስ   በሉ። 

⁵ኣምላኽ   ኣብ   ቅድስቲ   ማሕደሩ   ዀይኑ፡

ኣቦ   ዘኽታማትን   ጠበቓ   መበለታትን   እዩ። 

⁶ኣምላኽ   ነቲ   በይኑ   ዝዀነ   ናብ   ስድራ   የእትዎ፡

ንእሱራት   ናብ   ራህዋ   የውጽኦም፡

ተጻረርቲ   ግና   ኣብ   ምድሪ   ኣጻምእ   ይነብሩ። 

     ⁷ዎ   ኣምላኽ፡   ቀቅድሚ   ህዝብኻ   ኽትወጽእ   ከሎኻ፡

ብበረኻ   ኽትሓልፍ   ከሎኻ    ሴላ

⁸ምድሪ   ኣንቀጥቀጠት፡

ሰማያት   ድማ   ኣብ   ቅድሚ   ኣምላኽ   ኣንጠብጠበ፡

ሲና   እኳ   ኣብ   ቅድሚ   እግዚኣብሄር

ኣምላኽ   እስራኤል   ኣንቀጥቀጠት። 

⁹ዎ   ኣምላኽ፡   ዝናም   ውህበትካ   ኣዝነምካ፡

ነታ   ዝሓመቐት   ርስትኻ   ኣደልደልካያ። 

¹⁰ህያዋንካ   ኣብኡ   ሓደሩ፡

ዎ   ኣምላኽ፡   ብለውሃትካ   ንመሳኺን   ኣዳሎኻሎም። 

¹¹እግዚኣብሄር   ቃሉ   ይህብ፡

እተን   ሓጐስ   ዘበስራ   ዓብዪ   ጭፍራ   እየን። 

     ¹²ናይ   ሰራዊት   ነገስታት   ይሃድሙ፡ይሃድሙ፡

ኣብ   ገዛ   ዝወዓለትውን   ምርኮ   ትማቐል። 

¹³ኣብ   ማእከል   መጓሰ   እንተ   ሓደርኩም፡

ከም   ኣኽናፍ   ርግቢ   ብብሩር፡

ክንቲታውን   ብዘንጸባርቕ   ወርቂ   እተለበጠ   ትዀኑ። 

¹⁴እቲ   ዅሉ   ዝኽእል   ንነገስታት   ምስ   በተኖም፡

ኣብ   ሰልሞን   በረድ   ዘነመ። 

¹⁵ከረን   ባሳን   ናይ   ኣምላኽ   ከረን   እዩ፡

ከረን   ባሳን   ኣርእስቱ   ዝብዙሕ   ከረን   እዩ። 

¹⁶ኣቱም   ብዙሕ   ዘርእስትኩም   ኣኽራን፡

ነቲ   ኣምላኽ   ንማሕደሩ   ክዅኖ   እተመነዮ   ኸረን  

ስለምንታይ   ኢኹም   ቀኒእኩም   እትጥምትዎ፧  

እወ፡   እግዚኣብሄር   ንዘለኣለም   ኣብኡ   ኽነብር   እዩ። 

     ¹⁷ሰረገላታት   ኣምላኽ   ክልተ   እልፊ፡

ኣሽሓት   ግዜ   ኣሽሓት   እዩ።  

እግዚኣብሄር   ኣብ   ሲና፡

ኣብ   መቕደሱ፡   ኣብ   ማእከሎም   እዩ። 

¹⁸ናብ   ላዕሊ   ደየብካ፡   ምርኮ   ማረኽካ፡

ኣብ   እግዚኣብሄር   ኣምላኽ   ክነብሩስ፡

ካብ   ሰብ፡   ካብቶም   ተጻረርቲ   እኳ   ውህበት   ተቐበልካ። 

¹⁹እግዚኣብሄር   ይባረኽ፡

ነንመዓልቲ   ጾርና   ይጸውር   ኣሎ፡

ንሱ   ኣምላኽ   ምድሓንና   እዩ።    ሴላ።

