መዝሙር ዳዊት
ሳልሳይ መጽሓፍ  

73  74  75  76  77  78
79  80  81  82  83
84  85  86  87
88  89

ናብ ካልኣይ መጽሓፍ፥ 42 — 72
ናብ ቀዳማይ መጽሓፍ፥ 1 — 41
ናብ ራብዓይ መጽሓፍ፥ 90 — 106
ናብ ሓምሳይ መጽሓፍ፥ 107 — 150

ዝ/መዛ.   ብ/ኪ   ሓ/ኪ

       መበል 73 መዝሙር።            

ናይ   ኣሳፍ   መዝሙር።

     ¹ብሓቂ   ኣምላኽ   ንእስራኤል፡

ነቶም   ንጹህ   ልቢ   ዘለዎም   ሰናይ   እዩ። 

     ²ኣነ   ግና   ኣእጋረይ   ሰንከልከል   ንምባል፡

ስጕምተይ   ንምንድልሃጽ   ቀሪበ   ነበርኩ። 

³ራህዋ   ረሲኣን   ምስ   ርኤኹ፡   ንደፋራት   ቀናእኩሎም፡ 

⁴ክሳዕ   ሞቶም   ስቓይ   የብሎምን፡

ስጋኦምውን   ስቡሕ   እዩ   እሞ፡ 

⁵ጸገማ   መወትቲ   የብሎምን፡

ከም   ሰብውን   ኣይተሰቀዩን። 

⁶ስለዚ   ትዕቢት   ከም   ስልማት   ክሳድ   ይኸቦም፡

ግፍዒ   ኸም   ክዳን   ይጕልብቦም። 

⁷ኣዒንቶም   ካብ   ስብሒ   ይወጻ፡

ሓሳባት   ልቦም   ይግንፍል። 

⁸የላግጹ፡   ብኽፍኣቶም   ግፍዒ   ይዛረቡ፡

ካብ   ላዕሊ   ይዛረቡ   ኣለዉ። 

⁹ኣፎም   ናብ   ሰማይ   የልዕሉ፡

መልሓሶም   ከኣ   ኣብ   ምድሪ   ይመላለስ። 

     ¹⁰ስለዚ   ህዝቡ   ናብዚ   ይምለስ፡

ካብኦምውን   ብዙሕ   ማይ   ይሰቲ። 

¹¹ኣምላኽ   ከመይ   ገይሩ   ይፈልጥ፧  

ልዑልከ   ፍልጠትዶ   ኣለዎ   እዩ፧   ይብሉ   ኣለዉ። 

¹²እንሆ፡   ረሲኣን   እዚኣቶም   እዮም፡

ኵሉ   ግዜ   ሃዲኦም፡   ሃብቲ   ይውስኹ   ኣለዉ። 

     ^13-14ምሉእ   መዓልቲ   ተሰቅየ፡

ንግሆ   ንግሆውን   ተቐጺዐ   እየ   እሞ፡

እምበኣርሲ   ንልበይ   ብኸንቱ   ኣንጺሀ፡

ኣእዳወይውን   ብንጽህና   ሓጺበ። 

¹⁵ከምኦም   ክዛረብ   እየ፡   ኢለ   እንተ   ዝኸውንሲ፡

ንወለዶ   ውሉድካ   ምጠለምኩ   ነይረ። 

^16-17ነዚ   ኸስተውዕል   ምስ   ሓሰብኩ፡

ናብ   መቕደስ   ኣምላኽ   ክሳዕ   ዝኣቱ፡

መወዳእታኦምውን   ክሳዕ   ዘስተብህልሲ፡

ኣዝዩ   ይሽግረኒ   ነበረ። 

¹⁸ብርግጽ   ኣብ   መንደልሃጺ   ስፍራ   ደው   ተብሎም፡

ናብ   ጥፍኣት   ተውድቖም። 

¹⁹ከመይከ   ብድንገት   ባደሙ፡

ጸነቱ፡   ብስምባድውን   ተወድኡ። 

²⁰ከም   ሕልሚ   ድሕሪ   ምንቃሕ፡

ንስኻ፡   ዎ   እግዚኣብሄር፡   ምስ   ነቓሕካ፡

ንምስሎም   ከምኡ   ኽትንዕቖ   ኢኻ። 

²¹ልበይ   ምስ   መረረ፡   ኣብ   ኰላሊተይ   ምስ   ተወጋእኩ፡ 

²²ዓሾኹ፡   ደንቈሮውን   ነበርኩ፡

ኣብ   ቅድሜኻ   ኸም   እንስሳ   ዀንኩ። 

     ²³ግናኸ   ኣነ   ዅሉ   ግዜ   ምሳኻ   እየ፡

ንስኻ   ብየማነይቲ   ኢደይ   ሒዝካኒ፡ 

²⁴ብምኽርኻ   ኽትመርሓኒ፡

   ድሓርውን   ናብ   ክብሪ   ኽትቅበለኒ   ኢኻ። 

²⁵ኣብ   ሰማይ   ብጀካኻ   መን   ኣሎኒ፧  

ንኣኻ   ካብ   ረኸብኩስ፡   ኣብ   ምድሪ   ዝደልዮ   የብለይን። 

²⁶ስጋይን   ልበይን   እንተ   ማህመነ   እኳ፡

ኣምላኽ   ንዘለኣለም   ከውሒ   ልበይን   ክፍለይን   እዩ። 

     ²⁷እንሆ፡   ካባኻ   ዝርሕቁ   ኽጠፍኡ   እዮም   እሞ፡

ካባኻ   ብምንዝርና   ዝዓልዉ   ዘበሉ   ተጽንቶም። 

²⁸ንኣይ   ግና   ናብ   ኣምላኽ   ምቕራብ   ይሕሸኒ፡

ኵሉ   ተግባርካ   ምእንቲ   ኸዘንቱስ፡

እሙንቶይ   ናብ   እግዚኣብሄር   ኣምላኽ   ገበርኩ።

ዝ/መዛ.   ብ/ኪ   ሓ/ኪ

       መበል 74 መዝሙር።            

ናይ   ኣሳፍ   መስኪል።

     ¹ዎ   ኣምላኽ፡   ስለምንታይ   ንሓዋሩ   ደርቤኻና፧

ንምንታይከ   ነድርኻ   ኣብ   ኣባጊዕ   መጓሴኻ   ይተክኽ፧

 ²ነታ   ኻብ   ጥንቲ   ዘጥሬኻያ፡

ዓሌት   ርስትኻ   ኽትከውን   እተበጆኻያ   ማሕበር፡

ነታ   ዝሓደርካያ   ኸረን   ጽዮን   ዘክር። 

³ኣእጋርካ   ናብታ   ናይ   ዘለአለም   ዑና   አልዕል፡

እቲ   ጸላኢ   ኣብ   መቕደስ   ንዅሉ   ኣበላሽይዎ   ኣሎ።

 ⁴ተጻረርትኻ   ኣብ   ማእከል   ማሕበርካ   ጨዲሮም፡

ንምልክቶም   ምልክት   ገይሮም   ኣቘምዎ።

      ⁵ከምቶም   ማሕጸ   ኣብ   ብርቱዕ   ዱር   ዜልዕሉ   ሰብ   ይመስሉ።

⁶ንብዘሎ   ቕርጺ   ህንጻታቱ  

ብማሕጸን   ብመዶሻን   ገይሮም   ኣድቂቖምዎ። 

⁷ንመቕደስካ   ብሓዊ   ኣንዲዶምዋ፡

ንማሕደር   ስምካ   ኽሳዕ   መሰረታ   ኣርኪሶምዋ   እዮም። 

⁸ብልቦም፡   ሐቢርና   ነጥፍኣዮም፡   በሉ፡

ንዅለን   ኣብታ   ሃገር   ዘለዋ  

ኣባይቲ   ማሕበር   ኣምላኽ   ኣንዲዶምወን። 

⁹ምልክትና   ኣይንርእን፡   ነብዪ   የሎን፡

ክሳዕ   መአዝ   ምዃኑ   ዚፈልጥ   የብልናን። 

     ¹⁰ዎ   ኣምላኽ፡   እቲ   ተጻራሪ   ኽሳዕ   መኣዝ   ኪጸርፍ፧

ጸላእስ   ንሓዋሩ   ስምካ   ኺንዕቕ   እዩ፧ 

¹¹ስለምንታይ   ኢድካ፡   ነታ   የማነይቲኻ፡   ንድሕሪት   እትመልሳ፧  

ካብ   ትሽትሽካ   ኣውጺእካ   ኣጥፍኣዮም። 

¹²ግናኸ   እቲ   ኣብ   ማእከል   ምድሪ  

ግብርታት   ምድሓን   ዚገብር   ዘሎ   ኣምላኽ

   ካብ   ጥንቲ   ንጉሰይ   እዩ። 

¹³ንስኻ   ንባሕሪ   ብሓይልኻ   መቐልካዮ፡

ኣራእስ   ገበላት   ኣብ   ማያት   ጨፍለቕካ። 

¹⁴ኣርእስቲ   ሌዋታን   ቀጥቂጥካ፡

ነቶም   ኣብ   በረኻ   ዚነብሩ፡   ምግቢ   ኪዀኖም፡   ሀብካዮም። 

¹⁵ዓይኒ   ማያትን   ምንጭን   ኣፈልፈልካ፡

ነቲ   ዅሉ   ግዜ   ዚውሕዝ   ርባታት   ኣንቀጽካዮ። 

