መዝሙር ዳዊት
ራብዓይ መጽሓፍ

90  91  92  93  94  95
96  97  98  99  100
101  102  103  104
105  106

ናብ ቀዳማይ መጽሓፍ፥ 1 — 41
ናብ ካልኣይ መጽሓፍ፥ 42 — 72
ናብ ሳልሳይ መጽሓፍ፥ 73 — 89
ናብ ሓምሳይ መጽሓፍ፥ 107 — 150

ዝ/መዛ.   ብ/ኪ   ሓ/ኪ

       መበል 90 መዝሙር።            

ሙሴ፡   ናይ   ኣምላኽ   ሰብ፡   ዝጸለዮ   ጸሎት።

     ¹ጐይታየ፡   ካብ   ወለዶ   ንወለዶ   መዕቈቢ   ዀንካና። 

²ኣኽራን   ከይተወልደ፡   ምድርን   ዓለምን   ከይፈጠርካ፡

ኤረ   ንስኻስ   ካብ   ዘለኣለም   ንዘለኣለም   ኣምላኽ   ኢኻ። 

³ኣቱም   ደቂ   ሰብ፡   ተመለሱ፡   እናበልካ፡

ንሰብ   ናብ   መሬት   ትመልሶ   ኣሎኻ። 

⁴ሽሕ   ዓመት   ኣብ   ቅድሜኻ  

ኸም   እዛ   ትማሊ   ዝሓለፈት   መዓልትን  

ከም   ምንቃሕ   ለይትን   እየን   እሞ፡ 

⁵ከም   ብውሒዝ   ትገፎም፡   ከም   ትኽስታ   እዮም፡

ከምቲ   ብጊሓት   ዝልምልም   ሳዕሪ፡ 

⁶ንግሆ   ይዕምብብ   ይልምልም   ድማ፡

ኣጋ   ምሸት   ይዕጸድ   እሞ   ይነቅጽ። 

     ⁷ብዅራኻ   ጠፊእና   ኢና   እሞ፡

ብቑጥዓኻውን   ሰምቢድና። 

⁸ንኣበሳና   ኣብ   ቅድሜኻ፡

ንሕቡእ   ሓጢኣትናውን   ኣብ   ብርሃን   ገጽካ   ተቑሞ   ኣሎኻ። 

     ⁹ብዘሎ   መዓልትታትና   ብቑጥዓኻ   ይሓልፍ፡

ዓመታትና   ኸም   እህህታ   ነሕልፈን   ኣሎና   እሞ፡ 

¹⁰መዓልትታት   ዓመታትና   ሰብዓ   ዓመት፡

እንተ   በዝሐ   ኸኣ   ሰማንያ   ዓመት   እዩ፡

ቀልጢፉ   ይሓልፍ፡   ነፊርናውን   ንኸይድ   ኢና   እሞ፡

ክብረቱ   ጻዕርን   መከራን   እዩ። 

¹¹ከም   ዝግባእ   ምእንቲ   ኽፈርሃካ   ኢሉስ፡

ንሓይሊ   ኵራኻን   ንቑጥዓኻን   ዝሓስብከ   መን   እዩ፧ 

¹²ጥበበኛ   ልቢ   ምእንቲ   ኽንረክብሲ  

መዓልትታትና   ኽንቈጽር   ምሃረና። 

     ¹³ጐይታይ፡   ተመለስ፡   ክሳዕ   መኣዝ፧

ንባሮትካ   ምሓሮም። 

¹⁴ኵለን   መዓልትታትና   ኽንሕጐስን   ባህ   ክብለናንሲ፡

ንግሆ   ጸጋኻ   ኣጽግበና። 

¹⁵ብመጠን   እተን   ዘጨነቕካና   መዓልትታትን፡

ክፉእ   ዝርኤናለን   ዓመታትን   ኣሐጕሰና። 

¹⁶ግብርታትካ   ንባሮትካ፡

ክብርኻውን   ንውሉዶም   ግለጽ። 

     ¹⁷ጸጋ   እግዚኣብሄር   ኣምላኽና   ኣብ   ልዕሌና   ይኹን፡

ተግባር   ኣእዳውና   ኣስልጠልና፡

እወ፡   ንተግባር   ኣእዳውና   ንስኻ   ኣስልጦ።

ዝ/መዛ.   ብ/ኪ   ሓ/ኪ

       መበል 91 መዝሙር።  
         

     ¹ኣብ   ጸግዒ   እቲ   ልዑል   ዝሓድር፡

ኣብ   ጽላል   እቲ   ዅሉ   ዝኽእል   ይነብር። 

²ንእግዚአብሄር፡   ጸግዐይን   ዕርደይን  

ዝውከሎ   ኣምላኸይን   እዩ፡   እብሎ   ኣሎኹ። 

     ³ካብ   መጻወድያ   ሃዳናይ፡

ካብ   ዘጥፍእ   ፌራ   ኸናግፈካ   እዩ   እሞ፡

 ⁴ብግልግለኡ   ኸጐልብበካ፡

ኣብ   ትሕቲ   ኣኽናፉ   ኸኣ   መጸግዒ   ኽትረክብ   ኢኻ፡

ሓቁ   ዋልታን   ጸግዕን   እዩ። 

⁵ካብ   ስምባድ   ለይቲ፡

ካብቲ   ብመዓልቲ   ዝውርወር   ፍላጻ፡

⁶ካብቲ   ብጸልማት   ዝኸይድ   ፌራ፡

ብቐትሪ   ዘባድም   ሕማም   ኣይክትፈርህን   ኢኻ። 

⁷ኣብ   ጥቓኻ   ሽሕ፡   ኣብ   የማንካውን   እልፊ   ኽወድቁ   እዮም፡

ኣባኻ   ግና   ኣይክበጽሕን   እዩ። 

⁸በዒንትኻ   ጥራይ   ክትጥምቶ፡

ረሲኣን   ዝረኽብዎ   መስጣውን   ክትርኢ   ኢኻ። 

     ⁹ጐይታይ፡   ንስኻ   መዕቈብየይ   ኢኻ፡   ኢልካ   ኢኻ   እሞ፡

ንልዑልሲ   መጸግዒኻ   ስለ   ዝገበርካዮ፡ 

¹⁰እከይ   ዘበለ   ኣይክረኽበካን፡

ስቓይውን   ኣብ   ድንኳንካ   ኣይክቐርብን   እዩ። 

¹¹ኣብ   ኵሉ   መገድኻ   ኽሕልዉኻ፡

ንመላእኽቱ   ኽእዝዘልካ   እዩ   እሞ፡ 

¹²እግርኻ   ብእምኒ   ኸይትዕንቀፍሲ፡

ኣብ   ልዕሊ   ኣእዳዎም   ክጾሩኻ   እዮም። 

¹³ኣብ   ልዕሊ   ኣንበሳን   ተመንን   ክትከይድ፡

ሽደን   አንበሳን   ገበልን   ክትረግጽ   ኢኻ። 

     ¹⁴ኣጥቢቑ   ስለ   ዘፍቀረኒ፡   ከናግፎ፡

ንስመይ   ስለ   ዝፈለጦ፡   ከልዕሎ   እየ። 

¹⁵ክጽውዓኒ   ኣነውን   ክመልሰሉ፡

ብጸበባ   ምስኡ   ክኸውን፡   ከናግፎን   ከኽብሮን   እየ። 

¹⁶ነዊሕ   ዕድመ   ኸጽግቦ፡

ምድሓነውይን   ከርእዮ   እየ።

ዝ/መዛ.   ብ/ኪ   ሓ/ኪ

       መበል 92 መዝሙር።            

መዝሙር   ምስጋና   ንመዓልቲ   ሰንበት።

     ^1-3ኣታ   ልዑል፡   ንግሆ   ሳህልኻ፡

ለይቲውን   እምነትካ   ምውራይ፡

ዓሰርተ   ኣውታር   ብዘለዎ   በገናን   ብጭራን  

ብምውቃዕ   መሰንቆን   ንእግዚኣብሄር   ምምስጋን፡