     ²⁰ኣምላኽሲ   ንኣና   ኣምላኽ   ምንጋፍ   እዩ፡

ካብ   ሞት   ምውጻእ   ድማ   ናይ   እግዚኣብሄር   ኣምላኽ   እዩ። 

²¹ኣምላኽ   ግና   ርእሲ   ጸላእቱ፡

ኤረ   ነቲ   ብበደሉ   ዝመላለስ   ጐታን፡

መንበስበስታኡ   ኽጭፍልቖ   እዩ። 

^22-23እግዚኣብሄር፡   ኣእጋርካ   ኣብ   ደም   ክረግጻ፡

መልሓስ   ኣኽላባትካ   ኸኣ   ካብ   ጸላኢ   ግዲኡ   ኽረክብሲ፡

ካብ   ባሳን   ክመልሶም፡

ካብ   መዓሙቑ   ባሕሪ   ኽመልሶም   እየ፡   በለ። 

²⁴ዎ   ኣምላኽ፡   ኡደትካ፡   ናይ   ኣምላኸይ፡

ናይ   ንጉሰይ   ኡደት   ናብ   መቕደስ   ረኣዩ። 

²⁵ቅድም   ዘመርቲ፡   ደሓር   ቃነይቲ   በገና   ሰዓቡ፡

ከበሮ   ዝወቕዓ   ደናግል   ኣብ   ማእከል   ነበራ። 

     ²⁶ኣቱም   ካብ   ዓይኒ   ማይ   እስራኤል   ዝዀንኩም፡

ንእግዚኣብሄር   ኣምላኽ   ኣብ   ማሕበራት   ኣመስግንዎ። 

²⁷ኣብኡ   ብንያም፡   እቲ   ምንኣስ   ኵሎም፡   ገዛኢኦም፡

መሳንፍቲ   ይሁዳን   ጭፍራኦምን፡

መሳፍንቲ   ዛብሎን፡   መሳፍንቲ   ንፍታሌም   ኣለዉ። 

²⁸ኣምላኽካ   ንሓይልኻ   ኣዘዞ፡

ዎ   ኣምላኽ፡   ነቲ   ዝገበርካልና   ኣጽንዓዮ። 

²⁹ስለ   ቤት   መቕደስካ   ኣብ   የሩሳሌም  

ነገስታት   ውህበት   ከምጽኡልካ   እዮም። 

     ³⁰ብሩሮም   ጾይሮም   ምእንቲ   ኽመጹኻ፡

ንኣራዊት   ሰልሰላ፡

ንኣኼባ   ኣብዑር   ምስ   ምራኹት   ኣህዛብ   ገስጾም።  

ነቶም   ብውግእ   ዝሕጐሱ   ኣህዛብ   ፋሕ   ኣብሎም። 

³¹መሳፍንቲ   ኻብ   ግብጺ   ኽመጹ   እዮም፡

ኢትዮጵያ   ቐልጢፋ  

ኣእዳዋ   ናብ   ኣምላኽ   ክትዝርግሕ   እያ። 

^32-33አቱም   መንግስትታት   ምድሪ፡

ነቲ   ኣብ   ልዕሊ   ናይ   ጥንቲ   ሰማየ   ሰማያት  

ዝኸይድ   ኣምላኽ   ዘምሩ፡

   ንእግዚኣብሄር   ዘምሩሉ፡

እንሆ፡   ንሱ   ንድምጹ፡

ነቲ   ብርቱዕ   ድምጹ፡   የስምዕ   ኣሎ።     ሴላ

³⁴ንኣምላኽ   ምልኪ   ሃቡ፡

ግርማኡ   ኣብ   ልዕሊ   እስራኤል፡

ምልኩ   ኣብ   ደበናታት   እዩ። 

³⁵ዎ   ኣምላኽ፡   ካብ   መቕደስካ   እተፍርህ   ኢኻ።  

ንህዝቡ   ሓይልን   ስልጣንን   ዝህብ  