¹⁶መዓልቲ   ናትካ   እያ፡   ለይቲውን   ናትካ   እያ፡

ንብርሃንን   ጸሓይን   ገበርካየን። 

¹⁷ንብዘሎ   ወሰናት   ምድሪ   ንስኻ   ኣጽናዕካዮ፡

ንሓጋይን   ክረምትን   ፈጠርካዮም።

      ¹⁸ጸላኢ   ንእግዚኣብሄር   ከም   ዝጸርፎ፡

ዓሻ   ህዝቢውን   ንስምካ   ከም   ዝነዐቖ   ዘክር። 

¹⁹ነፍሲ   ባሬቶኻ   ንኣራዊት   ኣይትሀብ፡

ህይወት   መሳኺንካ   ንሓዋሩ   ኣይትረስዕ። 

²⁰እቲ   ዘጸልመተ   ቦታታት   ምድሪ  

ብማሕደር   ግፍዒ   መሊኡ   ኣሎ   እሞ፡   ኪዳንካ   ጠምት። 

²¹እቲ   ጥቑዕ   ሐፊሩ   ኣይመለስ፡

መስኪንን   ድኻን   ስምካ   ይባርኹ። 

     ²²ዎ   ኣምላኽ፡   ተንስእ፡   ነገርካ   ግበር፡

ዓሻ   ጽርፍ   ከም   ዚውዕለካ   ዘክር። 

²³ድምጺ   ተጻረርትኻ   ኣይትረስዕ፡

ጭድርታ   እቶም   ዓለውትኻ   ዅሉ   ግዜ   ይለዐል   ኣሎ።

ዝ/መዛ.   ብ/ኪ   ሓ/ኪ

       መበል 75 መዝሙር።            

ንሊቀ   መዘምራን፡   ብኣልተስሄት፡   ናይ   ኣሳፍ   መዝሙር   ምስጋና።

     ¹ነመስግነካ፡   ዎ   ኣምላኽ፡   ነመስግነካ   ኣሎና፡

ስምካ   ቐረባ   እዩ፡   ሰብ   ንተኣምራትካ   የዘንትውዎ።

²ነቲ   ምዱብ   ግዜ   ምስ   ረኸብክዎ፡   ቅኑዕ   ክፈርድ   እየ። 

³ምድርን   ኣብኣ   ዝነብሩ   ዅሎምን   መኸኹ።  

ኣነ   ነዕኑዳ   ኣጽናዕኩ።    ሴላ።

     ⁴ነቶም   ደፋራት፡   ኣይትድፈሩ፡

ንረሲኣንውን፡   ቀርንኹም   ኣይተልዕሉ፡   በልክዎም። 

⁵ቀርንኹም   ንላዕሊ   ኣይተልዕሉ፡

ክሳድኩም   ኣትሪርኩም   ኣይትዛረቡ። 

⁶ካብ   ምብራቕ   ወይ   ካብ   ምዕራብ፡

ወይስ   ካብ   በረኻ   ኣይኰነን   ልዕልና   ዝመጽእ፡ 

⁷ኣምላኽ   ደኣ   እዩ   ፈራዲ፡   ነዚ   የውርድ፡   ነቲ   ልዕል   የብል። 

     ⁸ኣብ   ኢድ   እግዚኣብሄር   ዓፈርፈር   ዝብል፡

እተሓዋወሰ   ወይኒ   ዝመልአ   ጽዋእ   ኣሎ   እሞ፡

ካብኡ   ቐዲሑ   ይዕድል፡   ብሓቂ፡

ኵሎም   ረሲኣን   ምድሪ   ንሓተላኡ   ኽጭልጥዎ   እዮም። 

⁹ኣነ   ግና   ንዘለኣለም   እዚ   ኸዘንቱ፡

ንኣምላኽ   ያእቆብ   ምስጋና   ኽዝምረሉ፡ 

¹⁰ንብዘሎ   ኣቕርንቲ   ረሲኣንውን   ክጕልዕሞ   እየ፡

ኣቕርንቲ   ጻድቃን   ግና   ልዕል   ክብል   እዩ።

ዝ/መዛ.   ብ/ኪ   ሓ/ኪ

       መበል 76 መዝሙር።            

ንሊቀ   መዘምራን፡   ብኣልተስሄት፡   ናይ   ኣሳፍ   መዝሙር   ምስጋና።

     ¹ኣምላኽ   ኣብ   ይሁዳ   ፍሉጥ   እዩ፡

ስሙ   ኣብ   እስራኤል   ዓብዪ   እዩ። 

²ድንኳኑ   ኣብ   ሳሌም፡   ማሕደሪኡውን   ኣብ   ጽዮን   እዩ። 

³ኣብኡ   ናይ   ቀስቲ   ፍላጻ፡

ዋልታን   ሰይፍን   መሳርያ   ውግእን   ሰባበረ።    ሴላ። 

     ⁴ንስኻ   ኻብ   ኣኽራን   መንጠልቲ   ዚበልጽ  

ብሩህን   ክቡርን   ኢኻ። 

⁵እቶም   ተባዓት   ልቢ   ተገፉ፡   ድቃሶም   ደቀሱ፡

ኵላቶም   ጀጋኑውን   ኣእዳዎም   ኣይረኸቡን። 

⁶ዎ   ኣምላኽ   ያእቆብ፡   ብተግሳጽካ  

ሰረገላታትን   ኣፍራስን   ድቃስ   ከቢድዎም   ዛሕ   በሉ። 

⁷ንስኻ   ግና   እተፈራህካ   ኢኻ፡

ክትቍጣዕ   ከሎኻኸ፡

ኣብ   ቅድሜኻ   መን   ደው   ኪብል   ይኽእል፧ 

^8-9ፍርድኻ   ኻብ   ሰማይ   ኣስማዕካ፡

ኣምላኽ   ንዅሎም   ትሑታት   ምድሪ   ምእንቲ   ኼድሕን  

ንፍርዲ   ምስ   ተንስኤ፡

ምድሪ   ፈርሄት   ስቕውን   በለት።       ሴላ።

     ¹⁰ኵራ   ሰብ   ኬመስግነካ   እዩ   እሞ፡

ትርፊ   ዅራ   ኽትዕጠቕ   ኢኻ። 

¹¹ንእግዚኣብሄር፡   ንአምላኽኩም፡   ተመባጽዑሉ   ፈጽምዎ   ኸኣ።  

ኣቱም   ኣብ   ዙርያኡ   ዘሎኹም   ኵሉኹም፡

ገጸ   በረኸት   ነቲ   ዜፍርህ   ኣቕርቡሉ። 

¹²ንሱ   ንመንፈስ   መሳፍንቲ   ኺዐጽዶ   እዩ፡

ንነገስታት   ምድሪ   ዜፍርህ   እዩ።

ዝ/መዛ.   ብ/ኪ   ሓ/ኪ

       መበል 77 መዝሙር።            

ንሊቀ   መዘምራን፡   ንየዱቱን፡   ናይ   ኣሳፍ   መዝሙር።

     ¹ድምጸይ   ናብ   ኣምላኽ   ኣልዒለ   ኤእዊ፡

ድምጸይ   ናብ   ኣምላኽ   ኤልዕል   ኣሎኹ፡

ንሱውን   ይሰምዓኒ   እዩ። 

²ብመዓልቲ   ጸበባይ   ንእግዚኣብሄር   ደሌኽዎ፡

ብለይቲ   ኢደይ   ተዘርግሐት   ኣይሰልከየትን   ከኣ፡

ነፍሰይ   ምጽንናዕ   ኣበየት። 

³ንአምላኽ   እዝክሮን   እቑዝምን   ኣሎኹ፡

ኤስተንትንን   መንፈሰይ   ከኣ   ይሕለልን   ኣሎ።    ሴላ።

     ⁴ነዒንተይ   ቈላሕላሕ   ተብለን፡

እሽገር   ምዝራብውን   እስእን   ኣሎኹ። 

⁵ናይ   ቀደም   መዓልትታት፡

ናይ   ጥንቲ   ዓመታት   እዝክር   ኣሎኹ። 

⁶ብለይቲ   ንበገናይ   እሓስብ፡

ምስ   ልበይ   ኤስተንትን   ኣሎኹ፡

መንፈሰይውን   ይምርምር   ኣሎ፡

⁷እግዚኣብሄርሲ   ንዘለኣለምዶ   ይድርቢ፧  

ድሕርዚኸ   ጸጋኡዶ   ኣየርእን   እዩ፧ 

⁸ጸጋኡስ   ንዘለኣለምዶ   ፈጺሙ   ተወዲኡ፧  

ተስፋኡኸ   ንውሉድ   ወለዶዶ   ተሪፉ   እዩ፧ 

⁹ኣምላኽሲ   ሳህሉዶ   ርሲዕዎ፧  

ንምሕረቱስ   ብዅራዶ   ዐጽይዎ   እዩ፧    ሴላ።

     ¹⁰ኣነ   በልኩ፡   እዚ   እዩ   ድኻመይ፡

ዓመታት   የማነይቲ   እቲ   ልዑል   እዝክር   ኣሎኹ። 

¹¹ናይ   ቀደም   ተአምራትካ   ኽሐስብ   እየ   እሞ፡

ንግብርታት   እግዚኣብሄር   ክዝክሮ   እየ፡ 

¹²ንብዘሎ   ግብርታትካ   ድማ   ከስተንትኖ፡

ንዕዮኻውን   ክምርምሮ   እየ። 

¹³ዎ   ኣምላኽ፡   መገድኻ   ብቕድስና   እዩ፡