ንስምካ   ምዝማር   ሰናይ   እዩ።

 ⁴ዎ   እግዚኣብሄር፡   ብግብርታትካ   ኣሐጒስካኒ   ኢኻ   እሞ፡

ብዛዕባ   ተግባር   ኣእዳውካ   እልል   ክብል   እየ። 

⁵ዎ   ጐይታይ፡   ግብርኻ   ኸመይ   ዓብዪ   እዩ፡

ሓሳብካ   ኣዝዩ   ዓሚቕ   እዩ።

⁶ዳንደ   ኣይፈልጦን፡

ዓሻውን   ኣየስተውዕሎን   እዩ። 

⁷ረሲኣን   ከም   ሳዕሪ   እንተ   ለምለሙ፡

ኵሎም   ገበርቲ   እከይውን   እንተ   ዓምበቡ፡

ንሓዋሩ   ምእንቲ   ኽጠፍኡ   እዩ። 

⁸ጐይታየ፡   ንስኻ   ግና   ንዘለኣለም   ልዑል   ኢኻ።

⁹ጐይታየ፡   እንሆ   ጸላእትኻ፡

እነዉ   ጸላእትኻ   ይጠፍኡ   ኣለዉ   እሞ፡

ኵሎም   ገበርቲ   እከይ   ክብተኑ   እዮም። 

¹⁰ግናኸ   ንቐርነይ   ከም   ናይ   ጎባይ   ኣልዓልካዮ፡

ብሓድሽ   ዘይቲ   ተቐባእኩ። 

¹¹ዓይነይ   ድማ   ነቶም   ተጻረርተይ   ባህ   ኢልዋ   ትምልከቶም፡

ኣእዛነይውን   ብናይቶም   ዝትንስኡኒ   ኽፉኣት   ተሓጒሰን   ይሰምዓ። 

     ¹²ጻድቕ   ከም   ስየ   ይልምልም፡

ከም   ጽሕዲ   ሊባኖስ   ይዓቢ። 

¹³እቶም   ኣብ   ቤት   እግዚኣብሄር   እተተኽሉ  

ኣብ   ኣጸድ   ኣምላኽና   ይልምዑ። 

¹⁴እግዚኣብሄር   ጻድቕ   ምዃኑ   ምእንቲ   ኸውርዩስ፡

ብእርግናኦም   ድማ   ይፈርዩ፡

ይውረዩን   ይልምዑን።  

እግዚኣብሄር   ከውሐይ   እዩ፡

ኣብኡውን   ዓመጻ   የልቦን።

ዝ/መዛ.   ብ/ኪ   ሓ/ኪ

       መበል 93 መዝሙር።
            

     ¹እግዚኣብሄር   ነጊሱ፡   ግርማ   ለቢሱ፡

እግዚኣብሄር   ለቢሱ፡   ሓይሊ   ተዓጢቑ   ኣሎ፡

ዓለም   ከይትናወጽሲ፡   ኣጽኒዕዋ   ኣሎ። 

²ዝፋንካ   ኻብ   ጥንቲ   ጽኑዕ   እዩ፡

ንስኻ   ኻብ   ዘለኣለም   ኢኻ። 

³ጐይታየ፡   ወሓይዝ   ኣልዓሉ፡

ወሓይዝ   ድምጾም   ኣልዓሉ፡

ወሓይዝ   ህማሞም   ኣልዓሉ።

 ⁴ካብ   ድምጺ   ብዙሕ   ማያት፡

ካብ   ስልጡን   ማዕበላት   ባሕሪ፡

እግዚኣብሄር   ኣብ   ላዕሊ   ይስልጥን።

     ⁵ምስክራትካ   ኣዝዩ   እሙን   እዩ፡

ጐይታየ፡   ንቤትካስ   ንዘለኣለም   ቅድስና   ይግባእ።

ዝ/መዛ.   ብ/ኪ   ሓ/ኪ

       መበል 94 መዝሙር።  
          

     ¹ዎ   እግዚኣብሄር   ኣምላኽ   ሕነ፡

ኣታ   ኣምላኽ   ሕነ፡   ኣንጸባርቕ። 

²ኣታ   ፈራድ   ምድሪ፡   ተንስእ፡

ንዕቡያት   ከም   ግብሮም   ፍደዮም። 

³ክሳዕ   መኣዝ   እቶም   ረሲኣን፡

ጐይታየ፡   ክሳዕ   መኣዝ   ረሲኣን   ክዕወቱ   እዮም፧

⁴ዘረባ   ድርቅና   የፈልፍሉ፡

ኵሎም   ገበርቲ   እከይ   ይጀሃሩ   ኣለዉ። 

⁵ዎ   እግዚኣብሄር፡   ንህዝብኻ   ይቕጥቅጥዎ፡

ንርስትኻውን   የጨንቕዎ   ኣለዉ። 

     ⁶ንመበለትን   ስደተኛን   ይቐትሉ፡

ንዘኽታማት   ከኣ   ይሓርዱ   እዮም   እሞ፡ 

⁷እግዚኣብሄር   ኣይርእዮን፡

ኣምላኽ   ያእቆብ   ኣየስተብህሎን   እዩ፡   ይብሉ   ኣለዉ። 

⁸ኣቱም   ዳንደታት   ህዝቢ፡   ኣስተውዕሉ፡

ኣቱም   ዓያሱ፡   መኣዝ   ኢኹም   እትልብሙ፧

⁹እዝኒ   ዝተኸለስ   ኣይሰምዕንዶ፧  

ዓይኒ   ዝፈጠረስ   ኣይርእይንዶ   እዩ፧ 

¹⁰ነህዛብ   ዝቐጽዕ፡

ፍልጠት   ንሰብ   ዝምህር   ኣይግስጽንዶ   እዩ፧ 

     ¹¹እግዚኣብሄር   ንሓሳባት   ሰብ   ከንቱ   ምዃኑ   ይፈልጦ   እዩ።

^12-13ዎ   እግዚኣብሄር፡   ጉድጓድ   ንረሲእ   ክሳዕ   ዝኵዓት፡

እቲ   ኻብ   መዓልቲ   መከራ   ኸተህድኦ   ኢልካ፡   እትቐጽዖን  

ብሕግኻ   እትምህሮን   ሰብ   ብጹእ   እዩ። 

¹⁴እግዚኣብሄር   ንህዝቡ   ኣይክድርብዮን፡

ንርስቱ   ኸኣ   ኣይክሓድጎን   እዩ። 

¹⁵ፍርዲ   ኣብ   ጽድቂ   ኽምለስ   እዩ   እሞ፡

ኵሎም   ቅኑዓት   ልቢ   ኽስዕብዎ   እዮም። 

¹⁶ኣብቶም   ገበርቲ   ኽፉእ   መን   ይትንስአለይ፧  

ኣብቶም   ዓመጸኛታትከ   መን   ይቘመለይ፧ 

     ¹⁷እግዚኣብሄር   ረዲኤተይ   ነይሩ   እንተ   ዘይከውንሲ፡

ነፍሰይ   ኣብ   ስቕታ   ንምሕዳር   ምቐረበት   ነይራ። 

¹⁸ጐይታየ፡   እግረይ   ኣንደልሃጸ   ምስ   በልኩ፡

ጸጋኻ   ደገፈኒ። 

¹⁹ጓሂ   ልበይ   ኣብ   ውሽጠይ   ምስ   በዝሐ፡

ምጽንናዕካ   ንነፍሰይ   ኣሐጐሳ። 

²⁰ከም   ሕጊ   ኢና፡   እናበሉ   ዓመጽ   ዝገብሩሉ  

መንበር   ጥፍኣትዶ   ምሳኻ   ሕብረት   ኣለዎ   እዩ፧ 

²¹ንነፍሲ   ጻድቕ   ሓቢሮም   ይወድቅዋ፡

ንንጹህ   ደም   ድማ   ይዅንንዎ   ኣለዉ። 

²²እግዚኣብሄር   ግና   በሪኽ   መጸግዕየይ፡

ኣምላኸይ   ድማ   ከውሒ   መዕቈብየይ   እዩ። 

²³ዓገቦም   ኣብ   ርእሶም   ይመልስ፡

ብእከዮም   ከኣ   ኸጥፍኦም   እዩ።  

