መዝሙር ዳዊት
ሓምሳይ መጽሓፍ

107  108  109  110
111  112  113  114
115  116  117  118
119  120  121  122
123  124  125  126
127  128  129  130
131  132   133  134
135  136  137  138
139  140  141  142
143  144  145  146
147  148  149
150

ናብ ቀዳማይ መጽሓፍ፥ 1 — 41
ናብ ካልኣይ መጽሓፍ፥ 42 — 72
ናብ ሳልሳይ መጽሓፍ፥ 73 — 89
ናብ ራብዓይ መጽሓፍ፥ 90 — 106

ዝ/መዛ.   ብ/ኪ   ሓ/ኪ

        መበል 107 መዝሙር። 
           

     ¹እግዚኣብሄር   ሰናይ   እዩ፡

ምሕረቱ   ኸኣ   ንዘለኣለም   ይነብር   እዩ   እሞ፡   ኣመስግንዎ። 

^2-3እቶም   እግዚኣብሄር   እተበጀዎም፡

ካብ   ኢድ   ገፋዒ   እተበጀዎም፡

ካብ   ሃገራት፡   ካብ   ምብራቕን   ምዕራብን  

ካብ   ሰሜንን   ደቡብን   ዝኣከቦም፡   ከምዚ   ይበሉ። 

⁴ኣብ   በረኻ፡   ኣብ   ጽምዋ   መገዲ   ዀብለሉ፡

ዝነብሩላ   ዓዲ   ኣይረኸቡን። 

⁵ጠምዮም፡   ጸሚኦም፡   ነፍሶም   ሰልከየት። 

⁶ሽዑ   ብመከራኦም   ናብ   እግዚኣብሄር   ኣእወዩ፡

ንሱውን   ካብ   ጸበባኦም   ኣናገፎም። 

⁷ናብ   ዝነብሩላ   ዓዲ   ኽበጽሑስ፡

ብቕኑዕ   መገዲ   መርሖም። 

     ^8-9ንጽምእቲ   ነፍሲ   ኣጽጊብዋ፡

ንጥምይቲ   ነፍሲ   ብሰናይ   መሊእዋ   እዩ   እሞ፡

ንእግዚኣብሄር   ስለ   ሳህሉን፡

ስለቲ   ንደቂ   ሰብ   ዝገበሮ   ተኣምራቱን   የመስግንዎ። 

¹⁰ብመከራን   ሓጺንን   ተኣሲሮም፡

ኣብ   ጸልማትን   ኣብ   ድነ   ሞትን   ነበሩ። 

¹¹ንቓል   ኣምላኽ   ስለ   እተሃላለኽዎ፡

ንምኽሪ   እቲ   ልዑል   ከኣ   ስለ   ዝነዓቕዎ፡ 

¹²ንልቦም   ብጻዕሪ   ኣዋረዶ፡

ወደቑ፡   ዝረድእውን   ሓደ   እኳ   ኣይነበረን። 

     ¹³ሽዑ   ብመከራኦም   ናብ   እግዚኣብሄር   ኣእወዩ፡

ንሱውን   ካብ   ጸበባኦም   ኣናገፎም። 

¹⁴ካብ   ጸልማትን   ድነ   ሞትን   ኣውጽኦም፡

መቐውሖም   ከኣ   ሰባበረ። 

^15-16መዓጹ   ኣስራዚ   ሰቢሩ፡

መሸጐር   ሓጺን   ሰባቢሩ   እዩ   እሞ፡

ንእግዚኣብሄር   ስለ   ሳህሉን፡

ስለቲ   ንደቂ   ሰብ   ዝገበሮ   ተኣምራቱን   የመስግንዎ። 

¹⁷ዓያሱ   ብሰሪ   ግህሰቶምን   ብሰሪ   ኣበሳኦምን   ተጨነቑ፡ 

¹⁸ነፍሶም   ንመብልዕ   ዘበለ   ፈንፈነቶ።  

ክሳዕ   ደጌታት   ሞትውን   በጽሑ። 

¹⁹ሽዑ   ብመከራኦም   ናብ   እግዚኣብሄር   ኣእወዩ፡

ንሱውን   ካብ   ጸበባኦም   ኣናገፎም። 

²⁰ቃሉ   ልኢኹ   ኣሕወዮም፡

ካብ   ጕድጓዶም   ከኣ   ኣናገፎም። 

²¹ንእግዚኣብሄር   ስለ   ሳህሉን  

ስለቲ   ንደቂ   ሰብ   ዝገበሮ   ተኣምራቱን   የመስግንዎ። 

²²መስዋእቲ   ምስጋና   ኸኣ   ይሰውኡ፡

ንግብርታቱውን   ብእልልታ   ይንገሩ። 

     ²³ብመራኽብ   ናብ   ባሕሪ   ዝወርዱ፡

ኣብ   ዓበይቲ   ማያት   ዝነግዱ፡ 

²⁴ንሳቶም   ግብርታት   እግዚኣብሄር፡

ኣብ   ዓሚቑ   ድማ   ተኣምራቱ   ረኣዩ። 

²⁵ኣዘዘ   እሞ፡   ማዕበላት   ዘልዕል   ህቦብላ   ንፋስ   ኣተንስአ። 

²⁶ናብ   ሰማይ   ደየቡ፡   ናብ   መዓሙቑ   ወረዱ፡

ነፍሶም   ብመከራ   መኸኸት። 

²⁷ከም   ሰካር   ኣሕወዝወዙን   ሰንከልከል   በሉን፡

ኵሉ   ጥበቦም   ከኣ   ጠፍአ። 

     ²⁸ሽዑ   ብመከራኦም   ናብ   እግዚኣብሄር   ኣእወዩ፡

ንሱውን   ካብ   ጸበባኦም   ኣውጽኦም። 

²⁹ንህቦብላ   ናብ   ህድኣት   ለወጦ፡

ማዕበላት   ከኣ   ዝግ   በሉ። 

     ³⁰ስለ   ዝሃድአ   ተሓስጐሱ፡

ናብቲ   ዝደለይዎ   ወደብ   ድማ   ኣብጽሖም። 

³¹ንእግዚኣብሄር   ስለ   ሳህሉን  

ስለቲ   ንደቂ   ሰብ   ዝገበሮ   ተኣምራቱን   የመስግንዎ፡ 

³²ኣብ   ማሕበር   ኣህዛብ   ልዕል   የብልዎ፡

ኣብ   ባይቶ   ሽማግሌታት   ድማ   የመስግንዎ። 

^33-34ንወሓዝቲ   ናብ   በረኻ፡

ንዓይኒ   ማያት   ናብ   ንቑጽ   ምድሪ፡

ንፍርያም   ምድሪ፡   ብሰሪ   ኽፍኣት   እቶም   ዝነበርዋ፡

ናብ   ጐልጐል   ጨው   ለወጦ። 

³⁵ንበረኻ   ናብ   መዕቈር   ማያት፡

ንንቑጽ   ምድሪ   ኸኣ   ናብ   ዓይኒ   ማያት   ለወጦ። 

³⁶ንጥሙያት   ኣብኣ   ኣሕደሮም፡

ንሳቶም   ከኣ   ዝነብሩላ   ዓዲ   ሰረቱ። 

³⁷ግርሁ   ዘርኡ፡   ወይንታት   ተኸሉ፡

ብዝሒ   ፍረ   ኸኣ   ሃቦም። 

³⁸ባረኾም   እሞ   ኣዝዮም   በዝሑ።  

ንኸብቶም   ድማ   ኣየውሓደሎምን። 

³⁹ደሓር   ከኣ   ብምጥቃዕ፡   ብመከራ፡

ብጓሂ   ወሓዱን   ተዋረዱን። 

⁴⁰ኣብ   ልዕሊ   መሳፍንቲ   ሓሳር   ከዓወ፡

መገዲ   ኣብ   ዘይብሉ   በረኻ   ኣዀብለሎም። 

⁴¹ንድኻ   ኻብ   ሽጋሩ   ልዕል   ኣበሎ፡

ንዓሌታት   ድማ   ከም   መጓሰ   ኣብዝሖም። 

     ⁴²ቅኑዓት   ርእዮምዎ   ኽሕጐሱ፡

ኣበሳ   ዘበለውን   ኣፉ   ኽዓጹ   እዩ። 

⁴³ለባም   ዘበለ   ነዚ   ኸስተብህሎ   እዩ፡

ንጸጋ   እግዚኣብሄር   ከኣ   ከስተውዕሎ   እዩ።

ዝ/መዛ.   ብ/ኪ   ሓ/ኪ

        መበል 108 መዝሙር።            

ናይ   ዳዊት   መዝሙር   ምስጋና።

     ¹ዎ   ኣምላኽ፡   ልበይን   ክብረይን   ኣንቂደን   ኣለዋ።

ክዝምርን   ከመስግንን   እየ። 

²በገናን   መሰንቆን   ንቕሑ፡   ንወጋሕታ   ኸንቅሓ   እየ። 

³ጐይታየ፡   ኣብ   ማእከል   ኣህዛብ   ከመስግነካ፡

ኣብ   ማእከል   ህዝብታት   ክዝምረልካ   እየ። 

⁴ምሕረትካ   ኣብ   ልዕሊ   ሰማያት   ዓብዪ፡

ሓቅኻውን   ክሳዕ   ደበናታት   እዩ   እሞ፡ 

⁵ዎ   ኣምላኽ፡   ኣብ   ልዕሊ   ሰማያት   ልዕል   በል፡

ክብርኻ   ኣብ   ልዕሊ   ዅሉ   ምድሪ   ይኹን። 

     ⁶ፍትዋትካ   ምእንቲ   ኽናገፉስ፡

ብየማነይትኻ   ኣድሕነናን   ስምዓናን። 

⁷ኣምላኽ   ኣብ   መቕደሱ   ተዛረበ፡   እልል   ክብል   እየ፡

ንሰኬም   ክመቅል፡   ንለሰ   ሱኮት   ክልክዕ   እየ። 

⁸ጊልኣድ   ናተይ   እዩ፡   ምናሴውን   ናተይ   እዩ፡

ኤፍሬም   መጸግዕ   ርእሰይ፡

ይሁዳውን   ዘንጊ   ግዝኣተይ   እዩ። 

⁹ሞኣብ   ገበራ   ምሕጻበይ   እዩ።  

ኣብ   ኤዶም   ሳእነይ   እድርቢ፡

ኣብ   ፍልስጥኤም   እልል   ክብል   እየ። 

     ¹⁰ናብታ   ዕርድቲ   ኸተማ   መን   ይወስደኒ፧

ናብ   ኤዶም   መን   ኰን   ይመርሓኒ፧ 

¹¹ዎ   ኣምላኽ፡   ንስኻዶ   ኣይኰንካን   ዝደርበኻና፧  

ንስኻ   ኣምላኽ፡   ምስ   ሰራዊትናኸ   ኣይትወጽእን   ዲኻ፧ 

¹²ረዲኤት   ሰብ   ከንቱ   እዩ   እሞ፡

ካብቲ   ተጻራሪ   ርድኣና። 

¹³ብኣምላኽ   ንሕይል፡

ንሱውን   ንተጻረርትና   ኽረግጾም   እዩ።

ዝ/መዛ.   ብ/ኪ   ሓ/ኪ

        መበል 109 መዝሙር።            

ንሊቀ   መዘምራን፡   ናይ   ዳዊት   መዝሙር።

     ^1-3ኣታ   ኣምላኽ   ምስጋናይ፡

እፍ   ረሲእን   ኣፍ   ጥበራን   ናባይ   ተኸፊቶም፡

ብሓሳዊት   መልሓስ   ይዛረቡኒ፡

ብቓላት   ጽልኢ   ኸቢቦምኒ፡

ብዘይ   ምኽንያት   ይዋግኡኒ   ኣለዉ   እሞ፡   ስቕ   ኣይትበል። 

⁴ኣብ   ክንዲ   ዘፍቀርክዎም   ተጻረሩኒ፡

ኣነ   ግና   እጽሊ   ኣሎኹ። 

⁵ኣብ   ክንዲ   ሰናይ   እከይ፡

ኣብ   ክንዲ   ፍቕረይ   ከኣ   ጽልኢ   ፈድዮምኒ። 

     ⁶ረሲእ   ኣብ   ልዕሊኡ   ኣቝመሉ፡

ተጻራሪ   ኣብ   የማኑ   ይቑም።

⁷ምስ   ተፈርደ፡   ተረቲዑ   ይውጻእ፡

ጸሎቱውን   ንሓጢኣት   ይኹኖ። 

⁸መዓልትታቱ   ሒደት   ይኹና፡

ንሽመቱውን   ካልእ   ይውሰዳ። 

⁹ውሉዱ   ዘኽታማት   ይኹኑ፡   ሰበይቱውን   መበለት   ትኹን። 

¹⁰ውሉዱ   እናዞሩ   ይለምኑ፡

ካብተን   ዝዓነዋ   ኣባይቶም   ርሒቖም፡   እንጌራ   ይድለዩ። 

¹¹ንዘለዎ   ዅሉ   እቲ   መሓረጺ   ይሓዞ፡

ጓኖት   ከኣ   ንጻማኡ   ይዝመትዎ። 

¹²ዝልውሃሉ   ሓደ   እኳ   ኣይረኸብ፡

ንዘኽታማቱ   ዝርሕርሓሎም   ከኣ   ሓደ   እኳ   ኣይሃሉ። 

¹³ሓድጉ   ይጽነቱ፡

ስሞም   ኣብ   ካልኣይ   ወለዶ   ይደምሰስ። 

¹⁴በደል   ኣቦታቱ   ኣብ   ቅድሚ   እግዚኣብሄር   ይዘከር፡

ሓጢኣት   ኣዲኡ   ኸኣ   ኣይደምሰስ። 

¹⁵ኵሉ   ግዜ   ኣብ   ቅድሚ   እግዚኣብሄር   ይኹኑ፡

መዘከርታኦም   ካብ   ምድሪ   የጥፍኣዮ። 

     ¹⁶ንመስኪንን   ንድኻን   ነቲ   ልቡ   እተሰብረን

ምእንቲ   ክቐትሎም   ሰጐጎም   እምበር፡

ምሕረት   ክገብር   ስለ   ዘይሓሰበ፡ 

¹⁷ንመርገም   ፈተዋ፡   ንሳ   ኸኣ   መጸቶ፡

ንበረኸት   ኣይበሃጋን፡   ንሳውን   ረሓቐቶ። 

¹⁸ንመርገም   ከም   ክዳኑ   ተኸድና፡

ንሳ   ኸኣ   ከም   ማይ   ናብ   ውሽጡ፡

ከም   ቅብኢውን   ናብ   ኣዕጽምቱ   ሰረጸት። 

¹⁹ከምቲ   ዝጓናጸፈሉ   ልብስን፡

ከምቲ   ዅሉ   ግዜ   ዝዕጠቖ   ቕናትን   ይኹኖ። 

²⁰እዚ   ኻብ   እግዚኣብሄር   ናይ   ተጻረርተይን  

ናይቶም   ኣብ   ነፍሰይ   ክፉእ   ዝዛረቡን   ፍዳ   ይኹን። 

     ²¹ዎ   እግዚኣብሄር   ኣምላኽ፡   ስለ   ስምካ   ኢልካ   ርድኣኒ፡

ጸጋኻ   ሰናይ   እዩ   እሞ፡   ኣናግፈኒ። 

²²ኣነ   መስኪንን   ድኻን   እየ   እሞ፡

ልበይ   ኣብ   ውሽጠይ   ቈሲሉ   ኣሎ። 

²³ከም   ዝነውሕ   ጽላሎት   እኸይድ፡

ከም   ኣንበጣውን   እስጐጕ   ኣሎኹ። 

²⁴ኣብራኸይ   ብጾም   ራዕራዕ   በለ፡

ስጋይ   ከኣ   ካብ   ስብሑ   ዓበረ። 

²⁵መላገጺኦም   ከኣ   ዀንኩ፡

እንተ   ረኣዩኒ   ርእሶም   ይንቕንቑ። 

^26-27ዎ   እግዚኣብሄር   ኣምላኸይ፡   ርድኣኒ፡

እዚ   ኢድካ   ምዃኑ፡

ንስኻ   ኸም   ዝገበርካዮ   ኽፈልጡስ፡

ዎ   እግዚኣብሄር፡   ብመጠን   ጸጋኻ   ኣናግፈኒ። 

²⁸ንሳቶም   ይረግሙ፡   ንስኻ   ግና   መርቕ፡

እንተ   ተንስኡ፡   ክሓፍሩ   እዮም።  

ባርያኻ   ግና   ክሕጐስ   እዩ። 

²⁹ተጻረርተይ   ውርደት   ይከደኑ፡

ንነውሮም   ከኣ   ከም   ነጸላ   ይወንዘፍዎ። 

     ^30-31ካብቶም   ንነፍሱ   ዝኹንንዋ   ኸድሕኖስ፡

ኣብ   የማን   እቲ   ድኻ   ቈይሙ   ኣሎ   እሞ፡

ንእግዚኣብሄር   ብኣፈይ   ኣዝየ   ኸመስግኖ፡

ኣብ   ማእከል   ብዙሓትውን   ክውድሶ   እየ።

ዝ/መዛ.   ብ/ኪ   ሓ/ኪ

        መበል 110 መዝሙር።            

ናይ   ዳዊት   መዝሙር።

     ¹ጐይታ   ንጐይታይ፡

ንጸላእትኻ   መርገጽ   እግርኻ   ኽሳዕ   ዝገብሮም፡