ከም   ኣምላኽ   ዝበለ   ዓብዪ   ኣምላኽከ   መን   ኣሎ፧ 

¹⁴ተአምራት   እትገብር   ኣምላኽ   ንስኻ   ኢኻ፡

ንሓይልኻ   ኣብ   ማእከል   ኣህዛብ   ኣፍለጥካዮ። 

¹⁵ንህዝብኻ፡   ንውሉድ   ያእቆብን   ዮሴፍን፡

ብቕልጽምካ   ተበጆኻዮ።    ሴላ።

     ¹⁶ዎ   ኣምላኽ፡   ማያት   ረአዩኻ፡

ማያት   ረኣዩኻ፡   ተሸበሩውን፡

እወ፡   መዓሙቑ   ተናወጸ። 

¹⁷ደበናታት   ብርቱዕ   ማያት   ኣፍሰሰ፡

ጠፈር   ድምጹ   ኣስምዐ፡   ፍላጻታትካውን   ተወረወረ። 

¹⁸ድምጺ   ነጐድጓድካ   ኣብ   ህቦብላ   ነበረ፡

መባርቕ   ንዓለም   ኣብርሃ፡   ምድሪ   ተናወጸት   ኣንቀጥቀጠትውን። 

¹⁹ጐደናኻ   ኣብ   ባሕሪ፡   መገድታትካ   ኣብ   ዓበይቲ   ማያት   እዩ፡

ኣሰርካውን   ኣይተፈልጠን። 

²⁰ንህዝብኻ   ኸም   መጓሰ  

ብኢድ   ሙሴን   ኣሮንን   ጌርካ   መራሕካዮ።

ዝ/መዛ.   ብ/ኪ   ሓ/ኪ

       መበል 78 መዝሙር።            

ናይ   ኣሳፍ   መዝሙር   መስኪል።

     ¹ዎ   ህዝበይ፡   ንሕገይ   ጽን   በሎ፡

ኣእዛንካ   ናብ   ቃላት   ኣፈይ   ኣድንን። 

²ኣፈይ   ብምስላ   እኸፍት፡

ናይ   ቀደም   ምስጢራት   እነግር   ኣሎኹ፡

 ³እቲ   ዝሰምዕናዮን   ዝፈለጥናዮን፡

ኣቦታትናውን   ዘዘንተዉልና፡ 

⁴ካብ   ውሉዶም   ኣይንሓብኦን፡

ነቲ   ዝመጽእ   ወለዶስ   ምስጋና   እግዚኣብሄርን  

ስልጣኑን   እቲ   ዝገበሮ   ተአምራቱን   ደኣ   ንነግሮ። 

     ^5-8እቲ   ዝመጽእ   ወለዶ፡   እቶም   ዝውለዱ   ደቂ   ኽፈልጥዎ፡

ንሳቶም   ከኣ   ተንሲኦም   ንውሉዶም   ምእንቲ   ኸዘንትውዎስ፡

ተስፋኦም   ናብ   ኣምላኽ   ክገብሩ፡

ትእዛዛቱ   ኽሕልዉ   እምበር፡

ተግባር   ኣምላኽ   ምእንቲ   ኸይርስዑ፡

ከም   ኣቦታቶም፡   እቲ   ህልኸኛን   ዓለወኛን   ወለዶ፡

ከምቲ   ልቡ   ቀጥ   ዘይበለ፡

መንፈሱውን   ናብ   ኣምላኽ   ዘይተኣመነ   ወለዶ   ኸይኮኑስ፡

ኣብ   ያእቆብ   ምስክር   ኣጽንዐ፡

ኣብ   እስራኤል   ከኣ   ሕጊ   ኣቘመ፡

እዚውን   ንውሉዶም   ከፍልጥዎስ፡   ነቦታትና   ኣዘዞም። 

     ⁹ውሉድ   ኤፍሬም፡   ተዋጋእትን   ወርወርትን፡

ብመዓልቲ   ውግእ   ንድሕሪት   ተመልሱ። 

¹⁰ኪዳን   ኣምላኽ   ኣይሓለዉን፡

ብሕጉ   ምምልላስ   ከኣ   ኣበዩ፡ 

¹¹ንግብርታቱን   ነቲ   ዘርኣዮም   ተኣምራቱን   ረስዕዎ። 

¹²ኣብ   ቅድሚ   ኣቦታቶም   ኣብ   ምድሪ   ግብጺ፡

ኣብ   መሮር   ጾዓን፡   ተኣምራት   ገበረ። 

¹³ባሕሪ   መቒሉ   ኣሕለፎም፡   ንማይ   ከም   ኵምሪ   ኣቘሞ። 

¹⁴መዓልቲ   ብደበና፡

ምሉእ   ለይቲውን   ብብርሃን   ሓዊ   መርሖም። 

¹⁵ኣብ   በረኻ   ነኻውሕ   ጨደዶ፡

ከም   ካብ   ዓሚቑ   ባሕሪውን   ብዙሕ   ኣስተዮም። 

¹⁶ዓይኒ   ማያት   ካብ   ከውሒ   ኣውጽአ፡

ንማይ   ድማ   ከም   ውሒዝ   ኣውሓዞ። 

     ¹⁷ግናኸ   ኣብ   በረኻ   ነቲ   ልዑል   ተሃላሊኾም፡

እናቐጸሉ   በደልዎ። 

¹⁸ንትምኒቶም   ዝብላዕ   እናደለዩ፡

ብልቦም   ንኣምላኽ   ፈተንዎ። 

^19-20ንሳቶም፡   ኣምላኽሲ   ኣብ   በረኻ   ደዀን  

መአዲ   ኽሰርዕ   ይኽእል   እዩ፧  

እንሆ፡   ማይ   ክሳዕ   ዝፍልፍል፡

ውሒዝ   ክሳዕ   ዝውሕዝሲ፡   ንኸውሒ   ወቕዖ፡

ግናኸ   እንጌራውን   ክህብ፡

ወይስ   ንህዝቡ   ስጋ   ኽምህዝዶ   ይከኣሎ   እዩ፧  

ኢሎም   ንኣምላኽ   ሓመይዎ። 

^21-22ብኣምላኽ   ኣይኣመኑን፡

ብምድሓኑውን   ኣይተወከሉን   እዮም   እሞ፡

እግዚኣብሄር   እዚ   ሰሚዑ   ተቘጥዐ፡

ኣብ   ያእቆብ   ሓዊ   ነደደ፡   ኣብ   እስራኤልውን   ቁጥዓ   ወጸ። 

     ²³ግናኸ   ንሱስ   ኣብ   ላዕሊ   ንደበና   ኣዘዞ፡

መዓጹ   ሰማይ   ከኣ   ከፈተ፡ 

²⁴ምእንቲ   ኽበልዑ   ድማ   ማና   አዝነመሎም፡

እኽሊ   ሰማይውን   ሃቦም። 

²⁵ሰብ   ናይ   መላእኽቲ   እንጌራ   በልዐ፡

ንምሉእ   ጽጋብ   ዝኸውን   ምግቢ   ሰደደሎም። 

²⁶ንፋስ   ምብራቕ   ኣብ   ሰማይ   ኣለዓዓለ፡

ብስልጣኑ   ድማ   ንፋስ   ደቡብ   ኣምጽአ። 

²⁷ስጋ   ኣብ   ልዕሊኦም   ከም   ሓመድ፡

ነፈርቲ   ኣዕዋፍውን   ከም   ሑጻ   ባሕሪ   አዝነመሎም። 

²⁸ኣብ   ማእከል   ሰፈሮም፡

ኣብ   ዙርያ   ድንኳኖም   ኣውረደሎም። 

²⁹በልዑን   ኣዝዮም   ጸገቡን፡   ትምኒቶምውን   ሃቦም። 

³⁰ትምኒቶም   ገና   ኸይወድኡ፡

ብልዖምውን   ገና   ኣብ   ኣፎም   ከሎ፡

 ³¹መዓት   ኣምላኽ   ወረዶም፡

ካብ   ስቡሓቶም   ከኣ   ቀተለ፡

ነጕባዝ   እስራኤልውን   ኣውደቖም። 

     ³²ምስናይዚ   እዚ   ዅሉ   መሊሶም   በደሉ፡

ብተኣምራቱ   ኸኣ   ኣይኣመኑን። 

³³ስለዚ   ንመዓልትታቶም   ብኸንቱ፡

ንዓመታቶም   ከኣ   ብስምባድ   ኣሕለፈን። 

³⁴ክቐትሎም   ከሎ፡   ሽዑ   ይደልይዎ   ነበሩ፡

ተመሊሶም   ከኣ፡   ኣንጊሆም   ንኣምላኽ   ደለይዎ። 

³⁵ኣምላኽሲ   ኸውሖም፡

እቲ   ልዑል   ኣምላኽውን   ተበጃዊኦም   ምዃኑ   ዘከሩ።

 ³⁶ብኣፎም   ኣቃባጠሩሉ፡   ብመልሓሶም   ድማ   ሓሰዉሉ። 

³⁷ልቦም   ናብኡ   ኣይቀንዐን፡

ብኺዳኑውን   እሙናት   ኣይነበሩን። 

     ³⁸ንሱ   ግና   መሓሪ   ዀይኑ፡   ኣበሳኦም   ይቕረ   በለሎም፡

ኣየጥፍኦምን   ከኣ፡   ንዅራኡ   ብዙሕ   ግዜ   መለሶ፡

ንዅሉ   ቑጥዓኡ   ድማ   ኣይደርጐሖን። 

³⁹ስጋ   ምዃኖም፡

ሓሊፋስ   ዘይትምለስ   ትንፋስ   ምዃኖም   ዘከረ። 