እግዚኣብሄር   ኣምላኽና   ኸጥፍኦም   እዩ።

ዝ/መዛ.   ብ/ኪ   ሓ/ኪ

       መበል 95 መዝሙር።  
          

     ¹ንዑ፡   ንእግዚኣብሄር   ብሓጐስ   ንዘምር፡

ንኸውሒ   ምድሓንና   እልል   ንበለሉ፡ 

²ብምስጋና   ኣብ   ቅድሚኡ   ንብጻሕ፡

ብመዝሙር   እልል   ንበለሉ፡ 

     ³እግዚኣብሄር   ዓብዪ   ኣምላኽ፡

ኣብ   ልዕሊ   ዅሎም   ኣማልኽቲ   ድማ  

ዓብዪ   ንጉስ   እዩ   እሞ፡ 

⁴መዓሙቑ   ምድሪ   አብ   ኢዱ፡

ምብራኽ   ኣኽራን   ከኣ   ናቱ   እዩ።

⁵ባሕሪ   ናቱ   እዩ፡   ንሱ   ፈጠሮ፡

ንንቑጽ   ምድሪውን   ኣእዳዉ   ገበራኦ። 

⁶ንዑ፡   ፍግም   ኢልና   ንስገድ፡

አብ   ቅድሚ   እግዚኣብሄር፡   ፈጣሪና፡   ንንበርከኽ። 

     ⁷ንሱ   ኣምላኽና   እዩ፡

ንሕና   ድማ   ህዝቢ   መጓሰኡ፡

ኢዱ   እትኽብክበን   ኣባጊዑ   ኢና   እሞ፡

ሎሚ   ድምጹ   እንተ   ሰምዕኩም፡ 

^8-9ከም   አብ   መሪባ፡   ከምቲ   ብመዓልቲ   ማሳ   ኣብ   በረኻ፡

ኣቦታትኩም   ክፍትኑኒ፡   ክዕዘቡኒ   ኸለዉ፡

ግብረይ   ዝረአዩ   ዄንኩም፡   ልብኹም   ኣይተትርሩ። 

¹⁰በቲ   ወለዶ   እቲ   ኣርብዓ   ዓመት   ተመነወኒ፡

መገደይ   ዘይፈለጡ፡

ብልቦም   እተጋገዩ   ህዝቢ   እዮም፡   በልኩ። 

¹¹ስለዚ፡   ኣብ   ዕረፍተይ   ኣይክኣትዉን   እዮም፡

ኢለ   ብዅራይ   መሓልኩ።

ዝ/መዛ.   ብ/ኪ   ሓ/ኪ

       መበል 96 መዝሙር።
            

     ¹ንእግዚኣብሄር   ሓድሽ   መዝሙር   ዘምሩ፡

ኵልኺ   ምድሪ፡   ንእግዚኣብሄር   ዘምሪ። 

²ንእግዚኣብሄር   ዘምሩ፡   ንስሙ   ባርኹ፡

ካብ   መዓልቲ   ንመዓልቲ   ምድሓኑ   ኣበስሩ። 

³ክብሩ   ኣብ   ማእከል   ኣህዛብ፡

ተኣምራቱ   ኣብ   ማእከል   ኵሎም   ህዝብታት   ኣዘንትዉ። 

     ⁴እግዚኣብሄር   ዓብዪ፡

ምስጋናኡ   ኸኣ   ኣዝዩ   ብዙሕ   እዩ   እሞ፡

ካብ   ኵሎም   ኣማልኽቲ   ዘፍርህ   እዩ። 

⁵ኵሎም   ኣማልኽቲ   ኣህዛብ   ከንቱ   እዮም፡

እግዚኣብሄር   ግና   ሰማያት   ገበረ። 

⁶ግርማን   ክብረትን   ኣብ   ቅድሚኡ፡

ሓይልን   ጽባቐን   ኣብ   መቕደሱ   እዩ። 

     ⁷ኣቱም   ዓሌታት   ኣህዛብ፡   ንእግዚኣብሄር   ሃቡ፡

ክብርን   ሓይልን   ንእግዚኣብሄር   ሃብዎ። 

⁸ንእግዚኣብሄር   ክብሪ   ስሙ   ሃቡ፡

መስዋእቲ   ሒዝኩም   ናብ   ኣጸዱ   እተዉ። 

⁹ንእግዚኣብሄር   ብቕዱስ   ክብረት   ስገዱ፡

ኵልኺ   ምድሪ፡   ኣብ   ቅድሚኡ   ኣንቀጥቅጢ። 

¹⁰ኣብ   ማእከል   ኣህዛብ፡   እግዚኣብሄር   ነጊሱ፡

ዓለምውን   ከይትናቓነቕ   ጸኒዓ   ኣላ፡

ነህዛብ   ብቕንዕና   ኽፈርዶም   እዩ፡   ኢልኩም   ንገሩ። 

     ¹¹ሰማያት   ይተሓጐሱ፡   ምድሪውን   ባህ   ይበላ፡

ባሕርን   ምልኣቱን   ይናወጽ። 

^12-13ይመጽእ፡   ንምድሪ   ኽፈርድ   ይመጽእ፡

ንዓለም   ብጽድቂ፡   ነህዛብ   ብሓቂ   ኽፈርድ   እዩ   እሞ፡

መሮርን   ኣብኡ   ዘሎ   ዅሉን   ባህ   ይበሎም፡

ሽዑ   ዅላቶም   ኣእዋም   ዱር  

ኣብ   ቅድሚ   እግዚአብሄር   እልል   ክብሉ   እዮም።

ዝ/መዛ.   ብ/ኪ   ሓ/ኪ

       መበል 97 መዝሙር።
            

     ¹እግዚኣብሄር   ነጊሱ፡   ምድሪ   ትተሐጐስ፡

እቶም   ብዙሓት   ደሴታት   ባህ   ይበሎም። 

²ደበናን   ጸልማትን   ይኸብዎ፡

ጽድቅን   ፍርድን   መሰረት   ዝፋኑ   እዩ። 

³ሓዊ   ቐቅድሚኡ   ይኸይድ፡

ንጸላእቱ   አብ   ዙርያኡ   የንድዶም። 

⁴መባርቑ   ንዓለም   አብርሄ፡

ምድሪ   ርእያቶ   አንቀጥቀጠት። 

⁵አኽራን   አብ   ቅድሚ   እግዚኣብሄር፡

አብ   ቅድሚ   እቲ   ጐይታ   ዅሉ  

ምድሪ   ኸም   ስምዒ   መኸኹ። 

⁶ሰማያት   ንጽድቁ   አውረዩ፡

ኵሎም   አህዛብ   ድማ   ክብሩ   ረአዩ። 

     ⁷ንምስልታት   ዚሰግዱን

ብጣኦታት   ዚምክሑን   ኵሎም   ይሕፈሩ።

   ኵሉኹም   አማልኽቲ፡   አብ   ቅድሚኡ   ፍግም   በሉ። 

^8-9ዎ   እግዚኣብሄር፡   ንስኻ  

አብ   ልዕሊ   ዅሉ   ምድሪ   ልዑል   ኢኻ፡

አብ   ልዕሊ   ዅሎም   አማልኽቲ   ኣዚኻ   ልዑል   ኢኻ   እሞ፡

ዎ   እግዚኣብሄር፡   ጽዮን   ሰሚዓ   ተሐጐሰት፡

ኣዋልድ   ይሁዳውን   ብዛዕባ   ፍርድኻ   እልል   በላ። 

     ¹⁰ኣቱም   ንእግዚኣብሄር   እተፍቅርዎ፡   እከይ   ጽልኡ፡

ነፍሲ   ቕዱሳኑ   ይሕሉ፡

ካብ   ኢድ   ረሲኣን   የናግፎም። 

¹¹ብርሃን   ንጻድቃን፡   ደስታ   ኸኣ   ንቕኑዓት   ልቢ   ተዘርኤ። 

¹²ኣቱም   ጻድቃን፡   ብእግዚኣብሄር   ተሐጐሱ፡

ንቕዱስ   ስሙውን   አመስግንዎ።

ዝ/መዛ.   ብ/ኪ   ሓ/ኪ

       መበል 98 መዝሙር።            