   ኣብ   የማነይ   ተቐመጥ፡   በሎ። 

     ²እግዚኣብሄር   ካብ   ጽዮን   በትሪ   ስልጣንካ   ኽልእኽ   እዩ፡

ኣብ   ማእከል   ጸላእትኻ   ግዛእ። 

³በታ   ሰራዊትካ   እተኽትተላ   መዓልቲ  

ህዝብኻ   ፈትዩ   ይመጽእ፡

ከምቲ   ኻብ   ከርሲ   ወጋሕታ   ዝመጽእ   ኣውሊ  

ከምኡ   መንእሰይካ   ብልብሲ   ቕድስና   ይመጹኻ። 

     ⁴እግዚኣብሄር፡   ንስኻ   ኸም   ስርዓት   መልከጼዴቅ

ንዘለኣለም   ካህን   ኢኻ፡   ኢሉ   መሓለ   ኣይጠዓስን   ከኣ። 

     ⁵እግዚኣብሄር   ኣብ   የማንካ   ዀይኑ፡

ብመዓልቲ   ቑጥዓኡ   ንነገስታት   ክጭፍልቖም፡ 

⁶ኣብ   ማእከል   ኣህዛብ   ክፈርድ፡

ብሬሳታት   ክመልኦ፡

ርእሲ   ርሒብ   ሃገር   ክጭፍልቕ። 

⁷ኣብ   መገዲ   ኻብ   ወሓዚ   ኽሰቲ፡

ስለዚ   ርእሱ   ልዕል   ከብል   እዩ።

ዝ/መዛ.   ብ/ኪ   ሓ/ኪ

        መበል 111 መዝሙር።      

     ¹ሃሌሉያ።

ንእግዚኣብሄር   ብምኽሪ   ቕኑዓትን   ማሕበርን  

ብምሉእ   ልበይ   አመስግኖ   ኣሎኹ። 

²ግብሪ   እግዚኣብሄር   ዓብዪ   እዩ፡

እቶም   ብእኡ   ዝሕጐሱ   ዅሎም   ይምርምርዎ   እዮም። 

³ግብሩ   ኽብርን   ግርማን   እዩ፡

ጽድቁ   ኸኣ   ንዘለኣለም   ይነብር። 

⁴ንተኣምራቱ   መዘከርታ   ገበሮ፡

እግዚኣብሄር   መሓርን   ርሕሩሕን   እዩ። 

     ⁵ንዝፈርህዎ   ምግቢ   ይህቦም፡

ኪዳኑ   ንዘለኣለም   ይዝክር። 

⁶ርስቲ   ኣህዛብ   ብምሃቡ   ሓይሊ   ግብሩ   ንህዝቡ   ኣርአዮ። 

⁷ግብሪ   ኣእዳዉ   ሓቅን   ፍርድን   እዩ፡

ትእዛዙ   ዅሉ   ጽኑዕ   እዩ። 

⁸ንዘለኣለመ   አለም   ጽኑዕ፡

ብሓቅን   ብቕንዕናን   እተገብረ   እዩ። 

⁹ንህዝቡ   በጃ   ሰደደሎም፡

ኪዳኑ   ንዘለኣለም   ኣዘዘ፡

ስሙ   ቅዱስን   ዘፍርህን   እዩ። 

     ¹⁰ፍርሃት   እግዚኣብሄር   መጀመርያ   ጥበብ   እዩ፡

ዝገብርዎ   ዅሎም   ሰናይ   ልቦና   ኣለዎም።  

ምስጋናኡ   ንዘለኣለም   ይነብር።

ዝ/መዛ.   ብ/ኪ   ሓ/ኪ

        መበል 112 መዝሙር።    

     ¹ሃሌሉያ።

እቲ   ንእግዚኣብሄር   ዝፈርሆ፡

ብትእዛዛቱ   ኣዝዩ   ባህ   ዝብሎ   ሰብ   ብጹእ   እዩ። 

²ዘርኡ   ኣብ   ምድሪ   ኸስልጥን፡

ወለዶ   ቕኑዓት   ክባረኽ   እዩ። 

³ሃብትን   ጽጋብን   ኣብ   ቤቱ   እዩ፡

ጽድቁውን   ንዘለኣለም   ይነብር። 

⁴ንቕኑዓት፡   ነቲ   መሓርን   ርሕሩሕን   ጻድቕን፡

ኣብ   ጸልማት   ብርሃን   ይወጸሎም። 

⁵ዝርሕርሕን   ዘለቅሕን   ሰብ   ብጹእ   እዩ።  

ንሱ   ንነገሩ   ብፍርዲ   ይፍጽሞ። 

⁶ንዘለኣለም   ኣይክናወጽን   እዩ   እሞ፡

መዘከርታ   ጻድቕ   ንዘለኣለም   ይነብር። 

⁷ክፉእ   ወረ   ኣይፈርህን፡

ልቡ   ብእግዚኣብሄር   ተወኪሉ   ይጸንዕ። 

⁸ልቡ   ጽኑዕ   እዩ፡

ትምኒቱ   ኣብ   ተጻረርቱ   ኽሳዕ   ዝርኢ   ኣይፈርህን። 

     ⁹ዘረወ፡   ንድኻታት   ሃበ፡

ጽድቁ   ንዘለኣለም   ይነብር፡

ቀርኑ   ብኽብሪ   ልዕል   ክብል   እዩ። 

¹⁰ረሲእ   ነዚ   ርእዩ   ኽሓርቕ፡

ኣስናኑ   ኽሕርቅምን   ክማስንን፡

ትምኒት   ረሲኣን   ክጠፍእ   እዩ።

ዝ/መዛ.   ብ/ኪ   ሓ/ኪ

        መበል 113 መዝሙር።   

     ¹ሃሌሉያ።

ኣቱም   ባሮት   እግዚኣብሄር፡   ኣመስግኑ፡

ንስም   እግዚኣብሄር   ኣመስግኑ። 

²ስም   እግዚኣብሄር   ካብ   ሕጂ   ንዘለኣለም   ይባረኽ። 

³ካብ   ምብራቕ   ጸሓይ   ክሳዕ   ምዕራባ  

ስም   እግዚኣብሄር   ይመስገን። 

⁴እግዚኣብሄር   ኣብ   ልዕሊ   ዅሎም   ኣህዛብ   ልዑል   እዩ፡

ክብሩ   ኸኣ   ኣብ   ልዕሊ   ሰማያት   እዩ። 

     ^5-6ነቲ   ኣብ   ላዕሊ   ኣብ   ዝፋኑ   እተቐመጠ፡

ናብ   ሰማይን   ናብ   ምድርን   ኣንቈልቁሉ   ዝጥምት፡

እግዚኣብሄር   ኣምላኽና   ዝመስል   መን   እዩ፧ 

^7-8ምስ   መሳፍንቲ፡   ምስቶም   መሳፍንቲ   ህዝቡ   ከቐምጦስ፡

ንመስኪን   ካብ   ሓመድ   የተንስኦ፡

ንድኻውን   ካብ   ድዅዒ   የልዕሎ። 

⁹ንመኻን፡   ኣደ   ቘልዑ   ገይሩ፡

ኣብ   ቤት   ብሓጐስ   የንብራ።  

ሃሌሉያ።

ዝ/መዛ.   ብ/ኪ   ሓ/ኪ

        መበል 114 መዝሙር።            

     ¹እስራኤል   ካብ   ግብጺ፡

ቤት   ያእቆብ   ካብቲ   ቛንቋኡ   ዘይስማዕ   ህዝቢ   ምስ   ወጸ፡ 

²ይሁዳ   መቕደሱ፡   እስራኤል   ግዝኣቱ   ዀነ። 

     ³ባሕሪ   ርእያቶ   ሃደመት።

ዮርዳኖስ   ንድሕሪት   ተመልሰ። 

⁴ኣኽራን   ከም   ደዓውል፡

ኰረቢት   ከም   ዕያውቲ   ተሰራሰሩ። 

⁵ኣቲ   ባሕሪ፡   እንታይ   ኴንኪ   ዝሃደምኪ፧  

ኣታ   ዮርዳኖስከ፡   ንድሕሪት   እተመለስካ፧ 

⁶ኣቱም   ኣኽራን፡   ከም   ደዓውል፡

ኣቱም   ኰረቢትሲ፡   ከም   ዕያውቲ   እተሰራሰርኩም፡

እንታይ   ኴንኩም   ኢኹም፧ 

     ^7-8ኣቲ   ምድሪ፡   ኣብ   ቅድሚ   እቲ   ነኻውሕ   ናብ   ቀላያት፡

ንዓረ   ናብ   ዓይኒ   ማያት   ዝለወጠ  

እግዚኣብሄር   ኣምላኽ   ያእቆብ   ኣንቀጥቅጢ

ዝ/መዛ.   ብ/ኪ   ሓ/ኪ

        መበል 115 መዝሙር።     

     ¹ንኣና   ኣይኰነን፡   ዎ   እግዚኣብሄር፡   ንኣና   ኣይኰነን፡

ግናኸ   ስለ   ምሕረትካን   ሓቅኻን   ኢልካ፡

ንስምካ   ኽብሪ   ሃብ። 

     ²ስለምንታይ   ኣህዛብ፡

ኣበይ   ደኣ   ኣሎ   ኣምላኾም፡   ዝብሉና፧ 

³ኣምላኽናስ   ኣብ   ሰማያት   ኣሎ፡

ዝደለዮ   ዅሉ   ይገብር   እዩ። 

     ⁴ጣኦታቶም   ኢድ   ሰብ   ዝገበሮም

ብሩርን   ወርቅን   እዮም። 

⁵ኣፍ   ኣለዎም፡   ኣይዛረቡን፡

ኣዒንቲ   ኣለዎም፡   ኣይርእዩን፡ 

⁶እዝኒ   ኣለዎም፡   ኣይሰምዑን፡

ኣፍንጫ   ኣለዎም፡   ኣየጫንዉን፡ 

⁷ኢድ   ኣለዎም፡   ኣይድህስሱን፡

እግሪ   ኣለዎም፡   ኣይከዱን፡

ብጐረሮኦም   ድማ   ገለ   እኳ   ኣየድምጹን። 

⁸እቶም   ዝገብርዎምን   ኣብኦም   ዝውከሉን፡

ኵሎም   ከምኣቶም   ክዀኑ   እዮም። 

     ⁹ኣታ   እስራኤል፡   ኣብ   እግዚኣብሄር   ተወከል፡

ንሱ   ረዲኤቶምን   ዋልታኦምን   እዩ። 

¹⁰ኣቱም   ቤት   ኣሮን፡   ኣብ   እግዚኣብሄር   ተወከሉ፡

ንሱ   ረዲኤቶምን   ዋልታኦምን   እዩ። 

¹¹ኣቱም   ንእግዚኣብሄር   እትፈርህዎ፡

ኣብ   እግዚኣብሄር   ተወከሉ፡

ንሱ   ረዲኤቶምን   ዋልታኦምን   እዩ። 

     ¹²እግዚኣብሄር   ዘከረና፡   ንሱ   ኽባርኽ፡

ንቤት   እስራኤል   ክባርኻ፡

ንቤት   ኣሮን   ክባርኻ   እዩ። 

¹³ነቶም   ንእግዚኣብሄር   ዝፈርሁ፡

ናእሽቱን   ዓበይትን፡ክባርኾም   እዩ። 

¹⁴ንኣኹምን   ንውሉድኩምን   እግዚኣብሄር   የብዝሕኩም። 

¹⁵በቲ   ሰማይን   ምድርን   ዝገበረ   እግዚኣብሄር  

እተባረኽኩም   ኢኹም። 

     ¹⁶ሰማያትሲ   ናይ   እግዚኣብሄር   ሰማያት   እዮም፡

ምድሪ   ግና   ንደቂ   ሰብ   ሃቦም። 

¹⁷ምውታትን   ናብ   ስቕ   ምባል   ዝወረዱ   ዅሎምን  

ንእግዚኣብሄር   ኣየመስግንዎን   እዮም። 

     ¹⁸ንሕና   ግና   ካብ   ሕጂ   ኽሳዕ   ዘለኣለም  

ንእግዚኣብሄር   ከነመስግኖ   ኢና።  

ሃሌሉያ።

ዝ/መዛ.   ብ/ኪ   ሓ/ኪ

        መበል 116 መዝሙር።    

     ¹ድምጸይን   ምህለላይን   ሰሚዑ   እዩ   እሞ፡

ንእግዚኣብሄር   አፍቅሮ   እየ። 

²እዝኑ   ናባይ   ኣድኒኑ   እዩ   እሞ፡

ኵለን   መዓልትታተይ   ናብኡ   ኽምህለል   እየ። 

³መኣስር   ሞት   ከበበኒ፡   ጸበባ   ሲኦል   ሓዘኒ፡

ጭንቀትን   መከራን   ረኸብኩ። 

⁴ሽዑ   ኣነ፡   ዎ   ጐይታይ፡   ንነፍሰይ   ኣድሕና፡   ኢለ  

ስም   እግዚኣብሄር   ጸዋዕኩ። 

     ⁵እግዚኣብሄር   ርሕሩሕን   ጻድቕን   እዩ፡

ኣምላኽና   ኸኣ   መሓሪ   እዩ። 

⁶እግዚኣብሄር   ንገርህታት   ይሕልዎም፡

ኣነ   ተሸገርኩ፡   ንሱውን   ኣድሓነኒ። 

⁷ነፍሰየ፡   እግዚኣብሄር   ሰናይ   ገይሩልኪ   እዩ   እሞ፡

ናብ   ዕረፍትኺ   ተመለሲ። 

     ⁸ንነፍሰይ   ካብ   ሞት፡   ነዒንተይ   ካብ   ንብዓት፡

ነእጋረይ   ካብ   ምውዳቕ   ኣድሒንካየን   ኢኻ   እሞ፡ 

⁹ኣብ   ቅድሚ   እግዚኣብሄር  

ኣብ   ሃገር   ህያዋን   ክመላለስ   እየ። 

¹⁰ኣመንኩ፡   ስለዚ   ተዛረብኩ፡   ኣዝየ   ተጨኒቐ   ነበርኩ። 

¹¹ኣነ   ብስምባደይ፡   ኵሉ   ሰብ   ሓሳዊ   እዩ፡   በልኩ። 

     ¹²ኣብ   ክንዲ   እቲ   ሰናይ   ዝገበረለይ   ኵሉስ፡

ንእግዚኣብሄር   እንታይ   ውሬታ   ኽመልሰሉ   እየ፧ 

¹³ጽዋእ   ምድሓን   ክወስድ፡

ስም   እግዚኣብሄር   ድማ   ክጽውዕ   እየ። 

¹⁴ንእግዚኣብሄር   ኣብ   ቅድሚ   ዅሉ   ህዝቡ  

መብጽዓይ   ክፍጽም   እየ። 

     ¹⁵ኣብ   ቅድሚ   እግዚኣብሄር  

ሞት   ቅዱሳኑ   ኽቡር   እዩ።

¹⁶ዎ   እግዚኣብሄር፡   ኣነ   ባርያኻ   እየ፡

ባርያኻ፡   ወዲ   እታ   ባርያኻ   እየ፡

መኣስረይ   ፈታሕካ። 

     ¹⁷መስዋእቲ   ምስጋና   ኽስውኣልካ፡

ስም   እግዚኣብሄር   ከኣ   ክጽውዕ   እየ። 

^18-19ንእግዚኣብሄር   ኣብ   ቅድሚ   ዅሉ   ህዝቡ፡

ኣብ   ኣጸድ   ቤት   እግዚኣብሄር፡

ኣብ   ማእከልኪ፡   ዎ   የሩሳሌም፡   መብጽዓይ   ክፍጽም   እየ።  

ሃሌሉያ።

ዝ/መዛ.   ብ/ኪ   ሓ/ኪ

        መበል 117 መዝሙር።      

     ¹ኵሉኹም   ኣህዛብ፡   ንእግዚኣብሄር   ኣመስግንዎ፡

ኵሉኹም   ህዝብታት፡   ወድስዎ። 

²ጸጋኡ   ኣባና   ዓብዪ   እዩ   እሞ፡

ሓቂ   እግዚኣብሄር   ድማ   ንዘለኣለም   ይነብር   እዩ።  

ሃሌሉያ።

ዝ/መዛ.   ብ/ኪ   ሓ/ኪ

መበል 118 መዝሙር።       

     ¹እግዚኣብሄር   ሰናይ   እዩ፡

ምሕረቱ   ንዘለኣለም   ይነብር   እዩ   እሞ፡   ኣመስግንዎ። 

     ²ምሕረቱ   ንዘለኣለም   ከም   ዝነብር፡   እስራኤል   ይበል።

³ምሕረቱ   ንዘለኣለም   ከም   ዝነብር፡   ቤት   ኣሮን   ይበል። 

⁴ምሕረቱ   ንዘለኣለም   ከም   ዝነብር፡

እቶም   ንእግዚኣብሄር   ዝፈርህዎ   ይበሉ። 

     ⁵ኣብ   ጸበባይ   ንእግዚኣብሄር   ጸዋዕኩ፡

እግዚኣብሄር   መለሰለይ   ኣርሓበለይ   ድማ። 

⁶እግዚኣብሄር   ምሳይ   እዩ፡   ኣይፈርህን፡

ሰብከ   እንታይ   ከይገብረኒ፧ 

⁷እግዚኣብሄር   ምሳይ   እዩ፡   ረዳእየይ   እዩ፡

ኣብ   ጸላእተይ   ትምኒተይ   ክርኢ   እየ። 

     ⁸ካብ   ኣብ   ሰብ   ምውካልሲ