⁴⁰ክንደይ   ሳዕ   እዮም   ኣብ   በረኻ   እተጻረርዎ፡

ኣብ   ጽምዋውን   ዘጕሃይዎ።

⁴¹ተመሊሶም   ንኣምላኽ   ፈተንዎ፡

ነቲ   ናይ   እስራኤል   ቅዱስ   ድማ   ኣቘጥዕዎ። 

^42-43ንኢዱን   ነታ   ኻብ   ተጻራሪ   እተበጀዎም   መዓልትን፡

ትእምርቱ   ኣብ   ግብጺ፡

ተኣምራቱ   ኸኣ   ኣብ   መሮር   ጾዓን  

ከም   ዝገበረ፡   ኣይዘከሩን። 

     ⁴⁴ምስታይ   ምእንቲ   ኽስእንዎስ፡

ንርባታቶምን   ንፈሳሲ   ማዮምን   ናብ   ደም   ለወጦ። 

⁴⁵ዝበልዕዎም   ተናኸስቲ   ጽንጽያን፡

ዘጥፍእኦም   ቁርዖባትን   ሰደደሎም። 

⁴⁶ብቋልያኦም   ንቓቔጣ፡   ፍረ   ዕዮኦም   ከኣ   ነንበጣ   ሃቦ። 

⁴⁷ንወይኖም   ብበረድ፡

ንዳዕሮኦም   ከኣ   በስሓይታ   ኣጥፍኦ። 

⁴⁸ከብቶም   ንበረድ፡

መጓሲኦም   ከኣ   ንመባርቕ   ኣሕሊፉ   ሃበን። 

⁴⁹ሓዊ   ዅራኡ፡   ቁጥዓን   ሓርቖትን   ጸበባን፡

ጭፍራ   መላእኽቲ   እከይ፡   ኣውደቐሎም። 

⁵⁰ንዅራኡ   መገዲ   ጸረገሉ፡

ህይወቶም   ንፌራ   ኣሕሊፉ   ሃበ   እምበር፡

ንነፍሶም   ካብ   ሞት   ኣይነሓፋን። 

⁵¹ንብዘሎ   በዅሪ   ግብጺ   ኸኣ፡   ነቶም   በዅሪ   ሓይሊ፡

ኣብ   ድንኳናት   ካም   ወቕዖም። 

     ⁵²ንህዝቡ   ግና   ከም   ኣባጊዕ   ኣንቀሎም፡

ኣብ   በረኻውን   ከም   መጓሰ   መርሖም። 

⁵³ከይፈርሁስ   ብደሓን   መርሖም፡

ንጸላእቶም   ግና   ባሕሪ   ደፊኖም። 

⁵⁴ናብ   ወሰን   መቕደሱ፡

ናብታ   የማነይቲ   ኢዱ   ዘጥረየቶ   ኸረን   ኣብጽሖም። 

⁵⁵ነህዛብ   ከኣ   ካብ   ቅድሚኦም   ሰጐጎም፡

ርስቲ   ክዀኖም   ብዕጻ   ኸፈሎም፡

ንነገዳት   እስራኤል   ኣብ   ድንኳናቶም   ኣሕደሮም።

      ⁵⁶ግናኸ   ነቲ   ልዑል   ኣምላኽ   ፈተንዎን   ተጻረርዎን፡

ምስክራቱውን   ኣይሓለዉን። 

⁵⁷ንድሕሪት   ተመልሱ፡   ከም   ኣቦታቶምውን   ጠለሙ፡

ከም   ጠላሚ   ቐስቲ   ተለውዩ። 

⁵⁸ብዀረቢቶም   ከኣ   ኣዀረይዎ፡

ብተወቕረ   ምስልታቶምውን   ኣቕንእዎ። 

⁵⁹ኣምላኽ   ድማ   ነዚ   ሰሚዑ   ተቘጥዐ፡

ንእስራኤልውን   ኣዝዩ   ነዓቖም። 

⁶⁰ንማሕደሩ   ኣብ   ሲሎ፡

ነቲ   ኣብ   ማእከል   ሰብ   ተኺልዎ   ዝነበረ   ድንኳን   ሓደጎ። 

⁶¹ሓይሉ   ንምርኮ፡   ክብሩውን   ናብ   ኢድ   ተጻራሪ   ሃበ።

⁶²ንህዝቡ   ድማ   ኣደዳ   ሰይፊ   ገበሮ፡

ንርስቱውን   ተቘጥዖ። 

⁶³ነጕባዞም   ሓዊ   በልዖም፡

ደናግሎም   ከኣ   ጓይላ   መርዓ   ኣይረኸባን። 

⁶⁴ካህናቶም   ብሰይፊ   ወደቑ፡

መበለታቶምውን   ኣይበኸያሎምን። 

⁶⁵ሽዑ   እግዚአብሄር   ከም   ደቂሱ   ዝነበረ፡

ከምቲ   ብወይኒ   ሰኺሩ   ዝጭድር   ጅግና   ዀይኑ   ተንስአ። 

⁶⁶ንጸላእቱ   ድማ   ኣብ   ድሕሪኦም   ወቕዖም፡

ንዘለኣለማዊ   ነውሪ   ሃቦም። 

⁶⁷ንድንኳን   ዮሴፍ   ደርበያ፡

ንነገድ   ኤፍሬምውን   ኣይሓረዮን፡ 

⁶⁸ንነገድ   ይሁዳ፡   ነታ   ዘፍቀራ   ኸረን   ጽዮን   ግና   ሓረያ። 

⁶⁹ንቤት   መቕደሱ   ኸም   ኵርባታት፡

ከምታ   ንዘለኣለም   ዝሰረታ   ምድሪ   ገይሩ፡   ሃነጻ። 

⁷⁰ንዳዊት   ባርያኡ   ሓርዩ፡   ካብ   መጓሴታት   ኣባጊዕ   ወሰዶ። 

⁷¹ንህዝቡ   ያእቆብን   ንርስቱ   እስራኤልን   ምእንቲ   ኽሕሉስ፡

ካብ   ሓራሳት   ኣባጊዕ   ኣምጽኦ። 

⁷²ብቕንዕና   ልቡ   ጓሰዮም፡

በእምሮ   ኣእዳዉውን   መርሖም።

ዝ/መዛ.   ብ/ኪ   ሓ/ኪ

       መበል 79 መዝሙር።            

ናይ   ኣሳፍ   መዝሙር።

     ¹ዎ   ኣምላኽ፡   ኣህዛብ   ናብ   ርስትኻ   ኣትዮም፡

ንቕድስቲ   መቕደስካ   ኣርከስዋ፡

ንየሩሳሌምውን   ኵምራ   እምኒ   ገበርዋ። 

²ሬሳ   ባሮትካ   ንምግቢ   ኣዕዋፍ   ሰማይ፡

ስጋ   ጻድቃን   ንኣራዊት   መሮር   ሃብዎም። 

³ደሞም   ኣብ   ዙርያ   የሩሳሌም   ከም   ማይ   ኣፍሰስዎ፡

ቀባሪውን   ኣይነበረን። 

⁴ንጐረባብትና   ነውሮም፡

ነቶም   ኣብ   ዙርያና   ዘለዉ   ኸኣ  

ንመስሓቒኦምን   ንመላገጺኦምን   ኰንና። 

     ⁵ዎ   እግዚአብሄር፡   ኣዘውትርካ   እትዅሪ፡

ቅንኣትካ   ኸም   ሓዊ   ዝነድድ   ኽሳዕ   መኣዝ   እዩ፧ 

^6-7ንያእቆብ   በሊዖምዎ፡

ንማሕደሩውን   ኣዕንዮምዋ   እዮም   እሞ፡

ቁጥዓኻ   ናብቶም   ዘይፈልጡኻ   ኣህዛብ፡

ናብቶም   ብስምካ   ዘይምህለሉ   መንግስትታት   ክዓዎ።

 ⁸ኣዚና   ተዋሪድና   ኢና   እሞ፡

በደል   ኣቦታትና   ኣይትዘክረልና፡

ቀልጥፍ፡   ምሕረትካ   ትቃባበለና። 

⁹ዎ   ኣምላኽ   ምድሓንና፡   ምእንቲ   ኽብሪ   ስምካ   ርድኣና፡

ምእንቲ   ስምካ   ኢልካ   ኸኣ   ኣናግፈና፡

ሓጢኣትናውን   ይቕረ   በለልና። 

     ¹⁰ስለምንታይከ   ኣህዛብ፡   ኣበይ   ኣሎ   ኣምላኾም፡   ዝብሉ፧  

እቲ   ምፍዳይ   ሕነ   ናይቲ   ዝፈሰሰ   ደም   ባሮትካ  

ኣብ   ቅድሜና   ኣብ   ማእከል   ኣህዛብ   ይፈለጥ። 

¹¹ምንኣኽ   እቶም   እሱራት   ናብ   ቅድሜኻ   ይምጻእ፡

ነቶም   ንሞት   እተመደቡ   ብስልጣን   ቅልጽምካ   ኣድሕኖም። 

¹²ዎ   እግዚአብሄር፡   ንጐረባብትና  

እቲ   ዝጸረፉኻ   ጸርፊ   ሾብዓተ   ኢድ   ጌርካ፡

ናብ   ሕቑፎም   ምለሰሎም። 

     ¹³ንሕና   ግና፡   ህዝብኻን   ኣባጊዕ   መጓሰኻን   ዝዀንና፡

ንዘለኣለም   ከነመስግነካ፡

ንውሉድ   ወለዶ   ምስጋናኻ   ኸነውሪ   ኢና።

ዝ/መዛ.   ብ/ኪ   ሓ/ኪ

       መበል 80 መዝሙር።            