ማህሌት።

     ¹እግዚኣብሄር   ተኣምራት   ገይሩ፡

የማነይቱን   እቲ   ቅዱስ   ቅልጽሙን   ስዒሮም   እዮም   እሞ፡

ሓድሽ   መዝሙር   ዘምሩሉ። 

²እግዚኣብሄር   ምድሓኑ   ኣፍለጠ፡

ጽድቁ   ኣብ   ቅድሚ   ኣህዛብ   ገለጸ። 

³ሳህሉን   እምነቱን   ንቤት   እስራኤል   ዘከረ፡

ኵሉ   ወሰናት   ምድሪ   ንምድሓን   ኣምላኽና   ረአየ። 

     ⁴ኣቲ   ምድሪ   ዅልኺ፡   ንእግዚኣብሄር   እልል   በሊ።

ብሓጐስ   ጨድሩን   ኣመስግኑን። 

⁵ንእግዚኣብሄር   ብመሰንቆ፡

እወ፡   ብመሰንቆን   ብደሃይ   በገናን   ኣመስግንዎ። 

⁶ኣብ   ቅድሚ   ንጉስ፡   ኣብ   ቅድሚ   እግዚኣብሄር፡

ብእምብልታን   ቃና   መለኸትን   እልል   በሉ። 

     ⁷ባሕርን   ምልኣቱን፡   ዓለምን   ኣብኣ   ዘሎን   የድህዩ።

^8-9ንምድሪ   ኽፈርድ   ይመጽእ፡

ንሱ   ንዓለም   ብጽድቂ፡

ነህዛብውን   ብቕንዕና   ኽፈርዶም   እዩ   እሞ፡

ወሓይዝ   ኣእዳዎም   የጣቕዑ፡

ኣኽራን   ሓቢሮም   ኣብ   ቅድሚ   እግዚኣብሄር  

ብሓጐስ   ይዘምሩ።

ዝ/መዛ.   ብ/ኪ   ሓ/ኪ

       መበል 99 መዝሙር። 
           

     ¹እግዚኣብሄር   ነጊሱ፡ኣህዛብ   ይርዓዱ፡

ኣብ   ልዕሊ   ኪሩቤል   ተቐሚጡ፡

ምድሪ   ተንቀጥቅጥ። 

²እግዚኣብሄር   ኣብ   ጽዮን   ዓብዪ   እዩ፡

ኣብ   ኵሎም   ኣህዛብ   ልዑል   እዩ። 

³ቅዱስ   እዩ   እሞ፡

ነቲ   ዓብይን   ዘፍርህን   ስምካ   የመስግንዎ። 

     ⁴ሓይሊ   ንጉስ   ድማ   ፍርዲ   ይፈቱ   እዩ፡

ንስኻ   ቕንዕና   ኣጽናዕካ፡

ፍርድን   ጽድቅን   ኣብ   ቤት   ያእቆብ   ገበርካ። 

⁵ንእግዚኣብሄር   ኣምላኽና   ልዕል   ኣብልዎ፡

ቅዱስ   እዩ   እሞ፡   ኣብ   ድኳ   እግሩ   ስገዱ። 

     ⁶ሙሴን   ኣሮንን   ኣብ   ማእከል   ካህናቱ፡

ሳሙኤል   ከኣ   ኣብ   ማእከል   እቶም   ስሙ   ዝጽውዑ  

ናብ   እግዚኣብሄር   ተማህለሉ፡

ንሱውን   መለሰሎም። 

⁷ብዓንዲ   ደበና   ተዛረቦም፡

ንምስክራቱን   ነቲ   ዝሃቦም   ሕግን   ሓለዉ። 

⁸እግዚኣብሄር   ኣምላኽና   ንስኻ   መለስካሎም፡

ይቕረ   እትብል   ኣምላኽ   ኰንካዮም፡

ግናኸ   ስለ   ኽፉእ   ግብሮም   ሕነ   ፈደኻዮም። 

⁹ንእግዚኣብሄር   ኣምላኽና   ልዕል   ኣብልዎ፡

እግዚኣብሄር   ኣምላኽና   ቅዱስ   እዩ   እሞ፡

ኣብ   ቅዱስ   ከረኑውን   ስገዱ።

ዝ/መዛ.   ብ/ኪ   ሓ/ኪ

       መበል 100 መዝሙር።            

መዝሙር   ምስጋና።

     ¹ኵልኺ   ምድሪ፡   ንእግዚኣብሄር   እልል   በልሉ።

 ²ንእግዚኣብሄር   ብሓጐስ   ተገዝእዎ፡

ኣብ   ቅድሚኡ   ብእልልታ   ምጹ። 

³እግዚኣብሄርሲ   ኣምላኽ   ምዃኑ   ፍለጡ፡

ንሱ   ገበረና፡   ባዕላትና   ኣይኰንናን፡

ንሕናስ   ህዝቡን   ኣባጊዕ   መጓሴኡን   ኢና። 

     ⁴ኣብ   ደጌታቱ   ብምስጋና፡

ኣብ   ኣጸዱውን   ብውዳሴ   እተዉ፡

ኣመስግንዎ   ንስሙ   ኸኣ   ባርኹ። 

⁵እግዚኣብሄር   ሰናይ   እዩ   እሞ፡   ጸጋኡ   ንዘለኣለም፡

እምነቱ   ኸኣ   ንውሉድ   ወለዶ   ይነብር።

ዝ/መዛ.   ብ/ኪ   ሓ/ኪ

       መበል 101 መዝሙር።            

ናይ   ዳዊት   መዝሙር።

     ¹ብዛዕባ   ጸጋን   ፍርድን   ክዝምር፡
ዎ   እግዚኣብሄር፡   ምስጋና   ኽዝምረልካ   እየ። 

²ብፍጽምቲ   መገዲ   እጣበብ   ኣሎኹ፡

—   መኣዝ   ክትመጸኒ   ኢኻ፡   —

   ኣብ   ውሽጢ   ቤተይ   ብፍጹም   ልበይ   እመላለስ   ኣሎኹ። 

     ³ኣብ   ቅድሚ   ዓይነይ   ገለ   ነውሪ   ኣየንብርን፡

ንግብሪ   ብልያል   እጸልኦ   ኣሎኹ፡

ኣይክጠብቀንን   እዩ። 

⁴ቄናን   ልቢ   ኻባይ   ይርሓቕ፡

ንኽፉእ   ክፈልጦ   ኣይደልን። 

⁵ነቲ   ንብጻዩ   ብሕቡእ   ዝሓሚ   አጥፍኦ፡

ነቲ   ዕቡይ   ዓይንን   ኵሩዕ   ልብን   ዘለዎ   ኣይዕገሶን   እየ። 

⁶ምሳይ   ክነብሩስ፡

ኣዒንተይ   ኣብቶም   ናይ   ሃገር   እሙናት   እየን፡

እቲ   ብፍጽምቲ   መገዲ   ዝመላለስ   ከገልግለኒ   እዩ። 

⁷ተንኰል   ዝገብር   ኣብ   ውሽጢ   ቤተይ   ኣይነብርን፡

ሓሶት   ዝዛረብ   ኣብ   ቅድሚ   ኣዒንተይ   ኣይጸንዕን   እዩ። 

⁸ንዓመጸኛታት   ካብ   ከተማ   እግዚኣብሄር   ከጽንትሲ፡

ንዅሎም   ረሲኣን   ምድሪ   ንግሆ   ንግሆ   ኸጥፍኦም   እየ።

ዝ/መዛ.   ብ/ኪ   ሓ/ኪ

        መበል 102 መዝሙር።            

ሽጉር   ትጨኒቑ   ኸሎ፡   ጸገማኡ   ኣብ   ቅድሚ   እግዚኣብሄር   ብጸሎት   ዘፍሰሶ።

     ¹ጐይታየ፡   ጸሎተይ   ስማዕ፡

ኣውያተይውን   ኣባኻ   ይብጻሕ። 

²ብመዓልቲ   ጸበባይ   ገጽካ   ኣይትኸውለለይ፡