ኣምላኽ   እስራኤል   እዩ።ኣምላኽ   ይባረኽ።

ዝ/መዛ.   ብ/ኪ   ሓ/ኪ

       መበል 69 መዝሙር።            

ንሊቀ   መዘምራን፡   ብሾሻኒም፡   ናይ   ዳዊት።

     ¹ማያት   ክሳዕ   ነፍሰይ   በጺሑ   እዩ   እሞ፡

ዎ   ኣምላኽ፡   ኣድሕነኒ። 

²ናብቲ   መርገጺ   ዘይብሉ   ዓሚቑ   ሰልሚ   ሰጢመ፡

ኣብ   ጥልቂ   ማያት   ኣትየ፡   ማዕበላት   ከኣ   የጥሕለኒ   ኣሎ። 

³ብምእዋየይ   ደኺመ፡   ጐረሮይ   ነቒጹ፡

ኣዒንተይ   ንኣምላኸይ   ብምጽባይ   ፈዚዘን። 

     ⁴ብኸንቱ   ዝጸልኡኒ   ኻብ   ጸጒሪ   ርእሰይ   ይበዝሑ፡

ብዘይ   ምኽንያት   ከጥፍኡኒ   ዝደልዩ   ጸላእተይ  

ሓያላት   እዮም፡

ኤረ   ዘይከተርክዎ   ኽመልስ   እኳ   ግዲ   ዀነኒ። 

⁵ዎ   ኣምላኽ፡   ንስኻ   ዕሽነተይ   ትፈልጥ   ኢኻ፡

በደለይውን   ካባኻ   ኣይተሓብአን። 

^6-7ኣታ   እግዚኣብሄር   ጐይታ   ሰራዊት፡

ስሌኻ   ጸርፊ   እጸውር   ኣሎኹ።  

ነውሪ   ንገጸይ   ኣጐልቢብዎ   እዩ   እሞ፡

እቶም   ዝጽበዩኻ   ብኣይ   ኣይሕፈሩ፡

ኣታ   ኣምላኽ   እስራኤል፡

እቶም   ዝደልዩኻ   ብኣኻ   ኣይነውሩ። 

^8-9ቅንኣት   ቤትካ   በሊዑኒ፡

ጸርፊ   እቶም   ዝጸርፉኻውን   ኣባይ   ወዲቑ   እዩ   እሞ፡

ነሕዋተይ   ጓና፡   ንውሉድ   ኣደይውን   ጋሻ   ዀንኩ። 

     ¹⁰እናበኸኹ   ንነፍሰይ   ብጾም   ምስ   ኣሕሳእክዋ፡

እዚ   መጽረፊ   ዀነኒ። 

¹¹ክዳን   ሓዘን   ምስ   ለበስኩ፡   መመሰሊ   ዀንክዎም። 

¹²ኣብ   ደገ   ዝቕመጡ   ብዛዕባይ   ይዛራረቡ፡

ሰካራት   ብኣይ   ይጭፍሩ። 

     ¹³ኣታ   እግዚኣብሄር፡   ብቕብልቲ   ግዜ   ግና

ጸሎተይ   ናባኻ   እዩ፡

ዎ   ኣምላኽ፡   ብብዝሒ   ምሕረትካ፡

ብሓቂ   ምድሓንካ   ምለሰለይ። 

¹⁴ከይሰጥምሲ   ኻብ   ሰልሚ   ኣውጽኣኒ፡

ካብ   ጸላእተይን   ካብ   ጥልቂ   ማያትን   ኣናግፈኒ። 

¹⁵ማዕበላት   ማይ   ኣየጥሕለኒ፡

መዓሙቑ   ድማ   ኣይውሓጠኒ፡

ጕድጓድውን   ኣብ   ልዕለይ   ኣፋ   ኣይትዕጾ። 

¹⁶ጐይታየ፡   ሳህልኻ   ሰናይ   እዩ   እሞ፡   ምለሰለይ፡

ከም   ዕቤት   ምሕረትካ   ተመለሰኒ። 