ንሊቀ   መዘምራን፡   ብሾሻኒም   ኤዱት፡   ናይ   ኣሳፍ   መዝሙር።

     ¹ዎ   ጓሳ   እስራኤል፡   ጽን   በል።

ንዮሴፍ   ከም   መጓሰ   እትመርሖ፡

ኣታ   ኣብ   ልዕሊ   ኪሩቤል   እትቕመጥ፡   በሪህካ   ተገለጽ። 

²አብ   ቅድሚ   ኤፍሬምን   ብንያምን   ምናሴን  

ስልጣንካ   ኣተንስእ፡   ንምድሓንናውን   ንዓ። 

³ዎ   ኣምላኽ፡   ምለሰና፡

ክንድሕን   ድማ   ገጽካ   ኣብርሃልና።

     ⁴ዎ   እግዚአብሄር፡   ኣምላኽ   ሰራዊት፡

ክሳዕ   መኣዝ   ኢኻ   ብጸሎት   ህዝብኻ   እትዅሪ፧ 

⁵እንጌራ   ንብዓት   ኣብላዕካዮም፡

ብመስፈር   ከኣ   ንብዓት   ኣስተኻዮም። 

⁶ንጐረባብትና   መካትዒኦም   ትገብረና   ኣሎኻ፡

ጸላእትናውን   የላግጹልና   ኣለዉ። 

⁷ዎ   ኣምላኽ   ሰራዊት፡   ምለሰና፡

ክንድሕን   ድማ   ገጽካ   አብርሃልና። 

     ⁸ጕንዲ   ወይኒ   ኻብ   ግብጺ   ኣውጻእካ፡

ኣህዛብ   ሰጒጕካውን   ተኸልካያ።

 ⁹ኣብ   ቅድሚኣ   ቦታ   ኣዳሎኻላ፡

ሱር   ሰደደት   ምድሪውን   መልአት። 

¹⁰ኣኽራን   ብጽላላ   ተኸድኑ፡

ጨናፍራ   ድማ   ከም   ጽሕድታት   ኣምላኽ   ነበሩ። 

¹¹ጨናፍራ   ኽሳዕ   ባሕሪ፡

ውልዶታታ   ኸኣ   ክሳዕ   እቲ   ርባ   ዘርግሐት። 

¹²ኵሎም   ሓለፍቲ   መገዲ   ክቕንጥብዋስ፡

ስለምንታይከ   ሓጹራ   ዘፍረስካ፧ 

¹³ናይ   ዱር   መፍለስ   ይፍልሳ፡

እንስሳ   መሮርውን   ይጓሰይዋ   ኣለዉ። 

     ^14-15ዎ   ኣምላኽ   ሰራዊት፡   ተመለስ፡

ካብ   ሰማይ   ኣንቈልቁልካ   ርኤ፡

እንሆ   ኸኣ   ነዛ   ወይንን፡   ነዛ   የማነይትኻ   ዝተኸለታ   ኦምን፡

ነቲ   ንኣኻ   ኢልካ   ዘጽናዕካዮ   ጨንፈርን   ብጽሓዮም። 

¹⁶ብሓዊ   ነዲዳ   ተበትከት።  

ብተግሳጽ   ገጽካ   ይጠፍኡ   ኣለዉ። 

¹⁷ኢድካ   ኣብ   ልዕሊ   እቲ   ናይ   የማነይትኻ   ሰብኣይ፡

ኣብ   ልዕሊ   እቲ   ንኣኻ   ኢልካ   ዘጽናዕካዮ   ወዲ   ሰብ   ትኹን። 

¹⁸ሽዑ   ኻባኻ   ኣይክንርሕቕን   ኢና፡

ህይወት   ሃበና፡   ብስምካውን   ክንምህለል   ኢና። 

     ¹⁹ዎ   እግዚአብሄር   ኣምላኽ   ሰራዊት፡   ምለሰና፡

ክንድሕን   ድማ   ገጽካ   አብርሃልና።

ዝ/መዛ.   ብ/ኪ   ሓ/ኪ

       መበል 81 መዝሙር።            

ንሊቀ   መዘምራን፡   ብጊቲት፡   ናይ   ኣሳፍ።

     ¹ንኣምላኽ፡   ነቲ   ሓይልና፡   እልል   በሉሉ፡

ንኣምላኽ   ያእቆብ   እልል   በሉ። 

²መዝሙር   ኣልዕሉ፡

ከበሮን   ጥዑም   በገና   ምስ   መሰንቆን   ኣቓንዩ። 

^3-4እዚ   ናይ   እስራኤል   ሕጊ፡

ናይ   ኣምላኽ   ያእቆብ   ስርዓት   እዩ   እሞ፡

ብሰርቂ   ወርሒ፡   ብምልኣት   ወርሒ፡

ብመዓልቲ   በዓልና   መለኸት   ንፍሑ። 

     ⁵ካብ   ምድሪ   ግብጺ   ኽወጽእ   ከሎ፡

ኣብ   ዮሴፍ   ምስክር   ገይሩ   ኣቘሞ።  

ዘይፈልጦ   ቛንቋ   እሰምዕ   ኣሎኹ፡ 

⁶ንመንኵቡ   ኻብ   ሰኽሚ   ኣርሓቕክዎ፡

ኣእዳዉ   ኻብ   መጾሪ   ኣቕሓ   ተናገፋ። 

⁷ብጸበባ   ኣእዌኻ፡   ኣነውን   ኣናገፍኩኻ፡

ኣብ   ነጕዲ   ተሰዊረ   መለስኩልካ፡

ኣብ   ማይ   መሪባ   ተዓዘብኩኻ።       ሴላ።

⁸ዎ   ህዝበይ፡   ክምስክረልካስ   ስማዕ፡

ዎ   እስራኤል፡   ኣየ   እንተ   ትሰምዓኒ። 

⁹ካልእ   ኣምላኽ   ኣብ   ማእከል   ኣይኹን፡

ንኻልእ   ኣምላኽውን   ኣይትስገድ። 

¹⁰ኣነ   እግዚአብሄር፡

እቲ   ኻብ   ምድሪ   ግብጺ   ዘውጻእኩኻ   ኣምላኽ   እየ፡

ኣፍካ   ሃህ   ኣብል፡   ኣነውን   ክመልኦ   እየ። 

     ¹¹ህዝበይ   ግና   ንድምጸይ   ኣይሰምዖን፡

እስራኤል   ድማ   እሺ   ኣይበለንን። 

¹²ብምኽሪ   ርእሶም   ክመላለሱስ፡

ኣብ   ጽንዓት   ልቦም   ሓደግክዎም። 

¹³ኣየ፡   ህዝበይ   እንተ   ዝሰምዓኒ፡

እስራኤልሲ   ብመገደይ   እንተ   ዝኸይድ። 

¹⁴ንጸላእቶም   ቀልጢፈ   መዋረድክዎም፡

ኢደይውን   ናብ   ተጻረርቶም   ምመለስኩ። 

¹⁵ንእግዚአብሄር   ጸላእቱ   ምተገዝእዎ   ነይሮም፡

ዘመኖም   ከኣ   ንዘለኣለም   ምዀነ። 

¹⁶ስብሒ   ስርናይ   መብላዕኩኻ፡

ካብ   ከውሕስ   መዓር   መጽገብኩኻ   ነይረ።

ዝ/መዛ.   ብ/ኪ   ሓ/ኪ

       መበል 82 መዝሙር።            

ናይ   ኣሳፍ   መዝሙር።

     ¹ኣምላኽ   አብ   ማሕበር   ኣማልኽቲ   ደው   ይብል፡

ኣብ   ማእከል   ኣማልኽቲ   ይፈርድ   ኣሎ። 

²ክሳዕ   መአዝ   ኢኹም   ሓሶት   እትፈርዱ፧  

ንገጽ   ረሲኣንስ   እተድልዉ፧       ሴላ 

     ³ንምግዱርን   ንዘኽታምን   በይኑሎም፡

ንጭኑቕን   መስኪንን   ፍትሒ   ኣውጽኡሎም። 

⁴ንድኻን   መስኪንን   ኣናግፍዎም፡

ካብ   ኣእዳው   ረሲኣን   ኣድሕንዎም። 

⁵ኣይፈልጡን፡   ኣየስተውዕሉን፡

ኣብ   ጸልማት   ይመላለሱ፡

ብዘሎ   መሰረታት   ምድሪ   ይናወጽ   ኣሎ። 

^6-7ኣነስ፡   ኣማልኽቲ   ኢኹም፡

ኵላትኩም   ውሉድ   እቲ   ልዑል   ኢኹም፡

ግናኸ   ከም   ሰብ   ክትሞቱ፡

ከም   ሓደ   ኻብቶም   መሳፍንቲውን   ክትወድቁ   ኢኹም፡   በልኩ። 

     ⁸ዎ   ኣምላኽ፡   ንዅሎም   ኣህዛብ   ክትወርስሲ፡

ተንስእ   ንምድሪ   ፍረዳ።

ዝ/መዛ.   ብ/ኪ   ሓ/ኪ

       መበል 83 መዝሙር።            

ናይ   ኣሳፍ   መዝሙር   ምስጋና።

     ¹ዎ   ኣምላኽ፡   ስቕ   ኣይትበል፡

ኣታ   ኣምላኽ፡   ዓባስ   ኣይትኹን፡   ዝግ   ኣይትበል። 

²እንሆ፡   ጸላእትኻ   የውክዑ፡