ኣብ   እግዚኣብሄር   ምዕቋብ   ይሓይስ። 

⁹ካብ   ኣብ   መሳፍንቲ   ምውካልሲ  

ኣብ   እግዚኣብሄር   ምዕቋብ   ይሓይስ። 

¹⁰ኵሎም   ኣህዛብ   ከበቡኒ፡

ብስም   እግዚኣብሄር   ክቘርጾም   እየ። 

¹¹ከበቡኒ፡   እወ   ኸበቡኒ፡

ብስም   እግዚኣብሄር   ክቘርጾም   እየ። 

¹²ከም   ንህቢ   ከበቡኒ፡

ከም   ሓዊ   ቘጥቋጥ   ጠፍኡ፡

ብስም   እግዚኣብሄር   ክቘርጾም   እየ። 

¹³ከተውድቐኒ   ኢልካ   ኣዚኻ   ደፋእካኒ፡

እግዚኣብሄር   ግና   ረድኣኒ። 

¹⁴ሓይለይን   መዝሙረይን   እግዚኣብሄር   እዩ፡

ንሱውን   ምድሓነይ   ኰነ። 

     ¹⁵ኣብ   ድንኳናት   ጻድቃን

ድምጺ   እልልታን   ምድሓንን   ኣሎ፡

የማነይቲ   ኢድ   እግዚኣብሄር   ሓይሊ   ትገብር። 

¹⁶የማነይቲ   እግዚኣብሄር   ልዕል   ትብል፡

የማነይቲ   እግዚኣብሄር   ሓይሊ   ትገብር   ኣላ። 

¹⁷ብህይወት   ክነብር   እየ   እምበር፡   ኣይክመውትን፡

ግብሪ   እግዚኣብሄር   ከኣ   ከዘንቱ   እየ። 

¹⁸እግዚኣብሄር   ኣዝዩ   ቐጽዓኒ፡

ንሞት   ግና   ኣይወፈየንን። 

¹⁹ብእአን   ኣትየ   ንእግዚኣብሄር   ከመስግኖስ፡

ደጌታት   ጽድቂ   ኽፈቱለይ። 

²⁰ደገ   እግዚኣብሄር   እዚኣ   እያ፡

ጻድቃን   ብእኣ   ኽኣትዉ   እዮም። 

²¹ሰሚዕካኒ   ምድሓነይውን   ኴንካ   ኢኻ   እሞ፡

ከመስግነካ   እየ። 

     ²²ነደቕቲ   ዝነዓቕዎ   እምኒ፡

ንሱ   ርእሲ   መኣዝን   ኰነ። 

²³እዚ   ኻብ   እግዚኣብሄር   ኰነ፡

ነዒንትናውን   ግሩም   እዩ። 

²⁴እታ   እግዚኣብሄር   ዝገበራ   መዓልቲ   እዚኣ   እያ፡

ብእኣ   ንተሓጐስን   ባህ   ይበለናን። 

²⁵ዎ   እግዚኣብሄር፡   ኣድሕን   ኰታ፡

ኣታ   እግዚኣብሄር፡   ኣሰልጥን   ኰታ። 

     ²⁶እቲ   ብስም   እግዚኣብሄር   ዝመጽእ   ብሩኽ   እዩ፡

ካብ   ቤት   እግዚኣብሄር   ንባርኸኩም   ኣሎና። 

²⁷እግዚኣብሄርሲ   ኣምላኽ   እዩ፡   ንሱውን   ኣብረሃልና፡

ነቲ   መስዋእቲ   በዓል   ዓመት  

ክሳዕ   ኣቕርንቲ   መሰውኢ   ብገመድ   እሰሩ። 

²⁸ንስኻ   ኣምላኸይ   ኢኻ   አመስግነካ፡

ዎ   ኣምላኸይ፡   ልዕል   አብለካ   ኣሎኹ። 

²⁹እግዚኣብሄር   ሰናይ   እዩ፡

ምሕረቱ   ንዘለኣለም   ይነብር   እዩ   እሞ፡   ኣመስግንዎ።

ዝ/መዛ.   ብ/ኪ   ሓ/ኪ

መበል 119 መዝሙር። 

ቤት  ጋሜል  ዳሌጥ  ሄ  ዋው  ዛይ

ሔት  ጤት  ዩድ  ካፍ  ላሜድ  ሜም

ኑን  ሳሜኽ  ዓይን  ፌ  ጻዴ  ቆፍ

ሬሽ  ሲን  ታው

                    ኣሌፍ

    ¹ብመገዶም   ፍጹማት   ዝዀኑ፡

ብሕጊ   እግዚኣብሄር   ዝመላለሱ   ብጹኣን   እዮም። 

²ምስክራቱ   ዝሕልዉ፡

ብምሉእ   ልቢ   ዝደልይዎ   ብጹኣን   እዮም። 

³እከይ   ኣይገብሩን፡

ብመገድታቱ   ኸኣ   ይመላለሱ። 

⁴ኣጸቢቑ   ምእንቲ   ኽሕሎ፡   ትእዛዛትካ   ኣዘዝካ። 

⁵ኣየ፡   ስርዓታትካ   ኽሕሉስ፡   መገደይ   እንተ   ዝቐንዕ። 

⁶ንዅሉ   ትእዛዛትካ   እንተ   ዝቋመት፡

ሽዑ   ኣይምሓፈርኩን። 

⁷ፍርዲ   ጽድቅኻ   ምስ   ተምሃርኩ፡

ብቕንዕና   ልቢ   ኸመስግነካ   እየ። 

⁸ስርዓታትካ   ኽሕሉ   እየ፡

ፈጺምካ   ኣይትሕደገኒ።

ዝ/መዛ.   ብ/ኪ   ሓ/ኪ

                    ቤት።

⁹ጐበዝ   ንመገዱ   ብምንታይ   የንጽሃ፧

ከም   ቃልካ   ንነፍሱ   ብምጥንቃቕ   እዩ። 

¹⁰ብምሉእ   ልበይ   እደልየካ   ኣሎኹ፡

ካብ   ትእዛዛትካ   ኸየግልስ   ኣይትሕደገኒ። 

¹¹ንኣኻ   ምእንቲ   ኸይብድልሲ፡

ንቓልካ   ኣብ   ልበይ   ዓቘርክዎ። 

¹²ዎ   እግዚኣብሄር፡   ንስኻ   ብሩኽ   ኢኻ፧  

ስርዓታትካ   ምሃረኒ። 

¹³ንዅሉ   ፍርድታት   ኣፍካ   ብኸናፍረይ   ኣዘንቶኹ። 

¹⁴ብመገዲ   ምስክራትካ  

ኸም   ብዅሉ   ሃብቲ   ገይረ   ተሓጐስኩ። 

¹⁵ንትእዛዛትካ   አስተንትኖ፡

ንመገድኻውን   እቋመቶ   ኣሎኹ። 

¹⁶ብስርዓታትካ   ባህ   እብል፡

ንቓልካ   ኣይክርስዖን   እየ። 

ዝ/መዛ.   ብ/ኪ   ሓ/ኪ

                    ጋሜል።

    ¹⁷ብህይወት   ክነብር፡   ቃልካውን   ክሕሉስ፡

ንባርያኻ   ሰናይ   ግበረሉ። 

¹⁸ኣብ   ሕግኻ   ተኣምራት   ክርእስ፡

ኣዒንተይ   ክፈተለይ። 

¹⁹ኣነ   ኣብ   ምድሪ   ጋሻ   እየ፡

ትእዛዛትካ   ኣይትሕብኣለይ። 

²⁰ነፍሰይ፡   ኵሉ   ግዜ   ፍርድኻ   ብምንፋቕ   ተቐጥቀጠት። 

²¹ነቶም   ትዕቢተኛታት፡

ነቶም   ካብ   ትእዛዛትካ   ዘግልሱ   ርጉማት   ገናሕካ። 

²²ምስክራትካ   ሓልየ   እየ   እሞ፡

ጸርፍን   ንዕቀትን   ኣርሕቐለይ። 

²³መሳፍንቲ   ተቐሚጦም   እኳ   እንተ   ሓመዩኒ፡

ባርያኻስ   ብስርዓታትካ   የስተንትን   ኣሎ። 

²⁴ምስክራትካ   ድማ   ባህታይን   መኸርተይን   እዮም። 

ዝ/መዛ.   ብ/ኪ   ሓ/ኪ

                    ዳሌጥ።

    ²⁵ነፍሰይ   ኣብ   ሓመድ   ተጣበቐት፡

ከም   ቃልካ   ህያው   ግበረኒ። 

²⁶መገደይ   ኣዘንቶኹ፡   ንስኻውን   መለስካለይ፡

ስርዓታትካ   ምሃረኒ። 

²⁷ንተኣምራትካ   ኸስተንትኖስ፡

መገዲ   ትእዛዛትካ   ኣፍልጠኒ። 

²⁸ነፍሰይ   ብሓዘን   ትነብዕ   ኣላ፡

ከም   ቃልካ   ኣደልድለኒ። 

²⁹መገዲ   ሓሶት   ኣርሕቐለይ፡

ሕግኻውን   ብሳህልኻ   ፍቐደለይ። 

³⁰መገዲ   ሓቂ   መረጽኩ፡

ፍርድታትካ   ኣብ   ቅድመይ   ኣንበርኩ። 

³¹ኣብ   ምስክራትካ   እጠብቕ፡

ዎ   እግዚኣብሄር፡   ኣይተሕፍረኒ። 

³²ልበይ   ምስ   ኣግፋሕካ፡

ብመገዲ   ትእዛዛትካ   ኽጐዪ   እየ። 

ዝ/መዛ.   ብ/ኪ   ሓ/ኪ

                    ሄ።

    ³³ዎ   እግዚኣብሄር፡   መገዲ   ስርዓታትካ   ምሃረኒ፡

ክሳዕ   መወዳእታውን   ክሕልዎ   እየ። 

³⁴ምስትውዓል   ሃበኒ   እሞ፡ንሕግኻ   ኽሕልዎ፡

ብምሉእ   ልበይውን   ክገብሮ   እየ። 

³⁵ብእኡ   ባህ   ኢሉኒ   እዩ   እሞ፡

ብመገዲ   ትእዛዛትካ   ኣመላልሰኒ። 

³⁶ንልበይ   ናብ   ምስክራትካ   እምበር፡

ናብ   ስስዐ   ገንዘብ   ኣይተዝብሎ። 

³⁷ነዒንተይ   ካብ   ምርኣይ   ከንቱነት   ምለሰን፡

ብመገድኻ   ህያው   ግበረኒ። 

³⁸ነቲ   ናብ   ፍርሃትካ   ዝመርሕ   ቃልካ  

ኣብ   ባርያኻ   ኣጽንዓዮ። 

³⁹ፍርድታትካ   ሰናይ   እዩ   እሞ፡

ነቲ   ዝፈርሆ   ጸርፊ   ኣርሕቐለይ። 

⁴⁰እንሆ፡   ትእዛዛትካ   እናፍቕ   ኣሎኹ፡

ብጽድቅኻ   ህያው   ግበረኒ። 

ዝ/መዛ.   ብ/ኪ   ሓ/ኪ

                    ዋው።

    ⁴¹ዎ   እግዚኣብሄር፡   ከምቲ   ቓልካ  

ምሕረትካን   ምድሓንካን   ይምጽኣኒ። 

⁴²ኣብ   ቃልካ   ተወኪለ   እየ   እሞ፡

ነቲ   ዝጸርፈኒ   ምላሽ   ክህቦ   እየ። 

⁴³ንፍርድታትካ   እጽበ   ኣሎኹ   እሞ፡

ነቲ   ቓል   ሓቂ   ኻብ   ኣፈይ   ፈጺምካ   ኣይተግድፈኒ። 

⁴⁴ኣነውን   ንሕግኻ   ኣዘውቲረ፡

ኵሉ   ግዜ፡   ንዘለኣለም   ክሕልዎ   እየ። 

⁴⁵ትእዛዛትካ   ድማ   ደልየ   እየ   እሞ፡

ብገፊሕ   ቦታ   ኽመላለስ   እየ። 

⁴⁶ኣብ   ቅድሚ   ነገስታት   ከኣ   ምስክራትካ   ኽዛረብ፡

ኣይክሓፍርን   ድማ   እየ። 

⁴⁷በቲ   ዘፍቅሮ   ትእዛዛትካውን   ባህ   ክብል   እየ። 

⁴⁸ኣእዳወይ   ድማ   ናብቲ   ዘፍቅሮ   ትእዛዛትካ   ኸልዕል፡

ስርዓታትካ   ኸኣ   ከስተንትን   እየ።

ዝ/መዛ.   ብ/ኪ   ሓ/ኪ

                    ዛይ።

    ⁴⁹ነቲ   ንባርያኻ   ዘተስፎኻዮ   ቓል   ዘክር።

⁵⁰ቃልካ   ህያው   ገይሩኒ   እዩ   እሞ፡

እዚ   ኣብ   መከራይ   መጸናንዕየይ   እዩ። 

⁵¹ትዕቢተኛታት   ኣዝዮም   ኣላገጹለይ፡

ኣነ   ግና   ካብ   ሕግኻ   ኣየግለስኩን። 

⁵²ጐይታየ፡   ናይ   ጥንቲ   ፍርድታትካ   እናሓሰብኩ፡

እጸናናዕ   ኣሎኹ። 

⁵³ብሰሪ   እቶም   ሕግኻ   ዝሓደጉ   ረሲኣን  

ብቑጥዓ   ተቓጸልኩ። 

⁵⁴ኣብ   ቤት   ግሽነተይ   ስርዓታትካ   መዝሙራተይ   እዩ። 

⁵⁵ዎ   እግዚኣብሄር፡   ብለይቲ   ስምካ   ሓሰብኩ፡

ሕግኻውን   ሓሎኹ። 

⁵⁶ትእዛዛትካ   ሓልየ   እየ   እሞ፡   እዚ   ዕድለይ   ኰነ። 

ዝ/መዛ.   ብ/ኪ   ሓ/ኪ

                    ሔት።

    ⁵⁷ጐይታየ፡   ምሕላው   ቃልካ   ግደይ   እዩ፡   በልኩ።

⁵⁸ብምሉእ   ልበይ   ኣባኻ   እምህለል   ኣሎኹ፡

ከም   ቃልካ   ምሓረኒ። 

⁵⁹ንመገደይ   ሓሰብኩ፡

ኣእጋረይውን   ናብ   ምስክራትካ   መለስኩ። 

⁶⁰ትእዛዛትካ   ንምሕላው  

ቀልጠፍኩ   እምበር፡   ኣይደንጔኹን። 

⁶¹ኣግማድ   ረሲኣን   ከበበኒ፡

ሕግኻ   ግና   ኣይረሳዕኩን። 

⁶²ስለቲ   ጻድቕ   ፍርድኻ   ኸመስግነካ፡

ፍርቂ   ለይቲ   ኽትንስእ   እየ። 

⁶³ኣነ   ብጻይ   እቶም   ዝፈርሁኻ   ዅሎምን  

ትእዛዛትካ   ዝሕልዉን   እየ። 

⁶⁴ጐይታየ፡   ምድሪ   ብጸጋኻ   መሊኣ   ኣላ፡

ስርዓታትካ   ምሃረኒ። 

ዝ/መዛ.   ብ/ኪ   ሓ/ኪ

                    ጤት።

    ⁶⁵ዎ   እግዚኣብሄር፡   ከም   ቃልካ   ንባርያኻ   ሰናይ   ገበርካሉ። 

⁶⁶ትእዛዛትካ   ኣሚነ   ኣሎኹ   እሞ፡

ሰናይ   ምስትውዓልን   ፍልጠትን   ምሃረኒ። 

⁶⁷ከይተዋረድኩ   ተጋገኹ፡

ሕጂ   ግና   ቓልካ   እሕሉ   ኣሎኹ። 

⁶⁸ንስኻ   ሰናይ   ኢኻ   እሞ፡   ሰናይ   ትገብር   ኣሎኻ፡

ስርዓታትካ   ምሃረኒ። 

⁶⁹ትዕቢተኛታት   ሓሶት   ይፍሕሱለይ   ኣለዉ፡

ኣነ   ግና   ብምሉእ   ልበይ   ትእዛዛትካ   እሕሉ   ኣሎኹ። 

⁷⁰ልቦም   ከም   ስብሒ   ረጐደ፡

ኣነ   ግና   ብሕግኻ   ባህ   እብል   ኣሎኹ። 

⁷¹ስርዓታትካ   ምእንቲ   ኽምሃር፡

ውርደተይ   ሰናይ   ኰነለይ። 

⁷²ካብ   ኣእላፋት   ወርቅን   ብሩርንሲ   ሕጊ   ኣፍካ   ይሕሸኒ። 

ዝ/መዛ.   ብ/ኪ   ሓ/ኪ

                    ዩድ።

    ⁷³ኣእዳውካ   ገበራንን   ሰርሓንን፡

ትእዛዛትካ   ኽምሃርሲ፡   ኣለብመኒ። 

⁷⁴ንቓልካ   ተጸብየ   እየ   እሞ፡

እቶም   ዝፈርሁኻ   ርእዮምኒ   ኽሕጐሱ   እዮም። 

⁷⁵ጐይታየ፡   ፍርድኻ   ጽድቂ   ምዃኑ፡

ብሓቅኻውን   ከም   ዘዋረድካኒ፡   እፈልጥ   ኣሎኹ። 

⁷⁶ከምቲ   ንባርያኻ   ዝበልካዮ   ቓል፡

ጸጋኻ   መጸናንዒ   ይኹነኒ። 

⁷⁷ሕግኻ   ደስታይ   እዩ   እሞ፡

ብህይወት   ክነብርሲ፡   ምሕረትካ   ይውረደኒ። 

⁷⁸ዕቡያት   ብሓሶት   ጠውዮምኒ   እዮም   እሞ፡   ይሕፈሩ፡

ኣነ   ግና   ትእዛዛትካ   አስተንትን   ኣሎኹ። 

⁷⁹እቶም   ዝፈርሁኻን   ምስክራትካ   ዝፈልጡን  