እዝንኻ   ኣድንነለይ፡

በታ   ዘእውየላ   መዓልቲ   ቐልጢፍካ   ምለሰለይ። 

     ³መዓልትታተይ   ከም   ትኪ   ይበና   ኣለዋ   እሞ፡

ኣዕጽምተይ   ከኣ   ከም   እያድ   ይነድድ   ኣሎ። 

⁴ምብላዕ   እንጌራይ   ረሲዔዮ   እየ   እሞ፡

ልበይ   ከም   ሳዕሪ   ጸምለወን   ነቐጸን። 

⁵ካብ   ድምጺ   ገዓረይ   እተላዕለ   ኣዕጽምተይ   ኣብ   ስጋይ   ተጣበቐ። 

⁶ኣባ   ጉምባሕ   በረኻ   መሰልኩ፡

ከም   ጉንጓ   ዑናታት   ኰንኩ። 

⁷ተጋህኩ፡   ከምቲ   ኣብ   ናሕሲ   በይኑ   ዘሎ   ዑፍ   ከኣ   እየ። 

     ⁸ምሉእ   መዓልቲ   ጸላእተይ   የላግጹለይ፡

ተጻረርተይ   ብስመይ   ይረግሙ   ኣለዉ። 

⁹ንሓመዅስቲ   ኸም   እንጌራ   እበልዖ   ኣሎኹ   እሞ፡

ንመስተይ   ምስ   ንብዓት   እሕውሶ   ኣሎኹ። 

¹⁰ብምኽንያት   ኵራኻን   ቁጥዓኻን  

ኣልዒልካ   ደርቢኻኒ   ኢኻ   እሞ፡ 

¹¹መዓልትታተይ   ከም   ዝነውሕ   ጽላሎት   እየን፡

ኣነውን   ከም   ሳዕሪ   እነቅጽ   ኣሎኹ። 

     ¹²ዎ   እግዚኣብሄር፡   ንስኻ   ግና   ንዘለኣለም   ትነብር፡

መዘከርታኻውን   ንውሉድ   ወለዶ   እዩ። 

^13-14ግዜ   ምሕረታ   እዩ፡   እቲ   ምዱብ   ግዜ   በጺሑ፡

ባሮትካ   ነእማና   ኣፍቂሮም፡

ብሓመዳ   ኸኣ   ጕህዮም   እዮም   እሞ፡

ክትትንስእ   ንጽዮንውን   ክትርሕርሓላ   ኢኻ። 

¹⁵ኣህዛብ   ከኣ   ንስም   እግዚኣብሄር፡

ኵሎም   ነገስታት   ምድሪ   ድማ   ንኽብርኻ   ኽፈርሁ   እዮም። 

     ¹⁶እግዚኣብሄር   ንጽዮን   ክሃንጻ፡

ብኽብሩ   ኽግለጽ   እዩ። 

¹⁷ኣብ   ጸሎት   ሽጉራት   ከቕልብ፡

ንጸሎቶምውን   ኣይክንዕቕን   እዩ   እሞ፡ 

¹⁸እዚ   ነቲ   ዝመጽእ   ወለዶ   ኽጽሓፍ፡

እቲ   ዝፍጠር   ህዝቢውን   ንእግዚኣብሄር   ከመስግኖ   እዩ። 

^19-22ኵሎም   ኣህዛብን   መንግስትታትን  

ኣብ   ጽዮን   ንስም   እግዚኣብሄር  

ኣብ   የሩሳሌም   ድማ   ንምስጋናኡ   ኽነግሩ   ኢሎም፡

ንእግዚኣብሄር   ከገልግልዎ   ምስተኣከቡ፡

እግዚኣብሄር   ንብኽያት   እሱራት   ክሰምዕ፡

ነቶም   ንሞት   እተመደቡ   ምእንቲ   ኽፈትሖም  

ካብ   ልዕልና   መቕደሱ   ረኣየ፡

ካብ   ሰማይ   ናብ   ምድሪ   ኣንቈልቁሉ   ጠመተ። 

     ²³ንሓይለይ   ኣብ   መገዲ   ኣድከሞ፡

ንመዓልትታተይ   ኣሕጸረን። 

²⁴ኣምላኸየ፡   ኣብ   ፍርቂ   መዓልትታተይ  

ኣይትውሰደኒ፡   በልኩ።  

ዓመታትካ   ንውሉድ   ወለዶ   እዩ። 

²⁵ካብ   ጥንቲ   ንምድሪ   ሰረትካያ፡

ሰማያት   ከኣ   ግብሪ   ኣእዳውካ   እዮም። 

²⁶ንሳቶም   ክጠፍኡ   እዮም፡   ንስኻ   ግና   ትነብር፡

ኵላቶም   ከም   ክዳን   ክበልዩ   እዮም፡

ከም   ልብሲ   ኽትልውጦም   ኢኻ፡   ክልወጡውን   እዮም። 

²⁷ንስኻ   ግና   ከም   ቀደምካ   ኢኻ፡

ዓመታትካውን   ከቶ   ኣይውዳእን። 

²⁸ውሉድ   ባሮትካ   ኽነብሩ፡

ዘርኦም   ከኣ   ኣብ   ቅድሜኻ   ኽጸንዕ   እዩ።

ዝ/መዛ.   ብ/ኪ   ሓ/ኪ

        መበል 103 መዝሙር።            

ናይ   ዳዊት።

     ¹ነፍሰይ፡   ንእግዚኣብሄር   ባርኺ፡

ኣብ   ውሽጠይ   ዘሎ   ዅሉውን   ንቕዱስ   ስሙ   ይባርኽ። 

²ነፍሰይ፡   ንእግዚኣብሄር   ባርኺ፡

ነቲ   እተገብረልኪ   ሰናይ   ኵሉ   ኸኣ   ኣይትረስዒ፡ 

³ንሱ   ንዅሉ   ኣበሳኺ   ዝሓድገልኪ፡

ንዅሉ   ሕማምኪ   ዝፍውስ፡ 

⁴ንህይወትኪ   ኻብ   ጥፍኣት   ዝብጀዋ፡

ብሳህልን   ምሕረትን   ዝኽልለኪ፡ 

⁵ንድሌትኪ   ብጽቡቕ   ነገር   ዘጽግብ   እዩ፡

ንእስነትኪውን   ከም   ንስሪ   ትሕደስ። 

⁶እግዚኣብሄርሲ   ንዅሎም   ጥቑዓት

ጽድቅን   ፍትሕን   ይገብር   እዩ። 

⁷መገድታቱ   ንሙሴ፡

ግብርታቱ   ንደቂ   እስራኤል   ኣፍለጠ። 

⁸እግዚኣብሄር   ርሕሩሕን   መሓርን   እዩ፡

ንዅራ   ደንጓዪ፡   ብሳህሊ   ድማ   ምሉእ   እዩ። 

⁹ኵሉ   ግዜ   ኣይገንሕን፡

ንዘለኣለም   ከኣ   ኣይቅየምን   እዩ። 

¹⁰ከም   መጠን   ሓጢኣትና   ኣይገብረናን፡

ከም   መጠን   ኣበሳና   ድማ   ኣይፈድየናን   እዩ። 

     ¹¹ሰማይ   ካብ   ምድሪ   ልዕል   ከም   ዝብል፡

ከምኡ   ምሕረቱ   ናብቶም   ዝፈርህዎ   ይስልጥን። 

¹²ምብራቕ   ካብ   ምዕራብ   ከም   ዝርሕቕ፡

ከምኡ   ንኣበሳና   ኻባና   ኣርሓቖ። 

¹³ከምቲ   ወላዲ   ንውሉዱ   ዝርሕርሓሎም፡

ከምኡ   እግዚኣብሄር   ንዝፈርህዎ   ይርሕርሓሎም   እዩ። 

     ¹⁴ፍጥረትና   ይፈልጥ   እዩ   እሞ፡

ሓመድ   ምዃንና   ይዝክር   እዩ። 

¹⁵ሰብሲ   መዓልትታቱ   ኸም   ሳዕሪ   እዩ፡

ከም   ዕምባባ   መሮር   ይዕምብብ። 