¹⁷ጸቢቡኒ   እዩ   እሞ፡   ንባርያኻ   ገጽካ   ኣይትኸውለሉ፡

ቀልጢፍካ   ምለሰለይ። 

     ¹⁸ክትብጀዋስ   ናብ   ነፍሰይ   ቅረብ፡

ምእንቲ   ጸላእተይ   ኢልካ   ኣናግፈኒ። 

¹⁹ንስኻ   ጸርፈይን   ነውረይን   ሕፍረተይን   ትፈልጦ   ኢኻ፡

ኵሎም   ተጻረርተይ   ኣብ   ቅድሜኻ   ኣለዉ። 

²⁰ንልበይ   ጸርፊ   ቐጥቂጥዎ   ደኸምኩ፡

ዝድንግጸለይ   ተጸበኹ፡   ሓደ   እኳ   ኣይነበረን፡

ዘጸናንዑኒ   ደልየውን፡   ሰኣንኩ። 

²¹ኣብ   መብልዐይ   ሓሞት   ገበሩ።  

ንጽምአይውን   መጺጽ   ኣስተዩኒ። 

     ²²መኣዶም   ኣብ   ቅድሚኦም   መፈንጠራ   ይኹኖም፡

ደሓን   ኢና   ኽብሉ   ኸለዉ፡   መጻወድያ   ይኹኖም። 

²³ኣዒንቶም   ከይርእያ   ይጸልምታ፡

ንሓቛቑኦምውን   ኵሉ   ግዜ   ኣንቀጥቅጦ። 

²⁴መዓትካ   ኣፍስሰሎም፡   ረስኒ   ቑጥዓኻውን   የርክቦም።  

²⁵ማሕደሪኦም   ይዕኖ፡

ኣብ   ድንኳናቶም   ዝነብር   ሓደ   እኳ   ኣይረኸብ። 

²⁶ነቲ   ዝወቓዕካዮ   ይሰጕዎ፡

ናይቶም   ዘቑሰልካዮም   ቃንዛ   የዘንትውዎ   ኣለዉ   እሞ፡ 

²⁷ኣብ   ርእሲ   ዓገቦም   ዓገብ   ወስኮም፡

ናብ   ጽድቅኻውን   ኣይእተዉ። 

²⁸ካብ   መጽሓፍ   ህይወት   ይደምሰሱ፡

ምስ   ጻድቃን   ድማ   ኣይጸሓፉ። 

     ²⁹ኣነ   ግና   መስኪንን   ምግዱርን   እየ፡

ዎ   ኣምላኽ፡   ምድሓንካ   ልዕል   የብለኒ። 

³⁰ንስም   ኣምላኽ   ብመዝሙር   ከመስግኖ፡

ብምምሳው   ከኣ   ልዕል   ከብሎ   እየ። 

³¹እዚ   ንእግዚኣብሄር   ካብ   ዝራብዕ፡

ካብ   ቀርንን   ጽፍርን   ዘለዎ   ተፊንቲ   ባህ   ከብሎ   እዩ። 

^32-33እግዚኣብሄር   ንድኻታት   ይሰምዖም፡

ንእሱራትውን   ኣይንዕቕን   እዩ   እሞ፡

ትሑታት   ነዚ   ርእዮም   ይሕጐሱ፡

ኣቱም   ንኣምላኽ   እትደልይዎ፡

ልብኹም   ብህይወት   ይንበር። 

³³ሰማይን   ምድርን   ባሕርን፡

ኣብኡ   ዝዋሳወስ   ኵሉን   ንእኡ   የመስግንዎ። 

     ³⁴ኣምላኽ   ንጽዮን   ከድሕና፡

ንኸተማታት   ይሁዳውን   ክሃንጸን   እዩ   እሞ፡

ኣብአን   ክነብሩን   ክርስተዩን፡ 

³⁵ዘርኢ   ባሮቱ   ኽወርስዋ፡

ስሙ   ዝፈትዉ   ኸኣ   ኣብኣ   ኽነብሩ   እዮም።