ናባይ   ይመለሱ። 

⁸⁰ምእንቲ   ኸይሓፍርሲ፡

ልበይ   ብስርዓታትካ   ፍጹም   ይኹን። 

ዝ/መዛ.   ብ/ኪ   ሓ/ኪ

                    ካፍ።

    ⁸¹ነፍሰይ   ንምድሓንካ   ትናፍቖ   ኣላ፡

ንቓልካ   እጽበዮ   ኣሎኹ። 

⁸²መኣዝ   ኢኻ   እተጸናንዓኒ፧   እናበልኩ፡

ብናፍቖት   ቃልካ   ኣዒንተይ   ሓመቓ። 

⁸³ከም   ኣብ   ትኪ   ዘሎ   ሓርቢ   ዀንኩ፡

ስርዓታትካ   ግና   ኣይረሳዕኩን። 

⁸⁴መዓልትታት   ባርያኻ   ኽንደይ   እየን፧  

ንሰጐጕተይከ   መኣዝ   ኢኻ   እትፈርዶም፧ 

⁸⁵እቶም   ከም   ሕግኻ   ዘይነብሩ   ትዕቢተኛታት  

ጕድጓድ   ኰዓቱለይ። 

⁸⁶ኵሉ   ትእዛዛትካ   ሓቂ   እዩ፡

ብዘይ   ምኽንያት   ይሰጉኒ   ኣለዉ፡   ርድኣኒ። 

⁸⁷ካብ   ምድሪ   ኸጥፍኡኒ   ቕሩብ   ተረፎም፡

ኣነ   ግና   ትእዛዛትካ   ኣይሓደግኩን። 

⁸⁸ከም   ጸጋኻ   ህያው   ግበረኒ፡

ኣነውን   ምስክር   ኣፍካ   ኽሕሉ   እየ። 

ዝ/መዛ.   ብ/ኪ   ሓ/ኪ

                    ላሜድ።

    ⁸⁹ዎ   እግዚኣብሄር፡

ቃልካ   ንዘለኣለም   ኣብ   ሰማይ   ጸኒዑ   ኣሎ። 

⁹⁰ሓቅኻ   ኻብ   ወለዶ   ንወለዶ   እዩ፡

ንምድሪ   ኣጽኒዕካያ፡   ንሳውን   ትነብር   ኣላ። 

⁹¹ብዘሎ   ዅሉ   ንኣኻ   የገልግል   እዩ   እሞ፡

ክሳዕ   ሎሚ   ኸም   ሕጋጋትካ   ቘይሙ   ኣሎ። 

⁹²ሕግኻ   ደስታይ   እንተ   ዘይነብርሲ፡

ዛጊት   ብመከራይ   ምጠፋእኩ   ነይረ። 

⁹³ብእኡ   ህያው   ጌርካኒ   ኢኻ   እሞ፡

ንትእዛዛትካ   ከቶ   ኣይክርስዖን   እየ። 

⁹⁴ትእዛዛትካ   ደልየ   እየ   እሞ፡

ናትካ   እየ፡   ኣድሕነኒ። 

⁹⁵ረሲኣን፡   ምእንቲ   ኸጥፍኡኒ፡   ይጸናተውኒ   ኣለዉ፡

ኣነ   ግና   ንምስክራትካ   አስተብህሎ   ኣሎኹ። 

⁹⁶ኵሉ   ፍጽምነት   መወዳእታኡ   ርኤኹ፡

ትእዛዛትካ   ግና   ኣዝዩ   ርሒብ   እዩ። 

ዝ/መዛ.   ብ/ኪ   ሓ/ኪ

                    ሜም።

    ⁹⁷ንሕግኻ   እምብዛ   ኣፍቀርክዎ፡

ምሉእ   መዓልቲ   አስተንትኖ   ኣሎኹ። 

⁹⁸ትእዛዛትካ   ንሓዋሩ   ምሳይ   እዩ   እሞ፡

ሓለፋ   ጸላእተይ   ኣለበመኒ። 

⁹⁹ምስክራትካ   ምስትንታነይ   እዩ   እሞ፡

ሓለፋ   ዅሎም   መምህራነይ   ለባም   ኰንኩ። 

¹⁰⁰ትእዛዛትካ   ሓልየ   እየ   እሞ፡

ሓለፋ   እቶም   ሽማግሌታት   ኣእምሮ   ኣሎኒ። 

¹⁰¹ቃልካ   ምእንቲ   ኽሕሉስ፡

ኣእጋረይ   ካብ   ክፉእ   ዘበለ   መገዲ   ኸልከልኩ። 

¹⁰²ንስኻ   ምሂርካኒ   ኢኻ   እሞ፡

ካብ   ፍርድኻ   ኣይርሕቕን   እየ። 

¹⁰³ቃላትካ   ንትንሓገይ   እምብዛ   ጥዑም   እዩ፡

ንኣፈይ   ካብ   መዓር   ዝበለጸ   ይምቅራ። 

¹⁰⁴ሳላ   ትእዛዛትካ   ኣእምሮ   ረኸብኩ፡

ስለዚ   ዅሉ   መገዲ   ሓሶት   ጸላእኩ። 

ዝ/መዛ.   ብ/ኪ   ሓ/ኪ

                    ኑን።

    ¹⁰⁵ቃልካ   ንእግረይ   መብራህቲ፡ንመገደይ   ብርሃን   እዩ።

¹⁰⁶ንፍርድታት   ጽድቅኻ   ኽሕሉ   መሓልኩ፡

ኣጽናዕክዎ   ኸኣ። 

¹⁰⁷ኣዝየ   ተጨነቕኩ፡

ዎ   እግዚኣብሄር፡   ከም   ቃልካ   ህያው   ግበረኒ። 

¹⁰⁸ዎ   እግዚኣብሄር፡   ፍርድታትካ   ምሃረኒ፡

እቲ   ፈትየ   ዘቕርበልካ   መስዋእቲ   ኣፈይ   ባህ   የብልካ። 

¹⁰⁹ነፍሰይ   ኵሉ   ግዜ   ኣብ   ኢደይ   እያ፡

ኣነ   ግና   ሕግኻ   ኣይርስዕን   እየ። 

¹¹⁰ረሲኣን   መፈንጠርያ   ኣጻውዱለይ፡

ኣነ   ግና   ካብ   ትእዛዛትካ   ኣየግለስኩን። 

¹¹¹ምስክራትካ   ሓጐስ   ልበይ   እዩ   እሞ፡

ንዘለኣለም   ርስተይ   ገበርክዎ። 

¹¹²ስርዓታትካ   ንሓዋሩ   ኽሳዕ   መወዳእታ   ኽገብር፡

ልበይ   ኣድነንኩ።
 

ዝ/መዛ.   ብ/ኪ   ሓ/ኪ

                    ሳሜኽ።

    ¹¹³ክልተ   ዝልቦም   ጸላእኩ፡

ሕግኻ   ግና   ፈቶኹ። 

¹¹⁴ንስኻ   መዕቈብየይን   ዋልታይን   ኢኻ፡

ብቓልካ   ተስፋ   እገብር   ኣሎኹ። 

¹¹⁵ትእዛዛት   ኣምላኸይ   ክሕሉስ፡

ኣቱም   ሕሱማት፡   ካባይ   ርሓቑ። 

¹¹⁶ብህይወት   ክነብርሲ፡   ከም   ቃልካ   ደግፈኒ፡

ብተስፋይ   ድማ   ኣይተሕፍረኒ። 

¹¹⁷ምእንቲ   ኽድሕን   ደግፈኒ፡

ንስርዓታትካውን   ኵሉ   ግዜ   ኽቛመቶ   እየ። 

¹¹⁸ተንኰሎም   ሓሶት   እዩ   እሞ፡

ነቶም   ካብ   ስርዓታትካ   ዘግልሱ   ዅሎም   ትረግጾም። 

¹¹⁹ንስኻ   ንዅሎም   ረሲኣን   ምድሪ  

ኸም   ሓርኢ   ሓጺን   ትጕሕፎም፡

ስለዚ   ንምስክራትካ   ኣፍቀርኩ። 

¹²⁰ካብ   ስምባድካ   እተላዕለ   ስጋይ   ይርዕድ፡

ፍርድኻውን   የሸብረኒ   ኣሎ። 

ዝ/መዛ.   ብ/ኪ   ሓ/ኪ

                    ዓይን።

    ¹²¹ፍርድን   ጽድቅን   እገብር   ኣሎኹ፡

ነቶም   ጠቓዕተይ   ኣሕሊፍካ   ኣይትሃበኒ። 

¹²²ንባርያኻ   ብሰናይ   ተወሓሶ፡

ዕቡያት   ክጠቕዑኒ   ኣይትፍቀደሎም። 

¹²³ኣዒንተይ   ብናፍቖት   ምድሓንካን  

ቃል   ጽድቅኻን   ሓመቓ። 

¹²⁴ከም   ጸጋኻ   ንባርያኻ   ግበረሉ፡

ስርዓታትካ   ኸኣ   ምሃረኒ። 

¹²⁵ኣነ   ባርያኻ   እየ፡

ምስክራትካ   ኽፈልጥሲ፡   ኣእምሮ   ሃበኒ። 

¹²⁶ሕግኻ   ኣፍሪሶም   እዮም   እሞ፡

እግዚኣብሄር   ግብሩ   ዝገብረሉ   ግዜ   እዩ። 

¹²⁷ስለዚ   ንትእዛዛትካ   ኻብ   ወርቂ፡

ካብ   ጽሩይ   ወርቂ   ኣብሊጸ   እፈትዎ   ኣሎኹ። 

¹²⁸ስለዚ   ትእዛዛትካ   ዘበለ   ዅሉ   ቕኑዕ   ምዃኑ   እቘጽሮ፡

መገዲ   ሓሶት   ዘበለ   ኸኣ   እጸልኦ   ኣሎኹ። 

ዝ/መዛ.   ብ/ኪ   ሓ/ኪ

                    ፌ።

    ¹²⁹ምስክራትካ   መስተንክር   እዩ፡

ስለዚ   ነፍሰይ   ትሕልዎ። 

¹³⁰ምኽፋት   ቃልካ   የብርህ፡

ንገርህታት   ኣእምሮ   ይህብ። 

¹³¹ትእዛዛትካ   ናፊቐ   እየ   እሞ፡

ኣፈይ   ሃህ   ኣቢለ   እህህ   እብል   ኣሎኹ። 

¹³²ከምቲ   ነቶም   ስምካ   ዝፈትዉ   እትገብረሎም፡

ተመለሰንን   ምሓረንን። 

¹³³ንስጕምተይ   ኣብ   ቃልካ   ኣጽንዓዮ፡

እከይ   ድማ   ከቶ   ኣይምለኸኒ። 

¹³⁴ካብ   መጥቃዕቲ   ሰብ   ተበጀወኒ፡

ኣነውን   ትእዛዛትካ   ኽሕሉ   እየ። 

¹³⁵ገጽካ   ንባርያኻ   ኣብርሃሉ፡

ስርዓታትካ   ኸኣ   ምሃረኒ። 

¹³⁶ሕግኻ   ኣይሕልዉን   እዮም   እሞ፡

ኣዒንተይ   ወሓዚ   ማይ   የፍስሳ   ኣለዋ። 

ዝ/መዛ.   ብ/ኪ   ሓ/ኪ

                    ጻዴ።

    ¹³⁷ዎ   እግዚኣብሄር፡   ንስኻ   ጻድቕ   ኢኻ፡

ፍርድኻ   ድማ   ቅኑዕ   እዩ። 

¹³⁸ብጽድቅን   ብዕዙዝ   ሓቅን   ምስክራትካ   ኣዘዝካ። 

¹³⁹ተጻረርተይ   ቃልካ   ረሲዖም   እዮም   እሞ፡

ቅንኣተይ   ይበልዓኒ   ኣሎ። 

¹⁴⁰ቃልካ   ኣዝዩ   ጽሩይ   እዩ፡

ባርያኻውን   የፍቅሮ   ኣሎ። 

¹⁴¹ኣነ፡   ንኡስን   ንዑቕን   እየ፡

ትእዛዛትካ   ግና   ኣይረሳዕኩን። 

¹⁴²ጽድቅኻ   ናይ   ዘለኣለም   ጽድቂ   እዩ፡

ሕግኻውን   ሓቂ   እዩ። 

¹⁴³መከራን   ሽጋርን   ረኸበኒ፡

ትእዛዛትካ   ግና   ደስታይ   እዩ። 

¹⁴⁴ምስክራትካ   ንዘለኣለም   ጽድቂ   እዩ፡

ኣእምሮ   ሃበኒ   እሞ፡   ብህይወት   ክነብር   እየ። 

ዝ/መዛ.   ብ/ኪ   ሓ/ኪ

                    ቆፍ።

    ¹⁴⁵ብምሉእ   ልበይ   እምህለል   ኣሎኹ

ዎ   እግዚኣብሄር፡   ምለሰለይ፡

ስርዓታትካ   ኽሕሉ   እየ። 

¹⁴⁶ናባኻ   ተማህለልኩ፡   ኣድሕነኒ፡

ምስክራትካውን   ክሕሉ   እየ። 

¹⁴⁷ቅድሚ   ወጋሕታ   መጺአ   ኣእወኹ፡

ንቓልካ   እጽበ   እኔኹ። 

¹⁴⁸ንቓልካ   ኸስተንትንሲ፡

ኣዒንተይ   ነቶም   ናይ   ለይቲ   ሓለውቲ   ቐደማኦም። 

¹⁴⁹ከም   ሳህልኻ   ድምጸይ   ስማዕ፡

ዎ   እግዚኣብሄር፡   ከም   ፍርድኻ   ህያው   ግበረኒ። 

¹⁵⁰ንሕሰም   ዝስዕቡ   ይቐርቡ   ኣለዉ፡

ካብ   ሕግኻ   ረሓቑ። 

¹⁵¹ዎ   እግዚኣብሄር፡   ቀረባ   ኢኻ፡

ኵሉ   ትእዛዛትካ   ኸኣ   ሓቂ   እዩ። 

¹⁵²ንዘለኣለም   ከም   ዝመስረትካዮ፡

ካብ   ጥንቲ   ጀሚረ   ብምስክራትካ   ፈለጥኩ። 

ዝ/መዛ.   ብ/ኪ   ሓ/ኪ

                    ሬሽ።

    ¹⁵³ሕግኻ   ኣይረሳዕኩን   እሞ፡

መከራይ   ርኢኻ   ኣናግፈኒ። 

¹⁵⁴ጠበቓይ   ኩን   እሞ   ተበጀወኒ፡

ከም   ቃልካ   ህያው   ግበረኒ። 

¹⁵⁵ረሲኣን   ስርዓታትካ   ኣይደልዩን   እዮም   እሞ፡

ምድሓንካ   ኻብኦም   ረሓቐ። 

¹⁵⁶ዎ   እግዚኣብሄር፡ርህራሀኻ   ዓብዪ   እዩ፡

ከም   ፍርድኻ   ህያው   ግበረኒ። 

¹⁵⁷ሰጐጕተይን   ተጻረርተይን   ብዙሓት   እዮም፡

ኣነ   ኻብ   ምስክራትካ   ኣየግለስኩን። 

¹⁵⁸ቃልካ   ኣይሕልዉን   እዮም   እሞ፡

ንጠለምቲ   ርእየ   ፈንፈንክዎም። 

¹⁵⁹ዎ   እግዚኣብሄር፡   ንትእዛዛትካ   ኸም   ዘፍቅሮ   ርኤ፡

ከም   ሳህልኻ   ህያው   ግበረኒ። 

¹⁶⁰ብዘሎ   ቓልካ   ሓቂ   እዩ፡

ኵሉ   ፍርዲ   ጽድቅኻ   ድማ   ንዘለኣለም   ይነብር።

ዝ/መዛ.   ብ/ኪ   ሓ/ኪ

                    ሲን። 

    ¹⁶¹መሳፍንቲ   ብዘይ   ምኽንያት   ሰጐጉኒ፡

ልበይ   ግና   ቃልካ   እዩ   ዝፈርህ። 

¹⁶²ከምቲ   ብዙሕ   ምርኮ   ዝማረኸ፡

ብቓልካ   ባህ   ይብለኒ   ኣሎ። 

¹⁶³ንሓሶት   እጸልኦን   እፍንፍኖን፡

ንሕግኻ   ግና   አፍቅሮ   ኣሎኹ። 

¹⁶⁴ስለ   ጽድቂ   ፍርድኻ  

ኣብ   መዓልቲ   ሾብዓተ   ሳዕ   አመስግነካ   ኣሎኹ። 

¹⁶⁵እቶም   ሕግኻ   ዘፍቅሩ   ብዙሕ   ሰላም   ኣለዎም፡

ዘዐንቅፎም   ከኣ   የልቦን። 

¹⁶⁶ዎ   እግዚኣብሄር፡   ንምድሓንካ   ተጸበኽዎ፡

ትእዛዛትካ   ድማ   ገበርኩ። 

¹⁶⁷ነፍሰይ   ንምስክራትካ   ሓለወቶ፡

ኣዝየውን   አፍቅሮ   ኣሎኹ። 

¹⁶⁸ኵሉ   መገደይ   ኣብ   ቅድሜኻ   እዩ   እሞ፡

ትእዛዛትካን   ምስክራትካን   ሓሎኹ። 

ዝ/መዛ.   ብ/ኪ   ሓ/ኪ

                    ታው።

    ¹⁶⁹ዎ   እግዚኣብሄር፡   ኣውያተይ   ኣብ   ቅድሜኻ   ይብጻሕ፡

ከም   ቃልካ   ኣእምሮ   ሃበኒ። 

¹⁷⁰ምህለላይ   ኣብ   ቅድሜኻ   ይብጻሕ፡

ከም   ቃልካ   ኣናግፈኒ። 

¹⁷¹ስርዓታትካ   ምሂርካኒ   ኢኻ   እሞ፡

ከናፍረይ   ምስጋናኻ   ኸፈልፍላ   እየን። 

¹⁷²ኵሉ   ትእዛዛትካ   ጽድቂ   እዩ   እሞ፡

ልሳነይ   ንቓልካ   ኽትነግር   እያ። 

¹⁷³ትእዛዛትካ   ሓርየ   እየ   እሞ፡

ኢድካ   ረዳኢተይ   ትኹን። 

¹⁷⁴ጐይታየ፡   ምድሓንካ   እናፍቕ   ኣሎኹ፡