¹⁶ንፋስ   ኣብ   ልዕሊኣ   ይሓልፍ   እሞ፡

ከቶ   ኣይትርከብን   እያ፡

ቦታኣውን   ኣይፈልጣን   እዩ። 

     ¹⁷ምሕረት   እግዚኣብሄር   ግና

ኣብቶም   ዝፈርህዎ   ኻብ   ዘለኣለም   ንዘለኣለም   ትነብር። 

¹⁸ጽድቁ   ኸኣ   ነቶም   ኪዳኑ   ዝሕልዉ፡

ንትእዛዛቱ   ምእንቲ   ኽገብርዎ   ዝዝክርዎ  

ንውሉድ   ወለዶ   እዩ። 

     ¹⁹እግዚኣብሄር   ንዝፋኑ   ኣብ   ሰማይ   ኣቘመ፡

መንግስቱውን   ኣብ   ልዕሊ   ዅሉ   ትገዝእ   ኣላ። 

²⁰ኣቱም   መላእኽቱ፡   ንድምጺ   ቓሉ   እትእዘዙ፡

ንቓሉ   እትፍጽሙ   ሓያላትን   ስልጡናትን፡

ንእግዚኣብሄር   ባርኽዎ። 

²¹ኣቱም   ሰራዊቱ   ዅሉኹም፡

ኣቱም   ንፍቓዱ   እትፍጽምዎ   ኣገልገልቱ፡

ንእግዚኣብሄር   ባርኽዎ። 

²²ኵሉ   ግብርታቱ   አብ   ኵሉ   ስፍራ   ግዝኣቱ፡

ንእግዚኣብሄር   ባርኹ።  

ነፍሰየ፡   ንእግዚኣብሄር   ባርኺ።

ዝ/መዛ.   ብ/ኪ   ሓ/ኪ

        መበል 104 መዝሙር። 
           

     ¹ነፍሰይ፡   ንእግዚኣብሄር   ባርኺ፡

ዎ   እግዚኣብሄር   ኣምላኸይ፡   ንስኻ   ኣዚኻ   ዓብዪ   ኢኻ፡

ግርማን   ክብርን   ለበስካ። 

²ንብርሃን   ከም   ልብሲ   ለበስካዮ፡

ንሰማያት   ከም   መጋረጃ   ዘርጋሕካዮ፡ 

³ንርሻንካ   ኣብ   ማያት   ሃነጽካዮ፡

ንደበናስ   ሰረገላኻ   ገበርካ፡

ኣብ   ኣኽናፍ   ንፋስ   ኴንካ   ኼድካ። 

⁴ንንፋሳት   ልኡኻትካ፡

ንሃልሃልታ   ሓዊ   ኣገልገልትኻ   ገበርካዮም። 

     ⁵ንዘለኣለም   ከይትናወጽሲ፡

ንምድሪ   ኣብ   መሰረታ   ኣጽንዓ። 

⁶ከም   ብልብሲ   ብመዓሙቑ   ኣልበስካያ፡

ማያት   ኣብ   ልዕሊ   ኣኽራን   ቈሙ። 

⁷ብመግናሕትኻ   ሃደሙ፡

ብድምጺ   ነጐድጓድካ   ቐልጢፎም   ከዱ። 

⁸ኣብቲ   ዝመደብካሎም   ቦታ   ኣኽራን   ልዕል   በሉ፡

ለሴታትውን   ለጠቕ   በሉ። 

⁹ተመሊሶም   ንምድሪ   ኸይከድንዋስ፡

ዘይሓልፍዎ   ደረት   ወሰንካሎም። 

¹⁰ኣብ   ሽንጭሮታት   ዓይኒ   ማያት   ኣንታዕካ፡

ኣብ   መንጎ   ኣኽራን   ይውሕዛ። 

     ¹¹ንዅሉ   እንስሳ   መሮር   የስትያኦ፡

ኣእዱግ   በረኻ   ይረውዩለን። 

¹²ኣዕዋፍ   ሰማይ   ኣብ   ጥቓአን   ይነብራ፡

ካብ   ማእከል   ጨናፍር   ከኣ   ድምጸን   የስምዓ። 

¹³ነኽራን   ካብ   ርሻናትካ   ተስትዮ፡

ምድሪ   ብፍረ   ተግባርካ   ትጸግብ። 

^14-15ወይኒ   ንልቢ   ሰብ   ከሐጕሶ፡

ዘይቲ   ንገጹ   ኸብርሆ፡

እንጌራውን   ንልቢ   ሰብ   ከጽንዖስ፡

ካብ   ምድሪ   ምግቢ   ምእንቲ   ኸውጽእ፡

ንእንስሳስ   ሳዕሪ፡   ንጥቕሚ   ሰብ   ከኣ   ተኽሊ   ኣብቈልካ። 

     ¹⁶ኣእዋም   እግዚኣብሄርን  

እተን   ዝተኸልካየን   ጽሕድታት   ሊባኖስን   ጸገባ። 

¹⁷ኣዕዋፍ   ኣብኡ   እንዳአን   ይሰርሓ፡

ጽሕድታት   ንራዛ   ማሕደሪኡ   እየን። 

¹⁸ነዋሕቲ   ኣኽራን   ንሰሰውሕ፡

ኣኻውሕ   ድማ   መዕቈቢ   ጊሔታት   እዩ። 

     ¹⁹ወርሒ   ንመመደብ   ግዝያት   ገበረ፡

ጸሓይ   ንምዕራባ   ትፈልጥ። 

²⁰ጸልማት   ትገብር፡   ለይቲውን   ይኸውን፡

ብእኡ   ዅሎም   እንስሳ   ዱር   ይዛወሩ። 

²¹ሽደናት   ኣንበሳ   ንምዝራፍ   ይጓዝሙ፡

ቀለቦም   ከኣ   ካብ   ኣምላኽ   ይደልዩ። 

²²ጸሓይ   ትበርቕ፡   ይምለሱ፡

ኣብ   ጒድጓዶም   ድማ   ይድቅሱ። 

²³ሰብ   ናብ   ተግባሩን   ናብ   ዕዮኡን   ክሳዕ   ምሸት   ይወጽእ። 

     ²⁴ዎ   እግዚኣብሄር፡   ግብርታትካስ   ክንደይ   ብዙሕ   እዩ፡

ንዅሉ   ብጥበብ   ገበርካዮ፡

ምድሪ   ብሃብትኻ   መሊኣ   ኣላ። 

²⁵እታ   ዓባይን   ገፋሕን   ባሕሪ   እዚኣ   እያ፡

ቍጽሪ   ዘይብሎም   ዓበይትን   ናእሽቱን   እንስሳ  

ኣብኣ   ይዋሳወሱ   ኣለዉ። 

²⁶ኣብኣ   መራኽብ   ይኸዳ፡

እቲ   ዝፈጠርካዮ   ሌዋታን   ኣብኣ   ይጻወት። 

     ²⁷እዚኣቶም   ኵሎም   ምግቦም   በብግዜኡ   ኽትህቦምሲ፡

ንኣኻ   ይጽበዩ   ኣለዉ። 

²⁸ንስኻ   ትህቦም፡   ይእክቡ።  

ንስኻ   ኢድካ   ትዝርግሕ፡   ብጸጋውን   ይጸግቡ   ኣለዉ። 

²⁹ንስኻ   ገጽካ   ትኽውል፡   ይስምብዱ፡

ትንፋሶም   ተውጽእ፡   ይሞቱ፡

ኣብ   መሬቶምውን   ይምለሱ። 

³⁰ትንፋስካ   ትልእኽ፡   ይፍጠሩ፡

ንገጽ   ምድሪውን   ትሕድሳ። 

     ³¹ክብሪ   እግዚኣብሄር   ንዘለኣለም   ይንበር፡

እግዚኣብሄር   ብተግባሩ   ይተሓጐስ። 

³²ኣብ   ምድሪ   ይጥምት፡   ንሳ   ኸኣ   ተንቀጥቅጥ፡

ነኽራን   ይትንክዮም   እሞ   ይተኩ። 

³³ብህይወተይ   ከሎኹ፡   ንእግዚኣብሄር   እዝምር፡

ክሳዕ   ዘሎኹ   ንኣምላኸይ   አመስግን። 

³⁴ቃላተይ   ባህ   የብሎ፡   ብእግዚኣብሄር   እሕጐስ   እየ። 