ዝጸልኡኻውን   ርእሶም   የልዕሉ   ኣለዉ   እሞ፡ 

³ንህዝብኻ   ተንኰል   ይፍሕሱሎም፡

ነቶም   እትጋርዶም   ድማ  

ኣብ   ልዕሊኦም   ይማኸሩሎም   ኣለዉ። 

⁴ህዝቢ   ኸይኰኑ፡   ስም   እስራኤል   ደጊም   ከይዝከርሲ፡

ንዑ   ነጽንቶም፡   ይብሉ   ኣለዉ። 

⁵ሓቢሮም፡   ተማኺሮም፡

ኪዳን   ተኣታትዮምልካ   እዮም   እሞ፡ 

⁶ድንኳናት   ኤዶምን   እስማኤላውያንን፡

ሞኣብን   ኣጋራውያንን፡ 

⁷ጌባልን   ዓሞንን   ኣማሌቅን፡

ፍልስጥኤም   ምስ   ሰብ   ጢሮስ፡ 

⁸ኣሶር   ድማ   ሓቢሮም፡

ንውሉድ   ሎጥ   ቅልጽም   ኰይኖምዎም   እዮም።     ሴላ

     ⁹ከምቲ   ንምድያን፡   ንሲሰራ፡   ንያቢን

ኣብ   ርባ   ቂሶን   ዝገበርካዮም   ግበሮም። 

¹⁰ንሳቶም   ኣብ   ኤንዶር   ጠፍኡ፡

ንምድሪ   ኸኣ   ድዅዒ   ዀንዋ። 

^11-12ንማሕደሪታት   ኣምላኽ   ንውረስ፡

ኢሎም   ኣለዉ   እሞ፡

   ንኹቡራቶም   ከም   ዖሬብን   ዜብን፡

ንብዘለዉ   መሳፍንቶም   ከኣ  

ከም   ዜባን   ጻልሙናን   ግበሮም። 

¹³ኣምላኸይ፡   ከም   ህቦብላ፡

ከም   ሓሰር   አብ   ቅድሚ   ንፋስ   ግበሮም። 

¹⁴ከምቲ   ሓዊ   ንዱር   ዘንድዶ፡

ሃልሃልታውን   ነኽራን   ዘቃጽሎ፡ 

¹⁵ከምኡ   ብህቦብላኻ   ስጐጎም፡

ብዘራጊቶኻ   ድማ   ኣሸብሮም። 

¹⁶ዎ   እግዚአብሄር፡   ስምካ   ኽደልዩስ፡

ንገጾም   ነውሪ   ምልኣዮ። 

¹⁷ንዘለኣለም   ይነውሩን   ይሸበሩን፡

ይሕፈሩን   ይጥፍኡን። 

¹⁸ንስኻ፡   ጐይታ   ዝስምካ፡

በይንኻ   ኣብ   ልዕሊ   ዅሉ   ምድሪ  

ልዑል   ከም   ዝዀንካ፡   ይፍለጡ።

ዝ/መዛ.   ብ/ኪ   ሓ/ኪ

       መበል 84 መዝሙር።            

ንሊቀ   መዘምራን፡   ብጊቲት፡   ናይ   ደቂ   ቆራህ   መዝሙር።

     ¹ዎ   ጐይታ   ሰራዊት፡

ማሕደራትካ   ኽንደይ   ባህ   ዘብላ   እየን። 

²ነፍሰይ   ንኣጸድ   እግዚአብሄር   ትናፍቖን   ሃረር   ትብሎን   ኣላ፡

ነፍሰይን   ስጋይን   ንህያው   ኣምላኽ   እልል   ይብላሉ። 

³ዑፍ   እኳ   ቤት   ረኸበት፡

ለዃዅቶውን   ጨጫዊታ   እተንብረላ   ቤት   ረኸበት፡

መሰውኢታትካ፡   ዎ   ጐይታ   ሰራዊት፡   ንጉሰይን   ኣምላኸይን። 

⁴ኣብ   ቤትካ   ዝነብሩ   ብጹኣን   እዮም፡

ኵሉ   ግዜ   ይውድሱኻ።     ሴላ

     ⁵ሓይሎም   ብኣኻ   ዝዀነ፡

ብልቦም   ንመገድኻ   ዝሓስቡ   ሰባት   ብጹኣን   እዮም። 

⁶ብለሰ   ብኽያት   ክሓልፉ   ኸለዉ፡   ዓይኒ   ማያት   ይገብርዎ፡

ዝናም   ኣዝመራውን   ብበረኸት   ይኸድኖ። 

⁷ካብ   ሓይሊ   ናብ   ሓይሊ   ይኸዱ፡

ኣብ   ጽዮን   ኣብ   ቅድሚ   ኣምላኽ   ይቘሙ። 

⁸ዎ   እግዚአብሄር   ኣምላኽ   ሰራዊት፡   ጸሎተይ   ስማዕ።  

ዎ   ኣምላኽ   ያእቆብ፡   ጽን   በል          ሴላ

     ⁹ኣታ   ዋልታና   ዝዀንካ   ኣምላኽ፡   ርኤ፡

ገጽ   ቅቡእካውን   ጠምት። 

¹⁰ካብ   ሽሕሲ   ሓንቲ   መዓልቲ   ኣብ   ኣጸድካ   ትሓይሽ   እያ   እሞ፡

ኣብ   ድንኳን   ረሲአን   ካብ   ምንባርሲ  

ኣብ   ቤት   ኣምላኸይ   ሓላው   ደገ   ምዃን   ይሕሸኒ። 

¹¹እግዚአብሄር   ኣምላኽሲ   ጸሓይን   ዋልታን   እዩ   እሞ፡

እግዚአብሄር   ጸጋን   ክብርን   ይህብ፡

ነቶም   ብቕንዕና   ዝመላለሱ   ሰናይ   ዘበለ   ኣይኸልኦምን   እዩ። 

¹²ዎ   ጐይታ   ሰራዊት፡   ኣባኻ   ዝውከል   ሰብ   ብጹእ   እዩ።

ዝ/መዛ.   ብ/ኪ   ሓ/ኪ

       መበል 85 መዝሙር።            

ንሊቀ   መዘምራን፡   ናይ   ደቂ   ቆራህ   መዝሙር።

     ¹ዎ   እግዚአብሄር፡   ንምድርኻ   ሞገስ   ገበርካላ፡

ንቤት   ያእቆብ   ካብ   ምርኮ   መለስካዮም። 

²ኣበሳ   ህዝብኻ   ሓደግካ፡

ንብዘሎ   ሓጢኣቶም   ከደንካ።         ሴላ

     ³ንዅሉ   መዓትካ   ኣርሓቕካዮ፡

ካብ   ንደት   ቁጥዓኻ   ተመለስካ። 

⁴ዎ   ኣምላኽ   ምድሓንና፡   ምለሰና፡

ንዅራኻውን   ካባና   ኣትርፎ። 

⁵ንዘለኣለምዶ   ኽትኵርየልና፧  

ኵራኻስ   ንውሉድ   ወለዶዶ   ኸተንውሕ   ኢኻ፧ 

⁶ህዝብኻ   ብኣኻ   ኽሕጐስሲ፡

መሊስካዶ   ህይወት   ኣይክትህበናን   ኢኻ፧ 

⁷ዎ   እግዚኣብሄር፡   ጸጋኻ   ኣርእየና፡   ምድሓንካውን   ሃበና። 

     ⁸ናብ   ዕሽነት   ደኣ   ኣይመለሱ   እምበር፡

ንህዝቡን   ቅዱሳኑን   ሰላም   ክዛረቦም   እዩ   እሞ፡

ነቲ   እግዚኣብሄር   ኣምላኽ   ዝብሎ   ኽሰምዕ   እየ። 

⁹ብሓቂ   አብ   ሃገርና   ኽብሪ   ኽሓድርሲ፡

ምድሓኑ   ነቶም   ዝፈርህዎ   ቐረባኦም   እዩ። 

¹⁰ለውሃትን   ሓቅን   ተራኸባ፡

ጽድቅን   ሰላምን   ተሳዓዓማ። 

     ¹¹ሓቂ   ኻብ   ምድሪ   ኽትበቁል፡

ጽድቂውን   ካብ   ሰማይ   ክትጥምት   እያ። 

¹²እግዚኣብሄር   ድማ   ሰናይ   ክህበና   እዩ፡

ሃገርናውን   ፍርያታ   ኽትህብ   እያ። 

¹³ጽድቂ   ቐቅድሚኡ   ኽትከይድ፡

ኣስኣሰሩ   ኸኣ   ክትስዕብ   እያ።

ዝ/መዛ.   ብ/ኪ   ሓ/ኪ

       መበል 86 መዝሙር።            

ናይ   ዳዊት   ጸሎት።

     ¹ዎ   እግዚኣብሄር፡   መስኪንን   ድኻን   እየ   እሞ፡

እዝንኻ   ኣድንን፡   ምለሰለይውን። 

²ሄር   እየ   እሞ፡   ንነፍሰይ   ሐልዋ፡

ኣታ   ኣምላኸየ፡   ነቲ   ኣባኻ   ዚውከል   ባርያኻ   ኣድሕኖ።

³ምሉእ   መዓልቲ   ናባኻ   ኤእዊ   ኣሎኹ   እሞ፡

ጐይታየ   ምሐረኒ። 

     ⁴ዎ   እግዚኣብሄር፡   ነፍሰይ   ናባኻ   ኤልዕል   ኣሎኹ   እሞ፡