ሕግኻውን   ደስታይ   እዩ። 

¹⁷⁵ንነፍሰይ   ህያው   ግበራ፡

ንሳ   ኸኣ   ከተመስግነካ   እያ፡

ፍርድታትካውን   ይርድኣኒ። 

¹⁷⁶ከም   ጥፍእቲ   በጊዕ   ተባረርኩ፡

ትእዛዛትካ   ኣይረሳዕኩን   እሞ፡   ንባርያኻ   ድለዮ።

ዝ/መዛ.   ብ/ኪ   ሓ/ኪ

        መበል 120 መዝሙር።  

መዝሙር   ምድያብ።

    ¹ብጸበባይ   ናብ   እግዚኣብሄር   ኣእዌኹ፡

ንሱውን   መለሰለይ። 

²ዎ   እግዚኣብሄር፡   ንነፍሰይ   ካብ   ሓሳዊት   ከንፈር፡

ካብ   ወስላታ   መልሓስ   ኣናግፋ። 

³ኣቲ   ወስላታ   መልሓስ፡   እንታይ   ክህቡኺ፧  

እንታይሲ   ኽውስኹኺ   እዮም፧ 

⁴ናይ   ጅግና   በላሕቲ   ፍላጻ፡   ምስ   ጓህሪ   ሰራው። 

    ⁵ወይለይ፡   ኣብ   ሜሴክ   እሰፍር፡

ኣብ   ማእከል   ድንኳናት   ቄዳር   እነብር   ኣሎኹ። 

⁶ነፍሰይ   ምስቶም   ሰላም   ዝጸልኡ፡   ብዙሕ   ግዜ   ነበረት። 

⁷ኣነስ   ሰላማዊ   እየ፡   ንሳቶም   ግና፡

እንተ   ተዛረብኩ፡   ንውግእ   ይስለፉ   ኣለዉ።

ዝ/መዛ.   ብ/ኪ   ሓ/ኪ

        መበል 121 መዝሙር።            

መዝሙር   ምድያብ።

    ¹ኣዒንተይ   ናብ   ኣኽራን   ኤልዕል   ኣሎኹ።

ረዲኤተይ   ካበይ   እዩ   ዝመጸኒ፧ 

²ረዲኤተይሲ   ኻብቲ   ሰማይን   ምድርን   ዝገበረ  

እግዚኣብሄር   እዩ   ዝመጸኒ። 

    ³ንሱ   ንእግርኻ   ኣየሰናኽልን፡

ሓላዊኻ   ኣይታኸስን። 

⁴እንሆ፡   እቲ   ንእስራኤል   ዝሕሉ  

ኣይታኸስን   ኣይድቅስን   እዩ። 

    ⁵እግዚኣብሄር   ሓላዊኻ   እዩ፡

እግዚኣብሄር   ኣብ   የማነይቲ   ኢድካ   ጽላልካ   እዩ። 

⁶ጸሓይ   ብመዓልቲ፡

ወርሒውን   ብለይቲ   ኣይክወቕዓካን   እዩ። 

    ⁷እግዚኣብሄር   ካብ   እከይ   ዘበለ   ኽሕልወካ፡

ንነፍስኻ   ኽሕልዋ   እዩ። 

⁸እግዚኣብሄር   ካብ   ሕጂ   ንዘለኣለም  

ምውጻእካን   ምእታውካን   ክሕሉ   እዩ።

ዝ/መዛ.   ብ/ኪ   ሓ/ኪ

        መበል 122 መዝሙር።            

መዝሙር   ምድያብ፡   ናይ   ዳዊት።

    ¹ናብ   ቤት   እግዚኣብሄር   ንኺድ፡   ምስ   በሉኒ   ተሓጐስኩ።

    ²ዎ   የሩሳሌም፡   ኣእጋርና   ኣብ   ደጌታትኪ   ቘይመን   ኣለዋ።

³ኣቲ   የሩሳሌም፡

ከም   ንሓድሕዳ   እተጋጠመት   ከተማ   ተሃነጽኪ። 

⁴እቶም   ዓሌታት፡   ናይ   እግዚኣብሄር   ዓሌታት፡

ከምቲ   ምስክር   እስራኤል  

ንስም   እግዚኣብሄር   ክውድሱ   ናብኣ   ይድይቡ። 

⁵ኣብኣ   ዝፋናት   ፍርዲ፡

ዝፋናት   ቤት   ዳዊት   ተነቢሩ   ኣሎ።

    ⁶ንየሩሳሌም   ሰላም   ለምኑላ፡

እቶም   ዘፍቅሩኺ   ኽለምዑ   እዮም። 

⁷ኣብ   ውሽጢ   መካበብያኺ   ሰላም፡

ኣብ   ውሽጢ   ኣዳራሻትኪ   ኸኣ   ልምዓት   ይኹን። 

⁸ስለ   ኣሕዋተይን   ብጾተይን፡   ሰላም   ይዅነልኪ፡   እብል። 

⁹ስለ   ቤት   እግዚኣብሄር   ኣምላኽና   ኢለ፡

ሰናይኪ   እደሊ   ኣሎኹ።

ዝ/መዛ.   ብ/ኪ   ሓ/ኪ

መበል 123 መዝሙር።            

መዝሙር   ምድያብ።

    ¹ኣታ   ኣብ   ሰማያት   እትነብር፡

ኣዒንተይ   ናባኻ   አልዕል   ኣሎኹ። 

²እንሆ፡   ከምቲ   ኣዒንቲ   ባሮት   ናብ   ኢድ   ጐይታኦም፡

ከምቲ   ኣዒንቲ   ገረድ   ናብ   ኢድ   እምቤታ   ዝጥምታ፡

ከምኡውን   ኣዒንትና፡   ንሱ   ኽሳዕ   ዝርሕርሓልና፡

ናብ   እግዚኣብሄር   ኣምላኽና   ይጥምታ   ኣለዋ። 

    ³ምሓረና፡   ንዕቀት   ኣዚና   ጸጊብና   ኢና   እሞ፡

ጐይታየ፡   ምሓረና። 

⁴ነፍስና   ብላግጺ   ሕንቁቓትን   ብንዕቀት   ዕቡያትን  

ኣዝያ   ጸገበት።

ዝ/መዛ.   ብ/ኪ   ሓ/ኪ

        መበል 124 መዝሙር።            

መዝሙር   ምድያብ፡   ናይ   ዳዊት።

    ¹እግዚኣብሄር   ምሳና   እንተ   ዘይነብርሲ፡

—   ይበል   እስራኤል፡— 

²እግዚኣብሄር   ምሳና   እንተ   ዘይነብር፡

ሰብ   ክትንስኡና   ኸለዉ፡ 

³ሓርቖቶም   ኣብ   ልዕሌና   ኽነድድ   ከሎ፡

ሽዑ   ብህይወት   ከሎና   ምወሓጡና፡ 

⁴ሽዑ   ማያት   መጥሓለና፡

ውሒዝ   ብልዕሊ   ነፍስና   ምወሓዘ፡ 

⁵ሽዑ   ዕቡይ   ማያት   ብልዕሊ   ነፍስና   ምሓለፈ   ነይሩ። 

    ⁶እቲ   ንምንጫቶ   ኣስናኖም   ክንከውን   ዘይወፈየና  

እግዚኣብሄር   ይባረኽ። 

⁷ነፍስና   ኸም   ዑፍ   ካብ   መፈንጠራ   ሃዳናይ   ኣምለጠት፡

መፈንጠራ   ተበትከ፡   ንሕናውን   ኣምለጥና። 

    ⁸ረዲኤትና   ብስም   እቲ   ሰማይን   ምድርን   ዝገበረ

እግዚኣብሄር   እዩ።

ዝ/መዛ.   ብ/ኪ   ሓ/ኪ

        መበል 125 መዝሙር።            

መዝሙር   ምድያብ።

    ¹እቶም   ብእግዚኣብሄር   ዝውከሉ   ኸምታ   ዘይትናወጽ፡

ንዘለኣለም   እትነብር   ከረን   ጽዮን   እዮም። 

    ²ኣብ   ዙርያ   የሩሳሌም   ኣኽራን   ኣሎ፡

እግዚኣብሄር   ከኣ   ካብ   ሕጂ   ኽሳዕ   ዘለኣለም  

ኣብ   ዙርያ   ህዝቡ   እዩ። 

³ስለዚ   ጻድቃን   ኣእዳዎም   ናብ   ዓመጻ   ኸይዝርግሑስ፡

በትሪ   ረሲእነት   ኣብ   ርስቲ   ጻድቃን   ኣይነብርን   እዩ። 

⁴ጐይታየ፡   ንሰናያትን   ንቕኑዓት   ልብን   ሰናይ   ግበረሎም። 

⁵ነቶም   ናብ   ጥውጥዋይ   መገዶም   ዘግልሱ   ግና  

እግዚኣብሄር   ምስቶም   ገበርቲ   እከይ   ክሰዶም   እዩ።  

ሰላም   ኣብ   ልዕሊ   እስራኤል   ይኹን።

ዝ/መዛ.   ብ/ኪ   ሓ/ኪ

        መበል 126 መዝሙር።            

መዝሙር   ምድያብ።

    ¹እግዚኣብሄር   ንምሩኻት   ጽዮን   ምስ   መለሶም፡

ከም   ሓለምቲ   ነበርና። 

²ሽዑ   ኣፍና   ብሰሓቕ፡   መልሓስናውን   ብእልልታ   መልአ።  

ሽዑ   ኣህዛብ፡

ነዚኣቶም   እግዚኣብሄር   ዓብዪ   ግብሪ   ገይሩሎም፡   ተባሃሀሉ። 

³እግዚኣብሄር   ዓብዪ   ግብሪ   ገበረልና፡

ንሕናውን   ተሓጐስና። 

    ⁴ዎ   እግዚኣብሄር፡   ከም   ንወሓይዝ   ደቡብ   ጌርካ

ንምሩኻትና   ምለሶም። 

⁵ብንብዓት   ዝዘርኡ   ብእልልታ   ይዓጽዱ። 

⁶ዘርኢ   ተሰኪሙ   ብብኽያት   ይወፍር፡

እንዳእቱ   ተሰኪሙ   ብእልልታ   ይምለስ።

ዝ/መዛ.   ብ/ኪ   ሓ/ኪ

        መበል 127 መዝሙር።            

መዝሙር   ምድያብ፡   ናይ   ሰሎሞን።

    ¹እግዚኣብሄር   ንቤት   እንተ   ዘይሃነጻ፡

ሃነጽቲ   ንኸንቱ   ይጽዕሩ።  

እግዚኣብሄር   ንኸተማ   እንተ   ዘይሓለዋ፡

ሓላዊ   ንኸንቱ   ይነቅሕ። 

²ኣንጊህኩም   ምትንሳእኩም፡

ኣምሲኹም   ምድቃስኩም፡

እንጌራ   ጻዕሪ   ምብላዕኩም   ከንቱ   እዩ፡

እዝስ   ንፍቁራቱ   ደቂሶም   ከለዉ   ይህቦም   እዩ። 

    ³እንሆ፡   ውሉድ   ውህበት   እግዚኣብሄር   እዮም።

ፍረ   ኸርሲ   ኸኣ   ዓስቢ   እዩ። 

⁴ከምቲ   ኣብ   ኢድ   ጅግና   ዘሎ   ፍላጻ፡

ውሉድ   ንእስነት   ከምኡ   እዮም። 

⁵ጕልድባኡ   ብእኦም   ዝመልአ   ሰብኣይ   ብጹእ   እዩ፡

ኣብ   ደገ   ምስ   ጸላእቲ   እንተ   ተዛረቡ፡   ኣይሓፍሩን   እዮም።

ዝ/መዛ.   ብ/ኪ   ሓ/ኪ

        መበል 128 መዝሙር።            

መዝሙር   ምድያብ።

    ¹ንእግዚኣብሄር   ዝፈርህ፡

ብመገዱ   ዝመላለስ   ዘበለ   ሰብ   ብጹእ   እዩ። 

    ²ዕዮ   ኣእዳውካ   ኽትበልዕ   ኢኻ   እሞ፡ብጹእ   ኢኻ፡

ደሓንውን   ክትረክብ   ኢኻ። 

³ሰበይትኻ   ኣብ   ውሽጢ   ቤትካ  

ኸም   ፈራይት   ወይኒ   ኽትከውን።

   ውሉድካ   ኣብ   ዙርያ   መኣድኻ  

ኸም   ተኽሊ   ኣውሊዕ   ክዀኑ   እዮም። 

⁴እንሆ፡   ንእግዚኣብሄር   ዝፈርህ   ሰብ  

ከምዚ   ኢሉ   ኽባረኽ   እዩ። 

    ⁵እግዚኣብሄር   ካብ   ጽዮን   ክባርኸካ፡

ኵለን   መዓልትታት   ህይወትካ   ድማ  

ሰናይ   የሩሳሌም   ክትርኢ   ኢኻ። 

⁶ደቂ   ደቅኻውን   ክትርኢ   ኢኻ።  

ሰላም   ኣብ   ልዕሊ   እስራኤል   ይኹን።

ዝ/መዛ.   ብ/ኪ   ሓ/ኪ       

        መበል 129 መዝሙር።

መዝሙር   ምድያብ።

    ¹ካብ   ንእስነተይ   ጀሚሮም   ብዙሕ   ግዜ   ኣጻበቡለይ፡

—   ይበል   እስራኤል፡—  

²ካብ   ንእስነተይ   ጀሚሮም   ብዙሕ   ግዜ   ኣጻበቡለይ፡

ግናኸ   ኣይሰዓሩንን። 

³ሓረስቶት   ኣብ   ዝባነይ   ሓረሱ፡

ትልምታቶም   ኣንውሑ። 

⁴እግዚኣብሄር   ጻድቕ   እዩ፡

ኣግማድ   ረሲኣን   በተኸ። 

    ⁵ንጽዮን   ዝጸልኡ   ዅላቶም   ይሕፈሩ፡

ንድሕሪትውን   ይመለሱ። 

^6-7ከምቲ   ሳዕሪ   ናሕሲ፡   ዓጻዲ   ኢዱ   መሊኡ   ዘይዓትረሉ፡

መልዓል   እንዳእቲውን   መሊኡ   ዘይሓቑፈሉ፡

ከይዓበየ   ዝሃጕግ   ይኹኑ። 

⁸ሓለፍቲ   መገዲ   ድማ፡

በረኸት   እግዚኣብሄር   ኣብ   ልዕሌኹም   ይኹን፡

ብስም   እግዚኣብሄር   ንባርኸኩም   ኣሎና፡   ኣይብሉን።

ዝ/መዛ.   ብ/ኪ   ሓ/ኪ

        መበል 130 መዝሙር።            

መዝሙር   ምድያብ።

    ¹ዎ   እግዚኣብሄር፡   ካብ   ዓሚቑ   ናባኻ   ኣእወኹ።

²ጐይታየ፡   ድምጸይ   ስማዕ፡

ኣእዛንካ   ናብ   ድምጺ   ምህለላይ   የቕልባ። 

³ዎ   እግዚኣብሄር፡   ኣበሳ   እንተ   ተቘጻጸርካስ፡

ጐይታየ፡   መን   ደው   ክብል   እዩ፧ 

⁴ግናኸ   ምእንቲ   ኽፈርሁኻ፡   ይቕሬታ   ምሳኻ   ኣሎ። 

    ⁵ንእግዚኣብሄር   እጽበ፡   ነፍሰይ   ትጽበ   ኣላ፡

ብቓሉውን   ተስፋ   እገብር   ኣሎኹ። 

⁶ሓለፋ   እቶም   ወጋሕታ   ዝጽበዩ   ሓለውቲ፡

እወ፡   ሓለፋ   እቶም   ወጋሕታ   ዝጽበዩ   ሓለውቲ  

ነፍሰይ   ንእግዚኣብሄር   ትጽበዮ   ኣላ። 

    ⁷ሳህሊ   ኣብ   እግዚኣብሄር፡

ብዙሕ   ምድሓን   ከኣ   ኣብኡ   እዩ   እሞ፡

ዎ   እስራኤል፡   ንእግዚኣብሄር   ተጸበዮ። 

⁸ንሱውን   ንእስራኤል   ካብ   ኵሉ   ኣበሳኡ   ኸድሕኖ   እዩ።

ዝ/መዛ.   ብ/ኪ   ሓ/ኪ

        መበል 131 መዝሙር።            

መዝሙር   ምድያብ፡   ናይ   ዳዊት።

         ¹ዎ   እግዚኣብሄር፡   ልበይ   ኣይተዓበየን፡
ኣዒንተይ   ከኣ   ልዕል   ኣይበላን፡
ኣብ   ዓብይን   ዘየስተውዕሎን   ነገር   ኣይመላለስን። 
²ንነፍሰይ   ኣህዳእክዋ፡   ስቕ   ኣበልክዋ፡
ከም   ጡብ   ዝሓደገ   ሕጻን   ኣብ   ሕቑፊ   ኣዲኡ፡
ነፍሰይ   ከምቲ   ጡብ   ዝሓደገ   ሕጻን   ኣባይ   ከምኡ   እያ። 
    ³ኣታ   እስራኤል፡
ካብ   ሕጂ   ንዘለኣለም   ብእግዚኣብሄር   ተስፋ   ግበር።