ዝ/መዛ.   ብ/ኪ   ሓ/ኪ

       መበል 70 መዝሙር።            

ንሊቀ   መዘምራን፡   ናይ   ዳዊት፡   ንመዘከርታ።

     ¹ዎ   ኣምላኽ፡   ንምንጋፈይ፡

ዎ   እግዚኣብሄር፡   ንምርዳአይ   ቀልጥፍ። 

²እቶም   ንነፍሰይ   ዝደልይዋ   ይሕፈሩን   ይሕነኹን፡

እቶም   ሕሰም   ዝትምነዩለይ  

ንድሕሪት   ይመለሱን   ይነውሩን።

³ኣሰይ፡   ኣሰይ፡   ዝብሉኒ   ነዊሮም   ንድሕሪት   ይመለሱ። 

     ⁴እቶም   ዝደልዩኻ   ዅሎም  

ብኣኻ   ባህ   ይበሎምን   ይተሓጐሱን፡

እቶም   ምድሓንካ   ዝፈትዉ   ኸኣ   ኵሉ   ግዜ፡

ኣምላኽ   ልዕል   ይበል፡   ይበሉ። 

⁵ኣነ   ግና   መስኪንን   ድኻን   እየ፡

ዎ   ኣምላኽ፡   ናባይ   ፍጠን፡

ዎ   እግዚኣብሄር፡

ረዳእየይን   መናገፍየይን   ንስኻ   ኢኻ፡   ኣይትደንጒ።

ዝ/መዛ.   ብ/ኪ   ሓ/ኪ

       መበል 71 መዝሙር።             

     ¹ዎ   እግዚኣብሄር፡   ኣባኻ   እውከል   ኣሎኹ፡

ከቶ   ኣይተሕፍረኒ። 

²ብጽድቅኻ   ኣናግፈንን   ባልሃንን፡

እዝንኻ   ናባይ   ኣድንን   እሞ   ኣድሕነኒ። 

³ኵሉ   ግዜ   ዝሃድመሉ   ኸውሒ   መሕደሪ   ኹነኒ፡

ከውሐይን   እምባይን   ንስኻ   ኢኻ   እሞ፡

ንምድሓነይ   ኣዘዝካ።

 ^4-5ዎ   እግዚኣብሄር   ኣምላኽ፡   ተስፋይን  

ካብ   ንእስነተይ   ጀሚርካ   እምንቶይን   ንስኻ   ኢኻ   እሞ፡

ዎ   ኣምላኸይ፡   ካብ   ኢድ   ረሲእ፡

ካብ   ኢድ   ዓመጸኛን   ገፋዕን   ኣናግፈኒ። 

⁶ካብ   ከርሲ   ወላዲተይ   ጀሚረ   ብኣኻ   ተደገፍኩ፡

ካብ   ማሕጸን   ወላዲተይ   ዝፈላለኻኒ   ንስኻ   ኢኻ፡

ምስጋናይ   ኵሉ   ግዜ   ንኣኻ   እዩ። 

     ⁷ንብዙሓት   መስተንከሪ   ዀንክዎም፡

ንስኻ   ግና   ብርቱዕ   መዕቈብየይ   ኢኻ። 

⁸ኣፈይ   ብምስጋናኻ፡

ኵሉ   መዓልቲ   ብኽብርኻ   ምልኣዮ። 

     ^9-10ጸላእተይ   ብዛዕባይ   ይዛረቡ፡

ንነፍሰይ   ዝጸናተውዋ   ኸኣ   ሓቢሮም   እናተማኸሩ፡

ኣምላኽ   ሓዲግዎ፡   መናገፊ   የብሉን፡

ስለዚ   ጐይኹም   ሓዝዎ፡   ይብሉ   ኣለዉ   እሞ፡

ብግዜ   እርግና   ኣይትደርብየኒ፡

ሓይለይ   ክውዳእ   ከሎ፡   ኣይትሕደገኒ። 