ንነፍሲ   ባርያኻ   ኣሐጕሳ። 

⁵ዎ   እግዚኣብሄር፡   ሕያዋይን   ንይቕሬታ   ድልውን   ኢኻ፡

ናባኻ   ንዜእውዩ   ዅላቶም   ከኣ  

ብዓል   ዓብዪ   ምሕረት   ኢኻ   እሞ፡ 

⁶ጐይታየ፡   ጸሎተይ   ስማዕ፡

ንድምጺ   ምህለላይ   ጽን   በሎ። 

⁷ንስኻ   ኽትመልሰለይ   ኢኻ   እሞ፡

ብመዓልቲ   ጸበባይ   ክጽውዓካ   እየ። 

     ⁸ዎ   እግዚኣብሄር፡   ካብ   ኣማልኽቲ   ዚመስለካ   የልቦን፡

ከም   ግብርታትካውን   ከቶ   የልቦን። 

⁹ዎ   እግዚኣብሄር፡   ዝፈጠርካዮም   ኣህዛብ   ኵሎም   መጺኦም  

አብ   ቅድሜኻ   ኺሰግዱ፡

ንስምካውን   ኬኽብሩ   እዮም። 

¹⁰ንስኻ   ዓብይን   ተኣምራት   እትገብርን   ኢኻ   እሞ፡

ኣምላኽሲ   ንስኻ   ጥራይ   ኢኻ። 

     ¹¹ዎ   እግዚኣብሄር፡   ብሓቅኻ   ምእንቲ   ኽመላለስ፡

መገድኻ   ምሀረኒ፡

ስምካ   ኽፈርህሲ፡   ንልበይ   ኣዳልዎ። 

^12-13ዎ   እግዚኣብሄር   ኣምላኸይ፡

ሳህልኻ   ንኣይ   ዓብዪ   እዩ፡

ንነፍሰይውን   ካብ   መዓሙቑ   ሲኦል   ኣውጺእካያ   ኢኻ   እሞ፡

ብምሉእ   ልበይ   ከመስግነካ፡

ስምካውን   ንዘለአለም   ከኽብር   እየ። 

¹⁴ዎ   ኣምላኽ፡   ትዕቢተኛታት   ተንሲኦምኒ፡

ኣኼባ   ገፋዕቲ   ኸኣ   ንነፍሰይ   ይደልይዋ   ኣለዉ፡

ንኣኻውን   አብ   ቅድሚኦም   ኣይገበሩኻን። 

     ¹⁵ጐይታየ፡   ንስኻ   ግና   መሓርን   ጸጋውን   ዓቃልን፡

ብሳህልን   ሓቅን   ዓብዪ   ኣምላኽ   ኢኻ። 

¹⁶ናባይ   ግልጽ   በል   እሞ   ምሐረኒ፡

ንባርያኻ   ሓይልኻ   ሀቦ፡   ንወዲ   እታ   ባርያኻ   ኣድሕኖ። 

¹⁷ዎ   እግዚኣብሄር፡   ረዲእካንን   ኣጸናኒዕካንን   ኢኻ   እሞ፡

ጸላእተይ   ርእዮም   ኪሐፍሩስ፡   ምልክት   ደሓን   ግበረለይ።

ዝ/መዛ.   ብ/ኪ   ሓ/ኪ

       መበል 87 መዝሙር።            

ናይ   ደቂ   ቆራህ   መዝሙር   ምስጋና።

     ¹መሰረታ   ኣብቶም   ቅዱሳት   ኣኽራን   እያ፡ 

²እግዚኣብሄር   ካብ   ኵሉ   ማሕደራት   ያእቆብሲ  

ንደጌታት   ጽዮን   የፍቅር   እዩ። 

³ኣቲ   ኸተማ   ኣምላኽ፡  

ብዛዕባኺ   ኽቡር   ነገር   ተዘርበ።    ሴላ።

⁴ካብተን   ዝፈልጣኒ፡   ረሃብን   ባቢሎንን   እሰሚ   ኣሎኹ፡

እንሆ፡   ፍልስጥኤምን   ጢሮስን   ምስ   ኢትዮጵያ፡

እዚኣቶም   ኣብኣ   ተወሊዶም   እዮም። 

⁵ብዛዕባ   ጽዮን   ድማ፡

እዝን   እትን   ኣብኣ   ተወሊዶም፡   ክበሀል   እዩ፡

እቲ   ልዑልውን   ባዕሉ   ኸጽንዓ   እዩ። 

⁶እግዚኣብሄር   ነህዛብ   ክጽሕፎም   ከሎ፡

እዚ   ኣብኣ   ተወሊዱ፡   ኢሉ   ክቘጽር   እዩ።    ሴላ።

     ⁷እናደረፉን   እናሳዕስዑን፡

ኵለን   ዓይኒ   ማያተይ   ኣባኻ   እየን፡   ክብሉ   እዮም።

ዝ/መዛ.   ብ/ኪ   ሓ/ኪ

       መበል 88 መዝሙር።            

ናይ   ደቂ   ቆራህ   መዝሙር   ምስጋና።   ንሊቀ   መዘምራን፡  

ብማሃላት   ለኣኖት፡   ናይ   ሄማን   ኣዝራዊ   መስኪል።

     ¹ዎ   እግዚኣብሄር፡   ኣምላኽ   ምድሓነይ፡

ኣብ   ቅድሜኻ   ለይትን   መዓልትን   አእዊ   ኣሎኹ፡ 

²ጸሎተይ   ኣብ   ቅድሜኻ   ይብጻሕ፡

እዝንኻ   ናብ   ኣውያተይ   ኣድንን። 

     ³ነፍሰይ   መከራ   ጸጊባ   እያ   እሞ፡

ህይወተይ   ናብ   ሲኦል   ቀሪባ   ኣላ። 

⁴ምስቶም   ናብ   ጒድጓድ   ዝወርዱ   ተቘጺረ፡

ሓይሊ   ኸም   ዘይብሉ   ሰብኣይ   እየ፡ 

⁵ከምቶም   ድሕርዚ   ዘይትዝክሮም፡

ካብ   ኢድካ   እተቘርጹ፡

ኣብ   ጕድጓድውን   ዝድቅሱ   ቕቱላት  

ኣብ   ማእከል   ምውታት   ተደርበኹ። 

⁶ኣብ   ዓሚቑ   ጕድጓድ፡

ኣብ   ጸልማት   ኣብ   መዓሙቕ   ኣንበርካኒ፡ 

⁷ቑጥዓኻ   ይኸብደኒ   ኣሎ፡

ብዅሉ   ማዕበላትካ   ጸቒጥካኒ።    ሴላ።

⁸ንመሓዙተይ   ካባይ   ኣርሒቕካ፡

ብኣታቶም   ፍንፉን   ገበርካኒ፡

ተዓጽየ፡   ምውጻእውን   ስኢነ   ኣሎኹ። 

⁹ኣዒንተይ   ብስቓይ   ይስልምታ   ኣለዋ፡

ዎ   እግዚኣብሄር፡   ኵሉ   መዓልቲ   ናባኻ   አእዊ።  

ኣእዳወይ   ናባኻ   እዝርግሕ   ኣሎኹ። 

¹⁰ንምዉታትዶ   ተኣምራት   ትገብረሎም   ኢኻ፧

ዝሞቱስ   ተንሲኦምዶ   የመስግኑኻ   እዮም፧    ሴላ።

     ¹¹ኣብ   መቓብርከ   ሳህልኻ፡

ኣብ   ቦታ   ጥፍኣትውን   እምነትካዶ   ይንገር   እዩ፧ 

¹²ተኣምራትካዶ   ኣብ   ጸልማት፡

ጽድቅኻውን   ኣብ   ምድሪ   ምርሳዕ   ይፍለጥ   እዩ፧ 

¹³ጐይታየ፡   ኣነ   ግና   ናባኻ   አእዊ   ኣሎኹ፡

ጸሎተይ   ድማ   ኣንጊሁ   ይቃባበለካ   ኣሎ። 

     ¹⁴ጐይታየ፡   ስለምንታይ   ንነፍሰይ   እትድርብያ፧

ንምንታይሲ   ገጽካ   ትኽውለለይ   ኣሎኻ፧ 

¹⁵ካብ   ንእስነተይ   ጀሚረ   ሽጉርን   ውጹዕን   እየ፡

ፍርሃትካ   ተሰኪመስ፡   ተስፋ   እቘርጽ   ኣሎኹ። 

¹⁶ሓዊ   ቑጥዓኻ   ብልዕለይ   ሓሊፉ፡

ስምባድካ   ኣጥፊኡኒ። 

¹⁷ምሉእ   መዓልቲ   ኸም   ማይ   ከቢቦምኒ፡

ሓቢሮም   ኣብ   ዙርያይ   ኣለዉ። 

¹⁸ንፈታውን   ዓርክን   ካባይ   ኣርሓቕካዮም፡

መሓዛይ   ጸልማት   እዩ።

ዝ/መዛ.   ብ/ኪ   ሓ/ኪ

       መበል 89 መዝሙር።            

ናይ   ኤታን   ኣዝራዊ   መስኪል።

     ¹ግብርታት   ጸጋ   እግዚኣብሄር   ንዘለኣለም   ክዝምር፡

ብኣፈይ   ንውሉድ   ወለዶ   እምነትካ   ኸፍልጥ   እየ።

 ²ጸጋ   ንዘለኣለም   ክህነጽ፡

እምነትካ   አብ   ሰማያት   ከተጽንዕ   ኢኻ፡   በልኩ   እሞ፡ 