ዝ/መዛ.   ብ/ኪ   ሓ/ኪ

        መበል 132 መዝሙር።            

መዝሙር   ምድያብ።

    ¹ዎ   እግዚኣብሄር፡   ንዳዊት   ኵሉ   መከራኡ   ዘክረሉ።

^2-5ንሱ   ንእግዚኣብሄር   ከም   ዝመሓለ፡   ቦታ   እግዚኣብሄር፡

መሕደሪ   ነቲ   ናይ   ያእቆብ   ስልጡን   ክሳዕ   ዝረክብሲ፡

ብሓቂ   ናብ   ድንኳን   ቤተይ   ኣይኣቱን፡

ኣብ   መንጸፍ   ዓራተይ   ኣይድይብን፡

ነዒንተይ   ድቃስ፡

ንዀበሮ   ዓይነውን   ሰለምታ   ኣይህብን፡   ኢሉ

ነቲ   ናይ   ያእቆብ   ስልጡን   ከም   እተመባጽዐ፡   ዘክረሉ። 

    ⁶እንሆ፡   ብዛዕባኣ   ኣብ   ኤፍራታ   ሰማዕና፡

ኣብ   መሮር   ያዓር   ረኸብናያ። 

⁷ናብ   ማሕደሩ   ንእቶ፡

ኣብ   መርገጽ   እግሩ   ንስገድ። 

    ⁸ዎ   እግዚኣብሄር፡   ንስኻን   ታቦት   ሓይልኻን   ተንስእ፡

ናብ   ቦታ   ዕረፍትኻ   ንዓ። 

⁹ካህናትካ   ጽድቂ   ይልበሱ፡

ቅዱሳንካ   ድማ   እልል   ይበሉ። 

¹⁰ምእንቲ   ዳዊት   ባርያኻ   ኢልካ   ገጽ   ቅቡእካ   ኣይትምለስ። 

    ^11-12እግዚኣብሄር   ንዳዊት፡

ካብ   ፍረ   ኸርስኻ   ኣብ   ዝፋንካ   ከቐምጥ   እየ፡

ውሉድካ   ኺዳነይን  

ነቲ   ዝምህሮም   ምስክረይን   እንተ   ሓለዉ፡

ውሉዶም   ድማ   ኣብ   ዝፋንካ  

ንሓዋሩ   ኽቕመጡ   እዮም፡   ኢሉ  

ብሓቂ   መሓለሉ፡   ካብኡ   ኣይክርሕቕን   እዩ። 

¹³እግዚኣብሄር   ንጽዮን   ሓርይዋ   እዩ   እሞ፡

መሕደሪኡ   ኽትከውን   በሃጋ፡ 

¹⁴እዚኣ   ንሓዋሩ   መዕረፊተይ   እያ፡

ብሂገያ   እየ   እሞ፡   ኣብዚኣ   ኽነብር   እየ። 

¹⁵ንሲሳያ   ኣጸቢቐ   ኽባርኾ፡

ንድኻታታ   እንጌራ   ኸጽግቦም   እየ። 

¹⁶ንኻህናታ   ምድሓን   ከልብሶም   እየ፡

ቅዱሳና   ኸኣ   ብሓጐስ   እልል   ክብሉ   እዮም። 

¹⁷ኣብኣ   ቐርኒ   ዳዊት   ከብቍል   እየ፡

ንቕቡአይ   መብራህቲ   ኣዳሎኹ። 

¹⁸ንጸላእቱ   ነውሪ   ኸልብሶም   እየ፡

ኣብ   ልዕሊኡ   ግና   ዘውዲ   ኸንጸባርቕ   እዩ።

ዝ/መዛ.   ብ/ኪ   ሓ/ኪ

        መበል 133 መዝሙር።            

መዝሙር   ምድያብ፡   ናይ   ዳዊት።

    ¹እንሆ፡   ኣሕዋት   ብሓደ   ሓቢሮም   ክነብሩስ፡

ክንደይ   ሰናይን   ክንደይ   ጥዑምን   እዩ። 

²ከምቲ   ኽቡር   ዘይቲ   ኣብ   ርእሲ፡

ኣብ   ጭሕሚ፡   ኣብ   ጭሕሚ   ኣሮን፡

ናብቲ   ዘፈር   ልብሱ   ዝወርድ   እዩ። 

³እግዚኣብሄር   ኣብኣ  

በረኸትን   ህይወትን   ንዘለኣለምን   ኣዚዙ   እዩ   እሞ፡

ከምቲ   ናብ   ኣኽራን   ጽዮን   ዝወርድ   ጠሊ   ሄርሞን   እዩ።

ዝ/መዛ.   ብ/ኪ   ሓ/ኪ

        መበል 134 መዝሙር።            

መዝሙር   ምድያብ።

    ¹እንሆ፡   ኣቱም   ብለይቲ   ኣብ   ቤት   እግዚኣብሄር   እትቘሙ

ኵሉኹም   ባሮት   እግዚኣብሄር፡   ንእግዚኣብሄር   ባርኽዎ። 

²ኣእዳውኩም   ናብ   መቕደሱ   ኣልዕሉ፡

ንእግዚኣብሄር   ከኣ   ባርኽዎ። 

    ³ሰማይን   ምድርን   ዝገበረ   እግዚኣብሄር

ካብ   ጽዮን   ይባርኽካ።

ዝ/መዛ.   ብ/ኪ   ሓ/ኪ

        መበል 135 መዝሙር።            

    ^1-2ሃሌሉያ።

ኣቱም   ባሮት   እግዚኣብሄር፡   ስም   እግዚኣብሄር   ኣመስግኑ፡

ኣቱም   ኣብ   ቤት   እግዚኣብሄር፡

ኣብ   ኣጸድ   ቤት   ኣምላኽና   እትቘሙ፡   ኣመስግንዎ። 

³እግዚኣብሄር   ሰናይ   እዩ   እሞ፡   ኣመስግንዎ።  

ግሩም   እዩ   እሞ፡   ንስሙ   ምስጋና   ዘምሩሉ። 

    ⁴እግዚኣብሄር   ንያእቆብ   ናቱ፡

ንእስራኤል   ከኣ   ጥሪቱ   ክኸውን   ሓረዮ። 

⁵እግዚኣብሄር   ዓብዪ   ምዃኑ፡

ጐይታና   ኣብ   ልዕሊ   ዅሎም   ኣማልኽቲ   ምዃኑ  

እፈልጥ   ኣሎኹ   እሞ፡ 

⁶እግዚኣብሄር   ኣብ   ሰማይን   ምድርን፡

ኣብ   ባሕርን   መዓሙቑን   ዝደለዮ   ዘበለ   ይገብር   እዩ። 

⁷ንግመ   ኻብ   ወሰን   ምድሪ   የልዕሎ፡

ንመባርቕ   ኣብ   ዝናም   ይገብሮ፡

ንንፋስ   ካብ   መዝገቡ   የውጽኦ። 

    ⁸ንበዅሪ   ግብጺ፡   ካብ   ሰብ   ክሳዕ   እንስሳ፡   ወቕዐ።

⁹ዎ   ምስሪ፡   ኣብ   ማእከልኪ፡

ኣብ   ፈርኦንን   ኣብ   ኵሎም   ባሮቱን  

ትእምርትን   ተኣምራትን   ሰደደ። 

^10-11ንዓበይቲ   ኣህዛብ   ወቕዐ፡

ንስልጡናት   ነገስታት   ከኣ፡

ንሲሆን   ንጉስ   ኣሞራውያንን   ንኦግ   ንጉስ   ባሳንን  

ንዅሎም   መንግስታት   ከነኣንን   ቀተለ። 

¹²ምድሮምውን   ንርስቲ   ሃበ፡

ንህዝቡ   እስራኤል   ኣውርሶም። 

    ¹³ዎ   እግዚኣብሄር፡   ስምካ   ንዘለኣለም፡

ኣታ   ጐይታይ፡   ዝኽርኻ   ንውሉድ   ወለዶ   ይነብር። 

¹⁴እግዚኣብሄር   ንህዝቡ   ይብይነሎም   እዩ   እሞ፡

ንባሮቱ   ይርሕርሓሎም። 

    ¹⁵ጣኦታት   ኣህዛብሲ   ብኢድ   ሰብ   እተገብሩ

ብሩርን   ወርቅን   እዮም። 

¹⁶ኣፍ   ኣለዎም፡   ኣይዛረቡን፡

ኣዒንቲ   ኣለዎም፡   ኣይርእዩን፡ 

¹⁷ኣእዛን   ኣለዎም፡   ኣይሰምዑን   እዮም።  

ኣብ   ኣፎም   ድማ   ትንፋስ   የልቦን። 

¹⁸እቶም   ዝገብርዎም  

ዝውከልዎም   ዘበሉ   ኸማታቶም   ክዀኑ   እዮም። 

    ¹⁹ኣቱም   ቤት   እስራኤል፡   ንእግዚኣብሄር   ባርኽዎ፡

ኣቱም   ቤት   ኣሮን፡   ንእግዚኣብሄር   ባርኽዎ፡ 

²⁰ኣቱም   ቤት   ሌዊ፡   ንእግዚኣብሄር   ባርኽዎ፡

ኣቱም   ንእግዚኣብሄር   እትፈርሁ፡

ንእግዚኣብሄር   ባርኽዎ። 

²¹ኣብ   የሩሳሌም   ዝነብር   እግዚኣብሄር   ካብ   ጽዮን   ይባረኽ።  

ሃሌሉያ።

ዝ/መዛ.   ብ/ኪ   ሓ/ኪ

        መበል 136 መዝሙር። 
           

    ¹እግዚኣብሄር   ሰናይ   እዩ   እሞ፡

ምሕረቱ   ንዘለኣለም   ይነብር   እዩ   እሞ፡   ኣመስግንዎ። 

²ምሕረቱ   ንዘለኣለም   ይነብር   እዩ   እሞ፡

ንኣምላኽ   ኣማልኽቲ   ኣመስግንዎ። 

³ምሕረቱ   ንዘለኣለም   ይነብር   እዩ   እሞ፡

ንጐይታ   ጐይተት   ኣመስግንዎ። 

⁴ምሕረቱ   ንዘለኣለም   ይነብር   እዩ   እሞ፡

ነቲ   በይኑ   ዓብዪ   ተኣምራት   ዝገበረ፡ 

⁵ምሕረቱ   ንዘለኣለም   ይነብር   እዩ   እሞ፡

ነቲ   በእምሮ   ንሰማያት   ዝገበረ፡ 

⁶ምሕረቱ   ንዘለኣለም   ይነብር   እዩ   እሞ፡

ነቲ   ንምድሪ   ኣብ   ልዕሊ   ማያት   ዝዘርግሓ፡

⁷ምሕረቱ   ንዘለኣለም   ይነብር   እዩ   እሞ፡

ነቲ   ዓበይቲ   ብርሃናት   ዝገበረ፡ 

⁸ምሕረቱ   ንዘለኣለም   ይነብር   እዩ   እሞ፡

ንጸሓይ   ብመዓልቲ   ዘሰልጠነ፡ 

⁹ምሕረቱ   ንዘለኣለም   ይነብር   እዩ   እሞ፡

ንወርሕን   ከዋኽብትን   ብለይቲ   ዘሰልጠነ፡ 

¹⁰ምሕረቱ   ንዘለኣለም   ይነብር   እዩ   እሞ፡

ነቲ   ንግብጺ   ብበዅሮም   ዝወቕዐ፡ 

¹¹ምሕረቱ   ንዘለኣለም   ይነብር   እዩ   እሞ፡

ንእስራኤል   ከኣ   ካብ   ማእከሎም   ዘውጽአ፡ 

¹²ምሕረቱ   ንዘለኣለም   ይነብር   እዩ   እሞ፡

ብብርቱዕ   ኢድን   ብዝርጉሕ   ቅልጽምን፡ 

¹³ምሕረቱ   ንዘለኣለም   ይነብር   እዩ   እሞ፡

ነቲ   ንባሕሪ   ኤርትራ   ኣብ   ክልተ   ዝመቐለ፡ 

¹⁴ምሕረቱ   ንዘለኣለም   ይነብር   እዩ   እሞ፡

ንእስራኤል   ከኣ   ብማእከላ   ዘሕለፈ፡ 

¹⁵ምሕረቱ   ንዘለኣለም   ይነብር   እዩ   እሞ፡

ንፈርኦንን   ሰራዊቱን   ድማ   ኣብ   ባሕሪ   ኤርትራ   ዘጥሓለ፡ 

¹⁶ምሕረቱ   ንዘለኣለም   ይነብር   እዩ   እሞ፡

ነቲ   ንህዝቡ   ብበረኻ   ኣቢሉ   ዝመርሐ፡ 

¹⁷ምሕረቱ   ንዘለኣለም   ይነብር   እዩ   እሞ፡

ነቲ   ንዓበይቲ   ነገስታት   ዝወቕዖም፡ 

¹⁸ምሕረቱ   ንዘለኣለም   ይነብር   እዩ   እሞ፡

ንስልጡናት   ነገስታት   ከኣ   ዝቐተለ፡

¹⁹ምሕረቱ   ንዘለኣለም   ይነብር   እዩ   እሞ፡

ንሲሆን፡   ንጉስ   ኣሞራውያን፡ 

²⁰ምሕረቱ   ንዘለኣለም   ይነብር   እዩ   እሞ፡

ንኦግ   ንጉስ   ባሳን   ድማ፡ 

²¹ምሕረቱ   ንዘለኣለም   ይነብር   እዩ   እሞ፡

ምድሮምውን   ንርስቲ   ዝሃበ፡

²²ምሕረቱ   ንዘለኣለም   ይነብር   እዩ   እሞ፡

ንእስራኤል   ባርያኡ   ዘረስተየ፡ 

²³ምሕረቱ   ንዘለኣለም   ይነብር   እዩ   እሞ፡

እቲ   ኣብ   ውርደትና   ዝዘከረና፡ 

²⁴ምሕረቱ   ንዘለኣለም   ይነብር   እዩ   እሞ፡

ካብ   መጥቃዕትና   ኸኣ   ዘናገፈና፡ 

²⁵ምሕረቱ   ንዘለኣለም   ይነብር   እዩ   እሞ፡

እቲ   ንዅሉ   ስጋ   ዝምግብ፡ 

²⁶ምሕረቱ   ንዘለኣለም   ይነብር   እዩ   እሞ፡

ንኣምላኽ   ሰማይ   ኣመስግንዎ።

ዝ/መዛ.   ብ/ኪ   ሓ/ኪ

        መበል 137 መዝሙር። 
           

    ¹ኣብ   ጥቓ   ርባታት   ባቢሎን   ተቐመጥና፡

ንጽዮን   ምስ   ዘከርና   በኸና። 

²መሰንቆታትና   ኣብቲ   ኣብኣ   ዘሎ   ዕቦላት   ሰቐልና። 

³እቶም   ዝማረኹና   ናይ   መዝሙር   ቃላት   ካባና   ደለዩ፡

እቶም   ሰቀይትናውን፡   ሓደ   መዝሙር   ጽዮን   ዘምሩልና፡

እናበሉ   ኽንሕጐስ   ለመኑና። 

    ⁴ከመይ   ጌርና   እሞ   መዝሙር   እግዚኣብሄር  

ኣብ   ምድሪ   ጓና   ኽንዝምር፡ 

⁵የሩሳሌመየ፡   እንተ   ረሲዐክስ፡   የማነይቲ   ኢደይ   ትረስዓኒ። 

⁶እንተ   ዘይዘኪረኪ፡

ንየሩሳሌም   ከኣ   ሓለፋ   ዅሉ   ሓጐሰይ   እንተ   ዘይገይረያስ፡

መልሓሰይ   ኣብ   ትንሓገይ   ትጣበቕ። 

    ⁷ዎ   እግዚኣብሄር፡   ነቶም፡   ኣፍርሱ፡

ክሳዕ   መሰረታ   ኣፍርስዋ፡

ዝበሉ   ደቂ   ኤዶም   ብመዓልቲ   የሩሳሌም   ዘክሮም። 

⁸ኣቲ   ኽትዓንዊ   ዘሎኪ   ጓል   ባቢሎን፡

ሕነ   እቲ   ዝገበርክና   ዝፈድየኪ   ምስጉን   እዩ። 

⁹ንሕጻናትኪ   ሒዙ   ኣብ   ከውሒ   ዝጭፍልቖም   ምስጉን   እዩ።

ዝ/መዛ.   ብ/ኪ   ሓ/ኪ

        መበል 138 መዝሙር።            

ናይ   ዳዊት   መዝሙር።

    ¹ብምሉእ   ልበይ   አመስግነካ፡

ኣብ   ቅድሚ   ኣማልኽቲ   ምስጋናኻ   እዝምር። 

²ንቓልካ   ሓለፋ   ዅሉ   ስምካ   ኣዕቢኻዮ   ኢኻ   እሞ፡

ናብ   ቅዱስ   መቕደስካ   ኣቢለ   ኽሰግድ፡

ንስምካውን   ስለ   ሳህልኻን   ሓቅኻን   ኢለ   ኸመስግኖ   እየ። 

³በታ   ዝጸዋዕኩላ   መዓልቲ   መለስካለይ፡

ኣትባዕካኒ፡   ንነፍሰይ   ኣበርታዕካያ። 

⁴ጐይታየ፡   ኵሎም   ነገስታት   ምድሪ፡

ቃላት   ኣፍካ   ሰሚዖም፡   ከመስግኑኻ   እዮም።