¹²ዎ   ኣምላኽ፡   ካባይ   ኣይትርሓቕ፡

ዎ   ኣምላኸይ፡   ንምርዳአይ   ፍጠን። 

     ¹³እቶም   ንነፍሰይ   ዝጻረርዋ   ይሕፈሩን   ይጥፍኡን፡

እቶም   ጕድኣተይ   ዝደልዩውን   ነውርን   ሓሳርን   ይከደኑ። 

¹⁴ኣነ   ግና   ኵሉ   ግዜ   ተስፋ   ኽገብር፡

ንዅሉ   ምስጋናኻውን   ክውስኸሉ   እየ። 

¹⁵ቁጽሩ   ኣይፈልጦን   እየ   እሞ፡

ኣፈይ   ጸድቅኻን   ምድሓንካን   ኵሉ   መዓልቲ   ኸዘንቱ   እዩ። 

¹⁶ናይ   እግዚኣብሄር   ኣምላኽ   ስልጡን   ግብርታት   ክነግር፡

ጽድቅኻ፡   ናትካ   ጥራይ   ክዝክር   እየ። 

¹⁷ዎ   ኣምላኽ፡   ካብ   ንእስነተይ   ጀሚርካ   መሃርካኒ፡

ክሳዕ   ሕጂውን   ተኣምራትካ   ኣወጅኩ። 

¹⁸ነዚ   ወለዶዚ   ቕልጽምካ፡

ነቲ   ዝመጽእውን   ስልጣንካ   ኽሳዕ   ዘበስሮምሲ፡

ዎ   ኣምላኽ፡   ብእርግናይ   ምስ   ሸየብኩ   እኳ   ኣይትሕደገኒ። 

     ¹⁹ዎ   ኣምላኽ፡   ጽድቅኻ   ኽሳዕ   ላዕሊ   ይበጽሕ፡

ኣታ፡   ዓበይቲ   ግብርታት   ዝገበርካ   ኣምላኽ፡   መን   ይመዓራረየካ፧ 

²⁰ኣታ፡   ብዙሕ   ጭንቀትን   መከራን   ዘርአኻና፡

   መሊስካ   ህይወት   ክትህበኒ፡

ከም   ብሓድሽ   ድማ   ካብ   መዓሙቑ   ምድሪ   ኸተውጽአኒ   ኢኻ። 

²¹ንዕቤተይ   ክትውስኸሉ፡

ብምጽንናዕ   ከኣ   ኽትከበኒ   ኢኻ። 

     ²²ኣምላኸየ፡   ኣነውን   ንኣኻ፡   ንሓቅኻ   ብበገና   ኸመስግን፡

ኣታ   ናይ   እስራኤል   ቅዱስ፡   ብመሰንቆ   ኽዝምረልካ   እየ። 

²³ከመስግነካ   ኸሎኹ፡   ከናፍረይን  

እታ   ዘድሓንካያ   ነፍሰይን   እልል   ክብላ   እየን። 

²⁴እቶም   ጕድኣተይ   ዝደልዩ   ሓፊሮምን   ነዊሮምን   እዮም   እሞ፡

መልሓሰይ   ምሉእ   መዓልቲ   ብዛዕባ   ጽድቅኻ   ኽትዛረብ   እያ።

ዝ/መዛ.   ብ/ኪ   ሓ/ኪ

       መበል 72 መዝሙር።            

ናይ   ሰሎሞን።

     ¹ዎ   ኣምላኽ፡   ንንጉስ   ፍርድኻ፡

ንወዲ   ንጉስውን   ጽድቅኻ   ሃቦም። 

²ንሱ   ኸኣ   ንህዝብኻ   ብጽድቂ፡

ንጥቑዓትካውን   ብቅንዕና   ኽፈርዶም   እዩ። 

³ኣኽራንን   ኰረቢትንሲ   ብጽድቂ  

ንህዝቢ   ሰላም   ከምጽኡሉ   እዮም። 