³⁵ሓጥኣን   ካብ   ምድሪ   ይጥፍኡ፡

ረሲኣንውን   ደጊም   ኣይሃልዉ፡

ነፍሰየ፡   ንእግዚኣብሄር   ባርኽዮ   ሃሌሉያ።

ዝ/መዛ.   ብ/ኪ   ሓ/ኪ

        መበል 105 መዝሙር። 
           

     ¹ንእግዚኣብሄር   ኣመስግንዎ፡   ስሙ   ጸውዑ፡

ግብርታቱ   ኣብ   ማእከል   ኣህዛብ   ኣውርዩ። 

²ዘምሩሉ፡   ኣመስግንዎ፡

ብዛዕባ   ዅሉ   ተኣምራቱ   ተዛረቡ። 

³ብቅዱስ   ስሙ   ኽብሩ፡

ልቢ   እቶም   ንእግዚኣብሄር   ዝደልይዎ   ይተሓጐስ። 

⁴እግዚኣብሄርን   ሓይሉን   ድለዩ።  

አዘውቲርኩም   ገጹ   ድለዩ። 

^5-6ኣቱም   ዘርኢ   ኣብርሃም፡   እቲ   ባርያኡ፡

ኣቱም   ውሉድ   ያእቆብ፡   ሕሩያቱ፡

ዝገበሮ   መስትንክር   ግብርታቱን   ተኣምራቱን  

ፍርዲ   ኣፉን   ዘክሩ። 

     ⁷ንሱ   እግዚኣብሄር   ኣምላኽና   እዩ፡

ፍርዱ   ኣብ   ኵሉ   ምድሪ   እዩ። 

^8-9ነቲ   ምስ   ኣብርሃም   ዝኣተዎ   ኺዳኑ፡

ንይስሃቅውን   ዝመሓለሉ   ማሕላ፡

ነቲ   ንሽሕ   ወለዶ   ዝአዘዞ   ቓል   ንዘለኣለም   ዘኪሩስ፡ 

^10-11ምድሪ   ከነኣን፡   ዕድሎት   ርስትኹም   ክትከውን፡

ክህበካ   እየ፡   ኢሉ   ንያእቆብ   ከም   ሕጊ፡

ንእስራኤል   ከኣ   ከም   ናይ   ዘለኣለም   ኪዳን   ገይሩ   ኣቘሞ። 

¹²ብቑጽሪ   ሒደት፡   ኣዝዮም   ሒደት፡

ኣብኣውን   ስደተኛታት   ከለዉ፡ 

¹³ካብ   ህዝቢ   ናብ   ህዝቢ፡

ካብ   መንግስቲውን   ናብ   ካልእ   ህዝቢ   ኽሓልፉ   ኸለዉስ፡ 

^14-15ንሱ   ሰብ   ክጠቕዖም   ኣይሓደገን፡

ንቕቡኣተይ   ኣይትተንክይዎም፡

ነብያተይ   ድማ   ክፉእ   ኣይትግበርዎም፡

ኢሉ   ምእንትኦም   ንነገስታት   ገሰጾም። 

     ¹⁶ጥሜት   ናብ   ሃገር   ጸውዐ፡

ኵሉ   ምርኩስ   እንጌራ   ሰበረ። 

¹⁷ቀቅድሚኦም   ሰብኣይ   ለኣኸ፡

ዮሴፍ   ከም   ባርያ   ተሸጠ። 

¹⁸ነእጋሩ   ብመቑሕ   ሳቐዩ፡

ነፍሱ   ኣብ   ሓጺን   ኣተወት። 

¹⁹ቃሉ   ኽሳዕ   ዝፍጸም፡

ቃል   እግዚኣብሄር   ክሳዕ   ዝፍትኖ፡ 

²⁰ንጉስ   ልኢኹ   ኣፍትሖ፡

እቲ   ገዛእ   ኣህዛብ   ሓራ   ኣውጽኦ። 

^21-22ንመሳፍንቱ   ኸም   ፍቓዱ   ኽኣስሮም፡

ንሽማግሌታቱ   ኸኣ   ጥበብ   ክምህሮም፡

ጐይታ   ቤቱን   ኣዛዝ   ኵሉ   ጥሪቱን   ገበሮ። 

     ²³እስራኤል   ናብ   ግብጺ   መጸ፡

ያእቆብውን   ኣብ   ሃገር   ካም   ሰፈረ። 

²⁴ንህዝቡ   ኸኣ   ኣዝዩ   ኣብዝሖ፡

ካብ   ተጻረርቱውን   ኣበርትዖ። 

²⁵ንህዝቡ   ኽጸልእዎ፡

ንባሮቱ   ኽታናዀልዎምሲ፡   ልቦም   ለወጦ። 

²⁶ንሙሴ   ባርያኡን   ንኣሮን   ሕሩዩን   ለኣኸ። 

²⁷ኣብ   ማእከሎም   ትእምርትታቱ፡

ኣብ   ሃገር   ካም   ድማ   ተኣምራት   ገበሩ። 

²⁸ጸልማት   ለኣኸ፡   ኣጸልመተ   ኸኣ፡

ንቓላቱውን   ኣይተጻረርዎን። 

²⁹ማያቶም   ናብ   ደም   ለወጠ፡   ዓሳታቶም   ከኣ   ቐተለ። 

³⁰ናብ   ኣባይቲ   ነገስታቶም   ክሳዕ   ዝኣትዋ፡

ምድሮም   ብቑርዖብ   መልአት። 

³¹ተዛረበ   እሞ   ጽንጽያታት፡

ኣብ   ኵሉ   ወሰኖም   ከኣ   ቃርማ   መጹ። 

³²ኣብ   ክንዲ   ዝናምሲ   በረድ፡

ሃልሃልታ   ሓዊ   ኸኣ   ኣብ   ሃገሮም   ኣውረደ። 

³³ወይኖምን   በለሶምን   ወቕዐ፡

ኣእዋም   ዓዶም   ድማ   ሰባበረ። 

³⁴ተዛረበ   እሞ   ኣንበጣ፡   ቁጽሪ   ዘይብሉ   ኹብኩብታ   መጸ። 

³⁵ንዅሉ   ብቋልያ   ሃገሮም   በልዖ፡

ንፍረ   ምድሮም   ከኣ   በልዐ። 

³⁶ንዅሉ   በዅሪ   ሃገሮም፡   ንበዅሪ   ሓይሎም፡   ቀተለ። 

³⁷ብወርቅን   ብሩርን   ኣውጽኦም፡

ኣብ   ማእከል   ዓሌቱ   ኸኣ   ድኹም   ኣይነበረን። 

³⁸ፍርሃት   ወዲቕዎም   ነበረ   እሞ፡

ግብጺ   ብምውጻኦም   ተሓጐሰት። 

³⁹ደበና   ንመኸወልታ፡

ሓዊ   ድማ   ብለይቲ   ኸብርህ፡   ዘርግሐ። 

⁴⁰ለመኑ   እሞ   ብርኒጎታት   ኣምጽአ፡

ብእንጌራ   ሰማይውን   ኣጽገቦም። 

⁴¹ከውሒ   ኸፈተ   እሞ   ማያት   ፈልፈለ፡

ውሒዝ   ብንቑጽ   ቦታ   ወሓዘ። 

⁴²ነቲ   ቅዱስ   ቃሉን   ንኣብርሃም   ባርያኡን   ዘኪሩ   እዩ   እሞ፡ 

⁴³ንህዝቡ   ብሓጐስ፡

ነቶም   ሕሩያቱ   ድማ   ብእልልታ   ኣውጽኦም። 

^44-45ትእዛዛቱ   ኽገብሩ፡   ሕጉውን   ክሕልዉስ፡

ሃገር   ኣህዛብ   ሃቦም፡   ጻማ   ኣህዛብውን   ወረሱ።  

ሃሌሉያ።

ዝ/መዛ.   ብ/ኪ   ሓ/ኪ

        መበል 106 መዝሙር።   
         

     ¹ሃሌሉያ።

እግዚኣብሄር   ሰናይ   እዩ፡

ምሕረቱውን   ንዘለኣለም   ይነብር   እዩ   እሞ፡   ኣመስግንዎ። 

²ንግብርታት   ሓይሊ   እግዚኣብሄር   ክዛረቦ፡