⁵ክብሪ   እግዚኣብሄር   ዓብዪ   እዩ   እሞ፡

ብዛዕባ   መገድታት   እግዚኣብሄር   ክዝምሩ   እዮም። 

⁶እግዚኣብሄር   ልዑል   እዩ   እሞ፡   ንትሑት   ይርእዮ፡

ንዕቡይውን   ካብ   ርሑቕ   የለልዮ። 

    ⁷ብማእከል   መከራ   እኳ   እንተ   ኸድኩ፡

ንስኻ   ህያው   ትገብረኒ፡

ኢድካ   ኣብ   ኵራ   ጸላእተይ   ትዝርግሕ፡

የማነይቲ   ኢድካውን   ተድሕነኒ። 

⁸እግዚኣብሄር   ክፍጽመለይ   እዩ፡

ጐይታየ፡   ጸጋኻ   ንዘለኣለም   ይነብር፡

ንተግባር   ኣእዳውካ   ኣይትሕደጎ።

ዝ/መዛ.   ብ/ኪ   ሓ/ኪ

        መበል 139 መዝሙር።            

ንሊቀ   መዘምራን፡   ናይ   ዳዊት   መዝሙር።

    ¹ጐይታየ፡   ንስኻ   መርመርካኒ   ፈለጥካኒውን።

²ንምቕማጠይን   ምትንሳኤይን   ትፈልጦ፡

ንሓሳበይ   ካብ   ርሑቕ   ተስተውዕሎ። 

^3-4ጐይታየ፡   ሓንቲ   ቓል   ኣብ   መልሓሰይ   ከየላስ፡

እንሆ፡   ኵሉ   ትፈልጥ   ኢኻ   እሞ፡

ምኻደይን   ምድቃሰይን   ትምርምር፡

ንብዘሎ   መገደይውን   ኣጸቢቕካ   ትፈልጦ   ኢኻ። 

⁵ብድሕሪትን   ብቕድሚትን   ከበብካኒ፡

ኢድካውን   ኣንበርካለይ። 

⁶እዚ   ፍልጠት   እዚ   ኣዝዩ   ይገርመኒ፡

ልዑል   እዩ፡   ከርክቦ   ኣይክእልን። 

    ⁷ካብ   መንፈስካ   ናበይ   ክኸይድ፡

ካብ   ገጽካስ   ናበይ   ክሃድም   እየ፧ 

⁸ንሰማይ   እንተ   ደይብኩ፡   ንስኻ   ኣብኡ   ኣሎኻ፡

መንጸፈይ   ኣብ   ሲኦል   እንተ   ኣንጸፍኩ፡

እንሆ፡   ንስኻ   ኣብኡ   ኢኻ። 

⁹ኣኽናፍ   ወጋሕታ   እንተ   ወሰድኩ፡

ኣብ   ወሰን   ባሕሪ   እንተ   ተቐመጥኩ፡ 

¹⁰ኣብኡ   ኸኣ   ኢድካ   ኽትመርሓኒ፡

የማነይቲ   ኢድካውን   ክትሕዘኒ   እያ። 

¹¹ጸልማት   ይኸውለኒ፡

ኣብ   ዙርያይ   ዘሎ   ብርሃን   ከኣ   ለይቲ   ይኹን፡   እንተ   በልኩ፡ 

¹²ንኣኻስ   ጸልማት   እኳ   ኣይጽልምተካን፡

ለይቲ   ኸኣ   ከም   መዓልቲ   ትበርህ፡

ጸልማትን   ብርሃንን   ንኣኻ   ሓደ   እዮም። 

    ¹³ንዀላሊተይ   ንስኻ   ፈጢርካየን፡

ኣብ   ከርሲ   ወላዲተይ   ኣሊምካኒ፡ 

¹⁴መስተንክርን   ድንቅን   ጌርካ   ፈጢርካኒ   ኢኻ   እሞ፡

ከማስወካ   እየ፡

ግብርታትካ   መስተንክር   እዩ፡

ነፍሰይውን   ኣጸቢቓ   ትፈልጦ። 

¹⁵ብሕቡእ   ምስ   ተፈጠርኩ፡

ኣብ   ከርሲ   ምድሪ   ምስ   ተኣለምኩ፡

ኣዕጽምተይ   ኣይተኸወላኻን። 

¹⁶ኣዒንትኻ፡   ድቂ   ኸሎኹ፡   ረኣያኒ፡

እተን   ምዱባት   መዓልትታተይ፡   ሓንቲ   እኳ   ኸይነበረት፡

ኵለን   ኣብ   መጽሓፍካ   ተጻሕፋ። 

    ¹⁷ዎ   ኣምላኽ፡   ሓሳባትካ   ንኣይ   ክንደይ   ክቡር   እዩ፡

ቁጽሩስ   ክንደይ   ዓብዪ   እዩ። 

¹⁸እንተ   ቘጸርክዎ፡   ካብ   ሑጻ   ይበዝሕ፡

እንተ   ነቓሕኩ፡   ገና   ምሳኻ   እየ። 

¹⁹ዎ   ኣምላኽ   ንረሲእ   ኰታ   እንተትቐትሎ፡

ኣቱም   ደመኛታት፡   ካባይ   ርሓቑ። 

²⁰ስምካ   ብተንኰል   ይሰምዩ፡

ጸላእትኻ   ከንቱ   ይዛረቡ። 

²¹ዎ   እግዚኣብሄር፡   ነቶም   ጸላእትኻዶ   ኣይጽልኣዮም፧  

ነቶም   ዚትንስኡኻስ   ኣይፈንፍኖም፧ 

²²ፍጹም   ጽልኢ   እጸልኦም፡

ጸላእተይ   እዮም። 

    ²³ዎ   ኣምላኽ፡   መርምረኒ፡

ልበይ   ከኣ   ፍለጥ፡

ፈትነኒ፡   ሓሳበይውን   ፍለጥ። 

²⁴መገዲ   ዓመጻ   እንተ   ኣልዩኒ፡   ርኤ፡

ኣብቲ   ናይ   ዘለኣለም   መገዲ   ምርሓኒ።

ዝ/መዛ.   ብ/ኪ   ሓ/ኪ

        መበል 140 መዝሙር።            

ንሊቀ   መዘምራን፡   ናይ   ዳዊት   መዝሙር።

    ^1-2ዎ   እግዚኣብሄር፡   ካብቲ   እኩይ   ሰብ፡

ካብቲ   ዓመጸኛ   ሰብ   ኣናግፈኒ፡

ካብቶም   ብልቦም   እከይ   ዝህቅኑ፡

ኵሉ   መዓልቲውን   ውግእ   ዘልዕሉ   ሓልወኒ። 

³መልሓሶም   ከም   ኣትማን   የብልሑ፡

ብ   ትሕቲ   ኸናፍሮም   ሕንዚ   ኣፍዑት   ኣሎ።    ሴላ።

    ⁴ዎ   እግዚኣብሄር፡   ካብ   ኣእዳው   ረሲእ   ባልሃኒ፡

ካብ   ዓመጸኛ   ሰብ፡

ካብቶም   ንስጒምተይ   ክሕንኵሉ   ዝህቅኑ   ሓልወኒ። 

⁵ዕቡያት   መፈንጠራን   ገመድን   ሓብኡለይ፡

ኣብ   ጥቓ   መገዲ   መርበብ   ዘርግሑ፡

መድፈና   ኣጻወዱለይ።    ሴላ።

    ⁶ንእግዚኣብሄር፡   ንስኻ   ኣምላኸይ   ኢኻ፡   በልክዎ፡

ዎ   እግዚኣብሄር፡   ንድምጺ   ምህለላይ   ጽን   በሎ። 

⁷ዎ   እግዚኣብሄር፡   ጐይታይ፡   ሓይሊ   ምድሓነይ፡

ብመዓልቲ   ውግእ   ንርእሰይ   ትጋርዳ። 

⁸ዎ   እግዚኣብሄር፡   ከይዕበዩስ፡

ንረሲእ   ትምኒቱ   ኣይትፈጽመሉ፡

   ሃቐናኡ   ኣይተስልጠሉ።    ሴላ።

    ⁹እቶም   ዝኸቡንስ   እከይ   ከናፍሮም   ኣብ   ርእሶም   ይምጻእ።

¹⁰ጒሁር   ፈሓም   ይውደቆም፡

ናብ   ሓዊ፡   ናብቲ   ዘይወጹሉ   ዓሚቑ   ጒድጓድ   ይደርበዮ። 

¹¹ወስላታ   መልሓስ   ዘለዎ   ኣብ   ሃገር   ኣይክቐውምን፡

ንገፋዒ፡   ክሳዕ   ዝወድቕ፡   እከይ   ክሃድኖ   እዩ። 

¹²እግዚኣብሄርሲ   ፍትሒ   ንጭኑቓት፡

ቅንዕና   ኸኣ   ንድኻታት   ከም   ዝገብረሎም፡   እፈልጥ   እየ። 

¹³ብርግጽ፡   ጻድቃን   ንስምካ   ኽማስዉ፡

ቅኑዓት   ኣብ   ቅድሜኻ   ኽነብሩ   እዮም።

ዝ/መዛ.   ብ/ኪ   ሓ/ኪ

        መበል 141 መዝሙር።            

ናይ   ዳዊት   መዝሙር።

     ¹ጐይታየ፡   ናባኻ   አእዊ   ኣሎኹ፡   ቀልጢፍካ   ምጸኒ፡

ክጽውዓካ   ኸሎኹ   ንድምጸይን   ጽን   በሎ። 

²ጸሎተይ   ኣብ   ቅድሜኻ   ኸም   ዕጣን፡

ምልዓል   ኢደይ   ከም   መስዋእቲ   ምሸት   ይኹን። 

    ³ጐይታየ፡   ንኣፈይ   ቀፊር   ግበረሉ፡ደገ   ኸናፍረይ   ሓሉ።

⁴ምስ   ገበርቲ   እከይ   ረሲእነት   ከይገብርሲ፡

ንልበይ   ናብ   ክፍኣት   ኣይተዘምብሎ፡

ኣነውን   ካብቲ   ጥዑም   ብልዖም   ኣይብላዕ። 

    ⁵ጻድቕ   ይውቅዓኒ፡   ለውሃት   እዩ፡   ይዝለፈኒ፡

ዘይቲ   ርእሲ   እዩ፡   ርእሰይ   ኣይእበዮ፡

ጸሎተይ   ገና   ብእከዮም   እዩ። 

⁶ፈረድቶም   ብገደል   ምስ   ጸደፉ፡

ቃላተይ   ጥዑም   ምዃኑ   ኽሰምዑ   እዮም። 

⁷ከምቲ   ሰብ   ንምድሪ   ዝትልሞን   ዝሓርሶን፡

ኣዕጽምትና   ኸምኡ   ኣብ   ኣፍ   ሲኦል   ተበተነ። 

⁸ዎ   እግዚኣብሄር፡   ጐይታየ፡   ኣዒንተይ   ናባኻ   እየን፡

ኣባኻ   እውከል   ኣሎኹ፡   ንነፍሰይ   ኣይትኽዓዋ። 

    ⁹ካብቲ   ዘጻውዱለይ   መጻወድያን

ካብ   መፈንጠራ   ገበርቲ   እከይን   ሓልወኒ። 

¹⁰ኣነ   ኽሓልፍ   ከሎኹስ፡

ረሲኣን   ኣብ   መጻወድያኦም   ይውደቑ።

ዝ/መዛ.   ብ/ኪ   ሓ/ኪ

        መበል 142 መዝሙር።            

ናይ   ዳዊት   መስኪል፡   ኣብ   በዓቲ   ኾይኑ   ዝጸለዮ   ጸሎት።

    ¹ብድምጸይ   ናብ   እግዚኣብሄር   አእዊ፡

ብድምጸይ   ናብ   እግዚኣብሄር   እምህለል   ኣሎኹ። 

²ጓህየይ   ኣብ   ቅድሚኡ   እኽዑ፡

ሽጋረይ   ኣብ   ቅድሚኡ   እነግር። 

³መንፈሰይ   ኣብ   ውሽጠይ   ምስ   ማህመነ፡   መገደይ   ፈለጥካ፡

ኣብታ   ዝሓልፋ   መገዲ   መፈንጠራ   ሓብኡለይ። 

⁴ኣብ   የማን   ጠምት   እሞ   ርኤ፡

ዝፈልጠኒ   የልቦን፡   መዕቈቢ   ሰኣንኩ፡

ንነፍሰይ   ግዲ   ዝገብረላ   የልቦን። 

⁵ዎ   እግዚኣብሄር፡   ናባኻ   ኣእወኹ፡

ንስኻ   መዕቈብየይ፡   ኣብ   ምድሪ   ህያዋን   ግደይ   ኢኻ። 

    ⁶ኣብ   ብዙሕ   መከራ   እየ   ዘሎኹ   እሞ፡   ኣውያተይ   ስማዕ፡

ሓይሎምኒ   እዮም   እሞ፡   ካብ   ሰጐጒተይ   ኣናግፈኒ። 

⁷ንስምካ   ኸማሱስ፡   ንነፍሰይ   ካብ   ማእሰርቲ   ኣውጽኣያ፡

ሰናይ   ክትገብረለይ   ኢኻ   እሞ፡

ጻድቃን   ክኸቡኒ   እዮም።

ዝ/መዛ.   ብ/ኪ   ሓ/ኪ

        መበል 143 መዝሙር።            

ናይ   ዳዊት   መዝሙር።

    ¹ጐይታየ፡   ጸሎተይ   ስማዕ፡   ንምህለላይ   ጽን   በሎ፡

ብሓቅኻን   ብጽድቅኻን   ምለሰለይ። 

²ህያው   ዘበለ   ኣብ   ቅድሜኻስ   ሓደ   እኳ   ጻድቕ   የልቦን   እሞ፡

ምስ   ባርያኻ   ኣብ   ፍርዲ   ኣይትእቶ። 

    ³ጸላኢ   ንነፍሰይ   ይሰጓ፡

ንህይወተይ   ናብ   ምድሪ   ይድርብያ፡

ከምቶም   ቀደም   ዝሞቱ   ኣብ   ጸልማት   የንብረኒ   ኣሎ። 

⁴መንፈሰይ   ኣብ   ውሽጠይ   ይደክም፡

ልበይ   ኣብ   ውሽጠይ   ይስምብድ   ኣሎ። 

    ⁵ናይ   ቀደም   መዓልትታት   እዝክር፡

ኵሉ   ተግባርካ   አስተንትን፡

ግብሪ   ኣእዳውካ   እሓስብ   ኣሎኹ። 

⁶ኣእዳወይ   ናባኻ   እዝርግሕ፡

ነፍሰይ   ከም   ደረቕ   ምድሪ   ትጸምኣካ   ኣላ።    ሴላ።

    ⁷ዎ   እግዚኣብሄር፡   መንፈሰይ   ደኺሙ   እዩ   እሞ፡

ቀልጢፍካ   ምለሰለይ፡

ነቶም   ኣብ   ጒድጓድ   ዝወረዱ   ኸይመስልሲ፡

ገጽካ   ኣይትኸውለለይ። 

⁸ብኣኻ   እውከል   ኣሎኹ   እሞ፡

ኣንጊህካ   ሳህልኻ   ኣስምዓኒ፡

ነፍሰይ   ናባኻ   አልዕል   ኣሎኹ   እሞ፡

እታ   ዝኸዳ   መገዲ   ኣፍልጠኒ። 

⁹ዎ   እግዚኣብሄር፡   ዕቑባኻ   እየ፡

ካብ   ጸላእተይ   ኣናግፈኒ። 

¹⁰ንስኻ   ኣምላኸይ   ኢኻ   እሞ፡   ምግባር   ፍቓድካ   ምሃረኒ፡

ሰናይ   መንፈስካ   ብቕኑዕ   መገዲ   ይምርሓኒ። 

    ¹¹ዎ   እግዚኣብሄር፡   ስለ   ስምካ   ኢልካ   ብህይወት   ኣንብረኒ፡

ብጽድቅኻ   ንነፍሰይ   ካብ   ጸበባ   ኣውጽኣያ። 

¹²ኣነ   ባርያኻ   እየ   እሞ፡   ብሳህልኻ   ንጸላእተይ   ኣጽንቶም፡

ነቶም   ንነፍሰይ   ዘጽብቡላ   ዅሎም   ከኣ   ኣጥፍኣዮም።

ዝ/መዛ.   ብ/ኪ   ሓ/ኪ

        መበል 144 መዝሙር።            

ናይ   ዳዊት ።

    ¹እግዚኣብሄር   እምባይ፡   ነእዳወይ   ውግእ፡

ነጻብዐይ   ድማ   ሰልፊ   ዝመሃረ፡   ይባረኽ። 

²ጸጋይ፡   ዕርደይ፡   እምባይ፡   መድሓንየይ፡

ዋልታይ፡   እቲ   ዝውከሎ፡

ንህዝበይ   ዘግዝኣለይ   ንስኻ   ኢኻ። 

    ³ዎ   እግዚኣብሄር፡   ሰብ   እንታይ   እዩ   እትፈልጦ፧

ወዲ   ሰብከ   እንታይ   እዩ   እትዝክሮ፧ 

⁴ሰብ   ንትንፋስ   ይመስል፡

መዓልትታቱ   ኸም   ዝሓልፍ   ጽላሎት   እየን። 

    ⁵ዎ   እግዚኣብሄር፡   ሰማያትካ   ለጠቕ   ኣቢልካ   ውረድ፡

ነኽራን   ተንክዮ   እሞ፡   ክተክኽ። 

⁶መባርቕ   ኣባርቕ   እሞ፡   በትኖም፡

ፍላጻታትካ   ወርዊርካ   ኣሸብሮም። 

⁷ኣእዳውካ   ኻብ   ላዕሊ   ዘርግሕ፡