³ምስ   ሕሩየይ   ኪዳን   ኣቶኹ፡

ንዳዊት   ባርያይ   መሓልኩሉ፡ 

⁴ዘርእኻ   ንዘለኣለም   ከጽንዕ፡

ዝፋንካውን   ንውሉድ   ወለዶ   ኽሃንጽ   እየ።    ሴላ።

     ⁵ጐይታየ፡   ሰማያት   ከኣ   ንተኣምራትካ፡

ንእምነትካ   ኣብ   ማሕበር   ቅዱሳን   ክውድሱ   እዮም። 

⁶ኣብ   ጠፈር   ንእግዚኣብሄር   ዝመዓራረዮስ   መን   እዩ፧  

ካብ   ውሉድ   ስልጡናትከ  

መን   እዩንእግዚኣብሄር   ዝመስሎ፧ 

⁷ኣብ   ምኽሪ   ቅዱሳን   ኣዝዩ   ዘፍርህ፡

ካብቶም   ኣብ   ዙርያኡ   ዘለዉ   ዅላቶም  

ዘሸብርን   ኣምላኽ   እዩ። 

⁸እግዚኣብሄር   ኣምላኽ   ሰራዊት፡

ከማኻ   ስልጡን   መን   እዩ፧  

ዎ   ጐይታይ፡   እምነትካውን   ኣብ   ዙርያኻ   ኣሎ። 

     ⁹ንትዕቢት   ባሕሪ   ትገዝኦ፡

ማዕበላቱ   እንተ   ተንስአ፡   ንስኻ   ተህድኦ። 

¹⁰ከም   እተወግአ   ጌርካ፡   ንረሃብ   ቀጥቂጥካዮ፡

ብሓይሊ   ቕልጽምካ   ንጸላእትኻ   በቲንካዮም   ኢኻ። 

¹¹ሰማያት   ናትካ   እዩ፡   ምድሪውን   ናትካ   እያ፡

ንዓለም   ምስ   ምልኣታ   ሰሪትካያ። 

¹²ንሰሜንን   ደቡብን   ንስኻ   ፈጠርካዮ፡

ታቦርን   ሄርሞንን   ብስምካ   እልል   ይብላ። 

¹³ሓያል   ቅልጽም   ኣሎካ፡

ኢድካ   ብርትዕቲ፡የማነይትኻ   ልዕልቲ   እያ። 

¹⁴መሰረት   ዝፋንካ   ጽድቅን   ቅንዕናን   እዩ፡

ሳህልን   ሓቅን   ቀቅድሚ   ገጽካ   ይኸዳ   ኣለዋ። 

¹⁵እቲ   እልልታ   ዝፈልጥ   ህዝቢ   ብጹእ   እዩ፡

ዎ   እግዚኣብሄር፡   ብብርሃን   ገጽካ   ይመላለሱ። 

¹⁶ብስምካ   ምሉእ   መዓልቲ   ይሕጐሱ፡

ብጽድቅኻውን   ልዕል   ይብሉ። 

¹⁷ክብሪ   ሓይሎም   ንስኻ   ኢኻ   እሞ፡

ብሞገስካ   ቐርንና   ልዕል   ክብል   እዩ። 

¹⁸ዋልታና   ናይ   እግዚኣብሄር   እዩ   እሞ፡

ንጉስና   ናይቲ   ናይ   እስራኤል   ቅዱስ   እዩ። 

     ¹⁹በቲ   ዘመን   እቲ   ብራእይ   ንቅዱሳንካ  

ኸምዚ   ኢልካ   ተዛረብካዮም፡

ረዲኤት   ኣብ   ልዕሊ   ጅግና   ኣንቢረ፡

ካብ   ህዝቢ   ሓደ   ሕሩይ   ኣልዒለ። 

²⁰ንዳዊት   ባርያይ   ረኺበዮ፡   ብቕዱስ   ዘይተይ   ቀቢአዮ፡ 

²¹ኢደይ   ኵሉ   ግዜ   ምስኡ   ኽትከውን   እያ፡

ቅልጽመይ   ከኣ   ከበርትዖ   እዩ። 

²²ጸላኢ   ኣይክወድቆን፡

ዓማጺ   ኸኣ   ኣይክጠቕዖን   እዩ። 

²³ንጸላእቱ   ድማ   አብ   ቅድሚኡ   ኽቕጥቅጦም፡

ነቶም   ዝጸልእዎውን   ክወቕዖም   እየ። 

²⁴እምነተይን   ጸጋይን   ድማ   ምስኡ   ክዀና፡

ብስመይውን   ቀርኑ   ልዕል   ክብል   እዩ። 

²⁵ኢዱ   ድማ   ኣብ   ባሕሪ፡

የማነይቱውን   ኣብ   ርባታት   ከንብር   እየ። 

²⁶ንሱ፡   ኣቦይ፡   ኣምላኸይ፡ከውሒ   ምድሓነይ  

ንስኻ   ኢኻ፡ኢሉ   ኽሰምየኒ   እዩ። 

²⁷ኣነውን   በዅሪ፡

ካብ   ነገስታት   ምድሪ   ልዕል   ዝበለ   ኽገብሮ   እየ። 

²⁸ሳህለይ   ንዘለኣለም   ክሕልወሉ   እየ፡

ኪዳነይውን   ክጸንዓሉ   እዩ። 

²⁹ዘርኡ   ድማ   ንዘለኣለም፡

ዝፋኑውን   ከም   መዓልትታት   ሰማይ   ከንብር   እየ። 

     ³⁰ደቁ   ሕገይ   እንተ   ሓደጉ፡

ከም   ቅንዕናይ   እንተ   ዘይተመላለሱ፡ 

³¹ስርዓተይ   እንተ   ኣፍረሱ፡

ትእዛዛተይውን   እንተ   ዘይሓለዉ፡ 

³²ሽዑ   ንኣበሳኦም   ብሸቦጥ፡

ንበደሎምውን   ብመውቃዕቲ   ኸረኻኽበሎም   እየ። 

³³ጸጋይ   ግና   ኣየግድፎን፡   እምነተይውን   ኣይጠልሞን። 

³⁴ኪዳነይ   ኣየፍርስን፡

ከናፍረይ   እተዛረቦ   ድማ   ኣይልውጥን። 

³⁵ሓንቲ   ነገር   ብቕድስናይ   ምሒለ   እየ፡

ንዳዊት   ኣይሕሱን፡

³⁶ዘርኡ   ንዘለኣለም፡

ዝፋኑውን   ከም   ጸሓይ   አብ   ቅድመይ   ክነብር   እዩ። 

³⁷ከም   ወርሒ   ንዘለኣለም   ይቐውም፡

ኣብ   ደበና   ዘሎ   ምስክር   ከኣ   እሙን   እዩ።   ሴላ።

³⁸ንስኻ   ግና   ደርቢኻን   ንዒቕካን፡

ንቕቡእካ   ተቘጣዕካዮ። 

³⁹ኪዳን   ባርያኻ   ኣፍሪስካ፡

ንዘውዱ   ኣብ   ምድሪ   ኣርከስካዮ። 

⁴⁰ብዘሎ   መካበብያኡ   ኣፍረስካ፡

ዕርድታቱ   ኣዕኖኻ። 

⁴¹ኵሎም   ሓለፍቲ   መገዲ   በዝቢዞምዎ፡

ንጐረባብቱ   መላገጺኦም   ኰይኑ። 

⁴²ንየማነይቲ   እቶም   መጻርርቱ   ልዕል   ኣቢልካያ፡

ንዅሎም   ጸላእቱ   ኣሐጕስካዮም። 

⁴³እወ፡   ንስሕለት   ሰይፉ   መለስካዮ፡

ኣብ   ውግእውን   ኣየጽናዕካዮን። 

⁴⁴ንነጸብራቑ   ኣጥፊእካዮ፡

ንዝፋኑውን   ናብ   ምድሪ   ደርቢኻዮ። 

⁴⁵መዓልትታት   ንእስነቱ   ኣሕጺርካዮ፡

ብነውሪ   ኣጐልቢብካዮ   ኣሎኻ።    ሴላ።

     ⁴⁶ዎ   እግዚኣብሄር፡   ፈጺምካ   እትኽወል፡

ነድርኻስ   ከም   ሓዊ   ዝነድድ   ክሳዕ   መኣዝ   እዩ፧ 

⁴⁷ህይወተይ   ክንደይ   ሓጻር   ምዃና፡

ኵሎም   ደቂ   ሰብ   ንኸንቱነት   ከም   ዝፈጠርካዮም   ዘክር። 

⁴⁸ሞት   ከይረኣየ   ብህይወት   ዝነብር፡

ንነፍሱስ   ካብ   ኢድ   ሲኦል   ዘናግፍ   ሰብ   መን   እዩ፧   ሴላ።

      ⁴⁹ጐይታየ፡   እቲ   ብእምነትካ   ንዳዊት   ዝመሓልካሉ፡

ናይ   ቀደም   ጸጋኻ   ኣበይ   ኣሎ፧ 

⁵⁰ጐይታየ፡   ንጸርፊ   ባሮትካ፡

ነቲ   ኻብ   ኵሎም   ሓያላት   ኣህዛብ  

ኣብ   ልበይ   ዝጾሮ   ዘሎኹ   ዘክር። 

⁵¹ጐይታየ፡   ጸላእትኻ   ዝጸርፍዎ   ጸርፊ፡

ነቲ   ንኣሰር   ቅቡእካ   ዝጸርፍዎ   ዘለዉ   ዘክር። 

     ⁵²እግዚኣብሄር   ንዘለኣለም   ይባረኽ።  

ኣሜን፡   ኣሜን።