⁴ነቶም   ናይ   ህዝቢ   መሳኺን   ይብይነሎም፡

ንደቂ   ድኻታት   ከድሕኖም   እዩ፡

ንጠቓዕቲውን   ክድዕምኾም   እዩ። 

     ⁵ጸሓይን   ወርሕን   ክሳዕ   ዘለዋ፡

ንውሉድ   ወለዶ   ኽፈርሁኻ   እዮም። 

⁶ከም   ዝናም   ናብ   እተዓጽደ   ሸኻ፡

ከምቲ   ንምድሪ   ዘጥልል   ጥሚቕ   ኰይኑ   ይወርድ። 

⁷ብዘመኑ   እቲ   ጻድቕ   ክዕምብብ፡

ወርሒ   ኽሳዕ   እትጠፍእ   ከኣ   ብዝሒ   ሰላም   ክህሉ   እዩ።

⁸ካብ   ባሕሪ   ኽሳዕ   ባሕሪ፡

ካብ   ርባ   ኽሳዕ   ወሰን   ምድሪ   ኽመልኽ   እዩ። 

     ⁹ኣብ   በረኻ   ዝነብሩ   ኢድ   ክነስኡሉ፡

ጸላእቱውን   ሓመድ   ክልሕሱ   እዮም። 

¹⁰ነገስታት   ተርሴስን   ደሴታትን   ገጸ   በረኸት   ከቕርቡሉ፡

ነገስታት   ሸባን   ሳባን   ድማ   ውህበታት   ከምጽኡሉ   እዮም። 

¹¹ኵሎም   ነገስታት   ከኣ   ኣብ   ቅድሚኡ   ኽፍገሙ፡

ብዘለዉ   ኣህዛብ   ከገልግልዎ   እዮም። 

¹²ነቲ   ዝጠርዕ   ድኻን  

ነቲ   ረዳኢ   ዘይብሉ   መስኪንን   ከናግፎ   እዩ። 

¹³ንመሳኺንን   ንድኻታትን   ክድንግጸሎም፡

ንነፍሲ   ድኻታት   ከኣ   ከድሕን   እዩ። 

¹⁴ንነፍሶም   ካብ   ምጥቃዕን   ግፍዕን   ክብጀዋ  

ደሞም   ከኣ   ኣብ   ኣዒንቱ   ኽቡር   ክኸውን   እዩ   እሞ፡ 

¹⁵ብህይወት   ክነብር፡   ካብ   ወርቂ   ሸባ   ድማ   ክህብዎ፡

ኵሉ   ግዜውን   ናብኡ   ኽጽልዩ፡

ምሉእ   መዓልቲ   ኽባርኽዎ   እዮም። 

     ¹⁶ብዝሒ   እኽሊ   ኣብ   ሃገር፡

ኣብ   ርእሲ   ኣኽራን   ክኸውን፡

ፍሬኡ   ኸም   ኣእዋም   ሊባኖስ   ዘዘው   ክብል፡

ሰብ   ከተማውን   ከም   ሳዕሪ   ምድሪ   ኽዕምብቡ   እዮም። 

¹⁷ስሙ   ንዘለኣለም   ክነብር፡

ስሙ   ጸሓይ   ክሳዕ   ዘላ   ኽዝውተር   እዩ፡

ብእኡውን   ሰብ   ክባረኹ፡

ኵሎም   ኣህዛብ   ብጹእ   ክብልዎ   እዮም። 

     ¹⁸እቲ   በይኑ   ተአምራት   ዝገብር   እግዚኣብሄር   ኣምላኽ፡

እቲ   ናይ   እስራኤል   ኣምላኽ   ይባረኽ። 

¹⁹ክቡር   ስሙ   ንዘለኣለም   ይባረኽ፡

ብዘሎ   ምድሪውን   ብኽብሩ   ይምላእ።  

ኣሜን፡   ኣሜን።²⁰ጸሎት   ዳዊት   ወዲ   እሰይ   ተፈጸመ።