ንብዘሎ   ምስጋናኡስ   ክነግሮ   መን   ይኽእል፧ 

³ፍርዲ   ዝሕልዉ፡

ኵሉ   ግዜ   ጽድቂ   ዝገብሩ   ብጹኣን   እዮም። 

^4-5ጐይታየ፡   በቲ   ንህዝብኻ   ዝሃብካዮ   ጸጋ   ዘክረኒ፡

ጣዕሚ   ሕሩያትካ   ኽርኢ፡

ብሓጐስ   ህዝብኻ   ኽሕጐስ  

ምስ   ርስትኻውን   ምእንቲ   ኽኸብርሲ፡

   ብምድሓንካ   ብጽሓኒ። 

     ⁶ምስ   ኣቦታትና   ሓጢኣት   ገበርና፡

በደልና፡   ግፍዒ   ገበርና። 

⁷ኣቦታትና   ኣብ   ግብጺ   ንተኣምራትካ   ኣየስተውዓልዎን፡

ንብዝሒ   ጸጋኻ   ኣይዘከርዎን፡

ኣብ   ባሕሪ፡   ኣብቲ   ባሕሪ   ኤርትራ፡   ዓለዉ። 

⁸ንሱ   ግና   ስልጣኑ   ምእንቲ   ኸፍልጥሲ፡

ስለ   ስሙ   ኢሉ   ኣድሓኖም። 

⁹ንባሕሪ   ኤርትራ   ገንሓ   እሞ   ነቐጸት፡

ከም   ብበረኻ   ድማ   ብዓሚቕ   መርሖም። 

¹⁰ካብ   ኢድ   ተጻራሪኦም   ኣድሓኖም፡

ካብ   ኢድ   ጸላኢ   ኸኣ   ተበጀዎም። 

¹¹ንተጻረርቶም   ከኣ   ማያት   ደፈኖም፡

ካብኦም   ሓደ   እኳ   ኣይተረፈን። 

     ¹²ሽዑ   ንቓላቱ   ኣመኑ፡

ምስጋናኡ   ዘመሩ። 

¹³ንተግባሩ   ቐልጢፎም   ረስዕዎ፡

ንምኽሩ   ኣይተጸበይዎን። 

¹⁴ኣብ   በረኻ   ኣዝዮም   ተመነዩ፡

ኣብቲ   ጽምዋ   ንእግዚኣብሄር   ፈተኑ። 

¹⁵ንሱ   ኸኣ   ዝለመንዎ   ሃቦም፡

ግናኸ   ንነፍሶም   ዕብራን   ለኣኸሎም። 

     ¹⁶ኣብቲ   ሰፈር   ንሙሴን  

ንኣሮን፡   ናይ   እግዚኣብሄር   ቅዱስን፡   ቀንኡሎም። 

¹⁷ምድሪ   ተኸፊታ   ንዳታን   ወሓጠቶ፡

ንወገን   ኣቢራም   ከኣ   ደፈነቶ። 

¹⁸ሓዊ   ኣብ   ማእከል   ወገኖም   ነደደ፡

ሃልሃልታ   ንረሲኣን   ወሓጦም። 

¹⁹ኣብ   ሆሬብ   ምራኽ   ገበሩ፡

ንዝፈሰሰ   ምስሊ   ኸኣ   ሰገዱሉ። 

²⁰ክብረቶም   ንምስሊ   ሳዕሪ   ዝበልዕ   ብዕራይ   ለወጥዎ። 

^21-22ኣብ   ግብጺ   ዓብዪ   ተግባር፡

ኣብ   ሃገር   ካም   ተኣምራት፡

ኣብ   ባሕሪ   ኤርትራ   ዘፍርህ   ነገር   ዝገበረ   ኣምላኽ፡

መድሓኒኦም፡   ረስዕዎ። 

     ²³ሽዑ   ኸጥፍኦም   ደልዩ   ተዛረበ፡

ግናኸ   ሙሴ፡   እቲ   ሕሩዩ፡

ከየጥፍኦም   ቁጥዓኡ   ምእንቲ   ኽመልስ፡

ኣብ   ቅድሚ   ገጹ   ኣብ   ማእከል   ቈመ። 

²⁴ነታ   ፍትውቲ   ሃገር   ነዓቑ፡

ብቓሉውን   ኣይኣመኑን። 

²⁵ኣብ   ድንኳናቶም   ኣጕረምረሙ፡

ንድምጺ   እግዚኣብሄር   ከኣ   ኣይሰምዕዎን። 

^26-27ሽዑ   ኢዱ   ናብኦም   ኣልዒሉ፡

ኣብ   በረኻ   ኸውድቖም፡

ንዘርኦም   ከኣ   ኣብ   ማእከል   ኣህዛብ   ከውድቖም፡

ኣብ   ሃገራትውን   ፋሕ   ከብሎም   መሓለ። 

²⁸ምስ   በዓል   ጴኦር   ሓበሩ፡

መስዋእቲ   ምውታት   ከኣ   በልዑ። 

²⁹ብግብርታቶም   ከኣ   ኣዀረይዎ፡

መዓትውን   ወረዶም። 

     ³⁰ሽዑ   ፊንሃስ   ተንሲኡ   ፍትሒ   ኣውጽአ፡

እቲ   መዓት   ድማ   ዛረየ። 

³¹እዚ   ኸኣ   ንሓዋሩ፡

ንውሉድ   ወለዶ   ጽድቂ   ኰይኑ   ተቘጽረሉ። 

³²ኣብ   ማይ   መሪባ   ድማ   ኣዀረይዎ፡

ሙሴውን   ብሰሮም   ተጐድአ። 

³³ንመንፈሱ   ኣንጸርጺሮምዎ   ነበሩ   እሞ፡

ብኸናፍሩ   ዕሽነት   ተዛረበ። 

^34-35ምስ   ኣህዛብ   ተሓባበሩ፡

ግብርታቶም   ከኣ   ተማህሩ   እምበር፡

ከምቲ   እግዚኣብሄር   ዝኣዘዞም፡   ነህዛብ   ኣየጽነትዎምን።

³⁶ንጣኦታቶም   ኣገልገሉ፡

ንሳቶም   ከኣ   መፈንጠርያ   ዀንዎም። 

     ³⁷ኣወዳቶምን   ኣዋልዶምን   ነጋንንቲ   ሰውኡሎም። 

³⁸ንጹህ   ደም፡   ደም   ኣወዳቶምን   ኣዋልዶምን፡   ኣፍሰሱ፡

ንጣኦታት   ከነኣን   ሰውእዎም፡

እታ   ሃገርውን   ብደም   ረኸሰት። 

³⁹በዚ   ከምዚ   ብተግባሮም   ረኸሱ፡

ብግብርታቶም   ከኣ   ኣመንዘሩ። 

⁴⁰ሽዑ   ቑጥዓ   እግዚኣብሄር   ኣብ   ህዝቡ   ነደደ፡

ንርስቱ   ኸኣ   ፈንፈኖ። 

⁴¹ኣብ   ኢድ   ኣህዛብ   ኣሕሊፉ   ሃቦም፡

እቶም   ዝጸልእዎም   ድማ   መለኽዎም። 

⁴²ጸላእቶም   ከኣ   ጠቕዕዎም፡

ኣብ   ትሕቲ   ኣእዳዎም   ድማ   ተዋረዱ። 

⁴³ብዙሕ   ግዜ   ኣናገፎም፡

ንሳቶም   ግና   ብምኽሮም   ዓለዉ፡

ብኣበሳኦምውን   ተዋረዱ። 

     ⁴⁴ኣውያቶም   ምስ   ሰምዐ   ኸኣ፡   ጸበባኦም   ረኣየ። 

⁴⁵ንኺዳኑ   ድማ   ዘከረሎም፡

ብመጠን   ብዝሒ   ሳህሉውን   ራሕርሓሎም። 

⁴⁶ኣብ   ቅድሚ   ዅሎም   ማረኽቶም   ከኣ   ሞገስ   ሃቦም። 

⁴⁷ዎ   እግዚኣብሄር   ኣምላኽና፡   ንቅዱስ   ስምካ   ኽንውድሶ፡

   ብምስጋናኻውን   ክንምካሕሲ፡

ኣናግፈናን   ካብ   ማእከል   ኣህዛብ   ኣክበናን። 

⁴⁸እግዚኣብሄር   ኣምላኽ   እስራኤል  

ካብ   ዘለኣለም   ንዘለኣለም   ይባረኽ።  

ኵሉ   ህዝቢውን   ኣሜን   ይበል።  

ሃሌሉያ።