ካብ   ብርቱዕ   ማያት፡   ካብ   ኢድ   ውሉድ   ጓና   ኣናግፈኒ። 

⁸ካብቶም   ኣፎም   ጥልመት   ዝዛረቡ፡

የማነይቲ   ኢዶም   ከኣ   የማነይቲ   ሓሶት   ዝዀነት   ባልሃኒ። 

    ⁹ዎ   ኣምላኽ፡   ሓድሽ   መዝሙር   እዝምረልካ፡

ዓሰርተ   ብዘውታሩ   በገና   እውድሰካ   ኣሎኹ። 

¹⁰ንነገስታት   ዲል   ዝሃብካ፡

ንዳዊት   ባርያኻ   ኻብ   ክፉእ   ሰይፊ   ዘድሓንካ   ንስኻ   ኢኻ። 

¹¹ካብ   ኢድ   ውሉድ   ጓና፡   ኣፎም   ጥልመት   ዝዛረብ፡

የማነይቲ   ኢዶም   የማነይቲ   ሓሶት   ዝዀነት፡

ኣናግፈንን   ባልሃንን። 

    ¹²ኣወዳትና   ብጒብዝናኦም   ከም   ነዋሕቲ   ኣትክልቲ   ይኹኑ፡

ኣዋልድና   ኸም   ኣተሃናንጻ   ኣዳራሽ  

እተወቕረ   ኣዕኑድ   ኵርናዕ   ይኹና፡ 

¹³መዓኽንና   በብዓይነቱ   እኽሊ   ይምላእ፡

ኣባጊዕና   ኣብ   መሮርና   ኣሽሓትን   ኣእላፋትን   ይውለዳ፡ 

¹⁴ኣብዑርና   ኣጸቢቖም   ይመንጒዱ፡

ኣብ   ኣደባባያትናስ፡

ምጥሓስን   ምህዳምን   ኣውያትን   ኣይኹን። 

¹⁵ከምዚ   ዝረክብ   ህዝቢ   ብጹእ   እዩ፡

እቲ   እግዚኣብሄር   ዝኣምላኹ   ህዝቢ   ብጹእ   እዩ።

ዝ/መዛ.   ብ/ኪ   ሓ/ኪ

        መበል 145 መዝሙር።            

ናይ   ዳዊት   መዝሙር   ምስጋና።

    ¹ዎ   ኣምላኸይ፡   ንጉሰይ፡   ልዕል   ከብለካ፡

ስምካውን   ንዘለኣለም   ኣለም   ክባርኽ   እየ። 

²ኵሉ   መዓልቲ   ኽባርኸካ፡

ስምካውን   ንዘለኣለመ   ኣለም   ክውድስ   እየ። 

    ³እግዚኣብሄር   ዓብዪ   እዩ   እሞ፡   ምስጋና   ይግብኦ፡

ዕብየቱ   ዘይተመርማሪ   እዩ። 

⁴ካብ   ወልዶ   ንወለዶ   ግብርታትካ   ይንእዱ፡

ስልጡን   ተግባርካውን   የውርዩ። 

    ⁵ንኽቡር   ጌጽ   ግርማኻን   ንመስተንክር   ግብርታትካን  

ከስተንትን   እየ። 

⁶ብዛዕባ   ሓይሊ   እቲ   ዘፍርህ   ግብርታትካ   ኽዛረቡ   እዮም፡

ኣነውን   ዕቤትካ   ኸዘንቱ   እየ። 

⁷መዘከርታ   ዓብዪ   ሳህልኻ   ኸውርዩ፡

ብጽድቅኻውን   እልል   ክብሉ   እዮም። 

⁸እግዚኣብሄር   መሓርን   ርሕሩሕን   እዩ፡

ዓቃልን   ብሳህሊ   ዓብይን   እዩ። 

⁹እግዚኣብሄር   ንዅሉ   ሰናይ   እዩ፡

ርሕራሐኡ   ኸኣ   ኣብ   ኵሉ   ግብርታቱ   እዩ። 

    ¹⁰ዎ   እግዚኣብሄር፡   ኵሉ   ግብርታትካ   ኸማስወካ፡

ቅዱሳንካውን   ክባርኹኻ   እዮም። 

^11-12ግብርታት   ሓይልኻን   ክቡር   ግርማ   መንግስትኻን  

ንደቂ   ሰብ   ምእንቲ   ኸፍልጡ፡

ክብሪ   መንግስትኻ   ኽዛረቡ፡

ስልጣንካውን   ክነግሩ   እዮም። 

¹³መንግስትኻ   መንግስቲ   ዘለኣለም   እያ፡

ግዝኣትካ   ኸኣ   ንውሉድ   ወለዶ   ይነብር። 

¹⁴እግዚኣብሄር   ነቶም   ዝወድቁ   ዅሎም   ይድግፎም፡

ነቶም   ለጠቕ   ዝብሉ   ዅሎም   የልዕሎም። 

¹⁵ኣዒንቲ   ዅሎም   ንኣኻ   ይጽበያ፡

ንስኻውን   በብግዜኡ   ምግቦም   ትህቦም። 

¹⁶ኢድካ   ትኸፍት   እሞ፡

ንህያው   ዘበለ   ዅሉ   ብበረኸት   ተጽግቦ። 

    ¹⁷እግዚኣብሄር   ብዅሉ   መገዱ   ጻድቕ   እዩ፡

ብዅሉ   ግብሩውን   ሕያዋይ   እዩ። 

¹⁸እግዚኣብሄር   ንዝጽውዕዎ   ዅሎም፡

ብሓቂ   ንዝጽውዕዎ   ዅሎም   ቀረባኦም   እዩ። 

    ¹⁹ፍቓድ   እቶም   ዝፈርህዎ   ይፍጽም፡

ኣውያቶም   ይሰምዕ   የድሕኖም   ከኣ። 

²⁰እግዚኣብሄር   ንዘፍቅርዎ   ዅሎም   ይሕልዎም፡

ንዅሎም   ረሲኣን   ግና   የጥፍኦም። 

²¹ኣፈይ   ምስጋና   እግዚኣብሄር   ይዛረብ፡

ኵሉ   ስጋ   ኸኣ   ንቕዱስ   ስሙ   ንዘለኣለም   ኣለም   ይባርኾ።

ዝ/መዛ.   ብ/ኪ   ሓ/ኪ

        መበል 146 መዝሙር።  
          

    ¹ሃሌሉያ።

ነፍሰየ፡   ንእግዚኣብሄር   ኣመስግኒ። 

²ብህይወተይ   ከሎኹ   ንእግዚኣብሄር   ከመስግኖ፡

ክሳዕ   ዘሎኹ   ንኣምላኸይ   ክውድሶ   እየ። 

    ³ብመሳንፍቲ፡በቲ   ኽረድእ   ዘይከኣሎ

ወዲ   ሰብ   ኣይትወከሉ።

 ⁴ትንፋሱ   ይወጽእ፡   ናብ   መሬት   ይምለስ፡

በታ   መዓልቲ   እቲኣ   ሃቐናኡ   ይጠፍእ። 

    ⁵ኣምላኽ   ያእቆብ   ዝረዲኤቱ፡

ተስፋኡ   ኸኣ   ኣብ   እግዚኣብሄር   ኣምላኽ   ዝገበረ   ሰብ  

ብጹእ   እዩ። 

⁶ንሰማይን   ምድርን፡   ንባሕርን   ኣብኡ   ዘሎ   ዅሉን   ዝገበረ፡

ንሓቂ   ኽሳዕ   ዘለኣለም   ዝሕሉ፡ 

⁷ንጥቑዓት   ፍትሒ   ዘውጽኣሎም፡

ንጥሙያት   እንጌራ   ዝህቦም   ንሱ   እዩ፡

እግዚኣብሄር   ንእሱራት   ይፈትሖም። 

    ⁸እግዚኣብሄር   ነዒንቲ   ዕውራት   ይኸፍተን፡

እግዚኣብሄር   ንዝደነኑ   የቕንዖም፡

እግዚኣብሄር   ንጻድቃን   የፍቅሮም፡ 

⁹እግዚኣብሄር   ንስደተኛታት   የዕቁቦም፡

እግዚኣብሄር   ንዘኽታምን   መበለትን   ይኣልዮም፡

ንመገዲ   ረሲኣን   ግና   ይጠዋውያ። 

¹⁰እግዚኣብሄር   ንዘለኣለም   ይነግስ፡

ዎ   ጽዮን፡   ኣምላኽኪ   ንውሉድ   ወለዶ   ይነግስ።  

ሃሌሉያ።

ዝ/መዛ.   ብ/ኪ   ሓ/ኪ

        መበል 147 መዝሙር። 
           

    ¹ሃሌሉያ።

ንኣምላኽና   ብመዝሙር   ምውዳስ   ሰናይ   እዩ፡

ጥዑም   እዩ   እሞ፡   ምስጋና   ይግባእ።

 ²እግዚኣብሄር   ንየሩሳሌም   ይሃንጽ፡

ንስዱዳት   እስራኤል   ይእክብ   ኣሎ። 

³ንልቦም   እተሰብሩ   ይፍውስ፡   ነቑሳሎም   ይዘንን። 

⁴ቁጽሪ   ኸዋኽብቲ   ይቘጽር፡

ንዅላቶም   በብስሞም   ይሰምዮም። 

⁵ጐይታና   ዓብዪ   እዩ፡   ሓይሉ   ብርቱዕ   እዩ፡

ምስትውዓሉ   ወሰን   የብሉን። 

⁶እግዚኣብሄር   ንትሑታት   ይድግፎም፡

ንረሲኣን   ግና   ኣብ   ምድሪ   የውድቖም። 

    ⁷ንእግዚኣብሄር   ብምምሳው   ዘምሩሉ፡

ንኣምላኽና   ውዳሴ   ብመሰንቆ   ዘምሩሉ። 

⁸ነቲ   ንሰማያት   ብደበና   ዘጐልብብ፡

ንምድሪ   ዝናም   ዘዳሉ፡   ናብ   ኣኽራን   ሳዕሪ   ዘብቁል፡ 

⁹ነቲ   ንእንስሳን   ንዝምህለሉ   ጨጫዊት   ኳዃትን  

ዝምግብ   ዘምሩሉ፡ 

¹⁰ንሓይሊ   ፈረስ   ኣይብህጎን፡   በእጋር   ሰብ   ኣይሕጐስን፡

¹እግዚኣብሄር   በቶም   ዝፈርህዎ፡

ንጸጋኡውን   ዝጽበዩ   ይሕጐስ። 

    ^12-13መሃርሃር   መዓጹኺ   ኣጽኒዑ፡

ንደቅኺ   ኣብ   ማእከልኪ   ባሪኽዎም   እዩ   እሞ፡

ዎ   የሩሳሌም፡   ንእግዚኣብሄር   ኣመስግኒ፡

ዎ   ጽዮን፡   ንኣምላኽኪ   ወድሲ። 

¹⁴ኣብ   ወሰናትኪ   ሰላም   ይገብር።  

ብስብሒ   ስርናይ   የጽግበኪ። 

    ¹⁵ትእዛዙ   ናብ   ምድሪ   ይሰድድ፡   ቃሉ   ቐልጢፉ   ይጐዪ።

¹⁶ንበረድ   ከም   ጸምሪ   ይህብ፡

ንኣስሓይታ   ኸም   ሓመዅስቲ   ይብትኖ። 

¹⁷ንበረዱ   ኸም   ርፍራፍ   ይድርብዮ፡

ኣብ   ቅድሚ   ቑሩኸ   መን   ይቐውም፧ 

¹⁸ቃሉ   ይሰድድ   እሞ   የምክኾ፡

ንፋሱ   የንፍስ   እሞ   ማያት   ይውሕዙ። 

¹⁹ቃሉ   ንያእቆብ፡

ስርዓታቱን   ፍርድታቱን   ንእስራኤል   ነገረ። 

²⁰ንኻልኦት   ኣህዛብ   ከምዚ   ከቶ   ኣይገበረሎምን፡

ፍርድታቱ   ኸኣ   ኣይፈለጡን።  

ሃሌሉያ።

ዝ/መዛ.   ብ/ኪ   ሓ/ኪ

        መበል 148 መዝሙር።  
          

    ¹ሃሌሉያ።

እግዚኣብሄር   ካብ   ሰማያት   ኣመስግንዎ፡

ኣብ   ኣርያም   ኣመስግንዎ። 

²ኵሉኹም   መላእኽቱ፡   ኣመስግንዎ፡

ብዘሎኹም   ሰራዊቱ፡   ኣመስግንዎ። 

³ኣትን   ጸሓይን   ወርሕን፡   ኣመስግናኦ፡

ኣቱም   ብሩሃት   ከዋኽብቲ፡   ኣመስግንዎ። 

⁴ኣቱም   ናይ   ሰማየ   ሰማያትን  

ኣብ   ልዕሊ   ሰማያት   ዘሎኹም   ማያትን፡   ኣመስግንዎ። 

    ⁵ንሱ   ኣዚዙ፡   ተፈጢሮም   እዮም   እሞ፡

ንስም   እግዚኣብሄር   የመስግንዎ። 

⁶ንዘለኣለመ   ኣለም   ኣቘሞም፡   ዘይሓልፍ   ሕጊ   ኸኣ   ሃቦም። 

    ⁷ንእግዚኣብሄር   ካብ   ምድሪ   ኣመስግንዎ፡

ኣቱም   ገበላት   ባሕርን   መዓሙቑን   ኵልኹም፡ 

⁸ኣቱም   ሓውን   በረድን   ኣስሓይታን   ግመን  

ቃሉ   እተስልጥ   ህቦብላን፡ 

⁹ኣቱም   ኣኽራንን   ኰረቢትን   ኵልኹም፡

ፈረይቲ   ኣእዋምን   ጽሕድታትን   ኵልኹም፡ 

¹⁰ኣራዊትን   ኵላትኩም   እንስሳን  

ለመም   እትብሉን   ነፈርቲ   ኣዕዋፍን፡ 

¹¹ነገስታት   ምድርን   ኵላትኩም   ኣህዛብን፡

መሳፍንትን   ኵላትኩም   ፈረድቲ   ምድርን፡ 

¹²ኣጕባዝን   ጐራዙትን፡   ዓበይቲ   ምስ   ናኣሽቱ። 

¹³ስሙ   በይኑ   ልዑል   እዩ፡

ግርማኡ   ኣብ   ልዕሊ   ሰማይን   ምድርን   እዩ   እሞ፡

ንስም   እግዚኣብሄር   የመስግንዎ። 

¹⁴ንህዝቡውን   ቀርኒ   ኣልዓለ፡

ስለዚ   ዅሎም   ቅዱሳኑ፡   ደቂ   እስራኤል፡

እቲ   ዝቐርቦ   ህዝቢ፡የመስግኖ   ኣሎ።  

ሃሌሉያ።

ዝ/መዛ.   ብ/ኪ   ሓ/ኪ

        መበል 149 መዝሙር።  
          

    ¹ሃሌሉያ።

ንእግዚኣብሄር   ሓድሽ   መዝሙር፡

ምስጋናኡ   ኸኣ   ኣብ   ማሕበር   ቅዱሳን   ዘምሩ። 

²እስራኤል   ብፈጣሪኡ   ይተሓጐስ፡

ደቂ   ጽዮን   ብንጉሶም   እልል   ይበሉ። 

³ንስሙ   ብሳዕሳዒት   የመስግንዎ፡

ብኸበሮን   በገናን   ይዘምሩሉ። 

    ⁴እግዚኣብሄር   ንህዝቡ   ብሂግዎም   እዩ   እሞ፡

ንትሑታት   ብምድሓን   ይስልሞም። 

⁵ቅዱሳን   ብኽብሪ   ይተሓጐሱ፡

ኣብ   መደቀሲኦም   እልል   ይበሉ። 

^6-9ንሳቶም   ኣብ   ኣህዛብ   ሕነ   ንምፍዳይ፡

ህዝብታት   ከኣ   ንምቕጻዕ፡

   ንነገስታቶም   ብሰንሰለት፡

ንኽቡራቶም   ብመቑሕ   ሓጺን   ንምእሳር፡

ነቲ   ጽሑፍ   ፍርዲ   ኣብኣቶም   ክፍጽምዎስ፡

ምስጋና   እግዚኣብሄር   ኣብ   ጐረሮኦም፡

ክልተ   ዝኣፉ   ሰይፊውን   ኣብ   ኢዶም   ይኹን።  

እዚ   ንዅሎም   ቅዱሳኑ   ኽብሪ   እዩ።  

ሃሌሉያ።

ዝ/መዛ.   ብ/ኪ   ሓ/ኪ

        መበል 150 መዝሙር። 
           

    ¹ሃሌሉያ።

ንኣምላኽ   ኣብ   መቕደሱ   ኣመስግንዎ፡

ኣብ   ጠፈር   ስልጣኑ   ኣመስግንዎ፡ 

²ስለቲ   ግብርታት   ሓይሉ   ኣመስግንዎ።  

ከም   ብዝሒ   ዕቤቱ   ኣመስግንዎ። 

³ብድምጺ   መለኸት   ኣመስግንዎ፡

ብበገናን   መሰንቆን   ኣመስግንዎ፡ 

⁴ብኸበሮን   ብሳዕስዒትን   ኣመስግንዎ፡

ብቓና   ኣውታርን   እምብልታን   ኣመስግንዎ። 

⁵ጭልጭል   ብዝብል   ጸናጽል   ኣመስግንዎ፡

ብጥዑም   ዝደሃዩ   ጸናጽል   ኣመስግንዎ። 

⁶ትንፋስ   ዘለዎ   ዅሉ   ንእግዚኣብሄር   የመስግኖ።  

ሃሌሉያ።